TTDL-ZABTER-08-NYA-048

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=08 |volumeLetter=NYA |textnuminvol=048 |pdflink=File:TTDL-ZABTER-08-NYA-048.pdf |InitCategories=Dudjom Tersar Project; TTDL-ZABTER-Volume-08-NYA }}

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་དམར་ནག་གི་སྲོག་དབང་རྡོ་རྗེ་ཕ་ལམ་བཞུགས་སོ༔ བརྡ་ཡིག་༠༠༠༠༠༠༤༢༩༔ རྗེ་བཙུན་པདྨ་འབྱུང་གནས་ལ་ཕྱག་འཚལ་ལོ༔ གནོད་སྦྱིན་ཤན་པ་དམར་ནག་གི༔ སྲོག་དབང་རྡོ་རྗེ་ཕ་ལམ་ནི༔ ལག་ཏུ་ལེན་པའི་རིམ་པ་ནི༔ གཏོར་མ་བརྗིད་ལྡན་འཁོར་གྲངས་ཀུན༔ ཚང་བར་བྱས་ཏེ་དམ་ཆུ་བཞག༔ སྐུ་དང་སྲོག་ཡིག་སྔགས་འཁོར་བཅས༔ མཛེས་ཤིང་ཡིད་དུ་འོང་བའི་མདུན༔ མཆོད་པ་བཤམས་ལ་གཞུང་བསྲང་བསྒྲུབ༔ ཡི་དམ་ལྷ་ཡི་དབང་རྫོགས་མཐར༔ ཧོཿགནོད་སྦྱིན་ཆེན་པོ་གཤེགས་སུ་གསོལ༔ དམ་ཚིག་དབང་གིས་སྤྱན་འདྲེན་ནོ༔ གསང་བའི་གནས་འདིར་བཞུགས་སུ་གསོལ༔ ཛ་ཏིཥྛ༔ ཧོཿསྐལ་ལྡན་བུ་རྣམས་ལེགས་པར་ཉོན༔ བཀའ་ཡི་སྲུང་མ་དགོངས་སུ་གསོལ༔ བསྒྲུབ་མཆོག་སྐལ་ལྡན་ལུས་བྱེད་ཅིང་༔ དབྱེར་མེད་བརྩེ་གདུང་སྲུང་མས་མཛོད༔ སྔོན་ཚེ་པདྨའི་སྤྱན་སྔ་རུ༔ བརྒྱུད་འཛིན་སྐྱོང་བར་ཞལ་བཞེས་བཞིན༔ དམ་ཚིག་གཉན་ལ་མ་འདའ་བར༔ དེ་རིང་ཕྱིན་ཆད་སློབ་བུ་དང་༔ དབང་ཆེན་གནོད་སྦྱིན་ཤན་པ་གཉིས༔ དབྱེར་མེད་ལུས་དང་གྲིབ་མ་བཞིན༔ སྐད་ཅིག་མི་འབྲལ་མནའ་ཐོ་མཛོད༔ རྗེས་ཟློས་ནི༔ ས་མ་ཡ་ན་ར་ཀན༔ ན་མོ་གུ་རུ་བུདྡྷ་ཡ༔ དེ་ནས་དམ་ཆུ་ཐོགས་ལ༔ ཧོཿསྐལ་ལྡན་ཁྱོད་ཀྱིས་མཆོད་བསྟོད་མཛོད༔ གནོད་སྦྱིན་ཆེན་པོས་ཕྲིན་ལས་སྒྲུབས༔ བཀའ་འདི་འདའ་དཀའ་རྡོ་རྗེའི་ཚིག༔ ཆུ་འདི་དམ་ཚིག་རྡོ་རྗེའི་ཆུ༔ བསྲུང་ན་ཚེ་གཅིག་མངོན་སངས་རྒྱས༔ ཉམས་ན་བརླག་ཅིང་དམྱལ་བར་ལྟུང་༔ ས་མ་ཡ་ན་ར་ཀན༔ དེ་ནས་སྐུ་གཏད་ལ༔ ཧཱུྃ་ཧྲཱིཿསྣང་སྲིད་དབང་བསྒྱུར་དབང་གི་སྐུ༔ ཕྲིན་ལས་ཐོགས་མེད་དྲག་པོའི་སྐུ༔ དགྲ་དང་བགེགས་ལ་གནོད་པ་སྟེར༔ བསྟན་དགྲའི་སྲོག་གི་ཤན་པ་ཆེ༔ ཁམས་གསུམ་རྣམ་རྒྱལ་མེ་ཁྱུང་ཆིབས༔ སྐལ་ལྡན་བུ་ལ་གཏད་པ་ཡིས༔ གནོད་སྦྱིན་དམར་ནག་འཁོར་བཅས་ལ༔ དབང་བསྒྱུར་དབང་མཆོག་ཐོབ་པར་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ༔ དེ་ནས་སྔགས་འཁོར་ཐོགས་ལ༔ ཧཱུྃ༔ གནོད་སྦྱིན་ཆེན་པོའི་གསུང་གི་སྒྲ༔ ཀྵ་སྒྲས་འཇིག་རྟེན་འཇིགས་པར་བྱེད༔ སྐལ་ལྡན་བུ་ལ་དབང་བསྐུར་རོ༔ གསུང་ལ་དབང་བསྒྱུར་དབང་ཐོབ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ༔ དེ་ནས་ཧཱུྃ་དམར་ཐོགས་ལ༔ ཧཱུྃ༔ ཧཱུྃ་ནི་གནོད་སྦྱིན་ཆེན་པོའི་ཐུགས༔ འཁོར་འདས་ཡོངས་ཀྱི་སྲོག་ཐིག་འདི༔ སྐལ་ལྡན་བུ་ལ་གཏད་པ་ཡིས༔ སྲོག་ལ་དབང་བསྒྱུར་དབང་ཐོབ་ཤོག༔ ཨོཾ་མ་ཧཱ་ཀྲོ་ཏ་རྨ་རུ་རྩེ་གུ་ཎ་ཧྲཱིཿཧཱུྃ་ཕཊ༔ ཙིཏྟ་ཨ་བྷི་ཥིཉྩ༔ དེ་ནས་བྷྱོ་ཡིག་ཐོགས་ལ༔ ཧཱུྃ༔ མ་མོ་གསོད་བྱེད་དམར་མོ་ཡི༔ ཐུགས་སྲོག་ས་བོན་ཡི་གེ་བྷྱོ༔ སྐལ་ལྡན་བུ་ལ་གཏད་པ་ཡིས༔ མ་ཚོགས་སྲོག་ལ་དབང་ཐོབ་ཤོག༔ བྷྱོ་ཨ་བྷི་ཥིཉྩ༔ དེ་ནས་གཏོར་མ་ཐོགས་ལ༔ ཧཱུྃ༔ ཞི་བའི་ལས་མཛད་རྣམ་པར་རྒྱལ༔ རྒྱས་པའི་ལས་མཛད་རྣམ་ཐོས་སྲས༔ དབང་གི་ལས་མཛད་རྟ་མཆོག་དཔལ༔ དྲག་པོའི་ལས་མཛད་མིག་དམར་གཟའ༔ ཕྲིན་ལས་ལྷུན་གྲུབ་གནོད་སྦྱིན་ཆེ༔ སྤྲུལ་འཁོར་བརྒྱད་དང་ཡང་འཁོར་བརྒྱད༔ མངགས་གཞུག་བཀའ་སྡོད་དུང་ཕྱུར་འབུམ༔ ཐུགས་རྗེའི་ཐབས་དང་རྟེན་འབྲེལ་དང་༔ ཆོས་ཉིད་བདེན་པ་མི་བསླུ་བར༔ དམ་ཚིག་དབང་གིས་གཏོར་མར་འདུས༔ སྐལ་ལྡན་བུ་ལ་གཏད་པ་ཡིས༔ དབང་དྲག་གནོད་སྦྱིན་དམར་ནག་དང་༔ སྤྲུལ་འཁོར་བཀའ་སྡོད་བཅས་པ་རྣམས༔ བསྒྲུབ་བརྟེན་ལས་ལ་དབང་འབྱོར་གྱིས༔ སྲོག་དབང་ཡོངས་རྫོགས་ཐོབ་པར་ཤོག༔ རྩ་སྔགས༔ སརྦ་ས་པ་རི་ཝཱ་ར་ཙིཏྟ་ཨ་བྷི་ཥིཉྩ༔ དེ་ནས་ཐུན་རྫས་ཐོགས་ལ༔ ཧཱུྃ༔ བསྟན་དགྲ་སྒྲོལ་ཕྱིར་རྡོ་རྗེའི་མཚོན༔ སྐལ་ལྡན་བུ་ལ་གཏད་པ་ཡིས༔ ཆོས་སྐྱོང་བྲན་དུ་ཁོལ་བ་དང་༔ དགྲ་བགེགས་མ་ལུས་བསྒྲལ་བ་ཡི༔ དྲག་པོ་མཐུ་ཡི་དབང་ཐོབ་ཤོག༔ སརྦ་དྷརྨ་པཱ་ལ་སརྦ་ཀྵེ་ཊ་པཱ་ལ་ས་མ་ཡ་སརྦ་ཨ་བྷི་ཥིཉྩ༔ ས་མ་ཡ༔ ཞེས་མཐའ་རྟེན་གཏད༔ མེ་ཏོག་འཐོར་ཞིང་ཤིས་པ་བརྗོད༔ ཨོ་རྒྱན་མཁན་པོ་པདྨའི་བཀའ་བཞིན་དུ༔ བུད་མེད་མཚོ་རྒྱལ་བདག་གིས་ཡི་གེར་བཀོད༔ བཀའ་སྲུང་སྔགས་བདག་མ་མོའི་ཚོགས་ལ་གཉེར༔ ཐུབ་པར་སྲུངས་ཤིག་བཛྲ་ས་མ་ཡ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་སྔགས་འཆང་བདུད་འཇོམས་རྡོ་རྗེས་གཏེར་ནས་སྤྱན་དྲངས་ཏེ་འབྲོས་ཕུག་མཁའ་འགྲོའི་འདུ་ཁང་དུ་ཤོག་སེར་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།སརྦ་མངྒ་ལཾ།།།།