DJYD-KABUM-24-YA-031

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 24, Text 31, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 24: . Kalimpong: Dupjung Lama, 1979-1985.*
Side notes
More details More details
Genre

[edit]

（1ན）རྒྱལ་རབས་སྤར་འདེབས་ཀྱི་སྔོན་བརྗོད་དུ་ཕུལ་བ། བདུད་འཇོམས་འཇིགས་བྲལ་ཡེ་ཤེས་རྡོ་རྗེར་འབོད་པའི་རྒྱལ་ཁམས་པ་བདག་གི་སྐྱེ་ཡུལ་ནི་སྦས་ཡུལ་པདྨ་བཀོད། སྐྱེད་བྱེད་ཀྱི་ཕ་ནི་ཀ་གནམ་རྗེ་རིགས་ཀྱི་མི་རྒྱུད་ཁེངས་བླ་འཇམ་དཔལ་ནོར་བུ་དབང་རྒྱལ་གྱི་བུ་རུ། རབ་བྱུང་བཅོ་ལྔ་པའི་ཤིང་འབྲུག་ལོར་སྐྱེས། ལོ་ངོ་གསུམ་ཙམ་ནས་བདུད་འཇོམས་གཏེར་ཆེན་གྱི་སྤྲུལ་སྐུར་ངོས་འཛིན་བྱས་ཏེ་གོང་མའི་ཞལ་སློབ་སོགས་ནས་བདག་གིར་བཟུང་སྟེ་ཆོས་སྒོར་བཅུག །ཡོན་ཏན་གྱི་རྩ་བ་བྲི་ཀློག་ཡིན་ཅེས་དགེ་རྒན་ནས་སློབ་སྦྱོང་གི་ཞུར་ལ་དྲངས། ཞར་ལ་ཆོ་ག་ཆོས་སྤྱོད་སོགས་ཀྱི་དཔེ་འཛིན་དང་སྒོ་གསུམ་སྤྱོད་ལམ་གང་ཅིར་ཉེས་འགོག་ལེགས་སྦྱོར་གྱི་སློབ་ཁྲིད་དང་འབྲེལ་ལོ་རྒྱུས་གཏམ་རྒྱུད་སྔོན་འགྲོའི་གོ་དོན་སོགས་ཁྲིད་ཚུལ་ཇི་སྙེད་པས་བློ་མིག་ཅུང་ཟད་ཕྱེས། རིམ་གྱིས་ལོ་ན་བློ་ཚོད་དང་མཐུན་པར་སྔ་ཕྱིར་མཁས་གྲུབ་བླ་མ་རྣམས་ཀྱིས་བརྩེ་བས་རྗེས་སུ་བཟུང་སྟེ། བརྡ་དག་སྙན་གསུམ་རྩིས་སྨན་སྐོར་སོགས་ཐུན་མོང་རིག་གནས་ཁ་ཐོར། དབུ་ཕར་བྱམས་ཆོས་སྤྱོད་འཇུག་སྡོམ་གསུམ་སོགས་ཐུན་མིན་གཞུང་བཤད་འགའ་ཙམ། ཁྱད་པར་རང་ལུགས་སྔགས་རྒྱུད་བཀའ་གཏེར་རྒྱ་མཚོའི་སྨིན་གྲོལ་རྒྱུད་འགྲེལ་ཟབ་ཁྲིད་སོགས་གཙོ་བོར་བཟུང་། རྡོ་རྗེ་སློབ་དཔོན་གྱི་ལས་ཆེན་བཅུ་གསུམ་ནས་（1བ）བརྩམས་སྒྲུབ་སྡེ་ཁག་གི་ཆོ་གའི་རྣམ་གཞག །གཏོར་བཟོ་རྒྱན་བཀོད་གར་ཐིག་དབྱངས་རོལ་ཚུན་རིག་འཛིན་བརྒྱུད་པའི་ཕྱག་བཞེས་རས་སུ་མ་བོར་བར་སྦྱང་བརྩོན་ལ་འབད་འབུང་བགྱིས། སྐབས་སུ་སྔོན་འགྲོ་བསགས་སྦྱོང་ནས་བརྩམས་དངོས་གཞི་བསྐྱེད་རྫོགས་བསྙེན་སྒྲུབ་ཀྱི་ཉམས་ལེན་ཡང་བྲེ་གསོག་ཕུལ་གསོག་ཅི་ནུས་སུ་བརྩོན་ཁུལ་བྱས་མོད། འོན་ཀྱང་བླ་མའི་མིང་ངན་ཐོགས་པ་འདིས་བསླུས་ཏེ་བསྟན་དོན་འགྲོ་ཕན་དུ་བསྙད་པའི་རྣམ་གཡེང་གི་ཁོལ་པོར་འཕྱན་ནས་སྒྲུབ་པ་ཉམས་ལེན་གྱི་མངོན་རྟགས་ཡོན་ཏན་ནི་རུས་སྦལ་གྱི་སྤུའི་རྗེས་སུ་སོང་། རང་ལ་ཆོས་ཀྱི་བདུད་རྩི་ཇི་ཙམ་ཐོབ་ཅིང་ཐོས་པ་ཕལ་ཆེར་གཞན་སོ་སོའི་ངོ་སྐལ་དང་འཚམས་པར་འཆད་སྤེལ་གང་ནུས་སུ་བགྱིས། མཁས་པའི་གྲལ་མི་གཤོག་ཀྱང་བསྐུལ་བ་པོའི་ངོ་མི་ལྡོག་ཕྱིར་དང་འགའ་ཞིག་བསྟན་པའི་ཞབས་ཏོག་ཏུའང་ཅུང་ཟད་འགྱུར་དུ་རེ་བས། བོད་སྔ་རབས་པའི་ཆོས་འབྱུང་དང་། རྙིང་བསྟན་རྣམ་གཞག །རྒྱལ་རབས། སྡོམ་གསུམ་འབྲུ་འགྲེལ། སྒྲུབ་སྐོར་མང་པོའི་ཆོག་ཁྲིགས་ཁྲིད་ཡིག་སོགས་ཀྱིས་མཚོན་རྩོམ་ཐོར་ཡོངས་བསྡོམས་པོད་གྲངས་བཅུ་ཕྲག་གཉིས་ལས་བརྒལ་བ་བྱུང་སོང་བ་ཐོས་པའི་ལག་རྗེས་རྩོམ་པར་བསྙད་དེ་རེ་དོགས་མེད་པར་དཔེ་ཐོག་ཏུ་བཀོད། དོན་ （2ན）གྱི་སྙིང་པོ་འདྲེན་མཆོག་དམ་པ་རྣམས་ཀྱི་བཀའ་དྲིན་ལ་བརྟེན་དག་སྣང་གི་བློ་མིག་ལ་ལྡོངས་ཙམ་ནས་གཞན་གྱི་ཆོས་དང་གང་ཟག་སུ་ལའང་ལོག་ལྟ་སྐུར་འདེབས་ཆོས་སྤོང་གི་ལས་ངན་བསགས་མ་མྱོང་ཞིང་། རང་སེམས་གཡོ་སྒྱུ་སྤངས་པའི་བསམ་པ་བཟང་པོ་ཞིག་ལ་རྟག་པར་སློབ་བཞིན་པ་ཡིན་སྟབས། སྟོན་པ་ཐུགས་རྗེ་ཅན་གྱི་འཁོར་རྣམས་བཞིའི་གྲལ་རིམ་འོག་མའི་ཁྱུར་མི་ཚུད་སྙམ་པའི་དོགས་པ་སྤུ་ཙམ་མེད་པས་ན་རེས་འགའ་རང་མཐོང་གི་བསམ་བློ་ཅུང་ཟད་རེའང་འཆར་ཡོང་གི་ན་འདུག་པ་འདི་དམ་པའི་ཆོས་དང་མི་དགེའི་སྡིག་གང་ཡིན་ཆ་མ་འཚལ་བར་གནས་ཡོད་ཞུ་རྒྱུ་སྔགས་རྒན་བདག་གི་ལོ་རྒྱུས་ཀྱི་བསྡུས་དོན་ལགས་སོ།། །།