DJYD-KABUM-16-MA-005

（1ན）བདེ་ཆེན་ལྷན་སྐྱེས་ཌཱ་ཀི་ནཱི༔ ཡང་གསང་རྡོ་རྗེ་རྣལ་འབྱོར་མ༔ ཁྲོས་མ་ནག་མོར་སྒྲུབ་པའི་ཐབས༔ མན་ངག་དོན་གྱི་མཐར་ཐུག་ནི༔ ཨ༔ རྣམ་ཐར་གསུམ་ལྡན་སྟོང་པ་ཉིད༔ བདེ་ཆེན་འོད་གསལ་སྙིང་རྗེའི་གདངས༔ ཟུང་འཇུག་རིག་པ་བྃ་མཐིང་ནག༔ དེ་ལས་འབར་བའི་འོད་ཟེར་གྱིས༔ ཁམས་གསུམ་རྟོག་པའི་ཞེན་སྣང་སྦྱངས༔ སྣང་སྲིད་ཆོས་ཀྱི་འབྱུང་གནས་ཆེ༔ རང་བྱུང་དུར་ཁྲོད་གཞལ་ཡས་དབུས༔ ཆགས་མེད་པདྨ་ཉི་ཟླའི་སྟེང་༔ བདག་ཉིད་རྒྱལ་ཀུན་བསྐྱེད་པའི་ཡུལ༔ རྡོ་རྗེ་ཁྲོས་མ་ནག་མོར་ཤར༔ དུས་ཀྱི་མུན་ལྟར་གནག་པའི་སྐུ༔ ཁྲོ་ཆགས་སྒེག་པའི་ལང་ཚོ་ཅན༔ གྲི་གུག་དང་ནི་ཐོད་ཁྲག་འཛིན༔ བརྐྱང་བསྐུམ་གར་གྱི་སྟངས་སྟབས་ཀྱིས༔ རྟོག་མེད་བམ་རོའི་གདན་ལ་རོལ༔ རུས་པའི་ཕྱག་རྒྱ་རྣམ་ལྔ་དང་༔ དུར་ཁྲོད་ཆས་ཀྱིས་རབ་ཏུ་བརྗིད༔ མཆན་གཡོན་ཐབས་ཀྱི་ཁ་ཊྭཱྃ་འཆང་༔ དབུ་སྐྲ་གྱེན་བརྫིས་རལ་གསེབ་ན༔ ཕག་ཞལ་ངུར་སྒྲས་ས་གསུམ་གཡོ༔ ཡེ་ཤེས་བསྐལ་མེ་འབར་བའི་ཀློང་༔ སྲིད་གསུམ་ཟིལ་གནོན་ཆེན་པོར་བཞུགས༔ གནས་ལྔར་རིགས་ལྔའི་ཕག་མོ་རྣམས༔ （1བ）རང་རྟགས་རྒྱན་རྫོགས་གར་གྱིས་རོལ༔ རྡོ་རྗེ་ལུས་ཀྱི་གྲོང་ཁྱེར་དུ༔ གནས་གསུམ་དཔའ་བོ་མཁའ་འགྲོ་མ༔ འབུམ་ཕྲག་ཡངས་པའི་བཀོད་པ་ཀུན༔ མ་བསྐྱེད་ཡེ་ནས་ལྷུན་རྫོགས་དང་༔ ཐུགས་ཀར་ཉི་ཟླའི་གྭའུའི་སྦུབས༔ བྃ་མཐར་སྔགས་ཀྱིས་བསྐོར་བ་ལས༔ འོད་འཕྲོས་འཁོར་འདས་དྭངས་བཅུད་བསྡུས༔ བདག་ཐིམ་ཆེ་བའི་གཟི་བྱིན་བསྐྱེད༔ ཅིར་སྣང་ཡེ་ཤེས་ཕྱག་རྒྱར་སད༔ གྲགས་སྟོང་སྔགས་སྒྲས་འཇིག་རྟེན་གཡོ༔ བདེ་ཆེན་མཆོག་ཏུ་མི་འགྱུར་བ༔ འོད་གསལ་དགོངས་པའི་རྩལ་རྫོགས་བསམ༔ ཨོཾ་བཛྲ་ཀྲོ་ངྷི་ཀ་ལི་བྃ་ཧ་རི་ནི་ས་ཧཱུྃ་ཕཊ༔ དམིགས་བསལ་གནད་དང་ལྡན་པ་ཡིས༔ བཟླས་པ་ཆུ་བོའི་རྒྱུན་ལྟར་བརྩོན༔ ཀུན་རྫོབ་སྣང་ཆ་བསྐྱེད་པའི་ལ༔ དོན་དམ་སྟོང་ཉིད་ཆེན་པོར་བཟླ༔ གཡོ་མེད་དགོངས་པའི་གདིང་ཐོབ་ཚེ༔ དོན་གྱི་ཁྲོས་མ་མངོན་དུ་འགྱུར༔ ས་མ་ཡ༔ ཁོ་བོ་འཇིགས་བྲལ་ཡེ་ཤེས་རྡོ་རྗེའི་ཟབ་མོ་དགོངས་པའི་གཏེར་གྱི་ཆོས་སྡེ་མཐར་ཐུག་པ་སྟེ་མི་ལོ་ཉེར་གསུམ་འདས་པ་ལྕགས་ཕོ་སྟག་གི་ལོ་སྨིན་དྲུག་ཟླ་བའི་དམར་ཕྱོགས་ཀྱི་ཚེས་བཅུ་ལ་བཀའ་རྒྱ་བཀྲོལ་ཏེ་སྐལ་ལྡན་གཅིག་ལ་ཆིག་བརྒྱུད་དུ་གདམས་པའོ། །བཀྲ་ཤིས༎ ༎