DJYD-KABUM-09-TA-001: Difference between revisions

From Dudjom Wiki
DJYD-KABUM-09-TA-001
(Imported new text files with Wyckibaat for processing)
 
m (Text replacement - "ཨེ་མ་ ཧོཿ" to "ཨེ་མ་ཧོཿ")
 
(31 intermediate revisions by 2 users not shown)
Line 1: Line 1:
༄༅།  །མཆོག་གཏེར་རྫོགས་ཆེན་སྡེ་གསུམ་གྱི་དབང་
{{Text
  བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་
|classification=Tibetan Publications
བཟང་རིག་འཛིན་བླ་མའི་དགོངས་རྒྱན་
|subclass=Tibetan Texts
ཅེས་བྱ་བ་བཞུགས་སོ།།   །།
|fulltitletib=མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན།
|fulltitle=mchog gter rdzogs chen sde gsum gyi dbang bskur yongs rdzogs khrigs su bsdebs pa kun bzang rig 'dzin bla ma'i dgongs rgyan
|citation=[[Dudjom Rinpoche]] 'Jigs bral ye shes rdo rje. ''Mchog gter rdzogs chen sde gsum gyi dbang bskur yongs rdzogs khrigs su bsdebs pa kun bzang rig 'dzin bla ma'i dgongs rgyan''. In ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 9: 1-295. Kalimpong: Dupjung Lama, 1979-1985.
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|collectiontitle=bdud 'joms rin po che bka' 'bum
|author=Dudjom Rinpoche
|sourcerevealer=mchog gyur gling pa
|tibgenre=Empowerment Ritual - dbang chog - dbang skur
|terma=Yes
|cycle=dam chos rdzogs pa chen po sde gsum
|cycletib=དམ་ཆོས་རྫོགས་པ་ཆེན་པོ་སྡེ་གསུམ་
|language=Tibetan
|volumenumber=09
|volnumtib=༩
|volyigtib=ཏ་
|totalvolumes=25
|textnuminvol=001
|pagenumbers=1-295
|totalpages=295
|beginfolioline=1a1
|endfolioline=148a4
|totalfolios=148
|multivolumework=No
|rectonotes=dbang chog
|versonotes=mchog gling sde gsum
|colophontib=།དེ་ལྟར་མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་དཀྱུས་གཅིག་ཏུ་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ་འདིའང་།  གསང་འཛིན་ཁྱབ་བདག་བླ་མ་ཨོ་རྒྱན་ཚེ་དབང་མཆོག་གྲུབ་དཔལ་འབར་གྱི་ཞལ་སྔ་ནས་ཟབ་ཆོས་འདིའི་སྨིན་གྲོལ་གྱི་བདུད་རྩི་སྐལ་བཟང་པོའི་དཔྱིད་དུ་ནོས་པའི་སྐབས་རྣམ་གསལ་འཇུག་བདེའི་ངག་ཁྲིགས་འདི་ལྟ་བུ་ཞི་ཅིས་ཀྱང་སྒྲུབ་པར་གྱིས་ཤིག་པའི་བཀའ་ལུང་བཏུད་མར་ཕེབས་པ་བཞིན་རྗེས་སུ་སྒྲུབ་པའི་གཡར་དམ་སྙིང་ལ་བཀོད་ཀྱང་གཞན་རྐྱེན་མི་བཟད་པའི་ཁོལ་པོར་འཕྱན་ཏེ་ཡུན་རིང་པོར་འགྱང་པ་ན།  སླར་ཡང་རྒྱལ་དབང་ཀརྨ་པ་ཀུན་བཟང་རིག་པའི་རྡོ་རྗེའི་བཀའ་ལུང་གིས་རྗེ་བླ་མར་སྙན་བསྐུལ་གནང་བར་མཛད་པ་དང་།  འཁོར་ལོའི་མགོན་པོ་མཁྱེན་བརྩེ་ཆོས་ཀྱི་བློ་གྲོས་དཔལ་བཟང་པོའི་ཞལ་སྔ་ནས་ཀྱང་ལེགས་སོའི་གསུང་གིས་དབུགས་དབྱུང་ཐོབ་པ་ལ་བརྟེན་ནས།  རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་ལྔ་བཅུ་ང་དགུར་སོན་པ་དགེ་བྱེད་ཆུ་ཕོ་སྟག་གི་ལོ་འབྲས་བུ་བཅུད་དུ་སྨིན་པའི་དུས་ཀྱི་ཆར་རི་བོས་རིན་ཆེན་སྤུངས་པའི་མགུལ་ཀུན་ཏུ་བཟང་པོའི་ནགས་ཁྲོད་ཉམས་དགའ་བའི་གནས་སུ་གྲུབ་པར་སྤེལ་བའི་ཟིན་བྲིས་ལས།  ཐོག་མའི་གླེགས་བམ་དུ་འབེབས་པ་པོ་ནི་ལྷོ་མོན་ཤིང་ལོའི་ཚལ་གྱི་སྔགས་སྟོན་ཆོས་གྲགས་རྒྱ་མཚོས་བགྱིས་པའོ།  །འདིས་ཀྱང་མཆོག་གཏེར་སྙིང་པོའི་རིང་ལུགས་ཕྱོགས་ཐམས་ཅད་དུ་དར་ཞིང་རྒྱས་ལ་མི་ནུབ་ཡུན་དུ་གནས་པའི་རྒྱུར་གྱུར་ཅིག  །།སརྦ་དཱ་མངྒལཾ།།
|colophonwylie=de ltar mchog gter rdzogs chen sde gsum gyi dbang bskur yongs rdzogs dkyus gcig tu khrigs su bsdebs pa kun bzang rig 'dzin bla ma'i dgongs rgyan ces bya ba 'di'ang /___gsang 'dzin khyab bdag bla ma o rgyan tshe dbang mchog grub dpal 'bar gyi zhal snga nas zab chos 'di'i smin grol gyi bdud rtsi skal bzang po'i dpyid du nos pa'i skabs rnam gsal 'jug bde'i ngag khrigs 'di lta bu zhi cis kyang sgrub par gyis shig pa'i bka' lung btud mar phebs pa bzhin rjes su sgrub pa'i g.yar dam snying la bkod kyang gzhan rkyen mi bzad pa'i khol por 'phyan te yun ring por 'gyang pa na/___slar yang rgyal dbang karma pa kun bzang rig pa'i rdo rje'i bka' lung gis rje bla mar snyan bskul gnang bar mdzad pa dang /___'khor lo'i mgon po mkhyen brtse chos kyi blo gros dpal bzang po'i zhal snga nas kyang legs so'i gsung gis dbugs dbyung thob pa la brten nas/___rgyal khams pa 'jigs bral ye shes rdo rjes rang lo lnga bcu nga dgur son pa dge byed chu pho stag gi lo 'bras bu bcud du smin pa'i dus kyi char ri bos rin chen spungs pa'i mgul kun tu bzang po'i nags khrod nyams dga' ba'i gnas su grub par spel ba'i zin bris las/___thog ma'i glegs bam du 'bebs pa po ni lho mon shing lo'i tshal gyi sngags ston chos grags rgya mtshos bgyis pa'o/___/'dis kyang mchog gter snying po'i ring lugs phyogs thams cad du dar zhing rgyas la mi nub yun du gnas pa'i rgyur gyur cig___//sarba dA mang+galaM//
|pdflink=File:DJYD-KABUM-09-TA-001.pdf
|authortib=བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
|sourcerevealertib=མཆོག་གྱུར་གླིང་པ་
|volumeLetter=TA
|InitCategories=Dudjom Tersar Project; DJYD-KABUM-Volume-09-TA
}}
<h1>Tibetan Text</h1>
<onlyinclude>
{{TibP|༄༅།  །མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ་བཞུགས་སོ།།   །།




༄༅།  །མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ།  ཨོཾ་སྭ་སྟི།  ཀ་དག་གཏིང་གསལ་གཞོན་ནུ་བུམ་སྐུའི་ཀློང་།  །ལྷུན་གྲུབ་ཕྱིར་གསལ་སྒྱུ་འཕྲུལ་རྡོ་རྗེའི་སྤྲིན།  །ཐུགས་རྗེ་གང་འདུལ་དེར་སྣང་ཆུ་ཟླའི་གར།  །ཁྱབ་བདག་གདོད་མའི་མགོན་པོ་བླ་མ་རྒྱལ།  །ཐེག་དགུའི་རྩེ་རྒྱལ་ཤིན་ཏུ་རྣལ་འབྱོར་ཆེའི།  །ལམ་སྲོལ་རིང་བརྒྱུད་འཚོལ་ལ་ལྟོས་མིན་པར།  །ཉེ་བརྒྱུད་ཌཱ་ཀིའི་ཞལ་རླངས་མ་ཡལ་བའི།  །སྔོན་མེད་ངོ་མཚར་གསང་མཛོད་འབྱེད་དེར་བསྔགས།  །རིགས་འདུས་པད་འབྱུང་ཞབས་དང་ {{TibChung|[2a]}}  བེེ་རོ་རྗེས།  །མན་ངག་གནད་དུ་དྲིལ་བ་སྡེ་གསུམ་གྱི།  །སྨིན་གྲོལ་འབོགས་པའི་ལག་ཁྲིགས་འཇུག་བདེའི་སྐྱེས།  །སྐལ་བཟང་འདོད་འཇོའི་དགའ་སྟོན་འདི་ན་སྤྲོ།  །དེ་ཡང་མཆོག་གཏེར་རྫོགས་པ་ཆེན་པོ་སྡེ་གསུམ་གྱི་དབང་བསྐུར་ཡོངས་རྫོགས་དཀྱུས་གཅིག་ཏུ་གསལ་བར་བྱེད་པ་ལ།  ཐོག་མར་སྤྱིར་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་ལ་ནང་གསེས་ཐུན་མོང་གཏོར་དབང་དང་།  ཐུན་མིན་ཟབ་དབང་དངོས་བཅས་དབང་སྣ་གཉིས།  ཕྱི་སྐོར་བླ་མ་འགྲོ་འདུལ་སུམ་ཅུ་རྩ་གཅིག་གི་བསྒྲུབ་དབང་།  ཡི་དམ་ཞི་བ་རྡོ་རྗེའི་དབྱིངས་ཀྱི་དབང་བསྐུར།  ཁྲིད་ཀྱི་བྱིན་རླབས་ {{TibChung|[2b]}} ཨ་ཡིག་མདའ་འཕེན་མ་སྟེ།  ཕྱི་སྐོར་སེམས་སྡེ་ལ་དབང་སྣ་གསུམ།  ནང་སྐོར་བླ་མ་རིག་འཛིན་བཅོ་ལྔའི་དབང་།  ཡི་དམ་ཞི་བ་མངོན་རྫོགས་སྟོན་པ་བཅུ་གཉིས་ཀྱི་དབང་།  ཡི་དམ་ཁྲོ་བོ་མངོན་རྫོགས་རྒྱལ་པོ་རྩ་བ་ཡན་ལག་དང་བཅས་པའི་དབང་།  ཁྲིད་ཀྱི་བྱིན་རླབས།  མཁའ་འགྲོ་རོ་ལངས་བདེ་བའི་སྟོབས་ལྡན་མའི་དབང་སྟེ།  ནང་སྐོར་ཀློང་སྡེ་ལ་དབང་སྣ་ལྔ།  གསང་སྐོར་བླ་མ་རིག་འཛིན་ཡོངས་རྫོགས་ཀྱི་དབང་།  ཡི་དམ་ཞི་བའི་དབང་ཁྲོ་བོ་གནས་གྱུར་དང་བཅས་པ།  ཡི་དམ་ཁྲོ་བོ་བཀའ་བརྒྱད་ཀྱི་དབང་།  ཁྲིད་ཀྱི་བྱིན་རླབས་ཏེ།  གསང་སྐོར་མན་ངག་སྡེ་ལ་དབང་སྣ་བཞི།  བཀའ་སྲུང་ཡེ་ཤེས་པ་དབྱིངས་ཕྱུག་མཁའ་འགྲོ་སྡེ་དགུའི་དབང་།  བཀའ་སྲུང་འཇིག་རྟེན་པ་འབར་མ་མེ་གདོང་མའི་སྲོག་གཏད།  རྡོ་རྗེ་གཤོག་རྒོད་མའི་སྲོག་གཏད།  དམ་ཅན་སྐྱེས་བུ་ཆེན་པོའི་སྲོག་གཏད།  གཏེར་སྲུང་ལྷ་བཙན་ཀླུ་གསུམ་གྱི་བཀའ་གཏད་བཅས།  སྲུང་མའི་སྐོར་ལ་དབང་སྣ་ལྔ་སྟེ།  ཁྱོན་དྲིལ་དབང་སྣ་བཅུ་དགུས་སྡེ་གསུམ་ཡོངས་རྫོགས་ཀྱི་སྨིན་བྱེད་ཚང་བར་འགྱུར་བ་ཡིན་ལ།  གསང་སྐོར་ཡི་དམ་ཁྲོ་བོའི་དབང་ཁྲིགས་འཇམ་མགོན་བློ་གྲོས་མཐའ་ཡས་ཀྱི་གསུང་རབ་ཏུ་བཞུགས་པའི་ཕྱིར་འདིར་གསར་སྤྲོས་མ་བགྱིས་པས་ཡིག་ཆ་དེ་ཉིད་འདིར་མེད་ {{TibChung|[3a]}} དུ་མི་རུང་ཞིང་།  བསྐུར་ཚུལ་འོག་ཏུ་སྨོས་པ་ལྟར་དབང་རེ་རེ་བཞིན་སོ་སོར་བཤམ་སྒྲུབ་ཀྱིས་དབང་སྣ་རེ་བཞིན་སྦྱོར་དངོས་རྗེས་ཚང་དུ་སྒྲུབ་པའམ།  ཡང་ན་ཆོ་གའི་ཆིངས་གཅིག་གི་ཁོངས་སུ་དབང་སྒྲུབ་ཇི་ལྟར་རིགས་པ་བྱས་ནས་སྡེབས་སུ་བསྐུར་བའང་རུང་སྟེ་ལོངས་སྐབས་དང་བསྟུན་པས་ཆོག་གོ།  གང་ལྟར་སློབ་དཔོན་རང་ཉིད་སྡེ་གསུམ་རྩ་དཀྱིལ་གང་ཡང་རུང་བའི་བསྙེན་པ་ལས་སུ་རུང་ཞིང་།  དབང་རྫས་ཀྱི་ཡོ་བྱད་དང་ཆོ་གའི་ལག་ལེན་ཕྲ་མོ་ཙམ་ཡང་རས་སུ་མི་བོར་བར་ཚང་ལ་མ་ནོར་བའི་སྒོ་ནས་སློབ་མ་རྗེས་སུ་འཛིན་པ་དང་།  སློབ་བུའང་དམ་ཚིག་ཐུབ་ངེས་པ་ཧ་ཅང་མང་བ་མ་ཡིན་པ་ལས།  ཁྱབ་བརྡལ་དུ་སྤེལ་ན་དཔོན་སློབ་གཉིས་ཀའི་དངོས་གྲུབ་ཀྱི་གེགས་སུ་འགྱུར་བ་ཡིན་པས་ཤིན་ཏུ་གཟབ་པར་གཅེས་སོ།  །རང་གནས་སྐུ་བཞིའི་ཡེ༵་ཤེ༵ས་ཉིད།  །སད་བྱེད་དབང་གི་ཆོ་གའི་ཁྲིགས།  །རྡོ༵་རྗེ༵འི་ཚིག་དོན་མ་འཁྲུལ་བར།  །ལེགས་བཤད་དགོངས་པའི་རྒྱན་དུ་བསྒྲུབ།  །རྫོགས་པ་ཆེན་པོ་སྡེ་གསུམ་གྱི་དབང་གི་ཆོག་ཁྲིགས་སྤྱིའི་ཁོག་ཕུབ་བསྡོམས་ཚིག་བཤད་པའི་ལེ་ཚན་ནོ།།  །།




