རྩ་གསུམ་ཐུགས་སྒྲུབ་དགོངས་པ་ཡོངས་འདུས་ཀྱི་ཚེས་བཅུའི་ཆོ་ག་གཏོང་ལུགས་ཀྱི་ཟིན་བྲིས་དྭངས་ཤེལ་མེ་ལོང་།

Previous Text Back to Volume PageNext Text

Wylie title	rtsa gsum thugs sgrub dgongs pa yongs 'dus kyi tshes bcu'i cho ga gtong lugs kyi zin bris dwangs shel me long
Location	bdud 'joms rin po che bka' 'bum Volume 22, Text 14, Pages 289-305 (Folios 1a1 to 9a4)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Rtsa gsum thugs sgrub dgongs pa yongs 'dus kyi tshes bcu'i cho ga gtong lugs kyi zin bris dwangs shel me long. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 22: 289-305. Kalimpong: Dupjung Lama, 1979-1985.
Side notes	Recto: zin bris   Verso: bdud 'dul dgongs 'dus
More details More details
Tertön	བདུད་འདུལ་རྡོ་རྗེ་ (bdud 'dul rdo rje)
Genre	Notes - zin bris
Cycle	བཀའ་རྫོགས་པ་ཆེན་པོའི་དམ་ཆོས་དགོངས་པ་ཡོངས་འདུས་ (bka' rdzogs pa chen po'i dam chos dgongs pa yongs 'dus)
Colophon	།ཞེས་པའང་རབ་བྱུང་བཅུ་དྲུག་པའི་མེ་ཁམས་ནོར་སྐྱོང་གི་ལོ་དབང་ཆེན་སྦྲེལ་ཟླའི་ཚེས་བཅུར་ཀོང་པོ་བུ་ཆུ་བདེ་ཆེན་སྟེང་དུ་ཚུལ་འདིའི་དུས་མཆོད་ཆེན་མོ་སྤྲོས་པའི་སྐབས་སུ་ཉེར་མཁོར་གྱུར་ཏེ་འཇིགས་བྲལ་ཡེ་ཤེས་རྡོ་རྗེས་ཟིན་བྲིས་སུ་བཏབ་པའོ།།
	/zhes pa'ang rab byung bcu drug pa'i me khams nor skyong gi lo dbang chen sbrel zla'i tshes bcur kong po bu chu bde chen steng du tshul 'di'i dus mchod chen mo spros pa'i skabs su nyer mkhor gyur te 'jigs bral ye shes rdo rjes zin bris su btab pa'o//

Tibetan Text

[edit]

༄༅། །རྩ་གསུམ་ཐུགས་སྒྲུབ་དགོངས་པ་ཡོངས་འདུས་ཀྱི་ཚེས་བཅུའི་ཆོ་ག་གཏོང་ལུགས་ཀྱི་ཟིན་བྲིས་དྭངས་ཤེལ་མེ་ལོང་བཞུགས་སོ། །

༄༅། །ཨོཾ་སྭསྟི། དགོངས་པ་ཡོངས་འདུས་ཚེས་བཅུའི་ཆོ་གའི་ཕྱག་བཞེས་ཀྱི་ཟིན་ཐོ་འགོད་པ་ལ། མཆོད་གཤོམ་གྱི་རིམ་པ་མཐོང་བརྒྱུད་བཞིན་ཚོགས་པར་བྱས་ནས། ཆོ་ག་དངོས་ལ། ཐོག་མར་ཚིག་བདུན་གསོལ་འདེབས་ལན་གསུམ། འཁྲུངས་རབ་གསོལ་འདེབས་དང་བརྒྱུད་འདེབས་རྗེས། ཇ་མཆོད་སྡོམ་བརྩོན་དམ་པ། ཇ༽ དགེ་བསྐོས་ཀྱིས་ཇ་གནང་ཞུ། དེ་ནས། རང་ཉིད་སྐད་ཅིག་གིས་སོགས། ས་མཱ་ཛཿར་བསྡུ་རྒྱ། ཐལ་སྦྱར་བཅས། ན་མོ། བླ་མ་བདེ་གཤེགས་སོགས་གསང་འདུས་རྩ་གདངས། ལན་གསུམ་ནས་བསྐུལ་མཚམས་ཀྱིས། ན་མོ། བདག་གིས་འགྲོ་བ་སོགས་ [2a] གསུམ་དང་། ཡང་བསྐུལ་མཚམས་ཀྱིས། ཧཱུྃ་ཧྲཱིཿ གུ་རུ་ཡི་དམ་སོགས་རྩ་གདངས། རྒྱུད་བྱིན་གྱིས་བརླབས་པར་གྱུར། འདི་སྐབས་ལས་རྡོར་གྱིས་གྲལ་གཤམ་དུ་བགེགས་གཏོར་བཤམ། རཾ་ཡཾ་ཁཾ་ལ་ཆབ་བྲན། སྟོང་པའི་ངང་ལས༴ ཨོཾ་ཨཱཿཧཱུྃ་ཧོཿ ར་མཁའ་ལྡིང་རྒྱ། སློབ་དཔོན་ནས་རྡོ་དྲིལ་བཅས། སརྦ་བྷཱུ་ཏར་འགུགས་རྒྱ། སརྦ་བིགྷྣཱན་སོགས་པད་སྐོར་མཛོད་རྒྱ་སེ་གོལ་བཅས་ལན་གསུམ་མཐར། དུང་ཆེན་གྱིས་དྲངས་པའི་རོལ་བརྒྱ་བརྡུང་ནི། ཐང་གསུམ་ཟིལ་འབེབས་མཐར། སྦྲམ་སྦྲམ་ཐང་༡ཐང་༢ཐང་༣ཐང་ཟད་མཇུག་བིར་སྦྲམ་༡བྱས་ [2b] བིར་སྦྲམ་༢བྱས་བིར་སྦྲམ་༣བྱས་སྦྲམ་སྦྲམ་ཐང་༡ ༢ ༣ ༤ ༥ ༦ ༧ ༨ ༩ཐང་སྦྲམ་ཐང་ཟད་ནས་བིར་སོགས་གོང་དང་འདྲ་བ་ལན་གསུམ་མཐར་ཐིང་གང་ཆེ་བ་གསུམ་ནས་ཟིལ་འབེབས་སུམ་བརྡུང་འཇོག་མེད་ཀྱིས། ཧཱུྃ་ཧྲཱིཿ བླ་མ་རྣམས་སོགས་བདེ་གཤེགས་འདུས་གདངས་ལྡེམ་དབྱངས། མཁའ་འགྲོ་རྣམས་ནས་ལྷུག །དེ་བས་མ་འདུག་ལ་འཇགས་རོལ་ཟིལ་འབེབས་མཐར། སྦྲམ་སྦྲམ་བྱས་༡ ༢ ༣ བྱས་༡ ༢ བྱས་སྦྲམ་ཐང་ཟད་ནས། ང་ནི་ཡེ་ནས་མཚམས་གཅོད་རང་གདངས། ཚིག་གཉིས་རེའི་མཚམས་སུ་རོལ་མོ་གོང་བཞིན་མཐར་སྔགས་རོལ་འོག །ཧཱུྃ་ཧྲཱིཿ སྣང་སྲིད་འཁོར་འདས་སོགས་ལྷུ་གསུམ་ལྷུག་མཐར་སུམ་བརྡུང་འཇོག་ཡོད་ཀྱིས། ཧཱུྃ༔ ཆོས་དབྱིངས་རྣམ་དག་སོགས་བྱིན་འབེབས་འོག་མིན་ཆོས་དབྱིངས་རྟ། དུས་གསུམ་བདེ་གཤེགས་ནས་ལྷུག་མཐར་རྒྱུད་གསུམ་རོལ་མོ་ཟིལ་འབེབས་བཞག་རོལ། རཾ་ཡཾ་ཁཾ་ལ་ལས་ཆུ་འཐོར། བདག་གི་ཐུགས་ཀ་ནས། ཨརྒྷཾ་སོགས་ལ་པད་སྐོར་སེ་གོལ་མེད་པའི་རང་རྒྱ་དང་། ཤཔྡར་རོལ། སྨན་རཀ་གཏོར་གསུམ་སྔགས་ལན་གསུམ་རེ། ཐ༽ དེ་ནས་ཐིང་གསུམ་ཟིལ་འབེབས་མཐར། སྦྲམ་སྦྲམ་ཐང་༡ [3a] ཐང་༢ཐང་༣ཐང་བྱས་ཐང་༡ཐང་༢ཐང་བྱས་ཐང་ཟད་ནས། ཨོཾ་ཆོས་སྐུ་མི་འགྱུར་སོགས་ཚིག་གཉིས་རྩ་གདངས་ལྡེམ་དབྱངས། དང་པོ་ཆོས་རྣམས་ནས་ལྷུག་འདོན་དལ་ཆགས་པ། ཁྲོ་གཏུམ་གཟི་བརྗིད་ལྡན་པར་བསྐྱེད༔ ཅེས་རྔ་ཚག་གིས་བཞག །བསྐུལ་མཚམས་ཀྱིས། ཧཱུྃ་ཧྲཱིཿ དེ་ཡི་ཕྱི་རིམ་སོགས་ལྷུག་འདོན། ཆར་སྤྲིན་གཏིབས་པ་ལྟ་བུར་གྱུར༔ ཅེས་སུམ་བརྡུང་མཚམས་ཅན་འཇོག་མེད་དལ་བ་ནས། སྔོན་བསྐལ་མ་རང་གདངས་ལྡེམ་དབྱངས་ལྷུ་གཅིག་གཉིས་གང་རིགས། དེ་ནས་ལྷུག བསྐུལ་མཚམས་ཀྱིས། ཧཱུྃ་ཧྲཱིཿ རྣམ་དག་དབྱིངས་སོགས། གུ་རུ་རྣམ་དྲུག་གཤེགས་སུ་གསོལ༔ ཐང་༡ཐང་༢བྱས་ཐང་༡ཐང་༢ཐང་བྱས་ཐང་ནས་ཧཱུྃ་ཧྲཱིཿ བདེ་ཆེན་འབར་བའི་སོགས་རྩ་གདངས་རྩེ་ཕྲན་ཅན་ཚིག་གཉིས་མཚམས་སུ་རོལ་བཅས་ལྷུ་གཉིས་ནས་ལྷུག །བརླབ་ཕྱིར་གཤེགས་སུ་གསོལ༔ ཐང་༡ཐང་༢བྱས་ཐང་༡ཐང་༢ཐང་བྱས་ཐང་ནས་གནས་མཆོག་འདི་རུ་སོགས་བདེ་ཆེན་འབར་བའི་གདངས་འགེབས་ཀྱིས་རྫོགས་མཐར་ཟིལ་འབེབས་བཞག་རོལ་ཐོག་རྔ་སྦུག་གནས་སུ་འཇོག ། [3b] ཧཱུྃ་ཧྲཱིཿ རིན་ཆེན་ཕོ་བྲང་སོགས་ལྷུག་འདོན་བཅད་དལ། འདིར་ཇ་མཆོད་དུས་གསུམ་སངས་རྒྱས་མ། དེ་ནས་ཐལ་སྦྱར་བཅས། ན་མོ༔ སྐྱེ་འགགས་འགྱུར་མེད་ལ་རྫོགས་ཆེན་ཕྱག་འཚལ་གདངས། ཐིང་གསུམ་ཟིལ་འབེབས་སུམ་བརྡུང་འཇོག་མེད་ཀྱིས། ཕྱི་མཆོད་བླ་མ་ཡིདམ་ལྷ་ཆེན་ཚོགས་རྗེ་ཚོགས་བདག་འགེབས་པའི་ལྡེམ་དབྱངས། པཱུ་ཛ་ཧོཿ ཞེས་སུམ་བརྡུང་འཇོག་མེད་ཀྱིས། ནང་མཆོད་བླ་མ་ཡི་དམ་ལ་བཀའ་བརྒྱད་ཡང་དག་རྟོགས་པའི་གདངས། ཚིག་གཉིས་མཚམས་སུ་རོལ་བཅས་ལྷུ་བཞི། ཚིག་བསྟུན་རྐང་གླིང་དང་ཐོད་རྔ་འབུད་དཀྲོལ། དུག་གསུམ་སྐུ་གསུང་ནས་ལྷུག པཉྩ་པཱུ་ཛ་ཧོཿ ཞེས་སུམ་བརྡུང་འཇོག་མེད་ནས། གསང་མཆོད་བླ་མ་ཡི་དམ་ལ་དྲག་དམར་བསྐང་དབྱངས་གཉིས་མཚམས་རོལ་བཅས་ལྷུ་གཉིས། བདེ་བའི་རོ་སྙོམས་ནས་ལྷུག མ་ཧཱ་པཱུ་ཛ་ཧོཿ ཞེས་སུམ་བརྡུང་འཇོག་མེད་དལ་བ་ནས། སྨན་མཆོད་བླ་མ་ཡི་དམ་ལ་རྩ་གདངས་ལྡེམ་དབྱངས། ཁ་རཾ་ཁཱ་ཧི༔ ཞེས་རྔ་ཚག་གིས་བཞག །ཆོས་སྐུ་སྣང་བ་སོགས་སྨན་མཆོད་དབྱངས་རྟ་ལྡེམ་དབྱངས་ཆུང་བ། གར་དབང་ཕྲིན་ལས་ལ་བསྐུལ་མཚམས་སམ་ཡང་ན་དེ་ནས་ལྷུག་འདོན་རྔ་མེད། ཁྲག་མཆོད་བླ་མ་ཡི་དམ་ [4a] ནས་རྔ་ཆིངས། རཀྟ་ལ་ཁ་རཾ་ཁཱ་ཧིཿ ཞེས་སུམ་བརྡུང་འཇོག་མེད་ནས། རྗེ་བཙུན་བླ་མ་སོགས་ལ་ལྷ་ཆེན་བསྟོད་དབྱངས་ཆེ་བ། གདངས་མི་བཏང་ན་དེའི་བར་ལ་རོལ་མེད། སྤྲོ་དགའ་གནས་ཀྱི་མཆོད་པ་བཞེས༔ ཞེས་སུམ་བརྡུང་འཇོག་མེད་ནས། སྣང་བ་སྣོད་སོགས་ལྷ་ཆེན་རང་བྱུང་གདོད་ནས་དབྱངས་འགེབས་ཀྱིས་ལྡེམ་དབྱངས། དཔལ་གྱི་གཏོར་མ་ནས་ལྷུག །བདུད་རྩིར་བསྒྱུར་བའི་གཏོར་མ་ཆེན་པོ་འདིས༔ ཐང་༡ཐང་༢ཐང་བྱས་ཐང་༡ཐང་༢ཐང་བྱས་ཐང་ཟད། རྡོ་རྗེ་སློབ་དཔོན་རྩ་གདངས་ལྡེམ་དབྱངས་ལྷུ་གཉིས་ནས་ལྷུག་མཐར། བ་ལིཾ་ཏ་ཁཱ་ཧི༔ ཞེས་སུམ་བརྡུང་ཟིལ་འབེབས་བཞག་རོལ་ཐོག་རྔ་སྦུག་རང་གནས་སུ་འཇོག་དེ་ནས་ལེའུ་བདུན་མ། ཇ་ཆ༽ དཀོན་མཆོག་གསུམ་དངོས་སོགས་ཀྱིས་ཞོག་ཚོགས་གྲོལ། ༼ཚ་གུང་སྦྲེལ་མར་༽ བསྐང་གསོའི་མཆོད་བརླབ་ནས་ཕྱག་བཞི་པའི་དམ་བཞག ཇ༽ །མཆོད་མཇུག །རྡོར་ལེགས་ནས་དཀྱུས་བཞིན་ལས། རྗེས་འབྲང་གི་ཕུར་སྲུང་མཇུག་དགེ་བསྐོས་ཀྱིས་གུང་ཚིག་རྒྱལ་རྔ་བརྡུང་། བསམ་ལྷུན། འཛམ་གླིང་དག་པ། ཁྱོད་ལ་བསྟོད་ཅིང་མཇུག་བཞེས་ཐུག་མཆོད་ནས་ཡོན་སྦྱོང་ཆབ་བཀྱེས་ཏེ་གུང་ཚོགས་གྲོལ། ༼བར་ཆ་སྔ་མར་༽ [4b] ཚེ་རིང་མའི་མངོན་རྟོགས་ནས་བསྟོད་པའི་བར་དང་། གཡུ་སྒྲོན་མ་ནས་གཏེར་གཞིའི་མཇུག་བཟླས་པ་དང་། བསྐང་རྫས་བརླབ་ནས་བསྐང་བ་ཡོངས་རྫོགས་བཅས་ནར་འདེད་ལས་སོ་སོའི་མཐར་ཚེ་རིང་མའི་བཟླས་པ་དང་སྐོང་བའང་སྦྱར། ཞ༽ བཤགས་པ་ཕྲིན་བཅོལ་བར་བཏང་ནས་གྲོལ། ༼བར་ཆ་རྗེས་མར་༽ ལས་རྡོར་གྱིས་ཚོགས་ཞུས་བྱས་ནས། ཐིང་གསུམ་ཟིལ་འབེབས་སུམ་བརྡུང་འཇོག་མེད་དལ་བ་ནས། རང་ཉིད་ལྷ་ཡི་སོགས་སྔོན་བསྐལ་ལྡེམ་དབྱངས། རཾ་རཾ་ནས་ལྷུག །འགྲོ་ཀུན་མུན་པ་བསལ་བར་གྱུར༔ ཞེས་འཇགས་རོལ་ནས་བཞག་རོལ་གྱིས་རྔ་སྦུག་གནས་སུ་འཇོག །སྐབས་འདིར་ཚོགས་ཞིང་སྤྱན་འདྲེན་མི་དགོས་ཤིང་། འདི་སྐབས་ལས་རྡོར་རོལ་བཅས་ཀྱིས་མར་མེ་དང་སྤོས་རྣམས་སྦར་ཏེ་གཞུང་གྲལ་གཡས་གཡོན་ཀྱི་དབུ་མཛད་འོག་གསུང་ལེན་པ་ནས་མར་བརྩིས་པའི་ལྔ་པར་མེ་ཏོག་ནས་བཟུང་སྟེ་ཡར་བདུག་སྤོས་སོགས་ཉེར་སྤྱོད་རྣམས་ཕུལ་བར་གསུང་ལེན་པར་ཞལ་ཟས་ཕུལ། དེ་བཞིན་སུ་གཡོན་གྲལ་དུའང་ཕུལ་རྗེས་དབུ་མཛད་ལ་ཏིང་ཤག་ཕུལ་ནས། དུར་ཁྲོད་གསང་བ་སོགས་རྩ་གདངས། རྡོ་རྗེ་རྒྱལ་པོའི་ཕྱག་ན་ཌཱ་རུ་དང་བདུད་རྩིའི་བྷནྡྷ་བསྣམས། དགེ་བསྐོས་ཀྱིས་ [5a] སྤོས་བསྐོར། གསང་བའི་དཀྱིལ་འཁོར་སོགས་ལ་དབུ་མཛད་ཀྱིས་ཏིང་ཤག་བརྡུང་། མཐར་རུ་ལུ་ལན་བདུན་ལ་ཌཱ་རུ་བཅད་མ་བདུན་དཀྲོལ། ཀུན་གཞི་མ་བཅོས་སོགས་ལྷུག ཇ༽ །དེ་ནས་རོལ་བླངས་ཏེ་ཐིང་གསུམ་ཟིལ་འབེབས་སུམ་བརྡུང་འཇོག་མེད་ཀྱིས། དམ་རྫས་གཏོར་ཆེན་སོགས་དྲག་དམར་མཆོད་རྟ་ཚིག་གཉིས་མཚམས་རོལ་རེ། རྐང་གླིང་ཐོད་རྔ་སོ་སོའི་ཚིག་བསྟུན་འབུད་དཀྲོལ། ཞུན་ཆེན་སྣང་གསལ་ནས་ལྷུག །བསྐུལ་མཚམས་ཀྱིས། དམ་རྫས་རྒྱན་གྱི་སོགས་ལྷུག་མཐར་སུམ་བརྡུང་འཇོག་ཡོད་ཀྱིས། བདེ་བར་གཤེགས་སོ་སོགས་དྲག་དམར་ཚོགས་གདངས། དངོས་གྲུབ་སྩོལ༔ ཅེས་སུམ་བརྡུང་འཇོག་ཡོད་ནས། སྔོན་བྱུང་དུས་སོགས་གདངས་གོང་བཞིན། འདི་སྐབས་ལས་རྡོར་གྱིས་གཞུང་གྲལ་མཇུག་ཏུ་བྲུབ་ཁུང་གདན་བཅས་འགོད། ཉེ་ལོགས་སུ་ཤིང་ཁྲོལ་ཁེབས་ལྡན་ནང་ཐུན་སྣོད། ཕུར་བུ། སྒྲོལ་གྲི། གནམ་ལྕགས་རྡོ་རྗེ་མཐིང་ཁྲ་ཅན་བཅས་བཤམས། གོང་གི་ཚིག་མཇུག་སུམ་བརྡུང་ཟིལ་ནས་བཞག་རོལ་ནས། ན་མོ། རིག་འཛིན་རྩ་བརྒྱུད་སོགས་འགུགས་གཞུག་ལན་གཅིག་ལ་སློབ་དཔོན་ལས་རྡོར་གཉིས་ཀས་རྒྱ་བཅས་མཐར་དྲག་བརྡུང་ [5b] མཇུག་ལས་རྡོར་གྱིས་འཆམས་སྟབས་དང་འབྲེལ་བར་དགུ་བརྡུང་འཇོག་མེད་ཀྱིས། ཆེ་མཆོག་པདྨ་སོགས་རྩ་གདངས་འཆོལ་རྒྱག་འཆམས་བཅས་མཐར་ཟིལ་འབེབས་གློག་མ་འདྲ་བའི་དུས་སུ་ལས་རྡོར་གྱིས་ཐུན་བྲབ་པ་སོགས་ཚེ་ཁྲུས་ཀྱི་དགོངས་པས་བསྒྲལ་ལ་ཟིལ་མཐར་སུམ་བརྡུང་འཇོག་ཡོས་ཀྱིས། བླ་མ་ཡི་དམ་སོགས་དྲག་དམར་ཚོགས་གདངས་མཐར་སུམ་བརྡུང་འཇོག་བཅས་ཀྱིས། རྒྱུ་གཉིས་རྐྱེན་སྦྱར་སོགས་ལྷུག་འདོན་དལ་ཆགས་པའི་མཐར། སུམ་བརྡུང་ཐིང་གང་མ་དང་ཉིས་བརྡུང་ཐིང་གང་མ་ཤིན་ཏུ་དལ་བ་འཇོག་མེད་ནས། མ་བཅོས་སྤྲོས་བྲལ་སོགས་རྩ་གདངས་ལྡེམ་དབྱངས། པད་སྡོང་ནས་ལྷུག །རྡོ་རྗེ་ཐོད་ཕྲེང་རྩལ་ལ་ཕྱག་འཚལ་བསྟོད༔ ཧཱུྃ་ཧྲཱིཿ གུ་རུའི་ཐུགས་རྗེས་སོགས་བརྡ་བསྟོད་དང་། ཞི་བའི་ལས་མཛད་སོགས་ནར་འདེད་ཀྱིས། གུ་རུ་དྲུག་ལ་ཕྱག་འཚལ་བསྟོད༔ ཐང་༡ཐང་༢ཐང་བྱས་ཐང་༡ཐང་༢ཐང་བྱས་ཐང་ཟད་ནས། མ་ཆགས་སྐྱོན་གྱིས་སོགས་ནས་ཤཱཀྱ་སེང་གེའི་བར་གདངས་རོལ་འདྲ། ལྷུ་གཉིས་ལས་མི་བཏང་ན་ཤེས་བྱ་ཀུན་ནས་ལྷུག །ཤཱཀྱ་སེང་གེའི་སྐུ་ལ་བསྟོད༔ ཅེས་རྩེ་ཚག་གིས་བཞག །བསྐུལ་མཚམས་ [6a] ཀྱིས་སེང་རྡོར་གཉིས་གདངས་རོལ་ཉིས་བརྡུང་མཚམས་ཅན་འཇོག་བཅས་མཐར། ༡ ༢བྱས་ ༡ ༢ བྱས་ ཐང་༡ ཐང་༢ བྱས་ ཐང་༡ཐང་༢ཐང་བྱས་ཐང་སྣང་བ་འགགས་སོགས་གིང་བསྟོད་རྩ་གདངས། ཇ༽ སྲུང་མ་རྣམས་ལ་ཕྱག་འཚལ་བསྟོད༔ ཅེས་སུམ་བརྡུང་ཟིལ་འབེབས་འོག་ཡིག་བརྒྱའི་མཐར་བཞག་རོལ་གྱིས་རྔ་སྦུག་འཇོག །ཡང་གསང་བླ་མེད་སོགས་ཛཔྲ་བསྐུལ་ལྷུག་མཐར། ཐལ་སྦྱར་བཅས་ཀྱེ་ཀྱེ་བླ་མ་སོགས་རྩ་གདངས། འདྲེན་པའི་བླ་མར་ལྷུག་ནས། བཛྲ་གུ་རུ་སུམ་བརྒྱ་ལྔ་བརྒྱ་ཅི་རིགས་བཟླས་མཐར། བསྐུལ་མཚམས་ཀྱིས། བླ་མ་ཡུབ་ཡུམ་སོགས་རྩ་གདངས་ཐལ་སྦྱར། བྱིན་གྱིས་བརླབས་ནས་ལྷུག བསྐུལ་མཚམས་ཀྱིས། རང་ཉིད་དབང་ཆེན་སོགས་ལྷུག་འདོན་ནས་ཐོད་ཕྲེང་རྩལ་བརྒྱ་རྩ་ཙམ་དང་། བླ་མ་འོད་ཞུ་སོགས་ཀྱིས་ཧྲཱིཿམ་ཉེར་གཅིག་ཙམ་བཟླས་མཐར། རོལ་བླངས་ཏེ་ཐིང་གསུམ་ཟིལ་འབེབས་སུམ་བརྡུང་འཇོག་མེད་ཀྱིས། ཧཱུྃ༔ མ་གཡེལ་མ་གཡེལ་སོགས་དྲག་དམར་ཟོར་བསྐུལ་གདངས། རྗེ་བཙུན་པདྨ་ནས་ལྷུག །དངོས་གྲུབ་སྩོལ༔ ཅེས་རྔ་ཚག་གིས་ [6b] བཞག །བསྐུལ་མཚམས་ཀྱིས། ཧཱུྃ་ཧྲཱིཿ ལྷོ་ནུབ་རྔ་ཡབ་སོགས། འདི་སྐབས་གསོལ་ཚོགས་འབུལ་ཞིང་ལྷག་མ་བསྡུ། ཆབ་བཀྱེ། རྣམ་རྟོག་ཞི་བར་མཛོད༔ ཅེས་སུམ་བརྡུང་ཟིལ་འབེབས་བཞག་རོལ་གྱིས་གྲོལ། ༼དགོང་ཚོགས་ལ་༽ ཆ་གསུམ་ཤར་ཙམ་བཏང་རྗེས། ཇ༽ ཧྲཱིཿ རྣལ་འབྱོར་མཆེད་ལྕམ་སོགས་སྤྱི་གདངས་ཚིག་མཇུག་ལྷུག་མཐར། ཨོཾ་ཨཱཿཧཱུྃ་པཉྩ་སོགས། རོལ་ཐིང་གཅིག་ཟིལ་འབེབས་ལེན་གཅིག་ནས་ཉིས་བརྡུང་མཚམས་ཅན་འཇོག་བཅས་ཀྱིས། ཧཱུྃ་ཧྲཱིཿ དང་པོ་ཕུད་སོགས་གདངས་རོལ་སྤྱི་ལྟར་ལྷུ་གསུམ། ལྷག་མ་ཁ་ཆུས་ནས་ལྷུག །མཐར་འཇགས་རོལ་ཟིལ་འབེབས་བཞག་རོལ། དེ་རྗེས་བསྐང་གསོའི་གཏོར་འབུལ་ནས་ཤིས་བརྗོད་བར་སྤྱི་འགྲེ། ཤིས་བརྗོད་རོལ་ཟིལ་འབེབས་མཐར་ཉིས་བརྡུང་འཇོག་བཅས་ཀྱིས། ཧཱུྃ་བྷྱོ༔ སྔོན་ཚེ་འདས་དུས་སོགས་གདངས་རོལ་བཀའ་བརྒྱད་བཞིན་ལས། དེ་འོག་བར་ནས་ལྷུག །མཐར་དགུ་བརྡུང་འཇོག་བཅས་ནས། བྷྱོ༔ འཇིག་རྟེན་བོད་ཁམས་སོགས་བྱང་གི་གནམ་མཚོའི་དབྱངས། ཤ་མེད་གངས་དཀར་ནས་ལྷུག །མཐར་འཇགས་རོལ་གྱིས་ཟིལ་འབེབས་བཞག་རོལ་ཐོག་ཐང་ [7a] ཟད་ནས། ཧཱུྃ་ཧྲཱིཿ རྟ་ཡི་བརྟུལ་ཞུགས་སོགས་ལྡེམ་དབྱངས་ཀྱིས་དབྱངས་རྟ་ཆེ་བ། སྐུ་གསུང་ཐུགས་ནས་དབྱངས་རྟ་ཆུང་བ། དབང་ཆེན་གར་གྱི་ནས་རྔ་ཆིངས་བཅས་ལྷུག་མཐར། ཧུ་ལུ་ཧུ་ལུ་ཧཱུྃ་ཕཊ༔ ཅེས་སུམ་བརྡུང་འཇོག་མེད་ཀྱིས། ཧཱུྃ་ཧྲཱིཿ བླ་མ་ཡི་དམ་མཁའ་འགྲོ་ལ༔ ལྷ་རྫས་ཕྱི་མཆོད་སོགས་ལྷུག་ནས། སརྦ་པཱུ་ཛ་ཧོཿ ཞེས་སུམ་བརྡུང་འཇོག་མེད་ཀྱིས། ཧཱུྃ་ཧྲཱིཿ མ་བཅོས་སྤྲོས་བྲལ་སོགས་ཤློ་ཀ་གཅིག་མཐར་སུམ་བརྡུང་ཟིལ་འབེབས་བཞག་རོལ་གྱིས་རྔ་སྦུག་རང་གནས་སུ་འཇོག་ཐལ་སྦྱར་བཅས། ཧཱུྃ་ཧྲཱིཿ ཡང་གསང་བླ་མེད་སོགས་རྩ་གདངས། མཇུག་ལྷུག་ནས་དབྱངས་གསལ་སོགས་ལ་སློབ་དཔོན་གྱིས་དྲིལ་གསིལ། ཨ༔ སྐྱེ་མེད་ཆོས་སྐུའི་སོགས། ངང་དུ་བཞག །ཅེས་བསྐུལ་མཚམས་ཀྱིས། སླར་ཡང་བདག་ཉིད་སོགས། ཀཱ་ཝཱ་ཙི་ཨཱཿཧཱུྃ༔ བསྐུལ་མཚམས། ན་མོ༔ བདག་གིས་སོགས་དང་། ཡེ་དྷརྨ་ཐོག་དྲངས་ཏེ། ཞ༽ ཧྲཱིཿ ཆོས་སྐུ་ནམ་མཁའ་སོགས། འདི་རྣམས་ཐམས་ཅད་ཕོ་བྲང་དབུས་གདངས་སམ་རྩ་གདངས་ཁོ་ན་དང་། བཀྲ་ཤིས་ལ་དྲིལ་གསིལ་བཅས་མཐར་མཆོད་རོལ། དེ་རྗེས་དགོང་ [7b] ཐུན་ལ་དགེ་བསྐོས་ཀྱིས་རྒྱལ་རྔ་བརྡུང་། ལྷོ་ནུབ་རྔ་ཡབ་མ། ཇི་སྙེད་ཕན་བདེ། པདྨའི་རིང་ལུགས། བསླབ་གསུམ་འཕགས་ནོར། ཨེ་ཝཾ་ཟུང་འཇུག །དེ་ལྟར་འགྲུབ་པའང་སོགས་ཀྱིས་གྲོལ་ལོ། །༼ཚེས་དགུ་ལ་༽ དེས་འགྲེ་བ་ལས་དབྱངས་ལ་ཉིས་ཐེང་ཡོད་མེད་དང་། ལེའུ་བདུན་མའི་དབྱངས་རེས་མོས། གསོལ་ཁའི་དབྱངས་ཀྱི་གཏོང་ཁྱད་འོས་བསྟུན་འཕྲུལ་ཤེས་པར་བྱའོ། །༼ཚེས་བཅུ་ཉིན་༽ ནམ་ཞོག་སྔ་བར་བཞེངས་ནས་ཚོགས་སྔར་རྒྱུན་བཞིན་བཏང་ནས་སྣང་གྲགས་སོགས་ཀྱིས་གྲོལ། ཚོགས་ཆུང་ཞར་ལ་ཚུགས་ཏེ། ཚོགས་བྱིན་བརླབ་ནས་དཀྱུས་ལྟར་ལས། མཚན་བསྟོད་ཞི་བསྟོད་གཉིས་དང་། ཁྲོ་བསྟོད་གིང་བསྟོད་གཉིས་ལྷུ་གཉིས་མ་གཏོགས་ལྷུག་པའི་ཁྱད་ཙམ་ལས་གཞན་སྔར་དཀྱུས་བཞིན་ནར་འདེད། དུག་ལྔའི་རྣམ་རྟོག་མཇུག་རོལ་སུམ་བརྡུང་ཟིལ་འབེབས་ནས་བཞག་རོལ་ཐོག་རྔ་སྦུག་གནས་སུ་འཇོག ཡོན་སྦྱོང་སོགས་སྔར་བཞིན་གྱིས་གྲལ། ༼ ཚ་གུང་སྦྲེལ་མར་༽ ལེའུ་བདུན་མ། ཟངས་མདོག་དཔལ་རིར་དབྱངས་རྟ་སྐབས་གསོལ་སྡེར་བཀྲམ། དེ་རྗེས་སྤྲོས་བྲལ་བདེ་ཆེན་དབྱངས་རྟ། བསྐང་གསོའི་མཆོད་བརླབ་རྒྱས་པ། [8a] དམ་ཅན་སྤྱི་གཏོར། སྔགས་སྲུང་། ཚེ་རིང་མ། གཏེར་གཞི། བཟླས་དམིགས་བཅས་བཟླས་པ་གཉིས། བསྐང་རྫས་བྱིན་རླབས། བསྐང་བ་གཉིས། སྤྱི་བཤགས། ཕྲིན་བཅོལ་བར་བཏང་སྟེ་རོལ་བཞག །ནུབ་ཕྱོགས་བདེ་ཅན། འཛམ་གླིང་དག་པ་སོགས་ཀྱིས་གྲོལ། །༼བར་ཆར་༽ དུང་བརྡ་དང་གཉིས་ཕུལ། དུང་བརྡ་གསུངས་པའི་སྐབས་རྔ་གྲྭ་བ་རྣམས་འདུ་ཁང་དུ་ཕེབས་ནས། དང་པོ་རྐང་གླིང་པ་གཉིས། རྔ་པ་གཡོན་གཡས་རྣམས། དུང་པ་གཉིས་ཞྭ་ཟླ་གམ་བཞེས་ཤིང་སེར་སྦྲེང་གིས་འཆམས་རའི་རྔ་གྲལ་དུ་ཕེབས་ཏེ་བཞུགས་ནས། ཚིག་བདུན་གསོལ་འདེབས། སྦས་ཡུལ་ཆོས་ནོར། མི་མིན་རང་སྣང་། མཆོད་དཔོན་སྣམ་སྦྱར་བཅས་གྲལ་གཤམ་དུ་བགེགས་གཏོར་བཤམ། རང་ཉིད་སྐད་ཅིག་གིས་དབང་ཆེན་དཔའ་བོ་རྟ་མགྲིན་ཡབ་ཡུམ་གྱི་སྐུར་གྱུར། རཾ་ཡཾ་ཁཾ་ལ་ཆབ་བྲན། སྟོང་པའི་ངང་ལས་སོགས། སྔགས་བསྔོས་ལན་གསུམ་གྱི་རྗེས་སུ་དུང་ཆེན་གྱིས་དྲངས་པའི་རོལ་མོ་ཐིང་གསུམ་ཟིལ་འབེབས་བརྒྱ་བརྡུང་མཐར་ཟིལ་འབེབས་ནས་སུམ་བརྡུང་འཇོག་མེད་ཀྱིས། བླ་མ་རྣམས་སོགས་བཀའ་ [8b] བསྒོ་ལྡེམ་དབྱངས། མཁའ་འགྲོ་ནས་ལྷུག་མཐར་འཇགས་རོལ་རིང་བའི་ཐོག་དུང་རྐང་། མཆོད་དཔོན་གྱིས་སྔོན་གཏོར་ཕྱི་རོལ་དུ་འཕང་། ཆས་འཇུག་ཁང་ནས་སྤོས་ཕོར་གྱིས་སྣ་དྲངས་ཏེ་མཚམས་གཅོད་པ་རིམ་གྱིས་དོན་ནས་ལམ་འགྲོས་སོགས་དང་། ང་ནི་ཡེ་ནས་ཚིག་འཆམས་སྐབས་མཆོད་དཔོན་རོག་བཅས་ཀྱིས་ཐུན་གང་འགྱེད། ཚིག་མཚམས་རྫོགས་ནས་ཐུན་ཕྱིར་བརྡེག་ཅིང་ལྡོག་དུས་རྐང་དུང་དང་བཅས་ཆས་ཁང་དུ་ལྡོག་ཟིན་པ་དང་། དེ་རྗེས་རིམ་བཞིན་བྱིན་འབེབས། གསེར་སྐྱེམས། ཚོགས་ལེན། གིང་ཆེན། ཇཐ༽ བར་འདིར་རྔ་གྲྭ་བ་རྣམས་ཆབ་བསིལ་ལ་ཕེབས། མི་མ་ཡིན་ཆས་ཞུགས་སེར་སྦྲེང་སོགས་ཀྱིས་དྲངས་པའི་གུ་རུ་རིན་པོ་ཆེ། མཚན་བརྒྱད། མནྡྷ་ར་ཝ། མཚོ་རྒྱལ། མཁའ་འགྲོ་སྡེ་ལྔ། ཚངས་པ་བརྒྱ་བྱིན། བཀའ་དྲིན་ཅན་མའི་གར་པ་བཅས་སོ་སོའི་རོལ་དབྱངས་འཆམས་གར་གྱི་རྣམ་འགྱུར་མཐའ་དག་འཆམས་ཡིག་བཞིན་ལེགས་པར་ཟིན་ནས་ཡར་ལྡོག་སྟེ་གྲོལ། ༼དགོང་ཚོགས་ལ་༽ ལྷག་གཏོར་ནས་སྔར་རྒྱུན་བཞིན་ལས། བྲོ་བརྡུང་མཇུག་ཟིལ་འབེབས་བཞག་རོལ། ཧཱུྃ་ཧྲཱིཿ བདེ་མཆོག་བདེ་སྤྱོད་སོགས་རྩ་གདངས། [9a] ཕ་ལ་ཧོཿ ཞེས་རྔ་ཆིངས་ཀྱིས་བཛྲ་གུ་རུ་དང་། ཐོད་ཕྲེང་རྩལ་གཉིས་ཀའི་སྔགས་དབྱངས་ལན་གསུམ་རེའི་གསུམ་པར་འཆོལ་རྒྱག་མཐར་སུམ་བརྡུང་འཇོག་མེད་ཀྱིས་གཏང་རག་མཆོད་བསྟོད་ནས་བཀྲ་ཤིས་སོགས་རྗེས་ཀྱི་རྒྱུན་སྤྱོད་བར་སྔར་བཞིན་རྒྱས་པར་མཐའ་དབྱུང་བས་ལེགས་པར་གྲུབ་བོ། །ཞེས་པའང་རབ་བྱུང་བཅུ་དྲུག་པའི་མེ་ཁམས་ནོར་སྐྱོང་གི་ལོ་དབང་ཆེན་སྦྲེལ་ཟླའི་ཚེས་བཅུར་ཀོང་པོ་བུ་ཆུ་བདེ་ཆེན་སྟེང་དུ་ཚུལ་འདིའི་དུས་མཆོད་ཆེན་མོ་སྤྲོས་པའི་སྐབས་སུ་ཉེར་མཁོར་གྱུར་ཏེ་འཇིགས་བྲལ་ཡེ་ཤེས་རྡོ་རྗེས་ཟིན་བྲིས་སུ་བཏབ་པའོ།། །།