TTDL-ZABTER-06-CHA-020

Previous Text Back to Volume PageNext Text

Wylie title	zab gsang mkha' 'gro'i snying thig las: bde gshegs gsang ba 'dus pa'i phyi sgrub rdo rje'i phreng ba:
Location	bdud 'joms gling pa zab gter Volume 6, Text 20, Pages 261-277 (Folios 1a1 to 9a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bde gshegs gsang ba 'dus pa'i phyi sgrub rdo rje'i phreng ba. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: 261-277. Thimphu, Bhutan: Lama Kuenzang Wangdue, 2004.
Side notes	Recto: phyi sgrub   Verso: bdud 'joms bka' brgyad gsang 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	བདེ་གཤེགས་བཀའ་བརྒྱད་གསང་བ་འདུས་པ་ (bde gshegs bka' brgyad gsang ba 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad
Colophon	ཞེས་པ་འདི་ཉིད་ཆེ་མཆོག་རོལ་པ་རྩལ་ཁྲག་འཐུང་ནུས་ལྡན་རྡོ་རྗེ་གར་དབང་བདུད་འཇོམས་གླིང་པས་ལུག་ལོའི་དགུན་ཟླ་འབྲིང་པོའི་ཉེར་ལྔའི་ཉིན་ངོ་མཚར་བའི་ལྟས་བཟང་དུ་མ་དང་བཅས་ཏེ་གཏེར་ནས་བཏོན་ཏེ་མཐར་རྟེན་འབྲེལ་དུས་ལ་བབ་ཚེ་ཆོས་ཀྱི་བདག་པོ་སྤྲུལ་སྐུ་པདྨ་སྣ་ཚོགས་རང་གྲོལ་དང་མཁྱེན་རབ་རྒྱ་མཚོ་ཀློང་ཆེན་རྡོ་རྗེ་རྣམས་ཀྱིས་ཡང་ཡང་བསྐུལ་ངོར་གཏན་ལ་ཕབ་པའི་དགེ་བས་རྩུབ་འགྱུར་དུས་ཀྱི་ཡོ་ལང་ནད་མུག་མཚོན་གྱི་འཁྲུལ་འཁོར་ཀླ་ཀློའི་རིགས་སྔགས་རྫས་སྦྱོར་ཐམས་ཅད་མིང་གི་ལྷག་མར་གཞོམ་པའི་ཐོ་ལུམ་དང་བསྟན་དང་འགྲོ་ལ་ཕན་བདེ་རྒྱ་ཆེན་པོ་འབྱུང་བའི་གནས་སུ་གྱུར་ཅིག །དགེའོ། །དགེའོ། །དགེའོ།།
	zhes pa 'di nyid che mchog rol pa rtsal khrag 'thung nus ldan rdo rje gar dbang bdud 'joms gling pas lug lo'i dgun zla 'bring po'i nyer lnga'i nyin ngo mtshar ba'i ltas bzang du ma dang bcas te gter nas bton te mthar rten 'brel dus la bab tshe chos kyi bdag po sprul sku pad+ma sna tshogs rang grol dang mkhyen rab rgya mtsho klong chen rdo rje rnams kyis yang yang bskul ngor gtan la phab pa'i dge bas rtsub 'gyur dus kyi yo lang nad mug mtshon gyi 'khrul 'khor kla klo'i rigs sngags rdzas sbyor thams cad ming gi lhag mar gzhom pa'i tho lum dang bstan dang 'gro la phan bde rgya chen po 'byung ba'i gnas su gyur cig /dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བདེ་གཤེགས་གསང་བ་འདུས་པའི་ཕྱི་སྒྲུབ་རྡོ་རྗེའི་ཕྲེང་བ་བཞུགས༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) དུས་གསུམ་སངས་རྒྱས་ཐམས་ཅད་ཀུན༔ ཡི་ཤེས་དབྱིངས་སུ་རོ་གཅིག་པའི༔ གཉིས་མེད་རོལ་པའི་ཆོ་འཕྲུལ་དུ༔ བདེ་གཤེགས་དཔལ་དགུའི་དཀྱིལ་འཁོར་ཤར༔ གང་ཟག་ལས་སྐལ་ལྡན་རྣམས་ཀྱིས༔ དུར་ཁྲོད་མཚོ་གླིང་ལ་སོགས་པར༔ རྫས་སྔགས་འཁོར་ལོ་འདུ་བྱས་ཏེ༔ སྒྲུབ་པའི་གཞུང་བསྲང་ཛཔ྄་ཀྱི་མགོར༔ ཨོཾ༔ མ་སྐྱེས་མ་དམིགས་བཅོམ་ལྡན་འདས༔ ཧེ་རུ་ཀ་ལ་ཕྱག་འཚལ་ལོ༔ ངང་ཉིད་ཡེ་སངས་རྒྱས་མོད་ཀྱང་༔ ཐུགས་རྗེའི་ཞི་ལས་ཀྲོ་བོར་བཞེངས༔ དཔལ་ཆེན་ལྷ་གཅིག་ཧེ་རུ་ཀ༔ མཐིང་ནག་ཞལ་གསུམ་ཕྱག་དྲུག་པ༔ གཡས་པས་རྡོ་རྗེ་གཡོན་བྷནྡྷ༔ སྤྱན་མིག་བསྒྲད་པས་གློག་འགྱུ་ཞིང་༔ ཞལ་གདངས་ལྗགས་འདྲིལ་མཆེ་བ་གཙིགས༔ སྨ་ར་སྨིན་མར་མེ་འོད་འཕྲོ༔ སྙན་གཉིས་ཉི་ཟླའི་སྙན་ཆ་མཛེས༔ དབུ་སྐྲ་ཁམ་ནག་གྱེན་དུ་འཁྱིལ༔ ཐོད་སྐམ་དབུ་རྒྱན་ཅོད་པན་འཕུར༔ ཞབས་བཞི་གྱད་ཀྱི་འདོར་སྟབས་ཀྱིས༔ པདྨ་ཉི་ཟླ་བམ་གདན་བརྫིས༔ དབྱིངས་ཕྱུག་སྔོན་མོ་ཡུམ་གྱིས་འཁྱུད༔ རྡོ་རྗེ་དུང་ཁྲག་ཡབ་ལ་སྟོབ༔ ཞལ་གསང་སྦྱོར་ཞིང་རྐང་གཡོན་འཁྲིལ༔ གཡས་པས་འཁོར་བའི་སྒོ་འཕར་གནོན༔ ཡབ་ཡུམ་དུར་ཁྲོད་ཆས་ཀྱིས་བརྒྱན༔ ཐུགས་ཀར་རྡོ་རྗེ་ཕ་ལམ་དབུས༔ གསེར་གྱི་འཁོར་ལོ་རྩིབས་བཅུ་པའི༔ ལྟེ་བར་རིན་ཆེན་ཟུར་བརྒྱད་སྦུབས༔ པདྨ་ཉི་མ་བམ་གྱི་སྟེང་༔ ཡཀྴ་བཛྲ་ཐོད་པ་རྩལ༔ སྨུག་ནག་ཞལ་གསུམ་ཕྱག་དྲུག་པ༔ རྡོ་རྗེ་ཐོ་བ་པདྨ་གཡས༔ མདའ་དང་གཏུན་ཤིང་དྲིལ་བུ་གཡོན༔ བཛྲ་ཀྲོ་དྷཱི་སྔོ་སྐྱ་འཁྲིལ༔ དུར་ཁྲོད་ཆས་རྫོགས་མེ་དཔུང་འབར༔ ཐུགས་དབུས་པདྨ་ཉི་གདན་ལ༔ གསེར་གྱི་རྡོ་རྗེ་རྩེ་ལྔ་པའི༔ ལྟེ་བར་ཉི་ཟླའི་གའུ་ནི༔ ཡུངས་འབྲུ་ཙམ་གྱི་ལྟེ་བ་རུ༔ ཧཱུྃ་ལ་སྔགས་ཀྱི་ཕྲེང་བས་བསྐོར༔ སྤྱི་བོར་རིག་འཛིན་རྡོ་རྗེ་ཆོས༔ དཀར་དམར་རང་སྣང་ཡུམ་དང་སྦྱོར༔ རྡོ་རྗེ་དྲིལ་བུའི་ཕྱག་རྒྱ་ཅན༔ ཞབས་གཉིས་འདོར་སྟབས་པད་ཉིར་བཞེངས༔ མགྲིན་པར་དབང་ཆེན་རྟ་མགྲིན་ནི༔ དམར་པོ་གྲི་གུག་ཐོད་ཁྲག་འཛིན༔ གཟི་ལྡན་ཁྲོ་མོ་ཡུམ་དང་འཁྲིལ༔ པད་ཉི་བམ་གདན་གྱད་སྟབས་བཞུགས༔ ལྟེ་བར་རྡོ་རྗེ་གཞོན་ནུ་མཐིང་༔ འཁོར་ལོ་རྒྱས་འདེབས་ཡུམ་དང་འཁྲིལ༔ ཕྱག་གཉིས་རྡོ་རྗེ་ལྕགས་ཕུར་གདེངས༔ པད་ཉི་བམ་གདན་གྱད་སྟབས་བཞུགས༔ གསང་བར་བླ་མེད་ཧེ་རུ་ཀ༔ མཐིང་ནག་བྱ་ཁྱུང་ཙིཏྟ་འཛིན༔ ཉིད་བཞི་མུ་ཁ་ལེ་དང་སྦྱོར༔ པདྨ་ཉི་མ་བམ་གདན་འགྱིང་༔ བརླ་གཡས་དྲེགས་པ་ཀུན་འདུལ་མཐིང་༔ རྡོ་རྗེ་གཏུམ་མ་ཡུམ་དང་སྦྱོར༔ ཕྱག་གཉིས་རྡོ་རྗེ་བྷནྡྷ་འཛིན༔ པད་ཉི་བམ་གདན་འགྱིང་སྟབས་བཞུགས༔ བརླ་གཡོན་སྟོབས་ལྡན་ནག་པོ་མཐིང་༔ ཕྱག་གཉིས་རལ་གྲི་དུང་ཁྲག་འཛིན༔ འབྱུང་ལྔའི་བདག་མོ་ཡུམ་དང་སྦྱོར༔ པད་ཉི་བམ་གྱི་གདན་ལ་འགྱིང་༔ དཔྲལ་བར་འཇམ་དཔལ་གཤིན་རྗེ་གཤེད༔ སེར་ནག་བེ་ཅོན་ཐོད་པ་འཛིན༔ གསོད་བྱེད་ཁྲོ་མོ་ཡུམ་དང་སྦྱོར༔ པད་ཉི་བམ་གྱི་གདན་ལ་འགྱིང་༔ ཀུན་ཀྱང་སྤྱན་བསྒྲད་མཆེ་བ་གཙིགས༔ དུར་ཁྲོད་ཆས་རྫོགས་མེ་དཔུང་འབར༔ རང་རང་ཐུགས་ཀར་རྡོ་རྗེ་དང་༔ པདྨ་རྒྱ་གྲམ་གཡུང་དྲུང་མཚན༔ ཕུར་པ་འཁོར་ལོ་བེ་ཅོན་གྱི༔ ལྟེ་བར་ཉི་ཟླ་ཡུངས་འབྲུ་ཙམ༔ ཁ་སྦྱར་དབུས་སུ་ཧཱུྃ་ཡིག་མཐར༔ སྔགས་ཀྱི་ཕྲེང་བས་བསྐོར་བར་དམིགས༔ ཕྱི་རིམ་གསེར་འཁོར་རྩིབས་བཅུའི་ནང་༔ ཧཱུྃ་དཀར་སྔོན་པོ་རྡོར་དྲིལ་བསྣོལ༔ རྣམ་རྒྱལ་དཀར་པོ་ཏྲི་ཤུལ་གདེངས༔ དབྱུག་པ་སྔོན་པོ་དབྱུག་ཏོ་ཕྱར༔ གཤིན་རྗེ་གཤེད་པོ་བེ་ཅོན་འཛིན༔ མི་གཡོ་མགོན་པོ་འཁོར་ལོ་འཕེན༔ རྟ་མགྲིན་རྒྱལ་པོ་ཐོད་དབྱུག་འཛིན༔ འདོད་རྒྱལ་རླུང་གི་བ་དན་ཕྱར༔ བདུད་འཁྱིལ་རྡོ་རྗེ་རྒྱ་གྲམ་འཛིན༔ ཁམས་གསུམ་གསེར་གྱི་རྡོ་རྗེ་ཕྱར༔ སྟོབས་ཆེན་གཏུན་ཤིང་དུང་ཁྲག་འཛིན༔ ཁྲོ་གཏུམ་རྔམས་བརྗིད་བལྟར་མི་བཟོད༔ ཕྱིར་བཟློག་བསྲུང་བའི་ཕྲིན་ལས་མཛད༔ དེ་ཡི་ཕྱི་རིམ་འཁོར་ལོ་དང་༔ པདྨ་རལ་གྲི་རྡོ་རྗེ་དབྱུག༔ ཏྲི་ཤུལ་མདའ་དང་ཐོ་ཆེན་དང་༔ རིན་ཆེན་རྒྱ་གྲམ་གུར་ཆེན་པོ༔ གཞོམ་བྲལ་སྲ་མཁྲེགས་ལྡན་པ་ལས༔ རང་རང་རིགས་ཀྱི་ཕྱག་རྒྱ་ནི༔ ཕྲ་མོ་གོ་མཚམས་མེད་པར་སྤྲས༔ གདོན་བགེགས་ལོག་འདྲེན་སྦྱོར་བ་བཤིག༔ ཕྱི་རིམ་མེ་ཆུ་ས་དང་ནི༔ རླུང་ནག་སྤུ་གྲི་འབར་བ་ཡི༔ ར་བས་མཚམས་སྲུབ་མེད་པར་བསྐོར༔ རྩེ་མོ་རྡོ་རྗེའི་ཏོག་གི་བརྒྱན༔ ལྷ་དང་རང་སྣང་ཆོས་ཉིད་གསུམ༔ དབྱེར་མེད་བདེ་བ་ཆེན་པོར་སྒྲུབ༔ འཁོར་འདས་གཉིས་སུ་མི་དམིགས་ཤིང་༔ བརྗོད་བྲལ་ལྟ་བའི་རང་ངོ་བལྟ༔ བལྟ་བྱ་ལྟ་བྱེད་གཉིས་མེད་པར༔ ཁྱབ་བརྡལ་འུབ་ཆུབ་རོལ་པར་སངས༔ བགེགས་ཞེས་བྱ་བ་དམིགས་སུ་མེད༔ དམིགས་མེད་ཡེ་གྲོལ་གཤིས་སུ་གློད༔ ནམ་མཁའི་འཇའ་ཚོན་ཅི་བཞིན་དུ༔ སྒྱུ་འཕྲུལ་རོལ་པའི་ལྷར་སྣང་བཀོད༔ མཚན་མར་འཛིན་པ་མ་ཡིན་ནོ༔ ཆུ་ཟླ་དྭངས་པའི་གཟུགས་བརྙན་བཞིན༔ བེམ་སྟོང་ཅང་མེད་མ་ཡིན་པར༔ བ་སྤུ་རེ་བཞིན་མཁྱེན་གཉིས་ཀྱི༔ ཡེ་ཤེས་ཆེན་པོ་འབར་བ་ཡིས༔ རྩལ་ལས་རྒྱལ་བའི་ཞིང་ཀུན་རྫོགས༔ ཀུན་གྱི་སྙིང་པོ་ཧཱུྃ་ཡིན་ཕྱིར༔ བར་སྐབས་ཧཱུྃ་གི་སྣང་གླུ་ལེན༔ ཡེ་ནས་ཆོས་སྐུར་རོ་གཅིག་པས༔ དམིགས་མེད་འཛིན་མེད་ངང་ལ་བཞག༔ གང་ཤར་ཡེ་ནས་ཆོས་སྐུར་ཤར༔ ཤར་དང་ཤར་བྱ་གཉིས་མེད་པར༔ ཤར་གྲོལ་མཉམ་ཉིད་ཆེན་པོར་སངས༔ དབྱིངས་ཐིག་ལུ་གུ་རྒྱུད་ལ་གཟིར༔ སྣང་བ་འཇའ་འོད་རོལ་པར་སྣང་༔ གང་ཤར་བདེ་སྟོང་འཁོར་ལོར་ཤར༔ ལྷ་སྐུ་རྫོགས་པའི་རྩལ་ཆེན་འབར༔ གློ་བུར་རྟོགས་པ་ཤུགས་འབྱུང་ནས༔ ཉམས་སྣང་བརྟན་དང་དཔེ་ཆར་ཤར༔ མཁྱེན་གཉིས་ཤེས་རབ་མངོན་དུ་རྒྱས༔ ཐམས་ཅད་དབྱིངས་སུ་འུབ་ཆུབ་པའི༔ ལྷ་དང་འདྲེ་ཞེས་དམིགས་སུ་མེད༔ དམིགས་མེད་ངང་ལ་གདིང་ཐོབ་ན༔ འཁོར་བའི་གནས་ལ་ཡ་མི་ང་༔ སྲིད་གསུམ་འཇིགས་ཀྱང་དངངས་སྐྲག་མེད༔ ཕྱམ་མཉམ་ཆོས་ཉིད་ངང་དུ་འབྱམས༔ ས་མ་ཡ༔ དེ་ནས་སྔགས་ཀྱི་རྒྱས་གདབ་པ༔ ཆེ་མཆོག་ཐུགས་ཀར་ཡཀྴ་མཐིང་༔ ཐུགས་དབུས་རྡོ་རྗེ་ཉི་ཟླའི་སྦུབས༔ ཧཱུྃ་ལ་སྔགས་ཀྱི་ཕྲེང་བས་བསྐོར༔ འོད་ཀྱིས་རྒྱལ་ཀུན་མཆོད་ཅིང་བསྐུལ༔ ཐུགས་རྗེ་བྱིན་རླབས་གཟི་བྱིན་བསྡུས༔ བདག་ཐིམ་གཟི་བརྗིད་འབར་བར་དམིགས༔ ཨོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ ཅི་འགྲུབ་དམིགས་གནད་ལྡན་པས་བཟླ༔ ཡང་དག་ཐུགས་ཀར་རྡོ་རྗེའི་སྦུབས༔ ཧཱུྃ་ལ་སྔགས་ཀྱི་ཕྲེང་བས་བསྐོར༔ འོད་ཀྱིས་རྡོ་རྗེའི་རིགས་མཆོད་བསྡུས༔ མཆོག་ཐུན་དངོས་གྲུབ་ཀུན་ཐོབ་དམིགས༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཅི་འགྲུབ་དམིགས་གནད་ལྡན་པས་བཟླ༔ གཤིན་རྗེའི་ཐུགས་ཀར་བེ་ཅོན་གྱི༔ ལྟེ་བར་ཧཱུྃ་ལ་སྔགས་ཕྲེང་འཁོར༔ འོད་ཀྱིས་རིན་ཆེན་རིགས་མཆོད་བསྡུས༔ གཟི་བྱིན་ནུས་སྟོབས་འབར་བར་དམིགས༔ ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ༔ ཅི་འགྲུབ་དམིགས་གནད་ལྡན་པས་བཟླ༔ རྟ་མགྲིན་ཐུགས་ཀར་པདྨའི་སྦུབས༔ ཉི་གདན་ཧཱུྃ་ལ་སྔགས་ཕྲེང་འཁོར༔ འོད་ཀྱིས་པདྨའི་རིགས་མཆོད་བསྡུས༔ བྱིན་རླབས་དངོས་གྲུབ་ཐོབ་པར་དམིགས༔ ཨོཾ་པདྨ་ཏ་ཀྲྀཏ་བཛྲ་ཀྲོ་ཏ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ དམིགས་གནད་ལྡན་པས་ཅི་འགྲུབ་བཟླ༔ ཕུར་པའི་ཐུགས་ཀར་རྒྱ་གྲམ་ལྟེར༔ ཉི་གདན་ཧཱུྃ་ལ་སྔགས་ཕྲེང་འཁོར༔ འོད་ཀྱིས་ལས་ཀྱི་རིགས་མཆོད་བསྡུས༔ མཐུ་སྟོབས་གཟི་བརྗིད་འབར་བར་དམིགས༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ དམིགས་གནད་ལྡན་པས་ཅི་འགྲུབ་བཟླ༔ བླ་མེད་ཐུགས་ཀར་གཡུང་དྲུང་མཚན༔ ལྟེ་བར་ཉི་གདན་ཧཱུྃ་སྔགས་འཁོར༔ འོད་ཀྱིས་ཡེ་ཤེས་མཁའ་འགྲོ་མཆོད༔ བསྡུས་ཐིམ་ལས་ཀུན་འགྲུབ་པར་དམིགས༔ ཨོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀ་གུ་ཧྱ་ཛྙཱ་ན་ཀྲོ་ཏི་ཤྭ་རཱི་སྟྭཾ༔ མ་མ་ཡོ་གི་ནི་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ དམིགས་གནད་ལྡན་པས་ཅི་འགྲུབ་བཟླ༔ རིག་འཛིན་ཐུགས་ཀར་གསེར་རྡོར་སྦུབས༔ དྭངས་ལ་ལྔ་ཡི་འོད་ཐིག་ཀློང་༔ ཧཱུྃ་ལ་སྔགས་ཀྱི་ཕྲེང་བས་བསྐོར༔ འོད་ཀྱིས་ཕྱོགས་བཅུའི་བུདྡྷ་བཀུག༔ ཁམས་གསུམ་འཁོར་བ་ཆོས་སྐུར་བསྒྲལ༔ ཚུར་འདུས་རྡོ་རྗེ་གསུམ་དུ་བསྒྲུབ༔ ཨོཾ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ་ཕཊ༔ དམིགས་གནད་ལྡན་པས་ཅི་འགྲུབ་བཟླ༔ གསང་བདག་ཐུགས་ཀར་ཕུར་བའི་ལྟེར༔ ཧཱུྃ་ལ་སྔགས་ཀྱི་ཕྲེང་བས་བསྐོར༔ འོད་ཀྱིས་དྲེགས་པའི་སྲོག་སྙིང་བསྡུས༔ སྙིང་པོ་གཅིག་འདྲེས་བྲན་ཁོལ་བསམ༔ ཨོཾ་བཛྲ་ཙཎྜ་སརྦ་དུཥྚན་ཧཱུྃ་ཕཊ༔ དམིགས་གནད་ལྡན་པས་ཅི་འགྲུབ་བཟླ༔ སྟོབས་ལྡན་ཐུགས་ཀར་འཁོར་ལོའི་ལྟེར༔ ཉི་མར་ཧཱུྃ་ལ་སྔགས་ཕྲེང་འཁོར༔ འོད་ཀྱིས་ལྷ་སྲིན་སྟོབས་ལྡན་རྣམས༔ བྲན་འགུགས་སྔགས་ཕྲེང་འོད་ཀྱིས་གཟེར༔ གཡོ་མེད་ནུས་པ་བཅིངས་པར་བསམ༔ ཨོཾ་བཛྲ་སརྦ་དུཥྚན་ཧཱུྃ་ཕཊ༔ དམིགས་གནད་ལྡན་པས་ཅི་འགྲུབ་བཟླ༔ བདག་ཉིད་ཆེ་མཆོག་ཐུགས་ཀ་ནས༔ འོད་ཟེར་ཚ་ལ་མྱུར་བར་འཕྲོས༔ བཀའ་སྡོད་དྲེགས་པའི་ཐུགས་ཀར་ཕོག༔ སྔོན་གྱི་དམ་ཚིག་རྗེས་དྲན་ནས༔ ཅི་བགྱིས་བཀའ་ཉན་གསུང་སྡོད་ཅིང་༔ ཕྲིན་ལས་ཐོགས་མེད་བསྒྲུབ་པར་བསམ༔ ཨོཾ་བཛྲ་སརྦ་ཡཀྴ་ཁྲོཾ་ག་རུ་ཌ་མ་མ་ཌཱ་ཀི་ནཱི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ དམིགས་གནད་ལྡན་པས་ཅི་འགྲུབ་བཟླ༔ ཧཱུྃ༔ སླར་ཡང་ཐུགས་ལས་འོད་ཟེར་ནི༔ ལྔ་ལྡན་བ་ཐག་བརྐྱང་བཞིན་འཕྲོས༔ ཕྱོགས་དུས་རྒྱལ་བ་སྲས་བཅས་མཆོད༔ ཐུགས་རྗེ་བྱིན་རླབས་གཟི་བྱིན་དབང་༔ དངོས་གྲུབ་དང་བཅས་བསྡུས་ནས་ནི༔ བདག་མདུན་ལྷ་སྔགས་འཁོར་ལོར་ཐིམ༔ མཆོག་ཐུན་དངོས་གྲུབ་ཐོབ་པར་དམིགས༔ དཔལ་དགུའི་སྔགས་རྣམས་གྲ་ཟུར་དང་༔ ལྷག་ཆད་མེད་པར་འཛབ་ཀྱིས་བསྐུལ༔ དམིགས་པ་གནད་ཡིན་ལྷོད་མེད་བྱ༔ ཧཱུྃ༔ སླར་ཡང་ཐུགས་ལས་འོད་དཀར་འཕྲོས༔ རྒྱལ་མཆོད་ཐུགས་རྗེ་བྱིན་རླབས་བསྡུས༔ བདག་ཐིམ་སྒོ་གསུམ་ཉེས་སྐྱོན་སྦྱངས༔ ཡེ་ཤེས་ལྷ་ཡི་རོལ་པར་འཕོས༔ འོད་ཟེར་མར་འཕྲོས་འགྲོ་ལ་ཕོག༔ སྡིག་སྒྲིབ་སྡུག་བསྔལ་བག་ཆགས་ཀུན༔ བ་མོར་ཉི་ཟེར་ཕོག་བཞིན་དག༔ དཔལ་ཆེན་གོ་འཕང་ཐོབ་པར་བསམ༔ གཙོ་སྔགས་ཅི་འགྲུབ་བཟླ་བ་དང་༔ ཐུན་མཐར་ཞི་ཤམ་ཉེར་གཅིག་བརྗོད༔ ཧཱུྃ༔ སླར་ཡང་འོད་ཟེར་གསེར་མདོག་སྤྲོས༔ རྒྱལ་ཀུན་མཁྱེན་བརྩེ་ནུས་གསུམ་དང་༔ ལྷ་དང་དྲང་སྲོང་ཚེ་བསོད་ནམས༔ པཎྜི་ཏ་ཡི་ཤེས་རབ་དང་༔ སྣོད་བཅུད་འབྱུང་བའི་དཔལ་ཡོན་བསྡུས༔ བདག་ཐིམ་གཟི་བྱིན་འབར་བར་དམིགས༔ གཙོ་སྔགས་ཅི་འགྲུབ་བཟླ་བ་དང་༔ ཐུན་མཐར་རྒྱས་ཤམ་ཉེར་གཅིག་བརྗོད༔ ཧཱུྃ༔ སླར་ཡང་ཐུགས་ལས་འོད་དམར་འཕྲོས༔ རྒྱལ་མཆོད་དབང་བྱིན་དངོས་གྲུབ་བསྡུས༔ བདག་ཐིམ་མཆོག་ཐུན་དངོས་གྲུབ་ཐོབ༔ མར་འཕྲོས་དྲེགས་པ་ཅན་རྣམས་བཀུག༔ འོད་ཟེར་སྐུ་ཡི་དཔའ་ཤུགས་བྱུང་༔ ཀུན་ཀྱང་དངངས་སྐྲག་འདར་ཆོམ་ཆོམ༔ སྲོག་སྙིང་ཕུལ་ནས་ཅི་བསྒོའི་བཀའ༔ ཐོགས་མེད་སྒྲུབ་པར་ཁས་བླངས་བསམ༔ གཙོ་སྔགས་ཅི་འགྲུབ་བཟླ་བ་དང་༔ ཐུན་མཐར་དབང་ཤམ་ཉེར་གཅིག་བརྗོད༔ ཧཱུྃ༔ བདག་མདུན་ཐུགས་ལས་ཀེཾ་དང་ཀྵ་འཕྲོས་པས༔ ཀེཾ་ལས་ཟངས་འཁོར་རྣོ་བའི་རྩིབས་སྟོང་ལྡན༔ དེ་འོག་ཀྵ་ལས་གནམ་ལྕགས་འཁོར་ལོ་འབར༔ སྤུ་གྲི་གཉིས་ཀྱི་དབལ་སོ་འཐབ་པའི་བར༔ དགྲ་བགེགས་གནོད་བྱེད་འབྱུང་པོ་ཐམས་ཅད་དང་༔ བྱད་ཕུར་རྦོད་གཏོང་ཆག་ཆེ་ཉམ་ང་གཏོང་༔ དུས་མཐར་མི་སྲུན་སྦྱོར་བས་བསྟན་པ་འཇིགས༔ ཀུན་ཀྱང་རྡོ་རྗེ་རླུང་གིས་དེད་ནས་ནི༔ དམར་ཉིལ་འཐག་སྟེ་ཤ་རུས་ཐམས་ཅད་གཏུབ༔ སྤྲུལ་པ་བྱ་ཁྱུང་ལྕགས་སྡིག་མགོ་དགུའི་ཚོགས༔ ཀུན་གྱིས་རྔམས་པའི་སྒྲ་བཅས་ལྷག་མེད་རོལ༔ གནོད་བྱེད་མིང་ཙམ་མེད་པར་བརླག་པར་བསམ༔ དྲག་སྔགས་སོ་ལྔ་དམིགས་གནད་ལྡན་པས་བཟླ༔ ཐུན་མཐར་དྲག་པོའི་ཤམ་བུ་ཉེར་གཅིག་བརྗོད༔ དེ་ལྟར་སྔགས་རྣམས་བཟླ་བའི་ཚེ༔ ལྕེ་ནི་རྡོ་རྗེ་རྩེ་ལྔར་བསྒོམ༔ མ་རྐན་ཉི་མའི་དཀྱིལ་འཁོར་ལ༔ ཀ་ལིའི་སྔགས་ཀྱི་རང་སྒྲ་བཅས༔ མདུན་ནས་གཡོན་དུ་འཁོར་བར་དམིགས༔ ཡ་རྐན་ཟླ་བའི་དཀྱིལ་འཁོར་ལ༔ ཨ་ལི་གཡས་སུ་འཁོར་བར་དམིགས༔ འོད་ཀྱིས་ཕྱོགས་བཅུའི་བུདྡྷ་བཀུག༔ རྡོ་རྗེ་དང་ནི་སྔགས་ཕྲེང་ལ༔ ཐིམ་པས་ནུས་པ་རབ་ཏུ་འབར༔ གཅིག་བཟླས་ཁྲི་སོགས་གྲངས་མེད་འཕེལ༔ ངག་ནུས་བཅོམ་པའི་ཟས་ཚོགས་ནི༔ བྱིན་གྱིས་མ་བརླབས་ཤ་ཆང་དང་༔ སྒོག་ཙོང་ལ་སོགས་སྤང་བར་བྱ༔ ལྕེ་ཡིས་ནུས་པ་གཏན་འཇོམས་པས༔ ནམ་ཡང་བཟའ་བར་བྱ་བ་མིིན༔ སྔགས་ཀྱི་བྱིན་རླབས་ཉམས་པའི་རྒྱུ༔ བྱིན་རླབས་མ་བྱས་བསྒྲང་ཕྲེང་ལ༔ གྲངས་མང་ཐེབ་ཀྱང་འཕེལ་མི་སྲིད༔ འབག་བསྙེན་གད་མོ་ལྷ་གད་རྒོད༔ དྲི་ཆུ་གཤང་ཆུ་འདོར་བཞིན་བཟླ༔ གདན་བསྒུལ་དྲོད་ཉམས་གཞན་སྡོད་པ༔ བག་ཡང་ཅི་འབྱུང་བརྩོན་འགྲུབ་ལྷོད༔ གཞན་ལ་ལྷ་སྔགས་སྨྲ་བ་དང་༔ ངག་ནུས་མཐུ་གཏད་སེར་བཟློག་དང་༔ མ་སྲུང་སྲིད་སྤེལ་ཁ་ཟས་བསྲེ༔ བཟའ་འཕྲོ་དུད་འགྲོ་དག་ལ་སྦྱིན༔ སྔགས་ནི་སྐད་ཆེན་འདོན་པ་དང་༔ ཟུར་ཉམས་རྐང་གྲངས་ཉམས་དང་འབྲལ༔ བྱང་ཆུབ་སེམས་གཏོང་སྐྱོ་སུན་བློ༔ ཐེ་ཚོམ་ལ་སོགས་བྱས་པ་ནི༔ སྔགས་ཀྱི་ནུས་པ་ཉམས་པར་བཤད༔ དྲོད་རྟགས་གཞན་ལ་སྨྲ་བརྗོད་དང་༔ དགོས་མེད་ཚོང་དུས་དག་ཏུ་འགྲིམ༔ འཆོལ་དོག་བརྟུལ་ཞུགས་ཐོ་ཅོ་བྱེད༔ ཡུག་ས་དམ་ཉམས་ཕྱག་རྒྱར་བསྟེན༔ བླ་མ་ལྷ་ལ་བློ་མི་གཏོད༔ དམ་ཚིག་ངོ་ལྐོག་ཆེ་བ་དང་༔ དཀོར་ནག་ལ་འབྱམས་ནག་ཆང་སྤྱོད༔ ཆོས་བརྒྱད་དོན་དུ་གཉེར་བ་དང་༔ གདམས་ངག་ནོར་དང་ཟས་ལ་འཚོངས༔ དམ་ཚིག་རྫས་རྣམས་ཡལ་བར་དོར༔ སྒྲུབ་རྟེན་མ་འབྱོར་གཞན་ལ་སྟོན༔ རྫས་དང་ཡོ་བྱད་ཉམས་པ་དང་༔ འདྲེ་གདོན་ལས་བཀོལ་མཆོད་ཅིང་བསྟོད༔ དཀོན་མཆོག་རྟེན་ལ་བཀུར་སྟི་མེད༔ ཤ་ལྔ་དམ་རྫས་བདུད་རྩི་ལྔ༔ ཉིན་བཞིན་མི་སྤྱོད་ལྷ་མི་བསྒོམ༔ སྒོ་གསུམ་ཐ་མལ་ངང་དུ་ཤོར༔ དེ་འདྲའི་དུས་ངན་སྔགས་པའི་མིང་༔ འཆང་ཡང་དངོས་གྲུབ་འབྱུང་མི་སྲིད༔ སྣང་བ་ལྷ་ཡི་དཀྱིལ་འཁོར་དུ༔ ཡེ་རྫོགས་ལྟ་བའི་གཞི་བཟུང་ལ༔ སྣང་ཆ་སྤྱན་གྱི་དཀར་ནག་ཚུན༔ མ་འདྲེས་སོ་སོར་གསལ་བ་དང་༔ སྟོང་ཆར་བེམ་སྟོང་དངོས་པོ་རུ༔ མ་འཐས་ཆུ་ཟླ་འཇའ་ཚོན་བཞིན༔ ཡེ་ཤེས་ཆེན་པོར་རྫོགས་པ་ཡི༔ བསྐྱེད་རྫོགས་དབྱེར་མེད་བསྒོམ་པ་སྤྱད༔ སྤྱོད་པ་དུས་ཀུན་བག་ཡོད་ཅིང་༔ སྔགས་ནུས་ཉམས་པའི་རྒྱུ་རྣམས་སྤང་༔ ཆོས་བརྒྱད་བདུད་ཀྱི་ཇག་པ་སྤང་༔ ཐེ་ཚོམ་ལོག་ལྟ་རྣམ་གཡེང་སྤང་༔ སྤྱོད་པ་མི་དང་བསྟུན་མི་བྱ༔ གཅིག་པུར་རི་དྭགས་རྨས་མ་བཞིན༔ དབེན་ཁྲོད་མཚོ་གངས་ནགས་ཁྲོད་བསྟེན༔ ཡ་ང་འཁུ་འཕྲིག་རྣམ་རྟོག་སྤང་༔ གསང་སྔགས་མོས་པའི་ལམ་ཡིན་ཏེ༔ མོས་གུས་ཆེ་ཞིང་ཐེ་ཚོམ་མེད༔ ལྷ་སྔགས་སྲོག་གི་དབང་པོ་བཞི༔ ནམ་ཡང་མི་སྨྲ་གཅེས་པར་སྦ༔ དམིགས་པས་ལྡེ་ཁ་བསྒྱུར་མཁས་པ༔ ཡིད་བཞིན་ནོར་བུ་རིན་ཆེན་འདྲ༔ ཡིད་བཞིན་ནོར་བུ་རིན་པོ་ཆེ༔ གསོལ་བ་གང་བཏབ་དགོས་འདོད་འབྱུང་༔ དམིགས་པའི་ལྡེ་ཁ་བསྒྱུར་མཁས་པ༔ འཇིག་རྟེན་འདས་དང་མ་འདས་པའི༔ དངོས་གྲུབ་མ་ལུས་ཐོབ་ཅིང་འགུགས༔ སྒྲ་གྲགས་སྔགས་ཀྱི་འཁོར་ལོ་རུ༔ ཡེ་ནས་གཉིས་མེད་རྫོགས་པ་ཡི༔ ཚུལ་ལ་ངེས་ཤེས་རབ་འདྲོང་ནས༔ འབྱུང་བའི་སྐྱེ་འགྲོའི་སྒྲ་སྐད་ཕྱི༔ གསང་སྔགས་བཟླས་བརྗོད་སྙིང་པོའི་སྒྲ༔ བུང་བ་ཚང་ཞིག་ལྟ་བུ་དང་༔ མི་ཤིགས་གཞོམ་མེད་ཐིག་ལེ་ཆེ༔ སྟོང་ཉིད་ཆོས་ཀྱི་རང་སྒྲ་ཤར༔ གསང་བ་དེ་ལས་ཆེས་གསང་བ༔ རང་རིག་མི་འགྱུར་ཆོས་ཀྱི་སྐུ༔ སངས་རྒྱས་རྣམས་ཀྱི་དུར་ས་ཆེ༔ འཁོར་འདས་ཀུན་གྱི་སྲོག་བཅུད་འདུས༔ གསང་སྔགས་རྣམས་ཀྱི་ནུས་པ་རྫོགས༔ རིག་པའི་རྩལ་ལས་སྣོད་བཅུད་ཆོས༔ གཟུགས་སུ་སྣང་བ་རྒྱལ་བའི་སྐུ༔ དག་དང་མ་དག་སྒྲ་རྣམས་ཀུན༔ དོན་ལ་རྒྱལ་བ་རྣམས་ཀྱི་གསུང་༔ དྲན་རྟོགས་འགྱུ་འཕྲོའི་རྟོག་ཚོགས་ཀུན༔ ཅི་ལྟར་ཤར་ཡང་རྒྱལ་བའི་ཐུགས༔ སྤང་བླང་རེ་དོགས་བྱེད་མི་དགོས༔ ཡེ་རྫོགས་དཀྱིལ་འཁོར་ཆེན་པོར་སྤྱོད༔ དངོས་གྲུབ་གཞན་ནས་ཚོལ་མི་དགོས༔ རང་བྱུང་ཡེ་ཤེས་བྱང་ཆུབ་སེམས༔ དངོས་གྲུབ་ཀུན་གྱི་འབྱུང་ཁུངས་ཡིན༔ འདི་ཉིད་ཅི་བཞིན་རྟོགས་པ་ན༔ ས་རྣམས་ཐམས་ཅད་རང་གི་འཕྲུལ༔ རི་བྲག་ཟང་ཐལ་འགྲོ་བར་ནུས༔ ཆུ་རྣམས་ཐམས་ཅད་རང་གི་འཕྲུལ༔ རྒྱ་མཚོར་མི་བྱིང་ཉ་བཞིན་བརྒལ༔ མེ་རྣམས་ཐམས་ཅད་རང་གི་འཕྲུལ༔ མེ་དཔུང་ཆུ་རུ་བསྒྱུར་བར་ནུས༔ རླུང་རྣམས་ཐམས་ཅད་རང་གི་འཕྲུལ༔ དངོས་རྣམས་དུ་མར་བསྒྱུར་བར་ནུས༔ ནམ་མཁའ་སྟོང་པ་རང་གི་ཀློང་༔ གཡང་ས་ཀུན་ལ་བྱ་བཞིན་ལྡིང་༔ སེམས་ཅན་རྣམས་ཀྱང་རང་གི་རྩལ༔ ཐམས་ཅད་དུས་གཅིག་གདོད་མའི་ཀློང་༔ འབད་རྩོལ་མེད་པར་བསྒྲལ་བར་ནུས༔ འདོད་ཡོན་སྣང་བ་རང་གི་འཕྲུལ༔ གཅིག་ལས་གྲངས་མེད་སྤེལ་བ་དང་༔ མཁའ་ལས་ཟས་གོས་འགུགས་པ་དང་༔ བྲག་ལས་ཆུ་དང་ལོངས་སྤྱོད་འབྱུང་༔ ཐུན་མོང་གྲུབ་པའི་མཛོད་ལ་དབང་༔ རིག་འཛིན་རྣམ་བཞི་འགྲུབ་པ་དང་༔ སངས་རྒྱས་ཆོས་ཀྱི་སྐུ་མཆོག་བརྙེས༔ ནང་དབྱིངས་གཞོན་ནུ་བུམ་སྐུར་ཆུབ༔ འཁོར་བ་ངན་སོང་དོང་ནས་སྤྲུགས༔ ཉི་མའི་དཀྱིལ་འཁོར་གཅིག་ཤར་བས༔ མུན་པ་གར་སོང་ཆ་མེད་དུ༔ འོད་ཀྱི་ངང་དུ་སངས་བ་དང་༔ རང་རིག་སངས་རྒྱས་བརྙེས་པ་ན༔ འཁྲུལ་སྣང་མ་ལུས་རང་ཟད་ནས༔ དག་པའི་འཁོར་ལོར་འབྱམས་སུ་ཀླས༔ ས་མ་ཡ༔ མ་འོངས་ལྔ་བརྒྱ་སྙིགས་མའི་དུས༔ ཀླ་ཀློ་ཀྱ་སྡེབ་ཧོར་ལ་འབེབས༔ ཧོར་དམག་ཁྲག་གི་རལ་པ་འཆང་༔ རྒྱ་རྗེ་མི་མོན་མགོ་རེག་གཟུགས༔ ཕྱི་པའི་བསྟན་པ་འབྱུང་བའི་ལྟས༔ འབྱུང་བ་སྒང་གཤོང་ཆེ་བ་དང་༔ ཆར་ཆུ་མི་སྙོམས་ནད་ཡམས་འབྱུང་༔ སེམས་ཅན་ཤེས་རྒྱུད་དུག་ལྔ་རགས༔ ལ་ལུང་ཨར་ཇག་རྐུན་མ་དར༔ ཉག་ལ་དུག་གི་སྡོང་པོ་རྒྱས༔ ལ་ལུང་མང་པོར་ཁྲག་ཆར་འབེབས༔ བླ་མ་ཕལ་ཆེར་གྲི་རུ་འགུམ༔ མི་ཆེན་མགོ་ཡི་སྟོན་མོ་འགྱེད༔ དེ་རྒྱབ་དར་མདོར་འཁྲུགས་པ་འབྱུང་༔ རེ་འབྱམས་ནག་པོའི་འཁྱིལ་ཁུག་ནས༔ མི་གྲངས་རྫོང་ཆེན་གནས་གཞི་འཆའ༔ རྒྱ་ནས་བུད་མེད་སྨ་ར་ཅན༔ ས་མིག་རེ་བཞིན་ཕུང་གཏེར་སྦ༔ སྡེ་དགེ་ཕོ་བྲང་དེར་བརྒྱུད་ནས༔ སྲོག་ཆགས་མང་པོའི་གསོན་སྙིང་ཕྱུང་༔ དབུས་གཙང་ཕྱོགས་སུ་ཆས་པ་ན༔ ལྷོ་སྨོན་ཕྱོགས་ནས་ལྔ་ལྔ་སྡེབ༔ གཙང་གི་རི་བཀྲ་ཞེས་བྱ་ནས༔ འབྱུང་དམག་མང་པོ་ཁ་ལོ་བསྒྱུར༔ དེ་གྲོགས་བྱས་ནས་ངང་ཁྱུ་འཇིགས༔ དེ་སོགས་ཆག་འཇིགས་བྱུང་བའི་ཚེ༔ ང་ཉིད་བདུད་འཇོམས་རྡོ་རྗེར་སྤྲུལ༔ གཏེར་རིགས་བཅོ་བརྒྱད་ཆོས་གཏེར་བརྒྱ༔ ཁྱད་པར་ནམ་མཁའ་ས་ཡི་གཏེར༔ གཉིས་ལ་དབང་བསྒྱུར་འགྲོ་བ་འདྲེན༔ ཁྱད་པར་སེ་ཕུང་སྲོག་གི་གཤེད༔ གསང་བའི་རྒྱ་ཅན་བཤུ་བསྒྱུར་ཚེ༔ ནག་ཕྱོགས་ཐུལ་བའི་ལྟས་མཚན་འབྱུང་༔ དེ་སོགས་ཟབ་གཏེར་གཉན་པོ་ཡི༔ ཕྱི་སྲུང་གཡུ་ཡི་ཕྲེང་བ་དང་༔ སྨན་མོ་འཛུམ་མེད་འོད་ལྡན་མ༔ སྐུ་བླ་གཉན་གྱི་རྩེ་མོ་དང་༔ རྨ་རྒྱལ་སྨན་ལྕམ་མིག་གཅིག་མ༔ རང་རང་གཉེར་འཛིན་གཏེར་སྲུང་བྱེད༔ ནང་སྲུང་མ་གཟའ་དམ་ཅན་གཙོའི༔ དྲེགས་པ་སྡེ་དགུའི་གཉེར་ལས་བྱེད༔ གསང་བ་རང་རང་སྒོས་སྲུང་རེ༔ ཀུན་གྱི་སྒྲུབ་ཐབས་བཅས་པ་ཀུན༔ རྫུ་འཕྲུལ་སྣ་ཚོགས་ཤོག་བུར་ཁོད༔ བཀའ་བརྒྱད་གསང་བ་འདུས་པ་ཉིད༔ རཱུ་ཏྲའི་སྙིང་ལྤགས་ངོས་སུ་ཁོད༔ རྡོ་ལ་ཟངས་ཞུན་བཀོན་པ་ཡི༔ སྒྲོམ་གྱི་གུད་ཆུག་མདོ་སྨད་ཆར༔ སྟག་ཚང་གཡས་ཀྱི་ཐིག་ལེ་རུ༔ རྡོ་རྗེ་ཅན་གྱི་བྲག་མགུལ་སྦོས༔ འཇིགས་པ་མེད་པའི་རྒྱ་ཡིས་ཐོབས༔ བཀའ་སྲུང་དྲེགས་པའི་ཚོགས་ལ་གཉེར༔ ལས་ཅན་བུ་ལ་ཕྲད་སོ་གྱིས༔ ཆོས་བདག་སྐྱེསབུ་དམ་པ་རྣམས༔ སྐུ་ཚེ་ཞབས་པད་རྒྱས་པ་དང་༔ འགྲོ་དོན་རྒྱས་པའི་གྲོགས་མཛོད་ཅིག༔ ལོག་ལྟ་གཤེ་སྐུར་མཁན་རྣམས་དང་༔ བརྒྱུད་འཛིན་བརྒྱུད་པར་བཅས་པ་ལ༔ སྡང་ཞིང་འཚེ་བའི་ཞིང་བཅུའི་དགྲ༔ མ་གཡེལ་མ་འགྱངས་མ་སྡུག་པར༔ མྱུར་དུ་དྲག་པོའི་ལས་ཀྱིས་སྒྲོལ༔ བཀའ་དང་ཐ་ཚིག་གཉན་གྱི་རྒྱ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ གཏེར་རྒྱ༔ སྦས་རྒྱ༔ ཟབ་རྒྱ༔ ཁ་ཐམ༔ ཞེས་པ་འདི་ཉིད་ཆེ་མཆོག་རོལ་པ་རྩལ་ཁྲག་འཐུང་ནུས་ལྡན་རྡོ་རྗེ་གར་དབང་བདུད་འཇོམས་གླིང་པས་ལུག་ལོའི་དགུན་ཟླ་འབྲིང་པོའི་ཉེར་ལྔའི་ཉིན་ངོ་མཚར་བའི་ལྟས་བཟང་དུ་མ་དང་བཅས་ཏེ་གཏེར་ནས་བཏོན་ཏེ་མཐར་རྟེན་འབྲེལ་དུས་ལ་བབ་ཚེ་ཆོས་ཀྱི་བདག་པོ་སྤྲུལ་སྐུ་པདྨ་སྣ་ཚོགས་རང་གྲོལ་དང་མཁྱེན་རབ་རྒྱ་མཚོ་ཀློང་ཆེན་རྡོ་རྗེ་རྣམས་ཀྱིས་ཡང་ཡང་བསྐུལ་ངོར་གཏན་ལ་ཕབ་པའི་དགེ་བས་རྩུབ་འགྱུར་དུས་ཀྱི་ཡོ་ལང་ནད་མུག་མཚོན་གྱི་འཁྲུལ་འཁོར་ཀླ་ཀློའི་རིགས་སྔགས་རྫས་སྦྱོར་ཐམས་ཅད་མིང་གི་ལྷག་མར་གཞོམ་པའི་ཐོ་ལུམ་དང་བསྟན་དང་འགྲོ་ལ་ཕན་བདེ་རྒྱ་ཆེན་པོ་འབྱུང་བའི་གནས་སུ་གྱུར་ཅིག །དགེའོ། །དགེའོ། །དགེའོ།། །།