TTDL-ZABTER-05-CA-047

Previous Text Back to Volume PageNext Text

Wylie title	rig 'dzin snying gi yang thig las: thugs sgrub bdud kyi dpung 'joms rdo rje'i phreng ba las: gsang sgrub rdo rje'i rgya can:
Location	bdud 'joms gling pa zab gter Volume 5, Text 47, Pages 453-461 (Folios 1a1 to 5a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Rig 'dzin snying gi yang thig las thugs sgrub bdud kyi dpung 'joms rdo rje'i phreng ba las gsang sgrub rdo rje'i rgya can. In Sprul pa'i gter chen bdud 'joms gling pa'i zab gter gsang ba'i chos sde, Vol. 5: 453-461. Thimphu, Bhutan: Lama Kuenzang Wangdue, 2004.
Side notes	Recto: gsang sgrub   Verso: bdud 'joms phur pa
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	རིག་འཛིན་སྙིང་གི་ཡང་ཐིག་ (rig 'dzin snying gi yang thig)
Deity	rdo rje phur pa
Colophon	ཞེས་པ་འདི་ཁྲག་འཐུང་བདུད་འཇོམས་རྡོ་རྗེས་ཤྭ་བྲག་རྡོ་རྗེ་ནས་གདན་དྲངས་ཏེ་མི་ལོ་སུམ་ཅུ་རྩ་བརྒྱད་བར་དུ་བཀའ་རྒྱ་བྱས་མཐར།ཀུན་དཔལ་དང་རིག་དགའ་དབང་ཕྱུག་འབྱུང་གནས་རྣམས་ཀྱིས་བསྐུལ་ངོར་རྫ་རྒྱལ་རྡོ་རྗེ་འཕན་པོའི་ཉེ་འདབས་སུ་དག་པར་ཕབ་པའི་ཡི་གེ་པ་ནི་ཀུན་བཟང་ཆོས་གྲགས་ཀྱི་བགྱིས་པ་ཡོངས་ལ་དགེ་བར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di khrag 'thung bdud 'joms rdo rjes shwa brag rdo rje nas gdan drangs te mi lo sum cu rtsa brgyad bar du bka' rgya byas mthar/kun dpal dang rig dga' dbang phyug 'byung gnas rnams kyis bskul ngor rdza rgyal rdo rje 'phan po'i nye 'dabs su dag par phab pa'i yi ge pa ni kun bzang chos grags kyi bgyis pa yongs la dge bar gyur cig_/dge'o/_/dge'o/_/dge'o/_/sarba mang+ga laM//

