DJYD-KABUM-14-PHA-026

(1ན)ཚེ་སྒྲུབ་འཆི་མེད་སྲོག་ཐིག་ལས་ཡང་གསང་གི་ཚེ་སྒྲུབ་རླུང་སྦྱོར་འབར་འཛག་གི་སྐབས་སུ་གེགས་སེལ་ལུས་སྦྱོང་འཁྲུལ་འཁོར་གྱི་མན་ངག་ལ། སྟེང་རླུང་མནན་ལ་འོག་རླུང་བསྡམས༔ རླུང་གཉིས་ཁ་སྦྱར་མ་ཤོར་བཟུང་༔ རྐང་པ་རྡོ་རྗེ་སྐྱིལ་ཀྲུང་བྱ༔ ལག་གཉིས་པུས་མོ་གཉིས་ལ་བཀབ༔ སྐེད་པ་གཡས་ལ་ལན་གསུམ་བསྐོར༔ རླུང་ནི་སྣ་བུག་གཡས་སུ་ཕུ༔ དེ་བཞིན་གཡོན་དུའང་ཤེས་པར་བྱ༔ ལག་གཉིས་བསྣོལ་ལ་དཔུང་པ་བཟུང་༔ རོ་སྟོད་གཡས་གཡོན་གསུམ་གསུམ་བསྐོར༔ ལག་གཉིས་བསྣོལ་ལ་གྲུ་མོ་བཟུང་༔ རེ་སྟོད་གསེང་ཞིང་བསྒྲིལ་བར་བྱ༔ མཛུབ་མོ་བསྣོལ་ལ་གུང་མོ་བསྒྲེང་༔ ནམ་མཁའི་མཐོངས་སུ་འཐེན་པར་བྱ༔ དེ་ཚེ་རླུང་གི་སྟོད་འཐེན་བྱ༔ ལག་གཉིས་བརྐྱང་ཞིང་ཞག་ཤ་སྡེབ༔ སྟེང་དུ་བརྐྱང་ཞིང་འོག་ཏུ་དབབ༔ དེ་དུས་མཆན་འོག་གྲུབ་མོས་བརྡུང་༔ གཡས་བསྐོར་གཡོན་བསྐོར་སྟོད་ནད་སེལ༔ གཡས་འགྱིང་གཡོན་འགྱིང་སྟོད་ནད་སེལ༔ གསོར་ཞིང་བསྲུབ་པས་གློ་ནད་སེལ༔ ནམ་མཁར་བརྒྱངས་(1བ)པས་ཐིག་ལེ་འདྲེན༔ ལག་པས་རི་འཕུལ་ཐིག་ལེ་འགྲིམས༔ བསྐྱོད་ཅིང་དབབ་པས་གེགས་རྣམས་སེལ༔ ཞེས་གསུངས་པ་ལྟར་དམིགས་རྐང་སོ་སོར་འཁྲུལ་འཁོར་ལ་གནད་དུ་བསྣུན་པས་ལུས་རྩ་རླུང་གི་གེགས་ཐམས་ཅད་སེལ་བར་ངེས་སོ། །འདི་ཡང་པད་གླིང་ཚེ་ཁྲིད་རྡོ་རྗེ་ཕྲེང་བའི་སྲོག་རྩོལ་རླུང་གི་མན་ངག་ལས་ཁོལ་ཕྱུངས་སཱ་ཁ་སྐོང་དུ་བསྡེབས་པ་སྟེ་ཛྙཱ་ནས་སོ།། །།