DJYD-KABUM-05-CA-007

（1ན）（བཀའ་བརྒྱད་གཏེར་ཁ་དགུ་འདུས་ཀྱི་བརྒྱུད་འདེབས་བཞུགས།）ཁྱབ་བདག་ཀུན་བཟང་ཆེ་མཆོག་ཧེ་རུ་ཀ ། རྡོ་རྗེ་ཆོས་རབ་ལས་ཀྱི་དབང་མོ་ཆེ། །གྲུབ་པའི་རིག་འཛིན་ཆེན་པོ་རྣམ་བརྒྱད་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །དཔལ་ཆེན་དངོས་སྣང་པདྨ་ཐོད་ཕྲེང་རྩལ། །ཁྲི་སྲོང་རྗེ་སོགས་བོད་ཀྱི་གྲུབ་ཆེན་དགུ། །གསང་འཛིན་སྨུག་ནག་དབང་གི་མཁའ་འགྲོ་ལ། །གསོལ་བ༴ ཉང་རལ་ཆོས་དབང་རྡོར་གླིང་རྒོད་ལྡེམ་ཅན། །པད་གླིང་བདེ་ཆེན་གླིང་པ་འཇའ་ཚོན་སྙིང་། །ཀློང་གསལ་སྙིང་པོ་མདོ་སྔགས་གླིང་པ་ལ། །གསོལ་བ༴ རྩ་བརྒྱུད་བླ་མ་བཀའ་བབས་འཁོར་ལོའི་མགོན། །ཡི་དམ་ཞི་ཁྲོ་སྒྲུབ་ཆེན་བཀའ་བརྒྱད་ལྷ། །གནས་གསུམ་མཁའ་འགྲོ་དམ་ཅན་ཆོས་སྐྱོང་ལ། །གསོལ་བ༴ དབང་གིས་རྒྱུད་སྨིན་དམ་ཚིག་རྣམ་པར་དག །ལྷར་སྣང་གསལ་བརྟན་བསྐྱེད་པའི་རྣལ་འབྱོར་དང་། །རིམ་པ་ལྔ་ཡི་རྫོགས་རིམ་མཐར་ཕྱིན་ནས། །དངོས་གྲུབ་རྣམ་གཉིས་ཚེ་འདིར་རབ་བརྙེས་ཤིང་། །མངོན་སྤྱོད་དྲག་པོས་མ་རུང་ལོག་འདྲེན་དཔུང་། །ཚར་གཅོད་རྗེས་འཛིན་ཕྲིན་ལས་དབང་ཆེན་འབྱོར། །དོན་གཉིས་（1བ）ལྷུན་གྲུབ་ཕྱོགས་ལས་རྣམ་པར་རྒྱལ། །ཁྲག་འཐུང་སྤྱི་དཔལ་ཆེ་དང་དབྱེར་མེད་ཤོག །（ཅེས་པའང་ཕྲིན་ལས་དཔལ་ཆེན་ཐུགས་ཐིག་གི་ཆ་ལག་ཏུ་འཇིགས་བྲལ་ཡེ་ཤེས་རྡོ་རྗེས་སོ།། །།）