DJYD-KABUM-06-CHA-016

Previous Text Back to Volume PageNext Text

Wylie title	dpal rdo rje phur bu yang gsang srog gi spu gri'i sgrub chen gyi khog dbub dngos grub 'dod pa 'jo ba'i za ma tog
Location	bdud 'joms rin po che bka' 'bum Volume 6, Text 16, Pages 473-542 (Folios 1a1 to 35b5)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Dpal rdo rje phur bu yang gsang srog gi spu gri'i sgrub chen gyi khog dbub dngos grub 'dod pa 'jo ba'i za ma tog. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 6: 473-542. Kalimpong: Dupjung Lama, 1979-1985.
Side notes	Recto: sgrub khog   Verso: pad gling phur pa
More details More details
Tertön	པདྨ་གླིང་པ་ (pad+ma gling pa)
Genre	Structural Arrangement for Ritual Practice - sgrub khog
Cycle	དཔལ་རྡོ་རྗེ་ཕུར་བུ་ཡང་གསང་སྲོག་གི་སྤུ་གྲི་ (dpal rdo rje phur bu yang gsang srog gi spu gri)
Deity	rdo rje phur pa
Colophon	།དེ་ལྟར་དཔལ་རྡོ་རྗེ་ཕུར་བུ་ཡང་གསང་སྲོག་གི་སྤུ་གྲིའི་སྒྲུབ་ཆེན་གྱི་ཁོག་དབུབ་དངོས་གྲུབ་འདོད་པ་འཇོ་བའི་ཟ་མ་ཏོག་ཅེས་བྱ་བ་འདི་ནི། གསང་ཆེན་བསྟན་པའི་རྩ་ལག་ལྷ་ལུང་ཐེག་མཆོག་རབ་རྒྱས་གླིང་དུ་འདི་ཉིད་ཀྱི་སྒྲུབ་རྒྱུན་གསར་འཛུག་མཛད་པའི་ཆ་རྐྱེན་དུ་འཇུག་པ་བདེ་བའི་ཆོག་ཁྲིགས་འདི་ལྟ་བུ་ཞིག་གྱིས་ཞེས་རྣམ་འདྲེན་གསུང་སྤྲུལ་བཅུ་པ་པདྨ་ངག་དབང་ཆོས་ཀྱི་རྒྱལ་མཚན་གང་གི་བཀའ་སྩལ་རིན་པོ་ཆེའི་ཅོད་པན་སྤྱི་བོའི་རྒྱན་དུ་མཆོད་པར་བྱ་བའི་ཕྱིར། སྤུ་གྲི་རྩ་བའི་སྒྲུབ་འབུམ་ཆེན་མོ་དང་རང་དོན་བྱང་ཆུབ་སྒྲུབ་པ་དབང་གི་མདོ་བྱང་གལ་འགག་ལས་བཀོལ་དང་བཅས་པའི་དགོངས་པ་མ་འཁྲུལ་བར་མན་ངག་ཁྲིགས་བསྡེབས་ཀྱིས་གཏན་ལ་ཕབ་ཅིང་། མཁས་ཤིང་གྲུབ་པ་བརྙེས་པའི་རྡོ་རྗེ་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲང་སྟེ་དཀྱུས་ཀྱི་ལག་ལེན་རྣམ་གསལ་བཀླག་ཆོག་གི་ཚུལ་དུ་བྱས་ཏེ། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་ཞེ་དགུར་སོན་པ་དགའ་བའི་ལོ་ཁྲུམས་སྟོད་ཉ་བའི་ཤེར་ཕྱོགས་ཀྱི་ཚེས་བཅུ་ལ། ཡུལ་གངས་ཅན་གྱི་རྡོ་རྗེ་གདན་ར་ས་འཕྲུལ་སྣང་གི་གྲོང་ཁྱེར་ཕྱོགས་ལས་རྣམ་པར་རྒྱལ་བའི་འདུན་ས་ཆེན་པོར་སྦྱར་བ་ལས། ཐོག་མའི་གླེགས་བམ་དུ་འབེབས་པ་པོ་ནི་རིག་བྱེད་སྨྲ་བའི་སློབ་དཔོན་ནོར་བུ་དབང་རྒྱལ་གྱིས་བགྱིས་པའོ། །འདིས་ཀྱང་དངོས་གྲུབ་རྣམ་གཉིས་རང་དབང་དུ་སྤྱོད་པས་སྲིད་པ་ཐམས་ཅད་རྡོ་རྗེ་ཕུར་བུ་འགྲུབ་པའི་རྒྱུར་གྱུར་ཅིག།། །།སརྦ་དཱ་མངྒ་ལཾ།།
	de ltar dpal rdo rje phur bu yang gsang srog gi spu gri'i sgrub chen gyi khog dbub dngos grub 'dod pa 'jo ba'i za ma tog ces bya ba 'di ni/___gsang chen bstan pa'i rtsa lag lha lung theg mchog rab rgyas gling du 'di nyid kyi sgrub rgyun gsar 'dzug mdzad pa'i cha rkyen du 'jug pa bde ba'i chog khrigs 'di lta bu zhig gyis zhes rnam 'dren gsung sprul bcu pa pad+ma ngag dbang chos kyi rgyal mtshan gang gi bka' stsal rin po che'i cod pan spyi bo'i rgyan du mchod par bya ba'i phyir/___spu gri rtsa ba'i sgrub 'bum chen mo dang rang don byang chub sgrub pa dbang gi mdo byang gal 'gag las bkol dang bcas pa'i dgongs pa ma 'khrul bar man ngag khrigs bsdebs kyis gtan la phab cing /___mkhas shing grub pa brnyes pa'i rdo rje slob dpon chen po rnams kyis ji ltar bkral ba'i rjes su 'brang ste dkyus kyi lag len rnam gsal bklag chog gi tshul du byas te/___rgyal khams pa 'jigs bral ye shes rdo rjes rang lo zhe dgur son pa dga' ba'i lo khrums stod nya ba'i sher phyogs kyi tshes bcu la/___yul gangs can gyi rdo rje gdan ra sa 'phrul snang gi grong khyer phyogs las rnam par rgyal ba'i 'dun sa chen por sbyar ba las/___thog ma'i glegs bam du 'bebs pa po ni rig byed smra ba'i slob dpon nor bu dbang rgyal gyis bgyis pa'o/___/'dis kyang dngos grub rnam gnyis rang dbang du spyod pas srid pa thams cad rdo rje phur bu 'grub pa'i rgyur gyur cig//___//sarba dA mang+ga laM//

Tibetan Text

[edit]

༄༅། །དཔལ་རྡོ་རྗེ་ཕུར་བུ་ཡང་གསང་སྲོག་གི་སྤུ་གྲིའི་སྒྲུབ་ཆེན་གྱི་ཁོག་དབུབ་དངོས་གྲུབ་འདོད་པ་འཇོ་བའི་ཟ་མ་ཏོག་ཅེས་བྱ་བ་བཞུགས་སོ། །

༄༅། །དཔལ་རྡོ་རྗེ་ཕུར་བུ་ཡང་གསང་སྲོག་གི་སྤུ་གྲིའི་སྒྲུབ་ཆེན་གྱི་ཁོག་དབུབ་དངོས་གྲུབ་འདོད་པ་འཇོ་བའི་ཟ་མ་ཏོག་ཅེས་བྱ་བ། བླ་མ་དཔལ་ཧེ་རུ་ཀ་ལ་ཕྱག་འཚལ་ལོ། །ངང་ཉིད་ཆོས་དབྱིངས་ཞི་བའི་ཡེ་ཤེས་ནི། །རྗེས་ཆགས་འབར་བའི་ཕྱག་རྒྱར་མངོན་སྣང་བ། །སྲོག་གི་གོ་རུ་ཤར་བའི་ལྷ་མཆོག་དེས། །བརྟན་གཡོའི་སྙིང་ལ་བདེ་ཆེན་རྒྱས་ཐེབས་མཛོད། །དཔའ་བོ་གང་གི་དཀྱིལ་འཁོར་ཆེ། །ཚོམ་བུ་ཚོགས་སུ་བསྒྲུབ་པ་ལས། །དངོས་གྲུབ་འདོད་རྒུར་འཇོ་མཐོང་ནས། །ཚུལ་འདིར་འབད་ལ་སྤྲོ་བ་སྐྱེས། །དེ་ཡང་བར་ཆད་བདུད་བཞིའི་གཡུལ་[2a]ལས་རྣམ་པར་རྒྱལ་དཔལ་ཏེ་ཧེ་རུ་ཀ་མཆོག་གི་སྐུ་གསུང་ཐུགས་རྡོ་རྗེའི་ཡེ་ཤེས་ཀྱི་དངོས་གྲུབ་ཆེན་པོ་བདེ་མྱུར་དུ་སྒྲུབ་པར་བྱེད་པའི་ལས་ཀྱི་རིམ་པ་འདི་ལ་སྤྱི་དོན་རྣམ་པ་གསུམ་སྟེ། གང་ཞིག་སྒྲུབ་པར་བྱ་བའི་གཞི། གང་གིས་སྒྲུབ་པར་བྱེད་པའི་ཐབས། དེ་ཉིད་མངོན་པར་གྲུབ་པའི་འབྲས་བུའོ། །དང་པོ་ནི། འདི་ལྟར་འགྲོ་བ་ཡོངས་ལ་ཀུན་ཁྱབ་བདེ་བར་གཤེགས་པའི་སྙིང་པོ་རང་བཞིན་གྱིས་རྣམ་པར་དག་པ་ལྷའི་བདག་ཉིད་ཆེན་པོར་གདོད་ནས་ལྷུན་གྲུབ་ཏུ་བཞུགས་པ་ཉིད་གློ་བུར་གྱི་དྲི་མ་དང་འབྲེལ་བས་གནས་ལུགས་ཀྱི་ཡོན་ཏན་མངོན་དུ་གྱུར་བ་དེ་མངོན་དུ་འགྱུར་བར་བྱ་བ་ལ་དམིགས་པའོ། །གཉིས་པ་ནི། སྤྱིར་ཕྲིན་ལས་ཕུར་བུ་རོལ་པའི་ལམ་རིམ་མཐའ་དག་ཐལ་འབྱིན་རྣམ་པ་བཞིའི་[2b]སྒོ་ནས་བསྒྲུབ་པ་ཡིན་ལ། བྱེ་བྲག་སྒྲུབ་ལུགས་ལག་ལེན་གྱི་ཆིངས་སུ་སྔ་མ་གཉིས་སྲོག་ཏུ་བཞག་ནས་ཕྱི་མ་གཙོར་བཏོན་གྱི་དབང་དུ་བྱས་ཏེ་སྟོད་སྨད་ཀྱི་ལས་གཉིས་སུ་ཕྱེ་བ་ལས། འདིར་སྟོད་ལས་ལ་བརྟེན་ནས་བྱང་ཆུབ་སྒྲུབ་པའི་ལས་རིམ་ཉིད་འཆད་པར་བྱ་བ་ཡིན་ཅིང་། དེའང་སྒྲུབ་ཐབས་རྩ་བ་ལས། གཞུང་དངོས་བྱང་ཆུབ་ནར་མ་དང་༔ ཐུན་མོང་ཚོམ་བུར་སྒྲུབ་པ་ཆེ༔ ཞེས་རྣམ་གྲངས་གཉིས་སུ་འབྱུང་བས། འདིར་ཕྱི་མ་ཚོམ་བུ་ཚོགས་སྒྲུབ་ཆེན་མོའི་པྲ་ཁྲིད་ལག་ལེན་དུ་བསྡེབས་པར་བྱ་བ་ལ་གཉིས། སྒྲུབ་པའི་གཞི་བཟུང་བ་དང་། སྒྲུབ་པ་དངོས་ལ་འཇུག་པའོ། །དང་པོ་ནི། བི་ཏོ་ལས། དང་པོ་སྟོན་འཁོར་གནས་ཡོ་བྱད༔ སྒྲུབ་ཆོས་ཕུན་ཚོགས་ལྔས་གཞི་བཟུང་༔ ཞེས་གསུངས་པས། གང་གིས་སྒྲུབ་པའི་སློབ་དཔོན་བདག་ཉིད་ཡོན་ཏན་དང་ལྡན་པ། གང་དང་ལྷན་ཅིག་སྒྲུབ་པའི་ཚོམ་བུར་འབྲེལ་བའི་འཁོར་དམ་ཚིག་གཙང་བ། གང་དུ་སྒྲུབ་པའི་གནས་བཀྲ་ཤིས་དགེ་མཚན་ཚང་བ། གང་ལ་བརྟེན་ནས་སྒྲུབ་པའི་ཡོ་བྱད་ཀྱི་རྫས་ཐམས་ཅད་ཚོགས་པ། གང་ཞིག་བསྒྲུབ་བྱའི་ཆོས་སྤྱི་དང་ཁྱད་པར་གཞུང་འདིའི་ཁོག་དོན་ཁྲོལ་ཞིང་མན་ངག་ཚང་བས་སྒྲོ་འདོགས་ཆོད་པ་སྟེ། དེ་ལྟར་ཕུན་སུམ་ཚོགས་པ་ལྔས་ལས་ཀྱི་གཞི་བཟུང་བར་བྱའོ། །གཉིས་པ་སྒྲུབ་པའི་རིམ་པ་དངོས་ལ་གསུམ། སྦྱོར་བ་སྔོན་འགྲོའི་ལས་རིམ་གྱིས་ཁོག་དབུབ་པ། དངོས་གཞི་བསྙེན་སྒྲུབ་ཕྲིན་ལས་ཀྱི་གཞུང་བསྲང་བ། [3a]རྗེས་མཐའ་རྒྱས་ཀྱི་བྱ་བས་མཇུག་བསྡུ་བའོ། །དང་པོ་ལ་བཞི། སའི་ཆོ་ག །ལྷག་པར་གནས་པ། རྟེན་གྱི་དཀྱིལ་འཁོར་བཅའ་བ། ཕྲིན་ལས་ལ་འཇུག་པའི་ཡན་ལག་གོ །དང་པོ་ལའང་ལྔ། ས་བརྟག་པ། བསླང་བ། སྦྱོང་བ། བཟུང་བ། བསྲུང་བའོ། །དང་པོ་ནི། ལྟོ་འཕྱེ་དང་རྟེན་འབྲེལ་བརྟག་པ་སོགས་ཏེ་སྒྲུབ་གནས་རྙིང་པ་ལ་མི་དགོས་པའི་ཕྱིར་འདིར་མ་སྨྲོས་ལ། ཤེས་པར་འདོད་ན་གཞུང་གཞན་དུ་བལྟའོ། །གཉིས་པ་ལ་གཉིས་ལས། དང་པོ་སྣང་བ་མི་ལས་བསླང་བ་ནི། རྒྱལ་པོ་ལ་སོགས་པས་ཡུལ་དེ་བདག་ཏུ་བཟུང་བ་ཡོད་ན་དགོས་པའི་རིན་དང་བདེན་པའི་གཏམ་གྱིས་བཀྲོལ་ཏེ་གནང་བ་ཞུ་ཞིང་སླད་མར་བར་ཆད་མི་འབྱུང་བར་བྱའོ། །གཉིས་པ་མི་སྣང་བ་ལས་བསླང་བ་ནི། གང་དུ་བྱ་བའི་གཞི་དེར་དྲིའི་མཎྜལ་མེ་ཏོག་གི་ཚོམ་བུ་ཅན་གྱི་མཐར་མཆོད་པ་དང་ས་བདག་སྤྱི་སྒོས་ཀྱི་གཏོར་མ་བཤམ། གཞན་ཡང་འོག་ཏུ་དགོས་པའི་ཡོ་བྱད་རྣམས་ཉེར་བསྡོག་བྱས་ལ། བདག་གི་རྣལ་འབྱོར་སྔོན་དུ་འགྲོ་བས། མཆོད་གཏོར་རྣམས་ཨ་མྲྀ་ཏས་བསང་། སྭ་བྷཱ་ཝས་སྦྱང་། ཐམས་ཅད་སྟོང་ཉིད་ནམ་མཁའི་ངང་༔ བྷྲཱུྃ་ལས་རིན་ཆེན་སྣོད་ནང་དུ༔ ཨོཾ་ལས་ཕྱི་ནང་མཆོད་པའི་ཚོགས༔ སོ་སོའི་ལྷ་མོའི་རོལ་པར་བཅས༔ རབ་འབྱམས་ནམ་མཁའ་གང་བར་གྱུར༔ ཨོཾ་བཛྲ་[3b]པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻདྱ་ཤཔྡ་པཱུ་ཛ་ས་མ་ཡ་ཧཱུྃ༔ ཞེས་དང་། གཏོར་གཞོང་རཏྣའི་གཞལ་ཡས་སུ༔ གཏོར་མ་འདོད་ཡོན་ཕུང་པོར་སྤུངས༔ ཨོཾ་ཨཱཿཧཱུྃ༔ ཞེས་ལན་གསུམ་གྱིས་བྱིན་བརླབ། ལག་གཡས་རྡོ་རྗེ་དང་བཅས་ས་ལ་བརྡེག་པའི་ཚུལ་བྱ་ཞིང་། ཧ་ཧ་ཧཱུྃ་ཧཱུྃ་ཧེ་ཧེ༔ རྡོ་རྗེའི་གད་མོས་ལྷ་མོའི་རྒྱུད་བསྐུལ་བས་ས་དེ་བརྡོལ་བ་ལས་ལྷ་མོ་བརྟན་མ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ། རིན་པོ་ཆེའི་བུམ་པ་བསྣམས་པ༔ ཞི་ཞིང་འཛུམ་པའི་ཉམས་ཅན། དར་གྱི་སྟོད་གཡོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ལྟེ་བ་ཡན་ཆད་ས་སྟེང་དུ་འཐོན་པར་བལྟས་ལ། ཨོཾ་པྲི་ཐི་དེ་ཝྰི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། སོགས་ནས། ཤཔྡའི་བར་གྱིས་མཆོད། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎྰཾ་ཨཱདྱ་ནུཏྤནྣ་ཏོཏྟ་ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་ལན་གསུམ་གྱིས་གཏོར་མ་ཕུལ་ལ། ས་གནོན་གྱི་རྒྱས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དུ། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱེད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་ [4a]བདག་ཀྱང་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་གསོལ་བ་བཏབ་པས་རིག་པ་འཛིན་པ་ཁྱོད་ཅི་དགའ་བར་སྤྱོད་ཅིག་ཅེས་གནང་བ་བྱིན་ནས་ས་དེ་ཉིད་དུ་ཐིམ་པར་བསམ། དེ་ནས་བྱེ་བྲག་གི་སའི་བདག་པོ་རྣམས། བྷྰུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས། སྠཱ་ན་པ་ཏིཀྵེ་ཏྲ་པཱ་ལཉྩ་ན་མ༔ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་ལན་གསུམ་གྱིས་གཏོར་མ་ཕུལ་ནས། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་ཕྱོགས་འདི། །བདག་ཞུ་ཁྱེད་ཀྱིས་སྩལ་དུ་གསོལ། །བྷྰུ་མི་པ་ཏི་ས་པ་རི་ཝཱ་ར་སརྦ་བྷྰུ་ཏ་གཙྪ། གནང་བ་བྱིན་ནས་རང་གནས་སུ་གཤེགས་པར་བསམ་ལ། ཚོམ་བུ་དང་མཆོད་པ་རྣམས་བསྡུའོ། །གསུམ་པ་ས་སྦྱོང་བ་ནི། སྨན་སྣ་དང་བ་བྱུང་ལྔ་སྦྱར་བའི་དྲིའི་ཆུས་དཀྱིལ་འཁོར་གྱི་གཞིར་དབང་ལྡན་ནས་བརྩམས་ཏེ་བྱུགས་ཤིང་། ཨོཾ་བྷྰུ་ཁཾ༔ ས་གཞི་ནམ་མཁར་བསམ། ཧཱུྃ་ལཾ་ཧཱུྃ། རྡོ་རྗེའི་ས་གཞིར་བསྐྱེད། ཨོཾ་མེ་དེ་ནཱི་བཛྲི་བྷ་ཝ་བཛྲ་བནྡྷ་ཧཱུྃ། རྡོ་རྗེའི་རང་བཞིན་དུ་ [4b]བཅིངས་ཏེ་བྱིན་གྱིས་བརླབས་པར་གྱུར། ས་ལ་སོགས་པ་སྣ་ཚོགས་པའི་ཆོས་ཐམས་ཅད་སྟོང་པ་ཉིད་དུ་རོ་གཅིག་པར་མོས་པར་བྱའོ། །བཞི་པ་ས་བཟུང་བ་ནི། སློབ་དཔོན་སྟེགས་བུའི་དབུས་སུ་གནས་པས་རྡོ་རྗེའི་འགྲོས་ཀྱིས་དཔྱིད་གསུམ་ལྷོ། དབྱར་གསུམ་ནུབ། སྟོན་གསུམ་བྱང་། དགུན་གསུམ་ཤར་དུ་ཕྱོགས་ཏེ། ཧ་ཧ་ཧཱུྃ་ཧཱུྃ་ཧྲཱིཿ ཧྲཱིཿ ཕེཾ་ཕེཾ། ཞེས་པའི་གད་མོ་ཆེར་བསྒྲག ། རང་ཉིད་དཔལ་ཆེན་པོར་གསལ་བའི་མིག་གཉིས་མ་དང་ཊ་ལས་ཉི་མ་དང་ཟླ་བ་མིག་འབྲས་ཧཱུྃ་ལས་བསྐལ་པའི་མེར་འབར་བ་ཁྲོས་པའི་སྡང་མིག་བལྟས་པ་ཙམ་གྱིས་བགེགས་ཐམས་ཅད་ཐལ་བར་བརླག་པར་བསམ་ལ། རྡོ་རྗེའི་ཁྲོ་བོའི་ལྟ་སྟངས་ཀྱིས་ཕྱོགས་ཀུན་ཏུ་བལྟ་ཞིང་། ཀཱི་ལ་ཡ་བརྗོད་པས་ཆེ་བའི་ང་རྒྱལ་བསྐྱེད་དེ་རྐང་མཐིལ་ཧཱུཾ་ལས་འབར་བའི་རྡོ་རྗེར་བྱས་ནས། སྒེག་པ་དང་བཅས་པས་རྡོ་རྗེ་གསོར། དྲིལ་བུ་འཁྲོལ་ཞིང་རྡོ་རྗེའི་གོམ་པས་གཡས་སུ་བསྐོར་ནས་དབང་ལྡན་དུ་སོང་སྟེ། ལས་བྱང་བཞིན་བགེགས་ལ་གཏོར་མ་བྱིན་ནས་བཀའ་བསྒོ་ཞིང་དྲག་པོའི་ཚམ་རྔམས་དང་བཅས་པས་བསྐྲད། ཁྲོ་བོ་དུ་མ་སྤྲོས་པས་བགེགས་བཅོམ། དཀྱིལ་འཁོར་གྱི་གཞི་ཧཱུྃ་ལས་རྡོ་རྗེའི་རང་བཞིན་དུ་གྱུར་པར་བསམ། གཞན་ཡང་སྤྲོས་པ་ [5a] ལ་དགའ་བས་ཆས་སུ་ཞུགས་ཏེ་ཁྲོ་བོའི་ཉམས་དང་ལྡན་པས་ཧཱུྃ་སྒྲ་དྲག་པོར་བརྗོད་ཅིང་ཁྲོ་བོ་བཅུའི་རྣམ་འགྱུར་སོགས་འབར་བའི་སྟངས་སྟབས་ཇི་ལྟར་རིགས་པས་ཀྱང་གཅག་ཅིང་གཟུང་བར་བྱའོ། །ལྔ་པ་ས་བསྲུང་བ་ནི། སློབ་དཔོན་གྱིས་དབང་མཆོག་གི་ཕུར་བུ་བཟུང་ལ། ཕུར་བུ་སྐད་ཅིག་གིས་བཛྲ་ཀཱི་ལ་ཡ་སྟོད་ཞལ་གསུམ་ཕྱག་དྲུག་ཕུར་བུ་འདྲིལ་བ། སྨད་ལྕགས་ཕུར་མེའི་ཚྭ་ཚྭ་འཕྲོ་བར་གྱུར་པར་བསམ་ལ། ཕུར་བུ་འདྲིལ་ཞིང་། ཨོྃ་གྷ་གྷ་གྷྰ་ཏ་ཡ་གྷྰ་ཏ་ཡ་སརྦ་དུ་ཥྚན་བཛྲ་དྷ་རོད་ཨཱ་ཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལི་ཀཱི་ལ་ཡ་ཧཱུཾ་ཧཱུཾ་ཕཊ་ཕཊ༔ ཅེས་ལན་གསུམ་གྱིས་སྟེགས་བུའི་དབུས་སུ་གདབ་པས། ཕུར་བུ་ལས་འཕྲོས་པའི་ཁྲོ་ཆུང་དང་མེའི་འོད་ཀྱིས་ས་གཞི་ཁེངས་པར་བསམ་མོ། །དེ་དག་ནི་སའི་ཆོ་གའོ། །སྐབས་འདིར་རྒྱབ་རིམ་གྱི་དཔུང་དུ་སྤྱི་བཤགས་བྱ་སྟེ། སྰཙྪ་གདབ། སྲོག་བསླུ། ཉེའུ་འདོན། བཤགས་སྐོང་། སྦྱིན་སྲེག །མགྲོན་བཞི་ལ་མཆོད་སྦྱིན་ཅི་འབྱོར་དང་། གཟུངས་མདོ་སྒྲོག །ཁྱད་པར་སྒྲུབ་ཁང་གི་ཤར་དུ་ཆོས་ཉིད་ཀྱི་དོན་རྟོགས་ཕྱིར་ཤེར་ཕྱིན། ལྷོར་བདུད་འཇོམས་ཕྱིར་སྟོབས་པོ་ཆེ། ནུབ་ཏུ་རྒྱུ་འབྲས་གོ་ཕྱིར་ལང་གཤེགས། བྱང་དུ་བར་ཆད་ཞི་ཕྱིར་ཏོག་གཟུངས་རྣམས་བཀླག་པ་སོགས་དགེ་བའི་དཔུང་བསྐྱེད་པའི་ཕྱིར་རང་ངམ་གཞན་གྱིས་ [5b] ཀྱང་ཅི་འགྲུབ་ཏུ་བྱའོ། །གཉིས་པ་ལྷག་པར་གནས་པའི་རིམ་པ་ནི། ལྷ་དང་བུམ་པ་སློབ་མ་རྣམས་སྟ་གོན་དུ་བསྒྲུབ་པ་སྟེ། སྒྲུབ་ཆེན་དབང་བསྐུར་དང་འབྲེལ་བའི་སློབ་མ་རྗེས་སུ་བཟུང་བ་གཙོ་བོར་བྱེད་པའི་ཚེ་སྨིན་བྱེད་ཀྱི་ཆོ་གའི་སྐབས་བཞིན་ལག་ཏུ་བླང་བར་བྱ་ཞིང་། མོས་སློབ་སྒྲུབ་ཆེན་འདྲ་འབག་སྤྱི་ཙམ་ལ་ནི་དེ་དག་ངེས་པར་དགོས་པ་མ་ཡིན་པས་སྒྲུབ་གཞུང་ཆེན་པོ་གཞན་དག་ལས་ཀྱང་མི་འབྱུང་བ་བཞིན་འདིར་ཡང་མ་སྨོས་སོ། །གསུམ་པ་རྟེན་གྱི་དཀྱིལ་འཁོར་བཅའ་བ་ལ་བདུན། མཚམས་བཅད་པ། མ་ཏྲཾ་བསྒྲལ་བ། ཆག་ཆག་གདབ་པ། ཐིག་གདབ་བ། ཚོན་དགྱེ་བ། ཕུར་བུ་དགོད་པ། རྒྱན་རྫས་དགྲམ་པའོ། །དང་པོ་ལ་གསུམ་གྱི། ཐོག་མར་ཕྱི་མཚམས་བཅད་པ་ནི། སྒྲུབ་ཁང་གི་ཕྱིའི་ཕྱོགས་བཞིར་ཐོ་བཞི་བརྩིགས་ལ་རྒྱལ་ཆེན་བཞིའི་སྐུ་རྟེན་རབ་གནས་ཅན་གཟུག །དེ་དག་གི་མདུན་དུ་མཆོད་པ་ཆུ་གཉིས་ཉེར་སྤྱོད་ལྔ་དང་གཏོར་མ་རེ་བཤམས་ལ། སྒྲུབ་པ་པོ་རྣམས་དཔལ་ཆེན་པོའི་སྙེམས་པ་དང་བཅས་པས་ཤར་དུ་སོང་སྟེ། མངོན་པར་བཤམས་པའི་མཆོད་གཏོར་རྣམས་བྱིན་གྱིས་བརླབས་ནས། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རི་རབ་ཀྱི་ཤར་ཕྱོགས་ནས་རྒྱལ་པོ་ཆེན་པོ་ཡུལ་འཁོར་སྲུང་འཁོར་དང་བཅས་པ་སྤྱན་དྲངས་པར་བསམ་ལ། ཧཱུྃ། གསང་བདག་སྤྱན་སྔར་དམ་མནོས་ཤིང་། །བསྟན་པ་ [6a] སྲུང་བར་ཞལ་བཞེས་པ། །རྒྱལ་པོ་ཆེན་པོ་ཡུལ་འཁོར་སྲུང་། །འདིར་གཤེགས་རྟེན་ལ་བརྟན་པར་བཞུགས། །བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བྃ་ཧོཿ ས་གཉིས་སུ་མེད་པར་བསྟིམ། ཨོཾ་མ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་ནས། ཤཔྡའི་བར་གྱིས་མཆོད། རྩ་སྔགས་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་གཏོར་མ་ཕུལ་ལ། ཧཱུྃ། དྲི་ཟའི་མངའ་བདག་ཡུལ་འཁོར་སྲུང་། །ཞི་བའི་ལས་མཛད་སྐུ་མདོག་དཀར། །ལྷ་ཡི་ཐུགས་དམ་པི་ཝཾ་བསྣམས། །དེ་ལ་བསྟོད་དེ་ཕྱག་ཀྱང་འཚལ། །རྒྱལ་པོ་ཆེན་པོ་འཁོར་བཅས་ཀྱིས། །སྔོན་གྱི་ཐ་ཚིག་ཇི་བཞིན་དུ། །མཆོད་སྦྱིན་གཏོར་མ་འདི་བཞེས་ལ། །སྒྲུབ་པའི་བར་ཆད་ཀུན་སྲུངས་ཤིག །ཅེས་བསྟོད་ཅིང་ཕྲིན་ལས་བཅོལ། ཨོཾ་དྷྲིཥྚ་རཥྚ་ཡ་སྭཱ་ཧཱ། ཏིཥྛ་བཛྲ། ཞེས་བརྟན་བཞུགས་བྱ། དེ་བཞིན་དུ་ལྷོ་ལ་སོགས་པའི་ཕྱོགས་གཞན་གསུམ་དུ་རིམ་བཞིན་སོང་སྟེ། ཆོ་ག་གཞན་སྔ་མ་ལྟ་བུ་ལས་ཤར་ཕྱོགས་ཀྱི་མལ་དུ་ལྷོ་ནུབ་བྱང་རྣམས་དང་། ཡུལ་འཁོར་སྲུང་ཞེས་པའི་ཚབ་ཏུ། འཕགས་སྐྱེས་པོ། མིག་མི་བཟང་། རྣམ་ཐོས་སྲས། ཞེས་བསྒྱུར་བས་སྤྱན་ [6b] འདྲེན་མཆོད་གཏོར་འབུལ་བ་རྣམས་ཤེས་པར་བྱས་ལ། བསྟོད་པའི་ཚེ། ཧཱུྃ། གཤིན་རྗེའི་མངའ་བདག་འཕགས་སྐྱེས་པོ། །མངོན་སྤྱོད་ལས་མཛད་སྐུ་མདོག་སྔོ། །ཚར་གཅོད་བེ་ཅོན་རལ་གྲི་བསྣམས། །དེ་ལ་བསྟོད་དེ་ཕྱག་ཀྱང་འཚལ། །ཨོཾ་བཻ་རཱུ་ཌཱ་ཀཱ་ཡ་སྭཱ་ཧཱ། ཧཱུྃ། ཀླུ་ཡི་མངའ་བདག་སྤྱན་མི་བཟང་། །དབང་གི་ལས་མཛད་སྐུ་མདོག་དམར། །ཚོགས་རྫོགས་མཆོད་རྟེན་སྦྲུལ་ཞགས་བསྣམས། །དེ་ལ་བསྟོད་དེ་ཕྱག་ཀྱང་འཚལ། །ཨོཾ་བི་རཱུ་པཀྵ་ཡ་སྭཱ་ཧཱ། ཧཱུྃ། གནོད་སྦྱིན་མངའ་བདག་རྣམ་ཐོས་སྲས། །རྒྱས་པའི་ལས་མཛད་ལྗང་སེར་སྐུ། །གཏེར་འཆང་བེ་ཅོན་ནེའུ་ལེ་བསྣམས། །དེ་ལ་བསྟོད་དེ་ཕྱག་ཀྱང་འཚལ། །ཨོཾ་བཻ་ཤྲ་མ་ཎྰ་ཡ་སྭཱ་ཧཱ། ཞེས་དང་། ཕྲིན་ལས་བཅོལ་བ་སོགས་གོང་བཞིན་བྱ། ཁོར་ཡུག་ཐམས་ཅད་དུ་རྒྱལ་ཐབས་བཞིས་རྡོ་རྗེའི་གུར་ཕུབ་པར་བསམ་མོ། །གཉིས་པ་ནང་མཚམས་བཅད་པ་ལ་གསུམ་གྱི། དང་པོ་དམ་སྲི་མནན་པ་ནི། དུག་ཤོག་ལ་དམ་སྲིའི་གཟུགས་རྟེན་ཚུལ་བཞིན་དུ་བྲིས་པ་སྒྲུབ་ཁང་གི་སྒོ་དྲུང་དོང་གྲུ་གསུམ་པར་བཀོད། སྡོང་གྲོགས་བཅོལ་བའི་ཕྱིར་གསེར་སྐྱེམས་ཀྱི་མཆོད་པ་སྔོན་དུ་འགྲོ་བས། ཀཱི་ལ་ཡའི་སྔགས་ཀྱིས་ང་རྒྱལ་བསྐྱེད་དེ། ཨེ་ཡཾ་ཛྭ་ལ་རྃ། བྲུབ་ [7a] ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དམ་སྲི་ཕོ་མོ་རིད་ཅིང་ཉམ་ཐག་པའི་ལུས་ཅན་དུ་གསལ་ལ། བདེན་སྟོབས་བརྗོད་པ་སྔོན་དུ་འགྲོ་བས། སྒྲུབ་པ་ཟབ་མོ་ལ་བར་དུ་གཅོད་པར་བྱེད་པའི་དམ་སྲི་འབྱུང་པོའི་རིགས་སུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག །ཏྲི་ཡཾ་ཛཿཏྲི་བཛྲ་ཨཾ་ཀུ་ཤ་ཛཿཛཿཧཱུྃ་བཾ་ཧོཿ ཞེས་དགུག་གཞུག་བྱ། ལས་བྱང་བཞིན་བབ་བརྒྱད་སོགས་ཀྱིས་བསྐུལ་ནས། ཨོཾ་ལཾ་སོགས་བརྗོད་ལ་ཕུར་སྐོར་ཚམ་རྔམས་དང་བཅས་ཚེ་ཁྲུས་ཀྱི་དགོངས་པས་རྣམ་པར་ཤེས་པ་རྡོར་སེམས་ཡབ་ཡུམ་གྱི་སྲས་སུ་བསྐྲུན། རྣམ་སྨིན་བག་ཆགས་ཀྱི་ལུས་རྟེན་དོང་ནང་དུ་སྤྱི་ཚུགས་སུ་མནན་ནས་རོ་གཡམ་ལ་སྣ་ཚོགས་རྡོ་རྗེ་དང་རི་རབ་གླིང་བཞི་བྲིས་པས་བཀབ་སྟེ། ཧཱུྃ༔ གཅིག་ནི་བརྗོད་མེད་ཉག་གཅིག་རྒྱ༔ གཉིས་པ་ཐབས་དང་ཤེས་རབ་རྒྱ༔ གསུམ་ནི་སྐུ་གསུང་ཐུགས་ཀྱི་རྒྱ༔ བཞི་ནི་ཕྱག་རྒྱ་བཞི་ཡི་རྒྱ༔ ལྔ་ནི་ཡེ་ཤེས་ལྔ་ཡི་རྒྱ༔ དྲུག་པ་ཕ་རོལ་ཕྱིན་དྲུག་རྒྱ༔ བདུན་པ་མ་མོ་བདུན་གྱི་རྒྱ༔ བརྒྱད་ནི་དུར་ཁྲོད་བརྒྱད་ཀྱི་རྒྱ༔ དགུ་ནི་ཧེ་རུ་ཀློང་དགུའི་རྒྱ༔ བཅུ་ནི་ཁྲོ་རྒྱལ་བཅུ་ཡི་རྒྱ༔ ཁྱོད་ལ་རྒྱ་བཅུ་བརྩེགས་ཏེ་མནན༔ རི་རབ་བརྗིད་པའི་འོག་ཏུ་ [7b] མནན༔ དཔལ་གྱི་བྲོ་ར་བྱས་ཏེ་མནན༔ བསྐལ་པ་བྱེ་སྙེད་མཐའ་རུ་མནན༔ ཞེས་རྒྱ་བཅུས་གདབ་ཅིང་ལས་བྱང་བཞིན་བྲོ་བརྡུང་ངོ་། །གཉིས་པ་སྒོ་སྲུང་བ་ནི། བསེ་བྱང་གཉིས་ཀྱི་མདུན་ངོས་ལ་གཤིན་རྗེ་གཤེད་དང་བདུད་རྩི་འཁྱིལ་བའི་སྐུ་བྲི་ཞིང་རྒྱབ་ཏུ་སོ་སོའི་སྙིང་པོ་འདོད་དོན་སྤེལ་ཚིག་ཅན་ཕུར་བུ་རེ་དང་བཅས་པའི་གཤིན་རྗེ་སྒོའི་ཕྱི་རོལ་དང་འཁྱིལ་བ་སྒོའི་ནང་ལོགས་ཀྱི་སྟེང་དུ་བཀོད། མདུན་དུ་མཆོད་པ་ལྔ་གཏོར་མ་དང་བཅས་པ་བཤམས་ཤིང་བྱིན་གྱིས་བརླབས་ཏེ། རྟེན་བསང་སྦྱང་། སྟོང་པའི་ངང་ལས་པད་ཉི་དྲེགས་པའི་སྟེང་དུ་ཡ་ལས་གཤིན་རྗེ་ནག་པོ་ཐོད་དབྱུག་དང་ཞགས་པ་ཐོགས་པ། ཧཱུྃ་ལས་བདུད་རྩི་འཁྱིལ་བ་ལྗང་ནག་རལ་གྲི་དང་རྒྱ་གྲམ་འཛིན་པ། གཉིས་ཀའང་སྲིན་པོ་ཁྲོས་པའི་ཉམས་ཅན་འབར་བའི་ཆས་ཀྱིས་བརྒྱན་ཏེ་མེའི་ཕུང་པོའི་དབུས་ན་གནས་པའོ། །དེའི་སྤྱི་བོར་ཨོཾ། མགྲིན་པར་ཨཱཿསྙིང་གར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བྃ་ཧོཿ ས། གཉིས་སུ་མེད་པར་བསྟིམ། པུཥྤེ་སོགས་ཉེར་སྤྱོད་ལྔས་མཆོད་ཅིང་། སྔགས་གཉིས་ཀྱི་མཐར་གཏོར་སྔགས་བཏགས་པ་གསུམ་གྱིས་གཏོར་མ་ཕུལ་ལ། ཧཱུཾ། བཅོམ་ལྡན་ཁྲོ་བོའི་ [8a] རྒྱལ་པོ་ནི། །སངས་རྒྱས་ཀུན་གྱི་འཁོར་ལོས་སྒྱུར། །གདུལ་དཀའ་མ་ལུས་འདུལ་བ་པོ། །ཁྲོ་བོའི་རྒྱལ་ལ་ཕྱག་འཚལ་བསྟོད། །ཅེས་བསྟོད། བརྟན་པར་བྱ་བའི་ཕྱིར། ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ལན་བདུན་བཟླས་ནས། ཁྲོ་བོ་གཤིན་རྗེའི་གཤེད་ཀྱིས་སྒྲུབ་པའི་གནས་འདིར་ཕྱིའི་བར་ཆད་ནང་དུ་མི་གཏོང་བའི་ཕྲིན་ལས་མཛོད་ཅིག །ཅེས་དང་། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ བདུན་བཟླས་ནས། ཁྲོ་བོ་བདུད་རྩི་འཁྱིལ་བས་ནང་གི་དངོས་གྲུབ་ཕྱིར་མི་གཏོང་བའི་ཕྲིན་ལས་མཛོད་ཅིག །ཅེས་འདོད་དོན་གསོལ་ལོ། །གསུམ་པ་ཁྲོ་བཅུའི་མཚམས་གཅོད་ནི། སེང་ལྡེང་ལ་སོགས་པའི་ཕུར་བུ་སོར་བཅུ་གཉིས་པ་ཙནྡན་དམར་པོས་བྱུག་པ་བཅུའམ་མགུལ་དུ་ཁ་དོག་ལྔའི་སྲད་བུས་དཀྲིས་ཤིང་རྩེ་མོར་མེ་ཏོག་དང་ཡུངས་དཀར་གྱི་ཐུམ་བུ་བཅིངས་པ་རྣམས་བསང་སྦྱང་། སྟོང་པའི་ངང་ལས་ཧཱུྃ་ཡོངས་སུ་གྱུར་པ་ལས་ཕུར་བུ་རྣམས་སྟོད་ཁྲོ་བོ་བཅུ་ལ་སྨད་ཕུར་བུའི་དབལ་ཅན་རྩེ་མོ་རབ་ཏུ་འབར་བའི་མེ་ལྟ་བུར་བསམ་ནས། ཕུར་བུ་རྣམས་བསྒྲིལ་ཞིང་། ཀཱི་ལ་ཡ་དང་ཁྲོ་བཅུའི་སྔགས་བརྗོད་པས་བྱིན་གྱིས་བརླབས་ [8b] ཏེ། དབང་པོ་ལ་སོགས་པའི་བགེགས་རྣམས་ཀྱི་སྤྱི་བོ་ནས་བསྡིགས་པས་གསང་བའི་བར་ཕུག་སྟེ་གསེར་གྱི་ས་གཞི་ལ་སྦྲགས་ནས་གཡོ་འགུལ་མེད་ཅིང་བདེ་བ་ཆེན་པོར་རོ་གཅིག་ཏུ་གྱུར་པར་བསམ་ལ། ཨོཾ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃ༔ གནོད་བྱེད་འབྱུང་པོ་གརྫ་གརྫ་ཧཱུྃ་ཕཊ༔ ཅེས་པ་ནས་སྟོབས་པོ་ཆེའི་བར་གྱི་སྔགས་ཚིག་རྣམས་བརྗོད་བཞིན་ཕུར་བུ་རྣམས་དཀྱིལ་འཁོར་ཁང་པའི་ཕྱོགས་མཚམས་བརྒྱད་དང་སྟེང་འོག་གི་ཕུར་བུ་ཤར་ནུབ་ཏུ་གདབ་ཅིང་། དེ་རྣམས་ཀྱིས་བགེགས་ཐམས་ཅད་བསྲུང་བའི་ལས་མཛད་པར་བསམ་མོ། །གསུམ་པ་གསང་མཚམས་ནི། བར་དུ་བཅད་བྱ་གཅོད་བྱེད་ཐམས་ཅད་གཟུང་འཛིན་སེམས་ཀྱི་རྣམ་པར་རྟོག་པའི་ངོར་སྣང་བ་ཙམ་སྟེ། སེམས་ཉིད་ཡེ་ནས་སྟོང་གསལ་ཆོས་ཀྱི་དབྱིངས་སུ་རོ་གཅིག་པའི་ངོ་བོ་ལ་བར་ཆད་ཀྱི་མཚན་མ་ནམ་ཡང་གྲུབ་པ་མེད་པས་ན་སྲིད་ཞི་མཉམ་ཉིད་དུ་རིག་པ་ནི་མི་ཤིགས་རྡོ་རྗེའི་མཚམས་གཅོད་བླ་ན་མེད་པའོ། །གཉིས་པ་མ་ཏྲཾ་བསྒྲལ་བ་ནི། ཁམས་ལ་མ་ཏྲཾ་གི་གཟུགས་ཐལ་སྐྱ་མི་སྡུག་པའི་རྣམ་པ་ཅན་ཞིག་བཅོས་པ་དཀྱིལ་འཁོར་གྱི་གཞིར་མགོ་ལྷོ་ནུབ་ཏུ་ཕྱོགས་པར་གན་རྐྱལ་དུ་བཞག་ལ། རང་ཉིད་དཔལ་ཆེན་པོར་གསལ་བའི་ཐུགས་ཀ་ནས་སྤྲོས་པའི་འོད་ཟེར་ལྕགས་ཀྱུས་བར་དུ་གཅོད་ [9a] པའི་བདུད་བགེགས་ལོག་འདྲེན་བཀུག་པར་བསམ་ཞིང་། བདེན་སྟོབས་བརྗོད་པ་སྔོན་དུ་འགྲོ་བས། རྣམ་པ་མ་ཏྲཾ་རུ་དྲ་ངོ་བོ་དངོས་གྲུབ་ལ་བར་དུ་གཅོད་པའི་བདུད་དང་ལོག་འདྲེན་ཐམས་ཅད་མ་ཏྲཾ་རུ་དྲ་ཨཱ་ཀརྵ་ཡ་ཛཿཏྲི་ཡཾ་ཛཿཛཿཧཱུྃ་བྃ་ཧོཿ ཞེས་དགུག་བསྟིམ་བྱ། དེ་ནས་ལས་ཀྱི་གིང་དཀར་ནག་གཡས་ཟངས་གྲི་དང་གཡོན་སྙིང་ཐོགས་པ་གཉིས་ཆས་སུ་བཅུག་པ་ལ་སློབ་དཔོན་གྱི་ཐུགས་ཀ་ནས་སྒྲོལ་བྱེད་ཌཱ་ཀྐི་རཱ་ཛ་དཀར་ནག་གཉིས་སྤྲོས་ཏེ་སོ་སོ་ལ་བསྟིམས་ནས་སྒྲོལ་གིང་དུ་མངའ་གསོལ། དེས་ཀྱང་སྙེམས་པ་བརྟན་ཅིང་དྲག་པོའི་གོམ་སྟབས་དང་བཅས་པས། ཧཱུྃ། མ་ཏྲཾ་བྱ་བའི་སྡིག་ཅན་ཁྱོད། །དུག་གསུམ་ཉོན་མོངས་དབང་དུ་སོང་། །གསང་བའི་དཀྱིལ་འཁོར་གཉན་པོ་བཤིག ། དཀོན་མཆོག་གསུམ་གྱི་སྐུ་དགྲར་གྱུར། །དེ་ཚེ་དཔལ་ཆེན་ཧེ་རུ་ཀས། །བསྒྲལ་ནས་དུར་ཁྲོད་བརྒྱད་དུ་བྱས། །དེ་བཞིན་ཞིང་བཅུའི་རུ་དྲ་ཁྱོད། །བདག་མེད་ཆོས་ཀྱི་དབྱིངས་སུ་བསྒྲལ། །ཨོཾ་བཛྲ་ཀཱི་ལི་ཀཱི་ལ་ཡ་མ་ཏྲཾ་རུ་དྲ་པྲ་བྷཉྩ་ཀྲ་ཧཱུྃ་ཕཊ། ཙིཏྟ་པྲ་བེ་ཤ་ཡ་ཕཊ༔ ཅེས་མ་ཏྲཾ་བསྒྲལ། སློབ་དཔོན་གྱིས་དེའི་སྙིང་ཕྱུངས་ཏེ་ཞལ་དུ་གསོལ་བར་བསམ་ཞིང་། ཏི་ཧཱུྃ། ཨེ་སྥ་ར་ཎ་ཕཊ། ཅེས་རྣམ་ཤེས་སྐྱེ་བ་མེད་པའི་དབྱིངས་སུ་སྦྱར། [9b] ཉོན་མོངས་པའི་ཡིད་དཔལ་ཆེན་པོའི་ཞབས་འོག་ཏུ་མནན་ལ་དོན་སྙིང་ནང་རོལ་རྣམས་ཕོ་ཉའི་ཚོགས་ཀྱིས་རོལ་པར་བསམ། བྷྲཱུྃ་ཛྙཱ་ན་མཎྜ་ལ་བྷྲཱུྃ། ཁོག་པ་རང་བྱུང་གི་གཞལ་ཡས་ཁང་དུ་ལྷུན་གྱིས་གྲུབ་པར་བལྟས་ལ། མགོ་བོ་དཀྱིལ་འཁོར་གྱི་ལྷོ་ནུབ། སྙིང་ནུབ། ལག་གཡོན་ནུབ་བྱང་། རྐང་གཡོན་བྱང་། མཚན་མ་བྱང་ཤར། རྐང་གཡས་ཤར། ལག་གཡས་ཤར་ལྷོ། གློ་བ་ལྷོ། ཁོག་པ་དབུས་རྣམས་སུ་འགོད་དོ། །གསུམ་པ་ཆག་ཆག་གདབ་པ་ནི། ཀ་པཱ་ལར་ཁྲག་ཆེན་བདུད་རྩི་ལྔ་དྲི་དང་སྦྱར་བ་ཐོགས་ལ། ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ དམ་རྫས་བདུད་རྩི་ཡེ་ཤེས་ལྔ་ལྡན་པས༔ དེ་བཞིན་གཤེགས་པའི་ཕྲིན་ལས་མཆོག་བསྒྲུབ་ཕྱིར༔ བཀའ་གསང་རྨད་དུ་བྱུང་བའི་ཆག་ཆག་འདེབས༔ ཨོཾ་མ་ཧཱ་པཉྩ་ཨ་མྲྀ་ཏ་མཎྜལ་ཧཱུྃ༔ ཞེས་བརྗོད་ཅིང་དཀྱིལ་འཁོར་གྱི་གཞི་དེའི་དབང་ལྡན་ནས་གཡས་བསྐོར་དུ་ཁྱེམ་མེད་པར་ཆག་ཆག་གདབ་བོ། །བཞི་པ་ཐིག་གདབ་པ་ལ་གཉིས་ཀྱི། དང་པོ་ཡེ་ཐིག་ནི། རྒྱུས་ཆེན་ནམ། ཁ་དོག་ལྔ་པའི་སྲད་བུ་མཚན་ཉིད་དང་ལྡན་པ་བསང་སྦྱང་། སྟོང་པའི་ངང་ལས་པདྨ་དང་ཉི་མ་ལ་གནས་པའི་ཧཱུྃ་ཁ་དོག་ལྔ་ལས་ཁྲག་འཐུང་རིགས་ལྔ་ཡུམ་དང་བཅས་པའི་སྐུར་གྱུར་པའི་ཐུགས་ཀའི་འོད་ཟེར་ [10a] གྱིས་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿ ས་བསྟིམ། ཉེར་སྤྱོད་ལྔས་མཆོད། བཅོམ་ལྡན་ཁྲོ་བོའི་རྒྱལ་པོ་ནི། །སོགས་ཤྭ་ལོ་ཀས་བསྟོད། དེ་རྣམས་ཞུ་བ་ལས་བྱུང་བའི་ཐིག་སྐུད་དུ་གྱུར་པར་བསམ་ལ། ལས་ཀྱི་རྡོ་རྗེ་ཡུམ་དུ་གསལ་བའི་ལག་ཏུ་གཏད་དེ། ཧཱུྃ༔ མཚན་ལྡན་བཀྲ་ཤིས་སྦྱོར་བའི་ཡུམ༔ དྲག་པོས་སྒྲོལ་བའི་ཡུམ་ཆེན་ནི༔ གདོལ་བ་ནག་པོ་གཉེར་ཕྲེང་མ༔ རྡོ་རྗེ་དྲག་པོའི་ལས་རྣམས་སྒྲུབ༔ གསང་བ་རྡོ་རྗེའི་ཐིག་འདེབས་ཀྱིས༔ ལས་རྣམས་མ་ལུས་ཀུན་བྱོས་ཤིག༔ ཨོཾ་བྷྲཱུྃ་ཛྙཱ་ན་ཨེ་མཎྜལ་བྷྲཱུྃ༔ ཞེས་བརྗོད་ཅིང་སློབ་དཔོན་ནུབ་དང་སློབ་མ་ཤར་དུ་གནས་པས་ཚངས་ཐིག་དང་པོ་མཁའ་ལ་གདབ་ཅིང་། དེ་བཞིན་དུ་སློབ་དཔོན་ལྷོ་དང་སློབ་མ་བྱང་དུ་གནས་བས་ཚངས་ཐིག་གཉིས་པ་དང་ཟུར་ཐིག་རྣམས་ནུབ་ནས་ལྷོ་བྱང་། ལྷོ་ནས་ནུབ་ཤར་གྱི་རྩ་ཐིག་རྣམས་གདབ། ཡུམ་གྱི་མཁའ་ཀློང་དུ་ཡབ་ཀྱི་བྱང་སེམས་མཁའ་མཉམ་གྱི་ཐིག་ལེར་འདྲེས་ཏེ་རང་བྱུང་གི་གཞལ་ཡས་ཁང་དུ་ལྷུན་གྱིས་གྲུབ་པར་བལྟའོ། །གཉིས་པ་ལས་ཐིག་ནི། ཐིག་ཆལ་གྱིས་སྦགས་པའི་སྐུད་པ་བསྐྱང་སྟེ། ཧཱུཾ༔ ནམ་མཁའ་བར་སྣང་ཨེ་ཡི་ངང་༔ གསང་བ་ཡེ་ཤེས་ཐིག་ [10b] བཏབ་པས༔ རྡོ་རྗེ་སྲིན་པོའི་ལྷ་ཚོགས་གནས༔ ཕོ་བྲང་ཡིད་བཞིན་ལྷུན་གྱིས་གྲུབ༔ བྷྲཱུྃ་བི་ཤྭ་བི་ཤུདྡྷེ་རཏྣ་བྷཉྫ་ན་ཨེ་མ་མཎྜལ་བྷྲཱུྃ༔ ཞེས་བརྗོད་ཅིང་འདུག་གནས་སྤྱོད་ལམ་ཡེ་ཐིག་གི་སྐབས་ལྟ་བུས་འདི་ལྟར་གདབ་སྟེ། ཐོག་མར་ཤར་ནུབ་ཚངས་ཐིག་གདབ། །ལྷོ་བྱང་མཚམས་བཞིར་བྱ་རྗེས་བཙལ། །དེ་སྟེང་ཚངས་ཐིག་གཉིས་པ་དང་། །ཟུར་ཐིག་གཉིས་གདབ་གྲུ་བཞིར་བཅད། །ཚངས་པའི་ཐིག་གི་གཡས་གཡོན་ཏུ། །ཆ་ཆེན་དགུ་དགུ་བཅོ་བརྒྱད་དང་། །ཆ་ཆུང་ཚངས་ངོས་དང་པོ་ཉིད། །ཕྱེད་བཏབ་ཕྱི་བསིལ་གཉིས་པ་བཞིར། །གསུམ་མཐར་ཆ་ཕྲན་གཅིག་བཏབ་བཞི། །དོར་རྗེས་ལྔ་པའི་མཐའ་བསིལ་དབུས། །བཞག་ལ་དྲུག་ཕྱེད་ཕྱི་མ་བསིལ། །བདུན་པ་བཞིར་བགོས་བརྒྱད་དབུས་དོར། །གསུམ་པའི་ཆ་ཕྲན་ནང་ཟླུམ་པོར། །གཅིག་ཕྱེད་ཕྱེད་དྲུག་གཅིག་བསྐོར་དབུས། །གྲུ་གསུམ་དེ་རྣམས་རིམ་པ་བཞིན། །ཐོད་ཕྲེང་རིན་ཆེན་ཆ་བརྒྱད་དང་། །མུ་ཁྱུད་མེ་རི་ནང་ཁྱམས་རྩིག །ཁྱམས་རྩིག་འདོད་སྣམ་ཕ་གུ་མུན། །མདའ་ཡབ་པུ་ཤུ་རྟ་བབ་དང་། །པད་འཁོར་གདུགས་ཀྱི་གནས་སུ་འགྱུར། །སྒོ་ངོས་ཐིག་དྲུག་ཕྱི་ནང་སྒོ། །སྒོ་ཁྱུད་འགྲམ་ལོག་མུན་ཀྭ་བ། །པུ་ཤུའི་ཟུར་ནས་ཆ་ཕྲན་གཉིས། །བཞི་གཉིས་གཅིག་བཞི་པད་དུར་ཁྲོད། །དམ་ཅན་རྡོར་མེ་ [11a] རིའི་གནས། །མཐོང་བརྒྱུད་གནད་ཀྱིས་ཤེས་པར་བྱའོ། །དེ་ནས་སྲད་བུ་ལྔ་ཆོ་ག་བཞིན་མཆོད་ནས་ཡེ་ཤེས་ཀྱི་ཐིག་བཛྲ་མུཿས་གཤེགས་སུ་གསོལ། ལས་ཐིག་ཀྱང་དབེན་བར་བཞག་གོ །ལྔ་པ་ཚོན་དགྱེ་བ་ནི། རྡུལ་ཚོན་ཁ་དོག་ལྔ་ལ་རང་རིགས་ཀྱི་ཡི་གེ་བྲིས་པ་དབུས་དང་ཕྱོགས་བཞིར་བཀོད། བསང་སྦྱང་ལྷར་བསྐྱེད་དེ་བསྟོད་པའི་བར་ཐིག་གི་སྐབས་བཞིན་བྱས་ལ། དེ་རྣམས་ཞུ་བ་ལས་བྱུང་བའི་རིན་པོ་ཆེའི་རྡུལ་ཕྲ་རབ་ཏུ་བསམ་ལ། ས་བོན་ལྔ་བརྗོད་པས་བྱིན་གྱིས་བརླབས་ནས་ཚོན་ཇི་ལྟར་དགྱེ་བའི་ཚུལ་ནི། དབུས་ཀྱི་གྲུ་གསུམ་མཐིང་ནག་ལ། །ཟླ་གམ་གསུམ་དམར་ཐོད་ཕྲེང་དཀར། །རིན་ཆེན་ཆ་བརྒྱད་མཐིང་ག་སྟེ། །མུ་སྐོར་སེར་པོ་མུ་མཆན་དམར། །ཁྱུད་སྐོར་མེ་རི་ལྔ་ལྡན་འབར། །ནང་ཁྱམས་དམར་སྨུག་རྩིག་པ་ནི། །དཀར་དམར་སྔོན་པོ་རིམ་པ་གསུམ། །སྒོ་དང་ཁྱམས་ནི་ཕྱོགས་ཀྱི་མདོག །རྩིག་པ་ནང་ནས་རིམ་པ་བཞིན། །མཐིང་དཀར་སེར་དམར་ལྗང་གུའོ། །འདོད་སྣམ་དམར་ལ་ཕ་གུ་སེར། །མུན་པ་ནག་པོ་དྲྭ་ཕྱེད་དཀར། །མདའ་ཡབ་སྔོན་པོ་པུ་ཤུ་དཀར། །རྟ་བབ་བཞི་ནི་མཛེས་པའི་ཚོན། །ཀ་བ་དང་ནི་སྣ་ཚོགས་ཀྱི། །རྡོ་རྗེའི་ར་རྣམས་ཕྱོགས་ཀྱི་མདོག །མུན་པ་གླང་རྒྱབ་ནག་པོ་ལ། །སྒོ་རྒྱན་བདུན་གྱིས་མངོན་པར་སྤྲས། །ཆོས་འཁོར་རི་དྭགས་གསེར་གྱི་མདོག །[11b] ཕྱི་ཁྱམས་ཁོར་ཡུག་ལྗང་གུ་སྟེ། །པདྨའི་ཕྲེང་བ་སྣ་ཚོགས་མདོག །དམ་ཅན་གནས་ནི་ཁྲག་གི་མཚོ། །དུར་ཁྲོད་གཞི་ནག་ཁྱད་ཆོས་བཀྲ། །རྡོ་ར་སེར་ལ་གཞི་མ་ནག །མེ་རི་སྣ་ལྔ་ཚྭ་ཚྭ་འཕྲོ། །ལྷ་གནས་རྣམས་སུ་ཕྱག་མཚན་ནམ། །མ་འགྲུབ་རང་མདོག་ཚོན་སྤུང་བྱ། །ཞིབ་པར་མཐོང་བརྒྱུད་ལ་གོམས་བྱོས། །ཞེས་གཟབ་ནས་འབྲི་བ་སྟེ་དེ་དག་ནི་ཉིན་དང་པོའི་བྱ་བའོ། །གལ་ཏེ་རྡུལ་ཚོན་མི་འགྲུབ་པའི་རས་བྲིས་ཀྱི་ཕྱོགས་ལ་ཐིག་ཚོན་གྱི་བྱ་བ་རྣམས་དོར་ནས་ཆག་ཆག་གདབ་པའི་རྗེས་སུ་རས་བྲིས་ཀྱི་དཀྱིལ་འཁོར་བཀྲམ་མོ། །དྲུག་པ་ཕུར་བུ་འགོད་པ་ནི། ལྕགས་སམ་སེང་ལྡེང་དུག་ཤིང་ཚེར་མ་ཅན་རྣམས་གང་རུང་ལས་བྱས་པའི་གཙོ་ཕུར་སོར་བཅུ་དྲུག ། ཁྲོ་བོ་སོར་བཅུ་གཉིས། ཟ་གསོད་སྒོ་སྐྱོང་མཐོ་རེ། སྲས་མཆོག་མར་བཅད་སོར་བརྒྱད་པ། ཁྲོ་བོ་སོགས་རང་རང་གི་ཞལ་ཅན་རྒྱ་མདུད་ཉིས་རིམ་ཆངས་བཟུང་ཟུར་བརྒྱད་ཆུ་སྲིན་གྱི་ཁ་ནས་ཐོན་པའི་དབལ་ཟུར་གསུམ་པ། གཙོ་ཕུར་རྣམས་འགྱིང་ཞིང་བརྗིད་ཆགས་པ། ལས་ཕུར་རྣམས་གསོར་བདེ་བ། དམ་ཅན་རྣམས་རྩང་ཕུར་ཁོ་ན་སྟེ། ཀུན་ལ་དར་སྣ་ལྔའི་ཅོད་པན་གྱེན་དུ་འཕུར་ཞིང་རང་རྟགས་ཀྱི་སྙིང་པོས་མཚན་པ་རྫས་དགུས་ངར་བླུད་པ་རྣམས་རུས་སྦལ་གྱི་ཁོག་པའམ་ཐོད་པ་སོགས་སུ་དར་ནག་གིས་བཀབ་སྟེ་བཞག་ལ། ཕུར་པའི་ལས་དགུའི་དང་པོ་བྱུག་སོགས་གསུམ་གྱིས་གཟི་བྱིན་བསྐྱེད་པ་ནི། གུ་གུལ་གྱིས་བདུག་ [12a] ལ། ཧཱུྃ༔ གུ་གུལ་སྦྱར་བའི་རྫས་མཆོག་དམ་པ་འདི༔ སྡང་བའི་དགྲ་ལ་ཕོག་ན་ལྷ་དང་བྲལ༔ གནོད་པའི་བགེགས་ལ་ཕོག་ན་མྱོས་པར་བྱེད༔ སྲས་མཆོག་ཀཱི་ལ་ཡ་ནི་གཟི་མདངས་བསྐྱེད༔ ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་ཨ་དྷི་ཏིཥྛ་རྨུགས་རྨུགས་ཧ་ལ་ཧ་ལ་དགྲ་བགེགས་འབྱུང་པོའི་ཙིཏྟ་མྱགས་མཱ་ར་ཡ་ཧཱུྃ་ཕཊ༔ ཡུངས་དཀར་གྱིས་བྲབ་ཅིང་། ཧཱུྃ༔ ཡུངས་དཀར་རྒྱལ་པོའི་རྫས་མཆོག་དམ་པ་འདི༔ གསེར་མདོག་གཟི་མདངས་འོད་ཟེར་ཕྱོགས་བཅུར་འཕྲོ༔ དགྲ་དང་བགེགས་ནི་ཐལ་བའི་རྡུལ་དུ་རློག༔ སྲས་མཆོག་ཀཱི་ལ་ཡ་ནི་གཟི་མདངས་བསྐྱེད༔ ཨོཾ་བཛྲ་ཀཱི་ལི་ཀཱི་ལ་ཡ་མ་གུ་ཏ་ལ་པྲ་ཏ་ལ་པྲ་ཏ་ལ་ཤ་ཏ་རཱ་ཙ་ཧཱུྃ་དགྲ་བགེགས་འབྱུང་པོ་མཱ་ར་ཡ་ཧཱུྃ་ཕཊ༔ རཀྟས་བྱུག་ཅིང་། ཧཱུྃ༔ རཀྟ་ཁོལ་བའི་རྫས་མཆོག་དམ་པ་འདི༔ སྡང་བའི་དགྲ་ལ་ཕོག་ན་དབང་དུ་སྡུད༔ གནོད་པའི་བགེགས་ལ་ཕོག་ན་ཐལ་བར་རློག༔ སྲས་མཆོག་ཀཱི་ལ་ཡ་ནི་གཟི་མདངས་བསྐྱེད༔ ཨོྃ་བཛྲ་ཀཱི་ལི་ཀཱི་ལ་ཡ་རཀྟ་ཛྭ་ལ་མཎྜལ་རཀྵ་རཀྵ་དགྲ་བགེགས་ཝཱ་ཤཾ་མཱ་ར་ཡ་ཧཱུྃ་ཕཊ༔ གཉིས་པ་རྫས་ཀྱི་ཕུར་བུ་དམ་ཚིག་གི་ཁྲོ་བོར་སྒྲུབ་པ་ནི། ཤཱུ་ནྱ་ཏས་བསང་སྦྱང་། [12b] ཕུར་བུ་རྣམས་སྟོང་ཉིད་ཆོས་ཀྱི་སྐུའི་རང་བཞིན་དུ་གྱུར། སྟོང་པའི་ངང་ལས་ཧཱུྃ་མཐིང་ནག་རེ་རེ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་རེར་གྱུར། གཙོ་འཁོར་རྣམས་ཀྱི་སྔགས་རྣམས་ཚར་རེ་བརྗོད་པས། གཙོ་ཕུར་རྡོ་རྗེ་གཞོན་ནུ་ཡབ་ཡུམ་དང་། འཁོར་རྣམས་ཐམས་ཅད་རང་རང་གི་སྐུའི་རྣམ་པ་བརྒྱན་ཆ་ལུགས་ཕྱག་མཚན་དང་བཅས་པ་ལ་སྨད་ཕུར་བུ་འབར་བའི་རྣམ་པ་ཅན་དུ་གསལ་བར་གྱུར་པར་མོས་ལ། གསུམ་པ་ཡེ་ཤེས་པ་ཆོས་ཀྱི་དབྱིངས་ནས་བཞེངས་སུ་གསོལ་ཞིང་སྤྱན་དྲང་བ་ནི། ཧཱུྃ༔ སྐྱེ་མེད་རྣམ་དག་ཆོས་ཀྱི་དབྱིངས་ཉིད་ནས༔ སྐྱེ་བའི་ཆོ་འཕྲུལ་འབར་བའི་སྐུར་སྟོན་པ༔ ཀུན་གྱི་བདག་ཉིད་རྡོ་རྗེ་གཞོན་ནུའི་སྐུ༔ ཕྱོགས་བཅུའི་ཁྲོ་རྒྱལ་མ་ལུས་ཐམས་ཅད་དང་༔ ཁྲོ་རྒྱལ་འདུས་པའི་སྲས་མཆོག་ཀཱི་ལ་ཡ༔ གདུག་པའི་འཁོར་ཚོགས་མ་ལུས་ཐམས་ཅད་ཀུན༔ སྲིད་པ་རྡོ་རྗེ་ཕུར་བུར་སྒྲུབ་པའི་ཕྱིར༔ སྐྱེ་མེད་ཆོས་ཀྱི་དབྱིངས་ལས་བཞེངས་ནས་ཀྱང་༔ རྡོ་རྗེ་ཕུར་བུ་སྒྲུབ་པའི་དུས་ལ་བབ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཅེས་དང་། ཧཱུྃ༔ སྟོང་གསུམ་སྟོང་གི་འཇིག་རྟེན་ན༔ ཕྱོགས་བཞི་མཚམས་བརྒྱད་སྟེང་འོག་ [13a] བཅུ༔ ཀུན་ཀྱང་རྡོ་རྗེ་གཞོན་ནུའི་སྐུ༔ ཞལ་གསུམ་ཕུར་པའི་ཛཔྲ་ཟློས་ཤིང་༔ སྲིད་པའི་ཕུར་བུ་སྒྲུབ་ཕྱིར་གཤེགས་སུ་གསོལ༔ དྲེགས་པ་ཕྱོགས་སྐྱོང་བསྣོལ་བའི་ཁྲི་སྟེངས་སུ༔ རྡོ་རྗེ་སྲིན་པོ་ཁྲོ་བོ་བཅུ་ལ་སོགས༔ སྤྲུལ་པའི་ཕྲ་མེན་མགོ་བརྙན་ཚོགས་དང་བཅས༔ ཀུན་ཀྱང་ཞལ་གསུམ་ཕུར་པའི་ཛཔྲ་ཟློས་ཤིང་༔ སྲིད་པའི་ཕུར་བུ་སྒྲུབ་ཕྱིར་གཤེགས་སུ་གསོལ༔ མི་གཡོ་ཆོས་མཆོག་སྐུ་གསུང་ཐུགས་ཀྱི་བདག༔ སྡུག་བསྔལ་ལོག་པར་འཁྱམས་པའི་སེམས་ཅན་རྣམས༔ དབྱེར་མེད་སྐུ་གསུང་ཐུགས་སུ་བསྒྲལ་བའི་ཕྱིར༔ ཁྲོ་རྒྱལ་འདུས་པའི་སྲས་མཆོག་ཀཱི་ལ་ཡ༔ སྲིད་པའི་ཕུར་བུ་སྒྲུབ་ཕྱིར་གཤེགས་སུ་གསོལ༔ བཛྲ་ས་མཱ་ཛཿབཞི་པ་བསྟིམ་ཞིང་བརྟན་པར་བཞུགས་སུ་གསོལ་བ་ནི། ཧཱུྃ༔ མི་འགྱུར་མཐིང་ནག་གྲུ་གསུམ་གཞལ་ཡས་ནས༔ དབྱིངས་ལས་སྐུ་བཞེངས་རྡོ་རྗེ་གཞོན་ནུའི་སྐུ༔ བདག་དང་གཉིས་སུ་མེད་པར་སྒྲུབ་པའི་ཕྱིར༔ སྒྲུབ་ཕུར་ཕྱག་རྒྱ་ཆེན་པོར་ཐིམ་དུ་གསོལ༔ འཁོར་ལོ་རྒྱས་འདེབས་བྷ་ག་དབྱིངས་ཕྱུག་མ༔ [13b] བཀྲ་ཤིས་གསང་བའི་ཡུམ་དུ་མངའ་གསོལ་ནས༔ ཐབས་དང་ཤེས་རབ་གཉིས་མེད་སྒྲུབ་པའི་ཕྱིར༔ འབར་བ་ཡུམ་གྱི་ཀློང་དུ་ཐིམ་དུ་གསོལ༔ གྲུ་གསུམ་མཐིང་ནག་འབར་བའི་དཀྱིལ་འཁོར་ནས༔ ཐབས་མཁས་སྤྱོད་པ་ཁྲོ་བོའི་ཚོགས་སུ་སྟོན༔ ཁྲོ་རྒྱལ་ཕྱག་རྒྱ་ཆེན་པོར་མངའ་གསོལ་ཕྱིར༔ ཏ་ཀྲྀཏ་འགྱིང་ཕུར་ཚོགས་ལ་ཐིམ་དུ་གསོལ༔ དབྱིངས་ཉིད་གཏིང་མཐའ་མེད་པའི་མཁའ་ཀློང་ནས༔ སྐྱེ་འགྲོ་ཐམས་ཅད་ཕུར་བུའི་གཟུགས་སུ་སྣང་༔ ཁྲོ་རྒྱལ་འདུས་པའི་སྲས་མཆོག་ཀཱི་ལ་ཡ༔ གདབ་ཕུར་སྤྲུལ་པའི་ཚོགས་ལ་ཐིམ་དུ་གསོལ༔ མཉམ་ཉིད་ངང་ལས་སྤྲུལ་པའི་མཁའ་འགྲོ་མ༔ ཡེ་ཤེས་མཁའ་འགྲོ་ཐབས་མཁས་ཕྱག་རྒྱར་གསལ༔ གཉིས་མེད་མཁའ་ལ་བསྐྱེད་ཅིང་ཐུགས་ལས་སྤྲུལ༔ མགྱོགས་ཕུར་ཕོ་ཉའི་ཚོགས་ལ་ཐིམ་དུ་གསོལ༔ བསྐལ་པ་སྔོན་ནས་བསྒྲུབས་པའི་འཕྲོ་ལྡན་པས༔ རྟེན་དུ་བཙུགས་པས་རང་དབང་མེད་པར་འདུ༔ དམ་བཅས་བཞིན་དུ་ཅི་བདེར་གཤེགས་ནས་ཀྱང་༔ སྒོ་བཞི་མངགས་ཕུར་ཚོགས་ལ་ཐིམ་དུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་ [14a] ཛཿཧཱུྃ་བཾ་ཧོཿ དིཔྟ་ཙཀྲ་ཨཱ་བེ་ཤ་ཡ་ཨཿལྔ་པ་བྱིན་གྱིས་བརླབ་ཅིང་དབང་བསྐུར་བ་ནི། ཐལ་མོ་སྦྱར་བའི་བར་དུ་སྦམ་ཕུར་རྣམས་བཟུང་ལ་འདྲིལ་ཞིང་། ཧཱུྃ༔ སངས་རྒྱས་ཀུན་གྱི་ཡེ་ཤེས་སྐུ༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་ཁྲོ་བོ་མི་བཟད་པའི༔ སྐུ་ཡི་དབྱིག་ཏུ་བདག་བསྐྱེད་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་བཛྲ་ནཾ༔ ཛྭ་ལ་ཛྭ་ལ་པྲ་ཛྭ་པུཏ་པུ་སརྦ་ན་ཡེ་ཧཱུྃ་ཕཊ༔ ཅེས་བརྗོད་པས་ཕུར་བུ་རྣམས་ལས་འོད་ཟེར་ཕྱོགས་བཅུར་འཕྲོས་བདེ་གཤེགས་ཐམས་ཅད་ཀྱི་སྐུ་ལ་ཕོག །མཉེས་མཆོད་ཕུལ། སྐུའི་དངོས་གྲུབ་སླར་འདུས། སྤྱི་གཙུག་རྣམས་སུ་ཐིམ་པས་སྐུ་རྡོ་རྗེར་བྱིན་གྱིས་བརླབས། སྲས་མཆོག་གི་སྐུར་སྐུ་ཕྲ་མོས་གཏམས་པས་སྐུས་སྲིད་པ་མ་ལུས་མྱ་ངན་ལས་འདས་པའི་སྐུར་གྲོལ་ནུས་པའི་དབང་ཐོབ་པར་གྱུར། ཡང་སོར་མོ་བསྣོལ་བའི་བར་དུ་འདྲིལ་ཞིང་། ཧཱུྃ༔ སངས་རྒྱས་ཀུན་གྱི་ཡེ་ཤེས་གསུང་༔ ངང་ཉིད་རྡོ་རྗེ༴ འབར་བའི་ཁྲོ༴ གསུང་གི་དབྱིག་ཏུ་བདག་བསྐྱེད་ཅིག༔ ཨྰཾ་པདྨ་ཀཱི་ལི་ཀཱི་ལ་ཡ་ཝཱ་ཀ་བཛྲ་ནཾ༔ སརྦ་དུཥྛན་ཧྲིཏ་ཤོ་དྷ་ཡ་ཧཱུྃ་ཕཊ༔ ཅེས་བརྗོད་པས་ [14b] ཕུར་བུ་རྣམས་ཀྱི་ཞལ་ལས་འོད་ཟེར་ཕྱོགས་བཅུར་འཕྲོས་བདེ་གཤེགས་ཐམས་ཅད་ཀྱི་གསུང་ལ་ཕོག །མཉེས་མཆོད་ཕུལ། གསུང་གི་དངོས་གྲུབ་སླར་འདུས། མགྲིན་པ་རྣམས་སུ་ཐིམ་པས་གསུང་རྡོ་རྗེར་བྱིན་གྱིས་བརླབས། ལྗགས་པདྨ་འདབ་བརྒྱད་དུ་གྱུར་པའི་ལྟེ་བར་ཟླ་བ་ལ་རྡོ་རྗེ་རྒྱ་གྲམ་དམར་ནག་ཨཱོཾ་དམར་པོས་མཚན་པའི་མཐར་ཀཱི་ལ་ཡ་འབྲུ་དགུ་ལྗང་དམར་གྱིས་བསྐོར་བར་གསུང་གི་སྲིད་པ་མ་ལུས་པ་མྱ་ངན་ལས་འདས་པའི་དབྱིངས་སུ་སྒྲོལ་ནུས་པའི་དབང་ཐོབ་པར་གྱུར། ཡང་ཐལ་མོ་རྟིང་པ་སྦྱར་བས་འདྲིལ་ཞིང་། ཧཱུྃ༔ སངས་རྒྱས་ཀུན་གྱི་ཡེ་ཤེས་ཐུགས༔ ངང་ཉིད༴ འབར་བའི་ཁྲོ་བོ༴ ཐུགས་ཀྱི་དབྱིག་ཏུ་བདག་བསྐྱེད་ཅིག༔ ཧཱུྃ་བཛྲ་ཀཱི་ལི་ཀཱི་ལ་ཡ་ཙིཏྟ་བཛྲ་ནཾ༔ ཙྪིནྡྷ་ཙྪིནྡྷ་ཧཱུྃ་ཕཊ༔ ཅེས་བརྗོད་པས་ཕུར་བུ་རྣམས་ཀྱི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་བདེ་གཤེགས་ཐམས་ཅད་ཀྱི་ཐུགས་ལ་ཕོག །མཉེས་མཆོད་ཕུལ། ཐུགས་ཀྱི་དངོས་གྲུབ་སླར་འདུས་ཐུགས་ཀ་རྣམས་སུ་ཐིམ་པས་ཐུགས་རྡོ་རྗེར་བྱིན་གྱིས་བརླབས། ཐུགས་རིན་པོ་ཆེ་མར་གད་གུར་ཕུབ་པ་ལྟ་བུའི་ནང་དུ་ཉི་ཟླའི་གདན་ལ་ཡེ་ཤེས་ [15a] སེམས་དཔའ་དཀར་གསལ་ཞལ་གཅིག་ཕྱག་གཉིས་རྡོར་དྲིལ་འཛིན་པ་རྒྱན་དང་བྲལ་བའི་ཐུགས་རིན་པོ་ཆེ་ཟུར་བརྒྱད་མཆོང་གུར་ལྟ་བུའི་ནང་དུ་ཟླ་བ་སྲན་མ་བཀས་པ་ཙམ་ལ་རྡོ་རྗེ་མཐིང་ནག་ནས་འབྲུ་ཙམ་གྱི་ལྟེ་བར་ཧཱུྃ་མཐིང་ནག་ཡུངས་འབྲུ་ཙམ་གྱི་མཐར་ཀཱི་ལ་ཡ་ལྗང་དམར་སྤུས་བྲིས་པ་ཙམ་གནས་པས་ཐུགས་ཀྱིས་སྲིད་པ་མ་ལུས་པ་མྱ་ངན་ལས་འདས་པའི་ཀློང་དུ་སྒྲོལ་ནུས་པའི་དབང་ཐོབ་པར་གྱུར། དབང་བསྐུར་བ་ནི། ཧཱུྃ༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བར༔ སངས་རྒྱས་ཕྲིན་ལས་རྫོགས་མཛད་པའི༔ དབང་དང་བྱིན་རླབས་བདག་སྩོལ་ཅིག༔ ཅེས་གསོལ་བ་བཏབ་པས་ཕྱོགས་བཅུའི་བདེ་བར་གཤེགས་པ་ཐམས་ཅད་ཨོཾ་འབའ་ཞིག་ཏུ་གྱུར་ཏེ་ཕུར་བུ་རྣམས་ཀྱི་སྤྱི་བོར་འདུས་ཐོད་པ་དུང་ཁང་གི་དབུས་སུ་བུདྡྷ་ཧེ་རུ་ཀ་ཚོན་གང་བར་གྱུར་ནས། ཨོཾ་སརྦ་ཏ་ཐཱ་ག་ཏ་མ་ཧཱ་ཤཱུ་ནྱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་གསུངས་ཤིང་ཆོས་དབྱིངས་ཡེ་ཤེས་ཀྱི་ངོ་བོར་གནས་པར་གྱུར། ཡང་ཕྱོགས་བཅུའི་བདེ་གཤེགས་ཐམས་ཅད་ཧཱུྃ་འབའ་ཞིག་ཏུ་ [15b] གྱུར་ཏེ་ཕུར་བུ་རྣམས་ཀྱི་དཔྲལ་བར་འདུས། དུང་ཁང་གི་མདུན་དུ་བཛྲ་ཧེ་རུ་ཀ་ཚོན་གང་བར་གྱུར་ནས། ཨོཾ་སརྦ་ཏ་ཐཱ་ག་ཏ་ཨ་དརྴ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ། ཞེས་གསུངས་ཤིང་མེ་ལོང་ལྟ་བུའི་ཡེ་ཤེས་ཀྱི་ངོ་བོར་གནས་པར་གྱུར། ཡང་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྭཱ་འབའ་ཞིག་ཏུ་གྱུར་ཏེ་དུང་ཁང་གི་རྣ་ལྟག་གཡས་སུ་འདུས། རཏྣ་ཧེ་རུ་ཀ་ཚོན་གང་བར་གྱུར་ནས། ཨོཾ་སརྦ་ཏ་ཐཱ་ག་ཏ་མ་ཧཱ་ས་མ་ཏ་ཛྙཱ་ན་སྭ་བྷཱ་ཝ་ཨཏྨ་ཀོ྅ཧཾ། ཞེས་གསུངས་ཤིང་མཉམ་ཉིད་ཡེ་ཤེས་ཀྱི་ངོ་བོར་གནས་པར་གྱུར། ཡང་ཕྱོགས་བཅུའི་བདེ་གཤེགས་ཐམས་ཅད་ཨྰཾ་འབའ་ཞིག་ཏུ་གྱུར་ཏེ་དུང་ཁང་གི་ལྟག་པར་འདུས། པདྨ་ཧེ་རུ་ཀ་ཚོན་གང་བར་གྱུར་ནས། ཨོཾ་སརྦ་ཏ་ཐཱ་ག་ཏ་མ་ཧཱ་པྲཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་གསུངས་ཤིང་སོར་རྟོག་ཡེ་ཤེས་ཀྱི་ངོ་བོར་གནས་པར་གྱུར། ཡང་ཕྱོགས་བཅུའི་བདེ་གཤེགས་ཐམས་ཅད་ཧཱ་འབའ་ཞིག་ཏུ་གྱུར་ཏེ་དུང་ཁང་གི་རྣ་ལྟག་གཡོན་དུ་འདུས་ཀརྨ་ཧེ་རུ་ཀ་ཚོན་གང་བར་གྱུར་ནས། ཨོཾ་སརྦ་ཏ་ཐཱ་ག་ཏ་མ་ཧཱ་ཀྲྀཏྱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་གསུངས་ཤིང་བྱ་གྲུབ་ཡེ་ཤེས་ཀྱི་ངོ་བོར་གནས་པར་ [16a] གྱུར། དེ་ནས་སྣང་སྲིད་འཁོར་འདས་ཀྱི་ཆོས་ཐམས་ཅད་འོད་དུ་ཞུ་ཕུར་བུའི་དཀྱིལ་འཁོར་ལ་ཐིམ། དེ་དག་གཙོ་བོ་ལ། དེ་ཐུགས་ཀའི་ཡེ་ཤེས་སེམས་དཔའ་ལ། དེ་ཐུགས་རྡོ་རྗེ་ལ། དེ་ཧཱུྃ་ལ། ཧཱུྃ་ཟླ་ཚེས་ཐིག་ལེར་ཐིམ། ཐིག་ལེ་མྱ་ངན་ལས་འདས་པའི་གཞི་དངོས་པོ་ཐམས་ཅད་ཀྱི་ངོ་བོ་ཉག་གཅིག་བརྗོད་མེད་སྤྲོས་བྲལ་ནམ་མཁའི་དཀྱིལ་ལྟར་རྣམ་པར་དག་པའི་ངང་དུ་མཉམ་པར་བཞག་པ་ནི་ཐུགས་ཡེ་ཤེས་རྩེ་གཅིག་པར་བྱིན་གྱིས་བརླབ་ཅིང་དབང་བསྐུར་བའི་དོན་ཏེ། སླར་ཡང་སྐྱེ་མེད་ཆོས་ཀྱི་སྐུ་ལས་འགག་མེད་ཀྱི་རྩལ་རྡོ་རྗེ་ཕུར་པའི་ལྷ་ཚོགས་སུ་ཤར་ནས་འགྲོ་བའི་དོན་མཛད་པར་གྱུར། དྲུག་པ་གཟི་བརྗིད་བསྐྱེད་པ་ནི། ཧཱུྃ༔ ཁྲོ་རྒྱལ་འཇིགས་བྱེད་བཛྲ་ཀཱི་ལ་ཡ༔ དུག་ལྔ་འཇོམས་པའི་སྤྱི་བོའི་རྒྱ་མདུད་ནི༔ སྲིད་གསུམ་མ་ལུས་དབྱིངས་སུ་སྒྲོལ་མཛད་པའི༔ མ་སྐྱེས་ལྷུན་གྱིས་གྲུབ་པར་གཟི་བརྗིད་བསྐྱེད༔ ཟུར་བཞི་ལོགས་བརྒྱད་ཡེ་ཤེས་བརྒྱད་ཀྱི་ངང་༔ རྣམ་ཤེས་ཚོགས་བརྒྱད་གནས་སུ་བསྒྲལ་བའི་ཕྱིར༔ དྲུག་ཅུ་ལོན་པའི་ཕོ་ཉར་གཟི་བརྗིད་བསྐྱེད༔ སྐེད་པ་རྒྱ་མདུད་ཟུར་དྲུག་ [16b] ཡེ་ཤེས་དྲུག༔ ཆུ་སྲིན་ཁ་དང་སྦྲུལ་ཆེན་ཆུན་པོས་སྤྲས༔ མ་བཅོས་ལྷུན་གྱིས་གྲུབ་པའི་གཞལ་ཡས་ཁང་༔ འབྱུང་ལྔ་ཡུམ་གྱི་ལྷུམས་སུ་གཟི་བརྗིད་བསྐྱེད༔ རྩེ་མོ་ཟུར་གསུམ་མངོན་སྤྱོད་དྲག་པོའི་ལྷ༔ དུག་གསུམ་གདུག་པ་གནས་སུ་བསྒྲལ་བའི་ཕྱིར༔ འབྲས་བུ་སྐུ་གསུང་ཐུགས་སུ་གཟི་བརྗིད་བསྐྱེད༔ རྩེ་མོ་ཟུར་བཞི་ཕྲིན་ལས་རྒྱས་པའི་དོན༔ ཕྱོགས་བཞི་མཚམས་བརྒྱད་ཟིལ་གྱིས་མནོན་པའི་ཕྱིར༔ ཡེ་ཤེས་ཆེན་པོ་བཞི་རུ་གཟི་བརྗིད་བསྐྱེད༔ རྩེ་མོ་ཟླ་གམ་མ་ལུས་དབང་དུ་སྡུད༔ བདེ་ཆེན་དབྱིངས་སུ་འགྲོ་དྲུག་བསྒྲལ་བའི་ཕྱིར༔ མ་ཆགས་ཡུམ་གྱི་ལྷུམས་སུ་གཟི་བྱིན་བསྐྱེད༔ རྩེ་མོ་ཟླུམ་པོ་ཞི་བར་མཛད་པའི་དོན༔ ཚད་མེད་བཞི་ཡིས་འགྲོ་བའི་དོན་མཛད་པ༔ བྱམས་དང་སྙིང་རྗེ་ཆེན་པོར་གཟི་བྱིན་བསྐྱེད༔ རྩེ་མོ་རྣོ་མགྱོགས་ཐོགས་མེད་ལས་ཀྱི་མཚོན༔ རྫོགས་པ་ཆེན་པོའི་ཕྲིན་ལས་ཡིན་པའི་ཕྱིར༔ ཀཱི་ལ་ཡ་ཡི་ཐུགས་སུ་གཟི་བྱིན་བསྐྱེད༔ ཞི་རྒྱས་དབང་དང་མངོན་སྤྱོད་ལ་སོགས་པ༔ འདུལ་སྦྱོང་ལས་ཀྱི་སྲས་མཆོག་ཀཱི་ལ་ཡ༔ མ་བཅོས་ལྷུན་ [17a] གྱིས་གྲུབ་པར་གཟི་བྱིན་བསྐྱེད༔ དྲག་པོས་ཚར་གཅོད་ཞི་བས་དཔའ་ཡང་བཀོད༔ དབང་གིས་མངའ་བསྡུས་རྒྱས་པས་ཟིལ་གྱིས་གནོན༔ མངོན་སྤྱོད་ལས་ཀྱི་སྲས་མཆོག་ཀཱི་ལ་ཡས༔ གང་བ་བྱ་བའི་དགྲ་བགེགས་བརླག་པར་བྱེད༔ གདུག་པའི་མཚོན་དང་རྣོ་བའི་དབལ་ངར་ཅན༔ གཅིག་ལ་རྒྱབ་པས་ཀུན་ཀྱང་བརླག་པར་བྱེད༔ ཨོཾ་བཛྲ་ཀཱི་ལི་ཀཱི་ལ་ཡ༔ དགྲ་བགེགས་གནོད་བྱེད་མཱ་ར་ཡ་ཧཱུྃ་ཕཊ༔ བདུན་པ་བསྟོད་པ་བྱ་བ་ནི། ཧཱུྃ༔ དིཔྟ་ཙཀྲ་ཕུར་པའི་ལྷ༔ མཐིང་ནག་གཅེར་བུ་རལ་པ་ཅན༔ སྐུ་སྟོད་ཁྲོ་བོ་ཆེན་པོ་ལ༔ ཨུཏྤལ་སྔོན་པོའི་མདོག་འདྲ་ཞིང་༔ ཞལ་གསུམ་ཕྱག་ཀྱང་དྲུག་པ་སྟེ༔ རལ་གྲིའི་སྐྲ་ལ་ཕུར་པའི་སོ༔ ལྟེ་བ་ཡན་ཆད་ཆས་རྣམས་ནི༔ པདྨ་རཱ་གའི་མདོག་འདྲ་ཞིང་༔ འབར་བའི་ཕྲེང་བ་འཁྲིགས་པའི་འོད༔ ལྕགས་ཀྱི་ཕུར་པ་ཟུར་གསུམ་རྣོ༔ དྲག་པོར་གྱུར་པའི་ཕུར་པ་སྟེ༔ མ་བཏབ་བཞིན་དུ་ལྷུན་གྱིས་གྲུབ༔ བཏབ་ན་ལྷ་ཡང་བརླག་པར་གྱུར༔ གནོད་བྱེད་བགེགས་ལ་སྨོས་ཅི་ [17b] དགོས༔ བཟླས་པ་ཙམ་གྱིས་རྡུལ་དུ་རློག༔ ཨོཾ་བཛྲ་ཀཱི་ལི་ཀཱི་ལ་ཡ༔ གནོད་བྱེད་དགྲ་བགེགས་སརྦ་བིགྷྣཱ་བྃ་ཧཱུྃ་ཕཊ༔ དཀྱིལ་འཁོར་གྱི་ལྷ་གནས་སོ་སོར་ཨེ་ཁྲམ་གྱི་གདན་ལ་རིམ་བཞིན་འགོད་ཅིང་། ཧཱུྃ༔ དབུས་ནས་རང་བྱུང་གྲུབ་པའི་ལྷ༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་བཅས༔ ལྷ་ཆེན་བསྣོལ་བའི་གདན་སྟེང་དུ༔ དགྱེས་ཤིང་བརྟན་པར་བཞུགས་སུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་དྰིཔྟ་ཙཀྲ་ས་མ་ཡ་ཏིཥྛནྟུ༔ ཞེས་གཙོ་ཕུར་དབུས་ནས་ཞལ་ཤར་བསྟན་དང་ཡུམ་བདུན་ནས་ཡབ་ལ་ཕྱོགས་པས་འགོད། ཧཱུྃ༔ ཕྱོགས་བཅུ་རང་བྱུང་གྲུབ་པའི་ལྷ༔ ཁྲོ་རྒྱལ་ཡབ་ཡུམ་ཟ་གསོད་བཅས༔ ཕྱོགས་སྐྱོང་ཕོ་མོའི་གདན་སྟེང་དུ༔ དགྱེས་ཤིང་བརྟན་པར་བཞུགས་སུ་གསོལ༔ ཁྲོ་བཅུའི་རྩ་སྔགས་མཐར། ས་མ་ཡ་ཏིཥྛནྟུ། ཞེས་ཤར་སྟོད་སྟེང་དང་ནུབ་སྨད་འོག་ཏུ་བྱས་ཏེ་ཕྱོགས་མཚམས་ཀྱི་རྩིབས་བཅུར་ཁྲོ་བོ་རྣམས་ཞལ་ནང་བསྟན་དང་ཡུམ་རྣམས་ཡབ་ལ་ཕྱོགས་ཤིང་ཟ་གསོད་གཉིས་ཀྱིས་གཡས་གཡོན་ནས་བརྟེན་པའི་ཚུལ་གྱིས་འགོད། ཧཱུྃ༔ སྐུ་གསུང་ཐུགས་ལས་སྤྲུལ་པ་ཡི༔ སྲས་མཆོག་ཉི་ཤུ་རྩ་ [18a] གཅིག་ཀྱང་༔ ཟླ་གམ་ཨེ་ཡི་གདན་སྟེང་དུ༔ དགྲ་བགེགས་གཟིར་ཞིང་དགྱེས་པར་བཞུགས༔ ཨོཾ་ཀརྨ་ཀྲོདྷ་བཛྲ་ཀཱི་ལི་ཀཱི་ལ་ཡ་ས་མ་ཡ་ཏྀཥྛནྟུ། ཞེས་ཟླ་གམ་གསུམ་ལ་སྲས་མཆོག་བདུན་བདུན་ཞལ་ནང་བསྟན་དུ་འགོད། ཧཱུྃ༔ གྲུ་ཆད་བཞི་ཡི་ཕོ་བྲང་དུ༔ ཕྲིན་ལས་རྣམ་བཞི་ལྷུན་གྲུབ་བཞུགས༔ ཙ་ཏུརྐྲྀ་ཏྱ་ས་མ་ཡ་ཏིཥྛནྟུ། ཞེས་གྲུ་ཆད་བཞི་ལ་འགོད། ཧཱུྃ༔ ཚད་མེད་བཞི་ལྡན་སྒོ་བཞི་རུ༔ ཡེ་ཤེས་སྒོ་སྐྱང་བརྟན་པར་བཞུགས༔ ཛཿ ཧཱུྃ་བཾ་ཧོཿ ས་མ་ཡ་ཏིཥྛནྟུ། ཞེས་སྒོ་བཞི་ལ་ཞལ་ཕྱིར་བསྟན་དུ་འགོད།ཧཱུྃ༔ དཀྱིལ་འཁོར་བར་ཁྱམས་ཕྱོགས་བཞི་རུ༔ ཤྭ་ན་བདག་ཉིད་ས་བདག་ཚོགས༔ བསེ་ལྕགས་དུང་གིང་གྱད་ཆེན་སོགས༔ བསྟན་པ་བསྲུང་ཕྱིར་དགྱེས་པར་བཞུགས༔ མོ་ཧཱ་གྷྰ་ཏ་ཡ་མ་མ་ཤྰི་གྷྲཾ་ཀརྨ་ཀ་ར་ཡེ་ས་མ་ཡ་ཏིཥྛནྟུ། ཞེས་སོ་སོའི་གནས་སུ་ཇི་ལྟ་བ་བཞིན་འགོད་དོ། །དགུ་པ་སྙན་བསྙུན་གསོལ་བ་ནི། ཧཱུྃ༔ རྒྱ་མདུད་མགོ་ལ་སྙན་བསྙུན་གསོལ་བ་ནི༔ ཆོས་ཀྱི་སྐུ་ཡི་ངོ་བོར་བཞུགས་ནས་ཀྱང་༔ བརྡལ་བ་ཆོས་ཉིད་ཕུར་པ་བསྒྲུབ་པ་ [18b] དང་༔ སྐྱེ་མེད་ཆོས་སྐུར་རྟོགས་པའི་དངོས་གྲུབ་སྩོལ༔ རྒྱ་མདུད་བར་ལ་སྙན་བསྙུན་གསོལ་བ་ནི༔ ལོངས་སྤྱོད་རྫོགས་པའི་སྐུ་རུ་བཞུགས་ནས་ཀྱང་༔ རིག་པ་ཡེ་ཤེས་ཕུར་བུ་བསྒྲུབ་པ་དང་༔ བདེ་ཆེན་ལོངས་སྐུ་རྟོགས་པའི་དངོས་གྲུབ་སྩོལ༔ རྒྱ་མདུད་སྨད་ལ་སྙན་བསྙུན་གསོལ་བ་ནི༔ མི་འགྱུར་རྡོ་རྗེའི་སྐུ་རུ་བཞུགས་ནས་ཀྱང་༔ གསང་བ་བྱང་སེམས་ཕུར་བུ་བསྒྲུབ་པ་དང་༔ བདེ་ཆེན་མངོན་བྱང་རྟོགས་པའི་དངོས་གྲུབ་སྩོལ༔ ཆུ་སྲིན་དབལ་ལ་སྙན་བསྙུན་གསོལ་བ་ནི༔ ཐུགས་རྗེ་སྤྲུལ་པའི་སྐུ་རུ་བཞུགས་ནས་ཀྱང་༔ མཚན་མ་རྫས་ཀྱི་ཕུར་བུ་བསྒྲུབ་པ་དང་༔ འགྲོ་བའི་དོན་རྣམས་མཐར་ཕྱིན་མཛད་དུ་གསོལ༔ ཐུར་བཞི་ལོགས་བརྒྱད་སྙད་བསྙུན་གསོལ་བ་ནི༔ རྣམ་ཤེས་ཚོགས་བརྒྱད་གནས་སུ་བསྒྲལ་དུ་གསོལ༔ རྩེ་ཟུར་ཟླུམ་པོར་སྙན་བསྙུན་གསོལ་བ་ནི༔ དགྲ་བགེགས་རྣམ་གཉིས་དཔའ་ཡང་བཀོང་དུ་གསོལ༔ རྩེ་མོ་ཟུར་བཞིར་སྙན་བསྙུན་གསོལ་བ་ནི༔ ཚད་མེད་བཞི་ཡི་ཕྲིན་ལས་མཛད་དུ་གསོལ༔ རྩེ་མོ་ཟླ་གམ་ [19a] སྙན་བསྙུན་གསོལ་བ་ནི༔ དགྲ་བགེགས་གདུག་པ་དབང་དུ་སྡུད་དུ་གསོལ༔ རྩེ་མོའི་ཟུར་ལ་སྙན་བསྙུན་གསོལ་བ་ནི༔ དུག་གསུམ་གདུག་པ་གནས་སུ་བསྒྲལ་དུ་གསོལ༔ ཕུར་པ་སྤྱི་ལ་སྙན་བསྙུན་གསོལ་བ་ནི༔ སྒྲོལ་བའི་ཕྲིན་ལས་མཐའ་རུ་དབྱུང་དུ་གསོལ༔ ཞེས་ཐུགས་རྟེན་ཕུར་བུ་འགོད་པའི་ལས་དགུ་ཟིན་ནས། དེའི་ཞར་ལ་བུམ་པ་སོགས་འགོད་པ་ནི། སྔར་ནས་འདུ་བྱས་པའི་སྒྲུབ་རྫས་རྣམས་སྤོས་ཀྱིས་སྣ་དྲངས་ནས་དཀྱིལ་འཁོར་ལ་གཡས་སུ་བསྐོར་སྟེ། ཧཱུྃ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཡེ་ཤེས་ཁྲོ་བོ་གཤེགས་ནས་ཀྱང་༔ ཕོ་བྲང་གནས་འདིར་བཞུགས་སུ་གསོལ༔ དངོས་གྲུབ་མ་ལུས་སྩལ་དུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་ས་མ་ཡ་ཏིཥྛ་ལྷན༔ ཞེས་དཀྱིལ་འཁོར་སྟེང་གི་ཁྲིའུའི་རིམ་པ་དང་པོ་སྐུ་རྟེན་རྣམ་རྒྱལ་བུམ་བ་རྒྱུན་འབབ་ཀྱི་ཆུ་གཙང་སོ་ལྔའི་བཅུད་དང་སྦྱར་བས་སུམ་གཉིས་དགང་ཞིང་ཁ་རྒྱན་མགུལ་ཆིངས་དང་ལྡན་པ། གསུང་རྟེན་ཐོད་པ་མཚན་ལྡན་བདུད་རྩི་ཨ་མྲྀ་ཏ་དང་བཅས་པའི་ཛ་གད་ཀྱིས་བཀང་བའི་ཁ་མེ་ལོང་ལ་རྩ་སྔགས་བྲིས་པས་བཀབ་པ། ཡོན་ཏན་ཕྲིན་ལས་ཡོངས་རྫོགས་ཀྱི་རྟེན་དཔལ་གྱི་ [19b] གཏོར་ཆེན་རྒྱན་ལྡན། གཞན་ཡང་ཚེའི་འབྲང་རྒྱས་ལ་སོགས་པ་ཕྱི་ནང་གསང་བའི་རྟེན་རྫས་སུ་འོས་པ་རྣམས་ལེགས་པར་འགོད་དོ། །བདུན་པ་རྒྱན་རྫས་དགྲམ་པ་ནི། དཀྱིལ་འཁོར་གྱི་སྟེང་དུ་ཞིང་གི་བླ་བྲེ་དང་གདུགས་ཀྱིས་ཕུབ་ཅིང་། ཁོར་ཡུག་རྣམས་སུ་ལྡ་ལྡི། བ་དན། རྒྱལ་མཚན། ཕྱེ་ཕུར། དར་གྱི་ཆུན་འཕྱངས་སོགས་དཔལ་གྱི་ཆས་གོས་རྒྱན་ཕྲེང་། རྒྱུ་མ་དང་དོན་སྙིང་གི་འཕྱང་འཕྲུལ། གོ་མཚོན་སོགས་སྤྱན་གཟིགས་སྣ་ཚོགས་པས་ཀུན་ཏུ་བཟང་པོའི་ཞིང་ལྟ་བུར་མཛེས་ཤིང་བརྗིད་ཆགས་པར་བྱས་ནས། བདུད་རྩི་ལྔ་དང་བཅས་པའི་དྲིས་དཀྱིལ་འཁོར་གྱི་མཐའ་རིམ་དུ་བྱུག་ཅིང་། ཟུར་བཞི་མདའ་དར་ཚོན་སྐུད་ཀྱི་དྲྭ་བས་སྦྲེལ་བ་དང་རལ་གྲི་ལ་སོགས་པའང་ཚུལ་བཞིན་དུ་བཀོད་པའི་དཀྱིལ་འཁོར་གྱི་ཤར་དུ་ཆུ་གཉིས་ཉེར་སྤྱོད་ལྔ། ལྷོར་འདོད་ཡོན་ལྔ་རིན་པོ་ཆེ་བདུན་བཀྲ་ཤིས་པའི་རྫས་བརྒྱད་སོགས། ནུབ་ཏུ་བཟའ་བཅའ་བཏུང་བ་ལྡག་གཞིབ་མྱང་བའི་དཔལ་གྱི་གཏོར་མ་དར་ཚོན་གྱི་འཕུར་ལྡིང་གཡོ་བ། དེའི་གཡས་སུ་ཆོས་སྐྱོང་ཕོ་རྒྱུད་ཀྱི་གཏོར་མ་དང་བདུད་རྩི་རྩ་བརྒྱད་སྟོང་སྦྱར་གྱིས་སྦགས་པའི་སྨན་ཕུད། གཡོན་དུ་སྲུང་མ་མོ་རྒྱུད་ཀྱི་གཏོར་མ་དང་སོ་ལྔ་པ་སྦྱར་བའི་རཀྟ། བྱང་དུ་ཁྲག་གི་ཨརྒྷཾ་སོགས་དྲག་པོའི་ཉེར་སྤྱོད། ཤར་ལྷོར་ལས་བཞིའི་འབྲང་རྒྱས་སོགས་དངོས་གྲུབ་ཀྱི་ཡོ་བྱད། ལྷོ་ནུབ་ཏུ་དྲག་པོའི་བྲུབ་ཁུང་ལིང་ག་དང་ཐུན་རྫས། ནུབ་བྱང་དུ་དམ་ཅན་བཅུ་དྲུག་ [20a] སོགས་བཀའ་སྲུང་གི་གཏོར་མ། བྱང་ཤར་དུ་སྲེག་འཕང་མནན་པ་སོགས་མཐའ་སྡུད་ཀྱི་ཡོ་བྱད། གཞན་ཡང་མཆོད་པར་འོས་པའི་རྫས་ཐམས་ཅད་ཀྱིས་ལེགས་པར་བསྐོར་ཞིང་། རྡོ་རྗེ། དྲིལ་བུ། ཐོད་རྔ། རྔ་བོ་ཆེ། སིལ་ཆོལ་སོགས་རོལ་མོའི་ཁྱད་པར་དང་། གར་འཆམས་ཀྱི་ཆ་བྱད་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ལ། ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ ཕུན་སུམ་ཚོགས་པའི་མཆོད་སྤྲིན་རབ་ཏུ་སྤྲས༔ དཔལ་ཆེན་འཁོར་བཅས་ཐུགས་དམ་གཉན་བསྐངས་ལ༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ༔ ཞེས་ནམ་མཁའ་མཛོད་ཀྱི་སྔགས་རྒྱས་མཁའ་ཁྱབ་ཏུ་སྤེལ་བར་བྱའོ། །བཞི་པ་ཕྲིན་ལས་ལ་འཇུག་པའི་ཡན་ལག་ལ་ལྔ་ལས། དང་པོ་སྒྲུབ་པ་པོ་རྣམས་མངའ་གསོལ་ཞིང་གནས་སུ་འགོད་པ་ནི། རྡོ་རྗེ་རྒྱལ་ཚབ་པས་སྐབས་སུ་བབ་པའི་གཏོང་ཐུན་ཇི་ལྟར་རིགས་པ་སྔོན་དུ་འགྲོ་བས་དབྱངས་སྙན་བོར་ལེན་ཚུལ་གྱིས།ཧཱུྃ༔ རྡོ་རྗེ་རྒྱལ་པོ་ཚོགས་རྗེ་ཚོགས་ཀྱི་བདག༔ ཤེས་རབ་ཡུམ་མཆོག་གཙོ་བོའི་ཐུགས་དམ་སྐོང་༔ སྲས་མཆོག་རྒྱལ་ཐེབས་ཀརྨ་འཆམས་གར་ [20b] བཅས༔ གིང་དང་ལས་མཁན་སྤྱན་པ་དུས་འཛིན་དང་༔ བརྡ་སྦྱོར་ཕྱག་ཚང་རྡུལ་ཕྱག་སྐྱེས་བུའི་ཚོགས༔ ཀུན་ཀྱང་དཀྱིལ་འཁོར་ཕོ་བྲང་གནས་འདི་རུ༔ ཕྲིན་ལས་མངའ་བརྙེས་བསྐོས་པའི་དོན་སྤྱོད་སྒྲུབ༔ སྐྱེ་བ་སྔོན་ནས་ཚོགས་གཉིས་ལམ་སྦྱངས་པས༔ དུས་འདིར་རླབས་ཆེན་སྤྱོད་པའི་ལམ་སྣ་ཟིན༔ འཁོར་ལོས་སྒྱུར་རྒྱལ་རྣམས་ལ་མངའ་གསོལ་ལོ༔ ཞེས་མངའ་གསོལ་ཞིང་བདུད་རྩིའི་སྐྱེམས་སོ་སོར་དྲངས་ཏེ་ལས་ཀྱི་གཉེར་གཏད་དོ། །གཉིས་པ་ཆས་སུ་གཞུག་པ་ནི། སླར་ཡང་སྔོན་བྱུང་གི་ལོ་རྒྱུས་ཇི་ལྟར་འཚམས་པའི་གཏོང་ཐུན་སྔོན་དུ་འགྲོ་བས། ཧཱུྃ། ཐེག་མཆོག་གླང་པོ་ཆེ་ཡི་ཀོ་རློན་ནི། །གཏི་མུག་འཁོར་བ་རྩད་ནས་བཅད་པ་དང་། །ཆོས་ཀྱི་དབྱིངས་ཀྱི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །མ་ཉམས་བྱང་སེམས་ཞིང་གི་གཡང་གཞི་ནི། །འདོད་ཆགས་འཁོར་བ་རྩད་ནས་བཅད་པ་དང་། །སོ་སོར་རྟོག་པའི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །དཔའ་གཏུམ་ཟ་བྱེད་སྟག་གི་ཤམ་ཐབས་ནི། །ང་རྒྱལ་འཁོར་བ་རྩད་ནས་བཅད་པ་དང་། །མཉམ་ [21a] པ་ཉིད་ཀྱི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །མཉེན་ལྕུག་འཁྲིལ་ལྡེམ་སྦྲུལ་གྱི་ཆུན་པོ་ནི། །ཞེ་སྡང་འཁོར་བ་རྩད་ནས་བཅད་པ་དང་། །མེ་ལོང་ལྟ་བུའི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །ཐོད་ཕྲེང་ཚར་གསུམ་ཕྲེང་བའི་ག་ཤ་ནི། །ཕྲག་དོག་འཁོར་བ་རྩད་ནས་བཅད་པ་དང་། །བྱ་བ་གྲུབ་པའི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ མཁའ་འགྲོའི་ཚོགས་དང་དམ་ཚིག་གཅིག་པ་དང་༔ སངས་རྒྱས་ས་གསུམ་དག་ལ་འགོད་བྱའི་ཕྱིར༔ སྨིན་མཚམས་ཐལ་ཆེན་ཚོམ་བུའི་མཚན་མས་གདབ༔ དེ་བཞིན་དུ་འགྲེས་ཏེ། ལྐོག་མར་ཞག་གི་ཟོ་རིས་མཚན་མས་གདབ༔ ཞེས་དང་། འབུར་བཞིར་ཁྲག་གི་ཐིག་ལེའི་མཚན་མས་གདབ༔ ཨོཾ་བཛྲ་ཀཱི་ལི་ཀཱི་ལ་ཡ་མ་ཧཱ་བྷ་སྨ་མ་ཧཱ་ཀེཾ་ནི་རི་ཏི་མ་ཧཱ་རཏྐ་ཧཱུྃ༔ ཞེས་རྡོ་རྗེ་རྒྱལ་པོ་ནས་བརྩམས་འདུས་པ་ཐམས་ཅད་ལ་རྟགས་གདབ་བོ། །གསུམ་པ་བསྲེ་བསྣན་བྱ་བ་ནི། སྔར་དམ་མ་འདྲེས་པའི་སློབ་བུ་གསར་པ་ [21b] ཡོད་ན་དེ་རྣམས་དཀྱིལ་འཁོར་དུ་བཅུག་ནས་དམ་བསྲེ་བ་སྟེ། མཆེད་གསར་བུ་རྣམས་ལོགས་སུ་འཁོད་པས་ཁྲུས་བྱ། ལས་བྱང་བཞིན་འབྱུང་གཏོར་བསྔོས་ཏེ་བགེགས་བསྐྲད། རྡོ་རྗེ་སློབ་དཔོན་སངས་རྒྱས་དཔལ། ཅེས་སོགས་ཀྱི་རྒྱུན་བཤགས་བྱས་ཏེ། སློབ་དཔོན་གྱིས་ནང་མཆོད་བྱིན་གྱིས་བརླབས་ནས་སྨན་མཆོད་རྒྱས་པར་ཕུལ་བའི་ལྷག་མ་ལ། ཨོཾ་བཛྲ་ཡཀྴ་ཀྲོ་དྷ་ཧ་ན་ཧ་ན་ཧཱུྃ་ཕཊ༔ ཅེས་བཟླས་པས་དམ་ཆུ་བྱིན་གྱིས་བརླབས་པའི་བདུད་རྩི་རྡོ་རྗེས་ལྕེ་ལ་ལན་གསུམ་རེ་བཞག་པས། ཡེ་ཤེས་སེམས་དཔའི་ངོ་བོ་ཧཱུྃ་མཐིང་ནག་རེར་གྱུར་ཏེ་སྙིང་དབུས་སུ་ཐིམ་པར་བསམ་དུ་བཅུག་ལ། འདི་ནི་ཁྱོད་ཀྱི་དམྱལ་བའི་ཆུ༔ དམ་ཚིག་འདས་ན་སྲེག་པར་བྱེད༔ དམ་ཚིག་བསྲུང་ན་དངོས་གྲུབ་ནི༔ རྡོ་རྗེ་བདུད་རྩིའི་ཆུ་འདིས་འགྲུབ༔ ཅེས་བྱིན། སློབ་བུས། ས་མ་ཡ་ན་ར་ཀན༔ ཞེས་བྲོ་བོར་ཞིང་མྱང་། དེ་ནས་འདྲེས་ཟིན་བསྣན་པ་ནི། མཆེད་གསར་རྙིང་ཐམས་ཅད་ཀྱི་གནས་གསུམ། ཀཱ་ཡ་སིདྡྷི་ཨོཾ༔ ཝཱ་ཀ་སིདྡྷི་ཨཱཿཙིཏྟ་སིདྡྷི་ཧཱུྃ༔ ཞེས་བདུད་རྩིས་ཐིག་ལེ་རེ་བྱ་ཞིང་། ལྕེ་ལ་བཞག་སྟེ། རྣལ་འབྱོར་རྣམས་ཀྱི་དཀའ་ཐུབ་དམ། །རྟོགས་ན་སྐུ་གསུང་ཐུགས་ཡིན་ཏེ། །མ་རྟོགས་ན་ནིང་ངན་སོང་གསུམ། །སུ་ཡང་འདའ་བར་མ་བྱེད་ཅིག །ཅེས་བྱིན་ལ། ས་མ་ཡ་ [22a] ན་ར་ཀན༔ ། ཞེས་བྲོ་བོར་དུ་བཅུག་ནས། གསར་རྙིང་གྲལ་བསྲེ་བ་ནི། ཧཱུྃ། རྩ་བ་སྐུ་གསུང་ཐུགས་ཀྱི་དཀྱིལ་འཁོར་དུ། །བསྙེན་སྒྲུབ་རྣམ་བཞི་བསྙེན་ཅིང་སྒྲུབ་པ་དང་། །ཡི་དམ་ལྷ་མཆོག་ཛཔྲ་བསྙེན་བགྲང་བའི་ཕྱིར། །དམ་ཚིག་རྡོ་རྗེའི་གྲལ་དུ་མཆིས་པར་གནང་། །དེང་ཕྱིན་ཆད་མཆེད་གསར་རྙིང་ཐམས་ཅད་སྐལ་པ་མཉམ་པ་ཡིན་པས་གྲལ་གཅིག་ལ་འདུག་པས་ཆོག་པ་ཡིན་ནོ། །ཞེས་བསྒོས་པ་ལྟར་རང་རང་གི་གྲལ་ལ་འཁོད་དོ། །བཞི་པ་བརྡ་སྦྱར་བ་ནི། ལས་བྱང་བཞི་བརྡ་སྒོ་དབྱེ་ཞིང་བརྡ་ཕྱག་འཚལ་བ་སྔོན་དུ་འགྲོ་བས། ཡི་དམ་ལྷའི་ང་རྒྱལ་བརྟན་པོས། ཨོཾ་མ་ཧཱ་བཛྲ་ཧཱུྃ་གིས་རྡོ་རྗེ་ཐུགས་ཀར་གསོར། ཨོཾ་བཛྲ་གྷཎྜེ་ཧོཿ ས་དྲིལ་བུ་བསིལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་ཐུགས་ཀར་འཁྱུད་རྒྱ་བྱས་ལ་དམ་ཚིག་གསུམ་དྲན་པའི་ངང་ནས་རོལ་མོའི་སྒྲ་སྣ་ཚོགས་བརྒྱ་ཆེར་བསྒྲག་གོ །ལྔ་པ་སྣོད་བཅུད་བྱིན་དབབ་པ་ནི། སློབ་དཔོན་སོགས་ཀྱིས་དཀྱིལ་འཁོར་ལ་བསྐོར་ཞིང་དར་གྱི་གཡབ་མོ་དང་དྲི་བཟང་པོའི་སྤོས་བཏུལ། རོལ་མོའི་སྒྲ་དང་སྙན་པའི་དབྱངས་ཀྱི་ང་རོ་དང་བཅས། ཨོཾ་བཛྲ་ས་མ་ཡ་ཧོཿ ས་མ་ཡ་སྟྭཾ༔ ཧཱུྃ༔ དབུས་ཀྱི་ཕོ་བྲང་གདན་སྟེང་ནས༔ [22b] བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་ཀྱིས༔ དཀྱིལ་འཁོར་འདི་ལ་བྱིན་ཅིག་ཕོབ༔ ཕྱོགས་བཅུ་དྲེགས་པའི་གདན་སྟེང་ནས༔ ཁྲོ་རྒྱལ་ཡབ་ཡུམ་ཕྲ་མེན་བཅས༔ སྤྲུལ་པ་ཡབ་ཡུམ་འཁོར་བཅས་ཀྱིས༔ དཀྱིལ་འཁོར་འདི་ལ་བྱིན་ཅིག་ཕོབ༔ ཟླ་གམ་ཨེ་ཡི་གདན་སྟེང་ནས༔ སྐུ་གསུང་ཐུགས་ཀྱི་སྤྲུལ་པའི་སྲས༔ མཐུ་ཆེན་ཉི་ཤུ་རྩ་གཅིག་གིས༔ དཀྱིལ་འཁོར་འདི་ལ་བྱིན་ཅིག་ཕོབ༔ དཀྱིལ་འཁོར་གྲུ་ཆད་སྒོ་བཞི་ནས༔ ཕྲིན་ལས་བཞི་བདག་ཐུགས་རྗེའི་སྲས༔ སྒོ་སྐྱོང་བཞི་དང་རིག་འཛིན་བཅས༔ དཀྱིལ་འཁོར་འདི་ལ་བྱིན་ཅིག་ཕོབ༔ རང་རང་སྤྲུལ་པའི་གནས་ཆེན་ནས༔ ཤྭ་ན་མ་བཞི་བདག་ཉིད་བཞི༔ ས་བདག་བསེ་ཡི་ལྷ་མོ་བཞིས༔ དཀྱིལ་འཁོར་འདི་ལ་བྱིན་ཅིག་ཕོབ༔ དུར་ཁྲོད་གཡའ་གངས་བྲག་རྩེ་ནས༔ བསེ་ལྕགས་དུང་སྐྱེས་བཀའ་སྡོད་དང་༔ གིང་ཆེན་བཅོ་བརྒྱད་དབང་ཕྱུག་ཉེར་བརྒྱད་ཀྱིས༔ དཀྱིལ་འཁོར་འདི་ལ་བྱིན་ཅིག་ཕོབ༔ སྒྲུབ་མཆོག་རྣམས་ལ་དབང་ཆེན་སྐུར༔ རྟགས་དང་མཚན་མ་བསྟན་པ་དང་༔ [23a] དངོས་གྲུབ་ཆེན་པོ་མྱུར་དུ་ཕོབ༔ འགྲོ་བ་མ་ལུས་དོན་སླད་དུ༔ དབང་དང་བྱིན་རླབས་འདིར་སྩོལ་ཅིག༔ དབང་ཆེན་རྣམས་ཀྱིས་དབང་བསྐུར་ཅིག༔ བྱིན་ཆེན་རྣམས་ཀྱིས་བྱིན་ཕོབ་ཅིག༔ མཐུ་ཆེན་རྣམས་ཀྱིས་མཐུ་སྩོལ་ཞིག༔ ཨོཾ་བཛྲ་ཀཱི་ལི་ཀཱི་ལ་ཡ༔ ཨཱ་བེ་ཤ་ཡ་ཨ་ཨ་ཨཱཿཞེས་བྱིན་དབབ་པས་བདག་གནས་དཀྱིལ་འཁོར་ཡོ་བྱད་དང་བཅས་པ་ཐམས་ཅད་ཡེ་ཤེས་ཆེན་པོའི་རོལ་པར་བྱིན་བརླབས་པར་བསམ་མོ། །དེ་དག་ནི་ཉིན་གཉིས་པའི་བྱ་བ་སྟེ་སྦྱོར་བའི་ལས་ཀྱི་རིམ་པ་རྣམས་གྲུབ་པ་ཡིན་ནོ། །སྤྱི་དོན་གཉིས་པ་དངོས་གཞི་བསྙེན་སྒྲུབ་ཕྲིན་ལས་ཀྱི་གཞུང་བསྲང་བ་ལ་བཞི། ཐུན་བཞིའི་རིམ་པས་སྒྲུབ་པའི་གཞུང་བསྲང་བ། དེའི་བར་ཆད་བརྟག་ཅིང་བསལ་བ། གྲུབ་པའི་མཚན་མ་བརྟག་ནས་དངོས་གྲུབ་བླང་བ། ཕྲིན་ལས་ལས་ལ་སྦྱར་བའོ། །དང་པོ་ནི། སློབ་དཔོན་སྒྲུབ་པའི་གྲོགས་དང་བཅས་པ་ཁྲུས་བྱས་དྲིས་བྱུགས་ཤིང་རྒྱན་གོས་བཟང་པོས་བརྒྱན། དང་བའི་ཡིད་ཀྱིས་དཀྱིལ་འཁོར་ལ་ཕྱོགས་པར་འཁོད་དེ་བརྒྱུད་པའི་གསོལ་འདེབས་ནས་བརྩམས་ཕྲིན་ལས་ཀྱི་སྔོན་འགྲོའི་ཆོས་རྣམས་རྒྱས་པར་བཏང་། དངོས་གཞི་ཏིང་ངེ་འཛིན་གསུམ་གྱིས་རྩ་བའི་དཀྱིལ་འཁོར་སྒོམ་པའི་ཚེ་རྒྱུའི་ཧཱུྃ་དེ་ཉིད་བྲིས་པའི་དཀྱིལ་འཁོར་གྱི་དབུས་སུ་བབས་པ་ལས་བདག་ཉིད་གཙོ་བོར་བསྐྱེད་ཅིང་བདག་ [23b] མདུན་དབྱེར་མེད་དཀྱིལ་འཁོར་གསུམ་ལྡན་དུ་བསྒོམ་ནས། ཡེ་ཤེས་ཀྱི་འཁོར་ལོ་སྤྱན་དྲངས་ཏེ་བསྟིམས་ཤིང་ཕྱག་མཆོད་བསྟོད་པའི་བར་གཞུང་བཞིན་བྱ། བཟླས་པ་ལ་འཇུག་པའི་སྔོན་དུ། ཧཱུྃ༔ ཆོས་དབྱིངས་འཁོར་ལོའི་གཞལ་ཡས་སུ༔ ལྷ་ཆེན་ཕྱོགས་སྐྱོང་ཉི་ཟླའི་སྟེང་༔ དཔལ་ཆེན་རྡོ་རྗེ་གཞོན་ནུ་དང་༔ ཁྲོ་བཅུ་ཕྱག་བརྙན་དམ་ཅན་ཚོགས༔ སྐུ་ལ་དུར་ཁྲོད་ཆས་རྣམས་རྫོགས༔ གསུང་གི་སྒྲ་སྒྲོགས་ཀཱི་ལ་ཡ༔ ཐུགས་ནི་སྒྲོལ་མཛད་སྲོག་དང་བཅས༔ མ་གསལ་བར་དུ་བསྐྱེད་ཅིང་བསྒོམ༔ མ་གྲུབ་བར་དུ་མི་བཏང་ངོ་༔ ཞེས་ཛཔྲ་ལ་བསྐུལ་ཏེ་སྐུ་ཕྱག་རྒྱ། གསུང་ཡིག་འབྲུ། ཐུགས་ཆོས་ཉིད་ལ་དམིགས་པའི་ཛཔྲ་དགོངས་གསུམ་པོ་ལྷ་ཐམས་ཅད་ལ་འགྲེལ་བ་བྱས་ལ། ཐུན་རེ་རེ་བཞིན་གཙོ་བོ་ལ་སྟོང་། ཁྲོ་བོ་བཅུ་ལ་བརྒྱ་རེ། སྲས་མཆོག་སྒོ་སྐྱོང་རྣམས་ལ་ལྔ་བཅུ་རེ་བཟླ། བསྙེན་གྲོགས་ཀྱིས་ཁོར་ཡུག་ཀུན་ཏུ་བཟླས་པ་མ་ཆད་པར་བྱ་ཞིང་། སྐབས་སུ་དབྱངས་ཀྱི་རྟ་ལ་སྦྱར་ཏེ་ཐུན་མོང་དུ་འུར་འདོན་ཡང་བྱ། འདིར་སྟོད་ལས་བསྙེན་སྒྲུབ་ལས་སྦྱོར་ཆིག་ཆོད་བྱེད་པར་འདོད་ན། གོང་གི་ཡེ་ཤེས་ལྷ་བསྙེན་གཙོ་བོར་བཟླ་བ་བསྙེན་པའི་ཚུལ་གྱི་མཐར། ཐུགས་སྲོག་འོད་ཟེར་ལྕགས་ཀྱུས་བསྐུལ་བས་དམ་ཅན་རྣམས་ཤ་རུལ་ལ་སྦྲང་མ་འདུབ་ལྟར་ཐིབས་ཀྱིས་བྱོན་ཏེ་ཕྲིན་ལས་ [24a] སྒྲུབ་པར་བསམ་ཞིང་བཞི་སྙིང་གཅིག་དྲིལ་བཟླ་བ་དམ་ཅན་ཉེ་བསྙེན་སྒྲུབ་པའི་ཡན་ལག་དང་། སྔགས་ཀྱི་འོད་ཟེར་མེའི་ཚྭ་ཚྭ་ལྟ་བུས་དགྲ་བགེགས་ཐམས་ཅད་ཐུལ་ཐུལ་བསྲེགས་པར་བསམ་ཞིང་གདབ་པའི་སྔགས་དྲུག་གམ་ཆིག་ཆོད་དུ་སྤུ་གྲིའི་དྲག་སྔགས་བཟླ་བ་ངན་སྔགས་ཉེ་བསྙེན་ལས་སྦྱོར་གྱི་ཚུལ་ཏེ། མོས་སློབ་ཀྱི་སྐབས་སུ་གྲངས་ཉེར་གཅིག་ཙམ་རེ་བཟླས་པས་ཆོག་གོ །མཐར་བརྟན་གཡོའི་ཚེ་བཅུད་བསྡུ་བའི་དམིགས་གནད་དང་བཅས། ཨོཾ་བཛྲ་ཀཱི་ལི་ཀཱི་ལ་ཡ༔ བཛྲ་ཨ་ཡུ་ཤེ་ཧཱུྃ་ཛ་ཛཿསིདྡྷི་ཕ་ལ་ཧཱུྃ་ཨཱཿཞེས་ཚེ་ཛཔྲ་ཀྱང་བརྒྱ་རྩ་ཙམ་བཟླ། ཐུན་མཚམས་སུ་སྟོང་ཚིག་གིས་མཆོད་ཅིང་བསྟོད་ནས་དངོས་གྲུབ་བསྐུལ། ཐུན་གཞན་རྣམས་ལ་ཏིང་འཛིན་གསུམ་ནས་བཟླས་པའི་བར་དང་། དགོངས་ཐུན་གྱི་མཐར་དམ་ཅན་གཏེར་སྲུང་རྣམས་ཀྱི་གཏོར་ཆོག་དང་ཚོགས་ཀྱི་མཆོད་པ་སོགས་རྗེས་ཀྱི་བྱ་བ་རྣམས་མཐར་དབྱུང་། དེ་ལྟ་བུའི་འགྲོས་ཀྱིས་སྔ་དྲོ་དགོངས་མོ་སྲོད་དང་ཐོ་རངས་བཞི་སྟེ་ཐུན་བཞིའི་རིམ་པས་ཉམས་སུ་བླང་བར་བྱའོ། །གཉིས་པ་ནི། དམ་སྲིའི་ཉམས་ལོན་གྱི་རྟགས་སུ་དོན་མེད་པར་སེམས་འཁྲུགས་ཤིང་འཐབ་རྩོད་འབྱུང་བ། དཀྱིལ་འཁོར་དང་མར་མེའི་མདངས་ཉམས་པ། ཆགས་སྡང་རང་གར་སྐྱེ་ཞིང་སྐྱོ་འཇིགས་སྙིང་མི་དགའ་བ། ནད་དང་སྡུག་བསྔལ་སློངས་པ། གྱེར་བཟླས་ཀྱི་ [24b] སུན་པ་སོགས་ཕྱི་ནང་གི་འགལ་རྐྱེན་མང་ན། སྤྱིར་རེ་དོགས་ཀྱི་བསྙེངས་བཅད་དེ་ལྟ་བས་ཟིལ་གྱིས་གནོན། བྱེ་བྲག་ཉུ་ལེ་བསྐྲད་པའི་ཆོ་ག་བྱ་སྟེ། བྲུབ་ཁུང་དུ་དམ་སྲིའི་ལིང་ག་བཅས་པ་མདུན་དུ་བཀོད་ལ། ཨེ་ཡཾ་ཛྭ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དམ་སྲི་འབྱུང་པོ་རིད་ཅིང་ཉམ་ཐག་པའི་ལུས་ཅན་དུ་གྱུར་པར་གསལ་ཞིང་། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་འཁོར་འདས་ཐམས་ཅད་ཀྱི་སྤྱི་དཔལ་ཡི་དམ་རྡོ་རྗེ་གཞོན་ནུ་བདུད་འདུལ་ཁྲོ་བཅུ་ཁྲ་ཐབས་སྒོ་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པའི་མཐུ་ལ་བརྟེན་ནས་དངོས་གྲུབ་ལ་བར་དུ་གཅོད་ཅིང་ལོག་པར་ལྟ་བའི་འབྱུང་པོ་ཉམས་ལེན་བདུད་ཀྱི་རིགས་སུ་གྱུར་པ་ [25a] ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག །ཏྲི་ཡཾ་ཛཿཏྲི་བཛྲ་ཨཾ་ཀུ་ཤ་ཛ༔ ཛ༔ ཧཱུྃ་བཾ་ ཧོཿ ཞེས་དགུག་བསྟིམ་ནན་ཏན་ཏུ་བྱས་ལ། ཕུར་ཐུན་ཚོམ་བུར་བསྐུལ་བ་ནི། ཧཱུྃ༔ ཆོས་ཀྱི་དབྱིངས་ལས་རང་བྱུང་གྲུབ་པའི་ལྷ༔ ཕུར་པ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་ཁྲོ་གཏུམ་སྐུར་སྟོན་པ༔ དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ༔ ང་ནི་རྡོ་རྗེ་གཞོན་ནུའི་སྐུ༔ སྲས་འཁོར་སྤྲུལ་པ་བྱེ་བ་འབུམ༔ བཀའ་སྡོད་རབ་འཇིགས་ཕོ་ཉར་བཅས༔ ཕུར་པའི་ལྷ་ཚོགས་དུས་ལ་བབ༔ གཡས་ཀྱི་ཕྱག་ན་ཕུར་པ་འདྲིལ༔ གཡོན་གྱི་ཕྱག་ན་ལྕགས་ཀྱུས་འགུག༔ ལྕགས་ཀྱུས་ཟུངས་ལ་ཕུར་བུས་ཐོབ༔ གནོད་བྱེད་དགྲ་བགེགས་རྡུལ་དུ་རློག༔ ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ༔ གནོད་བྱེད་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཧཱུྃ་ཕཊ༔ ཅེས་དྲག་སྔགས་ཕུར་བསྐོར་དང་བཅས་སྲས་མཆོག་གི་ཕུར་བུ་ལིང་གའི་གནས་རྣམས་སུ་གདབ་ཅིང་། སྤུ་གྲིའི་སྔགས་བཟླ་བཞིན་དུ་ཐུན་གྱིས་བྲབ། ཁྱད་པར་དཔལ་ [25b] གྱི་ཕོ་ཉ་ཀུན་ཐུབ་རྒྱལ་མོ་བསྐུལ་བ་ནི། ཧཱུྃ༔ ཤར་ཕྱོགས་དཀར་མོ་དུང་གི་གཞལ་ཡས་ནས༔ ཁྲག་མདོག་དམར་མོ་བསེ་ཡི་ལན་ཕྲན་ཅན༔ སྤྱན་རྩ་དམར་ཟླུམ་ཉི་མའི་ཟེར་ལྟར་འཕྲོ༔ སྨིན་མ་གློག་འཁྱུག་བར་སྣང་གོ་སྐབས་འབྱེད༔ བུ་ཡུག་ཐོག་འབེབས་ཤངས་ནས་རྡོ་རྗེ་འཁྲུགས༔ བཞེད་པ་ཧེ་དང་དཔལ་གྱི་སྤུ་གྲིས་གཏམས༔ རྔམས་པའི་ལྗགས་འདྲིལ་བསྐལ་པའི་མེ་ཆེན་འབར༔ ཨག་ཚོམ་མེ་འབར་རབ་འབྱམས་སྲིད་པ་སྲེག༔ བསྐལ་པའི་འབྲུག་སྒྲ་སྙན་ནས་འབྲུག་སྟོང་སྒྲོགས༔ ལག་པ་དམར་པོ་སྤུ་གྲི་འབུམ་གྱིས་གཏམས༔ སེན་མོ་ལྕགས་ཀྱུའི་རྩེ་ལ་མེ་ཆེན་འབར༔ བ་སྤུ་གནམ་ལྕགས་ཞུན་མའི་རྡོ་རྗེ་འཁྲུགས༔ སྨིན་མཚམས་ལྕགས་ཀྱི་ཁྲོ་ཆུང་ཆར་འབེབས་ཤིང་༔ ཞབས་ཀྱི་ཕུར་བས་སྲིན་མོ་ལྔ་བརྒྱ་གཟིར༔ རལ་པའི་གསེབ་ནས་ཁྲག་གི་ཆར་པ་འབེབས༔ ཤིན་ཏུ་མི་བཟད་གཏུམ་ཆེན་ཁྲག་འཐུང་མ༔ སྲིན་མོའི་སྙིང་འབྱིན་ཆངས་པར་བཅུག་ནས་གསོལ༔ ཤིན་ཏུ་མི་བཟད་འབར་བའི་སྐུ་གཅིག་མ༔ དཔག་ཚད་ལྔ་བརྒྱར་རྒྱུག་ཅིང་ཀླུ་སྲིན་སྒྲོལ༔ ཁྲོས་པའི་ཞལ་མདོག་ཁྲག་གི་ [26a] མཆིན་པའི་ཁ༔ ན་བཟའ་དམར་པོ་སྲིན་གྱི་གཡང་གཞི་གསོལ༔ ཕྱོགས་བཅུར་ཁ་བལྟས་ཕྱོགས་སྐྱོང་ཞབས་ཀྱིས་གནོན༔ བདུད་ལ་བབས་ན་སྙིང་ཁྲག་དྲོན་མོ་གསོལ༔ སྲིན་ལ་བབས་ན་སྲོག་རྩ་དམར་པོ་གཅོད༔ དགྲ་ལ་བབས་ན་དུག་གི་ཁ་ཆུ་འདེབས༔ བགེགས་ལ་བབས་ན་རཱུ་པ་རྡུལ་དུ་རློག༔ དཔལ་གྱི་ཕོ་ཉ་དཔལ་གྱི་ཐུགས་ལས་སྤྲུལ༔ དམ་ཉམས་དགྲ་དང་འབྱུང་པོ་བགེགས་རྣམས་ཀྱི༔ ཕུང་པོ་དུམ་བུར་གཏུབས་ལ་དོན་སྙིང་སྲེག༔ དམ་ཉམས་ཉུལ་ལེའི་བར་ཆད་རྡུལ་དུ་རློག༔ དམ་ཚིག་དུས་ལ་བབ་པོ་ས་མ་ཡ༔ ཧཱུྃ་གྲུ་བུ་གྲུ་ཨ་པ་ཙེ༔ རུ་པ་ཙེ༔ ན་ར་ཙེ༔ ཙ་མེ་ཐུན་ཐུན༔ ན་ཤ་སྟྭཾ་བྷ་ཡ༔ ཡཀྴ་བྱིན༔ ཡཀྴ་བྱིན༔ ཕྱེ་མ་ཕྱེ་མ༔ རྡུལ་ཕྲན་རྡུལ་ཕྲན༔ ཙིཏྟ་རྦད་ནན༔ ཞེས་ཀུན་ཐུབ་མའི་ཕྱག་མཚན་ཁྱད་པར་གྱི་དབྱུག་པས་བསྡིགས་ཤིང་གཟིར། ཊྰཀྐི་དཀར་པོས་གྲི་ཤར་བྱེད་ཅིང་། ཨོཾ་བཛྲ་ཀཱི་ལི་ཀཱི་ལ་ཡ་པྲ་མ་རཱ་ཛ་ཏྲིག་ནན༔ པུ་ན་རཀྴ་རྦུད་ལིང་༔ ཏྲིའུ་ཏྲིའུ་མ་ཡ་ན་མོ་ཤོ་ཛ་མཱ་ར་ཡ་རྦད་རྦད༔ ཊྰཀྐི་ནག་པོས་གྲི་ལག་ལ་མི་ལྤགས་ཀྱི་ལྕགས་འབྲས་བཏགས་པས་བྲབ་ཅིང་། ཨོཾ་སུམྦྷ་ནི་སོགས་ཧཱུྃ་ [26b] བཞི་པའི་སྔགས་བརྗོད་ལ་ཐུན་གྱིས་བྲབ་པ་སོགས་ཚམ་རྔམས་དྲག་པོས་བསྐྲད་པ་རྣམས་དུས་དྲུག་བྱས་པའི་རྗེས་སུ་སྒྲུབ་པ་པོ་རྣམས་རྒྱན་དང་ཆས་གོས་བསྟར་ནས་དཀྱིལ་འཁོར་ལ་བསྐོར་ཏེ་རོལ་མོ་སྣ་ཚོགས་པའི་སྒྲ་སྒྲོག་ཅིང་ཚིལ་ཆེན་དང་གུ་གུལ་སྲེག །དར་ནག་དང་ལྕང་ལོ་མི་ལྤགས་ཀྱིས་གཡབ་ཅིང་དད་པ་མཆོག་ཏུ་བསྐྱེད་ལ་བྱིན་དབབ་པར་བྱའོ། །གསུམ་པ་ནི། དེ་ལྟར་བརྩོན་པས་བསྒྲུབ་པས་མཚན་མའི་ལྟས་རབ་འབྲིང་ཐ་མ་གསུམ་གྱི་སྒོ་ནས་འབྱུང་བར་གསུངས་ཏེ། གནད་འཕྱང་ལས། རབ་ཕུར་པ་འགུལ་བ༔ འཁྲབ་པ༔ རཀྟ་མི་སྐམ་ཞིང་ཁོལ་བ༔ མར་མེ་གསལ་ཞིང་ཞག་གསུམ་འཛིན་པ་དང་༔ ཏིང་ངེ་འཛིན་གསལ་བ༔ ཉམས་དགའ་བ༔ དྲི་བཟང་འཐུལ་བ་ལ་སོགས་པ་འབྱུང་ངོ་༔ འབྲིང་དུ་རིན་པོ་ཆེའི་གླིང་དུ་ཕྱིན་པ་དང་༔ ཉི་ཟླ་ལུས་ལ་ཤར་བ་དང་༔ ཉི་ཟླ་ལག་གིས་བཟུང་བ་དང་༔ ཉི་ཟླ་ལ་ཞོན་པ་དང་༔ དར་ཕྱར་དུང་འབུད་མེ་འབར༔ ཕུར་པ་ལ་སོགས་ཕྱག་མཚན་རྙེད་པ་འབྱུང་ངོ་༔ ཐ་མ་མེ་ཏོག་སྔོན་པོའི་གླིང་དུ་འདུག་པ་དང་༔ ནམ་མཁའ་ལ་འཕུར་བ༔ ཆུ་ཆེན་བརྒལ་བ༔ མཚོན་རྣོན་ཐོགས་པ༔ ཉམས་དཔའ་གདིང་སྐྱེ་བ་ལ་སོགས་པ་འབྱུང་ངོ་༔ ཞེས་གསུངས་པ་ལྟར་གྲུབ་པའི་མཚན་མ་དགེ་བར་མཐོང་བའམ་དུས་དང་གྲངས་ཀྱི་དམ་བཅའ་བརྟན་པོ་ཐེམས་ནས་དངོས་གྲུབ་བླང་བར་བྱ་སྟེ། སླར་ཡང་མཆོད་གཏོར་གསར་པ་བཟང་དུ་བཤམས་ཤིང་དངོས་གྲུབ་ཀྱི་རྫས་སོགས་ཁ་གསོ། [27a] ཕྲིན་ལས་ཀྱི་གཞུང་བསྲང་ནས་དངོས་གྲུབ་ལ་བར་དུ་གཅོད་པའི་བགེགས་བསྐྲད་ཅིང་སྲུང་བའི་འཁོར་ལོ་བརྟན་པོར་བསྒོམ། འཁོན་ལྕུགས་དང་ཉམས་གྲིབ་བཤགས་ལ་བྱིན་དབབ་པ་སྔོན་དུ་འགྲོ་བས། ཡོན་ཏན་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི། བདག་ཉིད་དཔལ་ཆེན་པོ་ཡབ་ཡུམ་དུ་གསལ་བའི་ཡབ་ཀྱི་གསང་གནས་ཟླ་བ་ལ་རྡོ་རྗེ་རྩེ་ལྔ་པ་སྡུད་བྱེད་ཀྱི་སྙིང་པོ་བུ་གར་ཨོཾ་དཀར་པོས་མཚན་པ། ཡུམ་གྱི་མཁའ་པདྨ་འདབ་བརྒྱད་ཀྱི་ལྟེ་བར་ཨེ་གྲུ་གསུམ་གྱི་དབུས་སུ་འབེབས་བྱེད་ཀྱི་སྙིང་པོ་ཨེ་དམར་པོས་མཚན་པ། མཁའ་གསང་སྦྱར་ཏེ་སྙོམས་པར་ཞུགས་པས། ཡུམ་གྱི་དུང་ཁང་ཁྲག་འཐུང་རིགས་ལྔ་ཡབ་ཡུམ་ཚོན་གང་བ་བཞུགས་པ་རྣམས་བསྐུལ། སྙོམས་པར་ཞུགས་པས་ཡབ་ལྔའི་བྱང་སེམས་མུ་ཏིག་དཀར་པོ་ལྟ་བུ་དང་། ཡུམ་ལྔའི་དྭངས་མ་མཚལ་ལྟ་བུ་རྩ་དབུ་མ་ནས་བྱུང་། ཡུམ་གྱི་མཁར་བབས་དཀར་དམར་འདྲེས་ནས་དངོས་གྲུབ་ཐམས་ཅད་ཀྱི་རང་བཞིན་དུ་འཁྱིལ་བ་དེ་ཨོཾ་ཨཱཿཧཱུྃ་གསུམ་དུ་གྱུར་པ་བདག་གི་རྡོ་རྗེའི་ནང་དུ་རྔུབས་ཏེ་ཐུགས་སྲོག་ལ་ཐིམ་པས་བདེ་སྟོང་འཛིན་མེད་རང་བྱུང་གི་ཡེ་ཤེས་འབར་བར་བསམས་ [27b] ལ། དཀྱིལ་འཁོར་གསུམ་གྱི་ཛཔྲ་མཐར། ཨོཾ་ཨཱཿཧཱུྃ་སརྦ་སིདྡྷི་ཨཱཿཞེས་བཏགས་པ་ཅི་ནུས་སུ་བཟླ་ཞིང་། སླར་ཡང་འོད་ཟེར་འཕྲོས་པས་སྣོད་བཅུད་ཀྱི་འཇིག་རྟེན་ཐམས་ཅད་ཁྱབ། འབྱུང་བཞི་རིན་ཆེན་སྨན་རྫས་ཐམས་ཅད་ཀྱི་ཚེ་རིང་ནད་གདོན་སེལ་བྱེད་ཀྱི་བཅུད་ཐམས་ཅད་བསྡུས་ཏེ་བདག་ལ་ཐིམ་པས་གཟི་མདངས་བསྐྱེད། སེམས་ཅན་ཐམས་ཅད་ལ་འཕྲོས་པས་ལས་ཉོན་མ་རིག་པའི་བག་ཆགས་སྦྱངས། རྡོ་རྗེ་གཞོན་ནུའི་རང་བཞིན་དུ་གྱུར། དཀྱིལ་འཁོར་གྱི་ལྷ་ཚོགས་དང་ཕྱོགས་བཅུའི་སངས་རྒྱས་ཐམས་ཅད་ལ་འཕྲོས། མཉེས་མཆོད་ཕུལ། དགྱེས་པ་བསྐྱེ། ཐུགས་དམ་བསྐུལ། སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཨོཾ་ཨཱཿཧཱུྃ་གི་རྣམ་པར་བསྡུས་ནས་བདག་ལ་ཐིམ་པས་ལས་ཉོན་བག་ཆགས་དང་བཅས་པ་སྦྱངས། སྐུ་གསུང་ཐུགས་ཡོན་ཏན་ཕྲིན་ལས་ཡོངས་རྫོགས་ཀྱི་དངོས་གྲུབ་ཐོབ། ཡང་འབྲུ་གསུམ་གྱི་རྣམ་པར་བསྡུས་ནས་རྟེན་རྫས་ཐམས་ཅད་ལ་ཐིམ་པས་འཕར་འཁྲབ་ཁོལ་ཞིང་དྲི་བཟང་དང་དུ་བ་སོགས་འབྱུང་བར་བསམས་ལ། སྔགས་ཅི་འགྲུབ་བཟླས་པའི་མཐར་གདུང་དབྱངས་དྲག་པོས། ཧཱུྃ༔ [28a] དཔལ་ཆེན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་མ༔ ཁྲོ་བཅུ་ཡབ་ཡུམ་ཟ་གསོད་དང་༔ སྲས་མཆོག་སྒོ་བཞིའི་སྲུང་མར་བཅས༔ ཐུགས་དམ་དབང་གིས་སྤྱན་འདྲེན་ན༔ འདིར་གཤེགས་ཕོ་བྲང་གཉན་པོར་བཞུགས༔ ས་མ་ཡ་ཛཿཧཱུྃ་བཾ་ཧོཿ ཞེས་བསྐུལ་ལ། ཀ་པཱ་ལ་མཚན་ལྡན་དུ་ཁྲག་ཆང་ཨ་མྲྀ་ཏ་དང་མངར་གསུམ་སྦྱར་བ་བདུད་རྩིར་སྦར་བ་ཐོགས་ཏེ། ཧོཿ དཔལ་ཆེན་ཡབ་ཡུམ་འཁོར་དང་བཅས་༔ དང་པོ་ཆོས་དབྱིངས་ཡེ་ཤེས་ལྷ༔ བར་དུ་བདག་གི་ཡི་དམ་ལྷ༔ ད་ལྟ་ལྷ་དང་གཉིས་སུ་མེད༔ གཉིས་མེད་རོལ་པའི་མཁའ་དབྱིངས་སུ༔ སྨན་རཀ་བདུད་རྩི་སྦྱར་བས་མཆོད༔ མཆོད་འབུལ་ཛཔྲ་དགོངས་དངོས་གྲུབ་སྩོལ༔ ཞེས་ཁྲག་ཆང་མཐེབ་སྲིན་གྱིས་འཐོར་ཞིང་སོ་སོའི་མཚན་སྔགས་མཐར། མ་ཧཱ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ ཞེས་བཏགས་པས་མཆོད། དངོས་གྲུབ་བསྡུ་བའི་ཛཔྲ་དབྱངས་དང་བཅས་པས་དཀྱིལ་འཁོར་ལ་བསྐོར་ཞིང་ཤར་དུ་འཁོད་པས། ཧཱུྃ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་ [28b] གསོལ༔ ཡེ་ཤེས་ཁྲོ་བོ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ རྡོ་རྗེ་ཕུར་པའི་ལྷ་ཚོགས་དགོངས༔ དང་པོ་བསྙེན་པའི་དབུ་བཙུགས་ནས༔ དོ་ནུབ་ཕན་ཆད་ཞག་གྲངས་ཐེམས༔ བཟླས་བརྗོད་བསྙེན་པའི་གྲངས་ཀྱང་ཚང་༔ འགྲོ་བ་མ་ལུས་བསྒྲལ་སླད་དུ༔ ཀཱི་ལ་ཡ་ཡི་དངོས་གྲུབ་སྩོལ༔ ཨོཾ༔ བཅོམ་ལྡན་དཔལ་ཆེན་ཡབ་ཡུམ་སྦྱོར༔ གསང་བ་བྱང་སེམས་དངོས་གྲུབ་སྩོལ༔ ཕྱོགས་བཅུའི་ཁྲོ་རྒྱལ་ཡབ་ཡུམ་དང་༔ ཟ་བྱེད་གསོད་བྱེད་སྤྲུལ་པར་བཅས༔ ཕྱོགས་བཅུར་དབང་དང་ཕྱོགས་སྐྱོང་འདུལ༔ དབང་བཅུ་ཡོངས་རྫོགས་དངོས་གྲུབ་སྩོལ༔ དཔལ་ཆེན་སྐུ་གསུང་ཐུགས་ལས་འཁྲུངས༔ ཁྲོ་རྒྱལ་འབུམ་བས་མཐུ་སྟོབས་འཕགས༔ ཁྲོ་རྒྱལ་ཀུན་འདུས་ཀཱི་ལ་ཡ༔ ཁམས་གསུམ་ཡོངས་སྒྲོལ་དངོས་གྲུབ་སྩོལ༔ གསེར་དངུལ་ཟངས་ལྕགས་ལྷ་ཕུར་བཞི༔ བསྙེན་ཅིང་བསྒྲུབ་པའི་ལྷ་ལགས་ཀྱིས༔ ཞི་རྒྱས་དབང་དྲག་དངོས་གྲུབ་སྩོལ༔ དཔལ་གྱི་བཀའ་ཉན་སྒྲུབ་མཆོག་སྐྱོང་༔ ཤྭ་ན་བདག་ཉིད་ས་ [29a] བདག་བཞི༔ ཚེ་དབང་ལོངས་སྤྱོད་གྲུབ་རྟགས་རྣམས༔ མཐུ་བྱིན་དྲེགས་པའི་དངོས་གྲུབ་སྩོལ༔ བསེ་ལྕགས་དུང་གསུམ་སྐྱེས་བུ་གིང་༔ མ་བདུན་སྲིང་བཞི་དབང་ཕྱུག་ཚོགས༔ དྲག་རྩལ་དངོས་གྲུབ་རྒྱ་མཚོའི་མཛོད༔ ཕྲིན་ལས་ཡིད་བཞིན་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱ་ཀ་ཙིཏྟ་ཨཱ་ཡུརྫྙཱ་ན་སརྦ་སིདྡྷི་གུ་ཎ་ཕ་ལ་ཧོཿ སིདྡྷི་སིདྡྷི་ཧཱུྃ་ཧཱུྃ་ཨ་ཨ་ཨཱཿཞེས་བརྗོད་ལ་སྒྲུབ་རྟེན་གནས་གསུམ་དུ་གཏུག་ཅིང་དམ་རྫས་རྣམས་ལ་ལོངས་སྤྱོད་ནས། ལྷ་དང་དངོས་གྲུབ་འོད་དུ་ཞུ་བ་བདག་གི་ཐུགས་སྲོག་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་གྱུར་པར་བསམ། འདིར་རྒྱས་པ་དང་ཞི་བའི་སྦྱིན་སྲེག་སོ་སོའི་ཆོ་ག་བཞིན་དུ་བྱ་ཞིང་ཚོགས་ཀྱི་མཆོད་པ་རྒྱ་ཆེར་སྤེལ་ལོ། །བཞི་པ་ནི། སྲེག་འཕང་མནན་པའི་ཆོ་ག་གསུམ་གྱིས་ངན་སྔགས་དྲག་པོའི་ཕྲིན་ལས་ཀྱི་མཇུག་བསྡུ་བ་སྟེ། རྒྱས་པར་སོ་སོའི་གཞུང་དུ་བལྟ་བར་བྱ་ཞིང་། བསྡུས་པར་གཏོར་ཟོར་རྣམས་ཕྱིར་བཏེགས་ལ་ཟོར་ལས་ཀྱིས་དགྲ་ཕྱོགས་སུ་འཕང་། ཚེར་མ་ཅན་གྱི་ཧོམ་གྲུ་གསུམ་པར་མེ་ཉིད་རྡོ་རྗེ་སྲིན་པོའི་ལྷ་ཚོགས་སུ་གསལ་བའི་ཞལ་དུ་སྲེག་ལིང་ཞུན་མར་དང་བཅས་པ་སྤུ་གྲིའི་སྔགས་མཐར་སྲེག་སྔགས་བཏགས་པས་བསྲེག །མནན་ [29b] རྫས་རྣམས་སྒོའི་ཕྱི་རོལ་དུ་དོང་གྲུ་གསུམ་བྲུས་པར་མནན་ལ་རོ་གཡམ་རྒྱ་གྲམ་བྲིས་པས་བཀབ་སྟེ་དམིགས་བྱ་གཤིན་རྗེའི་བཙོན་ཁང་དུ་ཚུད་པའི་སྟེང་དུ་རི་རབ་ཀྱིས་མནན་པར་བསམ་ལ་བྲོ་བརྡུང་གཞུང་བཞིན་དུ་བྱ། གཞན་ཡང་ཞི་བ་ལ་སོགས་པའི་ཕྲིན་ལས་རབ་འབྱམས་གང་གིས་སེམས་ཅན་གང་འདུལ་བ་དེ་དང་དེའི་མོས་བློ་དང་འཚམས་པའི་སྤྱོད་པ་ལ་འཇུག་པར་བྱའོ། །དེ་དག་གིས་དངོས་གཞིའི་ལས་ཀྱི་རིམ་པ་རྣམས་གྲུབ་པ་ཡིན་ནོ། །སྤྱི་དོན་གསུམ་པ་རྗེས་མཐའ་རྒྱས་ཀྱི་བྱ་བས་མཇུག་བསྡུ་བ་ལ་བརྒྱད། གཏོར་མ་གཏང་བ། གཏེར་སྦ་བ། དཀྱིལ་འཁོར་བསྡུ་བ། མཚམས་གྲོལ་བ། རྡུལ་མཚོན་གཤེགས་པ། སྨོན་ལམ་གདབ་བ། ཤིས་པར་བྱ་བ། དགའ་སྟོན་དང་གནས་སྲུང་བའོ། །དང་པོ་ནི། འཇིག་རྟེན་ལས་འདས་པའི་གཏོར་མ་རྣམས་དངོས་གྲུབ་ཀྱི་དོན་དུ་བཞག །དམ་ཅན་ལ་སོགས་པའི་འཕྲལ་གཏོར་རྣམས་རོལ་མོའི་སྒྲ་དང་བཅས་པས་ཡང་ཐོག་ཏུ་ཁྱེར་ལ་ཐ་ཚིག་བསྒྲག་ཅིང་བརྟན་མ་བསྐྱང་སྟེ་ཛ་གད་ཕུད་སྐྱེམས་དང་བཅས་པས་ཀྱང་མཆོད་དོ། །གཉིས་པ་གཏེར་སྦ་བ་ནི། རིན་པོ་ཆེའམ་རྫའི་བུམ་པར་ལྔ་ཚན་ལྔ་དང་འབྲུ་སྨན་རིན་ཆེན་རྟེན་གཏོར་དངོས་གྲུབ་ཀྱི་རྫས་ལ་སོགས་པས་གཏམས་ཏེ་ཁ་དམ་པར་བཅད་ནས་རིགས་ལྔའི་ཕྱག་མཚན་བྲིས་པ་ཐོགས་ལ། ཏྲཱཾ་ལས་རིན་པོ་ཆེའི་མཆོད་སྡོང་དགོས་འདོད་ཐམས་ཅད་འབྱུང་བའི་གཏེར་དུ་གྱུར་པར་བསམ་ཞིང་། ཨོཾ་ཨཱཿཧཱུྃ། ལན་གསུམ་གྱིས་ [30a] བྱིན་རླབས་ཏེ། ཧཱུྃ༔ ཆོས་ཉིད་བདེན་པའི་བྱིན་རླབས་ཀྱིས༔ ས་ཡི་ལྷ་མོ་མཁའ་ཕྱེ་ཅིག༔ དབང་ཆེན་ཡུམ་ལྔའི་མཁའ་ཀློང་དུ༔ སྒྲུབ་པ་ལས་ཀྱི་གཏེར་སྦའོ༔ དཔལ་ཆེན་ཡབ་ཡུམ་གཏེར་སྦའོ༔ ཁྲོ་རྒྱལ་ཡབ་ཡུམ་གཏེར་སྦའོ༔ ཁྲ་ཐབས་ཡབ་ཡུམ་གཏེར་སྦའོ༔ སྲས་མཆོག་ཕུར་པའི་གཏེར་སྦའོ༔ དམ་ཅན་ཚོགས་ཀྱི་གཏེར་སྦའོ༔ དམ་རྫས་གཏོར་མའི་གཏེར་སྦའོ༔ གཏེར་ཆེན་སྦས་པའི་བྱིན་རླབས་ཀྱིས༔ རྣལ་འབྱོར་བདག་ཅག་འཁོར་བཅས་རྣམས༔ ནམ་ཞིག་འཆི་བའི་དུས་བྱུང་ཚེ༔ གཏེར་ཆེན་ཁྱེད་ཀྱིས་མདུན་ནས་བསུ༔ འདོད་ཡོན་ལྔ་ལ་ལོངས་སྤྱོད་ཤོག༔ ཡེ་ཤེས་ལྷ་ཡིས་བར་སྣ་དྲོངས༔ ཕྲ་མེན་ཚོགས་ཀྱིས་གཡས་གཡོན་སྐྱོར༔ འཁོར་གྱི་མ་ཚོགས་རྒྱབ་ནས་སྐྱོབས༔ བཅུ་གསུམ་ས་ལ་བགྲོད་པར་ཤོག༔ ཞེས་སྒྲུབ་ཁང་གི་ཕུག་སོགས་ཕྱོགས་གང་བདེར་སྦ་ཞིང་ཤིས་བརྗོད་ཀྱི་མེ་ཏོག་འཐོར་རོ། །གསུམ་པ་དཀྱིལ་འཁོར་བསྡུ་བ་ནི། གཏང་རག་གི་དོན་དུ་དཀྱིལ་འཁོར་གྱི་འཁོར་ལོ་ལ་ཕྱག་སྔོན་དུ་འགྲོ་བས་ཕྱི་ནང་གི་མཆོད་པ་འབུལ་ཞིང་བསྟོད་པ་བྱས་ལ་ནོངས་པ་བཟོད་པར་གསོལ། དེ་ནས་མངོན་པར་འདོད་པའི་དོན་གྲུབ་ [30b] པར་གསོལ་བ་གདབ་པ་ནི། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །ཅེས་སོགས་དང་། བཛྲ་མུཿས། རང་བཞིན་ཡེ་ཤེས་ཀྱི་འཁོར་ལོ་ཆོས་ཀྱི་དབྱིངས་སུ་གཤེགས། རྣམ་པ་དམ་ཚིག་གི་དཀྱིལ་འཁོར་ལས་བྱང་བཞིན་ཉེར་བསྡུ་བྱས་ཏེ་རྒྱུན་གྱི་ཏིང་ངེ་འཛིན་ལ་འཇུག་གོ །བཞི་པ་མཚམས་དགྲོལ་བ་ནི། ཕྱི་རོལ་གྱི་ཤར་ལ་སོགས་པར་སྔར་བཞིན་སོང་སྟེ་རྒྱལ་ཆེན་བཞི་དང་སྒོ་ཕྱི་ནང་གི་ཁྲོ་བོ་གཉིས་རྣམས་ལ་མཆོད་ཅིང་བསྟོད་ནས་ཡེ་ཤེས་པ་སྐུ་གཟུགས་ཀྱི་བྱང་བུ་རྣམས་ལ་བསྟིམས་ཏེ་ལྷག་གནས་ཀྱི་མེ་ཏོག་འཐོར། ནང་དུ་ཞུགས་ལ་ཧཱུྃ་མཛད་ཀྱི་རྒྱ་དང་ལྡན་པས་སུམྦྷ་ནི་བརྗོད་ཅིང་ཕུར་བུ་རྣམས་དང་པོར་གདབ་རིམ་ལས་ལྡོག་ཕྱོགས་སུ་ཕྱུངས་ཏེ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་སརྦ་ཨརྠ་སྰ་དྷ་ནི་སྭཱ་ཧཱ། ཞེས་བཟླས་པའི་འོ་མས་ཕུར་རྩེ་བཀྲུ་ཞིང་ཁུང་བུར་ཡང་འཐོར། ལྷ་རྣམས་ཀྱང་གཤེགས་ལ་ཁུང་བུ་དགང་ངོ་། །ལྔ་པ་རྡུལ་ཚོན་བསྡུ་ཞིང་གཤེགས་པ་ནི། ཆོས་ཐམས་ཅད་སྐྱེ་བ་མེད་པའི་དོན་ཡིད་ལ་བྱས་ཏེ་ཨ་ཀཱ་རོ་བརྗོད་བཞིན་པས་གཡས་པའི་རྡོ་རྗེས་ཤར་གྱི་ཚངས་ཐིག་གི་ལམ་ནས་གཙོ་བོའི་གནས་ཀྱི་བར་དབྱི་ཞིང་ལྷག་མ་རྣམས་རྗེས་མི་མངོན་པར་འཕྱག་ལ། དོན་དུ་གཉེར་བ་རྣམས་ལ་ཅུང་ཟད་བྱིན་ནས་གཞན་རྣམས་བུམ་པར་བླུགས་ཏེ་བཀུར་སྟི་ཆེན་པོས་མཆོད། ཐིག་ཤུལ་དྲི་བཟང་གི་ཆུས་དབྱི། དུས་དེ་ཉིད་དུའམ་གཞན་གྱི་ཚེ་ནའང་རུང་སྟེ་རྡུལ་ཚོན་ཉིད་སློབ་དཔོན་སློབ་ [31a] མར་བཅས་པས་བཀྲ་ཤིས་པའི་གླུ་དང་རོལ་མོ་རྣམ་པར་བཀྲ་བའི་ལྟད་མོ་སྣ་ཚོགས་དང་བཅས་པས་རྒྱུན་མི་འཆད་པའི་ཆུ་ཀླུང་ཆེན་པོའི་འགྲམ་དུ་ཁྱེར་ནས། དེར་དྲིའི་མཎྜལ་དཀར་པོ་འདབ་མ་བརྒྱད་པའི་དབུས་དང་པད་འབད་ལ་མེ་ཏོག་གི་ཚོམ་བུ་བཀོད། མཐར་ཉེར་སྤྱོད་དཀར་སྐྱེམས་ལྷ་བཤོས་དང་བཅས་པ་དང་། དེའི་མདུན་རྒྱབ་གང་འོས་ཀྱི་སྟེགས་བུ་མཐོ་བ་ལ་རྡུལ་ཚོན་གྱི་བུམ་པ་བཞུགས་སུ་གསོལ། མཆོད་པ་རྣམས་བྱིན་གྱིས་བརླབས་ནས། རྟེན་བསང་སྦྱང་། སྟོང་པའི་ངང་ལས་བྃ་ལས་བྱུང་བའི་རྒྱ་མཚོ་རིན་པོ་ཆེ་དང་མེ་ཏོག་གིས་གང་བའི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བར་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་རྒྱན་ཐམས་ཅད་ཀྱིས་བརྒྱན་པ་རང་སྣང་གི་ཡུམ་དང་བཅས་པའོ། །སྙིང་གནས་འོད་ཟེར་འཕྲོས་པས་ཀླུ་ཆེན་བརྒྱད་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། འདབ་མ་བརྒྱད་ལ་འཁོད་པ་ནི། སྟོད་ལྷའི་ལུས་ཅན་ཐལ་མོ་སྦྱར་བ། སྦྲུལ་མགོའི་གདེངས་ཀ་དང་ལྡན་པའི་སྨད་སྦྲུལ་མཇུག་ཏུ་འཁྱིལ་ཞིང་དར་དང་རིན་པོ་ཆེའི་རྒྱན་གྱིས་བརྒྱན་པ་འཁོར་དང་བཅས་པར་བལྟས་ལ། ཨོཾ་བཛྲ་སཏྭ་ཨཱཿམ་ཧཱ་ནྰ་ག་ཨ་དྷི་པ་ཏ་ཡེ་ས་པ་རི་ཝཱ་ར་པུཥྤེ་སོགས་ཀྱི་མཆོད། [31b] གདེངས་ཀ་ནོར་བུ་འབར་བའི་འོད་ཟེར་གྱིས། །ས་འོག་མུན་པའི་ཚོགས་རྣམས་རབ་འཇོམས་ཤིང་། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་ཕྱག་འཚལ་བསྟོད། །ཨོཾ་བྷཀྵ་བྷཀྵ་ཨཱ་གཙྪ་ཨཱ་གཙྪ་མ་ཧཱ་ནྰ་ག་ཨ་དྷི་པ་ཏ་ཡེ་སརྦ་བྷུརྦྷུ་ཝ༔ ཕྲུཾ་ཕུ་སྭཱ་ཧཱ། ཞེས་ལན་གསུམ་གྱིས་འོ་ཐུག་གི་གཏོར་མ་ཕུལ་ནས། ཀླུའི་རྒྱལ་པོ་འཁོར་དང་བཅས་པ་རྣམས་ཀྱིས་དེང་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པའི་རྡུལ་ཚོན་རིན་པོ་ཆེའི་རང་བཞིན་འདི་རྣམས་བདག་གིར་མཛད་ནས་མཆོད་པ་དང་། འཇིག་རྟེན་གྱི་ཁམས་སྤྱི་དང་ཁྱད་པར་ས་ཕྱོགས་འདི་དག་ཏུ་བདེ་ལེགས་ཀྱི་དཔལ་ཕུན་སུམ་ཚོགས་པ་འཕེལ་ཞིང་རྒྱས་པར་མཛད་དུ་གསོལ། ཞེས་རྡུལ་ཚོན་གཏད་དེ་ཆུ་ལ་བསྐུར་བ་དེ་རྣམས་ཀྱིས་བཀུར་སྟི་ཆེན་པོས་ས་འོག་གི་གཞིར་སྤྱན་དྲངས་པར་བསམ་ལ། ཨོཾ་མ་ཧཱ་ནྰ་ག་ཨ་དྷི་པ་ཏ་ཡེ་ས་པ་རི་ཝཱ་ར་གཙྪ། ཞེས་པས་ཀླུ་རྣམས་རང་གནས་སུ་གཤེགས། ཛཿཧཱུྃ་བྃ་ཧོཿ ས། རྡོ་རྗེ་སེམས་དཔའ་རང་ལ་བསྟིམ། མཆོད་གཏོར་དང་མཎྜལ་གྱི་ཚོམ་བུ་རྣམས་ཆུར་གཤེགས་ཤིང་རེ་ཁཱ་ཡང་བཀྲུ། གང་དུ་རྡུལ་ཚོན་བླུགས་པའི་བུམ་པ་དེ་ཆུས་བཀང་ནས་སྔར་བཞིན་ཁྱེར་ཏེ་ཞི་བའི་ཕྱིར་དཀྱིལ་འཁོར་གྱི་ཁང་པ་ལ་ [32a] སོགས་པར་བསང་གཏོར་བྱའོ། །དྲུག་པ་སྨོན་ལམ་གདབ་པ་ནི། སློབ་དཔོན་འདུས་པར་བཅས་པ་རྣམས་ཀྱི་ལག་བསྣོལ་བས་སྲིན་ལག་སྦྲེལ་ཏེ་གཡོན་པས་མར་མེ་ཐོགས། རྒྱལ་ཚབ་པས་གཏོང་ཐུན་གྱིས་དྲངས་པའི་དབྱངས་སྙན་པོས། ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ རྡོ་རྗེ་སློབ་དཔོན་གཉན་གྱིས་དབུ་བཟུང་ནས༔ རྒྱལ་བའི་གདུང་འཚོབ་མཆེད་དང་ལྕམ་དྲལ་རྣམས༔ ནམ་ཞིག་བྱང་ཆུབ་ལམ་དུ་ཞུགས་པའི་ཚེ༔ དམྱལ་བའི་ཟངས་ཁར་ནམ་ཡང་མི་སྐྱེ་ཞིང་༔ གཅན་གཟན་གདུག་པའི་སྒྲ་སྐད་མི་ཐོས་ཤིང་༔ བག་ཆགས་ངན་པའི་ནད་རོ་མི་ལྡང་བར༔ རིགས་དྲུག་འཁོར་བའི་སྡུག་བསྔལ་འབྱུང་མི་འགྱུར༔ མཚོན་རྣོན་གདུག་པའི་དབལ་གྱིས་མི་ཕོག་ཤོག༔ དགེ་བའི་བཤེས་གཉེན་བཀའ་དྲིན་ཆེ་བ་དང་༔ དམ་ཚིག་གཅིག་པའི་རྡོ་རྗེའི་མཆེད་གྲོགས་རྣམས༔ ཐབས་དང་ཤེས་རབ་འབྲེལ་བའི་གཟུངས་མ་གསུམ༔ ཚེ་རབས་འདི་ནས་སྐྱེ་བ་ཐམས་ཅད་དུ༔ མི་འབྲལ་འགྲོགས་པའི་ཏིང་འཛིན་རྩེ་གཅིག་གིས༔ ས་བཅུའི་ཁྱད་པར་རིམ་གྱིས་བགྲོད་པར་ཤོག༔ ནམ་ཞིག་ཚེ་འཕོས་འཆི་བའི་དུས་བྱུང་ཚེ༔ གཏི་ [32b] མུག་མུན་པའི་གླིང་དུ་འཁྱམས་གྱུར་ཅིང་༔ འཁོར་བའི་གཡང་ས་ཆེན་པོར་ལྟུང་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ སེམས་ཅན་ལས་ཀྱིས་མནར་བའི་སྡུག་བསྔལ་གྱིས༔ དམྱལ་བའི་ཟངས་ཁར་ནང་དུ་ལྟུང་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ང་རྒྱལ་ཁྲོ་གཏུམ་ཁེངས་པའི་སྡུག་བསྔལ་གྱིས༔ གཅན་གཟན་གདུག་པའི་སྒྲ་སྐད་ཐོས་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ འདོད་ཆགས་འཛིན་པ་ལས་ཀྱི་སྡུག་བསྔལ་གྱིས༔ གཅོང་རོང་ཟབ་མོའི་ནང་དུ་སྐྱེ་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ཕྲག་དོན་ཟུག་རྔུ་ལས་ཀྱི་སྡུག་བསྔལ་གྱིས༔ མི་བཟད་ [33a] མཚོན་ཆའི་དབལ་གྱིས་ཕོག་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས་༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ནམ་ཞིག་ས་དང་ལམ་གྱི་ཡོན་ཏན་རྫོགས༔ སྟོབས་བཅུའི་ཡོན་ཏན་ཉེ་བར་གྱུར་པའི་ཚེ༔ ཐུགས་རྗེ་གསལ་བའི་མར་མེ་དེར་སྣང་ནས་༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ས་བཅུའི་ཁྱད་པར་རིམ་གྱིས་བགྲོད་པའི་ཚེ༔ ཉོན་མོངས་བག་ཆགས་མ་ལུས་བྱང་གྱུར་ནས༔ ཕ་རོལ་ཕྱིན་དྲུག་འགྲོ་དོན་དཔག་མེད་ཅིང་༔ ས་བཅུའི་རྒྱུན་མཐར་གཅིག་ཆར་རྫོགས་གྱུར་ཅིག༔ ས་བཅུའི་ཁྱད་པར་རྩེ་མོར་ཕྱིན་པའི་ཚེ༔ བྱང་ཆུབ་སེམས་དཔའ་རྣམས་ཀྱིས་མདུན་བསུས་ཤིག༔ བྱང་ཆུབ་སེམས་མ་རྣམས་ཀྱིས་མཐའ་སྐྱོངས་ཤིག༔ ཁྲོ་བ་ཁྲོ་མོ་རྣམས་ཀྱིས་རྒྱབ་བརྟེན་ཅིག༔ འགྱུར་མེད་རྡོ་རྗེའི་ས་ལ་ཕྱིན་པར་ཤོག༔ ཀུན་ཏུ་འོད་ཀྱིས་ལ་ཕྱིན་པའི་ཚེ༔ ཡི་དམ་ལྷ་ཚོགས་རྣམས་ཀྱིས་མདུན་བསུས་ཤིག༔ བཀྲ་ཤིས་ལྷ་མོ་བརྒྱད་ཀྱིས་ [33b] མཐའ་སྐྱོངས་ཤིག༔ ཡེ་ཤེས་ཁྲོ་བོ་རྣམས་ཀྱིས་རྒྱབ་བརྟེན་ཅིག༔ རྡོ་རྗེ་ལྟ་བུའི་ཏིང་འཛིན་ཐོབ་པར་ཤོག༔ རྡོ་རྗེ་འཛིན་པའི་ས་ལ་ཕྱིན་པའི་ཚེ༔ སྔོན་ནས་འབྲེལ་བའི་ལྷ་ཡིས་མདུན་བསུས་ཤིག་༔ མཁའ་སྤྱོད་རིག་འཛིན་རྣམས་ཀྱིས་མཐའ་སྐྱོངས་ཤིག༔ སྤྲུལ་པའི་དཀྱིལ་འཁོར་རྣམས་ཀྱིས་རྒྱབ་བརྟེན་ཅིག༔ ཡང་དག་རྡོ་རྗེའི་ལམ་མཆོག་ཐོབ་པར་ཤོག༔ འཁོར་ལོ་ཚོགས་ཆེན་ས་ལ་ཕྱིན་པའི་ཚེ༔ འདས་པའི་སངས་རྒྱས་རྣམས་ཀྱིས་མདུན་བསུས་ཤིག༔ ད་ལྟར་བཞུགས་པ་རྣམས་ཀྱིས་མཐའ་སྐྱོངས་ཤིག་༔ སླད་ནས་འབྱོན་པ་རྣམས་ཀྱིས་རྒྱབ་སྐྱོར་ཅིག༔ ཡང་དག་རྡོ་རྗེའི་ས་ལ་ཕྱིན་པར་ཤོག༔ ཡེ་ཤེས་བླ་མའི་ས་ལ་ཕྱིན་པའི་ཚེ༔ ཀརྨ་ཧེ་རུ་ཀ་ཡིས་མདུན་བསུས་ཤིག༔ རང་བྱུང་ཁྲོ་རྒྱལ་རྣམས་ཀྱིས་མཐའ་སྐྱོངས་ཤིག༔ དཀྱིལ་འཁོར་ལྷ་ཚོགས་རྣམས་ཀྱིས་རྒྱབ་བརྟེན་ཅིག༔ སྐུ་གསུམ་ཡེ་ཤེས་ལྔ་ལྡན་ཐོབ་པར་ཤོག༔ རང་སྣང་དག་པའི་དཀྱིལ་འཁོར་དེར་གྲུབ་ཚེ༔ ཉིད་ལས་མི་གཞན་དག་པའི་འཁོར་རྣམས་ལ༔ མི་དམིགས་དགོངས་རྒྱུད་ [34a] དག་པའི་དཀྱིལ་འཁོར་གྱིས༔ ཏིང་འཛིན་ཆོས་ཀྱི་འཁོར་ལོ་བསྐོར་བར་ཤོག༔ སྤྲོས་མེད་དག་པའི་དཀྱིལ་འཁོར་དེ་ཉིད་ནས༔ གཟུགས་སྐུ་གཉིས་ཀྱིས་འགྲོ་བའི་དཔལ་ཤར་ཚེ༔ གང་འདུལ་འགྲོ་བའི་དོན་རྣམས་ཡོངས་རྫོགས་ཏེ༔ ཁམས་གསུམ་འཁོར་བ་དོང་ནས་སྤྲུགས་པར་ཤོག༔ ཅེས་འདུས་པ་ཀུན་གྱིས་རྗེས་ཟློས་དང་བཅས་སྨོན་ལམ་ནན་ཏན་དུ་གདབ་ཅིང་དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོའོ། །བདུན་པ་ཤིས་པ་བརྗོད་པ་ནི། ལས་བྱང་ནས་འབྱུང་བས་མཚོན་ཤིས་པ་བརྗོད་པའི་ཚོགས་རྒྱ་ཆེར་སྤེལ་ཞིང་བཀྲ་ཤིས་ཀྱི་མེ་ཏོག་ཆར་དུ་བསྙིལ་བར་བྱའོ། །བརྒྱད་པ་དགའ་སྟོན་དང་གནས་སྲུང་བ་ནི། སླར་ཡང་ཞག་ལྔའམ་གསུམ་ལ་སོགས་པར་བཟའ་བཅའ་མྱང་བ་ལྡག་པ་དང་ཆང་ལ་སོགས་པའི་ལོངས་སྤྱོད་ཆེན་པོ་དང་ལྡན་པས་སྐྱེ་བོ་དམ་པའི་འདུས་པ་དང་དགའ་སྟོན་རྒྱ་ཆེན་པོར་བྱ་ཞིང་། བཀྲ་ཤིས་ཀྱི་ཆོ་གས་ཕྱོགས་ཐམས་ཅད་དུ་དགེ་ལེགས་ཀྱི་སྣང་བ་ཆེན་པོས་ཡོངས་སུ་ཁྱབ་པར་བྱའོ། །ཞར་བྱུང་འཕྲོས་དོན་དུ་མོས་སློབ་ཀྱི་སྒྲུབ་ཆེན་འདྲ་འབག་ཙམ་ཡང་མི་ལྕོགས་པས་སྒྲུབ་མཆོད་སྤྱི་འགྲོ་ལྟར་བྱེད་པར་འདོད་ན། ནུབ་དང་པོ་ས་ཆོག་གི་ས་བཟུང་བ་ཡན་ཆད་སྔར་བཞིན་ལས། ས་བསྲུང་གི་ཚེ་ནང་མཚམས་ནས་འབྱུང་བ་ལྟར་ཕྱོགས་སྐྱོང་ཕུར་གདབ་རྣམས་བྱས་ལ་ཆག་ཆག་གདབ་ཅིང་ [34b] ཐིག་དང་ཚོན་གྱི་དཀྱིལ་འཁོར་བྲི། ནུབ་གཉིས་པ་ལ་ཕུར་བུ་བྱིན་གྱིས་བརླབས་ནས་ཕུར་ཁྲོམ་སྒྲུབ་རྫས་མཆོད་གཏོར་དཀྱིལ་འཁོར་གྱི་རྒྱན་སོགས་སྡེབས་འགོད་བྱས་ཏེ་སྔགས་རྒྱས་སྤེལ་བའི་བར་ཙམ་བྱའོ། །དེ་ནས་སྒྲུབ་མཆོད་དངོས་གཞི་ཞག་གྲངས་ཇི་ཙམ་བྱེད་ཀྱི་བར་ཉིན་རེ་བཞིན་ལས་བྱང་གི་གཞུང་སྲོང་ལུགས་འདྲ་བ་ལས། ཐུན་བཞིའི་ངེས་པ་མི་དགོས་ཤིང་། འགྲུབ་ན་བདག་འཇུག་རེ་ལེན། ནུབ་ཐ་མར་དངོས་གྲུབ་ལེན་པ་དང་། ལྕོགས་ན་སྦྱིན་སྲེག་བྱ། དཀྱིལ་འཁོར་བསྡུ་བ་དང་། ཕུར་བུ་ཕྱུང་ལ་རྡུལ་ཚོན་དབྱི་ཞིང་ཆུ་བོར་དོར་བ་རྣམས་ལྷག་པོར་བསྒྲུབ་པ་སྟེ། འདོར་ལེན་གྱི་དམིགས་ཕྱེད་པར་བྱ་བ་ཡིན་ནོ། །སྤྱི་དོན་གསུམ་པ་དེ་ལྟར་བསྒྲུབས་པའི་འབྲས་བུ་ནི། བདག་དོན་སྒྲུབ་གཞུང་ལས། དེ་ལྟར་ཉམས་སུ་བླངས་པས་མཆོག་ཐུན་མོང་གི་དངོས་གྲུབ་ཡོངས་རྫོགས་སུ་ཐོབ་ནས༔ ཕྲིན་ལས་རྣམ་བཞི་རྩོལ་མེད་ལྷུན་གྲུབ་སྟེ༔ འགྲོ་དོན་རྒྱ་ཆེན་པོ་འབྱུང་ངོ་༔ དགྲ་བགེགས་རང་བཞིན་གྱིས་ཐུལ་ལོ༔ ཕྱི་མ་ཕྱག་རྒྱ་ཆེན་པོ་མཆོག་གྲུབ་རིག་འཛིན་ལྷུན་གྱིས་གྲུབ་པར་འགྱུར་ངེས་སོ༔ ཞེས་དང་། སྔགས་ཀྱི་དངོས་གྲུབ་ཅི་འདོད་སྟེར༔ རིག་འཛིན་རྣམ་བཞི་གང་བསྒྲུབ་འགྲུབ༔ ཚེ་དབང་བསོད་ནམས་དབང་ཐང་འཕེལ༔ འབྱོར་པ་ཀུན་རྫོགས་ལོངས་སྤྱོད་ལྡན༔ ལྷ་སྲིན་ཀུན་གྱི་རྗེ་བཞིན་འཁུར༔ དགྲ་བགེགས་ཀུན་ཀྱང་གཞོབ་བཞིན་འདུལ༔ བསྟན་པ་ཀུན་ཀྱང་དར་ཞིང་རྒྱས༔ དམ་ཚིག་འདི་དག་གཙོར་ [35a] ལེན་ན༔ འགྲུབ་པར་འགྱུར་ཏེ་གདོན་མི་ཟ༔ ཞེས་གསུངས་ཤིང་། ཁྱད་པར་ཕུར་པ་མཁན་པོ། བཀྲ་ཤིས། དཔལ་ཆེ། ཚེ་རིང་། ནོར་ཕྱུག །འཁོར་རྒྱས། སྲིད་འཕེལ། མཐུ་ཆེ། མཐའ་བཙན་པ་སྟེ་ཡོན་ཏན་བརྒྱད་དང་ལྡན་པར་གསུངས་པ་སོགས་ཕུར་པ་རོལ་པའི་བསྐྱེད་རྫོགས་ཀྱི་རྣལ་འབྱོར་ལ་བརྩོན་པའི་ཕན་ཡོན་བསམ་གྱིས་མི་ཁྱབ་ཅིང་། སྒྲུབ་ཆེན་འདི་ལྟ་བུ་ནི་འཁོར་ཚོམ་བུ་དང་བཅས་པ་བཙན་ཐབས་སུ་འཚང་རྒྱ་བའི་ཐབས་མཁས་རྨད་དུ་བྱུང་བའི་གསེང་ལམ་ཡིན་པས་མཐོང་ཐོས་དྲན་རེག་ཙམ་གྱིས་འབྲེལ་བ་ཐམས་ཅད་ཀྱང་སྐལ་བ་དང་འཚམས་པར་རིག་པ་འཛིན་པའི་ས་ལ་དབུགས་ཆེན་འབྱིན་པར་འགྱུར་བ་ནི་ནམ་ཡང་མི་བསླུ་བའི་ཚད་མ་ཉིད་དུ་ངེས་པའོ། །ཕྲིན་ལས་རོལ་པའི་དཀྱིལ་འཁོར་འཁོར་ལོ་གང་། །ཚོམ་བུ་ཚོགས་སུ་སྒྲུབ་པའི་ལས་ཀྱི་ཁྲིགས། །རྒྱུད་ཀྱི་གཞུང་དང་གྲུབ་པའི་མན་ངག་གནད། །ཇི་བཞིན་མ་ནོར་བསྡེབས་འདི་འཇུག་བདེའི་དཔྱིད། །ཅུང་ཞིག་འབད་པའི་བསོད་ནམས་གང་ཐོབ་པ། །བསྟན་དང་འགྲོ་བའི་ཉེར་འཚོའི་གཞིར་གྱུར་ནས། །ཕུར་བུ་གྲུབ་པས་ལྗོངས་ཀུན་ལེགས་གཏམས་ཏེ། །འགྲོ་འདུལ་ཕྲིན་ལས་རྟག་ཁྱབ་དཔལ་འབར་ཤོག །དེ་ལྟར་དཔལ་རྡོ་རྗེ་ཕུར་བུ་ཡང་གསང་སྲོག་གི་སྤུ་གྲིའི་སྒྲུབ་ཆེན་གྱི་ཁོག་དབུབ་དངོས་གྲུབ་འདོད་པ་འཇོ་བའི་ཟ་མ་ཏོག་ཅེས་བྱ་བ་འདི་ནི། གསང་ཆེན་བསྟན་པའི་རྩ་ལག་ལྷ་ལུང་ཐེག་མཆོག་རབ་རྒྱས་གླིང་དུ་འདི་ཉིད་ཀྱི་སྒྲུབ་རྒྱུན་གསར་ [35b] འཛུག་མཛད་པའི་ཆ་རྐྱེན་དུ་འཇུག་པ་བདེ་བའི་ཆོག་ཁྲིགས་འདི་ལྟ་བུ་ཞིག་གྱིས་ཞེས་རྣམ་འདྲེན་གསུང་སྤྲུལ་བཅུ་པ་པདྨ་ངག་དབང་ཆོས་ཀྱི་རྒྱལ་མཚན་གང་གི་བཀའ་སྩལ་རིན་པོ་ཆེའི་ཅོད་པན་སྤྱི་བོའི་རྒྱན་དུ་མཆོད་པར་བྱ་བའི་ཕྱིར། སྤུ་གྲི་རྩ་བའི་སྒྲུབ་འབུམ་ཆེན་མོ་དང་རང་དོན་བྱང་ཆུབ་སྒྲུབ་པ་དབང་གི་མདོ་བྱང་གལ་འགག་ལས་བཀོལ་དང་བཅས་པའི་དགོངས་པ་མ་འཁྲུལ་བར་མན་ངག་ཁྲིགས་བསྡེབས་ཀྱིས་གཏན་ལ་ཕབ་ཅིང་། མཁས་ཤིང་གྲུབ་པ་བརྙེས་པའི་རྡོ་རྗེ་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲང་སྟེ་དཀྱུས་ཀྱི་ལག་ལེན་རྣམ་གསལ་བཀླག་ཆོག་གི་ཚུལ་དུ་བྱས་ཏེ། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་ཞེ་དགུར་སོན་པ་དགའ་བའི་ལོ་ཁྲུམས་སྟོད་ཉ་བའི་ཤེར་ཕྱོགས་ཀྱི་ཚེས་བཅུ་ལ། ཡུལ་གངས་ཅན་གྱི་རྡོ་རྗེ་གདན་ར་ས་འཕྲུལ་སྣང་གི་གྲོང་ཁྱེར་ཕྱོགས་ལས་རྣམ་པར་རྒྱལ་བའི་འདུན་ས་ཆེན་པོར་སྦྱར་བ་ལས། ཐོག་མའི་གླེགས་བམ་དུ་འབེབས་པ་པོ་ནི་རིག་བྱེད་སྨྲ་བའི་སློབ་དཔོན་ནོར་བུ་དབང་རྒྱལ་གྱིས་བགྱིས་པའོ། །འདིས་ཀྱང་དངོས་གྲུབ་རྣམ་གཉིས་རང་དབང་དུ་སྤྱོད་པས་སྲིད་པ་ཐམས་ཅད་རྡོ་རྗེ་ཕུར་བུ་འགྲུབ་པའི་རྒྱུར་གྱུར་ཅིག།། །།སརྦ་དཱ་མངྒ་ལཾ།། །།