{{TibChung|[4a]}}  ཨོཾ་སྭསྟི།  །དཀྱིལ་འཁོར་རབ་འབྱམས་སྤྲོ་བསྡུའི་བདག  །རིག་འཛིན་བླ་མའི་ཞབས་པདྨོ།  །ཚངས་བའི་རྒྱན་དུ་རྟག་བཀོད་ནས།  །སྨིན་ལམ་ཟབ་མོའི་སྒོ་འཕར་དབྱེ།  །{{TibChung|རྫོགས་པ་ཆེན་པོ་སྡེ་གསུམ་ལས་ཐོག་མར་སྤྱི་ལ་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་བསྐུར་བ་ལ་གཉིས།  ཐུན་མོང་གི་གདུལ་བྱ་དད་པ་ཅན་རྗེས་སུ་འཛིན་པ་བྱིན་རླབས་སྒོ་འབྱེད་ཀྱི་དབང་དང་།  ཐུན་མོང་མིན་པའི་གདུལ་བྱ་བརྩོན་འགྲུས་ཅན་རྗེས་སུ་འཛིན་པ་ཟབ་དབང་དངོས་བསྐུར་བའོ།  །སྔ་མ་ལ་སྦྱོར་དངོས་རྗེས་གསུམ་གྱི།  དང་པོ་དབང་རྟེན་འདུ་བྱ་ཞིང་དབང་དོན་སྒྲུབ་པའི་ཚུལ་ནི།  སྣོད་བཅུད་ཀྱི་རྟེན་འབྲེལ་ཚོགས་པ་ན་གནས་དུས་དགེ་བར་སྒྲུབ་ཁང་བྱི་དོར་གྱིས་གཙང་ཞིང་མཛེས་པར་བྱས་ལ།  གུང་དུ་སྟེགས་བུའི་དབུས་སུ་རས་བྲིས་ཀྱི་དཀྱིལ་འཁོར་འོད་ལྔའི་ཐིག་ལེ་ཧྲཱིཿཡིག་གིས་མཚན་པ་བྲིས་པའམ།  མཎྜལ་མེ་ཏོག་དཀར་པོའི་ཚོམ་བུ་གཅིག་བཀོད་པའི་སྟེང་དུ་མཉྫིའི་ཁར་དབང་གཏོར་དཔལ་བཤོས་ཕྱག་བཞེས་བཞིན་བཞེངས་པ་སྐུ་ཙཀ་དར་གདུགས་དམར་པོས་སྤྲས་པ་ཅན་བརྟན་པར་འགོད།  དེའི་གཡས་སུ་ཤྲཱི་སེང་གི་སྐུ་འབག  གཡོན་དུ་སྔགས་ཕྲེང་།  མདུན་དུ་རང་བྱུང་གི་ཤེལ་རྡོ།  རྒྱབ་ཏུ་མཆོད་གཏོར་སྨན་རཀ  མཐར་ཆུ་གཉིས་ཉེར་སྤྱོད་ལྔ་བཅས་བཤམ།  སློབ་དཔོན་གྱི་མདུན་དུ་གཡོན་ནས་བརྩམས་ཏེ་ནང་མཆོད།  རྡོ་དྲིལ།  ལས་བུམ།  ཌཱ་མ་རུ།  མེ་ཏོག་གི་སྣོད་བཅས་འགོད།  གཞན་ཡང་སྔོན་གཏོར།  ཚོགས་ཀྱི་ཡོ་བྱད།  ཆོས་སྐྱོང་སྤྱི་དང་གཏེར་སྲུང་གི་གཏོར་འབུལ།  མཆོད་པའི་མཎྜལ།  གུལ་ཡུངས་ {{TibChung|[4b]}} འབེབས་རྫས་སོགས་ཉེ་བར་མཁོ་བའི་ཡོ་བྱད་མཐའ་དག་ཚོགས་པར་འདུ་བྱས་ལ།  དབང་དོན་སྒྲུབ་མཆོད་ཀྱི་ཐོག་མར་ཚིག་བདུན་དང་བརྒྱུད་འདེབས་སྔོན་དུ་འགྲོ་བས།  བསང་ཆུ་བྱིན་རླབས་དང་དཀར་གཏོར་བསྔོ་བ་ཟུར་བྱང་ལྟར་སྦྱར།  ཕྱི་སྐོར་བླ་མའི་བསྐྱེད་རིམ་བྱང་བུ་ཁྲིགས་སྡེབས་ཀྱི་དབུ་ནས་བརྩ་མ་བྱིན་རླབས་བྱང་བུ་ཡན་མཐར་ཆགས་སུ་བཏང་།  དེ་ནས་བགེགས་གཏོར་ཟུར་བྱང་ལྟར་བཏང་རྗེས།  གཞུང་གི་མཆོད་བརླབས་བྱང་བུའི་མཚམས།  བླ་མའི་བསྐྱེད་རིམ་བསྒོམ་པ་ལ།  །ཏིང་འཛིན་རྣམ་གསུམ་ནས།}}  དགོངས་ཀློང་མཁར༔  རྒྱུ་ཡི་ས་བོན་ཧྲཱིཿ  ཡིག་ལས༔  ཅིར་ཡང་བསྒྱུར་བའི་རིག་འཛིན་གསལ༔    འབྱུང་བཞི་རྣམ་དག་གཞལ་ཡས་ཁང་༔    ཆོས་འཁོར་ཚུལ་གྱི་དཀྱིལ་འཁོར་དབུས༔    དུག་གསུམ་དག་པའི་གདན་སྟེང་དུ༔    རྒྱལ་ཀུན་གསང་གསུམ་འདུས་པའི་སྐུ༔    ཤྲཱི་སེངྷ་དཀར་སྨུག་མདོག༔    གྲུབ་པའི་ཆ་ལུགས་རྡོ་དྲིལ་འཛིན༔    རིན་ཆེན་དར་སྟག་རུས་པས་བརྒྱན༔    ཡུམ་དམར་གྲི་ཐོད་འཛིན་འཁྱུད་བསྒོམ༔    མ་བཅོས་གསལ་རྫོགས་{{TibChung|སོགས་ནས།  དབང་བསྐུར་འགུགས་བསྟིམ་བྱང་བུ་ནས་བསྟོད་པའི་བར་དུ་བཏང་།  བདག་མདུན་ཆིག་རྫོགས་རང་བཞིན་ཡོངས་གྲུབ་ཆེན་པོའི་དགོངས་པ་སྲོག་ཏུ་བཟུང་ལ།}} བླ་མའི་ཐུགས་དབུས་ཟླ་དཀྱིལ་སྟེང་༔    རང་རིག་ངོ་བོ་ཧྲཱིཿཡིག་མཐར༔    སྔགས་ཀྱི་ཕྲེང་བས་བསྐོར་བ་ལས༔    འོད་ཟེར་འཕྲོ་འདུས་བྱིན་དབང་ཐོབ༔  {{TibChung|ཅེས་དགོངས་པ་སྐྱེ་མེད་ཀྱི་ངང་ནས་མཚན་ {{TibChung|[5a]}} སྔགས་བཟླས་པ་ཅི་ནུས་དང་།}}  སྙིང་དབུས་ཐིག་ཟླུམ་འོད་ལྔའི་ཀློང་༔    ཨ་ཡིག་ཐ་མར་སྔགས་ཀྱིས་བསྐོར༔    བདེ་ཆེན་ཡེ་ཤེས་སྣང་བ་ཡིས༔    འཁོར་འདས་སྣོད་བཅུད་རྟོག་པ་སྦྱངས༔    ཐམས་ཅད་མ་ལུས་སྐུ་གསུང་ཐུགས༔    ཡོན་ཏན་ཕྲིན་ལས་རྨད་པོ་ཆེ༔    སྣང་སྲིད་གཞིར་བཞེངས་ཆེན་པོའི་ངང་༔    གྲགས་སྟོང་རྡོ་རྗེའི་ཛཔྲ་འདི་བཟླ༔  {{TibChung|ཞེས་ཨ་གསུམ་སྦྲེལ་ཅི་གྲུབ་བཟླས་མཐར།  སྟོང་ཚིག་འབུལ།  དེ་ནས་སྲུང་མའི་གཏོར་འབུལ་ཚོགས་མཆོད་བསྒྲལ་བསྟབ་ཡན་གྲུབ་ནས།  ལས་བུམ་ལ་དམིགས་ཏེ།}}  བུམ་པ་བྷྲཱུྃ་ལས་གཞལ་ཡས་ཁང༔    བདུད་རྩིའི་མཚོ་དབུས་པད་ཟླའི་སྟེང་༔    རྡོ་རྗེ་སེམས་དཔའ་ཟླ་བའི་མདོག༔    ཞག་གཅིག་ཕྱག་གཉིས་རྡོ་དྲིལ་འཛིན༔    སྙེམས་མ་ཡུམ་དང་མཉམ་པར་སྦྱོར༔    ལོངས་སྤྱོད་རྫོགས་སྐུའི་ཆ་ལུགས་ཅན༔    སྐྱིལ་ཀྲུང་བཞུགས་ཤིང་འོད་ཟེར་འབར༔    སྐུ་ལས་བདུད་རྩིའི་རྒྱུན་བབས་པས༔    བུམ་པ་ཡོངས་སུ་གང་བར་གྱུར༔    ཨོཾ་བཛྲ་ས་ཏྭ་ས་མ་ཡ་{{TibChung|སོགས་ཡིག་བརྒྱ་ཅི་འགྲུབ་བཟླས་མཐར།}}  བུམ་ལྷ་འོད་ཞུ་བཅུད་དང་འདྲེས།  །དག་བྱེད་བདུད་རྩིའི་མཆོག་ཏུ་གྱུར།  །{{TibChung|ཅེས་མོས།  དེ་ནས་སྣང་སྲིད་དག་མཉམ་རང་བྱུང་གི་དཀྱིལ་འཁོར་དུ་རིག་པའི་མེ་ཏོག་དོར་བ་ཙམ་གྱིས་འཇུག་པ་སྔོན་དུ་འགྲོ་བས།  སློབ་མ་གཞུག་པར་ {{TibChung|[5b]}} གསོལ་བ་གདབ་པ་ནི།}}    ཧོཿ    རང་བྱུང་རིག་པ་ཡེ་ཤེས་ལྷ་ཚོགས་རྣམས༔    ཐུགས་རྗེ་རྨད་བྱུང་བརྩེ་བས་དགོངས་སུ་གསོལ༔    གསང་བ་བླ་ན་མེད་པའི་དཀྱིལ་འཁོར་དུ༔    བདག་གི་སློབ་མ་ཡང་དག་འཛིན་པར་མཛོད༔    བདེ་ཆེན་ཡེ་ཤེས་བླ་མེད་འཕེལ་བ་དང་༔    གྲོལ་བ་མཐར་ཕྱིན་དགོངས་སུ་གསོལ༔  {{TibChung|ཞེས་གསོལ་ལྷ་རྣམས་དགྱེས་པ་ཆེན་པོ་ཡིས།}}  དེ་ལྟར་ཡིན་ན་རིག་པ་འཛིན་པ་གང༔    བློ་ཆེན་སྐལ་བར་ལྡན་པའི་སློབ་མ་དག༔    བདེ་ཆེན་ཡེ་ཤེས་དཀྱིལ་འཁོར་འདིར་ཁྲིད་ལ༔    སྨིན་ཅིང་གྲོལ་བ་བླ་ན་མེད་པར་བྱོས༔    ཨ་ལ་ལ་ ཧོཿ    {{TibChung|ཞེས་གནང་བ་བསྩལ་བར་བསམ་མོ།  །གཉིས་པ་བྱིན་རླབས་དབང་བསྐུར་དངོས་ནི།  སློབ་མ་རྣམས་སྒོའི་ཕྱི་རོལ་དུ་བོས་ལ།}}  ཇི་ལྟར་བལྟམས་པ་{{TibChung|སོགས་དང་།  ཡི་གེ་བརྒྱ་པ་བཟླ་བཞིན་ལས་བུམ་གྱི་ཆུས་ཁྲུས་ནས་དབྱུང་།  ནང་དུ་འཁོད་པ་ན་བགེགས་གཏོར་རྃ་ཡྃ་ཁྃ་གིས་བསང་སྦྱང་།}}  སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་{{TibChung|བལྟས་ལ།}}  ཨོཾ་ཨཱཿཧཱུཾ་{{TibChung|གིས་བྱིན་བརླབ།}}  སརྦ་བྷུ་ཏ་ཨ་ཀརྵ་ཡ་ཛཿ{{TibChung|ས་མགྲོན་བཀུག་པ་ལ།}}  སརྦ་བིགྷྣཱན་ནམཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿས་རྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་གན་ཁཾ་གྲྀཧྞེ་དཾ་བ་ལིནྟི་སྭཱ་ཧཱ།  {{TibChung|ཞེས་ལན་གསུམ་གྱིས་བསྔོས་ནས།}}  ན་མོ།  དྲིན་ཅན་རྩ་བ་དང་བརྒྱུད་པར་ {{TibChung|[6a]}}  བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་།  སངས་རྒྱས་ཀྱི༴    ཆོས་ཀྱི༴    དགེ་འདུན་གྱི༴    གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་།  ཁྱད་པར་རིག་འཛིན་བླ་མ་རྩ་གསུམ་སྒྱུ་འཕྲུལ་དྲྭ་བ་ཆེན་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་།  བདེན་པ་ཆེན་པོའི་བྱིན་གྱིས་རླབས་ཀྱིས་དེང་འདིར་རྡོ་རྗེ་སློབ་མ་རྣམས་དཀྱིལ་འཁོར་ཆེན་པོར་གཞུག་ཅིང་དབང་བསྐུར་ཟབ་མོ་སྒྲུབ་པ་ལ་བར་དུ་གཅོད་པའི་བགེགས་ཚོགས་ལོག་པར་འདྲེན་པ་ཐམས་ཅད་གཏོར་མ་འདིས་མགུ་ཞིང་ཚིམ་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་དེངས་ཤིག  གལ་ཏེ་མི་འགྲོ་ན་ཁྲོ་བོ་ཡེ་ཤེས་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ།  ཨོཾ་སུ་མྦྷ་{{TibChung|ནི་སོགས་དྲག་སྔགས་ཡུངས་ཐུན་ཚམ་རྔམས་དང་བཅས་པས་བསྐྲད་ལ།}}  ཨོཾ་བཛྲ་ར་ཀྵ་ཛྭ་ལ་རཾ་ཧཱུཾ།  ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ས་གཞི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་རབ་ཏུ་འབར་བས་བཅིངས་ཏེ་ཅིས་ཀྱང་མི་ཤིགས་པར་གྱུར་{{TibChung|བར་བསམ།  མཎྜལ་བཀྱེ་བསྡུ་བྱས་ལ།}}  འོ་ན་མ་གྱུར་ནམ་མཁའི་མཐའ་དང་མཉམ་པའི་ {{TibChung|[6b]}} སེམས་ཅན་མ་རིག་གསུམ་གྱིས་དམ་ལ་བཞག་ཅིང་འཁྲུལ་པའི་གཞན་དབང་དུ་གྱུར་པས་སྲིད་ལམ་འཁོར་བའི་གནས་རིས་སུ་སྡུག་བསྔལ་ཁོར་ཡུག་གིས་རྟག་ཏུ་མནར་ཞིང་འོག་ནས་འོག་ཏུ་ལྟུང་བ་ལས་ནམ་ཡང་ཐར་བའི་དུས་མེད་པ་འདི་རྣམས་སྙིང་རེ་རྗེ།  དེ་ཐམས་ཅད་གློ་བུར་འཁྲུལ་པའི་རྩ་བ་སེམས་ཉིད་གཞི་ཐོག་ཏུ་གྲོལ་ནས་སྐུ་དང་ཡེ་ཤེས་རྒྱ་མཚོའི་གོ་འཕང་ལ་འགོད་པའི་སླད་དུ་རིག་འཛིན་བླ་མའི་དཀྱིལ་འཁོར་ཆེན་པོར་འཇུག་པར་བགྱིའོ་སྙམ་པའི་ཀུན་སློང་བྱང་ཆུབ་མཆོག་ཏུ་ཐུགས་བསྐྱེད་པ་དང་།  སྣོད་བཅུད་ཐམས་ཅད་དག་མཉམ་ངེས་པ་ལྔ་ལྡན་གྱི་གསལ་སྣང་ལ་བློ་བཞག་སྟེ་ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་ལེགས་པར་འདུ་བགྱིས་ནས་གསན་པར་ཞུ།  དེ་ལ་གང་ཞིག་གསན་པར་བྱ་བ་ནི་རྒྱལ་བ་སྐུ་གསུམ་གྱི་སྟོན་པ་རྒྱ་མཚོས་གདུལ་བྱ་རྣམས་ཀྱི་ཁམས་དབང་བསམ་པའི་བྱེ་བྲག་དང་རྗེས་སུ་མཐུན་པར་ཟབ་རྒྱས་ཀྱི་ཆོས་ཚུལ་བསམ་གྱིས་མི་ཁྱབ་པར་བསྟན་པ་ཐམས་ཅད་དབྱེ་བའི་སྒོ་ནས་ཐེག་པ་རིམ་པ་དགུར་གནས་ཀྱང་བསྡུ་བའི་སྒོ་ནས་ངེས་པའི་ཐེག་པ་གསུམ་དུ་བསྡུ་བའི་ཚུལ།  སྤྱི་མདོ་དགོངས་པ་འདུས་པ་ལས།  དོན་དམ་ངེས་པའི་ཐེག་པ་ནི།  །གསུམ་དུ་ངེས་པར་སྣང་བ་སྟེ།  །ཀུན་འབྱུང་འདྲེན་དང་དཀའ་ཐུབ་རིག  ། {{TibChung|[7a]}} དབང་བསྒྱུར་ཐབས་ཀྱི་ཐེག་པའོ།  །ཞེས་ཕྱི་ཀུན་འབྱུང་འདྲེན་པའི་ཐེག་པ།  ནང་དཀའ་ཐུབ་རིག་བྱེད་ཀྱི་ཐེག་པ།  གསང་བ་དབང་བསྒྱུར་ཐབས་ཀྱི་ཐེག་པ་གསུམ་ལས་འདིར་ཕྱི་མ།  དེ་ལའང་རྒྱུད་མ་ཧཱ་ཡོ་ག  ལུང་ཨ་ནུ་ཡོ་ག  མན་ངག་ཨ་ཏི་ཡོ་ག་སྟེ་གསུམ་དུ་དབྱེ་བ་ལས།  འདིར་ནི་ཀུན་གྱི་རྩེ་མོའམ་ཕུལ་དུ་གྱུར་པ་མཆོག་གསང་བླ་མེད་ཨ་ཏི་ཡོ་ག་སྟེ།  འདི་ལའང་གདམས་ངག་གི་བཀའ་སྲོལ་བསམ་གྱིས་མི་ཁྱབ་པར་བཞུགས་པ་ལས།  འདིར་སློབ་དཔོན་ཆེན་པོ་ཤྲཱི་སིངྷའི་མན་ངག་དགོངས་ཉམས་མཐར་ཐུག་པ་རྒྱལ་དབང་པདྨ་འབྱུང་གནས་དང་།  ལོ་ཆེན་བེེ་རོ་ཙ་ནའི་ཐུགས་དམ་སྙིང་པོའི་ཡང་ཞུན་དམ་ཆོས་རྫོགས་པ་ཆེན་པོ།  ཕྱི་སྐོར་སེམས་སྡེ་ནམ་མཁའ་ཀློང་ཡངས།  མང་སྐོར་ཀློང་སྡེ་ཉི་མ་ཀློང་ཆུབ།  གསང་སྐོར་མན་ངག་འོད་ཟེར་མཐའ་ཡས་ཞེས་ཟབ་འདྲིལ་སྙིང་པོའི་ཡང་བཅུད་ཀྱི་ཆོས་སྡེ་ཆེན་པོ་འདི་ཉིད་ཟབ་མོ་གཏེར་ལས་ཇི་ལྟར་སྣང་བའི་ཚུལ་ནི་གཞུང་གི་ལུང་བསྟན་གཅེས་པའི་ལྡེའུ་མིག་ལས།  དེ་ཡི་དུས་སུ་ལྷོ་ཟླའི་ཕྱོགས༔    རཏྣའི་མིང་ཅན་སྟག་གམ་གླང་༔  མཆོག་གི་མིང་ཅན་སྐྱེས་བུ་ཞིག༔    དེ་ནི་སྔོན་དུ་ལྷ་སྲས་འབྲིང་༔    ད་ལྟ་ངན་ལམ་ {{TibChung|[7b]}} ཡེ་ཤེས་མཆོག༔  དེ་ལྟ་བུ་རུ་སྐྱེ་བ་ལེན༔    འབྲུག་གི་ལོ་ལ་གདམས་པ་འདི༔    ས་ཡི་སྟེང་དུ་དེས་འབྱིན་བྱེད༔    རྗེ་འབངས་ཡིད་ལ་ངེས་པར་གྱིས༔    ཞེས་གསུངས་པ་ལྟར་རྩོད་བྲལ་དུས་བབས་ཀྱི་སྤྲུལ་པའི་གཏེར་ཆེན་ཨོ་རྒྱན་མཆོག་འགྱུར་བདེ་ཆེན་གླིང་པ་དང་།  བཀའ་བབས་བདུན་གྱི་མངའ་བདག་ཐམས་ཅད་མཁྱེན་དངོས་པདྨ་འོད་གསལ་མདོ་སྔགས་གླིང་པ་ལྷན་རྒྱས་པས་མདོ་སྨད་ཛམ་ནང་པདྨ་ཤེལ་ཕུག་ནས་སྤྱན་དྲངས་ཏེ།  ལུང་ཟིན་རྩ་བའི་ཆོས་བདག་ལ་གཅིག་བརྒྱུད་དུ་སྩལ་བའི་དམ་ཆོས་རྫོགས་པ་ཆེན་པོ་སྡེ་གསུམ་ལས།  སྐབས་སུ་བབས་པ་འདི་ནི་མདོ་བྱང་ལས།  དམ་ཆོས་རྫོགས་ཆེན་སྡེ་གསུམ་བཤད༔  ད་ལྟ་ཤིན་ཏུ་སྤེལ་འཕངས་པས༔    ཟབ་པ་ཐུགས་ཀྱི་གཏེར་དུ་སྦས༔  ནམ་ཞིག་ལས་ཅན་བུར་འཕྲད་ནས༔  གདམས་པ་སྣ་རེས་གྲོལ་བར་འགྱུར༔  སྙན་ནས་སྙན་དུ་བརྒྱུད་པ་གཅེས༔  གང་ཞིག་འགྲོ་དོན་སྒོ་དབྱེ་ཙམ༔  སྒྲུབ་ཐབས་སྣ་རེ་སྦྱིན་པར་བྱ༔  ཞེས་བྱུང་བ་ལྟར་སྡེ་གསུམ་སྤྱི་ལ་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་ལས།  ཐུན་མོང་དད་པ་ཅན་རྗེས་སུ་འཛིན་པའི་སླད་དུ་ཀུན་གྱི་སྔོན་འགྲོ་ཆོས་ཀྱི་སྒོ་འབྱེད་ཟབ་མོའི་བྱིན་རླབས་དབང་བསྐུར་གྱི་རིམ་པར་བགྱི་བ་ལ།  {{TibChung|[8a]}} བདག་ཉིད་སློབ་དཔོན་གྱིས་བགྱི་འོས་རྣམས་སྔོན་དུ་ལེགས་པར་གྲུབ་ནས།  སྐུ་ཉིད་སློབ་མ་རྣམས་ཀྱི་ངོ་སྐལ་དུ་གྱུར་པ་ཐོག་མར་དབང་བསྐུར་ཞུ་བའི་ཡོན་དུ་མཎྜལ་འབུལ་བར་ཞུ།  {{TibChung|ཞེས་མཚམས་སྦྱར་ལ་མཎྜལ་འབུལ་དུ་གཞུག}}  སློབ་དཔོན་ཉིད་རིག་འཛིན་བླ་མའི་ངོ་བོར་བཞུགས་པ་ལ་མི་ཕྱེད་དད་པའི་གདུང་ཤུགས་དྲག་པོས་ཕྱག་སྙིམ་པ་མེ་ཏོག་དང་བཅས་ཐལ་མོ་སྦྱར་ལ་གསོལ་བ་གདབ་པ་འདིའི་རྗེས་ཟློས་མཛོད།    ཧོཿ    བདེ་གཤེགས་རྒྱལ་བའི་གདུང་འཚོབ་ཧེ་རུ་ཀ༔  འཇིགས་བྲལ་དཔའ་བོ་ཤྲཱི་སེངྷདང་༔  གཉིས་སུ་མེད་པའི་རྡོ་རྗེ་སློབ་དཔོན་དགོངས༔    བདག་ཅག་གྲོལ་བ་མཐར་ཕྱིན་མཛད་དུ་གསོལ༔  {{TibChung|ལན་གསུམ།}}  དེ་ལྟར་གསོལ་བ་བཏབ་པ་ལ་བརྩེ་པའི་ཐུགས་རྗེས་གནང་བ་སྩལ་ཞིང་ཆོས་ཀྱི་སྒོ་དབྱེ་བའི་སྒོ་ནས་སྤྲོ་བ་བསྐྱེད་པར་བྱ་བ་ཡིན་ཏེ།  {{TibChung|རྡོ་རྗེ་འཕྱར་ཞིང་།}}    ཧོཿ    ཐར་པ་བླ་ན་མེད་པའི་གྲོང་ཁྱེར་དུ༔  འདུས་པའི་གཙོ་བོ་ཤྲཱི་སེངྷ་བཞུགས༔  འདི་ན་མོས་པའི་སྐལ་ལྡན་སྐྱེས་བུ་ཁྱོད༔  འཇུག་པ་ལེགས་ཤིང་དངོས་གྲུབ་ཅི་ལ་དགའ༔  དེ་ཉིད་སྦྱིན་ཅིང་འདི་ན་བླ་མེད་པའི༔    ཚེ་གཅིག་སངས་རྒྱས་སྒྲུབ་ལ་སྤྲོ་བ་བསྐྱེད༔    དམ་ཚིག་མ་ལུས་ཡོངས་སུ་བཟུང་བར་གྱིས༔  {{TibChung|ཞེས་གདམས།}}  དེ་ལ་ཐོག {{TibChung|[8b]}} མར་རྒྱུད་དག་པར་བྱ་བའི་སླད་དུ་བླ་མ་ཉིད་དཀོན་མཆོག་རྩ་གསུམ་རྒྱ་མཚོའི་ཁྱབ་བདག་ཆེན་པོར་བཞུགས་པའི་སྤྱན་སྔར་བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བར་བགྱིའོ་སྙམ་པ་ཀུན་རྫོབ་གཞིའི་སྐྱབས་འགྲོ་དང་།  དབྱིངས་རིག་ཟུངས་འཇུག་རང་བྱུང་གདོད་མའི་གཤིས་ལུགས་དཀོན་མཆོག་གསུམ་གྱི་ངོ་བོར་ཡེ་ནས་རང་ཆས་སུ་བཞུགས་པ་ཉིད་རང་ངོ་ཤེས་པའི་སྒོ་ནས་རང་བབ་དེ་ཁོ་ན་ཉིད་དུ་ལ་བཟླ་བ་དོན་དམ་འབྲས་བུའི་སྐྱབས་འགྲོ་རང་བཞིན་ཡོངས་ཤེས་ཀྱི་ངང་ནས་འདིའི་རྗེས་ཟློས།  ཀུན་གཞི་དག་པའི་སངས་རྒྱས་དང་༔    རྣམ་ཤེས་གནས་གྱུར་དམ་པའི་ཆོས༔    དབང་པོ་ཡུལ་དག་ཚོགས་མཆོག་ལ༔  རང་ངོ་ཤེས་པས་སྐྱབས་སུ་མཆི༔  {{TibChung|ལན་གསུམ།}}  འདི་ལྟར་མ་རིག་འཁྲུལ་པའི་འཁོར་ལོར་ཁ་འཕྱན་པའི་སྐྱེ་འགྲོ་གློ་བུར་འཁྲུལ་སྣང་གི་སྡུག་བསྔལ་ལ་སྤྱོད་པ་ཐམས་ཅད་རང་གནས་འོད་གསལ་ཆོས་སྐུའི་ཀློང་ཆེན་པོར་གྲོལ་བའི་ཆེད་དུ་སྨིན་གྲོལ་ཟབ་མོའི་སྒོར་འཇུག་པར་བགྱིའོ་སྙམ་པ་ཀུན་རྫོབ་རྒྱུའི་སེམས་བསྐྱེད་དང་།  དོན་དམ་པར་གནས་ལུགས་བདེ་གཤེགས་སྙིང་པོ་འཆིང་གྲོལ་ལས་འདས་པའི་རང་བཞིན་གཉུག་མ་ལྷུན་རྫོགས་ཆེན་པོའི་ངོ་བོར་མཉམ་པར་འཇོག་པ་ {{TibChung|[9a]}} མཐར་ཐུག་འབྲས་བུའི་སེམས་བསྐྱེད་ལ་བློ་བཞག་བཞིན་པས་འདིའི་རྗེས་ཟློས།  ཨེ་མ་ཧོ་བདེ་གཤེགས་སྙིང་པོ་ལས༔    འགྲོ་བ་མ་རིག་འཁྲུལ་པ་རྣམས༔  འོད་གསལ་ཆན་པོར་བསྒྲལ་བའི་ཕྱིར༔  གཉིས་སུ་མེད་པར་སེམས་བསྐྱེད་དོ༔  {{TibChung|ལན་གསུམ།}}  ཞིང་མཆོག་དེ་དག་གི་སྤྱན་སྔར་ཕྱག་འཚལ་ཞིང་མཆོད་པ་འབུལ་བ་སོགས་ཀུན་རྫོབ་ཡན་ལག་བདུན་པའི་དམིགས་འདུན་དང་དོན་དམ་རང་གསལ་གྱི་དགོངས་པ་ཟུང་དུ་འབྲེལ་བས་འདིའི་རྗེས་ཟློས།  སྣང་བ་རྣམ་དག་བདེ་གཤེགས་ལ༔    བདེ་བ་འཛིན་མེད་ཕྱག་འཚལ་ལོ༔  བདེ་སྟོང་དབྱེར་མེད་མཆོད་པར་འབུལ༔  བདེ་ཆེན་མ་རྟོགས་མཐོལ་ལོ་བཤགས༔  ཡུལ་ཅན་དག་པར་རྗེས་ཡི་རང་༔    དབང་པོ་བདེན་མེད་ཆོས་འཁོར་བསྐོར༔  ཤེས་པ་རང་གསལ་ངང་ལ་བཞུགས༔  ཀུན་གཞི་དག་པའི་དོན་རྟོགས་ཤོག༔  {{TibChung|ལན་གསུམ།}}  རྡོ་རྗེ་ཐེག་པའི་དམ་ཚིག་སྤྱི་དང་བྱེ་བྲག་རྩ་བ་དང་ཡན་ལག་གིས་བསྡུས་པ་རྣམས་ལེགས་བར་བླངས་ནས་ཚུལ་བཞིན་བསྲུང་སྙམ་པས་འདིའི་རྗེས་ཟློས།  ཧོཿ    ཁྱབ་བདག་དཔལ་ལྡན་བླ་མ་དགོངས་སུ་གསོལ༔  བདག་ནི་དུས་གསུམ་རྒྱལ་བའི་དགོངས་པའི་མཐིལ༔  བདེ་བ་ཆེན་པོའི་ {{TibChung|[9b]}} ཡེ་ཤེས་ལ་དགའ་བས༔  དེ་ཉིད་མྱུར་སྩོལ་གསང་སྔགས་རིགས་མཆོག་གི༔  རྩ་བ་སྐུ་གསུང་ཐུགས་ཀྱི་དམ་ཚིག་དང་༔  ཉི་ཤུ་རྩ་ལྔའི་དམ་ཚིག་ཆེས་འཕགས་པ༔  སྲོག་གི་ཕྱིར་ཡང་མི་བཏང་བཟུང་བར་བགྱི༔  {{TibChung|ལན་གསུམ།}}  སློབ་མའི་མགོར་རྡོ་རྗེ་བཞག་ལྕེ་ལ་བདུད་རྩི་བྱིན་ཏེ།  འདི་ནི་གསང་བ་བླ་ན་མེད་པ་ཡི༔  ཐར་པའི་གོ་འཕང་ཚེ་འདིར་ཐོབ་འགྱུར་བས༔  ཉེ་བའི་ལམ་མཆོག་བདེ་བ་ལམ་བྱེད་ཡིན༔  ཁྱེད་རྣམས་རྡོ་རྗེའི་དམ་ཚིག་ཐུབ་པར་གྱིས༔  མ་ཐུབ་རྡོ་རྗེའི་དམྱལ་བ་ཆེན་པོར་ལྟུང་༔  སྲོག་གི་ཕྱིར་ཡང་ཡོངས་སུ་མ་བཏང་ཞིག༔  བཛྲས་མ་ཡ་རཀྵ་སི་ཧཱུྃ༔  ཇི་ལྟར་བསྒོས་པའི་དམ་ཚིག་གི་ཚུལ་ལས་ནམ་ཡང་འདའ་བར་མི་བགྱིད་དོ་སྙམ་པའི་རྡོ་རྗེའི་བྲོ་བོར་བ་འདིའི་རྗེས་ཟློས།  མ་ཧཱ་སུ་ཁ་བཛྲ་ས་མ་ཡ་ཧཱུྃ༔    ཨི་དཾ་ན་ར་ཀན༔  {{TibChung|ཞེས་བསྐྱལ།}}    དེ་རྣམས་ཀྱིས་དབང་གི་སྔོན་འགྲོའི་ཆོས་རྣམས་གྲུབ་ནས།  དངོས་གཞི་བྱིན་རླབས་ཀྱི་གཞི་འགོད་པ་ཡེ་ཤེས་པ་དབབ་པའི་སླད་དུ།  ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་སྲོང་ལ་མིག་མི་འགུལ་བའི་ལྟ་སྟངས་དབྱིངས་ལ་གཏོད།  ངག་གི་གནད་སྟེང་འོག་གི་རླུང་ཁ་སྦྱོར་དུ་ཆིངས།  ཡིད་ཀྱི་གནད་ཚོགས་དྲུག་གི་ཡུལ་ལ་སྐད་ཅིག་ཙམ་མ་ཡེངས་པར་དམིགས་པ་འདི་བཞིན་དུ་མཛོད།  སློབ་བུའི་ {{TibChung|[10a]}} ཐ་མལ་འཛིན་རྟོག་སྦྱངས།  །སྐད་ཅིག་དྲན་རྫོགས་ངང་ཉིད་ལས།  །དྭངས་མ་ཡེ་ཤེས་འོད་ཀྱི་ལུས།  །ཤྲཱི་སེངྷ་དཀར་སྨུག་མདོག  །གྲུབ་པའི་ཆ་ལུགས་རྡོ་དྲིལ་འཛིན།  །རིན་ཆེན་དར་སྟག་རུས་པས་བརྒྱན།  །ཡུམ་དམར་གྲི་ཐོད་འཛིན་འཁྱུད་བསྒོམ།  །དཔོན་སློབ་ཐུགས་སྲོག་ས་བོན་ལས།  །འོད་འཕྲོས་སྐུ་གསུམ་རྒྱལ་བའི་ཞིང་།  །ཆོས་དབྱིངས་བརྡལ་ཁྱབ་ཆེན་པོ་ནས།  །བརྒྱུད་གསུམ་རིག་འཛིན་བླ་མའི་ཚོགས།  །སྤྱན་དྲངས་ཐིམ་པས་དབྱེར་མེད་གྱུར།  །ཅེས་བརྡ་སྦྱར་ལ།  {{TibChung|སྦྱར་སྤོས་བཏུལ་ཞིང་རོལ་མོའི་སྒྲ་དབྱངས་དང་བཅས།}}  ཧཱུྃ༔  མི་མངོན་དབྱིངས་ཀྱི་ཞིང་ཁམས་ནས༔  བླ་མ་རིག་འཛིན་བདེ་གཤེགས་ཚོགས༔  ཡི་དམ་དཔའ་བོ་མཁའ་འགྲོ་རྣམས༔    གནས་འདིར་སྤྱན་འདྲེན་གཤེགས་སུ་གསོལ༔  ཀུན་གཞི་དག་པའི་ཞིང་ཁམས་ནས༔  གསལ་བ་ལོངས་སྤྱོད་རྫོགས་སྐུར་བཞེངས༔    ཐུགས་རྗེ་སྤྲུལ་སྐུའི་འཁོར་དང་བཅས༔  དབྱེར་མེད་ཆེན་པོར་གཤེགས་སུ་གསོལ༔  དབྱིངས་ལས་གཞན་མེད་ཆོས་སྐུའི་ཚོགས༔  བདེ་བ་ཆེ་ལ་ལོངས་སྤྱོད་པ༔  ཅིར་ཡང་སྣང་བ་སྤྲུལ་པའི་སྐུ༔    མ་ལུས་འཁོར་བཅས་གཤེགས་སུ་གསོལ༔  སྣང་ཡུལ་འཛིན་པ་དབྱིངས་ {{TibChung|[10b]}} སུ་གྲོལ༔  དབང་པོ་སྐུ་ལྔར་བྱིན་གྱིས་རློབས༔  རྣམ་ཤེས་ཡེ་ཤེས་ཆེན་པོར་བསྒྱུར༔  ཀུན་གཞིའི་ཀློང་དུ་ཐིམ་པར་མཛོད༔  ཨེ་ཧྱེ་ཧི་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ  ས་མ་ཡ་ཧོཿ  ས་མ་ཡ་སྟྭཾཿ ཛཿཧཱུྃ་བཾ་ཧོཿ  {{TibChung|ཞེས་བྱིན་དབབ་ལ།}}  དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བྱང་ཆུབ་སྙིང་པོའི་བར་དུ་བརྟན་བར་བྱས་པའི་མོས་པ་མཛོད།  {{TibChung|རྡོ་རྗེ་མེ་ཏོག་དང་བཅས་པ་སྤྱི་བོར་རྒྱ་གྲམ་དུ་བཀོད་ནས།}}  ཏིཥྛ་བཛྲ་{{TibChung|ས་བརྟན་བར་བྱ།}}  དེ་ནས་དངོས་གཞི་བྱིན་རླབས་ཡོངས་རྫོགས་གཏོར་མའི་དབང་བསྐུར་བ་ལ་དམིགས་པ་འདི་བཞིན་དུ་མཛོད།  གཏོར་སྣོད་རང་བྱུང་གི་གཞལ་མེད་ཁང་ཆེན་པོར་གཏོར་མ་རིག་འཛིན་བླ་མའི་ལྷ་ཚོགས་དངོས་སུ་བཞུགས་པ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཏེ་དབང་བསྐུར་བས་གསང་བ་གསུམ་གྱི་དབང་དང་བྱིན་རླབས་དངོས་གྲུབ་ཐམས་ཅད་ཆིག་རྫོགས་སུ་ཐོབ་པའི་མོས་པ་མཛད།  {{TibChung|གཏོར་མ་ཐོགས་ལ།}}  ཧཱུྃ༔  གཏོར་མའི་རང་བཞིན་རིན་ཆེན་གཞལ་ཡས་ཁང་༔  ནང་དུ་བླ་མ་ཤྲཱི་སེངྷ་དང་༔  རིག་འཛིན་གྲུབ་ཐོབ་རྒྱ་མཚོའི་ཚོགས་རྣམས་བཞུགས༔  ཡི་དམ་ལྷ་ཚོགས་ཐམས་ཅད་སྤྲིན་ལྟར་གཏིབས༔  མ་དང་མཁའ་འགྲོ་བུ་ཡུག་བཞིན་དུ་འཚུབས༔  རྩ་གསུམ་རྒྱལ་བའི་དཀྱིལ་འཁོར་ཆེན་པོ་འདིས༔  སྐལ་ལྡན་སློབ་མ་རྣམས་ལ་དབང་ {{TibChung|[11a]}} བསྐུར་བས༔  ཕྱི་ནང་གསང་བའི་བར་ཆད་བསལ་བ་དང་༔  སྐུ་གསུང་ཐུགས་ཀྱི་དབང་ཆེན་ཡོངས་སུ་རྫོགས༔  མཆོག་དང་ཐུན་མོང་དངོས་གྲུབ་སྩལ་དུ་གསོལ༔    ཨོཾ་ཨཱཿཧཱུྃ་གུ་རུ་ཤྲཱི་སེངྷ་སིདྡྷི་ཧཱུྃ༔    ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཧཱུྃ༔  {{TibChung|ཞེས་གཏོར་མ་གནས་གསུམ་དུ་བཞག  །}}  རྗེས་འབྲེལ་དུ་སྐུ་གསུང་ཐུགས་ཀྱི་དབང་བསྐུར་བ་ལ།  ཐོག་མར་ལྷ་སྐུ་ཕྱག་རྒྱའི་དབང་བསྐུར་བའི་སླད་དུ།  རིག་འཛིན་བླ་མའི་སྐུ་ལས་ཡེ་ཤེས་ཀྱི་སྐུ་གཉིས་པ་ཞིག་རྒྱངས་ཀྱིས་བྱུང་།  ཁྱེད་རང་རྣམས་ཀྱི་དཔྲལ་བར་ཐིམ་པས་སྐུའི་བྱིན་རླབས་མ་ལུས་པ་ཐོབ་པའི་མོས་པ་མཛོད།  {{TibChung|སྐུ་འབག་སྤྱི་བོར་བཞག་ལ།}}  ཨོཾ༔    རྡོ་རྗེ་སེམས་དཔའ་བདེ་བའི་ལྷུམས་སུ་ཞུགས༔  མི་ཡི་ཡུལ་འཁྲུངས་ཐོས་བསམ་ཐར་ཕྱིན་མཛད༔  རྒྱལ་བའི་གསང་གསུམ་མ་ལུས་འདུས་པའི་སྐུ༔  དཔལ་ཆེན་རིག་འཛིན་ཤྲཱི་སེངྷ་ཡི༔  སྐུ་ཡི་ཕྱག་རྒྱ་བསྒོམ་པའི་དབང་བསྐུར་རོ༔  {{TibChung|རྩ་སྔགས་མཐར།}}  ཀཱ་ཡ་ཨ་བྷི་ཥིཉྩ་ཨོཾ༔  དེང་ཕྱིན་ཆད་ཐ་མལ་སྣང་ཞེན་གྱི་འཛིན་པ་བཏུལ་ནས་སྣང་སྟོང་ཟུང་འཇུག་ཡེ་ཤེས་ཕྱག་རྒྱའི་སྐུ་བསྒོམ་པ་དང་མི་བྲལ་བར་གྱིས་ཤིག  གསུང་བཟླས་པའི་ལུང་སྦྱིན་པའི་སླད་དུ།  སློབ་དཔོན་རིག་འཛིན་བླ་མའི་ཐུགས་ཀའི་སྔགས་ཕྲེང་ལས་ {{TibChung|[11b]}} སྔགས་ཕྲེང་གཉིས་པ་བྱུང་།  ཞལ་ནས་ཐོན།  ཁྱེད་རང་རྣམས་ལྷར་གསལ་བའི་ཞལ་དུ་ཞུགས།  ཐུགས་ཀར་ཟླ་སྟེང་ཧྲཱིཿཡིག་གི་མཐར་འཁོད་པ་བཟླས་པའི་རྐྱེན་གྱིས་གསུང་སྔགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད།  {{TibChung|རྩ་སྔགས་དང་ཨ་སུམ་སྦྲེལ་རྗེས་ཟློས་ལན་གསུམ་རེ་བྱ།}}  སྔགས་ཀྱི་ཕྲེང་བ་མགྲིན་པར་བཞག་སྟེ་དབང་བསྐུར་བས་དེ་ཉིད་བརྟན་པར་བྱས་པའི་མོས་པ་མཛོད།  {{TibChung|སྔགས་ཕྲེང་མགྲིན་པར་བཞག །}} ཨཱཿ  རིག་འཛིན་གཙོ་བོ་གྲུབ་པའི་དབང་ཕྱུག་རྗེ༔  རྒྱལ་ཀུན་གསང་གསུམ་འདུས་པ་གསུང་གི་མཆོག༔  རླུང་སྔགས་གྲགས་སྟོང་སྔགས་སུ་འགྱུར་བའི་ཕྱིར༔  ཡན་ལག་དྲུག་ཅུ་ལྡན་པའི་དབང་བསྐུར་རོ༔  {{TibChung|རྩ་སྔགས་མཐར།}}  ཝཱཀ་ཨ་བྷི་ཥིཉྩ་ཨཱཿ  དེང་ཕྱིན་ཆད་ངག་ཐ་མལ་དུ་འཛིན་པའི་བརྗོད་པ་བཏུལ་ཏེ་རླུང་སྔགས་དབྱེར་མི་ཕྱེད་པའི་སྙིང་པོ་གྲགས་སྟོང་ཆུའི་རྒྱུན་ལྟར་བཟླ་བ་ལ་བརྩོན་པར་གྱིས་ཤིག  ཐུགས་འོད་གསལ་གྱི་དགོངས་པ་ངོ་སྤྲོད་པའི་སླད་དུ།  སེམས་དུས་གསུམ་གྱི་རྟོག་པའི་རྗེས་སུ་མི་འབྲང་བར་བླ་མའི་ཐུགས་དང་རང་སེམས་དབྱེར་མེད་དུ་བསྲེས་ནས་རིག་སྟོང་ཟུང་འཇུག་འོད་གསལ་གཉུག་མའི་ངང་དུ་མཉམ་པར་བཞག་པས་རིག་འཛིན་བླ་མའི་ཐུགས་ཀྱི་དགོངས་པ་མངོན་དུ་གྱུར་ {{TibChung|[12a]}} པའི་མོས་པ་མཛོད།  ཧཱུྃ༔  རིག་འཛིན་བླ་མ་ཤྲཱི་སེངྷའི་ཐུགས༔  སྤྲོས་པ་ཀུན་བྲལ་སེམས་ཉིད་ཡེ་ཤེས་ཆེ༔  བདེ་གསལ་མི་རྟོག་དབྱེར་མེད་ཀློང་དུ་ཆུབ༔    དབྱིངས་རིག་ཟུང་དུ་འཇུག་པའི་དབང་ཐོབ་ཤོག༔  {{TibChung|རྩ་སྔགས་མཐར།}}  ཙིཏྟ་ཨབྷི་ཥིཉྩ་ཧཱུྃ༔  {{TibChung|ཞེས་དཔོན་སློབ་གཉིས་ཀས་ཅུང་ཟད་མཉམ་པར་བཞག།}}  དེང་ཕྱིན་ཆད་ཡིད་ཐ་མལ་གྱི་དྲན་རྟོག་འཛིན་ཞེན་ཐམས་ཅད་བཏུལ་ཏེ་ཆོས་ཉིད་གཉུག་མ་བསམ་བརྗོད་དང་བྲལ་བའི་ངང་དུ་ལ་བཟླ་བར་གྱིས་ཤིག དེ་ལྟར་ཁྱེད་རང་རྣམས་ཀྱི་སྒོ་གསུམ་རིག་འཛིན་བླ་མའི་གསང་བ་གསུམ་དང་དབྱེར་མེད་དུ་གྱུར་པ་ལ།  བླ་མ་དཀྱིལ་འཁོར་པའི་ལྷ་ཚོགས་ནམ་མཁའ་གང་བའི་ཚོགས་ཀྱིས་བཀྲ་ཤིས་པའི་བདེན་ཚིག་དབྱངས་སུ་ལེན་བཞིན་མེ་ཏོག་མནྡཱ་ར་བའི་ཆར་སིལ་མར་བསྙིལ་བས་དབང་དོན་གྱི་ཡེ་ཤེས་སྔར་མ་སྐྱེས་པ་བསྐྱེད།  སྐྱེས་པ་གོང་ནས་གོང་དུ་འཕེལ་ཞིང་བརྟན་པར་བྱས་པའི་མོས་པ་མཛོད།  {{TibChung|ཅེས་མཚམས་སྦྱར་ལ་ཤིས་བརྗོད་ཇི་ལྟར་རིགས་པ་སྤེལ།}}  དེ་དག་རྣམས་ཀྱི་སྒོ་ནས་རྩ་བའི་གཞུང་ལས།  འདི་ཡི་གདམས་པ་སློབ་བུའི་སྣོད་བརྟགཅིང་༔    བློ་དང་འཚམས་པར་རིམ་བཞིན་བསྟན་པ་ལས༔  པདྨའི་སྙིང་ཁྲག་ཡིན་པས་སྤེལ་བར་ཕངས༔  ཞེས་ཤིན་ཏུ་ཟབ་ཅིང་རབ་ཏུ་གཅེས་པའི་གཙིགས་སུ་བསྔགས་པར་མཛད་ {{TibChung|[12b]}} པ་བླ་མའི་ཟབ་དབང་ཉི་ཟླའི་རྒྱ་ཅན་ལས།  ཐུན་མོང་དད་པ་ཅན་རྗེས་སུ་འཛིན་པ་ཐོག་མའི་ཆོས་ཀྱི་སྒོ་འབྱེད་ཟབ་མོའི་དབང་བསྐུར་ལེགས་པར་ཐོབ་པ་ལགས།  དེའང་དབང་གི་སྲོག་དམ་ཚིག་གིས་འཛིན་དགོས་པས་ན་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་ལྷག་པས་བསྡུས་པ་མཐའ་དག་ཚུལ་བཞིན་དུ་བསྲུང་བར་ཁས་བླང་བ་འདིའི་རྗེས་ཟློས།  གཙོ་བོ་ཇི་ལྟར་{{TibChung|སོགས་ལན་གསུམ།}}  དབང་བསྐུར་བ་ལེགས་པར་ཐོབ་པའི་གཏང་རག་ཏུ་མཎྜལ་ཕུལ།  {{TibChung|ཞེས་མཎྜལ་འབུལ་དུ་གཞུག}}  སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲོས་ཏེ་འབུལ་ན་ཆ་ཤས་རེ་རེ་ནས་བཞེས་ལ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས།  དེང་ནས་བརྩམས་ཏེ་{{TibChung|སོགས་ལན་གསུམ།}}  དེ་ལྟར་དབང་བསྐུར་ཟབ་མོ་ལེགས་པར་གསན་པ་ལས་བྱུང་བའི་དགེ་ཚོགས་རྣམས་བྱང་ཆུབ་སྙིང་པོར་ཡོངས་སུ་བསྔོ་བའི་རྒྱས་འདེབས་ལྷན་ཅིག་ཏུ་གནང་བ་དང་།  འདི་ལ་བརྟེན་ནས་རང་གཞན་གྱི་དོན་རྒྱ་ཆེན་པོ་མཛད་པར་ཞུ།  བསོད་ནམས་འདི་ཡིས་{{TibChung|སོགས་བསྔོ་སྨོན་ཇི་ལྟར་རིགས་པ་བརྗོད་ལ་སློབ་མ་རྣམས་རང་གནས་སུ་བཏང་ངོ་།  །གསུམ་པ་རྗེས་ཀྱི་རིམ་པ་ནི།  སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ་བ་སོགས་ཕྲིན་ལས་བྱང་བུ་ཁྲིགས་སྡེབས་མཐར་ཆགས་སུ་བཏང་བས་ལེགས་པར་གྲུབ་བོ།།  །།}}  ༈  {{TibChung| གཉིས་པ་ཐུན་མོང་མ་ཡིན་པའི་གདུལ་བྱ་བརྩོན་ {{TibChung|[13a]}} འགྲུས་ཅན་རྗེས་སུ་འཛིན་པ་ཟབ་དབང་དངོས་བསྐུར་བ་ལ་གསུམ།  སྦྱོར་བ་ཤོམ་དང་སྒྲུབ་མཆོད།  དངོས་གཞི་དབང་གི་ཆོ་ག  །རྗེས་མཐའ་རྒྱས་ཀྱི་ལས་རིམ་མོ།  །དང་པོ་ནི།  སྟེགས་བུ་ཁེབས་ལྡན་གྱི་དབུས་སུ་དཀྱིལ་འཁོར་སྒོ་རྫོགས་པད་འདབ་བརྒྱད་ལྡན་བྲིས་པའི་རས་དཀྱིལ་བཀྲམ་པའམ།  མ་འབྱོར་ན་མཎྜལ་མེ་ཏོག་གི་ཚོམ་བུ་གཅིག་བཀོད་བའི་ཁར་མཉྫིའི་སྟེང་དུ་བུམ་པ་སོ་ལྔའི་བཅུད་ལྡན་ཁ་རྒྱན་མགུལ་ཆིངས་ཀྱིས་སྤྲས་པ་འགོད།  དེའི་གཡས་སུ་གསང་ཐོད་ཆང་དང་མངར་གསུམ་ཆོས་སྨན་སྦྱར་བས་བཀང་བའི་ཁ་དར་དམར་བརྒྱད་ལྟེབས་ཀྱིས་བཀབ་པ།  གཡོན་དུ་རིག་མའི་གཟུགས་བརྙན།  མདུན་དུ་ཤེལ་རྡོ་རྨ་བྱའི་མདོངས་སྒྲོ་མེ་ལོང་སྦྲགས་མ།  རྒྱབ་ཏུ་མཆོད་རྫས་སྨན་རཀ་གཏོར་གསུམ།  མཐའ་སྐོར་བྱང་ཤར་མཚམས་འཛིན་མེ་ཏོག་ནས་བརྩམས་ཆུ་གཉིས་ཉེར་སྤྱོད་ལྔ་གཡས་བསྐོར་དུ་བཤམ།  ཉེ་ལོགས་སུ་སྲད་བུ་དམར་པོའི་སྲུང་སྐུད་རྡོ་རྗེའི་མདུད་པ་བཏབ་པ་སློབ་མའི་གྲངས་མཉམ།  གཞན་ཡང་ཚོགས་དང་གཏོར་མ་སོགས་འདིར་དགོས་པའི་ཡོ་བྱད་ཐམས་ཅད་སྔར་བཞིན་ཚང་བར་འདུ་བྱས་ལ།  དབང་དོན་སྒྲུབ་མཆོད་ཀྱི་ཚུལ་སྔ་མ་ཁོ་ན་ལྟར་ལས།  མཆོད་བརླབ་བྱང་བུ་ནས་དངོས་གཞི་རྟེན་གྱི་བྱང་བུ་སྦྲེལ་ཏེ་བསྟོད་པ་གྲུབ་ཀྱི་བར་དུ་བཏང་།  གོང་བཞིན་ཛཔྲ་དམིགས་གསལ་བཏབ་ལ་མཚན་སྔགས་དང་ཨ་སུམ་སྦྲེལ་གྱི་བཟླས་པ་ཅི་འགྲུབ་བྱ།  བུམ་བཟླས་ཟུར་དུ་སྤྲོ་ན།}}  བུམ་པ་རང་བྱུང་གི་གཞལ་མེད་ཁང་དུ་རིག་འཛིན་བླ་མའི་ལྷ་ཚོགས་གསལ་བའི་སྐུ་ལས་བདུད་རྩིའི་རྒྱུན་བབས་བུམ་པ་གང་བར་{{TibChung|བསམ་ལ།  བཟླས་པ་ཅི་ནུས་མཐར།  སྟོང་ཚིག་ཕུལ།  སྐབས་འདིར་བུམ་ལྷ་འོད་ཞུ་མི་བྱ།  དེ་ནས་སྲུང་མའི་ {{TibChung|[13b]}} གཏོར་འབུལ་དང་ཚོགས་མཆོད་ནས་གནང་བ་ནོད་པའི་བར་གོང་བཞིན་བྱའོ།  །གཉིས་པ་དངོས་གཞི་དབང་བསྐུར་བ་ནི།  སློབ་མ་རྣམས་ཁྲུས་ནས་དབྱུང་།  བགེགས་གཏོར་བསྔོས་ལ་ཕྱིར་བསྐྲད་མཐར།}} ཨོཾ་ཧ་ཧ་ཧཱུྃ་ཧཱུྃ་ཧྲཱིཿཧྲཱིཿཕཊ་ཕཊ༔  {{TibChung|ཅེས་བཟླས་པས་བསྔགས་པའི་སྲུང་སྐུད་ཕོའི་དཔུང་པ་གཡོན་དང་མོའི་གཡས་སུ་འཆིང་ལ་སྲུང་འཁོར་གསལ་བཏབ།  མཎྜལ་བཀྱེ་བསྡུ་བྱས་ལ།  སེམས་བསྐྱེད་གསལ་གདབ་སོགས་ཆོས་བཤད་ལོ་རྒྱུས་སྔར་བཞིན་ལས།}} སྡེ་གསུམ་སྤྱི་ལ་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་གྱི་ཐུན་མོང་མ་ཡིན་པའི་གདུལ་བྱ་བརྩོན་འགྲུས་ཅན་རྗེས་སུ་འཛིན་པ་ཟབ་དབང་དངོས་བསྐུར་བར་བགྱི་བ་ལ།  བདག་ཉིད་སློབ་དཔོན་གྱིས་བགྱི་འོས་རྣམས་སྔོན་དུ་གྲུབ་ནས་{{TibChung|སོགས་ཀྱི་མཚམས་སྦྱར་ལ་མཎྜལ་འབུལ་དུ་གཞུག  །གསོལ་བ་གདབ་པ་ནས་དམ་ཚིག་བསྒྲག་བཟུང་གི་བར་སྔར་བཞིན་སོང་ནས་ཡེ་ཤེས་དབབ་པའི་སྐབས།}}  ཡིད་ཀྱི་གནད་ཚོགས་དྲུག་གི་ཡུལ་ལ་སྐད་ཅིག་ཙམ་མ་ཡེངས་པར་དམིགས་པ་འདི་བཞིན་དུ་མཛོད།  སློབ་བུའི་ལུས་སྣང་མི་དམིགས་སྟོང་པའི་ངང་༔  སྐད་ཅིག་དྲན་རྫོགས་ཡེ་ཤེས་སྒྱུ་མའི་སྐུ༔  ཤྲཱི་སེངྷ་རྣལ་འབྱོར་གཞོན་ནུའི་ཚུལ༔    དཀར་དམར་མདངས་ལྡན་ཞལ་གཅིག་ཕྱག་གཉིས་པ༔  གཅེར་བུ་རུས་པའི་རྒྱན་དྲུག་གར་སྟབས་བསྒྱུར༔  རྩ་གསུམ་འཁོར་ལོ་བཞི་ལྡན་ལྟེ་བའི་མདོར༔    གཏུམ་མོ་ཨ་ཤད་དབྱིབས་ཅན་རབ་འབར་བ༔  སྤྱི་བོར་ཐིག་ལེ་ཧཾ་ཡིག་མགོ་ཐུར་བསྟན༔  སྙིང་ {{TibChung|[14a]}} གར་རྣམ་ཤེས་ངོ་བོ་ཨ་དཀར་བསྒོམ༔    སློབ་དཔོན་ཤྲཱི་སེངྷ་ཡབ་ཡུམ་དུ༔  གསལ་ལ་བཟོད་མེད་མོས་གུས་བསྐྱེད་པའི་མཐུས༔  བླ་མའི་སྦྱོར་མཚམས་ལས་ནི་འོད་འཕྲོས་པའི༔  སློབ་མའི་གསང་བ་ནས་ཞུགས་གཏུམ་མོ་སྦར༔  སྤྱི་བོའི་ཐིག་ལེ་ཞུ་ཞིང་གསལ་བ་ལས༔    ལུས་ཀྱི་སྟོད་སྨད་དྭངས་མ་དཀར་དམར་གྱིས༔  གང་ཞིང་སྙིང་གའི་ཐད་དུ་གོ་སྐབས་ཅན༔  བདེ་བ་བསྒོམ་ཞིང་བདེ་བ་ཆེར་འཕེལ་ཚེ༔  དཀར་དམར་འདྲེས་ཤིང་ཨ་ཡིག་ལ་ཐིམས་པས༔  ཐིག་ལེ་ཆེར་འཕེལ་བདེ་བ་ཆེན་པོར་བསྒོམ༔    རྒྱལ་བའི་ཚོགས་རྣམས་བདེ་བ་ཆེན་པོར་ཞུར༔  བདུད་རྩིའི་རང་བཞིན་སྤྱི་བོའི་གཙུག་ནས་བྱུང་༔  སྙིང་གི་ནང་ཞུགས་ལུས་ཀུན་མེར་གྱིས་ཁེངས༔  བདེ་བ་ཆེན་པོའི་ཡེ་ཤེས་རྩེ་གཅིག་བསྒོམ༔  {{TibChung|ཞེས་བརྡ་སྤྲད་ལ་སྦྱར་སྤོས་བཏུལ་ཞིང་ཌཱ་དྲིལ་རོལ་མོའི་སྒྲ་དང་བཅས་རྩ་སྔགས་དང་ཨ་སུམ་སྦྲེལ་མང་དུ་བཟླས་པས་བྱིན་དབབ་ལ་གོང་བཞིན་བརྟན་པར་བྱ།}}  དེ་ནས་དངོས་གཞིའི་དབང་རྣམས་རིམ་པར་འབྱུང་བའི་དང་པོ་བུམ་པའི་དབང་གི་སླད་དུ་དམིགས་པ་འདི་བཞིན་དུ་མཛོད།  བུམ་ནང་ཤྲཱི་སེངྷའི་སྤྱི་བོ་ཡི༔  ཨོཾ་ཡིག་གསལ་ཞིང་ཡབ་ཡུམ་སྦྱོར་བ་ཡིས༔  ཨོཾ་ལས་དགའ་བའི་བདུད་རྩི་དཀར་གསལ་ {{TibChung|[14b]}} བབས༔  སྐུ་གང་སྦྱོར་མཚམས་ནས་བབས་བུམ་པ་གང༔  ཁ་ནས་ལུད་ཅིང་སློབ་མའི་སྤྱི་བོར་བབས༔  བདེ་ཆེན་འཁོར་ལོའི་རྩ་ཁེངས་བདེ་ཆེན་བསྒོམ༔  དེ་བཞིན་མགྲིན་དང་ཐུགས་ཀའི་ཨཱཿཧཱུྃ་ལས༔  བདུད་རྩི་དམར་མཐིང་དགའ་ཆེན་ཁྱད་དགའ་ཡི༔    ངོ་བོ་བབས་ཤིང་སློབ་མའི་མགྲིན་པ་དང་༔  སྙིང་ག་གང་བས་བདེ་མཆོག་རྒྱས་པར་བསྒོམ༔  དེ་རྗེས་ལྟེ་བའི་ཧྲཱིཿལས་ལྷན་སྐྱེས་ཀྱི༔    བདུད་རྩི་བབས་ཤིང་སློབ་མའི་ལྟེ་བ་ཁེངས༔  སྐུ་ཡི་གནས་རྣམས་མ་ལུས་ཐམས་ཅད་ནི་༔  བདུད་རྩི་འོད་ལྔའི་མདངས་ལྡན་བབས་པ་ཡིས༔  སློབ་མའི་ལུས་གང་བདུད་རྩི་གྱེན་འཁྱིལ་བས༔  སྤྱི་གཙུག་རྡོ་རྗེ་སེམས་དཔས་རྒྱས་བཏབ་མོས༔  {{TibChung|རྣམ་བུམ་ཐོགས་ལ།}}  ཧཱུྃ༔  རང་བྱུང་བདེ་བ་ཆེན་པོའི་བུམ་པ་རུ༔    ལྷན་ཅིག་སྐྱེས་པའི་བླ་མ་ཡབ་ཡུམ་བཞུགས༔  བདེ་ཆེན་སྦྱོར་བའི་བདུད་རྩི་བསམ་མི་ཁྱབ༔  རང་གྲོལ་བདེ་ཆེན་ཡེ་ཤེས་བསྐྱེད་པའི་ཕྱིར༔  བླ་ན་མེད་པ་བུམ་པས་དབང་བསྐུར་རོ༔  {{TibChung|རྩ་སྔགས་མཐར།}}  ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔  {{TibChung|ཞེས་བུམ་པ་གནས་བཞིར་བཞག་ཅིང་བུམ་ཆུ་སྦྱིན།}}  དེས་བུམ་པ་ལ་བརྟེན་པའི་དབང་བཞི་ཆིག་རྫོགས་སུ་ཐོབ་པ་ཡིན་ནོ།  །གཉིས་ {{TibChung|[15a]}} པ་གསང་བའི་དབང་གི་སླད་དུ་དམིགས་པ་འདི་བཞིན་དུ་མཛོད།  སློབ་དཔོན་ཡབ་ཡུམ་ཤྲཱི་སེངྷ་ནི༔  མཉམ་པར་སྦྱོར་བའི་སྤྱི་མགྲིན་སྙིང་ལྟེ་བཞིར༔  ཡིག་འབྲུ་ཨོཾ་ཨཱཿཧཱུྃ་ཧྲཱིཿགསལ་བ་ལས༔  དགའ་བཞིའི་ངོ་བོ་འོད་ཟེར་དཀར་དམར་མཐིང་༔    སེར་པོ་བདུད་རྩིའི་རང་བཞིན་ཡོངས་རྫོགས་བབ༔  སློབ་མའི་ཁར་སྦྱིན་རྩ་བཞི་ལུས་ཀུན་གང་༔  བདེ་ཆེན་བཞི་དང་ཡོངས་རྫོགས་ཐོབ་པར་བསྒོམ༔  {{TibChung|གསང་ཐོད་བདུད་རྩི་ཐོགས་ལ།}}  ཧཱུྃ༔  ཡུལ་སྣང་རྣམ་པར་དག་པའི་ཐོད་པ་རུ༔    རྣམ་པར་དག་པའི་དབང་པོ་སྦྱོར་བ་ཡིས༔  རྣམ་ཤེས་ཡེ་ཤེས་བསྒྱུར་བའི་བྱང་སེམས་བསྐྱིལ༔  ཀུན་གཞི་རྣམ་པར་གྲོལ་ཕྱིར་དབང་བསྐུར་རོ༔  {{TibChung|རྩ་སྔགས་མཐར།}}  ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔  {{TibChung|ཞེས་ཐོད་པ་གནས་བཞིར་བཞག་ཅིང་བདུད་རྩི་སྦྱིན།}}  དེས་ཐོད་པའི་བདུད་རྩི་ལ་བརྟེན་པའི་དབང་བཞི་ཆིག་རྫོགས་སུ་ཐོབ་པ་ཡིན་ནོ།  །གསུམ་པ་ཤེས་རབ་ཡེ་ཤེས་ཀྱི་དབང་གི་སླད་དུ་དམིགས་པ་འདི་བཞིན་དུ་མཛོད།  སློབ་མ་རིག་མ་བླ་མ་ཡབ་ཡུམ་གསལ༔  འདུ་ཤེས་གསུམ་གྱིས་སྙོམས་པར་འཇུག་ལ་བསླབ༔  ཡབ་ཡུམ་གནས་བཞིར་ཡིག་འབྲུ་བཞི་གསལ་བ༔  {{TibChung|[15b]}} དེ་ལས་རིམ་བཞིན་ཐིག་ལེ་འཕེལ་བ་ཡང་༔  རྩ་བཞི་ལ་བབས་གྱེན་དུ་དྲངས་པ་ཡིས༔  དགའ་བཞི་ཡོངས་རྫོགས་ཉིད་དུ་བསྒོམ་པར་བྱ༔  {{TibChung|རིག་ཙཀ་ཐོགས་ལ།}}  ཧཱུྃ༔  སྣང་ཞིང་སྟོང་ལ་གསལ་བའི་རིག་མ་ལ༔  མི་རྟོག་ངང་དུ་མཉམ་པར་སྦྱོར་བ་ལས༔    བདེ་བའི་ཡེ་ཤེས་ནམ་མཁའ་གང་བར་འཕེལ༔  དབྱེར་མེད་ལྷུན་གྲུབ་ཆེན་པོར་རྟོགས་པར་ཤོག༔  {{TibChung|རྩ་སྔགས་མཐར།}}  ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔  {{TibChung|ཞེས་ལག་གཡོན་དུ་གཏད།}}  དེས་གསང་བ་བྷ་གའི་དཀྱིལ་འཁོར་ལ་བརྟེན་པའི་དབང་བཞི་ཆིག་རྫོགས་སུ་ཐོབ་པ་ཡིན་ནོ།  །དེ་ནས་དབང་བཞི་པའི་སླད་དུ།  རང་བྱུང་རྡོ་རྗེ་སེམས་དཔའི་མེ་ལོང་འདིས་མཚོན་ཏེ་སེམས་ཉིད་ཟང་ཐལ་ངོ་བོ་ཀ་ནས་དག་པ་ཤེལ་ལྟ་བུ་ལས།  རང་བཞིན་ལྷུན་གྲུབ་ཀྱི་ཡོན་ཏན་འཇའ་ཚོན་ལྟར་ཅིར་ཡང་འཆར་ཞིང་།  ཐུགས་རྗེ་རྣམ་འཕྲུལ་འགག་མེད་སྣ་ཚོགས་སུ་སྣང་ཡང་དབྱིངས་ལ་འགྱུར་བ་མེད་པའི་དོན་རྟོགས་པར་མཛོད་ཅིག  །{{TibChung|མན་ཤེལ་བསྟན་ལ།}}  ཧཱུྃ༔  ཕྱི་ནང་ཟང་ཐལ་ཀ་ནས་དག་པ་ལ༔  ལྷུན་གྱིས་གྲུབ་པའི་འཇའ་ཚོན་ཅི་ཡང་འཆར༔  རྣམ་པར་འཕྲུལ་པའི་བྱེ་བྲག་ཅིར་སྣང་ཡང་༔  རང་བྱུང་དབྱིངས་ལས་འགྱུར་བ་མེད་པའོ༔  {{TibChung|རྩ་སྔགས་མཐར།}}  {{TibChung|[16a]}} ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔  རྨ་བྱའི་མདོངས་ཐིག་མེ་ལོང་དུ་འཆར་བ་འདིས་མཚོན་ཏེ།  ཀ་དག་གི་ངོ་བོ་དབྱིངས་རྣམ་དག་མེ་ལོང་དྭངས་པ་ལྟ་བུའི་རང་བཞིན་ལ།  རིག་པ་ཐིག་ལེ་ལུག་རྒྱུད་གསལ་བ་མདོངས་ཐིག་ལྟ་བུ་རང་ལས་འབྱུང་ཞིང་རང་ཤར་བ་སྣང་སྟོང་གཉིས་མེད་རང་གདངས་ལྷུན་གྲུབ་ཏུ་ཤེས་པར་མཛོད་ཅིག  །{{TibChung|རྨ་བྱའི་མདོངས་སྒྲོ་མེ་ལོང་དུ་འཆར་བ་བསྟན་ལ།}}  ཨ༔  དབྱིངས་ནི་རྣམ་པར་དག་པའི་རང་བཞིན་ལ༔  ཐིག་ལེ་གསལ་བའི་སྒྲོན་མ་རང་ལས་བྱུང༔  གཉིས་སུ་མེད་པའི་རང་གདངས་ངོ་མཚར་ཅན༔  ལྷུན་གྱིས་གྲུབ་པའི་ངང་དུ་བལྟ་བར་བྱ༔  {{TibChung|རྩ་སྔགས་མཐར།}}  ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨབྷི་ཥིཉྩ་ཧཱུྃ༔  ཁྱེད་རང་རྣམས་སྒོ་གསུམ་མ་བཅོས་ལྷུག་པར་ཀློད་ལ་ལྟ་སྟངས་གཡོ་བ་མེད་པས་མདུན་གྱི་ནམ་མཁའི་དབྱིངས་ལ་རང་བབས་སུ་ལྟོས་ཤིག  །ཧཱུྃ༔  ཕྱི་ནང་དབྱིངས་རིག་གཉིས་སུ་མེད་པ་ལ༔  གཉིས་སུ་འཛིན་པའི་ཀུན་བརྟག་བློ་ལས་འདས༔  ཆོས་དབྱིངས་ཁྱབ་བརྡལ་འོད་གསལ་ཟང་ཐལ་ལེ༔  འདི་ཞེས་བརྗོད་ཚིག་བྲལ་བར་དབྱིངས་རིག་བསྲེས༔  {{TibChung|རྩ་སྔགས་མཐར།}}  ཨ་ཨ་ཨ༔  སེམས་དུས་གསུམ་གྱི་རྟོག་པས་མ་ {{TibChung|[16b]}} བསླད་པར་ཐ་མལ་གྱི་ཤེས་པ་སོར་བཞག་རང་བབས་གཉུག་མའི་གཤིས་ལུགས་དེ་ཁོ་ན་ཉིད་ཀྱི་ངང་དུ་མཉམ་པར་ཞོག་ཅིག  །ཧཱུྃ༔    ཡེ་ནས་རྣམ་པར་དག་པའི་གཞི་ཐོག་ཏུ༔    བྱ་རྩོལ་བྲལ་བའི་བདེ་ཆེན་མཐར་ཕྱིན་ནས༔    འབྲས་བུ་རང་ལས་རྙེད་པ་ངོ་མཚར་ཆེ༔    དོན་དམ་དམིགས་མེད་མྱོང་བ་ངོས་བཟུང་བྲལ༔  ངོ་བོ་རང་བཞིན་ཐུགས་རྗེ་རྣམ་པ་གསུམ༔  དབྱེར་མེད་མི་ཕྱེད་དབྱིངས་རིག་གཉིས་སུ་མེད༔  མཐར་ཐུག་འབྲས་བུའི་ས་ལ་ཕྱིན་པའོ༔  {{TibChung|རྩ་སྔགས་མཐར།}}  དྷརྨ་ཀཱ་ཡ་ཨ༔  {{TibChung|ཞེས་ཅུང་ཟད་མཉམ་པར་བཞག།}}  དེས་དོན་དམ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་པའི་མཐར་ཐུག་ཚིག་གི་དབང་ཆེན་རབ་འབྱམས་ཆིག་རྫོགས་སུ་ཐོབ་པ་ཡིན་ནོ།  །{{TibChung|དེ་ནས་གོང་བཞིན།}}  ནམ་མཁའ་གང་བའི་རྩ་གསུམ་{{TibChung|སོགས་ཀྱིས་མཚམས་སྦྱར་ལ་ཤིས་བརྗོད་གང་འོས་བྱ།}}  དེ་ལྟ་ན་དེ་དག་རྣམས་ཀྱི་སྒོ་ནས་ཇི་སྐད་དུ།  དེ་ལྟར་རྣམ་པ་ཉི་ཤུས་བྱང་ཆུབ་པའི༔    བདེ་བ་ཆེན་པོའི་ཟབ་དབང་བསྐུར་བ་ནི༔  ཀུན་ལ་མ་ཡིན་བློ་ཆེན་ལྡན་ལ་གཏད༔    ཅེས་ཤིན་ཏུ་ཟབ་ཅིང་རབ་ཏུ་གཅེས་པའི་གཙིགས་སུ་བསྔགས་པར་མཛད་པ་བླ་མའི་ཟབ་དབང་ཉི་ཟླའི་རྒྱ་ཅན་ཐུན་མོང་མ་ཡིན་པ་ཉིད་ལེགས་པར་ཐོབ་པ་ལགས་{{TibChung|སོགས་ཀྱི་མཚམས་ {{TibChung|[17b]}} སྦྱར་ཏེ་དམ་ཚིག་ཁས་ལེན།  གཏང་རཀ་མཎྜལ་ལུས་ལོངས་སྤྱོད་དབུལ་བ།  དགེ་བསྔོ་བཅས་ཀྱི་སློབ་མ་རྣམས་གྲོལ།  གསུམ་པ་རྗེས་ཀྱི་རིམ་པ་ནི།  སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ་བ་སོགས་ཆོ་གའི་རྗེས་ཀྱི་བྱ་བ་རྣམས་མཐར་ཆགས་སུ་བཏང་བས་གྲུབ་བོ།  །རང་གནས་སྐུ་བཞིའི་ཡེ༵་ཤེ༵ས་ཉིད།  །སད་བྱེད་རྡོ༵་རྗེ༵འི་གཏོར་བླུགས་ཀྱི།  །ཆོ་ག་ཟབ་དབང་བདུད་རྩིའི་སྐྱེས།  །སྐལ་བཟང་འདོད་འཇོའི་དཔྱིད་དུ་གྲུབ།  །སྡེ་གསུམ་སྤྱི་ལ་གཅེས་པ་ཟབ་དབང་ཉི་ཟླའི་རྒྱ་ཅན་གྱི་ལེའུ་ཚན་ནོ།།  །།}}




