DJYD-KABUM-16-MA-058

༄༅། །ཟབ་ལམ་མཚོ་སྐྱེས་ཐུགས་ཐིག་གི་ཚེ་སྒྲུབ་ མན་ངག་གནད་བྱང་བཞུགས་སོ། །

༄༅། །ཨོཾ་སྭསྟི། （འཆི་མེད་པདྨ་ཐོད་ཕྲེང་རྩལ་ཉིད་རྡོ་རྗེའི་ཚེ་སྒྲུབ་པ་གཙོ་བོར་བཏོན་ཏེ་ཉམས་སུ་ལེན་པ་ནི། ཚེ་དལ་བཀྲམ་ལ་ཕྲིན་ལས་ཀྱི་གཞུང་བསྲངས་ཏེ་བདག་མདུན་དབྱེར་མེད་དུ་བསྐྱེད། བཟླས་པའི་སྐབས་སུ་བབ་པ་ན།） རང་གི་སྙིང་གར་འོད་ལྔའི་ཀློང་། །ཕ་ལམ་ལས་གྲུབ་རྡོ་རྗེའི་ལྟེར། །ཉི་ཟླའི་གའུ་ཁ་སྦྱོར་སྦུབ། །སྲོག་གི་སྙིང་པོ་ཧྲཱིཿདཀར་དམར། །བླ་ཚེ་མི་འགྱུར་ཨནྲྀས་མཚན། །མཐའ་མར་སྔགས་ཀྱི་ཕྲེང་བས་བསྐོར། །དེ་ལ་ལྔ་ལྡན་འོདཟེར་ནི། །ནམ་མཁའ་ཁྱབ་པར་རབ་འཕྲོས་པས། །ཕྱི་སྣོད་འབྱུང་ལྔའི་དྭངས་མ་བཅུད། །ནང་བཅུད་སྐྱེ་འགྲོའི་ཚེ་བསོད་དཔལ། །རྒྱལ་ཀུན་མཁྱེན་བརྩེ་ནུས་པའི་སྟོབས། །དབང་བྱིན་དངོས་གྲུབ་མ་ལུས་པ། །འུབ་ཀྱིས་བསྡུས་ནས་རང་ལུས་དང་། །སྙིང་གའི་དྭངས་སྲོག་ལ་ཐིམ་པས། །བླ་ཚེ་སྲོག་དབུགས་ཉམས་པ་གསོས། །གནས་པ་འཕེལ་རྒྱས་མི་ཉམས་བརྟན། །འཕོ་འགྱུར་སྐྱེ་འཇིག་དང་བྲལ་བའི། །རྡོ་རྗེའི་སྲོག་ལ་རང་དབང་ཐོབ། མདུན་གྱི་ཚེ་རྫས་ལ་ཐིམ་པས། །འཆི་མེད་བདུད་རྩིའི་དབྱིག་ཏུ་གྱུར། །(ཅེས་དམིགས་ལ་ཚེ་བསྙེན་བཟླ། ཐུན་མཚམས་སུ། རང་གི་ཐུགས་ཀ་ནས་ལྷ་མོ་མགྱོགས་མ་མདའ་དར་ཚེ་བུམ་འཛིན་པ་གྲངས་མེད་པ་སྤྲོས་ཏེ་འཁོར་འདས་(1བ)ཀྱི་ཚེ་བཅུད་བསྡུ་བའི་དམིགས་པ་དང་བཅས་ཚེ་འགུགས་བསྐུལ། ཚེའི་དྭངས་བཅུད་ཐམས་ཅད་མཚོ་ལ་སྦྲང་ཆར་འབབ་པ་ལྟར་རང་ལུས་ལ་སིབ་སིབ་ཐིམ་ཞིང་དྭངས་མ་སྙིང་གའི་ཚེ་རྟེན་སྲོག་ཡིག་ལ་འུབ་ཀྱིས་འདྲིལ། ཉི་ཟླའི་གྭའུ་ཁ་འགྲིགས་པའི་ཕྱི་ནས་འོད་ཟེར་རྡོ་རྗེའི་ཕྲེང་བས་རྒྱ་གྲམ་དུ་བསྡམས་ཏེ་ཅིས་ཀྱང་མི་ཤིགས་པར་བསམ་ལ་རྒྱས་གདབ་བྱ། ཚུལ་དེ་ལྟ་བུས་སྒྲུབ་པ་ཐེམས་ན་ཚེ་འབྲང་ལྷར་གསལ་བ་ལས་དངོས་གྲུབ་བླང་། ལྷ་རང་ལ་བསྟིམ་ལྷ་བདག་དབྱེར་མེད་གཉུག་མ་མི་ཤིགས་པའི་ངོ་བོར་མཉམ་པར་བཞག །ཐབས་ཤེས་ཀྱི་དམ་རྫས་ལ་ལོངས་སྤྱོད་དེ་དགའ་སྟོན་ཤིས་པ་སྤེལ་བས་བདེ་ལེགས་སུ་བྱའོ། །རྒྱུན་གྱི་ཉམས་ལེན་ལ་མདུན་རྟེན་གྱི་སྤྲོས་པ་མི་དགོས་པས་རང་ཉིད་ཁོ་ན་ལ་སྤྲོ་བསྡུའི་དམིགས་གནད་བྱས་པས་འགྲུབ་ཅིང་། ཁྱད་པར་ཡང་ཟབ་ཀྱི་ཚེ་སྒྲུབ་ལ་ལྷ་སྔགས་ཀྱི་སྤྲོས་པའང་དོར་ནས་རང་ལུས་སྟོང་གསལ་འཛིན་མེད་ནམ་མཁའ་ལྟ་བུའི་ངང་ལ་མཉམ་པར་བཞག་བཞིན་པས། འཁོར་འདས་ཀྱི་དྭངས་བཅུད་ཐམས་ཅད་ནམ་མཁའི་རང་བཞིན་དུ་སྔོ་མེར་གྱིས་དྲངས་ཏེ་ལྟོ་བར་བསྐྱིལ་བས་འཆི་མེད་ཚེའི་རིག་འཛིན་བརྟན་པར་བསམ་ཞིང་ནམ་མཁའ་ཟས་སུ་བཟའ་བའི་རྣལ་འབྱོར་ལ་བསླབ་པས་རིམ་གྱིས་རྡོ་རྗེའི་ལུས་སུ་འགྲུབ་པར་གསུངས་སོ། །ཞེས་པའང་མཁྱེན་རྟོགས་ནུས་པའི་བདག་ཉིད་བླ་མ་བསོད་ནམས་བཟང་པོས་ལྷ་རྫས་གསེར་གྱི་མཎྜལ་དང་བཅས་ཏེ་བསྐུལ་བའི་བཞེད་སྐོང་དུ་འཇིགས་བྲལ་ཡེ་ཤེས་རྡོ་རྗེས་གནས་དུས་དགེ་བའི་སྔ་དྲོའི་ཆར་བྲིས་པ་ཨ་ཡུ་སིངྔྷི་རསྟུ། །༎)