DJYD-KABUM-17-TSA-027

（1ན）༄༅། །（སྨན་གཅིག་ཀོང་བཙུན་དེ་མོའི་མཆོད་སྤྲིན་འདོད་པའི་རེ་སྐོང་ཞེས་བྱ་བ་བཞུགས་སོ། །） ༈ ན་མོ་པདྨ་ཀ་ར་ཡེ། （སྨན་བཙུན་ཆེན་མོ་འདི་ཉིད་མཆོད་པར་འདོད་པས་རིན་པོ་ཆེའི་སྣོད་དུ་གཙང་མའི་ཟན་ལས་དཀར་གྱི་བཤོས་བུ་པད་འདབ་ཅན་མཐེབ་ཀྱུ་བཅུ་བཞིས་བསྐོར་བ་རྒྱན་ལྡན་དང་། གསེར་སྐྱེམས་སོགས་དམ་རྫས་སུ་འོས་པའི་ཡོ་བྱད་རྣམས་བཤམས་ལ་བྱིན་གྱིས་བརླབས། རང་ཉིད་པདྨ་ཐོད་ཕྲེང་རྩལ་གྱི་ང་རྒྱལ་ལ་གནས་པས་རོལ་མོ་དབྱངས་དང་སྦྱར་ཏེ།） ཀྱེེ། ཡུལ་ནི་ཀོང་ཡུལ་ལྗོན་པའི་ཚལ། །གནས་ནི་ཡུལ་གསུམ་བྲེ་སྣ་གདོང་། །སྨན་བཙུན་དགྱེས་པའི་བསྟི་གནས་ནས། །རྡོ་རྗེ་དེ་མོ་བོད་ཁམས་སྐྱོང་། །མཆེད་འཁོར་སྨན་ཕྲན་འབུམ་དང་བཅས། །དར་སྣའི་ཅོད་པན་པུ་རུ་རུ། །རིན་ཆེན་རྒྱན་ཕྲེང་སི་ལི་ལི། །གླུ་ལེན་གར་སྟབས་ཁྱུགས་སེ་ཁྱུག །སིལ་སྙན་རོལ་མོ་འུ་རུ་རུ། །རྣལ་འབྱོར་གདུང་བ་དེང་འབོད་དོ། །བརྩེ་བའི་ཐུགས་ཀྱིས་གཤེགས་ནས་ཀྱང་། །དམ་ཚིག་གནས་འདིར་བག་ཕོབ་ཅིག །བཛྲ་ས་མ་ཡ་ཛཿ ཀྱེེ། སྲིང་གཅིག་དགྱེས་པས་བྱོན་ལགས་སམ། །མཛའ་བས་དགོངས་ཤིག་བཞིན་བཟང་མ། །ཕྱི་མཆོད་ཉེར་སྤྱོད་འདོད་ཡོན་དང་། །ནང་མཆོད་སྨན་རཀ་གཏོར་མའི་ཚོགས། །གསང་མཆོད་བདེ་སྟོང་དགའ་བཞིའི་རོ། །དངོས་བཤམས་མཆོད་པ་དཔངས་རེ་མཐོ། །ཡིད་སྤྲུལ་ལོངས་སྤྱོད་ལྷུན་རེ་སྟུག །དགྱེས་རྒུའི་དམ་རྫས་མ་ཚང་མེད། །བཟང་རྒུའི་འབྱོར་པ་སྤྲིན་དུ་གཏིབས། །མཛེས་རྒུའི་སྤྱན་（1བ）གཟིགས་ཚར་དངར། །དགའ་ཞིང་གུས་པས་བདག་འབུལ་གྱིས། །མཉེས་ཤིང་བརྩེ་བས་ཁྱོད་བཞེས་ཤིག །མ་ཧཱ་སརྦ་པཱུ་ཛ་ཧོ༔ ཀྱེ། མི་འགྱུར་བདེ་ཆེན་སྒྱུ་མའི་གར། །ངོ་བོ་ཡེ་ཤེས་ངྷཱ་ཀི་ནཱི། །རྣམ་པ་སྨན་བཙུན་སྤྲུལ་པའི་ཚུལ། །ངོ་མཚར་ཅིར་ཡང་འཕྲུལ་ལ་བསྟོད། །བཅུ་དྲུག་ལང་ཚོས་རབ་མྱོས་པའི། །ཡིད་འོང་དཀར་ལྗང་མཛེས་པའི་སྐུ། །འཛུམ་ཞལ་དགྱེས་པའི་མཚར་སྡུག་དཔྱིད། །རྗེས་ཆགས་ཟུར་མིག་གཡོ་ལ་བསྟོད། །བསུང་ཞིམ་ཧ་རིའི་དྲི་ངད་དང་། །ཉེར་འགྲོགས་མཉེན་ལྕུག་འཁྲིལ་ལྡེམ་སྐུར། །ལྷབ་ལྷུབ་དར་གྱི་ན་བཟའ་དང་། །རིན་ཆེན་རྒྱན་གྱིས་སྤྲས་ལ་བསྟོད། །ཕྱག་གཡས་ལྔ་ལྡན་མདའ་དར་ནི། །གཡས་སུ་བསྐོར་བཞིན་གཡབ་པ་ཡིས། །སྲིད་ཞིའི་དགེ་མཚན་དྭངས་བཅུད་ཀུན། །ཐོགས་པ་མེད་པར་སྡུད་ལ་བསྟོད། །གཡོན་པས་རིན་ཆེན་སྒྲོམ་བུ་ནི། །སྐུ་ལ་བརྟེན་ནས་འགྱིང་བ་ཡིས། །སྒྲུབ་ལ་འདོད་རྒུའི་དངོས་གྲུབ་རྣམས། །ཡིད་བཞིན་ཆར་དུ་འབེབས་ལ་བསྟོད། །བུད་མེད་སྒྱུ་མའི་ང་རྒྱལ་གྱིས། །སྲིད་པའི་རླུང་ལ་ཅོ་འདྲི་བའི། །མྱུར་མགྱོགས་ཅང་ཤེས་ངང་དཀར་ནི། །རིན་ཆེན་རྒྱན་ལྡན་བཅིབས་ལ་བསྟོད། །སྟོང་ཁམས་སྨན་མོ་ཁྱོད་ཀྱི་འཁོར། །སྡེ་བརྒྱད་གཞི་བདག་ཕོ་ཉ་བྲན། །དྲེགས་ལྡན་ཡོངས་ཀྱི་རྗེ་མོར་ཤར། །མཐུ་སྟོབས་དབང་ཕྱུག་མ་ལ་བསྟོད། །ཟབ་གཏེར་བསྟན་པའི་གཉེར་འཛིན་མ། །རིག་འཛིན་（2ན）རྣམས་ཀྱི་དགྱེས་སྡེ་མོ། །སྒྲུབ་མཆོག་བུ་བཞིན་སྐྱོང་བ་ཡི། །གཡར་དམ་ཅན་ལ་བདག་བསྟོད་དོ། །ཀྱེ། སྔོན་ཚེ་དཔལ་མོ་དཔལ་ཐང་དུ། །སློབ་དཔོན་པདྨ་ཐོད་ཕྲེང་གིས། །ཁྱོད་དང་མཆེད་འཁོར་བརྟན་མའི་ཚོགས། །དབང་དུ་བསྡུས་ནས་དམ་ལ་བཏགས། །ཕྱག་རྒྱར་དབང་བསྐུར་སྲོག་སྙིང་ཕུལ། །ཐ་ཚིག་བོར་བ་དྲན་ལགས་སམ། །བསྟན་པ་འཛིན་པའི་སྐྱེས་བུ་ཡི། །ཕྲིན་ལས་སྒྲུབ་པར་མ་ཆད་དམ། །བསྟན་པ་སྤེལ་བའི་དགེ་འདུན་གྱི། །དབུ་འཕང་བསྟོད་པ་མ་ཆད་དམ། །བསྟན་པ་སྐྱོང་བའི་རྗེ་བློན་གྱི། །མངའ་ཐང་སྤེལ་བར༴ བསྟན་པ་མཆོད་པའི་སྦྱིན་བདག་གི ། འགལ་རྐྱེན་བསལ་བར༴ བསྟན་པར་གུས་པའི་རྒྱལ་ཁམས་སུ། །བདེ་སྐྱིད་སྤེལ་བར༴ བསྟན་པ་བཤིག་པའི་བདུད་དགྲ་ཀུན། །རྡུལ་དུ་བརླག་པར༴ རུ་བཞི་གངས་ཅན་བོད་ཡུལ་གྱི། །སོ་ཁ་བསྲུང་བར་མ་ཆད་དམ། །སྔོན་གྱི་ཞལ་བཞེས་གཡར་དམ་ཆེ། །དེ་རིང་བདག་གིས་བསྐུལ་ལགས་སོ། །ཀྱེ། ང་ནི་པདྨའི་བརྒྱུད་འཛིན་ཡིན། །ཁྱོད་ནི་པདྨའི་བཀའ་སྲུང་ཡིན། །ཡུལ་ནི་པདྨའི་སྒྲུབ་གནས་ཡིན། །དེས་ན་དམ་ཚིག་མཆོག་ཏུ་གཉན། །རྣལ་འབྱོར་བདག་ཅག་དཔོན་སློབ་རྣམས། །གཞི་བྱེས་ཉེ་རིང་ཐམས་ཅད་དུ། །མི་འབྲལ་ལུས་དང་གྲིབ་བཞིན་འགྲོགས། །འགལ་（2བ）རྐྱེན་ཉེས་པ་སྟོང་དང་བསྣོལ། །མཐུན་རྐྱེན་ལེགས་པ་བརྒྱ་དང་སྤྲོད། །བསྐུལ་བའི་ལས་ལ་རྩལ་མ་ཞན། །བརྣག་པའི་ལས་ལ་མཐུ་མ་ཆུང་། །འདོད་པའི་དོན་ལ་དཔང་མ་དམའ། །ཆོས་སྲིད་ཕུན་ཚོགས་དཔལ་འབྱོར་གྱི། །རྟེན་འབྲེལ་ལེགས་པའི་ཕྱོགས་སུ་སྒྲིགས། །མདོར་ན་བསམ་པའི་རེ་བ་ཀུན། །དུས་འདིར་འགྲུབ་པའི་ཕྲིན་ལས་མཛོད། །（ཅེས་འདོད་དོན་བསྐུལ་ཞིང་མཆོད་གཏོར་གཙང་མར་འབུལ། མགྲོན་རྟེན་ལ་བསྟིམ་པའམ་རང་གནས་སུ་གཤེགས་ལ་ཤིས་བརྗོད་པས་མཐའ་བརྒྱན་པར་བྱའོ། །ཞེས་པའང་མངོན་པར་འདོད་པའི་དོན་ལ་ཕྲིན་ལས་བསྐུལ་བའི་སླད་དུ་འདི་ལྟར་བགྱི་བར་འདུན་པའི་ཐོག །ཉེ་ཆར་བང་རི་མཆོག་སྤྲུལ་ཀུན་བཟང་བསྟན་པའི་རྒྱལ་མཚན་དང་། བཀྲ་བདེ་གནས་འཛིན་ཚེ་དབང་རབ་བརྟན་ཟུང་ནས་བཀྲ་ཤིས་ལྷ་རྫས་རིན་པོ་ཆེའི་མེ་ཏོག་གི་སྐྱེས་དང་བཅས་ཏེ་གསུང་གིས་བསྐུལ་བས་མཚམས་སྦྱར་ཏེ། རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེས་དཔོན་ཟླའི་ཤེས་རབ་ཀྱི་ཆའི་ཌཱ་ཀི་འདུ་བའི་ཆོས་བཟང་པོར་སྦྱར་བ་སིདྡྷི་རསྟུ།། །།）