{{TibChung|[18a]}} སྭསྟི།  མི་འགྱུར་ཡེ་ཤེས་གཅིག་ཉིད་ལས།  །གང་འདུལ་སྒྱུ་འཕྲུལ་དྲ་བའི་གར།  །རིག་འཛིན་རྒྱ་མཚོར་གུས་བཏུད་ནས།  །གང་དེའི་དགོངས་ཉམས་རྩལ་དབང་དབྱེ།  །{{TibChung|རྫོགས་པ་ཆེན་པོ་སྡེ་གསུམ་ལས་ཕྱི་སྐོར་སེམས་སྡེའི་བླ་མ་འགྲོ་འདུལ་སུམ་ཅུ་རྩ་གཅིག་གི་རྩལ་དབང་བསྐུར་བ་ལ་གསུམ།  སྦྱོར་བ།  དངོས་གཞི།  རྗེས་སོ།  །དང་པོ་ནི།  མདུན་དཀྱིལ་རས་བྲིས་སྤྱི་མཐུན་ནམ་མཎྜལ་ལ་མེ་ཏོག་གི་ཚོམ་བུ་ལྷ་གྲངས་འཀོད་པའི་ཁར་འཕྲུལ་སྟེགས་ལ་གྲུབ་ཐོབ་སུམ་ཅུ་རྩ་གཅིག་གི་སྐུ་འབག་བཤམ།  ཕྱི་ནང་གི་མཆོད་པ་གང་འབྱོར་དང་།  ཚོགས་ཀྱི་ཡོ་བྱད་སོགས་ཆོ་གར་འོས་པའི་རིགས་རྣམས་འདུ་བྱས་ལ།  བླ་མའི་བསྐྱེད་རིམ་བྱང་བུ་ཁྲིགས་སྡེབས་ཀྱི་གཞུང་བསྲང་ནས་བཟླས་པ་ཅི་འགྲུབ་དང་ཚོགས་མཆོད་རྒྱས་པར་བྱ།  རྣམ་བུམ་བསྒྲུབ་པ་མི་དགོས་ཤིང་།  ལས་བུམ་རྡོར་སེམས་བསྐྱེད་བཟླས་ཀྱིས་བྱིན་བརླབ་བོ།  །གཉིས་པ་སྒྲུབ་དབང་དངོས་ནི།  སློབ་མ་རྣམས་ཁྲུས་ནས་དབྱུང་།  བགེགས་བསྐྲད་ལ་སྲུང་འཁོར་བསྒོམ།  མཎྜལ་བཀྱེ་བསྡུ་དང་།  སེམས་བསྐྱེད་གསལ་བཏབ་ལ་ལོ་རྒྱུས་ཀྱི་ཁྱད་པར།}} དེ་ལ་འདིར་སྐབས་སུ་བབས་པའི་འཆད་བྱ་གསང་སྔགས་སྔ་འགྱུར་བའི་རང་སྐད་ཐུན་མིན་བླ་མེད་ཡོ་ག་སྐོར་གསུམ་ཞེས།  ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་པའི་ཆོ་འཕྲུལ་དུ་རྟོགས་པས་ཐབས་བསྐྱེད་པའི་རིམ་པ་དང་སྤྱོད་པ་གཙོ་བོར་བརྟེན་པ་རྒྱུད་མ་ཧཱ་ཡོ་ག  །ཆོས་ཐམས་ཅད་སེམས་ཉིད་དབྱིངས་ཡེ་གཉིས་སུ་མེད་པས་རྩལ་དུ་རྟོགས་པས་ཤེས་རབ་རྫོགས་པའི་རིམ་པ་ {{TibChung|[18b]}} དང་ཏིང་ངེ་འཛིན་གཙོ་བོར་བརྟེན་པ་ལུང་ཨ་ནུ་ཡོ་ག  །ཆོས་ཐམས་ཅད་ཡེ་ནས་སྐྱེ་འགག་མེད་པར་རང་བྱུང་གི་ཡེ་ཤེས་རང་སྣང་བར་རྟོགས་པས་ཡེ་ཐོག་ཏུ་གྲོལ་བར་བྱེད་པའི་ཐབས་སྤང་བླང་རེ་དོགས་དང་བྲལ་བས་ལྟ་བ་ལ་གཙོ་བོར་བརྟེན་པ་རྫོགས་པ་ཆེན་པོ་ཨ་ཏི་ཡོ་ག་སྟེ།  དེ་ལྟར་བསྐྱེད་རྫོགས་རྣམ་པ་གསུམ་དུ་དབྱེ་བ་ལས་འདིར་མན་ངག་རྫོགས་པ་ཆེན་པོ།  དེའང་སྤྲོས་བྲལ་རང་བྱུང་གི་ཡེ་ཤེས་རྒྱ་ཆད་ཕྱོགས་ལྷུང་མེད་པ་ཐེག་པ་ཀུན་གྱི་དོན་ཐམས་ཅད་ཡོངས་སུ་རྫོགས་པས་རྩེ་མོར་གྱུར་པ་སྟེ།  ཀུན་བྱེད་རྒྱལ་པོ་ལས།  གཅིག་རྫོགས་གཉིས་རྫོགས་སེམས་སུ་རྫོགས།  །གཅིག་རྫོགས་སེམས་ཀྱི་བྱས་པར་རྫོགས།  །གཉིས་རྫོགས་ཕུན་སུམ་ཚོགས་པར་རྫོགས།  །ཀུན་རྫོགས་བྱང་ཆུབ་སེམས་སུ་རྫོགས།  །ཞེས་གསུངས།  དེ་ན་མ་ཧཱ་དང་ཨ་ནུ་མན་ཆད་ཐམས་ཅད་རྩོལ་སྒྲུབ་ཀྱི་བླང་དོར་བྱས་པས་རེ་དོགས་ཀྱི་དྲི་མས་རང་བྱུང་གི་ཡེ་ཤེས་ལ་སྒྲིབ་པའི་ཕྱིར་རྫོགས་ཆེན་གྱི་གོལ་སར་བཤད་དེ།  ནམ་མཁའ་དང་མཉམ་པའི་རྒྱུད་ལས།  མ་ཧཱ་རྡོ་རྗེ་འཆང་འདོད་པས།  །ཐབས་དང་ཤེས་རབ་སྒོར་ཞུགས་ནས།  །རང་རྒྱུད་དག་པའི་དཀྱིལ་འཁོར་ལ།  །བསྙེན་སྒྲུབ་རྣམ་བཞིས་སྒྲུབ་པར་བྱེད།  ཨ་ཏི་ཡོ་གའི་བདེ་ཆེན་ནི།  །རྩོལ་སྒྲུབ་འདས་པའི་བྱང་ཆུབ་སེམས།  ། {{TibChung|[19a]}} རྩོལ་སྒྲུབ་འདས་པ་མ་ཧཱས་སྒྲིབ།  །རྫོགས་ཆེན་རྩོལ་སྒྲུབ་བྱེད་པ་ནི།  །མ་ཧཱ་ཡོ་གར་གོལ་བར་བཤད།  །ཨ་ནུ་དབྱེར་མེད་ས་འདོད་པ།  །དབྱིངས་དང་ཡེ་ཤེས་སྒོར་ཞུགས་ནས།  །འདི་ལྟར་སྣང་བའི་ཆོས་རྣམས་ལ།  །རྒྱུ་ནི་དག་པའི་དབྱིངས་ལྟ་བ།  །འབྲས་བུ་ཡེ་ཤེས་དཀྱིལ་འཁོར་ལྷ།  །ཨ་ཏི་ཡོ་གའི་བདེ་ཆེན་ནི།  །རྒྱུ་འབྲས་འདས་པའི་བྱང་ཆུབ་སེམས།  །རྒྱུ་འབྲས་འདས་པ་ཨ་ནུས་སྒྲིབ།  །རྫོགས་ཆེན་རྒྱུ་འབྲས་གཉིས་ལྟ་ན།  །ཨ་ནུ་ཡོ་གར་གོལ་བར་བཤད།  །ཅེས་གསུངས།  རྒྱུ་མཚན་དེའི་ཕྱིར་ཨ་ཏི་ཡོ་ག་ནི་བྱ་རྩོལ་དང་བྲལ་བའི་ཡེ་ཤེས་ལ་དབང་བསྒྱུར་བ་སྟེ།  ཀུན་བྱེད་ལས།  ཀྱེེ་སེམས་དཔའ་ཆེན་པོ།  རྫོགས་པ་ཆེན་པོའི་ལྟ་སྤྱོད་ནི།  །རྒྱུ་འབྲས་སྒྲུབ་དང་མི་འདྲ་སྟེ།  །ལྟ་སྤྱོད་བྱང་ཆུབ་སེམས་འདི་ནི།  །ནམ་མཁའ་ལྟ་བུའི་རང་བཞིན་ཏེ།  །ནམ་མཁའ་ལ་ནི་རྟོག་དཔྱོད་འདས།  །ཞེས་སོགས་རྒྱ་ཆེར་གསུངས་ཤིང་།  ནམ་མཁའ་ཆེ་ལས་ཀྱང་།  རང་བྱུང་ཡེ་ཤེས་རྩོལ་མེད་ལས།  །གྲོལ་ནས་གྲོལ་བའི་ལམ་ཡང་སྟོན།  །ཞེས་གསུངས།  རྫོགས་པ་ཆེན་པོ་དེ་ལ་དབྱེ་ན།  ཨ་ཏི་བཀོད་པ་ཆེན་པོ་ལས།  ཡིད་ཅན་རྣམས་ལ་སེམས་ཀྱི་སྡེ།  །ནམ་མཁའ་ཅན་ལ་ཀློང་གི་སྡེ།  ། {{TibChung|[19b]}} རིམ་རྩོལ་བྲལ་ལ་མན་ངག་སྡེ།  །ཞེས་པས།  སེམས་སྡེ་ཀློང་སྡེ་མན་ངག་གི་སྡེ་དང་གསུམ་ལས་འདིར་སེམས་སྡེ།  དེ་ལ་སྔ་འགྱུར་དང་ཕྱི་འགྱུར་བཅུ་གསུམ་སྟེ་མ་བུ་བཅོ་བརྒྱད་དུ་གནས་པའི་རྒྱུད་ཀྱི་དགོངས་པའི་ཉིང་ཁུ་ཟབ་མོ་སྟེ།  དེ་ལའང་རིང་བརྒྱུད་བཀའ་མ་དང་།  ཉེ་བརྒྱུད་གཏེར་མ་གཉིས་སུ་བཞུགས་པ་ལས།  འདིར་ཤིན་ཏུ་ཟབ་པ་ཉེ་བརྒྱུད་གཏེར་མ།  ཀུན་བཟང་རྡོ་རྗེ་སེམས་དཔའི་ཐུགས་བཅུད།  སངས་རྒྱས་གཉིས་པ་པདྨ་ཀ་རའི་མན་ངག  །བོད་ཡུལ་ས་འོག་ཀུན་གྱི་གཏེར་གཅིག་སྔ་ན་མེད་པའི་ངོ་མཚར་རྨད་དུ་བྱུང་བ།  ཟབ་ཆོས་རྫོགས་པ་ཆེན་པོ་སྡེ་གསུམ་གྱི་ནང་ཚན་ཕྱི་སྐོར་སེམས་སྡེའི་རིག་འཛིན་བླ་མ་འགྲོ་འདུལ་སུམ་ཅུ་རྩ་གཅིག་གི་བྱིན་རླབས་རྩལ་དབང་ཟབ་མོ་སྒྲུབ་པ་སྐབས་སུ་བབ་པ་ཡིན།  དེ་ལ་བདག་ཉིད་སློབ་དཔོན་གྱིས་བགྱི་བར་འོས་པ་{{TibChung|སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག།}}  སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས།  ཟུང་འཇུག་དགོངས་པ་བརྙེས་པ་ཡི༔  འགྲོ་འདུལ་སུམ་ཅུ་རྩ་གཅིག་གི༔  བྱིན་རླབས་བརྩེ་བས་གནང་དུ་གསོལ༔  {{TibChung|ལན་གསུམ།}}  དེ་ལྟར་གསོལ་བ་བཏབ་པ་ལ་བསྐུར་ཐོབ་བྲལ་བའི་དབང་བསྐུར་ཡེ་ནས་རང་ལ་རྫོགས་པར་གདམས་པའི་སྒོ་ནས་ལན་སྦྱིན་ {{TibChung|[20a]}} པ་འདི་ལ་གསན་པས་ཁྱབ་སྟེ།  སྤྱིར་ནི་འགྲོ་འདུལ་ལྔ་བཅུ་རྩ་བརྒྱད་པོ༔  ཐམས་ཅད་ཟུང་འཇུག་མངོན་གྱུར་ཀུན་ཏུ་བཟང་༔  དགོངས་པ་རང་བྱུང་ནམ་མཁའི་རྣལ་འབྱོར་ཚོགས༔  ཡེ་ཤེས་སྐུ་ཅན་འཁོར་འདས་ཡོངས་ལ་ཁྱབ༔  བཞུགས་ཡུལ་ཞིང་ཁམས་གཞན་དུ་བཙལ་མི་འཚལ༔  ད་ལྟའི་ནམ་མཁའ་འདིར་ཡང་རྣལ་འབྱོར་རྣམས༔  རང་གི་སེམས་ཉིད་འདི་ལའང་བླ་མས་ཁྱབ༔  བསྐུར་བྱ་བསྐུར་ཐོབ་སྒྲུབ་དང་སྒྲུབ་ཐབས་མེད༔  རྣལ་འབྱོར་ལྟ་བའི་ངང་ལ་སྒྲུབ་དབང་རྫོགས༔  {{TibChung|ཞེས་དང་།}}    དེ་ལ་རང་གནས་ཡེ་ཤེས་ཀྱི་ཚོགས་བསགས་པའི་ཆེད་དུ་ལྟ་བའི་རྒྱལ་པོ་ཡས་འབུབ་ཀྱི་མཆོད་པ་འབུལ་བར་གདམས་པ་སྟེ།  ཨེ་མ་ཧོ་བདེ་གཤེགས་བླ་མ་རྣམས༔    བསམ་གྱིས་མི་ཁྱབ་ཆོས་ཉིད་ཀློང་༔  ཀུན་ཏུ་བཟང་པོའི་རྣལ་འབྱོར་ནི༔  ལྟ་བའི་རྒྱལ་པོའི་མཆོད་པ་འབུལ༔  དེའང་རང་རིག་གདོད་ནས་རྣམ་པར་དག་པ་རིག་རྩལ་བླ་མའི་ལྷ་ཚོགས་རྣམས་ཀྱི་སྤྱན་སྔར་གནས་ལུགས་ལྟ་བ་མཇལ་བའི་ཕྱག་འཚལ་ཞིང་གང་ཤར་ཆོས་ཉིད་རྒྱན་དུ་རིག་བའི་མཆོད་པ་འབུལ་བ་སྔོན་དུ་འགྲོ་བས།  གློ་བུར་འཁྲུལ་པའི་མུན་ཁུང་བརྟོལ་ཏེ་འོད་གསལ་སྣང་བའི་དགའ་སྟོན་སྩོལ་བར་གསོལ་བ་གདབ་པ་འདིའི་རྗེས་ {{TibChung|[20b]}} ཟློས།  གདོད་ནས་དག་པའི་ཀུན་བཟང་བླ་མ་ལ༔  མཚན་འཛིན་འཁྲུལ་པའི་བསྐང་བཤགས་མི་འཚལ་ཞིང༔  གཉིས་སུ་འཛིན་པའི་ཕྱག་འཚལ་མོས་གུས་བྲལ༔    དེ་བས་རང་རིག་ཀློང་དུ་ཕྱག་འཚལ་ལོ༔  གཉིས་སུ་མེད་པའི་མཆོད་སྤྲིན་རྒྱ་མཚོས་མཆོད༔  བསམ་ལས་འདས་པའི་ངང་དུ་ཐུགས་དམ་བསྐང་༔  བརྗོད་མེད་བརྗོད་པ་ཐམས་ཅད་མཐོལ་ལོ་བཤགས༔  ཨེ་མ་ཧོ་བདེ་གཤེགས་བླ་མ་རྣམས༔  ཀུན་བཟང་དགོངས་ཀློང་སེམས་སུ་རྫོགས་པ་ལ༔  ཕྱི་ནང་གཉིས་མེད་སྤྲོས་པའི་མཐའ་ལས་འདས༔    ཆོས་དབྱིངས་ཀློང་ཆུབ་ངང་དུ་ཕྱག་འཚལ་ལོ༔  ཨེ་མ་ཧོ་རང་རིག་བླ་མ་རྣམས༔    འཁོར་འདས་ཐམས་ཅད་ས་ལེར་མཐོང་བ་ལ༔  གཉིས་སུ་མེད་པས་དབྱིངས་སུ་ལྷུན་རྫོགས་པས༔  མཐོང་བྱ་མཐོང་མཁན་མེད་ལ་ཕྱག་འཚལ་ལོ༔  ཨེ་མ་ཧོ་བདེ་གཤེགས་བླ་མ་རྣམས༔  ཕྱི་ནང་ནམ་མཁའ་ཀུན་ལ་སྐུ་ནི་ཡོངས་སུ་ཁྱབ་པ་ཉིད༔  བཞུགས་པའི་ཡུལ་ནི་ཕྱོགས་བཅུའི་འཇིག་རྟེན་དགན་མཆིས༔  གློ་བུར་དྲི་མེད་རྣམ་རྟོག་བསལ་ཕྱིར་གཟུགས་སྐུར་བཞེངས་པ་རྣམས༔  མཚན་འཛིན་འཁྲུལ་པ་འདི་དག་མྱུར་དུ་བསལ་བར་མཛད་དུ་གསོལ༔  {{TibChung|ཞེས་གསོལ་བ་བཏབ།}}  སློབ་དཔོན་གྱིས་རིག་འཛིན་ {{TibChung|[21a]}} བླ་མ་རྣམས་ལ་ཐུགས་དམ་བསྐུལ་བའི་སླད་དུ་གསོལ་བ་གདབ་པར་བྱ་བ་ཡིན་ཏེ།  ཨེ་མ་ཧོཿ  བདེ་གཤེགས་བླ་མ་འགྲོ་འདུལ་ལྔ་བཅུ་རྩ་བརྒྱད་རྣམས༔  དམིགས་མེད་ཆོས་ཀྱི་སྐུ་ལས་ད་ལྟ་བཞེངས་སུ་གསོལ༔  ཕྱི་སྐོར་བླ་མ་སུམ་ཅུ་རྩ་གཅིག་སྣང་བར་མཛོད༔  ཡེ་ཤེས་སྐུ་ཡི་སློབ་མར་བྱིན་རླབས་དབང་ཆེནད་ལྟ་བསྐུར་དུ་གསོལ༔  {{TibChung|ཞེས་གསོལ་བ་བཏབ།}}  སློབ་དཔོན་ཉིད་རིག་འཛིན་བླ་མའི་སྐུར་བཞུགས་པའི་དྲུང་དུ།  ཁྱེད་རང་རྣམས་ཀྱང་རིག་འཛིན་བླ་མ་སུམ་ཅུ་རྩ་གཅིག་གི་སྐུ་འདི་བཞིན་དུ་གསལ་ཐོབ་ཅིག  །ལྟ་བ་རང་བཞིན་དགོངས་ཀློང་མཁར༔  {{TibChung|ཞེས་སོགས་རྟེན་གྱི་བྱང་བུ་མཐར་ཆགས་སུ་བཏང་ནས།}}  བྱིན་རླབས་འོད་ཕུང་འབར་བར་བསམ༔  དེ་ལྟར་གསལ་བཞིན་པ་ལ་རིག་འཛིན་བླ་མ་རྣམས་ཀྱིས་དོ་ཧ་རྡོ་རྗེའི་གླུ་དགོངས་པ་མི་གཡོ་བའི་ངང་ནས་བླངས་པ་དང་ཆབ་གཅིག་རང་འདྲའི་སྐུ་གཉིས་པ་རེ་བྱུང་སྤྱི་བོ་ནས་ཐིམ་པས་སྐུའི་བྱིན་རླབས་དང་།  རྡོ་རྗེའི་བཟླས་བ་བྱ་བ་གསུང་གི་བྱིན་རླབས་དང་།  རིག་འཛིན་བླ་མ་རྣམས་རང་རིག་ཏུ་རྫོགས་པའི་ངང་དུ་མཉམ་པར་བཞག་པ་ཐུགས་ཀྱི་བྱིན་རླབས་ཡིན་པས།  ཁྱེད་རང་རྣམས་དགོངས་པ་སྐྱེ་མེད་ཀྱི་ངང་ལས་མ་གཡོས་བཞིན་དུ་གྲགས་སྟོང་རྡོ་རྗེའི་གླུ་བླངས་པ་འདི་ལ་སྙན་གྱི་ {{TibChung|[21}} བ།  དབང་པོ་རྩེ་གཅིག་ཏུ་གཏོད་པར་ཞུ།  {{TibChung|ཤྲཱི་སེངྷའི་སྐུ་ཙཀ་ཐོགས་ལ།}}  སློབ་དཔོན་ཤྲཱི་སེང་ཧས་བསམ་གཏན་གྱི་ཁང་བུར་རྡོ་རྗེའི་གླུ་ཕྱི་མ་བླངས་པའི་འདི་སྐད་དོ།  །ཇི་ལྟར་བསམ་ཡང་མི་རྟོགས་ངང༔  ཇི་ལྟར་སྨྲས་ཀྱང་སྒོམ་པ་མེད༔  སྣང་སྲིད་ཆོས་ཀུན་ཡེ་ཤེས་ངང་༔  ཡེ་ཤེས་བཙལ་དུ་མེད་པ་འདི༔  རང་བྱུང་རང་ཤར་ཐལ་ལེ་བ༔  ང་ནི་དེང་ཕྱིན་གཞི་ལ་གནས༔  གཞི་ནི་མ་བཅོས་ལྷུག་པར་འདུག༔  མཚན་ཉིད་ཀུན་ལྡན་འོད་གསལ་བ༔  ཅིར་ཡང་མ་ཡིན་ཅིར་ཡང་རྟོགས༔  ལྟ་བ་མཐར་ཕྱིན་ཤྲཱི་སེང་༔  སྒོམ་པའི་བློ་དང་བྲལ་འདོད་ནས༔  གསལ་བ་འདི་ལ་ལམ་བྱས་པས༔  གཏད་སོ་མེད་པའི་ཉམས་ཞིག་ཤར༔  རྒྱུན་ཆད་མེད་པའི་ཤྲཱི་སེང་༔  སྤྱོད་པ་སྤྱད་དུ་འདུག་གམ་བལྟས༔  ཅི་བྱས་ཐམས་ཅད་བདེ་བ་ཆེ༔  གང་བྱུང་ཐམས་ཅད་དགའ་བའི་ངང་༔  ཟུང་འཇུག་མངོན་གྱུར་ཤྲཱི་སེང་༔  འབྲས་བུ་ཐོབ་པར་བྱ་བའི་ཕྱིར༔  གཞི་ཡི་སྟེང་དུ་མཉམ་པར་བཞག༔  འཇམ་དཔལ་བཤེས་གཉེན་གདམས་བ་སྟེ༔  སེམས་ཀྱི་ཀློང་ནས་གཏེར་དུ་རྙེད༔  རྣམ་ཤེས་ཡུལ་དབང་ཀུན་གཞི་རྣམས༔  སོ་སོར་དབྱེར་མེད་དམིགས་སུ་མེད༔  གང་ཡང་འདི་ཞེས་མེད་པ་ཡི༔  བདེ་བ་ཆེན་པོར་ཨ་ལ་ལ་ ཧོཿ  {{TibChung|ཞེས་བླངས་ {{TibChung|[22a]}} ལ་སྐུ་ཙཀ་སྤྱི་བོར་བཞག  །}} ཨ་སུམ་སྦྲེལ་གྱི་རྡོ་རྗེའི་བཟླས་པ་མཛད་པར་ཞུ།  {{TibChung|ཞེས་རྡོར་བཟླས་ལན་བདུན་ནམ་གསུམ་ཙམ་བྱ།}}  ཤྲཱི་སེངྷ་རང་རིག་ཏུ་རྫོགས་པའི་ངང་དུ་མཉམ་པར་ཞོག་ཅིག  །{{TibChung|ཅེས་དགོངས་པའི་ངང་དར་ཅིག་བསྐྱང་།  དེ་བཞིན་དུ་ལི་ཙཱ་བི་དྲི་མེད་གྲགས་པའི་སྐུ་ཐོགས་ལ།}}  རིན་པོ་ཆེའི་ཁང་བཟང་ནས་སྐྱ་རེང་དང་པོ་ཤར་བ་དང་དུས་མཚུངས་པར་ལི་ཙཱ་བི་དྲི་མེད་གྲགས་པ་འདི་སྐད་ལོ།  །ཨ་ཧོཿ  གསང་སྔགས་ནམ་མཁའི་རྣལ་འབྱོར་དྲི་མེད་གྲགས་པ་ང་༔  ཡུལ་ལ་ཞུགས་པའི་སེམས་རྣམས་ཐམས་ཅད་དབྱིངས་ཉིད་དེ༔  ཅོག་བཞག་ལྷུག་པར་བཞག་པའི་རིག་པ་འདི་ཀ་རང་༔    ཕྱི་ནང་གཉིས་མེད་ཟང་ཐལ་ཀུན་ཏུ་འོད་གསལ་བའོ༔  {{TibChung|ཞེས་དང་།  ཨ་སུམ་སྦྲེལ་གྱི་རྡོར་བཟླས།}}  ལི་ཙཱ་བི་དྲི་མེད་གྲགས་པ་རང་རིག་ཏུ་རྫོགས་པའི་ངང་དུ་མཉམ་པར་{{TibChung|བཞག།  ལྷ་དབང་བརྒྱ་བྱིན་གྱི་སྐུ་ཐོགས་ལ།}}  རྣམ་པར་རྒྱལ་བའི་ཁང་བཟང་དུ་སེམས་བདེ་བ་ཆེན་པོ་དུས་ལས་འདས་པའི་ཚེ་ལྷ་ཡི་དབང་པོ་འདི་སྐད་ལོ།  །ལྷ་དབང་བརྒྱ་བྱིན་བདེ་ཆེན་རང་གསལ་བདག་ཉིད་ནི༔  བདེ་བའི་ཡུལ་ལ་མ་ཞེན་སྣང་བ་སྒྱུ་མར་རྟོགས༔    རང་གྲོལ་དམིགས་སུ་མེད་པ་ཅིར་སྣང་བརྗོད་པ་བྲལ༔  ཆོས་ཉིད་ཀློང་དུ་རང་ཤར་རང་གྲོལ་ཕ་མཐར་སོན༔  {{TibChung|ཞེས་དང་།  གོང་བཞིན་རྡོར་བཟླས་དང་མཉམ་བཞག་བྱ་བ་འོག་མ་རྣམས་ལ་འགྲེ།  གནོད་སྦྱིན་ {{TibChung|[22b]}} སྐར་མདའ་གདོང་གི་སྐུ་ཐོགས་ལ།}}  ནོར་བུས་བརྒྱན་པའི་ཤིང་གི་དྲུང་ན་སེམས་རིག་མ་བུ་འདྲེས་པའི་དུས་ཀྱི་ཚེ་གནོད་སྦྱིན་སྐར་མདའ་གདོང་འདི་སྐད་ལོ།  །ཆོས་དབྱིངས་རང་གསལ་སེམས་ལ་ཡོངས་སུ་རྫོགས་པ་ལས༔  ཀུན་ཏུ་བཟང་པོའི་མ་གཟིགས་ལྟ་བ་ཀློང་ཡངས་དེ༔    མེད་པར་བསྒྲུབ་མེད་ཡེ་ཤེས་འོད་གསལ་སྙིང་པོ་སྟེ༔  སྒྱུ་མའི་ལུས་ཀྱི་རྒྱ་ཞིག་གསལ་རྫོགས་ནམ་མཁའི་རྒྱལ་པོ་འདྲེས༔  {{TibChung|ཞེས་སོ།  །སྲིན་པོ་བློ་གྲོས་ཐབས་ལྡན་གྱི་སྐུ་ཐོགས་ལ།}}  རི་བོ་གནམ་ལྕགས་འབར་བའི་རྩེ་མོ་རུ་སྐྱ་རེངས་གཉིས་པ་ཤར་བ་ན་སྲིན་པོ་བློ་གྲོས་ཐབས་ལྡན་འདི་སྐད་ལོ།  །ཤར་གྲོལ་དུས་མཉམ་བྱུང་བའི་བློ་གྲོས་ཐབས་ལྡན་བདག༔  དམིགས་མེད་ནམ་མཁའི་ངང་དུ་ཡེ་ནས་གནས་པ་ལས༔  འོད་གསལ་དག་པའི་ཡེ་ཤེས་ཉི་མ་སེམས་ལས་ཤར༔  གསལ་སྟོང་ཟུང་འཇུག་ཉི་མ་དྭངས་གསལ་ནམ་མཁའ་ཉིད་དང་མཚུངས༔  {{TibChung|ཞེས་སོ།  །ཀླུ་རྒྱལ་བྱང་ཆུབ་སེམས་དཔའི་སྐུ་ཐོགས་ལ།}}  རིན་པོ་ཆེའི་ཁང་བཟང་དགུ་རིམ་ན་སེམས་རིག་གཉིས་སུ་མེད་པར་འབྱེད་པའི་དུས་ཀྱི་ཚེ་ཀླུ་རྒྱལ་བྱང་ཆུབ་སེམས་དཔའ་འདི་སྐད་ལོ།  །རང་གིས་རང་བཅིངས་བཅིངས་པ་དམ་པོའི་མ་རིག་པ༔  གང་གིས་དགྲོལ་དུ་མེད་དེ་རང་བྱུང་རང་གྲོལ་ལོ༔  ཡེ་ནས་རང་བྱུང་རིག་པར་ཤེས་པས་མ་བཅོས་བྱར་མེད་པ༔  གང་དུའང་མི་གནས་ {{TibChung|[23a]}} བསྒོམ་བྱའི་བློ་དང་བྲལ་བའོ༔  {{TibChung|ཞེས་སོ།  །རྒྱལ་པོ་ཛའི་སྐུ་ཐོགས་ལ།}}  མཁའ་འགྲོ་མའི་ཚོགས་ཁང་ཆེན་མོར་ཉི་མ་འཆར་ཀ་དང་དུས་མཚུངས་པར་བསྐལ་ལྡན་རྒྱལ་པོ་ཛཿའདི་སྐད་ལོ།  །བདག་ནི་སྐལ་ལྡན་རྒྱལ་པོ་ཛ༔  སྒྱུ་མ་བདེ་བའི་ལམ་བྱས་ཏེ༔  རྫོགས་པ་ཆེན་པོའི་དོན་བསྒོམས་པས༔  ཚོགས་དྲུག་ཡུལ་གྱི་སྣང་བ་ཀུན༔  སྤང་བླང་རྩིས་གདབ་མེད་པ་རུ༔  རང་ཤར་རང་གྲོལ་བདེ་བའི་ངང༔  བློ་འདས་བྱར་མེད་ཆེན་པོར་རྫོགས༔  {{TibChung|ཞེས་སོ།  །དགའ་རབ་རྡོ་རྗེའི་སྐུ་ཐོགས་ལ།}}  ཆོས་ཀྱི་དབྱིངས་ན་རྡོ་རྗེ་སེམས་དཔའི་དྲུང་དུ་སེམས་ཉིད་འོད་གསལ་བའི་དུས་སུ་རིག་འཛིན་དགའ་རབ་རྡོ་རྗེ་འདི་སྐད་ལོ།  །ང་ནི་མི་ཡི་རིག་འཛིན་དགའ་རབ་རྡོ་རྗེ་སྟེ༔  སེམས་ལ་བལྟ་བའི་ཡུལ་མེད་འཛིན་པ་རང་སར་དག༔  སྒོམ་པའི་བློ་དང་བྲལ་ནས་གསལ་དང་མི་གསལ་མེད༔  སྤྱོད་པ་ཅི་དགར་བཏང་བས་རེ་དོགས་རྩིས་གདབ་བྲལ༔  འབྲས་བུ་འོད་གསལ་སྙིང་པོའི་ཀློང་དུ་རང་བཞིན་གྲོལ༔  {{TibChung|ཞེས་སོ།  །འཇམ་དཔལ་བཤེས་གཉེན་གྱི་སྐུ་ཐོགས་ལ།}}  དུར་ཁྲོད་ཧེ་ཆེན་བརྡལ་དུ་མཆོད་རྟེན་ལ་སྐུ་རྒྱབ་བརྟེན་ཏེ་བསྒྲུབ་པའི་ཚེ་སྲོད་ཀྱི་དུས་སུ་སློབ་དཔོན་འཇམ་དཔལ་བཤེས་གཉེན་འདི་སྐད་ལོ།  །དགའ་རབ་རྡོ་རྗེའི་ཐུགས་སྲས་ {{TibChung|[23b]}} འཇམ་དཔལ་བཤེས་གཉེན་བདག༔  གདམས་ངག་བསྒོམ་མཁན་མི་སྣང་འོད་གསལ་ཀུན་ལ་ཁྱབ༔  དེ་ཉིད་དམིགས་སུ་མ་མཆིས་དམིགས་ཡུལ་རྡུལ་ཙམ་མེད༔  སྟོང་ཉིད་ཀ་ནས་དག་ཀྱང་སྐུ་དང་ཡེ་ཤེས་གསལ༔  {{TibChung|ཞེས་སོ།  །བི་མ་མི་ཏྲའི་སྐུ་ཐོགས་ལ།}}  བདེ་ཆེན་བརྩེགས་པའི་དུར་ཁྲོད་ཆེན་པོར་མཁའ་འགྲོ་དབྱིངས་ཕྱུག་མས་མཆོད་བའི་ཚེ་སློབ་དཔོན་བི་མ་མི་ཏྲ་འདི་སྐད་ལོ།  །ཨ་ཧོཿ  བདེ་ཆེན་ནམ་མཁའ་གང་བའི་དབྱིངས་སུ་དག༔  རང་བྱུང་རང་ཤར་རིག་པའི་ཀློང་དུ་ཐིམ༔    དབྱིངས་རིག་གཉིས་མེད་ཟུང་འཇུག་ལ་བཟླས་པས༔    འཁོར་འདས་ཀུན་ཁྱབ་ཧེ་རུ་ཀ་དཔལ་ལོ༔  {{TibChung|ཞེས་སོ།  །པདྨ་འབྱུང་གནས་ཀྱི་སྐུ་ཐོགས་ལ།}}  ལྷུན་གྲུབ་བརྩེགས་པ་བམ་རོའི་ཚལ་ཆེན་པོར་བརྟུལ་ཞུགས་ཀྱི་སྤྱོད་པ་སྤྱད་པའི་ཚེ་འཆི་མེད་པདྨ་འབྱུང་གནས་འདི་སྐད་ལོ།  །ཨ་ཧོཿ  ཤར་གྲོལ་དུས་མཉམ་རིག་པ་ཐོལ་བྱུང་ནི༔  འཇིགས་མེད་སྣང་མེད་འཛིན་མེད་ངང་དུ་སྤྱོད༔  ཀློང་ལས་ཤར་བའི་ཆོ་འཕྲུལ་ཅིར་བསྟན་ཀྱང༔  འཁོར་འདས་མཉམ་པ་ཉིད་དུ་བརྡལ་བའོ༔  {{TibChung|ཞེས་སོ།  །}}  ༈  {{TibChung|སེམས་སྨད་རིག་འཛིན་བཅོ་བརྒྱད་ཀྱི་གླུ་ནི།  རིག་འཛིན་སོ་སོའི་སྐུ་རྣམས་རིམ་པར་ཐོགས་ལ།  དང་པོ།}}  ཁྱུང་ཆེན་གྱི་དགོངས་པ་ཆོས་ཉིད་ཀློང་རྡོལ་གླུའི་བསམ་གཏན་ཙནྡན་གྱི་ནགས་ཚལ་དུ་ནམ་གྱི་གུང་ལ་རྒྱལ་པོ་དྷ་ཧི་ན་ཏ་ལོ་འདི་སྐད་ལོ།  །ཧཱུྃ།  འགྱུར་བ་མེད་ {{TibChung|[24a]}} པའི་ཆོས་ཉིདནི།  །ཀུན་གཞི་མ་བཅོས་བྱང་ཆུབ་སེམས།  །གཟུང་འཛིན་རྣམ་རྟོག་ཡུལ་ལས་འདས།  །སྣང་བའི་གཟུགས་མེད་བྱང་ཆུབ་སེམས།  །ཅི་ལ་མི་སྤྱོད་རྟོག་པས་མི་བཟུང་ཞིང་།  །སེམས་ཉིད་རང་བཞིན་བསམ་མེད་མཁའ་འདྲ་ལ།  །མ་ཡེངས་མ་བསླད་བཅོས་པ་མེད་པར་བཞག  །སྒོམ་དུ་མེད་པའི་ཆོས་དབྱིངས་ཆེན་པོ་ལ།  །བསམ་དུ་མེད་པའི་རིག་པ་མ་ཡེངས་ཞོག  །དེ་ལས་བསྒོམ་དུ་རྡུལ་ཙམ་མེད་པར་འཁུམས།  །སྐྱེ་བ་བརྒྱུད་ནས་རྒྱལ་པོར་བདག་སྐྱེས་ཏེ།  །དོ་ཧ་དེ་བླངས་ང་རྒྱལ་བཅག་པ་ལས།  །སྔོན་ཆད་བྱང་ཆུབ་མཆོག་ཏུ་སེམས་བསྐྱེད་ཅིང་།  །སེམས་དང་ཆོས་སུ་འདྲེས་པའི་འཕྲོ་བླངས་ཤིང་།  །སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར།  །ཀུན་བཟང་ཐུགས་ཀྱི་འོད་ཟེར་བདག་ལ་ཤར།  །གྷི་ཏ་མ་ཀོ་ལ་ས་ཨ་ཧོཿ  {{TibChung|གཉིས་པ།}}  རིག་པ་ཁུ་བྱུག་གི་དགོངས་པ་རིག་པ་ཀློང་རྡོལ་གླུའི་བསམ་གཏན་ཙནྡན་གོར་ཤི་ཤའི་ཚལ་དུ་ནམ་གྱི་ཆ་སྟོད་ལ་སྲས་ཐུ་བོ་རཱ་ཛ་ཧསྟི་འདི་སྐད་ལོ།  །ཧཱུྃ།  ཀུན་གཞི་ཡེ་ནས་མ་བཅོས་དེ་བཞིན་ཆོས་ཀྱི་དབྱིངས།  །རང་བྱུང་ཡེ་ཤེས་མཁའ་འདྲ་མཉམ་པ་ཆེན་པོའི་ངང་།  །ཚིག་དང་ཡི་གེའི་སྒྲ་ལས་འདས་པའི་ཀུན་ཏུ་བཟང་།  །སེམས་དང་ཆོས་ཉིད་མཉམ་ཞིང་དབྱེར་ {{TibChung|[24b]}} མེད་ན།  །ལུས་ངག་ཡིད་གསུམ་མཚན་མ་ཅིས་བསླད་ཀྱང་།  །ཆོས་ཉིད་བྱང་ཆུབ་སེམས་ལ་འགྱུར་མེད་དེ།  །རྣམ་རྟོག་སྐྱོན་སྤང་ཀུན་གཞི་བྱང་ཆུབ་སེམས།  །མ་བཅོས་ངང་དུ་བཞག་པ་ལས།  །བསྒོམ་པ་གུད་ན་མེད་པར་འཁུམས།  །སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར།  །ཀུན་བཟང་ཐུགས་ཀྱི་འོད་ཟེར་ང་ལ་ཤར།  །གྷི་ཏ་མ་ཀོ་ལ་ས་མ་ཨ་ཧོཿ  {{TibChung|གསུམ་པ།}}  ནམ་མཁའ་ཆེའི་དགོངས་པ་ཡེ་ཤེས་ཀློང་རྡོལ་གླུའི་བསམ་གཏན་མེ་ཏོག་ཨུ་དུམ་འབར་བའི་ཚལ་དུ་ནམ་གྱི་ཆ་སྨད་ལ་སྲས་མོ་གོ་མ་ས་ར་འདི་སྐད་ལོ།  །ཧཱུྃ།  ཀུན་གཞི་མ་བཅོས་ཡེ་ནས་ཆོས་ཀྱི་དབྱིངས།  །རྒྱུ་དང་རྐྱེན་གྱིས་མ་སྐྱེས་འཇིག་དྲལ་མེད།  །རང་བྱུང་ལྷུན་གྱིས་གྲུབ་པའི་བཅོན་ལྡན་འདས།  །གཟུང་འཛིན་ཡུལ་ལས་འདས་པ་རྡོ་རྗེ་སེམས་དབའི་ཐུགས།  །བདག་གི་དགོངས་པ་འདི་ལས་མེད་པར་འཁུམས།  །སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར།  །ཀུན་བཟང་ཐུགས་ཀྱི་གཏེར་ཆེན་བདག་ལ་བབས།  །གྷི་ཏ་མ་ཀོ་ལ་ཧོཿ  {{TibChung|བཞི་པ།}}  ཐིག་ལེ་དྲུག་པའི་དགོངས་པ་བདེ་བ་ཀློང་རྡོལ་གྱི་གླུའི་བསམ་གཏན་སྐྱ་རེངས་དང་པོ་ཤར་ཙམ་ན་རྒྱ་མཚོའི་གཏིང་དུ་ཀླུ་རྒྱལ་འཇོག་པོ་འདི་སྐད་ལོ།  །ཧཱུྃ།  མཐའ་དང་དབུས་མེད་ནམ་མཁའ་ལྟ་བུ་ལ།  །སྨྲ་བསམ་ཡུལ་ལས་འདས་ {{TibChung|[25a]}} པ་ཆོས་ཀྱི་སྐུ།  །སྲིད་གསུམ་སྐྱེ་འགྲོ་རྣམ་པར་དག་བྱས་ན།  །མ་བཅོས་རྣམ་པར་དག་པའི་ཀུན་གཞི་བྱང་ཆུབ་སེམས།  །མ་བཙལ་མཉམ་པར་བཞག་ན་སྒོམ་པའི་མཆོག  །རིག་པ་ཆོས་ཀྱི་དབྱིངས་སུ་མ་བཅོས་ལ།  །རྣམ་པར་གྲོལ་བའི་ལམ་མཆོག་གཞན་མེད་དེ།  །དུས་གསུམ་བདེ་བར་གཤེགས་པའི་དགོངས་པ་ཉིད།  །དཔག་ཅིང་གཞལ་ཡང་འདི་ལས་མེད་པར་མཇལ།  །བདག་གི་ཕུང་པོ་གདོས་བཅས་འདི་བསྙིལ་ནས།  །ཀུན་བཟང་དབྱེ་བ་མེད་པའི་ས་ལ་མཆིས།  །གྷི་ཏ་མ་ཀོ་ལ་ས་ཨ་ཧོཿ  {{TibChung|ལྔ་པ།}}  རྩལ་ཆེན་གྱི་དགོངས་པ་བྱང་ཆུབ་སེམས་ཀློང་རྡོལ་གླུའི་བསམ་གཏན་སྐྱ་རེངས་གཉིས་པ་ཤར་ཙ་ན་རྒྱ་མཚོའི་གླིང་དུ་ཁྱི་ཡི་རྒྱལ་པོ་ཀུ་ཀུ་རཱ་ཛ་འདི་སྐད་ལོ།  །ཧཱུྃ།  ཡེ་ནས་ལྷུན་གྲུབ་ཀུན་ཏུ་བཟང་པོའི་ངང་།  །གསལ་ལ་མི་རྟོག་སྤྲོས་བྲལ་བྱང་ཆུབ་སེམས།  །མི་འགྱུར་མི་དམིགས་ཆོས་ཀྱི་དབྱིངས་ཉིད་ལས།  །རིག་པ་མི་འགྱུར་མ་བསླད་མཉམ་མཞག་ན།  །ཅིར་ཡང་མི་རྟོག་གང་ལའང་མི་བསམ་ཏེ།  །མཆོག་ཏུ་གསང་བའི་རྨད་བྱུང་སེམས་ཉིད་འདི།  །རྣ་བས་ཉན་པ་ལ་སོགས་སྤྱོད་ཡུལ་ཡོད་མ་ཡིན།  །ཀུན་གཞི་མི་འགྱུར་དབྱིངས་ཆེན་ལ།  །རིག་པ་མི་འགྱུར་མ་ཡེངས་བཞག  །སྒོམ་ {{TibChung|[25b]}}  པ་འདི་ལས་མེད་པར་འཁུམས།  །ཁམས་གསུམ་རྟོགས་པར་གྲོལ་བས་བཙལ་ཞིང་སྒྲུབ་མི་དགོས།  །རེ་ཞིང་དོགས་པ་མེད་པའི་བདག་ཉིད་སངས་རྒྱས་ཡིན།  །གྷི་ཏ་མ་ཀོ་ལ་ཨ་ཧོཿ  {{TibChung|དྲུག་པ།}}  སེམས་སྒོམ་གྱི་དགོངས་པ་དབྱིངས་ཀློང་རྡོལ་གླུའི་བསམ་གཏན་རྒྱན་ཆག་དཔལ་གྱི་རིའི་གནས་སུ་སྐྱ་རེངས་གསུམ་པ་ཤར་ཙམ་ན་ནཱ་གརྫུ་ན་འདི་སྐད་ལོ།  །ཧཱུྃ།  སྣང་བ་ཐམས་ཅད་ཡེ་ནས་དབྱིངས་ཆེན་ལ།  །རིག་པ་འཕོ་འགྱུར་མེད་པའི་དུར་བཏབ་ནས།  །དབྱིངས་ཉིད་མི་འགྱུར་རིག་པས་མི་བསླད་དེ།  །མ་ཡེངས་མི་འགྱུར་མཁའ་ལྟར་དག་པ་ལས།  །མ་ཡེངས་མི་འགྱུར་ཡོངས་ཀྱི་འོད་གསལ་ལ།  །སྒོམ་པ་མིང་དུ་བཏགས་པ་གུད་ན་མེད་པར་འཁུམས།  །བདག་གི་ཕུང་པོ་གདོས་བཅས་འདི།  །དབྱེ་བ་མེད་པའི་ས་ལ་མཆིས།  །གྷི་ཏ་མ་ཀོ་ལ་ས་ཨ་ཧོཿ  {{TibChung|བདུན་པ།}}  རྨད་བྱུང་གི་དགོངས་པ་འབྱུང་ལྔ་ཡེ་ཤེས་ཀློང་རྡོལ་གླུའི་བསམ་གཏན་དམར་རེངས་དང་པོ་ཤར་ཙམ་ན་རྒྱ་མཚོའི་འགྲམ་དུ་ཁྱིའི་རྒྱལ་པོ་ཕྱི་མ་འདི་སྐད་ལོ།  །ཧཱུྃ།  ཆོས་ཉིད་བྱང་ཆུབ་སེམས་ནི་འབྱུང་བ་ལྔ་ཡིན་ཏེ།  །མ་བཅོས་རང་བཞིན་གསལ་བས་མཁའ་ལྟར་གནས།  །འགྲོ་བའིོ་གཟུང་འཛིན་བསྲེགས་པས་མེ་ལྟར་གནས།  །དམིགས་མེད་གདོད་ནས་དག་པས་ {{TibChung|[26a]}} རླུང་ལྟར་གནས།  །གཟུང་འཛིན་སྐྱོན་དང་བྲལ་བས་ཆུ་ལྟར་གནས།  །ཅིས་ཀྱང་སྐྱོན་མེད་སྲ་བས་ས་ལྟར་གནས།  །འབྱུང་བ་ལྔ་ཉིད་ཡེ་ནས་ཆོས་ཉིད་བྱང་ཆུབ་སེམས།  །གདོད་ནས་དག་པས་ནམ་མཁའ་འདྲ་བ་ལ།  །དམིགས་པ་མེད་པ་མ་ཡེངས་གནས་པ་ལས།  །སྒོམ་པ་འདི་ལས་མེད་པར་རྟོགས།  །བདག་གི་ཕུང་པོ་གདོས་བཅས་འདི།  །དབྱེ་བ་མེད་པའི་ས་ལ་མཆིས།  །གྷི་ཏ་མ་ཀོ་ལ་ས་ཧ་ཨ་ཧོཿ {{TibChung|བརྒྱད་པ།}}  ཡིད་བཞིན་ནོར་བུའི་དགོངས་པ་དངོས་གྲུབ་ཀློང་རྡོལ་གླུའི་བསམ་གཏན་དམར་རེངས་གཉིས་པ་ཤར་ཙམ་ན་གནོད་སྦྱིན་བུ་མོ་བྱང་ཆུབ་མ་འདི་སྐད་ལོ།  །ཧཱུྃ།  ཆོས་ཉིད་བྱང་ཆུབ་སེམས་ལ་བླང་ཞིང་བལྟར་མེད་དེ།  །བལྟ་བའི་གཟུགས་མེད་ཡོངས་ལ་སྣང་།  །ཅིས་ཀྱང་བཅོས་སུ་མེད་ལ་སྤྱད་དུ་མེད།  །སེམས་ཀྱི་རང་བཞིན་ཅི་ལའང་མི་གནས་ཏེ།  །རིག་པ་བྱང་ཆུབ་སེམས་ཀྱི་རང་བཞིན་ཡིན།  །ཇི་ལྟར་བསླད་ཀྱང་དབྱིངས་ལས་འགྱུར་བ་མེད།  །དབྱིངས་ཉིད་རིག་པས་མི་བཙལ་ཏེ།  །སེམས་ཉིད་མཁའ་ལྟར་དག་པའི་གནས།  །མ་བཅོས་རང་བཞིན་མེད་པ་སྟེ།  །སྒོམ་པ་འདི་ལས་མེད་པར་བདག་གིས་རྟོགས།  །བདག་གི་ཕུང་པོ་གདོས་བཅས་འདི་བསྙིལ་ནས།  །ཀུན་བཟང་ {{TibChung|[26b]}} ཐུགས་ཀྱི་འོད་ཟེར་བདག་ལ་ཤར།  །གྷི་ཏ་མ་ཀོ་ལ་ས་ཨ་ཧོཿ  {{TibChung|དགུ་པ།}}  རྩེ་མོ་བྱུང་རྒྱལ་གྱི་དགོངས་པ་རྩོལ་མེད་ཀློང་རྡོལ་གླུའི་བསམ་གཏན་ཤིང་ན་ལ་བྱི་ས་ལའི་རྩར་དམར་རེངས་གསུམ་པ་ཤར་ཙམ་ན་སྨད་འཚོང་མ་བུདྡྷ་ཏི་འདི་སྐད་ལོ།  །ཨེ་མ་ཧོ་ཆོས་ཉིད་བྱང་ཆུབ་སེམས།  །བརྟག་ཏུ་མེད་དེ་དཔྱད་དུ་མེད།  །བཙལ་ཞིང་གཉེན་པོས་བཅོས་སུ་མེད།  །སེམས་ལས་སངས་རྒྱས་ལོགས་ན་མེད།  །བཙལ་བས་མི་རྙེད་སེམས་ལས་སངས་རྒྱས་མེད།  །སེམས་ཀྱི་རང་བཞིན་མ་བཅོས་སངས་རྒྱས་ཡིན།  །གདོད་ནས་མ་བཙལ་བྱང་ཆུབ་སྙིང་པོ་ལ།  །ཏིང་འཛིན་མ་བསླད་ངང་གིས་གསལ་བ་ལས།  །སངས་རྒྱས་དགོངས་པ་འདི་ལས་མེད་པར་འཁུམས།  །བདག་གི་ཕུང་པོ་གདོས་བཅས་འདི་བསྙིལ་ནས།  །ཀུན་བཟང་ཐུགས་ཀྱི་འོད་ཟེར་བདག་ལ་ཤར།  གྷི་ཏ་མ་ཀོ་ལ་ས་ཨ་ཧོཿ  {{TibChung|བཅུ་པ།}}  སྤྱི་གཅོད་ཀྱི་དགོངས་པ་གསང་བ་ཀློང་རྡོལ་གླུའི་བསམ་གཏན་ཤིང་ནྱ་གྲོ་དྷའི་རྩར་སྲོད་ཀྱི་ཐུན་ལ་འཇམ་དཔལ་བཤེས་གཉེན་ཕྱི་མ་འདི་སྐད་ལོ།  །ཧཱུྃ།  ཀུན་གཞི་ཡངས་པའི་བྱེ་ཐང་ལ།  །དག་པའི་ཀློང་ནས་ཉི་མ་ཤར།  །ཤར་བའི་དུས་ན་ནུབ་པ་མེད།  །ཤར་ནས་མ་བཅོས་གསལ་བ་ལས།  །སངས་རྒྱས་ཆོས་ཉིད་སྔ་ཕྱི་གསུམ།  །གང་དུ་བཙལ་ཡང་རྙེད་ཐབས་མེད།  །ཀུན་གཞི་ཡངས་ {{TibChung|[27a]}} པའི་ཆོས་ཉིད་ལ།  །རིག་པ་སེམས་ཀྱི་ཉི་ཤར་བ།  །མ་བཅོས་ནུབ་པ་མེད་པ་ལས།  །སྒོམ་དུ་འདི་ལས་མེད་པར་འཁུམས།  །མྱོང་ན་སེམས་ཀྱི་བདུད་རྩི་མྱོང་།  །བལྟ་ན་རིག་པའི་ཡེ་ཤེས་ལྟོས།  །པདྨ་ཀོ་ལ་ཤ་ཨ་ཧོཿ  {{TibChung|བཅུ་གཅིག་པ།}}  །  སྤྱི་ཆིངས་ཀྱི་དགོངས་པ་ནམ་མཁའ་ཀློང་རྡོལ་གླུའི་བསམ་གཏན་དཔག་བསམ་ཤིང་གི་གྲིབ་མ་ལ་ཐོ་རེངས་ཁར་ཨཱ་རྻ་པ་ལོ་འདི་སྐད་ལོ།  །ཧཱུྃ།  བྱང་ཆུབ་སེམས་ནི་ནམ་མཁའ་ལྟ་བུའི་ཀློང་།  །གསལ་ལ་རྙོག་པ་མེད་པའི་ཡེ་ཤེས་ནི།  །ཕྱི་དང་ནང་མེད་ཀུན་ལ་གསལ་བར་སྣང་།  །གདོད་ནས་དག་པ་ནམ་མཁའི་ཀློང་འདྲ་ལ།  །རྣམ་རྟོག་སྲེག་པའི་ཡེ་ཤེས་མངོན་ཤར་བའི།  །སྐྱེ་འགག་ཡངས་དོག་རང་བཞིན་མེད་པ་ལས།  །སངས་རྒྱས་དགོངས་པ་འདི་ལས་མེད་པར་མཇལ།  །ཟ་ན་སེམས་ཉིད་བདུད་རྩི་ཟོ།  །གྱོན་ན་ཆོས་ཉིད་གོས་སུ་གྱོན།  །ཨེ་མ་ཀོ་ལ་ཤ་ཨ་ཧོཿ  {{TibChung|བཅུ་གཉིས་པ།}}  བདེ་བ་ཕྲ་བཀོད་ཀྱི་དགོངས་པ་ཕྲིན་ལས་ཀློང་རྡོལ་གླུའི་བསམ་གཏན་རིན་པོ་ཆེའི་གླིང་ན་ནམ་གུང་ཡོལ་ལ།  ཨོ་རྒྱན་གྱི་མཁན་པོ་དྷ་ཧེ་ཏ་འདི་སྐད་ལོ།  །ཧཱུྃ།  སེམས་ཉིད་སངས་རྒྱས་ཡིན་པ་ལ།  །སེམས་ལས་སངས་རྒྱས་ལོགས་ན་མེད།  །སེམས་ཉིད་ཡེ་ནས་སངས་རྒྱས་ཡིན་པ་ལ།  །རིག་པ་མི་ {{TibChung|[27b]}}  འགྱུར་རང་བཞིན་མེད་པ་འདི།  །ཟབ་མོའི་ཆོས་དབྱིངས་མི་བརྗོད་དོན་དམ་གསལ།  །རྒྱ་མཚོ་ཆེ་ལྟར་ཆོས་དབྱིངས་ཟབ་མོ་ལས།  །རིག་པ་མི་འགྱུར་བཟོད་ཅིང་ནང་ནས་འཆར།  །ཀུན་གཞི་གཏན་ནས་སྦྱོངས་པའི་ཉི་ཆེན་པོ།  །མཁའ་ལྟར་དག་པའི་ཡོངས་ལ་ཁྱབ་པར་གདལ།  །ཆོས་ཉིད་ཡེ་ནས་དག་པས་སྦྱང་དུ་མེད་པ་ལ།  །རིག་པ་མི་འགྱུར་གདོད་ནས་གསལ་བར་གནས།  །ཕྱིན་ཅི་ལོག་གིས་མ་བསླད་གསལ་བར་གནས།  །བདེ་བར་གཤེགས་པའི་དགོངས་པ་འདི་ལས་མེད་པར་མཇལ།  །ཆོས་ཉིད་ནམ་མཁའ་ཆེན་པོ་ལ།  །རྣལ་འབྱོར་ཁྱུང་ཆེན་གཤོག་པ་ལྡིང་།  །ཀརྨ་ཀོ་ལ་ཤ་ཨ་ཧོཿ  {{TibChung|བཅུ་གསུམ་པ།}}  སྲོག་གི་འཁོར་ལོའི་དགོངས་པ་རང་བྱུང་ཀློང་རྡོལ་གླུའི་བསམ་གཏན་ནྱ་གྲོ་དྷའི་དགོན་པར་སྲོད་ཡོལ་བའི་དུས་སུ་དྲང་སྲོང་བི་ཤྭ་ཏི་འདི་སྐད་ལོ།  །ཧཱུྃ།  མ་བཅོས་མཁའ་ལ་གཟའ་སྐར་ཀུན་འཕྱོ་བས།  །གདོད་ནས་དག་པའི་མཁའ་ནི་མི་བརྗོད་དེ།  །བྱང་ཆུབ་སེམས་ནི་མཁའ་ལྟར་དག་པ་ལ།  །མཚན་མའི་རྣམ་རྟོག་སྒྱུ་མས་ཅི་བསླད་ཀྱང་།  །རྣམ་དག་སེམས་ཉིད་དབྱིངས་ལ་འཕོ་འགྱུར་མེད།  །ཆོས་དབྱིངས་བརྡལ་བ་ཆེན་པོའི་དཀྱིལ་འཁོར་ལ།  །རིག་པ་ཡེ་ཤེས་དུར་ས་བཏབ་པ་ནི།  །གསང་བའི་འོད་ཀྱི་དཀྱིལ་འཁོར་ {{TibChung|[28b]}} གསལ་བར་འཆར།  །ཤར་བ་ཉིད་ཀྱི་དོན་དེ་མ་ཡེངས་ལས།  །སངས་རྒྱས་རྣམས་ལ་དགོངས་པ་འདི་ལས་མེད།  །རིག་པ་ཡེ་ཤེས་རླུང་ཆེན་གྱིས།  །རྣམ་པར་རྟོག་པའི་མུན་པ་གཡེངས།  །ཨ་ཀ་ཤ་ཀོ་ལ་མ་དྷ་ཨ་ཧོཿ  {{TibChung|བཅུ་བཞི་པ།}}  རིན་པོ་ཆེ་ཀུན་འདུས་ཀྱི་དགོངས་པ་སྐྱེ་མེད་ཀློང་རྡོལ་གླུའི་བསམ་གཏན་རྒྱལ་བའི་དགོན་གནས་སུ་ནམ་སྨད་ལ་སྲས་མོ་གོ་མ་དེ་ཝཱི་འདི་སྐད་ལོ།  །ཧཱུྃ།  སངས་རྒྱས་ཀུན་གྱི་ཐུགས་ཉིད་ཡི་གེ་ཨ་ཡིན་ཏེ།  །ཨ་ཡི་རང་བཞིན་ཡེ་ནས་དངོས་པོ་མེད།  །བདེ་གཤེགས་ཀུན་གྱི་འབྱུང་གནས་ཨ་ཡིན་ཏེ།  །བདེན་གཉིས་ལ་སོགས་སྣང་སྲིད་ཅིར་སྣང་ཡང་།  །ཨ་ཡི་དངོས་གཞི་ཡེ་ནས་བྱང་ཆུབ་སེམས།  །འཕོ་འགྱུར་འདུ་འབྲལ་བརྟགས་ན་སངས་རྒྱས་ཏེ།  །སྨྲ་བསམ་ཡུལ་ལས་འདས་པའི་བྱང་ཆུབ་དབྱིངས་ཉིད་ལ།  ཨ་ལྟར་སྐྱེ་བ་མེད་པའི་བྱང་ཆུབ་སེམས།  །མ་བཅོས་མ་ཡེངས་མཉམ་པར་བཞག་པ་ལས།  །བདག་གི་དགོངས་པ་འདི་ལས་མེད་པར་མཇལ།  །ཆོས་ཉིད་བྱེ་ཐང་ཆེན་པོ་ལ།  །རིག་པ་ཡེ་ཤེས་རྟ་ཕོ་རྒྱུག  །ཀ་པ་ལ་ཀ་མ་པ་ཤ་ཨ་ཧོཿ  {{TibChung|བཅོ་ལྔ་པ།}}  སྐྱེ་མེད་རང་རིག་གི་དགོངས་པ་ཆོས་སྐུ་ཀློང་རྡོལ་གླུའི་བསམ་གཏན་ཙནྡན་སྡོང་པོའི་རྩར་གུང་ཐུན་ལ།  ཁ་ཆེའི་རྒྱལ་ {{TibChung|[28b]}} པོ་རབ་སྣང་མཛད་འདི་སྐད་ལོ།  །ཧཱུྃ།  བྱང་ཆུབ་སེམས་ནི་ཡེ་ནས་ཆོས་ཀྱི་སྐུ།  །མཁའ་དང་འདྲ་བར་ཀུན་ལ་ཁྱབ་པར་སྣང་།  །སྣང་བ་ཉིད་ཀྱང་སྟོང་པ་སྟེ།  །སྟོང་པའི་ཆོ་འཕྲུལ་ཅིར་སྣང་བ།  །བསམ་དུ་རྡུལ་ཙམ་མེད་པ་ལ།  །བརྗོད་དུ་མེད་པར་མ་ཡེངས་ཞོག  །ཆོས་ཉིད་སེམས་ཀྱི་བདུད་རྩི་ཡིས།  །ཁམས་གསུམ་འཁོར་བའི་ནད་པ་གསོས།  །ཀ་པ་ལ་ཀོ་ཤ་ཨ་ཧོཿ  {{TibChung|བཅུ་དྲུག་པ།}}  བདེ་འབྱམས་ཀྱི་དགོངས་པ་སྐུ་གསུམ་ཀློང་རྡོལ་གླུའི་བསམ་གཏན་གྲོང་ཁྱེར་དཔལ་ཡོན་དུ་སྲོད་ཀྱི་དུས་སུ་རྒྱལ་པོ་དེ་བ་རཱ་ཛ་འདི་སྐད་ལོ།  །ཧཱུྃ།  སྣང་སྲིད་ཆོས་རྣམས་མངོན་དུ་ལྟོས་པ་རྣམས།  །ཡང་དག་ཉིད་དུ་འདི་ལྟར་བསྒོམ་པར་བྱ།  །སྣང་སྲིད་ཐམས་ཅད་ཡེ་ནས་ཀུན་ཏུ་བཟང་པོའི་ངང་།  །འདི་ལས་གཞན་མེད་མ་ཡེངས་མཉམ་བཞག་པས།  །སྒོམ་པར་བྱ་བ་འདི་ལས་མེད་པར་རྟོགས།  །ལུས་ནི་སྒྱུ་མའི་ཕུང་པོ་མིང་ཙམ་སྟེ།  །སེམས་ནི་ཡེ་ཤེས་ཆེན་པོར་སོན།  །ཙནྡྲ་དེ་ཝ་ཀོ་ས་ལ་ཨ་ཧོཿ  {{TibChung|བཅུ་བདུན་པ།}}  ནམ་མཁའི་རྒྱལ་པོའི་དགོངས་པ་གྲོལ་བ་ཀློང་རྡོལ་གླུའི་བསམ་གཏན་མེ་ཏོག་གི་ཚལ་དུ་ནམ་གྱི་ཆ་སྟོད་ལ་དྷརྨ་རཱ་ཛ་འདི་སྐད་ལོ།  །ཧཱུྃ།  སེམས་ཀྱི་རང་བཞིན་ཡེ་ནས་མཛོད་ཆེན་ལས།  །གང་ལྟར་རྟོགས་ཤིང་ཇི་ལྟར་ {{TibChung|[29b]}} སྣང་བ་ཀུན།  །འབྱུང་འཇུག་འབྱུང་བ་མེད་ན་ཀུན་ཏུ་བཟང་།  །གཉིས་སུ་མེད་པའི་རིག་པ་འདི།  །ཀུན་ཏུ་བཟང་པོའི་སེམས་ལ་གནས།  །རིག་པའི་དབྱིངས་ལ་མ་བསླད་པས།  །བསྒོམ་ཞིང་གནས་པ་འདི་ལས་མེད།  །ཀྱེ་མ་མ་རྟོགས་སྙིང་རེ་རྗེ།  །བདག་ཉིད་རང་སར་གྲོལ་བ་ཨ་ལ་ལ་ཧོཿ  རྡོ་ཧ་ཀོ་ས་ཤ་ཨ་ཧོཿ  {{TibChung|བཅོ་བརྒྱུད་པ།}}  རྗེ་བཙུན་དམ་པའི་དགོངས་པ་ཤེས་རབ་ཀློང་རྡོལ་གླུའི་བསམ་གཏན་དབེན་པ་ཆེན་པོའི་གནས་སུ་བུདྡྷ་གུཔྟ་འདི་སྐད་ལོ།  །ཧཱུྃ།  ཆོད་རྣམས་ཐམས་ཅད་མ་བཅོས་ཀུན་ཏུ་བཟང་པོ་ལ།  །གསལ་ལ་འགྱུར་བ་མེད་པ་བྱང་སེམས་ངང་དེ་ལ།  །མཚན་མའི་རྣམ་པར་རྟོག་པས་མ་བསླད་དེ།  །རྣམ་རྟོག་རང་བྱུང་རང་ཤར་གནས་པ་ལས།  །སྒོམ་པ་འདི་ལས་གུད་དུ་མེད་པར་འཁུམས།  །སེམས་ཀྱི་མེ་ལོང་མ་བལྟས་ན།  །རྣམ་རྟོག་དྲི་མས་གོས་ཏ་རེ།  །པྲཛྙཱ་ཀོ་ས་ལ་ཨ་ཧོཿ  {{TibChung|ཞེས་སོ།}}    དེ་ལྟར་བྱིན་རླབས་འཕོ་བའི་དབང་བསྐུར་ཐོབ་བའི་ཡེ་ཤེས་ཀྱི་རྒྱུན་དེ་ཉིད་མི་ཉམས་བརྟན་པར་བྱ་བའི་སླད་དུ་རིག་འཛིན་བླ་མའི་ལྷ་ཚོགས་ནམ་མཁའ་གང་བར་སད་པ་རྣམས་ཀྱིས་སྨོན་པའི་བདེན་ཚིག་གི་རྒྱས་གདབ་ཅིང་ཤིས་པ་བརྗོད་པའི་མེ་ཏོག་གི་ཆར་ཕབ་པས་དགེ་ལེགས་ {{TibChung|[29b]}} སུ་བྱས་པའི་མོས་པ་མཛོད།  {{TibChung|མེ་ཏོག་འཐོར་བཞིན།}}  ཆོས་ཉིད་དངོས་པོ་མེད་པའི་ཡེ་སྟོང་འདི།  །ལྟ་བ་འདི་དང་མི་འབྲལ་འགྲོགས་པར་ཤོག  །ཆོས་ཉིད་ཉམས་མྱོང་མེད་པའི་བདེ་སྟོང་འདི།  །བསྒོམ་པ་འདི་དང་མི་འབྲལ་འགྲོགས་པར་ཤོག  །སེམས་ཉིད་འཆོས་པ་མེད་པའི་རང་སྟོང་འདི།  །སྤྱོད་པ་འདི་དང་མི་འབྲལ་འགྲོགས་པར་ཤོག  །ཆོས་ཉིད་འགྱུར་བ་མེད་པའི་ཡེ་སྟོང་འདི།  །འབྲས་བུ་འདི་དང་མི་འབྲལ་འགྲོགས་པར་ཤོག  །ཇི་ལྟར་སྨོན་པའི་འབྲས་བུ་འགྲུབ་པར་གྱུར་ཅིག  །སྨོན་ལམ་གྱི་མཐུ་བཙན་པར་གྱུར་ཅིག  །དེ་ཁོ་ན་ཉིད་ཀྱི་དོན་ལ་བློ་གནས་པར་གྱུར་ཅིག  །{{TibChung|ཅེས་དང་ཤིས་བརྗོད་གང་འོས་བྱ།}}  དེ་རྣམས་ཀྱི་སྒོ་ནས་ཕྱི་སྐོར་སེམས་སྡེའི་རིག་འཛིན་བླ་མ་འགྲོ་འདུལ་སུམ་ཅུ་རྩ་གཅིག་གི་བྱིན་རླབས་དབང་བསྐུར་ཟབ་མོ་ལེགས་པར་གྲུབ་པ་ལགས་པས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་གྱིས་བསྡུས་པ་མཐའ་དག་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས།  གཙོ་བོས་ཇི་ལྟར་{{TibChung|སོགས་དབང་གི་རྗེས་རིམ་སྤྱི་ལྟར་བྱའོ།  །གསུམ་པ་རྗེས་ནི།  ཚོགས་ལ་རོལ་པ་སོགས་ཆོ་གའི་རྗེས་རིམ་རྣམས་བྱང་བུ་ཁྲིགས་བསྡེབས་ལྟར་མཐར་དབྱུང་བས་གྲུབ་བོ།  །ཀུན་བཟང་གདོད་མའི་དབྱིངས་ {{TibChung|[30a]}} ཉིད་ལས།  །གང་འདུལ་ཡེ༵་ཤེ༵ས་སྒྱུ་མའི་གར།  །རྡོ༵་རྗེ༵འི་རིག་འཛིན་རྒྱ་མཚོ་ཡི།  །དགོངས་ཉམས་རྩལ་དབང་འཇུག་བདེའི་དཔྱིད།  །ཕྱི་སྐོར་སེམས་སྡེའི་རིག་འཛིན་བླ་མ་འགྲོ་འདུལ་སུམ་ཅུ་རྩ་གཅིག་གི་བྱིན་རླབས་དབང་བསྐུར་གྱི་ལེའུ་ཚན་ནོ།།  །།}}




