DJYD-KABUM-04-NGA-005

སྟོན་པ་ཐུབ་པའི་དབང་པོའི་མཛད་པ་བཅུ་གཉིས་ཀྱི་ཚུལ་ལ་ཅུང་ཟད་བསྟོད་པ་དད་སྤྲིན་རྒྱ་མཚོའི་རླབས་ཕྲེང་ཞེས་བྱ་བ།

ཨོཾ་སྭསྟི། དཔག་ཡས་རྣམ་ཐར་ཕུན་སུམ་ཚོགས་མངའ་བས། །རྒྱ་ཆེན་མཛད་པ་ཡོན་ཏན་རྒྱ་མཚོའི་དབྱངས། །རབ་འབྱམས་ཞིང་ཀུན་འགེངས་པར་སྙན་སྒྲོགས་པ། །ཐུབ་དབང་ཁྱོད་ཞབས་པངྨོར་གུས་ཕྱག་འཚལ། །རྨད་བྱུང་བསྐལ་པ་གྲངས་མེད་གསུམ་གྱི་བར། །བསོད་ནམས་ཡེ་ཤེས་ཚོགས་གཉིས་མཐར་ཕྱིན་ནས། །མུ་མེད་རྒྱལ་བ་གཞན་གྱིས་ཡོངས་སྤངས་པའི། །གདུལ་བྱའི་ཞིང་འདི་བཟུང་ལ་ཕྱག་འཚལ་ལོ། །དམ་པ་ཏོག་གྱུར་དགའ་ལྡན་གནས་མཆོག་ཏུ། །རང་གི་ཅོད་པན་མ་ཕམ་དབུར་བཅིངས་ཏེ། །ངོ་མཚར་གཟིགས་པ་ཆེན་པོ་རྣམ་པ་ལྔས། །འཛམ་གླིང་མགོན་དུ་གཤེགས་ལ་ཕྱག་འཚལ་ལོ། །རྒྱལ་པོའི་ཁབ་ཀྱི་ཕོ་བྲང་ཉམས་དགའ་བར། །སྒྱུ་འཕྲུལ་ལྷ་མོ་སྒྱུ་མའི་ཁང་བཟང་ཆེར། །ཡིད་འོང་གླང་ཆེན་ཐལ་དཀར་མཛེས་ལྡན་གྱི། །རྣམ་པས་ལྷུམས་སུ་ཞུགས་ལ་ཕྱག་འཚལ་ལོ། །ལུམྦཱིའི་ཚལ་དུ་རྫུ་འཕྲུལ་ལྟས་བཟང་བཅ ས། །བལྟམས་མ་ཐག་ཏུ་ཚངས་སོགས་ཆེ་རྒུས་མཆོད། །མཚུངས་བྲལ་མི་ཡི་སེང་གེར་ཞལ་གྱིས་བཞེས། །ལྷ་ཡི་ལྷ་རུ་གྱུར་ལ་ཕྱག་（1བ）འཚལ་ལོ། །གཞོན་ནུའི་རོལ་རྩེད་བཟོ་གནས་སྒྱུ་རྩལ་སོགས། །ཀུན་ལས་མཆོག་གྱུར་ངོ་མཚར་སྟོབས་ཁྱད་ཀྱིས། །དྲེགས་ལྡན་སྐྱེ་བོའི་འགྲན་ཟླ་མ་ལུས་པའི། །ཁེངས་པ་ཡུད་ཀྱིས་བཅོམ་ལ་ཕྱག་འཚལ་ལོ། །ཐབས་མཁས་མཛད་པ་འཇིག་རྟེན་ཆོས་མཐུན་ཕྱིར། །གྲགས་འཛིན་མ་སོགས་བཙུན་མོའི་འཁོར་དང་བཅས། །ཕུན་ཚོགས་འདོད་ཡོན་དཔལ་ལ་རོལ་བཞིན་དུ། །ཤཱཀྱའི་རྒྱལ་སྲིད་བསྐྱངས་ལ་ཕྱག་འཚལ་ལོ། ངེས་འབྱུང་རྐྱེན་གྱིས་འཁོར་བར་ཐུགས་བྱུང་སྟེ། །ཁབ་ནས་ཡོངས་གཤེགས་མཆོད་རྟེན་རྣམ་དག་དྲུང་། དབུ་སྐྲ་བྲེགས་ཤིང་ལྷས་ཕུལ་ངུར་སྨྲིག་གསོལ། མངོན་པར་རབ་ཏུ་བྱུང་ལ་ཕྱག་འཚལ་ལོ། །ནཻ་རཉྫ་ནར་མཁའ་ཁྱབ་ཏིང་འཛིན་ལ། །ལོ་དྲུག་མཉམ་པར་བཞག་པས་བསམ་གཏན་བརྙེས། །དཀའ་ཐུབ་ལས་བཞེངས་ལེགས་སྐྱེས་བསྙེན་བཀུར་བཞེས། །བཙོ་སྦྱངས་གཟི་བརྗིད་འབར་ལ་ཕྱག་འཚལ་ལོ། །བྱང་ཆུབ་སྙིང་པོར་གཤེགས་བཞེད་རྩྭ་འཚོང་མཁན། །བཀྲ་ཤིས་ལྡན་ལས་ཀུ་ཤའི་སྟན་བཞེས་ཏེ། །རྡོ་རྗེའི་གདན་གྱི་ཤིང་དྲུང་ལེགས་བཀྲམ་པར། །སྐྱིལ་ཀྲུང་དམ་བཅའ་བརྟན་ལ་ཕྱག་འཚལ་ལོ། །དཔའ་བོ་མངོན་བྱང་ཆུབ་ལ་བདུད་（2ན）སྡེའི་དཔུང་། །མ་བཟོད་ཕྲག་དོག་སྦྱོར་བས་ཐོ་བརྩམས་པར། །མི་གཡོ་བྱམས་ཆེན་ཏིང་འཛིན་དགོངས་པས་བཏུལ། །སྲིད་ལས་རྣམ་པར་རྒྱལ་ལ་ཕྱག་འཚལ་ལོ། །གང་ཚེ་བླ་མེད་ཡེ་ཤེས་ལེགས་བསྐྲུན་པས། །ཞི་བ་མཆོག་གི་བདུད་རྩི་ཡོངས་བརྙེས་ཏེ། །མངོན་པར་སངས་རྒྱས་ས་ཆེན་རབ་ཏུ་གཡོས། །ཁམས་གསུམ་སྣང་བས་ཁྱབ་ལ་ཕྱག་འཚལ་ལོ། །གདུལ་བྱའི་དོན་སླད་ཚངས་དབང་གསོལ་བཏབ་བཞིན། །གནང་བའི་སྐབས་ཕྱེས་ཝ་ར་ཎཱ་སཱིར་གཤེགས། །ལྔ་སྡེ་གཙོ་གྱུར་བརྒྱད་ཁྲི་ལྷའི་འདུས་པར། །བདེན་བཞིའི་ཆོས་ཆར་ཕབ་ལ་ཕྱག་འཚལ་ལོ། །ཕུལ་བྱུང་ཕྲིན་ལས་བསམ་གྱིས་མི་ཁྱབ་པས། །སྐྱེ་འགྲོ་ཇི་སྙེད་ཞི་བའི་སར་བཞག་ནས། །རྩྭ་མཆོག་གྲོང་དུ་གདུལ་བྱའི་མཐའ་གཟིགས་ཏེ། །མྱ་ངན་འདའ་ཚུལ་བསྟན་ལ་ཕྱག་འཚལ་ལོ། མདོར་ན་སྲིད་འདིར་ཕན་དང་བདེ་བ་ཡི། དགེ་ལེགས་དངོས་པོ་གང་ཞིག་མཆིས་པ་ཀུན། སྟོན་མཆོག་རིན་ཆེན་ཁྱོད་ཀྱི་མཐུ་ཁོ་ནར། བཅོས་མིན་ངེསཔ་རྙེད་པས་ཕྱག་འཚལ་ལོ། །བདག་བློ་དང་བས་ཆ་ཙམ་བསྟོད་པ་ལས། །ཡོངས་སྨིན་བསོད་ནམས་གང་དེས་འགྲོ་བ་ཀུན། །སྤངས་རྟོགས་མཐར་ཕྱིན་དོན་གཉིས་（2བ）ལྷུན་གྲུབ་པ། །ཤཱཀྱ་སེང་གེ་ཁྱོད་དང་མཚུངས་པར་ཤོག ། སངས་རྒྱས་རིན་ཆེན་ཉི་མ་ལས་བྱུང་བའི། །དམ་ཆོས་རིན་ཆེན་སྣང་བའི་འཛུམ་ཟེར་གྱིས། །ཚོགས་མཆོག་རིན་ཆེན་པད་ཚལ་རབ་བཞད་ནས། ས་གསུམ་བཀྲ་ཤིས་དཔལ་གྱིས་མཛེས་གྱུར་ཅིག །（ཅེས་པའང་བདག་ཅག་གི་སྟོན་པ་ཐུགས་རྗེ་ཅན་གྱི་ངོ་མཚར་བའི་མཛད་པའི་ཚུལ་ལ་རྒྱུ་མཚན་ཤེས་པའི་མོས་པ་བརྟན་པོ་ཐོབ་པ་ལས། རང་ལོ་ཉེར་བརྒྱད་དུ་སོན་པ་ལྕགས་མོ་ལུག་གི་ལོ་ཆུ་སྟོད་ཟླ་བའི་ཡར་ཚེས་རྒྱལ་བ་ལྷུམས་སུ་ཞུགས་པའི་དུས་བཟང་པོ་ལ་ལྷ་ལྡན་ར་ས་འཕྲུལ་སྣང་གི་གཙུག་ལག་ཁང་ཆེན་པོར་མཐོང་གྲོལ་ཇོ་བོ་ཡིད་བཞིན་ནོར་བུའི་སྤྱན་སྔར་བསོད་ནམས་ཀྱི་ཚོགས་ཆེན་ཀུན་ཏུ་བཟང་པོའི་མཆོད་སྤྲིན་དུ་སྤྲོས་ཏེ་བྱང་ཆུབ་མཆོག་ཏུ་སེམས་བསྐྱེད་པའི་གོ་ཆ་ཡང་དག་པར་བགོས་པའི་ཚེ་མཆོག་ཏུ་བཀའ་དྲིན་དྲན་པས་ཡིད་བསྐུལ་ཏེ་ཤཱཀྱའི་དགེ་བསྙེན་ཁྱིམ་ན་གནས་པ་འཇིགས་བྲལ་ཡེ་ཤེས་རྡོ་རྗེ་དགེ་ལེགས་རྣམ་པར་རྒྱལ་བའི་སྡེས་སྙིང་ནས་གུས་པ་ཆེན་པོས་གསོལ་བ་བཏབ་པ་སྟེ། འདིས་ཀྱང་འགྲོ་བ་ཐམས་ཅད་དེ་བཞིན་གཤེགས་པའི་བྱིན་རླབས་ཀྱི་སྣང་བ་དང་མི་འབྲལ་ཞིང་བསྟན་པའི་སྙིང་པོ་ཡུན་དུ་གནས་པའི་རྒྱུར་གྱུར་ཅིག། །། ）