DJYD-KABUM-16-MA-048

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 16, Text 48, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: . Kalimpong: Dupjung Lama, 1979-1985.*
Side notes	Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)

[edit]

༄༅། །མཁའ་འགྲོ་སེང་གདོང་མའི་ཚོགས་མཆོད་དངོས་གྲུབ་རོལ་མཚོ་བཞུགས་སོ། ། ༄༅། །（མཁའ་འགྲོ་སེང་གདོང་མའི་ཚོགས་མཆོད་བྱ་བ་ལ། ཚོགས་རྫས་རྣམས་རཾ་ཡཾ་ཁཾ་གིས་བསང་སྦྱང་།） ཚོགས་གཞོང་བྷནྡྷའི་སྣོད་ཡངས་སུ། །ཚོགས་རྫས་ཤ་ལྔ་བདུད་རྩི་ལྔ། །རྡོ་རྗེ་བཟའ་བའི་དམ་ཚིག་རྫས། །འདོད་ཡོན་སྤྲིན་ཕུང་འཕྲོ་བར་གྱུར། །ཨོཾ་ཨཱཿཧཱུྃ། （ལན་གསུམ་གྱིས་བྱིན་བརླབས། ཚོགས་ཞིང་སྤྱན་འདྲེན་པ་ནི།） ཧཱུྃ། འོག་མིན་ཆོས་དབྱིངས་ཕོ་བྲང་དང་། །དུར་ཁྲོད་དྲག་པོའི་གནས་མཆོག་ནས། །བདུད་འདུལ་མཁའ་འགྲོ་སེང་གདོང་མ། །སྤྲུལ་འཁོར་མ་མོ་འབུམ་སྡེའི་ཚོགས། །ལོངས་སྤྱོད་ཚོགས་ཀྱི་འདུ་བར་གཤེགས། །བཛྲ་སེཾ་ཧ་མུ་ཁ་ས་པ་རི་ཝཱ་ར་ཨེ་ཧྱེ་ཧི༔ ཛཿཧཱུྃ་བྃ་ཧོཿ （ཚོགས་དང་པོ་འབུལ་བ་ནི།） ཧཱུྃ། བླ་མེད་མཆོག་གི་དམ་ཚིག་རྫས། འདོད་ཡོན་རྒྱ་མཚོའི་སྤྲིན་ཕུང་འཕྲོ། །ཚོགས་ཀྱི་མཆོད་པ་དམ་པ་འདི། །ཐུགས་དམ་དབང་གི་བཞེས་སུ་གསོལ། །སརྦ་ག་ཎ་ཙཀྲ་པཱུ་ཛ་ཧོཿ （བར་པ་བཤགས་སྐོང་ནི།） ཧོཿ བདག་ཅག་མ་རིག་འཁྲུལ་པ་ཡིས། །ཡེ་ཤེས་ངྷཱ་ཀིའི་ལྷ་ཚོགས་ཀྱི། །ཐུགས་དང་འགལ་བའི་ཉེས་ལྟུང་ཀུན། །མཐོལ་བཤགས་ཚངས་པའི་དངོས་གྲུབ་སྩོལ། །（ཡིག་བརྒྱ་བརྗོད། ཐ་མ་བསྒྲལ་བསྟབ་ནི།） ནྲྀ་ཏྲི་སརྦ་ཤ་ཏྲུཾ་ཨཱ་ཀཪྵ་(1བ)ཡ་ཛཿ ཛཿཧཱུྃ་བཾ་ཧོཿ ཧཱུྃ་བྷྱོ། བདུད་འདུལ་སེང་ཧ་མུ་ཁ་ཡི། །ཕྲིན་ལས་ཡོངས་རྫོགས་དུས་ལ་བབ། །དགྲ་བགེགས་བྱད་མའི་ཚོགས་རྣམས་ཀྱི། །གཟུགས་ཕུང་ཐལ་བའི་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྤོར། །སརྦ་ཤ་ཏྲུཾ་མཱ་ར་ཡ་རྦད། ཙྪིནྡྷ་ཙྪིནྡྷ་བྷིནྡྷ་བྷིནྡྷ་ཧ་ཧེ་ཕཊ། བྷྱོ། དགྲ་བགེགས་བསྒྲལ་བའི་ཤ་ཁྲག་རུས། །སེང་གདོང་ལྷ་ཚོགས་ཞལ་དུ་བསྟབ། །རྔམས་ཤིང་དགྱེས་པར་བཞེས་ནས་ཀྱང་། །མངོན་སྤྱོད་ཕྲིན་ལས་ཡོངས་རྫོགས་མཛོད། །ཨོཾ་བཛྲ་སེཾ་ཧ་མུ་ཁ་ས་པ་རི་ཝཱ་ར་མ་ཧཱ་མཱཾ་ས་རཀྟ་ཙིཏྟ་གོ་རོ་ཙ་ན་བསུ་ཏ་ཀེཾ་ནི་རི