{{TibChung|[31a]}} སྭསྟི།  བྱང་ཆུབ་སེམས་ཀྱི་རང་བཞིན་ནི།  །རྡོ་རྗེ་དབྱིངས་ཀྱི་དཀྱིལ་འཁོར་དུ།  །མངོན་པར་སྣང་ལ་ཡོངས་བཏུད་ནས།  །གང་དེའི་སྨིན་བྱེད་ལམ་བཟང་དབྱེ།  །{{TibChung|རྫོགས་པ་ཆེན་པོ་སྡེ་གསུམ་ལས་ཕྱི་སྐོར་སེམས་སྡེའི་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་བའི་ཚུལ་ལ།  སྦྱོར་བ་རས་བྲིས་ཞི་དཀྱིལ་སྤྱི་འགྲེ་སྒོས་ཆོས་ལྷ་མཚན་ཅན་གྱི་འདིང་དཀྱིལ་བཀྲམ་པའམ།  མ་འབྱོར་ན་མཎྜལ་ལ་ཚོམ་བུ་དབུས་དང་ཕྱོགས་མཚམས་སུ་རེ་རེ།  དེ་རྒྱབ་མཚམས་བཞི་དང་ཤར་ནུབ་གཉིས་སུ་རེ་རེ་སྟེ་དྲུག  །དེ་རྒྱབ་བཞི་བཅས་བཀོད་པའི་སྟེང་དུ་མཉྫིར་བུམ་པ་སོ་ལྔའི་བཅུད་ལྡན་ཁ་རྒྱན་མགུལ་ཆིངས་ཀྱིས་སྤྲས་པ།  ཤར་དུ་གསང་མཚན་ཤོག་དྲིལ་ལམ་རྡོ་དྲིལ་ལྷན་ཅིག་ཏུ་བསྡམས་པ།  ལྷོར་དབུ་རྒྱན།  ནུབ་ཏུ་རྡོ་རྗེ།  བྱང་དུ་དྲིལ་བུ།  མདུན་དུ་སྐུ་ཙཀ་ཡོངས་རྫོགས།  ཤར་ལྷོར་མངའ་དབུལ་ཆས་ཁྲི་གདུགས་གླེགས་བམ་ཕྱག་ཤིང་འཁོར་ལོ་རྡོ་དྲིལ་དུང་བཅས་ཀྱི་ཙཀླི།  ལྷོ་ནུབ་ཏུ་གསང་ཐོད་ཨ་མྲྀ་ཏས་གཏམས་པ།  ནུབ་བྱང་དུ་རིག་མའི་གཟུགས་བརྙན།  བྱང་ཤར་དུ་རང་བྱུང་གི་ཤེལ་རྡོ་བཅས་འགོད།  ཕྱི་ནང་གི་མཆོད་པ་དང་ཚོགས་གཏོར་སོགས་སྤྱི་ལྟར་དང་།  མིག་དར་མེ་ཏོག་སོགས་ཉེར་མཁོ་ཡོ་བྱད་རྣམས་ཚང་བར་འདུ་བྱས་ལ།  དབང་སྒྲུབ་ཆོ་གའི་སྔོན་རྗེས་རྣམས་བླ་མའི་བྱང་བུ་ཁྲིགས་བསྡེབས་ལྟར་ལས།  མངོན་རྟོགས་གཏེར་གཞུང་ཕྱི་སྐོར་ཡི་དམ་སྒྲུབ་པ།}}  སེམས་ཉིད་ཀ་ནས་དག་པའི་ངང་༔  {{TibChung|སོགས་སྦྱར་ལ་བདག་མདུན་དབྱེར་མེད་དུ་གསལ་གདབ།  ཛཔྲ་ཀྱི་སྐབས་བཟླས་དམིགས་ནི།}}  {{TibChung|[31b]}} རང་གི་ཐུགས་སྲོག་ས་བོན་ལས༔    བདེ་བ་ཆེན་པོའི་འོད་ཟེར་འཕྲོས༔  རབ་འབྱམས་རྒྱལ་བའི་དཀྱིལ་འཁོར་པའི༔  ལྷ་ཚོགས་རྣམས་ཀྱི་ཐུགས་རྒྱུད་བསྐུལ༔  དེ་རྣམས་ཐུགས་རྗེའི་འོད་ཟེར་རྣམས༔  མཁའ་ཁྱབ་ཀུན་ཏུ་སྣང་བ་ཡིས༔  བདག་དང་འགྲོ་ཀུན་སྒྲིབ་གཉིས་སྦྱངས༔  ཡེ་ཤེས་མཆོག་གིས་བྱིན་རླབས་གྱུར༔  {{TibChung|ཅེས་བསྒོམ་ལ་སྒྲུབ་ཐབས་ཀྱི་བསྐྱེད་སྔགས་རྣམས་གཙོ་འཁོར་གྱི་འགྲོས་དང་སྦྱར་ཏེ་བཟླས་མཐར།  བུམ་བཟླས་ནི།}}  བུམ་པ་རང་བྱུང་གི་གཞལ་ཡས་ཁང་དུ་ལྷ་རྣམས་དྭངས་པའི་མཚོ་ལ་གཟའ་སྐར་ཤར་བ་ལྟར་སྐད་ཅིག་གིས་གསལ་བར་གྱུར།  རང་སྲོག་སྔགས་ཀྱི་འོད་ཟེར་གཟུངས་ཐག་ལ།  །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཕོག  །དེ་དག་སྐུ་ལས་བྱང་སེམས་བདུད་རྩིའི་རྒྱུན།  །བབས་པས་བུམ་ཆུར་གཉིས་མེད་རོ་གཅིག་གྱུར།  །{{TibChung|ཅེས་གཟུངས་ཐག་ནས་འཇུས་ཏེ་བཟླས་པ་ཅི་འགྲུབ་བྱ།  མཐར་སྟོང་ཚིག་གིས་མཆོད་བསྟོད་ཕུལ་ལ།}}  ཨོཾ་ཨཱཿཧཱུྃ་{{TibChung|གིས་མཆོད་ཡོན་ཕུལ་བས།}}  བུམ་པའི་ལྷ་རྣམས་བདེ་སྟོང་ཆེན་པོས་འོད་དུ་ཞུ་བ་བུམ་པའི་ཆུ་དང་རོ་གཅིག་ཏུ་གྱུར་པར་{{TibChung|མོས།  ལས་བུམ་གོང་ལྟར་བརླབ།  བཀའ་གཏེར་སྲུང་མའི་གཏོར་འབུལ་དང་ཚོགས་མཆོད་ཕུལ།  རིག་པའི་མེ་ཏོག་དོར་ལ་གནང་བ་ནོད་དེ་དཀྱིལ་འཁོར་ཡོལ་བས་བསྒྲིབ་བོ།  །དབང་བསྐུར་ {{TibChung|[32a]}} དངོས་ལ།  སློབ་མ་རྣམས་ཁྲུས་ནས་དབྱུང་།  བགེགས་བསྐྲད་ཅིང་སྲུང་འཁོར་བསྒོམ།  སེམས་བསྐྱེད་གསལ་བཏབ་ལ་ཆོས་བཤད་གོང་བཞིན་རྒྱས་བསྡུས་ཇི་ལྟར་རིགས་པ་དང་ཁྱད་པར།}}  འདིར་རྫོགས་པ་ཆེན་པོ་སྡེ་གསུམ་གྱི་ནང་ཚན་ཕྱི་སྐོར་སེམས་ལུང་མ་ཧཱའི་མན་ངག་དང་འབྲེལ་བ་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ།  ཡེ་ཤེས་སྤྱི་བླུགས་ཀྱི་དབང་བསྐུར་ཟབ་མོ་བསྒྲུབ་པ་ལ་བདག་ཉིད་ཀྱིས་བགྱི་འོས་རྣམས་སྔོན་དུ་གྲུབ་{{TibChung|སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག}}  །ཁྱེད་རང་རྣམས་སྔོན་ཆད་གསང་བའི་དཀྱིལ་འཁོར་ཆེན་པོར་མ་ཞུགས་པ་མཚོན་པའི་ཕྱིར་མིག་དར་འཆིང་བར་ཞུ།  ཨོཾ་ཙ་ཀྵུ་བྷནྡྷ་ཝཱ་ར་མ་ཎཱ་ཡེ་སྭཱ་ཧཱ།  {{TibChung|ཞེས་མིག་དར་འཆིང་།}}  ཡེ་ཤེས་ཀྱི་ལྷ་དང་མཇལ་བའི་ཕྱག་རྟེན་དུ་མེ་ཏོག་གི་ཕྲེང་བ་རེ་བཟུང་བར་མཛོད།  ཨ་ཁཾ་བཱི་ར་ཧཱུྃ།  {{TibChung|ཞེས་མེ་ཏོག་གཏད།}}  བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་ཐལ་མོ་མེ་ཏོག་དང་བཅས་མི་ཕྱེད་དད་པས་གསོལ་བ་གདབ་པ་འདིའི་རྗེས་ཟློས།  ཨེ་མ་ཧོ་བདེ་གཤེགས་བླ་མ་རྒྱལ་བ་སྲས་བཅས་ཀུན༔    མ་ལུས་བདག་ཅག་རྣམས་ལ་དགོངས་སུ་གསོལ༔  རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་རུ༔  བདག་ཅག་གཞུག་ཅིང་སྨིན་པར་མཛད་དུ་གསོལ༔  {{TibChung|ལན་གསུམ།}}  དེ་ལྟར་གསོལ་བ་ {{TibChung|[32b]}} བཏབ་པ་ལ་སྤྲོ་བ་བསྐྱེད་པའི་སྒོ་ནས་གནང་བ་སྦྱིན་པ་ལགས་ཏེ།  ཨོཾ༔  རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་འདིར༔    འཇུག་ཅིང་སྨིན་པ་བསྐལ་པར་རྙེད་མི་འགྱུར༔  རྩོལ་བས་ཚུལ་བཞིན་འཇུག་པར་རྗེས་ཡི་རང༔  བུ་རྣམས་ཚུར་ཤོག་དམ་ཚིག་ཐུབ་པར་གྱིས༔  {{TibChung|ཞེས་བསྒོ།}}  དེ་ལ་ཐོག་མར་རྒྱུད་དག་པར་བྱ་བའི་སླད་དུ་{{TibChung|སོགས་སྐྱབས་སེམས་ཚོགས་བསགས་བཅས་སྔར་བླ་མའི་ཟབ་དབང་གི་སྐབས་བཞིན་འདིར་བྱ།}}  གསང་སྔགས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་ལྷག་པས་བསྡུས་པ་རྣམས་ལེགས་པར་བླངས་ནས་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས།  ཨེ་མ་ཧོཿ    བདེ་གཤེགས་སྲས་བཅས་མ་ལུས་པ༔  ཀུན་ནས་བདག་ལ་དགོངས་སུ་གསོལ༔    དེ་བཞིན་གཤེགས་པའི་རིགས་རྣམས་ཀྱིས༔  སྡོམ་པ་མ་ལུས་བདག་གིས་བཟུང་༔  སྲོག་གི་ཕྱིར་ཡང་མི་བཏང་ངོ་༔  {{TibChung|ལན་གསུམ།}}  དམ་ཚིག་རྡོ་རྗེའི་ཕྱག་རྒྱ་སྤྱི་བོར་བཀོད་པ་ཁེ་ཉེན་གྱི་དཔང་པོར་བཞུགས་པའི་དོན་གོ་བར་གྱིས་ཤིག  །དེ་ལྟར་ཡིན་ན་དེ་བཞིན་གཤེགས་༔  རྡོ་རྗེ་དབྱིངས་ཀྱི་དཀྱིལ་འཁོར་དུ༔  བཅུག་ཅིང་སྨིན་པར་བྱེད་དུ་རུང༔    དམ་ཚིག་ཆེན་པོ་དེ་ཉིད་སྲུངས༔  དངོས་གྲུབ་ཆེན་པོ་དེ་ཐོབ་བྱ༔  དེ་བས་དམ་ལས་མ་འདའ་ཞིག༔  ཨོཾ་བཛྲ་ས་མ་ཡ་ {{TibChung|[33a]}} ཧཱུྃ༔  {{TibChung|ཞེས་རྡོ་རྗེ་མགོར་བཞག  སློབ་དཔོན་གྱིས་དབྱེ་བའི་རྒྱ་དང་བཅས།}}  ས་མ་ཡ་པྲ་ཝེ་ཤ་ཡ་ཕཊ༔  {{TibChung|ཅེས་པས།}}  དཀྱིལ་འཁོར་གྱི་སྒོ་བཞི་ཤག་གིས་དབྱེ་བར་གྱུར།  {{TibChung|ཅེས་བརྗོད་ལ་ཡོལ་བ་བསལ།}}  ཤར་སྒོ་ནས་གཡས་བསྐོར་དུ་ཕྱིན་ཏེ་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་བྱ་བར་མོས་པས་ཐལ་མོ་གནས་གསུམ་དུ་སྦྱོར་ལ་འདིའི་རྗེས་ཟློས།  ཨོཾ་ན་མ་སྟེ་ཧཱུྃ༔  ཨོཾ་ན་མ་མཱི་ཧཱུྃ༔  ཨོཾ་ན་མོ་ན་མ་ཧཱུྃ༔  {{TibChung|ལན་བཞི།}}  དེ་རྣམས་ཀྱིས་ཕྱི་འཇུག་གི་རིམ་པ་རྣམས་གྲུབ།  དེ་ནས་ནང་འཇུག་གི་དངོས་གཞི་ཡེ་ཤེས་པ་དབབ་པའི་སླད་དུ།  ཁྱེད་རང་རྣམས་དཀྱིལ་འཁོར་ཆེན་པོའི་ཤར་སྒོའི་ཁྱམས་སུ་དབང་སྟེགས་ཀྱི་ཁྲི་ལ་འཁོད་པར་མོས་ཏེ་སྒོ་གསུམ་གྱི་གནད་ལེགས་པར་གཅུན་ལ་དམིགས་པ་འདི་རྩེ་གཅིག་སྒོམ་མཛོད།  {{TibChung|ཤུ་ནྱ་ཏས་བསང་སྦྱང་།}}  ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཀྱིས་མཚོན་པའི་གཟུང་འཛིན་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་ཀྱི་ངང་ལས་ཆུ་ལས་ཆུ་བུར་བརྡོལ་བ་ལྟར་སྐད་ཅིག་གིས་རྣམ་པར་སྣང་མཛད་སྐུ་མདོག་དཀར་གསལ་ཞལ་གསུམ་ཞི་ཞིང་འཛུམ་པའི་ཉམས་ཅན།  ཕྱག་དྲུག་གི་གཡས་གསུམ་འཁོར་ལོ་རྡོ་རྗེ་རིན་པོ་ཆེ་དང་།  གཡོན་གསུམ་པདྨ་རྒྱ་གྲམ་དྲིལ་བུ་འཛིན་པ།  ཞབས་ {{TibChung|[33b]}} རྡོ་རྗེའི་སྐྱིལ་མོ་ཀྲུང་གིས་བཞུགས་པའི་པང་དུ་ཡུམ་དབྱིངས་ཕྱུག་མ་སྔོན་མོ་འཁོར་ལོ་དང་དྲིལ་བུ་འཛིན་པས་མགུལ་ནས་འཁྱུད་པ་དང་མཉམ་པར་སྦྱོར་བ།  གཉིས་ཀའང་ཞི་བའི་ཚུལ་དགུ་ལྡན་ཅིང་།  དར་དང་རིན་པོ་ཆེ་སོགས་ལོངས་སྤྱོད་རྫོགས་པའི་རྒྱན་གྱིས་སྤྲས་པ།  འོད་ཟེར་དཔག་ཏུ་མེད་པར་འཕྲོ་བའི་སྐུ་ཅན་དུ་གསལ་བའི་སྤྱི་བོར་ཧོཾ།  མགྲིན་པར་ལྃ།  སྙིང་གར་བྃ།  ལྟེ་བར་རྃ།  རྐང་མཐིལ་དུ་ཡྃ་རྣམས་ཀྱིས་མཚན་པ་དང་།  སློབ་དཔོན་གྱི་ཐུགས་ཀ་ནས་འོད་ཟེར་གྱི་སྣང་བ་བསམ་གྱིས་མི་ཁྱབ་པའི་འཕྲོས་པས་འོག་མིན་གྱི་ཞིང་ན་བཞུགས་པའི་བདེ་བར་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ།  དེ་ཐམས་ཅད་ནམ་མཁའི་དབྱིངས་གང་བར་བྱོན་ཏེ་ལུས་ཀྱི་དཀྱིལ་གྱི་ཡི་གེ་རྣམས་ལ་ཐིམ།  ཡི་གེ་རྣམས་འོད་དུ་མེར་གྱིས་ཞུ་ནས་ལུས་ཀྱི་ནང་ཐམས་ཅད་གང་བས་བདེ་སྟོང་གི་ཡེ་ཤེས་མཆོག་ཏུ་འབར་བར་མོས་མཛོད།  {{TibChung|ཅེས་འབེབས་པའི་རྫས་བཏུལ།  རོལ་མོའི་སྒྲ་དང་བཅས།}} ཨོཾ་ཧཱུྃ་ཏྲཱྃ་ཧྲཱིཿཨཱཿམཱུྃ་ལཱྃ་མཱྃ་པཱྃ་ཏཱྃ་ཛྙཱ་ན་སཏྭ་ཧཱུྃ༔  ཨཱ་བེ་ཤ་ཡ་ཨ་ཨཱཿ{{TibChung|ཞེས་དྲག་ཏུ་བརྗོད་ལ་དབབ།}} དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་བརྟན་པར་བྱས་པའི་མོས་པ་མཛོད།  {{TibChung|རྡོ་རྗེ་མེ་ཏོག་དང་བཅས་པ་སྤྱི་བོར་བཞག་ལ།}} ཏིཥྛ་བཛྲ{{TibChung|ས་བརྟན་པར་བྱ།}} སྔར་བྱིན་པའི་ {{TibChung|[34a]}} མེ་ཏོག་དེ་ཉིད་ཚེ་རབས་ནས་འབྲེལ་བའི་རིགས་ཀྱི་ལྷ་ལ་འབུལ་བའི་མོས་པས་འདིའི་རྗེས་ཟློས་དང་བཅས་ཚོམ་བུའི་དཀྱིལ་འཁོར་དུ་འདོར་བ་ཞུ།  {{TibChung|དགྲིམ་དཀྱིལ་བཀོད་ལ།}}  ཧོཿ  བདེ་གཤེགས་ཀུན་འདུས་དཀྱིལ་འཁོར་འདིར༔    སྙིང་པོའི་ཡེ་ཤེས་བསྟན་བྱའི་ཕྱིར༔  རིག་པའི་མེ་ཏོག་འདི་འབུལ་གྱིས༔  ལས་འཕྲོའི་དབང་གིས་བཞེས་སུ་གསོལ༔  པུཥྤེ་པྲ་ཏཱིཙྪ་ཧོཿ  {{TibChung|ཞེས་འདོར་དུ་གཞུག  །}} མེ་ཏོག་ལྷག་པའི་ལྷས་བཞེས་ཏེ་སླར་དབང་རྟགས་ཅོད་པན་དུ་བཅིངས་པར་མོས་ཤིག  །ཧོཿ  མི་གནས་ཡེ་ཤེས་དཀྱིལ་འཁོར་དུ༔  རིག་པའི་མེ་ཏོག་ཕུལ་བ་འདི༔  བྱིན་རླབས་བསམ་མི་ཁྱབ་པར་ཟུངས༔  དངོས་གྲུབ་ཐམས་ཅད་འདིས་ཐོབ་བོ༔  པུཥྤེ་གྷྲྀ་ཎ་སྟྭྃ་ཨི་མཾ་ས་ཏྭ་མ་ཧཱ་བ་ལ།  {{TibChung|ཞེས་མེ་ཏོག་སླར་སྤྱི་བོར་བཅིངས།}}  མ་རིག་པའི་སྒྲིབ་གཡོགས་དང་མིག་དར་ལྷན་ཅིག་བསལ་བར་མོས་ཤིག  །{{TibChung|གསེར་ཐུར་ཐོགས་ལ།}}  ཧོཿ  སྔོན་གྱི་རྒྱལ་བ་ཐམས་ཅད་ཀྱིས༔  འགྲོ་བའི་མིག་ནི་དབྱེ་བར་མཛད༔  སངས་རྒྱས་ས་ལ་བཀོད་པ་བཞིན༔  དེང་འདིར་རྣམ་སྣང་མཛད་བདག་གིས༔    མ་རིག་མིག་ནི་དབྱེ་བར་བྱ༔  ཙཀྵུ་པྲ་བེ་ཤ་ཡ་ཕཊ༔  {{TibChung|ཞེས་མིག་དར་བསལ།}}  དེ་ལྟར་དྲི་མེད་ཡེ་ཤེས་ཀྱི་སྤྱན་ཐོབ་པ་ལ་བརྟེན་ནས་ {{TibChung|[34a]}} བཅོམ་ལྡན་འདས་རྣམ་པར་སྣང་མཛད་ཡབ་ཡུམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་མངོན་སུམ་དུ་མཇལ་བར་མོས་ལ་སྤྲོ་བ་རྒྱ་ཆེན་པོ་བསྐྱེད་མཛོད།  དེ་རྣམས་ཀྱིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་པ་ལགས།  ཞུགས་ནས་མངོན་པར་དབང་བསྐུར་བ་དངོས་ལ་རྣམ་གྲངས་བཞི་ལས།  དང་པོ་བུམ་པའི་དབང་གི་སླད་དུ།  སློབ་དཔོན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་གདན་གསུམ་ཚང་བའི་དབང་གི་ལྷ་ནམ་མཁའ་གང་བར་སྤྱན་དྲངས།  དེ་རྣམས་དང་སློབ་དཔོན་ལྷན་ཅིག་པས་རིན་པོ་ཆེའི་བུམ་པ་རྡོ་རྗེ་མི་བསྐྱོད་པའི་རང་བཞིན་ཅན་གྱི་བདུད་རྩིའི་ཆུ་རྒྱུན་གྱིས་གང་བ་ཐོགས་ཏེ་བཀྲ་ཤིས་པའི་རྣམ་པ་དུ་མ་དང་ལྡན་པས་དབང་བསྐུར་བར་མོས་ཤིག  །{{TibChung|རྣམ་བུམ་ཐོགས་ལ།}}  ཧཱུྃ༔  རིན་ཆེན་བུམ་པ་གཞལ་ཡས་ཁང་༔  ནང་དུ་བདེ་གཤེགས་ལྷ་ཚོགས་བཞུགས༔  སྐལ་ལྡན་བུ་ལ་དབང་བསྐུར་བས༔  སྣང་སྟོང་ཡེ་ཤེས་རྟོགས་པར་ཤོག༔  ཀ་ལཱ་ཤ་ཨ་བྷི་ཥིཉྩ་ཧཱུྃ༔  {{TibChung|སྤྲོ་ན་བསྐྱེད་སྔགས་རེ་རེའི་མཐར་ཀ་ལཱ་ཤ་སྦྱར།  བུམ་པ་སྤྱི་བོར་བཞག་ཅིང་བུམ་ཆུ་སྦྱིན།}}  དེ་ལྟར་བུམ་པའི་ཆུས་དབང་བསྐུར་བས་ཉོན་མོངས་པ་ཞེ་སྡང་དག  །རྣམ་པར་ཤེས་པའི་ཕུང་པོ་རྡོ་རྗེ་མི་ {{TibChung|[35a]}}  བསྐྱོད་པའི་ངོ་བོར་གནས་གྱུར།  མེ་ལོང་ལྟ་བུའི་ཡེ་ཤེས་མངོན་དུ་བྱས་པ་ཡིན་ནོ།  །{{TibChung|ཞེས་རྟོགས་པ་བསྐྱེད།}}  དབང་ལྷ་རྣམས་དང་སློབ་དཔོན་ལྷན་ཅིག་པས་རིན་ཆེན་འབྱུང་ལྡན་གྱི་ངོ་བོར་གྱུར་པའི་རིན་པོ་ཆེའི་དབུ་རྒྱན་གྱིས་དབང་བསྐུར་ཞིང་སྤྱི་བོར་བཅིངས་པར་མོས་ཤིག  །{{TibChung|དབུ་རྒྱན་ཐོགས་ལ།}}  ཧཱུྃ༔  རིན་ཆེན་མཛེས་པའི་དབུ་རྒྱན་འདི༔  རྒྱལ་བ་ཀུན་གྱི་ཅོད་པན་ཏེ༔  སྐལ་ལྡན་བུ་ལ་དབང་བསྐུར་བས༔  མཉམ་ཉིད་ཡེ་ཤེས་རྟོགས་པར་ཤོག༔  རཏྣ་མུ་ཀུ་ཊ་ཨ་བྷི་ཥིཉྩ་ཏྲཱྃ༔  {{TibChung|ཞེས་སྤྱི་བོར་བཅིངས།}}  དེ་ལྟར་དབུ་རྒྱན་ཅོད་པན་གྱིས་དབང་བསྐུར་བས་ཉོན་མོངས་པ་ང་རྒྱལ་དག  །ཚོར་བའི་ཕུང་པོ་རིན་ཆེན་འབྱུང་ལྡན་གྱིུ་ངོ་བོར་གནས་གྱུར།  མཉམ་པ་ཉིད་ཀྱི་ཡེ་ཤེས་མངོན་དུ་བྱས་པ་ཡིན་ནོ།  །{{TibChung|ཞེས་རྟོགས་པ་བསྐྱེད།}}  དབང་ལྷ་རྣམས་དང་སློབ་དཔོན་ལྷན་ཅིག་པས་སྣང་བ་མཐའ་ཡས་ཀྱི་རང་བཞིན་ཅན་གྱི་རྡོ་རྗེས་དབང་བསྐུར་ཞིང་ལག་གཡས་སུ་གཏད་པར་མོས་ཤིག  །{{TibChung|རྡོ་རྗེ་ཐོགས་ལ།}}  ཧཱུྃ༔  མི་ཆོད་མི་ཤིགས་རྡོ་རྗེ་འདི༔  རྒྱལ་བ་ཀུན་གྱི་གསང་གསུམ་སྟེ༔  སྐལ་ལྡན་བུ་ལ་དབང་བསྐུར་བས༔  སོར་རྟོག་ཡེ་ཤེས་རྟོགས་པར་ཤོག༔    པདྨ་དྷཱ་ར་ཨ་བྷི་ཥིཉྩ་ཧྲཱིཿ  {{TibChung|ཞེས་སྤྱི་བོར་བཞག་ཅིང་ལག་གཡས་ {{TibChung|[35b]}} སུ་གཏད།}}  དེ་ལྟར་རྡོ་རྗེས་དབང་བསྐུར་བས་ཉོན་མོངས་པ་འདོད་ཆགས་དག  །འདུ་ཤེས་ཀྱི་ཕུང་པོ་སྣང་བ་མཐའ་ཡས་ཀྱི་ངོ་བོར་གནས་གྱུར།  སོ་སོར་རྟོག་པའི་ཡེ་ཤེས་མངོན་དུ་བྱས་པ་ཡིན་ནོ།  །{{TibChung|ཞེས་རྟོགས་པ་བསྐྱེད།}}  དབང་ལྷ་རྣམས་དང་སློབ་དཔོན་ལྷན་ཅིག་པས་དོན་ཡོད་གྲུབ་པའི་རང་བཞིན་ཅན་གྱི་དྲིལ་བུས་དབང་བསྐུར་ཞིང་ལག་གཡོན་དུ་གཏད་པར་མོས་ཤིག  །{{TibChung|དྲིལ་བུ་ཐོགས་ལ།}}  ཧཱུྃ  སྟོང་པ་ཉིད་ཀྱི་དྲིལ་བུ་ཆེ༔  རྒྱལ་བ་ཀུན་གྱི་དབྱངས་དང་ལྡན༔  སྐལ་ལྡན་བུ་ལ་དབང་བསྐུར་བས༔  བྱ་གྲུབ་ཡེ་ཤེས་རྟོགས་པར་ཤོག༔  ཀརྨ་གྷཎྜེ་ཨ་བྷི་ཥིཉྩ་ཨཱ༔  {{TibChung|ཞེས་སྤྱི་བོར་བཞག་ཅིང་ལག་གཡོན་དུ་གཏད།}}  དེ་ལྟར་དྲིལ་བུས་དབང་བསྐུར་བས་ཉོན་མོངས་པ་ཕྲག་དོག་དག  །འདུ་བྱེད་ཀྱི་ཕུང་པོ་དོན་ཡོད་གྲུབ་པའི་ངོ་བོར་གནས་གྱུར།  བྱ་བ་གྲུབ་བའི་ཡེ་ཤེས་མངོན་དུ་བྱས་པ་ཡིན་ནོ།  །{{TibChung|ཞེས་རྟོགས་པ་བསྐྱེད།}}  དབང་ལྷ་རྣམས་དང་སློབ་དཔོན་ལྷན་ཅིག་པས་རྣམ་པར་སྣང་མཛད་ཀྱི་རང་བཞིན་ཅན་གྱི་རྡོ་རྗེའི་མིང་གིས་མངོན་པར་དབང་བསྐུར་བར་མོས་ཤིག  །{{TibChung|གསང་མཚན་ཅོད་པན་ནམ་རྡོ་དྲིལ་ལྷན་ཅིག་ཏུ་བསྡམས་པ་ཐོགས་ལ།}}  ཧཱུྃ༔  རྒྱལ་བ་ཀུན་གྱི་མཚན་མཆོག་ནི༔  ཐོག་མ་བར་དང་མཐའ་མར་དགེ༔  སྐལ་ལྡན་བུ་ལ་དབང་བསྐུར་བས༔  ཆོས་དབྱིངས་ཡེ་ཤེས་རྟོགས་ {{TibChung|[36a]}} པར་ཤོག༔  བུདྡྷ་ན་མཿསརྦ་ཏ་ཐཱ་ག་ཏ་ཀྱེ་དཔལ་ཀུན་ཏུ་གཟིགས་པ་ཞེས་བྱ་བའི་དེ་བཞིན་གཤེགས་པའོ།  །{{TibChung|ཞེས་བསྐུར།}}  དེ་ལྟར་མིང་གིས་དབང་བསྐུར་བས་ཉོན་མོངས་པ་གཏི་མུག་དག  །གཟུགས་ཀྱི་ཕུང་པོ་རྣམ་པར་སྣང་མཛད་ཀྱི་ངོ་བོར་གནས་གྱུར་།  ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས་པ་ཡིན་ནོ།  །{{TibChung|ཞེས་རྟོགས་པ་བསྐྱེད།}}  དེའི་རྗེས་འབྲེལ་དུ་ལྷ་སྐུ་ཕྱག་རྒྱའི་དབང་བསྐུར་པ་ལ།  དཀྱིལ་འཁོར་པའི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་འཕྲོས་ཏེ་ཁྱེད་རང་ཁྱེད་རང་རྣམས་ལ་ཐིམ་པར་མོས་ཤིག  །{{TibChung|སྐུ་ཙཀ་རྣམས་རིམ་པར་ཐོགས་ལ།}}  ཧཱུྃ༔  དབུས་ཀྱི་ཕྱོགས་ཀྱི་དེ་བཞིན་གཤེགས་༔  བཅོམ་ལྡན་རྣམ་པར་སྣང་མཛད་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  རྣམ་པར་སྣང་མཛད་དབང་ཐོབ་ཤོག༔  ཨོཾ་ཧཱུྃ་ཏྲཱྃ་ཧྲཱིཿཨཱཿ མཱུྃ་ལཱྃ་མཱྃ་པཱྃ་ཏཱྃ༔  ཛྙཱ་ན་ས་ཏྭ་ཧཱུྃ༔  ཨ་བྷི་ཥིཉྩ་ཨོཾ༔  ཧཱུྃ༔  ཤར་གྱི་ཕྱོགས་ནས་དེ་བཞིན་གཤེགས༔  བཅོམ་ལྡན་རྡོ་རྗེ་སེམས་དཔའ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  རྡོ་རྗེ་སེམས་དཔའི་དབང་ {{TibChung|[36b]}}  ཐོབ་ཤོག༔  ཨོཾ་བཛྲ་ས་ཏྭ་ཨཱཿཨ་བྷི་ཥིཉྩ་ཨོཾ༔  ཧཱུྃ༔  ལྷོ་ཡི་ཕྱོགས་ནས་དེ་བཞིན་གཤེགས༔  བཅོམ་ལྡན་འཇམ་དཔལ་གཞོན་ནུ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  འཇམ་དཔལ་གཞོན་ནུའི་དབང་ཐོབ་ཤོག༔  ཨོཾ་མཉྫུ་ཤྲཱི་མཱུཾ༔    ཨ་བྷི་ཥིཉྩ་ཨོཾ༔  ཧཱུྃ༔  ནུབ་ཀྱི་ཕྱོགས་ནས་དེ་བཞིན་གཤེགས༔  བཅོམ་ལྡན་འཇིག་རྟེན་དབང་ཕྱུག་ལ༔  དེ་བཞིན་གཤེགས་དང་བྱང་ཆུབ་སེམས་༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  འཇིག་རྟེན་དབང་ཕྱུག་དབང་ཐོབ་ཤོག༔  ཨོཾ་ཨཱ་རྻ་ཨ་ཝ་ལོ་ཀི་ཏེ་ཤྭ་རི་ཧྲཱིོཿ  ཨ་བྷི་ཥིཉྩ་ཨོཾ༔  ཧཱུྃ༔  བྱང་གི་ཕྱོགས་ནས་དེ་བཞིན་གཤེགས༔  བཅོམ་ལྡན་ཕྱག་ན་རྡོ་རྗེ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  ཕྱག་ན་རྡོ་རྗེའི་དབང་ཐོབ་ཤོག༔  ཨོཾ་བཛྲ་པཱ་ཎི་ཧཱུྃ༔  ཨ་བྷི་ཥིཉྩ་ཨོཾ༔  ཧཱུྃ༔  ཤར་ལྷོ་མཚམས་ཀྱི་དཀྱིལ་འཁོར་ནས༔  བཅོམ་ལྡན་ཀུན་ཏུ་བཟང་པོ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོའི་བསྐོར༔  སྐལ་ {{TibChung|[37a]}} ལྡན་བུ་ལ་དབང་བསྐུར་བས༔  ཀུན་ཏུ་བཟང་པོའི་དབང་ཐོབ་ཤོག༔  ཨོཾ་ས་མནྟ་བྷ་དྲ་ཧཱུྃ༔  ཨ་བྷི་ཥིཉྩ་ཨོཾ༔  ལྷོ་ནུབ་མཚམས་ཀྱི་དེ་བཞིན་གཤེགས༔  བཅོམ་ལྡན་ནམ་མཁའི་རྒྱལ་པོ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  ནམ་མཁའི་སྙིང་པོའི་དབང་ཐོབ་ཤོག༔  ཨོཾ་ཁ་གརྦྷ་ཏྲཾ༔    ཨ་བྷི་ཥིཉྩ་ཨོཾ༔  ཧཱུྃ༔    ནུབ་བྱང་མཚམས་ཀྱི་དེ་བཞིན་གཤེགས༔  བཅོམ་ལྡན་ས་ཡི་སྙིང་པོ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  ས་ཡི་སྙིང་པོའི་དབང་ཐོབ་ཤོག༔  ཨོཾ་ཀྵིཾ་རཱ་ཛ་ཧྲཱིཿ  ཨ་བྷི་ཥིཉྩ་ ཨོཾ༔  ཧཱུྃ༔  བྱང་ཤར་མཚམས་ཀྱི་དེ་བཞིན་གཤེགས༔  བཅོན་ལྡན་བྱམས་པ་མགོན་པོ་ལ༔  དེ་བཞིན་གཤེགས་དང་བྱང་ཆུབ་སེམས༔  མ་ལུས་འཁོར་ཚོགས་རྒྱ་མཚོས་བསྐོར༔  སྐལ་ལྡན་བུ་ལ་དབང་བསྐུར་བས༔  བྱམས་པ་མགོན་པོའི་དབང་ཐོབ་ཤོག༔  ཨོཾ་མེེ་ཏྲི་དྷ་ར་ཨཱཿ  ཨ་བྷི་ཥིཉྩ་ཨོཾ༔  {{TibChung|ཞེས་སྤྱི་བོར་བསྐུར།}}  དེ་ལྟར་བརྡ་ལྷ་སྐུ་ཕྱག་རྒྱས་དབང་བསྐུར་བ་ལ་བརྟེན་ནས།  དོན་ཕྱི་སྣོད་གཞལ་ཡས་ཁང་།  ནང་བཅུད་ {{TibChung|[37b]}} ལྷའི་དཀྱིལ་འཁོར།  རྒྱུད་ཕུང་ཁམས་སྐྱེ་མཆེད་དབང་ཡུལ་དང་བཅས་པ་ཐམས་ཅད་བདེ་གཤེགས་ཞི་བ་རྡོ་རྗེ་དབྱིངས་ཀྱི་ལྷ་ཚོགས་སུ་ཡེ་ནས་བཞུགས་པ་ཉིད་ཐབས་འདིས་གསལ་བཏབ་པ་ཡིན་པས།  དེང་ཕྱིན་ཆད་གདན་གསུམ་ཚང་བའི་དཀྱིལ་འཁོར་འཁོར་ལོའི་ང་རྒྱལ་ལ་རྟག་ཏུ་གནས་པའི་སྒོ་ནས་ཅིར་སྣང་ཆོས་ཉིད་བདེ་བ་ཆེན་པོའི་ལོངས་སྤྱོད་ལ་རོལ་པར་མཛོད་ཅིག  །དེ་ལྟར་དབང་ཡོངས་སུ་རྫོགས་པ་ཐོབ་པ་ལ་ཁམས་གསུམ་ཆོས་ཀྱི་རྒྱལ་པོར་མངའ་གསོལ་བའི་ཕྱིར་ཁྱེད་རང་རྣམས་སེང་གེས་བཏེགས་པའི་རིན་པོ་ཆེའི་ཁྲི་ལ་གནས་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་ཕུབ་ཅིང་།  རྐང་འོག་ཏུ་འཁོར་ལོ།  །ལག་ཏུ་རྡོ་དྲིལ་དུང་དང་གླེགས་བམ་ཕྱག་ཤིང་རྣམས་གཏད་ནས་རྡོ་རྗེ་སློབ་དཔོན་གྱི་དབང་གི་བྱེད་ལས་གཞན་དོན་འཆད་ཕྲིན་གྱི་གནང་བ་སྩལ་བར་མོས་ཤིག  །{{TibChung|ཡོ་བྱད་རྣམས་གཏད་ལ།}}  ཧཱུྃ༔  རང་བྱུང་ལྷུན་གྲུབ་དགོངས་པ་མངོན་གྱུར་པའི༔  རྡོ་རྗེ་སློབ་དཔོན་བདག་པོའི་དབང་ཐམས་ཅད༔  དེང་འདིར་རྡོ་རྗེ་སློབ་དཔོན་འདིར་རྫོགས་ནས༔  རྒྱལ་བ་རྣམས་ཀྱིས་ཤིས་པ་བརྗོད་གྱུར་ཅིག༔  {{TibChung|ཅེས་དང་།  རྟེན་འབྲེལ་སྙིང་པོ་བཟླས་པའི་མེ་ཏོག་འཐོར།}}  དེ་ལྟར་ན་ཕྱི་མཚན་མའི་དཀྱིལ་འཁོར་དུ་བུམ་པའི་དབང་ཐོབ།  ལུས་རྩའི་དྲི་མ་དག  །ལམ་སྣང་སྟོང་ {{TibChung|[38a]}} ཟུང་འཇུག་བསྐྱེད་པའི་རིམ་པ་བསྒོམ་པ་ལ་དབང་།  འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ།  །{{TibChung|འདིར་དབང་གཞུང་དུ་མཆོག་དབང་གོང་མ་གསུམ་དབང་ཕྲེང་ཆེ་ཆུང་ནས་བླང་བར་གསུངས་པ་གཏེར་ཁ་རིགས་གཅིག་པའི་གནད་ཀྱིས་དགའ་རབ་སྙིང་ཐིག་ནས་ལེན་པའི་ཕྱག་བཞེས་ལྟར་ན།}}  གཉིས་པ་གསང་བའི་དབང་གི་སླད་དུ།  བླ་མ་དཀྱིལ་འཁོར་གྱི་བདག་པོ་ཡབ་ཡུམ་སྙོམས་པར་ཞུགས་པའི་བདེ་བའི་སྒྲ་དང་དགའ་བའི་འོད་ཟེར་གྱིས་རྒྱལ་བ་སྲས་དང་བཅས་པ་བཀུག་ཏེ་ཞལ་དུ་ཞུགས།  ཐུགས་ཀར་བྱང་ཆུབ་ཀྱི་སེམས་སུ་ཞུ།  མཁའ་གསང་ནས་ཕྱུངས་ཏེ་དཀར་དམར་ལྷག་པའི་བྱང་སེམས་ཐོད་པའི་བདུད་རྩི་དང་རོ་གཅིག་ཏུ་འདྲེས་པ་ལྕེ་ལ་བཞག་སྟེ་དབང་བསྐུར་བར་མོས་ཤིག  །{{TibChung|གསང་ཐོད་ཐོགས་ལ།}}  ཨ༔  ཇི་ལྟར་བདེ་གཤེགས་ཡབ་རྣམས་ཀྱིས༔  རང་གི་སྲས་ལ་དབང་བསྐུར་བཞིན༔  བདེ་ཆེན་བྱང་ཆུབ་སེམས་ཀྱི་ཆུས༔  རྟོག་པའི་དྲི་མ་བསལ་བར་བྱ༔  བོ་དྷི་ཙིཏྟ་ཨ་བྷི་ཥིཉྩ་ ཧོཿ  {{TibChung|ཞེས་བདུད་རྩི་སྦྱིན།}}  རྣམ་པར་རྟོག་པ་མེད་པའི་བློས་སྔགས་འདིའི་རྗེས་ཟློས་དང་བཅས་མྱང་བར་ཞུ།  ཨ་ཧོ་མ་ཧཱ་སུ་ཁ་ཧོཿ  {{TibChung|ཞེས་མྱང་དུ་བཅུག  །}} དེས་སློབ་དཔོན་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ།  ངག་རླུང་གི་ {{TibChung|[38b]}} དྲི་མ་དག  །ལམ་རང་བྱིན་རླབས་ཀྱི་རིམ་པ་བསྒོམ་པ་ལ་དབང་།  འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ།  །གསུམ་པ་ཤེས་རབ་ཡེ་ཤེས་ཀྱི་དབང་གི་སླད་དུ།  སློབ་དཔོན་གྱི་ཡུམ་དབྱིངས་ཕྱུག་མ་ལས་གཟུགས་དང་ལང་ཚོ་ཕུལ་དུ་བྱུང་ཞིང་མཚན་ཉིད་ཡོངས་སུ་རྫོགས་པའི་ཤེས་རབ་མ་སྤྲོས་ཏེ་ཁྱེད་རང་གི་མདུན་དུ་ཆགས་པའི་ཉམས་འགྱུར་དང་བཅས་འཁོད་ནས་བདེ་བ་བརྟེན་པར་བསྐུལ་བར་མོས་ཤིག  །{{TibChung|རིག་ཙཀ་ཐོགས་ལ།}}  ཧཱུྃ༔  དགའ་བའི་གནས་ཆེན་ཕྱག་རྒྱ་མོ༔  སྣ་ཚོགས་གཟུགས་ཅན་ཡིད་འོང་མ༔  ཁྱེར་ཅིག་ཁྱེར་ཅིག་སེམས་དཔའ་ཆེ༔  དགའ་བདེའི་རོལ་མོ་རྟག་ཏུ་གྱིས༔  མ་ཧཱ་མུ་དྲ་ཛྙཱ་ན་ཨ་བྷི་ཥིཉྩ་ཧཱུྃ༔  {{TibChung|ཞེས་ལག་ཏུ་གཏད།}}  ཛཿཧཱུྃ་བྃ་ ཧོཿ    ཨ་ནུ་རཱ་ག་ཛྙ་ན་བཛྲ་ས་མ་ཡ་ཧོཿ  ཞེས་ཤེས་རབ་མ་དང་འདུ་ཤེས་གསུམ་ལྡན་གྱིས་སྙོམས་པར་ཞུགས་པས་ཡས་བབས་རྒྱུ་དང་མས་བརྟན་འབྲས་བུའི་དགའ་བ་བཞི་ཉམས་སུ་མྱོང་།  ལྷན་ཅིག་སྐྱེས་པའི་ཡེ་ཤེས་འགྱུར་མེད་དུ་བརྟན་པར་མོས་ཤིག  །དེས་ཕྱག་རྒྱ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ།  ཡིད་ཐིག་ལེའི་སྒྲིབ་པ་དག  །ལམ་གཞན་ལུས་ཕོ་ཉའི་ལམ་བསྒོམ་པ་ལ་དབང་།  འབྲས་བུ་ {{TibChung|[39a]}} ཐུགས་རྡོ་རྗེ་ཆོས་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ།  །དབང་བཞི་པ་དོན་དམ་ངོ་སྤྲོད་རིག་པ་རྩལ་གྱི་དབང་གི་སླད་དུ།  སྔར་དཔེ་ལས་སྐྱེས་པའི་ཡེ་ཤེས་དེ་ཉིད་ཀྱིས་མཚོན་བྱེད་དུ་བྱས་ནས་དོན་དམ་རང་བྱུང་ལྷན་ཅིག་སྐྱེས་པའི་ཡེ་ཤེས་གདོད་ནས་རང་རིག་རང་ལ་གསལ་བའི་དོན་རྡོ་རྗེ་སེམས་དཔའི་མེ་ལོང་གི་བརྡས་མཚོན་ཏེ།  དབྱིངས་ཀ་དག་ནང་གསལ་སྤྲོས་པ་དང་བྲལ་བ་ལས་རིག་གདངས་ལྷུན་གྲུབ་ཀྱི་སྣང་བ་ཕྱིར་གསལ་དུ་འཆར་ཡང་ངོ་བོ་ལས་ནམ་ཡང་མ་གཡོས་པའི་དོན་གོ་བར་མཛོད་ལ་མཉམ་པར་ཞོག་ཅིག  །{{TibChung|ཤེས་རྡོ་ཐོགས་ལ།}}  ཨཿ གསང་བ་མཆོག་གི་དགྱེས་པ་ན༔  ཐམས་ཅད་བདག་ཉིད་རྟག་ཏུ་བཞུགས༔  རྡོ་རྗེ་སེམས་དཔའ་བདེ་བ་ཆེ༔  དབྱིངས་རིག་ཟུང་འཇུག་རྟོགས་པར་ཤོག༔  ཛྙཱ་ན་བཛྲ་ས་ཏྭ་ཨ་ཨ་ཨ༔  {{TibChung|ཞེས་ཤེལ་རྡོ་སྙིང་གར་བཞག  །}} དེས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཚིག་དབང་རིན་པོ་ཆེ་ཐོབ།  སྒོ་གསུམ་ཆ་མཉམ་གྱི་སྒྲིབ་པ་དག  །ལམ་འོད་གསལ་རྫོགས་པ་ཆེན་པོ་ཀ་དག་དང་ལྷུན་གྲུབ་ཉམས་སུ་ལེན་པ་ལ་དབང་།  འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ།  །{{TibChung|ཞེས་རྟོགས་པ་བསྐྱེད།}}  བླ་མ་དཀྱིལ་འཁོར་པའི་ལྷ་ཚོགས་ {{TibChung|[39b]}} ནམ་མཁའ་གང་བའི་རྩ་གསུམ་{{TibChung|སོགས་ཀྱིས་མཚམས་སྦྱར་ལ་ཤིས་བརྗོད་རྒྱས་པར་སྤེལ།}}  དེ་རྣམས་ཀྱི་སྒོ་ནས་གཞུང་ལས།  དེ་ལྟར་རྡོར་དབྱིངས་དཀྱིལ་འཁོར་གྱི༔  དབང་བསྐུར་ཡོངས་རྫོགས་ཕྱི་སྐོར་འདི༔  ཡང་ཟབ་ཀུན་གྱི་མཐར་ཐུག་པ༔  རྫོགས་པ་ཆེན་པོའི་ཆོས་སྡེར་འདུ༔  ཞེས་གསུངས་པ་ལྟར་རྫོགས་བ་ཆེན་པོ་ཕྱི་སྐོར་སེམས་སྡེ་མ་ཧཱའི་མན་ངག་དང་འབྲེལ་བ་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་ཟབ་མོ་ལེགས་པར་གྲུབ་པ་ལགས་{{TibChung|སོགས་ཀྱི་མཚམས་སྦྱར་ལ་དམ་ཚིག་བསྒྲགས་བཟུང་སོགས་དབང་གི་རྗེས་རིམ་སྤྱི་ལྟར་དང་།  སློབ་དཔོན་གྱིས་ཚོགས་ལ་རོལ་ཞིང་ལྷག་མ་གཏོང་བ་སོགས་ཆོ་གའི་རྗེས་རིམ་རྣམས་ཀྱང་གཞུང་བཞིན་མཐར་ཆགས་སུ་བཏང་བས་གྲུབ་བོ།  །མི་འགྱུར་གཉུག་མའི་ཡེ༵་ཤེ༵ས་གང་།  །རྡོ༵་རྗེ༵་དབྱིངས་ཀྱི་ཕྱག་རྒྱ་རུ།  །ཡོངས་སྣང་དེ་ཡི་དཀྱིལ་འཁོར་དུ།  །འཇུག་པའི་ཐབས་ཚུལ་འདི་རྨད་བྱུང་།  །ཕྱི་སྐོར་སེམས་སྡེའི་ཡི་དམ་ཞི་བ་རྡོ་རྗེ་དབྱིངས་ཀྱི་དབང་གི་ལེའུ་ཚན་ནོ།།  །།}} 




