DJYD-KABUM-16-MA-043

Previous Text Back to Volume PageNext Text

Wylie title	zab lam mkha' 'gro'i thugs thig gi khrid yig las 'phros pa rdzogs rim phyag rgya'i man ngag gud du sbas pa
Location	bdud 'joms rin po che bka' 'bum Volume 16, Text 43, Pages 463-500 (Folios 1a1 to 19b3)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Zab lam mkha' 'gro'i thugs thig gi khrid yig las 'phros pa rdzogs rim phyag rgya'i man ngag gud du sbas pa. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 463-500. Kalimpong: Dupjung Lama, 1979-1985.
Side notes	Recto: rdzogs rim   Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Contemplative Guide Books and Instructional Manuals - khrid yig  ·  Completion Stage - rdzogs rim
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)
Colophon	།ཅེས་ཟབ་ལ་མཁའ་འགྲོའི་ཐུགས་ཐིག་གི་རིམ་གཉིས་ཀྱི་ཁྲིད་ཡིག་དངོས་གྲུབ་འདོད་འཇོ་ལས་བདེ་བ་ཆོས་ཀྱི་ཕྱག་རྒྱའི་རྣལ་འབྱོར་གྱི་མན་ངག་གུད་དུ་སྦས་པ་གསལ་རྗེན་ལྷན་ཐབས་ཀྱི་ཚུལ་དུ་སྤྲོས་པ་འདི་ནི། རེབ་ཀོང་ཕྱོགས་ཀྱི་སྔགས་སྐྱེས་ཤེས་རབ་རྡོ་རྗེས་བརྩོན་པ་ཆེན་པོས་ཡང་ཡང་དུ་བསྐུལ་བའི་ངོར། འཇིགས་བྲལ་ཡེ་ཤེས་རྡོ་རྗེས་མཁའ་འགྲོའི་གསང་མཛོད་ཟབ་རྒྱའི་བཅུད་ཕྱུངས་ཏེ་བྲིས་པ་སྐལ་ལྡན་རྣམས་ལ་བདེ་ཆེན་མཆོག་གི་དངོས་གྲུབ་མངོན་དུ་བྱེད་པའི་རྒྱུར་གྱུར་ཅིག །སརྦ་དཱ་མངྒལཾ༎
	ces zab la mkha' 'gro'i thugs thig gi rim gnyis kyi khrid yig dngos grub 'dod 'jo las bde ba chos kyi phyag rgya'i rnal 'byor gyi man ngag gud du sbas pa gsal rjen lhan thabs kyi tshul du spros pa 'di ni/___reb kong phyogs kyi sngags skyes shes rab rdo rjes brtson pa chen pos yang yang du bskul ba'i ngor/___'jigs bral ye shes rdo rjes mkha' 'gro'i gsang mdzod zab rgya'i bcud phyungs te bris pa skal ldan rnams la bde chen mchog gi dngos grub mngon du byed pa'i rgyur gyur cig___/sarba dA mang+galaM//

Tibetan Text

[edit]

༄༅། །ཟབ་ལམ་མཁའ་འགྲོའི་ཐུགས་ཐིག་གི་ཁྲིད་ཡིག་ལས་འཕྲོས་པ་རྫོགས་རིམ་ཕྱག་རྒྱའི་མན་ངག་གུད་དུ་སྦས་པ་བཞུགས་སོ། །

༄༅། །ཨོཾ་སྭསྟི། ཟབ་ལམ་མཁའ་འགྲོའི་ཐུགས་ཐིག་གི་རྫོགས་རིམ་ཕྱག་རྒྱའི་རྣལ་འབྱོར་བདེ་བ་ཆེན་པོའི་ཡེ་ཤེས་སྒྲུབ་བའི་མན་ངག་གུད་དུ་སྦས་པ་གསལ་བར་འཆད་པ་ལ་གསུམ། སྦྱོར་བ་གསང་ཐུར་ལ་བསླབ་པ། དངོས་གཞི་ཤེས་རབ་མར་བསླབ་པ། རྗེས་གེགས་སེལ་གྱི་རིམ་པའོ། །དང་པོ་གསང་ཐུར་ལ་རྒྱབ་ཐུར་མདུན་ཐུར་གཉིས་ཀྱི། དང་པོ་རྒྱབ་ཐུར་སྟོན་པ་ལ། ཐུར་མའི་རྒྱུ་དང་། ཚད་དང་། རབ་གནས། སྦྱོང་ཐབས། བཅུད་ལེན་དང་ལྔ་ལས། དང་པོ་རྒྱུ་ནི། བྱ་རྒོད་ཀྱི་རྐང་ངམ་སྨྱུག་མ་ལས་བྱས་པ། ཚད་ནི་སྦོམ་ཕྲ་མཛུབ་མོ་ཙམ། སྦྱོང་ཐུར་ལ་སོར་བཞི། ལམ་ཐུར་ [2a] ལ་མཐོ་གང་། རབ་གནས་ནི་རྟེན་འབྲེལ་སྙིང་པོས་བྱ། བཞི་པ་སྦྱོང་ཐབས་ལ་ལྔ། རླུང་བཤལ། ཆུ་བཤལ། གྲང་བཤལ། ཚ་བཤལ། དུག་བཤལ་ལོ། །དང་པོ་རླུང་བཤལ་ནི། སྦྱང་ཐུར་ལ་མར་གྱིས་བྱུགས་ནས་སྲིན་ཞལ་དུ་གཞུག །ལུས་གནད་གླིང་བཞི་མཐའ་སྡུད་བྱ། དམིགས་པ་རང་ཉིད་ཡི་དམ་གྱི་སྐུར་གསལ་བའི་ནང་དུ། དྷུ་ཏི་འོད་ཀྱི་སྦུ་གུ་སྦ་ལྕགས་ཙམ། སྤྱི་བོ་གསང་གནས་ཀྱི་བར་དུ་ཤེད་དེ་ཟུག་པ། ཡར་མར་གྱི་སྣེ་བུ་ག་དྲང་ཤད་དེ་ཧ་རེ་ཡོད་པར་དམིགས། དེ་ནས་སྣོད་བཅུད་ཐམས་ཅད་འོད་ལྔར་ལྟེམ་གྱིས་ཞུ་ནས་གསང་བའི་སྦུགས་སུ་ཞུགས། སྤྱི་གཙུག་ནས་ [2b] ཕྱུར་ཕྱུར་ཐོན་པ་བསམ་ལ། སྟེང་རླུང་དྲག་ཏུ་བྱུང་། འོག་རླུང་ཐུབ་ཚད་འཐེན། རྒྱུ་ཞབས་སྒལ་པ་ལ་སྦྱར། ཉྭ་བཞི་བསྒྲིམ། མིག་གྱེན་དུ་བགྲད། ལྕེ་ཡ་རྐན་ལ་སྦྱར། མི་ཐུབ་པ་ན་ནང་དུ་རྔུབ། སྣོད་བཅུད་ཐམས་ཅད་འོད་ལྔར་ཞུ་སྟེ་སྤྱི་བོ་ནས་ཞུགས་གསང་གནས་ཀྱི་བུ་ག་ནས་ཕྱུ་རུ་རུ་ཐོན་པར་བསམ་ལ། མིག་ཐུར་དུ་བགྲད། ལུས་ཤེད་ཐམས་ཅད་ཐུར་དུ་ཕྱུང་། འདི་དུས་འོག་རླུང་སྒྲ་བཅས་སུ་སོང་ཡང་སྐྱོན་མེད། དེ་ལྟར་ཐུན་བཞིར་ནན་ཏན་དུ་སྦྱངས་པས། འོག་རླུང་འཐེན་དུས་སྣ་སྒོར་ཐུར་སེལ་གྱི་དྲི་བྲོ་ཞིང་། སྟེང་དུ་མནན་དུས་སྣ་ནས་སྤོས་དྲི་རྔུབ་པ་འོག་སྒོར་བྲོ་ནུས་ན་སྟེང་འོག་གི་རླུང་འདྲེས་པ་ཡིན་ནོ། །ཕན་ཡོན་ཀྱང་། ཐུར་སེལ་རླུང་ནི་རྟ་རྔ་ཙམ། །ལན་གཅིག་དྲོངས་པ་གྱུར་པ་ཡིས། །ངན་འགྲོ་ཐམས་ཅད་རབ་བཅོམ་ནས། །བར་དོའི་གྲོང་ཁྱེར་དེས་མི་མཐོང་། །ཞེས་སོ། །གཉིས་པ་ཆུ་བཤལ་ནི། རྡུལ་མེད་པའི་ཆུ་གཙང་མ་ཤ་དྲོད་ཙམ་བསྲོ་ལ། སྣུམ་ཐུར་མགོ་གསུམ་ཙམ་གྱིས་ཀ་ལི་བཀང་། ལམ་ཐུར་མར་གྱིས་བྱུག་པ་སོར་བཞི་སྲིན་ལམ་དུ་བཅུག །མཚམས་སུ་དར་གྱིས་བཅིང་། ལུས་ཐུར་དུ་སྒུར་ནས་པུས་མོ་དང་གྲུ་མོ་ས་ལ་བཙུགས། ལམ་ཐུར་མར་སྣེ་ཀ་ལིའི་ནང་དུ་འཕྲོད་པར་བྱ། དེ་ནས་ཆུ་དེ་ཡེ་ [3a] ཤེས་ཀྱི་བདུད་རྩི་བསིལ་བའི་རང་བཞིན་དུ་བསམ་ལ། གོང་ལྟར་འོག་རླུང་དྲག་ཏུ་འཐེན་ལ་རྔུབ། ཕོ་སྐོར་ཕོ་བརྡབ་བྱས་ལ་ཕྱིར་འདོན་པ་ཡང་ཡང་བྱའོ། །གསུམ་པ་གྲང་བཤལ་ནི། ཆང་སྐྱུར་རྙིང་པ་མ་ཡལ་བ་ལ། ཨ་བར་སྐྱུར་གསུམ། རྒྱ་ཚྭ། གཡེར་མ། ལྕམ་ཚ། རྒྱ་ལྕམ་འབྲས་བུ། དུར་བྱིད། ཐར་ནུ། ཆུ་རྩ། བྱང་ཁྲ་རྣམས་ཞིབ་པར་བཏུལ་བ་སྦྱར་ལ་གོང་ལྟར་རྔུབ་ཅིང་ཕོ་སྐོར་ཕོ་བརྡབ་བྱས་ལ་ཕྱིར་འདོན་ནོ། །བཞི་པ་ཚ་བཤལ་ནི། གར་ཆང་རྙིང་པར། མར་རྙིང་གི་ཁུ་བ། རྒྱ་ཚྭ། རྒྱམ་ཚྭ། ཁ་རུ་ཚྭ། ཤིང་ཚྭ། ལྒ་སྐྱ། པི་པི་ལིང་། ཕོ་བ་རིལ། སེ་འབྲུ། སུཀྨེལ། ཤིང་ཀུན་རྣམས་སྦྱར་བའི་སྨན་ཐུན་གསུམ་ཙམ་སྦྱར་ལ། དམིགས་པ་ནི་ཡེ་ཤེས་ཀྱི་བདུད་རྩི་ཚ་ཞིང་རྩུབ་པའི་རང་བཞིན་ཅན་དུ་བསམ་ལ་བཏང་། ཕོ་སྐོར་སོགས་གོང་དང་འདྲའོ། །ལྔ་པ་དུག་བཤལ་ནི། བཙན་དུག །ཐར་ནུ། དུར་བྱིད། ཤིང་ཀུན་རྣམས་ཞིབ་པར་བཏུལ་ལ། དང་པོ་སྨན་ཐུན་གསུམ་ཙམ་ཆུར་སྦྱར་ལ་བཏང་། ཕོ་སྐོར་དང་ཕོ་བརྡབ་བྱ་ཞིང་ལྷག་མ་མ་ལུས་པར་ཕྱིར་འཕོ། དེ་ལ་གོམས་ནས་ཐུན་གཉིས་དང་གསུམ་སོགས་དགུའི་བར་དུ་སྤེལ་ཤེས་པར་བྱའོ། །ལྔ་པ་བཅུད་ [3b] ལེན་ནི། དུག་རིགས་སྤངས་པའི་ཤ་དང་རུས་པ་རྐང་ཚིལ་བཟང་པོ་གང་རྙེད་གདུས་པའི་ཁུ་བར། དྭངས་མ་ལྔ་སྦྱོར་བཏབ་པ་བྲེ་དོ་ཙམ་མམ། རླུང་ནུས་ཀྱིས་གང་དྲངས་ཙམ་བཏང་ལ་ཕྱིར་མི་འཕོ་བ་རང་སར་བཞག་པས། འོག་སྒོ་རུབ་ཅིང་ལུས་ཟུང་རྒྱས་ཏེ་ལོ་ཟླ་ཙམ་ལ་འཚོ་བ་མི་དགོས་པར་འབྱུང་སྟེ། རི་ཁྲོད་འགྲིམ་པའི་གདམས་པ་ཁྱད་པར་ཅན་ནོ། །གཉིས་པ་མདུན་ཐུར་རམ་རྡོ་རྗེ་འཐུང་གི་གདམས་པ་ལ་བཞི། དང་པོ་སྦྱང་བ། བར་དུ་ཚད་པ། ཐ་མ་ལས་ལ་སྦྱར་བ། མ་གྲུབ་ན་སྤོགས་པའོ། །དང་པོ་སྦྱོང་བ་ནི། རྒྱབ་ཐུར་གྱི་ལག་ལེན་ལ་དབང་འབྱོར་བས། ལུས་གནད་རླུང་སྦྱོར་དམིགས་པ་རྣམས་སྔར་དང་འདྲ་ལ། དང་པོ་རྡོ་རྗེ་ལ་མར་དཀར་གྱིས་བྱུག་ནས་ཉི་མ་ལ་བསྲོ་ཞིང་མཉེ་སྟེ། ལས་སུ་རུང་བ་དང་འོག་ཏུ་མི་གཞིལ་བར་སྟེང་དུ་རྒྱ་མཚོའི་འགྲམ་ལ་སྦྱར་ཏེ་བཞག །ཡང་གཟིམས་པ་དང་སྔར་ལྟར་མཉེ་ཞིང་བསྲོ་ཙམ་བྱ། དེ་ནས་ལྕམ་པའི་མྱུ་གུ་མཐོ་གང་ཙམ་ཤུན་པ་རྩུབ་མོ་དེ་བཤུས། དེ་རྡོ་རྗེ་སྦུབས་སུ་སོར་བཞི་ཙམ་བཅུག་སྟེ། རླུང་འཐེན་པའི་ཚེ་ནང་དུ་ནུབ་པ་དང་། མནན་པའི་ཚེ་ཕྱིར་རྒྱང་གིས་ཐོན་ན་འབྱོངས་པ་ཡིན། ན་ཚ་ཅུང་ཟད་བྱུང་ཡང་སྐྱོན་མེད་པས་བསྲན། སྐབས་སུ་མཉེ་བ་གོང་ལྟར་བྱ། [4a] ཆུ་འགག་ན་རྒྱ་ཚྭ་བཏང་ཞིང་ཡོས་ཚན་གྱིས་བསྲོའོ། །གཉིས་པ་བར་དུ་ཚད་པ་ནི། དེ་ནས་མདུན་ཐུར་རབ་ཟངས་ལྕགས། འབྲིང་སྨྱུག་མ། ཐ་མ་ཤིང་སྦུ་གུ་ཅན། རིང་ཐུང་རང་མཐོ་གང་། སྦོམ་ཕྲ་གྲོ་སྲོག་ཙམ། ཤིན་ཏུ་འཇམ་ལ་དྲང་བར་བྱས་ཏེ། རྡོ་རྗེ་ལ་མི་གནོད་པའི་ཐབས་ཀྱིས་རྩ་བའི་བར་དུ་རིམ་གྱིས་ཕུལ་ནས་སྟེང་རླུང་མནན་པས། གསང་སྒོར་སྤུ་འགུལ་ནུས་ན་འབྱོངས་པ་ཡིན་ནོ། །གསུམ་པ་ཐ་མ་ལས་ལ་སྦྱར་བ་ནི། ངང་པའི་སྒོ་ངའམ་ལྒང་ཕུག་ལྟ་བུའི་ནང་དུ། ཆུ་དང་འོ་མ་བསྲེས་པ་ཤ་དྲོད་ཙམ་དུ་ཀ་ར་ཅུང་ཟད་བཏབ་པ་དྲང་། དེ་ནས་འོ་མ་གཅིག་པུ་ལ་བཟང་དྲུག་དང་པད་རག་བཏབ་ནས་དྲངས་པས། འོ་མ་སྣ་བུག་ཏུ་དཀར་རྒྱང་ངེར་དྲངས་པ་དང་། མནན་པའི་དུས་གང་དྲངས་པ་དེ་ཕྱིར་འབྱིན་ནུས་ན་སྟེང་འོག་གི་རླུང་ལ་རང་དབང་ཐོབ་པའི་རྟགས་ཡིན། ཆུ་དང་འོ་མ་གང་དྲངས་པ་དེ་ནང་དུ་མི་བཞག་པར་ཕྱིར་བཏོན། འདིའི་དུས་མཚན་ལྡན་གྱི་དམར་ཆ་ལེན་པར་ནུས་ཏེ། བརྩོན་འགྲུས་དང་ལྡན་ན་ཡུན་རིང་པོར་མི་ཐོགས་པར་རྟགས་མངོན་སུམ་དུ་འཆར་བའི་གདམས་པའོ། །བཞི་པ་མ་གྲུབ་ན་སྤོགས་པ་ནི་ཞལ་ལས་ཤེས་པར་བྱའོ། །གཉིས་པ་དངོས་གཞི་ཐབས་ཤེས་ཁ་སྦྱོར་བསླབ་པ་ལ་ [4b] གཉིས། ཕོ་ཁྲིད་ཉི་མའི་བཅུད་སྡུད་དང་། །མོ་ཁྲིད་ཟླ་བའི་མདངས་ལེན་ནོ། །དང་པོ་ནི། རྡོ་རྗེ་ཆུ་འཐུང་དང་ལག་པའི་འདུ་བྱེད་ལ་བརྟེན་ནས་རང་ལུས་ཐབས་ལྡན་ལ་གོམས་པ་སྔོན་དུ་སོང་བའི་རྣལ་འབྱོར་པས། ལས་ཀྱི་ཕྱག་རྒྱ་དངོས་ལ་བདེ་བ་རྩལ་སྦྱོང་བའི་སྐབས་སུ་བབས་པ་ན། ཐོག་མར་བདེ་སྟེར་ཤེས་རབ་ཕྱག་རྒྱ་མཚན་ཉིད་དང་ལྡན་པ་བཙལ་བར་བྱ་སྟེ། དེའང་ལུས་མཛེས་ཤིང་ཡིད་དུ་འོང་བ། སྟོད་སྨད་རྒྱས་ཤིང་སྐད་པ་ཕྲ་བ། ནུ་མ་འབུར་ལ་བྷ་ག་དམ་ཞིང་རུབ་པ། གནས་གསུམ་སྐུ་གསུང་ཐུགས་ཀྱི་སྨེ་བ་ཅན། ཁྱད་པར་མཆན་ཁུང་གཡས་ན་དཀར་པོ་གཅིག་ཐུབ་ཀྱི་སྨེ་བ་ཡོད་པ། ལུས་དང་པདྨ་ལ་དྲི་ཤིན་ཏུ་ཞིམ་པར་མནམ་པ། ངག་འཇམ་ལ་སྙན་པ། དྲང་པོར་སྨྲ་ཞིང་། གསང་སྔགས་ཀྱི་ཆོས་ཟབ་མོ་རླུང་ཕྱོགས་ཙམ་གཞན་ལ་མི་བསྒྲག་པ། བློ་ཆེ་ཞིང་ཤེས་རབ་དང་སྙིང་རྗེ་ཆེ་བ། ཁྱད་པར་དུ་སྒྲུབ་པ་པོ་དང་། གསང་སྔགས་ཀྱི་ཆོས་ལ་དད་ཅིང་མོས་པ། སྦྱོར་བ་ལ་མཁས་ཤིང་བདེ་བ་ཆེ་བ། པདྨས་རྡོ་རྗེ་ལ་གཞིབ་པར་ཤེས་པ། དེ་ལྟ་བུའི་ཕྱག་རྒྱ་མཚན་ཉིད་ཐམས་ཅད་ཚང་བ་རྙེད་ན་རབ་དང་། མིན་ཀྱང་དེ་དང་ཆ་འདྲ་བ་བཙལ་ཏེ་རང་དབང་དུ་བྱས་ལ་ཁྲུས་དང་བཀུ་མཉེ་བྱ་ཞིང་རོ་ཙ་བའི་ [5a] བཅུད་ལེན་གྱིས་ཁམས་སྤེལ་བ་སྔོན་དུ་འགྲོ་བས། དབེན་པའི་གནས་སུ་བདེ་བའི་སྟན་ལ་འཁོད་ནས། ཕན་ཚུན་གཟུགས་ལ་བལྟ་བ། ཆགས་པའི་གཏམ་མཉན་པ། ལུས་ཀྱི་དྲི་ཞིམ་པོ་བསྣོམ་པ། ཟས་ཞིམ་མངར་གྱི་ལུམ་བུ་སྟེར་བ། ལུས་ཀྱི་ཆ་ཤས་རྣམས་དང་གསང་བའི་གནས་ལ་རེག་པ་སྟེ་བསླབ་པ་ལྔས་བདེ་བ་བསླང་། ཡུམ་གྱི་དབུས་རྩ་རྙེད་པའི་རྟེན་འབྲེལ་བྱས་ཏེ། རང་ལུས་ཐབས་ལྡན་གྱི་སྐབས་སུ་བཤད་པ་བཞིན་འདུ་ཤེས་གསུམ་ལྡན་གྱི་སྒོ་ནས་སྙོམས་པར་ཞུགས་ལ། རུས་སྦལ་གྱི་ནུར་འགྲོས་ལྟར་དལ་བུས་བསྐྱོད། བདེ་བ་ཆེ་ན་བསྐྱོད་འཕྲོ་བཤོལ་ཏེ་ངོ་ཐོག་ཏུ་འཇོག །བདེ་བ་ཅུང་ཟད་ཡལ་བ་དང་སྲུབས་ལ་དགའ་བཞིའི་ཡེ་ཤེས་ངོས་བཟུང་། གོམས་ཤས་ཆུང་བ་རྣམས་ཀྱི་དགའ་བ་གསུམ་པ་ནས་མི་དབབ་པར་འདྲེན་འགྲེམ་གྱི་འཁྲུལ་འཁོར་བྱ། དེ་ཡང་དབབ་མ་ཐག་ཏུ་འཛིན། བཟུང་མ་ཐག་ཏུ་འདྲེན། དྲངས་མ་ཐག་ཏུ་དགྲམ་མོ། །ཅུང་ཟད་གོམས་ནས་བདེ་བ་རྩལ་རྫོགས་པའི་ཚེ་འཛིན་འདྲེན་དགྲམ་པ་རྣམས་བྱ། གོམས་སྟོབས་ཆེར་སོང་ནས་ཐིག་ལེ་པདྨར་དབབ། ཡུམ་གྱི་དྭངས་མ་དང་མཉམ་དུ་འདྲེན་ནུས་ཏེ། རང་གི་དཀར་ཆ་ནི་བདེ་བ་རྒྱས་པའི་ཚེ་ངོ་ [5b] ཐོག་ཏུ་ལྷོད་ནས་བཞག་པས་འཛིན་འདྲེན་དགྲམ་པ་འགྲུབ་བོ། །དམར་ཆ་འདྲེན་ན་ཟླ་མཚན་ཟླ་དུས་སུ་འབབ་ཚེ། དྲི་མི་ཞིམ་པ་མནམ་པ་དང་། ཁ་དོག་སེར་ནག་དཀར་བ་ནི་འདྲེན་དུ་མི་རུང་། ཚོས་ཁུའམ་མཚལ་ཁུ་ལྟ་བུར་འབབ་དུས་སུ་དྲང་། འདྲེན་དུས་རྩ་ཁ་འབྱེད་སྡོམ་གྱི་རྫས་བརྟེན་ནས་རྡོ་རྗེ་ཆུ་འཐུང་གི་སྐབས་ལྟར་ཧཱུྃ་གི་སྒྲ་དང་བཅས་པས་དྲང་། དྲོངས་རྟགས་རྡོ་རྗེ་མགོ་འཁྱོག་པ་དང་། ལུས་ཚ་ཆིལ་གྱིས་འབྱུང་བ། ཡུམ་གྱིས་མི་བཟོད་པའི་རྣམ་གྱུར་སྟོན་ན་དྲོངས་པ་ཡིན་པས་འགྲེམ་པའི་འཁྲུལ་འཁོར་ལ་འབད། འདྲེན་དཀའ་ན་གསང་བའི་སྦུ་གུ་བཅུག་ལ་དྲང་། དེས་ཀྱང་མ་དྲོངས་ན་ཞལ་གྱི་གདམས་པ་ལས་ཤེས་དགོས་སོ། །གཉིས་པ་མོ་ཁྲིད་ཟླ་བའི་མདངས་ལེན་ལ་གཉིས། སྦྱོར་བ་པདྨ་རླུང་འབྱིན་དང་། དངོས་གཞི་ཐབས་ཀྱི་བདེ་ཆེན་སྒྲུབ་པའོ། །དང་པོ་ལ་བཞི། པདྨ་རླུང་འབོད། པདྨ་ཁ་སྡོམ། པདྨ་ཐེར་འབུད། པདྨ་སྐད་འདོན་ནོ། །དང་པོ་པདྨ་རླུང་འབོད་ལ་འབོད་ཆུང་དང་འབོད་ཆེན་གཉིས་ལས། དང་པོ་ནི། རྒྱབ་ཐུར་གྱི་རིམ་པ་ཚར་ནས། ལག་གཉིས་བསྣོལ་བས་པུས་མོ་བསྐོར། ལུས་ཙོག་པུ་པུས་འཁྱུད་ཀྱིས་བསྡམ། མགོ་བོ་སྒུར་ལ། སྟེང་རླུང་དྲག་ཏུ་དབྱུང་ཞིང་འོག་རླུང་ཅི་ནུས་སུ་འཐེན་ [6a] ལ་བགྲད་འབེབས་བྱ། གཉིས་པ་འབོད་ཆེན་ནི། རྐང་མཐིལ་གཉིས་ཁ་སྤྲད་ལ་བྷ་གའི་མདུན་དུ་བཞག །ལག་གཉིས་བསྣོལ་ཏེ་རྐང་མགོ་གཉིས་ལ་བསྡོམ། འོག་རླུང་ཅི་ཐུབ་འཐེན་ལ་ཕོ་སྐོར་ཡང་ཡང་བྱ། སྟེང་རླུང་གང་ཐུབ་འཐེན་ལ་དྲག་འབེབས་ཅི་ནུས་རྒྱག །དེ་རྗེས་སུ་ལུས་སྤྲུགས་བྱས་ལ་མཉམ་པར་བཞག་གོ ། གཉིས་པ་པདྨ་ཁ་སྡོམ་ནི། རྒྱུན་དུ་གསང་བའི་སྐྱིལ་ཀྲུང་བྱས་ལ་ཁུ་ཚུར་བརླ་སྟེང་བསྒྲེང་། སྟེང་རླུང་མནན་ཞིང་འོག་རླུང་འཐེན་ཏེ་རྫས་སྦྱོར་ལ་བརྟེན། གསུམ་པ་པདྨ་ཐེར་འབུད་ནི། འོག་སྒོ་ཀློད་ལ་སྟེང་འོག་གི་རླུང་ཐུར་དུ་ཕུལ་བས། བ་རུ་ཤའི་གནོད་པ་བྱུང་ཡང་གླག་མི་རྙེད་དེ། ནང་དུ་ཆུད་ཀྱང་ཕྱིར་འབུད་ནུས་སོ། །བཞི་པ་པདྨ་སྐད་འདོན་ནི། མདུན་ཐུར་བྱ་རྒོད་རྐང་ངམ་མི་ཡི་རྐང་དུང་མཐོ་གང་སོར་བཞི་ཡོད་པ་ལ་མར་གྱིས་བྱུག་ནས་པདྨར་གཞུག །པད་སྐྱིལ་ཀློད་ནས་རྐང་མགོ་མཐོ་གང་ཙམ་གྱི་སར་བཞག་སྟེ་ལག་གཉིས་ཀྱིས་བཟུང་། རླུང་འཐེན་དྲག་ཏུ་བྱས་ལ་རྒྱ་མཚོ་བསྐོར། འདི་དུས་གྲུ་མོ་གཉིས་ཀྱིས་མཁལ་རྩ་བསྡམ་པ་གལ་ཆེ། དེ་ལྟར་སྦྱངས་པས་འོག་རླུང་འཐེན་ཚེ་འོ་མ་སྣ་བུག་ཏུ་དྲངས་ནུས་ལ། སྟེང་རླུང་མནན་དུས་རྐང་དུང་ཕྱིར་འབྱིན་ནུས་ན། རྐང་དུང་འབུད་པ་སོགས་འགྲུབ་པ་སྟེ་ [6b] ཐེ་ཚོམ་དང་བྲལ་བའི་གདམས་པའོ། །ནུས་པ་དུས་ཙམ་ཐོབ་ཕྱིན་འོག་སྒོ་བདེ་བ་ཆེན་པོའི་ཉམས་ལེན་ལ་འཇུག་པར་བྱའོ། །གཉིས་པ་ཐབས་ཀྱི་བདེ་ཆེན་སྒྲུབ་པ་ནི། པདྨ་རླུང་འབྱིན་དང་འབོལ་ལའི་གདམས་པ་གོམས་པའི་རྣལ་འབྱོར་མས། ཐབས་གྲོགས་དཔའ་བོ་མཚན་ཉིད་དང་ལྡན་པ་བཙལ་ལ། འདུ་ཤེས་གསུམ་ལྡན་གྱི་ངང་ནས་བདེ་བ་སྐྱིད་པའི་སྤྱོད་པ་ལ་བསླབ། ཆགས་པ་གཡོ་བའི་རྟགས་ཤར་བ་དང་སྙོམས་པར་འཇུག །བདེ་ཤིག་ཤིག་བྱུང་བ་དང་སྤྱོད་འཕྲོ་བཤོལ་ལ་དགའ་བའི་ཡེ་ཤེས་ངོས་བཟུང་། དེ་བཞིན་དུ་མཆོག་དགའ། ཁྱད་དགའ། ལྷན་སྐྱེས་ཀྱི་དགའ་བ་ལ་སེམས་བཟུང་། ཡབ་བདེ་བ་རྒྱས་པའི་དུས་སུ་ངལ་མི་གསོ་བར་དྲག་ཏུ་སྤྱོད་བཅུག །ཐིག་ལེ་ཆིལ་གྱིས་བྱུང་བ་དང་འདྲེན་ཅིང་དགྲམ་པ་ལ་འབད། དེ་རྗེས་དྭངས་སྙིགས་འབྱེད་པ་ནི། རྐང་མཐིལ་གཉིས་སྤྲད་དེ་བྷ་གའི་མདུན་དུ་བཞག །ལག་པ་གཉིས་བསྣོལ་ཏེ་རྐང་མགོ་གཉིས་ལ་བཟུང་། འོག་རླུང་ཀློད་ལ་སྟེང་རླུང་དྲག་ཏུ་མནན་ནས་དྲག་འབེབས་བྱས་ལ་ཐིག་ལེའི་སྙིགས་མ་སྐྱ་ཉོ་ལེར་བྱུང་བ་དང་གཡང་མོའི་སྤྲུགས་སྟངས་བྱ། དེས་ནི་དྭངས་མ་ལུས་ལ་ཁྲེམ་ཞིང་སྙིགས་མ་ཕྱིར་འཕོ་བར་བྱེད་དོ། །འདི་ལ་གོམས་ཤས་ཆེ་བར་མ་བྱུང་གི་བར་དུ་ཁྱད་དགའ་ཙམ་ [7a] ལས་མི་དབབ་པར་ཡབ་དང་བྲལ་ཏེ་འཛིན་འདྲེན་དགྲམ་པ་ལ་འབད། གོམས་སྟོབས་ཆེར་སོང་ནས་སྐྱེ་བོ་ཆགས་སྲེད་ཀྱིས་གདུང་བ་རྣམས་ལ་བློ་ཆེན་སྟོབས་ལྡན་མའི་སྒོ་ནས་ལུས་སྦྱིན་པར་བཏང་ངོ་། །རྩ་བའི་གསུམ་པ་རྗེས་གེགས་སེལ་གྱི་རིམ་པ་བསྟན་པ་ལ་གསུམ། ལུས་རྩའི་གེགས་སེལ། ངག་རླུང་གི་གེགས་སེལ། སེམས་ཐིག་ལེའི་གེགས་སེལ་ལོ། །དང་པོ་ལུས་རྩའི་གེགས་སེལ་བསྟན་པ་བྱ་བ་ལ། སྤྱིར་ལུས་ངག་ཡིད་གསུམ་ལ་གེགས་འབྱུང་བའི་རྒྱུ་ནི་གསང་སྔགས་བླ་མེད་ཀྱི་ཉམས་ལེན་ལ་བརྩོན་འགྲུས་ཕུར་ཚུགས་ཆེ་བ་ལས་འབྱུང་། དེ་ཡང་ཉམས་སུ་ལེན་པ་ལ་གེགས་འབྱུང་བའང་ལམ་གྱི་ཡོན་ཏན་སྐྱེ་བ་ཡིན་པས་སྐྱོན་དུ་མི་བལྟ་ཞིང་། གེགས་ཀྱི་དབང་དུ་མ་སོང་བར་གེགས་སེལ་གྱི་གདམས་པ་ལ་འབད་དགོས་ཏེ། གེགས་མེད་པ་ལ་ཡོན་ཏན་སྐྱེ་བ་མི་སྲིད་ལ། གེགས་སྣ་རེ་སེལ་ན་ཡོན་ཏན་གྱི་རིམ་པ་གོང་འཕེལ་དུ་འགྲོ་བའོ། །ཉམས་ལེན་མེད་པའི་གང་ཟག་གི་རྒྱུད་ལ་མི་བདེ་བ་དུ་མ་འབྱུང་བ་ནི་སྔོན་གྱི་ལས་དང་འཕྲལ་གྱི་རྐྱེན་ལས་གྱུར་པའི་ནད་གདོན་ཡིན་པས་གེགས་དང་སློང་ཞེས་མི་ཟེར་རོ། །སྤྱིར་རྩ་སྐམ་ན་ལུས་སྐམ། རྩ་ཞ་ན་ལུས་ཞ་བ་སོགས། རྩ་ལ་སྐྱོན་ཇི་ལྟར་བྱུང་བ་བཞིན་ [7b] ལུས་ལ་སྐྱོན་འབྱུང་བའི་ཕྱིར། རྩའི་སྐྱོན་གེགས་མ་སེལ་ན་རླུང་སེམས་གནད་ལ་མི་ཕེབས། དེ་མ་ཕེབས་ན་བདེ་སྟོང་ཟག་པ་མེད་པའི་ཡེ་ཤེས་རྒྱུད་ལ་མི་སྨིན་པས་རྩའི་སྐྱོན་གེགས་བསལ་བ་གལ་ཆེའོ། །རྩ་ལ་སྐྱོན་འབྱུང་བའི་རྒྱུ་ནི། སྤྱོད་ལམ་དྲག་ཤུལ་གྱི་ལས་དང་། གཡང་ལ་ལྷུང་བའམ། རྟིབ་ཀྱི་གནོན་པ་སོགས་དང་། རླུང་མ་བཟུང་བར་འཁྲུལ་འཁོར་བྱས་པ། བཟའ་བཏུང་སྤྱོད་ཉེས་བྱས་པ་སོགས་ལས་འབྱུང་། སྐྱོན་ཞུགས་པའི་རྟགས་ནི། ལུས་སྤྲིད་པ་དང་། ཁོལ་བ་དང་། ཟ་བ་དང་། ཚ་བ་དང་། གཟེར་བ་དང་། ལུས་སྤྱི་ཁྱབ་ཏུ་ན་བ་དང་། ཉམས་རྨི་ལམ་ལ་མི་མིན་གྱི་བར་ཆད་བྱེད་པ་དང་། ཤ་ལྷག་དང་ཤུ་བ་མཛེར་པ་ཞ་རེངས་སོགས་མི་འདོད་པ་དུ་མ་འབྱུང་། དེ་སེལ་བའི་ཐབས་ལ་འཁྲུལ་འཁོར་དང་སྨན་ནོ། །དང་པོ་རྩ་ཆད་ན། ལུས་ཀྱི་སྟོད་སྨད་ནས་གང་ཡིན་དེ་རུ་རླུང་སྐྱིལ་བ་སྟོང་རའི་དམིགས་པ་དང་རྣམ་སྣང་ཆོས་བདུན་བྱ། གར་མ་བདེ་སར་འཕུར་སུབ་བྱེད། རང་གི་མི་སླེབས་ས་ཡིན་ན་གྲོགས་ལ་འཕུར་དུ་གཞུག །རྗེས་སུ་མི་བསྐྱོད་པ་ངར་མ་ཡལ་བ་བྱུག་པས་སེལ་ལོ། །རྩ་སྐམ་ན་ལུས་ལ་གཡའ་ཟ་ཞིང་ཡན་ལག་སྐམ་པ་འབྱུང་སྟེ། ལུས་སེམས་སྐྱིལ་ཀྲུང་མཉམ་གཞག་གི་ངང་ནས་རླུང་བཟུང་ [8a] ལ། དང་པོ་ལག་མཐིལ་གཉིས་དྲོད་དང་ལྡན་པར་འཕུར། དེ་ནས་སྤྱི་གཙུག་ནས་རྐང་མཐིལ་གྱི་བར་དུ་དྲོད་ཕེབས་པར་འཕུར། ཡང་རྐང་མཐིལ་ནས་སྤྱི་བོའི་བར་དུ་འཕུར་ལ། སྤྱི་བོར་སླེབ་པ་དང་རླུང་རོ་ཕྱུང་ཞིང་ལུས་ཀུན་སི་ལི་ལི་སྤྲུག །དེས་རྩ་སྐམ་པའི་གེགས་སེལ་ཞིང་ལུས་སྟོབས་རྒྱས་སོ། །རྩ་འཆུས་ན། དང་པོ་ཉལ་ནས་རླུང་རོ་འདོན་པ་ཁ་ཡར་བྱ། དེ་ནས་འཇམ་རླུང་བཟུང་ལ་ལུས་ཀུན་གཡས་གཅུ་གཡོན་གཅུ་མང་དུ་བྱ་ཞིང་། མཐར་ལུས་སེམས་གཡོ་མེད་དུ་མཉམ་པར་བཞག །སྐབས་སུ་མང་དུ་འཆུས་སར་འཕུར་བ་ལན་འགའ་བྱས་པས་སེལ་ལོ། །རྩ་འཁྲུགས་ན། ལུས་སམ་ལག་པ་འདར་བ་འབྱུང་སྟེ། དང་པོ་ལུས་ཅི་བདེར་བཞག་ལ་ལུས་ཐམས་ཅད་འཕུར་སུབ་ཡམ་ཙམ་བྱ། དེ་ནས་གན་རྐྱལ་དུ་ཉལ་ནས་ལག་པ་གཉིས་ཀྱིས་གཞུ་སྲ་ཚན་ཅན་འགེང་ཚུལ་རེས་མོས་གསུམ་གསུམ་བྱ། རྐང་པ་ཡང་དེ་བཞིན་ཤེས། དེ་ནས་རྐང་ལ་གནམ་དུ་བརྐྱང་ཞིང་སྙིང་གར་བསྐུམ་པ་དང་པོ་དལ་ཞིང་ཇེ་དྲག་ཇེ་དྲག་ཉེར་གསུམ་བྱས་ལ་ཟོ་ཀློད། ཧ་རིང་གིས་རླུང་རོ་ཕྱུངས་ན་སེལ་ལོ། །རྩ་འདར་བ་ནི་ཕལ་ཆེར་ཉལ་སྟབས་མ་བདེ་བས་རྩ་ཡི་ནང་དུ་ཁྲག་དང་ཆུ་སེར་གྱི་རྒྱུ་འགྲུལ་ [8b] ཆད་པ་ལས་འབྱུང་། དེ་བསལ་བ་ནི་སྤྱོད་ལམ་ཐམས་ཅད་ཀློད་ལ་འཇམ་རླུང་བཟུང་། སྡོད་པའི་དུས་སུ་གདན་འབོལ་བར་རྣམ་སྣང་ཆོས་བདུན་བྱ། ཉལ་དུས་སངས་རྒྱས་གཟིམ་ཚུལ་གྱིས་རླུང་རིག་སྨིན་མཚམས་སུ་ཐིག་ལེ་དཀར་པོ་ལ་གཏད། གོས་དྲོད་ཅན་གྱོན་ལ་སད་པའི་དུས་ཀྱང་དྲན་པས་ཟིན་པར་བྱས་ཏེ་ཚུལ་མིན་གྱི་ཉལ་སྟབས་སྤང་བ་ཞག་བདུན་གྱིས་སོར་ཆུད་དོ། །རྩ་རེངས་པ་དང་ཞ་འཁུམས་རྣམས་ལ་རླུང་བུམ་པ་ཅན་བཟུང་། ཕྱིང་པ་སྣུམ་ཚོས་ཅན་མེ་ལ་བསྲོས་པ་གང་ན་སར་བླན་པ་ཡང་ཡང་བསྐྱར་ན་ཕན་ནོ། །རྩ་གེགས་དེ་ཐམས་ཅད་ལ་བཀུ་བྱུག་བྱེད་པ་དང་། འཁྲུལ་འཁོར་ཇི་ལྟར་རིགས་པ་བྱས་པས་ཕན། སྨན་བཅོས་ནི། རྩ་གེགས་དེ་རྣམས་ཐམས་ཅད་ལ། ཨ་རུ་གསེར་མདོག །རྒྱ་ཚྭ། སྤོས་དཀར། ལི་ག་དུར། རྒྱ་མཚོ་གསེར་བྱེད། ཨ་འབྲས། འཇམ་འབྲས། སྲ་འབྲས། དབང་ལག །སྤུ་ཤེལ། གཟེ་མ། ཤུ་གུ་ཚེར་མ་ཅན་གྱི་འབྲུ་གུ། བ་ལུ་དཀར་པོ། སེང་ལྡེང་དམར་པོ་རྣམས་ཞིབ་པར་བཏུལ་ལ་ཐོ་རེངས་བསྟེན། སྤྱོད་ལམ་ཐམས་ཅད་ཤིན་ཏུ་དལ་བར་བྱ། སྔོ་རིགས་ཤ་རུལ་ཆང་སྐྱུར་སྤོད་སྣ་རྣམས་སྤངས་པས། རྩའི་གེགས་སྔ་མ་སེལ་ཞིང་ཕྱིས་མི་འཇུག་པའི་གདམས་པའོ། ། [9a] གཉིས་པ་ངག་རླུང་གི་གེགས་སེལ། དང་པོ་སྲོག་འཛིན་གྱི་རླུང་ནི། རྩ་དབུ་མའི་ནང་དུ་ཀུན་གཞི་རྣམ་པར་ཤེས་པ་དང་མཉམ་དུ་གཡོ་བ་མེད་པར་གནས། རླུང་དེ་གཞན་དུ་ལོག་ན་འཆི་བར་བྱེད་ལ། མིན་ཀྱང་སྨྱོ་བརྒྱལ་ལ་སོགས་མ་རུངས་པ་མང་པོ་བསྐྱེད་པར་འགྱུར། རླུང་གི་ནང་ནས་སྲོག་འཛིན་གྱི་རླུང་འདི་སྟོབས་ཆེ་བ་ཡིན་ཏེ། འདི་ལ་སྐྱོན་མ་ཞུགས་ན་རླུང་གཞན་གྱི་གེགས་རང་བཞིན་གྱིས་སེལ་ལོ། །སྤྱིར་སྲོག་རླུང་འདིའི་གེགས་སེལ་བ་ལ་ཧཱུྃ་ཕཊ་འདྲེ་བརྡུང་གི་སྤྱོད་པ་ཙབ་ཙུབ་མི་བྱ་བར། སྒོ་གསུམ་གྱི་སྤྱོད་ལམ་ཐམས་ཅད་ཅི་བདེར་སྤྱོད་ཅིང་སྣ་མི་བསྐྱིལ། སྐབས་སུ་སྙིང་དཀྱིལ་དུ་བླ་མ་བསྒོམ་ཞིང་རང་དང་དབྱེར་མེད་བསྲེ། རླུང་མི་འཛིན་པར་མཉམ་པར་བཞག་པའི་ངང་དུ་ཡུན་རིང་ཀློད་པས་སྲོག་འཛིན་གྱི་རླུང་ལོག་པ་སེལ་ལོ། །དང་པོ་སྲོག་འཛིན་གྱི་རླུང་རེངས་ན། ལུས་ཤིང་གིས་དཀར་བ་ལྟར་ཡ་ཡོ་དང་དགྱེ་དགུ་མི་ཤེས་པ་འབྱུང་། བཅོས་ཐབས་ནང་ཚང་ཅན་གྱི་གདན་ལ་བུམ་ཅན་གྱི་རླུང་དང་ཐོག་འབེབས་བྱ། རང་གིས་མ་ནུས་ན་གོས་སྟན་གྱི་ཁར་གྲོགས་ཐབས་ལྡན་བཞིས་བསྐྱག་ཕབ་བྱེད་དུ་བཅུག །བཤང་ལམ་དང་རྡོ་རྗེའི་བར་དུ་ཕྱིང་པ་སྣུམ་ཚོས་ཅན་ཚ་མོས་བསྲོ། དེ་དུས་ཞྭ་ [9b] གོས་དྲོན་པོ་གྱོན་ལ་ལུས་གནད་འཁོར་ལོ་བཞི་སྦྱོར་རམ་གླིང་བཞི་མཐའ་སྡུད་བྱའོ། །སྨན་གྱིས་བཅོས་པ་ནི། ཆང་བཟང་པོར་བུ་རམ་དང་ཛཱ་ཏི་བཏབ་པ་བསྐོལ་ནས་བཏང་། ཤ་ཆེན་བདུག །ས་དམའ་ཞིང་ཁ་ནག་སར་སྡོད། ཀུ་ཅོ་དང་ཐུག་ཆོམ་རོལ་མོ་སོགས་མི་བྱ། དེས་སྲོག་རླུང་ངེས་པར་སེལ་ལོ། །སྲོག་འཛིན་གྱི་རླུང་འཁྲུགས་ན། སྲོག་རྩ་དང་བྲང་མདུན་རྒྱབ་ན་ཞིང་སེམས་མི་བདེ། སྙིང་འཕར། ཧུ་ཤུ་འབྱིན། ཕྱི་མིའི་རྡོག་སྒྲ་སོགས་ཀྱང་སེམས་ལ་གནོད་པ་འབྱུང་། དེ་སེལ་བ་ལ་འབོལ་གྱི་སྟེང་དུ་རྡོ་རྗེ་སྐྱིལ་ཀྲུང་བཅའ། ཁུ་ཚུར་གཉིས་དཔྱིའི་ཐད་ཀར་ས་ལ་བཙུག །འཇམ་རླུང་བཟུང་ཞིང་བརྡབ་ཆུང་ཡང་ཡང་བྱ། རང་གིས་མ་ནུས་ན་གྲོགས་ཀྱིས་སྣམ་ཕྱར་དུ་བཞག་ནས་རན་ཙམ་རྡེབ་བཅུག །སྨན་ནི་ཨ་བར་སྐྱུར་གསུམ། ཛཱ་ཏི། ཨ་ག་རུ། ཕྱུགས་ཆེན་གྱི་སྲེ་ལོང་རྣམས་ཁྲམ་ཁྲུམ་བརྡུང་། དེ་རས་དཀར་དྲི་མེད་དུ་བསྟུམས་ལ་ཆང་གར་སླ་རན་པར་ཕུལ་གསུམ་གྱི་ནང་ཕུལ་གང་མ་རེད་བར་དུ་གདུ། ངར་ཅུང་ཟད་ཡལ་བ་དང་བཏང་ཞིང་གོས་དྲོ་བར་གྱོན་ལ་རྡུལ་ཐོན་པར་བྱས་པས་སེལ་ལོ། །སྲོག་འཛིན་གྱི་རླུང་འཁྱམས་པ་ལ། རླུང་དང་རྣམ་ཤེས་ནང་དུ་སྡུད་མི་ཤེས་པར་ཕྱི་རུ་ཧད་དེ་འཕྱོ་བ་དང་། དྲན་ [10a] མེད་དུ་བརྒྱལ་བ་སོགས་འབྱུང་སྟེ། བཅོས་ཐབས་ནི། རྣམ་སྣང་ཆོས་བདུན་དང་ལྡན་པའི་ངང་ནས་སྒོ་གསུམ་ཀློད་ལ་མཉམ་བཞག་བསྐྱང་། སྐབས་སུ་དྲག་རླུང་མིན་པ་འཇམ་རླུང་ལ་བརྟེན། སྨན་ནི་ཨ་རུ་ར་ནག་པོ། སྙིང་ཞོ་ཤ ། ཛཱ་ཏི། ཕོ་རིལ། པི་པི་ལིང་། གོ་སྙོད། ཤ་ཆེན། ཤིང་ཀུན་རྣམས་བུར་ཆང་དུ་སྦྱར་ནས་བཏང་། རྡུལ་ཐོན་པའི་གོས་ཀྱིས་ཡིབ་ན་སེལ་ལོ། །སྤྱིར་སྲོག་རླུང་གི་སྐྱོན་འདི་རྣམས་ལ་གསོ་རིག་པ་རྣམས་ཀྱིས་རྒྱལ་པོའི་གནོད་པར་ངོས་བཟུང་སྟེ། རྒྱལ་ནད་མ་ཡིན་ལ་ཉམས་ལེན་ཅན་ལ་ཉམས་ལེན་གྱི་རྟགས་ཡིན་པས་སྨན་པ་སྤང་དགོས། གཉིས་པ་ཐུར་སེལ་གྱི་རླུང་ནི། ལྟེ་བ་རྩ་གསུམ་འདུས་མདོ་མན་ཆད་ལ་གནས། བྱེད་ལས་ནི་དྲི་ཆེན་དྲི་ཆུ་ཁམས་དཀར་དམར་གྱི་འབྱིན་སྡུད་བྱེད། ཁྱད་པར་དུ་སྤྱི་གཙུག་ནས་གསང་བའི་བར་གྱི་བདེ་བ་གཡོ་བར་བྱེད་དོ། །གེགས་ཞུགས་པའི་རྟགས་སུ། དང་པོ་ཐུར་སེལ་གྱི་རླུང་འཚང་བ་ལ། གྱེན་རྒྱུ་དང་བསྡོངས་ནས་སྨད་དུ་འཚང་ནས་འོག་རླུང་མི་ཐོན་ཞིང་སྦོས་པ་དང་རྩ་ཆུ་འགགས་པ་འབྱུང་སྟེ། དེ་མྱུར་དུ་མ་བཅོས་ན་སྲོག་ལ་ཉེན་པའི་ཕྱིར། སྟན་དྲོ་འཇམ་གྱི་ཁར་ལུས་གནད་གླིང་བཞི་མཐའ་སྡུད་བྱས་ལ་ [10b] སྟེང་རླུང་ཆིལ་གྱིས་མནན། ཧཱུྃ་གི་སྒྲ་དང་བཅས་པས་འོག་རླུང་ནར་གྱིས་དྲངས། རྒྱུ་ཞབས་སྒལ་པ་ལ་སྦྱར། དེ་ལྟར་སྟེང་འོག་གི་རླུང་མནན་འཐེན་རེས་མོས་སུ་བྱ། སྐབས་སུ་ཟོ་ཀློད་ལ་ངལ་གསོ་བར་བྱའོ། །སྨན་བཅོས་ནི་ཚ་བ་གསུམ་དང་ཅོང་ཞི་ལྔ་འགྱུར་ཆང་དུ་བསྐོལ་བ་སྐམ་པོའི་ཕྱེ་མ། ཨ་རུ་ར་དང་སྒ་སྐྱའི་ཐང་གིས་འཕུལ་ལ་གོས་དྲོན་མོར་བྱས་པས་སེལ་ལོ། །ཐུར་སེལ་གྱི་རླུང་འཁྲུག་ན། ལུས་བདེ་མི་བདེ་རེས་མོས་དང་། དྲི་ཆེན་དྲི་ཆུ་བཤལ་སྡོམ་བྱེད། ཕོ་བ་ཚ་རླབས་དང་སྐབས་སུ་འཁྱག་སྣང་ཤར། དེ་སེལ་བའི་ཐབས་ནི། ལྟེ་འོག་ཏུ་ཕྱིང་སྣམ་མེ་ལ་བསྲོས་པའི་ཕ་རྡོ་རང་གི་མགོ་ཙམ་བཅུག་པའི་སྟེང་དུ་ཁ་སྦུབ་ཏུ་ཉལ་ཞིང་། རྐང་པ་བརྐྱང་བསྐུམ་རེ་མོས་ཀྱིས་རྟིང་པ་འཕོངས་ལ་རན་པར་བརྡུང་། ལག་པ་གཉིས་ཀྱིས་ཨོག་མ་འདེགས། དེས་ཀྱང་མ་ཕན་ན་གྲོགས་ཤེད་ལྡན་གཅིག་གིས་རྐང་པ་གཉིས་ཕྲག་པར་བཀལ་ནས་ཁུར་ཏེ། རྒྱབ་གཉིས་སྤྲད་ལ་དྲག་ཏུ་འཕག་བཅུག །སླར་ཡང་གོང་ལྟར་ཁ་སྦུག་ཏུ་ཉལ་ནས་ཨ་འདངས་བརྒྱད་པ་མན་ཆད་ཁུ་ཚུར་གྱིས་རན་པར་བརྡུང་བཅུག །སྐབས་སུ་ལུས་ཐམས་ཅད་འཕུར་སུབ་བྱ་ཞིང་རླུང་རོ་སེལ་ལོ། །སྨན་ནི། པི་པི་ལིང་། ཀ་ཀོ་ལ། རྒྱམ་ཚྭ། ལྒ་ [11a] སྐྱ། འུ་སུ། སེ་འབྲུ། ཤིང་ཚ་རྣམས་བཏུལ་བས་བདུན་འགྱུར་གྱི་ཅོང་ཞི་ནས་ཙམ། ཨ་རུ་ར་གསེར་མདོག་ཤ་རུས་དང་བཅས་པ་བརྡུངས་ནས། ཆུ་ཕུལ་ཕྱེད་དུ་གདུས་ནས་སྐམ་ལ་ཞིབ་པར་བྱས་ཏེ་ཆུ་སྐོལ་གྱིས་ཕུལ། རིག་མ་དྲོད་ལྡན་གྱི་ཕོ་བ་དང་སྦྱར་བས་སེལ་ལོ། །ཐུར་སེལ་གྱི་རླུང་སྟོང་ན། འོག་རླུང་མི་ཐུབ། ཁོག་སྨད་ལྗི། སྨད་ཀྱི་རྩ་རྒྱུས་རྣམས་དང་། ཕོ་བ་གཡས་གཡོན་མདུན་སོགས་ན་ཞིང་གཟེར་བ་འོང་། བཅོས་ཐབས་ཙོག་པུར་པུས་འཁྱུད་ཀྱི་འཇམ་རླུང་བཟུང་། སྲིན་ལམ་དབྱེ་བཙུམ་མང་པོ་བྱས་པས་ཕན། སྨན་ལ་ལྒ་སྐྱ། ཕོ་བ་རིལ། པི་པི་ལིང་། རྒྱ་ཚ། ཤིང་ཚ། ཛཱ་ཏི་རྣམས་བཏུལ་ལ་རུས་ཐང་ཞག་མེད་ཀྱིས་ཕུལ། བཅུ་དྲུག་མདོ་ལ་རྭ་ཚུག་དང་ཕོ་བར་བསྲོས་བྱས་པས་སེལ་ལོ། །གསུམ་པ་གྱེན་རྒྱུའི་རླུང་ནི། མདུན་ཕྱོགས་ཀྱི་རྩ་ནས་མགྲིན་པར་རྒྱུ་ཞིང་། བྱེད་ལས་ནི་སྨྲ་བརྗོད་གླུ་དབྱངས་ཅ་ཅོ་རྣམས་བྱེད། གལ་ཏེ་རླུང་དེ་ལོག་ན་ནད་ཕལ་ཆེར་བསྐྱེད་པའི་རྒྱུ་བྱེད་པའོ། །དང་པོ་ཐུར་སེལ་གྱི་རླུང་དང་བསྡོངས་ནས་སྟོད་དུ་འཚངས་ན། རྟགས་ནི་རོ་སྟོང་གཟེར་ཞིང་སྐད་མི་ཐོན། དབུགས་ཁ་རྒོད། འོག་སྒོ་དབྱེ་བཙུམ་མི་ཤེས་པ་འོང་། [11b] དེ་མ་བཅོས་ན་མྱུར་དུ་འཆི་བར་འགྱུར། བཅོས་ཐབས་ནི། སྟེང་རླུང་མི་བཟུང་བར་འོག་སྒོ་དྲག་ཏུ་བསྡམ། སྐབས་སུ་འོག་སྒོ་ཀློད་ལ་འབེབས་བྱ། རང་གིས་མ་ནུས་ན་གྲོགས་གཉིས་ཀྱིས་སྣམ་ཕྱར་སྟེང་དུ་བཞག་ནས་རན་པར་བརྡབ། སྨན་ནི་ཤ་ཆེན་གྱི་གདུང་ཐང་སྨན་ཚ་བ་གསུམ་བཏབ་ལ་བཏང་། དེ་རྗེས་ཆང་གར་མ་བསྐོལ་བ་ཅུང་ཟད་བཏང་། གོས་དྲོ་བར་གྱོན་ལ་རྡུལ་ཐོན་པས་སེལ་ལོ། །གྱེན་རྒྱུའི་རླུང་འཁྲུག་ན། རོ་སྟོང་ལྕགས་ཕུར་བཏབ་པ་ལྟར་གཟེར། གོང་མ་དང་ཆ་འདྲ་ཞིག་འབྱུང་སྟེ། མི་ནོར་བའི་རྟགས་སུ་འོག་སྒོ་དབྱེ་བཙུམ་ཤེས། གཟེར་ཟུག་གོང་མ་བས་ཆུང་། སེལ་ཐབས་གང་དུ་ན་བའི་གཟེར་མིག་དེ་རུ་གྲུ་གུ་ཁུ་ཚུར་ཙམ་ཞིག་བཅིངས་ཏེ། གྲོགས་ཤེད་ལྡན་ཞིག་གིས་པང་གིས་བཏབ་ལ་དྲག་ཏུ་སྤྲུག་ཅིངས་ལ་དལ་བུས་བཞག །སྐབས་སུ་རོ་སྟོད་ན་སར་ཁུ་ཚུར་གྱིས་རན་པར་བརྡུང་། བཀུ་མཉེ་བྱས་ལ་འཕུར། རླུང་བུམ་པ་ཅན་བཟུང་། སྨན་བཅོས་ནི། མི་ནོར་གྱི་རུས་ཁུར། ཛཱ་ཏི། ཨ་ག་རུ། སྒོག་སྐྱ། ཁ་རུ་ཚ་རྣམས་བཏབ་ལ་བཏང་། ངེས་སེལ་བར་འགྱུར་རོ། །གྱེན་རྒྱུའི་རླུང་སྟོང་པ་ལ། མགོ་འཐོམ་པ་དང་སྟོད་མི་བདེ། [12a] རླུང་ནུས་ཆུང་། བྱང་ཁོག་སྟོང་ཧད་དེ་བ་འབྱུང་། བཅོས་ཐབས་གདན་དྲོ་འཇམ་གྱི་སྟེང་དུ་ཙོག་པུ་སྒོམ་འཁྱུད་ཀྱིས་རླུང་བུམ་པ་ཅན་བཟུང་། རླུང་འབྱིན་འཇུག་གི་ཚེ་ཤིན་ཏུ་དལ་བར་བསླབ། སྨན་ནི་ཛཱ་ཏི། ཨར་ནག །སུཀྨེལ། རུ་རྟ། ཤིང་ཀུན་རྣམས་ཞིབ་པར་བཏུལ་ལ། སིང་པོ་ཚ་མོས་ཕུལ། གོས་དྲོན་མོ་གྱོན། ཟས་བཅུད་ཅན་བསྟེན་ན་སེལ་བར་འགྱུར་རོ། །བཞི་པ་མེ་མཉམ་གྱི་རླུང་ནི། ཕོ་བ་ལ་གནས་འཆའ་ཞིང་བཟའ་བཏུང་དྭངས་སྙིགས་འབྱེད་པར་བྱེད། དེ་ལོག་ན་འཁྲུ་སྐྱུག་དང་མ་ཞུ་ཕོ་ནད་ཐམས་ཅད་སྐྱེད་པར་བྱེད། དེ་ཡང་མེ་མཉམ་གྱི་རླུང་གང་བའི་རྟགས་ནི། སྟོང་སྦོས་བྱེད་ཅིང་དང་ཀ་འགག །བཀྲེས་པའི་དུས་སུ་ན་བར་བྱེད། སྨན་པས་བད་ཀན་མྱག་བྱེད་ཕོ་བར་འཁྱིལ་བར་ངོས་བཟུང་སྟེ། འདི་ནི་མེ་མཉམ་གྱི་རླུང་ཕོ་བར་འཁྱིལ་བ་ཡིན། དེ་བཅོས་པའི་ཐབས་ནི། བདེ་བའི་གདན་ལ་སྐྱིལ་ཀྲུང་ལག་གཉིས་པུས་མོའི་སྟེང་དུ་བཀབ་ལ། འཛིན་རླུང་གསར་རྙིང་བརྗེ། ཕོ་སྐོར་མང་དུ་བྱ། རྗེས་སུ་རླུང་བཟུང་ལ་ལག་གཉིས་ཀྱིས་ཕོ་བ་དྲག་ཏུ་འཕུར། སྒྲེགས་པ་འདོན་པར་བྱའོ། །སྨན་ནི། སེ་འབྲུ། སུཀྨེལ། ཙི་ཏྲ་ཀ ། པི་པི་ [12b] ལིང་། ལྒ་སྐྱ། ཚ་ལ་རྣམས་བཏུལ་བ་ཆུ་བསྐོལ་གྱིས་ཕུལ། དེས་ནི་སྟོང་སྒྲགས་མང་པོའམ་སྐྱུག་པ་འབྱུང་སྟེ་དེས་སེལ་བར་འགྱུར་རོ། །མེ་མཉམ་གྱི་རླུང་ལྷུང་ན། ཚ་ལྷུང་གི་རྟགས་ནི། སྒྲ་མེད་དུ་འཁྲུ། འཁྲུ་མདོག་ཡང་སེར་པོའམ་དུད་ཁུ་ལྟ་བུའམ། ཁྲག་ཏུ་འཁྲུ་བའམ། ཆུ་རུ་འཁྲུ་ཞིང་ཅུང་ཟད་གཟེར། གྲང་རླུང་ནི་ཕོ་བ་སྒྲོག་ཅིང་སྒྲ་དང་བཅས་ཏེ་འཁྲུ། འཁྲུ་མདོག་ཀྱང་ཟས་གང་ཟོས་ཀྱི་མདོག་ཏུ་འབྱུང་། སྐབས་སུ་བེ་སྣབས་ལྟ་བུར་འབྱུང་། དེ་སེལ་ཐབས་རྣམ་སྣང་ཆོས་བདུན་བཅའ་ལ་རླུང་བུམ་པ་ཅན་བཟུང་། ཕོ་བ་གཡས་གཡོན་དུ་སྐོར་བ་མང་དུ་བྱ། དེ་ནས་ལག་པ་གྲུ་མོར་བཟུང་ཞིང་བསྣོལ་ཏེ་སྨིན་མཚམས་སུ་བཏེགས་ལ་ཕོ་ཁར་བརྡེག །དེ་ཡང་དང་པོ་དལ་བུས་བྱ། དེ་ནས་ཇེ་དྲག་ཇེ་དྲག་ཏུ་རྡེག་པ་ཤེས། དེ་ཚེ་རླུང་དགང་བ་གནང་ཡིན། དེ་ནས་ཕོ་བ་དྲག་ཏུ་འཕུར་ལ་འོག་སྒོ་འཐེན་ཕུལ་བྱེད། སྨན་ནི་ཚ་ལྷུང་ལ་ཨ་རུ། སུར་ནག །ཙོད། རྙ་ལོ། ཁ་རུ་ཚ། བྲག་ཞུན། རྒྱམ་ཚ་རྣམས་ཆུ་བསྐོལ་དྲོ་འཇམ་གྱིས་ཕུལ། གྲང་ལྷུང་ལ། སྨན་ཚ་བ་གསུམ། ཁ་རུ་ཚ། ལྕ་བའི་འབྲས་བུ་རྣམས་ཨ་རག་གམ་ཆང་གིས་ཕུལ་ལོ། །འདི་ལ་སྨན་པ་རྣམས་ཀྱིས་ཕོ་བའི་མཁྲིས་པར་ངོས་འཛིན་པ་ [13a] འབྱུང་སྟེ། འདི་ནི་མེ་མཉམ་ཀྱི་རླུང་སྟོབས་ཉམས་པ་ཡིན་ནོ། །ནད་ཟུག་སེལ་ཡང་འཁྲུ་བ་མ་ཆོད་ན། འབྲས་ཚོད་དུ་རམ་ཕྱེ་བཏབ་པའམ། མོན་ཆ་ར་དང་དན་དྲིག་གི་ཐང་། ཚ་ལྷུང་ལ་དྲོ་འཇམ། གྲང་ལྷུང་ལ་ཚ་ངར་མ་ཡལ་བས་ཕུལ་ན་སེལ་ལོ། །ལྔ་པ་ཁྱབ་བྱེད་ཀྱི་རླུང་ནི། གཡས་ཕྱོགས་རོ་མ་དང་འབྲེལ་ནས་ལུས་ཀྱི་ཚིགས་པ་ཐམས་ཅད་ལ་གནས། བྱེད་ལས་ནི་ལུས་ཀྱི་སྟོབས་བསྐྱེད་ཅིང་འགྲོ་འདུལ་ལ་སོགས་པའི་ལས་བྱེད། གལ་ཏེ་རླུང་དེ་ལོག་ན། ཞ་འཁུམ་རེངས་པ་སོགས་ཀྱི་གེགས་སྐྱེད་པར་བྱེད། དང་པོ་ཁྱབ་བྱེད་ཀྱི་རླུང་རེངས་པའི་རྟགས་ནི། ཡན་ལག་གློ་བུར་དུ་རེངས་པ་དང་། འཁུམ་པ་དང་། སྦྲིད་པ་དང་། ཀླད་ཡུ་འཁོར་བ་སོགས་འབྱུང་། དེ་སེལ་བའི་ཐབས་ལ་འབོལ་གྱི་སྟེང་དུ་རྐང་པ་ཤད་ཀྱིས་བརྐྱངས་ལ་འདུག་སྟེ། ཧ་རིང་གི་རླུང་རོ་ཕྱུང་ལ་གསར་པ་དལ་གྱིས་རྔུབ་ཅིང་ལུས་ཐམས་ཅད་འཕུར་སུབ་བྱ། རྗེས་བཀུ་མཉེ་བྱ་ཞིང་རླུང་མི་བཟུང་བར་ངལ་གསོ། སྨན་ནི་ལྒ་དམར། དྲོད་སྨན་རིལ་འཇོང་གཉིས། ལྕེ་ཚ་རྣམས་ཆང་གིས་ཕུལ། བཟའ་བཏུང་དྲོད་བཅུད་ཅན་བསྟེན་པས་སེལ་ལོ། །ཁྱབ་བྱེད་ཀྱི་རླུང་སྟོང་ན། ལུས་འདར་བ། ཁ་སོ་སྦྲིད་པ། ལུས་ [13b] སྤྱིའི་ཤེད་ཆུང་། དབང་པོ་མི་གསལ་བར་ཟ་ཟི་བྱེད། དེ་སེལ་ཐབས་ལ། བདེ་རླུང་ཕོ་བར་བསྐྱིལ་བ་ལ་ལུས་ཀྱི་སྤྱི་བོ་ནས་རྐང་མཐིལ་བར་དུ་འཕུར་སུབ་བྱ། ས་གྱེན་ཐུར་ཅུང་ཟད་ཡོད་སར་རླུང་སྦྱོར་ངང་ནས་རྒྱུག་མཆོང་མང་དུ་བྱ། སྐབས་སུ་རྩལ་ཤུགས་དང་རྩེད་མོའི་རྣམ་འགྱུར་གྱིས་ཁམས་གསེང་ངོ་། །སྨན་ནི་ར་མོ་ཤག །ཀ་ནི་ཀ་ཤ་ཀ་ངྷ། མཚེ། ཤུག་འབྲུ། སྒོག་པ། དབང་ལག་རྣམས་ཀྱི་ཞུན་ཆུ་བཅད་པ། བུ་རམ་མར་དཀར་སྦྱར་བས་བརྟེན། བད་ཀན་ཆེ་ན་བུ་རམ་ཚབས་སུ་སྦྲང་རྩི་དང་སྦྱར། དྲོད་བཅུད་དང་ལྡན་པའི་ཟས་གོས་བསྟེན་པར་བྱས་ན་སེལ་ལོ། །ཁྱབ་བྱེད་ཀྱི་རླུང་འཁྲུགས་ན། ལྤགས་པ་རྣམས་བརྩེད་ཞིང་བྲང་བྲུམ་བྱེད། ལུས་འདར་ཞིང་བ་སྤུ་ཟེར་བ། ཡན་ལག་གི་རྩ་རྒྱུས་རྣམས་ན་ཞིང་རྐང་ལག་བརྐྱང་བསྐུམ་བྱེད་སྙིང་འདོད། ལུས་ཐམས་ཅད་ཁབ་ཀྱིས་བཙག་པ་ལྟར་ཚ་ཙག་ཙག་བྱེད་པ་འབྱུང་། སེལ་བའི་ཐབས། སྟན་བདེ་ལ་ཆེ་བར་བསྡད་ནས། ལག་གཉིས་ཀྱིས་དང་པོ་པུས་མོ་འཕུར། དེ་ནས་བརླ་གཉིས། རྩིབས་ལོགས་གཉིས། བྲང་། ལག་པ་གཡས་གཡོན། མཇིང་པ། མགོ་རྣམས་འཕུར་བའི་རྗེས་ལ་སེངྒེ་རྣམ་རོལ་བྱ། རླུང་རོ་འབྱིན་པ་དང་མཉམ་ [14a] དུ་ལག་པ་སོར་མོ་དང་བཅས་པ་སྤྲུག །མཐར་ལངས་ཏེ་ལག་གཉིས་འཕྲད་ཤིང་ལ་བཟུང་ནས། རྐང་པ་རེས་མོས་ཀྱིས་སྤྲུག་པ་བྱས་རྗེས། རྐང་མགོ་མིན་པར་བསོད་སྣམ། མཐར་རས་ཀྱིས་དམ་ལྷོད་རན་པར་དཀྲིས་ཤིང་། རང་གིས་རླུང་དྲག་ཏུ་བཟུང་ནས། གྲོགས་ཤིག་གིས་ཕྱིང་པ་བླིང་བ་ལྟར་དལ་བུས་སྒྲིལ་ཏེ། ལུས་ཐམས་ཅད་རྡུལ་ཞུམ་གྱིས་འབྱུང་ཞིང་དབང་པོ་དྲན་མེད་བརྒྱལ་བ་དང་བཞག་ལ། དཀྲིས་པ་ཀློད་ཅིང་རྡུལ་ཆུ་རྣམས་ཕྱེ་ཞིབ་ཀྱིས་བྱུག་ལ་འཕྱི། དེ་ནས་རླུང་མི་བཟུང་བར་སྒོ་གསུམ་ཟོ་ཀློད་པར་བྱའོ། །སྨན་གྱིས་འཆོས་པ་ལ། ཕྱུགས་ཆེན་གྱི་སེ་ལོང་བསྐོལ་བ་དྲོ་འཇམ་ནད་ཚབ་དང་བསྟུན་ལ་བཏང་། དེ་ནས་ཨ་བར་སྐྱུར་གསུམ། བ་ཤ་ཀ ། ཨ་ཀྲོང་། འབྲས་བུ་གསུམ། ཧོང་ལེན་རྣམས་ཚ་ཤས་ཆེ་ན་སྦྲང་། གྲང་ཤས་ཆེ་ན་བུ་རམ་དང་སྦྱར་ལ་བཏང་། བཟའ་བཏུང་བསིལ་དྲོད་སྙོམས་པར་བརྟེན། ལུས་མི་བསྐྱོད་པས་བཀྲུ་ཞི་བཀུ་མཉེ་བྱ། དེ་ལྟར་རྩ་བའི་རླུང་ལྔའི་གེགས་སེལ་རྣམས་ལ་སྔ་གོང་ནས་གོམས་པར་བྱས་ལ་བཅོས་ཉེས་སུ་མ་སོང་བ་གལ་ཆེ། སྐབས་སུ་གཏུམ་མོའི་འཁྲུལ་འཁོར་རྣམས་བྱས་པས་ཀྱང་སེལ་བར་འགྱུར་རོ། །གསུམ་པ་སེམས་ [14b] ཐིག་ལེའི་གེགས་སེལ་ལ། དང་པོ་ཐིག་ལེ་ནད་ཀྱིས་སྐམ་པ་ནི། ཉམས་ལེན་གྱི་འཕྲོ་ལ་ནད་ཀྱིས་ཡུན་རིང་དུ་སྦྱང་བའམ། གློ་བུར་གྱི་ནད་དྲག་པོ་ཐེབ་པའི་རྐྱེན་གྱིས་ཐིག་ལེ་སྐམ་སྟེ། ལུས་ཀྱི་མདངས་ཉམས། ཤ་སྐམ། ཤེད་ཆུང་། སྐོམ་དད་ཆེ་བར་འབྱུང་། དེ་སེལ་ཐབས་ནི་བུམ་པའི་རླུང་གིས་སྦྱོར་བའི་བསྐྱེད་རིམ་ལྷའི་རྣལ་འབྱོར་གྱིས་ཐིག་ལེ་སྤེལ། འོ་མ་བསྐོལ་བར་གངས་སྦལ་གྱི་ཤ་བཏབ་ནས་བཏང་། ཡིད་དུ་འོང་བའི་གཟུངས་མ་དང་ཆགས་པ་གསོ་བའི་གཏམ་བྱ། ཁམས་མི་དབབ་པར་དབང་པོ་སྦྱོར་བས་སེལ་ལོ། །ཐིག་ལེ་གདོན་གྱིས་སྐམ་པ་ནི། རྣལ་འབྱོར་པ་ལ་མི་གཙང་བའི་གྲིབ་ཀྱིས་ཕོག་པས་མཁའ་འགྲོ་གཡེལ། བསེན་མོའི་རིགས་ཐིག་ལེ་ལ་ཞུགས་ནས་ལུས་སྔ་མ་བས་ཀྱང་ཇེ་ངན་དུ་སོང་། དབང་པོ་འཐིབ། ཤེས་པ་གཡེངས། ཁམས་ཉོག །ལུས་ལྕི་བར་འབྱུང་སྟེ། ཡི་དམ་གྱི་ང་རྒྱལ་བསྐྱེད་ནས་དྲག་སྔགས་བཟླས་ན་སེལ་ལོ། །ཐིག་ལེ་བཟའ་བཏུང་གིས་སྐམ་པ་ནི། ལན་ཚྭ་ཚོད་མེད་དུ་བརྟེན་པ། ཟྭ་ཚོད་དང་སྔོ་ངད་ལ་སོགས་ཡུན་རིང་ཟོས་པ། མར་ཁུ་འོ་མ་དང་སྣུམ་ཚིག་གི་རིགས། རྗེན་ཟས་ཡུན་རིང་དུ་སྤྱད་པས་བྱེད་དེ། དེའི་རྟགས་སུ་དབང་ [15a] པོ་འཐིབ། ལུས་ཀྱི་བཀྲག་ཡལ། ཤེས་པ་འཕྱོ། རྐང་ལག་གི་མཐིལ་སྐམ། དང་ཀ་འགག །ཆགས་པ་མི་སྐྱེ། གསང་རྡོར་ལས་སུ་མི་རུང་། དེ་སེལ་བ་ལ་གནོད་རྐྱེན་དེ་རྣམས་སྤངས་ཤིང་ཟས་བཅུད་ཅན་རྣམས་ཁམས་དང་འཕྲོད་པར་བརྟེན་པས་སེལ་ལོ། །ཐིག་ལེ་སྤྱོད་ལམ་གྱིས་སྐམ་པ་ནི། ཉིན་མཚན་དུ་གཉིད་ལོག་པ། རྟ་རྒྱུག་དང་དྲག་ཤུལ་གྱི་ལས་བྱས་པ། མེ་ཆེན་པོས་ཚིག་པར་བསྲོས་པ་སོགས་ཀྱིས་འབྱུང་། སེལ་བའི་ཐབས་ལ་གོང་དུ་བཤད་པའི་སྤྱོད་ལམ་རྣམས་སྤངས། གཞུང་ལུགས་དང་མཐུན་པའི་སྤྱོད་ལམ་རྣལ་མར་བྱ། སྐམ་པའི་རིགས་དེ་དག་ཐམས་ཅད་ལ་ཕན་པའི་སྨན་ནི། བ་ལུ་དཀར་པོའི་ལོ་མ། ཤུག་གུ་ཚེར་མ་ཅན། མཚེ། འོམ་བུ། མཁན་དཀར། སྲོ་ལོ། སྤང་སྤོས། བུར་སྦྲང་ཆུ་བཅད་པ་རྣམས་ལྡེ་གུར་སྦྱར་ནས་ཐོ་རེངས་བྱ་སྒོང་ཙམ་རེ་བཟའ། རིག་མའི་བཀུ་མཉེ་དང་། ཐིག་ལེ་འཕེལ་བའི་སྤྱོད་ལམ་དམིགས་པ་རྣམས་ལ་འབད། གོང་དུ་བཤད་པའི་གདོན་རྐྱེན་རྣམས་སྤངས་ལ་ལུས་མ་འཁྱག་པར་བྱ། བརླན་གཤེར་ལ་འཛེམ་ན་ཐིག་ལེ་སྐམ་པ་སོར་ཆུད་ནས་ལུས་སྟོབས་རྒྱས་པར་ [15b] འགྱུར་རོ། །ཐིག་ལེ་རུལ་བ་ནི། འཁྲུལ་འཁོར་དང་དགེ་སྦྱོར་གྱི་འབད་རྩོལ་ཆུང་ཞིང་། ཟས་བཅུད་ཅན་དང་ཆང་བག་མེད་དུ་བཏུང་བ། ཉིན་པར་གཉིད་ལོག་པ་སོགས་ཀྱིས་བྱེད། དེ་མ་བཅོས་ན་མཛེ་དང་དམུ་ཆུར་འགྱུར། དེའི་རྟགས་སུ་དང་པོ་ཆགས་པ་སྐྱེ། སྦྱོར་བ་བརྩམ་པ་དང་རྡོ་རྗེ་ལས་སུ་མི་རུང་། ལུས་ལ་ཤ་རུལ་མནམ། ཁམས་ཀྱི་མདོག་རྣག་ལྟ་བུར་རང་བཞིན་གྱིས་འཛག །ཉིན་མཚན་མེད་པར་གཉིད་བྲོ། གེགས་དེ་སེལ་བ་ལ། ཕྱག་བསྐོར་ལ་སོགས་ཤེད་མི་བསྐྱེད་པའི་ལས་མང་པོ་བྱ། སྨན་དཔྱད་ནས་འབྱུང་བ་ལྟར་བད་ཀན་རྩ་བཤལ་བཏང་། ཕྱི་དྲོའི་ཁ་ཟས་ལོ་ཟླ་ཙམ་རིག་པས་དཔྱད་ལ་བཏང་། དེའི་ཚེ་ལུས་བདེ་ཞིང་སྣང་བ་བདེ་དུས་སུ་ཕྱག་རྒྱ་མ་ལ་ཁམས་ཡང་ཡང་དབབ། དེ་ནས་ག་བུར། གུར་གུམ། ཙནྡན་དཀར་དམར། ཅུ་གང་། ཨ་རུ་ར་རྣམས་ལེགས་པར་བཏུལ། དེ་དང་ཆ་མཉམ་པའི་ཅོང་ཞི་འོ་མར་བཙོས་པའི་ཕྱེ་མ་དང་བསྲེས་ལ་ཐོ་རེངས་སུ་བཏང་། མེ་དང་ཉི་མ་ལ་ཡུན་རིང་མི་བསྲོ། དེས་སེལ་བར་འགྱུར་རོ། །ཐིག་ལེ་ཆུ་སེར་དུ་སོང་བའི་གེགས་ནི། ཐིག་ལེ་བསྐྱིལ་བ་ཙམ་ལ་བརྟེན་ནས་ལུས་ལ་མ་ཁྲེམ་པ་ལས་ [16a] འབྱུང་། དེའི་རྟགས་སུ་མདོག་སེར། ཆགས་སྲེད་རྒྱས། ཐིག་ལེ་འཛིན་འདྲེན་མི་ནུས། ལུས་ཤིན་ཏུ་ལྗི་ཞིང་ཟ་བ་དང་སྤྲིད་པར་བྱེད། རླུང་སེར་མི་ཐུབ། སྐྲ་དང་སྨིན་མ་བྱི། སྔར་ལྟར་མཛེའམ་དམུ་ཆུར་འགྱུར། དེ་སེལ་བའི་ཐབས་ལ་ཐིག་ལེ་འབར་འཛག་གི་དམིགས་པ་དང་འཛིན་འདྲེན་གྱི་རླུང་སྦྱོར་ལ་འབད། སེངྒེ་རྣམ་རོལ་གྱིས་ཡང་ཡང་དགྲམ། སྐབས་སུ་རིག་མ་ལ་ཁམས་དབབ་པས་སེལ་ལོ། །སྨན་ནི་སེང་ལྡེང་། སྲོ་མ་རཱ་ཙ། མགྲོན་བུ། ཤ་རུ། དུར་ཁྲོད་རྣམས་བསྲེག་པའི་ཐལ་བ། ཙི་ཏྲ་ཀ ། སྤོས་དཀར། སྦུར་ལེན་རྣམས་བཏུལ་ཞིང་། གུ་གུལ་ཆུ་ལ་སྦྱང་བ་བླུགས་ནས་འདམ་ཐག་བྱ། དེ་རིལ་བུ་སྲན་མ་ཙམ་དུ་སྒྲིལ་ལ་གྲིབ་སྐམ་བྱ། རིལ་བུ་ལྔ་ལྔ་རེ་མཚེ་དང་སེང་ལྡེང་ཐང་གིས་ཕུལ་ལ་ལྟོ་སྟོང་ལ་བརྟེན་པས་སེལ་ལོ། །གལ་ཏེ་དེས་ཀྱང་མ་སེལ་ན། རྒྱ་ཚྭ། རྒྱམ་ཚྭ། ཁ་རུ་ཚྭ། སྡིག་སྲིན། མཚལ་དཀར། དན་རོག །སེང་ལྡེང་། ཉི་དགའ། པི་པི་ལིང་རྣམས་ཆང་གིས་ཕུལ། ཚ་ཤས་ཆེ་ན་ཁ་རུ་ཚྭ་ཆུ་བསྐོལ་གྱིས་ཕུལ་ལ་ཞག་ཉེར་གཅིག་ཙམ་བསྟེན། དེ་ནས་རྒྱ་མཚོ་གསེར་བྱེ། ཡུང་བ་སེར་པོ། སྐྱེར་པའི་ [16b] བར་ཤུན། རྒྱ་སྐྱེགས། ཞུ་མཁན། གླ་རྩི། གུ་གུལ། ཤིང་ཀུན། ཨ་རུ་ར། བྱང་བ་དུག་ཤོག་ཕུད་པ་དགུ་རྣམས་རྩི་བཞིན་བཏགས་ལ། བ་ཆུའི་ཁཎྜས་རིལ་བུ་དན་རོག་གི་ལྡོག་པོ་ཙམ་སྦྱར་བ། ལྕམ་པ། གཡེར་མ། སྡིག་སྲིན། གཟེ་མ་བཞིའི་ཐད་གིས་རིལ་བུ་དགུ་རེ་ཕུལ་ལ་ནང་མ་གསུམ་ཙམ་བཏང་། སྐབས་སུ་ལུས་དྲི་ཆུས་བཀྲུ་ཞིང་མར་དཀར་གྱིས་བྱུག །ཚ་བ་ལ་གཟེ་མའི་ཚབས་སུ་རྒྱ་ཁུར་བཏང་། ལུས་མ་འཁྱགས་པར་གོས་ཀྱིས་ཡིབ། སྐྱུག་བྲོ་ན་སྣ་ལ་བང་ཟན་བྱུག །དང་གར་རྡོ་གྲང་རླན་ལ་ཙོག་པུར་སྡོད། རྒྱུ་ཞབས་ན་ན་ཚ་བ་ལ་སྦང་སྐམ། གྲང་བ་ལ་ཡོས་བདུག་བྱའོ། །དེས་ནི་ཆུ་སེར་ཐམས་ཅད་བཤལ་ཏེ་འོང་། བཤལ་ཐེབས་གསུམ་གསུམ་ལ་ཆུ་བསྐོལ་སུན་རེ་བཏང་། ཧ་ཅང་ཟུག་ཆེ་ཞིང་འགྲིམ་དཀའ་བར་བྱུང་ན། རྒྱ་ཚ་དང་ཨ་རུ་རྩེར་ཉུང་གི་ཐང་བཏང་ངོ་། །སྨན་རིལ་དགུ་བས་མང་ཉུང་ལུས་ཉམས་དང་སྨན་ལྟོ་ཆེ་ཆུང་གི་ཤེས། ནད་ཚབ་ཆེ་ན་ལན་གསུམ་གསུམ་བསྐྱར། འབྲིང་ན་གཉིས། ཆུང་ན་གཅིག་གིས་ཆོག །ཚ་བ་ལ་བསིལ་དྲོད་སྙོམས་པའི་བཟའ་བཏུང་དང་། གྲང་བ་ལ་དྲོད་བཅུད་ཅན་གྱི་ཟས་བསྟེན་ [17a] པ་སྨན་གཞུང་སྤྱི་དང་མཐུན་པ་བྱས་པས་སེལ་བར་འགྱུར་རོ། །ཐིག་ལེ་ཉམས་པའི་གེགས་ནི། བཟའ་བཏུང་ཞག་གཅིག་དཀའ་ཐུབ་ཆེ་བ་དང་། སྲེད་པའི་དབང་གིས་ཕྱག་རྒྱ་མ་ལ་ཁམས་ཡང་ཡང་དབབ་པའི་སྐྱོན་གྱིས། མདོག་ཤོར། སྐྲ་དང་བ་སྤུ་གཟིང་། ལུས་དྲི་ངན་ཀུན། སེམས་མི་བདེ། དེ་བཅོས་ཐབས་ནི། བླ་མ་ཁྱད་པར་ཅན་ལ་གསང་སྔགས་ཀྱི་དབང་བཞི་ཞུ། ཚོགས་དང་སྐོང་བཤགས་བྱ། ཐིག་ལེ་སྤེལ་བ་དང་དགྲམ་པའི་དམིགས་པ་དང་འཁྲུལ་འཁོར་ལ་འབད། སྨན་ནི། འོ་མ་བསྐོལ་བའི་ནང་དུ་གངས་སྦལ་གྱི་ཤ་བཏབ་པ་བཏང་། བཟའ་བཏུང་དྲོད་བཅུད་དང་ལྡན་པ་བསྟེན་པས་གེགས་སེལ་ལོ། །ཐིག་ལེ་ཟག་པའི་གེགས་ལ། དང་པོ་བག་ཆགས་ཀྱི་འཛག་པ་ནི། རྨི་ལམ་དུ་སྔར་འདྲིས་ཀྱི་ཡིད་དུ་འོང་བའི་བུད་མེད་དང་འཕྲད་ནས་ཉལ་པོ་བྱས་པ་རྨིས་པས་འཛག །དེ་མ་བཅོས་ན་གནས་སྐབས་སུ་ལུས་སྟོབས་ཞན། མཐར་ཐུག་ཚེ་ལ་གཟན་པར་འགྱུར་བས། དེ་སེལ་ཐབས་ཆགས་པ་སྐྱེ་བའི་ཡུལ་དེ་ཡང་ཕྱི་ལྤགས་དང་སེན་མོ་བ་སྤུ་ཐམས་ཅད་ཀྱང་ཤིན་ཏུ་མི་སྡུག་པའི་རྣམ་པ། ནང་ཁྲག་རྣག་ཆུ་སེར་ལ་སོགས་མི་གཙང་ [17b] བའི་རྫས་དུ་མས་གང་བ། བར་རྩ་དང་ཆུ་རྒྱུས་ཀྱི་དྲ་བས་འབྲེལ་ཞིང་མྱུར་དུ་འཇིག་པའི་རང་བཞིན་ཅན་དུ་བལྟས་ལ། བདག་འདོད་ཆགས་རང་རྒྱུད་པར་སོང་བ་འདི་ཆེས་མ་ལེགས། འདོད་ཆགས་ཀྱི་རྟོག་པ་འདི་དང་མ་བྲལ་ན་ཐར་པ་ཐོབ་པའི་དུས་མ་མཆིས། བྱང་ཆུབ་ཀྱི་ལམ་དུ་མི་འགྲོ། བདེ་ལེགས་ཀྱི་འབྲས་བུ་མི་སྨིན། ས་ལམ་གྱི་ཡོན་ཏན་མི་སྐྱེ་བའི་ཕྱིར། འདོད་ཆགས་ཀྱི་ལས་ངན་པ་དེ་སྐད་ཅིག་ཙམ་ཡང་དྲན་པར་མི་བྱ་བསམ་ལ། རླུང་རོ་རྙིང་པ་སངས་ཀྱི་འབུད། གསར་པ་དལ་གྱི་བཟུང་ཞིང་། སྤྱི་བོར་བླ་མ་བསྒོམ་ལ་གསོལ་བ་ཕུར་ཚུགས་སུ་གདབ། ཡང་མཚན་ལྡན་གྱི་ཕྱག་རྒྱ་ཡིན་ན་ཡིད་དུ་མི་འོང་བ་བསྒོམ་དུ་མི་རུང་བའི་ཕྱིར། གཟུངས་མ་དེ་འོད་ཟེར་དུ་ལྷགས་ནས་རྡོ་རྗེའི་སྦུབས་སུ་ཞུགས་ཏེ་སྙིང་གར་ཐིམ། ཆགས་པ་དེ་རང་སེམས་བདེ་བ་ལས་ཕྱི་ན་མེད་པའི་བདེ་ཆེན་སྒྱུ་མ་ལྟ་བུར་ཡང་ཡང་བསྒོམས་པས་སེལ་ལོ། །ཐིག་ལེ་གདོན་གྱིས་འཛག་པ་ལ། ཤི་སྐྲ་ལ་མདུད་པ་གསུམ་བྱས་ནས་སྔགས་ནི། ཨོཾ་བཛྲ་ཀྲོ་དྷ་རཀྵ་དམ་སྲི་སྲོག་ལ་ཧུར་ཐུམ་རྦད། ཅེས་བཏབ་ནས་རྡོ་རྗེར་དཀྲི། རྡོ་རྗེ་ལྕགས་སྲེག་གི་ཕུར་པ་མེ་ལྕེ་ལྷབ་ལྷབ་འབར་བ་ཞིག་ཏུ་ [18a] གྱུར་པར་བསྒོམ། སྐབས་སུ་གཏུམ་མོའི་མེ་དམིགས་ཀྱི་ངང་ནས་སྤྱི་བོ་མ་གཏོགས་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་འུར་འུར་འབར་བས། གནོད་པ་བྱེད་པའི་གདོན་བགེགས་ཐམས་ཅད་ཐུལ་ཐུལ་བསྲེགས་པར་བསྒོམ། རླུང་རོ་དབྱུང་བའི་ཚེ་གདོན་བགེགས་གང་ཡིན་པ་དེ་མཐའི་ལྕགས་རིའི་རྒྱབ་ཏུ་གཏོར་བར་དམིགས་པས་ཀྱང་སེལ་ལོ། །ཡང་གསང་རྡོར་བཀྲུས་པའི་དྲི་ཆུས་ཟན་སྦྲུས་ཤིང་དབང་པོའི་རྡོ་རྗེ་གསུམ་བཅོས་ཏེ་ཁྱི་དཀར་ནག་ཁྲ་གསུམ་ལ་བྱིན་པས་ལོ་གསུམ་བསྲུང་ནུས་སོ། །ཐིག་ལེ་ནདཀྱིས་འཛག་པ་ནི། རྡོ་རྗེ་ལས་སུ་མི་རུང་བཞིན་རང་བཞིན་ནུ་རུ་རུ་འབྱུང་བ་དང་། དྲི་ཆུ་དང་བསྡོངས་ནས་འབབ་པ་ལ་སོགས་བཅོས་ཐབས་ནི། འཛིན་འདྲེན་དགྲམ་པའི་འཁྲུལ་འཁོར་ལ་ནན་ཏན་བསྐྱེད། སྨན་ལ་རྒྱ་ཚྭ། ཨ་འབྲས། འཇམ་འབྲས། སྲ་འབྲས། གསེར་གྱི་བྱེ་མ། སྡིག་སྲིན། སེ་འབྲུ། སུཀྨེལ། གི་ཝཾ། རྡོ་དྲེག །པི་པི་ལིང་། དོམ་མཁྲིས་རྣམས་བུ་རམ་དང་སྦྱར་ལ་ལན་མང་དུ་བཏང་། ཟས་གོས་དྲོད་བཅུད་བསྟེན། རླན་ལ་འཛེམ། སྐབས་སུ་བཀུ་མཉེ་བྱས་ན་ཕན། དེས་ཀྱང་མ་ཐུབ་ན། རང་གི་ [18b] གྲུ་མོས་སླེབ་པའི་མཁལ་ཁུང་གཉིས་དང་། ཨ་འོ་དང་བཅུ་དགུ་པའི་གཡས་གཡོན་ཚོན་རེ་གཞལ་བའི་སར་མེ་བཙའ་བཞག་པས་སེལ་བར་འགྱུར་རོ། །ཐིག་ལེ་ཁམས་འཁྲུགས་པས་འཛག་པ་ནི། ལྗིད་ཅན་པང་ཁུར་བྱས་པའམ། བརྡབ་པའམ། དྲག་ལས་སམ། བུད་མེད་ལ་སྤྱོད་དྲག་པའི་དབང་གིས། གསང་སྦུབ་གཟེར་ཞིང་ཚ་བ། དྲི་ཆུའི་ཁམས་ཀྱི་ནང་དུ་ཁྲག་དང་འདྲེས་མར་འབྱུང་། དམིགས་པ་དང་འཁྲུལ་འཁོར་གྱིས་ནད་སེལ་བ་དཀའ་བས། སྨན་ནི། ཨ་བར་སྐྱུར་གསུམ། བཙོད། འབྲི་མོག །རྙ་ལོ། ཞུ་མཁན། ལྕམ་པ། གཟེ་མ། ལི་ག་དུར་རྣམས་ཀྱི་ཐང་ནད་ཚབ་དང་བསྟུན་ལ་གསུམ་ལྔ་བདུན་གྱི་བཏང་ལུགས་བྱ། དེ་རྗེས་ཕྱུགས་ཆེ་ཆུང་གི་སྲེ་ལོང་དང་རྟའི་ཉྭ་གཞུག་གི་ཐང་བཏང་། དེ་ནས་ཨ་རུ་ར་གསེར་མདོག །གཡག་རྒོད་མཁྲིས་པ། རྙ་ལོ་མེ་ཏོག །རྡོ་བྲེག །བྲག་ཞུན། ཛཱ་ཏི་རྣམས་བུར་སྦྲང་དང་སྦྱར་བའི་སྨན་མར་བཏང་། ཤ་རུལ་དང་ཆང་སྐྱུར་ལ་སོགས་ཁམས་ལ་གནོད་པའི་ཟས་སྤང་། ལུས་ངག་ཡིད་གསུམ་ཟོ་ཀློད་ལ་མཉམ་པར་བཞག་པས་སེལ་ལོ། །ཐིག་ལེའི་རྩ་སྒོ་ཀློད་པས་འཛག་པ་ནི། ཆགས་པ་གཡོ་བའི་རྐྱེན་ཅུང་ཟད་ཙམ་ལ་བརྟེན་ [19a] ནས། གསང་རྡོར་ལས་སུ་མི་རུང་དུས་ཀྱང་བདེ་བ་དང་བཅས་ཏེ་འབབ། དེས་ལུས་ལ་ནད་རྐྱེན་མང་། སྐྲ་དཀར་དང་གཉེར་མ་སོགས་འབྱུང་སྟེ། འདི་ཡང་འཁྲུལ་འཁོར་དང་དམིགས་པས་སེལ་བ་དཀའ་ལ། སྨན་གྱིས་བཅོས་ཐབས་ནི། ཕོ་མོ་རང་མཐུན་གྱི་ཅོང་ཞི་བསྲེ་བ་བ་འོར་བཏུལ་བ་དང་། དབང་ལག་འོ་མར་བཙོས་པའི་ཆ་མཉམ་གྱི་ལྡེ་གུར། དོམ། ཕྱི་བ། བྱ་རྒོད། སྤྲེའུ། འབྲོང་། ཉ་རྣམས་ཀྱི་མཁྲིས་པ། ཨ་རུ་ར་གསེར་མདོག །གི་ཝཾ་རྣམས་ལེགས་པར་བཏུལ་ལ་རིལ་བུ་སྲན་མ་ཙམ་དུ་བསྒྲིལ་ནས་གྲིབ་སྐམ་བྱ། ནང་ནུབ་རིལ་བུ་གསུམ་གསུམ་ཟླ་རེར་བརྟེན་པས་ལོ་རེ་ཐུབ། ལོ་གཅིག་བརྟེན་ན་གེགས་སེལ་བར་འགྱུར་རོ། །གཡེར་མ་ལྕམ་པ་ཟྭ་ལ་སོགས་པའི་རྩ་སྒོ་འབྱེད་པར་འགྱུར་བའི་རིགས་རྣམས་སྤངས་ཤིང་། ཚངས་པར་སྤྱོད་པའི་སྤྱོད་པ་ལ་གནས་པར་གལ་ཆེའོ། །གེགས་སེལ་འདི་རྣམས་ཉམས་ལེན་ལ་མཁས་ཤིང་གོམས་པས་ཆུ་བོ་དལ་ལ་འབབ་པ་ལྟ་བུའི་སྐྱེས་བུ་ཡང་རབ་འགའ་ལ་མི་དགོས་མོད། དེ་མ་ཡིན་པར་བློ་རབ་འབྲིང་ཐ་མའི་རིགས་གང་ལའང་ཉེ་བར་མཁོ་བའི་གདམས་པ་ཟབ་མོ་སྟེ་ཡིད་བཞིན་གྱི་ནོར་བུ་ལས་ཀྱང་གཅེས་ [19b] པར་བཟུང་འཚལ་ལོ། །ཅེས་ཟབ་ལ་མཁའ་འགྲོའི་ཐུགས་ཐིག་གི་རིམ་གཉིས་ཀྱི་ཁྲིད་ཡིག་དངོས་གྲུབ་འདོད་འཇོ་ལས་བདེ་བ་ཆོས་ཀྱི་ཕྱག་རྒྱའི་རྣལ་འབྱོར་གྱི་མན་ངག་གུད་དུ་སྦས་པ་གསལ་རྗེན་ལྷན་ཐབས་ཀྱི་ཚུལ་དུ་སྤྲོས་པ་འདི་ནི། རེབ་ཀོང་ཕྱོགས་ཀྱི་སྔགས་སྐྱེས་ཤེས་རབ་རྡོ་རྗེས་བརྩོན་པ་ཆེན་པོས་ཡང་ཡང་དུ་བསྐུལ་བའི་ངོར། འཇིགས་བྲལ་ཡེ་ཤེས་རྡོ་རྗེས་མཁའ་འགྲོའི་གསང་མཛོད་ཟབ་རྒྱའི་བཅུད་ཕྱུངས་ཏེ་བྲིས་པ་སྐལ་ལྡན་རྣམས་ལ་བདེ་ཆེན་མཆོག་གི་དངོས་གྲུབ་མངོན་དུ་བྱེད་པའི་རྒྱུར་གྱུར་ཅིག །སརྦ་དཱ་མངྒལཾ༎ ༎