DJYD-KABUM-17-TSA-006

（46ན）༄༅། །（ལྷ་ཆེན་དབང་ཕྱུག་ཆེན་པོའི་ཕྲིན་ལས་ནི། སྦྱོར་བའི་རིམ་པ་སྔོན་དུ་འགྲོ་བས། དངོས་གཞི་མདུན་བསྐྱེད་བསང་སྦྱང་།） སྟོང་པའི་ངང་ལས་རང་གི་མདུན་དུ་བྷྲུཾ་ལས་བྱུང་བའི་པདྨ་རཱ་ག་ལས་གྲུབ་པའི་གཞལ་ཡས་ཁང་ཟླ་གམ་སྒོ་གཅིག་པ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་ཤིང་འོད་ཟེར་ཀུན་ནས་འབར་བའི་དབུས་སུ་རིན་པོ་ཆེའི་ཁྲི་བཀོད་པ་ཕུལ་དུ་བྱུང་བའི་སྟེང་དུ་ཟླ་ཕྱེད་ཀྱི་གདན་ལ་ཧྲཱིཿཡིག་དམར་པོ་མཆོག་ཏུ་འབར་བ། དེ་ལས་འོད་ཟེར་འཕྲོས། འཕགས་པ་མཆོད། ཁམས་གསུམ་སྣོད་བཅུད་ཐམས་ཅད་དབང་དུ་བསྡུས་ནས་འོད་ཟེར་དམར་པོའི་རྣམ་པས་ཧྲཱིཿལ་ཐིམ། དེ་ཡོངས་སུ་གྱུར་པ་ལས་ལྷ་ཆེན་དབང་ཕྱུག་ཆེན་པོ་སྐུ་མདོག་པདྨ་རཱ་ག་ལྟར་དམར་ཞིང་འོད་འབར་བ། ཞལ་གཅིག་ཕྱག་གཉིས་སྤྱན་གསུམ་པ། ཤིན་ཏུ་སྒེག་པའི་ལང་ཚོ་ཅན་ཁྲོ་འཛུམ་ཆགས་པའི་ཉམས་འགྱུར་མཆོག་ཏུ་གསལ་བ། གཡས་ཁམས་གསུམ་སྐད་ཅིག་གིས་འགུགས་པའི་ལྕགས་ཀྱུ་རྣོན་པོ་འཕྱར་ཐབས་སུ་འཛིན་ཅིང་། གཡོན་སྣང་སྲིད་བྲན་དུ་འཆིང་བའི་ཉི་ཟེར་གྱི་ཞགས་པ་འཛིན་པ། ཞབས་གཡས་བསྐུམ་ཞིང་གཡོན་བརྐྱང་བའི་འདོར་སྟབས་ཀྱིས་བཞུགས་པ། དབུ་སྐྲ་རལ་པའི་ཐོར་ཚུགས་ཟུར་ཕུད་（46བ）ལ་ཟླ་བ་ཚེས་པས་བརྒྱན་ཅིང་ལྟེ་བར་ཉི་མ་ངོམས་པ། གཅེར་བུ་ལིང་ག་དམར་པོ་བསྒྲེང་ཞིང་ཆགས་པའི་ཟིལ་པ་འཁྲིགས་པ། ཡིད་བཞིན་གྱི་ནོར་བུ་བསམ་འཕེལ་སེར་པོ། དབང་རྒྱལ་དམར་པོ། ཕ་རོལ་དཔུང་འཇོམས་ལྗང་སྔོན་རྣམས་ཀྱི་ཕྲེང་བས་དོ་ཤལ་སྤྲས་པ། རིན་པོ་ཆེའི་རྒྱན་དང་དར་གྱི་ཅོད་པན་འཕུར་བ། དེའི་གཡོན་དུ་ཡུམ་ཨུ་མ་དཱེ་ཝི་དམར་གསལ་མཛེས་འཛུམ་ལང་ཚོ་རྒྱས་པའི་ཉམས་ཅན། གཡས་ཡིད་བཞིན་གྱི་ནོར་བུ་དང་གཡོན་གཏེར་གྱི