TTDL-ZABTER-02-KHA-045

Previous Text Back to Volume PageNext Text

Wylie title	zab gsang mkha' 'gro'i snying thig las: rdo rje tshe yi sgrub pa'i dzap dgongs zab mo:
Location	bdud 'joms gling pa'i zab gter Volume 2, Text 45, Pages 459-462 (Folios 1a1 to 2b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las rdo rje tshe yi sgrub pa'i dzap dgongs zab mo. In Sprul pa'i gter chen bdud 'joms gling pa'i zab gter gsang ba'i chos sde, Vol. 2: 459-462. Thimphu, Bhutan: Lama Kuenzang Wangdue, 2004.
Side notes	Recto: 'dzab dgongs   Verso: bdud 'joms tshe sgrub
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mantra Repetition Preparatory Liturgies - dzab khang dbye ba - dzab bskul
Cycle	ཚེ་སྒྲུབ་དངོས་གྲུབ་འདོད་འབྱུང་ (tshe sgrub dngos grub 'dod 'byung)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	tshe dpag med
Colophon	ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་པདྨ་ངོ་མཚར་རོ། །དགེའོ། །དགེའོ། །དགེའོ།།
	zhes pa 'di ni khrag 'thung bdud 'joms rdo rjes gter nas bton te dag par phab pa'i yi ge pa ni pad+ma ngo mtshar ro/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ རྡོ་རྗེ་ཚེ་ཡི་སྒྲུབ་པའི་ཛཔ྄་དགོངས་ཟབ་མོ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) མ་འོངས་དུས་ཀྱི་སྙིགས་མ་ལ༔ པདྨའི་བརྒྱུད་འཛིན་སྐྱེས་བུ་ཡིས༔ རྡོ་རྗེའི་ཚེ་སྒྲུབ་ཉམས་ལེན་ན༔ དམིགས་གནད་སྔགས་བཟླས་རིམ་པ་ནི༔ ཧཱུྃ༔ རང་ཉིད་བཅོམ་ལྡན་ཚེ་དཔག་མེད༔ ཐབས་ཤེས་མཉམ་སྦྱོར་ལོངས་སྤྱོད་རྫོགས༔ ཐུགས་ཀར་ཡེ་ཤེས་འོད་ཀློང་དུ༔ རཱ་གའི་བུམ་པ་དམར་གསལ་གྱི༔ ལྟེ་བར་དྭངས་མའི་ཐིག་ཀློང་དུ༔ པདྨ་ཟླ་རྒྱས་ལྟེ་བ་རུ༔ ཐུགས་སྲོག་ངོ་བོ་ཧྲཱིཿདམར་གསལ༔ མཐའ་མར་སྔགས་ཕྲེང་གཡས་སུ་འཁོར༔ འོད་འཕྲོས་རྒྱལ་བ་མཆོད་པས་མཉེས༔ སེམས་ཅན་ཀུན་གྱི་སྒྲིབ་པ་སྦྱངས༔ དབང་བྱིན་དངོས་གྲུབ་ཐམས་ཅད་དང་༔ ཚེ་བསོད་བཀྲག་མདངས་ནུས་བཅུད་ཀུན༔ ཚུར་འདུས་སྲོག་གི་སྙིང་པོར་བསྟིམ༔ ཚེ་དཔལ་ཡེ་ཤེས་འབར་བར་བསྒོམ༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཧཱུྃ༔ འབུམ་ཕྲག་ཉེར་གཅིག་གྲངས་རྫོགས་མཐར༔ སྒྲུབ་པའི་སྒོ་རུ་འཇུག་པ་ནི༔ ཧཱུྃ༔ རང་ཉིད་འཆི་མེད་མགོན་པོ་ཡི༔ ཐུགས་སྲོག་སྔགས་ཀྱི་འཁོར་ལོ་ལས༔ འོད་དང་འོད་ཟེར་རབ་འཕྲོས་པས༔ སྣོད་ཀྱི་འཇིག་རྟེན་པདྨ་འོད༔ བཅུད་ཀྱི་སེམས་ཅན་ཚེ་དཔག་མེད༔ སྒྲ་གྲགས་སྔགས་ཀྱི་རོལ་པ་ཆེ༔ དྲན་རྟོག་ཆོས་ཉིད་རོལ་པའི་ངང་༔ ཨོཾ་ཨ་མི་དྷེ་ཝ་ཡུཛྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ་ཨཱཿ སླར་ཡང་འོད་ཟེར་རབ་འཕྲོས་པས༔ དུས་གསུམ་རྒྱལ་བ་སྲས་བཅས་ཀྱི༔ དབང་བྱིན་དངོས་གྲུབ་མ་ལུས་དང་༔ སྣོད་བཅུད་ཀུན་གྱི་ཚེ་དཔལ་ཀུན༔ འོད་ཟེར་ཁ་དོག་ལྔ་ལྡན་གྱི༔ རྣམ་པར་བསྡུས་ཏེ་སྔགས་སུ་བསྟིམ༔ ཚེ་བསོད་ཡེ་ཤེས་འབར་བར་བསྒོམ༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ་ཨཱཿ རང་ཉིད་ཚེ་དཔག་མེད་མགོན་གྱི༔ སྤྱི་བོ་ནས་བཟུང་རྐང་མཐིལ་ཡན༔ ཕྲ་རབ་རྡུལ་གྱི་ཆ་ཙམ་གྱི༔ ཕྱག་རྒྱ་ཕྲ་མོ་ཚོགས་པ་ཡི༔ འཇའ་ཚོན་འོད་ཀྱི་ཕུང་པོར་གསལ༔ ཀུན་ཀྱང་སྔགས་སྒྲ་སྒྲོགས་པ་ཡིས༔ འཇིག་རྟེན་ཁམས་ཀུན་གཡོ་བར་བསྒོམ༔ འཁོར་འདས་གཉིས་ཀྱི་དྭངས་མ་བཅུད༔ མ་ལུས་འོད་ཀྱི་རྣམ་པར་བསྡུས༔ སྲོག་གི་འཁོར་ལོར་རོ་གཅིག་དྲིལ༔ འཁོར་འདས་ཀུན་གྱི་སྲོག་ཐོབ་བསམ༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ་ཨཱཿ དེ་ནས་འཛབ་བསྐུལ་ནི༔ ཧཱུྃ་ཧྲཱིཿ ཆོས་དབྱིངས་སྐྱེ་འགགས་འགྱུར་མེད་ཞིང་ཁམས་ནས༔ ཆོས་སྐུའི་དཀྱིལ་འཁོར་རྒྱ་མཚོའི་ཐུགས་དམ་བསྐུལ༔ གཞི་དང་སྙིང་པོ་མེ་ཏོག་བརྒྱན་པའི་ཞིང་༔ ལོངས་སྐུ་རྒྱལ་བ་རྒྱ་མཚོའི་ཐུགས་རྒྱུད་བསྐུལ༔ སྟོང་གསུམ་མི་མཇེད་འཇིག་རྟེན་རྒྱ་མཚོ་ནས༔ སྤྲུལ་སྐུའི་དཀྱིལ་འཁོར་རྒྱ་མཚོའི་ཐུགས་དམ་བསྐུལ༔ ཡེ་ཤེས་དབྱིངས་སུ་ཐ་དད་མ་གྲུབ་ཀྱང་༔ ཀུན་རྫོབ་གདུལ་བྱའི་མོས་ངོར་རྣམ་རོལ་གར༔ གང་འདུལ་མཛད་པ་ཕྲིན་ལས་སྣ་ཚོགས་བསྒྱུར༔ གསུང་སྙན་ཡན་ལག་དྲུག་ཅུའི་ཚངས་དབྱངས་ཀྱིས༔ སྔགས་ཀྱི་སྒྲ་སྒྲོགས་འཁོར་བའི་འཁྲུལ་འཁོར་གཞིག༔ ཐུགས་ནི་མི་གཡོ་བརྡལ་ཁྱབ་ཆེན་པོའི་ངང་༔ ཡེ་ཤེས་རླབས་ཆེན་གཡོ་བའི་གཟི་བྱིན་གྱིས༔ འཁོར་འདས་དག་མཉམ་ཆེན་པོར་རོལ་པར་མཛོད༔ སྒྲུབ་པའི་རིག་འཛིན་མཆེད་དང་ལྕམ་དྲལ་ཚོགས༔ མ་ལུས་ཡང་གསང་དཀྱིལ་འཁོར་ཆེན་པོ་འདིར༔ བརྟེན་ནས་སྒོ་གསུམ་རྡོ་རྗེ་གསུམ་གྱི་ངང་༔ དག་སྨིན་གྲོལ་ཐོབ་བྱིན་གྱིས་བརླབ་མཛོད་ཅིག༔ མ་གཡེལ་དམ་ཚིག་ཐུགས་དམ་གནད་ནས་བསྐུལ༔ བརྒྱུད་འཛིན་རྗེས་སུ་བཟུང་བའི་དུས་ལ་བབས༔ དབྱིངས་དང་དགོངས་པ་དབྱེར་མེད་རོ་གཅིག་ངང་༔ ལྷ་སྔགས་ཏིང་འཛིན་རོལ་པར་དགོངས་མཛོད་ལ༔ གྲུབ་རྟགས་དངོས་གྲུབ་མཚན་མ་མྱུར་དུ་སྟོན༔ ཕྲིན་ལས་དུས་ལ་བབ་པོ་ས་མ་ཡ༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ་ཨཱཿ ལས་སྦྱོར་དུས་བཞིར་ལས་བཞི་སྦྲགས༔ སྒྲུབ་སྔགས་འབུམ་ཕྲག་ཉེར་ལྔ་དང་༔ ལས་སྔགས་བཅུ་ཡིས་དངོས་གྲུབ་ཐོབ༔ དེ་ལྟར་སྒྲུབ་པ་ལྷུར་ལེན་ཚེ༔ ལུས་གནད་གདན་དྲོད་མི་ཉམས་སྡོད༔ ངག་གནད་མི་ཚིག་སྤངས་པ་དང་༔ སེམས་གནད་གཞན་དུ་མི་ཡེངས་པ༔ འདི་གསུམ་གནད་ཀྱི་ཡང་ཞུན་ཏེ༔ དེ་དང་ལྡན་པའི་རྣལ་འབྱོར་ལ༔ དྲོད་རྟགས་མི་རིང་ངེས་པར་འབྱུང་༔ ཚེ་ཟད་པ་ཡང་ཕྱིར་ནུར་ཞིང་༔ མཆོག་གི་དངོས་གྲུབ་ངེས་པར་ཐོབ༔ སྒྲུབ་པའི་ཡང་སྙིང་བཅུད་འདི་ནི༔ ལྷ་ཆེན་ཚོགས་ཀྱི་བདག་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་པདྨ་ངོ་མཚར་རོ། །དགེའོ། །དགེའོ། །དགེའོ།། །།