DJYD-KABUM-16-MA-066

(1ན)༄༅།   །(པདྨ་གཡང་འབུམ་ཡིད་བཞིན་ནོར་བུ་ལས་ཁོལ་དུ་བྱུངས་པའི་སྨོན་ལམ་དང་བཀྲ་ཤིས་ནི།   ) ན་མོ༔   སངས་རྒྱས་ཆོས་དང་དགེ་འདུན་དང་༔   རྩ་བ་གསུམ་གྱི་བདེན་པ་དང་༔   ནོར་ལྷ་གཡང་ལྷ་ལ་སོགས་པ༔   འཇིག་རྟེན་སྐྱོང་བའི་མཐུ་སྟོབས་ཀྱིས༔   རྒྱུ་སྦྱོར་ཡོན་གྱི་བདག་པོ་རྣམས༔   བསོད་ནམས་རི་བོ་བརྟན་པར་ཤོག༔   མི་གཡང་སྟོབས་རྩལ་འཕེལ་བར་ཤོག༔   ཕྱུགས་གཡང་བཀྲག་བཅུད་རྒྱས་པར་ཤོག༔   ཉི་ཟླ་བཞིན་དུ་གསལ་བར་ཤོག༔   དཔལ་འབྱོར་ལོངས་སྤྱོད་སྙན་གྲགས་ཀུན༔   རྒྱ་ཆེ་ས་གཞི་ལྟ་བུར་ཤོག༔   དགོས་འབྱུང་ནོར་བུ་ལྟ་བུར་ཤོག༔   ཟིལ་གནོན་སེང་གེ་ལྟ་བུར་ཤོག༔   རྒྱུན་རིང་ཆུ་བོ་ལྟ་བུར་ཤོག༔   མི་འཕེལ་ཁང་ཁྱིམ་གང་བར་ཤོག༔   ནོར་འཕེལ་བར་མཛོད་གང་བར་ཤོག༔   རྟ་འཕེལ་བྲིས་ཁང་གང་བར་ཤོག༔   ཕྱུགས་འཕེལ་ལྷས་མལ་གང་བར་ཤོག༔   རྒྱུ་སྦྱོར་ཡོན་བདག་འཁོར་བཅས་ཀུན༔   སྦྱིན་པའི་ཕར་ཕྱིན་རྫོགས་པར་ཤོག༔   བསོད་ནམས་ཡེ་ཤེས་རྒྱས་པར་ཤོག༔   བླ་མེད་བྱང་ཆུབ་(1བ)མྱུར་ཐོབ་ཤོག༔   སིངྔྷི་སིངྔྷི་བྷྲུྃ་སྭཱ་ཧཱ༔   ཨོཾ༔   ཕུན་སུམ་ཚོགས་པ་བླ་མེད་དཀོན་མཆོག་གསུམ༔   བཀྲ་ཤིས་ཀུན་གྱི་འབྱུང་གནས་བཀྲ་ཤིས་པ༔   གྲགས་པའི་བཀྲ་ཤིས་འཇིག་རྟེན་ཡོངས་ལ་ཁྱབ༔   དགེ་ལེགས་ཕུན་སུམ་ཚོགས་པའི་བཀྲ་ཤིས་ཤོག༔   ཝཱ་ར་ཎ་སཱི་ཉམས་དགའ་བདེ་སྐྱིད་ལྡན༔   ཡུལ་ཕྱོགས་འདིར་ཡང་དེ་བཞིན་བཀྲ་ཤིས་ཤོག༔   གྲོང་ཁྱེར་སེར་སྐྱ་དཔལ་དང་ཡོན་ཏན་རྒྱས༔   གྲོང་རྡལ་འདིར་ཡང་དེ་བཞིན་བཀྲ་ཤིས་ཤོག༔   ལྷས་བསྟན་ཁབ་ཏུ་ཆོས་དང་འབྱོར་པས་གང་༔   ཁང་ཁྱིམ་འདིར་ཡང་དེ་བཞིན་བཀྲ་ཤིས་ཤོག༔   རྒྱལ་པོ་ཟས་གཙང་འཁོར་ལོས་བསྒྱུར་བའི་རིགས༔   སྐྱེས་པ་འདིར་ཡང་དེ་བཞིན་བཀྲ་ཤིས་ཤོག༔   བཙུན་མོ་སྒྱུ་འཕྲུལ་རྒྱལ་བ་སྐྱེད་པའི་ཡུམ༔   བུད་མེད་འདིར་ཡང་དེ་བཞིན་བཀྲ་ཤིས་ཤོག༔   རྒྱལ་བུ་དོན་གྲུབ་ལེགས་པའི་དཔལ་ཀུན་འབྱོར༔   ལྷ་སྲས་འདིར་ཡང་དེ་བཞིན་བཀྲ་ཤིས་ཤོག༔   ས་འཚོ་གྲགས་འཛིན་ཡོན་ཏན་དམ་པས་བརྒྱན༔   བཙུན་མོ་འདིར་ཡང་དེ་བཞིན་བཀྲ་ཤིས་ཤོག༔   ཅང་ཤེས་བསྔགས་ལྡན་སྤྲིན་གྱི་ཤུགས་ཆེན་འཆང་༔   རྟ་མཆོག་འདིར་ཡང་དེ་བཞིན་བཀྲ་ཤིས་ཤོག༔   （2ན）ནཻ་རཉྫ་ན་མེ་ཏོག་འབྲས་བུས་བརྒྱན༔   སྐྱེད་ཚལ་འདིར་ཡང་དེ་བཞིན་བཀྲ་ཤིས་ཤོག༔   ཡངས་པ་ཅན་དུ་འབྲུ་ནོར་ལོངས་སྤྱོད་འཕེལ༔   ས་ཕྱོགས་འདིར་ཡང་དེ་བཞིན་བཀྲ་ཤིས་ཤོག༔   རྡོ་རྗེ་གདན་དུ་ཐུབ་པ་མངོན་སངས་རྒྱས༔   གནས་རྟེན་འདིར་ཡང་དེ་བཞིན་བཀྲ་ཤིས་ཤོག༔   བྱ་རྒོད་སྤུངས་རིར་ཐེག་ཆེན་ཆོས་འཁོར་བསྐོར༔   ཆོས་ར་འདིར་ཡང་དེ་བཞིན་བཀྲ་ཤིས་ཤོག༔   རྒྱལ་བྱེད་ཚལ་དུ་འཕགས་པའི་དགེ་འདུན་འདུ༔   དགོན་སྡེ་འདིར་ཡང་དེ་བཞིན་བཀྲ་ཤིས་ཤོག༔   ཉིན་མོ་བཀྲ་ཤིས་བདེ་བའི་ཉི་མ་ཤར༔   མཚན་མོ་བཀྲ་ཤིས་སྐྱིད་པའི་ཟླ་བ་གསལ༔   ཉིན་མཚན་བཀྲ་ཤིས་བདེ་སྐྱིད་ཕྱྭ་གཡང་འཕེལ༔   བསམ་དོན་ཆོས་བཞིན་འགྲུབ་པའི་བཀྲ་ཤིས་ཤོག༔   སྭསྟི་སྭསྟི་བྷྲུྃ་བྷྲུྃ་སྭཱ་ཧཱ༔