་ཏི་ཁ་ཁ་ཁཱ་ཧི་ཁཱ་ཧི། （འདིར་ཚོགས་ལ་རོལ་མཐར་ལྷག་མར་ཞལ་ཆབ་སྦྲེང་ལ།） ཨོཾ་ཨཱཿཧཱུྃ་（གིས་བྱིན་བརླབ།） བྷྱོ། ལྷག་ལ་དབང་བའི་དྲེགས་ཚོགས་ཀུན། །དམ་རྫས་ཚོགས་ལྷག་འདི་བཞེས་ལ། །ཕྱི་ནང་བར་ཆད་ཞི་བ་དང་། །ཕྲིན་ལས་རྣམ་བཞི་འགྲུབ་པར་མཛོད། །ཨོཾ་ཨུ་ཙྪིཥྚ་ལིཾ་ཏ་ཁ་རཾ་ཁཱ་ཧི། （ཞེས་གཙང་གསང་འབུལ། ཆད་ཐོ་བསྒྲག་པ་ནི།） བྷྱོ། དཔལ་གྱི་སྤྱན་སྔར་དམ་བཅས་པའི། །གསང་སྔགས་བཀའ་ཡི་སྲུང་མ་རྣམས། །མཆོད་གཏོར་བཞེས་ལ་དགྲ་བགེགས་སྒྲོལ། །ཁྱད་པར་ཀླ་ཀློའི་འཚེ་བྱེད་ཟློག །རྣམ་བཞིའི་ཕྲིན་ལས་འགྲུབ་པར་མཛོད། །（བཤལ་ཆུས་བརྟན་མ་སྐྱོང་བ་ནི།） ཧཱུྃ། བོད་ཁམས་སྐྱོང་བའི་བརྟན་མའི་ཚོགས། །འདིར་（2ན）བྱོན་བཤལ་ཆུའི་བདུད་རྩི་བཞེས། །གངས་ཅན་འགྲོ་ཀུན་བདེ་བ་དང་། །བསྟན་པ་དར་བའི་ཕྲིན་ལས་མཛོད། །མ་མ་ཧྲིང་ཧྲིང་ཨ་མྲྀ་ཏ་པཱུ་ཙ་ཧོཿ （རྟ་བྲོ་ནི།） ཧཱུྃ་བྷྱོ། བདུད་འདུལ་དྲག་མོའི་དཀྱིལ་འཁོར་དུ། །དབྱིངས་ཕྱུག་ཁྲོས་མའི་རྡོ་རྗེའི་བྲོས། །བར་ཆད་དམ་སྲི་འབྱུང་པོ་ཀུན། །སྐྱེ་མེད་ཆོས་ཀྱི་དབྱིངས་སུ་མནན། །ཨོཾ་ཨཱཿཧཱུྃ་སྟྭམྦྷ་ཡ་ལཾ་ནན། （གཏང་རག་མཆོད་བསྟོད་མཐར།） ཧོཿ དོན་དམ་གཟོད་ནས་སྤྲོས་བྲལ་ལ། །གཟུང་འཛིན་མཚན་མ་ལས་འདས་ཀྱང་། །ཀུན་རྫོབ་གློ་བུར་འཁྲུལ་བའི་ཚོགས། །འཁོར་གསུམ་དམིགས་མེད་དབྱིངས་སུ་བཤགས། །（ཡིག་བརྒྱ་བཟླ། བསྡུ་ལྡང་ནི།） ཨ། སེམས་ཉིད་སྐྱེ་བ་མེད་པ་ལས། །སྐྱེ་བའི་ཆོ་འཕྲུལ་དཀྱིལ་འཁོར་ལྷ། །མཁའ་ལ་འཇའ་ཚོན་ཡལ་བ་ལྟར། །འོད་གསལ་གཉུག་མའི་ཀློང་དུ་ཐིམ། །ཨ་ཨ་ཨ། ལྷ་ཉིད་རང་ལ་རང་ཉིད་ལྷ། །རང་བཞིན་ཀ་དག་ངང་ལ་གནས། །བདག་ཉིད་གཉུག་མའི་ངྷཱ་ཀི་ནཱི། །སྣང་སྲིད་ཞིང་ཁམས་ཆེན་པོར་བལྟ། །ཨོཾ་ཨཱཿཧཱུྃ། （བསྔོ་སྨོན་ནི།） དགེ་འདིས་བདག་གཞན་འགྲོ་བ་ཀུན། །བདུད་འདུལ་ཡུམ་ཆེན་ངྷཱ་གི་མའི། །གོ་འཕང་བྱང་ཆུབ་མྱུར་ཐོབ་ནས། །བདུད་ལས་རྣམ་པར་རྒྱལ་བར་ཤོག །（བཀྲ་ཤིས་ནི།） ཨོཾ། འཁོར་ལོས་བསྒྱུར་བའི་ཡུམ་ཆེན་（2བ）མོ། །བདུད་འདུལ་ངྷཱ་ཀིའི་མཐུ་སྟོབས་ཀྱིས། །དེང་འདིར་རྒུད་པ་ཀུན་ཞི་ནས། །རྟག་ཏུ་དཔལ་གནས་བདེ་ལེགས་ཤོག །（ཅེས་སོགས་ཀྱིས་མཐའ་རྒྱས་པར་བྱའོ། །ཞེས་པའང་ཆོས་ཀྱི་བདག་པོ་འཁྲུལ་ཞིག་རྡོ་རྗེའི་ངོར་བདུད་འཇོམས་འགྲོ་འདུལ་གླིང་པས་སོ། །ཛ་ཡནྟུ༎ ༎）