TTDL-ZABTER-18-TSHA-079

ལྟ་སྒོམ་སྤྱོད་པའི་མགུར་མ་བཞུགས།ལྟ་བ་དང་སྒོམ་པ་སྤྱོད་པ་གསུམ། །མཉམ་བཞག་གི་ངོ་བོར་གཅིག་ཏུ་རྫོགས། །འཁོར་འདས་ཀྱི་ཆོས་རྣམས་མ་ལུས་པ། །རང་སྣང་ལས་མི་གཞན་ཚུལ་ཤེས་ནས། །བདེན་ཞེན་གྱི་འཛིན་པ་ཧར་སངས་ཏེ། །ལྟ་བ་ནི་ཁྱབ་བརྡལ་ལྷུན་འབྱམས་ཡིན། །ཡེ་གནས་ཀྱི་ཡེ་ཤེས་ངོ་འཕྲོད་ཅིང་། །གནས་ལུགས་ཀྱི་རང་ཞལ་གསལ་བ་ལ། །འཛིན་ཞེན་དང་བྲལ་བར་ཅོག་བཞག་ན། །སྒོམ་པ་ནི་རང་བྱུང་རྒྱ་ཡན་ཡིན། །རང་བྱུང་གི་ཡེ་ཤེས་ཡེ་ཡིན་ལ། །བཅོས་བསྒྱུར་དང་སྤང་ལེན་བྱ་རྩོལ་དང་། །གཟའ་གཏད་ཀུན་བྲལ་བ་ཤུགས་འབྱུང་ངང་། །སྤྱོད་པ་ནི་མ་བཅོས་བྱུང་རྒྱལ་ཡིན། །ཁྲེགས་ཆོད་ཀྱི་གདམས་པ་ཉམས་ལེན་ཚེ། །འདི་མེད་ཀུན་མུན་པའི་ནགས་ན་དགོན། །ཐོད་རྒལ་གྱི་གདམས་པ་ཉམས་ལེན་ཚེ། །སྣང་བ་ཡི་འོད་གསལ་འཕེལ་སྨིན་ཀུན། །རང་སྣང་ལས་གཞན་མིན་ཐག་ཆོད་དེ། །རང་རིག་གིས་རང་ཞལ་གཟིགས་མོ་རུ། །རང་ཤེས་པ་ལྟ་བ་མཐའ་གྲོལ་ཡིན། །དབྱིངས་ཐིག་གི་རོལ་པ་ལྷུན་གྲུབ་གདངས། །ཤེས་རབ་ཀྱི་མིག་གིས་མཐོང་བ་ཡི། །རང་བབས་སུ་རང་གྲོལ་རང་བྱུང་བ། །སྒོམ་པ་ནི་ཀློང་གྲོལ་ཆེན་པོ་ཡིན། །ཐོབ་ཤོར་དང་བྲལ་བའི་སྣང་ཉམས་ལ། །རེ་དོགས་ཀྱི་དགག་སྒྲུབ་དང་བྲལ་ནས། །རང་བབས་སུ་རྩོལ་མེད་བཞག་པ་ན། །སྤྱོད་པ་ནི་རྩོལ་མེད་བྱུང་རྒྱལ་ཡིན། །དེང་སང་གི་སྒོམ་ཆེན་ཅེར་ལོང་འགས། །གནད་དེ་གསུམ་མ་རྟོགས་ལོག་འཁྲུལ་ནས། །ལྟ་བ་དང་སྒོམ་པ་གཅིག་ཏུ་ལྟ། །སྤྱོད་པ་ནི་ལུས་དང་ངག་ལ་འཁྲུལ། །བྱུང་རྒྱལ་ཞེས་འབྱོར་ཉོག་བག་མེད་སྤྱོད། །དེ་བདེན་ན་ལྟ་སྒོམ་སྤྱོད་པ་གསུམ། །ཡ་བྲལ་བའི་མཁན་པོ་རྣམ་པ་གསུམ། །ཅིས་ཀྱང་ནི་མེད་ཐབས་ཅི་ལ་ཡོད། །དེ་ལྟ་བུའི་བླུན་པོའི་འུར་སྐད་དེ། །ཡུལ་མཁས་པས་ཐོས་ན་ག་ཞ་བྱེད། །བག་མེད་ཀྱི་སྤྱོད་པ་འབྱོར་ཉོག་དེ། །སྤྱིར་སེམས་ཅན་ཀུན་གྱི་ཐུན་མོང་ཡིན། །དེ་ཆོས་པའི་ལམ་དུ་ངས་མི་འདོད། །ཡུལ་མོ་བཙུན་ཆགས་པས་འགུགས་པ་འདི། །སྔགས་བླ་མེད་ཐབས་ལམ་ཞིག་ཡིན་ན། །སྲོག་ཆགས་པའི་སྲིན་བུ་ཡན་ཆད་ཀྱང་། །སྔགས་བླ་མེད་སྤྱོད་པ་ཨ་ལ་ལ། །ངས་བསམ་ཞིང་བསམ་ན་དགོད་རེ་བྲོ། །ངས་བདག་གི་སྤྱོད་ངན་ཆགས་སྦྱོར་འདི། །ཆོས་གསང་སྔགས་ཡིན་སྙམ་ཡོད་རེ་ཀན། །རིག་འཛིན་བདུད་འཇོམས་པས་སོ། །དགེའོ། །དགེའོ། །དགེའོ། །། །