{{TibChung|[40a]}} སྭསྟི།  བྱིན་རླབས་འཕོ་བའི་དབང་ཆེན་གྱིས།  །སྐལ་ལྡན་གྲོལ་གཞིར་སྨིན་མཛད་པ།  །རིག་འཛིན་བླ་མར་གུས་བཏུས་ནས།  །ཁྲིད་ཀྱི་བྱིན་རླབས་མཛོད་སྒོ་དབྱེ།  །{{TibChung|རྫོགས་པ་ཆེན་པོ་སྡེ་གསུམ་ལས་ཕྱི་སྐོར་སེམས་སྡེའི་ཁྲིད་ཀྱི་བྱིན་རླབས་ཨ་ཡིག་མདའ་འཕེན་མ་བསྒྲུབ་པ་ལ།  སྦྱོར་བ་རྡུལ་ཚོན་ནམ་རས་བྲིས་ཀྱི་ཕྱི་དཀྱིལ་ཙིཏྟ་ལ་ནང་པདྨ་དམར་པོ་འདབ་མ་བཅུ་དྲུག་པ་འདབ་མ་རྣམས་ལ་ཨ་དཀར་པོ་རེ་རེས་མཚན་པ་ཅན་བྲིས་པ་བཀྲམ།  དེ་སྟེང་མཉྫི་ཁར་བུམ་པ་བཅུད་ལྡན་ལ་རས་སམ་ཤིང་ཤུན་ལ་བྲིས་པའི་ཙིཏྟ་དམར་པོ་ཨ་ཡིག་གིས་མཚན་པ་གདག  །ཕྱི་ནང་གི་མཆོད་ཚོགས་བཤམ་ལ།  བླ་མའི་བསྐྱེད་རིམ་བྱང་བུའི་ཁྲིགས་བསྡེབས་ལྟར་བདག་མདུན་དབྱེར་མེད་ཀྱི་དགོངས་པས་བཟླས་པ་ཚོགས་མཆོད་དང་།  བུམ་ནང་ཨ་དཀར་པོ་ཞུ་བས་བདུད་རྩིར་བསམ་ལ་ཨ་གང་འགྲུབ་བཟླ།  ལས་བུམ་རྡོར་སེམས་ཀྱིས་བརླབ།  བྱིན་རླབས་དངོས་ལ།  སློབ་མ་རྣམས་ཁྲུས་ནས་དབྱུང་།  བགེགས་བསྐྲད་ཅིང་སྲུང་འཁོར་བསྒོམ།  མཎྜལ་བཀྱེ་བསྡུ་དང་།  སེམས་བསྐྱེད་གསལ་བཏབ་ལ་མཚམས་སྦྱོར་གྱི་ཁྱད་པར།}}  དེ་ལ་འདིར་གྲུབ་པའི་རིག་འཛིན་རྣམས་ཀྱི་གསུམ་དུ་གྲགས་པའི་ཡ་གྱལ་རྫོགས་པ་ཆེན་པོ་ཀུན་གྱི་འཕྲོ་གཞིའམ་རྩ་བ་ལྟ་བུ་སེམས་ཕྱོགས་རྒྱ་མཚོའི་མན་ངག་གི་སྙིང་པོ་མཁས་པ་ཤྲཱི་སེང་ཧས་དུས་གསུམ་ཀུན་མཁྱེན་པདྨ་འབྱུང་གནས་ {{TibChung|[40b]}} ལ་གདམས་པ།  ཟབ་དགུའི་ཡང་བཅུད་རྟོག་གེ་དང་དམ་ཉམས་འདྲེས་ཁྱེར་གྱི་བསྲེ་བསླད་མ་ཞུགས་པ་གཏེར་བརྒྱུད་མཁའ་འགྲོའི་ཁ་རླངས་ཐུ་ལེ་བ་འདི་ཉིད་ཀྱི་ཁྲིད་ཀྱི་བྱིན་རླབས་ཟབ་མོ་འབུལ་བ་ལ།  ཀྱེ་རིགས་ཀྱི་བུ་རྣམས༔  དབང་བསྐུར་བའི་ཚུལ་ནི་འདི་ལྟ་བུ་སྟེ༔  བསྐུར་བྱ་བསྐུར་བྱེད་བསྐུར་ཐོབ་དང་བྲལ་བའོ༔  དེ་མཚོན་བྱེད་བརྡ་ལ་བརྟེན་ནས་འཇུག་དགོས་པས་ཐོག་མར་ཁྱེད་རང་གི་དངོས་སུ་འབྱོར་པ་དང་ཡིད་ཀྱིས་སྤྲུལ་པའི་མཆོད་སྤྲིན་ཞིང་ཁམས་རྒྱ་མཚོར་ཁྱབ་པར་སྤྲུལ་ནས་མཎྜལ་འབུལ་བར་ཞུ།  {{TibChung|ཞེས་མཎྜལ་འབུལ་དུ་གཞུག  །}} འོ་རང་ཤེས་རིག་པའི་རྒྱལ་པོ་བླ་མ་ཀུན་ཏུ་བཟང་པོར་བསྒོམ་ལ་དད་མོས་གདུང་བ་དྲག་པོས་གསོལ་བ་འདེབས་པ་འདིའི་རྗེས་ཟློས།  བདག་ལ་བྱ་རྩོལ་བྲལ་བའི་རྫོགས་ཆེན་ཐམས་ཅད་སེམས་སུ་བལྟ་བ༔  བརྡ་ཙམ་གྱིས་ནི་རྟོགས་པའི་བྱིན་རླབས་འཕོ་བའི་དབང་༔  སློབ་དཔོན་དགོངས་པའི་མཐར་ཐུག་གང་ཡོད་བདག་ལ་སྩལ་དུ་གསོལ༔  {{TibChung|ལན་གསུམ།}}  དེ་ནས་མཆོད་བསྟོད་བཤགས་པ་བྱ་བ་རྣམས་ཚིག་རིས་དང་མཐུན་པའི་སྒོམ་དོན་གསལ་ཐོབ་ཅིག  །{{TibChung|དཔོན་སློབ་ལྷན་ཅིག་པས་བླ་མའི་བྱང་བུའི་མཆོད་བསྟོད་དང་།  སྒྲིབ་སྦྱོང་བྱང་བུའམ་ཆོས་ཉིད་ཀློང་བཤགས་སོགས་རྒྱས་བསྡུས་ཅི་རིགས་བྱ།}}  དེ་ནས་བྱིན་རླབས་དངོས་གཞིའི་ {{TibChung|[41a]}} སླད་དུ་དམིགས་པ་འདི་བཞིན་དུ་མཛོད།  ཀྱེ་རིགས་ཀྱི་བུ་སློབ་དཔོན་མ་བཅོས་གསལ་རྫོགས་ལྷུག་པར་གནས་པའི་སྙིང་རྩ་འདབ་དབུས་དང་བཅས་པའི་ཕྱོགས་བརྒྱད་ན་ཨ་སུམ་ཅུ་རྩ་གཅིག་བསྒོམ༔  སྙིང་གར་གནས་པའི་ཨ་དཀར་པོ་ལས་འོད་ཟེར་མདའ་འཕང་བ་ལྟར་འཕྲོས༔  དཀྱིལ་འཁོར་དབུས་ཀྱི་ཨ་ཐམས་ཅད་ལའང་ཕོག༔  དེ་ལས་ཀྱང་འོད་ཟེར་སྔར་ལྟར་འཕྲོས་ཏེ་རྫས་ཀྱི་ཨ་ཡིག་ལ་ཕོག༔    དེ་ལས་འོད་ཟེར་སྐར་མདའ་ལྟར་འཕྲོས་པས་སློབ་མའི་སྙིང་ནང་གི་ཨ་ལ་ཕོག་པས༔    སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཨ་ཡིག་བཞི་ལ་ཐིམ༔  རང་ལུས་ཀྱང་ཨ་ཡིག་ལ་ཐིམ༔  ཨ་ཡིག་འོད་དུ་མེར་གྱི་ཞུ་ནས་མི་དམིགས་པར་མཉམ་པར་བཞག༔  སླར་ཡང་མ་འདྲེས་གསལ་རྫོགས་སུ་གསལ་བས༔  སྙིང་གི་ཨ་ཡིག་ལས་འོད་འཕྲོས༔  སྙིང་གའི་ནང་ཐམས་ཅད་གསལ༔  བུམ་ནང་གི་མར་མེ་ལྟར་གསལ་བ་ལ་ཤེས་པ་གཏོད་ཅིག༔  {{TibChung|དཀྱིལ་འཁོར་གྱི་བརྡ་དོན་ངོ་སྤྲད་ནི།}}  དཀྱིལ་འཁོར་དབུས་ཀྱི་ཨ་དཀར་པོ་དེ་ནི་ཀུན་གཞི་དྲི་མ་མེད་པ་མཚོན་ནོ༔  ཨ་ཡིག་ཕྱི་རོལ་དུ་ཙིཏྟ་རིན་ཆེན་འདི་ནི་ཀུན་གཞིའི་ངོ་བོ་སྟོང་པ་ནི་འོད་གསལ་བ་ལས་མ་རིག་པ་རྣམ་ཤེས་སམ༔  རིག་པའི་དུས་ན་ {{TibChung|[41b]}} ཡེ་ཤེས་སུ་སྐུ་མཚོན་པས་སྐུ་གཉིས་ལྷུན་གྱིས་གྲུབ་པའོ༔  བུམ་པ་ནི་ལུས་དབང་པོའི་སྒོ་ཐམས་ཅད་གསལ་ཞིང་རྣམ་ཤེས་ཀྱི་འཇུག་སྒོ་ཕྱི་ནང་གི་ཡུལ་ཤེས་གཉིས་ཀྱི་སྒོ་འབྱེད་པ་ལྟ་བུ་སྟེ༔  བུམ་པའི་སྒོ་འགགས་པས་སོ་སོར་དབྱེ་བ་ཙམ་ལས་བུམ་པ་དབྱིངས་སུ་ཐིམ་པའི་ཚེ་ནམ་མཁའ་ཕྱི་ནང་གཅིག་ཏུ་འགྱུར་བ་བཞིན༔  ལུས་ཀྱི་རྒྱ་གྲོལ་བས་ཡུལ་དང་ཤེས་པ་དབྱེར་མེད་ཅིང་༔  དེ་ཉིད་ཀྱང་ཀུན་གཞིའི་དབྱིངས་སུ་རྫོགས་པར་འགྱུར་བས་ན༔  མ་དག་པའི་དབང་པོ་གཉིས་སུ་འཛིན་ཅིང་༔  དག་པའི་དབང་པོ་བདེན་མེད་དུ་མཐོང་བས་བུམ་པ་ཆག་པའི་མར་མེས་ཕྱི་ནང་འོད་གསལ་བ་བཞིན་འོད་གསལ་དག་པའི་གཞོན་ནུ་བུམ་པའི་སྐུར་ལྷུན་གྱིས་གྲུབ་པར་མཚུངས་ལ༔    པདྨ་ནི་མ་དག་པའི་ངོ་ནས་ཀུན་གཞི་ནས་གསལ་བའི་ཆ་མ་རྟོགས་པར་རྣམ་ཤེས་ཀྱི་འཇུག་པ་དབང་པོས་མཚམས་སྦྱར་ཏེ་ཡུལ་ཐམས་ཅད་སྣ་ཚོགས་བདེན་ཞེན་དུ་མཐོང་བར་བྱེད་ལ༔    དེ་ཉིད་རྣམ་ཤེས་གནས་འགྱུར་བའི་ཚེ་དབང་པོ་བདེ་བ་འོད་གསལ་ཞིང་ཕྱིའི་རྟོག་ཚོགས་ཐམས་ཅད་ཆོས་ཉིད་ཀྱི་རང་སྣང་དུ་རྟོགས་པས་ཞིང་ཁམས་ཡོན་ཏན་བསམ་གྱིས་མི་ཁྱབ་པ་མཐོང་བའི་བརྡའོ༔  {{TibChung|ཞེས་ངོ་སྤྲོད་ལ།  བུམ་པ་ཐོགས་ཏེ།}}  དང་པོ་དབང་པོའི་ཚོར་བས་མཚམས་སྦྱར་ཏེ༔  {{TibChung|[42a]}} རྣམ་ཤེས་ལོག་པར་བྱེད་པ་དག་པ་དང་༔  དབང་པོ་བདེན་མེད་ཉིད་དུ་རྟོགས་བྱའི་ཕྱིར༔  བདེ་ཆེན་གཞོན་ནུ་ཕྱག་རྒྱ་བུམ་པའི་དབང་༔  དེ་བས་དེ་ཉིད་རྟོགས་ཕྱིར་དབང་བསྐུར་རོ༔    ཁ་རྒྱན་སྣ་ཚོགས་མདོངས་སྒྲོ་པདྨའི་འདབ༔  སྣང་སྟོང་དབྱེར་མེད་ཡུལ་ཀུན་དག་པ་དང་༔  སྣང་སྲིད་བདེ་བ་ཆེན་པོར་འཆར་བའི་ཕྱིར༔  བུམ་པ་ཁ་རྒྱན་སྣང་སྟོང་མདངས་གསལ་དབང་༔  ཕྱི་ནང་གཉིས་མེད་རྟོགས་ཕྱིར་དབང་བསྐུར་རོ༔  རྣམ་ཤེས་ཡུལ་ལ་འཇུག་པའི་མ་དག་པ༔  རྡོ་ལ་གསེར་འགྱུར་རྩི་ཡིས་བཏབ་པ་བཞིན༔  བདེ་ཆེན་མཁའ་དབྱིངས་མཉམ་སྦྱར་གཅིག་ཏུ་འཁྲིལ༔  ཙིཏྟ་རིན་ཆེན་འབར་བ་ཟུར་བརྒྱད་འདི༔  བདེ་བ་བརྒྱད་དུ་མཚོན་པས་དབང་བསྐུར་བས༔  དགའ་བཞིའི་ཡེ་ཤེས་དབྱིངས་སུ་རྣམ་ཤེས་དག༔  ཡེ་ཤེས་འོད་གསལ་ཀློང་དུ་གྲོལ་བར་ཤོག༔  ཨ་ནི་ཀུན་གཞི་ཀ་དག་སྒྲིབ་བྲལ་ལས༔  གཙང་ཞིང་རྟག་ལ་འགྱུར་བ་མེད་པའི་ངང་༔  བཟང་ངན་བླང་དོར་འཛིན་པའི་མཐའ་ལས་འདས༔  འོད་གསལ་ཀློང་ཆུབ་སེམས་ཉིད་ཡེ་ཤེས་སུ༔    བལྟས་པས་སྣང་སྲིད་ཐམས་ཅད་ཡེ་ཤེས་དབྱིངས༔  ཡོངས་རྫོགས་རྩོལ་བ་མེད་པའི་ངང་དུ་ལྟ༔    {{TibChung|[42b]}} ཨ་ཨ་ཨ༔  {{TibChung|ཞེས་བུམ་པ་སྤྱི་བོར་བཞག་ཅིང་བུམ་ཆུ་སྦྱིན།}}  རིག་འཛིན་དགོངས་མཉམ་ཀྱི་གླུས་བསྐུལ་བ་ལ་རྩ་བ་རིག་འཛིན་ཤྲཱི་སེངྷ་ས་བསམ་གཏན་གྱི་ཁང་བུར་རྡོ་རྗེའི་གླུ་ཕྱི་མ་རྒྱས་པ་འདི་སྐད་ལོ།  །ཇི་ལྟར་བསམ་ཡང་མི་རྟོག་ངང་༔  {{TibChung|ཞེས་སོགས་ནས།}}  བདེ་བ་ཆེན་པོར་ཨ་ལ་ལ་ ཧོཿ  {{TibChung|ཞེས་བླངས།}}  དེ་ལྟར་རྡོ་རྗེ་གླུའི་དགོངས་དོན་གདམས་ངག་གི་ངོ་སྤྲོད་ཆིག་བརྒྱུད་དུ་གདམས་པ་ནི།  {{TibChung|སློབ་བུའི་རྣ་བར་ཟངས་དུང་ལྟ་བུའི་སྦུབས་མཆུ་བཙུགས་ནས་སྐད་ཤུབ་བུས་གཞན་གྱིས་མ་ཐོས་པར་བྱས་ལ།}}  བུམ་པ་ཁུངས་གཏོར་གྱི་དགོངས་པ་ལས།  ཆོས་ཐམས་ཅད་ཡེ་ཤེས་སུ་ཤེས༔  ཡེ་ཤེས་བཙལ་དུ་མེད་པའོ༔  {{TibChung|ཞེས་དང་།}}  དང་པོ་ཐུགས་གཅིག་ཏུ་ཐུག༔    བར་དུ་བལྟ་བ་གཅིག་ལ་བལྟ༔  མཐར་ནི་མཐོང་བ་གཅིག་ཏུ་མཐོང་༔  {{TibChung|ཞེས་ལན་གསུམ་རེ་དལ་བུར་བརྗོད།  དེ་ནས་སྔར་སེམས་སྡེའི་བླ་མའི་སྒྲུབ་དབང་གི་སྐབས་བཞིན་རྒྱལ་པོ་དྷ་ཧེ་ན་ཏ་ལོ་ནས་བཟུང་རིག་འཛིན་བཅོ་བརྒྱད་ཀྱི་གླུ་རྣམས་འདིར་བླང་ལ་གླུ་རེ་དང་སྒྲགས་ནས་ངོ་སྤྲད་སྦུབས་མཆུའི་གདམས་པ་བཅོ་བརྒྱད་ནི།  དང་པོ།}}  གསེར་གྱི་ཁྱུང་གཤོག་ཅེས་པའི་མན་ངག་ལས།  གསལ་ལ་མི་གཡོ་ཐལ་བྱུང་བའོ།  །{{TibChung|གཉིས་པ།}}  བུམ་པ་ཁུངས་གཏོར་ཞེས་བྱ་བའི་མན་ངག་ལས།  ཡེ་ཤེས་མ་བཙལ་ཡན་པར་ཞོག  །{{TibChung|གསུམ་པ།}}  ཉི་མ་ཤར་བ་ལྟ་བུའི་ {{TibChung|[43a]}} མན་ངག་ལས།  རིག་པ་ཅིག་ཆར་ལྷུག་པར་བཞག  །{{TibChung|བཞི་པ།}}  དབུལ་མོ་གཏེར་འཆང་ཞེས་བྱ་བའི་མན་ངག་ལས།  ཐམས་ཅད་སྤྲུལ་པ་སྐུ་སྟེ་བཏང་སྙོམས་ངང་།  །{{TibChung|ལྔ་པ།}}  མེ་ལོང་ལྟ་བུ་ཞེས་བྱ་བའི་མན་ངག་ལས།  སྤྲོས་མེད་བྱང་ཆུབ་ཡན་ལག་གནས།  །{{TibChung|དྲུག་པ།}}  ཐིག་ལེ་ཆེན་པོ་ཞེས་བྱ་བའི་མན་ངག་ལས།  ཆོས་ཉིད་བདེ་ཆེན་ངང་དུ་གསལ།  །{{TibChung|བདུན་པ།}}  སེང་གེ་འགྱིང་བ་ལྟ་བུ་ཞེས་བྱ་བའི་མན་ངག་ལས།  ཉོན་མོངས་ལྔ་ཉིད་ཡེ་ཤེས་ལྔ་རུ་གསལ།  །{{TibChung|བརྒྱད་པ།}}  མཁའ་ལྡིང་ཆེན་པོ་ཞེས་བྱ་བའི་མན་ངག་ལས།  འཁོར་བ་མ་བཙལ་ཡེ་ནས་སངས་རྒྱས་ཡིན།  །{{TibChung|དགུ་པ།}}  ཡེ་ཤེས་ཕྲེང་བ་ཞེས་བྱ་བའི་མན་ངག་ལས།  སྣང་སྲིད་ཡེ་ཤེས་ངང་དུ་གསལ།  །{{TibChung|བཅུ་པ།}}  སེམས་ཀྱི་འཁོར་ལོ་ཞེས་བྱ་བའི་མན་ངག་ལས།  སེམས་ཀྱི་བདེ་ཆེན་ཉམས་མྱོང་གསལ།  །{{TibChung|བཅུ་གཅིག་པ།}}  སྒྲོན་མ་གསལ་བ་ཞེས་བྱ་བའི་མན་ངག་ལས།  སེམས་ཉིད་གྱིན་འདའ་རྣལ་མར་ཞོག  །{{TibChung|བཅུ་གཉིས་པ།}}  སྐྱེས་བུ་གྱད་ཀྱི་རྩལ་འཆང་ཞེས་བྱ་བའི་མན་ངག་ལས།  རིག་པ་མི་གཡོ་རྒྱ་མཚོ་བཞིན་དུ་གནས།  །{{TibChung|བཅུ་གསུམ་པ།}}  ལྷ་མོ་མཁའ་ལྡིང་ཞེས་བྱ་བའི་མན་ངག་ལས།  {{TibChung|[43a]}} འཁོར་འདས་སེམས་ལ་རྫོགས་པར་ལྷུན་གྱིས་གྲུབ།  །{{TibChung|བཅུ་བཞི་པ།}}  མན་ངག་ཡེ་ཤེས་འཁྱིལ་བ་ལས།  གཉིས་མེད་ཡེ་ཤེས་ངང་དུ་རོ་གཅིག་པས།  །{{TibChung|བཅོ་ལྔ་པ།}}  ཐིག་ལེ་ཉི་ཤར་ཞེས་བྱ་བའི་མན་ངག་ལས།  གཉིས་མེད་རྡོ་རྗེ་ཡེ་ཤེས་གསལ།  །{{TibChung|བཅུ་དྲུག་པ།}}  ཆོས་ཉིད་མཁའ་ལྟར་ཡངས་པ་ཞེས་བྱ་བའི་མན་ངག་ལས།  བླང་དོར་མེད་ཅིང་མཉམ་པའི་ངང་དུ་གསལ།  །{{TibChung|བཅུ་བདུན་པ།}}  ཡེ་ཤེས་ཆེན་པོ་ཞེས་བྱ་བའི་མན་ངག་ལས།  གང་ནས་བལྟས་ཀྱང་ཡེ་ཤེས་རྩེ་གཅིག་འཆར།  །{{TibChung|བཅོ་བརྒྱད་པ།}}  ནམ་མཁའི་སྤྲིན་དང་ལྡན་པ་ཞེས་བྱ་བའི་མན་ངག་ལས།  ཆོས་རྣམས་མ་བཅོས་ལྷུན་གྱིས་གྲུབ་པའི་ངང་།  །{{TibChung|ཞེས་ལན་གསུམ་རེ་གདབ།  འདིར་རྒྱས་པར་འཕྲོས་དོན་ལས་ཅན་དྲྭ་མ་བཞི་དང་།  བོད་ཀྱི་རིག་འཛིན་རྣམས་ཀྱི་གླུ་ཡང་རིག་པས་དཔྱད་ལ་གཞུང་གཞན་དུ་རྟོགས་པར་གསུངས་པས།  སྤྲོ་ན་སྔ་མ་བཞི་གོང་གི་བླ་མའི་སྒྲུབ་དབང་སྐབས་བཞིན་དང་།  ཕྱི་མ་རྣམས་ནང་སྐོར་བླ་མའི་ཆོས་སྡེ་ནས་བླང་བར་བྱ་ཞིང་།  འདི་རྣམས་ལ་ངོ་སྤྲོད་ཟུར་དུ་མི་བཞུགས་པས་མ་འགྲུབ་ཀྱང་ཆད་པའི་སྐྱོན་མེད་པར་སེམས།}}  དེ་རྣམས་ཀྱིས་ཕྱི་སྐོར་ཁྲིད་ཀྱི་བྱིན་རླབས་སྨིན་བྱེད་ཟླ་བའི་ཞུན་མ་སྙིང་གི་མུན་སེལ་ཉིད་ཡོངས་སུ་གྲུབ་པ་ལགས།  དེ་ལྟར་ལེགས་པར་ཐོབ་པའི་གཏང་རག་དང་།  {{TibChung|[44a]}} སླར་ཡང་སྨིན་ཟིན་གྲོལ་བར་བྱེད་པ་ཁྲིད་ཀྱི་རིམ་པ་ཞུ་བའི་ཡོན་དུ་མཎྜལ་ཆབ་གཅིག་འདི་བཞིན་གནང་བར་ཞུ།  ངོ་བོ་ཞིང་ཁམས་རྒྱ་ཆེ་བར༔  རང་བཞིན་གསལ་བའི་རྒྱན་གྱིས་སྤྲས༔  ཐུགས་རྗེ་ཅིར་སྣང་མཎྜལ་འདི༔  གསལ་རྫོགས་བདེ་བར་གཤེགས་ལ་འབུལ༔  གུ་རུ་མཎྜ་ལ་པཱུ་ཛ་ཧོཿ  དེ་ཡང་རིག་འཛིན་ཆེན་པོ་ཤྲཱི་སེང་ཧའི་དགོངས་བཅུད།  གྲུབ་པའི་སློབ་དཔོན་པདྨ་སམྦྷ་ཝ་དང་།  ལོ་ཆེན་བེེ་རོ་ཙཱ་ནའི་མན་ངག་གནད་དུ་འདྲིལ་བ་ཟབ་ཆོས་རྫོགས་པ་ཆེན་པོ་སྡེ་གསུམ་ལས།  ཕྱི་སྐོར་སེམས་སྡེ་ནམ་མཁའ་ཀློང་ཡངས་ཀྱི་ཁྲིད་ཚུལ་བགྱི་བ་ལ།  སྐུ་ཉིད་རྣམས་ཐུགས་གཞན་དུ་མ་གཡེངས་པར་གཏེར་གཞུང་རྡོ་རྗེའི་ཚིག་རྐང་འདི་ལ་སྙན་གྱི་དབང་པོ་རྩེ་གཅིག་ཏུ་གཏོད་འཚལ།  ན་མོ་གུ་རུ༔  ཕྱི་སྐོར་དངོས་གཞིའི་ཁྲིད་རིམ་ནི༔  དང་པོ་ཐུགས་གཅིག་ཏུ་ཐུག༔    ཅེས་པས།  ལྟ་བ་མངོན་དུ་གྱུར་པའི་བླ་མ་ཞིག་ཏུ་གཏུག༔    གདམས་ངག་ལེགས་པར་ཞུས་ལ་ཐེ་ཚོམ་གྱི་དྲི་མ་བཅད༔  ཡུལ་དངོས་པོར་འདུག་གམ་བརྟག་བས་མི་རྟག་པ་གློ་བུར་དུ་བྱུང་བ་རྣམས་ལ་བློ་བཞག་སྟེ༔  སྨིག་རྒྱུ་དུ་བ་རྣམས་ལའང་དངོས་པོ་ཡོད་མེད་ {{TibChung|[44b]}} ལེགས་པར་དཔྱད་པའི་ཚེ༔  ཡུལ་ཐམས་ཅད་སྟོང་ཞིང་ཡུལ་དེ་རྣམས་ལ་རྣམ་ཤེས་འབྱམས་པའི་མཚམས་སྦྱར་བ་པོ་ནི་དབང་པོ་སྟེ༔  དཔེར་ན་མགོ་ད་ལྟ་རང་དུ་མཚོན་གྱིས་བཅད་དེ་རྡོ་བས་ཞིབ་པར་འཐག་ནས་བྱ་ཁྱིར་བྱིན་ན་མགོ་བོ་སོང་བའི་ཡུལ་ཡང་མེད༔  དེ་བཞིན་དུ་དབང་པོ་མི་རྟག་པ་དང་དབང་པོ་སྟོང་པ་ཉིད་དོ༔  དབང་པོ་དེ་ལ་འཇུག་པའི་རྣམ་ཤེས་དུས་གསུམ་གྱི་རྣམ་རྟོག་ལ་དཔྱད་དེ་བརྟག་ན།  སྔར་དྲན་པའི་ཤེས་པ་མཚན་མོའི་རྨི་ལམ་བཞིན་དུ་གར་སོང་ཆ་མེད༔    མ་འོངས་པའི་རྟོག་པ་གློ་བུར་ཆུའི་རྦ་རླབས་ལྟ་བུར་འབྱུང་བའི་ཡུལ་འདི་ལས་བྱུང་མེད༔  ད་ལྟའི་ཤེས་པ་ནམ་མཁའི་དབྱིངས་སུ་ཁུ་རླངས་ལྟ་བུ་འདི༔  དངོས་མེད་མྱུར་དུ་ཡལ་བ་ཡིན་ནོ༔  རྣམ་ཤེས་འབྱུང་བའི་ཡུལ་ཀུན་གཞི་ཉིད་དངོས་པོར་གྲུབ་བམ་མ་གྲུབ་༔  གྲུབ་ན་ཕྱི་ནང་ལུས་ཀྱི་སྟོད་སྨད་སྙིང་དཀར་ནག་མཚམས་གང་དུ་གནས་པ་བརྟག་པས་ཡུལ་མི་རྙེད་དོ༔  མ་གྲུབ་ན་འཁོར་བ་བདེ་སྡུག་གི་བྱེད་ལས་སྣ་ཚོགས་པ་ཀུན་གཞི་ཉིད་ལས་འབྱུང་བའོ༔  བར་དུ་བལྟ་བ་གཅིག་ལ་བལྟ༔  ཞེས་པས།  སྣང་བ་ཐམས་ཅད་དངོས་མེད་ནམ་མཁའི་མཇའ་ཚོན་ལྟ་བུར་བལྟས་བྱས་ཏེ༔  སྟོང་པ་ཐམས་ཅད་ {{TibChung|[45a]}} བདེ་བའི་ངང་དུ་རྒྱས་གདབ་གཉིས་སུ་མེད་པ་ནི༔  བདེ་བ་ཐམས་ཅད་སྟོང་པའི་རང་བཞིན་ངོས་བཟུང་བྲལ་བར་ཡེ་ནས་སྟོང་༔  ཕྱལ་ཆད་མ་ཡིན་བདེ་སྟོང་གཉིས་མེད་བདེ་བ་ཆེན་པོར་ལྷུན་གྱིས་གྲུབ༔  སྣང་བ་ཐམས་ཅད་ཡུལ་ལ་འབྱམས་པ་འཁྲུལ་པའི་བློ་རྣམས་མ་ལུས་ཀུན༔  སྟོང་ཞིང་མ་འདྲེས་སོ་སོར་གསལ་བ་བསྐྱེད་པའི་རིམ་པ་མ་བསྐྱེད་གསལ༔  ཡོངས་སུ་འཛིན་པ་མེད་པས་དངོས་པོ་མེད་པར་ཡུལ་རྣམས་ཐམས་ཅད་སྟོང་པར་དག༔  སྟོང་པ་དེ་ཡང་རང་རིག་བྱང་ཆུབ་སེམས་ཀྱི་ངོ་བོ་ཨེ་མ་ཧོཿ    བདེ་བ་དེ་ཡང་དབང་པོའི་སྒོ་ལ་རྐྱེན་གྱིས་སྨིན་པར་ཡང་དག་བརྩོན༔  དབང་པོ་བདེ་བ་རང་ལས་བྱུང་ཞིང་ལུས་ཀུན་ཐམས་ཅད་ཀུན་ཏུ་ཁྱབ༔  ཀུན་ཏུ་སྣང་བའི་སྒོ་ནི་ཚོགས་དྲུག་ཡུལ་ལ་འཇུག་པའི་དབང་པོའི་གསང་ལམ་བདེ༔  བདེ་བ་དེ་ཉིད་སྟོང་པར་བྱས་ན་དབང་པོའི་ཡུལ་ཡང་རྣམ་པར་སྟོང་པར་རང་རིག་བྱང་ཆུབ་སེམས་ཀྱིས་སོ༔  ཕྱག་རྒྱའི་ཡུལ་ལ་དབང་པོའི་རྣམ་ཤེས་བཅུག་བྱས་ན༔  རྣམ་ཤེས་བདེ་བའི་ངང་དུ་ཐིམ་གྱུར་ཚོགས་དྲུག་ཡུལ་སྣང་འགག༔  རྣམ་ཤེས་གང་དུ་མི་གནས་སྟོང་ལ་མྱོང་གསལ་བདེ་བ་ཆེ༔  དབྱེར་མེད་དག་པར་གྱུར་པ {{TibChung|[45b]}} རང་རིག་བྱང་ཆུབ་སེམས་ཀྱིས་མཐོང་༔  ཡུལ་དབང་ཤེས་གསུམ་བདེ་བའི་ངང་དུ་རྣམ་པར་དག་གྱུར་པས༔  ཀུན་གཞིའི་ངང་དུ་རྣམ་ཤེས་གནས་འགྱུར་སེམས་རིག་གཉིས་མེད་པར༔  འུབ་ཆུབ་ཀློང་དུ་བལྟ་བྱ་བྲལ་བའི་ངང་དུ་རྟོགས་བྱ་ཡེ་ཤེས་ཉིད་ཁོ་ནའོ༔  བལྟ་ཚུལ་ཤྲཱི་སེངྷས་གདམས་པ་ཚིགས་སུ་བཅད་པ་དེ་དག་གིས་རྟོགས་པར་འགྱུར་ལ༔  མཐའ་མར་མཐོང་བ་གཅིག་ཏུ་མཐོང་༔  ཞེས་པས་ཡུལ་སྟོང་བས་ན་དབང་པོའི་མཚང་རིག་ཅིང་རྣམ་པར་དག་སྟེ་འཇུག་བྱེད་རྣམ་ཤེས་བདེ་བ་ཆེན་པོའི་ཡེ་ཤེས་སུ་གྱུར་པས་ཀུན་གཞི་བྱ་རྩོལ་དང་བྲལ་བར་འུབ་ཆུབ་ཀློང་དུ་གྲོལ་བར་འགྱུར་བ་ནི་འབྲས་བུའོ༔    ཕྱི་སྐོར་ཁྲིད་ཀྱི་དངོས་གཞི་རྫོགས་སོ༔  ས་མ་ཡ་རྒྱ་རྒྱ་རྒྱ༔  {{TibChung|ཞེས་དང་།}}  སླར་ཡང་དངོས་གཞིའི་ཁྲིད་ཀྱི་བསྡུས་དོན་ནི་འདི་ལྟ་སྟེ།  ན་མོ་གུ་རུ༔  ཕྱི་སྐོར་ཁྲིད་ཀྱི་རྗེས་འབྲེལ་ནི༔    ལྟ་སྒོམ་སྤྱོད་གསུམ་འབྲས་བུ་ལས༔  ལྟ་བ་ཀུན་གཞི་སྟོང་བ་ཉིད༔  ཅིར་ཡང་མེད་ལ་མྱོང་བ་ཅན༔  གལ་ཏེ་གནས་པ་མ་ཡིན་ནམ༔  རྣམ་ཤེས་གསལ་སྟོང་དམིགས་སུ་མེད༔  སྤྲོས་པའི་མཐའ་དང་བྲལ་བ་ཉིད༔  དབང་པོ་ཡུལ་གཉིས་བདེ་བར་སྤྱོད༔  ཀུན་གཞི་ཡེ་ཤེས་བདེ་ཆེན་འཆར༔  འབྲས་བུ་སྐུ་གཉིས་ {{TibChung|[46a]}} འགྲུབ་བོ༔    དངོས་གཞིའི་ཁྲིད་དོན་མདོར་བསྡུས་སོ༔  ས་མ་ཡ་རྒྱ་རྒྱ་རྒྱ༔  {{TibChung|ཞེས་གསལ་དག་སྙན་པའི་སྒོ་ནས་གོ་བརྡ་འཕྲོད་ངེས་པར་བཀླག  །}} དེ་དག་རྣམས་ཀྱི་སྒོ་ནས་ཕྱི་སྐོར་སེམས་སྡེའི་མན་ངག་གི་བྱིན་རླབས་ཟབ་ཁྲིད་ཡོངས་རྫོགས་དཀྱུས་གཅིག་ཏུ་ཕུལ་གྲུབ་པ་ལགས་བས།  འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་ཉིད་བྱང་ཆུབ་སེམས་ཀྱི་ངོ་བོ་བྱ་རྩོལ་ལས་འདས་པ་གདོད་ནས་ཡེ་སངས་རྒྱས་པར་ཤེས་པས་ངང་བཞག་གི་ཏིང་ངེ་འཛིན་ཆུ་བོའི་རྒྱུན་ལྟར་སྐྱོང་བ་དང་།  གཉིས་འཛིན་བློ་རྟོག་གིས་བསྲུང་དུ་མེད་པ་རང་བཞིན་བལྟ་བའི་དམ་ཚིག་ཆེན་པོ་ལས་ནམ་ཡང་འདའ་བར་མི་བྱ་བའི་བློས་འདིའི་རྗེས་ཟློས།  གཙོ་བོས་ཇི་ལྟར་{{TibChung|སོགས་དང་།}}  དེ་ལྟར་ཐོབ་པའི་གཏར་རག་ཏུ་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འབུལ་བའི་མོས་པས་འདིའི་རྗེས་ཟློས།  དེང་ནས་བརྩམས་ཏེ་{{TibChung|སོགས་དང་དགེ་བསྔོ་བཅས་སྤྱི་ལྟར་བྱ།  སློབ་དཔོན་གྱིས་ཚོགས་ལ་རོལ་བ་སོགས་ཆོ་གའི་རྗེས་རྣམས་གཞུང་བཞིན་མཐར་དབྱུང་བས་གྲུབ་བོ།  །རང་གནས་ཡེ༵་ཤེ༵ས་སྙིང་བོའི་དོན།  །རྡོ༵་རྗེ༵འི་ཚིག་གིས་མཚོན་བྱས་ནས།  །མངོན་སུམ་གནད་ལ་དབབ་པའི་ཚུལ།  །སྨིན་བྱེད་རྒྱ་མཚོའི་ཉིང་ཁུ་ལགས།  །ཕྱི་སྐོར་སེམས་སྡེའི་ཁྲིད་ཀྱི་བྱིན་རླབས་ཨ་ཡིག་མདའ་འཕེན་མའི་ལེའུ་ཚན་ནོ།།  །།}}




