DJYD-KABUM-07-JA-017

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 7, Text 17, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 7: . Kalimpong: Dupjung Lama, 1979-1985.*
Side notes
More details More details
Tertön	བདུད་འདུལ་རྡོ་རྗེ་ (bdud 'dul rdo rje)
Genre
Cycle	བཀའ་རྫོགས་པ་ཆེན་པོའི་དམ་ཆོས་དགོངས་པ་ཡོངས་འདུས་ (bka' rdzogs pa chen po'i dam chos dgongs pa yongs 'dus)

[edit]

༄༅། །དམ་ཆོས་དགོངས་པ་ཡོངས་འདུས་ལས། ཡང་གསང་

བླ་མ་རྩ་གསུམ་འདུས་པའི་བསྙེན་སྒྲུབ་ཀྱི་ཡི་གེ་ སྐལ་བཟང་ཡིད་ཀྱི་འདོད་འཇོ་ཞེས་ བྱ་བ་བཞུགས་སོ།། །།

（1བ）ཡང་གསང་བླ་མ་རྩ་གསུམ་འདུས་པའི་བསྙེན་སྒྲུབ་ཀྱི་ཡི་གེ་སྐལ་བཟང་ཡིད་ཀྱི་འདོད་འཇོ་ཞེས་བྱ་བ། ཁྱབ་བདག་བླ་མ་རྗེ་བཙུན་ཐོད་ཕྲེང་རྩལ་གྱི་ངོ་བོར་བཞུགས་པའི་ཞབས་ལ་གུས་པས་ཕྱག་འཚལ་ལོ། །རབ་འབྱམས་རྒྱལ་བའི་དཀྱིལ་འཁོར་འཁོར་ལོའི་མགོན། །བདེ་ཆེན་སྒྱུ་མའི་གར༵་མཁན་གསུང་དབ༵ང་ཕྱུག །སང༵ས་རྒྱས༵་ཉག་གཅིག་རང་བྱུང་རིག་པའི་གཤིས། །རྡོ༵་རྗེ༵་ཐོད་ཕྲེང་བླ་མའི་ཞབས་ལ་འདུད། །རྒྱ་ཆེན་རྒྱུད་ལུང་མན་ངག་ཀུན་གྱི་བཅུད། །དགོངས་པ་ཡོངས་འདུས་བླ་མའི་ཐུགས་སྒྲུབ་ཀྱི། །བསྙེན་སྒྲུབ་ཉམས་（2ན）ལེན་ཡི་གེ་རབ་གསལ་བ། །རང་གཞན་ཀུན་ལ་ཕན་བློས་འདིར་འཆད་ན། རྩ་གསུམ་བཀའ་ཡི་གནང་བ་ལེགས་སྩོལ་ལ། །ལམ་འདིའི་སྒོ་ནས་རིག་འཛིན་ས་བགྲོད་པའི། །ལས་ཅན་གདུལ་བྱ་གྲངས་མེད་འབྱུང་བ་དང་། །འབྲེལ་ཚད་དོན་དང་ལྡན་པར་བྱིན་བརླབ་གསོལ། །དེ་ཡང་ཟབ་ཆོས་གང་གི་མཚན་ཙམ་ཐོས་པས་ཀྱང་སྐལ་ལྡན་སྤྲོ་བ་བསྐྱེད་པ་གངས་ཅན་ས་འོག་ཀུན་གྱི་གཏེར་གཅིག །བླ་མའི་ཐུགས་སྒྲུབ་བྱེ་བ་ཕྲག་བརྒྱའི་ཡང་ཞུན། གུ་རུ་རིན་པོ་ཆེ་མངོན་སུམ་མཇལ་བ་ལྟ་བུའི་ཟབ་ཆོས་བླ་ན་མེད་པ་（2བ）འདི་ལ་ཉམས་སུ་བླང་བྱའི་སྙིང་པོ་རིམ་པ་གཉིས་ཀྱི་ལམ་ཁྱད་པར་ཅན་དུ་བཞུགས་པ་ལས། འདིར་རིམ་པ་དང་པོ་ལ་སྤྱི་དང་བྱེ་བྲག་གི་སྒྲུབ་ལུགས་མང་དུ་གསུངས་པ་རྣམས་ཀྱི་གཙོ་བོ་བླ་མ་རྩ་བ་གསུམ་འདུས་ཡོངས་རྫོགས་སྒྲུབ་གཞུང་ཆེན་མོའི་དགོངས་དོན་བཞིན་ཉམས་སུ་ལེན་པའི་ཚུལ་འདུས་གསལ་གོ་བདེ་སྙིང་པོར་དྲིལ་ཏེ་འཆད་པ་ལ་གསུམ། བསྙེན་ཐབས་ཀྱི་ལག་ལེན་དངོས་གཞི་བསྟན་པ། གལ་ཆེ་བའི་སྤྱི་དོན་འཕྲོས་སུ་གདམས་པ། ཕན་ཡོན་ཅུང་ཟད་སྨོས་པས་བློ་ལྡན་སྤྲོ་བ་བསྐྱེད་པའོ། །དང་པོ་ལ་གསུམ། སྔོན་འགྲོ་སྟ་གོན་དུ་བྱ་བ། དངོས་གཞི་བསྙེན་སྒྲུབ་ཀྱི་རྣལ་འབྱོར། རྗེས་མཐའ་རྒྱས་ཀྱི་ལས་རིམ་མོ། །སྔ་མ་ལའང་སྤྱི་དང་ཁྱད་པར་གཉིས་ཀྱི། ཐོག་མར་སྤྱིའི་སྔོན་འགྲོ་ནི། འདི་ལ་གསུམ་སྟེ། ཕྱིའི་སྔོན་འགྲོ་གོང་མས་བྱིན་གྱིས་བརླབས་ཤིང་འཚེ་དོགས་རྣམ་གཡེང་མེད་པའི་གནས་སུ། སྡོད་མལ་ཟས་གོས་འཚོ་སྨན་གྲོགས་འཁོར་སོགས་མཐུན་རྐྱེན་དུ་འོས་པའི་ཡོ་བྱད་རྣམས་ཚང་བར་བསྡོགས་ཏེ། དངོས་གཞི་མཐར་མ་ཕྱིན་གྱི་བར་དུ་（3ན）སེམས་བྲེལ་དང་འབད་རྩོལ་མི་དགོས་པར་བྱ། ནང་གི་སྔོན་འགྲོ་བར་ཆད་མི་འབྱུང་ཞིང་སྒྲུབ་པའི་འབྲས་བུ་མྱུར་དུ་འགྲུབ་པའི་ཕྱིར་ཕྱག་བསྐོར། བཀའ་བསྒྲགས། སཱཙྪ། ལམ་བཅོས། བསང་བརྔན་སོགས་མགྲོན་བཞི་ལ་མཆོད་སྦྱིན་ཅི་འབྱོར། རྡོར་སེམས་སྒོམ་བཟླས་སྐོང་བཤགས་སོགས་ཉམས་ཆག་སྒྲིབ་སྦྱོང་དང་། མཎྜལ་ཚོགས་ཀྱི་མཆོད་པ་སོགས་ཚོགས་བསགས་ཀྱི་རིམ་པ་ལ་ནན་ཏན་དུ་འབད། གསང་བའི་སྔོན་འགྲོ་སློབ་དཔོན་ཆེན་པོའི་ཞལ་ནས། འདི་ནི་ཀུན་གྱི་ཡང་སྙིང་ཆོས་ཡིན་པས༔ ཌཱ་ཀིའི་འཁུ་ལྡོག་བདུད་ཀྱི་ཆོ་འཕྲུལ་སོགས༔ རྐྱེན་གྱི་རྣམ་པ་བསམ་གྱིས་མི་ཁྱབ་པས༔ གང་ཡང་བར་ཆད་ཡིན་པ་ཤེས་པར་བྱ༔ གཉེན་པོ་ཡེངས་མེད་བརྩོན་འགྲུས་ལྕགས་ཀྱིས་བསྡམ༔ བླ་མ་ཡི་དམ་རྣམས་ལ་གསོལ་བ་ཐོབ༔ མཁའ་འགྲོ་ཆོས་སྐྱོང་སྐོང་གསོ་ཡང་ཡང་གྱིས༔ དེས་ནི་གནས་སྐབས་མཐར་ཐུག་དོན་ཆེན་འགྲུབ༔ ཅེས་གསུངས་པ་ལྟར། བར་དུ་གཅོད་པ་ཅི་ཞིག་བྱུང་ཡང་སྤྲོ་བ་ལས་ཡིད་ཕྱིར་མི་ལྡོག་པའི་གོ་ཆའི་བརྩོན་འགྲུས་ལྷག་（44བ）པར་བགོ་སྟེ། ཀུན་གོ་གཅིག་ཆོད་བཀའ་གཏེར་ཀུན་གྱི་ཡང་བཅུད་བསྐྱེད་རྫོགས་རྫོགས་པ་ཆེན་པོའི་མཐར་ཐུག་ཟབ་ཆོས་འདི་ལྟ་བུ་དང་མཇལ་བ་ནི་རྨི་ལམ་ན་ནོར་བུ་རྙེད་པ་ལྟར་མི་སྲིད་སྲིད་པའི་ཆོས་ཅན་ཡིན་ཅིང་། ལྟར་སྣང་གི་བྱ་སྤྱོད་ཇི་ཙམ་ཞིག་འབད་དུ་ཟིན་ཀྱང་གཏན་གྱི་བདེ་བ་ལ་ཕན་པའི་སྙིང་པོ་སྐྲའི་རྩེ་མོ་བརྒྱར་གཤག་པའི་ཆ་ཙམ་ཡང་མེད་པས། རིགས་འདུས་བླ་མའི་དཀྱིལ་འཁོར་ཆེན་པོ་འདི་ཉིད་མ་འགྲུབ་ཀྱི་བར་དུ་འཆི་བ་སྲོག་ལ་བབ་ཀྱང་སྒྲུབ་པ་མཐར་སྐྱེལ་བར་མི་བྱེད་རེ་སྙམ་པའི་ཞེ་དམ་བརྟན་པོ་ཡང་དང་ཡང་དུ་བླངས་ཏེ་འཁྲུལ་པའི་རྣམ་རྟོག་ལུ་གུ་རྒྱུད་ཆུ་གཉེར་ལྟ་བུ་རྦད་ཀྱིས་བཅད་ཅིང་། ཁྱད་པར་འཕགས་པའི་ཟབ་ཆོས་འདིའི་ཕན་ཡོན་བསམ་གྱིས་མི་ཁྱབ་པ་དཔལ་གྱི་མགུར་ནས་རྡོ་རྗེའི་གསུང་གིས་ཆེ་ཐང་དུ་གདམས་པ་ལ་བསམ་སྟེ་སྒྲུབ་པ་ཉམས་ལེན་ལ་ཤིན་ཏུ་སྤྲོ་བའི་བློ་གཟེངས་བསྟོད་པ་དང་། རང་ཉིད་གྲགས་འདོད། གཞན་ལ་འགྲན་སེམས། ཉམས་མཚར་ཁ་ཆོས། བྱས་བྱས་བསྒྲུབས་བསྒྲུབས་ཀྱི་རྣམ་གྲངས་ཙམ་ལ་（4ན）བློ་གཏོད་པས་འདི་ཉིད་བསྒྲུབས་ཀྱང་ཙནྡན་གྱི་སྡོང་པོ་སོལ་དུམ་དུ་བསྒྱུར་བ་ལྟར་སྒྲུབ་པའི་རྨང་འཆུག་ནས་འབད་པ་དོན་མེད་དུ་བཅོས་པ་ཡིན་པས་ན། མཁའ་ཁྱབ་ཀྱི་ཕ་མ་སེམས་ཅན་ཐམས་ཅད་གསུང་རྡོ་རྗེ་པདྨའི་མགོན་པོའི་གོ་འཕང་ལ་འགོད་པའི་ཕྱིར་དུ་ཟབ་མོའི་ལམ་བཟང་འདི་ལ་འཇུག་པར་བགྱིའོ་སྙམ་པའི་བྱང་ཆུབ་སེམས་བསྐྱེད་བཟང་པོས་ཐོག་མཐའ་ཀུན་དུ་ཟིན་པར་བྱའོ། །གཉིས་པ་ཁྱད་པར་གྱི་སྔོན་འགྲོ་ལ་གཉིས། རྟེན་གྱི་དཀྱིལ་འཁོར་འདུ་བྱ་བ་དང་། རྟེན་མཆོད་བཤམ་པའོ། །དང་པོ་ནི། འབྱོར་པ་དང་སྤྲོས་པ་རབ་ཀྱིས་རྡུལ་ཚོན་གྱི་དཀྱིལ་འཁོར་ཚུལ་བཞིན་དུ་བཞེངས་པའམ། སྒྲུབ་པ་ཡུན་རིང་པོའི་ཕྱོགས་སུ་རས་བྲིས་ཀྱི་དཀྱིལ་འཁོར་བཀྲམ་པ་ཉིད་འཇུག་པ་བདེ་ཞིང་ལེགས་པས་སྒྲུབ་ཆེན་པྲ་ཁྲིད་ནས་འབྱུང་བ་ལྟར་དཀྱིལ་འཁོར་རས་བྲིས་མཚན་ཉིད་དང་ལྡན་པ་འདུ་བྱ། དེ་ཡང་མ་འབྱོར་ན་མཎྜལ་ལ་འབྲུ་དཀར་དྲི་བཟང་བདུད་རྩི་ལྔས་གཤེར་བས་ཚོམ་བུ་ལྷ་གྲངས་དང་མཉམ་ན་ལེགས་པར་བཀོད་པས་ཀྱང་རུང་། （4བ）མེད་དུ་མི་རུང་བའི་སྒྲུབ་རྟེན་སྐུ་འབག་ནི་རས་གཞི་ལ་བླ་མ་ཐོད་ཕྲེང་རྩལ་ཡབ་ཡུམ་གྱི་སྐུ་གཞུང་མཐུན་སྐྱ་བྲིས་ཟིན་པ་དང་། བྱང་སེམས་སིནྡྷུ་ར་འོ་མ་རྣམས་སྦྱར་བ་ཚོན་ལ་མི་གནོད་པའི་སླ་མོས། ཡབ་ཡུམ་གཉིས་ཀའི་གནས་གསུམ་དུ་ཨོཾ་ཨཱཿཧཱུཾ། ལྟེ་བར་ཧྲཱིཿདང་མ། མགྲིན་པ་ཙམ་ནས་ཕྲེང་ཚར་དུ་བསྙེན་སྒྲུབ་ལས་གསུམ་གྱི་སྔགས་དང་རྟེན་སྙིང་བཅས་གཟབ་ཆུང་དག་པར་བྲི། དེ་སྟེང་ཚོན་རྫོགས་ལེགས་པར་བཏང་ལ་གྲུབ་མ་ཐག་རབ་གནས་ནན་ཏན་བྱ། རྩ་གསུམ་སྲོག་འཁོར་བླ་རྡོ་གཏེར་གཞུང་ནས་གསུངས་པ་ལྟར་ཚད་ལྡན་སྦྱོང་ཁྲུས་རབ་གནས་བྱས་པའང་འཛོམ་ན་མཆོག་ཏུ་འགྱུར། གཞན་ཡང་འོག་ཏུ་དགོས་པའི་ཡོ་བྱད་མཐའ་དག་སྔ་ཚགས་སུ་ཚུད་པར་བྱའོ། །གཉིས་པ་རྟེན་མཆོད་བཤམ་པ་ནི། དེ་ནས་སྒྲུབ་པ་དངོས་ལ་འཇུག་པའི་ཐོག་མ་རྒྱལ་ཟླ་སོགས་ཉི་མ་བྱང་བགྲོད་ཀྱི་ཡར་ངོའི་གཟའ་སྐར་འཕྲོད་སྦྱོར་བཟང་པོའམ་ཁྱད་པར་གྱི་དུས་ཆེན་ཚེས་བཅུའི་སྔ་དྲོའི་ཆར་གནས་ཁང་བྱི་དོར་བྱས་ལ་རྒྱན་གྱིས་སྤྲས། གུ་རུའི་སྐུ་བརྙན་（5ན）གཙོ་བོར་གྱུར་པའི་བྱིན་རླབས་ཅན་གྱི་རྟེན་ཅི་འབྱོར་བཤམས་པའི་མདུན་དུ་དཀྱིལ་འཁོར་གྱི་སྟེགས་བུར་ཆང་དང་བདུད་རྩི་ལྔ་སྦྱར་བས་ཆག་ཆག་བཏབ་ལ་རས་བྲིས་བཀྲམ། དབུས་སུ་བུམ་པ་མཚན་ལྡན་དར་སྣའི་མགུལ་ཆིངས་ཅན་རྒྱུན་འབབས་ཀྱི་ཆུ་དང་ཆང་གིས་སུམ་གཉིས་བཀང་བར་ལྔ་ཚན་ལྔའི་རྫས་བཏབ་ཅིང་ཤུགས་པ་དང་རྨ་བྱའི་མདོངས་ཀྱིས་ཁ་བརྒྱན། དེའི་སྟེང་དུ་ཁྲིའུ་ལ་ཐོད་པ་དུམ་བུ་གཅིག་པ་སོགས་མཚན་ལྡན་འབྲུ་སྣས་བཀང་བའི་དབུས་སུ་སྔར་གྱི་སྐུ་འབག་རབ་གནས་ཅན་བཙུགས་ལ་དར་དམར་གྱི་གུར་ཕུབ། མདུན་ཕྱོགས་སུ་ཀ་པཱ་ལ་མཚན་ལྡན་ནམ་རིན་པོ་ཆེའི་པད་སྣོད་དུ་ནས་འབྲས་གྲོ་སྲན་ཏིལ་ཏེ་འབྲུ་ལྔའི་ཟན་ལ་ཆོས་སྨན་ཛ་གད་སྤོད་སྣ་བསྲེས་པའི་གཏོར་མ་རིན་ཆེན་འབར་བ་ཕྱག་བཞེས་བཞིན་དཀར་དམར་རྒྱན་སྤྲོས་དང་ལྡན་པ་བཤམ། སྲོག་འཁོར་ཡོད་ན་སྨྱུག་སྦུབས་ལྟ་བུར་བཅུག་ནས་སྒྲུབ་གཏོར་འདིའི་ནང་གཞུག་བྱེད་པའང་ཡང་ན་གཏོར་གདུགས་འོག་ཏུ་མདུན་（5བ）རྒྱབ་མ་ལོག་པར་བཏགས་པས་འཐུས། གཡས་གཡོན་དུ་རྩ་བརྒྱད་སྟོང་སྦྱར་དང་སོ་ལྔའི་ཕབ་གཏས་བྲན་པའི་སྨན་རཀ །མཐར་ཞི་མཆོད་གཡས་དང་དྲག་མཆོད་གཡོན་དུ་བྱས་ཏེ་ཕྲེང་ཚར་རམ་བསྐོར་བཤམ་ཅི་བདེ། རྒྱབ་ངོས་སུ་བཀའ་སྲུང་མ་གཟའ་རྡོར་གསུམ། གཏེར་སྲུང་ཚེ་རིང་མ་སོགས་ཀྱི་འབུལ་གཏོར་དང་། ཆད་མདོ་བརྟན་མ་བཅས་འགོད། འཛོམ་ན་འཕན་གདུགས་རྒྱལ་མཚན་ལ་སོགས་པའི་རྒྱན་བཀོད་རྣམས་ཀྱང་མཛེས་པར་བསྟར། གོ་ཡུལ་འགྲིགས་ཚེ་རང་ཉིད་ཁ་ནུབ་ཏུ་ཕྱོགས་པ་དང་དཀྱིལ་འཁོར་ཞལ་སྤྲོད་དུ་འགྱུར་པའི་སར་སྡོད་མལ་བྱ་སྟེ། སྤྲོ་ཞིང་ནུས་ན་གཏེར་ཁ་རིགས་མཐུན་གཞན་ནས་ཟབ་གནད་དུ་གདམས་ཤིང་འདི་ཉིད་ནས་ཀྱང་ཕྱོགས་མཚོན་གསུངས་པའི་འོག་ཏུ་བདུད་བཞིའི་མནན་པ་དང་། སྟེང་ཕུབ་གཏེར་གཞུང་ལྟར་གུ་རུ་དཔའ་བོ་སྡེ་ལྔའི་ཙཀྲ་བཅས་གྲུབ་ན་ལེགས་པའི་ཡན་ལག་ཏུ་འགྱུར་ཞིང་། གང་ལྟར་ཡང་རྡོ་རྗེ་གཡུང་དྲུང་གི་རེ་ཁཱ་དཀར་པོ་བྲིས་པའི་ཁར་སྟན་ནང་ཚང་ཅན་འདིང་། མདུན་དུ་ནང་མཆོད། རྡོ་དྲིལ། ལས་བུམ། （6ན）ཌཱ་མ་རུ། མེ་ཏོག་གི་སྣོད་སོགས་ཉེ་བར་མཁོ་བའི་ཆས་རྣམས་ཚོགས་པར་བྱའོ། །གཉིས་པ་དངོས་གཞི་བསྙེན་སྒྲུབ་ཀྱི་ཉམས་ལེན་ལ་གཉིས། རྩ་བ་དང་། ཡན་ལག་གི་རྣལ་འབྱོར་རོ། །དང་པོ་ནི། དེ་ལྟར་བཅས་བཤམས་ལེགས་པར་གྲུབ་པའི་དགོངས་ཐུན་ནས་དབུ་བཟུང་ལ། ཚིག་བདུན་དང་བརྒྱུད་པའི་གསོལ་འདེབས་སྔོན་དུ་འགྲོ་བས་ལས་བྱང་ལྟར་སྐྱབས་སེམས་ཡན་ལག་བཅུ་པ་རྣམས་ལན་གསུམ་གསུམ་བྱ། རང་ཉིད་སྐད་ཅིག་གིས་རྟ་མགྲིན་དུ་གསལ་ལ་རྟ་སྔགས་བརྒྱ་རྩ་ཙམ་བཟླ། ལས་བུམ་དུའང་དེ་ལྟར་བསྐྱེད་དེ་སྔགས་བཟླས་པས་བྱིན་བརླབས། དཀར་གཏོར་བྱིན་བརླབ་བསྔོ་བ་ཕྲིན་བཅོལ་རྣམས་སྤྱི་ལྟར་བྱས་ལ་སྡོང་གྲོགས་བཅོལ། བགེགས་གཏོར་གཞུང་བཞིན་བསྔོས་ཏེ་བཀའ་བསྒོ་དང་བཅས་བསྐྲད། གུ་གུལ་གྱིས་བདུག །ཡུངས་ཐུན་གྱིས་བྲབ། རྣམ་འཇོམས་སྨེ་བརྩེགས་བཟླས་པའི་དྲི་ཆབ་ཀྱིས་བསང་བ་རྣམས་ནན་དུ་བྱ། ཕྱི་སྒོའི་དྲུང་དུ་ཐོ་དཀར་པོ་བརྩིགས་པ་ལ་རྒྱལ་ཆེན་བཞིའི་སྐུའམ་སྔགས་བྱང་བྲིས་པའི་ཤིང་（6བ）བྱང་དང་བ་དན་བཙུགས། མཆོད་གཏོར་བཤམས་ལ་བསང་སྦྱང་བྱིན་རླབས་སྤྱི་ལྟར་བྱ། རང་ཉིད་དབང་ཆེན་དུ་གསལ་བའི་ཐུགས་ཀ་ནས་འོད་ཟེར་འཕྲོས། རི་རབ་ཀྱི་ཕྱོགས་བཞི་ནས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་རྟེན་དང་གཉིས་སུ་མེད་པར་བསམ། ཨོཾ་དྷྲྀཥྚ་རཥྚ་ཡ་སྭཱཧཱ༔ ཨོཾ་བཻ་རུ་ཌྷ་ཀཱ་ཡ་སྭཱཧཱ༔ ཨོཾ་བི་རུ་པཀྵ་ཡ་སྭཱཧཱ༔ ཨོཾ་བེ་ཤྲ་མ་ཎ་ཡ་སྭཱཧཱ༔ ཞེས་སྔགས་རྣམས་ལན་བདུན་རེ་བཟླ། ཨརྒྷཾ་ནས་ཤཔྡའི་བར་གྱིས་ཉེར་སྤྱོད་དང་། སོ་སོའི་སྔགས་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཏགས་པ་ལན་གསུམ་རེས་གཏོར་མ་ཕུལ་ལ། ཧཱུཾ་ཧྲཱིཿ རྒྱལ་བའི་བཀའ་ཉན་བསྟན་པ་སྲུང་མཛད་པ༔ ཕྱོགས་སྐྱོང་རྒྱལ་པོ་ཆེན་པོ་སྡེ་བཞི་པོ༔ གཙང་སྦྱར་མཆོད་སྦྱིན་གཏོར་མ་འདི་བཞེས་ལ༔ གནས་འདིར་སྒྲུབ་པ་མཐའ་རུ་མ་ཕྱིན་བར༔ མ་དག་གདོན་བགེགས་ཚོགས་རྣམས་མཚམས་ཆོད་ཅིག༔ ཅེས་ཕྲིན་ལས་བཅོལ། རང་སྔགས་རྣམས་དང་སུ་པྲ་ཏིཥྛས་བརྟན་བཞུགས་བྱས་ལ་ཕྱི་མཚམས་བཅད། ནང་སྒོའི་ཡ་（7ན）ཐེམ་ལ་རྟ་མགྲིན་གྱི་སྐུའམ་སེང་ལྡེང་གི་ཕུར་བུ་ལ་སྙིང་པོ་བྲིས་པ་བཏགས། མཆོད་གཏོར་བྱིན་བརླབས། རྟེན་བསང་སྦྱང་། སྟོང་པའི་ངང་ལས་རྟེན་ཉིད་སྐད་ཅིག་གིས་དབང་ཆེན་རྟ་མགྲིན་དུ་གསལ་བའི་གནས་གསུམ་འབྲུ་གསུམ་དང་། རང་གི་ཐུགས་ཀ་ནས་འཕྲོས་པའི་འོད་ཟེར་གྱིས་འོག་མིན་ནས་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་རྟེན་དང་གཉིས་མེད་དུ་བསམ། ཨོཾ་བཛྲ་ཀྲོ་དྷ་ཧྱ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ༔ ལན་བདུན། ཨརྒྷཾ་སོགས་དང་། སྔགས་མཐར་ཨི་དཾ་བ་ལིཾ་ཏ་སོགས་བཏགས་པ་ལན་གསུམ་གྱིས་མཆོད་གཏོར་ཕུལ་ལ། ཧཱུྃ༔ སུམ་ཅུ་རྩ་གསུམ་དགའ་ལྡན་ལྷ་ཡུལ་ནས༔ བཅོམ་ལྡན་ཆོས་རྗེ་ལྷ་ཡིས་བཀའ་སྩལ་ལྟར༔ དེང་འདིར་སྒྲུབ་པ་མཆོག་ལ་ད་ཞུགས་ཀྱིས༔ དངོས་གྲུབ་རྒྱ་མཚོ་བདག་གིས་མ་ཐོབ་བར༔ ཁྲོ་བོ་ཆེན་པོ་འཇིགས་བྱེད་རྟ་མགྲིན་གྱིས༔ བར་གཅོད་འབྱུང་པོ་ཐམས་ཅད་ཕྱིར་དེད་ལ༔ མཆོག་ཐུན་དངོས་གྲུབ་འཁྱིལ་བའི་གྲོགས་མཛོད་ཅིག༔ ཅེས་ཕྲིན་ལས་བཅོལ་ཏེ། བརྟན་བཞུགས་དང་ཤིས་པ་བརྗོད་（7བ）ལ་ནང་མཚམས་བཅད། འདི་ནས་བརྩམས་མི་འགྲུལ་བཅད། ཀ་ཅ་ཡི་གེ་སོགས་ཀྱི་གཏོང་ལེན་སྤང་། བོ་ཟག་ལྟེམ་ལོག་བཞིའི་དྲི་མ་བསྲུབ་ཚུལ་འོག་ཏུ་སྨོས་པ་ལྟར་བྱའོ། །དེ་ནས་སྟན་ལ་འཁོད་དེ་དམ་ཚིག་གསུམ་དྲན་པས་རྡོར་དྲིལ་བཟུང་ལ་མཚམས་གཅོད་བཏང་། དམིགས་པ་གནས་ཡུལ་ཐོ་གྲི་གུག་རལ་གྲི་འཁོར་ལོ་རྣམས་ཀྱི་གུར་ཁང་ཟླུམ་པོ་བར་མཚམས་ཐམས་ཅད་ཁྲོ་ཆུང་འཆོལ་པའི་ཚོགས་སྐར་ལྟར་འཁྲུགས་ཤིང་། ཕྱི་རོལ་དུ་ཡེ་ཤེས་ཀྱི་མེ་ཁ་དོག་སྣ་ལྔ་པ་འབར་བའི་སྲུང་བའི་འཁོར་ལོ་ཤིན་ཏུ་བརྟན་པས་དཀྲིག་སྟེ་བར་དུ་གཅོད་པ་གང་གིས་ཀྱང་གླག་མི་རྙེད་པར་བསྒོམ། འདི་ཉིད་སྒྲུབ་པ་ཐམས་ཅད་གྲུབ་པའི་རྗེས་ཆོག་གི་ཉེར་བསྡུའི་སྐབས་བར་མི་བསྡུ་ཞིང་ཐུན་མགོ་རྣམས་སུའང་གསལ་འདེབས་བསྐྱར་མ་རེ་བྱ། དེ་ནས་བརྡ་སྒོ་དབྱེ་བ་སོགས་སྔོན་འགྲོའི་ལས་རིམ་ཚང་བ་དང་། ཏིང་འཛིན་རྣམ་གསུམ་ནས་བརྩམས་དཀྱིལ་འཁོར་རྟེན་བརྟེན་པར་བཅས་པ་བདག་མདུན་དབྱེར་མེད་དུ་（8ན）བསྐྱེད་ལ། སྤྱན་འདྲེན་ནས་མཆོད་བསྟོད་བཤགས་པའི་བར་དུ་བཏང་། བསྙེན་པ་སུམ་བརྒྱ། སྒྲུབ་སྔགས་སྟོང་རྩ། ལས་སྦྱོར་ཉེར་གཅིག་ཙམ་བཟླས་ལ་ཛཔྲ་བསྟོད་འབུལ། དམ་ཅན་གཏོར་ཆོག་དང་ཚོགས་བྱིན་བརླབ་ནས་ལྷག་མའི་བར་བཏང་། བསྙེན་སྒྲུབ་ཀྱི་ཚེ་ལྷག་མ་བཙོན་འཛིན་བྱ་དགོས་པས་འཛོམ་ན་དཀྱིལ་འཁོར་གྱི་བྱང་ཤར་དུ་ཞིང་ལྤགས་དངོས་སམ་རི་མོར་བྲིས་པའི་སྟེང་ཐལ་ཆེན་གྱི་ཚོམ་བུ་བཀོད་པར་རམ། མ་འཛོམ་ན་སྣོད་དུ་བསགས་ལ་ཁེབས་ཀྱིས་བཀབ། བསྐུལ་དང་ཆད་བརྟན་རྟ་བྲོ་བཅས་གྲོལ་དུས་ལས་མི་དགོས་པས་བཟོད་གསོལ་བསྡུ་ལྡང་བསྔོ་སྨོན་ཤིས་བརྗོད་ཀྱི་བར་བྱས་ཏེ་ཉལ་བའི་རྣལ་འབྱོར་ལ་འཇུག །ཕྱིར་ནངས་ནས་བརྩམས་ཐུན་བཞིའི་རིམ་པས་ཉམས་སུ་བླང་དགོས་པ་ལས། ཐོག་མར་ཐོར་ཐུན་ལ། ཚིག་བདུན་བརྒྱུད་འདེབས་སྐྱབས་སེམས་ཚོགས་བསགས་རྣམས་དང་མཚམས་གཅོད་ནས་བཟུང་ལས་བྱང་མཐར་ཆགས་སུ་བཏང་། དེ་ལ་སྐུ་བསྐྱེད་པ། སྙིང་པོ་བཟླ་བ། དགོངས་པ་བསྐྱང་བ་གསུམ་དངོས་གཞིའི་（8བ）སྐབས་དོན་གྱི་གཙོ་བོ་ཡིན་པས། དང་པོ་ནི། ཏིང་ངེ་འཛིན་རྣམ་གསུམ་གྱིས་ཁོག་དབུབ། རྟེན་དང་བརྟེན་པའི་དཀྱིལ་འཁོར་མདུན་གྱི་སྒྲུབ་དཀྱིལ་དམིགས་རྟེན་གྱི་མཚན་གཞི་ལྟ་བུར་བཟུང་སྟེ་བདག་མདུན་དབྱེར་མེད་དུ་བསྒོམ་པ་སྟེ། དེའང་དཀྱིལ་འཁོར་གྱི་དབུས་སུ་རང་ཉིད་གཙོ་བོ་རྟ་ཕག་ཡབ་ཡུམ་དུ་གསལ་བའི་སྤྱི་བོར་བླ་མ་རྡོ་རྗེ་ཐོད་ཕྲེང་རྩལ་ཡབ་ཡུམ། དེའི་ཐུགས་ཀ་དང་ཕྱོགས་བཞིའི་པད་འདབ་ལ་ཐོད་ཕྲེང་རིགས་ལྔ། དེའི་ཕྱི་རོལ་དུ་རིམ་བཞིན་འགྲོ་འདུལ་གུ་རུ་དྲུག །སྤྲུལ་པའི་མཚན་བརྒྱད། སྒོའི་ནང་ཁོངས་སུ་རིགས་བཞིའི་མཁའ་འགྲོ་ཡབ་ཡུམ། དེ་མཐར་མོས་བསྐྱེད་ཙམ་གྱིས་རྩ་བརྒྱུད་བླ་མའི་ཚོགས་དང་། སྣ་ཚོགས་པད་འཁོར་ཕྱི་མ་ལ་ཡི་དམ་ལྷ་དང་རིག་འཛིན་མཁའ་འགྲོ་ཆོས་སྐྱོང་རྣམས་སྤྲིན་གཏིབས་པ་བཞིན་དུ་གསལ་ཞིང་། དེ་ཐམས་ཅད་དུ་མར་སྣང་ཡང་རང་གི་སེམས་ཉིད་བླ་མ་ཐོད་ཕྲེང་རྩལ་གྱི་རང་བཞིན་དུ་རྣམ་པར་དག་པའི་རྩལ་སྣང་ཙམ་དུ་ཐག་བཅད་ནས། མ་འདྲེས་ཡོངས་རྫོགས་མེ་ལོང་ནང་གི་གཟུགས་བརྙན་བཞིན་གསལ་（9ན）སྟོང་ཞེན་བྲལ་དུ་བསྒོམ། རྗེས་འབྲེལ་དུ་ཡེ་ཤེས་པ་སྤྱན་འདྲེན་ཅིང་བཞུགས་གསོལ་ཕྱག་མཆོད་བསྟོད་བཤགས་རྣམས་ཚང་བར་བྱ། གཉིས་པ་སྔགས་བཟླ་བའི་ཐོག་མར་བསྙེན་པའི་དོན་དུ། སྤྱི་བོའི་བླ་མའི་ཐུགས་ཀར་ཟླ་བའི་གདན་ལ་གསེར་གྱི་རྡོ་རྗེ་རྩེ་ལྔ་པའི་ལྟེ་བར་ཧྲཱིཿདཀར་པོའི་མཐར་སྙིང་པོ་བཛྲ་གུ་རུས་བསྐོར་བར་བསྒོམ། དེ་ལས་འོད་ཟེར་ཕྱོགས་བཅུར་འཕྲོས་པས་སངས་རྒྱས་བྱང་སེམས་རྩ་གསུམ་རིག་འཛིན་རྒྱ་མཚོའི་ཚོགས་ལ་མཉེས་པའི་མཆོད་པ་ཕུལ། དེ་དག་གི་དབང་བྱིན་དངོས་གྲུབ་ཐམས་ཅད་འོད་ཟེར་བདུད་རྩིའི་རྣམ་པར་བསྡུས་ཏེ་བླ་མ་ལ་ཐིམ་པས། བླ་མ་ཉིད་སངས་རྒྱས་ཀུན་འདུས་ཀྱི་ངོ་བོར་ཆེ་བའི་གཟི་བྱིན་ལྷག་པར་བསྐྱེད་པར་བསམ་ཞིང་། མོས་གུས་གདུང་ཤུགས་དྲག་པོས་གསོལ་འདེབས་སྔོན་དུ་འགྲོ་བས་བཛྲ་གུ་རུ་ཅུང་ཟད་བཟླས་མཐར་དབང་བླང་བའི་དམིགས་པ་ནི། བླ་མ་ཡབ་ཡུམ་གཉིས་མེད་པའི༔ སྤྱི་གཙུག་ཨོཾ་ལ་མགྲིན་པར་ཨཱཿ ཐུགས་ཀར་ཧཱུཾ་ལ་ལྟེ་བར་ཧྲཱིཿ ཡུམ་གྱི་ལྟེ་བར་མ་བསྒོམ་（9བ）མོ༔ དེ་ནས་ཡབ་ཡུམ་སྤྱི་གཙུག་ནས༔ ཨོཾ་དཀར་འོད་ཟེར་དང་བཅས་པ༔ བདག་གི་སྨིན་མཚམས་མཛོད་སྤུར་བབས༔ བུམ་དབང་ཐོབ་ནས་ལུས་སྒྲིབ་དག༔ སྐུ་ཡི་དངོས་གྲུབ་ཐོབ་པར་བསམ༔ དེ་ནས་ཡབ་ཡུམ་མགྲིན་པ་ནས༔ ཨཱཿདམར་འོད་ཟེར་དང་བཅས་པ༔ བདག་གི་ལྕེ་ཡི་དབང་པོར་བབས༔ གསང་བའི་དབང་ཐོབ་ངག་སྒྲིབ་དག༔ གསུང་གི་དངོས་གྲུབ་ཐོབ་པར་བསམ༔ དེ་ནས་ཡབ་ཡུམ་ཐུགས་ཀ་ནས༔ ཧཱུཾ་མཐིང་འོད་ཟེར་དང་བཅས་པ༔ བདག་གི་སྙིང་གའི་དཀྱིལ་དུ་བབས༔ ཡེ་ཤེས་དབང་ཐོབ་ཡིད་སྒྲིབ་དག༔ ཐུགས་ཀྱི་དངོས་གྲུབ་ཐོབ་པར་བསམ༔ དེ་ནས་ཡབ་ཡུམ་ལྟེ་བ་ནས༔ ཧྲཱིཿམ་འོད་ཟེར་ལྔ་བཅས་པ༔ བདག་གི་ལྟེ་བའི་དཀྱིལ་དུ་བབས༔ སྒོ་གསུམ་ཐ་དད་འཛིན་སྒྲིབ་དག༔ དབྱེར་མེད་ལྷན་སྐྱེས་དབང་བཞི་ཐོབ༔ བདག་དང་སེམས་ཅན་ཀུན་བདེར་གྱུར༔ ཞེས་གསུངས་པ་བཞིན་དབང་བཞི་བླང་རྗེས་བླ་མ་ཡབ་ཡུམ་ཀྱང་འོད་དུ་ཞུ་ནས་རང་ལ་ཐིམ་པས་གཉིས་སུ་མེད་པར་མོས་ལ་དབང་དོན་བསམ་པ་ནི། ལུས་ནི་རྣམ་སྣང་（10ན）ཆོས་བདུན་བཅའ༔ ཡིད་ནི་གསང་ལམ་མིག་འབྲས་ཀྱི༔ དཀྱིལ་དུ་མ་ཡེངས་ཙེན་ནེ་བཞག༔ བློ་ཡིས་མ་བཅོས་དྲན་མེད་དུ༔ སྐྱེས་བུ་ཁོང་སྙིང་ཕྱུངས་པ་ལྟར༔ བདག་འཛིན་མེད་པར་ས་ལེར་བཞག༔ བསྒོམ་བྱ་སྒོམ་བྱེད་མེད་པར་བཞག༔ རང་བྱུང་ཡེ་ཤེས་ལྷན་སྐྱེས་འཆར༔ བདེ་གསལ་ཆོས་ཉིད་རོལ་པ་ལ༔ དེར་འཛིན་སྐྱེས་ན་འཆིང་བར་བྱེད༔ དེ་ཉིད་རང་རིག་མི་འགྱུར་ན༔ རིག་པ་རྩལ་གྱི་དབང་ཐོབ་ནས༔ ཉོན་མོངས་སྐྱེས་ཚད་གྲོགས་སུ་འཆར༔ བདག་ཉིད་ཆེན་པོ་བླ་མ་ཡི༔ དབང་ཆེན་ཐོབ་པར་ངེས་ཤེས་བསྐྱེད༔ ཅེས་གསུངས་པ་ལྟར་དགོངས་པ་བསྐྱང་། དངོས་གཞི་སྒྲུབ་པའི་དམིགས་པ་གཞུང་གསལ་ལྟར་ལ་བཟླ་བྱའི་སྔགས་ཐོད་ཕྲེང་རྩལ་ཤམ་བུ་མེད་པ་ཁོ་ན་ཡིན་ཏེ། ཞལ་གདམས་སུ། ས་ནི་བཅུ་གསུམ་ལམ་ལྔ་ཡང་༔ ང་བསྒྲུབ་ཐོད་ཕྲེང་བཟླས་པས་བགྲོད༔ དུས་གསུམ་བདེ་གཤེགས་ཐམས་ཅད་ཀྱི༔ གསུང་རབ་ཐམས་ཅད་ཀློག་དང་མཚུངས༔ ཞེས་དང་། རེས་འགའ་སྔགས་ཀྱི་འབྲུ་དོན་བསམ༔ ཨོཾ་ནས་ཨཱཿནི་ཡན་ཆོད་（10བ）ལ༔ བཟླས་བསྒོམ་རིག་པ་གཏད་དུས་སུ༔ བླ་མ་ཌཱ་ཀིའི་སྲོག་ཐོབ་འགྱུར༔ ཞེས་གསུངས་པས། འབྲུ་ཉེར་བཞི་པོ་རེ་རེ་བཞིན་དབྱིབས་དང་གདངས་དང་ཤེས་ན་སྔགས་དོན་བསམ་ལ་སེམས་གཏད་པ་དང་། ཡང་། རེས་འགའ་ཐོད་ཕྲེང་རྩལ་གྱི་སྐུ༔ ནམ་མཁའ་གང་བ་ཆད་ལྟར་བབས༔ སྒྲུབ་པ་པོ་ཡི་སྤྱི་བོར་ཐིམ༔ ཤ་མེད་འོད་ཀྱི་གཟུགས་ཅན་ནི༔ པདྨ་འབྱུང་གནས་སྐུ་རུ་བསྒོམ༔ དེ་དུས་ཆེ་བའི་ང་རྒྱལ་བསྐྱེད༔ སྲོག་གི་སྙིང་པོ་ཐོད་ཕྲེང་རྩལ༔ བྲག་ཁ་དག་ནས་ཆུ་འབབ་བཞིན༔ དྲག་པོར་བར་མཚམས་མེད་པར་སྒྲོངས༔ ང་ཉིད་རང་དབང་མེད་པར་འབྱོན༔ ཨོཾ་རྒྱན་པདྨ་བདག་ཉིད་ལ༔ མོས་གུས་དྲག་པོས་གུས་པ་དང་༔ དུང་དུང་གདུང་སེམས་དྲག་པོ་ཡིས༔ གསོལ་བ་དྲག་པོ་བཏབ་པའི་ཚེ༔ ང་ཉིད་དེ་ཡི་དྲུང་དུ་འབྱོན༔ ཞེས་གསུངས་པའི་ཚིག་དོན་བསམ་ཞིང་ངེས་ཤེས་བསྐྱེད། ཁྱད་པར་ཐོད་ཕྲེང་རྩལ་གྱི་སྐུ་ནམ་མཁའ་གང་བར་བྱོན་ཏེ་རང་ལ་ཐིམ་པའི་དམིགས་པ་སོགས་བྱ། གཞན་ཡང་། ཙ་ཀ་ལི་ནི་སྐུ་ཡི་རྟེན༔ དེ་ལ་བལྟ་ཞིང་དམིགས་པ་བཟུང་༔ མ་（11ན）ཡེངས་ཡིད་ཀྱི་འཛིན་ཕུར་གདབ༔ ཅེས་གསུངས་པས་མདུན་གྱི་སྐུ་རྟེན་དེ་ལ་མིག་ཙིར་ཟིན་མདུང་ཚུགས་མིན་པའི་ཡིད་མིག་རླུང་གསུམ་ལྷན་ནེར་གཏད་ལ་བཟླ་བ་སོགས་མདོར་ན་དམིགས་གཏད་གཅིག་ཁོ་ནའི་སྤར་བཀབ་མིན་པར་ཤེས་པ་བག་ཡངས་སུ་མ་ཤོར་བའི་ངང་ནས་ཉམས་དང་གང་མཐུན་པ་བསྐྱང་ཞིང་ཛཔྲ་བཟླའོ། །བཟླས་པའི་ཐུན་འཇོག་ཁར་གསུམ་པ་དགོངས་པ་བསྐྱང་བ་ནི། ཧཱུཾ་ཧྲཱིཿ རང་སྣང་སྣང་བ་མཐའ་ཡས་སྐུ༔ གཟུང་འཛིན་བྲལ་བའི་སེམས་ལ་ལྟོས༔ ཆོས་སྐུ་སྣང་མཐའ་ལོགས་ན་མེད༔ རང་རིག་ཆོས་སྐུ་ངོ་མཚར་ཆེ༔ ཧཱུཾ་ཧྲཱིཿ སྒྲ་གྲགས་འགགས་མེད་ཐུགས་རྗེ་ཅན༔ སྨྲ་བསམ་བརྗོད་འདས་དོན་ལ་ལྟོས༔ ནམ་མཁའི་རྒྱལ་པོ་ལོགས་ན་མེད༔ རང་བྱུང་ལོངས་སྐུ་ངོ་མཚར་ཆེ༔ ཧཱུཾ་ཧྲཱིཿ རྟོག་ཚོགས་རང་གྲོལ་པདྨ་འབྱུང་༔ འཛིན་མེད་ཟང་ཐལ་ངང་ལ་ཞོག༔ པདྨ་འབྱུང་གནས་ལོགས་ན་མེད༔ ཐུགས་རྗེ་སྤྲུལ་སྐུ་ངོ་མཚར་ཆེ༔ ཧཱུཾ་ཧྲཱིཿ སྣང་བའི་ངོ་བོ་དཔལ་ཆེན་རྟ་མགྲིན་ཡབ༔ སྟོང་པའི་རང་བཞིན་（11བ）རྡོ་རྗེ་རྣལ་འབྱོར་མ༔ དུག་ལྔ་རང་གྲོལ་སྐུ་ལྔ་ལྷུན་གྱིས་གྲུབ༔ ཚོགས་དྲུག་རང་གྲོལ་འགྲོ་འདུལ་གུ་རུ་དྲུག༔ མ་འགག་གང་འདུལ་སྤྲུལ་པ་མཚན་མཆོག་བརྒྱད༔ ཡེ་ཤེས་ལྔ་ལྡན་དཔའ་བོ་གིང་ཆེན་ཚོགས༔ འབྱུང་བ་ལྔ་དག་མཁའ་འགྲོ་སྡེ་ལྔར་ཤར༔ ཐམས་ཅད་རང་བྱུང་རང་ཤར་རང་ལ་རྫོགས༔ རང་བྱུང་དངོས་གྲུབ་བསམ་ཡས་པ༔ སྐྱེ་མེད་ཆོས་སྐུའི་རང་རྩལ་ཡིན༔ སྐྱེ་མེད་བདེ་ཆེན་དོན་རྟོགས་ན༔ གཞི་མེད་རྩ་བྲལ་ལྷན་སྐྱེས་འཆར༔ ཞེས་འདོན་སྒོམ་སྦྲག་ཅིང་། ལྷ་སྔགས་ལ་ཆེད་འཛིན་གྱི་སྤྲོས་པ་དོར་ཏེ་རང་རིག་གཉུག་མའི་ངོ་བོ་ཟང་ཐལ་རྗེན་པར་བསྐྱང་བཞིན་པའི་ངང་ནས་ཛཔྲ་ཀྱང་བཟླ། ཐུན་མཐར་ཉེར་སྤྱོད་སྨན་རཀ་གཏོར་མ་སྔགས་ཙམ་གྱིས་མཆོད་ཅིང་མ་བཅོས་སྤྲོས་བྲལ་སོགས་ཤློ་ཀས་བསྟོད། ཡི་གེ་བརྒྱ་པས་ནོངས་པ་བཤགས་ནས། དཀྱིལ་འཁོར་གྱི་འཁོར་ལོ་ཐམས་ཅད་འོད་གསལ་དུ་བསྡུས་ཏེ་བློ་འདས་ཀ་དག་གི་ངང་ལ་བཞག །སླར་ཡང་ཟུང་འཇུག་གི་སྐུར་ལྡང་ལ་བསྔོ་སྨོན་དང་ཤིས་བརྗོད་བྱ། དེ་ནས་ཞོག་ཐུན། དགོངས་ཐུན། （12ན）སྲོད་ཐུན་རྣམས་ཀྱང་མཚམས་གཅོད་ནས་བཟུང་དེས་རིགས་འགྲེས་སུ་བྱ་ཞིང་། དགོངས་ཐུན་ནམ་སྲོད་ཐུན་གང་རིགས་ཀྱི་རྗེས་སུ་ཚོགས་མཆོད་དང་དམ་ཅན་གཏེར་སྲུང་གི་གཏོར་འབུལ་རྣམས་ཀྱང་མ་ཆག་པར་བྱའོ། །ཚུལ་དེ་ལྟ་བུའི་རིམ་པས་གྲངས་དུས་མཚན་མའི་བསྙེན་པ་གསུམ་གང་ཡང་རུང་བ་ཞིག་མཐར་ཕྱིན་པར་བྱ་སྟེ། ཞལ་གདམས་ལས། གྲངས་ཀྱི་བསྙེན་པ་བྱེ་བ་དང་༔ དུས་ཀྱི་བསྙེན་པ་ཟླ་བ་གསུམ༔ དེ་བར་མཚམས་ནི་དམ་པོར་བསྡམ༔ ཞེས་གསུངས་པས། དུས་ཟླ་བ་གསུམ་གྱི་རིང་ཐོད་ཕྲེང་རྩལ་འབུམ་ཕྲག་བཅུ་འདྲེན་དགོས་ལ། དེ་ཡང་ཁ་ཅིག་ཏུ། གཅིག་བཅུ་བརྒྱ་སྟོང་ཁྲི་འབུམ་དང་། ས་ཡ་བྱེ་བ་དུང་ཕྱུར་ཏེ། ཞེས་ས་ཡ་སྔོན་དུ་འདྲེན་ཀྱང་། རང་ལུགས་གུ་རུའི་གསུང་ལས། བརྒྱ་སྟོང་ཁྲི་འབུམ་བྱེ་བ་གཅིག༔ ཅེས་གསུངས་པས་འབུམ་བཅུ་ལ་བྱེ་བ་ཕྲག་གཅིག་ཏུ་བརྩི་བ་ཡིན། མཚན་མའི་རྟགས་ནི་སྔོན་གྱི་ལས་འཕྲོ་ཆེ་ཆུང་གི་དབང་གིས་ངེས་མེད་དུ་འབྱུང་བ་ཡིན་ཅིང་། ཇི་ལྟར་འབྱུང་ཚུལ་ཀྱང་ཞལ་གདམས་（12བ）ལས། དེ་ལ་གྲུབ་རྟགས་རབ་འབྲིང་ནི༔ རབ་ཀྱིས་དངོས་སུ་ཞལ་མཐོང་ཞིང་༔ འབྲིང་གིས་རྟགས་ནི་ལམ་ཙམ་མཐོང་༔ ཐ་མས་ཟླ་བ་གསུམ་ནང་དུ༔ རྨི་ལྟས་བཟང་པོ་མཐོང་བར་འགྱུར༔ ཞེས་དང་། ཐུན་མོང་དུ་ནི་འདི་ལྟར་འབྱུང་༔ བདག་ལུས་བདེ་བའི་དངོས་གྲུབ་འབྱུང་༔ ལུས་ཀྱི་རྫུ་འཕྲུལ་སྟོན་པར་ནུས༔ དྷཱ་ཀི་དབང་དུ་འདུས་པའི་རྟགས༔ བུད་མེད་རིགས་གྱུར་ཀུན་ཀྱང་འདུ༔ དཔའ་མོ་དབང་དུ་འདུས་པའི་རྟགས༔ སྔགས་བཙུན་སྐྱེ་བོ་ཐམས་ཅད་འདུ༔ དཔའ་བོ་དབང་དུ་འདུས་པའི་རྟགས༔ རབ་དངོས་འབྲིང་ཉམས་ཐ་མ་ཡང་༔ རྨི་ལམ་ཙམ་དུ་མཁའ་འགྲོ་རྣམས༔ ལུང་སྟོན་ཆོས་བཤད་ལེགས་ཉེས་སྨྲ༔ ལྷ་འདྲེ་མི་གསུམ་དབང་དུ་འདུ༔ རིགས་གང་དབང་དུ་འདུས་པའི་སར༔ གདུལ་བྱ་རྒྱ་མཚོ་མ་ལུས་འབྱུང་༔ ངག་ལ་ནུས་པ་ཐོགས་མེད་འབྱུང་༔ མ་བསླབ་ཆོས་སྒོ་སྨྲ་བར་ནུས༔ སྨྲས་པ་བཙན་ཅིང་སྨོན་ལམ་འགྲུབ༔ ཡིད་ལ་དག་སྣང་དཔག་མེད་འཆར༔ བླ་མ་དྷཱ་ཀིའི་གནས་ཆེན་མཐོང་༔ མངོན་པར་ཤེས་པ་ཕྲ་མོ་འབྱུང་༔ ཁྱད་པར་（13ན）རྟགས་སུ་བླ་མ་ལ༔ དག་སྣང་དཔག་མེད་འཆར་བ་དང་༔ ཆོས་སྒོ་དཔག་མེད་གསུངས་པ་དང་༔ ཡང་ན་སྣང་བ་བླ་མར་འཆར༔ སྣང་སྲིད་ཀུན་གྱི་ཆོས་རྣམས་སྟོན༔ དངོས་སུ་བསམ་པ་ཡིད་བཞིན་འགྲུབ༔ འོན་ཀྱང་དམ་ལ་གནས་པ་གཅེས༔ ཞེས་གསུངས་སོ། །གཉིས་པ་ཡན་ལག་གི་རྣལ་འབྱོར་ནི། མཉམ་པར་མ་བཞག་པའི་རྣལ་འབྱོར་ཅེས་མན་ངག་རྣམས་ནས་དབྱེ་བ་མང་དུ་གསུངས་ཀྱང་། འདིར་སྐབས་སུ་བབས་པའི་རྣལ་འབྱོར་ལ་དྲུག་སྟེ། དང་པོ་ཉལ་བའི་རྣལ་འབྱོར་ནི། སྟོང་པའི་ངང་དུ་ཉལ་ན། སྙིང་གའི་ས་བོན་གྱི་འོད་ཀྱིས་སྣོད་བཅུད་རང་ལུས་ཐུགས་སྲོག་ལ་རིམ་པར་བསྡུས་ཏེ་དེ་ཉིད་སྟོང་པའི་དབྱིངས་སུ་ཞུགས་པ་ལ་བློ་བཞག་ནས་སེང་གེའི་སྟབས་ཀྱིས་ཉལ། བདེ་བའི་ངང་དུ་ཉལ་ན། གདན་གཞལ་ཡས་ཁང་སོགས་མི་བསྡུ་བར་འཁོར་རྣམས་གཙོ་བོའི་ཐུགས་སྲོག་ཧྲཱིཿལ་བསྡུ། གཙོ་བོ་ཡབ་ཡུམ་སྙོམས་པར་ཞུགས་ཏེ་བདེ་བ་ཆེན་པོས་འོད་དུ་ཞུ། བྱང་ཆུབ་སེམས་ཀྱི་ཐིག་ལེར་གྱུར་པ་ལ་སེམས་བཟུང་ནས་ཉལ་ལོ། （13བ）གཉིས་པ་ལྡང་བའི་རྣལ་འབྱོར་ནི། སྟོང་པའི་ངང་ལས་ལྡང་ན། གཉིད་སད་མ་ཐག་ཧྲཱིཿཞེས་བརྗོད་པས་རང་གི་རྣམ་ཤེས་འོད་གསལ་བའི་ངང་ལས་བླ་མ་ཐོད་ཕྲེང་རྩལ་གྱི་སྐུར་ལྡང་། ཐུགས་ཀའི་ཧྲཱིཿལས་འོད་འཕྲོས་པས་རྟེན་དང་བརྟེན་པའི་དཀྱིལ་འཁོར་སྣོད་བཅུད་དང་བཅས་པ་གསལ་ཞིང་ཐམས་ཅད་ཕྲིན་ལས་འཇུག་པའི་ཡུལ་དུ་མོས་པས་ལྡང་། བདེ་བའི་ངང་ནས་ལྡང་ན། རང་བཞིན་གྱི་དབྱིངས་ནས་བསྐྱོད་བྱེད་ཀྱི་མཁའ་འགྲོ་ལྔ་བྱོན་ཏེ་བརྡས་བསྐུལ་བས་འབྲས་བུའི་རྡོ་རྗེ་འཛིན་པའི་སྐུར་བཞེངས་པའི་ཚུལ་གྱིས་རྣལ་འབྱོར་པ་ལངས་ལ། ཐུགས་ཀའི་ས་བོན་ལས་འཕྲོས་པའི་འོད་ཀྱིས་སྣོད་གཞལ་ཡས་ཁང་དང་བཅུད་ལྷའི་འཁོར་ལོར་སྔར་ལྟར་རྫོགས་པར་བལྟ། གཞན་ཡང་ལངས་མ་ཐག་པ་དེར་རླུང་རོལ་ན་གསུམ་མམ་དགུ་དབྱུང་བས། འཁོར་བ་ཐོག་མེད་ནས་བསགས་པའི་ལས་ཉོན་སྡིག་སྒྲིབ་ཉེས་ཚོགས་ཐམས་ཅད་ཀཾ་ནག་པོ་ལས་བྱུང་བའི་སྡིག་པ་རྭ་ཅན་གྱི་རྣམ་པར་གྱུར་པ་ཉོན་མོངས་པའི་རླུང་དང་བསྡོངས་ཏེ་སྣ་སྒོ་ནས་སང་སང་ཐོན། མདུན་དུ་ཡེ་ཤེས་ཀྱི་མེས་སྦྱངས་（14ན）པར་མོས་ལ། ཨོཾ་ཨཱཿཧཱུཾ་ན་མོ་གུ་རུ་ཡ༔ བུདྡྷ་ཡ༔ དྷརྨ་ཡ༔ སཾ་ག་ཡ༔ མ་མ་ཀཱ་ཡ་ཝཱཀ་ཙིཏྟ་སརྦ་ཀརྨ་པཱ་པཾ་ད་ཧ་ན་བི་ཤུདྡྷེ་སྭཱཧཱ༔ ཞེས་ལན་གསུམ་བརྗོད། ངག་བྱིན་གྱིས་བརླབ་ཅིང་། གཟུངས་སྔགས་ཀྱི་ཉེས་སེལ་སོགས་ཀྱང་ནུས་ན་གནད་དུ་ཆེའོ། །གསུམ་པ་ཁྲུས་ཀྱི་རྣལ་འབྱོར་ནི། ཆབ་ལྡན་གྱི་ཁྲུས་བུམ་དུ་རྣམ་འཇོམས་སྨེ་བརྩེགས་བདུད་རྩི་འཁྱིལ་བ་སོགས་བསྐྱེད་བཟླས་སྤྱི་དང་། ཁྱད་པར་ཨོ་རྒྱན་ལ་འཁོར་མཁའ་འགྲོ་སྡེ་བཞིས་བསྐོར་བ་ལས་བདུད་རྩིའི་རྒྱུན་བབས། མཐར་ལྷ་ཡང་འོད་དུ་ཞུ་ནས་ཆུ་དང་དབྱེར་མེད་དུ་གྱུར་པར་མོས་ལ། ཐོད་ཕྲེང་རྩལ་གྱི་ཤམ་དུ། ཤུདྡྷེ་ཤུདྡྷེ་བི་ཤུདྡྷེ་སྭཱཧཱ༔ ཞེས་བཏགས་པ་ཅི་འགྲུབ་བཟླ། རང་གི་སྙིང་གའི་འོད་ཀྱིས་རིགས་ལྔ་འཁོར་བཅས་སྤྱན་དྲངས་པ་དེ་རྣམས་ཀྱིས། ཨོཾ་ན་མཿསརྦ་ཏ་ཐཱ་ག་ཏ་ཨབྷི་ཥེ་ཀ་ཏ་ས་མ་ཡ་ཤྲཱི་ཧཱུྃ༔ ཞེས་གསུངས་ཤིང་བུམ་པའི་ཆུ་རྒྱུན་སྤྱི་བོ་ནས་བླུགས་པས་སྒོ་གསུམ་གྱི་དྲི་མ་ཐམས་ཅད་དག །ཡེ་ཤེས་ཀྱི་བདུད་རྩིས་ལུས་མེར་གྱིས་གང་བར་བསམ་ལ་བཏུང་བ་དང་ཁྲུས་བྱ། གཞན་ཡང་（14བ）ལག་པ་གཡོན་པར་མེ་ཏོག་གི་ཕྲེང་བ་ཐོགས་པ་སྤྱི་བོར་བཞག་ཅིང་། ཨོཾ་ཨཱཿཧཱུཾ་བཛྲ་གུ་རུ་དྷེ་ཝ་དྷཱ་ཀི་ནཱི་མ་ཎི་དྷ་རི་བཛྲཱི་མ་ཧཱ་པྲ་ཏི་སཱ་རེ་རཀྵ་རཀྵ་མཱྃ་ཧཱུཾ་ཧཱུཾ་ཕཊ་ཕཊ་སྭཱཧཱ༔ ཞེས་ལན་བདུན་བཟླས་པས་མི་མཐུན་པའི་ཕྱོགས་ངན་པ་ཐམས་ཅད་བསྲུང་བར་འགྱུར་བའང་ཞར་བྱུང་ངོ་། །བཞི་པ་ཁ་ཟས་ཀྱི་རྣལ་འབྱོར་ནི། རང་ཉིད་ལྷའི་ང་རྒྱལ་ལ་གནས་པས་ལག་གཡས་དགང་གཟར། གཡོན་བླུགས་གཟར། ཁ་ཐབ་ཁུར། ལྟེ་བར་གཏུམ་མོའི་མེ་སྦར་བས་ལུས་ཐམས་ཅད་གང་། མེའི་ནང་དུ་བླ་མ་ཡི་དམ་མཁའ་འགྲོ་ཆོས་སྐྱོང་དང་བཅས་པ་གསལ་བཏབ། མཆོད་པ་འབུལ་བའི་བསམ་པས་བཟའ་བཏུང་ཨོཾ་ཨཱཿཧཱུྃ་གིས་ཡེ་ཤེས་ཀྱི་བདུད་རྩིར་བྱིན་གྱིས་བརླབ་ལ་ཆགས་ཞེན་སྲེད་པ་དང་བྲལ་བས་ནང་གི་སྲེག་བླུག་ཏུ་ལོངས་སྤྱད། ལྷག་མ་རྣམས་ཀྱང་ལྷག་ལ་དབང་བའི་འབྱུང་པོ་རྣམས་ལ། ཨོཾ་ཨུཙྪིཥྚ་བ་ལིནྟ་བྷཀྵ་སི་སྭཱཧཱ༔ ཞེས་སེ་གོལ་གྱི་སྒྲ་དང་བཅས་པས་སྦྱིན་པར་བྱའོ། །ལྔ་པ་སྤྱོད་ལམ་གྱི་རྣལ་འབྱོར་ནི། ཐུན་མཚམས་ཐམས་ཅད་དུ་སྣོད་གཞལ་ཡས་ཁང་། བཅུད་ལྷ་དང་ལྷ་མོ། བདག་ཉིད་ཐོད་ཕྲེང་（15ན）རྩལ་གྱི་རྣམ་རོལ་དུ་ཤེས་པས་སྤྱོད་ཡུལ་གྱི་སྣང་བ་ཐམས་ཅད་ལ་སྒྱུ་མ་རྨི་ལམ་ལྟ་བུར་ཞེན་ཆགས་མེད་པར་ཆོས་ཉིད་ལ་ཆོས་ཉིད་རོལ་པའམ། ཡང་ན་ཅི་བྱས་ཐམས་ཅད་བླ་མའི་རིམ་གྲོ་དང་སེམས་ཅན་གྱི་དོན་ལ་འཇུག་པའི་མོས་པ་བྱའོ། །དྲུག་པ་རྗེས་ཆགས་ཀྱི་རྣལ་འབྱོར་ནི། ཁྱད་པར་བ་ནི་ཟབ་ལམ་པའི་སྤྱོད་ཡུལ་ཏེ་འདིར་མ་སྤྲོས་ལ། ཐུན་མོང་ཙམ་དུ་བདག་ཉིད་ཐོད་ཕྲེང་རྩལ་ཡབ་ཡུམ་དུ་གསལ་བ་ལྷའི་འདུ་ཤེས། མཁའ་གསང་རྡོ་རྗེ་དང་པདྨར་བྱིན་གྱིས་བརླབ་པ་སྔགས་ཀྱི་འདུ་ཤེས། རང་གནས་ཀྱི་བདེ་ཆེན་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ། འདུ་ཤེས་གསུམ་ལྡན་གྱི་ངང་ནས་སྙོམས་པར་ཞུགས་པས་ལུས་ཐམས་ཅད་བདེ་བས་ཁྱབ་ཅིང་རྩ་ཁམས་ཀྱི་དཔའ་བོ་མཁའ་འགྲོ་ཐམས་ཅད་མཉེས་ཤིང་ཚིམ། ངོ་བོ་བརྗོད་བྲལ་ཀ་དག་གི་ཀློང་དུ་ལ་བཟླ་བས་བདེ་སྟོང་ཟུང་འཇུག་གི་ཏིང་ངེ་འཛིན་བསྐྱེད་པར་བྱའོ། །གསུམ་པ་རྗེས་མཐའ་རྒྱས་ཀྱི་ལས་རིམ་ལ་གསུམ། ཐུན་མོང་ལས་ལ་སྦྱོར་བ། ཁྱད་པར་དངོས་གྲུབ་བླང་བ། དཀྱིལ་འཁོར་བསྡུ་ཞིང་མཚམས་བཀྲོལ་（15བ）བའོ། །དང་པོ་ནི། གྲངས་དུས་མཚན་མའི་བསྙེན་པ་གང་རུང་ཐེམ་པའི་རྗེས་ལ་ཕྲིན་ལས་བཞི་སྒྲུབ་ཀྱི་དམིགས་བཟླས་སྦྱོར་ཏེ། དེའང་ཞག་བཅུ་ལ་མཚོན་ན་ལས་བཞི་ཆ་བགོས་པ་ལས་རེ་རེ་ལ་ཞག་གཉིས་དང་ཐུན་གཉིས་རེ་འབྱུང་ཞིང་། ཡང་ན་ཐོ་རངས་ཞི་བ། སྔ་དྲོ་རྒྱས་པ། དགོངས་མོ་དབང་། སྲོད་ལ་དྲག་པོ་སྟེ་དུས་སོ་སོ་དང་སྦྱར་ཡང་ལེགས། གང་ལྟར་ཐུན་གྱི་གཅོད་ཚུལ་སོགས་སྔར་བཞིན་ལ། བསྙེན་སྒྲུབ་ཀྱི་དམིགས་བཟླས་ཁྱུག་ཙམ་སོང་རྗེས། སྙིང་གའི་བླ་མ་འོད་དུ་ཞུ་ནས་རང་དང་དབྱེར་མེད་དུ་འདྲེས་པས་རང་ཉིད་རྟ་མགྲིན་གནས་གྱུར་ཏེ་གཙོ་བོ་ཐོད་ཕྲེང་རྩལ་དུ་གསལ་བའི་དཔྲལ་བར་པད་ཟླའི་གདན་ལ་རྡོ་རྗེ་ཐོད་ཕྲེང་རྩལ་མངོན་རྟོགས་བཞིན་བསྒོམས་པའི་ཐུགས་ཀར་ཉི་སྟེང་ཧྲཱིཿདཀར་པོའི་མཐར་རང་སྔགས་ཀྱིས་བསྐོར་བ། བཟླས་པ་བྱས་པས་སྔགས་ཕྲེང་ལས་འོད་ཟེར་འཕྲོས། འཁོར་གྱི་རྡོ་རྗེ་མཁའ་འགྲོ་ཡབ་ཡུམ་ལ་ཕོག་པས་ཐུགས་རྒྱུད་བསྐུལ། དེ་གཉིས་ཀའི་ཐུགས་ཀ་ནས་འོད་ཟེར་དཀར་པོ་ཟླ་བ་ཤར་བ་ལྟ་བུ་འཕྲོས། སྣོད་བཅུད་ཐམས་ཅད་ལ་ཁྱབ་པས་སྣོད་ཀྱི་འབྱུང་བའི་（16ན）དུག་བཅིལ། བཅུད་ཀྱི་སྐྱེ་འགྲོའི་ལས་ཉོན་སྡིག་སྒྲིབ་སྦྱངས། ཚུར་འདུས་རང་ལ་ཐིམ་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ། དེ་བཞིན་དུ་རིགས་འགྲེ་སྦྱར་ཏེ། ལྟེ་བའི་རཏྣ་ཐོད་ཕྲེང་རྩལ་དང་འཁོར་གྱི་རིན་ཆེན་མཁའ་འགྲོ་ཡབ་ཡུམ་ལས་འོད་ཟེར་སེར་པོ་འཕྲོས་པས་བདག་གཞན་གྱི་ཚེ་དཔལ་བསོད་ནམས་མཐའ་དག་རྒྱས་པར་བསམ་པ་དང་། མགྲིན་པའི་པདྨ་ཐོད་ཕྲེང་རྩལ་དང་འཁོར་གྱི་པདྨ་མཁའ་འགྲོ་ཡབ་ཡུམ་ལས་འོད་ཟེར་དམར་པོ་ལྕགས་ཀྱུ་ལྟ་བུ་སྤྲོས་པས་ལྷ་འདྲེ་མི་གསུམ་ཐམས་ཅད་ཀྱི་ཕོའི་སྙིང་ག་དང་མོའི་གསང་གནས་ནས་རང་དབང་མེད་པར་བཀུག་སྟེ་མོས་ཤིང་ཆགས་པས་བདག་གི་ཞབས་དྲུང་དུ་འཁོད་པ་འོད་དམར་པོར་ཞུ་ནས་རང་ལ་ཐིམ་པས་དབང་དུ་འདུས་པར་བསམ་པ་དང་། གསང་བའི་ཀརྨ་ཐོད་ཕྲེང་རྩལ་དང་འཁོར་གྱི་ཀརྨ་མཁའ་འགྲོ་ཡབ་ཡུམ་ལས་འོད་ཟེར་ལྗང་ནག་མཚོན་ཆ་ལྟ་བུ་ཚ་ཞིང་རྩུབ་པ་ཐོག་ལྟར་འཕྲོས་པས་དགྲ་བགེགས་བར་ཆད་ཐམས་ཅད་ཐལ་བར་བརླག་ཅིང་ཚུར་འདུས་རང་ལ་ཐིམ་（16བ）པས་ལུས་ཀྱི་ནད་གདོན་བར་ཆད་དམིགས་མེད་དུ་སྦྱངས་པར་བསམ་པ་དང་། ཐུགས་ཀའི་བུདྡྷ་ཐོད་ཕྲེང་རྩལ་དང་འཁོར་གྱི་མཁའ་འགྲོ་བཞི་ཆར་ལས་འོད་ཟེར་ཁ་དོག་སྣ་ཚོགས་འཕྲོས་པས་ལས་བཞི་གཅིག་ཅར་དུ་སྒྲུབ་ཅིང་སྣོད་བཅུད་ཐམས་ཅད་བླ་མ་རྩ་བ་གསུམ་གྱི་དཀྱིལ་འཁོར་དུ་སྦྱངས། ཚུར་འདུས་བདག་ལ་ཐིམ་པས་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་པར་བསམ། འདི་དག་གི་ཚེ་མཁའ་འགྲོ་སྡེ་བཞི་རེ་རེ་ལའང་སོ་སོའི་རིགས་ཀྱི་དཔའ་བོ་མཁའ་འགྲོ་འབུམ་ཕྲག་དུ་མས་བསྐོར་བ་རྣམས་ཐོད་ཕྲེང་རྩལ་གྱི་བཀའ་ཉན་ཅིང་ལས་དེ་དང་དེ་སྒྲུབ་པའི་ཕྲིན་ལས་ལ་གཅིག་ཏུ་བརྩོན་པར་བསམ་ཞིང་། སྔགས་ཀྱི་ཤམ་འདོགས་ཀྱང་སརྦ་སིདྡྷི་ཞེས་པའི་མཐར། ནད་གདོན་སྡིག་སྒྲིབ་ཤཱནྟིཾ་ཀུ་རུ་ཡེ་སྭཱཧཱ༔ ཚེ་བསོད་དཔལ་འབྱོར་པུཥྚིཾ་ཀུ་རུ་ཡེ་སྭཱཧཱ༔ ཁམས་གསུམ་སྲིད་གསུམ་པཱ་ཤཾ་ཀུ་རུ་ཡེ་སྭཱཧཱ༔ གནོད་བྱེད་དགྲ་བགེགས་མཱ་ར་ཡ་རྦད༔ ཅེས་སོ་སོར་སྦྱར། འདི་རྣམས་ཀྱི་གྲངས་ཚད་སྤྱིར་ཆ་སྙོམས་པ་དང་། དམིགས་བསལ་གྱི་ལས་སྒྲུབ་པར་（17ན）འདོད་ན་དེ་ཉིད་མང་དུ་བཟླ། མཚན་མའི་རྟགས་སྤྱི་དང་མཚུངས་པའོ། །ཡང་སྐབས་འདིར་དམིགས་བཟླས་ཀྱི་སྤྲོས་པ་བསྡུ་བར་འདོད་ན། རང་ཉིད་གཙོ་བོའི་ཐུགས་ཀའི་འོད་ཟེར་འཁོར་གྱི་ཐོད་ཕྲེང་སྡེ་ལྔ་དང་མཁའ་འགྲོ་ཡབ་ཡུམ་རྣམས་ལ་ཕོག །དེ་རྣམས་ལས་འོད་ཟེར་སྣ་ཚོགས་འཕྲོས་པས་ལས་རབ་འབྱམས་གཅིག་ཅར་དུ་སྒྲུབ་པའི་དམིགས་པ་གོང་བཞིན་སྦྱར་ཏེ་སྤྱི་དྲིལ་ཤམ་བུ་ཅན་བཟླས་པས་ཀྱང་འགྲུབ་བོ། །གཉིས་པ་དངོས་གྲུབ་བླང་བ་ནི། དེ་ལྟར་བསྙེན་སྒྲུབ་ལས་སྦྱོར་བཅས་ཐེམས་པའི་ཐོར་ཐུན་ནམ་སྔ་དྲོའི་ཐུན་ལ་མཆོད་གཏོར་རྣམས་ཁ་གསོ། རིན་པོ་ཆེའི་སྣོད་དུ་དཀར་མངར་སྤོད་དང་ཆོས་སྨན་ཆང་སོགས་བསྲེས་པའི་རྒྱུ་ལས། དཔལ་ཟན་རིན་ཆེན་ཟུར་བརྒྱད་ཀྱི་སྟེང་བླ་མའི་གཏོར་མ་ཟླུམ་བརྗིད་པད་འདབ་ཀྱིས་བསྐོར་བ་དམར་པོ་རྒྱན་སྤྲོས་ཅན་གྱི་མཐར། འབྲང་རྒྱས་ཟླུམ་པོ་ཤར། གྲུ་བཞི་ལྷོ། ཟླ་གམ་ནུབ། གྲུ་གསུམ་བྱང་དང་། བར་མཚམས་དང་མཐའ་སྐོར་དུ་ཚེ་རིལ་གྱིས་གཏམས་པ་དཀྱིལ་འཁོར་མདུན་（17བ）དུ་བཤམས། གཞན་ཡང་ཚོགས་རྫས་བཟའ་བཅའ་བཏུང་བའི་རིགས་གང་འབྱོར་གྱིས་བསྐོར། ལས་བྱང་རྒྱས་པར་བཏང་བའི་མཚམས་གཅོད་སྐབས་སྒྲུབ་རྫས་ལ་བགེགས་བསྐྲད་པའི་དམིགས་པ་བྱེད། ལྷ་བསྐྱེད་སྐབས་རང་དང་མདུན་གྱི་སྐུ་རྟེན་བུམ་པ་གཏོར་ཆེན་བཅས་ངོ་བོ་རིག་པའི་མདངས་རྩལ་གཅིག་ལ་རྣམ་པ་བཞིན་དང་མེ་ལོང་ལྟར་ཐ་དད་ཞལ་སྤྲོད་ཀྱི་ཚུལ་དུ་བསྒོམ་པར་ཡེ་ཤེས་པ་ལྷན་ཅིག་ཏུ་བསྟིམ། བཟླས་པ་ཅུང་ཟད་མཐར་སྲུང་མའི་གཏོར་བསྔོ་ཚོགས་མཆོད་ལྷག་མ་ཡན་གྲུབ་པ་དང་། ཧཱུཾ་ཧྲཱིཿ བླ་མ་རིག་འཛིན་ཡི་དམ་དྷཱ་ཀི་དགོངས༔ ཞེས་སོགས་དང་ཡི་གེ་བརྒྱ་པ་བརྒྱ་རྩ་བཟླས་པས་འཁོན་གཅུགས་སྦྱངས། སྐུ་གསུང་ཐུགས་སྐོང་དང་དམ་རྫས་གཏོར་ཆེན་སོགས་ཀྱིས་མཆོད། ཧཱུཾཿ མ་གཡེལ་མ་གཡེལ་སོགས་ཀྱིས་ཐུགས་དམ་སྤྱིར་བསྐུལ་ཞིང་། ཧཱུཾ་ཧྲཱིཿ གུ་རུ་རྩ་གསུམ་ལྷ་ཚོགས་དགོངས༔ འདིར་འདུས་རྣལ་འབྱོར་བདག་ཅག་གིས༔ དཀྱིལ་འཁོར་གསུམ་དུ་བསྙེན་ཅིང་བསྒྲུབ༔ བསྙེན་སྒྲུབ་ལས་སྦྱོར་མཐའ་རུ་ཕྱིན༔ དེང་སང་སྐྱ་（18ན） རེངས་དང་པོ་ཤར༔ རྡོ་རྗེ་སྲིན་པོའི་ནམ་ལངས་ཉེ༔ དངོས་གྲུབ་འབྱུང་བའི་དུས་ལ་བབ༔ རྒྱལ་བ་ཐུགས་རྗེའི་རང་བཞིན་ལ༔ གནད་ནས་བསྐུལ་བར་མི་འཚལ་ཏེ༔ ད་ལྟ་ཐུགས་དམ་གནད་ནས་བསྐུལ༔ གསང་བ་ཐུགས་ཀྱི་དཔལ་བེའུ་ནས༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཞེས་དངོས་གྲུབ་ཁྱད་པར་དུ་བསྐུལ་ལ། མདུན་གྱི་བླ་མའི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཡིག་འབྲུ་ཕྱག་མཚན་འོད་ཟེར་ཐིག་ལེ་དཀར་དམར་མཐིང་གསུམ་གྱི་རྣམ་པ་བར་མ་ཆད་པར་བྱོན་ཏེ་རང་གི་གནས་གསུམ་དུ་ཐིམ་པས་དབང་བྱིན་དངོས་གྲུབ་ཐམས་ཅད་དུས་གཅིག་ཏུ་ཐོབ། འཁོར་འདས་བརྟན་གཡོའི་མཐུ་དཔལ་གཟི་བརྗིད་ཚེ་བཅུད་ཐམས་ཅད་ཀྱང་འོད་ཟེར་སྣ་ཚོགས་པའི་རྣམ་པར་བསྡུས་ཏེ་དངོས་གྲུབ་ཀྱི་རྫས་ལ་ཐིམ་པས་ཟག་མེད་བདུད་རྩིའི་རྒྱ་མཚོར་འཁྱིལ་བར་བསམ་ཞིང་། སྒྲུབ་སྔགས་ཤམ་དུ། ཀཱ་ཡ་ཝཱཀ་ཏིཙྪ་སརྦ་སིདྡྷི་ཕལ་ཧཱུྃ༔ ཞེས་བཏགས་པ་བརྒྱ་སྟོང་སོགས་ཅི་འགྲུབ་བཟླས་མཐར། མདུན་རྟེན་（18ན）སྒྲུབ་དུས་ལྟར་ལ། རང་རྟ་མགྲིན་ཡབ་ཡུམ་གྱི་རྣམ་པར་ལོགས་སུ་ཕྱེ་བས་དངོས་གྲུབ་ལེན་པ་པོར་བྱས་ནས། ཧཱུྃ་ཧྲཱིཿ བདེ་མཆོག་བདེ་སྤྱོད་སོགས་ཀྱིས་འདོད་པའི་དོན་ལ་གསོལ་བ་བཏབ་སྟེ་ཛཔྲ་ཤམ་བུ་ཅན་བཟླ་བཞིན་དུ་སྒྲུབ་རྫས་སྐུ་འབག་བུམ་པ་གཏོར་མ་རྣམས་གནས་གསུམ་དུ་གཏུགས་ལ་དབང་བླང་། བླ་མ་རང་ལ་ཐིམ་པས་མཆོག་ཐུན་མོང་གི་དངོས་གྲུབ་ཐམས་ཅད་དུས་དེ་ཉིད་དུ་ཐོབ། གུ་རུ་ཐོད་ཕྲེང་རྩལ་དང་དབྱེར་མེད་ཕྱག་རྒྱ་ཆེན་པོའི་གོ་འཕང་མཆོག་ཏུ་གྲུབ་པར་མོས་ལ། བུམ་ཆུ་དང་གཏོར་མའི་ཆ་ཤས་དངོས་གྲུབ་ཏུ་མྱང་། དཔལ་ཟན་སོགས་རྫས་ཐམས་ཅད་ལ་ལོངས་སྤྱོད་ཅིང་ནང་མི་དམ་གཙང་ལའང་སྦྱིན། དེ་ནས་ཁ་སྐོང་སྦྱིན་སྲེག་དང་གཏང་རག་གི་ཚོགས་སྐོང་རྒྱས་པར་བྱེད་ན་འདིར་མཆོད་བསྟོད་ནོངས་བཤགས་སོགས་རྗེས་ཆོག་སྔར་རྒྱུན་ལྟར་བྱ། དེ་ཙམ་གྱིས་གྲུབ་པར་བྱེད་ན་གོང་གི་ལྷག་ཆོག་སྐབས་གཏར་བཟུང་བའི་ལྷག་གཏོར་རྣམས་ལྷན་དུ་གཏོང་ཞིང་ཆད་མདོ་བསྐྱང་བ་མན་ཆད་འོག་ཏུ་སྨོས་པ་ལྟར་བྱས་པས་གྲུབ། བཟླས་པ་གཙོར་（19ན）བཏོན་གྱི་བསྙེན་སྒྲུབ་ལ་ཁ་སྐོང་ཤིན་ཏུ་གལ་ཆེ་བས། སྤྲོས་པ་ཆུང་བར་འདོད་ན་བཟླས་པས་ཁ་བསྐང་བ་སྟེ། དེའང་གཞུང་བཟླས་འབུམ་ལ་ཁྲི། ཁྲི་ལ་སྟོང་། སྟོང་ལ་བརྒྱ། བརྒྱ་ལ་བཅུ་སྟེ། བཟླས་པའི་གྲངས་ཀྱི་བཅུ་ཆ་འགྲོ་བར་བྱ། སྤྲོས་འབྱོར་ཆེ་ན་ཁ་སྐོང་སྦྱིན་སྲེག་བྱ་སྟེ། སྒྲུབ་པ་གྲུབ་པའི་ཕྱི་དྲོའམ་ཕྱིར་ནངས་ནས་དབུ་བརྩམས་ཏེ་ཉམས་ཆག་སྦྱོང་བའི་སླད་དུ་ཞི་བ་ཁོ་ན་དང་གྲངས་ཚད་བཤད་མ་ཐག་པ་ལྟར་ལ། སྒྲུབ་པ་པོ་གཅིག་པུས་གྲངས་གསོག་པར་དཀའ་བས་ཆོག་གྲོགས་དམ་གཙང་མང་དུ་འཚོགས་པ་ལ་གྲངས་བཟུང་ན་ལེགས་ཤིང་། དེ་ལྟར་གྲུབ་ན་ལས་གང་བརྩམ་མྱུར་དུ་འགྲུབ་པ་སོགས་ཀྱི་དགོས་པ་མང་དུ་མཆིས་པས་དེའི་ཚུལ་ནི་གཞན་ལས་ཤེས་པར་བྱའོ། །གསུམ་པ་དཀྱིལ་འཁོར་བསྡུ་ཞིང་མཚམས་བཀྲོལ་བ་ནི། དེ་ལྟར་བསྙེན་སྒྲུབ་ཁ་སྐོང་བཅས་གྲུབ་ནས་མཚམས་གྲོལ་ཉིན་ཡར་ངོའི་གཟའ་ཚེས་འཕྲོད་སྦྱོར་ལེགས་པ་དང་བསྟུན་དགའ་སྟོན་ཚོགས་མཆོད་ཅི་འབྱོར་རྒྱས་པར་བཤམས་ལ། བླ་མའི་ལས་（19བ）བྱང་དང་ཆོས་སྲུང་སྐོང་གསོ་རྩ་གསུམ་བསྐང་བཤགས་རྣམས་རྒྱས་པར་བཏང་། ལྷག་ཆོག་སྐབས་སྔར་བཙོན་འཛིན་བྱས་པའི་ལྷག་མ་རྣམས་དང་ལྷན་ཅིག་སྒྲུབ་ཁང་ལྷོ་ནུབ་གོམ་པ་བདུན་ཅུའི་སར་སྐྱེལ། སྒྲུབ་ཁང་གི་ཐལ་རྡུལ་རྣམས་ཀྱང་ཕྱིར་ཕྱག །ཆད་མདོའི་གཏོར་མ་གསར་པའང་བཤམས་ཏེ་ཆོས་སྐྱོང་གཞི་བདག་གི་གཏོར་མ་དང་སྔར་གྱི་གཏའ་གཏོར་བཅས་སྒྲུབ་ཁང་གི་ཡང་ཐོག་ཏུ་འབུལ་ཞིང་བཤལ་ཆུས་བརྟན་མ་བསྐྱང་། གཏོར་གཞོང་ཁ་སྦུབས་པ་རི་རབ་ཏུ་གསལ་བའི་འོག་ཏུ་བར་ཆད་དམ་སྲི་སྒབ་འདྲེ་འབྱུང་པོ་ཐམས་ཅད་མནན་པའི་ཁར་སྣང་སྲིད་ཐམས་ཅད་རྟ་མགྲིན་གྱི་དཀྱིལ་འཁོར་དུ་གསལ་བས་བྲོ་བརྡུངས་པར་བསམ་ལ་རྟ་བྲོ་བྱ། མཆོད་གཏོར་རྣམས་ཁ་གསོས་ལ་གཏང་རག་གི་མཆོད་བསྟོད་དང་ནོངས་བཤགས་བྱས་རྗེས། རས་བྲིས་ཀྱི་དཀྱིལ་འཁོར་དང་སྐུ་འབག་ལ་དམིགས་ཏེ། འདིར་ནི་གཟུགས་དང་སོགས་སུ་པྲ་ཏིཥྛས་མེ་ཏོག་འཐོར་ཞིང་ཡེ་ཤེས་པ་བརྟན་བཞུགས་བྱ། དམ་ཚིག་གི་དཀྱིལ་འཁོར་འོད་གསལ་དུ་བསྡུ་ཞིང་སླར་ཡང་གཉུག་མའི་སྐུར་ལྡངས་ལ། རང་（20ན）ཉིད་ལྷ་ཡི་ང་རྒྱལ་གྱིས༔ མེ་དཔུང་འབར་བའི་ཀློང་དཀྱིལ་དུ༔ འགྱུར་མེད་རྡོ་རྗེའི་འོད་སྐུར་ལྡན༔ རྡོ་རྗེ་འཛིན་པས་འཇིགས་མི་ཚུགས༔ གནོད་བྱེད་བགེགས་ཀྱིས་སྨོས་ཅི་དགོས༔ ཨོཾ་བཛྲ་རཀྵ་རཀྵ་ཧཱུཾ༔ ཞེས་རྒྱས་གདབ། ཟབ་ལམ་འདི་ཁོ་ན་དངོས་གྲུབ་ཀྱི་རྩ་བར་ངེས་པའི་ཤེས་པ་གཏིང་ཚུགས་བསྐྱེད་ལ་གྲུབ་མཐའ་བཟུང་། དགེ་བའི་རྩ་བ་བྱང་ཆུབ་ཆེན་པོར་བསྔོས་ཏེ་སྨོན་ལམ་ནན་དུ་གདབ། ཤིས་བརྗོད་སྤྱི་དང་བྱེ་བྲག་རྒྱས་པར་སྤེལ་ལ་མེ་ཏོག་གི་ཆར་དབབ། དེ་ནས་ནང་སྒོའི་རྩར་མཆོད་གཏོར་བཤམས་ལ་བྱིན་བརླབ་ཅིང་སྔགས་ཀྱིས་འབུལ། མཆོད་སྦྱིན་གཏོར་མ་འདི་བཞེས་ལ། ཞེས་སོགས་ཀྱིས་ཕྲིན་ལས་བཅོལ། བཛྲ་མུཿས་གཤེགས་སུ་གསོལ་ཏེ་སྒོ་བྱང་བསྡུ། ཕྱི་སྒོའི་མཆོད་གཏོར་ཀྱང་སྔར་བཞིན་བསྔོས་ནས། ཧཱུྃ༔ རྒྱལ་པོ་ཆེན་པོ་སྡེ་བཞི་པོ༔ རྡོ་རྗེ་འཛིན་པའི་བཀའ་བཞིན་དུ༔ སྒྲུབ་པའི་བར་ཆད་བསྲུང་མཛད་པའི༔ གཏང་རག་མཆོད་གཏོར་འདི་བཞེས་ལ༔ རང་གནས་གཤེགས་ཏེ་བྱང་ཆུབ་བར༔ དངོས་གྲུབ་མཆོག་སྩོལ་བར་ཆད་སོལ༔ （20བ）བཛྲ་མུཿ ཞེས་གཤེགས་གསོལ་བྱས་ལ་ཐོ་བྱང་བསྡུ། དེ་ནས་བགས་ཀྱིས་མཚམས་གསེང་སྟེ་ཞག་ཤས་གཞན་དུ་མི་འགྲོ་བར་སྒྲུབ་ཁང་དེར་སྡོད། སྐུ་འབག་སྲོག་འཁོར་ཐོད་པ་རྣམས་མི་འབྲལ་བར་དམ་ཚིག་གི་རྟེན་དུ་འཆང་། རྒྱུན་བཟླས་ཀྱི་དམ་བཅའ་བཟུང་ནས་དེའི་དབུ་འཛུག །ཐོག་མར་དམ་ཚིག་གཙང་བའི་མི་དང་གདོང་འཕྲད་ཅིང་། མིག་ཉི་ཟླ་ལ་བལྟ་བ་དང་། གོམ་པ་གྱེན་དུ་འདོར་བ་སོགས་མཚམས་གྲོལ་བའི་རྟེན་འབྲེལ་གྱི་སྒོ་བཟང་དུ་བསྒྲིགས་པར་བྱའོ། །གཉིས་པ་གལ་ཆེ་བའི་སྤྱི་དོན་འཕྲོས་སུ་གདམས་པ་ལ་གཉིས། བསྐྱེད་རྫོགས་ཀྱི་གོ་དོན་གནད་བསྡུས་སུ་སྨོས་པ་དང་། མཚམས་ཀྱི་བསླབ་བྱ་དམིགས་ཀྱིས་བསྙད་པའོ། །དང་པོ་ནི། དེའང་སྦྱང་གཞི་བདེ་གཤེགས་སྙིང་པོ་ཡོན་ཏན་ཀུན་ཚང་གི་སངས་རྒྱས་དེ་ཉིད། སྦྱང་བྱ་གཟུང་འཛིན་འཁྲུལ་པ་གློ་བུར་བས་བསྒྲིབས་པ་ལ། སྦྱོང་བྱེད་གཞི་འབྲས་དང་རྣམ་པ་མཐུན་པའི་སྔགས་ཀྱི་ཐབས་མཁས་ཁྱད་པར་ཅན་བསྒོམས་པས། སྦྱང་འབྲས་གཞི་ལ་བཞུགས་པའི་རང་བཞིན་རྣམ་དག་མངོན་དུ་འགྱུར་བར་བྱེད་པ་སྟེ། （21ན）དེ་ལ་གསལ་དག་བརྟན་གསུམ་གྱི་ཚད་རིམ་པར་མཐར་ཕྱིན་པ་ལམ་ངེས་རྫོགས་ཀྱི་བསྐྱེད་རིམ་མཚན་ཉིད་པ་ནི་ད་ལྟ་སྲིད་པ་ཙམ་ལས་དཀོན་ཅིང་། སྟན་ཐོག་གཅིག་ཏུ་སྦྱོར་དངོས་རྗེས་ཀྱི་ཆོ་ག་ཆ་ཚང་ཉམས་སུ་བླངས་ནས་སོ་སོའི་སྐབས་སུ་བབ་པའི་ཏིང་འཛིན་མོས་པ་ལ་མ་བྱེད་ཁྱུག་ཙམ་རེ་ལས་གསལ་སྣང་རིམ་ཅན་དུ་བསྒྲུབ་མི་ནུས་པ་མོས་སྒོམ་གྱི་བསྐྱེད་རིམ་རྗེས་མཐུན་པ་འདི་ཉིད་དེང་དུས་ཀྱི་ལག་ཏུ་ལེན་བྱ་སྟེ། འདིའི་ཚེ་ནའང་ཐོག་མར་གསལ་སྣང་མ་ཐེབས་ཀྱི་བར་དུ་ལྷ་ལ་སེམས་བཟུང་དགོས་པ་ལས། ཐ་མལ་གྱི་འཁྲུལ་སྣང་གཅོད་པའི་ཕྱིར་རྣམ་པ་གསལ་བ་ནི། དེ་ལ་བློ་རབ་ཀྱིས་གཅིག་ཅར་ཆུ་ཟླ་དང་འཇའ་ཛོན་ལྟར་སྣང་ལ་དེར་འཛིན་མེད་པ། བློ་དམན་ན་ཐོག་མར་ཡོངས་རྫོགས་ཝལ་ཙམ་དང་། སླར་རིམ་གྱིས་དབུ་དང་ཕྱག་ཞབས་སོགས་རེ་རེ་ནས་གསལ་འདེབས་ལ་སེམས་བཟུང་སྟེ། ཐོག་མར་རྟག་པའི་སྐུ་ལྡེར་སོ་ལྟ་བུ་བསྒོམ་ཞིང་རིམ་པས་སྣང་ལ་མ་གྲུབ་པར་བསླབ། རྟག་པར་ལྟ་བའི་ཞེན་འཛིན་དགག་པའི་ཕྱིར་རྣམ་དག་དྲན་པ་ནི། ནུས་ན་མངོན་རྟོགས་ཀྱི་（21བ）གཞུང་ཆེན་པོ་གཞན་དང་བརྡ་བསྟོད་སོགས་ནས་འབྱུང་བ་ལྟར་རེ་རེ་བཞིན་ཡིད་ལ་བྱ། ཐམས་ཅད་མི་ནུས་ནའང་མདོར་བསྡུས་ཙམ་མམ། ཡང་ན་དག་དྲན་རྗེས་མཐུན་དུ་སངས་རྒྱས་ཐམས་ཅད་ནི་ཆོས་ཀྱི་སྐུ་ཉག་གཅིག་ཡིན། ཆོས་སྐུ་ལ་ཞལ་ཕྱག་སོགས་སྤྲོས་པའི་མཚན་མ་རྡུལ་ཙམ་མེད་ཀྱང་བསམ་གྱིས་མི་ཁྱབ་པའི་ཡོན་ཏན་རྣམས་ཞལ་ཕྱག་རྒྱན་ཆའི་རྣམ་པར་ཤར་བས་ལྷུན་གྱིས་གྲུབ་པའི་ཕྲིན་ལས་ལ་དབང་བསྒྱུར་བ་སྟེ། རང་རྒྱུད་དངོས་པོར་གྲུབ་པ་རྡུལ་ཙམ་ཡང་མེད་སྙམ་དུ་བསྒོམ། ཐ་མལ་གྱི་བདག་འཛིན་དགག་པའི་ཕྱིར་ང་རྒྱལ་བརྟན་པ་ནི། ལྷ་གསལ་རུང་མ་གསལ་རུང་དཀྱིལ་འཁོར་ཐམས་ཅད་ཀྱི་ཁྱབ་བདག་བླ་མ་ཐོད་ཕྲེང་རྩལ་ངའོ་སྙམ་པའི་ལྷའི་ང་རྒྱལ་ལ་རྟག་ཏུ་གནས་པ་གལ་ཆེ། མི་གསལ་བཞིན་དུ་འཁྲུལ་རྟོག་ལ་འཁྲུལ་རྟོག་གི་ལྷན་པ་འདེབས་པ་ལས་དོན་གྱི་གནད་དུ་འདི་ཁོ་ན་ཟབ་པས་ནན་ཏན་དུ་བྱ། མདོར་ན་ཕུང་ཁམས་སྐྱེ་མཆེད་ཡེ་གདོད་མ་ནས་ལྷའི་སྐུ་དང་ཡེ་ཤེས་སུ་ཤར་བ་ཡིན་པ་ལ་ཡིན་པར་ཐོག་མར་གོ་བ་དང་བར་དུ་ངེས་ཤེས་བསྐྱེད་པས་མཐར་སྣང་（22ན）བ་ལྷ། གྲགས་པ་སྔགས། དྲན་རྟོག་ཡེ་ཤེས་སུ་བཅོས་བསྒྱུར་མེད་པར་འཆར་བ་སྣང་སྲིད་གཞིར་བཞེངས་ཀྱི་བསྐྱེད་རིམ་ལམ་དུ་ལོངས་པ་ལ་བསླབ། གཞན་ཡང་བསྐྱེད་རིམ་སྤྱིའི་ཆིངས་སུ་སྲོག་སྡོམ་གཟེར་བཞིས་གདབ་པར་གསུངས་ཏེ། དེའང་སྐུ་ཕྱག་རྒྱའི་གསལ་སྣང་གིས་ཡུལ་གསུམ་གྱད་དུ་གྱུར་པ་ཏིང་འཛིན་དམིགས་པའི་གཟེར། གསུང་ཐུགས་སྲོག་སྔགས་འཁོར་ལ་སེམས་རྩེ་གཅིག་ཏུ་གཏད་པ་སྙིང་པོ་སྔགས་ཀྱི་གཟེར། ཐུགས་སྟོང་གསལ་འགག་པ་མེད་པའི་ཆོས་ཉིད་རང་སེམས་དང་གཉིས་སུ་མེད་པ་དེ་ཉིད་ལྷའི་རྣམ་པར་ཤར་བ་ལས་བསྒྲུབ་བྱའི་ལྷ་རྟག་རྟག་པོ་གུད་ན་མེད་པར་ཤེས་པ་དགོངས་པ་མི་འགྱུར་བའི་གཟེར། ཕྲིན་ལས་རྣམ་པ་བཞི་སོགས་དམིགས་པའི་བསྒྱུར་ཁ་གང་ལ་གང་དགོས་སུ་སྒྱུར་བ་འཕྲོ་འདུ་སྣ་ཚོགས་པའི་གཟེར་ཞེས་གཟེར་བཞིའི་མན་ངག་གནད་ཐོག་ཏུ་ཁེལ་ན་སྐུ་དངོས་སུ་མཐོང་། ངག་ལ་བདེན་པ་འགྲུབ། ཆོས་ཉིད་ལ་རང་དབང་ཐོབ་ནས་གསང་བ་གསུམ་གྱི་སྲོག་འཕྲོག །རིག་པའི་རྩལ་འབྱོང་། ཕྲིན་ལས་རང་དབང་བསྒྱུར་བར་གསུངས། （22བ）ཁྱད་པར་ལྟ་དགོངས་ཀྱི་གཟེར་ནི་ཤིན་ཏུ་གཅེས་ཏེ། པད་སྡོང་བརྩེགས་པ་ལས། དེ་ཉིད་ལྡན་པའི་རྣལ་འབྱོར་གྱིས༔ དུར་ཁྲོད་འདྲེ་ངན་བསྒྲུབས་གྱུར་ཀྱང་༔ མཆོག་དང་ཐུན་མོང་འབྲས་བུ་གང་༔ ཅི་འདོད་རང་བྱུང་ལྷུན་གྲུབ་འབྱུང་༔ དེ་ཉིད་མ་རྟོགས་ཨ་འཐས་བློས༔ ཡེ་ཤེས་སེམས་དཔའ་བསྒྲུབས་གྱུར་ཀྱང་༔ གནས་སྐབས་ལྡན་འབྲས་ཕྲའུ་ལས༔ ཡང་དག་འབྲས་བུ་སྲིད་མཐའ་ཙམ༔ ཞེས་གསུངས་པས། བསྐྱེད་རིམ་ཙམ་དུ་མ་ཟད་འཁོར་འདས་ཀྱི་སྣང་ཆ་ཐམས་ཅད་རྟོག་པས་བཏགས་པ་ཁོ་ན་ཡིན། དེའང་ཉི་མ་དང་འོད་ཆུ་དང་རླན་བཞིན་རིག་པའི་རང་རྩལ་ལས་གཞན་དུ་གྲུབ་པ་རྡུལ་ཙམ་ཡང་མེད། རང་རིག་ཐིག་ལེ་ཉག་གཅིག་གི་ཀློང་དུ་ཆོས་ཐམས་ཅད་ཡེ་རྫོགས་ཆེན་པོར་གྲུབ་པ་ལ་སླར་བཅོས་མས་རྒྱས་འདེབས་མི་དགོས། རིག་པའི་ངོ་བོ་སྐྱེ་འགག་གནས་གསུམ་གྱི་མཐའ་དང་བྲལ་བས་ཅི་ཡང་མ་ཡིན་ལ་ཅིར་ཡང་འཆར་བ། ཤར་བ་ཙམ་ནས་དངོས་པོ་མཚན་མར་མ་གྲུབ་ཀྱང་ཀུན་རྫོབ་ཏུ་སྣང་ལ་དོན་བྱེད་ནུས་པས་མ་བསྐྱེད་ལྷུན་རྫོགས་ཀྱི་དཀྱིལ་འཁོར། ཟང་（23ན）ཐལ་གྱི་ཡེ་ཤེས་རང་གནས་ལ་ནམ་ཡང་འཕོ་འགྱུར་མེད་པས་འཛིན་མེད་ཅོག་བཞག་གི་ཆོས་སྐུ། འདི་ལྟར་སྣང་བའི་ཆོས་ཐམས་ཅད་བསྐྱེད་རྫོགས་ཟུང་འཇུག་འབའ་ཞིག་ལས་མི་འདས་བ་གཤིས་ལུགས་ཀྱི་སྣང་སྟོང་ཟུང་འཇུག་ལ་རིག་ཐོག་ཏུ་མྱོང་བ་ཐོན་ནས་གནད་གཅིག་ཤེས་པས་འཁོར་འདས་ཀུན་གྱི་སྟོང་སྲོག་ཐོབ་པ་ཉིད་བསྐྱེད་རྫོགས་གང་གི་ཡང་སྙིང་པོ་སྟེ། གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་ཞལ་ནས། བརྒྱ་བཤད་སྟོང་དུ་ལབ་ཀྱང་གོ་བ་གཅིག །གཅིག་ཤེས་ཀུན་གྲོལ་རང་རིག་རང་མདངས་སྐྱོང་། ཞེས་གསུངས་པ་ལྟར་ཐེག་མཆོག་རྒྱལ་པོ་ལྟ་བ་སྤྱི་འབྱམས་གདིང་དུ་གྱུར་པའི་རྩལ་སྣང་རང་བཞིན་ཡོངས་གྲུབ་ལྷའི་ཕྱག་རྒྱར་ཤར་བའི་གནད་གསང་འདི་ཉིད་མ་རྟོགས་ན་ནམ་དུའང་བསྐྱེད་རྫོགས་ལ་མཚན་རྟོག་གི་གོལ་ས་ཆོད་དུས་མེད་པས། རབ་རྟོགས་པ། འབྲིང་ཉམས་མྱོང་། ཐ་མ་གོ་བ་ཕྱིན་ཅི་མ་ལོག་པས་ངེས་ཤེས་རྙེད་པ་ཙམ་ཅི་ནས་གལ་ཆེ་བ་ཡིན་ནོ། །གཉིས་པ་མཚམས་ཀྱི་བསླབ་བྱ་དམིགས་ཀྱིས་བསྙད་པ་ནི། བསྙེན་སྒྲུབ་སྤྱིར་（23བ）གཅེས་པའི་སྤང་བླང་གནད་ཀྱི་བྱེ་བྲག་མན་ངག་རྣམས་ལས་རྒྱས་པར་འབྱུང་བ་ལྟར་ཤེས་དགོས་ཀྱང་། འདིར་གཏེར་གཞུང་དང་དེ་འབྲེལ་གོང་མ་རྣམས་ཀྱི་གསུང་གི་གནད་དོན་མདོར་བསྡུས་སུ་སྨོས་ན། སྤྱིར་དམ་ཚིག་དང་མི་ལྡན་ན་གསང་སྔགས་མི་འགྲུབ་པས་དབང་བསྐུར་ཐོབ་ཀྱང་དམ་ཚིག་ལ་ཐེ་ཚོམ་ཡོད་པའམ་དབང་བསྐུར་ཉིད་ཞུས་ལོ་ཐོབ་ལོ་ཙམ་དུ་སོང་ན། བླ་མ་ལས་དབང་བསྐུར་བསྐྱར་ནས་ཞུ་ཞིང་ཅི་འབྱོར་བའི་མཎྜལ་གྱིས་མཉེས་པར་བྱས་ལ་བསྙེན་སྒྲུབ་མཐར་ཕྱིན་པའི་གསོལ་བ་གདབ། དེ་ཕྱིན་ཆད་བླ་མ་ཉིད་བསྒྲུབ་བྱའི་ལྷ་དང་དབྱེར་མེད་དུ་བལྟ་བ་ནི་རྩ་བ་ཡིན་ལ། གལ་ཏེ་བླ་མ་མི་བཞུགས་ན་འདུན་པ་དེ་དང་ལྡན་པས་བདག་འཇུག་ཡིད་ཆེས་པ་བླང་། མཚམས་ཡུན་རིང་ཐུང་དང་ཐུན་བཞིའམ་གཉིས་སོགས་ཀྱི་བཅད་ཁྲིགས་དམ་བཅའ་དང་པོར་གང་བྱས་པ་དེ་ཉིད་མཐར་ཐོན་ངེས་པར་བྱ། འཚོ་ཆས་སོགས་ཚགས་སུ་མ་ཚུད་པས་ཅིས་ཀྱང་གཏོང་ལེན་མི་བྱ་ཀ་མེད་ཡོད་པ་དང་། སྒྲུབ་གཡོག་ཁྲོལ་ཅན་ལྷ་རྗེ་སོགས་སྒྲུབ་པའི་གྲོགས་སུ་འགྲོ་ངེས་པ་རྣམས་ཐོག་མ་（24ན）ནས་དམིགས་འོག་ཏུ་འཇུག་ཅིང་། ལར་ནས་དམ་བཅའི་སྐབས་འདིར་དངོས་སུ་མི་དྲན་པའི་གལ་ཆེ་བ་གློ་བུར་དུ་བྱུང་ན་དམིགས་འོག་ཏུ་ཆུག་པར་བྱེད་པ་སོགས་ཧ་ཅང་སྡོམ་དྲག་པ་མ་ཡིན་པ་དང་། རྗེས་ནས་དམིགས་ཁོངས་སུ་ཆུད་ཡོད་སྙམ་པའི་བག་ཡངས་མི་བྱ་བར་སྒྲུབ་གཡོག་ཁྲོལ་ཅན་དང་ཕྱི་ནང་འགྲུལ་པས་མཚོན་བསྲུང་ཅི་ཐུབ་བྱས་པས་མཚམས་མི་རལ་ཞིང་གཡེང་བས་མི་ཁྱེར་བ་ཡིན། མངོན་མཚན་ཅན་གྱི་སྒྲུབ་པ་ལ་དངོས་སྒྲུབ་གཡེལ་ཞིང་བར་ཆད་འཇུག་པས་བསྙེན་པ་མ་ཐོན་གྱི་བར་ཡི་དམ་གང་ཡིན་གཞན་གྱིས་མ་ཤེས་པ་བྱེད། ཐོག་མར་ཕྱི་ནང་གི་མཚམས་བཅད་པ་ནས་བཟུང་སྒྲུབ་པ་མ་གྲོལ་གྱི་བར་བོ་ཟག་ལྟེམས་ལོག་བཞིའི་དྲི་མ་བསྲུང་དགོས་ཏེ། བོ་བའི་རྒྱུ། ཆོས་འཆད་ཉན་དང་གཞན་ལ་བསྲུང་བ་བྱིན་རླབས་རིམ་གྲོ་རྟེན་འབྲེལ་སོགས་མི་བྱ། ཚོགས་གཏོར་མཆོད་ལྷག་སོགས་བྱིན་གྱིས་བརླབས་པའི་རྫས་ཕྱིར་མི་གཏོང་། ཟག་པའི་རྒྱུ། གཞན་དང་ཕར་ཚུར་གདོང་མི་འཕྲད་ཅིང་ངག་མི་སྨྲ། ཕྱི་ནང་མི་འགྲུལ། ཡོ་བྱད་གཏོང་（24བ）ལེན་མི་བྱེད། ཁྱད་པར་རང་གི་ཟས་གོས་སྣོད་དཔྱད་སྤྱོད་འཕྲོ་གཞན་སྤྱོད་དུ་མི་འཇུག །གཞན་གྱི་དེ་དག་རང་གིས་མི་སྤྱད། ལྷག་པར་དམ་ཚིག་ཉམས་པའི་ཕྲིན་ཡིག་ཀ་ཅ་ཟས་གོས་སོགས་རླུང་ཕྱོགས་ཙམ་ཡང་འཕྲད་དུ་མི་འཇུག །རྟགས་མཚན་དང་ཉམས་རྟོགས་ཅི་བྱུང་ཡང་གཞན་ལ་མི་བཤད། ལྟེམས་པའི་རྒྱུ། ལུས་གོས་སྐྲ་དང་གདོང་མི་བཀྲུ། སྐྲ་སེན་མི་འདྲེག །མལ་ས་མི་སྤོ། སྟན་མི་སྤྲུགས། སྒྲུབ་ཁང་ཕྱགས་བདར་མི་བྱ། ལོག་པའི་རྒྱུ། ལྟར་སྣང་ཉི་ཚེ་གཞན་དོན་གྱི་རྣམ་པའི་གཡེང་བ་དང་། རང་ཉིད་ཞི་བདེ་དོན་གཉེར་གྱི་བློ་འཁྲིས་མ་ཞུགས་པས་སྟན་གྱི་དྲོད་མ་ཡལ་བར་བྱས་ཏེ་བསྒྲུབ། རྒྱུན་གྱི་ཁ་ཏོན་དགེ་སྦྱོར་རིགས་ཀྱང་སྒྲུབ་པ་ཆགས་པའི་རྒྱུ་ཡིན་པས་མང་དུ་བྱ་བ་རྣམས་སྤངས་ཏེ། འབྲས་བུ་སངས་རྒྱས་སྒྲུབ་པ་ལ་ཟབ་ལམ་བླ་མའི་རྣལ་འབྱོར་འདི་ལས་གཞན་དུ་མེད་པའི་ཡིད་ཆེས་ཀྱིས་ཆོག་ཤེས་པར་བྱེད། རྒྱུན་དུ་རྣམ་འཇོམས་སྨེ་བརྩེགས་གང་རུང་བཟླས་པའི་ཁྲུས་བུམ་འདུ་བྱས་ལ། མི་བྱེད་ཀ་མེད་ཀྱི་ཡོ་བྱད་ལེན་པ་དང་སྒྲུབ་གཡོག་འགྲུལ་ལྟ་（25ན）བུ་དགོས་ན་ཁྲུས་ཆབ་ཀྱིས་བསང་ཞིང་གུ་གུལ་གྱིས་བདུག་པ་སོགས་བྱ། མི་དང་ཡོ་བྱད་གསར་པའི་གདོང་དུ་ཤེས་པ་བྱིང་འཐིབ་ཚིག་པ་གཉིད་ཡེར་པ་སོགས་བྱུང་ན་འགྲུལ་སྣ་ཡིན་པས་སྲུང་འཁོར་བསྒོམ། རྫས་དེ་བྱུང་ཚར་བའི་རྗེས་སུ་བྱུང་ན་གྲིབ་ལྷོངས་ཡིན་པས་ཡིག་བརྒྱ་བཟླ། འགྲུབ་ཏུ་རུང་ན་རྫས་དེ་དག་འཕྲལ་དུ་ལོངས་མི་སྤྱོད། མཚམས་རལ་བ་ལྟ་བུའི་རྐྱེན་གྱིས་བགེགས་འཚུབས་ཀྱི་རྟགས་བྱུང་ན་བགེགས་སྐྲོད་ནན་ཏན་དང་རྒྱལ་ཐོ་སྒོ་བྱང་གསོ་ཞིང་སྲུང་འཁོར་བསྒོམ། ཐུན་མཚམས་སུ་ཡིག་བརྒྱ་དང་ཡེ་ཤེས་སྐུ་མཆོག་སོགས་ཉེས་བཤགས་ཅི་རིགས་ཆག་མེད་དུ་བྱ། ཀ་ཅ་ཆེ་ཕྲ་ཕྲིན་ཡིག་ཙམ་གྱི་གཏོང་ལེན་ཀྱང་མི་བྱ་བར་གཅིག་པུར་རྣམ་གཡེང་སྤངས་ནས་བསྒྲུབ་ནུས་ན་རྟགས་མཚན་མྱུར་ཞིང་སྒྲུབ་པའི་འབྲས་བུ་འབྱིན་པ་ཡིན་ལ། བསྙེན་སྒྲུབ་ཀྱི་དམ་ཚིག་རལ་ཞིང་ཁ་ཡེངས་མིག་ཡེངས་ཀྱི་བཟླས་པ་ལོ་ཟླར་འབད་ཀྱང་གྲུབ་པའི་རྟགས་དང་འབྲས་བུ་མི་འབྱུང་བས་འབད་པ་དོན་མེད་དུ་འགྲོ་བ་ཡིན། སྐབས་རེར་ཚིག་པ་ཟ་（25བ）བ་དང་སྙིང་མི་དགའ་བ་སོགས་བྱུང་ན་བླ་མའི་མོས་གུས་དང་ངོ་བོ་ལ་བལྟས་ནས་རང་ཐོག་ཏུ་བཞག །ཤེས་པ་འཕྱོ་ཞིང་ཡེད་པ་སོགས་རླུང་རྟགས་བྱུང་ན་རུས་ཐང་སོགས་དང་། བྱིང་འཐིབ་ཉོབ་ན་ཇ་དཀར་བཏུང་བ་སོགས་ཁམས་དང་བསྟུན་པའི་ཟས་སྤྱོད་དང་སྨན་བསྟེན་པ་སོགས་སྤྱོད་ལམ་གཟབ་པར་བྱ། བཟླས་ཕྲེང་ལས་མཐུན་སོ་སོར་བཤད་ཀྱང་སྤྱི་ལ་བོ་དྷི་ཙེ་ཉིད་འགྱུར་སྟོབས་དང་བསྔགས་པ་ཆེ་བས་དེ་ཀ་ལེགས་ལ། བཟླས་པའི་ཐོག་མར་ཕྲེང་བ་བྱིན་རླབས་ཀྱི་སྔགས་དམིགས་སྤྱི་མཐུན་ནམ། མདོར་བསྡུས་སུ་ཕྲེང་བ་ལག་མཐིལ་གཡོན་དུ་བསྐྱིལ་བ་བསང་སྦྱང་། སྟོང་པའི་ངང་ལས་ཕྲེང་བའི་མདོ་འཛིན་གཙོ་བོ་ཡབ་ཡུམ་ལ་ཕྲེང་རྡོག་འཁོར་གྱི་རྣམ་པས་ཡོངས་སུ་བསྐོར་བ་ལས་འོད་འཕྲོས། རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ཏེ་དབྱེར་མེད་དུ་གྱུར། རྩ་བ་གསུམ་གྱི་ལྷ་ཚོགས་ཐམས་ཅད་བཟླ་བྱའི་ཡིག་འབྲུའི་རྣམ་པར་ཆར་ལྟར་བབས་ནས་ཕྲེང་བ་ལ་ཐིམ་པར་མོས་ལ། སྙིང་པོ་དང་། ཨོཾ་རུ་ཙི་པྲ་མ་རྟ་ན་ཡེ་རཏྣ་མ་ཎི་དྷ་ར་ཛྙཱ་ན་དེ་བ་ཨ་བྷི་ཥིཉྩ་ཧཱུཾ་སྭཱཧཱ༔ ཞེས་བརྒྱ་རྩ་བཟླས་མཐར། ལྷ་རྣམས་（26ན）འོད་དུ་ཞུ་བ་ཕྲེང་བའི་རྣམ་པར་གྱུར་པར་བསམ། སླར་སྙིང་པོ་དབྱངས་གསལ་བཟླས་པས་མེ་ཏོག་འཐོར། དེ་ཉིད་འགོམ་གཡུག་དང་ཕལ་གྱིས་མཐོང་རེག་མེད་པར་བཅང་། སྔགས་ཀྱི་སྒྲ་ཆེ་ཆུང་མྱུར་བུལ་ལྷག་ཆད་ཡིག་འབྲུ་སྒྲ་ཟུར་ཉམས་པ། གློ་ལུ་བ་དང་གླལ་བ་སྦྲིད་པ་སོགས་ཀྱིས་བར་ཆོད་པ་མ་ཡིན་པའི་ངག་བཟླས་སྐྱོན་བྲལ་བྱེད་ཅིང་། སྔགས་ཕྲེང་སྐོར་རེའི་མཚམས་སུ་བཟླས་དམིགས་གསལ་སྐྱོར་དང་སྟོང་རྗེས་ལ་བརྒྱ་སོགས་བཅུ་ཆའི་ཁ་སྐོང་ཡང་ཞོར་ལ་འགྲོ་བ་ཐོན་ན་རྗེས་སུ་སྦྱིན་སྲེག་མ་གྲུབ་ཀྱང་སྐྱོན་མེད་པ་དང་། སྒྲུབ་པ་ཞག་གྲངས་སུ་བཅད་པ་སོགས་ལ་སྟབས་བདེ་བ་ཡིན། ཐུན་གྱི་སྒང་ལ་འགྲོ་འདུག་འགུལ་བསྐྱོད། གཞན་ལ་ངག་དང་ཕྲིན་ཡིག་གཏོང་བ། ལྷ་སྔགས་མི་གཅིག་པ་འདོན་བསྒོམ་སོགས་བཟླས་དམིགས་ཀྱི་བར་ཆད་དུ་འགྲོ་བའི་རྣམ་གཡེང་ཐམས་ཅད་སྤངས། དུས་གསུམ་གྱི་རྣམ་རྟོག་ཆུ་གཉེར་ལྟ་བུ་ཐོལ་སྐྱེས་དེ་ཀ་དྲན་པས་ཆེར་བཟུང་དུ་བྱས་ནས་ལུས་མི་གཡོ། ངག་མི་སྨྲ། སེམས་མི་ཡེངས་པར་རྩེ་གཅིག་པས་ལྷ་སྐུ་རེག་མཐོང་ཡོད་པ་ལྟ་（26བ）བུར་གསལ་ཐུབ་ཀྱང་སྣང་སྟོང་རིག་རྩལ་ཙམ་དུ་བལྟ་ཞིང་། གང་ལྟར་བསྒོམས་ཀྱང་མི་གསལ་བ་བྱུང་ཡང་སེམས་ལས་ལྷ་སྐུ་ལོགས་སུ་མེད་པར་ཐག་བཅད་དེ་ཡིད་མི་གཡེང་བར་བསྒོམ། ངེས་པར་ལྡང་བ་སོགས་བྱེད་དགོས་ཀྱང་ལྷའི་གསལ་སྣང་མ་ཤོར་བ་དང་བཟླས་པའི་རྒྱུན་མ་ཆད་པ་བྱེད། ཐུན་མཚམས་རྣམས་སུ་ཡང་ལྷའི་གསལ་སྣང་མ་བྲལ་བས་བཟླས་པ་གང་འགྲུབ་བྱེད་ཅིང་གྲངས་སུ་མི་རྩི། བྱ་བ་གང་ལ་འཇུག་ཀྱང་དྲན་པའི་རྩིས་ཟིན་པས་ཐ་མལ་གྱི་བློ་ལང་དུ་མ་ཤོར་བ་ཞིག་ཅིས་ཀྱང་དགོས། གཞན་ཡང་རེས་རིག་པ་དྭགས་ཤིང་ལྕེ་བདེ་བ་དང་། རེས་བྱིང་རྨུག་མི་གསལ་བ་དང་། རེས་རྣམ་རྟོག་འཕྲོ་རྒོད་གཉེན་པོས་མི་ཆུན་པ་དང་། རེས་ཁམས་འདུས་སྒྱིད་ལུགས་པ་དང་། རྨི་ལམ་བཟང་ངན་སོགས་ཕྱི་ནང་གི་རྐྱེན་མཐོ་དམན་ཅི་བྱུང་ཡང་རང་སེམས་ཀྱི་འཆར་སྒོ་ཙམ་དུ་ཐག་བཅད་ནས་དགའ་སྡུག་གི་རྩིས་གདབ་མི་བྱ། མདོར་ན་དད་གུས། བརྩོན་འགྲུས། ལྷག་པའི་ལྷ་ལ་ཐུན་མོང་མ་ཡིན་པའི་ཡིད་ཆེས་བཅས་གསུམ་པོ་དེ་དག་ནམ་དུའང་གལ་ཆེ་ཞིང་། འདི་བསྒྲུབ་ན་དྲག་གམ། འདི་（27ན）བས་གཞན་ཞིག་ཟབ་བ་མ་སྙམ་པ་ལྟ་བུའི་བློ་ཙབ་ཙུབ་གཏན་ནས་མི་བྱ་སྟེ། སློབ་དཔོན་ཆེན་པོས། རྒྱལ་བ་གཅིག་བསྒྲུབས་ཐམས་ཅད་མ་བསྒྲུབས་འགྲུབ༔ དེ་ཕྱིར་སྤངས་ལེན་མེད་པར་གཅིག་ལ་འབད༔ སྤངས་ལེན་བློ་ཡིས་མང་པོ་བརྩམས་གྱུར་ཀྱང་༔ གཅིག་ཀྱང་མ་འགྲུབ་ཨ་ཐང་ཆད་པའི་རྒྱུ༔ ཞེས་གསུངས། དེས་ན་ཁམས་ཀྱིས་མི་ལྕོགས་པའི་ཧ་ཅང་འགྱུར་བ་མིན་ཙམ་གྱི་ངང་ལེ་ལོ་སྙོམས་ལས་ཀྱི་དབང་དུ་མ་ཤོར་བའི་སྒོ་ནས་སྒྲུབ་པའི་འགོ་ལྷོད་པ། བར་གྲིམ་པ། ཐ་མ་ནར་གྱིས་སོང་བའི་ཐང་ལྷོད་མེད་པར་མཐར་ཕྱིན་པར་བྱའོ། །རྩ་བའི་གསུམ་པ་ཕན་ཡོན་ཅུང་ཟད་སྨོས་པས་བློ་ལྡན་སྤྲོ་བ་བསྐྱེད་པ་ནི། དེ་ལྟར་བླ་མ་སྒྲུབ་པའི་ཕན་ཡོན་སྤྱིར་གསང་སྔགས་ཀུན་ནས་རྒྱ་ཆེར་གསུངས་ཤིང་རྡོ་རྗེ་ཐེག་པའི་ཉེ་ལམ་གྱི་རྩ་བའང་བླ་མ་ཚུལ་བཞིན་སྒྲུབ་པ་ལ་རག་ལས་པ་དང་། ཁྱད་པར་སངས་རྒྱས་གཉིས་པ་གུ་རུ་རིན་པོ་ཆེ་ལ་གསོལ་འདེབས་མཆོད་བསྟོད་བསྙེན་སྒྲུབ་ལ་སོགས་པ་བགྱིས་ན་གཞན་ལས་ཁྱད་པར་དུ་མས་འཕགས་པའི་ཡོན་ཏན་（27བ）རླབས་པོ་ཆེ་འཐོབ་པ་འཁྲུལ་མེད་ཀྱི་ཟབ་གཏེར་རྣམས་ལས་ཡང་ནས་ཡང་དུ་གསུངས་ཏེ། གསང་ཐེམ་ལས། ང་བསྒྲུབ་སངས་རྒྱས་ཐམས་ཅད་འགྲུབ༔ ང་མཐོང་རྒྱལ་བ་ཐམས་ཅད་མཐོང་༔ ང་ནི་བདེ་གཤེགས་འདུས་པ་ཡིན༔ ཞེས་སོགས་དང་། འདི་ཉིད་ཀྱི་གཏེར་གཞུང་ལས་ཀྱང་། ཐུགས་སྒྲུབ་ཁྱད་འཕགས་ཐེག་པའི་བཅུད་བསྡུས་འདི༔ མཐོང་ཐོས་དྲན་རེག་བཀའ་ལུང་ཐོབ་ཚད་ཀུན༔ ཚེ་གཅིག་རིག་འཛིན་ས་ལ་འགོད་པར་ངེས༔ སྒྲུབ་མཆོད་བྱས་ན་ལྟ་ཅི་སྨྲོས༔ འདི་ཉིད་སྒྲུབ་པའི་ས་ཕྱོགས་དེར༔ ནད་ཡམས་མཚོན་འཁྲུགས་མུ་གེའི་བསྐལ་པ་ཞི། ཕྱག་བསྐོར་འབྲེལ་ཐོབ་བྱང་ཆུབ་ལམ་སྣ་ཟིན༔ ཟབ་ཆོས་འདི་ཉིད་ཉམས་སུ་ལེན་མཁན་ལ༔ ལོ་ཟླར་མི་འགྱང་གྲུབ་རྟགས་མྱུར་དུ་འོང་༔ ཉམས་ལེན་མཁན་ལ་གྲུབ་རྟགས་མ་བྱུང་ན༔ ཀུན་བཟང་སྣང་མཐའ་པདྨ་འབྱུང་གནས་ཀྱིས༔ ཕྱི་རབས་སེམས་ཅན་ཐམས་ཅད་བསླུས་པར་ངེས༔ དེ་ཕྱིར་ངེས་ཤེས་སྐྱེད་ཅིག་ཕྱི་རབས་ཀུན༔ ཞེས་གསུང་པ་ལྟར། དབང་པོ་སྐལ་བ་དད་བརྩོན་རབ་ཏུ་གྱུར་པ་རྣམས་ཚེ་འདིར། འབྲིང་（28ན）བར་དོར། ཐ་མ་ཡང་སྐྱེ་བ་ཕྱི་མ་ལ་གུ་རུ་རིན་པོ་ཆེས་རྗེས་སུ་བཟུང་ཞིང་བྱིན་གྱིས་བརླབས་ནས་ཐུན་མོང་དང་མཆོག་གི་དངོས་གྲུབ་བདེ་བླག་ཏུ་འཐོབ་པར་འགྱུར་བ་ནི་བསླུ་མེད་རྡོ་རྗེའི་གསུང་གི་བདེན་དོན་ཟབ་མོ་སྟེ། དལ་འབྱོར་ཐོབ་ཅིང་བསྟན་པའི་ཡང་སྙིང་ཟབ་ལམ་འདི་ལྟ་བུ་དང་མཇལ་བའི་ཚེ་བཏང་སྙོམས་སུ་མི་འདོར་བར་སྒྲུབ་པ་ཉམས་ལེན་ལ་རྩེ་གཅིག་ཏུ་འབད་པས་དོན་གཉིས་ཡིད་བཞིན་དུ་འཇོ་བ་ལ་བརྩོན་པར་འཚལ་ལོ། །བགྲངས་ཡས་ཐེག་པའི་རྩེ་རྒྱལ་སྔ་འགྱུར་ཆོས། །བཀའ་གཏེར་རྒྱ་མཚོའི་ཡང་ཞུན་བླ་སྒྲུབ་གཙོ། །དགོངས་པ་ཡོངས་འདུས་ཉམས་ལེན་བཅུད་བསྡུས་པ། །བརྒྱུད་ལྡན་གསུང་གི་གསང་བ་འདི་ཁོ་ན། །ཚུལ་འདིར་སྔོན་ཆད་སྦས་དོན་སྙན་བརྒྱུད་ལས། །ཟབ་གནད་ཡི་གེར་སྤེལ་བ་མེད་མོད་ཀྱང་། །སྙིགས་དུས་གདམས་པའི་གནད་གསང་འཆོལ་དོགས་ནས། །བལྟ་ས་ཆོག་བསྙེན་ཡིག་འདུས་གསལ་ཉིད་དུ་བཀོད། །བསོད་ནམས་དེ་མཐུས་བདག་གཞན་འགྲོ་བ་ཀུན། །མ་དག་གདོས་བཅས་ལུས་འདི་བོར་མ་ཐག །པདྨ་འོད་ཞིང་གུ་རུའི་（28བ）ཞབས་དྲུང་དེར། །རིག་འཛིན་ཌཱ་ཀིའི་ཚོགས་གྲལ་ལ་འཁོད་ཤོག །མགོན་དེའི་རིང་ལུགས་ལམ་བཟང་ཉིན་མོར་བྱེད། །མི་ནུབ་གདུལ་བྱའི་མཁའ་ལ་རྟག་འཆར་བས། །སྐལ་ལྡན་པདྨོའི་སྐྱེད་ཚལ་རབ་བཞད་དེ། །གྲུབ་གཉིས་སྦྲང་རྩིའི་དགའ་སྟོན་རྒྱས་གྱུར་ཅིག །དེ་ལྟར་ཡང་གསང་བླ་མ་རྩ་གསུམ་འདུས་པའི་བསྙེན་སྒྲུབ་ཀྱི་ཡི་གེ་སྐལ་བཟང་ཡིད་ཀྱི་འདོད་འཇོ་ཞེས་བྱ་བ་འདི་ནི། རང་གཞན་མང་པོ་ལ་སྨན་པའི་བསམ་པ་བཟང་པོས་ཀུན་ནས་བསླངས་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་རྩ་གསུམ་པའི་ཐོག་ཏུ་སོན་པ་འཛིན་བྱེད་ཀྱི་ལོ་ཁྲུམ་སྟོད་ཟླ་བའི་ཡར་ངོ་རྒྱལ་བ་དང་པོ་ལ། གངས་ཅན་གྱི་ལྷོ་ཕྱོགས་མོན་ཡུལ་སྤ་གྲོ་རིན་ཆེན་སྤུངས་ཀྱི་རི་ངོགས་རང་བྱུང་པདྨས་བྱིན་གྱིས་བརླབས་པའི་སྒྲུབ་གནས་ཀྱི་རྒྱལ་པོ་སྟག་ཚང་སེང་གེ་བསམ་འགྲུབ་ཀྱི་ཀེའུ་ཚང་དུ་ལེགས་པར་སྦྱར་བ་སྟེ། འདིས་ཀྱང་ཟབ་མོའི་ལམ་བཟང་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པ་དང་། འགྲོ་བ་（29ན）ཐམས་ཅད་ཨོ་རྒྱན་རྡོ་རྗེ་འཆང་ཆེན་པོའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག། །སརྦ་དཱ་མངྒ་ལཾ།། །།