DJYD-KABUM-07-JA-006

（1ན）གདོད་མའི་མགོན་པོ་ཀུན་བཟང་སྣང་མཐའ་ཡས། །མ་འགགས་སྙིང་རྗེའི་རང་གཟུགས་སྤྱན་རས་གཟིགས། །རབ་འབྱམས་རྒྱལ་ཀུན་ངོ་བོ་པདྨ་འབྱུང་། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །བདེ་ཆེན་ཝཱ་ར་ཧི་དངོས་མཚོ་རྒྱལ་མ། །དབང་ཆེན་དཔའ་བོ་ཨརྱ་ས་ལེ་རྩ་ལ། ཟབ་གཏེར་མངའ་བདག་སྟག་ཤམ་ནུས་ལྡན་རྗེ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །མཚུངས་མེད་རྒྱལ་ཚབ་ནམ་མཁའི་རྡོ་རྗེའི་ཞབས། །གྲུབ་པའི་དབང་ཕྱུག་པདྨ་རྣམ་པར་རྒྱལ། །རིག་པ་འཛིན་པ་རྟ་མཆོག་ཆོས་ཀྱི་གྲགས། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །འགྲོ་བའི་མགོན་པོ་བསོད་ནམས་རྣམ་པར་རྒྱལ། །སྙན་བརྒྱུད་མཛོད་འཛིན་མགོན་པོ་རྡོ་རྗེ་རྩལ། །འཛམ་གླིང་ཤིང་རྟ་པདྨ་གར་གྱི་དབང་། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །མཁས་ཤིང་གྲུབ་བརྙེས་བསྟན་པའི་རྒྱལ་མཚན་རྗེ། །རྡོ་རྗེ་འཛིན་པ་འགྱུར་མེད་ངེས་དོན་དབང་། །སྨིན་གྲོལ་མཛོད་འཆང་ཡེ་ཤེས་རྡོ་རྗེ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །རིགས་ཀུན་ཁྱབ་བདག་རྩ་བརྒྱུད་བླ་མའི་ཚོགས། །དངོས་གྲུབ་མཆོག་སྩོལ་ཡི་དམ་（1བ）དཀྱིལ་འཁོར་ལྷ། །ཕྲིན་ལས་ཐོགས་མེད་མཁའ་འགྲོ་ཆོས་སྐྱོང་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །སྣང་ཞེན་རྡོ་རྗེ་བཙུན་མོའི་ཕྱག་རྒྱར་སད། །རྩ་རླུང་ཐིག་ལེ་ངྷུ་ཏིའི་བྷ་གར་ཐིམ། །རིག་སྟོང་མཁའ་འགྲོའི་རང་ཞལ་མཇལ་ནས་ཀྱང་། །བརྗོད་དུ་མེད་པའི་མཁའ་ལ་སྤྱོད་པར་ཤོག །（ཅེས་པའང་ཚོགས་མཆོད་ལས་བྱང་ཁྲིགས་བསྡེབས་དང་འབྲེལ་བར་འཇུག་བདེའི་བརྒྱུད་འདེབས་མདོར་བསྡུས་སུ་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ་ལེགས་སུ་གྱུར་ཅིག། །།）