་བུམ་བཟང་འཛིན་པ། གཅེར་མོ་སྐྲ་གྲོལ་ཞིང་པདྨའི་ཆུན་པོས་ཐོད་རྒྱན་ཅན། དར་གྱི་ཅོད་པན་དང་ཨུཏྤལ་དམར་པོའི་དོ་ཤལ་གྱིས་སྤྲས་པ། དགྱེས་ཆགས་འཛུམ་པའི་རྣམ་འགྱུར་དང་བཅས་ཏེ་ཡབ་ལ་ཟུར་མིག་བལྟ་བའི་ཚུལ་གྱིས་ཞབས་གཉིས་ཡབ་ཀྱི་སྐུ་ལ་བརྟེན་ནས་བཞེངས་སྟབས་སུ་གནས་པ། ཕྱོགས་ཀྱི་འདབ་མ་བཞི་ལ་གསང་བའི་ཌཱ་ཀི་ཤར་དུ་འགུགས་བྱེད་མ། ལྷོ་རུ་འཆིང་བྱེད་མ། ནུབ་ཏུ་རྨོངས་བྱེད་མ། བྱང་དུ་མྱོས་བྱེད་མ་སྟེ། བཞི་ཀའང་དབང་གི་མདོག་ཅན་རང་རྟགས་ཀྱི་ཕྱག་མཚན་འཛིན་ཅིང་དར་གྱི་ཅོད་པན་རིན་པོ་ཆེའི་རྒྱན་གྱིས་སྤྲས་པ། ཞི་འཛུམ་ཆགས་པའི་ཉམས་ཅན་འགྲེང་སྟབས་སུ་འཁོད་པ། གཞན་ཡང་（47ན）ཁམས་གསུམ་གྱི་དྲེགས་པ་ཅན་ཐམས་ཅད་ཀྱིས་བསྐོར་ཞིང་འོད་ཟེར་དམར་པོ་རབ་ཏུ་འཁྲུགས་པའི་དབུས་ན་སྒྲུབ་པ་པོའི་ཕྲིན་ལས་འདོད་རྒུར་སྒྲུབ་པའི་ཚུལ་གྱིས་བཞུགས་པའོ། །དེ་རྣམས་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་དང་སོ་སོའི་ས་བོན་གྱིས་མཚན་པ་དང་། རང་གི་ཐུགས་ཀའི་འོད་ཟེར་གྱིས་བསྐུལ་བས་སྟེང་ཕྱོགས་ཚངས་པའི་གནས་དང་རྒྱ་མཚོ་ཆེན་པོའི་འགྲམ་སོགས་རང་བཞིན་གྱི་གནས་ནས་ལྷ་ཆེན་ལྕམ་དྲལ་འཁོར་དང་བཅས་པ་ནམ་མཁའ་ལ་སྤྲིན་ཕུང་གཏིབས་པ་བཞིན་བྱོན་པར་（བསམ་ཞིང་།） ཧྲཱིཿཛཿ དད་པ་དང་ནི་དམ་ཚིག་གིས། །འབོད་དོ་བསྒྲུབ་བོ་ལྷ་ཆེན་པོ། །མ་ཧཱ་དཱེ་ཝ་ལྕམ་དྲལ་འཁོར། །ཐུགས་དམ་དབང་གིས་གཤེགས་སུ་གསོལ། །དབང་ཕྱུག་ཆེན་པོ་གཤེགས་སུ༴ ཨུ་མ་དཱེ་ཝི་གཤེགས་སུ༴ ལས་བྱེད་མ་བཞི༴ འཁོར་ཚོགས་རྒྱ་མཚོ༴ རྣལ་འབྱོར་གདུང་བས་ཁྱོད་བསྐུལ་ན། །སྒྲུབ་པའི་ལས་ལ་མ་གཡེལ་བར། །ཚངས་པའི་གནས་དང་རྩུབ་འགྱུར་ཚལ། །རྒྱ་མཚོའི་གླིང་སོགས་གར་བཞུགས་ནས། །ཐོགས་མེད་རྫུ་འཕྲུལ་སྟོབས་ཤུགས་ཀྱིས། །དམ་ཚིག་མཆོག་གི་ཕོ་བྲང་འདིར། །སྐད་ཅིག་ཉིད་ལ་གཤེགས་ནས་ཀྱང་། །（47བ）དགྱེས་པའི་ཞལ་སྟོན་ཕྲིན་ལས་མཛོད། །ཨོཾ་མ་ཧཱ་དཱེ་ཝ་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ （ཞེས་སྤྱན་དྲངས།） ཧྲཱིཿ ཏིང་འཛིན་འཕྲུལ་གྱི་གནས་མཆོག་འདིར། །གསལ་སྣང་འགྱུར་མེད་བདེ་ཆེན་ཀློང་། །རབ་མཛེས་མཐོ་བའི་གདན་ཁྲི་ལ། །དབང་ཕྱུག་འཁོར་བཅས་བཞུགས་སུ་གསོལ། །ཛཿཧཱུཾ་བཾ་ཧོཿ ས་མ་ཡ་ཏིཥྛ་ལྷན། （ཞེས་བཞུགས་སུ་གསོལ།） ཨོཾ་བཛྲ་ས་མ་ཡ་རཀྵ་ཧཱུཾ་ཕཊ། ལྷ་ཆེན་ལྕམ་དྲལ་འཁོར་དང་བཅས་པ་རྣམས་ཀྱིས་ཀུན་བཟང་སྣང་བ་མཐའ་ཡས། གར་དབང་ཐུགས་རྗེ་ཆེན་པོ། སློབ་དཔོན་པདྨ་འབྱུང་གནས། མ་གཅིག་ཡེ་ཤེས་མཚོ་རྒྱལ། སྤྲུལ་སྐུ་གཏེར་ཆེན་པོ་ནས་འཁོར་ལོའི་མགོན་པོ་རྩ་བའི་བླ་མའི་བར་དུ་བྱོན་པའི་རིག་འཛིན་བརྒྱུད་པ་རྣམས་ཀྱིས་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས། （སོགས་ཀྱིས་དམ་ཚིག་གི་གཉེར་གཏད།） ཧྲཱིཿ དངོས་སུ་འབྱོར་དང་ཏིང་འཛིན་ལས། །བྱུང་བའི་མཆོད་པའི་སྤྲིན་ཕུང་ནི། །ཡོན་ཆབ་ཞབས་བསིལ་མེ་ཏོག་ཚལ། །བདུག་སྤོས་སྣང་གསལ་དྲི་བཟང་ཆབ། །ཞལ་ཟས་སིལ་སྙན་རོལ་མོའི་དབྱངས། །འདོད་པའི་ཡོན་ཏན་རྣམ་པ་ལྔ། །འཆི་མེད་བདུད་རྩི་རཀྟའི་རྒྱུན། །བཟའ་བཅའི་གཏོར་མ་ལྷུན་པོར་སྤུངས། །བཀྲ་ཤིས་（48ན）རྫས་རྟགས་རྒྱལ་སྲིད་བདུན། །སྣ་ཚོགས་དཀོར་ནོར་རིན་ཆེན་དབྱིག །ཟག་མེད་བདེ་སྦྱོར་དགའ་བཞིའི་རོ། །མཆོག་གི་དམ་ཚིག་བླ་ན་མེད། །དགྱེས་པར་དགོངས་ལ་བཞེས་ནས་སུ། །བདག་གི་འདོད་དོན་ཡོངས་སྒྲུབ་མཛོད། །ཨོཾ་མ་ཧཱ་དཱེ་ཝ་ས་པ་རི་ཝཱ་ར་ཨརྒྷཾ（ནས།） ཤཔྡའི་（བར་གྱིས་ཉེར་སྤྱོད་དང་།） མ་ཧཱ་པཉྩ་ཨ་མྲྀ་ཏ་ཁཱ་ཧི། （ཞེས་སྨན་རཀ་སྟོབ།） ལྷ་ཆེན་འཁོར་བཅས་ཀྱི་ལྗགས་རྡོ་རྗེ་རྩེ་གསུམ་པའི་སྦུ་གུས་གཏོར་མའི་བཅུད་དྲངས་ཏེ་གསོལ་བར་（བསམ་ལ།） ཨོཾ་མ་ཧཱ་དཱེ་ཝ་ཛཿ ཨུ་མ་དཱེ་ཝཱི་ཧྲིཾ་ཧ་རི་ནི་ས་པཱ་ཤཾ་ཀུ་རུ་ཧོཿ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། （ཞེས་ལན་གསུམ་མམ་བདུན་གྱིས་གཏོར་མ་ཕུལ་ནས།） བསྟན་སྲུང་དྲེགས་པའི་གཙོ་བོ་ལྷ་ཆེན་ལྕམ་དྲལ་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས། （སོགས་ཀྱིས་ཕྲིན་ལས་བཅོལ།） ཧྲཱིཿ ཐུགས་རྗེའི་གཏེར་ཆེན་མགོན་པོ་སྤྱན་རས་གཟིགས། །གང་འདུལ་ཐབས་མཁས་སྤྲུལ་བསྒྱུར་རོལ་པ་ལས། །ཁམས་གསུམ་དབང་མཛད་བདག་པོའི་སྐུར་བཞེངས་པ། །དྲང་སྲོང་ལྷ་ཡི་བླ་མ་ཁྱོད་ལ་བསྟོད། །དྲི་མེད་པདྨ་རཱ་གའི་ལྷུན་པོའི་སྤོར། །སྣང་བྱེད་ཉི་གཞོན་འབུམ་གྱིས་འཁྱུད་པས་（48བ）ཀྱང་། །མི་མཚོན་བདེ་ཆེན་ཉམས་བརྒྱའི་ལང་ཚོ་ཅན། །འཇིག་རྟེན་གསུམ་གྱི་རྗེ་བོ་ཁྱོད་ལ་བསྟོད། །ཟག་མེད་ཆགས་པས་མྱོས་པའི་རྣམ་འགྱུར་དང་། །ལྷན་ཅིག་ཕྱག་མཚན་འབར་བའི་འཕྲུལ་འཁོར་གྱིས། །ས་གསུམ་སྐྱེ་འགྲོའི་བློ་ཡིད་དབང་མེད་དུ། །སྐད་ཅིག་ཙམ་གྱིས་འགུགས་ཤིང་འཆིང་ལ་བསྟོད། །འགྲན་མེད་ཆེ་བཙན་རྒྱལ་པོ་ཁྱོད་ཞབས་ལ། །དྲེགས་པའི་ལྷ་ཆེན་ཡོངས་ཀྱིས་ཕྱག་བྱས་ཤིང་། །ལྷ་མིན་གཡུལ་ཟློག་ལྷ་དམག་དབུགས་འབྱིན་མཛད། །སྟོན་པའི་བཀའ་སྡོད་བསྟན་སྐྱོང་གཙོ་ལ་བསྟོད། །ཤེས་རབ་ཨུ་མའི་བདེ་ལ་རྟག་རོལ་ཞིང་། །གསང་བའི་ཌཱ་ཀི་མ་བཞི་ལས་ལ་འགྱེད། །ཐུགས་རྗེའི་དབང་གིས་ཆོ་འཕྲུལ་ཅིར་ཡང་སྟོན། །མཐུ་ཆེན་མ་ཧཱ་དཱེ་ཝའི་ཚོགས་ལ་བསྟོད། །（ཅེས་བསྟོད། བཟླས་པ་བྱ་བ་ནི།） ལྷ་ཆེན་གྱི་ཐུགས་ཀར་ཟླ་བ་ཕྱེད་པའི་གདན་ལ་ཡིད་བཞིན་གྱི་ནོར་བུ་དབང་གི་རྒྱལ་པོའི་ནང་ཁོངས་སུ་ཧྲཱིཿདམར་པོའི་མཐར་སྔགས་ཀྱི་ཕྲེང་བས་བསྐོར་བ། བདག་གི་ཐུགས་ཀའི་འོད་ཀྱིས་བསྐུལ་བས་ཅི་འདོད་པའི་ཕྲིན་ལས་རབ་འབྱམས་ཐོགས་མེད་དུ་བསྒྲུབ་པར་（བསམ་ལ།） ཨོཾ་མ་ཧཱ་དཱེ་ཝ་ལོ་ཀི་ཤྭ་ར་ཧྲིཾ་ཧྲིཾ་ཕེཾ་ཛཿ （ཞེས་འབོད་སྔགས་དང་།） ཨོཾ་མ་ཧཱ་དཱེ་ཝ་ཛཿ ཨུ་མ་དཱེ་ཝི་ཧྲིཾ་ཧ་རི་ནི་ས་པཱ་ཤཾ་（49ན）ཀུ་རུ་ཧོཿ （ཞེས་སྤྱི་དྲིལ་སྒྲུབ་སྔགས་ཏེ། ཅི་ནུས་སུ་བཟླས་པའི་མཐར་མཆོད་ཅིང་འདོད་དོན་གསོལ། བསྐང་རྫས་བྱིན་གྱིས་བརླབས་ཏེ།） ཧྲཱིཿ བདེ་གཤེགས་ཀུན་གྱི་སོར་རྟོག་ཡེ་ཤེས་གསུང་། །འགྲོ་ལ་རྗེས་སུ་ཆགས་པའི་སྒྱུ་ཐབས་ཀྱིས། །འཇིག་རྟེན་དྲེགས་པ་ཡོངས་ཀྱི་རྗེ་བོའི་སྐུར། །རབ་བཞེངས་ལྷ་ཆེན་འཁོར་བཅས་ད་ཚུར་བྱོན། །ངོ་མཚར་ཏིང་འཛིན་རོལ་མོའི་རྩེ་འཇོ་ལས། །ནམ་མཁའ་མཛོད་ཀྱི་སྒོ་འཕར་ལེགས་ཕྱེས་པས། །མི་འཛད་འདོད་ཡོན་ཀུན་བཟང་མཆོད་སྤྲིན་གྱིས། །རབ་འབྱམས་ཞིང་ཀུན་བཀང་བས་ཐུགས་དམ་བསྐང་། །བསུང་ཞིམ་དམ་རྫས་སྤོས་སྤྲིན་རབ་དཀྲིགས་ཤིང་། །ལེ་བརྒན་མདངས་འཛིན་དར་གྱི་གཡབ་མོ་འདོར། །རྩེ་གཅིག་གདུང་བས་འབོད་བསྐུལ་སྙན་འགྱུར་ངག །རོལ་མོ་དབྱངས་དང་སྦྱར་བས་ཐུགས་དམ་བསྐང་། །པདྨ་རཱ་གའི་རྒྱུ་མཆོག་ལས་གྲུབ་པའི། །ཡིད་འོང་གཞལ་མེད་ཁང་བཟང་ཟླ་གམ་དབྱིབས། །ཕུལ་བྱུང་རྒྱན་དང་བཀོད་པ་ཁྱད་པར་ཅན། །རབ་མཛེས་ཕོ་བྲང་རྟེན་གྱིས༴ དྭངས་བསིལ་མཆོད་ཡོན་རྣམ་བཀྲའི་མེ་ཏོག་ཚལ། །ངད་ལྡན་བདུག་པ་མུན་སེལ་སྒྲོན་མེའི་འོད། །དྲི་བཟང་ཆུ་ཀླུང་རོ་བརྒྱའི་ཞལ་ཟས་སྤུངས། །སྙན་བརྗིད་རོལ་མོའི་སྒྲ་ཡིས༴ མཛེས་（49བ）སྡུག་གཟུགས་དང་སྙན་འཇེབས་སྒྲ་དབྱངས་རྒྱུན། །དྲི་ཞིམ་བྱུག་པ་སྣ་ཚོགས་རོ་བདའི་ཟས། །སྲབ་འཇམ་རེག་བྱ་ལྷ་ཡི་མལ་ཆ་སོགས། །འདོད་པའི་ཡོན་ཏན་རྒྱ་མཚོས༴ རིན་ཆེན་རྣམ་བདུན་བཀྲ་ཤིས་རྫས་རྟགས་བརྒྱད། །མ་རྨོས་ལོ་ཐོག་གཏེར་གྱི་བུམ་པ་བཟང་། །འདོད་འཇོའི་བ་མོ་དཔག་བསམ་ལྗོན་པའི་ཤིང་། །སྣ་ཚོགས་རིན་ཆེན་དབྱིག་གིས༴ འཆི་མེད་བདུད་རྩི་དམར་ཆེན་རཀྟའི་མཚོ། །འདོད་རྒུའི་གཏོར་ཆེན་མཱཾ་ས་དཀར་མངར་བཅུད། །འབྲས་ཆེན་ཁུར་པ་ཤིང་ཏོག་ལ་དུ་དང་། །མྱོས་བྱེད་ཛ་གད་བཏུང་བས༴ ཁྱད་པར་དམ་ཚིག་མཆོག་གི་བྲིས་སྐུ་ཆེ། །གླེགས་བམ་སྔགས་བྱང་ལས་མཐུན་བགྲང་ཕྲེང་མཛེས། །ལེ་བརྒན་དར་གྱིས་བརྒྱན་པའི་ལྕགས་ཀྱུ་དང་། །སྣང་བྱེད་ཟེར་ལྡན་ཞགས་པས༴ ཡབ་ཡུམ་སྲོག་གི་ཙཀྲ་བླ་རྡོ་དང་། །བླ་རྟེན་ཕུར་བུ་ལྷ་འདྲེ་མི་ཡི་སྲོག །རང་བྱུང་བྱེ་རུ་ཡིད་བསྒྱུར་རྫས་སོགས་ཀྱིས། །རབ་གཏམས་གསང་བའི་རྟེན་གྱིས༴ གཞན་ཡང་མཐུན་པའི་སྤྱན་གཟིགས་དཀོར་ཆ་སོགས། །ཕྱི་ནང་གསང་བ་བསྙེན་སྒྲུབ་མཆོད་སྐོང་རྫས། །བརྟན་དང་གཡོ་བའི་ལེགས་ཚོགས་ཇི་སྙེད་པ། །གྲངས་མེད་འདོད་རྒུར་འཆར་བས༴ ངོ་བོ་ཀ་ནས་དག་པ་གདོད་མའི་གཤིས། །（50ན）རང་བཞིན་མ་འགགས་ལྷུན་གྲུབ་འོད་གསལ་དབྱིངས། །ཐུགས་རྗེ་ཀུན་ཁྱབ་ཆོས་ཉིད་རོལ་པའི་རྒྱན། །སྣང་སྲིད་གཞིར་བཞེངས་དགོངས་པས་ཐུགས་དམ་བསྐང་། །སྟོང་པ་ཉིད་དང་ཟུང་འཇུག་བདེ་བ་ཆེ། །གཉིས་མེད་ཀློང་དུ་ཐུགས་དམ་དགྱེས་བསྐང་ནས། །བདག་གི་འདོད་པའི་དོན་རྣམས་མ་ལུས་པ། །གེགས་མེད་མྱུར་དུ་འགྲུབ་པའི་ཕྲིན་ལས་མཛོད། །（ཅེས་བསྐང་བ་བྱ། མཐར་གཏོར་མ་སྟོབ་པ་སོགས་རྗེས་ཀྱི་བྱ་བ་རྣམས་སྤྱི་དང་མཐུན་ནོ། །འདི་ནི་གཙོ་བོར་བདུད་འཇོམས་ཟབ་གཏེར་གྱི་གཞུང་ལས་སྙིང་པོའི་བཅུད་བསྡུས་པ་སྟེ། བྱང་གཏེར་དང་། ལས་འབྲེལ་རྩལ། གཏེར་བདག་གླིང་པ་བཅས་ཀྱི་ལྷ་ཆེན་ཀྱང་ཆུ་བོ་གཅིག་འདྲེས་སུ་འགྱུར་ཞིང་། སྲོག་དབང་གི་ཆོ་ག་སོ་སོའི་གཞུང་ལས་ཤེས་སོ།། ༎）