དམ་ཆོས་དགོངས་པ་ཡོངས་འདུས་ལས། རིམ་གཉིས་རྣལ་འབྱོར་ཐུན་མོང་གི་སྔོན་འགྲོའི་ངག་འདོན་རིག་པ་འཛིན་པའི་ཤིང་རྟ།

Previous Text Back to Volume Page Next Text

Wylie title	dam chos dgongs pa yongs 'dus las rim gnyis rnal 'byor thun mong gi sngon 'gro'i ngag 'don rig pa 'dzin pa'i shing rta
Location	bdud 'joms rin po che bka' 'bum Volume 7, Text 18, Pages 597-609 (Folios 1a1 to 7a3)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Dam chos dgongs pa yongs 'dus las rim gnyis rnal 'byor thun mong gi sngon 'gro'i ngag 'don rig pa 'dzin pa'i shing rta. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 7: 597-609. Kalimpong: Dupjung Lama, 1979-1985.
Side notes	Recto: sngon 'gro Verso: bdud 'dul dgongs 'dus
More details More details
Tertön	བདུད་འདུལ་རྡོ་རྗེ་ (bdud 'dul rdo rje)
Genre	Liturgy - ngag 'don · Preliminary Practices - sngon 'gro
Cycle	བཀའ་རྫོགས་པ་ཆེན་པོའི་དམ་ཆོས་དགོངས་པ་ཡོངས་འདུས་ (bka' rdzogs pa chen po'i dam chos dgongs pa yongs 'dus)
Colophon	།ཅེས་པའང་ལམ་འདིར་མོས་པའི་སྐྱེ་བོ་རྣམས་ལ་ཕན་པའི་ཕྱིར་གཏེར་གཞུང་རྩ་བའི་དགོངས་དོན་འཇུག་པ་བདེ་བའི་ངག་འདོན་སྙིང་བོར་དྲིལ་ཏེ། རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེས་བྲིས་པ་ཟབ་ལམ་གྱི་ཕྲིན་ལས་ཕྱོགས་མཐར་ཁྱབ་ཅིང་རྟག་པའི་རྒྱུར་གྱུར་ཅིག། །།སརྦ་དཱ་མངྒ་ལཾ།།
Colophon	ces pa'ang lam 'dir mos pa'i skye bo rnams la phan pa'i phyir gter gzhung rtsa ba'i dgongs don 'jug pa bde ba'i ngag 'don snying bor dril te/___rig 'dzin gyi myu gu 'jigs bral ye shes rdo rjes bris pa zab lam gyi phrin las phyogs mthar khyab cing rtag pa'i rgyur gyur cig/___//sarba dA mang+ga laM//

