DJYD-KABUM-09-TA-006

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 9, Text 6, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 9: . Kalimpong: Dupjung Lama, 1979-1985.*
Side notes
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre
Cycle	དགོངས་གཏེར་ནཱ་ག་རཀྵ་ (dgongs gter na ga rak+sha)

[edit]

(1ན)(གཏེར་གསར་ནཱ་ག་རཀྴའི་རྒྱུན་ཁྱེར་འོག་གདོན་ཚར་གཅོད་བྱ་བ་བཞུགས་སོ།) ན་མོ་གུ་རུ་མ་ཧཱ་ཀྲོ་ངྷ་ཡ། (འདིར་འཇིགས་བྱེད་ནཱ་གརཀྴའི་རྒྱུན་གྱི་རྣལ་འབྱོར་ལ་འཇུག་པར་འདོད་པས། སྦྱོར་བ་ནི།) ན་མོ། བླ་མ་མཆོག་གསུམ་ཡི་དམ་ལྷར། །གུས་པས་སྐྱབས་མཆི་མཁའ་མཉམ་འགྲོ། །གཏི་མུག་ཀླུ་གདོན་ལས་སྐྱོབ་ཕྱིར། །འཇམ་དཔལ་དཔའ་བོ་བསྒྲུབ་པར་བགྱི། (ལན་གསུམ། དངོས་གཞི་ནི།) ཨ༔ སྣང་སྲིད་ཆོས་རྣམས་སྟོང་པ་ཉིད༔ ཀུན་ཁྱབ་ཀུན་གཟིགས་ཀུན་ཏུ་སྣང་༔ མཁའ་ལས་འཇའ་ཚོན་ཤར་བ་ལྟར༔ རང་རིག་ཧཱུྃ༔ གི་ཡི་གེར་ཤར༔ འོད་འཕྲོས་སྣོད་བཅུད་དངོས་འཛིན་སྦྱངས༔ རབ་འཇིགས་དུར་ཁྲོད་དྲག་པོའི་ཞིང་༔ བསྐལ་པའི་མེ་དཔུང་འབར་བའི་ཀློང་༔ གནམ་ལྕགས་འཁོར་ལོ་རྩིབས་བརྒྱད་དབུས༔ ཀླུ་འབུམ་གཉན་ཁྲི་ས་བདག་སྟོང་༔ བསྣོལ་ཞིང་བརྩེགས་པའི་ཁྲི་སྟེང་དུ༔ པདྨ་ཉི་སྟེང་ཧཱུྃ་བབས་པའི༔ འོད་འཕྲོས་འཁོར་འདས་ཟིན་བྱིན་བསྡུས༔ ཡོངས་གྱུར་གཤིན་རྗེའི་གཤེད་ཆེན་པོ༔ ཁྲོ་མཆོག་ནཱ་ག་རཀྴ་ནི༔ མཐིང་ནག་དབུ་དགུ་ཕྱག་བཅོ་བརྒྱད༔ ཞལ་གདངས་ལྗགས་འདྲིལ་མཆེ་བ་གཙིགས༔ ཉེར་བདུན་སྤྱན་གདངས་ཁྲོ་གཉེར་སྡུད༔ སྨ་ར་སྨིན་མར་(1བ)མེ་སྟག་འཕྲོ༔ སྦྲུལ་མགོ་དགུ་ཡིས་ཐོད་གདེངས་བྱས༔ རིན་པོ་ཆེ་ཡི་པྲོ་གཞུ་གསོལ༔ དམར་ནག་རལ་པ་སྲིད་རྩེར་སླེབས༔ རྩ་བའི་ཕྱག་གཉིས་ཐུགས་ཀ་རུ༔ གྲི་གུག་འབར་བས་སྦྲུལ་གཏུབ་རོལ༔ གཡས་ཕྱག་བརྒྱད་ཀྱི་གྲི་གུག་གིས༔ རྒྱ་མཚོའི་གཏིང་ནས་ཀླུ་རྣམས་བཀུག༔ གཡོན་བརྒྱད་ཀྱིས་བསྡམས་ཆེམ་ཆེམ་རོལ༔ སྦྲུལ་དང་མི་མགོས་དོ་ཤལ་བྱས༔ ཡན་ལག་སྦྲུལ་ལྔའི་ཆུན་པོས་བརྒྱན༔ སྐུ་སྨད་སྦྲུལ་མཇུག་དུག་རླངས་འཕྱོ༔ བཙན་དུག་ངད་རླངས་ནུས་ལྡན་པ༔ མེ་དཔུང་འབར་བའི་ཀློང་དུ་བསྐྱེད༔ སྤྱི་བོར་བདེ་ཆེན་འཁོར་ལོ་རུ༔ ཀླུ་གཤེད་བྱ་ཁྱུང་ནག་པོ་ལས༔ སྤྲུལ་པ་ཡང་སྤྲུལ་སྐར་ལྟར་འཁྲིགས༔ མགྲིན་པར་རྟ་མགྲིན་དམར་ནག་རྔམས༔ རལ་གྲི་སྦྲུལ་འཛིན་འདོར་སྟབས་བགྲད༔ ཐུགས་ཀར་གསང་བདག་ཁྲོ་གཏུམ་མཐིང་༔ རྡོ་རྗེ་སྤྲུལ་འཛིན་འདོར་སྟབས་བགྲད༔ ཀུན་ཀྱང་ཡེ་ཤེས་མེ་དཔུང་ཀློང་༔ དུར་ཁྲོད་ཆས་རྫོགས་ཁྲོ་ཆུང་འགྱེད༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དུས་གསུམ་སངས་རྒྱས་ཀྱི༔ སྐུ་གསུང་ཐུགས་ཡོན་ཕྲིན་ལས་ཀུན༔ དབྱིངས་ནས་སྤྱན་དྲངས་གཉིས་མེད་ཐིམ༔ (2ན) བཛྲ་ས་མ་ཛ༔ ཛ༔ ཧཱུྃ༔ བཾ་ཧོཿགཉིས་གྱུར༔ ཐུགས་གསང་ཉི་ཟླའི་གའུའི་ནང་༔ ཧཱུྃ༔ མཐིང་ཉིད་ལ་སྔགས་ཀྱིས་བསྐོར༔ ཡིག་འབྲུ་རང་ལས་རང་གི་སྒྲ༔ འབྲུག་སྟོང་དུས་གཅིག་ལྡིར་བ་བཞིན༔ སྣོད་བཅུད་འཕར་འཁྲུགས་ཤིག་ཤིག་འགུལ༔ འོད་ཟེར་མེ་སྟག་ལྟ་བུ་ཡིས༔ ཀླུ་གཉན་ས་བདག་གདོན་གྱི་རིགས༔ ནད་དང་ཆུ་སེར་གྲིབ་དང་བཅས༔ སྦུར་མ་མེ་ལ་བསྲེག་བཞིན་གྱུར༔ (ཅེས་དམིགས་གནད་དྲག་པོ་དང་བཅས།) ཨོཾ་ཕེ་ལཾ་ཧཱུྃ༔ (ཞེས་གཙོ་བོར་བཟླ་ཞིང་།) ནག་པོ་ཏི་པ་ཙ་ཡ་ནཱ་ག་ར་ཙ་ཧཱུྃ༔ ཕཊ༔ (ཅེས་པའང་ཅུང་ཟད་རེ་བཟླ། རྗེས་ནི།) སྣོད་བཅུད་འོད་ཞུ་རང་ལ་ཐིམ། །རང་ཡང་མི་དམིགས་སྤྲོས་བྲལ་ངང་། །སླར་ཡང་སྒྱུ་མའི་སྐུ་རུ་ཤར། །ཀླུ་གདོན་ཕྱོགས་རྣམས་ཚར་གཅོད་གྱུར། །དགེ་འདིས་བདག་དང་འགྲོ་བ་ཀུན། །འཇིགས་བྱེད་ནཱ་ག་རཀྴ་ཡི། །གོ་འཕང་བྱང་ཆུབ་མྱུར་ཐོབ་ནས། །བདུད་ལས་རྣམ་པར་རྒྱལ་བར་ཤོག །(ཅེས་པའང་དོན་གཉེར་ཅན་དུ་མའི་རེ་སྐོང་དུ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ཛ་ཡནྟུ།། །།