DJYD-KABUM-16-MA-006

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 16, Text 6, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: . Kalimpong: Dupjung Lama, 1979-1985.*
Side notes	Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)

[edit]

（1ན）རྡོ་རྗེ་ཕག་མོའི་ཟབ་ཏིག་བཞུགས༔ དངོས་གྲུབ་ཀུན་གྱི་རྩ་བ་སྟེ༔ གསང་བའི་ལམ་གྱི་མཐར་ཐུག་པ༔ ཤེས་རབ་དབྱིངས་ཀྱི་ཡུམ་ཆེན་མོ༔ རྡོ་རྗེ་ཕག་མོ་བསྒྲུབ་པ་ནི༔ སྐད་ཅིག་སྟོང་ཉིད་སྒྱུ་མའི་འཕྲུལ༔ ས་ཕྱོགས་ཨོ་རྒྱན་སྤྲུལ་པའི་ཞིང་༔ རང་ལུས་གཞལ་ཡས་ཆོས་འབྱུང་དབུས༔ སེམས་ཉིད་དག་པ་ཕག་མོའི་སྐུ༔ དམར་གསལ་ཉི་མ་བྱེ་བའི་མདངས༔ རྩ་ཞལ་འཛུམ་ཁྲོ་ཆགས་ཉམས་བཞད༔ སྟེང་ཞལ་ཕག་གདོང་གཡས་ཕྱོགས་པའི༔ དཔྲལ་བར་གཡུང་དྲུང་འཁོར་བས་མཚན༔ ཕྱག་གཡས་རྡོ་རྗེའི་གྲི་གུག་ཕྱར༔ གཡོན་པས་ཐོད་ཁྲག་ཐུགས་ཀར་འཛིན༔ མཆན་གཡོན་ཁ་ཊྭཱྃ་བརླ་ལ་བརྟེན༔ ཌཱ་མ་རུ་དང་དར་དཔྱང་གཡོ༔ དབུ་སྐྲ་ནག་པོ་སིལ་བུར་གྲོལ༔ རྡོ་རྗེའི་ཕྲེང་བ་ལ་བརྒྱུས་པའི༔ ཐོད་སྐམ་ལྔ་ཡི་ཅོད་པན་བཅིངས༔ ཁྲག་འཛག་མི་མགོ་སོ་གཉིས་དང་༔ གསེར་གྱི་དྲིལ་བུ་སྤེལ་བ་ཡི༔ དོ་ཤལ་དག་ནི་མཛེས་པར་འཕྱང་༔ རུས་པའི་འཁོར་ལོ་རྣ་ཆ་དང་༔ མགུལ་ཆུ་གདུ་བུ་རྣམས་ཀྱིས་བརྒྱན༔ གཅེར་བུ་བཅུ་དྲུག་ལོན་པ་ལྟར༔ ལང་ཚོ་དར་ལ་བབས་པའི་ཚུལ༔ ནུ་མ་འབུར་ཞིང་པདྨོ་རྒྱས༔ ཞབས་གཡོན་བརྐྱང་པའི་གར་སྟབས་（1བ）ཀྱིས༔ པད་ཉི་བམ་རོའི་གདན་ལ་རོལ༔ ཡེ་ཤེས་བསྐལ་མེ་འབར་བའི་དབུས༔ ཁམས་གསུམ་དབང་སྡུད་ཆེན་མོར་བཞུགས༔ དམ་ཚིག་ཡེ་ཤེས་གཉིས་སུ་མེད༔ སྙིང་གར་ཆོས་འབྱུང་ཟུར་དྲུག་པའི༔ ལྟེ་བར་ཉི་སྟེང་བྃ་ཡིག་མཐར༔ སྔགས་ཕྲེང་མགལ་མེ་ལྟར་འཁོར་བ༔ དེ་ལས་འཕྲོས་པའི་འོད་ཟེར་གྱིས༔ རྒྱལ་མཆོད་འགྲོ་བའི་སྡིག་སྒྲིབ་སྦྱང་༔ བརྟན་གཡོའི་དྭངས་བཅུད་ཀུན་བསྡུས་ཏེ༔ རང་ཐིམ་བདེ་བ་ཆེན་པོ་ཡི༔ ཡེ་ཤེས་མཆོག་ལ་དབང་འབྱོར་བསམ༔ ཨོཾ་བཛྲ་ཝཱ་རཱ་ཧི་ཧྲཱི་ཧཱུྃ་ཕཊ་སྭཱ་ཧཱ༔ ཡིད་དང་ངག་དང་འགོག་པ་ཡི༔ བཟླས་པ་དག་ལ་རབ་ཏུ་བརྩོན༔ གསལ་བདེ་མི་རྟོག་གང་འདོད་བཞིན༔ སྙིང་གསང་ལྟེ་བར་སྔགས་འཁོར་ལས༔ སྤོ་ཞིང་བཟླ་བ་མཆོག་ཏུ་ཤིས༔ ཐུན་མཚམས་གཏོར་མས་ཐུགས་དམ་བསྐང་༔ རྒྱས་པར་གསང་བའི་ཚོགས་འཁོར་ལ༔ བརྟེན་ནས་དགའ་བཞིའི་བདེ་ཆེན་སྤེལ༔ སྣང་གྲགས་སེམས་ཀྱིས་བསྡུས་པའི་ཆོས༔ དོན་དམ་ཕག་མོའི་རང་བཞིན་ཏེ༔ ཕག་མོ་ཉིད་ཀྱང་གདོད་མ་ནས༔ ལྷན་ཅིག་སྐྱེས་པའི་ཡེ་ཤེས་སུ༔ ངོ་ཤེས་གདིང་ཐོབ་མངོན་གྱུར་པ༔ ཕག་མོའི་དངོས་གྲུབ་ཡང་དག་གོ༔ ས་མ་ཡ༔ （ཁོ་བོ་གར་དབང་འགྲོ་འདུལ་（2ན）གླིང་པ་རྡོ་རྗེ་དྲག་པོ་རྩལ་གྱི་སྙིང་གི་ཏི་ཀ་མཐར་ཐུག་པ་ལས་ལྡན་གྱི་ཤེས་རབ་མ་གཅིག་ལ་ཆིག་བརྒྱུད་དུ་གདམས་པ་ཨྀཐི༎ ༎ ༈ ཨོཾ་སྭསྟི། （ཕག་མོའི་ཟབ་ཏིག་ཉམས་སུ་ལེན་པ་ལ། ཐོག་མར་སྦྱོར་བའི་ཆོས་ནི།） རང་ཉིད་སྐད་ཅིག་གིས་རྡོ་རྗེ་རྣལ་འབྱོར་མའི་སྐུར་གྱུར་པའི་མིག་གཉིས་ཉི་ཟླ་དང་མིག་འབྲས་རྡོ་རྗེར་འབར་བའི་འོད་ཟེར་གྱིས་བགེགས་ཐམས་ཅད་ཚར་བཅད་པ་གྱུར། ཨོཾ་བཛྲ་རཀྵ་རཀྵ་ཧཱུྃ། སྟེང་འོག་ཕྱོགས་མཚམས་ཐམས་ཅད་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་འབར་བ་དང་བཅས་པའི་སྲུང་བའི་འཁོར་ལོས་བཅིངས་པར་གྱུར། （ཅེས་སྲུང་མཚམས་བཅད།） རང་གི་སྤྱི་བོར་རྩ་བའི་བླ་མ་ཧེ་རུ་ཀ་དང་རྡོ་རྗེ་རྣལ་འབྱོར་མ་གཉིས་སུ་མེད་པ་སྐྱབས་གནས་ཐམས་ཅད་འདུས་པའི་ངོ་བོར་བཞུགས་པར་གྱུར། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་རྡོ་རྗེ་འཛིན། །གསོལ་བ་འདེབས་སོ་བྱིན་གྱིས་རློབས། །（ལན་གསུམ།） བླ་མ་རྡོ་རྗེ་རྣལ་འབྱོར་མ། །དཀོན་མཆོག་གསུམ་ལས་སྐྱབས་སུ་མཆི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །བླ་མ་རྡོ་རྗེ་མཁའ་འགྲོ་མ། །དཀོན་མཆོག་གསུམ་ལ་ཕྱག་འཚལ་ལོ། །དུག་ལྔ་ཟད་མཛད་མཁའ་འགྲོ་ལྔ། །ཞི་རྒྱས་དབང་དྲག་ཚར་（2བ）གཅོད་པའི། །བདག་གི་ལས་ཀྱི་འབྲས་བུ་རྣམས། །ད་ལྟ་ཉིད་དུ་མཆིས་པར་མཛོད། །བདག་གིས་དགེ་བ་གང་བྱས་པ། །སེམས་ཅན་ཀུན་གྱི་དོན་དུ་བསྔོ། །སུ་ཡིས་དམ་པའི་ཆོས་སྤྱོད་པ། །དེ་དག་ཀུན་ལ་རྗེས་ཡི་རང་། །མཆོག་ཏུ་གསང་བ་སྔགས་ཀྱི་ལམ། །བདག་གི་རྒྱུད་ལ་བརྟེན་པར་བགྱི། །（ལན་གསུམ།） ཚོགས་ཞིང་རྣམས་རང་ལ་ཐིམ་པར་གྱུར། （ཅེས་བསོད་ནམས་ཀྱི་ཚོགས་དང་།） ཨོཾ་སྭ་བྷཱ་ཝ་ཤུངྔྷཿ སརྦ་དྔྷརྨ་སྭ་བྷཱ་ཝ་ཤུདྡྷོ་྅་ཧཾ། （ཞེས་སྣོད་བཅུད་ཕུང་ཁམས་ཐམས་ཅད་མི་དམིགས་པར་བསྒོམ་པ་ཡེ་ཤེས་ཀྱི་ཚོགས་བསགས། ཐུན་མཚམས་སུ་གཏོར་མ་འབུལ་བར་འདོད་ན།） རཾ་ཡཾ་ཁཾ་（གིས་བསྲེག་གཏོར་བཀྲུས།） ཨོཾ་ཨཱཿཧཱུྃ་（ལན་གསུམ་གྱིས་བྱིན་བརླབ།） འཁོར་འདས་ཐམས་ཅད་རྗེ་བཙུན་མ་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པའི་རྣམ་པར་ཕེཾ། （ཞེས་སྤྱན་དྲངས།） ལྗགས་རྡོ་རྗེའི་སྦུ་གུས་གཏོར་མ་གསོལ་བར་（བསམ་ལ། རྩ་སྔགས་མཐར།） ཨེ་ཨ་རལླི་ཨོཾ་ཨཱཿཧཱུྃ་བ་ལིཾ་ཏ་ཁཱ་ཧི་ཁཱ་ཧི། （ལན་གསུམ་མམ་བདུན་གྱིས་ཕུལ་ལ།） ཨརྒྷཾ་（ནས་）ཤཔྡའི་（བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ།） སྟོང་ཉིད་སྙིང་རྗེ་དབྱེར་མེད་པ༔ ཁམས་གསུམ་པ་ཡི་ངོ་བོ་ཉིད༔ བསྐལ་པའི་མེ་བཞིན་གཟི་བརྗིད་འབར༔ རྡོ་རྗེ་ཕག་མོ་ཁྱོད་ལ་བསྟོད༔ དམ་རྫས་གཏོར་མ་འདི་བཞེས་ལ༔ མཆོག་（3ན）དང་ཐུན་མོང་དངོས་གྲུབ་སྩོལ༔ （ཅེས་བསྟོད། ཡིག་བརྒྱས་ནོངས་པ་བཤགས་ནས།） བཛྲ་མུ༔ （ས་མགྲོན་གཤེགས་སུ་གསོལ། བཟླས་པའི་མཐར།） སྣང་གྲགས་ལྷ་སྔགས་ཡེ་ཤེས་སྤྲིན། །ཆོས་དབྱིངས་ཀློང་ཆེན་ཡངས་པར་བསྡུ། །མ་འགག་སྒྱུ་འཕྲུལ་དྲྭ་བའི་གར། །རྡོ་རྗེ་ཕག་མོའི་ངོ་བོ་ལྡང་། །ཨོཾ་ཨཱཿཧཱུྃ། ཞེས་བསྡུ་ལྡང་བྱ） དགེ་བ་འདི་ཡིས་མྱུར་དུ་བདག །རྡོ་རྗེ་ཕག་མོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡིས་ལ་འགོད་པར་ཤོག །ཇི་ལྟར་ལྷ་མོ་ཁྱོད་ཉིད་དང་། །བདག་ནི་རབ་ཏུ་མཉམ་སྦྱར་ཕྱིར། །འདི་ནས་འཇིག་རྟེན་འོག་ཏུ་ཡང་། །མཁའ་འགྲོ་མ་ཡི་གཟུགས་ཅན་དུ། །བདག་ཉིད་འབྱུང་ཞིང་འགྱུར་བར་ཤོག །བདེ་ཞིང་བདེ་བ་བརྟན་པ་དང་། །བདེ་བ་ཆེན་པོར་བདག་འགྱུར་ཤོག །（ཅེས་དགེ་བ་བསྔོ་ཞིང་སྨོན་ལམ་གདབ། ཤིས་པ་བརྗོད་པས་ཀྱང་བདེ་ལེགས་སུ་བྱའོ། །ཞེས་པའང་ཛྙཱ་ནས་སོ༎ ༎）