TTDL-ZABTER-18-TSHA-108

གདོད་མའི་གནས་ལུགས་ཀུན་ཏུ་བཟང་པོ་ལ། །མི་ཕྱེད་དད་པའི་སྒོ་ནས་ཕྱག་འཚལ་ལོ། །ཁྱོད་ནི་ངན་འགྲོའི་འཇིགས་པ་ལ་བྲེད་ནས། །ཐར་པ་དོན་དུ་གཉེར་བ་ཞིག་ཡིན་ན། །ཁྱབ་བརྡལ་དོན་གྱི་ལྟ་སྒོམ་ཉམས་སུ་ལོངས། །ཇི་ལྟར་མཚན་མོ་རྨི་ལམ་གནས་སྐབས་སུ། །རང་བཞིན་སྟོང་ཉིད་ནམ་མཁའ་ཡངས་པའི་ཀློང་། །རྒྱ་མཚོའི་ནང་དུ་སྐར་གཟུགས་ཤར་བ་ལྟར། །སྣོད་བཅུད་འདོད་ཡོན་སྣང་བ་སྣ་ཚོགས་པ། །དངོས་པོ་ཐོགས་རེག་གཟུགས་སུ་སྣང་བ་རྣམས། །ཆུ་ཡི་གཟའ་སྐར་ཆུ་ལས་མི་གཞན་བཞིན། །སྣ་ཚོགས་སྣང་བ་རང་གཞི་ལས་མ་གཞན། །དེ་བཞིན་ཉིན་སྣང་བདག་དང་གཞན་སྣང་བ། །ཐམས་ཅད་དངོས་པོ་ཐོགས་རེག་ཅན་སྣང་ཡང་། །དངོས་མེད་ནམ་མཁའ་སྟོང་པའི་རང་བཞིན་ཡིན། །ནམ་མཁའ་ཉིད་དུ་བརྡལ་ཁྱབ་ཆོས་ཉིད་དབྱིངས། །ནམ་མཁའ་མངོན་དུ་གྱུར་བའི་གདིང་ཐོབ་ན། །ལྟ་སྒོམ་ཀུན་གྱི་རྒྱལ་པོ་བླ་ན་མེད། །ཤེས་པ་མིག་སྟེ་མིག་ནི་ཤེས་པ་ཡིན། །རྨི་ལམ་བར་དོའི་མཐོང་མཁན་དག་ལ་ལྟོས། །དེས་ན་འཁོར་འདས་ཐམས་ཅད་རང་སྣང་ཉིད། །ངོ་ཤེས་ངང་དུ་གདིང་ཐོབ་ཞིག་མཛོད་ལ། །ལུས་ངག་གི་བྱ་བ་དགུ་ཕྲུགས་སུ་ཆམ་ཞོག།རྒྱལ་ཁམས་སུ་རྐང་པའི་འཁོར་ལོ་ནི་མ་བསྐོར། །རྩེ་གཅིག་ཏུ་སྙིང་པོའི་བསྒྲུབ་པ་ལ་འབུང་དང་། །མངོན་སངས་རྒྱས་པ་ཡི་འབྲས་བུ་ཞིག་ཐོབ་འོང་། །ཞལ་གདམས་ཀྱི་མཆོག་ནི་དེ་ལས་ཅང་མི་འདུག།ཅེས་པ་འདིའང་གཅོད་པ་རྒྱ་ལིའི་ངོར་བདུད་འཇོམས་རྡོ་རྗེས་སྨྲས་པ་ཡོངས་སུ་དགེ་བར་གྱུར་ཅིག། །།