ཟབ་གསང་མཁའ་འགྲོའི་སྙིང་ཐིག་ལས༔ ཡང་ཁྲོས་མ་ཧཱ་ཀཱ་ལའི་བསྐུལ་བཟློག་རྡོ་རྗེའི་གད་མོ༔

Previous Text Back to Volume Page Next Text

Wylie title	zab gsang mkha' 'gro'i snying thig las: yang khros ma hA kA la'i bskul bzlog rdo rje'i gad mo:
Location	bdud 'joms gling pa zab gter Volume 3, Text 13, Pages 139-141 (Folios 1a1 to 2a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las yang khros ma hA kA la'i bskul bzlog rdo rje'i gad mo. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 139-141. Thimphu, Bhutan: Lama Kuenzang Wangdue, 2004.
Side notes	Recto: bskul zlog Verso: bdud 'joms rta mgrin yang khros
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Averting or Dispelling Rites- zlog pa · Invocations - bskul ba
Cycle	ཁྲོ་རྒྱལ་ཁམས་གསུམ་རོལ་པ་རྟ་མགྲིན་ཡང་ཁྲོས་ནག་པོ་ (khro rgyal khams gsum rol pa rta mgrin yang khros nag po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rta mgrin nag po
Colophon	ཞེས་པ་འདི་ཉིད་ཚུལ་ཁྲིམས་རྡོ་རྗེས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་པར་ཕབ་པའོ། །དགེའོ།།
Colophon	zhes pa 'di nyid tshul khrims rdo rjes nan du bskul ngor khrag 'thung bdud 'joms rdo rjes dag par phab pa'o/_/dge'o//

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ཡང་ཁྲོས་མ་ཧཱ་ཀཱ་ལའི་བསྐུལ་བཟློག་རྡོ་རྗེའི་གད་མོ་བཞུགས༔ ན་མོ་གུ་རུ་པདྨ་ཀ་ར་ཡེ༔ ཤ་ཁྲག་དམར་གཏོར་བཤམས་བྱས་ཏེ༔ དགྲ་བགེགས་འགུགས་གཞུག་བདུད་རྩིར་བསྒྱུར༔ ལྟ་བའི་གདིང་དང་ལྡན་པ་ཡིས༔ རྡོ་རྗེ་ཁྲོས་པའི་གད་མོ་བྱ༔ ཧཱུྃ་བྷྱོ༔ དུས་གསུམ་རྒྱལ་བ་ཀུན་གྱི་ཡེ་ཤེས་གསུང་༔ རྟ་སྐད་བཞད་པས་སྲིད་གསུམ་དབང་དུ་སྡུད༔ ལོག་རྟོག་མ་རུངས་བདུད་ཀྱི་སྡེ་ཚོགས་འཇོམས༔ དབང་ཆེན་ཁྲོས་པའི་རྒྱལ་པོ་རྟ་མགྲིན་རྒྱལ༔ དམར་ནག་གྲུ་གསུམ་མེ་ཡི་ཀློང་ནས་བཞེངས༔ སྙིང་རྗེའི་ཐུགས་ལ་འབར་བའི་ཕྱག་རྒྱ་ཡིས༔ མངོན་སྤྱོད་དྲག་པོའི་ཕྲིན་ལས་ཐོགས་མེད་སྒྲུབས༔ ཤེས་རབ་སྟོང་པ་ཡེ་ཤེས་ཕག་མོ་དང་༔ རྩ་གསུམ་འཁོར་ལོ་གསང་བ་གསུམ་གྱི་ལྷ༔ ཡ་མཱནྟ་ཀྲིཏ་པ་ཎི་ཁྲོ་བོའི་རྒྱལ༔ གང་འདུལ་ཐུགས་རྗེ་ཁྲོས་པའི་སྐུར་བཞེངས་ལ༔ མངོན་སྤྱོད་དྲག་པོའི་ཕྲིན་ལས་ཐོགས་མེད་སྒྲུབས༔ ཡེ་ཤེས་བཞི་དང་མཉམ་སྦྱོར་ཐུགས་རྡོ་རྗེ༔ ཡོན་ཏན་རཏྣ་གསུང་མཆོག་པདྨ་དང༔ ཕྲིན་ལས་ཀརྨ་རིགས་བཞི་ཁྲོ་བོའི་རྒྱལ༔ བུདྡྷ་བཛྲ་རིན་ཆེན་མ་ཆགས་པད༔ ལས་ཀྱི་རིགས་ཏེ་བྱ་ཁྱུང་ག་རུ་ཌ༔ ཡེ་ཤེས་གཅིག་ལ་རྣམ་པ་ཐ་དད་པ༔ རྣམ་འགྱུར་མ་ངེས་སྤྲུལ་པ་ཡང་སྤྲུལ་བཅས༔ དབྱིངས་ནས་སྐུར་བཞེངས་མངོན་སྤྱོད་ཕྲིན་ལས་མཛོད༔ ཚད་མེད་བཞི་ལྡན་སྒོ་སྐྱོང་སྲུང་མར་བཅས༔ ཡེ་ཤེས་ཁྲོས་པ་ཆེན་པོའི་སྐུར་བཞེངས་ཤིག༔ དཔལ་སྐྱེམས་དམ་རྫས་དམར་གྱི་གཏོར་མ་རོལ༔ སྤྲུལ་པའི་དམག་གིས་སྣང་སྲིད་གང་བར་མཛོད༔ གཟུགས་ཅན་གཟུགས་མེད་དགྲ་གདོན་བགེགས་ཀྱི་སྡེ༔ མ་གཡེལ་མ་འགྱངས་ཐལ་བའི་རྡུལ་བཞིན་རློགས༔ བྱད་ཕུར་རྦོད་གཏོང་ཆག་ཆེ་ཉམ་ང་ཟློག༔ མཐའ་དམག་དུས་འཁྲུག་སངས་རྒྱས་བསྟན་བཤིག་སྡེ༔ རྩྭ་ཕུང་སྐམ་ལ་མེ་དཔུང་མཆེད་པ་བཞིན༔ མངོན་སྤྱོད་དྲག་པོས་མིང་ཙམ་མེད་པར་མཛོད༔ སྔོན་གྱི་ཐུགས་བསྐྱེད་དམ་བཅའ་མ་གཡེལ་བར༔ བརྒྱུད་འཛིན་རྗེས་སུ་བཟུང་ལ་རྣམ་གཉིས་ཀྱི༔ དངོས་གྲུབ་འབྲས་བུ་དུས་འདིར་སྨིན་པ་དང་༔ ཆར་ཆུ་དུས་འབེབས་ལོ་ཕྱུགས་རྟག་ཏུ་ལེགས༔ བོད་ཁམས་བདེ་སྐྱིད་ཕུན་ཚོགས་དཔལ་ལ་སྦྱོར༔ བསྟན་དང་བསྟན་འཛིན་སྐུ་ཚེ་མཛད་ཕྲིན་འཕེལ༔ ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད༔ ཐུགས་དམ་དུས་ལ་བབ་བོ་ས་མ་ཡ༔ དེ་ལྟར་བསྐུལ་ཟློག་ཟབ་མོ་འདི༔ གང་གིས་ཉམས་ལེན་རྣལ་འབྱོར་ཀུན༔ མི་མཐུན་ཕྱོགས་ལས་རྣམ་པར་རྒྱལ༔ བཀྲ་ཤིས་དགེ་ལེགས་དཔལ་གྱིས་ཕྱུག༔ མཐུ་ཡིས་གྲགས་པས་ས་སྟེང་ཁྱབ༔ དོན་གཉིས་ཡིད་བཞིན་འགྲུབ་འགྱུར་རོ༔ བཀའ་སྲུང་དྲེགས་པའི་ཚོགས་ལ་གཉེར༔ ཐུབ་པར་སྲུངས་ཤིག་ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཉིད་ཚུལ་ཁྲིམས་རྡོ་རྗེས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་པར་ཕབ་པའོ། །དགེའོ།། །།