DJYD-KABUM-16-MA-014

Previous Text Back to Volume PageNext Text

Wylie title	zab lam mkha' 'gro'i thugs thig gi las byang bde chen 'dod 'jo
Location	bdud 'joms rin po che bka' 'bum Volume 16, Text 14, Pages 85-99 (Folios 1a1 to 8a5)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Zab lam mkha' 'gro'i thugs thig gi las byang bde chen 'dod 'jo. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 85-99. Kalimpong: Dupjung Lama, 1979-1985.
Side notes	Recto: las byang   Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Activity Manual - las byang
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)
Colophon	།ཅེས་པའང་ཆོས་ཀྱི་བདག་པོར་གྱུར་པའི་སྐལ་ལྡན་རྣམས་ཀྱི་ཉམས་བཞེས་འཇུག་པ་བདེ་བའི་ཕྱིར་རྩ་བའི་གཞུང་ལ་གསལ་བྱེད་ཁ་སྐོང་གིས་ཅུང་ཟད་བརྒྱན་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་ཉི་མའི་ལོ་མགོ་ཉ་བའི་ཤེས་རབ་ཀྱི་ཆའི་ཌཱ་ཀི་འདུ་བའི་དུས་བཟང་པོར་ངོ་མཚར་བསམ་རྒུ་འགྲུབ་པའི་གནྡྷོ་ལ་འོག་མིན་བདེ་བ་ཆེན་པོའི་ཕོ་བྲང་དུ་སྦྱར་བ་ཟུང་འཇུག་ཡེ་ཤེས་མཁའ་འགྲོ་མའི་གོ་འཕང་མངོན་དུ་བྱེད་པའི་རྒྱུར་གྱུར་ཅིག །སརྦ་དཱ་མངྒལཾ༎ །
	ces pa'ang chos kyi bdag por gyur pa'i skal ldan rnams kyi nyams bzhes 'jug pa bde ba'i phyir rtsa ba'i gzhung la gsal byed kha skong gis cung zad brgyan te/___rig pa 'dzin pa'i myu gu 'jigs bral ye shes rdo rjes nyi ma'i lo mgo nya ba'i shes rab kyi cha'i DA ki 'du ba'i dus bzang por ngo mtshar bsam rgu 'grub pa'i gan+d+ho la 'og min bde ba chen po'i pho brang du sbyar ba zung 'jug ye shes mkha' 'gro ma'i go 'phang mngon du byed pa'i rgyur gyur cig___/sarba dA mang+galaM//

Tibetan Text

[edit]

༄༅། །ཌཱ ཀྐི ག མྦྷི ར ས ཐཱ ཙི ཏྲ གཪྦྷ སྱ ཀ རྨ ཤུ དྡྷ མ ཧེ ཥྚ དོ ཧ ནེ ཏི སྨ། །

༄༅། །ཟབ་ལམ་མཁའ་འགྲོའི་ཐུགས་ཐིག་གི་ལས་བྱང་བདེ་ཆེན་འདོད་འཇོ་ཞེས་བྱ་བ་བཞུགས་སོ། །

