TTDL-ZABTER-18-TSHA-111

རྗེ་བླ་མ་པདྨ་ཀ་རས་སྐྱོངས། །ཁྱོད་ཞལ་གདམས་དགོས་ཟེར་ཡང་ཡང་བསྐུལ། །དོན་བསྒྲུབ་སྙམ་དོ་གལ་མཆིས་ན་ཡང་། །ང་མི་རྒན་རོ་ཉལ་བསླང་བ་ལ། །དོན་དགོས་མེད་སྡིག་ཆེན་མ་བསྒྲུབ་རེམ། །ཁྱོད་ངེས་པར་འཆི་བ་རྗེས་དྲན་ནས། །ཚེ་གཏན་གྱི་བདེ་བ་དོན་གཉེར་ན། །མིའི་ནང་ནས་ཁྱུ་མཆོག་དམ་པ་ཡིན། །ཚུལ་དེ་ལྟར་སྤྱོད་པའི་གཞིར་བྱས་ཏེ། །སྣང་སྲིད་དང་འཁོར་འདས་ཆོས་སོ་ཅོག།དབྱིངས་སྟོང་ཉིད་ནམ་མཁའི་རང་བཞིན་དུ། །ངང་མངོན་གྱུར་འཇོག་པ་ཁྲེགས་ཆོད་གནས། །ཡུལ་མ་དག་འཁོར་བའི་ཆོས་རྣམས་ཀུན། །ཆོས་དག་དབྱིངས་དྭངས་མར་སྦྱོང་བ་ཡི། །ལམ་ཐོད་རྒལ་མྱུར་ལམ་ལ་སྤྱོད་ནས། །གནས་དབེན་པར་སྙིང་པོའི་བསྒྲུབ་གཞོལ་ན། །ཚེ་འདི་རུ་ཡང་དག་སངས་རྒྱས་ཐོབ། །རྗེ་ན་རོ་པཎ་ཆེན་ཞལ་ན་རེ། །ཚེ་གཅིག་ལ་གྲོང་བསྒྲུབ་བྱེད་པ་ལས། །ཞག་གཅིག་ལ་རི་ཁྲོད་བརྟེན་པ་མཆོག།ཚུལ་དེ་ལྟར་མ་དོར་སེམས་ལ་ཞོག།ཁྱོད་རི་ཁྲོད་དབེན་པ་བརྟེན་བྱས་ནས། །ལོ་བཅུ་གཉིས་ཐོད་རྒལ་བསྒོམ་ནུས་ན། །ཁྱོད་འཇའ་ལུས་འགྲུབ་པར་གདོན་མི་ཟ། །དེ་སེམས་ལ་ཞོག་དང་སྙིང་གཏམ་ཡིན། །མི་ང་ལ་ཞལ་གདམས་དེ་ལས་མེད། །ཅེས་སློབ་བུ་རྣམ་གྲོལ་གྱིས་ཡང་ཡང་ནན་དུ་བསྐུལ་ངོ་མ་བཟོད་པར་རིག་འཛིན་བདུད་འཇོམས་རྡོ་རྗེས་སྨྲས་པའོ། །། །