TTDL-ZABTER-03-GA-051

Previous Text Back to Volume PageNext Text

Wylie title	zab gsang mkha' 'gro'i snying thig las: gsang bdag phyag na rdo rje'i dbang chog zab mo:
Location	bdud 'joms gling pa zab gter Volume 3, Text 51, Pages 503-511 (Folios 1a1 to 5a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las gsang bdag phyag na rdo rje'i dbang chog zab mo. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 503-511. Thimphu, Bhutan: Lama Kuenzang Wangdue, 2004.
Side notes	Recto: dbang chog   Verso: bdud 'joms phyag rdor
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur
Cycle	གསང་བདག་རྡོ་རྗེ་གཏུམ་པོ་ (gsang bdag rdo rje gtum po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	phyag na rdo rje
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di yang khrag 'thung bdud 'joms rdo rjes gter nas bton te dag par phab pa'i yi ge pa ni phun tshogs bkra shis so/_/dge'o/_/dge'o/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ གསང་བདག་ཕྱག་ན་རྡོ་རྗེའི་དབང་ཆོག་ཟབ་མོ་བཞུགས་སོ༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ དབང་དང་ལྡན་པའི་སློབ་དཔོན་གྱིས༔ མོས་གུས་སྣོད་ལྡན་སློབ་མ་ལ༔ འདི་བསྐུར་གསང་བདག་སྒོར་ཞུགས་ན༔ རྡོ་རྗེ་འཆང་གི་ས་ཐོབ་འགྱུར༔ དབང་རྫས་དམ་ཚིག་བདུད་རྩི་བསྒྲུབ༔ བུམ་པ་སྐུ་གཟུགས་སྐུ་ཡི་རྟེན༔ བདུད་རྩི་རྩ་སྔགས་གསུང་གི་རྟེན༔ རྡོ་རྗེ་སྦྲུལ་ཞགས་ཐུགས་ཀྱི་རྟེན༔ འཇའ་ཤེལ་མདངས་ལྡན་ཚིག་གི་དབང་༔ ཐིག་ལེ་ལྔ་མདངས་རིག་རྩལ་དབང་༔ བཀྲ་ཤིས་རྫས་རྟགས་རྒྱལ་སྲིད་བདུན༔ རྣམ་མཁྱེན་སངས་རྒྱས་གོ་འཕང་དུ༔ དབང་བསྐུར་མངའ་གསོལ་མཐའ་བརྟེན་ནོ༔ བསྒྲུབ་ནས་བདག་འཇུག་ལས་བྱེད་དུས༔ སློབ་མ་གྲལ་འཁོད་ཁྲུས་བྱས་ཤིང་༔ བགེགས་བསྐྲད་སྲུང་བའི་འཁོར་ལོ་བསྒོམ༔ དེ་ནས་སྐྱབས་འགྲོ་སེམས་བསྐྱེད་ཅིང་༔ མཎྜལ་ཕུལ་ཞིང་གསོལ་འདེབས་ནི༔ ཀྱཻ༔ ཁྲོ་བོ་ཆེན་པོ་དགོངས་སུ་གསོལ༔ བདག་ནི་བསྐལ་པ་དཔག་མེད་ནས༔ འཁོར་བའི་བཙོན་རར་མནར་བ་ཡི༔ ད་ནི་ཐར་པའི་གྲོང་འཇུག་ཕྱིར༔ གསང་བདག་ཕྱག་ན་རྡོ་རྗེ་ཡི༔ གོ་འཕང་མཆོག་ཏུ་རྣམ་གྲོལ་ཕྱིར༔ སྒོ་གསུམ་རྡོ་རྗེ་གསུམ་གྱི་ངང༔ རྣམ་གྲོལ་དབང་གི་སྨིན་པར་མཛོད༔ ལན་གསུམ་མཐར་བླ་མས༔ ཀྱེ་ཧོ་སྐལ་ལྡན་རིགས་ཀྱི་བུ༔ གསང་སྔགས་དབང་གི་སྒོར་འཇུག་ན༔ རྩ་བ་ཡན་ལག་དམ་ཚིག་ཀུན༔ སྲོག་གི་ཕྱིར་ཡང་མི་ཉམས་སྲུངས༔ རྟག་ཏུ་དགེ་ལ་གནས་པར་མཛོད༔ དེ་ཕྱིར་དབང་མཆོག་བསྐུར་བར་བགྱི༔ དེ་ནས་དམ་ཆུ་སྦྱིན་པ་ནི༔ ཧཱུྃ༔ དམ་ཚིག་གཉན་པོ་མནའ་ཡི་ཆུ༔ སློབ་མ་ཁྱོད་ཀྱི་ལྕེ་ལ་བཞག༔ དམ་ཚིག་བསྲུང་ན་དངོས་གྲུབ་ཐོབ༔ ཉམས་ན་རྡོ་རྗེ་དམྱལ་བར་མནར༔ དེ་བས་དམ་ཚིག་སྲུངས་མཛོད་ཅིག༔ ཅེས་བསྒོས་སློབ་མས༔ ལེགས་སོ་བསྒོས་པ་བཞིན་དུ་བསྲུང་༔ ས་མ་ཡ་ན་ར་ཀན༔ རྡོ་རྗེའི་རྭ་རྩེས་བདུད་རྩི་ལྕེ་ལ་བཞག་གོ༔ དེ་ནས་སློབ་མ་ལྷར་བསྐྱེད༔ ཡེ་ཤེས་པ་དབབ༔ ཏིཥྛ་བཛྲ་གྱིས་བརྟན་པར་བྱ༔ དེ་ནས་བུམ་དབང་ཟབ་མོ་ནི༔ བུམ་པ་ཐོགས་ལ༔ ཧཱུྃ༔ བུམ་པ་ཁྱབ་བརྡལ་གཞལ་ཡས་ཁང་༔ གསང་བདག་ཕྱག་ན་རྡོ་རྗེ་ཡི༔ སྐུ་ཡི་དཀྱིལ་འཁོར་ཡོངས་སུ་རྫོགས༔ སྐལ་ལྡན་ཁྱོད་ལ་དབང་བསྐུར་རོ༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གཙོ་བོའི་སྐུ་གཏད་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ངོ་བོ་ཉིད་སྐུ་ཆེ་བའི་མཆོག༔ དོན་གྱི་ཧེ་རུ་ཀ་དཔལ་གྱིས༔ སྐལ་ལྡན་བུ་ལ་དབང་བསྐུར་རོ༔ རྩ་སྔགས་ཀཱ་ཡ་ཨ་བྷི་ཥིཉྩ་ཨོཾ༔ སངས་རྒྱས་ཁྲག་འཐུང་གཏད་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ སྐུ་ཡི་ངོ་བོ་ཡོངས་རྫོགས་དཔལ༔ སངས་རྒྱས་ཁྲག་འཐུང་ཆེན་པོ་ཡི༔ ཆོས་དབྱིངས་ཡེ་ཤེས་དབང་ཐོབ་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ རྡོ་རྗེ་ཁྲག་འཐུང་གཏད་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ ཐུགས་ཀྱི་ངོ་བོ་ཡོངས་རྫོགས་དཔལ༔ རྡོ་རྗེ་ཁྲག་འཐུང་ཆེན་པོ་ཡི༔ མེ་ལོང་ཡེ་ཤེས་དབང་ཐོབ་ཤོག༔ རྩ་སྔགསཀཱ་ཡ་ཨ་བྷི་ཥིཉྩ་ཨོཾ༔ རིན་ཆེན་ཁྲག་འཐུང་གཏད་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ ཡོན་ཏན་ངོ་བོ་ཡོངས་རྫོགས་དཔལ༔ རཏྣ་ཁྲག་འཐུང་ཆེན་པོ་ཡི༔ མཉམ་ཉིད་ཡེ་ཤེས་དབང་ཐོབ་ཤོག༔ རྩ་སྔགས་ཀཱ་ཡ་ཨ་བྷི་ཥིཉྩ་ཨོཾ༔ པདྨ་ཁྲག་འཐུང་གཏད་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ གསུང་གི་ངོ་བོ་ཡོངས་རྫོགས་དཔལ༔ ཁྲོ་ཆེན་པདྨ་དྲག་པོ་ཡི༔ སོར་རྟོག་ཡེ་ཤེས་དབང་ཐོབ་ཤོག༔ རྩ་སྔགས་ཀཱ་ཡ་ཨ་བྷི་ཥིཉྩ་ཨོཾ༔ ཀརྨ་ཁྲག་འཐུང་གཏད་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ ཕྲིན་ལས་ངོ་བོ་ཡོངས་རྫོགས་དཔལ༔ ཁྲོ་ཆེན་ཀརྨ་ཧེ་རུ་ཀའི༔ བྱ་གྲུབ་ཡེ་ཤེས་དབང་ཐོབ་ཤོག༔ རྩ་སྔགས་ཀརྨ་ཀྲོ་དྷ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ཧཱུྃ་བཅུ་ཐོགས་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ ཕྲིན་ལས་ལས་ཀྱི་ཕོ་ཉ་བ༔ ཡེ་ཤེས་ཁྲོ་བོ་ཆེན་པོ་བཅུ༔ ཆགས་བྲལ་ཡི་གེ་ཧཱུྃ་དུ་ཤར༔ སྐལ་ལྡན་བུ་ལ་དབང་བསྐུར་རོ༔ འཁོར་བ་ཡོངས་སྒྲོལ་དབང་ཐོབ་ཤོག༔ རྩ་སྔགས་ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ༔ ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ཛཿཧཱུྃ་བྃ་ཧོཿ ཐོགས་ལ༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ ཚད་མེད་ཕྲིན་ལས་རང་གཟུགས་ཤར༔ ཡེ་ཤེས་སྒོ་མ་ཆེན་མོ་བཞི༔ ཆགས་བྲལ་ཡི་གེ་བཞི་རུ་ཤར༔ སྐལ་ལྡན་བུ་ལ་དབང་བསྐུར་རོ༔ ཕྲིན་ལས་ཐོགས་མེད་དབང་ཐོབ་ཤོག༔ རྩ་སྔགསཛཿཧཱུྃ་བྃ་ཧོཿ ཀཱ་ཡ་ཨཱ་བྷི་ཥིཉྩ་ཨོཾ༔ ཞེས་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ དེ་ནས་གསང་དབང་ཟབ་མོ་ནི༔ དང་པོ་ཐོད་པ་བདུད་རྩི་ཐོགས་ལ༔ ཧཱུྃ༔ མཉམ་པ་ཉིད་ཀྱི་བྷནྡྷ་རུ༔ རྒྱལ་བ་རྒྱ་མཚོ་སྤྱི་དང་ནི༔ ཁྱད་པར་གསང་བའི་བདག་པོ་ཡི༔ གསུང་གི་བཅུད་འདུས་བདུད་རྩི་འཁྱིལ༔ སྐལ་ལྡན་ཁྱོད་ཀྱི་ངག་ཏུ་བླུད༔ གསང་དབང་ཡོངས་སུ་རྫོགས་ཐོབ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ་ཨཱཿདེ་ནས་རྩ་སྔགས་ཐོགས་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ཐུགས་ཀྱི་ཡང་སྙིང་རྩ་བའི་སྔགས༔ སྐལ་ལྡན་ཁྱོད་ལ་དབང་བསྐུར་རོ༔ བཟླས་པ་སྔགས་ཀྱི་དབང་ཐོབ་ཤོག༔ རྩ་སྔགས་ཝཱཀ་ཨ་བྷི་ཥིཉྩ་ཨཱཿདེ་ནས་ཕྲེང་བ་ཐོགས་ལ༔ ཧཱུྃ༔ ཆོས་ཕུང་ཡོངས་རྫོགས་རིན་ཆེན་ཕྲེང་༔ སྐལ་ལྡན་ཁྱོད་ལ་གཏད་པ་ཡིས༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་ཀྱི་དབང་ཐོབ་ཤོག༔ རྩ་སྔགས་ཝཱཀ་ཨ་བྷི་ཥིཉྩ་ཨཱཿཞེས་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ དེ་ནས་ཤེར་དབང་བསྐུར་བ་ནི༔ གནམ་ལྕགས་རྡོ་རྗེ་ཧཱུྃ་གིས་མཚན་པ་ཅན་གཏད་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ཐུགས་ཀྱི་ངོ་བོ་རྡོ་རྗེའི་དབང་༔ སྐལ་ལྡན་ཁྱོད་ལ་བསྐུར་བ་ཡིས༔ ཤེས་རབ་ཡེ་ཤེས་དབང་ཐོབ་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་སྦྲུལ་ཞགས་གཏད་ལ༔ ཧཱུྃ༔ གསང་སྔགས་བདག་པོ་རྡོ་རྗེ་ཅན༔ དྲག་པོ་ཆེན་པོའི་དྲག་ཤུལ་གྱིས༔ སྐལ་ལྡན་བུ་ལ་དབང་བསྐུར་རོ༔ ཉོན་མོངས་བརྒྱད་ཁྲི་གཞོམ་པར་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ ཐུན་རྫས་ཐོགས་ལ༔ ཧཱུྃ༔ འཇིགས་པའི་ཧཱུྃ་སྒྲ་ངེས་སྒྲོགས་ཤིང་༔ བགེགས་རྣམས་མ་ལུས་འཇོམས་མཛད་པའི༔ དྲག་པོ་ཆེན་པོའི་མཐུ་རྩལ་གྱིས༔ སྐལ་ལྡན་བུ་ལ་དབང་བསྐུར་རོ༔ དགྲ་བགེགས་ཡོངས་སྒྲོལ་མཐུ་ཐོབ་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་དྲག་པོའི་མེ་ཧོམ་ཐོགས་ལ༔ ཧཱུྃ༔ རང་རྩལ་ལྷུན་གྲུབ་ཧེ་རུ་ཀའི༔ མཉམ་ཉིད་ཞལ་གྱི་ཧོམ་ཁུང་དུ༔ དགྲ་བགེགས་བསྲེག་པའི་དབང་བསྐུར་རོ༔ འཁོར་བ་ཡོངས་སྒྲོལ་དབང་ཐོབ་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ རྫོགས་སོ༔ ས་མ་ཡ༔ རྒྱ་རྒྱ་རྒྱ༔ དེ་ནས་ཚིག་དབང་བསྐུར་བ་ནི༔ འཇའ་ཤེལ་གཏད་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ཡེ་ཤེས་ཡོན་ཏན་ཡོངས་རྫོགས་པའི༔ ལྷུན་གྲུབ་འཇའ་ཤེལ་འདི་གཏད་པས༔ རྡོ་རྗེ་ཚིག་གི་དབང་ཐོབ་ཤོག༔ རྩ་སྔགས་སརྦ་ཨ་བྷི་ཥིཉྩ་ཧྲཱིཿདེ་ནས་ཐིག་ལེ་སྟོང་པའི་སྒྲོན་མ་གཏད་ལ༔ ཧཱུྃ༔ རང་རིག་ཡེ་ཤེས་ངོ་བོ་ཉིད༔ རྒྱལ་ཀུན་གསང་འདུས་ཐིག་ལེའི་དབང་༔ སྐལ་ལྡན་ཁྱོད་ལ་བསྐུར་བར་བྱ༔ རིག་པའི་རྩལ་དབང་ཐོབ་པར་ཤོག༔ ཨ༔ ཕཊ༔ རྫོགས་སོ༔ ས་མ་ཡ༔ དེ་ནས་གཏོར་མ་ཐོགས་ལ༔ ཧཱུྃ༔ དཀྱིལ་འཁོར་ཡོངས་རྫོགས་གཏོར་མ་འདི༔ སྐལ་ལྡན་བུ་ལ་གཏད་པ་ཡིས༔ དཔལ་ཆེན་ཕྱག་ན་རྡོ་རྗེ་ཡི༔ དཀྱིལ་འཁོར་ཡོངས་ལ་དབང་ཐོབ་ཤོག༔ རྩ་སྔགས་བ་ལིངྟ་མཎྜ་ལ་གུ་ཧྱ་ཨ་བྷི་ཥིཉྩ༔ དེ་ནས་བཀྲ་ཤིས་རྫས་བརྒྱད་གཏད་ལ༔ ཧཱུྃ༔ བཀྲ་ཤིས་རྫས་མཆོག་རྣམ་པ་བརྒྱད༔ སྐལ་ལྡན་ཁྱོད་ལ་གཏད་པ་ཡིས༔ རྒྱལ་བ་རྒྱ་མཚོའི་ཡོན་ཏན་ལ༔ དབང་བསྒྱུར་འགྲོ་བ་འདུལ་བར་ཤོག༔ སརྦ་མངྒ་ལ་ཨ་བྷི་ཥིཉྩ༔ དེ་ནས་བཀྲ་ཤིས་རྟགས་བརྒྱད་གཏད་ལ༔ ཧཱུྃ༔ ཕུན་སུམ་ཚོགས་པའི་བཀྲ་ཤིས་རྟགས༔ སྐལ་ལྡན་བུ་ལ་གཏད་པ་ཡིས༔ འཁོར་འདས་ཡོངས་ལ་དབང་བསྒྱུར་ནས༔ ཕྲིན་ལས་མཐའ་རྒྱས་དབང་ཐོབ་ཤོག༔ ལཱཀྵྀཾ་མངྒ་ལ་ཨ་བྷི་ཥིཉྩ༔ དེ་ནས་རྒྱལ་སྲིད་སྣ་བདུན་གཏད་ལ༔ ཧཱུྃ༔ འབྱོར་པ་ཕུན་སུམ་ཚོགས་པའི་ནོར༔ རྒྱལ་སྲིད་སྣ་བདུན་དབང་བསྐུར་རོ༔ རྣམ་མཁྱེན་རྫོགས་པའི་སངས་རྒྱས་ཀྱི༔ གོ་འཕང་མཆོག་ལ་དབང་ཐོབ་ཤོག༔ མ་ཎི་རཏྣ་ཨ་བྷི་ཥིཉྩ༔ དེ་མཐར་བཀྲ་ཤིས་བསྔོ་སྨོན་བརྗོད༔ མ་འོངས་ལས་ཅན་བུ་མཆོག་རྣམས༔ དབང་འདི་ཐོབ་ནས་གསང་བདག་གི༔ སྒྲུབ་པ་ལྷུར་ལེན་བྱེད་པ་ཀུན༔ ཚེ་འདིར་རིག་འཛིན་ས་ཐོབ་འགྱུར༔ དམ་ཚིག་གཉན་པོ་བསྲུང་བ་ནི༔ གསང་སྔགས་ཀུན་གྱི་སྲོག་རྩ་ཡིན༔ བཀའ་སྲུང་རྒྱལ་ཆེན་རྣམ་ཐོས་སྲས༔ དྲང་སྲོང་གཟའ་དང་བཅས་པས་སྲུངས༔ དམ་ལོག་རཱུ་ཏྲའི་དབང་པོ་བསྣུབས༔ དམ་ལྡན་བུ་ལ་བརྩེ་གྲོགས་མཛོད༔ བཀའ་དང་དམ་ཚིག་གཉན་པོའོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ། །སརྦ་མངྒ་ལཾ།། །།