༄༅།   །མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་
{{TibChung|[47a]}} སྭསྟི།   ཆོས་ཉིད་མཉམ་པའི་ཀློང་ཆེན་ལས།  །གང་འདུལ་སྒྱུ་མའི་ཕྱག་རྒྱར་སྟོན།  །རིག་འཛིན་ཚོགས་ལ་གུས་བཏུད་ནས།  །དེ་ཡི་བྱིན་རླབས་ལམ་མཆོག་དབྱེ།  །{{TibChung|རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་བླ་མ་རིག་འཛིན་བཅོ་ལྔའི་བྱིན་རླབས་སྒྲུབ་དབང་བསྐུར་བའི་ཚུལ་ལ།  སྦྱོར་བ་མདུན་དཀྱིལ་རས་བྲིས་སྤྱི་མཐུན་ནམ་མཎྜལ་མེ་ཏོག་གི་ཚོམ་བུ་ལྷ་གྲངས་བཀོད་པའི་ཁར་འཕྲུལ་སྟེགས་ལ་རིག་འཛིན་བཅོ་ལྔའི་སྐུ་འབག་བཤམ།  ཕྱི་ནང་གི་མཆོད་པ་དང་།  ཚོགས་ཀྱི་ཡོ་བྱད་སོགས་ཆོ་གར་འོས་པའི་རིགས་རྣམས་ཚོགས་པར་འདུ་བྱས་ལ།  དབང་སྒྲུབ་ནང་སྐོར་ཁྲོ་བོའི་བྱང་བུ་ཁྲིགས་བསྡེབས་ཀྱིས་ཁོག་ཕུབ་ནས།  མངོན་རྟོགས་དང་བཟླས་པ་རྣམས་ནང་སྐོར་རིག་འཛིན་བླ་མའི་སྒྲུབ་ཐབས་ལྟར་ལ།  བཟླས་དམིགས་ནི།}}  ཐུགས་དབུས་པདྨ་ཟླ་བའི་སྟེང་།  །ཨ་མཐར་སྔགས་ཀྱི་ཕྲེང་བས་བསྐོར།  །འོད་འཕྲོས་རྒྱལ་བ་སྲས་བཅས་མཆོད།  །ཚུར་འདུས་དངོས་གྲུབ་བདག་ལ་ཐིམ།  །སླར་འཕྲོས་འགྲོ་བའི་སྒྲིབ་གཉིས་སྦྱངས།  །སྣོད་བཅུད་ལྷ་དང་གཞལ་ཡས་ཁང་།  །སྣང་གྲགས་རྟོག་པའི་ཆོས་རྣམས་ཀུན།  །སྐུ་གསུང་ཐུགས་ཀྱི་ཕྱག་རྒྱར་རྫོགས།  །{{TibChung|ཞེས་གསལ་བཏབ་ལ་གཙོ་བོའི་མཚན་སྔགས་ཅི་ནུས་དང་གཞན་རྣམས་དེའི་ཕྱེད་ཆ་སོགས་ཇི་ལྟར་འོས་པ་རྣམས་དང་ཚོགས་མཆོད་རྒྱས་པར་བྱ་ཞིང་ལས་བུམ་རྡོར་སེམས་བསྐྱེད་བཟླས་ཀྱིས་བརླབ།  བྱིན་རླབས་སྒྲུབ་དབང་དངོས་ {{TibChung|[47b]}} ལ།  སློབ་མ་རྣམས་ཁྲུས་ནས་དབྱུང་།  བགེགས་བསྐྲད་ཅིང་སྲུང་མཚམས་བཅད།  མཎྜལ་བཀྲམ་བསྡུས་དང་།  སེམས་བསྐྱེད་གསལ་བཏབ་ལོ་རྒྱུས་ཀྱི་ཁྱད་པར།}}  དེ་ལ་གསན་བྱ་དམ་པའི་ཆོས་ཀྱི་རྣམ་གྲངས་མཐའ་ཡས་པ་ཞིག་མཆིས་པ་ལས་སྐབས་སུ་བབས་པའི་འདི་ནི་སྔ་འགྱུར་རྙིང་མའི་བཀའ་སྲོལ་ལ་ཐེག་པ་རིམ་པ་དགུར་གྲགས་པ་རྣམས་ཀྱི་ནང་ནས་མཆོག་ཏུ་གྱུར་པ་ནང་དབང་བསྒྲུབ་ཐབས་ཀྱི་ཐེག་པ།  དེ་ལའང་ཐབས་དང་ཤེས་རབ་ཟུང་འཇུག་གི་རྣལ་འབྱོར་གཙོར་བཏོན་པའི་དབང་ལས་མ་ཧཱ་ཨ་ནུ་ཨ་ཏི་སྟེ་ཡོ་ག་རྣམ་པ་གསུམ་ལས་འདིར་ཐམས་ཅད་ཀྱི་ཡང་རྩེ་ཨ་ཏི་ཡོ་ག  །དེ་ལའང་ཕྱི་སེམས་སྡེ།  ནང་ཀློང་སྡེ།  གསང་བ་མན་ངག་གི་སྡེ་དང་གསུམ་དུ་བཞུགས་པ་ལས་འདིར་ནང་སྐོར་སྙིང་ལྟ་བུ་ཀུན་ཏུ་བཟང་པོ་ཀློང་ཆེན་རབ་འབྱམས་རྒྱལ་པོ་སོགས་རྒྱུད་ལུང་རྣམས་ཀྱི་བསྟན་དོན་ཆོས་ཐམས་ཅད་ཆོས་ཉིད་ཀུན་ཏུ་བཟང་མོའི་ཀློང་ལས་ནམ་ཡང་འདའ་རུ་མེད་པར་སྟོན་པ་ཀློང་སྡེ་ཡིན།  འདི་ལའང་རྒྱུད་ལུང་མན་ངག་གི་རིམ་པ་བསམ་གྱིས་མི་ཁྱབ་པ་བཞུགས་ཤིང་།  དེ་དག་ལས་ཕལ་མོ་ཆེ་ཞིག་འཇའ་ལུས་རྡོ་རྗེའི་སྐུ་བརྙེས་པ་རིག་འཛིན་གྲུབ་པ་ཡོངས་ཀྱི་གཙུག་རྒྱན་སློབ་དཔོན་ཆེན་པོ་ཤྲཱི་སེང་ཧ་ལས།  རྣམ་སྣང་སྤྲུལ་པའི་ལོ་ཙ་བ་ཆེན་པོ་བེེ་རོ་ཙ་ནས་དཀའ་བ་མང་དུ་སྤྱད་ {{TibChung|[48a]}} ནས་གསན་ཏེ་ཀློང་ཆེན་རབ་འབྱམས་རྒྱལ་པོའི་རྒྱུད་ལ་སོགས་པ་བོད་དུ་བསྒྱུར།  ལོ་ཙཱ་བ་ཉིད་ཀྱང་འཇའ་ལུས་ཀྱི་གྲུབ་མཐར་གཤེགས་ཤིང་གདམས་ངག་སྤང་མི་ཕམ་མགོན་པོ་ལ་ཆིག་བརྒྱུད་དུ་གནང་བས་དེས་མཚོན་བརྒྱུད་པ་ལྔའི་བར་དུ་འཇའ་ལུས་སུ་གཤེགས་པ་ཤ་སྟག་བྱུང་།  དེ་ལས་ཀྱང་གདོད་མའི་བཙན་ས་ཟིན་པའི་གྲུབ་ཐོབ་ཀྱི་བརྒྱུད་པ་བར་མ་ཆད་པ་ལས་བྱོན་པའི་བརྡ་བརྒྱུད་རྡོ་རྗེ་ཟམ་པ་ཞེས་རིང་བརྒྱུད་བཀའི་ཆུ་བོ་ད་ལྟའི་བར་མ་ཉམས་པར་བཞུགས་པ་ཡིན་ལ།  འདིར་ནི་དེ་ལས་ཀྱང་བཀའ་བབ་ལུང་བསྟན།  སྨོན་ལམ་དབང་བསྐུར།  མཁའ་འགྲོ་གཏད་རྒྱ་སྟེ།  ཁྱད་པར་གྱི་བརྒྱུད་པ་གསུམ་དང་ལྡན་པའི་ངོ་མཚར་གཏེར་བརྒྱུད་མཁའ་འགྲོའི་ཁ་རླངས་མ་ཡལ་བ།  བོད་ཡུལ་ས་འོག་ཀུན་གྱི་གཏེར་གཅིག  །དམ་ཆོས་རྫོགས་ཆེན་སྡེ་གསུམ་གྱི་ནང་ཚན་ནང་སྐོར་ཀློང་སྡེའི་རིག་འཛིན་བཅོ་ལྔའི་བྱིན་རླབས་དབང་བསྐུར་གྱི་རིམ་པ་ཟབ་མོ་བསྒྲུབ་པར་བགྱི་བ་ལགས།  དེ་ལ་བདག་ཉིད་སློབ་དཔོན་གྱིས་བགྱི་བར་འོས་པ་{{TibChung|སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག  །}} སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས།  ཟུང་འཇུག་དགོངས་པ་རྙེད་པ་ཡི༔  འགྲོ་ {{TibChung|[48b]}} འདུལ་རིག་འཛིན་བཅོ་ལྔ་ཡི༔  བྱིན་རླབས་བརྩེ་བས་གནང་དུ་གསོལ༔  {{TibChung|ལན་གསུམ།}}  དེ་ལྟར་གསོལ་བ་བཏབ་པ་ལ་བསྐུར་ཐོབ་བྲལ་བའི་དབང་བསྐུར་ཡེ་ནས་རང་ལ་རྫོགས་པར་གདམས་པའི་སྒོ་ནས་ལན་སྦྱིན་པ་འདི་ལ་གསན་པས་ཁྱབ་སྟེ།  སྤྱིར་ནི་འགྲོ་འདུལ་རིག་འཛིན་བཅོ་ལྔ་པོ༔  ཐམས་ཅད་ཟུང་འཇུག་མངོན་གྱུར་ཀུན་ཏུ་བཟང༔  དགོངས་པ་རང་བྱུང་ནམ་མཁའི་རྣལ་འབྱོར་ཚོགས༔  ཡེ་ཤེས་སྐུ་ཅན་འཁོར་འདས་ཡོངས་ལ་ཁྱབ༔  བཞུགས་ཡུལ་ཞིང་ཁམས་གཞན་དུ་བཙལ་མི་འཚལ༔  ད་ལྟའི་ནམ་མཁའ་འདིར་ཡང་རྣལ་འབྱོར་རྣམས༔  རང་གི་སེམས་ཉིད་འདི་ལའང་བླ་མས་ཁྱབ༔  བསྐུར་བྱ་བསྐུར་ཐོབ་སྒྲུབ་དང་སྒྲུབ་ཐབས་མེད༔  རྣལ་འབྱོར་ལྟ་བའི་ངང་ལ་སྒྲུབ་དབང་རྫོགས༔  {{TibChung|ཞེས་དང་།}}  དེ་ལ་རང་གནས་ཡེ་ཤེས་ཀྱི་ཚོགས་བསགས་པའི་ཆེད་དུ་ལྟ་བའི་རྒྱལ་པོ་ཡས་འབུབ་ཀྱི་མཆོད་པ་འབུལ་བར་གདམས་པ་སྟེ༔  ཨེ་མ་ཧོ་བདེ་གཤེགས་བླ་མ་རྣམས༔  བསམ་གྱིས་མི་ཁྱབ་ཆོས་ཉིད་ཀློང་༔  ཀུན་ཏུ་བཟང་པོའི་རྣལ་འབྱོར་ཡིན༔  ལྟ་བའི་རྒྱལ་པོའི་མཆོད་པ་འབུལ༔  རང་རིག་གདོད་ནས་རྣམ་པར་དག་པ་རིག་རྩལ་བླ་མའི་ལྷ་ཚོགས་རྣམས་ཀྱི་སྤྱན་ {{TibChung|[49a]}} སྔར་གནས་ལུགས་ལྟ་བ་མཇལ་བའི་ཕྱག་འཚལ་ཞིང་གང་ཤར་ཆོས་ཉིད་རྒྱན་དུ་རོལ་བའི་མཆོད་པ་འབུལ་བ་སྔོན་དུ་འགྲོ་བས།  གློ་བུར་འཁྲུལ་པའི་མུན་ཁུང་བརྟོལ་ཏེ་འོད་གསལ་སྣང་བའི་དགའ་སྟོན་སྩོལ་བར་གསོལ་བ་གདབ་པ་འདིའི་རྗེས་ཟློས།  གདོད་ནས་དག་པའི་ཀུན་བཟང་བླ་མ་ལ༔  མཚན་འཛིན་འཁྲུལ་པའི་བསྐང་བཤགས་མི་འཚལ་ཞིང་༔  གཉིས་སུ་འཛིན་པའི་ཕྱག་འཚལ་མོས་གུས་བྲལ༔  དེ་བས་རང་རིག་ཀློང་དུ་ཕྱག་འཚལ་ལོ༔  གཉིས་སུ་མེད་པའི་ཆོས་སྤྲིན་རྒྱ་མཚོས་མཆོད༔  བསམ་ལས་འདས་པའི་ངང་དུ་ཐུགས་དམ་བསྐང་༔  བརྗོད་མེད་བརྗོད་པ་ཐམས་ཅད་མཐོལ་ལོ་བཤགས༔  ཨེ་མ་ཧོ་བདེ་གཤེགས་བླ་མ་རྣམས༔  ཀུན་བཟང་དགོངས་ཀློང་སེམས་སུ་རྫོགས་པ་ལ༔  ཕྱི་ནང་གཉིས་མེད་སྤྲོས་བའི་མཐའ་ལས་འདས༔  ཆོས་དབྱིངས་ཀློང་ཆུབ་ངང་དུ་ཕྱག་འཚལ་ལོ༔  ཨེ་མ་ཧོ་རང་རིགས་བླ་མ་རྣམས༔  འཁོར་འདས་ཐམས་ཅད་ས་ལེར་མཐོང་བ་ལ༔  གཉིས་སུ་མེད་པའི་དབྱིངས་སུ་ལྷུན་རྫོགས་པས༔  མཐོང་བྱ་མཐོང་མཁན་མེད་ལ་ཕྱག་འཚལ་ལོ༔  ཨེ་མ་ཧོ་བདེ་གཤེགས་བླ་མ་རྣམས༔  ཕྱི་ནང་ནམ་མཁའ་ཀུན་ལ་སྐུ་ནི་ཡོངས་སུ་ཁྱབ་པ་ {{TibChung|[49b]}} ཉིད༔  བཞུགས་པའི་ཡུལ་ནི་ཕྱོགས་བཅུའི་འཇིག་རྟེན་དག་ན་མཆིས༔  གློ་བུར་དྲི་མའི་རྣམ་རྟོག་བསལ་ཕྱིར་གཟུགས་སྐུར་བཞེངས་པ་རྣམས༔  མཚན་འཛིན་འཁྲུལ་པ་འདི་དག་མྱུར་དུ་བསལ་བར་མཛད་དུ་གསོལ༔  {{TibChung|ཞེས་གསོལ་བ་བཏབ།}}  སློབ་དཔོན་གྱི་རིག་འཛིན་བླ་མ་རྣམས་ལ་ཐུགས་དམ་བསྐུལ་བའི་སླད་དུ་གསོལ་བ་གདབ་པར་བྱ་བ་ཡིན་ཏེ།  ཨེ་མ་ཧོཿ    བདེ་གཤེགས་བླ་མ་འགྲོ་འདུལ་རིག་འཛིན་བཅོ་ལྔ་རྣམས༔  དམིགས་མེད་ཆོས་ཀྱི་སྐུ་ལས་ད་ལྟ་བཞེངས་སུ་གསོལ༔  ཕྱི་སྐོར་བླ་མ་རིག་འཛིན་བཅོ་ལྔ་གནང་བར་མཛོད༔  ཡེ་ཤེས་སྐུ་ཡི་སློབ་མར་བྱིན་རླབས་དབང་ཆེན་ད་ལྟ་བསྐུར་དུ་གསོལ༔  {{TibChung|ཞེས་གསོལ་བ་བཏབ།}}  སློབ་དཔོན་ཉིད་རིག་འཛིན་བླ་མའི་སྐུར་བཞུགས་པའི་དྲུང་དུ།  ཁྱེད་རང་རྣམས་ཀྱང་རིག་འཛིན་བླ་མ་བཅོ་ལྔའི་སྐུ་འདི་བཞིན་དུ་གསལ་ཐོབ་ཅིག  །ཨ༔  ཀ་དག་དེ་བཞིན་ཉིད་ཀྱི་དབྱིངས༔  {{TibChung|ཞེས་སོགས་སྒྲུབ་ཐབས་མཐར་ཆགས་སུ་བཏང་ནས།}}  སྣང་ལ་རང་བཞིན་མེད་པར་གསལ༔  དེ་ལྟར་གསལ་བཞིན་པ་ལ་རིག་འཛིན་བླ་མ་རྣམས་ཀྱི་དོ་ཧ་རྡོ་རྗེའི་གླུ་དགོངས་པ་མི་གཡོ་བའི་ངང་ནས་བླངས་པ་དང་ཆབ་གཅིག་རང་འདྲའི་སྐུ་གཉིས་པར་རེ་བྱུང་བ་སྤྱི་བོ་ནས་ཐིམ་པས་སྐུའི་བྱིན་རླབས་ {{TibChung|[50a]}}  དང་།  རྡོ་རྗེའི་བཟླས་པ་བྱ་བ་གསུང་གི་བྱིན་རླབས་དང་།  རིག་འཛིན་བླ་མ་རྣམས་རང་རིག་ཏུ་རྫོགས་པའི་ངང་དུ་མཉམ་པར་བཞག་པ་ཐུགས་ཀྱི་བྱིན་རླབས་ཡིན་པས།  ཁྱེད་རང་རྣམས་དགོངས་པ་སྐྱེ་མེད་ཀྱི་ངང་ལས་མ་གཡོས་བཞིན་དུ་གྲགས་སྟོང་རྡོ་རྗེའི་གླུ་བླངས་པ་འདི་ལ་སྙན་གྱི་དབང་པོ་རྩེ་གཅིག་ཏུ་གཏོད་པར་ཞུ།  {{TibChung|དགའ་རབ་རྡོ་རྗེའི་སྐུ་ཐོགས་ལ།}}  ཆོས་ཀྱི་དབྱིངས་ན་རྡོ་རྗེ་སེམས་དཔའི་དྲུང་དུ་སེམས་ཉིད་འོད་གསལ་བའི་དུས་སུ་རིག་འཛིན་དགའ་རབ་རྡོ་རྗེ་འདི་སྐད་ལོ།  །ང་ནི་མི་ཡི་རིག་འཛིན་དགའ་རབ་རྡོ་རྗེ་སྟེ༔  སེམས་ལ་བལྟ་བའི་ཡུལ་མེད་འཛིན་པ་རང་སར་དག༔  སྒོམ་པའི་བློ་དང་བྲལ་ནས་གསལ་དང་མི་གསལ་མེད༔  སྤྱོད་པ་ཅི་དགར་བཏང་བས་རེ་དོགས་རྩིས་གདབ་བྲལ༔  འབྲས་བུ་འོད་གསལ་སྙིང་པོའི་ཀློང་དུ་རང་བཞིན་གྲོལ༔  {{TibChung|ཞེས་བླངས་ལ་སྐུ་ཙཀ་སྤྱི་བོར་བཞག  །}} ཨ་སུམ་སྦྲེལ་གྱི་རྡོ་རྗེའི་བཟླས་པ་མཛད་པར་ཞུ།  །{{TibChung|ཞེས་རྡོར་བཟླས་ལན་བདུན་ནམ་གསུམ་ཙམ་བྱ།}}  དགའ་རབ་རྡོ་རྗེ་རང་རིག་ཏུ་རྫོགས་པའི་ངང་དུ་མཉམ་པར་ཞོག་ཅིག  །{{TibChung|ཅེས་དགོངས་པའི་ངང་དར་ཅིག་བསྐྱང་།  དེ་བཞིན་དུ་འཇམ་དཔལ་བཤེས་གཉེན་གྱི་སྐུ་ཐོགས་ལ།}}    དུར་ཁྲོད་ཧེ་ཆེན་བརྡལ་དུ་མཆོད་རྟེན་ལ་ {{TibChung|[50b]}} སྐུ་རྒྱབ་བརྟེན་ཏེ་བསྒྲུབ་པའི་ཚེ་སྲོད་ཀྱི་དུས་སུ་སློབ་དཔོན་འཇམ་དཔལ་བཤེས་གཉེན་འདི་སྐད་ལོ།  །དགའ་རབ་རྡོ་རྗེའི་ཐུགས་སྲས་འཇམ་དཔལ་བཤེས་གཉེན་བདག༔  གདམས་ངག་བསྒོམ་མཁན་མི་སྣང་འོད་གསལ་ཀུན་ལ་ཁྱབ༔  དེ་ཉིད་དམིགས་སུ་མ་མཆིས་དམིགས་ཡུལ་རྡུལ་ཙམ་མེད༔  སྟོང་ཉིད་ཀ་ནས་དག་ཀྱང་སྐུ་དང་ཡེ་ཤེས་གསལ༔  {{TibChung|ཞེས་དང་།  ཨ་སུམ་སྦྲེལ་གྱི་རྡོར་བཟླས།}}  འཇམ་དཔལ་བཤེས་གཉེན་རང་རིག་ཏུ་རྫོགས་པའི་ངང་དུ་མཉམ་པར་བཞག  །{{TibChung|ཤྲཱི་སེངྷའི་སྐུ་ཐོགས་ལ།}}  བསམ་གཏན་གྱི་ཁང་བུར་སློབ་དཔོན་ཤྲཱི་སེངྷ་འདི་སྐད་ལོ།  །ཇི་ལྟར་བསམ་ཡང་མི་རྟོག་ངང༔  ཇི་ལྟར་སྨྲས་ཀྱང་སྒོམ་པ་མེད༔  སྣང་སྲིད་ཆོས་ཀུན་ཡེ་ཤེས་ངང་༔  ཡེ་ཤེས་བཙལ་དུ་མེད་པ་འདི༔  རང་བྱུང་རང་ཤར་ཐལ་ལེ་བ༔  ང་ནི་དེང་ཕྱིན་གཞི་ལ་གནས༔  གཞི་ནི་མ་བཅོས་ལྷུག་པར་འདུག༔  མཚན་ཉིད་ཀུན་ལྡན་འོད་གསལ་བ༔  ཅིར་ཡང་མ་ཡིན་ཅིར་ཡང་རྟོག༔  ལྟ་བ་མཐར་ཕྱིན་ཤྲཱི་སེང་༔  སྒོམ་པའི་བློ་དང་བྲལ་འདོད་ནས༔  གསལ་བ་འདི་ལ་ལམ་བྱས་པས༔  གཏད་སོ་མེད་པའི་ཉམས་ཤིག་ཤར༔  རྒྱུན་ཆད་མེད་པའི་ཤྲཱི་སེང་༔  སྤྱོད་པ་སྤྱད་དུ་འདུག་གམ་བལྟས༔  ཅི་ {{TibChung|[51a]}} བྱས་ཐམས་ཅད་བདེ་བ་ཆེ༔    གང་བྱུང་ཐམས་ཅད་དགའ་བའི་ངང་༔  ཟུང་འཇུག་མངོན་གྱུར་ཤྲཱི་སེང་༔  འབྲས་བུ་ཐོབ་པར་བྱ་བའི་ཕྱིར༔  གཞི་ཡི་སྟེང་དུ་མཉམ་པར་བཞག༔  འཇམ་དཔལ་བཤེས་གཉེན་གདམས་པ་སྟེ༔  སེམས་ཀྱི་ཀློང་ནས་གཏེར་དུ་རྙེད༔  རྣམ་ཤེས་ཡུལ་དབང་ཀུན་གཞི་རྣམས༔  སོ་སོར་དབྱེར་མེད་དམིགས་སུ་མེད༔  གང་ཡང་འདི་ཞེས་མེད་པ་ཡི༔  བདེ་བ་ཆེན་པོར་ཨ་ལ་ལ་ ཧོཿ  {{TibChung|ཞེས་དང་།  གོང་བཞིན་རྡོར་བཟླས་དང་མཉམ་བཞག་བྱ་བ་འོག་མ་རྣམས་ལ་འགྲེ།  ཛྙཱ་ན་སཱུ་ཏྲའི་སྐུ་ཐོགས་ལ།}}  རང་བྱུང་བྲག་དམར་དབེན་རྩ་རུ་མཁའ་འགྲོ་མ་རྣམས་དང་ཚོགས་ཀྱི་འཁོར་ལོ་བསྐོར་བའི་ཚེ་སློབ་དཔོན་ཛྙཱ་ན་སུ་ཏྲ་འདི་སྐད་ལོ།  ཨ་ཧོཿ  བདེ་བ་ནམ་མཁའི་ཀློང་དུ་བསྟིམ་བྱས་པས༔  བདེ་སྟོང་རྒྱ་ཆེ་ཁྱབ་བརྡལ་ནམ་མཁའ་འདྲ༔  ཞེན་པ་མེད་པ་བདེ་བའི་འཁོར་ལོ་ལ༔  ལུས་ངག་ཡིད་གསུམ་བདེ་བ་ཆེན་པོར་ཤར༔  {{TibChung|བི་མ་མི་ཏྲའི་སྐུ་ཐོགས་ལ།}}  དུར་ཁྲོད་ཆེན་པོ་བདེ་ཆེན་བརྩེགས་པར་མཁའ་འགྲོ་དབྱིངས་ཕྱུག་མས་མཆོད་པའི་ཚེ་སློབ་དཔོན་བི་མ་མི་ཏྲ་འདི་སྐད་ལོ།  །ཨ་ཧོཿ  བདེ་ཆེན་ནམ་མཁའ་གང་བའི་དབྱིངས་སུ་དག༔  རང་བྱུང་རང་ཤར་རིག་པའི་ {{TibChung|[51b]}} ཀློང་དུ་ཐིམ༔  དབྱིངས་རིག་གཉིས་མེད་ཟུང་འཇུག་ལ་བཟླས་པས༔  འཁོར་འདས་ཀུན་ཁྱབ་ཧེ་རུ་ཀ་དཔལ་ལོ༔  {{TibChung|བེེ་རོ་ཙཱ་ནའི་སྐུ་ཐོགས་ལ།}}  ཡར་ཀླུང་ཤེལ་གྱི་བྲག་ཕུག་ཆེན་པོར་སྙིང་པོའི་གནས་ལུགས་མངོན་དུ་གྱུར་པའི་ཚེ་སློབ་དཔོན་བེེ་རོ་ཙཱ་ན་འདི་སྐད་ལོ།  །ང་ནི་བེེ་རོ་ཙཱ་ན་སྟེ༔  མ་བཅོས་རང་གསལ་ངང་དུ་གནས༔  མ་ནོར་དམིགས་སུ་མ་མཆིས་ཤིང་༔  བརྗོད་མེད་རིག་པ་ཟང་ཐལ་ལེ༔  བསམ་འདས་སེམས་ཀྱི་དྲི་མ་དག༔  རང་བྱུང་ཡེ་ཤེས་ངོ་བོ་ཉིད༔  རང་གསལ་རང་བཞིན་ལྷུན་གྱིས་གྲུབ༔  ཅིར་སྣང་ཆོས་སྐུའི་རྒྱན་དུ་ཤར༔    ཐུགས་རྗེ་སྤྲུལ་སྐུ་སྣ་ཚོགས་སྣང་༔  ཐམས་ཅད་ཀུན་གཞིའི་དབྱིངས་སུ་རྫོགས༔  ལྟ་བ་གནམ་འཕང་གཅོད་པའི་ཚེ༔  སྒོམ་པ་ཐབས་ཤེས་སྒྲོ་གཤོག་བརྒྱང་༔  སྤྱོད་པའི་ལམ་ལ་བཞུགས་པའི་ཚེ༔  རེ་དོགས་མེད་པའི་ངང་ལ་འགྲོ༔  འབྲས་བུའི་ཕ་མཐར་རྟོགས་པའི་ཚེ༔  གཞན་དུ་མེད་པའི་སངས་རྒྱས་རྟོགས༔    སྒོམ་པའི་གཟེབ་ལས་གྲོལ་ཙ་ན༔  ལྟ་བའི་རྒྱལ་པོ་ཕུག་ཐག་ཆོད༔  ལམ་ལ་བགྲོད་དུ་མེད་པ་དེ༔  ལུང་དང་རིག་པས་བསྒྲུབ་མེད་ཕྱིར༔    གཞི་ཡི་སྟེང་དུ་འབྲས་བུར་སྨིན༔  ཆོས་ཉིད་ཀློང་དུ་ལ་བཟླས་ཏེ༔  {{TibChung|[52a]}} རང་རིག་རྩལ་དུ་ཤན་ཡང་འབྱེད༔  དབྱིངས་རིག་གཉིས་སུ་མེད་པ་དེ༔  ཐིག་ལེ་ཉག་གཅིག་ངང་དུ་རྫོགས༔  སེམས་བདེའི་ངང་དུ་ཉམས་བླངས་པས༔  སྣང་སྲིད་སེམས་ཀྱི་ཀློང་དུ་རྫོགས༔  ཀློང་སྡེའི་རྩ་བ་ཉམས་བླངས་ཚེ༔  རྣམ་རྟོག་ཕྲ་རགས་ཀློང་དུ་ཐིམ༔    མན་ངག་ཉམས་སུ་བླངས་བའི་ཚེ༔  དབྱིངས་ཡེ་ཟུང་འཇུག་མངོན་སངས་རྒྱས༔  ལྟ་བའི་ཕུག་ཐག་ཆོད་པ་ཡིན༔  སྒོམ་པའི་བློ་ལས་འདས་པ་ཡིན༔  སྤྱོད་པ་སྤྱད་དུ་མེད་པ་ཡིན༔  འབྲས་བུ་གཞན་ལ་དེ་མི་འཚལ༔  འོན་ཀྱང་རྣལ་འབྱོར་བེེ་རོ་ཡིས༔  རྒྱུ་འབྲས་ཁྱད་དུ་མི་གསོད་པས༔  སྡོམ་པ་གསུམ་གྱིས་རྒྱུད་སྦྱངས་ཏེ༔  མཚན་ལྡན་བླ་མ་དཔལ་སེངྒེ༔  སྤྱི་བོའི་གཙུག་ཏུ་འབྲལ་མེད་བཞུགས༔  རིག་འཛིན་པདྨ་འབྱུང་གནས་དེ༔  མཉེས་པ་གསུམ་གྱིས་ཡང་ཡང་བསྟེན༔  པཎ་ཆེན་བི་མ་ལ་མི་ཏྲ༔  དགོངས་པར་བཞེད་བའི་ཕ་མཐའ་བསྐང་༔  བསླབ་པ་གསུམ་གྱི་ཆས་འཛིན་ཏེ༔  ལྟ་བའི་གནམ་འཕང་གཅོད་པ་ཡིན༔  སྔར་སྤྱོད་ངང་དུ་མཉམ་པར་བཞག༔  བསྟན་གཉིས་ཟུང་འཇུག་བཀྲ་ཤིས་ཤོག༔  {{TibChung|ཁྲི་སྲོང་ལྡེའུ་བཙན་གྱི་སྐུ་ཐོགས་ལ།}}  བསམ་ཡས་དབུ་ {{TibChung|[52b]}} རྩེའི་བར་ཁང་གཡུ་ཞལ་ཅན་ནས་མངའ་བདག་ཁྲི་སྲོང་ལྡེའུ་བཙན་འདི་སྐད་ལོ།  །ང་ནི་ཁྲི་སྲོང་ལྡེའུ་བཙན་སྟེ༔  སེམས་ཉིད་རང་བྱུང་ཡེ་ཤེས་དེ༔  ཅིར་ཡང་མི་དམིགས་ཅིར་ཡང་གསལ༔  ལྟ་བའི་རྒྱལ་པོ་མཐའ་གཉིས་བྲལ༔  {{TibChung|གཉགས་ཛྙཱ་ནའི་སྐུ་ཐོགས་ལ།}}  ཡར་མོ་ལུང་གི་ཕུ་བདུད་རྩི་འབྱུང་བའི་བ་གམ་ནས་གཉགས་ཆེན་ཛྙཱ་ན་ཀུ་མཱ་ར་འདི་སྐད་ལོ།  ལྷུན་གྲུབ་ཡེ་ཤེས་བསམ་མི་ཁྱབ༔  ནམ་མཁའ་ལྟ་བུ་མཐའ་བྲལ་བ༔  ཟུང་དུ་འཇུག་པའི་ཡེ་ཤེས་དེ༔  བློ་བྱས་ཡིད་དཔྱོད་ཀུན་ལས་འདས༔  {{TibChung|དཔལ་གྱི་ཡེ་ཤེས་ཀྱི་སྐུ་ཐོགས་ལ།}}  ཀོང་པོ་བྲག་དཀར་ལྷ་ཆུ་འཁྱིལ་བའི་ཡང་དབེན་ནས་གཉན་ཆེན་དཔལ་གྱི་ཡེ་ཤེས་འདི་སྐད་ལོ།  །རང་རིག་ལྷུན་གྲུབ་བློ་ལས་འདས༔  སེམས་ཉིད་ནམ་མཁའ་མཐའ་དབུས་མེད༔  ཚོགས་བརྒྱད་སྣང་ལ་ངོས་བཟུང་མེད༔  རང་བྱུང་དགོངས་པ་འདི་ཀའོ༔  {{TibChung|ཉང་བན་གྱི་སྐུ་ཐོགས་ལ།}}  ཀོང་ཡུལ་ལྗོན་པ་ལུང་གི་འཆི་མེད་ཚེའི་ཀེའུ་ཚང་ནས་ཉང་བན་ཏིང་འཛིན་བཟང་པོ་འདི་སྐད་ལོ།  །ལྟ་བ་ཕྱོགས་ལྷུང་མེད་པ་དེ༔  དམིགས་བྱ་མེད་པའི་ངོ་བོ་ཉིད༔  ལྟ་བྱེད་བློ་ཡི་གཟེབ་ལས་གྲོལ༔  བལྟ་བྱའི་སྙིང་པོ་ཡེ་ཤེས་ཆེ༔  {{TibChung|ནམ་མཁའི་སྙིང་པོའི་སྐུ་ཐོགས་ལ།}}  ལྷོ་བྲག་མཁར་ཆུ་ {{TibChung|[53a]}} དཔལ་གྱི་ཕུག་མོ་ཆེ་ནས་དགེ་སློང་ནམ་མཁའི་སྙིང་པོ་འདི་སྐད་ལོ།  །རང་བྱུང་རང་ཤར་ཡེ་ཤེས་འདི༔  བསྒོམ་བྱའི་བློ་ལས་རིང་དུ་འདས༔  སྒོམ་བྱེད་ཤེས་པ་རང་སར་དེངས༔  ཅིར་ཡང་དམིགས་སུ་མེད་པར་ཤར༔  {{TibChung|འབྲོག་མི་དཔལ་ཡེའི་སྐུ་ཐོགས་ལ།}}  བདུད་རི་གནམ་ལྕགས་འབར་བའི་རྩེ་མོ་ནས་འབྲོག་མི་དཔལ་གྱི་ཡེ་ཤེས་འདི་སྐད་ལོ།  །དགོངས་པ་རང་བྱུང་རང་ཤར་འདི༔  མ་བཅོས་ལྷུག་པར་བཞག་ཙམ་ན༔  བརྗོད་དུ་མེད་པའི་ཉམས་ཤིག་ཤར༔  བསམ་དུ་མེད་པའི་འབྲས་བུ་རྙེད༔  {{TibChung|གནུབས་ཆེན་གྱི་སྐུ་ཐོགས་ལ།}}  སྒྲགས་ཀྱི་ཡང་རྫོང་གི་ཀེའུ་ཚང་ནས་གནུབས་ཆེན་སངས་རྒྱས་ཡེ་ཤེས་འདི་སྐད་ལོ།  །ང་ནི་སངས་རྒྱས་ཡེ་ཤེས་ཏེ༔  སངས་རྒྱས་རང་ལས་རྙེད་པ་ཡིན༔  ལྟ་བའི་རྒྱལ་པོ་གནམ་འཕང་གཅོད༔  སྒོམ་པ་ཐབས་ཤེས་གཤོག་རྩལ་ཆེ༔  སྤྱོད་པ་འཇིགས་མེད་ཧེ་རུ་ཀ༔  འབྲས་བུ་སྲིད་ཞིའི་ཐིག་ལེར་རྫོགས༔  {{TibChung|ལང་གྲོ་ལོ་ཙཱིའི་སྐུ་ཐོགས་ལ།}}  བྲག་དམར་ཟངས་ཡག་ནམ་མཁའ་རྫོང་ནས་ལང་གྲོ་དཀོན་མཆོག་འབྱུང་གནས་འདི་ཀད་ལོ།  །སེམས་ལ་བསམ་དུ་མེད་པའི་ཉམས༔  རང་གསལ་རྗེན་པར་གནས་པ་འདི༔  འཁོར་འདས་ཀུན་ལ་ {{TibChung|[53b]}} ལ་ཁྱབ་པ་ཉིད༔  དུས་གསུམ་སངས་རྒྱས་དགོངས་པ་ལགས༔  {{TibChung|རྒྱལ་བ་མཆོག་དབྱངས་ཀྱི་སྐུ་ཐོགས་ལ།}}  བསམ་ཡས་བྲག་དམར་མཆིམས་ཕུའི་དབེན་རྩ་ནས་ངན་ལམ་རྒྱལ་བ་མཆོག་དབྱངས་འདི་སྐད་ལོ།  །བློ་འདས་བསམ་བརྗོད་བྲལ་བའི་སེམས༔  རིག་པའི་ངང་དུ་གཉིས་མེད་འདྲེས༔  ཕྱི་ནང་ཀུན་ལ་ཟང་ཐལ་ལེ༔  མ་བཅོས་ཡེ་རྫོགས་ཆེན་པོའོ༔  {{TibChung|རླངས་ཆེན་དཔལ་སེང་གི་སྐུ་ཐོགས་ལ།}}  ཁམས་ཀྱི་ཁྱུང་ཚང་བྲག་གི་དབེན་རྩ་ནས་རླངས་ཆེན་དཔལ་གྱི་སེང་གེ་འདི་སྐད་ལོ།  །གསལ་བ་ཐབས་སུ་བྱས་ནས་ཀྱང་༔  སྟོད་པ་ཤེས་རབ་ངང་དུ་རྫོགས༔  གསལ་སྟོང་དབྱེར་མེད་ཀློང་དུ་འཕྱོ༔  ཀུན་བཟང་དགོངས་པ་རང་ལས་རྙེད༔  {{TibChung|མཁའ་འགྲོ་ཡེ་ཤེས་མཚོ་རྒྱལ་གྱི་སྐུ་ཐོགས་ལ།}}  གཞོ་སྟོད་ཏི་སྒྲོ་བྲག་གི་ཚོགས་ཁང་ཆེན་མོ་ནས་མཁའ་འགྲོ་ཡེ་ཤེས་མཚོ་རྒྱལ་འདི་སྐད་ལོ།  །འཁོར་འདས་ཀུན་ལ་ཁྱབ་པའི་སེམས༔  བདེ་བ་ཆེན་པོའི་ངང་དུ་ཐིམ༔  ཆོས་ཉིད་ངང་དུ་ལྟ་བྱ་བྲལ༔  ཁོ་མོའི་རྟོགས་པ་དེ་ཙམ་མོ༔  {{TibChung|གཡུ་སྒྲ་སྙིང་པོའི་སྐུ་ཐོགས་ལ།}}  ལྷ་སའི་ཡེར་པ་གཙུག་རུམ་འབར་བའི་ཕུག་ནས་རྒྱལ་མོ་གཡུ་སྒྲ་སྙིང་པོ་འདི་སྐད་ལོ།  །སེམས་ལས་གཞན་པའི་སངས་རྒྱས་མེད༔  རྣམ་རྟོག་ཆོས་ {{TibChung|[54a]}} དབྱིངས་ཀློང་དུ་ནུབ༔  དབྱིངས་རིག་དབྱེར་མེད་རྫོགས་པ་འདི༔  བེེ་རོ་ཙཱ་ནི་བཀའ་དྲིན་ལགས༔  {{TibChung|ཞེས་བསྐུར་རོ།}}  དེ་ལྟར་བྱིན་རླབས་འཕོ་བའི་དབང་བསྐུར་ཐོབ་པའི་ཡེ་ཤེས་ཀྱི་རྒྱུན་དེ་ཉིད་མི་ཉམས་བརྟན་པར་བྱ་བའི་སླད་དུ་རིག་འཛིན་བླ་མའི་ལྷ་ཚོགས་ནམ་མཁའ་གང་བར་སད་པ་རྣམས་ཀྱིས་སྨོན་པའི་ཚིག་གི་ཤིས་པ་བརྗོད་ཅིང་མེ་ཏོག་གི་ཆར་ཕབ་པས་དགེ་ལེགས་སུ་བྱས་པའི་མོས་པ་མཛོད།  {{TibChung|ཅེས་ཤིས་བརྗོད་གང་འོས་བྱ།}}  དེ་རྣམས་ཀྱི་སྒོ་ནས་ནང་སྐོར་ཀློང་སྡེའི་བླ་མ་རིག་འཛིན་བཅོ་ལྔའི་བྱིན་རླབས་དབང་བསྐུར་ཟབ་མོ་ལེགས་པར་གྲུབ་པ་ལགས་པས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་གྱིས་བསྡུས་པ་མཐའ་དག་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས།  གཙོ་བོས་ཇི་ལྟར་{{TibChung|སོགས་དབང་གི་རྗེས་རིམ་སྤྱི་ལྟར་བྱའོ།  །སློབ་དཔོན་གྱིས་ཚོགས་ལ་རོལ་བ་སོགས་ཆོ་གའི་རྗེས་རིམ་རྣམས་བྱང་བུ་ཁྲིགས་བསྡེབས་ལྟར་མཐར་དབྱུང་བས་གྲུབ་བོ།  །ལྷུན་གྲུབ་སྐུ་དང་ཡེ༵་ཤེ༵ས་ཀྱི།  །རང་རྩལ་སྒྱུ་འཕྲུལ་རྡོ༵་རྗེ༵འི་སྤྲིན།  །འགྲོ་འདུལ་ཚོམ་བུའི་དགོངས་ཉམས་བྱིན།  །སྐལ་སྡན་སྙིང་ལ་འདོད་རྒུར་འཇོ།  །ནང་སྐོར་ཀློང་སྡེའི་བླ་མ་རིག་འཛིན་བཅོ་ལྔའི་བྱིན་རླབས་དབང་བསྐུར་གྱི་ལེའུ་ཚན་ནོ།།   །།}}
ཡོངས་རྫོགས་ཁྲིགས་སུ་བསྡེབས་པ་ཀུན་བཟང་
རིག་འཛིན་བླ་མའི་དགོངས་རྒྱན་
ཅེས་བྱ་བ་བཞུགས་སོ།།   །།


(1བ) མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ།  ཨོཾ་སྭ་སྟི།  ཀ་དག་གཏིང་གསལ་གཞོན་ནུ་བུམ་སྐུའི་ཀློང་།  །ལྷུན་གྲུབ་ཕྱིར་གསལ་སྒྱུ་འཕྲུལ་རྡོ་རྗེའི་སྤྲིན།  །ཐུགས་རྗེ་གང་འདུལ་དེར་སྣང་ཆུ་ཟླའི་གར།  །ཁྱབ་བདག་གདོད་མའི་མགོན་པོ་བླ་མ་རྒྱལ།  །ཐེག་དགུའི་རྩེ་རྒྱལ་ཤིན་ཏུ་རྣལ་འབྱོར་ཆེའི།
 
{{TibChung|[55b]}} སྭསྟི།  སྐུ་གསུམ་བསྟན་པའི་སྙིང་པོ་མཆོག  །མི་མཇེད་ཞིང་འདིར་སྣང་མཛད་མགོན།  །སྟོན་པ་བཅུ་གཉིས་ལ་བཏུད་ནས།  །དེ་ཡི་སྨིན་བྱེད་ལམ་བཟང་དབྱེ།  །{{TibChung|རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་ཡིད་དམ་ཞི་བ་རྫོགས་ཆེན་སྟོན་པ་བཅུ་གཉིས་ཀྱི་སྒྲུབ་དབང་བསྐུར་བའི་ཚུལ་ལ།

Latest revision as of 10:30, 28 January 2026

First text in volume. Back to Volume PageNext Text
Wylie title mchog gter rdzogs chen sde gsum gyi dbang bskur yongs rdzogs khrigs su bsdebs pa kun bzang rig 'dzin bla ma'i dgongs rgyan DJYD-KABUM-09-TA-001.pdf
Location bdud 'joms rin po che bka' 'bum
Volume 9, Text 1, Pages 1-295 (Folios 1a1 to 148a4)
Author བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation Dudjom Rinpoche 'Jigs bral ye shes rdo rje. Mchog gter rdzogs chen sde gsum gyi dbang bskur yongs rdzogs khrigs su bsdebs pa kun bzang rig 'dzin bla ma'i dgongs rgyan. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 9: 1-295. Kalimpong: Dupjung Lama, 1979-1985.
Side notes Recto: dbang chog   Verso: mchog gling sde gsum
More details More details
Tertön མཆོག་གྱུར་གླིང་པ་ (mchog gyur gling pa)
Genre Empowerment Ritual - dbang chog - dbang skur
Cycle དམ་ཆོས་རྫོགས་པ་ཆེན་པོ་སྡེ་གསུམ་ (dam chos rdzogs pa chen po sde gsum)
Colophon

།དེ་ལྟར་མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་དཀྱུས་གཅིག་ཏུ་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ་འདིའང་། གསང་འཛིན་ཁྱབ་བདག་བླ་མ་ཨོ་རྒྱན་ཚེ་དབང་མཆོག་གྲུབ་དཔལ་འབར་གྱི་ཞལ་སྔ་ནས་ཟབ་ཆོས་འདིའི་སྨིན་གྲོལ་གྱི་བདུད་རྩི་སྐལ་བཟང་པོའི་དཔྱིད་དུ་ནོས་པའི་སྐབས་རྣམ་གསལ་འཇུག་བདེའི་ངག་ཁྲིགས་འདི་ལྟ་བུ་ཞི་ཅིས་ཀྱང་སྒྲུབ་པར་གྱིས་ཤིག་པའི་བཀའ་ལུང་བཏུད་མར་ཕེབས་པ་བཞིན་རྗེས་སུ་སྒྲུབ་པའི་གཡར་དམ་སྙིང་ལ་བཀོད་ཀྱང་གཞན་རྐྱེན་མི་བཟད་པའི་ཁོལ་པོར་འཕྱན་ཏེ་ཡུན་རིང་པོར་འགྱང་པ་ན། སླར་ཡང་རྒྱལ་དབང་ཀརྨ་པ་ཀུན་བཟང་རིག་པའི་རྡོ་རྗེའི་བཀའ་ལུང་གིས་རྗེ་བླ་མར་སྙན་བསྐུལ་གནང་བར་མཛད་པ་དང་། འཁོར་ལོའི་མགོན་པོ་མཁྱེན་བརྩེ་ཆོས་ཀྱི་བློ་གྲོས་དཔལ་བཟང་པོའི་ཞལ་སྔ་ནས་ཀྱང་ལེགས་སོའི་གསུང་གིས་དབུགས་དབྱུང་ཐོབ་པ་ལ་བརྟེན་ནས། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་ལྔ་བཅུ་ང་དགུར་སོན་པ་དགེ་བྱེད་ཆུ་ཕོ་སྟག་གི་ལོ་འབྲས་བུ་བཅུད་དུ་སྨིན་པའི་དུས་ཀྱི་ཆར་རི་བོས་རིན་ཆེན་སྤུངས་པའི་མགུལ་ཀུན་ཏུ་བཟང་པོའི་ནགས་ཁྲོད་ཉམས་དགའ་བའི་གནས་སུ་གྲུབ་པར་སྤེལ་བའི་ཟིན་བྲིས་ལས། ཐོག་མའི་གླེགས་བམ་དུ་འབེབས་པ་པོ་ནི་ལྷོ་མོན་ཤིང་ལོའི་ཚལ་གྱི་སྔགས་སྟོན་ཆོས་གྲགས་རྒྱ་མཚོས་བགྱིས་པའོ། །འདིས་ཀྱང་མཆོག་གཏེར་སྙིང་པོའི་རིང་ལུགས་ཕྱོགས་ཐམས་ཅད་དུ་དར་ཞིང་རྒྱས་ལ་མི་ནུབ་ཡུན་དུ་གནས་པའི་རྒྱུར་གྱུར་ཅིག །།སརྦ་དཱ་མངྒལཾ།།

de ltar mchog gter rdzogs chen sde gsum gyi dbang bskur yongs rdzogs dkyus gcig tu khrigs su bsdebs pa kun bzang rig 'dzin bla ma'i dgongs rgyan ces bya ba 'di'ang /___gsang 'dzin khyab bdag bla ma o rgyan tshe dbang mchog grub dpal 'bar gyi zhal snga nas zab chos 'di'i smin grol gyi bdud rtsi skal bzang po'i dpyid du nos pa'i skabs rnam gsal 'jug bde'i ngag khrigs 'di lta bu zhi cis kyang sgrub par gyis shig pa'i bka' lung btud mar phebs pa bzhin rjes su sgrub pa'i g.yar dam snying la bkod kyang gzhan rkyen mi bzad pa'i khol por 'phyan te yun ring por 'gyang pa na/___slar yang rgyal dbang karma pa kun bzang rig pa'i rdo rje'i bka' lung gis rje bla mar snyan bskul gnang bar mdzad pa dang /___'khor lo'i mgon po mkhyen brtse chos kyi blo gros dpal bzang po'i zhal snga nas kyang legs so'i gsung gis dbugs dbyung thob pa la brten nas/___rgyal khams pa 'jigs bral ye shes rdo rjes rang lo lnga bcu nga dgur son pa dge byed chu pho stag gi lo 'bras bu bcud du smin pa'i dus kyi char ri bos rin chen spungs pa'i mgul kun tu bzang po'i nags khrod nyams dga' ba'i gnas su grub par spel ba'i zin bris las/___thog ma'i glegs bam du 'bebs pa po ni lho mon shing lo'i tshal gyi sngags ston chos grags rgya mtshos bgyis pa'o/___/'dis kyang mchog gter snying po'i ring lugs phyogs thams cad du dar zhing rgyas la mi nub yun du gnas pa'i rgyur gyur cig___//sarba dA mang+galaM//

[edit]
༄༅། །མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ་བཞུགས་སོ།། །།


༄༅། །མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ། ཨོཾ་སྭ་སྟི། ཀ་དག་གཏིང་གསལ་གཞོན་ནུ་བུམ་སྐུའི་ཀློང་། །ལྷུན་གྲུབ་ཕྱིར་གསལ་སྒྱུ་འཕྲུལ་རྡོ་རྗེའི་སྤྲིན། །ཐུགས་རྗེ་གང་འདུལ་དེར་སྣང་ཆུ་ཟླའི་གར། །ཁྱབ་བདག་གདོད་མའི་མགོན་པོ་བླ་མ་རྒྱལ། །ཐེག་དགུའི་རྩེ་རྒྱལ་ཤིན་ཏུ་རྣལ་འབྱོར་ཆེའི། །ལམ་སྲོལ་རིང་བརྒྱུད་འཚོལ་ལ་ལྟོས་མིན་པར། །ཉེ་བརྒྱུད་ཌཱ་ཀིའི་ཞལ་རླངས་མ་ཡལ་བའི། །སྔོན་མེད་ངོ་མཚར་གསང་མཛོད་འབྱེད་དེར་བསྔགས། །རིགས་འདུས་པད་འབྱུང་ཞབས་དང་ [2a] བེེ་རོ་རྗེས། །མན་ངག་གནད་དུ་དྲིལ་བ་སྡེ་གསུམ་གྱི། །སྨིན་གྲོལ་འབོགས་པའི་ལག་ཁྲིགས་འཇུག་བདེའི་སྐྱེས། །སྐལ་བཟང་འདོད་འཇོའི་དགའ་སྟོན་འདི་ན་སྤྲོ། །དེ་ཡང་མཆོག་གཏེར་རྫོགས་པ་ཆེན་པོ་སྡེ་གསུམ་གྱི་དབང་བསྐུར་ཡོངས་རྫོགས་དཀྱུས་གཅིག་ཏུ་གསལ་བར་བྱེད་པ་ལ། ཐོག་མར་སྤྱིར་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་ལ་ནང་གསེས་ཐུན་མོང་གཏོར་དབང་དང་། ཐུན་མིན་ཟབ་དབང་དངོས་བཅས་དབང་སྣ་གཉིས། ཕྱི་སྐོར་བླ་མ་འགྲོ་འདུལ་སུམ་ཅུ་རྩ་གཅིག་གི་བསྒྲུབ་དབང་། ཡི་དམ་ཞི་བ་རྡོ་རྗེའི་དབྱིངས་ཀྱི་དབང་བསྐུར། ཁྲིད་ཀྱི་བྱིན་རླབས་ [2b] ཨ་ཡིག་མདའ་འཕེན་མ་སྟེ། ཕྱི་སྐོར་སེམས་སྡེ་ལ་དབང་སྣ་གསུམ། ནང་སྐོར་བླ་མ་རིག་འཛིན་བཅོ་ལྔའི་དབང་། ཡི་དམ་ཞི་བ་མངོན་རྫོགས་སྟོན་པ་བཅུ་གཉིས་ཀྱི་དབང་། ཡི་དམ་ཁྲོ་བོ་མངོན་རྫོགས་རྒྱལ་པོ་རྩ་བ་ཡན་ལག་དང་བཅས་པའི་དབང་། ཁྲིད་ཀྱི་བྱིན་རླབས། མཁའ་འགྲོ་རོ་ལངས་བདེ་བའི་སྟོབས་ལྡན་མའི་དབང་སྟེ། ནང་སྐོར་ཀློང་སྡེ་ལ་དབང་སྣ་ལྔ། གསང་སྐོར་བླ་མ་རིག་འཛིན་ཡོངས་རྫོགས་ཀྱི་དབང་། ཡི་དམ་ཞི་བའི་དབང་ཁྲོ་བོ་གནས་གྱུར་དང་བཅས་པ། ཡི་དམ་ཁྲོ་བོ་བཀའ་བརྒྱད་ཀྱི་དབང་། ཁྲིད་ཀྱི་བྱིན་རླབས་ཏེ། གསང་སྐོར་མན་ངག་སྡེ་ལ་དབང་སྣ་བཞི། བཀའ་སྲུང་ཡེ་ཤེས་པ་དབྱིངས་ཕྱུག་མཁའ་འགྲོ་སྡེ་དགུའི་དབང་། བཀའ་སྲུང་འཇིག་རྟེན་པ་འབར་མ་མེ་གདོང་མའི་སྲོག་གཏད། རྡོ་རྗེ་གཤོག་རྒོད་མའི་སྲོག་གཏད། དམ་ཅན་སྐྱེས་བུ་ཆེན་པོའི་སྲོག་གཏད། གཏེར་སྲུང་ལྷ་བཙན་ཀླུ་གསུམ་གྱི་བཀའ་གཏད་བཅས། སྲུང་མའི་སྐོར་ལ་དབང་སྣ་ལྔ་སྟེ། ཁྱོན་དྲིལ་དབང་སྣ་བཅུ་དགུས་སྡེ་གསུམ་ཡོངས་རྫོགས་ཀྱི་སྨིན་བྱེད་ཚང་བར་འགྱུར་བ་ཡིན་ལ། གསང་སྐོར་ཡི་དམ་ཁྲོ་བོའི་དབང་ཁྲིགས་འཇམ་མགོན་བློ་གྲོས་མཐའ་ཡས་ཀྱི་གསུང་རབ་ཏུ་བཞུགས་པའི་ཕྱིར་འདིར་གསར་སྤྲོས་མ་བགྱིས་པས་ཡིག་ཆ་དེ་ཉིད་འདིར་མེད་ [3a] དུ་མི་རུང་ཞིང་། བསྐུར་ཚུལ་འོག་ཏུ་སྨོས་པ་ལྟར་དབང་རེ་རེ་བཞིན་སོ་སོར་བཤམ་སྒྲུབ་ཀྱིས་དབང་སྣ་རེ་བཞིན་སྦྱོར་དངོས་རྗེས་ཚང་དུ་སྒྲུབ་པའམ། ཡང་ན་ཆོ་གའི་ཆིངས་གཅིག་གི་ཁོངས་སུ་དབང་སྒྲུབ་ཇི་ལྟར་རིགས་པ་བྱས་ནས་སྡེབས་སུ་བསྐུར་བའང་རུང་སྟེ་ལོངས་སྐབས་དང་བསྟུན་པས་ཆོག་གོ། གང་ལྟར་སློབ་དཔོན་རང་ཉིད་སྡེ་གསུམ་རྩ་དཀྱིལ་གང་ཡང་རུང་བའི་བསྙེན་པ་ལས་སུ་རུང་ཞིང་། དབང་རྫས་ཀྱི་ཡོ་བྱད་དང་ཆོ་གའི་ལག་ལེན་ཕྲ་མོ་ཙམ་ཡང་རས་སུ་མི་བོར་བར་ཚང་ལ་མ་ནོར་བའི་སྒོ་ནས་སློབ་མ་རྗེས་སུ་འཛིན་པ་དང་། སློབ་བུའང་དམ་ཚིག་ཐུབ་ངེས་པ་ཧ་ཅང་མང་བ་མ་ཡིན་པ་ལས། ཁྱབ་བརྡལ་དུ་སྤེལ་ན་དཔོན་སློབ་གཉིས་ཀའི་དངོས་གྲུབ་ཀྱི་གེགས་སུ་འགྱུར་བ་ཡིན་པས་ཤིན་ཏུ་གཟབ་པར་གཅེས་སོ། །རང་གནས་སྐུ་བཞིའི་ཡེ༵་ཤེ༵ས་ཉིད། །སད་བྱེད་དབང་གི་ཆོ་གའི་ཁྲིགས། །རྡོ༵་རྗེ༵འི་ཚིག་དོན་མ་འཁྲུལ་བར། །ལེགས་བཤད་དགོངས་པའི་རྒྱན་དུ་བསྒྲུབ། །རྫོགས་པ་ཆེན་པོ་སྡེ་གསུམ་གྱི་དབང་གི་ཆོག་ཁྲིགས་སྤྱིའི་ཁོག་ཕུབ་བསྡོམས་ཚིག་བཤད་པའི་ལེ་ཚན་ནོ།། །།


