DJYD-KABUM-10-THA-001

༄༅། །ཕུར་པ་བདུད་འཇོམས་གནམ་ལྕགས་

    སྤུ་གྲིའི་གླེགས་བམ་བཞུགས་བྱང་ཟླ་ཤེལ་

མེ་ལོང་ཞེས་བྱ་བ་བཞུགས་སོ། །

༄༅། །ཨ ད རྴ ཙ ཎྜ ཀ ནྟ ཀཱི ལི པྲ དཱ རཿ ལོ ཧ ཀྵུ རཱ པུ སྟ ཀ ཤ ཀ ལི ན ནཱ མ བི ཛ ཧ རཾ ། ། ༄༅། །ཕུར་པ་བདུད་འཇོམས་གནམ་ལྕགས་སྤུ་གྲིའི་གླེགས་བམ་ བཞུགས་བྱང་ཟླ་ཤེལ་མེ་ལོང་ཞེས་ བྱ་བ་བཞུགས་སོ། །

（1བ）སྡེབ་སྦྱོར་རྐང་བཞི་མཉམ་པའི་བྲིཏྟ་ལས། ཡི་གེ་དགུ་པ་བྲྀ་ཧ་ཏི་ལ་སྤྱིར་རྣམ་གྲངས་༥༡༢ཡོད་པ་ལས། འདིར་བཅོ་ལྔའི་མཚམས་ནས་ཟིན་པ་རྒྱལ་མཚན་གྱི་ཏོག་ཅེས་བྱ་བའི་པྲ་སྟ་རས་མཛེས་པར་བཅིངས་པ་དགེ། ༄༅། །མ ཎྜ ལ པ ར སྱ པྲ བྷྭ གྲ ༄༅། །དཀྱིལ་འཁོར་རྒྱ་མཚོའི་ཁྱབ་བདག་མཆོག ། ༄། །རབ་འབྱམས་རྒྱལ་ཀུན་འདུས་པའི་དངོས། །འཆི་མེད་པདྨ་སམྦྷ་ཝ། ། ༄༅། །ཕྲིན་ལས་འདུས་པའི་ཧེ་རུ་ཀ། དཔལ་ཆེན་བཛ་ཀུ་མཱ་ར། ། （2ན）༄༅། །ཧེ རུ ཀ མ ཧཱ ཤྲཱི ཀཱི ལཱ ཡ ༄༅། །དཔལ་ཆེན་ཁྲག་འཐུང་ཀའི་ལ་ཡ ། ། ༄། །འཕགས་ཡུལ་པཎ་ཆེན་ཡོངས་ཀྱི་མཆོག ། ཡེ་ཤེས་ལུས་ཅན་བི་མ་ལ། ། ༄། །ཐལ་འབྱིན་གྲུབ་པའི་རིག་འཛིན་གཙོ། །བལ་པོ་ཤའི་ལ་མཉཛུ་རྩལ། ། （2བ）ཏ ཙྩ གུ ར བོ ན དྭཱ ཡ པ དྲ། དེ་དང་གཉིས་མིན་བླ་མའི་ཞབས། ༄། །གསང་ཆེན་བཀའ་ཡི་གཉེར་འཛིན་མ། །ཌཱ་ཀིའི་གཙོ་མོ་མཚོ་རྒྱལ་ལྕམ། ། ༄། །ངོ་མཚར་གདམས་བའི་བཀའ་བབས་འཛིན། །གྲུབ་ཆེན་ཁྱེའུ་ཆུང་ལོ་ཙ་བ། ། （3ན）༄༅། །ཙ ཀྲ སུ མ ཧཱ ལ དྐཱ རཱ ཏི ། ། ༄༅། །བདེ་ཆེན་འཁོར་ལོའི་རྒྱན་དུ་བསྟི། ། ༄། །གཏེར་འབྱིན་གྲུབ་པའི་འཁོར་ལོས་བསྒྱུར། །ཁྲག་འཐུང་གར་དབང་བདུད་འཇོམས་གླིང་། ༄། །ཟབ་ལམ་སྙིང་པོའི་ཤིང་རྟ་ཆེ། །འཇིགས་བྲལ་དཔའ་བོ་འགྲོ་འདུལ་གླིང་། ། （3བ）མཚོ་སྐྱེས་གྲུབ་པའི་མེས་པོའི་སྒྱུ་རྩལ་གྱིས། །ཕྲིན་ལས་རོལ་པའི་ཆུ་གཏེར་བསྲུབས་པ་ལས། །གནམ་ལྕགས་སྤུ་གྲིའི་གདམས་སྲོལ་དབང་གི་རྒྱལ། །སྙིགས་མའི་རྒུད་པ་སེལ་བའི་བཙས་སུ་ཕྱུངས། །སྨོན་ལམ་ཟབ་མོས་མི་སྣང་རྒྱས་བཏབ་སྟེ། །མཁའ་འགྲོའི་གསང་མཛོད་དབྱིག་ཏུ་གཏམས་པ་ལས། །དུས་བབས་འགྲོ་འདུལ་སྤྲུལ་པའི་ཟློས་གར་གྱིས། །སྐལ་བཟང་ཕན་བདེ་འཇོ་བའི་དཔྱིད་དུ་ཕྱེས། །ཉེས་པར་བཀྲལ་བའི་འདམ་གྱིས་སྦག་མིན་པར། །རྣམ་དཔྱོད་གསེར་གྱི་ཡུ་བ་ལ་བརྟེན་པའི། །ལེགས་བཤད་གོས་བཟང་འཕུར་ལྡིང་གཡོ་བ་ཅན། །ཁྲིགས་བསྡེབས་རྒྱལ་མཚན་རྩེ་མོར་ཁོ་བོས་བཀོད། །དེ་ལས་གྲུབ་གཉིས་རིན་ཆེན་འདོད་རྒུའི་ཆར། །འབེབས་པའི་ངོ་མཚར་རྣམ་གྲངས་འདི་ལྟ་ཞེས། །དབུ་འདྲེན་ཟླ་ཤེལ་དྭངས་པའི་མེ་ལོང་དུ། །དབུ་ཞབས་དོན་གྱི་གཟུགས་བརྙན་ཅིར་ཡང་འཆར། །དེ་ཡང་གཏེར་གསར་རྡོ་རྗེ་ཕུར་པའི་ཆོས་སྐོར་འདི་ཉིད་གཏེར་གཞུང་རྡོ་རྗེའི་ཚིག་རྐང་ཧ་ཅང་གབ་འཁྲུགས་ཆེ་ཞིང་མན་ངག་གི་གནད་རྣམས་བླ་མའི་ཞལ་ལས་ཤེས་དགོས་པ་ཁོ་ནར་སོང་བས། དེང་དུས་ཐོས་ཆུངགི་བླ་སློབ་ཕལ་མོ་ཆེ་ཞིག་བསྐྱེད་རྫོགས་ཀྱི་ཟབ་གནད་ལྟ་（4ན）ཅི། །ཐ་ན་ལས་སྦྱོར་ཕྲན་ཚེགས་རེའི་ཕྱག་ལེན་དང་བསྒོམ་བྱའང་གཏན་ལ་མ་ཕེབས་པའི་དབང་གིས་གང་དྲན་བྱུང་རྒྱལ་དུ་སྤྱད་པས་ཆད་ལྷག་གི་སྐྱོན་འབྱུང་བ་མང་བ་དང་། མཁས་གྲགས་ཆེན་པོ་རྣམས་ནི་བྱ་སླ་ཁྱེར་བདེ་རྔམས་ཆོས་ཁོ་ན་འདོམས་ཤིང་། རྨོངས་པ་བླུན་དད་ཅན་རྣམས་མ་དག་རྒྱུན་འབྱམས་ཀྱི་ལག་ལེན་ལ་ཕ་ཕོ་གཙང་ཞེན་དུ་གཡེང་བ་ལས་ཅི་བྱ་གཏོལ་བྲལ་དུ་སྣང་བའི་ཕྱིར། དེས་