༄༅། །ཨོཾ་སྭསྟི། མི་འགྱུར་སྟོང་ཉིད་མཛེས་མའི་ལང་ཚོ་ནི། །ཟུང་འཇུག་བདེ་ཆེན་རྡོ་རྗེར་ཆགས་པའི་གར། །རྣམ་པ་ཀུན་གྱི་མཆོག་ལྡན་མཚོ་རྒྱལ་མས། །ཡིད་ལ་ལྷན་སྐྱེས་དགའ་བའི་བཀའ་དྲིན་སྩོལ། །གང་གི་རྣལ་འབྱོར་དྲན་ཙམ་གྱིས། །གྲུབ་གཉིས་འདོད་རྒུར་འཇོ་མཐོང་ནས། །སྒྲུབ་ཅིང་མཆོད་པའི་ཐབས་ཀྱི་ཚུལ། །འཇུག་བདེའི་ཁྲིགས་སུ་བསྡེབས་ལ་སྤྲོ། །དེ་ཡང་ཟུང་འཇུག་མཆོག་གི་ཡེ་ཤེས་བདེ་བླག་ཏུ་བསྐྱེད་ཅིང་ལས་དང་དངོས་གྲུབ་ཐམས་ཅད་ཀྱི་རྩ་བར་གྱུར་པ་ནི་ཟབ་ལམ་མཁའ་འགྲོ་ཐུགས་ཀྱི་ཐིག་ལེའི་རྣལ་འབྱོར་འདི་ཁོ་ན་ཡིན་ཏེ། དེའི་ཚུལ་ཉམས་སུ་ལེན་པར་འདོད་པས། ཐོག་མར་ཇི་སྐད་དུ། དབེན་ཅིང་ཉམས་དགའ་བག་ཕེབས་ལ༔ མཁའ་འགྲོ་འདུ་བའི་གནས་རྣམས་སུ༔ ཞེས་དང་༔ མཚན་ཉིད་ལྡན་པའི་གནས་སུ་ཕྱིན༔ ས་ཡི་ཆོ་ག་ལ་སོགས་བྱ༔ དཀྱིལ་འཁོར་ [2a] བཞེངས་ཤིང་སྒྲུབ་རྫས་བཀྲམ༔ མཆོད་གཏོར་དམ་རྫས་བག་དྲོ་བཤམ༔ མཚན་ཉིད་དང་ལྡན་པའི་གནས་སུ་སྒྲུབ་པའི་ཁང་པ་བྱི་དོར་གྱིས་མཛེས་པར་བྱ། གང་དུ་བྱ་བའི་གཞི་དེར་གཏོར་མ་དཀར་དམར་གཉིས་བཤམ་ལ། རང་ཉིད་སྐད་ཅིག་གིས་བདུད་འདུལ་ཡེ་ཤེས་མཁའ་འགྲོའི་སྐུར་གྱུར་པར་མོས། རཾ་ཡཾ་ཁཾ་གིས་བསང་སྦྱང་། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར་པར་བསམ་ཞིང་། ཨོཾ་ཨཱཿཧཱུྃགིས་བྱིན་བརླབ། བྷུ་མི་པཱ་ཏི་ས་པ་རི་ཝཱ་ར་བཛྲ་ས་མཱ་ཛཿ ས་ཞིང་སྐྱོང་གཞི་བདག་རྣམས་སྤྱན་དྲངས། དཀར་གཏོར། སྠཱ་ན་པ་ཏི་ཀྵེ་ཏྲ་པཱ་ལཉྩ་ན་མ༔ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱ་སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་གན་ཁཾ་སྭཱ་ཧཱ། ཞེས་ལན་གསུམ་གྱིས་ཕུལ་ལ། [2b] གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་ཕྱོགས་འདི། །བདག་ཞུ་ཁྱེད་ཀྱིས་སྩལ་དུ་གསོལ། །ཅེས་པས་གནང་བ་བྱིན་ནས་རང་གནས་སུ་གཤེགས་པར་བསམ སརྦ་བྷུ་ཏ་ཨཱ་ཀཪྵ་ཡ་ཛཿས་ལན་ཆགས་ཀྱི་མགྲོན་རྣམས་བཀུག གཏོར་མ་གཉིས་པ། སརྦ་བིགྷྣཱཾན་ན་མཿ སརྦ་ཏ་ཐཱ་ག་ཏེ་བྷྱོསོགས་ནས་ གྲྀཧྞ་དཾ་བ་ལིཾ་ཏེ་སྭཱ་ཧཱ། ཞེས་ལན་གསུམ་གྱིས་བསྔོས་ལ། ཧཱུྃ༔ སྣང་སྲིད་དག་པ་རབ་འབྱམས་ལ༔ གཉིས་འཛིན་འཁྲུལ་པའི་མིང་ཡང་མེད༔ གློ་བུར་རྣམ་རྟོག་མ་རིག་བགེགས༔ བདག་མེད་ཆེན་པོར་མཚམས་བཅད་དོ༔ དྷརྨ་དྷཱ་ཏུ་རཀྵ་ཨ༔ ཞེས་ཚམ་རྔམས་དྲག་པོས་བསྐྲད་ནས་སྲུང་བའི་འཁོར་ལོས་བཅིངས་པར་བསྒོམ། དེ་ནས་དཀྱིལ་འཁོར་འདུ་བྱ་བ་ནི། ཇི་སྐད་དུ། ཚོང་དུས་དང་ནི་སྨད་འཚོང་དང་༔ ཕོ་མོ་ཉལ་པོ་བྱས་པའི་སས༔ སྟེགས་བུ་སྐྱེ་གནས་དབྱིབས་སུ་བརྩིག༔ ཅེས་པ་བཞིན་དངོས་སུ་བརྩིག་པའམ། ལག་ལེན་བདེ་ཁྱད་དེར་མོས་པའི་སྟེགས་བུ་མདའ་གང་གྲུ་བཞི་པར་བདུད་རྩི་ལྔ་དང་ཅུ་གང་སིནྡྷུ་ར་ཆ་དང་སྦྱར་བས་ཆག་ཆག་གདབ། དེའི་ཁར་རྡུལ་ཚོན་དམར་པོ་ཤས་ཆེ་བའི་ཆོས་འབྱུང་བསྣོལ་མ་ཕྱི་སྐོར་དུ་པད་ཕྲེང་རྡོ་ར་མེ་རི་རྣམས་ཀྱིས་བསྐོར་ཞིང་། ཆོས་འབྱུང་གི་ཟུར་དྲུག་ཏུ་དགའ་འཁྱིལ་དཀར་པོ་རེ་རེ། ལྟེ་བར་དགའ་བ་འཁྱིལ་བ་བྃ་ཡིག་གིས་མཚན་པའི་རྣམ་པར་བྲི་བ་ནི་འདོད་ཁམས་རྣམ་དག་སྐུ་སྤྲུལ་སྐུའི་དཀྱིལ་འཁོར། དེའི་དབུས་སུ་མཉྫིའི་ཁར་ཐོད་པ་དུམ་བུ་གཅིག་པའི་ནང་དུ་ཆོས་འབྱུང་བསྣོལ་མ་དགའ་འཁྱིལ་ས་བོན་དང་བཅས་པ་བྲིས་ལ་རླན་གྱིས་མི་འཇིག་པ་བྱས་པའི་ནང་ཆང་དང་མངར་གསུམ་ཆོས་སྨན་སྦྱར་བས་ [3a] བཀང་ལ་དར་དམར་བརྒྱད་ལྟེབ་ཀྱིས་ཁ་བཀབ་པ་ནི་གཟུགས་ཁམས་རྣམ་དག་གསུང་ལོངས་སྐུའི་དཀྱིལ་འཁོར། དེའི་སྟེང་དུ་མེ་ལོང་བདུད་རྩིས་བརླན་ཞིང་སིནྡྷུ་གསེང་རས་ཀྱིས་ཁྱབ་པར་བརྡལ་བ་ལ་ཐོད་ནང་གི་དཀྱིལ་འཁོར་ཇི་ལྟ་བ་བཞིན་བྲིས་པ་འགོད་པ་ནི་གཟུགས་མེད་གནས་དག་ཐུགས་ཆོས་སྐུའི་དཀྱིལ་འཁོར་ཏེ། དེར་སྨྱུག་མའི་སྒྲོམ་ལ་བརྟེན་པའི་དར་དམར་གྱི་གུར་ཕུབ། དཀྱིལ་འཁོར་གྱི་མཐའ་སྐོར་དུ་པདྨའི་སྣོད་ལ་སོགས་པར་གཏོར་མ་དམར་པོ་ཟླ་གམ་གྱི་དབྱིབས་ཅན་ཤ་ཆང་གིས་སྦྲན་པ། བདུད་རྩི། རཀྟ། ཆུ་གཉིས་ཉེར་སྤྱོད་ལྔ། གཞན་ཡང་དམ་ཚིག་གི་རྡོ་རྗེ་དྲིལ་བུ་ཐོད་རྔ་རྐང་གླིང་ཧསྟ་གསུར་ཆེན་སོགས་ཐུན་མོང་དང་ཁྱད་པར་གྱི་མཆོད་པ་མཁའ་འགྲོ་མཉེས་པའི་དམ་རྫས་སུ་འོས་པ་རྣམས་མཐོང་བ་བརྒྱུད་པའི་ལག་ལེན་བཞིན་དུ་བཤམ་པར་བྱ་བ་རྣམས་ནི་སྦྱོར་བའོ། །དེ་ནས་དངོས་གཞིའི་ཐོག་མར་སྐྱབས་སུ་འགྲོ་ཞིང་སེམས་བསྐྱེད་པ་ནི། སྒྲུབ་པ་པོ་བདེ་བའི་སྟན་ལ་ཁ་ནུབ་ཏུ་ཕྱོགས་པས་འཁོད་དེ། མདུན་གྱི་ནམ་མཁར་བླ་མ་དང་། །ཡེ་ཤེས་མཁའ་འགྲོ་དབྱེར་མེད་པ། །སྐྱབས་ཡུལ་ཀུན་འདུས་ངོ་བོར་བཞུགས། ། ༈ ན་མོ༔ རང་རིག་ཡེ་ཤེས་མཁའ་འགྲོ་མར༔ འདུ་འབྲལ་མེད་པར་སྐྱབས་སུ་མཆི༔ མ་རྟོགས་གཉིས་འཛིན་འཁྲུལ་པའི་བློ༔ རང་གྲོལ་ཆེན་པོར་སེམས་བསྐྱེད་དོ༔ ལན་གསུམ། ཚོགས་བསགས་པ་ནི། ཨ༔ ཀ་ངག་གཏིང་གསལ་མཁའ་འགྲོ་མར༔ ཆོས་ཉིད་མངོན་སུམ་མཐོང་བས་འདུད༔ ཉམས་སྣང་གོང་དུ་འཕེལ་བས་མཆོད༔ རིག་པ་ཚད་ལ་ཕེབས་པར་བཤགས༔ ཆོས་ཉིད་ཟད་ལ་རྗེས་ཡི་རང་༔ བརྗོད་མེད་ [3b] ཆོས་འཁོར་བསྐོར་བར་བསྐུལ༔ འཕོ་བ་ཆེན་པོར་བཞུགས་གསོལ་འདེབས༔ དགེ་ཚོགས་འོད་གསལ་དབྱིངས་སུ་བསྔོ༔ ཞེས་ཚོགས་བསགས་མཐར། ཚོགས་ཞིང་རང་ཐིམ་དབྱེར་མེད་དང་། །སྒྲིབ་དག་བྱིན་གྱིས་བརླབས་པར་གྱུར། །བྱིན་དབབ་པ་ནི། སྤོས་དང་རོལ་མོའི་བརྡས་བསྐུལ་ཏེ། ཨོཾ་ཨཱཿཧཱུྃ༔ ཨ་ལ་ལ་ཧོཿ ས་མ་ཡ་ཧོཿ ས་མ་ཡ་སྟྭཾ༔ ཨ༔ ངོ་བོ་སྟོང་པའི་ཞིང་ཁམས་ནས༔ ཆོས་སྐུའི་མཁའ་འགྲོས་བྱིན་ཕོབ་ཅིག༔ རང་བཞིན་གསལ་བའི་ཕོ་བྲང་ནས༔ ལོངས་སྐུའི་མཁའ་འགྲོས་བྱིན༴ ཐུགས་རྗེ་ཀུན་ཁྱབ་གཞལ་ཡས་ནས༔ སྤྲུལ་སྐུའི་མཁའ་འགྲོས༴ སྐྱེ་མེད་དགོངས་ཉམས་ཡ་ལ་ལ༔ འགགས་མེད་སྔགས་སྒྲ་དི་རི་རི༔ སྣང་བ་འཇའ་སྐུར་ལམས་སེ་ལམ༔ སྣང་སྲིད་གཞིར་བཞེངས་བྱིན་ཕོབ་ལ༔ གློ་བུར་འཁྲུལ་པའི་བར་ཆད་སོལ༔ འདུ་འབྲལ་མེད་པར་དབང་སྐུར་ཅིག༔ ཛྙཱ་ན་ཨ་བེ་ཤ་ཡ་ཨ༔ ཧཱུྃ་ཧཱུྃ་ཧཱུྃ༔ མཆོད་རྫས་བརླབ་པ་ནི། ཧཱུྃ༔ ཀུན་བཏགས་སྣ་ཚོགས་སྣང་བའི་ཆོས༔ ཡོངས་གྲུབ་མཆོད་པའི་ཕུང་པོ་ནི༔ ཀུན་ཏུ་བཟང་པོའི་སྒྱུ་འཕྲུལ་ལས༔ ནམ་མཁའ་ལྟ་བུར་འཛད་པ་མེད༔ བཛྲ་སྥ་ར་ཎ་ཁཾ༔ ཞེས་མཁའ་ཁྱབ་ཏུ་སྤེལ། དམ་ཚིག་གི་དཀྱིལ་འཁོར་གསལ་གདབ་པ་ནི། ཨ༔ མ་བཅོས་ཀ་དག་དེ་བཞིན་ཉིད༔ ལྷུན་གྲུབ་ཀུན་སྣང་སྙིང་རྗེའི་རྩལ༔ སོར་རྟོག་ཡེ་ཤེས་ཡི་ [4a] གེ་བྃ༔ མཁའ་ལ་འཇའ་ཚོན་བཞིན་དུ་ཤར༔ འོད་འཕྲོས་མ་དག་དངོས་འཛིན་སྦྱངས༔ སྣོད་བཅུད་བདེ་ཆེན་པདྨ་འོད༔ ངོ་མཚར་དག་པའི་གྲོང་ཁྱེར་དབུས༔ པདྨ་ཉི་ཟླའི་གདན་སྟེང་དུ༔ རང་ཉིད་ཡེ་ཤེས་མཚོ་རྒྱལ་མ༔ བདེ་སྟོང་དབྱེར་མེད་དཀར་དམར་མདངས༔ མཚན་དཔེའི་ལང་ཚོ་མཆོག་ཏུ་འབར༔ ཐིག་ལེ་ཉག་གཅིག་ཞི་འཛུམ་ཞལ༔ ཐབས་ཤེས་ཟུང་འཇུག་ཕྱག་གཉིས་ཀྱིས༔ བདག་རྟོག་རྩད་གཅོད་གྲི་གུག་དང་༔ དངོས་གྲུབ་མཆོག་སྩོལ་ཐོད་པ་འཛིན༔ ཞབས་གཉིས་མཉམ་པའི་སྟབས་ཀྱིས་བཞེངས༔ གཅེར་མོ་དར་དང་རིན་པོ་ཆེ༔ མེ་ཏོག་ཕྲེང་བ་དུ་མས་བརྒྱན༔ སྤྱི་བོར་ཐབས་མཆོག་རིགས་ཀྱི་བདག༔ པདྨ་གར་དབང་ཐོད་ཕྲེང་རྩལ༔ རྡོ་རྗེ་དྲིལ་འཛིན་ལོངས་སྐུའི་ཆས༔ འཇའ་འོད་ཟེར་ཐིག་ཀློང་དུ་བརྗིད༔ གདན་གསུམ་སྐུ་ཡི་བཀོད་པ་ལ༔ རྩ་གསུམ་རྒྱལ་བ་རབ་འབྱམས་ཀུན༔ མ་འདྲེས་ཏིལ་གོང་ཕྱུར་བཞིན་རྫོགས༔ གདོད་ནས་དག་མཉམ་ཆེན་པོར་གསལ༔ ཡེ་ཤེས་ཀྱི་འཁོར་ལོ་སྤྱན་དྲང་བ་ནི། ཐོད་རྔ་སོགས་རོལ་མོ་དབྱངས་དང་སྦྱར་ཏེ། ཧཱུྃ༔ བདེ་ཆེན་སྐྱེ་མེད་ཕོ་བྲང་ནས༔ རང་བྱུང་འགགས་མེད་མཁའ་འགྲོའི་ཚོགས༔ ཐུགས་རྗེས་གཟུགས་ཀྱི་སྐུར་བཞེངས་ལ༔ འདིར་གཤེགས་དབང་བསྐུར་བྱིན་ཆེན་ཕོབ༔ བཛྲ་ས་མཱ་ཛ༔ ཛཿཧཱུྃ་བྃ་ ཧོཿ ཞེས་གནས་གསུམ་གྱི་མཁའ་ [4b] འགྲོ་མ་ཐམས་ཅད་སྤྲིན་འཐིབས་པ་བཞིན་དུ་བྱོན་པར་བསམ་ལ༔ བཞུགས་སུ་གསོལ་ཞིང་ཕྱག་འཚལ་བ་ནི། ཧཱུྃ༔ དབྱིངས་ནས་སྤྱན་དྲངས་ཡེ་ཤེས་པ༔ སྒོ་གསུམ་རྡོ་རྗེའི་ངོ་བོར་བཞུགས༔ མཁའ་འགྲོ་སེམས་ཀྱི་སྒྱུ་འཕྲུལ་གར༔ ལྷན་ཅིག་སྐྱེས་ལ་ཕྱག་འཚལ་ལོ༔ ས་མ་ཡ་ཏིཥྠ་ལྷན༔ ན་མོ་ཧོཿ མཆོད་པ་འབུལ་བ་ནི། ཧོཿ ཡུལ་དྲུག་འདོད་ཡོན་བཀོད་པའི་ཆོས༔ སྣང་ཡང་འཛིན་པས་མ་བསླད་པར༔ ཡེ་གྲོལ་མཆོད་པའི་སྤྲིན་དུ་ཤར༔ བདེ་བ་ཆེན་པོའི་ངང་དུ་འབུལ༔ ཨོཾ་སརྦ་པཱུ་མེ་གྷ་ཨཱཿ ཧཱུྃ༔ ཡེ་ནས་མ་བཅོས་རིག་པའི་གཤིས༔ བདེ་ཆེན་མཁའ་འགྲོའི་རང་བཞིན་ཏེ༔ མངོན་སུམ་ལྷུག་པར་མཇལ་བའི་ངང་༔ ངོ་མཚར་ཆེན་པོས་ཕྱག་འཚལ་བསྟོད༔ བཟླས་པ་བྱ་བ་ནི། གསལ་བརྟན་དག་དྲན་དང་ལྡན་པས། ཐུགས་ཀར་ཉི་ཟླའི་གྭའུའི་སྦུབས༔ བྃ་མཐར་སྔགས་ཀྱི་ཕྲེང་བས་བསྐོར༔ འོད་འཕྲོས་བརྟན་གཡོའི་དངོས་ཀུན་ཁྱབ༔ སྣང་གྲགས་རྟོག་པའི་ཆོས་རྣམས་ཀུན༔ ལྷ་སྔགས་ཡེ་ཤེས་རོལ་པར་བལྟ༔ ཨོཾ་ཛྙཱ་ན་ཌཱ་ཀི་ནཱི་བྃ་ཧ་རི་ནི་ས་སིདྡྷི་ཧཱུྃ༔ ཞེས་བཟླས་པའི་སྐྱོན་ཐམས་ཅད་སྤང་ལ་ཏིང་ངེ་འཛིན་རྩེ་གཅིག་པས་བཟླ་བ་ནི་བསྙེན་པའོ། ། རང་གི་ཐུགས་ཀའི་སྔགས་ཕྲེང་ལས༔ འོད་ཟེར་མཆོད་པའི་ཚུལ་དུ་འཕྲོས༔ སྤྱི་བོའི་རིགས་བདག་ཐུགས་རྒྱུད་བསྐུལ༔ སྐུ་གསུང་ཐུགས་ཀྱི་དབང་བྱིན་ཀུན༔ འོད་ཟེར་བདུད་རྩིའི་རྣམ་པར་བསྡུས༔ རང་གི་གནས་བཞིར་ཐིམ་པ་ [5a] ཡིས༔ དབང་བསྐུར་རྣམ་བཞིའི་བྱེད་ལས་ཀྱིས༔ བདེ་ཆེན་ཡེ་ཤེས་ཉམས་སུ་མྱོང་༔ ཞེས་སྤྲོ་བསྡུའི་དམིགས་གནད་དང་སྦྱར་ཏེ་གོང་བཞིན་བཟླ་བ་ནི་སྒྲུབ་པའོ། ། ཐུགས་སྲོག་ལས་བྱུང་འོད་ཟེར་སྤྲིན། །ནམ་མཁའ་གང་བར་རབ་འཕྲོས་པས། །གང་འདུལ་ཞི་རྒྱས་དབང་དྲག་གི ། ཕྲིན་ལས་ཐམས་ཅད་སྒྲུབ་པར་གྱུར། །ཅེས་བསྒོམ་ལ་སྔགས་ཤམ་དུ། ནད་གདོན་སྡིག་སྒྲིབ་ཤཱིནྟཾ་ཀུ་རུ་སྭཱ་ཧཱ༔ ཚེ་བསོད་དཔལ་འབྱོར་པུཥྚིཾ་ཀུ་རུ་ཨོཾ༔ ཁམས་གསུམ་སྣོད་བཅུད་ཝཱ་ཤཾ་ཀུ་རུ་ཧོཿ གནོད་བྱེད་དགྲ་བགེགས་མཱ་ར་ཡ་ཕཊ༔ ཅེས་སོ་སོར་སྦྱར་ཏེ་བསྙེན་སྒྲུབ་ཀྱི་འགྲོས་བཞིན་བཟླ་བ་ལས་སྦྱོར་རོ། །ཐུན་མཚམས་སུ་གཏོར་མ་ལ་སྨན་རག་སྦྲན་ཅིང་། རཾ་ཡཾ་ཁཾ་གིས་བསང་། ཨོཾ་ཨཱཿཧཱུྃ་ཧོཿ ས་བྱིན་གྱིས་བརླབ། བསྙེན་སྔགས་མཐར། མ་ཧཱ་པཉྩ་ཨ་མྲྀ་ཏ་རཀྟ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་ནམ་གསུམ་གྱིས་ཕུལ་ལ། ཧཱུྃ༔ བདེ་ཆེན་རྡོ་རྗེ་མཁའ་འགྲོ་མ༔ སྐུ་གསུང་ཐུགས་དང་ཡེ་ཤེས་ལྔ༔ ཡོངས་རྫོགས་མཁའ་འགྲོ་ཀུན་གྱི་གཙོ༔ འཁོར་ལོས་སྒྱུར་བ་སྟོབས་ཆེན་མོ༔ དངོས་གྲུབ་ཕྲིན་ལས་ཀུན་གྱི་བདག༔ ཆོས་དབྱིངས་འོག་མིན་མཁའ་སྤྱོད་ཞིང་༔ ཨོ་རྒྱན་གནས་སུ་རྟག་ཏུ་བཞུགས༔ ཞིང་དང་སྐུ་ཡི་བཀོད་པའི་ཚོགས༔ རེ་རེ་ལ་ཡང་མཁའ་འགྲོ་འབུམ༔ གར་གྱི་རྣམ་འགྱུར་བསམ་ལས་འདས༔ འགྱུར་བ་མེད་པའི་མཁའ་འགྲོ་འབུམ༔ གསུང་ [5b] དབྱངས་ནམ་མཁའ་ཁྱབ་པ་ལ༔ ཚངས་པའི་གླུ་ལེན་མཁའ་འགྲོ་འབུམ༔ རྟོག་མེད་རྣམ་ཐར་གསུམ་དབྱིངས་ལས༔ ཐུགས་རྗེ་རོལ་པའི་མཁའ་འགྲོ་འབུམ༔ རྒྱན་དང་ཡོན་ཏན་ལོངས་སྤྱོད་ལས༔ བསམ་མི་ཁྱབ་པའི་མཁའ་འགྲོ་འབུམ༔ འགྲོ་བའི་དོན་མཛད་ཕྲིན་ལས་བཞི༔ ལྷུན་གྱིས་གྲུབ་པའི་མཁའ་འགྲོ་འབུམ༔ ཡེ་ཤེས་དང་ནི་ལས་ལས་གྲུབ༔ འཁོར་གྱི་མཁའ་འགྲོ་བྱེ་བ་འབུམ༔ ཀུན་ཀྱང་བདུད་རྩི་རཀྟ་དང་༔ འདོད་ཡོན་གཏོར་མའི་མཆོད་པ་བཞེས༔ ཕྱི་ནང་གསང་བའི་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཕྲིན་ལས་རྣམ་བཞི་མྱུར་དུ་སྒྲུབས༔ ཞེས་ཅང་ཏེའུ་སོགས་རོལ་མོའི་སྒྲ་དང་བཅས་པས་གཏོར་མ་ནམ་མཁར་འབུལ་ལོ། །དེ་ནས་ཁྱད་པར་གྱི་དམ་ཚིག་ཚོགས་ཀྱི་འཁོར་ལོས་མཆོད་པ་ནི། ཇི་སྐད་དུ། རྣལ་འབྱོར་ཕོ་མོ་དབེན་པར་ཚོགས༔ ཤིན་ཏུ་རྒྱན་གྱིས་བརྒྱན་ནས་སུ༔ མ་ད་ན་དང་བཱ་ལ་སོགས༔ དམ་ཚིག་རྫས་རྣམས་འདུ་བྱས་ལ༔ ཞེས་པ་ལྟར་དཀྱིལ་འཁོར་གྱི་སྣམ་ལོགས་སུ་དར་རས་ལ་ཆོས་འབྱུང་བསྣོལ་མ་དམར་པོ་བྲིས་པའི་ཁར་མ་ད་ན་སོགས་བཏུང་བའི་བྱེ་བྲག་དང་། དགའ་བ་འཁྱིལ་བ་དཀར་པོ་བྲིས་པའི་ཁར་བཱ་ལ་སོགས་བཟའ་བའི་དམ་རྫས་རྣམས་བཀོད། བདུད་རྩིས་བསང་གཏོར་བྱས་ལ། ཧཱུྃ༔ རང་རིག་རྩལ་ལས་རཾ་ཡཾ་ཁཾ༔ འཕྲོས་པས་ཚོགས་ཀྱི་ཉེས་སྐྱོན་སྦྱངས༔ བཟའ་བཏུང་ལོངས་སྤྱོད་དམ་ཚིག་རྫས༔ ཡེ་ཤེས་བདུད་རྩིའི་ངོ་བོར་གྱུར༔ ཨོཾ་ཨཱཿཧཱུྃ༔ ལན་གསུམ་གྱིས་བྱིན་བརླབ། ཚོགས་ཞིང་སྤྱན་དྲང་བ་ནི། སྤོས་ [6a] བཏུལ་ཞིང་ཐོད་རྔ་སོགས་རོལ་མོ་དབྱངས་དང་བཅས་པས། ཧཱུྃ༔ འོག་མིན་བདེ་ཆེན་པདྨ་འོད༔ ངོ་མཚར་ཞིང་ཁམས་བསམ་ཡས་ནས༔ ཡེ་ཤེས་མཁའ་འགྲོའི་ལྷ་ཚོགས་རྣམས༔ འདོད་ཡོན་ཚོགས་ཀྱི་འདུ་བར་གཤེགས༔ དབུ་སྐྲ་ཐོར་ཚུགས་ཤིགས་སེ་ཤིག༔ རུས་པའི་རྒྱན་ཆ་ཁྲ་ལ་ལ༔ དར་གྱི་ཅོད་པན་པུ་རུ་རུ༔ ཌཱ་རུ་ཅང་ཏེ་ཁྲོ་ལོ་ལོ༔ གཡེར་ཁ་དྲིལ་བུ་སི་ལི་ལི། བརྡ་སྐད་བཤུག་གླུ་ཀྱུ་རུ་རུ༔ འཁྲིལ་སྦྱོར་བདེ་ཉམས་གར་སྟབས་བསྒྱུར༔ རྡོ་རྗེའི་གླུ་དང་ཛཔྲ་དབྱངས་ལྡིར༔ ཐུགས་ཀྱི་དགོངས་པ་འོད་གསལ་དབྱིངས༔ རྣལ་འབྱོར་ཕོ་མོའི་འདུ་བ་ལ༔ ད་ལྟ་ཉིད་དུ་གཤེགས་སུ་གསོལ༔ ཚོགས་ཁང་རང་བཞིན་སྤྲུལ་པའི་ཞིང་༔ འདོད་ཡོན་རྡོ་རྗེའི་དམ་ཚིག་རྫས༔ ཅིར་སྣང་ལྷ་དང་སྔགས་ཀྱི་སྒྲ༔ ཡེ་ཤེས་ཆེན་པོར་བྱིན་ཕོབ་ཅིག༔ ཨེ་ཨ་རལླི་ཧྲཱིཾ་པྱྀཕེཾ་ཛཿ ཞེས་སྤྱན་དྲངས། ཚོགས་ཕུད་རིམ་པ་གསུམ་དུ་སྤྲོས་ཏེ། དང་པོ་མཆོད་པ་ནི། ཧོཿ སྣ་ཚོགས་སྣང་བ་ཕྱི་ཡི་ཚོགས༔ རང་བྱུང་འདོད་ཡོན་ནང་གི་ཚོགས༔ གཉིས་མེད་འཛིན་བྲལ་གསང་བའི་ཚོགས༔ བློ་འདས་གཉུག་མའི་ངང་དུ་འབུལ༔ གྷ་ཎ་ཙཀྲ་པཱུ་ཛ་ཧོཿ བར་པ་བཤགས་པ་ནི། ཨ༔ ཡེ་གྲོལ་ཕྱལ་པའི་དམ་ཚིག་ལ༔ འགལ་དང་བཤགས་བྱ་མི་དམིགས་ཀྱང་༔ གློ་བུར་ལྟར་སྣང་འཁྲུལ་པའི་སྒྲིབ༔ [6b] ཚོགས་ཀྱི་མཆོད་པས་བསྐང་ཞིང་བཤགས༔ ས་མ་ཡ་ཤུདྡྷེ་ཨ༔ ཐ་མ་བསྒྲལ་བསྟབ་ནི། ཚོགས་ཆ་གསུམ་པ་དེའི་འདོད་ཡོན་གྱི་ལྷ་མོ་རང་ལ་བསྡུས་ནས། ཎྲྀ་ཏྲི་བཛྲ་ཨངྐུ་ཤ་ཛཿཛཿཧཱུྃ་བྃ་ཧོཿ ས་དགྲ་བགེགས་བཀུག་ཅིང་བསྟིམ་སྟེ། ཧཱུྃ༔ གཟུང་འཛིན་རྟོག་པའི་རུ་དྲ་ཀུན༔ བདག་མེད་རིག་པའི་མཚོན་གྱིས་བསྒྲལ༔ མཉམ་པ་ཉིད་ཀྱི་དབྱིངས་སུ་བསྟབ༔ ཞེན་མེད་བདེ་བ་ཆེན་པོར་རོལ༔ ཨ་ཨ་ཨ༔ ཞེས་བསྒྲལ་ཞིང་སྟོབ། འདིར་ཐུགས་དམ་སྐོང་ཞིང་ཉམས་ཆག་བཤགས་པའི་རིམ་པ་གཞན་སྦྱར་བར་འདོད་ནའང་སྤྲོས་པས་ཆོག་གོ ། དེ་ནས་ལས་ཀྱི་རྡོ་རྗེས་ཐབས་ཤེས་ཀྱི་རྫས་རྣམས་ལག་པ་པདྨའི་གར་གྱིས་སྟོབ་ཅིང་། ལེན་པས་རྡོ་རྗེའི་གར་གྱིས་བླངས་ཏེ་བདེ་སྟོང་གཉིས་མེད་ཟུང་འཇུག་ཏུ་སྦྱོར་བའི་ཚུལ་གྱིས་འདོད་ཡོན་ལ་ཚིམས་པར་ལོངས་སྤྱད་དེ་ཉམས་སྦར། སྤྲོ་ན་རྡོ་རྗེའི་གླུ་ཡང་བྱ་སྟེ། འགྲོ་བ་ཀུན་ནི་མཆོག་ཏུ་དགའ་བའི་རང་བཞིན་ཏེ། །རྣལ་འབྱོར་མ་ནི་འཁོར་ལོའི་རང་བཞིན་དུ་གནས་ཀྱི། །ས་གསུམ་མ་ལུས་འགྲོ་བ་སངས་རྒྱས་ཀྱི་རང་བཞིན། །སྙིང་རྗེས་གཞོན་ནུ་མ་དང་ལྷན་ཅིག་རོལ་པར་བྱའོ། །གང་གིས་དོན་དམ་པ་ནི་མ་བསྒོམས་པར། །དེ་ཡིས་སངས་རྒྱས་ཉིད་ནི་ཐོབ་པ་མ་ཡིན་ནོ། །ནང་དང་ཕྱི་ནི་དབྱེ་བ་མེད་པར་ཤེས་པར་གྱིས། །འཇིག་རྟེན་ཐམས་ཅད་བསྒྲལ་བར་ནུས་པའོ། །ཞེས་པའི་ཤླཽ་ཀ་གཉིས་སོ་སོའི་མཐར། ཨ་རེ་གཏི་མུག་ཕྱུགས་ཀྱིས་མི་ཤེས་སོ། །ལྷན་སྐྱེས་མཛེས་མས་བླངས་ནས་བདེ་བ་ཆེ་ལ་མནོས། །ཞེས་དྲུག་འགྱུར་དུ་བླང་ངོ་། ལྷག་མ་གཏོང་བ་ནི། ཚོགས་ལ་རོལ་པའི་ལྷག་མ་བསྡུས་པའི་ཁར་ཕུད་ [7a] ལྷག་བསྣན་ལ་བདུད་རྩིའི་ཞལ་ཕྲུ་སྦྲེང་ཞིང་། ཨོཾ་ཨཱཿཧཱུྃ་བསམ། ཕེཾ་ཞེས་འབར་བའི་རྒྱས་ལྷག་མགྲོན་རྣམས་སྤྱན་དྲངས་ལ། ཀུན་སྣང་འདོད་ཡོན་ལྷག་གཏོར་འདི༔ ཀུན་རྟོག་ལྷག་སྡུད་མགྲོན་ལ་འབུལ༔ མ་རིག་འཁྲུལ་པར་གོལ་བའི་དཔུང་༔ གཞི་ལ་དག་པའི་ཕྲིན་ལས་མཛོད༔ ཨོཾ་ཨུཙྪིཥྚ་བ་ལིཾ་ཏ་ཁཱ་ཧི༔ ཞེས་ཕྱི་རོལ་དུ་འབུལ། མཁའ་འགྲོ་མ་ཡི་གྲོང་ཁྱེར་དུ། །ཚོགས་ཀྱི་འཁོར་ལོ་བསྐོར་བ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །ཅེས་སྨོན་ལམ་གྱི་རྒྱས་གདབ། འདིར་གཞུང་དུ་གཏོར་སྐྱོང་མི་འབྱུང་བས་མ་བཏང་ཀྱང་ཆད་པར་མི་འགྱུར་མོད། སྤྲོས་པ་ལ་དགའ་ན་རིགས་མཐུན་གྱི་ཆོ་ག་ལས་བླངས་ཏེ་བྱའོ། །དེ་ནས་དངོས་གྲུབ་བླང་བ་ནི། ཧོཿ ཡེ་ཤེས་མཁའ་འགྲོའི་གསང་གསུམ་གྱི༔ དངོས་གྲུབ་བདུད་རྩིའི་དབྱིག་ཆེན་པོ༔ སྒྲུབ་མཆོག་བདག་ལ་སྩལ་ནས་ཀྱང་༔ སྒོ་གསུམ་རྡོ་རྗེར་སྨིན་གྲོལ་མཛོད༔ འགྱུར་མེད་སྐུ་ཡི་དཀྱིལ་འཁོར་ནས། །རྡོ་རྗེ་ཚེ་ཡི་དངོས་གྲུབ་སྩོལ། །འགགས་མེད་གསུང་གི་དཀྱིལ་འཁོར་ནས། །མི་ཤིགས་དབྱངས་ཀྱི་དངོས་གྲུབ་སྩོལ། །འཁྲུལ་མེད་ཐུགས་ཀྱི་དཀྱིལ་འཁོར་ནས། །འོད་གསལ་མཆོག་གི་དངོས་གྲུབ་སྩོལ། །བསམ་ཡས་ཡོན་ཏན་དཀྱིལ་འཁོར་ནས། །འདོད་འབྱུང་ཡིད་བཞིན་དངོས་གྲུབ་སྩོལ། །ཐོགས་ [7b] མེད་ཕྲིན་ལས་དཀྱིལ་འཁོར་ནས། །གང་འདུལ་འགྲོ་དོན་དངོས་གྲུབ་སྩོལ། །ཐུན་མོང་ལས་བཞིའི་དངོས་གྲུབ་སྩོལ། །ཁྱད་པར་དབང་བཅུའི་དངོས་གྲུབ་སྩོལ། །བླ་མེད་མཆོག་གི་དངོས་གྲུབ་སྩོལ། །སརྦ་སིདྡྷི་ཕ་ལ་ཧོཿ ཞེས་བསྐུལ་ཏེ་ཀ་པཱ་ལའི་བདུད་རྩི་རོལ། མེ་ལོང་གི་སིནྡྷུ་ཕྱིས་ཏེ་སྙིང་གར་ཐིག་ལེ་བྱའོ། །སླར་ཡང་གཏང་རག་གི་དོན་དུ་མཆོད་ཅིང་བསྟོད་ནས། ནོངས་པ་བཤགས་པ་ནི། ཧོཿ ཡེ་ཤེས་མཁའ་འགྲོའི་དཀྱིལ་འཁོར་དུ༔ མཆོད་དང་ཏིང་འཛིན་ཕྲིན་ལས་སོགས༔ ཚུལ་བཞིན་མ་བགྱིས་ནོངས་པ་ཀུན༔ འོད་གསལ་གཉུག་མའི་ངང་དུ་བཤགས༔ ཨ་ཨ་ཨ༔ རྟག་ཆད་ཀྱི་མཐའ་བསལ་བ་ནི། ཧོཿ རིག་པ་རང་ཤར་མཚན་མའི་ལྷ༔ གཉིས་མེད་བློ་འདས་ཆེན་པོར་བརྡལ༔ སླར་ཡང་ཟུང་འཇུག་སྒྱུ་མའི་རྩལ༔ སྣོད་བཅུད་ཡེ་ཤེས་རོལ་པར་ཤར༔ ཨོཾ་ཨཱཿཧཱུྃ༔ ཞེས་སྒོ་གསུམ་མཁའ་འགྲོའི་སྐུ་གསུང་ཐུགས་ཀྱི་ཕྱག་རྒྱར་རྒྱས་གདབ། དགེ་བ་བསྔོ་བ་ནི། ཧོཿ དུསགསུམ་བསགས་པའི་དགེ་ཚོགས་ཀུན༔ དམིགས་མེད་མཐའ་བྲལ་ཀློད་དུ་བསྔོ༔ ཁམས་གསུམ་འཁོར་བའི་སེམས་ཅན་ཀུན༔ བདག་མཉམ་ཆེན་པོར་སངས་རྒྱས་ཤོག༔ ཤིས་པར་བྱ་བ་ནི། རྩ་གསུམ་མཁའ་འགྲོའི་བྱིན་རླབས་མཐུས༔ བདག་ཅག་སྒྲུབ་མཆོག་འཁོར་བཅས་ཀྱི༔ འགལ་རྐྱེན་ཀུན་ཞི་བསམ་དོན་འགྲུབ༔ འགྲོ་ཁམས་དོང་སྤྲུགས་བཀྲ་ཤིས་ཤོག །ཅེས་མེ་ཏོག་གི་ཆར་དབབ་པས་ཀུན་ཏུ་བདེ་ལེགས་ཀྱིས་ཡོངས་སུ་ཁྱབ་པར་བྱའོ། །ཚུལ་དེ་ལྟ་བུའི་སྒོ་ནས་ཉམས་སུ་བླངས་ [8a] པའི་ཡོན་ཏན་ནི། ཇི་སྐད་དུ། དེ་ལྟར་སྦྱོར་དངོས་རྗེས་གསུམ་གྱི༔ ངེས་རྫོགས་ཉམས་སུ་བླང་བ་ན༔ བླ་མེད་འབྲས་བུ་ཐོབ་པར་འགྱུར༔ མོས་སྒོམ་བསྙེན་སྒྲུབ་ཙམ་བགྱིས་ཀྱང་༔ དངོས་གྲུབ་སྣ་རེ་ངེས་པར་ཐོབ༔ ཚུལ་མཐུན་ཚོགས་འཁོར་རེ་རེ་ཡིས༔ ལམ་རྟགས་ཡོན་ཏན་གོང་དུ་སྤར༔ རྗེས་མཐུན་དག་པའི་མཆོད་པ་ཡིས༔ ཉམས་པ་སྐོང་ཞིང་ཚོགས་ཆེན་རྫོགས༔ དེར་འདུས་སྡིག་པ་ཀུན་བྱང་ནས༔ ཐར་པའི་འབྲས་བུ་ཐོབ་པར་འགྱུར༔ དད་མེད་ཉམས་པ་རྣམས་ལ་མིན༔ ཤིན་ཏུ་མོས་པས་ཉམས་པའང་གསོ༔ དངོས་གྲུབ་སྣོད་དུ་འགྱུར་བར་ངེས༔ ཞེས་གདམས་པ་ནི་མི་བསླུ་བའི་ཚད་མ་ཉིད་དུ་ངེས་པའོ། །ལྷན་ཅིག་སྐྱེས་མའི་ཉེ་རྒྱུ་གང་། །མྱུར་བདེའི་འཇུག་ངོགས་གཅིག་པུ་སྟེ། །དེ་ཡི་ཐབས་ཚུལ་སྙིང་པོའི་བཅུད། །སྐལ་བཟང་འདོད་འཇོའི་དཔྱིད་དུ་ཕྱེས། །དགའ་བཞིས་རྣམ་པར་རྩེན་པ་འོག་མིན་ཞིང་། །མཁའ་སྤྱོད་གྲོང་ཁྱེར་མཛེས་པའི་དོ་ར་རུ། །ཤེས་རབ་དགའ་མས་བདག་སོགས་མདུན་བསུས་ཏེ། །ཧེ་རུ་ཀ་དང་ལྷན་ཅིག་གར་བྱེད་ཤོག །ཅེས་པའང་ཆོས་ཀྱི་བདག་པོར་གྱུར་པའི་སྐལ་ལྡན་རྣམས་ཀྱི་ཉམས་བཞེས་འཇུག་པ་བདེ་བའི་ཕྱིར་རྩ་བའི་གཞུང་ལ་གསལ་བྱེད་ཁ་སྐོང་གིས་ཅུང་ཟད་བརྒྱན་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་ཉི་མའི་ལོ་མགོ་ཉ་བའི་ཤེས་རབ་ཀྱི་ཆའི་ཌཱ་ཀི་འདུ་བའི་དུས་བཟང་པོར་ངོ་མཚར་བསམ་རྒུ་འགྲུབ་པའི་གནྡྷོ་ལ་འོག་མིན་བདེ་བ་ཆེན་པོའི་ཕོ་བྲང་དུ་སྦྱར་བ་ཟུང་འཇུག་ཡེ་ཤེས་མཁའ་འགྲོ་མའི་གོ་འཕང་མངོན་དུ་བྱེད་པའི་རྒྱུར་གྱུར་ཅིག །སརྦ་དཱ་མངྒལཾ༎ །།