DJYD-KABUM-23-A-040

Previous Text Back to Volume PageLast text in volume.

Wylie title
Location	bdud 'joms rin po che bka' 'bum Volume 23, Text 40, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: . Kalimpong: Dupjung Lama, 1979-1985.*
Side notes
More details More details
Genre

[edit]

（1ན）（སྲིད་པ་ཧུའི་ཕྱག་རྒྱའི་རྒྱབ་ཡིག །）ཧོཿ ལོ་རྒྱལ་པོ། ཟླ་བ་བློན་པོ། ཞག་དམག་མི། དུས་ཚོད་མཚོན་ཆ། སྲིད་པ་གསུམ་གྱི་ཡབ་ཡུམ་ནང་པ། གཡས་གདགས་རི་དཀར་པོ་སྐྱེས་པ་ཕོའི་བླ་རི། གཡོན་སྲིབ་རི་ནག་པོ་ཟ་མའི་བླ་རི། མཚམས་བུ་ཚ་ནོར་གྱི་བླ་རིས་གཙོས་པའི་ཡུལ་འདིར་གནས་པའི་ཀླུ་གཉན་ས་བདག་སྲིན་པོ། ཤར་ཕྱོགས་འབྱུང་བ་ཤིང་གི་ལྷ། ལྷོ་ཕྱོགས་འབྱུང་བ་མེ་ཡི་ལྷ། ནུབ་ཕྱོགས་འབྱུང་བ་ལྕགས་ཀྱི་ལྷ། བྱང་ཕྱོགས་འབྱུང་བ་ཆུ་ཡི་ལྷ། མཚམས་བཞི་འབྱུང་བ་ས་ཡི་ལྷ། ཤར་གྱི་སྟག་སྐྱ་བོ། ལྷོ་ཡི་འབྲུག་སྔོན་པོ། ནུབ་ཀྱི་བྱ་དམར་པོ། བྱང་གི་རུས་སྦལ་ནག་པོ། དབུས་ཀྱི་སྤྲེའུ་སེར་པོ། མཚམས་བཞིར་གཡོག་གི་ལྷ། ཐེ་སེ་རྒྱལ་པོ་ལ་སོགས་ཏེ་ལོའི་ས་བདག །འབྲུག་ལྷ་གྭ་པ་ལ་སོགས་ཏེ་ཟླ་བའི་ས་བདག །གསེར་མཛོད་གསེར་པོ་ལ་སོགས་ཏེ་ཞག་གི་ས་བདག །གཡུ་མཛོད་སྔོན་མོ་ལ་སོགས་ཏེ་དུས་ཚོད་ཀྱི་ས་བདག་ཤིང་ཕོ་བྱི་བ་ལ་སོགས་ཏེ་ལོ་རྒན་དྲུག་ཅུའི་ལྷ། མེ་ཕོ་སྟག་ལ་སོགས་ཏེ་ཟླ་བའི་ལྷ། ས་ཕོ་འབྲུག་ལ་སོགས་ཏེ་ཞག་གི་ལྷ། ལྕགས་མོ་ཡོས་ལ་སོགས་ཏེ་དུས་ཚོད་ཀྱི་ས་（1བ）བདག །ནམ་ཟླ་དུས་བཞིའི་ས་བདག །སྤར་ཁ་བརྒྱད་ཀྱི་ལྷ། སྨེ་བ་དགུ་ཡི་ལྷ། གཟའ་སྐར་འཕྲོད་སྦྱོར་དུས་འབྱུང་བའི་ལྷ་ཕྱེད་གཉིས་དང་། གཟེར་གཉིས་སུ་རྒྱུ་བའི་ལྷ། གཉུག་མར་གནས་པའི་ལྷ་ལ་སོགས་ཡུལ་དུས་ལ་དབང་བྱེད་པའི་ས་བདག་ལྷ་ཀླུ་འཁོར་དང་བཅས་པ་ཐམས་ཅད་རང་རང་གི་ཡུལ་དང་མཐུན་པའི་གཏོར་མ་རྒྱན་ལྡན་ཡས་སུ་སྦྱར་བ་གསེར་སྐྱེམས་ཀྱིས་བརྒྱན་པའི་ཕུད་ཀྱི་མཆོད་པ་དམ་པ་འདི་གསོལ་ཞིང་མཆོད་དོ། །སོ་སོའི་རྒྱུད་ཚིམས་པ་དང་ལོངས་སྤྱོད་ཀྱི་རྐྱེན་དུ་འབྱོར་བར་གྱུར་ཅིག །བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་ཆེ་བ་ལ་མ་བསྐྱོན། ཆུང་བ་ལ་མ་འཁང་། རུ་ང་དང་ཕྲག་དོག་མ་མཛད་ཅིག །བདག་ནི་ས་དང་ཡུལ་དུས་ལ་དབང་མི་བྱེད་དོ། །ས་དང་ཡུལ་དུས་ཀྱི་བདག་པོ་ཁྱེད་རྣམས་ལ་བརྟེན་ནས་ལས་དང་བྱ་བ་བྱེད་པ་ཡིན་པས་སྡོང་གྲོགས་དང་དཔུང་གཉེན་མཛོད་ཅིག །（ཅེས་པའང་ཛྙཱ་ནས་སོ།། །།）