TTDL-ZABTER-02-KHA-002

Previous Text Back to Volume Page Next Text

Wylie title
Location	bdud 'joms gling pa zab gter Volume 2, Text 2, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

༠༠༠༠བརྡ་ཡིག༢༣ཟབ་གསང་མཁའ་འགྲོའི་སྙིང་ཐིག་ལས༔ འཇམ་དཔལ་གསང་བ་འདུས་པའི་དབང་ཆོག་དངོས་གྲུབ་གཏེར་མཛོད་བཞུགས་སོ༔ ༠༠༠༠བརྡ་ཡིག༢༣ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༢༣འཇམ་དཔལ་གསང་འདུས་སྒྱུ་འཕྲུལ་ལྷའི༔ དབང་ཆོག་དངོས་གྲུབ་གཏེར་མཛོད་འདི༔ ལག་ཏུ་ལེན་པའི་རིམ་པ་ལ༔ དཀྱིལ་འཁོར་བཀོད་ལེགས་དབང་ཆས་མཛེས་པར་བཀྲམ༔ བསྙེན་སྒྲུབ་གཞུང་བསྲང་བསྒྲུབ་པ་གནད་ལྡན་བྱ༔ སྐབས་འདིར་སྟ་གོན་རིམ་པ་སྔོན་སོང་ནས༔ དེ་རྗེས་དད་དམ་ལྡན་པའི་བུ་སློབ་ལ༔ ཁྲུས་བྱ་བགེགས་བསྐྲད་སྲུང་བའི་འཁོར་ལོ་བསྒོམ༔ དེ་ནས་གསོལ་བ་འདེབས་པ་ནི༔ ཀྱཻ༔ ཡེ་ཤེས་རྡོ་རྗེ་མི་ཟད་པ༔ འཇིག་རྟེན་འཇིགས་བྱེད་མཚོན་ཆ་ཅན༔ ཁྱེད་ལ་སྐྱབས་མཆི་གསོལ་བ་འདེབས༔ བདག་ཅག་འཁོར་བ་ལས་སྒྲོལ་ཕྱིར༔ ཐར་པ་ཆེན་པོའི་གྲོང་ཁྱེར་དུ༔ ཁྱེད་ཀྱིས་གནང་སྟེ་བཏང་དུ་གསོལ༔ དེ་ནས་སློབ་དཔོན་གྱིས་ལན་བཏབ་པ་ནི༔ ཁྱེད་ཅག་སུ་ཡིན་འདོད་པ་གང༔ ལས་དང་སྐལ་བ་ལྡན་ནམ་ཅི༔ ངེས་པར་ཡང་དག་སྒོར་ཞུགས་ཏེ༔ ཐར་པའི་གྲོང་དུ་འཇུག་ནུས་སམ༔ དེ་ནས་སློབ་མས་ལན་བཏབ་པ་ནི༔ རིགས་ཀུན་ཁྱབ་བདག་བླ་མ་དང་༔ ལྷ་དང་དཀྱིལ་འཁོར་སྤངས་ནས་ནི༔ སྐྱབས་དང་སྐྱོབ་པ་གཞན་མེད་པས༔ སྒོ་ཕྱེས་ཐར་བའི་གྲོང་བསྟན་འཚལ༔ བླ་མས་ལན་བཏབ་པ་ནི༔ ཧོཿལས་སྨོན་རྟེན་འབྲེལ་ཟབ་མོའི་མཐུས༔ ཁྱོད་ནི་སྣོད་ལྡན་སྐྱེས་བུ་ལགས༔ ཁྱོད་ཀྱི་འདོད་དོན་ངས་སྦྱིན་གྱིས༔ དགའ་སྤྲོ་བསྐྱེད་ལ་འདི་རུ་ཤོག༔ ཅེས་ནང་དུ་འདུས་ཤིང་མདུན་དུ་འཁོད༔ ལོ་རྒྱུས་བརྗོད་ཅིང་མཎྜལ་ཕུལ༔ དེ་ནས་མིག་དར་སྦྱིན་པ་ནི༔ ཀྱེ་ཧོ་སྐལ་ལྡན་རིགས་ཀྱི་བུ༔ འཁྲུལ་སྣང་དབྱིངས་སུ་འགོག་བྱས་ཏེ༔ ཡེ་ཤེས་ལྷར་སྣང་མངོན་བྱེད་ཕྱིར༔ དར་གྱིས་གདོང་གཡོགས་འདི་སྦྱིན་ཟུངས༔ ཨོཾ་ཙཀྵུ་བནྡྷ་ཝ་ར་མ་ཎ་ཡེ་སྭཱ་ཧཱ༔ དེ་ནས་མེ་ཏོག་སྦྱིན་པ་ནི༔ ཀྱེ་ཧོ་སྐལ་ལྡན་རིགས་ཀྱི་བུ༔ ཚེ་རབས་སྔོན་ནས་ལྷག་པའི་ལྷ༔ ངོས་བཟུང་ཕྱིར་ན་མེ་ཏོག་སྦྱིན༔ ལྷ་དང་མཇལ་བའི་ཕྱག་རྟེན་མཛོད༔ ཨ་ཁཾ་ཝི་ར་ཧཱུྃ༔ དེ་ནས་གསོལ་བ་འདེབས་པ་ནི༔ ཧོཿཁྱབ་བདག་འཁོར་ལོའི་མགོན་པོ་བླ་མ་རྗེ༔ བདག་ཅག་སྲིད་པའི་མཚོ་ལས་སྒྲོལ་བའི་ཕྱིར༔ ཕྱི་ནང་གསང་བའི་དབང་མཆོག་དམ་པ་ཡིས༔ སྒོ་གསུམ་རྡོ་རྗེ་གསུམ་དུ་སྨིན་པར་མཛོད༔ ལན་གསུམ༔ དེ་ནས་སྐྱབས་སེམས་ཡན་ལག་བདུན་པ་རྣམས་རིམ་བཞིན་དམིགས་པ་གནད་དང་ལྡན་པའི་ངང་ནས་རྗེས་ཟློས་གཞུང་བཞིན་ལེགས་པར་གྲུབ་པར་བྱ༔ དེ་ནས་སྡོམ་སེམས་དམ་བཅའ་བཟུང་ཞིང་རྗེས་ཟློས་ནི༔ བདག་གིས་དེང་བཟུང་བྱང་ཆུབ་མ་ཐོབ་བར༔ མགོན་པོ་འཇམ་དབྱངས་སྐྱབས་ཀྱི་དམ་པར་འཛིན༔ སྐུ་གསུང་ཐུགས་དང་རྩ་བ་ཡན་ལག་གི༔ དམ་ཚིག་སྡོམ་པ་རྟག་ཏུ་བསྲུང་བར་བགྱི༔ ལན་གསུམ་བརྗོད་པ་དང་༔ དེ་ནས་དམ་ཆུ་སྦྱིན་པ་ལ༔ ཧཱུྃ༔ རྡོ་རྗེ་ཁྲོ་བོ་གནོད་སྦྱིན་གྱི༔ གསང་བའི་བཅུད་ཀྱི་ཡང་སྙིང་སྟེ༔ འདི་ནི་དམ་ཚིག་རྡོ་རྗེའི་ཆུ༔ སློབ་མ་ཁྱོད་ཀྱི་ལྕེ་ལ་བཞག༔ དེ་རིང་ཕྱིན་ཆད་བུ་ཁྱོད་ཀྱིས༔ དམ་ཚིག་སྲོག་གི་གཏའ་རུ་བཞག༔ མི་འདའ་རྡོ་རྗེའི་དམ་བཅའ་ཟུངས༔ ཞེས་དམ་ཆུ་ལྕེ་ལ་བཞག་པས་འོད་ཕུང་ཁ་དོག་སྣ་ཚོགས་པའི་རྣམ་པར་འགྱུར་ཏེ་སྙིང་གི་དཀྱིལ་དུ་སོང་བ་ལས༔ ཀུན་རྫོབ་བྱང་ཆུབ་སེམས་ཀྱི་ངོ་བོ་རྡོ་རྗེ་སྔོན་པོ་འོད་འབར་བའི་ལྟེ་བར་དོན་དམ་བྱང་ཆུབ་སེམས་ཀྱི་ངོ་བོ་ཐིག་ལེ་ཁ་དོག་ལྔ་ལྡན་ཨ་ཡིག་མཐིང་གས་མཚན་པ་ཅན་ཞིག་ཏུ་གྱུར་ཏེ་དམ་ཚིག་གཉན་པོའི་སྲོག་ཐོབ་པར་བསྒོམ༔ ཞེས་རྩ་བ་དང་ཡན་ལག་གི་དམ་ཚིག་གཉན་པོའི་སྲོག་ཐོབ་ནས་སྐད་ཅིག་ཀྱང་མི་འདའ་བར་བསམ་ལ་འདིའི་རྗེས་ཟློས་མཛོད༔ ས་མ་ཡ༔ ན་ར་ཀན༔ ཡང་དཀྱིལ་འཁོར་དུ་འཇུག་པའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད༔ ཀྱཻ༔ མགོན་པོ་འཇམ་དབྱངས་ལྷ་ཚོགས་དང་༔ དུས་གསུམ་རྒྱལ་བ་སྲས་བཅས་དགོངས༔ སྒོ་བ་ཆེན་པོ་ཁྱེད་རྣམས་ཀྱིས༔ ཚད་མེད་བཞི་ཡི་སྒོ་ཕྱེས་ལ༔ ཡེ་ཤེས་བཞི་ཡི་རང་ཞལ་སྤྲོད༔ སྐུ་དང་ཡེ་ཤེས་མངོན་གྱུར་མཛོད༔ ལན་གསུམ་མཐར༔ ས་མ་ཡ་པྲ་བེ་ཤ་ཡ་ཕཊ༔ ཅེས་བརྗོད་པ་ཙམ་གྱིས་དཀྱིལ་འཁོར་གྱི་སྒོ་ཤག་གིས་ཕྱེས་པར་བསམ་ལ༔ ཤར་སྒོ་ནས་འཇུག་ཅིང་ཕྱག་བྱེད་པའི་མོས་པ་བྱས་ཏེ༔ ན་མོ་བཛྲ་མཉྫུ་ཤྲཱི་ཡེ་ཧཱུྃ༔ ལྷོ་སྒོ་ནས་ཕྱག་བྱས་ཏེ༔ ན་མོ་རཏྣ་མཉྫུ་ཤྲཱི་ཡེ་ཏྲཱཾ༔ དེ་ནས་ནུབ་སྒོ་ནས་ཕྱག་བྱས་ཏེ༔ ན་མོ་པདྨ་མཉྫུ་ཤྲཱི་ཡེ་ཧྲཱི༔ བྱང་སྒོ་ནས་ཕྱག་བྱས་ཏེ༔ ན་མོ་ཀརྨ་མཉྫུ་ཤྲཱི་ཡེ་ཨཱཿཡང་ཤར་སྒོ་ནས་ཕྱག་བྱས་ཏེ༔ ན་མོ་བུདྡྷ་མཉྫུ་ཤྲཱི་ཡེ་ཨོཾ༔ དེ་ལྟར་ཕྱག་བྱས་པས་སྒྲིབ་གཉིས་བག་ཆགས་ཐམས་ཅད་སངས་ཀྱིས་དག་ནས་དཀྱིལ་འཁོར་གྱི་ཤར་སྒོར་དབང་སྟེགས་པདྨ་འདབ་བརྒྱད་ཟླ་བའི་གདན་ལ་འཁོད་པར་བསམ༔ དེ་ནས་གཙོ་བོའི་ཐུགས་ཀ་ནས་འོད་འཕྲོས་པས་སློབ་མའི་རྣམ་སྨིན་ཤ་ཁྲག་གི་ཕུང་པོ་དངོས་མེད་དུ་སྦྱངས་ཏེ་སྟོང་པར་གྱུར༔ རྣམ་པར་ཤེས་པ་དྷཱི༔ ཡིག་དམར་སེར་འོད་འབར་བ་ཞིག་ཏུ་གྱུར་ཏེ་མེ་སྟག་ཡར་བ་བཞིན་དུ་གཙོ་བོའི་ཞལ་དུ་ཞུགས་ཏེ་སྐུའི་དབྱིབས་བརྒྱུད་ཅིང་ཡུམ་གྱི་པདྨོ་ནས་ཞུགས་ཏེ་རྩིབ་ལོག་གཡོན་ནས་ཐོན་པས་འཇམ་དཔལ་དམར་སེར་གྱི་སྐུ་མཚན་དང་དཔེ་བྱད་ཀྱིས་བརྒྱན་པ་ཞིག་ཏུ་གྱུར་ཏེ་སྲས་ཀྱི་རྣམ་པར་སྔར་གྱི་པད་ཟླའི་གདན་ལ་འཁོད་པར་སྒོམ་པའི་གནས་གསུམ་དུ་འབྲུ་གསུམ་དང་༔ བདག་ཉིད་འཇམ་དཔལ་ཡབ་ཡུམ་གྱི་གནས་གསུམ་འབྲུ་གསུམ་ལས་འོད་འཕྲོས་པས༔ དུས་གསུམ་རྒྱལ་བའི་སྤྱི་གཟུགས་མགོན་པོ་འཇམ་པའི་དབྱངས་ལ་སོགས་པ་ཕྱོགས་བཅུའི་རྒྱལ་བ་སྲས་དང་བཅས་པ་མ་ལུས་ཤིང་ལུས་པ་མེད་པ་སྤྱན་དྲངས་ཏེ་མཚོ་ལ་ཁ་ཆར་བབས་པ་ལྟར་སློབ་མ་ལྷར་གསལ་བ་ལ་སིབ་སིབ་ཏུ་ཐིམ་པས་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་ཤིང་འཕོས་པར་བསམ་ལ༔ སྤྱན་འདྲེན་གཞུང་ལྟར་འདོན་ཅིང་ཡེ་ཤེས་པ་དབབ་པར་བྱའོ༔ ཨོཾ་ན་མོ་མཉྫུ་ཤྲཱི་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛ༔ ཨ་བེ་ཤ་ཡ་ཨ་ཨ༔ ཡེ་ཤེས་པ་དབབ་པ་དེ་ཉིད་ཇི་སྲིད་སངས་མ་རྒྱས་བྱང་མ་ཆུབ་ཀྱི་བར་དུ་གནས་ཤིང་བརྟན་པར་གྱུར་ཅིག༔ ཨོཾ་ཀཱ་ཡ་བཛྲ་ཏིཥྛ༔ ཝཱཀ་བཛྲ་ཏིཥྛ༔ ཙིཏྟ་བཛྲ་ཏིཥྛ༔ གུ་ཎ་བཛྲ་ཏིཥྛ༔ ཀརྨ་བཛྲ་ཏིཥྛ༔ ས་མ་ཡ་ལྷན༔ དེ་ནས་མེ་ཏོག་དོར་བ་ནི༔ ཧཱུྃ༔ དཀོན་མཆོག་གསུམ་གྱི་བྱིན་རླབས་དང་༔ རྡོ་རྗེ་ཐེག་པའི་བདེན་སྟོབས་ཀྱིས༔ སློབ་མའི་རིག་པའི་མེ་ཏོག་འདི༔ སྔོན་ནས་ལས་འཕྲོ་གང་ཡོད་པའི༔ ལྷག་པའི་ལྷ་ཡི་རིགས་ལ་ཕོག༔ ཨོཾ་བཛྲ་པུཥྤེ་པྲ་ཏཱིཙྪ་ཡེ་སྭཱ་ཧཱ༔ མེ་ཏོག་དབུས་སུ་བབ་ན་བུདྡྷ་རིགས་ཀྱི་རྟེན་དང་བརྟེན་པ་ཐམས་ཅད་སྤྱི་བོར་ཐིམ་པས་བསམ་ལ༔ མིང་ལ་སངས་རྒྱས་གར་དབང་༔ སངས་རྒྱས་འོད་ཟེར༔ ལྷུན་གྲུབ་རྒྱ་མཚོ་ཞེས་གསོལ་ལོ༔ ཤར་དུ་བབ་ན་རྡོ་རྗེ་རིགས་ཀྱི་རྟེན་དང་བརྟེན་པ་ཐམས་ཅད་སྤྱི་བོར་ཐིམ་པར་བསམ་ལ༔ མིང་ལ་རྡོ་རྗེ་འོད་ཟེར༔ མི་འགྱུར་རྡོ་རྗེ༔ ཞི་བ་བཟང་པོ་ཞེས་གསོལ་ལོ༔ ལྷོ་རུ་བབ་ན་རིན་ཆེན་རིགས་ཀྱི་རྟེན་དང་བརྟེན་པ་ཐམས་ཅད་སྤྱི་བོར་ཐིམ་པར་བསམ་ལ༔ མིང་ལ་རིན་ཆེན་དཔལ་འབར༔ རིན་ཆེན་དཔལ་ལྡན༔ རིན་ཆེན་དཔལ་རྒྱས་ཞེས་གསོལ་ལོ༔ ནུབ་ཏུ་བབ་ན་པདྨ་རིགས་ཀྱི་རྟེན་དང་བརྟེན་པ་ཐམས་ཅད་སྤྱི་བོར་ཐིམ་པར་བསམ་ལ༔ མིང་ལ་པདྨ་རྒྱལ་པོ༔ པདྨ་དྲི་མེད༔ པདྨ་དབང་རྒྱལ་ཅེས་གསོལ་ལོ༔ བྱང་དུ་བབ་ན་ལས་ཀྱི་རིགས་ཀྱི་རྟེན་དང་བརྟེན་པ་ཐམས་ཅད་སྤྱི་བོར་ཐིམ་པར་བསམ་ལ༔ མིང་ལ་ཀརྨ་དོན་འགྲུབ༔ ཕྲིན་ལས་དཔལ་འབར༔ མངོན་སྤྱོད་གྲུབ་པ་ཞེས་མངའ་གསོལ་ལོ༔ མ་འོངས་པ་ན་རིགས་དེ་བསྒྲུབ་ན་དངོས་གྲུབ་ཐོབ་ཅིང་ཞིང་ཁམས་གང་ཡིན་པ་དེ་རུ་མངོན་སངས་རྒྱས་པར་འགྱུར་རོ༔ ཞེས་ལུང་བསྟན་ནོ༔ དེ་ནས་གདོང་གཡོགས་དཀྲོལ་བ་ནི༔ ཧཱུྃ༔ ཀ་དག་གདོད་མའི་མགོན་པོའི་ཞལ༔ སྒྲིབ་བྱེད་མ་རིག་ཉོན་ཤེས་སྒྲིབ༔ ཡེ་ཤེས་འོད་ཀྱིས་རབ་བསལ་ཏེ༔ སྐུ་དང་ཡེ་ཤེས་མངོན་གྱུར་མཛོད༔ ཨོཾཛྙཱ་ན་ཙཀྵུ་པྲ་བེ་ཤ་ཡ་ཕཊ༔ ཅེས་བསལ༔ དེ་ནས་དཀྱིལ་འཁོར་ངོ་སྤྲོད་པ་ནི༔ ཀྱེ་ཧོ་སྐལ་ལྡན་རིགས་ཀྱི་བུ༔ ཁྱོད་ཀྱི་སྒྲིབ་གཉིས་དྲི་མ་སངས༔ རང་སྣང་ཡེ་ཤེས་དཀྱིལ་འཁོར་འདིར༔ ལྟོས་ལ་རྣམ་གསུམ་དད་པ་བསྐྱེད༔ དངོས་གྲུབ་ཐམས་ཅད་ངང་གིས་འཐོབ༔ དམ་ཚིག་སྔགས་ལ་རྟག་བརྩོན་མཛོད༔ སླར་ཡང་དབང་ལྷ་སྤྱན་དྲང་བ་ནི༔ རང་ཉིད་ལྷར་གསལ་བའི་གནས་གསུམ་འབྲུ་གསུམ་ལས་འོད་ཟེར་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་མ་ལུས་ཤིང་ལུས་པ་མེད་པ་ཐམས་ཅད་སྤྱན་དྲངས་ལ༔ ཨོཾབཛྲ་ཨརྒྷཾ་སོགས་ཀྱིས་མཆོད་ཅིང་སྐུ་གསུང་ཐུགས་ཀྱི་བསྟོད་པ་བྱས་མཐར༔ ཧོཿདུས་གསུམ་བདེ་གཤེགས་ཐམས་ཅད་ཀྱི༔ ཉེ་བའི་སྲས་མཆོག་སེམས་དཔའ་ལ༔ འགྲོ་བ་སྐྱོབ་པའི་ཆེད་དུ་དབང་༔ ཡོན་ཏན་འབྱུང་གནས་ཇི་ལྟར་བསྩལ༔ དེ་ལྟར་འདི་ལ་སྩལ་དུ་གསོལ༔ ཅེས་གསོལ་བ་བཏབ་པས་ཐུགས་དམ་གྱི་རྒྱུད་རབ་ཏུ་བསྐུལ་ཏེ༔ བདེ་གཤེགས་ཞི་བ་རྣམས་ཀྱིས་དགོངས་པ་མཛད༔ དབང་ཕྱུག་ཡུམ་ཆེན་རྣམས་ཀྱིས་དབང་བསྐུར༔ བྱང་ཆུབ་སེམས་དཔའ་རྣམས་ཀྱིས་ཤིས་པ་བརྗོད༔ སེམས་མ་རྣམས་ཀྱིས་གླུ་གར་བསྒྱུར༔ ཁྲོ་བོ་རྣམས་ཀྱིས་བགེགས་བསྐྲད༔ ཁྲོ་མོ་རྣམས་ཀྱིས་བར་ཆད་བསལ་ཏེ་ཀུན་ཀྱང་དབང་གི་བྱ་བ་ལ་དགྱེས་པར་གྱུར༔ དེ་ནས་བུམ་པ་ཐོགས་ལ༔ ཨོཾ༔ རྣམ་ཤེས་ཞེ་སྡང་རྣམ་དག་དབྱིངས༔ མེ་ལོང་ཡེ་ཤེས་ངོ་བོ་ཉིད༔ ཞེ་སྡང་མེ་གསོད་ཆུ་ཡི་དབང་༔ དཔལ་ལྡན་ཐུགས་ཀྱི་དབང་བསྐུར་རོ༔ ཧཱུྃ་བཛྲ་ཨ་བྷི་ཥིཉྩ་ཨཱཿདེ་ནས་དབུ་རྒྱན་བསྐོན་ལ༔ ཧཱུྃ༔ ཚོར་ཕུང་ང་རྒྱལ་གནས་དག་དབྱིངས༔ མཉམ་ཉིད་ཡེ་ཤེས་ངོ་བོ་ཉིད༔ རིན་ཆེན་དབུ་རྒྱན་འདི་བསྐོན་པས༔ དཔལ་ལྡན་ཡོན་ཏན་དབང་ཐོབ་ཤོག༔ སརྦ་རཏྣ་ཨ་བྷི་ཥིཉྩ་ཨཱཿདེ་ནས་རྡོ་རྗེ་ཐོགས་ལ༔ ཧཱུྃ༔ འདུ་ཤེས་འདོད་ཆགས་རྣམ་དག་དབྱིངས༔ སོར་རྟོག་ཡེ་ཤེས་ངོ་བོ་ཉིད༔ ཆགས་པ་བྲལ་བའི་རྡོ་རྗེ་འདིས༔ དཔལ་ལྡན་གསུང་གི་དབང་ཐོབ་ཤོག༔ ཨཱཾ་པདྨ་ཨ་བྷི་ཥིཉྩ་ཨཱཿདེ་ནས་དྲིལ་བུ་གཏད་ལ༔ ཧཱུྃ༔ འདུ་བྱེད་ཕྲག་དོག་རྣམ་དག་དབྱིངས༔ བྱ་གྲུབ་ཡེ་ཤེས་ངོ་བོ་ཉིད༔ ཕྲག་དོག་གཞོམ་བྱེད་དྲིལ་བུ་འདིས༔ དཔལ་ལྡན་ཕྲིན་ལས་དབང་ཐོབ་ཤོག༔ ཧཱ་ཀརྨ་ཨ་བྷི་ཥིཉྩ་ཨཱཿདེ་ནས་རྣམ་པར་སྣང་མཛད་ཀྱི་སྐུ་ཐོགས་ལ༔ ཧཱུྃགཟུགས་ཕུང་གཏི་མུག་རྣམ་དག་དབྱིངས༔ ཆོས་དབྱིངས་ཡེ་ཤེས་ངོ་བོ་ཉིད༔ རྣམ་པར་སྣང་མཛད་མིང་གི་དབང་༔ དཔལ་ལྡན་སྐུ་ཡི་དབང་ཐོབ་ཤོག༔ ཨོཾ་བུདྡྷ་ཨ་བྷི་ཥིཉྩ་ཨཱཿདེ་ནས་རྡོ་རྗེ་སློབ་དཔོན་གྱི་དབང་ནི༔ ཧཱུྃ༔ ཐབས་དང་ཤེས་རབ་གཉིས་སུ་མེད༔ སྣང་སྟོང་གཉིས་མེད་རྡོ་དྲིལ་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ འཆད་རྩོད་རྩོམ་སོགས་གང་འདུལ་གྱི༔ ཐུགས་རྗེ་ཐབས་ཚུལ་སྒོ་དུ་མས༔ འགྲོ་ཀུན་རྗེས་སུ་བཟུང་བར་མཛོད༔ དེ་ནས་དཀྱིལ་འཁོར་གྱི་ལྷ་ཚོགས་གཙོ་བོའི་ཐུགས་ཆོས་ཉིད་ཀྱི་ཀློང་ལྷུན་གྲུབ་རིན་པོ་ཆེའི་མཛོད་ལས་དབང་རྫས་རྣམས་རིམ་བཞིན་དུ་བྱུང་ནས་སློབ་མའི་སྒོ་གསུམ་རྡོ་རྗེ་གསུམ་གྱི་རོལ་པར་སྨིན་ཅིང་གྲོལ་བར་བསམ༔ དེ་ནས་གཙོ་བུམ་ཐོགས་ལ༔ ཧཱུྃ༔ བུམ་པ་ལྷུན་གྲུབ་གཞལ་ཡས་ཁང་༔ ནང་ན་འཇམ་དཔལ་ལྷ་ཚོགས་རྣམས༔ མ་བཙལ་ཡོངས་གྲུབ་ཆེན་པོར་བཞུགས༔ སྐལ་ལྡན་བུ་ལ་དབང་བསྐུར་བས༔ བུམ་དབང་ཡོངས་རྫོགས་རབ་ཐོབ་ཤོག༔ རྩ་སྔགས་དང་༔ ཀཱ་ཡ་ཨ་བྷི་ཥིཉྩ་ཨོཾ༔ སླར་ཡང་དཀྱིལ་འཁོར་གྱི་ལྷ་ཚོགས་རྣམས་ལས་རིམ་བཞིན་དུ་ལྷ་རང་འདྲ་བ་རེ་འཕྲོས་ནས་སློབ་མ་ལ་ཐིམ་པར་བསམ་ལ༔ འཇམ་དཔལ་གཙོ་བོ་ཡབ་ཡུམ་གྱི་སྐུ་ཐོགས་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ཇི་ལྟ་ཇི་སྙེད་ཡེ་ཤེས་སྐུ༔ མཁྱེན་བརྩེ་ནུས་པའི་བདག་ཉིད་དཔལ༔ འཇམ་དཔལ་ཡབ་ཡུམ་དབང་བསྐུར་རོ༔ མ་རིག་མུན་པ་དྲུང་འབྱིན་ཏེ༔ ཡེ་ཤེས་སྐུ་ཉིད་མངོན་གྱུར་ཤོག༔ རྩ་སྔགས་དང་༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འཇམ་དཔལ་དཀར་པོ་ཡབ་ཡུམ་གྱི་སྐུ་ཐོགས་ལ༔ ཧཱུྃ༔ བཅོམ་ལྡན་མཁྱེན་རབ་དབང་པོ་ཡི༔ ཐུགས་གསང་སྟོང་གསལ་ཡེ་ཤེས་ཀྱི༔ ངོ་བོ་ཐབས་ཀྱི་སྐུར་སྣང་བ༔ འཇམ་དབྱངས་དྲི་མེད་གསལ་ཁྱབ་དང་༔ དབྱངས་ཅན་མ་ཡི་དབང་བསྐུར་རོ༔ མ་རིག་སྒྲིབ་པ་དྲུང་འབྱིན་ནས༔ ཡེ་ཤེས་སྐུ་ཉིད་མངོན་གྱུར་ཤོག༔ ཨོཾ་ཝ་ཀྱཻ་དཾ་ན་མ་ཧྲཱི༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འཇམ་དཔལ་སེར་པོ་ཡབ་ཡུམ་གྱི་སྐུ་ཐོགས་ལ༔ ཧཱུྃ༔ བཅོམ་ལྡན་མཁྱེན་རབ་དབང་པོ་ཡི༔ ཡོན་ཏན་ཡོངས་སུ་རྫོགས་པའི་དཔལ༔ ཡོན་ཏན་བཟང་པོ་ཡབ་ཡུམ་གྱིས༔ སྐལ་ལྡན་བུ་ལ་དབང་བསྐུར་རོ༔ སྒྲིབ་གཉིས་བག་ཆགས་དང་བྲལ་ཞིང་༔ དོན་གཉིས་ལྷུན་གྲུབ་དབང་ཐོབ་ཤོག༔ ཨོཾཝཱ་གཱི་ཤྭ་རི་མུཾ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འཇམ་དཔལ་དམར་པོ་ཡབ་ཡུམ་གྱི་སྐུ་ཐོགས་ལ༔ ཧཱུྃ༔ དུས་གསུམ་རྒྱལ་བ་ཀུན་གྱི་ཡེ་ཤེས་སྐུ༔ བཅོམ་ལྡན་མཁྱེན་རབ་དབང་པོའི་གསུང་གི་བདག༔ འཇམ་དཔལ་སྨྲ་བའི་སེང་གེ་ཡབ་ཡུམ་གྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་རོ༔ མ་རིག་མུན་པ་དྲུང་ནས་འབྱིན་གྱུར་ཏེ༔ ཡེ་ཤེས་སྒྱུ་མའི་སྐུ་ཉིད་མངོན་གྱུར་ཤོག༔ ཨཱོཾ་ཧྲཱིཿདྷཱི་མ་མེ་དྷཱི་བཾ་མཉྫུ་ཤྲཱི་མཱུཾ་ཧྲཱིཿཔྲ་ཛྙཱ་ཝརྡྷ་ནི་ཧྲཱིཿདྷཱིཿསྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འཇམ་དཔལ་ནག་པོ་ཡབ་ཡུམ་གྱི་སྐུ་ཐོགས་ལ༔ ཧཱུ༔ དུས་གསུམ་རྒྱལ་བ་ཀུན་གྱི་ཡེ་ཤེས་སྐུ༔ བཅོམ་ལྡན་མཁྱེན་རབ་དབང་པོའི་ཕྲིན་ལས་དཔལ༔ མངོན་སྤྱོད་ལྷུན་གྲུབ་བྱ་གྲུབ་ཡེ་ཤེས་སྐུ༔ འཇམ་དཔལ་འཁོར་བ་ཡོངས་སྒྲོལ་ཡབ་ཡུམ་གྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་རོ༔ ཉོན་མོངས་བརྒྱད་ཁྲི་བཞི་སྟོང་གཡུལ་བཟློག་ཅིང་༔ ཆོས་ཕུང་བརྒྱད་ཁྲི་བཞི་སྟོང་མངོན་འགྱུར་ཤོག༔ ཨཱོཾ་པྲ་སོད༔ ཆུ་སོད༔ དུར་ཏ་སོད༔ དུར་མེ་སོད༔ གཉན་མགོ་ལ་ཆོད༔ ཁ་ལ་ཛ༔ ཀང་ཤང་རྦད་ཕཊ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ཤར་གྱི་སྒོ་བའི་སྐུ་གཏད་ལ༔ ཛཿདུས་གསུམ་སངས་རྒྱས་ཀུན་གྱི་ཡེ་ཤེས་སྐུ༔ ཐུགས་རྗེའི་ལྕགས་ཀྱུས་འཁོར་བ་གནས་ནས་འདྲེན༔ གཤིན་རྗེ་འགུགས་བྱེད་ཆེན་པོའི་དབང་བསྐུར་རོ༔ ཞི་བའི་ཕྲིན་ལས་ཡོངས་སུ་འགྲུབ་པར་ཤོག༔ ཛཿཡ་མཱནྟ་ཀ་ཛ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ལྷོ་ཡི་སྒོ་བའི་སྐུ་གཏད་ལ༔ ཧཱུྃ༔ དུས་གསུམ་སངས་རྒྱས་ཀུན་གྱི་ཡེ་ཤེས་སྐུ༔ བྱམས་པའི་ཞགས་པས་འཁོར་བ་དབྱིངས་སུ་འཆིང་༔ གཤིན་རྗེ་འཆིང་བྱེད་ཆེན་པོའི་དབང་བསྐུར་རོ༔ རྒྱས་པའི་ཕྲིན་ལས་ཡོངས་སུ་འགྲུབ་པར་ཤོག༔ ཧཱུྃ་ཡ་མཱནྟ་ཁ་༔ ཧཱུྃ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ནུབ་ཀྱི་སྒོ་བའི་སྐུ་གཏད་ལ༔ བཾ༔ དུས་གསུམ་སངས་རྒྱས་ཀུན་གྱི་ཡེ་ཤེས་སྐུ༔ དགའ་བའི་ལྕགས་སྒྲོག་ཉོན་མོངས་སྒོ་སྡོམ་མཛད༔ གཤིན་རྗེ་རྨོངས་བྱེད་ཆེན་པོའི་དབང་བསྐུར་རོ༔ དབང་གི་ཕྲིན་ལས་ཡོངས་སུ་འགྲུབ་པར་ཤོག༔ བཾ་ཡ་མཱནྟ་ཀ་བཾ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བྱང་གི་སྒོ་བའི་སྐུ་གཏད་ལ༔ ཧོཿདུས་གསུམ་སངས་རྒྱས་ཀུན་གྱི་ཡེ་ཤེས་སྐུ༔ བཏང་སྙོམས་དྲིལ་བུས་འཁོར་བ་དོང་སྤྲུགས་མཛད༔ གཤིན་རྗེ་མྱོས་བྱེད་ཆེན་པོའི་དབང་བསྐུར་རོ༔ དྲག་པོ་མངོན་སྤྱོད་ཕྲིན་ལས་ཡོངས་འགྲུབ་ཤོག༔ ཧོཿཡ་མཱནྟ་ཀ་ཧོཿཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གཤིན་རྗེ་ནག་པོའི་སྐུ་ཐོགས་པ༔ ཧཱུྃ༔ མི་སྲུན་རྔམ་པ་ཁམས་གསུམ་སྲོག་བདག་ཆེ༔ དྲག་ཤུལ་སྟོབས་ལྡན་འགྲོ་བའི་ཤུགས་ཀྱི་བདག༔ མཐུ་རྩལ་ཐོགས་མེད་འབྱུང་བ་གཡོ་འཁྲུགས་འགྱེད༔ ལས་གཤིན་འཆི་བདག་ནག་པོ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ འཆི་བདག་ཡོངས་ཀྱི་སྐུ་ལ་དབང་ཐོབ་སྟེ༔ བསྟན་དགྲ་མ་ལུས་བསྒྲལ་བའི་མཐུ་ཐོབ་ཤོག༔ ཀཱ་ལ་རཱུ་པ་ཙ་མུནྟྲི་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གསང་དབང་བསྐུར་བ་ལ༔ དང་པོ་བྷནྡྷ་བདུད་རྩི་ཐོགས་ལ༔ ཧཱུྃ༔ དུས་གསུམ་བདེ་གཤེགས་ཐམས་ཅད་དང་༔ མཁྱེན་རབ་དབང་པོའི་གསུང་གི་བཅུད༔ ཡབ་ཡུམ་སྦྱོར་བའི་བྱང་ཆུབ་སེམས༔ ཡེ་ཤེས་བདུད་རྩི་མྱོང་གྲོལ་འདི༔ སྐལ་ལྡན་ཁྱོད་ཀྱི་ངག་ཏུ་བླུད༔ ངག་གི་སྒྲིབ་པ་ཀུན་དག་ཅིང་༔ གསང་བ་གསུང་གི་དབང་ཐོབ་ཤོག༔ རྩ་སྔགས་རྣམས་ཀྱི་ཤམ་དུ༔ ཝཱཀ་ཨ་བྷི་ཥིཉྩ་ཨཱཿདེ་ནས་གསུང་རབ་པོ་ཏི་གཏད་ལ༔ ཧཱུྃ༔ དུས་གསུམ་རྒྱལ་བ་ཐམས་ཅད་ཀྱི༔ ལྷུན་གྲུབ་རོལ་པའི་རང་རྩལ་ལས༔ ཆོས་ཕུང་ཡོངས་རྫོགས་པོ་ཏི་འདིས༔ སྐལ་ལྡན་བུ་ལ་དབང་བསྐུར་རོ༔ འཆད་རྩོད་བརྩམ་པའི་དབང་ཐོབ་ཤོག༔ རྩ་སྔགས་ཤམ་དུ༔ ཝཱཀ་ཨ་བྷི་ཥིཉྩ་ཨཱཿདེ་ནས་སྔགས་ཀྱི་ཡི་གེ་ཐོགས་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ མཁྱེན་བརྩེའི་ནུས་པའི་བདག་ཉིད་དཔལ༔ འཇམ་དཔལ་སྒྱུ་འཕྲུལ་རིགས་ལྔ་ཡི༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་རྣམས་བཅུད་དྲིལ་བའི༔ ཡང་སྙིང་སྔགས་ཀྱི་ཡི་གེ་འདིས༔ སྐལ་ལྡན་བུ་ལ་དབང་བསྐུར་རོ༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་ཀྱི་དབང་ཐོབ་སྟེ༔ བཟླས་པ་ཙམ་གྱིས་འགྲུབ་གྱུར་ཅིག༔ ཨོཾ་ཨ་ར་པ་ཙ་ན་དྷཱི་ཧྲཱིཾཿསྦྱོར་སྔགས་དྲུག་ཀྱང་བརྗོད༔ ཝཱཀ་ཨ་བྷི་ཥིཉྩ་ཨཱཿདེ་ནས་གཤིན་རྗེ་ཡ་མ་རཱ་ཛའི་སྔགས་གསུམ་གཏད་ལ༔ ཧཱུྃ༔ དྲེགས་པའི་རྒྱལ་པོ་ཆེན་པོ་ནི༔ གཤིན་རྗེ་ཡ་མ་རཱ་ཛ་ཡི༔ གསུང་གསང་འདུས་པའི་སྔགས་གསུམ་གྱིས༔ སྐལ་ལྡན་བུ་ལ་དབང་བསྐུར་རོ༔ བཟླས་པ་ཙམ་གྱིས་འགྲུབ་གྱུར་ཏེ༔ འབོད་རྦད་བསད་དང་གསུམ་གྱི་རྟགས༔ རིང་པོར་མི་ཐོགས་མངོན་གྱུར་ཏེ༔ མངོན་སྤྱོད་ཕྲིན་ལས་འགྲུབ་གྱུར་ཅིག༔ ཀཱ་ལ་རཱུ་པ་ཙ་མུནྟྲི་ཀཱ་ཨ་བྷི་ཥིཉྩ་ཨཱཿདེ་ནས་ཕྲེང་བ་གཏད་ལ༔ ཧཱུྃ༔ སྔགས་ཀྱི་བགྲང་ཕྲེང་འདི་གཏད་པས༔ རྣམ་པར་རྟོག་པ་དབྱིངས་སུ་སྒྲོལ༔ ཡེ་ཤེས་རོལ་པ་ལུ་གུ་རྒྱུད༔ ནམ་མཁའ་མཛོད་ལ་དབང་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་ཤེར་དབང་བསྐུར་བ་ལ༔ རིག་མ་གཏད་ལ༔ ཧཱུྃ༔ ལྷན་སྐྱེས་ཡེ་ཤེས་རོལ་པའི་གདངས༔ བདེ་ཆེན་སྦྱོར་བའི་ཡུམ་ཆེན་མོ༔ སྐལ་ལྡན་ཁྱོད་ལ་གཏད་པ་ཡིས༔ ཐབས་ཤེས་སྙོམས་འཇུག་རོལ་པའི་འཕྲུལ༔ དགའ་བ་བཞི་ཡི་བྱེད་ལས་ཀྱིས༔ ཟག་མེད་བདེ་སྟོང་ཡེ་ཤེས་སྐུ༔ ཀུན་ཏུ་བཟང་པོར་སངས་རྒྱས་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་དབྱངས་ཅན་རིགས་ལྔ་ཐོགས་ལ༔ ཧཱུྃ༔ ནམ་མཁའ་དག་སྦྱོར་ནམ་མཁའི་དབྱིངས༔ ཆུ་ཁམས་དག་སྦྱོར་ཆུ་ཡི་དབྱིངས༔ ས་ཁམས་དག་སྦྱོར་ས་ཡི་དབྱིངས༔ མེ་ཁམས་དག་སྦྱོར་མེ་ཡི་དབྱིངས༔ རླུང་ཁམས་དག་སྦྱོར་རླུང་གི་དབྱིངས༔ ཐམས་ཅད་སྟོང་པར་རོལ་པ་མོ༔ ཡེ་ཤེས་རིགས་ལྔའི་དབྱངས་ཅན་མ༔ སྐལ་ལྡན་ཁྱོད་ལ་གཏད་པ་ཡིས༔ བདག་མེད་རྟོགས་པའི་ཤེས་རབ་ཀྱིས༔ ཁམས་གསུམ་འཁོར་བ་སྟོང་པར་བཤིགས༔ ཡེ་ཤེས་ལྔ་ཡི་ཀློང་བརྡོལ་ནས༔ གདོད་མའི་མགོན་པོར་སངས་རྒྱས་ཤོག༔ རྩ་སྔགས་མཐར༔ ཙིཏྟ་པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༔ དེ་ནས་དྷཱིཿཡིག་རྣམ་ལྔ་གཏད་ལ༔ ཧཱུྃ༔ བཅོམ་ལྡན་མཁྱེན་རབ་རིགས་ལྔ་ཡི༔ ཡེ་ཤེས་སྒྱུ་འཕྲུལ་རོལ་པའི་ལྷའི༔ ཐུགས་སྲོག་ངོ་བོ་དྷཱིཿཡི་གེས༔ སྐལ་ལྡན་ཁྱོད་ལ་དབང་བསྐུར་རོ༔ ཤེས་རབ་ཡེ་ཤེས་དབང་ཐོབ་ནས༔ ཀུན་བཟང་ཡབ་ཡུམ་སྐུ་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཧཱུྃ་ཡིག་དཀར་སེར་དམར་ལྗང་ཐོགས་ལ༔ ཧཱུྃ༔ འཆི་བདག་གཞོམ་བྱེད་ཁྲོ་བོའི་རྒྱལ༔ གཤིན་རྗེ་གཤེད་པོ་བགེགས་ཀྱི་གཤེད༔ རྡོ་རྗེ་འཇིགས་བྱེད་འཇིགས་པར་བྱེད༔ ཐབས་ཀྱི་ཡང་སྙིང་ཡི་གེ་ཧཱུྃ༔ ཁྱོད་ཀྱི་སྙིང་གར་བཞག་པ་ཡིས༔ ཡིད་སྒྲིབ་དག་ནས་ཐུགས་དབང་ཐོབ༔ ཆོས་ཀྱི་སྐུ་རུ་སངས་རྒྱས་ཤོག༔ རྩ་སྔགས་དང་༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་རལ་གྲི་ལྔ་གཏད་ལ༔ ཧཱུྃ༔ བཅོམ་ལྡན་མཁྱེན་རབ་དབང་པོ་ཡི༔ ཤེས་རབ་ཡེ་ཤེས་རང་གཟུགས་ལས༔ གཟུང་འཛིན་གཅོད་པའི་རལ་གྲི་འདིས༔ སྐལ་ལྡན་བུ་ལ་དབང་བསྐུར་རོ༔ བདག་མེད་རྟོགས་པའི་ཤེས་རབ་ཀྱིས༔ འཁོར་བ་ཡོངས་སྒྲོལ་དབང་ཐོབ་ཤོག༔ རྩ་སྔགས་དང་༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཡ་ཡིག་གཏད་ལ༔ ཧཱུྃ༔ ཡ་ཡིག་འཆི་བདག་གཤིན་རྗེའི་སྲོག༔ སྐལ་ལྡན་ཁྱོད་ལ་གཏད་པ་ཡིས༔ གཤིན་རྗེ་ཡོངས་ལ་དབང་བསྒྱུར་ནས༔ བསྟན་དགྲ་ཡོངས་སྒྲོལ་དབང་ཐོབ་ཤོག༔ ཡ་མ་རཱ་ཙ་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་དགྲ་སྟྭ་གཏད་ལ༔ ཧཱུྃ༔ དགྲ་སྟྭ་འཆི་བདག་གཤིན་རྗེའི་ཐུགས༔ སྐལ་ལྡན་ཁྱོད་ལ་གཏད་པ་ཡིས༔ སྡེ་བརྒྱད་སྲོག་ལ་དབང་ཐོབ་ནས༔ བསྟན་དགྲ་བསྒྲལ་བའི་མཐུ་ཐོབ་ཤོག༔ ཨཿཡཿམཿདུཿརུཿཙཿཤཿནཿསརྦ་ཙིཏྟ་ཨ་བྷི་ཥིཉྩ་ཧཱུྃ༔ ཞེས་སློབ་མ་འཇམ་དཔལ་དུ་གསལ་བའི་ཐུགས་ཀ་ནས་ཡ་ཡིག་ནག་པོ་མདུན་མཁར་འཕྲོས་པ་ལ་འཁོར་འདས་གཉིས་ཀྱི་གཟི་བྱིན་ནུས་མཐུ་ཐམས་ཅད་ཐིམ་པས་གནས་སུ་གྱུར་པ་ལས་གཤིན་རྗེ་ཡ་མ་རཱ་ཙ་ལ་བཀའ་ཡི་ལྷ་མ་སྲིན་སྡེ་བརྒྱད་ཀྱིས་བསྐོར་བ་ལུས་དང་གྲིབ་མའི་ཚུལ་དུ་མི་འབྲལ་བའི་གྲོགས་སུ་ལྷགས་པར་བསྒོམ༔ དེ་ནས་སྲོག་འཁོར་གཏད་ལ༔ ཧཱུྃ༔ ཆོས་ཉིད་བརྡལ་ཁྱབ་ཆེན་པོའི་དབྱིངས༔ ལྷུན་གྲུབ་རོལ་པ་ལོངས་སྤྱོད་རྫོགས༔ ཀུན་ནས་ཟླུམ་པ་ཐིག་ལེ་ཆེ༔ སྲོག་གི་འཁོར་ལོ་འདི་གཏད་པས༔ སྒྲུབ་དང་དཀྱིལ་འཁོར་ཐམས་ཅད་ལ༔ དབང་བསྒྱུར་དབང་མཆོག་ཐོབ་པར་ཤོག༔ རྩ་སྔགས་དང་༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་རིལ་བུ་གཏད་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ དགོངས་བཅུད་འདུས་པའི་རིལ་བུ་འདི༔ སྐལ་ལྡན་བུ་ལ་གཏད་པ་ཡིས༔ མྱོང་གྲོལ་ཡེ་ཤེས་བདུད་རྩི་ཡིས༔ འགྲོ་དོན་རླབས་ཆེན་འགྲུབ་པ་དང་༔ དོན་གཉིས་མཐར་ཕྱིན་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཚིག་དབང་བསྐུར་བ་ལ༔ དང་པོ་འཇའ་ཤེལ་གཏད་ལ༔ ཧཱུྃ༔ གདོད་མ་གཞི་ཡི་སངས་རྒྱས་ཀྱི༔ ལྷུན་གྲུབ་རོལ་པའི་རང་རྩལ་ལས༔ ཡེ་ཤེས་འཇའ་ཤེལ་འདི་གཏད་པས༔ སྒྲོན་མ་བཞི་ཡི་ངང་མངོན་གྱུར༔ སྣང་བ་བཞི་ཡི་འཕེལ་སྨིན་ཟད༔ གཞོན་ནུ་བུམ་སྐུར་སངས་རྒྱས་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཧཱུྃ༔ དེ་ནས་འཇའ་འོད་ཀྱི་ཐིག་ལེ་གཏད་ལ༔ ཧཱུྃ༔ གདོད་མ་གཞི་ཡི་སངས་རྒྱས་ཀྱི༔ ལྷུན་གྲུབ་དག་མཉམ་ཆེན་པོའི་གདངས༔ ཡེ་ཤེས་འོད་ཐིག་འདི་གཏད་པས༔ མ་དག་འཁོར་བའི་སྣང་སེམས་ཀུན༔ དག་དབྱིངས་དྭངས་མར་མངོན་སངས་རྒྱས༔ འཇའ་ལུས་ཆེན་པོའི་དབང་ཐོབ་ཤོག༔ རྩ་སྔགས་དང་༔ སརྦ་ཨ་བྷི་ཥིཉྩ་ཧཱུྃ༔ དེ་ནས་རིག་པའི་རྩལ་དབང་ལ༔ འོད་ཀྱི་ཐིག་ལེ་གཏད་ལ༔ ཧཱུྃ༔ ཀུན་ནས་ཟླུམ་པ་གཞིའི་ཐིག་ལེ༔ སྐལ་ལྡན་ཁྱོད་ལ་གཏད་པ་ཡིས༔ མ་རིག་འཁྲུལ་པའི་སེམས་སྣང་ཀུན༔ སྒྱུ་མའི་འཁྲུལ་འཁོར་ཞིག་པ་བཞིན༔ ཀ་དག་གདོད་མའི་དབྱིངས་སུ་ཞིག༔ རིག་པ་རྩལ་གྱི་དབང་ཐོབ་ཤོག༔ ཨ༔ བརྗོད་པས་ཁམས་གསུམ་གྱི་སྣང་སེམས་ཐམས་ཅད་ཐུགས་རྗེ་སྤྲུལ་སྐུའི་དབྱིངས་སུ་ཞིག༔ ཨ༔ བརྗོད་པས་ལྷུན་གྲུབ་ལོངས་སྤྱོད་རྫོགས་པའི་དབྱིངས་སུ་ཞིག༔ ཨ༔ བརྗོད་པས་ཀ་དག་ཆོས་སྐུའི་དབྱིངས་སུ་འབྱམས་ཀླས༔ ཕཊ༔ བརྗོད་པས་དུས་གསུམ་འཕོ་འགྱུར་མེད་པའི་རྒྱས་ཐེབས་པར་གྱུར༔ དེ་ནས་གཏོར་མ་གཏད་ལ༔ ཧཱུྃ༔ འཁོར་འདས་འུབ་ཆུབ་རོལ་པ་ཡི༔ ཐབས་ཤེས་དབྱེར་མེད་བ་ལིཾ་ཏ༔ བརྡལ་ཁྱབ་ཆོས་དབྱིངས་མཁའ་ལ་བསྙེགས༔ དྭངས་གསལ་འོད་ཀྱི་མཁའ་ཀློང་དུ༔ རྒྱལ་བའི་ཞིང་ཁམས་རྟེན་བརྟེན་པ༔ རྒྱ་མཚོར་གཟའ་སྐར་བཞིན་དུ་ཤར༔ སྐལ་ལྡན་ཁྱོད་ཀྱི་ལག་ཏུ་གཏད༔ རིགས་དང་དཀྱིལ་འཁོར་མ་ལུས་པ༔ བསྒྲུབ་ལ་དབང་བསྒྱུར་དབང་ཐོབ་ཤོག༔ ཅེས་ལྷ་དང་དཀྱིལ་འཁོར་ཐམས་ཅད་ཡོངས་སུ་རྫོགས་པའི་གཏོར་མ་སློབ་བུ་ལ་ཐིམ་པས་གཏོར་མ་དང་དཀྱིལ་འཁོར་བཀྲམ་པ་ཙམ་གྱིས་སྣང་སྲིད་གཞིར་བཞེངས་ཀྱི་དཀྱིལ་འཁོར་ལྷུན་གྱིས་གྲུབ་པར་བསྒོམ༔ རྩ་སྔགས་དང་༔ མ་ཧཱ་བ་ལིཾ་ཏ་མཎྜ་ལ་ཨ་བྷི་ཥིཉྩ་ཧཱུྃ༔ དེ་ནས་སེང་གེའི་ཁྲི་སྟན་དང་བཅས་པ་གཏད་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ མཁྱེན་བརྩེ་ནུས་པའི་དབང་ཕྱུག་གིས༔ རྡོ་རྗེ་གསུམ་དུ་སྨིན་གྲོལ་བའི༔ རྒྱལ་བའི་དབང་པོ་དམ་པ་ཁྱོད༔ ཁམས་གསུམ་ཆོས་ཀྱི་རྒྱལ་པོ་ཡི༔ རྒྱལ་པོར་མངའ་གསོལ་ཁྲི་རུ་འཁོད༔ དུས་གསུམ་སངས་རྒྱས་ཐམས་ཅད་ཀྱི༔ གདུལ་བྱ་ཕྲིན་ལས་དཔལ་ཐོབ་ནས༔ འཁོར་བ་དོང་སྤྲུགས་དབང་ཐོབ་ཤོག༔ དེ་ནས་གླེགས་བམ་སྤྱི་བོར་བཞག་ལ༔ ན་མོ༔ ཆོས་སྐུ་ཀུན་བཟང་ཡབ་ཡུམ༔ དྲུག་པ་རྡོ་རྗེ་འཆང་ཆེན༔ སྟོན་པ་རྡོ་རྗེ་སེམས་དཔའ༔ གུ་རུ་དགའ་རབ་རྡོ་རྗེ༔ མཁས་པ་ཤྲཱི་སེངྷ༔ པཎ་གྲུབ་འཇམ་དཔལ་བཤེས་གཉེན༔ ཨོ་རྒྱན་མཚོ་སྐྱེས་རྡོ་རྗེ༔ མཁའ་འགྲོ་ཡེ་ཤེས་མཚོ་རྒྱལ༔ འབྲོག་བན་ཁྱེའུ་ཆུང་ལོ་ཙཱ༔ རྗེ་འབངས་ཉི་ཤུ་རྩ་ལྔ༔ གཏེར་ཆེན་བརྒྱ་དང་རྩ་བརྒྱད༔ དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ༔ ཡི་དམ་དཔའ་བོ་མཁའ་འགྲོ༔ བཀའ་སྲུང་དམ་ཅན་རྒྱ་མཚོའི་ཚོགས་མ་ལུས་ཤིང་ལུས་པ་མེད་པ་ཐམས་ཅད་དང་༔ ཁྱད་པར་དུ་འཇམ་དཔལ་སྒྱུ་འཕྲུལ་རོལ་པའི་ལྷ་ཚོགས་འཁོར་དང་བཅས་པ་ཐམས་ཅད་ཀྱིས༔ སྐལ་ལྡན་གྱི་སློབ་མ་འདི་ལ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་དབང་རྣམས་ཡོངས་སུ་རྫོགས་པར་བསྐུར་དུ་གསོལ༔ བྱིན་གྱིས་བརླབ་པར་མཛད་དུ་གསོལ༔ ཐུགས་རྒྱུད་རྣམ་པར་མི་རྟོག་པའི་ཡེ་ཤེས་འཕོ་བར་མཛད་དུ་གསོལ༔ རྟོགས་པ་སྤར་དུ་གསོལ༔ མཐུ་ནུས་བསྐྱེད་དུ་གསོལ༔ སྒོ་གསུམ་རྡོ་རྗེ་གསུམ་གྱི་རོལ་པ་རུ་འཕོ་བར་མཛོད་ཅིག༔ སྨིན་ཅིང་གྲོལ་བར་མཛོད་ཅིག༔ བཀའ་དང་བསྟན་བཅོས་མདོ་སྔགས་རྒྱུད་སྡེ་རྒྱ་མཚོའི་དབང་ལུང་ཡོངས་སུ་རྫོགས་པ་ཐོབ་པར་མཛད་དུ་གསོལ༔ ཚེ་གཅིག་ལུས་གཅིག་འདི་ཉིད་དུ་འཇའ་ལུས་འཕོ་བ་ཆེན་པོའི་སྐུ་རུ་སད་ནས་སངས་རྒྱས་པར་མཛད་དུ་གསོལ༔ ཨོཾ་ཨཱཿཧཱུྃ༔ སརྦ་བུདྡྷ་དྷརྨ་སངྒ་ཡ་ཀཱ་ཡ་ཝཱཀ་ཙིཏྟ་སརྦ་ཨ་བྷི་ཥིཉྩ་ཧཱུྃ༔ དེ་ནས་བཀྲ་ཤིས་རྫས་བརྒྱད་གཏད་ལ༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ བཀྲ་ཤིས་རྫས་བརྒྱད་འདི་གཏད་པས༔ ཡོན་ཏན་ཕུན་སུམ་ཚོགས་པའི་དཔལ༔ ཡོངས་ཐོབ་དོན་གཉིས་ལྷུན་གྲུབ་ཤོག༔ མངྒ་ལཾ་ཨ་བྷི་ཥིཉྩ་ཧཱུྃ༔ དེ་ནས་བཀྲ་ཤིས་རྟགས་བརྒྱད་གཏད་ལ༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ བཀྲ་ཤིས་རྟགས་བརྒྱད་འདི་གཏད་པས༔ མཚན་དཔེས་བརྒྱན་པའི་སྐུ་ཐོབ་ནས༔ སྤྲུལ་སྐུའི་གདུལ་བྱ་མྱུར་ཐོབ་ཤོག༔ ཨཥྚ་མངྒ་ལཾ་ཨ་བྷི་ཥིཉྩ་ཧཱུྃ༔ དེ་ནས་རྒྱལ་སྲིད་སྣ་བདུན་གཏད་ལ༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ རྒྱལ་སྲིད་སྣ་བདུན་འདི་གཏད་པས༔ རྒྱལ་བའི་རྒྱལ་སར་དབང་འབྱོར་ཏེ༔ རྣམ་མཁྱེན་སངས་རྒྱས་མྱུར་ཐོབ་ཤོག༔ མ་ཎི་རཏྣ་ཨ་བྷི་ཥིཉྩ་ཧཱུྃ༔ དེ་ནས་གཏང་རག་འབུལ་བ་དང་༔ དམ་ཚིག་གཉན་པོ་བསྒྲགས་པ་ཡི༔ རྗེས་ལ་བཀྲ་ཤིས་བསྔོ་སྨོན་བྱ༔ ལྟ་དགོངས་ལྡན་པའི་སློབ་དཔོན་གྱིས༔ དད་དམ་ལྡན་པའི་སློབ་བུ་ཡི༔ དབང་འདི་ཐོབ་ནས་ཉམས་ལེན་ན༔ ཚེ་འདིར་མངོན་སངས་རྒྱས་འགྱུར་རོ༔ བཅུ་ལས་མང་ལ་བསྐུར་མི་རུང་༔ མཁའ་འགྲོ་འབུམ་གྱི་བཀའ་རྒྱ་ཡོད༔ བཀའ་སྲུང་དབང་ཕྱུག་ཆེན་པོ་དང་༔ གཟའ་དང་གནོད་སྦྱིན་གཤིན་རྗེར་གཏད༔ དམ་ཉམས་ལག་ཏུ་མ་ཤོར་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་ཡང་གཏེར་སྟོནབདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་སུམ་ཅུ་བར་དུ་བཀའ་རྒྱ་བྱས་མཐར་ཆོས་ཀྱི་བདག་པོ་ཀུན་བཟང་དཔལ་འབར་དང་དགེ་འདུན་རྒྱ་མཚོ་གཉིས་ཀྱིས་ནན་དུ་བསྐུལ་ངོར་གསེར་སྟོད་བླ་མ་རོང་ནས་དག་པར་ཕབ་པའོ།།དགེའོ།།དགེའོ།།སརྦ་མངྒ་ལཾ།།།།