[4a] ཨོཾ་སྭསྟི། །དཀྱིལ་འཁོར་རབ་འབྱམས་སྤྲོ་བསྡུའི་བདག །རིག་འཛིན་བླ་མའི་ཞབས་པདྨོ། །ཚངས་བའི་རྒྱན་དུ་རྟག་བཀོད་ནས། །སྨིན་ལམ་ཟབ་མོའི་སྒོ་འཕར་དབྱེ། །རྫོགས་པ་ཆེན་པོ་སྡེ་གསུམ་ལས་ཐོག་མར་སྤྱི་ལ་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་བསྐུར་བ་ལ་གཉིས། ཐུན་མོང་གི་གདུལ་བྱ་དད་པ་ཅན་རྗེས་སུ་འཛིན་པ་བྱིན་རླབས་སྒོ་འབྱེད་ཀྱི་དབང་དང་། ཐུན་མོང་མིན་པའི་གདུལ་བྱ་བརྩོན་འགྲུས་ཅན་རྗེས་སུ་འཛིན་པ་ཟབ་དབང་དངོས་བསྐུར་བའོ། །སྔ་མ་ལ་སྦྱོར་དངོས་རྗེས་གསུམ་གྱི། དང་པོ་དབང་རྟེན་འདུ་བྱ་ཞིང་དབང་དོན་སྒྲུབ་པའི་ཚུལ་ནི། སྣོད་བཅུད་ཀྱི་རྟེན་འབྲེལ་ཚོགས་པ་ན་གནས་དུས་དགེ་བར་སྒྲུབ་ཁང་བྱི་དོར་གྱིས་གཙང་ཞིང་མཛེས་པར་བྱས་ལ། གུང་དུ་སྟེགས་བུའི་དབུས་སུ་རས་བྲིས་ཀྱི་དཀྱིལ་འཁོར་འོད་ལྔའི་ཐིག་ལེ་ཧྲཱིཿཡིག་གིས་མཚན་པ་བྲིས་པའམ། མཎྜལ་མེ་ཏོག་དཀར་པོའི་ཚོམ་བུ་གཅིག་བཀོད་པའི་སྟེང་དུ་མཉྫིའི་ཁར་དབང་གཏོར་དཔལ་བཤོས་ཕྱག་བཞེས་བཞིན་བཞེངས་པ་སྐུ་ཙཀ་དར་གདུགས་དམར་པོས་སྤྲས་པ་ཅན་བརྟན་པར་འགོད། དེའི་གཡས་སུ་ཤྲཱི་སེང་གི་སྐུ་འབག གཡོན་དུ་སྔགས་ཕྲེང་། མདུན་དུ་རང་བྱུང་གི་ཤེལ་རྡོ། རྒྱབ་ཏུ་མཆོད་གཏོར་སྨན་རཀ མཐར་ཆུ་གཉིས་ཉེར་སྤྱོད་ལྔ་བཅས་བཤམ། སློབ་དཔོན་གྱི་མདུན་དུ་གཡོན་ནས་བརྩམས་ཏེ་ནང་མཆོད། རྡོ་དྲིལ། ལས་བུམ། ཌཱ་མ་རུ། མེ་ཏོག་གི་སྣོད་བཅས་འགོད། གཞན་ཡང་སྔོན་གཏོར། ཚོགས་ཀྱི་ཡོ་བྱད། ཆོས་སྐྱོང་སྤྱི་དང་གཏེར་སྲུང་གི་གཏོར་འབུལ། མཆོད་པའི་མཎྜལ། གུལ་ཡུངས་ [4b] འབེབས་རྫས་སོགས་ཉེ་བར་མཁོ་བའི་ཡོ་བྱད་མཐའ་དག་ཚོགས་པར་འདུ་བྱས་ལ། དབང་དོན་སྒྲུབ་མཆོད་ཀྱི་ཐོག་མར་ཚིག་བདུན་དང་བརྒྱུད་འདེབས་སྔོན་དུ་འགྲོ་བས། བསང་ཆུ་བྱིན་རླབས་དང་དཀར་གཏོར་བསྔོ་བ་ཟུར་བྱང་ལྟར་སྦྱར། ཕྱི་སྐོར་བླ་མའི་བསྐྱེད་རིམ་བྱང་བུ་ཁྲིགས་སྡེབས་ཀྱི་དབུ་ནས་བརྩ་མ་བྱིན་རླབས་བྱང་བུ་ཡན་མཐར་ཆགས་སུ་བཏང་། དེ་ནས་བགེགས་གཏོར་ཟུར་བྱང་ལྟར་བཏང་རྗེས། གཞུང་གི་མཆོད་བརླབས་བྱང་བུའི་མཚམས། བླ་མའི་བསྐྱེད་རིམ་བསྒོམ་པ་ལ། །ཏིང་འཛིན་རྣམ་གསུམ་ནས། དགོངས་ཀློང་མཁར༔ རྒྱུ་ཡི་ས་བོན་ཧྲཱིཿ ཡིག་ལས༔ ཅིར་ཡང་བསྒྱུར་བའི་རིག་འཛིན་གསལ༔ འབྱུང་བཞི་རྣམ་དག་གཞལ་ཡས་ཁང་༔ ཆོས་འཁོར་ཚུལ་གྱི་དཀྱིལ་འཁོར་དབུས༔ དུག་གསུམ་དག་པའི་གདན་སྟེང་དུ༔ རྒྱལ་ཀུན་གསང་གསུམ་འདུས་པའི་སྐུ༔ ཤྲཱི་སེངྷ་དཀར་སྨུག་མདོག༔ གྲུབ་པའི་ཆ་ལུགས་རྡོ་དྲིལ་འཛིན༔ རིན་ཆེན་དར་སྟག་རུས་པས་བརྒྱན༔ ཡུམ་དམར་གྲི་ཐོད་འཛིན་འཁྱུད་བསྒོམ༔ མ་བཅོས་གསལ་རྫོགས་སོགས་ནས། དབང་བསྐུར་འགུགས་བསྟིམ་བྱང་བུ་ནས་བསྟོད་པའི་བར་དུ་བཏང་། བདག་མདུན་ཆིག་རྫོགས་རང་བཞིན་ཡོངས་གྲུབ་ཆེན་པོའི་དགོངས་པ་སྲོག་ཏུ་བཟུང་ལ། བླ་མའི་ཐུགས་དབུས་ཟླ་དཀྱིལ་སྟེང་༔ རང་རིག་ངོ་བོ་ཧྲཱིཿཡིག་མཐར༔ སྔགས་ཀྱི་ཕྲེང་བས་བསྐོར་བ་ལས༔ འོད་ཟེར་འཕྲོ་འདུས་བྱིན་དབང་ཐོབ༔ ཅེས་དགོངས་པ་སྐྱེ་མེད་ཀྱི་ངང་ནས་མཚན་ [5a] སྔགས་བཟླས་པ་ཅི་ནུས་དང་། སྙིང་དབུས་ཐིག་ཟླུམ་འོད་ལྔའི་ཀློང་༔ ཨ་ཡིག་ཐ་མར་སྔགས་ཀྱིས་བསྐོར༔ བདེ་ཆེན་ཡེ་ཤེས་སྣང་བ་ཡིས༔ འཁོར་འདས་སྣོད་བཅུད་རྟོག་པ་སྦྱངས༔ ཐམས་ཅད་མ་ལུས་སྐུ་གསུང་ཐུགས༔ ཡོན་ཏན་ཕྲིན་ལས་རྨད་པོ་ཆེ༔ སྣང་སྲིད་གཞིར་བཞེངས་ཆེན་པོའི་ངང་༔ གྲགས་སྟོང་རྡོ་རྗེའི་ཛཔྲ་འདི་བཟླ༔ ཞེས་ཨ་གསུམ་སྦྲེལ་ཅི་གྲུབ་བཟླས་མཐར། སྟོང་ཚིག་འབུལ། དེ་ནས་སྲུང་མའི་གཏོར་འབུལ་ཚོགས་མཆོད་བསྒྲལ་བསྟབ་ཡན་གྲུབ་ནས། ལས་བུམ་ལ་དམིགས་ཏེ། བུམ་པ་བྷྲཱུྃ་ལས་གཞལ་ཡས་ཁང༔ བདུད་རྩིའི་མཚོ་དབུས་པད་ཟླའི་སྟེང་༔ རྡོ་རྗེ་སེམས་དཔའ་ཟླ་བའི་མདོག༔ ཞག་གཅིག་ཕྱག་གཉིས་རྡོ་དྲིལ་འཛིན༔ སྙེམས་མ་ཡུམ་དང་མཉམ་པར་སྦྱོར༔ ལོངས་སྤྱོད་རྫོགས་སྐུའི་ཆ་ལུགས་ཅན༔ སྐྱིལ་ཀྲུང་བཞུགས་ཤིང་འོད་ཟེར་འབར༔ སྐུ་ལས་བདུད་རྩིའི་རྒྱུན་བབས་པས༔ བུམ་པ་ཡོངས་སུ་གང་བར་གྱུར༔ ཨོཾ་བཛྲ་ས་ཏྭ་ས་མ་ཡ་སོགས་ཡིག་བརྒྱ་ཅི་འགྲུབ་བཟླས་མཐར། བུམ་ལྷ་འོད་ཞུ་བཅུད་དང་འདྲེས། །དག་བྱེད་བདུད་རྩིའི་མཆོག་ཏུ་གྱུར། །ཅེས་མོས། དེ་ནས་སྣང་སྲིད་དག་མཉམ་རང་བྱུང་གི་དཀྱིལ་འཁོར་དུ་རིག་པའི་མེ་ཏོག་དོར་བ་ཙམ་གྱིས་འཇུག་པ་སྔོན་དུ་འགྲོ་བས། སློབ་མ་གཞུག་པར་ [5b] གསོལ་བ་གདབ་པ་ནི། ཧོཿ རང་བྱུང་རིག་པ་ཡེ་ཤེས་ལྷ་ཚོགས་རྣམས༔ ཐུགས་རྗེ་རྨད་བྱུང་བརྩེ་བས་དགོངས་སུ་གསོལ༔ གསང་བ་བླ་ན་མེད་པའི་དཀྱིལ་འཁོར་དུ༔ བདག་གི་སློབ་མ་ཡང་དག་འཛིན་པར་མཛོད༔ བདེ་ཆེན་ཡེ་ཤེས་བླ་མེད་འཕེལ་བ་དང་༔ གྲོལ་བ་མཐར་ཕྱིན་དགོངས་སུ་གསོལ༔ ཞེས་གསོལ་ལྷ་རྣམས་དགྱེས་པ་ཆེན་པོ་ཡིས། དེ་ལྟར་ཡིན་ན་རིག་པ་འཛིན་པ་གང༔ བློ་ཆེན་སྐལ་བར་ལྡན་པའི་སློབ་མ་དག༔ བདེ་ཆེན་ཡེ་ཤེས་དཀྱིལ་འཁོར་འདིར་ཁྲིད་ལ༔ སྨིན་ཅིང་གྲོལ་བ་བླ་ན་མེད་པར་བྱོས༔ ཨ་ལ་ལ་ ཧོཿ ཞེས་གནང་བ་བསྩལ་བར་བསམ་མོ། །གཉིས་པ་བྱིན་རླབས་དབང་བསྐུར་དངོས་ནི། སློབ་མ་རྣམས་སྒོའི་ཕྱི་རོལ་དུ་བོས་ལ། ཇི་ལྟར་བལྟམས་པ་སོགས་དང་། ཡི་གེ་བརྒྱ་པ་བཟླ་བཞིན་ལས་བུམ་གྱི་ཆུས་ཁྲུས་ནས་དབྱུང་། ནང་དུ་འཁོད་པ་ན་བགེགས་གཏོར་རྃ་ཡྃ་ཁྃ་གིས་བསང་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བལྟས་ལ། ཨོཾ་ཨཱཿཧཱུཾ་གིས་བྱིན་བརླབ། སརྦ་བྷུ་ཏ་ཨ་ཀརྵ་ཡ་ཛཿས་མགྲོན་བཀུག་པ་ལ། སརྦ་བིགྷྣཱན་ནམཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿས་རྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་གན་ཁཾ་གྲྀཧྞེ་དཾ་བ་ལིནྟི་སྭཱ་ཧཱ། ཞེས་ལན་གསུམ་གྱིས་བསྔོས་ནས། ན་མོ། དྲིན་ཅན་རྩ་བ་དང་བརྒྱུད་པར་ [6a] བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཁྱད་པར་རིག་འཛིན་བླ་མ་རྩ་གསུམ་སྒྱུ་འཕྲུལ་དྲྭ་བ་ཆེན་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས་དེང་འདིར་རྡོ་རྗེ་སློབ་མ་རྣམས་དཀྱིལ་འཁོར་ཆེན་པོར་གཞུག་ཅིང་དབང་བསྐུར་ཟབ་མོ་སྒྲུབ་པ་ལ་བར་དུ་གཅོད་པའི་བགེགས་ཚོགས་ལོག་པར་འདྲེན་པ་ཐམས་ཅད་གཏོར་མ་འདིས་མགུ་ཞིང་ཚིམ་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་དེངས་ཤིག གལ་ཏེ་མི་འགྲོ་ན་ཁྲོ་བོ་ཡེ་ཤེས་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཨོཾ་སུ་མྦྷ་ནི་སོགས་དྲག་སྔགས་ཡུངས་ཐུན་ཚམ་རྔམས་དང་བཅས་པས་བསྐྲད་ལ། ཨོཾ་བཛྲ་ར་ཀྵ་ཛྭ་ལ་རཾ་ཧཱུཾ། ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ས་གཞི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་རབ་ཏུ་འབར་བས་བཅིངས་ཏེ་ཅིས་ཀྱང་མི་ཤིགས་པར་གྱུར་བར་བསམ། མཎྜལ་བཀྱེ་བསྡུ་བྱས་ལ། འོ་ན་མ་གྱུར་ནམ་མཁའི་མཐའ་དང་མཉམ་པའི་ [6b] སེམས་ཅན་མ་རིག་གསུམ་གྱིས་དམ་ལ་བཞག་ཅིང་འཁྲུལ་པའི་གཞན་དབང་དུ་གྱུར་པས་སྲིད་ལམ་འཁོར་བའི་གནས་རིས་སུ་སྡུག་བསྔལ་ཁོར་ཡུག་གིས་རྟག་ཏུ་མནར་ཞིང་འོག་ནས་འོག་ཏུ་ལྟུང་བ་ལས་ནམ་ཡང་ཐར་བའི་དུས་མེད་པ་འདི་རྣམས་སྙིང་རེ་རྗེ། དེ་ཐམས་ཅད་གློ་བུར་འཁྲུལ་པའི་རྩ་བ་སེམས་ཉིད་གཞི་ཐོག་ཏུ་གྲོལ་ནས་སྐུ་དང་ཡེ་ཤེས་རྒྱ་མཚོའི་གོ་འཕང་ལ་འགོད་པའི་སླད་དུ་རིག་འཛིན་བླ་མའི་དཀྱིལ་འཁོར་ཆེན་པོར་འཇུག་པར་བགྱིའོ་སྙམ་པའི་ཀུན་སློང་བྱང་ཆུབ་མཆོག་ཏུ་ཐུགས་བསྐྱེད་པ་དང་། སྣོད་བཅུད་ཐམས་ཅད་དག་མཉམ་ངེས་པ་ལྔ་ལྡན་གྱི་གསལ་སྣང་ལ་བློ་བཞག་སྟེ་ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་ལེགས་པར་འདུ་བགྱིས་ནས་གསན་པར་ཞུ། དེ་ལ་གང་ཞིག་གསན་པར་བྱ་བ་ནི་རྒྱལ་བ་སྐུ་གསུམ་གྱི་སྟོན་པ་རྒྱ་མཚོས་གདུལ་བྱ་རྣམས་ཀྱི་ཁམས་དབང་བསམ་པའི་བྱེ་བྲག་དང་རྗེས་སུ་མཐུན་པར་ཟབ་རྒྱས་ཀྱི་ཆོས་ཚུལ་བསམ་གྱིས་མི་ཁྱབ་པར་བསྟན་པ་ཐམས་ཅད་དབྱེ་བའི་སྒོ་ནས་ཐེག་པ་རིམ་པ་དགུར་གནས་ཀྱང་བསྡུ་བའི་སྒོ་ནས་ངེས་པའི་ཐེག་པ་གསུམ་དུ་བསྡུ་བའི་ཚུལ། སྤྱི་མདོ་དགོངས་པ་འདུས་པ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་སྟེ། །ཀུན་འབྱུང་འདྲེན་དང་དཀའ་ཐུབ་རིག ། [7a] དབང་བསྒྱུར་ཐབས་ཀྱི་ཐེག་པའོ། །ཞེས་ཕྱི་ཀུན་འབྱུང་འདྲེན་པའི་ཐེག་པ། ནང་དཀའ་ཐུབ་རིག་བྱེད་ཀྱི་ཐེག་པ། གསང་བ་དབང་བསྒྱུར་ཐབས་ཀྱི་ཐེག་པ་གསུམ་ལས་འདིར་ཕྱི་མ། དེ་ལའང་རྒྱུད་མ་ཧཱ་ཡོ་ག ལུང་ཨ་ནུ་ཡོ་ག མན་ངག་ཨ་ཏི་ཡོ་ག་སྟེ་གསུམ་དུ་དབྱེ་བ་ལས། འདིར་ནི་ཀུན་གྱི་རྩེ་མོའམ་ཕུལ་དུ་གྱུར་པ་མཆོག་གསང་བླ་མེད་ཨ་ཏི་ཡོ་ག་སྟེ། འདི་ལའང་གདམས་ངག་གི་བཀའ་སྲོལ་བསམ་གྱིས་མི་ཁྱབ་པར་བཞུགས་པ་ལས། འདིར་སློབ་དཔོན་ཆེན་པོ་ཤྲཱི་སིངྷའི་མན་ངག་དགོངས་ཉམས་མཐར་ཐུག་པ་རྒྱལ་དབང་པདྨ་འབྱུང་གནས་དང་། ལོ་ཆེན་བེེ་རོ་ཙ་ནའི་ཐུགས་དམ་སྙིང་པོའི་ཡང་ཞུན་དམ་ཆོས་རྫོགས་པ་ཆེན་པོ། ཕྱི་སྐོར་སེམས་སྡེ་ནམ་མཁའ་ཀློང་ཡངས། མང་སྐོར་ཀློང་སྡེ་ཉི་མ་ཀློང་ཆུབ། གསང་སྐོར་མན་ངག་འོད་ཟེར་མཐའ་ཡས་ཞེས་ཟབ་འདྲིལ་སྙིང་པོའི་ཡང་བཅུད་ཀྱི་ཆོས་སྡེ་ཆེན་པོ་འདི་ཉིད་ཟབ་མོ་གཏེར་ལས་ཇི་ལྟར་སྣང་བའི་ཚུལ་ནི་གཞུང་གི་ལུང་བསྟན་གཅེས་པའི་ལྡེའུ་མིག་ལས། དེ་ཡི་དུས་སུ་ལྷོ་ཟླའི་ཕྱོགས༔ རཏྣའི་མིང་ཅན་སྟག་གམ་གླང་༔ མཆོག་གི་མིང་ཅན་སྐྱེས་བུ་ཞིག༔ དེ་ནི་སྔོན་དུ་ལྷ་སྲས་འབྲིང་༔ ད་ལྟ་ངན་ལམ་ [7b] ཡེ་ཤེས་མཆོག༔ དེ་ལྟ་བུ་རུ་སྐྱེ་བ་ལེན༔ འབྲུག་གི་ལོ་ལ་གདམས་པ་འདི༔ ས་ཡི་སྟེང་དུ་དེས་འབྱིན་བྱེད༔ རྗེ་འབངས་ཡིད་ལ་ངེས་པར་གྱིས༔ ཞེས་གསུངས་པ་ལྟར་རྩོད་བྲལ་དུས་བབས་ཀྱི་སྤྲུལ་པའི་གཏེར་ཆེན་ཨོ་རྒྱན་མཆོག་འགྱུར་བདེ་ཆེན་གླིང་པ་དང་། བཀའ་བབས་བདུན་གྱི་མངའ་བདག་ཐམས་ཅད་མཁྱེན་དངོས་པདྨ་འོད་གསལ་མདོ་སྔགས་གླིང་པ་ལྷན་རྒྱས་པས་མདོ་སྨད་ཛམ་ནང་པདྨ་ཤེལ་ཕུག་ནས་སྤྱན་དྲངས་ཏེ། ལུང་ཟིན་རྩ་བའི་ཆོས་བདག་ལ་གཅིག་བརྒྱུད་དུ་སྩལ་བའི་དམ་ཆོས་རྫོགས་པ་ཆེན་པོ་སྡེ་གསུམ་ལས། སྐབས་སུ་བབས་པ་འདི་ནི་མདོ་བྱང་ལས། དམ་ཆོས་རྫོགས་ཆེན་སྡེ་གསུམ་བཤད༔ ད་ལྟ་ཤིན་ཏུ་སྤེལ་འཕངས་པས༔ ཟབ་པ་ཐུགས་ཀྱི་གཏེར་དུ་སྦས༔ ནམ་ཞིག་ལས་ཅན་བུར་འཕྲད་ནས༔ གདམས་པ་སྣ་རེས་གྲོལ་བར་འགྱུར༔ སྙན་ནས་སྙན་དུ་བརྒྱུད་པ་གཅེས༔ གང་ཞིག་འགྲོ་དོན་སྒོ་དབྱེ་ཙམ༔ སྒྲུབ་ཐབས་སྣ་རེ་སྦྱིན་པར་བྱ༔ ཞེས་བྱུང་བ་ལྟར་སྡེ་གསུམ་སྤྱི་ལ་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་ལས། ཐུན་མོང་དད་པ་ཅན་རྗེས་སུ་འཛིན་པའི་སླད་དུ་ཀུན་གྱི་སྔོན་འགྲོ་ཆོས་ཀྱི་སྒོ་འབྱེད་ཟབ་མོའི་བྱིན་རླབས་དབང་བསྐུར་གྱི་རིམ་པར་བགྱི་བ་ལ། [8a] བདག་ཉིད་སློབ་དཔོན་གྱིས་བགྱི་འོས་རྣམས་སྔོན་དུ་ལེགས་པར་གྲུབ་ནས། སྐུ་ཉིད་སློབ་མ་རྣམས་ཀྱི་ངོ་སྐལ་དུ་གྱུར་པ་ཐོག་མར་དབང་བསྐུར་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་མཚམས་སྦྱར་ལ་མཎྜལ་འབུལ་དུ་གཞུག སློབ་དཔོན་ཉིད་རིག་འཛིན་བླ་མའི་ངོ་བོར་བཞུགས་པ་ལ་མི་ཕྱེད་དད་པའི་གདུང་ཤུགས་དྲག་པོས་ཕྱག་སྙིམ་པ་མེ་ཏོག་དང་བཅས་ཐལ་མོ་སྦྱར་ལ་གསོལ་བ་གདབ་པ་འདིའི་རྗེས་ཟློས་མཛོད། ཧོཿ བདེ་གཤེགས་རྒྱལ་བའི་གདུང་འཚོབ་ཧེ་རུ་ཀ༔ འཇིགས་བྲལ་དཔའ་བོ་ཤྲཱི་སེངྷདང་༔ གཉིས་སུ་མེད་པའི་རྡོ་རྗེ་སློབ་དཔོན་དགོངས༔ བདག་ཅག་གྲོལ་བ་མཐར་ཕྱིན་མཛད་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་བརྩེ་པའི་ཐུགས་རྗེས་གནང་བ་སྩལ་ཞིང་ཆོས་ཀྱི་སྒོ་དབྱེ་བའི་སྒོ་ནས་སྤྲོ་བ་བསྐྱེད་པར་བྱ་བ་ཡིན་ཏེ། རྡོ་རྗེ་འཕྱར་ཞིང་། ཧོཿ ཐར་པ་བླ་ན་མེད་པའི་གྲོང་ཁྱེར་དུ༔ འདུས་པའི་གཙོ་བོ་ཤྲཱི་སེངྷ་བཞུགས༔ འདི་ན་མོས་པའི་སྐལ་ལྡན་སྐྱེས་བུ་ཁྱོད༔ འཇུག་པ་ལེགས་ཤིང་དངོས་གྲུབ་ཅི་ལ་དགའ༔ དེ་ཉིད་སྦྱིན་ཅིང་འདི་ན་བླ་མེད་པའི༔ ཚེ་གཅིག་སངས་རྒྱས་སྒྲུབ་ལ་སྤྲོ་བ་བསྐྱེད༔ དམ་ཚིག་མ་ལུས་ཡོངས་སུ་བཟུང་བར་གྱིས༔ ཞེས་གདམས། དེ་ལ་ཐོག [8b] མར་རྒྱུད་དག་པར་བྱ་བའི་སླད་དུ་བླ་མ་ཉིད་དཀོན་མཆོག་རྩ་གསུམ་རྒྱ་མཚོའི་ཁྱབ་བདག་ཆེན་པོར་བཞུགས་པའི་སྤྱན་སྔར་བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བར་བགྱིའོ་སྙམ་པ་ཀུན་རྫོབ་གཞིའི་སྐྱབས་འགྲོ་དང་། དབྱིངས་རིག་ཟུངས་འཇུག་རང་བྱུང་གདོད་མའི་གཤིས་ལུགས་དཀོན་མཆོག་གསུམ་གྱི་ངོ་བོར་ཡེ་ནས་རང་ཆས་སུ་བཞུགས་པ་ཉིད་རང་ངོ་ཤེས་པའི་སྒོ་ནས་རང་བབ་དེ་ཁོ་ན་ཉིད་དུ་ལ་བཟླ་བ་དོན་དམ་འབྲས་བུའི་སྐྱབས་འགྲོ་རང་བཞིན་ཡོངས་ཤེས་ཀྱི་ངང་ནས་འདིའི་རྗེས་ཟློས། ཀུན་གཞི་དག་པའི་སངས་རྒྱས་དང་༔ རྣམ་ཤེས་གནས་གྱུར་དམ་པའི་ཆོས༔ དབང་པོ་ཡུལ་དག་ཚོགས་མཆོག་ལ༔ རང་ངོ་ཤེས་པས་སྐྱབས་སུ་མཆི༔ ལན་གསུམ། འདི་ལྟར་མ་རིག་འཁྲུལ་པའི་འཁོར་ལོར་ཁ་འཕྱན་པའི་སྐྱེ་འགྲོ་གློ་བུར་འཁྲུལ་སྣང་གི་སྡུག་བསྔལ་ལ་སྤྱོད་པ་ཐམས་ཅད་རང་གནས་འོད་གསལ་ཆོས་སྐུའི་ཀློང་ཆེན་པོར་གྲོལ་བའི་ཆེད་དུ་སྨིན་གྲོལ་ཟབ་མོའི་སྒོར་འཇུག་པར་བགྱིའོ་སྙམ་པ་ཀུན་རྫོབ་རྒྱུའི་སེམས་བསྐྱེད་དང་། དོན་དམ་པར་གནས་ལུགས་བདེ་གཤེགས་སྙིང་པོ་འཆིང་གྲོལ་ལས་འདས་པའི་རང་བཞིན་གཉུག་མ་ལྷུན་རྫོགས་ཆེན་པོའི་ངོ་བོར་མཉམ་པར་འཇོག་པ་ [9a] མཐར་ཐུག་འབྲས་བུའི་སེམས་བསྐྱེད་ལ་བློ་བཞག་བཞིན་པས་འདིའི་རྗེས་ཟློས། ཨེ་མ་ཧོ་བདེ་གཤེགས་སྙིང་པོ་ལས༔ འགྲོ་བ་མ་རིག་འཁྲུལ་པ་རྣམས༔ འོད་གསལ་ཆན་པོར་བསྒྲལ་བའི་ཕྱིར༔ གཉིས་སུ་མེད་པར་སེམས་བསྐྱེད་དོ༔ ལན་གསུམ། ཞིང་མཆོག་དེ་དག་གི་སྤྱན་སྔར་ཕྱག་འཚལ་ཞིང་མཆོད་པ་འབུལ་བ་སོགས་ཀུན་རྫོབ་ཡན་ལག་བདུན་པའི་དམིགས་འདུན་དང་དོན་དམ་རང་གསལ་གྱི་དགོངས་པ་ཟུང་དུ་འབྲེལ་བས་འདིའི་རྗེས་ཟློས། སྣང་བ་རྣམ་དག་བདེ་གཤེགས་ལ༔ བདེ་བ་འཛིན་མེད་ཕྱག་འཚལ་ལོ༔ བདེ་སྟོང་དབྱེར་མེད་མཆོད་པར་འབུལ༔ བདེ་ཆེན་མ་རྟོགས་མཐོལ་ལོ་བཤགས༔ ཡུལ་ཅན་དག་པར་རྗེས་ཡི་རང་༔ དབང་པོ་བདེན་མེད་ཆོས་འཁོར་བསྐོར༔ ཤེས་པ་རང་གསལ་ངང་ལ་བཞུགས༔ ཀུན་གཞི་དག་པའི་དོན་རྟོགས་ཤོག༔ ལན་གསུམ། རྡོ་རྗེ་ཐེག་པའི་དམ་ཚིག་སྤྱི་དང་བྱེ་བྲག་རྩ་བ་དང་ཡན་ལག་གིས་བསྡུས་པ་རྣམས་ལེགས་བར་བླངས་ནས་ཚུལ་བཞིན་བསྲུང་སྙམ་པས་འདིའི་རྗེས་ཟློས། ཧོཿ ཁྱབ་བདག་དཔལ་ལྡན་བླ་མ་དགོངས་སུ་གསོལ༔ བདག་ནི་དུས་གསུམ་རྒྱལ་བའི་དགོངས་པའི་མཐིལ༔ བདེ་བ་ཆེན་པོའི་ [9b] ཡེ་ཤེས་ལ་དགའ་བས༔ དེ་ཉིད་མྱུར་སྩོལ་གསང་སྔགས་རིགས་མཆོག་གི༔ རྩ་བ་སྐུ་གསུང་ཐུགས་ཀྱི་དམ་ཚིག་དང་༔ ཉི་ཤུ་རྩ་ལྔའི་དམ་ཚིག་ཆེས་འཕགས་པ༔ སྲོག་གི་ཕྱིར་ཡང་མི་བཏང་བཟུང་བར་བགྱི༔ ལན་གསུམ། སློབ་མའི་མགོར་རྡོ་རྗེ་བཞག་ལྕེ་ལ་བདུད་རྩི་བྱིན་ཏེ། འདི་ནི་གསང་བ་བླ་ན་མེད་པ་ཡི༔ ཐར་པའི་གོ་འཕང་ཚེ་འདིར་ཐོབ་འགྱུར་བས༔ ཉེ་བའི་ལམ་མཆོག་བདེ་བ་ལམ་བྱེད་ཡིན༔ ཁྱེད་རྣམས་རྡོ་རྗེའི་དམ་ཚིག་ཐུབ་པར་གྱིས༔ མ་ཐུབ་རྡོ་རྗེའི་དམྱལ་བ་ཆེན་པོར་ལྟུང་༔ སྲོག་གི་ཕྱིར་ཡང་ཡོངས་སུ་མ་བཏང་ཞིག༔ བཛྲས་མ་ཡ་རཀྵ་སི་ཧཱུྃ༔ ཇི་ལྟར་བསྒོས་པའི་དམ་ཚིག་གི་ཚུལ་ལས་ནམ་ཡང་འདའ་བར་མི་བགྱིད་དོ་སྙམ་པའི་རྡོ་རྗེའི་བྲོ་བོར་བ་འདིའི་རྗེས་ཟློས། མ་ཧཱ་སུ་ཁ་བཛྲ་ས་མ་ཡ་ཧཱུྃ༔ ཨི་དཾ་ན་ར་ཀན༔ ཞེས་བསྐྱལ། དེ་རྣམས་ཀྱིས་དབང་གི་སྔོན་འགྲོའི་ཆོས་རྣམས་གྲུབ་ནས། དངོས་གཞི་བྱིན་རླབས་ཀྱི་གཞི་འགོད་པ་ཡེ་ཤེས་པ་དབབ་པའི་སླད་དུ། ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་སྲོང་ལ་མིག་མི་འགུལ་བའི་ལྟ་སྟངས་དབྱིངས་ལ་གཏོད། ངག་གི་གནད་སྟེང་འོག་གི་རླུང་ཁ་སྦྱོར་དུ་ཆིངས། ཡིད་ཀྱི་གནད་ཚོགས་དྲུག་གི་ཡུལ་ལ་སྐད་ཅིག་ཙམ་མ་ཡེངས་པར་དམིགས་པ་འདི་བཞིན་དུ་མཛོད། སློབ་བུའི་ [10a] ཐ་མལ་འཛིན་རྟོག་སྦྱངས། །སྐད་ཅིག་དྲན་རྫོགས་ངང་ཉིད་ལས། །དྭངས་མ་ཡེ་ཤེས་འོད་ཀྱི་ལུས། །ཤྲཱི་སེངྷ་དཀར་སྨུག་མདོག །གྲུབ་པའི་ཆ་ལུགས་རྡོ་དྲིལ་འཛིན། །རིན་ཆེན་དར་སྟག་རུས་པས་བརྒྱན། །ཡུམ་དམར་གྲི་ཐོད་འཛིན་འཁྱུད་བསྒོམ། །དཔོན་སློབ་ཐུགས་སྲོག་ས་བོན་ལས། །འོད་འཕྲོས་སྐུ་གསུམ་རྒྱལ་བའི་ཞིང་། །ཆོས་དབྱིངས་བརྡལ་ཁྱབ་ཆེན་པོ་ནས། །བརྒྱུད་གསུམ་རིག་འཛིན་བླ་མའི་ཚོགས། །སྤྱན་དྲངས་ཐིམ་པས་དབྱེར་མེད་གྱུར། །ཅེས་བརྡ་སྦྱར་ལ། སྦྱར་སྤོས་བཏུལ་ཞིང་རོལ་མོའི་སྒྲ་དབྱངས་དང་བཅས། ཧཱུྃ༔ མི་མངོན་དབྱིངས་ཀྱི་ཞིང་ཁམས་ནས༔ བླ་མ་རིག་འཛིན་བདེ་གཤེགས་ཚོགས༔ ཡི་དམ་དཔའ་བོ་མཁའ་འགྲོ་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ ཀུན་གཞི་དག་པའི་ཞིང་ཁམས་ནས༔ གསལ་བ་ལོངས་སྤྱོད་རྫོགས་སྐུར་བཞེངས༔ ཐུགས་རྗེ་སྤྲུལ་སྐུའི་འཁོར་དང་བཅས༔ དབྱེར་མེད་ཆེན་པོར་གཤེགས་སུ་གསོལ༔ དབྱིངས་ལས་གཞན་མེད་ཆོས་སྐུའི་ཚོགས༔ བདེ་བ་ཆེ་ལ་ལོངས་སྤྱོད་པ༔ ཅིར་ཡང་སྣང་བ་སྤྲུལ་པའི་སྐུ༔ མ་ལུས་འཁོར་བཅས་གཤེགས་སུ་གསོལ༔ སྣང་ཡུལ་འཛིན་པ་དབྱིངས་ [10b] སུ་གྲོལ༔ དབང་པོ་སྐུ་ལྔར་བྱིན་གྱིས་རློབས༔ རྣམ་ཤེས་ཡེ་ཤེས་ཆེན་པོར་བསྒྱུར༔ ཀུན་གཞིའི་ཀློང་དུ་ཐིམ་པར་མཛོད༔ ཨེ་ཧྱེ་ཧི་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾཿ ཛཿཧཱུྃ་བཾ་ཧོཿ ཞེས་བྱིན་དབབ་ལ། དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བྱང་ཆུབ་སྙིང་པོའི་བར་དུ་བརྟན་བར་བྱས་པའི་མོས་པ་མཛོད། རྡོ་རྗེ་མེ་ཏོག་དང་བཅས་པ་སྤྱི་བོར་རྒྱ་གྲམ་དུ་བཀོད་ནས། ཏིཥྛ་བཛྲ་ས་བརྟན་བར་བྱ། དེ་ནས་དངོས་གཞི་བྱིན་རླབས་ཡོངས་རྫོགས་གཏོར་མའི་དབང་བསྐུར་བ་ལ་དམིགས་པ་འདི་བཞིན་དུ་མཛོད། གཏོར་སྣོད་རང་བྱུང་གི་གཞལ་མེད་ཁང་ཆེན་པོར་གཏོར་མ་རིག་འཛིན་བླ་མའི་ལྷ་ཚོགས་དངོས་སུ་བཞུགས་པ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཏེ་དབང་བསྐུར་བས་གསང་བ་གསུམ་གྱི་དབང་དང་བྱིན་རླབས་དངོས་གྲུབ་ཐམས་ཅད་ཆིག་རྫོགས་སུ་ཐོབ་པའི་མོས་པ་མཛད། གཏོར་མ་ཐོགས་ལ། ཧཱུྃ༔ གཏོར་མའི་རང་བཞིན་རིན་ཆེན་གཞལ་ཡས་ཁང་༔ ནང་དུ་བླ་མ་ཤྲཱི་སེངྷ་དང་༔ རིག་འཛིན་གྲུབ་ཐོབ་རྒྱ་མཚོའི་ཚོགས་རྣམས་བཞུགས༔ ཡི་དམ་ལྷ་ཚོགས་ཐམས་ཅད་སྤྲིན་ལྟར་གཏིབས༔ མ་དང་མཁའ་འགྲོ་བུ་ཡུག་བཞིན་དུ་འཚུབས༔ རྩ་གསུམ་རྒྱལ་བའི་དཀྱིལ་འཁོར་ཆེན་པོ་འདིས༔ སྐལ་ལྡན་སློབ་མ་རྣམས་ལ་དབང་ [11a] བསྐུར་བས༔ ཕྱི་ནང་གསང་བའི་བར་ཆད་བསལ་བ་དང་༔ སྐུ་གསུང་ཐུགས་ཀྱི་དབང་ཆེན་ཡོངས་སུ་རྫོགས༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་གུ་རུ་ཤྲཱི་སེངྷ་སིདྡྷི་ཧཱུྃ༔ ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཧཱུྃ༔ ཞེས་གཏོར་མ་གནས་གསུམ་དུ་བཞག ། རྗེས་འབྲེལ་དུ་སྐུ་གསུང་ཐུགས་ཀྱི་དབང་བསྐུར་བ་ལ། ཐོག་མར་ལྷ་སྐུ་ཕྱག་རྒྱའི་དབང་བསྐུར་བའི་སླད་དུ། རིག་འཛིན་བླ་མའི་སྐུ་ལས་ཡེ་ཤེས་ཀྱི་སྐུ་གཉིས་པ་ཞིག་རྒྱངས་ཀྱིས་བྱུང་། ཁྱེད་རང་རྣམས་ཀྱི་དཔྲལ་བར་ཐིམ་པས་སྐུའི་བྱིན་རླབས་མ་ལུས་པ་ཐོབ་པའི་མོས་པ་མཛོད། སྐུ་འབག་སྤྱི་བོར་བཞག་ལ། ཨོཾ༔ རྡོ་རྗེ་སེམས་དཔའ་བདེ་བའི་ལྷུམས་སུ་ཞུགས༔ མི་ཡི་ཡུལ་འཁྲུངས་ཐོས་བསམ་ཐར་ཕྱིན་མཛད༔ རྒྱལ་བའི་གསང་གསུམ་མ་ལུས་འདུས་པའི་སྐུ༔ དཔལ་ཆེན་རིག་འཛིན་ཤྲཱི་སེངྷ་ཡི༔ སྐུ་ཡི་ཕྱག་རྒྱ་བསྒོམ་པའི་དབང་བསྐུར་རོ༔ རྩ་སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ༔ དེང་ཕྱིན་ཆད་ཐ་མལ་སྣང་ཞེན་གྱི་འཛིན་པ་བཏུལ་ནས་སྣང་སྟོང་ཟུང་འཇུག་ཡེ་ཤེས་ཕྱག་རྒྱའི་སྐུ་བསྒོམ་པ་དང་མི་བྲལ་བར་གྱིས་ཤིག གསུང་བཟླས་པའི་ལུང་སྦྱིན་པའི་སླད་དུ། སློབ་དཔོན་རིག་འཛིན་བླ་མའི་ཐུགས་ཀའི་སྔགས་ཕྲེང་ལས་ [11b] སྔགས་ཕྲེང་གཉིས་པ་བྱུང་། ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཟླ་སྟེང་ཧྲཱིཿཡིག་གི་མཐར་འཁོད་པ་བཟླས་པའི་རྐྱེན་གྱིས་གསུང་སྔགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། རྩ་སྔགས་དང་ཨ་སུམ་སྦྲེལ་རྗེས་ཟློས་ལན་གསུམ་རེ་བྱ། སྔགས་ཀྱི་ཕྲེང་བ་མགྲིན་པར་བཞག་སྟེ་དབང་བསྐུར་བས་དེ་ཉིད་བརྟན་པར་བྱས་པའི་མོས་པ་མཛོད། སྔགས་ཕྲེང་མགྲིན་པར་བཞག ། ཨཱཿ རིག་འཛིན་གཙོ་བོ་གྲུབ་པའི་དབང་ཕྱུག་རྗེ༔ རྒྱལ་ཀུན་གསང་གསུམ་འདུས་པ་གསུང་གི་མཆོག༔ རླུང་སྔགས་གྲགས་སྟོང་སྔགས་སུ་འགྱུར་བའི་ཕྱིར༔ ཡན་ལག་དྲུག་ཅུ་ལྡན་པའི་དབང་བསྐུར་རོ༔ རྩ་སྔགས་མཐར། ཝཱཀ་ཨ་བྷི་ཥིཉྩ་ཨཱཿ དེང་ཕྱིན་ཆད་ངག་ཐ་མལ་དུ་འཛིན་པའི་བརྗོད་པ་བཏུལ་ཏེ་རླུང་སྔགས་དབྱེར་མི་ཕྱེད་པའི་སྙིང་པོ་གྲགས་སྟོང་ཆུའི་རྒྱུན་ལྟར་བཟླ་བ་ལ་བརྩོན་པར་གྱིས་ཤིག ཐུགས་འོད་གསལ་གྱི་དགོངས་པ་ངོ་སྤྲོད་པའི་སླད་དུ། སེམས་དུས་གསུམ་གྱི་རྟོག་པའི་རྗེས་སུ་མི་འབྲང་བར་བླ་མའི་ཐུགས་དང་རང་སེམས་དབྱེར་མེད་དུ་བསྲེས་ནས་རིག་སྟོང་ཟུང་འཇུག་འོད་གསལ་གཉུག་མའི་ངང་དུ་མཉམ་པར་བཞག་པས་རིག་འཛིན་བླ་མའི་ཐུགས་ཀྱི་དགོངས་པ་མངོན་དུ་གྱུར་ [12a] པའི་མོས་པ་མཛོད། ཧཱུྃ༔ རིག་འཛིན་བླ་མ་ཤྲཱི་སེངྷའི་ཐུགས༔ སྤྲོས་པ་ཀུན་བྲལ་སེམས་ཉིད་ཡེ་ཤེས་ཆེ༔ བདེ་གསལ་མི་རྟོག་དབྱེར་མེད་ཀློང་དུ་ཆུབ༔ དབྱིངས་རིག་ཟུང་དུ་འཇུག་པའི་དབང་ཐོབ་ཤོག༔ རྩ་སྔགས་མཐར། ཙིཏྟ་ཨབྷི་ཥིཉྩ་ཧཱུྃ༔ ཞེས་དཔོན་སློབ་གཉིས་ཀས་ཅུང་ཟད་མཉམ་པར་བཞག། དེང་ཕྱིན་ཆད་ཡིད་ཐ་མལ་གྱི་དྲན་རྟོག་འཛིན་ཞེན་ཐམས་ཅད་བཏུལ་ཏེ་ཆོས་ཉིད་གཉུག་མ་བསམ་བརྗོད་དང་བྲལ་བའི་ངང་དུ་ལ་བཟླ་བར་གྱིས་ཤིག དེ་ལྟར་ཁྱེད་རང་རྣམས་ཀྱི་སྒོ་གསུམ་རིག་འཛིན་བླ་མའི་གསང་བ་གསུམ་དང་དབྱེར་མེད་དུ་གྱུར་པ་ལ། བླ་མ་དཀྱིལ་འཁོར་པའི་ལྷ་ཚོགས་ནམ་མཁའ་གང་བའི་ཚོགས་ཀྱིས་བཀྲ་ཤིས་པའི་བདེན་ཚིག་དབྱངས་སུ་ལེན་བཞིན་མེ་ཏོག་མནྡཱ་ར་བའི་ཆར་སིལ་མར་བསྙིལ་བས་དབང་དོན་གྱི་ཡེ་ཤེས་སྔར་མ་སྐྱེས་པ་བསྐྱེད། སྐྱེས་པ་གོང་ནས་གོང་དུ་འཕེལ་ཞིང་བརྟན་པར་བྱས་པའི་མོས་པ་མཛོད། ཅེས་མཚམས་སྦྱར་ལ་ཤིས་བརྗོད་ཇི་ལྟར་རིགས་པ་སྤེལ། དེ་དག་རྣམས་ཀྱི་སྒོ་ནས་རྩ་བའི་གཞུང་ལས། འདི་ཡི་གདམས་པ་སློབ་བུའི་སྣོད་བརྟགཅིང་༔ བློ་དང་འཚམས་པར་རིམ་བཞིན་བསྟན་པ་ལས༔ པདྨའི་སྙིང་ཁྲག་ཡིན་པས་སྤེལ་བར་ཕངས༔ ཞེས་ཤིན་ཏུ་ཟབ་ཅིང་རབ་ཏུ་གཅེས་པའི་གཙིགས་སུ་བསྔགས་པར་མཛད་ [12b] པ་བླ་མའི་ཟབ་དབང་ཉི་ཟླའི་རྒྱ་ཅན་ལས། ཐུན་མོང་དད་པ་ཅན་རྗེས་སུ་འཛིན་པ་ཐོག་མའི་ཆོས་ཀྱི་སྒོ་འབྱེད་ཟབ་མོའི་དབང་བསྐུར་ལེགས་པར་ཐོབ་པ་ལགས། དེའང་དབང་གི་སྲོག་དམ་ཚིག་གིས་འཛིན་དགོས་པས་ན་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་ལྷག་པས་བསྡུས་པ་མཐའ་དག་ཚུལ་བཞིན་དུ་བསྲུང་བར་ཁས་བླང་བ་འདིའི་རྗེས་ཟློས། གཙོ་བོ་ཇི་ལྟར་སོགས་ལན་གསུམ། དབང་བསྐུར་བ་ལེགས་པར་ཐོབ་པའི་གཏང་རག་ཏུ་མཎྜལ་ཕུལ། ཞེས་མཎྜལ་འབུལ་དུ་གཞུག སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲོས་ཏེ་འབུལ་ན་ཆ་ཤས་རེ་རེ་ནས་བཞེས་ལ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་སོགས་ལན་གསུམ། དེ་ལྟར་དབང་བསྐུར་ཟབ་མོ་ལེགས་པར་གསན་པ་ལས་བྱུང་བའི་དགེ་ཚོགས་རྣམས་བྱང་ཆུབ་སྙིང་པོར་ཡོངས་སུ་བསྔོ་བའི་རྒྱས་འདེབས་ལྷན་ཅིག་ཏུ་གནང་བ་དང་། འདི་ལ་བརྟེན་ནས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། བསོད་ནམས་འདི་ཡིས་སོགས་བསྔོ་སྨོན་ཇི་ལྟར་རིགས་པ་བརྗོད་ལ་སློབ་མ་རྣམས་རང་གནས་སུ་བཏང་ངོ་། །གསུམ་པ་རྗེས་ཀྱི་རིམ་པ་ནི། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ་བ་སོགས་ཕྲིན་ལས་བྱང་བུ་ཁྲིགས་སྡེབས་མཐར་ཆགས་སུ་བཏང་བས་ལེགས་པར་གྲུབ་བོ།། །། ༈ གཉིས་པ་ཐུན་མོང་མ་ཡིན་པའི་གདུལ་བྱ་བརྩོན་ [13a] འགྲུས་ཅན་རྗེས་སུ་འཛིན་པ་ཟབ་དབང་དངོས་བསྐུར་བ་ལ་གསུམ། སྦྱོར་བ་ཤོམ་དང་སྒྲུབ་མཆོད། དངོས་གཞི་དབང་གི་ཆོ་ག །རྗེས་མཐའ་རྒྱས་ཀྱི་ལས་རིམ་མོ། །དང་པོ་ནི། སྟེགས་བུ་ཁེབས་ལྡན་གྱི་དབུས་སུ་དཀྱིལ་འཁོར་སྒོ་རྫོགས་པད་འདབ་བརྒྱད་ལྡན་བྲིས་པའི་རས་དཀྱིལ་བཀྲམ་པའམ། མ་འབྱོར་ན་མཎྜལ་མེ་ཏོག་གི་ཚོམ་བུ་གཅིག་བཀོད་བའི་ཁར་མཉྫིའི་སྟེང་དུ་བུམ་པ་སོ་ལྔའི་བཅུད་ལྡན་ཁ་རྒྱན་མགུལ་ཆིངས་ཀྱིས་སྤྲས་པ་འགོད། དེའི་གཡས་སུ་གསང་ཐོད་ཆང་དང་མངར་གསུམ་ཆོས་སྨན་སྦྱར་བས་བཀང་བའི་ཁ་དར་དམར་བརྒྱད་ལྟེབས་ཀྱིས་བཀབ་པ། གཡོན་དུ་རིག་མའི་གཟུགས་བརྙན། མདུན་དུ་ཤེལ་རྡོ་རྨ་བྱའི་མདོངས་སྒྲོ་མེ་ལོང་སྦྲགས་མ། རྒྱབ་ཏུ་མཆོད་རྫས་སྨན་རཀ་གཏོར་གསུམ། མཐའ་སྐོར་བྱང་ཤར་མཚམས་འཛིན་མེ་ཏོག་ནས་བརྩམས་ཆུ་གཉིས་ཉེར་སྤྱོད་ལྔ་གཡས་བསྐོར་དུ་བཤམ། ཉེ་ལོགས་སུ་སྲད་བུ་དམར་པོའི་སྲུང་སྐུད་རྡོ་རྗེའི་མདུད་པ་བཏབ་པ་སློབ་མའི་གྲངས་མཉམ། གཞན་ཡང་ཚོགས་དང་གཏོར་མ་སོགས་འདིར་དགོས་པའི་ཡོ་བྱད་ཐམས་ཅད་སྔར་བཞིན་ཚང་བར་འདུ་བྱས་ལ། དབང་དོན་སྒྲུབ་མཆོད་ཀྱི་ཚུལ་སྔ་མ་ཁོ་ན་ལྟར་ལས། མཆོད་བརླབ་བྱང་བུ་ནས་དངོས་གཞི་རྟེན་གྱི་བྱང་བུ་སྦྲེལ་ཏེ་བསྟོད་པ་གྲུབ་ཀྱི་བར་དུ་བཏང་། གོང་བཞིན་ཛཔྲ་དམིགས་གསལ་བཏབ་ལ་མཚན་སྔགས་དང་ཨ་སུམ་སྦྲེལ་གྱི་བཟླས་པ་ཅི་འགྲུབ་བྱ། བུམ་བཟླས་ཟུར་དུ་སྤྲོ་ན། བུམ་པ་རང་བྱུང་གི་གཞལ་མེད་ཁང་དུ་རིག་འཛིན་བླ་མའི་ལྷ་ཚོགས་གསལ་བའི་སྐུ་ལས་བདུད་རྩིའི་རྒྱུན་བབས་བུམ་པ་གང་བར་བསམ་ལ། བཟླས་པ་ཅི་ནུས་མཐར། སྟོང་ཚིག་ཕུལ། སྐབས་འདིར་བུམ་ལྷ་འོད་ཞུ་མི་བྱ། དེ་ནས་སྲུང་མའི་ [13b] གཏོར་འབུལ་དང་ཚོགས་མཆོད་ནས་གནང་བ་ནོད་པའི་བར་གོང་བཞིན་བྱའོ། །གཉིས་པ་དངོས་གཞི་དབང་བསྐུར་བ་ནི། སློབ་མ་རྣམས་ཁྲུས་ནས་དབྱུང་། བགེགས་གཏོར་བསྔོས་ལ་ཕྱིར་བསྐྲད་མཐར། ཨོཾ་ཧ་ཧ་ཧཱུྃ་ཧཱུྃ་ཧྲཱིཿཧྲཱིཿཕཊ་ཕཊ༔ ཅེས་བཟླས་པས་བསྔགས་པའི་སྲུང་སྐུད་ཕོའི་དཔུང་པ་གཡོན་དང་མོའི་གཡས་སུ་འཆིང་ལ་སྲུང་འཁོར་གསལ་བཏབ། མཎྜལ་བཀྱེ་བསྡུ་བྱས་ལ། སེམས་བསྐྱེད་གསལ་གདབ་སོགས་ཆོས་བཤད་ལོ་རྒྱུས་སྔར་བཞིན་ལས། སྡེ་གསུམ་སྤྱི་ལ་གཅེས་པ་རིག་འཛིན་བླ་མའི་ཟབ་དབང་ཉི་ཟླའི་རྒྱ་ཅན་གྱི་ཐུན་མོང་མ་ཡིན་པའི་གདུལ་བྱ་བརྩོན་འགྲུས་ཅན་རྗེས་སུ་འཛིན་པ་ཟབ་དབང་དངོས་བསྐུར་བར་བགྱི་བ་ལ། བདག་ཉིད་སློབ་དཔོན་གྱིས་བགྱི་འོས་རྣམས་སྔོན་དུ་གྲུབ་ནས་སོགས་ཀྱི་མཚམས་སྦྱར་ལ་མཎྜལ་འབུལ་དུ་གཞུག །གསོལ་བ་གདབ་པ་ནས་དམ་ཚིག་བསྒྲག་བཟུང་གི་བར་སྔར་བཞིན་སོང་ནས་ཡེ་ཤེས་དབབ་པའི་སྐབས། ཡིད་ཀྱི་གནད་ཚོགས་དྲུག་གི་ཡུལ་ལ་སྐད་ཅིག་ཙམ་མ་ཡེངས་པར་དམིགས་པ་འདི་བཞིན་དུ་མཛོད། སློབ་བུའི་ལུས་སྣང་མི་དམིགས་སྟོང་པའི་ངང་༔ སྐད་ཅིག་དྲན་རྫོགས་ཡེ་ཤེས་སྒྱུ་མའི་སྐུ༔ ཤྲཱི་སེངྷ་རྣལ་འབྱོར་གཞོན་ནུའི་ཚུལ༔ དཀར་དམར་མདངས་ལྡན་ཞལ་གཅིག་ཕྱག་གཉིས་པ༔ གཅེར་བུ་རུས་པའི་རྒྱན་དྲུག་གར་སྟབས་བསྒྱུར༔ རྩ་གསུམ་འཁོར་ལོ་བཞི་ལྡན་ལྟེ་བའི་མདོར༔ གཏུམ་མོ་ཨ་ཤད་དབྱིབས་ཅན་རབ་འབར་བ༔ སྤྱི་བོར་ཐིག་ལེ་ཧཾ་ཡིག་མགོ་ཐུར་བསྟན༔ སྙིང་ [14a] གར་རྣམ་ཤེས་ངོ་བོ་ཨ་དཀར་བསྒོམ༔ སློབ་དཔོན་ཤྲཱི་སེངྷ་ཡབ་ཡུམ་དུ༔ གསལ་ལ་བཟོད་མེད་མོས་གུས་བསྐྱེད་པའི་མཐུས༔ བླ་མའི་སྦྱོར་མཚམས་ལས་ནི་འོད་འཕྲོས་པའི༔ སློབ་མའི་གསང་བ་ནས་ཞུགས་གཏུམ་མོ་སྦར༔ སྤྱི་བོའི་ཐིག་ལེ་ཞུ་ཞིང་གསལ་བ་ལས༔ ལུས་ཀྱི་སྟོད་སྨད་དྭངས་མ་དཀར་དམར་གྱིས༔ གང་ཞིང་སྙིང་གའི་ཐད་དུ་གོ་སྐབས་ཅན༔ བདེ་བ་བསྒོམ་ཞིང་བདེ་བ་ཆེར་འཕེལ་ཚེ༔ དཀར་དམར་འདྲེས་ཤིང་ཨ་ཡིག་ལ་ཐིམས་པས༔ ཐིག་ལེ་ཆེར་འཕེལ་བདེ་བ་ཆེན་པོར་བསྒོམ༔ རྒྱལ་བའི་ཚོགས་རྣམས་བདེ་བ་ཆེན་པོར་ཞུར༔ བདུད་རྩིའི་རང་བཞིན་སྤྱི་བོའི་གཙུག་ནས་བྱུང་༔ སྙིང་གི་ནང་ཞུགས་ལུས་ཀུན་མེར་གྱིས་ཁེངས༔ བདེ་བ་ཆེན་པོའི་ཡེ་ཤེས་རྩེ་གཅིག་བསྒོམ༔ ཞེས་བརྡ་སྤྲད་ལ་སྦྱར་སྤོས་བཏུལ་ཞིང་ཌཱ་དྲིལ་རོལ་མོའི་སྒྲ་དང་བཅས་རྩ་སྔགས་དང་ཨ་སུམ་སྦྲེལ་མང་དུ་བཟླས་པས་བྱིན་དབབ་ལ་གོང་བཞིན་བརྟན་པར་བྱ། དེ་ནས་དངོས་གཞིའི་དབང་རྣམས་རིམ་པར་འབྱུང་བའི་དང་པོ་བུམ་པའི་དབང་གི་སླད་དུ་དམིགས་པ་འདི་བཞིན་དུ་མཛོད། བུམ་ནང་ཤྲཱི་སེངྷའི་སྤྱི་བོ་ཡི༔ ཨོཾ་ཡིག་གསལ་ཞིང་ཡབ་ཡུམ་སྦྱོར་བ་ཡིས༔ ཨོཾ་ལས་དགའ་བའི་བདུད་རྩི་དཀར་གསལ་ [14b] བབས༔ སྐུ་གང་སྦྱོར་མཚམས་ནས་བབས་བུམ་པ་གང༔ ཁ་ནས་ལུད་ཅིང་སློབ་མའི་སྤྱི་བོར་བབས༔ བདེ་ཆེན་འཁོར་ལོའི་རྩ་ཁེངས་བདེ་ཆེན་བསྒོམ༔ དེ་བཞིན་མགྲིན་དང་ཐུགས་ཀའི་ཨཱཿཧཱུྃ་ལས༔ བདུད་རྩི་དམར་མཐིང་དགའ་ཆེན་ཁྱད་དགའ་ཡི༔ ངོ་བོ་བབས་ཤིང་སློབ་མའི་མགྲིན་པ་དང་༔ སྙིང་ག་གང་བས་བདེ་མཆོག་རྒྱས་པར་བསྒོམ༔ དེ་རྗེས་ལྟེ་བའི་ཧྲཱིཿལས་ལྷན་སྐྱེས་ཀྱི༔ བདུད་རྩི་བབས་ཤིང་སློབ་མའི་ལྟེ་བ་ཁེངས༔ སྐུ་ཡི་གནས་རྣམས་མ་ལུས་ཐམས་ཅད་ནི་༔ བདུད་རྩི་འོད་ལྔའི་མདངས་ལྡན་བབས་པ་ཡིས༔ སློབ་མའི་ལུས་གང་བདུད་རྩི་གྱེན་འཁྱིལ་བས༔ སྤྱི་གཙུག་རྡོ་རྗེ་སེམས་དཔས་རྒྱས་བཏབ་མོས༔ རྣམ་བུམ་ཐོགས་ལ། ཧཱུྃ༔ རང་བྱུང་བདེ་བ་ཆེན་པོའི་བུམ་པ་རུ༔ ལྷན་ཅིག་སྐྱེས་པའི་བླ་མ་ཡབ་ཡུམ་བཞུགས༔ བདེ་ཆེན་སྦྱོར་བའི་བདུད་རྩི་བསམ་མི་ཁྱབ༔ རང་གྲོལ་བདེ་ཆེན་ཡེ་ཤེས་བསྐྱེད་པའི་ཕྱིར༔ བླ་ན་མེད་པ་བུམ་པས་དབང་བསྐུར་རོ༔ རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔ ཞེས་བུམ་པ་གནས་བཞིར་བཞག་ཅིང་བུམ་ཆུ་སྦྱིན། དེས་བུམ་པ་ལ་བརྟེན་པའི་དབང་བཞི་ཆིག་རྫོགས་སུ་ཐོབ་པ་ཡིན་ནོ། །གཉིས་ [15a] པ་གསང་བའི་དབང་གི་སླད་དུ་དམིགས་པ་འདི་བཞིན་དུ་མཛོད། སློབ་དཔོན་ཡབ་ཡུམ་ཤྲཱི་སེངྷ་ནི༔ མཉམ་པར་སྦྱོར་བའི་སྤྱི་མགྲིན་སྙིང་ལྟེ་བཞིར༔ ཡིག་འབྲུ་ཨོཾ་ཨཱཿཧཱུྃ་ཧྲཱིཿགསལ་བ་ལས༔ དགའ་བཞིའི་ངོ་བོ་འོད་ཟེར་དཀར་དམར་མཐིང་༔ སེར་པོ་བདུད་རྩིའི་རང་བཞིན་ཡོངས་རྫོགས་བབ༔ སློབ་མའི་ཁར་སྦྱིན་རྩ་བཞི་ལུས་ཀུན་གང་༔ བདེ་ཆེན་བཞི་དང་ཡོངས་རྫོགས་ཐོབ་པར་བསྒོམ༔ གསང་ཐོད་བདུད་རྩི་ཐོགས་ལ། ཧཱུྃ༔ ཡུལ་སྣང་རྣམ་པར་དག་པའི་ཐོད་པ་རུ༔ རྣམ་པར་དག་པའི་དབང་པོ་སྦྱོར་བ་ཡིས༔ རྣམ་ཤེས་ཡེ་ཤེས་བསྒྱུར་བའི་བྱང་སེམས་བསྐྱིལ༔ ཀུན་གཞི་རྣམ་པར་གྲོལ་ཕྱིར་དབང་བསྐུར་རོ༔ རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔ ཞེས་ཐོད་པ་གནས་བཞིར་བཞག་ཅིང་བདུད་རྩི་སྦྱིན། དེས་ཐོད་པའི་བདུད་རྩི་ལ་བརྟེན་པའི་དབང་བཞི་ཆིག་རྫོགས་སུ་ཐོབ་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་གི་སླད་དུ་དམིགས་པ་འདི་བཞིན་དུ་མཛོད། སློབ་མ་རིག་མ་བླ་མ་ཡབ་ཡུམ་གསལ༔ འདུ་ཤེས་གསུམ་གྱིས་སྙོམས་པར་འཇུག་ལ་བསླབ༔ ཡབ་ཡུམ་གནས་བཞིར་ཡིག་འབྲུ་བཞི་གསལ་བ༔ [15b] དེ་ལས་རིམ་བཞིན་ཐིག་ལེ་འཕེལ་བ་ཡང་༔ རྩ་བཞི་ལ་བབས་གྱེན་དུ་དྲངས་པ་ཡིས༔ དགའ་བཞི་ཡོངས་རྫོགས་ཉིད་དུ་བསྒོམ་པར་བྱ༔ རིག་ཙཀ་ཐོགས་ལ། ཧཱུྃ༔ སྣང་ཞིང་སྟོང་ལ་གསལ་བའི་རིག་མ་ལ༔ མི་རྟོག་ངང་དུ་མཉམ་པར་སྦྱོར་བ་ལས༔ བདེ་བའི་ཡེ་ཤེས་ནམ་མཁའ་གང་བར་འཕེལ༔ དབྱེར་མེད་ལྷུན་གྲུབ་ཆེན་པོར་རྟོགས་པར་ཤོག༔ རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔ ཞེས་ལག་གཡོན་དུ་གཏད། དེས་གསང་བ་བྷ་གའི་དཀྱིལ་འཁོར་ལ་བརྟེན་པའི་དབང་བཞི་ཆིག་རྫོགས་སུ་ཐོབ་པ་ཡིན་ནོ། །དེ་ནས་དབང་བཞི་པའི་སླད་དུ། རང་བྱུང་རྡོ་རྗེ་སེམས་དཔའི་མེ་ལོང་འདིས་མཚོན་ཏེ་སེམས་ཉིད་ཟང་ཐལ་ངོ་བོ་ཀ་ནས་དག་པ་ཤེལ་ལྟ་བུ་ལས། རང་བཞིན་ལྷུན་གྲུབ་ཀྱི་ཡོན་ཏན་འཇའ་ཚོན་ལྟར་ཅིར་ཡང་འཆར་ཞིང་། ཐུགས་རྗེ་རྣམ་འཕྲུལ་འགག་མེད་སྣ་ཚོགས་སུ་སྣང་ཡང་དབྱིངས་ལ་འགྱུར་བ་མེད་པའི་དོན་རྟོགས་པར་མཛོད་ཅིག །མན་ཤེལ་བསྟན་ལ། ཧཱུྃ༔ ཕྱི་ནང་ཟང་ཐལ་ཀ་ནས་དག་པ་ལ༔ ལྷུན་གྱིས་གྲུབ་པའི་འཇའ་ཚོན་ཅི་ཡང་འཆར༔ རྣམ་པར་འཕྲུལ་པའི་བྱེ་བྲག་ཅིར་སྣང་ཡང་༔ རང་བྱུང་དབྱིངས་ལས་འགྱུར་བ་མེད་པའོ༔ རྩ་སྔགས་མཐར། [16a] ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔ རྨ་བྱའི་མདོངས་ཐིག་མེ་ལོང་དུ་འཆར་བ་འདིས་མཚོན་ཏེ། ཀ་དག་གི་ངོ་བོ་དབྱིངས་རྣམ་དག་མེ་ལོང་དྭངས་པ་ལྟ་བུའི་རང་བཞིན་ལ། རིག་པ་ཐིག་ལེ་ལུག་རྒྱུད་གསལ་བ་མདོངས་ཐིག་ལྟ་བུ་རང་ལས་འབྱུང་ཞིང་རང་ཤར་བ་སྣང་སྟོང་གཉིས་མེད་རང་གདངས་ལྷུན་གྲུབ་ཏུ་ཤེས་པར་མཛོད་ཅིག །རྨ་བྱའི་མདོངས་སྒྲོ་མེ་ལོང་དུ་འཆར་བ་བསྟན་ལ། ཨ༔ དབྱིངས་ནི་རྣམ་པར་དག་པའི་རང་བཞིན་ལ༔ ཐིག་ལེ་གསལ་བའི་སྒྲོན་མ་རང་ལས་བྱུང༔ གཉིས་སུ་མེད་པའི་རང་གདངས་ངོ་མཚར་ཅན༔ ལྷུན་གྱིས་གྲུབ་པའི་ངང་དུ་བལྟ་བར་བྱ༔ རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨབྷི་ཥིཉྩ་ཧཱུྃ༔ ཁྱེད་རང་རྣམས་སྒོ་གསུམ་མ་བཅོས་ལྷུག་པར་ཀློད་ལ་ལྟ་སྟངས་གཡོ་བ་མེད་པས་མདུན་གྱི་ནམ་མཁའི་དབྱིངས་ལ་རང་བབས་སུ་ལྟོས་ཤིག །ཧཱུྃ༔ ཕྱི་ནང་དབྱིངས་རིག་གཉིས་སུ་མེད་པ་ལ༔ གཉིས་སུ་འཛིན་པའི་ཀུན་བརྟག་བློ་ལས་འདས༔ ཆོས་དབྱིངས་ཁྱབ་བརྡལ་འོད་གསལ་ཟང་ཐལ་ལེ༔ འདི་ཞེས་བརྗོད་ཚིག་བྲལ་བར་དབྱིངས་རིག་བསྲེས༔ རྩ་སྔགས་མཐར། ཨ་ཨ་ཨ༔ སེམས་དུས་གསུམ་གྱི་རྟོག་པས་མ་ [16b] བསླད་པར་ཐ་མལ་གྱི་ཤེས་པ་སོར་བཞག་རང་བབས་གཉུག་མའི་གཤིས་ལུགས་དེ་ཁོ་ན་ཉིད་ཀྱི་ངང་དུ་མཉམ་པར་ཞོག་ཅིག །ཧཱུྃ༔ ཡེ་ནས་རྣམ་པར་དག་པའི་གཞི་ཐོག་ཏུ༔ བྱ་རྩོལ་བྲལ་བའི་བདེ་ཆེན་མཐར་ཕྱིན་ནས༔ འབྲས་བུ་རང་ལས་རྙེད་པ་ངོ་མཚར་ཆེ༔ དོན་དམ་དམིགས་མེད་མྱོང་བ་ངོས་བཟུང་བྲལ༔ ངོ་བོ་རང་བཞིན་ཐུགས་རྗེ་རྣམ་པ་གསུམ༔ དབྱེར་མེད་མི་ཕྱེད་དབྱིངས་རིག་གཉིས་སུ་མེད༔ མཐར་ཐུག་འབྲས་བུའི་ས་ལ་ཕྱིན་པའོ༔ རྩ་སྔགས་མཐར། དྷརྨ་ཀཱ་ཡ་ཨ༔ ཞེས་ཅུང་ཟད་མཉམ་པར་བཞག། དེས་དོན་དམ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་པའི་མཐར་ཐུག་ཚིག་གི་དབང་ཆེན་རབ་འབྱམས་ཆིག་རྫོགས་སུ་ཐོབ་པ་ཡིན་ནོ། །དེ་ནས་གོང་བཞིན། ནམ་མཁའ་གང་བའི་རྩ་གསུམ་སོགས་ཀྱིས་མཚམས་སྦྱར་ལ་ཤིས་བརྗོད་གང་འོས་བྱ། དེ་ལྟ་ན་དེ་དག་རྣམས་ཀྱི་སྒོ་ནས་ཇི་སྐད་དུ། དེ་ལྟར་རྣམ་པ་ཉི་ཤུས་བྱང་ཆུབ་པའི༔ བདེ་བ་ཆེན་པོའི་ཟབ་དབང་བསྐུར་བ་ནི༔ ཀུན་ལ་མ་ཡིན་བློ་ཆེན་ལྡན་ལ་གཏད༔ ཅེས་ཤིན་ཏུ་ཟབ་ཅིང་རབ་ཏུ་གཅེས་པའི་གཙིགས་སུ་བསྔགས་པར་མཛད་པ་བླ་མའི་ཟབ་དབང་ཉི་ཟླའི་རྒྱ་ཅན་ཐུན་མོང་མ་ཡིན་པ་ཉིད་ལེགས་པར་ཐོབ་པ་ལགས་སོགས་ཀྱི་མཚམས་ [17b] སྦྱར་ཏེ་དམ་ཚིག་ཁས་ལེན། གཏང་རཀ་མཎྜལ་ལུས་ལོངས་སྤྱོད་དབུལ་བ། དགེ་བསྔོ་བཅས་ཀྱི་སློབ་མ་རྣམས་གྲོལ། གསུམ་པ་རྗེས་ཀྱི་རིམ་པ་ནི། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ་བ་སོགས་ཆོ་གའི་རྗེས་ཀྱི་བྱ་བ་རྣམས་མཐར་ཆགས་སུ་བཏང་བས་གྲུབ་བོ། །རང་གནས་སྐུ་བཞིའི་ཡེ༵་ཤེ༵ས་ཉིད། །སད་བྱེད་རྡོ༵་རྗེ༵འི་གཏོར་བླུགས་ཀྱི། །ཆོ་ག་ཟབ་དབང་བདུད་རྩིའི་སྐྱེས། །སྐལ་བཟང་འདོད་འཇོའི་དཔྱིད་དུ་གྲུབ། །སྡེ་གསུམ་སྤྱི་ལ་གཅེས་པ་ཟབ་དབང་ཉི་ཟླའི་རྒྱ་ཅན་གྱི་ལེའུ་ཚན་ནོ།། །།