ན་ལམ་འདིའི་རིང་ལུགས་འཛིན་པ་རྣམས་ཀྱི་འཇུག་སྒོར་འདི་ལྟར་བགྱི་བའང་དོན་དང་ལྡན་པར་མཐོང་ནས། རང་ཉིད་རྩོམ་པ་པོའི་མཚན་ཉིད་གང་ཡང་མི་ལྡན་ཀྱང་སྔོན་དགེའི་བག་ཆགས་ཕྲ་མོས་ཟབ་ཆོས་འདི་དག་རང་ནོར་རང་དབང་དུ་སྤྱོད་པ་ལ་སྤོབས་པའི་བློ་མཐུ་མི་དམན་ཅིང་། གསང་བའི་གཉེར་འཛིན་ཌཱ་ཀི་སྲུང་མའི་ཚོགས་ཀྱིས་ལེགས་སོའི་དབུགས་དབྱུང་གིས་སྤྲོ་བའི་བློ་གཟེངས་བསྟོད་པར་གྱུར་པ་ལས། མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲངས་ཏེ་སྒྲུབ་ཐབས་བསྐྱེད་རྫོགས་ལས་ཁ་ཚར་དང་བཅས་པ་གཞན་ལ་ལྟོས་མ་དགོས་པའི་ཡིག་ཆ་ཕྱོགས་གཅིག་ཏུ་བསྡེབས་པར་བྱས་པ་གནམ་（4བ）ལྕགས་སྤུ་གྲིའི་ཆོས་སྐོར་གྱི་གླེགས་བམ་འདིར། ཐོག་མར་བཞུགས་བྱང་དཀར་ཆག་ལྡེབ་ ༥ལོ་རྒྱུས་ལྡེབ་ ༣༣བརྒྱུད་འདེབས་ལྡེབ་ ༡ལས་བྱང་ལྡེབ་༣༩ བསྐང་བ་གཏེར་གཞུང་ལྡེབ་༣ བསྐང་བ་བལ་ཡུལ་མ་ལྡེབ་༥ བསྐང་ཟློག་ཁ་སྐོང་ལྡེབ་༢ ཚོགས་བསྡུས་ལྡེབ་༡ ཚེ་སྒྲུབ་ལྡེབ་༥ རྒྱུན་ཁྱེར་ལྡེབ་༦ འདིར་ཉེར་མཁོ་སྨིན་ལུགས་དམ་ཅན་སྦྱི་གཏོར་ཁ་སྐོང་ཅན་ལྡེབ་༩ བླ་མ་ཡི་དམ་སྤྱིའི་གཏོར་འབུལ་ལྡེབ་༡བཅས་ཡོད། ཕུར་སྲུང་ལྡེབ་༣ སྒྲུབ་ཁོག་ལྡེབ་༢༦ ཛཔྲ་བསྐུལ་དང་སྔགས་བྱང་ལྡེབ་༣ བྱིན་འབེབས་གཏེར་གཞུང་ལྡེབ་༤ གཏོང་ཐུན་ལྡེབ་༦ སྨན་སྒྲུབ་ལྡེབ་༢༠ བདག་འཇུག་ལྡེབ་༨ སྦྱིན་སྲེག་ལྡེབ་༡༤ དྲག་སྲེག་ལྡེབ་༩ མཁྱེན་དགོངས་དམོད་བཅོལ་ལྡེབ་༦ སྨད་ལས་ལྡེབ་༥༢ དམོད་བྱང་ལྡེབ་༡ མནན་པ་ལྡེབ་༡༡ རྩ་དབང་ལྡེབ་༤༥ གཏོར་དབང་ལྡེབ༧ མན་ངག་ལས་ཚོགས་ལྡེབ་བཀའ་བསྒོ་ལྡེབ་༢བཅས་ཤོག་ལྡེབ་༢༦ སྟོད་ལས་བསྙེན་ཡིག་ལྡེབ་༥༤ སྨད་ལས་མན་ངག་ལྡེབ་༢༥ རྫོགས་རིམ་རྩ་རླུང་ལྡེབ་༢༥ དེའི་ལྷན་ཐབས་ལག་ཁྲིད་ལྡེབ་ ༣༣དེའི་སྦས་དོན་ཟབ་ཁྲིད་ལྡེབ་༢༢ ཁྲིད་རྐང་ས་བཅད་ལྡེབ་༡ ཡན་ལག་ཆོས་ལྔའི་（5ན）ཉམས་ཁྲིད་ལྡེབ་༡༢ རྫོགས་ཆེན་ལྡེབ་༣༧ སྨོན་ལམ་རྣམ་བཤདལྡེབ་༦ གཏོར་མའི་དཔེའུ་རིས་ལྡེབ་༥ སྲུང་ཟློག་ཙཀྲ་དང་ལིངྒའི་དཔེའུ་རིས་ལྡེབ་༢ སྒྲུབ་ཆེན་འདྲ་འབག་ལག་ལེན་ཟིན་བྲིས་ལྡེབ་༢༧ ཊ་ཀི་དང་ཀུན་ཐུབ་འཆམས་ཚིག་ལྡེབ་ཕུར་སྒྲུབ་སྨན་སྒྲུབ་འབྲེལ་བའི་ཡོ་བྱད་ཤོམ་ཟིན་ལྡེབ་༢ ཕུར་ཟློག་ཟིན་བྲིས་ལྡེབ་ ༣དེའི་གཏོར་མའི་ཟིན་བྲིས་ལྡེབ་༣ དབྱངས་ཡིག་ལྡེབ༢༥ བསྒྲལ་འཆམས་དང་ཟོར་འཆམས་བརྗེད་བྱང་ལྡེབ་སྤར་བྱང་སྨོན་ཚིག་ལྡེབ་༢བཅས་ལེགས་པར་བཞུགས་སོ། །ངོ་མཚར་ཕུར་གཞུང་མ་དྲོས་ཀླུང་ཆེན་ལས། །སྙིང་པོའི་ལམ་ཟབ་འཆི་མེད་བདུད་རྩིའི་རྒྱུན། །ཁྲིགས་བསྡེབས་བུམ་བཟང་བཅུད་དུ་བླངས་ཟིན་གྱི། །དོན་གཉེར་སྐལ་ལྡན་ཀུན་དགའི་ཉེར་འཚོར་མཛོད། །ལེགས་བྱས་ཁྱུང་སྔོན་བུ་ཡིས་ཉེར་དྲངས་པའི། །བསོད་ནམས་སྣང་བའི་མུ་ཁྱུད་ཅན་གྱི་ཟེར། །གདུལ་བྱའི་ཡིད་ཀྱི་ཆུ་སྐྱེས་ལ་ཕོག་པས། །རྣམ་གྲོལ་གེ་སར་དགོད་པའི་དཔལ་གྱུར་ཅིག ། ཟབ་གཏེར་ཕྲིན་ལས་མི་བཟད་འཐོར་རླུང་ཆེས། །བདུད་སྡེའི་རུ་མཚོན་དུས་གཅིག་ཡོངས་（5བ）བཅིལ་ཏེ། །དགེ་མཚན་ཕྱོགས་ལས་རྣམ་རྒྱལ་ལྷའི་རྔ་སྒྲ། །ས་གསུམ་སྐྱེ་རྒུའི་རྣ་བར་རྟག་འབེབས་ཤོག ། ཅེས་པའང་ཡིག་ཆ་ཡོངས་སུ་རྫོགས་པ་གྲུབ་པའི་རྗེས་ཐོག་ཟླ་བ་གསར་དུ་ཚེས་པའི་དུས་ཀྱི་རྒྱལ་ཕུར་འཛོམ་པའི་འགྲུབ་སྦྱོར་བཟང་པོ་ལ། རིག་པ་འཛིན་པའི་མིང་གིས་སྙན་པ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ཤྲཱི་བི་ཛ་ཡུནཏུ།། །།