[edit]

༄༅། །དམ་ཆོས་དགོངས་པ་ཡོངས་འདུས་ལས། རིམ་གཉིས་རྣལ་འབྱོར་ཐུན་མོང་གི་སྔོན་འགྲོའི་ངག་འདོན་རིག་པ་འཛིན་པའི་ཤིང་རྟ་ཞེས་བྱ་བ་བཞུགས་སོ། །

༄༅། །ན་མོ་མ་ཧཱ་གུ་རུ་པདྨ་ཀ་ར་ཡེ། རབ་འབྱམས་རྒྱལ་ཀུན་འདུས་ཞལ་གཏན་གྱི་སྐྱབས། །རྡོ་རྗེ་ཐོད་ཕྲེང་བླ་མར་གུས་བཏུད་ནས། །ཟབ་མོའི་ལམ་གྱི་འཇུག་སྒོ་སྔོན་འགྲོའི་ཁྲིགས། །རིག་པ་འཛིན་པའི་ཤིང་རྟ་འདི་ན་དབྱེ། །དེ་ཡང་ཚེ་འདིར་ཟུང་འཇུག་སྐུ་བཞིའི་གོ་འཕང་མངོན་དུ་བྱེད་པར་འདོད་པའི་གང་ཟག་སྐལ་པའི་བློ་གྲོས་ཁྱད་པར་ཅན་རྣམས་ཀྱིས་ཐོག་མ་ཉིད་ནས་ཟབ་མོའི་ལམ་འདི་ཁོ་ན་ལ་བརྩོན་པར་བྱ་བ་ཡིན་ཏེ། དེའི་ཚུལ་ལ་གཉིས། རྒྱུད་སྣོད་རུང་དུ་བྱེད་པ་ཐུན་སྤྱིའི་སྔོན་འགྲོ་དང་། རིམ་གཉིས་རྣལ་འབྱོར་བྱེ་བྲག་སྒོས་ཀྱི་སྔོན་འགྲོའོ། །དང་པོ་ནི། བདེ་བའི་སྟན་ལ་འཁོད་དེ་ལུས་གནད་བསྲང་། དུག་གསུམ་གྱི་རླུང་རོ་བསལ། ཤེས་པ་རྣལ་དུ་ཕབ་སྟེ་རང་བབ་ཀྱི་བསམ་གཏན་ལ་དྲན་པ་མངོན་དུ་ཕྱོགས་པས། མདུན་གྱི་ནམ་མཁར་འཇའ་ཟེར་ཐིག་ལེའི་ཀློང་དུ་ངོ་བོ་དྲིན་ཆེན་རྩ་བའི་བླ་མ་ཉིད་རྣམ་པ་ཨོ་རྒྱན་རྡོ་རྗེ་འཆང་གི་ཚུལ་དུ་དགྱེས་འཛུམ་ཡེ་རེ་རང་ལ་བརྩེ་བ་ཆེན་པོས་དགོངས་ཏེ་བཞུགས་པར་བསམ་ལ། མོས་གུས་གདུང་ཤུགས་དྲག་པོས། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཞེས་དང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་སྨིན་ཅིང་གྲོལ་བར་བྱིན་གྱིས་ [2a] བརླབ་ཏུ་གསལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཚེ་འདི་ཉིད་ལ་ཟུང་འཇུག་རྡོ་རྗེ་ཐོད་ཕྲེང་རྩལ་གྱི་གོ་འཕང་རིན་པོ་ཆེ་མངོན་དུ་འགྲུབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་བཏབ་པས་བླ་མའི་སྐུ་ལས་འོད་ཟེར་དཔག་ཏུ་མེད་པ་བྱུང་། རང་ལ་ཐིམ་པས་སྒོ་གསུམ་གྱི་སྒྲིབ་པ་བསལ། མཐར་བླ་མ་འོད་དུ་ཞུ་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ་རིག་པ་འཛིན་མེད་ཀྱི་ངང་དུ་དར་གཅིག་མཉམ་པར་བཞག་གོ །གཉིས་པ་ལ་གཉིས། ཐུན་མོང་བློ་སྦྱོང་དང་། ཁྱད་པར་བསགས་སྦྱོང་ངོ་། །སྔ་མ་ལ་བློ་ལྡོག་རྣམ་པ་བཞི་ལས། དང་པོ་དལ་འབྱོར་གྱི་མི་ལུས་རིན་པོ་ཆེ་འདི་ཉིད་ཤིན་ཏུ་རྙེད་དཀའ་བར་བསམ་པ་ནི། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུས་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱིས་འདི་ཡང་དག་འབྱོར་པར་ག་ལ་འགྱུར། གཉིས་པ་འདུས་བྱས་ཐམས་ཅད་མི་རྟག་འཇིག་པའི་རང་བཞིན་ཅན་དུ་བསམ་པ་ནི། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་ནི་ནམ་མཁའི་གློག་འདྲ་སྟེ། རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། གསུམ་པ་ལས་དཀར་ནག་གི་འབྲས་བུ་བསླུ་བ་མེད་པའི་ཚུལ་ལ་བསམ་པ་ནི། དུས་ཀྱིས་བསྙེན་ནས་རྒྱལ་པོ་འགྲོ་གྱུར་ [2b] ན། ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དག་ནི་གར་ནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །བཞི་པ་ཁམས་གསུམ་འཁོར་བའི་གནས་ལ་སྡུག་བསྔལ་གྱི་རང་བཞིན་བཟོད་བགླག་མེད་པར་བསམ་པ་ནི། སྲེད་སྲིད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་འཁོར་བ་བཞིན། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། ཚུལ་དེ་ལྟ་བུའི་གནས་ལ་ངེས་པར་འབྱུང་བའི་བློས་རྒྱུད་ཡང་དག་བྱང་ཆུབ་ཀྱི་ལམ་དུ་བསྐུལ་བ་ནི། མཁའ་ཁྱབ་འགྲོ་ཀུན་བདག་གི་ཕ་མ་སྟེ། །བདེ་བ་འདོད་ཀྱང་སྡུག་བསྔལ་འབའ་ཞིག་སྒྲུབ། །ཐར་མེད་འཁོར་བར་འཁྱམས་པ་སྙིང་རེ་རྗེ། །དེ་རྣམས་བདག་གིས་ཅི་ནས་བསྒྲལ་བར་བྱ། །དེ་ཕྱིར་ཡེངས་མེད་བརྩོན་པའི་ཤུགས་བསྐྱེད་ནས། །ཟབ་མོའི་རྣལ་འབྱོར་མཐའ་རུ་ཕྱིན་པར་བགྱི། །ཞེས་སྟོན་པ་བཀའ་དྲིན་ཅན་གྱི་གསུང་དྲི་མ་མེད་པས་མཚོན་ཐར་བར་བསྐུལ་བའི་ཚིག་རྣམས་ངག་ཏུ་བརྗོད་ཅིང་དོན་རྒྱུད་ལ་འདྲེས་ངེས་སུ་བྱའོ། །གཉིས་པ་ལ་ལྔ་ལས། དང་པོ་ལམ་ཐམས་ཅད་ཀྱི་འཇུག་སྒོ་ [3a] སྐྱབས་སུ་འགྲོ་བ་ལ། ཐོག་མར་སྐྱབས་ཡུལ་གསལ་གདབ་པ་ནི། མདུན་གྱི་ནམ་མཁར་དཔག་བསམ་ཤིང་༔ རབ་ཏུ་རྒྱས་པའི་སྙིང་པོ་ལ༔ སེང་ཁྲི་པདྨ་ཉི་ཟླའི་སྟེང་༔ རྩ་བའི་བླ་མ་ཐོད་ཕྲེང་རྩལ༔ རྡོ་རྗེ་འཆང་གི་ཆ་ལུགས་ཅན༔ མཚོ་རྒྱལ་ཡུམ་དང་མཉམ་པར་སྦྱོར༔ དགྱེས་འཛུམ་འོད་ཟེར་སྤྲོ་བའི་སྐུ༔ སྐྱབས་ཀུན་འདུས་པའི་ངོ་བོར་བཞུགས༔ ཞེས་གསལ་བཏབ་ལ། དེའི་སྤྱན་སྔར་བདག་གཞན་མཁའ་ཁྱབ་ཀྱི་སེམས་ཅན་ཐམས་ཅད་སྒོ་གསུམ་གུས་པ་ཆེན་པོས་དེང་ནས་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བའི་ཟློས། ན་མོཿ བླ་མ་བདེ་གཤེགས་འདུས་པའི་སྐུ༔ དཀོན་མཆོག་གསུམ་གྱི་རང་བཞིན་ལ༔ བདག་དང་མཐའ་ཡས་སེམས་ཅན་རྣམས༔ བྱང་ཆུབ་བར་དུ་སྐྱབས་སུ་མཆི༔ ཞེས་ཅི་ནུས་སུ་བྱའོ། །གཉིས་པ་ཐེག་ཆེན་ལམ་གྱི་གཞི་རྟེན་སེམས་བསྐྱེད་པ་ནི། སྐྱབས་ཡུལ་དེ་རྣམས་ཀྱི་སྤྱན་སྔར། སེམས་ཅན་ཐམས་ཅད་གཏན་བདེའི་ས་ལ་འགོད་ཕྱིར་བྱང་ཆུབ་དོན་དུ་གཉེར་བ་སྨོན་པ་དང་། བྱང་ཆུབ་ཀྱི་སྤྱོད་པ་ཚུལ་བཞིན་སྤྱད་པར་དམ་བཅའ་བ་འཇུག་པའི་སེམས་བསྐྱེད་གསལ་འདེབས་བཞིན་པས། ན་མོ༔ བདག་གིས་འགྲོ་བ་ཀུན་དོན་དུ༔ བླ་མ་སངས་རྒྱས་བསྒྲུབ་ནས་ནི༔ གང་ལ་གང་འདུལ་ཕྲིན་ལས་ཀྱིས༔ འགྲོ་དྲུག་བསྒྲལ་བར་དམ་བཅའོ༔ ཞེས་བརྗོད་ཅིང་ [3b] སྟོང་ཉིད་སྙིང་རྗེའི་སྙིང་པོ་ཅན་ལ་བློ་སྦྱང་། མཐར་སྐྱབས་ཡུལ་བླ་མ་འོད་དུ་ཞུ་ནས་རང་ལ་ཐིམ་པས་དབྱེར་མེད་དུ་གྱུར་པར་བསམ་ལ་མི་དམིགས་པའི་ངང་དུ་བཞག་གོ །གསུམ་པ་འགལ་རྐྱེན་སྡིག་སྒྲིབ་སྦྱོང་བྱེད་རྡོར་སེམས་བསྒོམ་བཟླས་ནི། རང་གི་སྤྱི་བོར་པད་ཟླའི་སྟེང༔ ཧཱུྃ་ལས་བླ་མ་རྡོ་རྗེ་སེམས༔ དུང་མདོག་ཞལ་གཅིག་ཕྱག་གཉིས་པ༔ རྡོར་དྲིལ་འཛིན་པས་ཡུམ་ལ་འཁྱུད༔ དར་དང་རིན་ཆེན་རྒྱན་གྱིས་མཛེས༔ ཐུགས་ཀར་ཟླ་སྟེང་རྡོ་རྗེའི་ལྟེར༔ ཧཱུྃ་མཐར་ཡིག་བརྒྱའི་ཕྲེང་བས་བསྐོར༔ དེ་ལས་བྱང་སེམས་བདུད་རྩིའི་རྒྱུན༔ བབས་པས་སྡིག་སྒྲིབ་ཉེས་ལྟུང་ཀུན༔ དག་ཅིང་དྲི་མ་མེད་པར་གྱུར༔ ཅེས་སྟོབས་བཞིའི་དམིགས་གནད་དང་ལྡན་པའི་སྒོ་ནས། ཨོཾ་བཛྲ་སཏྭ་ས་མ་ཡ་སོགས་ཡི་གེ་བརྒྱ་པ་བཟླས་པའི་དངོས་གཞི་དང་། ཡང་སྙིང་ཡིག་དྲུག་ཀྱང་ཇི་ལྟར་ནུས་པ་བཟླ། མཐར་མོས་གདུང་དྲག་པོས། མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཀྱེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ [4a] ཚོགས་ཐམས་ཅད་བྱང་ཞིང་དག་པར་མཛད་གདུ་གསོལ། ཞེས་གསོལ་བ་བཏབ་པས། རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་སྩལ་བ་དང་ཆབ་གཅིག་འོད་དུ་ཞུ་ནས་རང་ལ་ཐིམ་པར་བསམ་ཞིང་དམིགས་མེད་ཀྱི་ངང་དུ་མཉམ་པར་བཞག་གོ །བཞི་པ་མཐུན་རྐྱེན་ཚོགས་བསགས་མཎྜལ་འབུལ་བ་ནི། ཚོགས་ཞིང་སྐྱབས་ཡུལ་ལྟར་གསལ་བཏབ་པ་ལ་མཆོད་པའི་མཎྜལ་མཚོན་བྱེད་དུ་བྱས་ཏེ། རང་གཞན་གྱི་ལུས་ལོངས་སྤྱོད་དགེ་ཚོགས་དང་བཅས་པ་མཆོད་སྤྲིན་དུ་འབུལ་བའི་བློས། བདག་གཞན་ལུས་དང་ལོངས་སྤྱོད་དང་༔ དུས་གསུམ་དགེ་བའི་དངོས་པོ་རྣམས༔ ཀུན་བཟང་མཆོད་སྤྲིན་ཆེར་སྤྲོས་ནས༔ བླ་མ་རྒྱལ་བ་སྲས་བཅས་མཆོད༔ ཨོཾ་ཨཱཿཧཱུཾ་གུ་རུ་དྷེ་ཝ་དྷཱ་ཀི་ནཱི་རཏྣ་མཎྜལ་པཱུ་ཛ་མེ་གྷ་ས་མ་དྲ་སྥ་ར་ཎ་ས་མ་ཡེ་སྭཱཧཱ༔ ཞེས་ཅི་ནུས་སུ་འབུལ་ལོ། །ལྔ་པ་ལམ་གྱི་མཐར་ཐུག་བྱིན་རླབས་བླ་མའི་རྣལ་འབྱོར་ལ། ཐོག་མར་དབང་རྟེན་གསལ་གདབ་པ་ནི། ཧྲཱིཿ མི་དམིགས་སྟོང་པའི་ངང་ཉིད་ལས༔ བདུད་བཞི་ཉི་ཟླ་པདྨའི་སྟེང༔ བདག་ཉིད་དབང་ཆེན་ཡབ་ཡུམ་སྐུ༔ ཞལ་གཅིག་ཕྱག་གཉིས་སྐུ་གམདོག་དམར༔ དབུ་གཙུག་རྟ་ཞལ་ཕག་གདོང་མཚན༔ གཡས་ [4b] གཡོན་གྲི་གུག་ཐོད་ཁྲག་བསྣམས༔ ཞབས་གཉིས་བརྐྱང་བསྐུམ་འཁྲིལ་སྦྱོར་ཚུལ༔ དུར་ཁྲོད་ཆས་རྫོགས་མེ་ཀློང་བཞུགས༔ སྤྱི་གཙུག་པད་སྡོང་ཉི་ཟླའི་སྟེང་༔ སྐུ་གསུམ་རྒྱལ་བ་འདུས་པའི་དངོས༔ རྩ་བའི་བླ་མ་ཐོད་ཕྲེང་རྩལ༔ ཨཱ་ཙརྻ་གཞོན་ཚུལ་དཀར་དམར་ཞལ༔ ཕྱག་གཡས་རྡོ་རྗེ་གཡོན་ཐོད་བུམ༔ པད་ཞྭ་གསང་ཕོད་ཆོས་གོས་དང་༔ ཟ་འོག་བེ་ར་སྨུག་བརྗིད་པར་གསོལ༔ སྙན་ཆ་མགུལ་ཆུ་ཁ་ཊྭཱཾ་འཛིན༔ ཞབས་གཉིས་རྒྱལ་པོ་རོལ་པའི་སྟབས༔ པང་དུ་བདེ་ཆེན་མཚོ་རྒྱལ་དཀར༔ གྲི་ཐོད་འཛིན་པས་དགྱེས་པར་འཁྲིལ༔ སྐུ་གསུང་ཐུགས་ཀྱི་དཀྱིལ་འཁོར་ལས༔ རྩ་གསུམ་ཆོས་སྲུང་རབ་འབྱམས་ཀུན༔ འཕྲོ་འདུའི་གཟི་བྱིན་ལམ་མེ་བ༔ མངོན་སུམ་བཞིན་དུ་བཞུགས་པར་གྱུར༔ ཞེས་ཐ་མལ་གྱི་ཤེས་པ་རང་འགགས་སུ་འགྲོ་བར་གསལ་བཏབ་ལ། ཧཱུྃ་ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་རྒྱ་མཚོའི་གླིང་༔ གེ་སར་པད་སྡོང་མེ་ཏོག་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་ [5a] སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ མོས་པའི་བུ་ལ་བྱིན་གྱིས་རློབས༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿཞེས་བྱིན་དབབ་ཅིང་དམ་ཡེ་དབྱེར་མེད་དུ་བཞུགས་པར་མོས། ཚོགས་བསགས་པའི་སླད་དུ། ཧཱུཾ་ཧྲཱིཿ གུ་རུ་ཡི་དམ་དྷཱ་ཀི་གཤེགས༔ པད་ཉིའི་གདན་ལ་བཞུགས་སུ་གསོལ༔ སྒོ་གསུམ་གུས་པས་ཕྱག་འཚལ་ལོ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ཞིང་བཤགས༔ བླ་མེད་དོན་ལ་རྗེས་ཡི་རང་༔ སྨིན་གྲོལ་གསང་སྔགས་ཆོས་འཁོར་བསྐོར༔ མྱ་ངན་མི་འདའ་གཞན་དོན་བཞུགས༔ སྙིང་པོ་སེམས་ཅན་དོན་ཕྱིར་བསྔོ༔ ཡང་གསང་རྡོ་རྗེའི་དོན་རྟོགས་ཤོག༔ ཅེས་ཡན་ལག་བཅུ་པ་བྱ། སྤྱི་བོའི་བླ་མ་ལ་སེམས་རྩེ་གཅིག་པའི་མོས་གུས་གདུང་ཤུགས་དྲག་པོས་བློ་གཏད་རེ་ལྟོས་ལིང་བསྐྱུར་གྱི་སྒོ་ནས། ཀྱེ་ཀྱེ་བླ་མ་རིན་པོ་ཆེ༔ སངས་རྒྱས་ཐམས་ཅད་འདུས་པའི་སྐུ༔ འགྲོ་བ་ཀུན་གྱི་གཉེན་གཅིག་པོ༔ མགོན་མེད་བདག་ལ་ཐུགས་རྗེས་ཟུངས་༔ བླ་མ་རྡོ་རྗེ་ [5b] ཐོད་ཕྲེང་རྩལ༔ རེ་ཞིང་ལྟོས་པའི་གཉེན་གཅིག་པོ༔ བདག་ལ་རེ་ས་གཞན་ན་མེད༔ སྡུལ་བསྔལ་འདམ་ནས་དྲང་དུ་གསོལ༔ རྗེ་བཙུན་པདྨ་ཐོད་ཕྲེང་རྩལ༔ ཁྱེད་ལ་བདག་ཉིད་བྲན་དུ་འབུལ༔ སྐྱིད་སྡུག་རེ་ལྟོས་ཁྱེད་ཤེས་པས༔ བླ་མེད་མཆོག་གི་དངོས་གྲུབ་སྩོལ༔ བླ་མ་སངས་རྒྱས་ཕྲིན་ལས་མཛད༔ བདག་ལ་དབང་བསྐུར་བྱིན་རློབས་ལ༔ མཐའ་ཡས་སེམས་ཅན་མ་ལུས་ཀུན༔ འདྲེན་པའི་བླ་མར་བདག་གྱུར་ཅིག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་མོས་གུས་ཀྱི་ཉམས་མ་སྐྱེས་ཀྱི་བར་དུ་གསོལ་བ་བཏབ་ཅིང་ཐུགས་རྒྱུད་བསྐུལ་བའི་བཟླས་པ་ཕུར་ཚུགས་སུ་བྱ། མཐར་བླ་མ་ཡབ་ཡུམ་གྱི་སྐུའི་གནས་བཞིར་ཨོཾ་ཨཱཿཧཱུྃ་ཧྲཱིཿམ་རྣམས་དཀར་དམར་མཐིང་ལྗང་འོད་འབར་བས་མཚན་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཞིའི་བདག་ཉིད་དུ་བཞུགས་པར་བསམ་ལ། སླར་ཡང་མོས་གུས་ཀྱི་ཤུགས་བསྐྱེད་དེ། རྗེ་གུ་རུའི་སྐུ་ལ་གསོལ་བ་འདེབས༔ སྐུ་ཡི་བྱིན་རླབས་ལུས་ལ་སྩོལ༔ ལུས་ཀྱི་སྒྲིབ་པ་དག་ནས་ཀྱང་༔ ལུས་ལ་བདེ་དྲོད་འབར་བ་དང་༔ ལུས་སྤྲུལ་སྐུར་གྲོལ་བར་བྱིན་གྱིས་རློབས༔ རྗེ་གུ་རུའི་གསུང་ལ་གསོལ་བ་འདེབས༔ གསུང་གི་བྱིན་རླབས་ངག་ལ་སྩོལ༔ ངག་གི་སྒྲིབ་པ་དག་ནས་ཀྱང་༔ ངག་ལ་ནུས་པ་ [6a] སྐྱེ་བ་དང་༔ ངག་ལོངས་སྐུར་གྲོལ་བར་བྱིན་གྱིས་རློབས༔ རྗེ་གུ་རུའི་ཐུགས་ལ་གསོལ་བ་འདེབས༔ ཐུགས་ཀྱི་བྱིན་རླབས་ཡིད་ལ་སྩོལ༔ ཡིད་ཀྱི་སྒྲིབ་པ་དག་ནས་ཀྱང་༔ སེམས་ལ་རྟོགས་པ་འཆར་བ་དང་༔ ཡིད་ཆོས་སྐུར་གྲོལ་བར་བྱིན་གྱིས་རློབས༔ གུ་རུའི་སྐུ་གསུང་ཐུགས་ལ་གསོལ་བ་འདེབས༔ སྐུ་གསུང་ཐུགས་ཀྱི་དངོས་གྲུབ་སྩོལ༔ བུའི་སྒོ་གསུམ་ཐ་དད་འཛིན་ཞེན་དག༔ ལྷན་སྐྱེས་ངོ་བོ་ཉིད་ཀྱི་སྐུ༔ ཕ་ཁྱེད་རང་ལྟ་བུར་བྱིན་གྱིས་རློབས༔ ཞེས་གསོལ་བ་བཏབ་པས། བླ་མ་ཡབ་ཡུམ་སྐུ་ཡི་གནས་བཞི་ནས༔ འོད་ཟེར་བྱུང་བ་བདག་གི་གནས་བཞིར་ཐིམ༔ སྐུ་གསུང་ཐུགས་དང་ཡེ་ཤེས་རྡོ་རྗེ་ཡི༔ བྱིན་གྱིས་བརླབས་ནས་དབང་བཞི་ཐོབ་པར་གྱུར༔ ཅེས་དབང་བཞི་བླངས་མཐར། བླ་མ་རྡོ་རྗེ་ཐོད་ཕྲེང་རྩལ༔ དགྱེས་པ་ཆེན་པོས་རང་ལ་ཐིམ༔ རང་ཡང་ཀུན་གཞི་མ་བཅོས་པའི༔ ངང་ལ་ཡིད་ནི་འཛིན་པ་བྲལ༔ རྣམ་དག་སྤྲོས་བྲལ་ཆོས་ཀྱི་སྐུ༔ ཞེས་སྤྱི་བོའི་བླ་མ་རང་ལ་བསྟིམས་ནས་གཉིས་མེད་བློ་འདས་ཀྱི་དགོངས་པ་རིག་སྟོང་དོན་གྱི་བླ་མའི་རང་ཞལ་ཅི་གནས་སུ་བསྐྱང་། དེ་ལས་ལྡང་བར་བརྩམ་པ་ན་སླར་ཡང་སྣང་གྲགས་རྟོག་ཚོགས་བླ་མའི་གསང་བ་གསུམ་དུ་ལམ་གྱིས་སད་པར་བལྟས་ [6b] ལ། ན་མོ༔ བདག་གིས་ཡང་གསང་བླ་མ་བསྒྲུབ་ལ་སོགས་༔ དུས་གསུམ་ཚོགས་གཉིས་ཅི་བསགས་པའི༔ འབྲས་བུ་དུས་འདིར་སྨིན་གྱུར་ཅིག༔ ཡོན་ཏན་མ་ལུས་ཡོངས་རྫོགས་ནས༔ ཕྲིན་ལས་གང་བརྩམས་མྱུར་འགྲུབ་ཅིང་༔ བདག་གཞན་གཉིས་མེད་སངས་རྒྱས་ཤོག༔ གཞན་ཡང་ཕྱོགས་བཅུ་དུས་གསུམ་གྱི༔ བླ་མའི་ཐུགས་དགོངས་རབ་རྫོགས་ཤིང་༔ དུས་གསུམ་ཕ་མས་སྣ་དྲངས་པའི༔ འགྲོ་དྲུག་སེམས་ཅན་མ་ལུས་པ༔ བླ་མ་མཆོག་གིས་རྗེས་བཟུང་ནས༔ ཡང་དག་རྡོ་རྗེའི་དོན་རྟོགས་ཤོག༔ ཅེས་བསྔོ་སྨོན་གྱིས་རྒྱས་གདབ་ཅིང་ཤིས་བརྗོད་ཇི་ལྟར་རིགས་པས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་རྣམས་སུའང་ཅིར་སྣང་དག་པ་རབ་འབྱམས་ཡེ་ཤེས་ཀྱི་རོལ་པར་ལམ་དུ་ཁྱེར་ཞིང་དད་མོས་དམ་ཚིག་རྣམ་པར་དག་པའི་སྒོ་ནས་ཚོགས་གཉིས་ཟུང་འབྲེལ་གྱི་རྣལ་འབྱོར་གོང་ནས་གོང་དུ་སྤེལ་བ་ལ་བརྩོན་པར་བྱའོ། །དེ་ལྟར་གོང་གི་བློ་ལྡོག་རྣམ་བཞིས་མཚོན་བསགས་སྦྱོང་གི་རིམ་པ་རྣམས་སོ་སོར་ཉམས་ཀྱི་མྱོང་བ་ཐོན་ཐོན་གྱི་བར་དུ་འབད་ཅིང་། ཁྱད་པར་བླ་མའི་རྣལ་འབྱོར་རྡོ་རྗེ་ཐེག་པའི་ལམ་གྱི་ཟབ་གནད་ཐུན་མོང་མ་ཡིན་པ་ཁོ་ནར་ངེས་པའི་ཕྱིར་འདི་ཉིད་དངོས་གཞིའི་ཉམས་ལེན་གྱི་སྲོག་ཏུ་བཟུང་སྟེ་བརྩོན་པ་དྲག་པོས་ཉམས་སུ་བླངས་པས་བསྐྱེད་རྫོགས་གཞན་གྱི་ཉམས་ལེན་ལ་ལྟོས་མི་དགོས་པར་བདེ་ཆེན་པདྨ་འོད་ [7a] ཀྱི་ཞིང་དུ་དབུགས་དབྱུང་སྟེ་ས་ལམ་གྱི་བགྲོད་པ་མིག་འཕྲུལ་ལྟ་བུས་ཁྱབ་བདག་བླ་མ་མཚོ་སྐྱེས་རྡོ་རྗེ་འཆང་གི་གོ་འཕང་ལ་རེག་པར་འགྱུར་བ་ནི་ངེས་པའོ། །ཟབ་མོའི་ལམ་བཟང་རིག་པ་འཛིན་པའི་སར། །མྱུར་བདེར་དཀྲི་བའི་ཤིང་རྟ་གསལ་བྱས་པ། །འདི་ལས་འགྲོ་ཀུན་ཟུང་འཇུག་བདེ་བ་ཆེ། །མཚོ་སྐྱེས་བླ་མའི་གོ་འཕང་མངོན་བྱེད་ཤོག །ཅེས་པའང་ལམ་འདིར་མོས་པའི་སྐྱེ་བོ་རྣམས་ལ་ཕན་པའི་ཕྱིར་གཏེར་གཞུང་རྩ་བའི་དགོངས་དོན་འཇུག་པ་བདེ་བའི་ངག་འདོན་སྙིང་བོར་དྲིལ་ཏེ། རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེས་བྲིས་པ་ཟབ་ལམ་གྱི་ཕྲིན་ལས་ཕྱོགས་མཐར་ཁྱབ་ཅིང་རྟག་པའི་རྒྱུར་གྱུར་ཅིག། །།སརྦ་དཱ་མངྒ་ལཾ།། །།