DJYD-KABUM-23-A-018

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 23, Text 18, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: . Kalimpong: Dupjung Lama, 1979-1985.*
Side notes
More details More details
Genre

[edit]

（1ན）（ཟབ་གསང་མཁའ་འགྲོའི་སྙིང་ཐིག་གི་འཕོ་བའི་ངག་འདོན་ནི། སྐྱབས་སེམས་སྔོན་དུ་འགྲོ་བས་འཁོར་བའི་སྒོ་དགུ་ཧཱུཾ་རེས་བཀག་པར་མོས་ལ། དངོས་གཞི་ནི།） ཨེ་མ་ཧོཿ རང་སྣང་རྣམ་དག་དོན་གྱི་འོག་མིན་ཞིང་༔ རང་ལུས་རྣལ་འབྱོར་དམར་མོ་གྲི་ཐོད་ཅན༔ ཞི་འཛུམ་དོར་སྟབས་མཚན་དཔེའི་ལང་ཚོས་མཛེས༔ སྐུ་དབུས་དབུ་མ་མདའ་སྨྱུག་འབྲིང་པོ་ཙམ༔ སྙིང་གའི་གནས་ནས་སྤྱི་བོར་ཐ་ལེར་ཟུག༔ རིགས་ཀྱི་བདག་པོ་སངས་རྒྱས་འོད་དཔག་མེད༔ དམར་གསལ་མཉམ་བཞག་སྐྱིལ་ཀྲུང་པད་ཟླར་བཞུགས༔ ཞི་འཛུམ་མཚན་དཔེ་རབ་རྫོགས་སྤྲུལ་སྐུའི་ཆས༔ སྐུ་ལ་བཀོད་པ་རྒྱལ་བའི་དཀྱིལ་འཁོར་རྫོགས༔ སྙིང་དབུས་རིགཔ་དྭངས་མའི་ཐིག་ལེར་གསལ༔ དབུ་མའི་ལམ་ནས་སྐར་མདའ་རྒྱུག་པ་བཞིན༔ སངས་རྒྱས་འོད་དཔག་མེད་པའི་ཐུགས་ཀར་འཕོ༔ （ཞེས་གསལ་བཏབ་ལ། མོས་གུས་ཀྱི་གདུང་བ་དྲག་པོ་ཁ་ཙམ་མིན་པར་ཞེ་ཐག་པ་ནས་འདི་སྐད་དུ།） ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་འགྲོ་བའི་མགོན་པོ་པདྨ་འབྱུང༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ ཟབ་ལམ་འཕོ་བ་འབྱོངས་པར་བྱིན་གྱིས་རློབས༔ （ཞེས་གསོལ་འདེབས་གང་ནུས་（1བ）དང་། གསོལ་འདེབས་གཞན་སྤྲོ་ནའང་སྦྱར་བས་ཆོག ། རྣམ་ཤེས་ཐིག་ལེ་དེ་ཉིད་དབུ་མའི་ནང་བརྒྱུད་སྐར་མདའ་འཕང་བ་ལྟར་སངས་རྒྱས་འོད་དཔག་མེད་ཀྱི་ཐུགས་ཀར་འཕོ་བར་མོས་ཤིང་རླུང་མིག་སེམས་གསུམ་གྱེན་དུ་གཏད་ལ་ཕཊ་སྒྲ་བདུན་ནམ་ཉེར་གཅིག་སོགས་ཀྱིས་སྤར། ཐུན་མཚམས་སུ་ཊ་ཞེས་རླུང་མིག་སེམས་གསུམ་སྙིང་གར་ཕབ་ནས།） རིགས་བདག་འོད་ཞུ་དབུ་མའི་ལམ་བརྒྱུད་དེ། །སྙིང་དབུས་རང་སེམས་ཐིག་ལེར་རོ་གཅིག་འདྲེས། །འཆི་མེད་ཚེ་ཡི་རིག་འཛིན་བརྙེས་པར་གྱུར། །（ཞེས་ཚངས་བུག་གསེར་གྱི་རྡོ་རྗེ་རྒྱ་གྲམ་གྱིས་བཀག་པར་བསམ་ལ།） ཨོཾ་ཨ་མཱ་ར་ཎི་ཛཱི་ཝ་ནྟི་ཡེ་སྭཱ་ཧཱ། （ཞེས་ཅི་ནུས་བཟླས་མཐར།） དུས་མིན་འཆི་བའི་མཚན་མ་མཐོང་བ་ན། །དེ་ཡི་མོད་ལ་ཚེ་དཔག་མེད་མགོན་སྐུ། །གསལ་བར་མཐོང་ནས་འཆི་བདག་དཔའ་བཅོམ་སྟེ། །འཆི་མེད་རིག་འཛིན་མྱུར་དུ་ཐོབ་པར་ཤོག ། མི་གཙང་ལུས་འདི་བོར་བར་གྱུར་མ་ཐག །བདེ་བ་ཅན་དུ་བརྫུས་ཏེ་སྐྱེ་བར་ཤོག །སྐྱེས་མ་ཐག་ཏུ་ས་བཅུ་རབ་བགྲོད་ནས། །སྤྲུལ་པས་ཕྱོགས་བཅུར་གཞན་དོན་བྱེད་པར་ཤོག ། （ཅེས་པའང་ཡེ་ཤེས་སྙིང་པོའི་སློབ་ཚོགས་ཀྱི་ངག་འདོན་དུ་གཏེར་གཞུང་ནས་བསྡུས་པ་སྟེ་ཛྙཱ་ནས་སོ།། །།） ༈ ། གནས་ཡུལ་བདེ་ཆེན་དག་པའི་ཞིང་ཁམས་དབུས། །རང་ལུས་རྣལ་འབྱོར་མ་དཔལ་གྲི་ཐོད་（2ན）ཅན། །ལུས་དབུས་དབུ་མ་ཡར་སྣེ་སྤྱི་བོར་ཧར། །སྙིང་གའི་ཐད་དུ་རླུང་སེམས་ཐིག་ལེའི་ཚལ། །སྤྱི་བོར་བླ་མ་འོད་དཔག་མེད་མགོན་བཞུགས། །གསོལ་བ་བཏབ་པས་ཐིག་ལེ་སྐར་མདའ་བཞིན། །བླ་མ་འོད་དཔག་མེད་པའི་ཐུགས་ཀར་འཕོས། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས། །སྤྲུལ་སྐུ་པད་འབྱུང་རྩ་བརྒྱུད་བླ་མ་ལ། །གསོལ་བ་འདེབས་སོ་བདག་ནི་འཕོས་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །ཕཊ་ཕཊ་ཕཊ། （འདིར་སྤྲོ་ན་གསོལ་འདེབས་གཞན་ཡང་བྱ།） འོད་དཔག་མེད་པ་འོད་ཞུ་རང་ལ་ཐིམ། །འཆི་མེད་ཚེ་ཡི་རིག་འཛིན་ཐོབ་པར་གྱུར། །ཨོཾ་ཨ་མཱ་ར་ཎི་ཛཱི་ཝ་ནྟི་ཡེ་སྭཱ་ཧཱ། ཛྙཱ་ནས་སོ།། །།