Tibetan Text

[edit]

༼བྗྂ༽༔ རིག་འཛིན་སྙིང་གི་ཡང་ཐིག་ལས༔ ཐུགས་སྒྲུབ་བདུད་ཀྱི་དཔུང་འཇོམས་རྡོ་རྗེའི་ཕྲེང་བ་ལས༔ གསང་སྒྲུབ་རྡོ་རྗེའི་རྒྱ་ཅན་བཞུགས་སོ༔

༼བྗྂ༽༔ (བརྡ་ཡིག་) གུ་རུ་པདྨ་འབྱུང་གནས་ལ་ཕྱག་འཚལ་ལོ༔ ཐུགས་སྒྲུབ་རྡོ་རྗེའི་ཡང་གསང་བཅུད༔ ཉམས་སུ་ལེན་པའི་རིམ་པ་ལ༔ ཆོས་བརྒྱད་ལས་དབེན་སྐྱེད་ཚལ་དུ༔ ཉེར་མཁོའི་ཡོ་བྱད་འཛོམ་བྱས་ཏེ༔ བདེ་ཞིང་ཁོད་སྙོམས་གདན་འོག་ཏུ༔ འཁོར་ལོ་རྩིབས་བརྒྱད་ལྟེ་བ་རུ༔ ཨེ་ཡིག་བྲིས་ཏེ་ཕྱོགས་མཚམས་ཀྱི༔ རྩིབས་ལ་སྡེ་བརྒྱད་སྲོག་ཡིག་ནི༔ མདུན་ནས་བརྩམས་ཏེ་འདི་སྐད་དུ༔ ཨཿ ཡཿ མཿ དུཿ རུཿ ཙཿ ཤཿ ནཿ ཞེས་བྲི༔ རྩིབས་ཀྱི་རྩེ་རུ་ཕྱོགས་བཞིར་ཕོ་གདོན་གྱི་གཟུགས་བཞི༔ མཚམས་བཞིར་མོ་གདོན་གྱི་གཟུགས་རྣམས་མགོ་ནང་དུ་བསྟན་ཏེ་རྩིབས་རྩེས་སྤྱི་བོར་ཟུག་པ་བྲི༔ མཐར་གྲི་གསུམ་གསུམ་རིམ་མེ་རི་འབར་བ་བྱ༔ དེ་ཡི་སྟེང་དུ་སྟོབས་ཆེན་མ་ཧཱ་བཱ་ལ་ཁ་ཐུར་དུ་སྦུབས་ཏེ་མགོ་ཕྱིར་བསྟན་ནས་བཞག༔ མདུན་དུ་འབྲུ་ཡི་ཚོམ་བུ་བཀོད་པའི་སྟེང་དུ་འབྲལ་མེད་ཀྱི་རྟེན་ཅིག་བཙུགས༔ མཐར་བསྐོོར་དུ་མཆོད་རྫས་ཅི་རིགས་བཤམ༔ དེ་ནས་སྒྲུབ་པ་ལ་སྐྱབས་འགྲོ་དང་སེམས་བསྐྱེད་སྔོན་དུ་བཏང་ལ༔ ཡུལ་གསུམ་གྱི་བག་ཆགས་སྦྱོང་བ་རྟེན་དང་བརྟེན་པའི་དཀྱིལ་འཁོར་བསྒོམ་པ་ནི༔ ཨ༔ སྣང་ཞིང་སྲིད་པའི་ཆོས་རྣམས་ཀུན༔ རྣམ་ཐར་གསུམ་ལྡན་སྟོང་པ་ཉིད༔ སྟོང་པའི་རང་རྩལ་ཐུགས་རྗེའི་ཤུགས༔ འཁོར་བ་ཡོངས་སྒྲོལ་དཔལ་དུ་ཤར༔ རྩལ་ལས་ཡེ་ཤེས་སྙིང་པོ་ཧཱུྃ༔ རྟེན་དང་བརྟེན་པའི་རྒྱུ་རུ་ཤར༔ ཧཱུྃ་ལས་ཡེ་ཤེས་ལྔ་ཡི་གདངས༔ འོད་འཕྲོས་འབྱུང་བ་རིམ་བརྩེགས་སྟེང་༔ བདེ་ཆེན་དྲག་པོའི་ཞིང་ཁམས་སུ༔ ཡེ་ཤེས་བསྐལ་བའི་མེ་ལྟར་འབར༔ བསྲུང་བའི་འཁོར་ལོ་རིམ་ལྔའི་དབུས༔ སྐུ་ལྔ་ལྷུན་རྫོགས་གཞལ་ཡས་ཁང་༔ ཚད་དང་མཚན་ཉིད་རྫོགས་པའི་དབུས༔ པདྨ་དང་ནི་ཉི་ཟླའི་སྟེང་༔ རང་རིག་ཧཱུྃ་གི་འཕྲོ་འདུ་ལས༔ རྒྱལ་བ་མཆོད་ཅིང་འཁོར་བ་བསྒྲལ༔ ཚུར་འདུས་སྣང་སྟོང་དབྱེར་མེད་ལྷ༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་མཐིང་ནག༔ ཞལ་གདངས་ལྗགས་འདྲིལ་མཆེ་བ་གཙིགས༔ སྤྱན་དགུ་སྡང་མིག་གཡོ་ཞིང་འཁྲུགས༔ ཁྲོ་གཉེར་ཆུ་ཡི་རླབས་བཞིན་སྡུད༔ དབུ་སྐྲ་ཁམ་ནག་མེ་ལྟར་འབར༔ སྨ་ར་སྨིན་མ་མེ་སྟག་འཕྲོ༔ གཡས་གཉིས་གསེར་གྱི་རྡོ་རྗེ་ནི༔ རྩེ་དགུ་དང་ནི་རྩེ་ལྔ་ཕྱར༔ གཡོན་གཉིས་ཁ་ཊྭཱྃ་མེ་དཔུང་བསྣམས༔ མཐའ་གཉིས་རི་རབ་ཕུར་པ་འདྲིལ༔ རྡོ་རྗེ་རིན་ཆེན་གཤོག་པ་གདེངས༔ ཞབས་གཉིས་བདུད་དང་དམ་སྲི་གནོན༔ དུར་ཁྲོད་ཆས་བརྒྱད་རྒྱན་དུ་རྫོགས༔ སྐུ་དབུས་རྩ་མཆོག་དབུ་མའི་སྦུབས༔ བདེ་ཆེན་འཁོར་ལོར་པད་ཉིའི་སྟེང་༔ འཇམ་དཔལ་ནག་པོ་རལ་གྲི་དང་༔ གཡོན་པས་བརྒྱད་སྟོང་གླེགས་བམ་བསྣམས༔ ཁྲོ་གཏུམ་རྔམས་བརྗིད་ཕྱེད་སྐྱིལ་བཞུགས༔ ཡེ་ཤེས་མེ་དཔུང་འབར་ཀློང་དུ༔ འཆི་བདག་ཟིལ་གྱིས་གནོན་པར་བསྐྱེད༔ མགྲིན་པར་པདྨ་འདབ་བཞིའི་དབུས༔ ཉི་སྟེང་རྟ་མགྲིན་དམར་པོ་ནི༔ ཕྱག་གཡས་དབྱུག་ཏོ་གཡོན་ཞགས་པ༔ ཞབས་གཉིས་གྱད་ཀྱི་འདོར་སྟབས་བགྲད༔ ཁྲོ་ཚུལ་རྫོགས་ཤིང་མེ་དཔུང་འབར༔ ཀླུ་གདོན་ཟིལ་གྱིས་གནོན་པར་བསྐྱེད༔ ཆོས་ཀྱི་འཁོར་ལོར་པད་ཉིའི་སྟེང་༔ གསང་བདག་རྡོ་རྗེ་སྲིན་པོ་མཐིང་༔ རྡོ་རྗེ་གཡས་ལ་སྡིགས་མཛུབ་གཡོན༔ ཞབས་གཉིས་གྱད་ཀྱི་འདོར་སྟབས་བགྲད༔ ཁྲོ་བོའི་ཆས་དང་ཚུལ་ཀུན་རྫོགས༔ སྡེ་བརྒྱད་མ་ལུས་ཟིལ་གྱིས་གནོན༔ ཡེ་ཤེས་མེ་དཔུང་ཀློང་དུ་བསྐྱེད༔ སྤྲུལ་པའི་འཁོར་ལོར་པད་ཉིའི་སྟེང་༔ སྲིད་པ་མ་མོའི་དཀྱིལ་འཁོར་ཀུན༔ ཡོངས་འདུས་རྡོ་རྗེ་ཕག་མོ་མཐིང་༔ གྲི་གུག་གཡས་ལ་ཐོད་ཁྲག་གཡོན༔ ཞབས་གཉིས་གར་སྟབས་ཁ་ཊྭཱྃ་ཀ༔ སྤྱི་བོར་ཕག་ཞལ་ནག་པོ་ངུར༔ གཅེས་བུ་མི་མགོའི་ཕྲེང་བས་བརྒྱན༔ ཡེ་ཤེས་མེ་དཔུང་རབ་ཏུ་འབར༔ ཁམས་གསུམ་དབང་སྡུད་ངོ་བོར་གསལ༔ བདེ་སྐྱོང་འཁོར་ལོར་པད་ཉི་དང་༔ ཟ་བྱེད་དུར་ཕག་མགོ་དགུའི་སྟེང་༔ ཕྲིན་ལས་ཡཀྵ་མེ་དཔལ་ནི༔ མཐིང་ནག་ཁྲོ་གཏུམ་རྔམས་བརྗིད་འབར༔ ཕྱག་གཉིས་ཐོ་བ་མེ་ཞགས་བསྣམས༔ ཡེ་ཤེས་མེ་དཔུང་འབར་བའི་ཀློང་༔ ཁམས་གསུམ་དབང་སྡུད་ངོ་བོར་གསལ༔ ཞབས་གཉིས་གྱད་ཀྱི་འདོར་སྟབས་བགྲད༔ བཙན་དུག་ནག་པོའི་ངད་རླངས་དང་༔ མེ་ཁྱུང་ཕག་ནག་ལྕགས་སྡུག་པའི༔ ཚྭ་ཚྭ་སྐར་ལྟར་འཁྲིགས་པ་ཡིས༔ དབུ་རྐྱང་རོ་གསུམ་ལ་སོགས་པའི༔ རྩ་ཁམས་མ་ལུས་ཡོངས་གང་སྟེ༔ བ་སྤུའི་བུ་ག་ཐམས་ཅད་ནས༔ ཕྱོགས་མཚམས་ཀུན་ཏུ་སྐར་ལྟར་འཁྲུགས༔ གཉན་དང་ས་བདག་ནད་རིམས་གདོན༔ རྗེས་ལྷག་མེད་པར་བརླག་པར་བསམ༔ ཡུམ་ཆེན་འཁོར་ལོ་རྒྱས་འདེབས་ནི༔ ཕྱག་གཡས་ཁ་ཊྭཱྃ་གཡོན་ཐོད་ཁྲག༔ ཞབས་གཡོན་ཡབ་ཀྱི་སྐེད་ལ་འཁྲིལ༔ གཡས་པས་སྲིད་པའི་སྒོ་འཕར་གནོན༔ གཡང་གཞི་གཟིག་ཤམ་རུས་རྒྱན་གསོལ༔ བསྐལ་པ་དུས་མཐའི་མེ་ལྟར་འབར༔ སྤྲུལ་པ་ཕག་དང་ཁྱུང་སྡིག་འགྱེད༔ ས་བདག་ཀླུ་གཉན་ནད་རིམས་གདོན༔ བསྲེག་གཏུབ་ཧབ་ཧབ་ཟས་སུ་རོལ༔ སྤྱི་བོར་བྱ་ཁྱུང་ནག་པོ་ལས༔ བརྒྱལ་བྱེད་ཧ་ལའི་ངད་རླངས་འཕྱོ༔ ཐུགས་ཀར་པདྨ་ཟླ་གདན་ལ༔ ཀུན་ཏུ་བཟང་པོ་མཉམ་བཞག་ཅན༔ རྒྱན་མེད་གཅེར་བུ་འོད་ཕུང་འབར༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ དེ་ཡི་ཐུགས་ཀར་ཉི་གདན་ལ༔ གནམ་ལྕགས་རྡོ་རྗེ་རྩེ་དགུ་པའི༔ ལྟེ་བར་དྭངས་མའི་ཐུགས་ཀློང་དུ༔ ཧཱུྃ་མཐིང་ཉིད་ལ་སྔགས་ཀྱིས་བསྐོར༔ འོད་འཕྲོས་དུས་གསུམ་རྒྱལ་དང་སྲས༔ མ་ལུས་ལུས་པ་མེད་པ་ཀུན༔ རྡོ་རྗེ་གཞོན་ནུའི་རྣམ་རོལ་དུ༔ མཚོ་ལ་ཁ་ཆར་བབས་པ་ལྟར༔ སྤྱན་དྲངས་གཉིས་སུ་མེད་པར་གྱུར༔ སྣོད་བཅུད་དཀྱིལ་འཁོར་གསུམ་ལྡན་གྱི༔ རོལ་པ་ཆེན་པོར་རྫོགས་སངས་རྒྱས༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ དེ་ནས་བསྒྲུབ་པ་ནི༔ ཐུགས་སྲོག་ཧཱུྃ་དང་སྔགས་ཕྲེང་ལས༔ འོད་ཟེར་དཔག་མེད་རབ་འཕྲོས་པས༔ བརྒྱུད་གསུམ་རིག་འཛིན་བླ་མ་དང་༔ ཡི་དམ་དཔའ་བོ་མཁའ་འགྲོ་ཡི༔ ཐུགས་རྗེའི་བྱིན་རླབས་དབང་དངོས་གྲུབ༔ འོད་ཕུང་འཇའ་སྤྲིན་ལྟ་བུ་ཡི༔ རྣམ་པར་འདུས་ཏེ་བདག་ལ་ཐིམ༔ བསྒྲུབ་རྫས་དུས་གསུམ་རྒྱལ་རྣམས་ཀྱི༔ སྐུ་དང་ཡེ་ཤེས་ངོ་བོ་ལ༔ རྣམ་པ་འོད་ལྔའི་རོལ་པར་གསལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཨཱཿ དེ་ནས་ལས་ལ་སྦྱོར་བ་ནི༔ རང་ཉིད་གདན་གསུམ་ཚང་བའི་ལྷའི༔ སྐུ་ཡི་ཆ་རྣམས་ཐམས་ཅད་ནས༔ ཐུན་མཚོན་མེ་རླུང་ཁྲོ་ཚོགས་དང་༔ ཁྱུང་དང་ཕག་ནད་སྡིག་པ་ཡི༔ འདུ་འཕྲོ་སེར་རླུང་འཁྲུགས་པ་ལྟར༔ འཕྲོ་ཞིང་གཡོ་བའི་བྱེད་ལས་ཀྱིས༔ སྡང་བའི་དགྲ་དང་གནོད་པའི་བགེགས༔ བར་དུ་གཅོད་པའི་ནད་རིམས་གདོན༔ གཏུབ་ཅིང་བསྲེག་སྟེ་ཧབ་ཧབ་ཟོས༔ རྗེས་ལྷག་མེད་པར་བརླག་པར་བསམ༔ ཨོཾ་བཛྲ་ཀཱི་ལི་ཀཱི་ལ་ཡ་ཡ་མཱནྟ་ཀ་ཧྱ་གྲཱི་ཝ་བཛྲ་ཙཎྜ་ཡཀྴ་ཀྲོ་ཏ་ནག་པོ་ཏི་པ་རཱ་ཙ་ཁྲོཾ་ག་རུ་ཊ་ཕེ་ཁྱི་མ༔ ཙིཏྟ་སྲོག་ལ་དུང་དུང་༔ སྙིང་ཁྲག་ཤད་ཛ༔ ཐུམ་རིལ་རིལ༔ སྙིང་རྩིག་རྩིག༔ འུག་འུར༔ ཤིག་ཤིག༔ འགུལ་འགུལ༔ མྱག་མྱག༔ སོད་སོད༔ དྷ་ཏི་མ་མ༔ ཀརྨ་ཤཱི་གྷྲཾ་ཀ་ར་ཡེ༔ མཱ་ར་ས་ན༔ པྲ་མར་ཏ་ན་ཡེ་སརྦ་བིགྷྣཱན་བཾ་ཧཱུྃ་ཕཊ༔ སརྦ་ཛྭ་ར་པྲ་ཤ་མ་ཎི་ཡེ་སྭཱ་ཧཱ༔ གཉན་པར་པ་ཏ་པཪྤ་མཱ་ར་ཡ་ཛྭ་ལ་རཾ་རཾ་རྦད་སོད་ནན་བྷྱོ༔ བསྙེན་པ་བྱེ་བ་བཅུ་ཕྲག་དང་༔ བསྒྲུབ་པ་བྱེ་བ་གཅིག་སློང་ནས༔ ལས་སྦྱོར་འབུམ་ཕག་གསུམ་ནས་འགྲུབ༔ ས་མ་ཡ༔ སྣང་སྲིད་འཁོར་འདས་ཐམས་ཅད་ཀུན༔ རང་སྣང་ཉིད་དུ་དབང་བསྒྱུར་ཏེ༔ དག་གསུམ་འཁོར་ལོར་སྦྱངས་པ་ཡིན༔ གསང་བའི་ཡང་སྙིང་བླ་ན་མེད༔ གང་གིས་བསྐྱེད་རིམ་གནད་ལྡན་པས༔ ཉམས་སུ་ལེན་ཀུན་རྫོགས་སངས་རྒྱས༔ སྒྲུབ་པའི་གནས་མི་སྤོ་བ་དང་༔ གདན་གྱི་དྲོད་མི་ཡལ་བ་རུ༔ སྡོད་གནས་གཅིག་ཏུ་སྒྲུབ་ཚུགས་ཟུངས༔ མི་ཚིག་དག་གིས་བར་མི་ཆོད༔ སྔགས་ནི་ཆུ་བོའི་རྒྱུན་བཞིན་བཟླ༔ ཤེས་པ་གཞན་དུ་མི་ཡེངས་པར༔ གསལ་ཞིང་ལྷ་ཡི་ང་རྒྱལ་ཟུངས༔ དེ་ལྟར་གནད་དང་ལྡན་པའི་མིས༔ ལོ་གསུམ་ཟླ་གསུམ་ཞག་གསུམ་གྱིས༔ རྣམ་པར་སྨིན་པའི་རིག་འཛིན་འཐོབ༔ འཁོར་འདས་འུབ་ཆུབ་རྫོགས་པ་ཆེ༔ ཆོས་རྣམས་ཀུན་གྱི་གྲོལ་ས་སྟེ༔ ཤེས་པར་གྱིས་ཤིག་སྐལ་ལྡན་བུ༔ པདྨའི་སྙིང་ཏིག་གཏད་དོ་རྒྱ༔ བཀའ་སྲུང་གནོད་སྦྱིན་དམར་ནག་དང་༔ གཟའ་རྒོད་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ སྐལ་ལྡན་སྐྱེས་བུའི་འདོད་དོན་སྒྲུབས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ཨྠིྀ༔ ཞེས་པ་འདི་ཁྲག་འཐུང་བདུད་འཇོམས་རྡོ་རྗེས་ཤྭ་བྲག་རྡོ་རྗེ་ནས་གདན་དྲངས་ཏེ་མི་ལོ་སུམ་ཅུ་རྩ་བརྒྱད་བར་དུ་བཀའ་རྒྱ་བྱས་མཐར།ཀུན་དཔལ་དང་རིག་དགའ་དབང་ཕྱུག་འབྱུང་གནས་རྣམས་ཀྱིས་བསྐུལ་ངོར་རྫ་རྒྱལ་རྡོ་རྗེ་འཕན་པོའི་ཉེ་འདབས་སུ་དག་པར་ཕབ་པའི་ཡི་གེ་པ་ནི་ཀུན་བཟང་ཆོས་གྲགས་ཀྱི་བགྱིས་པ་ཡོངས་ལ་དགེ་བར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ།།