[18a] སྭསྟི། མི་འགྱུར་ཡེ་ཤེས་གཅིག་ཉིད་ལས། །གང་འདུལ་སྒྱུ་འཕྲུལ་དྲ་བའི་གར། །རིག་འཛིན་རྒྱ་མཚོར་གུས་བཏུད་ནས། །གང་དེའི་དགོངས་ཉམས་རྩལ་དབང་དབྱེ། །རྫོགས་པ་ཆེན་པོ་སྡེ་གསུམ་ལས་ཕྱི་སྐོར་སེམས་སྡེའི་བླ་མ་འགྲོ་འདུལ་སུམ་ཅུ་རྩ་གཅིག་གི་རྩལ་དབང་བསྐུར་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། མདུན་དཀྱིལ་རས་བྲིས་སྤྱི་མཐུན་ནམ་མཎྜལ་ལ་མེ་ཏོག་གི་ཚོམ་བུ་ལྷ་གྲངས་འཀོད་པའི་ཁར་འཕྲུལ་སྟེགས་ལ་གྲུབ་ཐོབ་སུམ་ཅུ་རྩ་གཅིག་གི་སྐུ་འབག་བཤམ། ཕྱི་ནང་གི་མཆོད་པ་གང་འབྱོར་དང་། ཚོགས་ཀྱི་ཡོ་བྱད་སོགས་ཆོ་གར་འོས་པའི་རིགས་རྣམས་འདུ་བྱས་ལ། བླ་མའི་བསྐྱེད་རིམ་བྱང་བུ་ཁྲིགས་སྡེབས་ཀྱི་གཞུང་བསྲང་ནས་བཟླས་པ་ཅི་འགྲུབ་དང་ཚོགས་མཆོད་རྒྱས་པར་བྱ། རྣམ་བུམ་བསྒྲུབ་པ་མི་དགོས་ཤིང་། ལས་བུམ་རྡོར་སེམས་བསྐྱེད་བཟླས་ཀྱིས་བྱིན་བརླབ་བོ། །གཉིས་པ་སྒྲུབ་དབང་དངོས་ནི། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ལ་སྲུང་འཁོར་བསྒོམ། མཎྜལ་བཀྱེ་བསྡུ་དང་། སེམས་བསྐྱེད་གསལ་བཏབ་ལ་ལོ་རྒྱུས་ཀྱི་ཁྱད་པར། དེ་ལ་འདིར་སྐབས་སུ་བབས་པའི་འཆད་བྱ་གསང་སྔགས་སྔ་འགྱུར་བའི་རང་སྐད་ཐུན་མིན་བླ་མེད་ཡོ་ག་སྐོར་གསུམ་ཞེས། ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་པའི་ཆོ་འཕྲུལ་དུ་རྟོགས་པས་ཐབས་བསྐྱེད་པའི་རིམ་པ་དང་སྤྱོད་པ་གཙོ་བོར་བརྟེན་པ་རྒྱུད་མ་ཧཱ་ཡོ་ག །ཆོས་ཐམས་ཅད་སེམས་ཉིད་དབྱིངས་ཡེ་གཉིས་སུ་མེད་པས་རྩལ་དུ་རྟོགས་པས་ཤེས་རབ་རྫོགས་པའི་རིམ་པ་ [18b] དང་ཏིང་ངེ་འཛིན་གཙོ་བོར་བརྟེན་པ་ལུང་ཨ་ནུ་ཡོ་ག །ཆོས་ཐམས་ཅད་ཡེ་ནས་སྐྱེ་འགག་མེད་པར་རང་བྱུང་གི་ཡེ་ཤེས་རང་སྣང་བར་རྟོགས་པས་ཡེ་ཐོག་ཏུ་གྲོལ་བར་བྱེད་པའི་ཐབས་སྤང་བླང་རེ་དོགས་དང་བྲལ་བས་ལྟ་བ་ལ་གཙོ་བོར་བརྟེན་པ་རྫོགས་པ་ཆེན་པོ་ཨ་ཏི་ཡོ་ག་སྟེ། དེ་ལྟར་བསྐྱེད་རྫོགས་རྣམ་པ་གསུམ་དུ་དབྱེ་བ་ལས་འདིར་མན་ངག་རྫོགས་པ་ཆེན་པོ། དེའང་སྤྲོས་བྲལ་རང་བྱུང་གི་ཡེ་ཤེས་རྒྱ་ཆད་ཕྱོགས་ལྷུང་མེད་པ་ཐེག་པ་ཀུན་གྱི་དོན་ཐམས་ཅད་ཡོངས་སུ་རྫོགས་པས་རྩེ་མོར་གྱུར་པ་སྟེ། ཀུན་བྱེད་རྒྱལ་པོ་ལས། གཅིག་རྫོགས་གཉིས་རྫོགས་སེམས་སུ་རྫོགས། །གཅིག་རྫོགས་སེམས་ཀྱི་བྱས་པར་རྫོགས། །གཉིས་རྫོགས་ཕུན་སུམ་ཚོགས་པར་རྫོགས། །ཀུན་རྫོགས་བྱང་ཆུབ་སེམས་སུ་རྫོགས། །ཞེས་གསུངས། དེ་ན་མ་ཧཱ་དང་ཨ་ནུ་མན་ཆད་ཐམས་ཅད་རྩོལ་སྒྲུབ་ཀྱི་བླང་དོར་བྱས་པས་རེ་དོགས་ཀྱི་དྲི་མས་རང་བྱུང་གི་ཡེ་ཤེས་ལ་སྒྲིབ་པའི་ཕྱིར་རྫོགས་ཆེན་གྱི་གོལ་སར་བཤད་དེ། ནམ་མཁའ་དང་མཉམ་པའི་རྒྱུད་ལས། མ་ཧཱ་རྡོ་རྗེ་འཆང་འདོད་པས། །ཐབས་དང་ཤེས་རབ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་སྒྲུབ་རྣམ་བཞིས་སྒྲུབ་པར་བྱེད། ཨ་ཏི་ཡོ་གའི་བདེ་ཆེན་ནི། །རྩོལ་སྒྲུབ་འདས་པའི་བྱང་ཆུབ་སེམས། ། [19a] རྩོལ་སྒྲུབ་འདས་པ་མ་ཧཱས་སྒྲིབ། །རྫོགས་ཆེན་རྩོལ་སྒྲུབ་བྱེད་པ་ནི། །མ་ཧཱ་ཡོ་གར་གོལ་བར་བཤད། །ཨ་ནུ་དབྱེར་མེད་ས་འདོད་པ། །དབྱིངས་དང་ཡེ་ཤེས་སྒོར་ཞུགས་ནས། །འདི་ལྟར་སྣང་བའི་ཆོས་རྣམས་ལ། །རྒྱུ་ནི་དག་པའི་དབྱིངས་ལྟ་བ། །འབྲས་བུ་ཡེ་ཤེས་དཀྱིལ་འཁོར་ལྷ། །ཨ་ཏི་ཡོ་གའི་བདེ་ཆེན་ནི། །རྒྱུ་འབྲས་འདས་པའི་བྱང་ཆུབ་སེམས། །རྒྱུ་འབྲས་འདས་པ་ཨ་ནུས་སྒྲིབ། །རྫོགས་ཆེན་རྒྱུ་འབྲས་གཉིས་ལྟ་ན། །ཨ་ནུ་ཡོ་གར་གོལ་བར་བཤད། །ཅེས་གསུངས། རྒྱུ་མཚན་དེའི་ཕྱིར་ཨ་ཏི་ཡོ་ག་ནི་བྱ་རྩོལ་དང་བྲལ་བའི་ཡེ་ཤེས་ལ་དབང་བསྒྱུར་བ་སྟེ། ཀུན་བྱེད་ལས། ཀྱེེ་སེམས་དཔའ་ཆེན་པོ། རྫོགས་པ་ཆེན་པོའི་ལྟ་སྤྱོད་ནི། །རྒྱུ་འབྲས་སྒྲུབ་དང་མི་འདྲ་སྟེ། །ལྟ་སྤྱོད་བྱང་ཆུབ་སེམས་འདི་ནི། །ནམ་མཁའ་ལྟ་བུའི་རང་བཞིན་ཏེ། །ནམ་མཁའ་ལ་ནི་རྟོག་དཔྱོད་འདས། །ཞེས་སོགས་རྒྱ་ཆེར་གསུངས་ཤིང་། ནམ་མཁའ་ཆེ་ལས་ཀྱང་། རང་བྱུང་ཡེ་ཤེས་རྩོལ་མེད་ལས། །གྲོལ་ནས་གྲོལ་བའི་ལམ་ཡང་སྟོན། །ཞེས་གསུངས། རྫོགས་པ་ཆེན་པོ་དེ་ལ་དབྱེ་ན། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། ། [19b] རིམ་རྩོལ་བྲལ་ལ་མན་ངག་སྡེ། །ཞེས་པས། སེམས་སྡེ་ཀློང་སྡེ་མན་ངག་གི་སྡེ་དང་གསུམ་ལས་འདིར་སེམས་སྡེ། དེ་ལ་སྔ་འགྱུར་དང་ཕྱི་འགྱུར་བཅུ་གསུམ་སྟེ་མ་བུ་བཅོ་བརྒྱད་དུ་གནས་པའི་རྒྱུད་ཀྱི་དགོངས་པའི་ཉིང་ཁུ་ཟབ་མོ་སྟེ། དེ་ལའང་རིང་བརྒྱུད་བཀའ་མ་དང་། ཉེ་བརྒྱུད་གཏེར་མ་གཉིས་སུ་བཞུགས་པ་ལས། འདིར་ཤིན་ཏུ་ཟབ་པ་ཉེ་བརྒྱུད་གཏེར་མ། ཀུན་བཟང་རྡོ་རྗེ་སེམས་དཔའི་ཐུགས་བཅུད། སངས་རྒྱས་གཉིས་པ་པདྨ་ཀ་རའི་མན་ངག །བོད་ཡུལ་ས་འོག་ཀུན་གྱི་གཏེར་གཅིག་སྔ་ན་མེད་པའི་ངོ་མཚར་རྨད་དུ་བྱུང་བ། ཟབ་ཆོས་རྫོགས་པ་ཆེན་པོ་སྡེ་གསུམ་གྱི་ནང་ཚན་ཕྱི་སྐོར་སེམས་སྡེའི་རིག་འཛིན་བླ་མ་འགྲོ་འདུལ་སུམ་ཅུ་རྩ་གཅིག་གི་བྱིན་རླབས་རྩལ་དབང་ཟབ་མོ་སྒྲུབ་པ་སྐབས་སུ་བབ་པ་ཡིན། དེ་ལ་བདག་ཉིད་སློབ་དཔོན་གྱིས་བགྱི་བར་འོས་པ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག། སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས། ཟུང་འཇུག་དགོངས་པ་བརྙེས་པ་ཡི༔ འགྲོ་འདུལ་སུམ་ཅུ་རྩ་གཅིག་གི༔ བྱིན་རླབས་བརྩེ་བས་གནང་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་བསྐུར་ཐོབ་བྲལ་བའི་དབང་བསྐུར་ཡེ་ནས་རང་ལ་རྫོགས་པར་གདམས་པའི་སྒོ་ནས་ལན་སྦྱིན་ [20a] པ་འདི་ལ་གསན་པས་ཁྱབ་སྟེ། སྤྱིར་ནི་འགྲོ་འདུལ་ལྔ་བཅུ་རྩ་བརྒྱད་པོ༔ ཐམས་ཅད་ཟུང་འཇུག་མངོན་གྱུར་ཀུན་ཏུ་བཟང་༔ དགོངས་པ་རང་བྱུང་ནམ་མཁའི་རྣལ་འབྱོར་ཚོགས༔ ཡེ་ཤེས་སྐུ་ཅན་འཁོར་འདས་ཡོངས་ལ་ཁྱབ༔ བཞུགས་ཡུལ་ཞིང་ཁམས་གཞན་དུ་བཙལ་མི་འཚལ༔ ད་ལྟའི་ནམ་མཁའ་འདིར་ཡང་རྣལ་འབྱོར་རྣམས༔ རང་གི་སེམས་ཉིད་འདི་ལའང་བླ་མས་ཁྱབ༔ བསྐུར་བྱ་བསྐུར་ཐོབ་སྒྲུབ་དང་སྒྲུབ་ཐབས་མེད༔ རྣལ་འབྱོར་ལྟ་བའི་ངང་ལ་སྒྲུབ་དབང་རྫོགས༔ ཞེས་དང་། དེ་ལ་རང་གནས་ཡེ་ཤེས་ཀྱི་ཚོགས་བསགས་པའི་ཆེད་དུ་ལྟ་བའི་རྒྱལ་པོ་ཡས་འབུབ་ཀྱི་མཆོད་པ་འབུལ་བར་གདམས་པ་སྟེ། ཨེ་མ་ཧོ་བདེ་གཤེགས་བླ་མ་རྣམས༔ བསམ་གྱིས་མི་ཁྱབ་ཆོས་ཉིད་ཀློང་༔ ཀུན་ཏུ་བཟང་པོའི་རྣལ་འབྱོར་ནི༔ ལྟ་བའི་རྒྱལ་པོའི་མཆོད་པ་འབུལ༔ དེའང་རང་རིག་གདོད་ནས་རྣམ་པར་དག་པ་རིག་རྩལ་བླ་མའི་ལྷ་ཚོགས་རྣམས་ཀྱི་སྤྱན་སྔར་གནས་ལུགས་ལྟ་བ་མཇལ་བའི་ཕྱག་འཚལ་ཞིང་གང་ཤར་ཆོས་ཉིད་རྒྱན་དུ་རིག་བའི་མཆོད་པ་འབུལ་བ་སྔོན་དུ་འགྲོ་བས། གློ་བུར་འཁྲུལ་པའི་མུན་ཁུང་བརྟོལ་ཏེ་འོད་གསལ་སྣང་བའི་དགའ་སྟོན་སྩོལ་བར་གསོལ་བ་གདབ་པ་འདིའི་རྗེས་ [20b] ཟློས། གདོད་ནས་དག་པའི་ཀུན་བཟང་བླ་མ་ལ༔ མཚན་འཛིན་འཁྲུལ་པའི་བསྐང་བཤགས་མི་འཚལ་ཞིང༔ གཉིས་སུ་འཛིན་པའི་ཕྱག་འཚལ་མོས་གུས་བྲལ༔ དེ་བས་རང་རིག་ཀློང་དུ་ཕྱག་འཚལ་ལོ༔ གཉིས་སུ་མེད་པའི་མཆོད་སྤྲིན་རྒྱ་མཚོས་མཆོད༔ བསམ་ལས་འདས་པའི་ངང་དུ་ཐུགས་དམ་བསྐང་༔ བརྗོད་མེད་བརྗོད་པ་ཐམས་ཅད་མཐོལ་ལོ་བཤགས༔ ཨེ་མ་ཧོ་བདེ་གཤེགས་བླ་མ་རྣམས༔ ཀུན་བཟང་དགོངས་ཀློང་སེམས་སུ་རྫོགས་པ་ལ༔ ཕྱི་ནང་གཉིས་མེད་སྤྲོས་པའི་མཐའ་ལས་འདས༔ ཆོས་དབྱིངས་ཀློང་ཆུབ་ངང་དུ་ཕྱག་འཚལ་ལོ༔ ཨེ་མ་ཧོ་རང་རིག་བླ་མ་རྣམས༔ འཁོར་འདས་ཐམས་ཅད་ས་ལེར་མཐོང་བ་ལ༔ གཉིས་སུ་མེད་པས་དབྱིངས་སུ་ལྷུན་རྫོགས་པས༔ མཐོང་བྱ་མཐོང་མཁན་མེད་ལ་ཕྱག་འཚལ་ལོ༔ ཨེ་མ་ཧོ་བདེ་གཤེགས་བླ་མ་རྣམས༔ ཕྱི་ནང་ནམ་མཁའ་ཀུན་ལ་སྐུ་ནི་ཡོངས་སུ་ཁྱབ་པ་ཉིད༔ བཞུགས་པའི་ཡུལ་ནི་ཕྱོགས་བཅུའི་འཇིག་རྟེན་དགན་མཆིས༔ གློ་བུར་དྲི་མེད་རྣམ་རྟོག་བསལ་ཕྱིར་གཟུགས་སྐུར་བཞེངས་པ་རྣམས༔ མཚན་འཛིན་འཁྲུལ་པ་འདི་དག་མྱུར་དུ་བསལ་བར་མཛད་དུ་གསོལ༔ ཞེས་གསོལ་བ་བཏབ། སློབ་དཔོན་གྱིས་རིག་འཛིན་ [21a] བླ་མ་རྣམས་ལ་ཐུགས་དམ་བསྐུལ་བའི་སླད་དུ་གསོལ་བ་གདབ་པར་བྱ་བ་ཡིན་ཏེ། ཨེ་མ་ཧོཿ བདེ་གཤེགས་བླ་མ་འགྲོ་འདུལ་ལྔ་བཅུ་རྩ་བརྒྱད་རྣམས༔ དམིགས་མེད་ཆོས་ཀྱི་སྐུ་ལས་ད་ལྟ་བཞེངས་སུ་གསོལ༔ ཕྱི་སྐོར་བླ་མ་སུམ་ཅུ་རྩ་གཅིག་སྣང་བར་མཛོད༔ ཡེ་ཤེས་སྐུ་ཡི་སློབ་མར་བྱིན་རླབས་དབང་ཆེནད་ལྟ་བསྐུར་དུ་གསོལ༔ ཞེས་གསོལ་བ་བཏབ། སློབ་དཔོན་ཉིད་རིག་འཛིན་བླ་མའི་སྐུར་བཞུགས་པའི་དྲུང་དུ། ཁྱེད་རང་རྣམས་ཀྱང་རིག་འཛིན་བླ་མ་སུམ་ཅུ་རྩ་གཅིག་གི་སྐུ་འདི་བཞིན་དུ་གསལ་ཐོབ་ཅིག །ལྟ་བ་རང་བཞིན་དགོངས་ཀློང་མཁར༔ ཞེས་སོགས་རྟེན་གྱི་བྱང་བུ་མཐར་ཆགས་སུ་བཏང་ནས། བྱིན་རླབས་འོད་ཕུང་འབར་བར་བསམ༔ དེ་ལྟར་གསལ་བཞིན་པ་ལ་རིག་འཛིན་བླ་མ་རྣམས་ཀྱིས་དོ་ཧ་རྡོ་རྗེའི་གླུ་དགོངས་པ་མི་གཡོ་བའི་ངང་ནས་བླངས་པ་དང་ཆབ་གཅིག་རང་འདྲའི་སྐུ་གཉིས་པ་རེ་བྱུང་སྤྱི་བོ་ནས་ཐིམ་པས་སྐུའི་བྱིན་རླབས་དང་། རྡོ་རྗེའི་བཟླས་བ་བྱ་བ་གསུང་གི་བྱིན་རླབས་དང་། རིག་འཛིན་བླ་མ་རྣམས་རང་རིག་ཏུ་རྫོགས་པའི་ངང་དུ་མཉམ་པར་བཞག་པ་ཐུགས་ཀྱི་བྱིན་རླབས་ཡིན་པས། ཁྱེད་རང་རྣམས་དགོངས་པ་སྐྱེ་མེད་ཀྱི་ངང་ལས་མ་གཡོས་བཞིན་དུ་གྲགས་སྟོང་རྡོ་རྗེའི་གླུ་བླངས་པ་འདི་ལ་སྙན་གྱི་ [21 བ། དབང་པོ་རྩེ་གཅིག་ཏུ་གཏོད་པར་ཞུ། ཤྲཱི་སེངྷའི་སྐུ་ཙཀ་ཐོགས་ལ། སློབ་དཔོན་ཤྲཱི་སེང་ཧས་བསམ་གཏན་གྱི་ཁང་བུར་རྡོ་རྗེའི་གླུ་ཕྱི་མ་བླངས་པའི་འདི་སྐད་དོ། །ཇི་ལྟར་བསམ་ཡང་མི་རྟོགས་ངང༔ ཇི་ལྟར་སྨྲས་ཀྱང་སྒོམ་པ་མེད༔ སྣང་སྲིད་ཆོས་ཀུན་ཡེ་ཤེས་ངང་༔ ཡེ་ཤེས་བཙལ་དུ་མེད་པ་འདི༔ རང་བྱུང་རང་ཤར་ཐལ་ལེ་བ༔ ང་ནི་དེང་ཕྱིན་གཞི་ལ་གནས༔ གཞི་ནི་མ་བཅོས་ལྷུག་པར་འདུག༔ མཚན་ཉིད་ཀུན་ལྡན་འོད་གསལ་བ༔ ཅིར་ཡང་མ་ཡིན་ཅིར་ཡང་རྟོགས༔ ལྟ་བ་མཐར་ཕྱིན་ཤྲཱི་སེང་༔ སྒོམ་པའི་བློ་དང་བྲལ་འདོད་ནས༔ གསལ་བ་འདི་ལ་ལམ་བྱས་པས༔ གཏད་སོ་མེད་པའི་ཉམས་ཞིག་ཤར༔ རྒྱུན་ཆད་མེད་པའི་ཤྲཱི་སེང་༔ སྤྱོད་པ་སྤྱད་དུ་འདུག་གམ་བལྟས༔ ཅི་བྱས་ཐམས་ཅད་བདེ་བ་ཆེ༔ གང་བྱུང་ཐམས་ཅད་དགའ་བའི་ངང་༔ ཟུང་འཇུག་མངོན་གྱུར་ཤྲཱི་སེང་༔ འབྲས་བུ་ཐོབ་པར་བྱ་བའི་ཕྱིར༔ གཞི་ཡི་སྟེང་དུ་མཉམ་པར་བཞག༔ འཇམ་དཔལ་བཤེས་གཉེན་གདམས་བ་སྟེ༔ སེམས་ཀྱི་ཀློང་ནས་གཏེར་དུ་རྙེད༔ རྣམ་ཤེས་ཡུལ་དབང་ཀུན་གཞི་རྣམས༔ སོ་སོར་དབྱེར་མེད་དམིགས་སུ་མེད༔ གང་ཡང་འདི་ཞེས་མེད་པ་ཡི༔ བདེ་བ་ཆེན་པོར་ཨ་ལ་ལ་ ཧོཿ ཞེས་བླངས་ [22a] ལ་སྐུ་ཙཀ་སྤྱི་བོར་བཞག ། ཨ་སུམ་སྦྲེལ་གྱི་རྡོ་རྗེའི་བཟླས་པ་མཛད་པར་ཞུ། ཞེས་རྡོར་བཟླས་ལན་བདུན་ནམ་གསུམ་ཙམ་བྱ། ཤྲཱི་སེངྷ་རང་རིག་ཏུ་རྫོགས་པའི་ངང་དུ་མཉམ་པར་ཞོག་ཅིག །ཅེས་དགོངས་པའི་ངང་དར་ཅིག་བསྐྱང་། དེ་བཞིན་དུ་ལི་ཙཱ་བི་དྲི་མེད་གྲགས་པའི་སྐུ་ཐོགས་ལ། རིན་པོ་ཆེའི་ཁང་བཟང་ནས་སྐྱ་རེང་དང་པོ་ཤར་བ་དང་དུས་མཚུངས་པར་ལི་ཙཱ་བི་དྲི་མེད་གྲགས་པ་འདི་སྐད་ལོ། །ཨ་ཧོཿ གསང་སྔགས་ནམ་མཁའི་རྣལ་འབྱོར་དྲི་མེད་གྲགས་པ་ང་༔ ཡུལ་ལ་ཞུགས་པའི་སེམས་རྣམས་ཐམས་ཅད་དབྱིངས་ཉིད་དེ༔ ཅོག་བཞག་ལྷུག་པར་བཞག་པའི་རིག་པ་འདི་ཀ་རང་༔ ཕྱི་ནང་གཉིས་མེད་ཟང་ཐལ་ཀུན་ཏུ་འོད་གསལ་བའོ༔ ཞེས་དང་། ཨ་སུམ་སྦྲེལ་གྱི་རྡོར་བཟླས། ལི་ཙཱ་བི་དྲི་མེད་གྲགས་པ་རང་རིག་ཏུ་རྫོགས་པའི་ངང་དུ་མཉམ་པར་བཞག། ལྷ་དབང་བརྒྱ་བྱིན་གྱི་སྐུ་ཐོགས་ལ། རྣམ་པར་རྒྱལ་བའི་ཁང་བཟང་དུ་སེམས་བདེ་བ་ཆེན་པོ་དུས་ལས་འདས་པའི་ཚེ་ལྷ་ཡི་དབང་པོ་འདི་སྐད་ལོ། །ལྷ་དབང་བརྒྱ་བྱིན་བདེ་ཆེན་རང་གསལ་བདག་ཉིད་ནི༔ བདེ་བའི་ཡུལ་ལ་མ་ཞེན་སྣང་བ་སྒྱུ་མར་རྟོགས༔ རང་གྲོལ་དམིགས་སུ་མེད་པ་ཅིར་སྣང་བརྗོད་པ་བྲལ༔ ཆོས་ཉིད་ཀློང་དུ་རང་ཤར་རང་གྲོལ་ཕ་མཐར་སོན༔ ཞེས་དང་། གོང་བཞིན་རྡོར་བཟླས་དང་མཉམ་བཞག་བྱ་བ་འོག་མ་རྣམས་ལ་འགྲེ། གནོད་སྦྱིན་ [22b] སྐར་མདའ་གདོང་གི་སྐུ་ཐོགས་ལ། ནོར་བུས་བརྒྱན་པའི་ཤིང་གི་དྲུང་ན་སེམས་རིག་མ་བུ་འདྲེས་པའི་དུས་ཀྱི་ཚེ་གནོད་སྦྱིན་སྐར་མདའ་གདོང་འདི་སྐད་ལོ། །ཆོས་དབྱིངས་རང་གསལ་སེམས་ལ་ཡོངས་སུ་རྫོགས་པ་ལས༔ ཀུན་ཏུ་བཟང་པོའི་མ་གཟིགས་ལྟ་བ་ཀློང་ཡངས་དེ༔ མེད་པར་བསྒྲུབ་མེད་ཡེ་ཤེས་འོད་གསལ་སྙིང་པོ་སྟེ༔ སྒྱུ་མའི་ལུས་ཀྱི་རྒྱ་ཞིག་གསལ་རྫོགས་ནམ་མཁའི་རྒྱལ་པོ་འདྲེས༔ ཞེས་སོ། །སྲིན་པོ་བློ་གྲོས་ཐབས་ལྡན་གྱི་སྐུ་ཐོགས་ལ། རི་བོ་གནམ་ལྕགས་འབར་བའི་རྩེ་མོ་རུ་སྐྱ་རེངས་གཉིས་པ་ཤར་བ་ན་སྲིན་པོ་བློ་གྲོས་ཐབས་ལྡན་འདི་སྐད་ལོ། །ཤར་གྲོལ་དུས་མཉམ་བྱུང་བའི་བློ་གྲོས་ཐབས་ལྡན་བདག༔ དམིགས་མེད་ནམ་མཁའི་ངང་དུ་ཡེ་ནས་གནས་པ་ལས༔ འོད་གསལ་དག་པའི་ཡེ་ཤེས་ཉི་མ་སེམས་ལས་ཤར༔ གསལ་སྟོང་ཟུང་འཇུག་ཉི་མ་དྭངས་གསལ་ནམ་མཁའ་ཉིད་དང་མཚུངས༔ ཞེས་སོ། །ཀླུ་རྒྱལ་བྱང་ཆུབ་སེམས་དཔའི་སྐུ་ཐོགས་ལ། རིན་པོ་ཆེའི་ཁང་བཟང་དགུ་རིམ་ན་སེམས་རིག་གཉིས་སུ་མེད་པར་འབྱེད་པའི་དུས་ཀྱི་ཚེ་ཀླུ་རྒྱལ་བྱང་ཆུབ་སེམས་དཔའ་འདི་སྐད་ལོ། །རང་གིས་རང་བཅིངས་བཅིངས་པ་དམ་པོའི་མ་རིག་པ༔ གང་གིས་དགྲོལ་དུ་མེད་དེ་རང་བྱུང་རང་གྲོལ་ལོ༔ ཡེ་ནས་རང་བྱུང་རིག་པར་ཤེས་པས་མ་བཅོས་བྱར་མེད་པ༔ གང་དུའང་མི་གནས་ [23a] བསྒོམ་བྱའི་བློ་དང་བྲལ་བའོ༔ ཞེས་སོ། །རྒྱལ་པོ་ཛའི་སྐུ་ཐོགས་ལ། མཁའ་འགྲོ་མའི་ཚོགས་ཁང་ཆེན་མོར་ཉི་མ་འཆར་ཀ་དང་དུས་མཚུངས་པར་བསྐལ་ལྡན་རྒྱལ་པོ་ཛཿའདི་སྐད་ལོ། །བདག་ནི་སྐལ་ལྡན་རྒྱལ་པོ་ཛ༔ སྒྱུ་མ་བདེ་བའི་ལམ་བྱས་ཏེ༔ རྫོགས་པ་ཆེན་པོའི་དོན་བསྒོམས་པས༔ ཚོགས་དྲུག་ཡུལ་གྱི་སྣང་བ་ཀུན༔ སྤང་བླང་རྩིས་གདབ་མེད་པ་རུ༔ རང་ཤར་རང་གྲོལ་བདེ་བའི་ངང༔ བློ་འདས་བྱར་མེད་ཆེན་པོར་རྫོགས༔ ཞེས་སོ། །དགའ་རབ་རྡོ་རྗེའི་སྐུ་ཐོགས་ལ། ཆོས་ཀྱི་དབྱིངས་ན་རྡོ་རྗེ་སེམས་དཔའི་དྲུང་དུ་སེམས་ཉིད་འོད་གསལ་བའི་དུས་སུ་རིག་འཛིན་དགའ་རབ་རྡོ་རྗེ་འདི་སྐད་ལོ། །ང་ནི་མི་ཡི་རིག་འཛིན་དགའ་རབ་རྡོ་རྗེ་སྟེ༔ སེམས་ལ་བལྟ་བའི་ཡུལ་མེད་འཛིན་པ་རང་སར་དག༔ སྒོམ་པའི་བློ་དང་བྲལ་ནས་གསལ་དང་མི་གསལ་མེད༔ སྤྱོད་པ་ཅི་དགར་བཏང་བས་རེ་དོགས་རྩིས་གདབ་བྲལ༔ འབྲས་བུ་འོད་གསལ་སྙིང་པོའི་ཀློང་དུ་རང་བཞིན་གྲོལ༔ ཞེས་སོ། །འཇམ་དཔལ་བཤེས་གཉེན་གྱི་སྐུ་ཐོགས་ལ། དུར་ཁྲོད་ཧེ་ཆེན་བརྡལ་དུ་མཆོད་རྟེན་ལ་སྐུ་རྒྱབ་བརྟེན་ཏེ་བསྒྲུབ་པའི་ཚེ་སྲོད་ཀྱི་དུས་སུ་སློབ་དཔོན་འཇམ་དཔལ་བཤེས་གཉེན་འདི་སྐད་ལོ། །དགའ་རབ་རྡོ་རྗེའི་ཐུགས་སྲས་ [23b] འཇམ་དཔལ་བཤེས་གཉེན་བདག༔ གདམས་ངག་བསྒོམ་མཁན་མི་སྣང་འོད་གསལ་ཀུན་ལ་ཁྱབ༔ དེ་ཉིད་དམིགས་སུ་མ་མཆིས་དམིགས་ཡུལ་རྡུལ་ཙམ་མེད༔ སྟོང་ཉིད་ཀ་ནས་དག་ཀྱང་སྐུ་དང་ཡེ་ཤེས་གསལ༔ ཞེས་སོ། །བི་མ་མི་ཏྲའི་སྐུ་ཐོགས་ལ། བདེ་ཆེན་བརྩེགས་པའི་དུར་ཁྲོད་ཆེན་པོར་མཁའ་འགྲོ་དབྱིངས་ཕྱུག་མས་མཆོད་བའི་ཚེ་སློབ་དཔོན་བི་མ་མི་ཏྲ་འདི་སྐད་ལོ། །ཨ་ཧོཿ བདེ་ཆེན་ནམ་མཁའ་གང་བའི་དབྱིངས་སུ་དག༔ རང་བྱུང་རང་ཤར་རིག་པའི་ཀློང་དུ་ཐིམ༔ དབྱིངས་རིག་གཉིས་མེད་ཟུང་འཇུག་ལ་བཟླས་པས༔ འཁོར་འདས་ཀུན་ཁྱབ་ཧེ་རུ་ཀ་དཔལ་ལོ༔ ཞེས་སོ། །པདྨ་འབྱུང་གནས་ཀྱི་སྐུ་ཐོགས་ལ། ལྷུན་གྲུབ་བརྩེགས་པ་བམ་རོའི་ཚལ་ཆེན་པོར་བརྟུལ་ཞུགས་ཀྱི་སྤྱོད་པ་སྤྱད་པའི་ཚེ་འཆི་མེད་པདྨ་འབྱུང་གནས་འདི་སྐད་ལོ། །ཨ་ཧོཿ ཤར་གྲོལ་དུས་མཉམ་རིག་པ་ཐོལ་བྱུང་ནི༔ འཇིགས་མེད་སྣང་མེད་འཛིན་མེད་ངང་དུ་སྤྱོད༔ ཀློང་ལས་ཤར་བའི་ཆོ་འཕྲུལ་ཅིར་བསྟན་ཀྱང༔ འཁོར་འདས་མཉམ་པ་ཉིད་དུ་བརྡལ་བའོ༔ ཞེས་སོ། ། ༈ སེམས་སྨད་རིག་འཛིན་བཅོ་བརྒྱད་ཀྱི་གླུ་ནི། རིག་འཛིན་སོ་སོའི་སྐུ་རྣམས་རིམ་པར་ཐོགས་ལ། དང་པོ། ཁྱུང་ཆེན་གྱི་དགོངས་པ་ཆོས་ཉིད་ཀློང་རྡོལ་གླུའི་བསམ་གཏན་ཙནྡན་གྱི་ནགས་ཚལ་དུ་ནམ་གྱི་གུང་ལ་རྒྱལ་པོ་དྷ་ཧི་ན་ཏ་ལོ་འདི་སྐད་ལོ། །ཧཱུྃ། འགྱུར་བ་མེད་ [24a] པའི་ཆོས་ཉིདནི། །ཀུན་གཞི་མ་བཅོས་བྱང་ཆུབ་སེམས། །གཟུང་འཛིན་རྣམ་རྟོག་ཡུལ་ལས་འདས། །སྣང་བའི་གཟུགས་མེད་བྱང་ཆུབ་སེམས། །ཅི་ལ་མི་སྤྱོད་རྟོག་པས་མི་བཟུང་ཞིང་། །སེམས་ཉིད་རང་བཞིན་བསམ་མེད་མཁའ་འདྲ་ལ། །མ་ཡེངས་མ་བསླད་བཅོས་པ་མེད་པར་བཞག །སྒོམ་དུ་མེད་པའི་ཆོས་དབྱིངས་ཆེན་པོ་ལ། །བསམ་དུ་མེད་པའི་རིག་པ་མ་ཡེངས་ཞོག །དེ་ལས་བསྒོམ་དུ་རྡུལ་ཙམ་མེད་པར་འཁུམས། །སྐྱེ་བ་བརྒྱུད་ནས་རྒྱལ་པོར་བདག་སྐྱེས་ཏེ། །དོ་ཧ་དེ་བླངས་ང་རྒྱལ་བཅག་པ་ལས། །སྔོན་ཆད་བྱང་ཆུབ་མཆོག་ཏུ་སེམས་བསྐྱེད་ཅིང་། །སེམས་དང་ཆོས་སུ་འདྲེས་པའི་འཕྲོ་བླངས་ཤིང་། །སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར། །ཀུན་བཟང་ཐུགས་ཀྱི་འོད་ཟེར་བདག་ལ་ཤར། །གྷི་ཏ་མ་ཀོ་ལ་ས་ཨ་ཧོཿ གཉིས་པ། རིག་པ་ཁུ་བྱུག་གི་དགོངས་པ་རིག་པ་ཀློང་རྡོལ་གླུའི་བསམ་གཏན་ཙནྡན་གོར་ཤི་ཤའི་ཚལ་དུ་ནམ་གྱི་ཆ་སྟོད་ལ་སྲས་ཐུ་བོ་རཱ་ཛ་ཧསྟི་འདི་སྐད་ལོ། །ཧཱུྃ། ཀུན་གཞི་ཡེ་ནས་མ་བཅོས་དེ་བཞིན་ཆོས་ཀྱི་དབྱིངས། །རང་བྱུང་ཡེ་ཤེས་མཁའ་འདྲ་མཉམ་པ་ཆེན་པོའི་ངང་། །ཚིག་དང་ཡི་གེའི་སྒྲ་ལས་འདས་པའི་ཀུན་ཏུ་བཟང་། །སེམས་དང་ཆོས་ཉིད་མཉམ་ཞིང་དབྱེར་ [24b] མེད་ན། །ལུས་ངག་ཡིད་གསུམ་མཚན་མ་ཅིས་བསླད་ཀྱང་། །ཆོས་ཉིད་བྱང་ཆུབ་སེམས་ལ་འགྱུར་མེད་དེ། །རྣམ་རྟོག་སྐྱོན་སྤང་ཀུན་གཞི་བྱང་ཆུབ་སེམས། །མ་བཅོས་ངང་དུ་བཞག་པ་ལས། །བསྒོམ་པ་གུད་ན་མེད་པར་འཁུམས། །སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར། །ཀུན་བཟང་ཐུགས་ཀྱི་འོད་ཟེར་ང་ལ་ཤར། །གྷི་ཏ་མ་ཀོ་ལ་ས་མ་ཨ་ཧོཿ གསུམ་པ། ནམ་མཁའ་ཆེའི་དགོངས་པ་ཡེ་ཤེས་ཀློང་རྡོལ་གླུའི་བསམ་གཏན་མེ་ཏོག་ཨུ་དུམ་འབར་བའི་ཚལ་དུ་ནམ་གྱི་ཆ་སྨད་ལ་སྲས་མོ་གོ་མ་ས་ར་འདི་སྐད་ལོ། །ཧཱུྃ། ཀུན་གཞི་མ་བཅོས་ཡེ་ནས་ཆོས་ཀྱི་དབྱིངས། །རྒྱུ་དང་རྐྱེན་གྱིས་མ་སྐྱེས་འཇིག་དྲལ་མེད། །རང་བྱུང་ལྷུན་གྱིས་གྲུབ་པའི་བཅོན་ལྡན་འདས། །གཟུང་འཛིན་ཡུལ་ལས་འདས་པ་རྡོ་རྗེ་སེམས་དབའི་ཐུགས། །བདག་གི་དགོངས་པ་འདི་ལས་མེད་པར་འཁུམས། །སྒྱུ་མའི་ཕུང་པོ་ད་ལྟ་བསྙིལ་བའི་ཕྱིར། །ཀུན་བཟང་ཐུགས་ཀྱི་གཏེར་ཆེན་བདག་ལ་བབས། །གྷི་ཏ་མ་ཀོ་ལ་ཧོཿ བཞི་པ། ཐིག་ལེ་དྲུག་པའི་དགོངས་པ་བདེ་བ་ཀློང་རྡོལ་གྱི་གླུའི་བསམ་གཏན་སྐྱ་རེངས་དང་པོ་ཤར་ཙམ་ན་རྒྱ་མཚོའི་གཏིང་དུ་ཀླུ་རྒྱལ་འཇོག་པོ་འདི་སྐད་ལོ། །ཧཱུྃ། མཐའ་དང་དབུས་མེད་ནམ་མཁའ་ལྟ་བུ་ལ། །སྨྲ་བསམ་ཡུལ་ལས་འདས་ [25a] པ་ཆོས་ཀྱི་སྐུ། །སྲིད་གསུམ་སྐྱེ་འགྲོ་རྣམ་པར་དག་བྱས་ན། །མ་བཅོས་རྣམ་པར་དག་པའི་ཀུན་གཞི་བྱང་ཆུབ་སེམས། །མ་བཙལ་མཉམ་པར་བཞག་ན་སྒོམ་པའི་མཆོག །རིག་པ་ཆོས་ཀྱི་དབྱིངས་སུ་མ་བཅོས་ལ། །རྣམ་པར་གྲོལ་བའི་ལམ་མཆོག་གཞན་མེད་དེ། །དུས་གསུམ་བདེ་བར་གཤེགས་པའི་དགོངས་པ་ཉིད། །དཔག་ཅིང་གཞལ་ཡང་འདི་ལས་མེད་པར་མཇལ། །བདག་གི་ཕུང་པོ་གདོས་བཅས་འདི་བསྙིལ་ནས། །ཀུན་བཟང་དབྱེ་བ་མེད་པའི་ས་ལ་མཆིས། །གྷི་ཏ་མ་ཀོ་ལ་ས་ཨ་ཧོཿ ལྔ་པ། རྩལ་ཆེན་གྱི་དགོངས་པ་བྱང་ཆུབ་སེམས་ཀློང་རྡོལ་གླུའི་བསམ་གཏན་སྐྱ་རེངས་གཉིས་པ་ཤར་ཙ་ན་རྒྱ་མཚོའི་གླིང་དུ་ཁྱི་ཡི་རྒྱལ་པོ་ཀུ་ཀུ་རཱ་ཛ་འདི་སྐད་ལོ། །ཧཱུྃ། ཡེ་ནས་ལྷུན་གྲུབ་ཀུན་ཏུ་བཟང་པོའི་ངང་། །གསལ་ལ་མི་རྟོག་སྤྲོས་བྲལ་བྱང་ཆུབ་སེམས། །མི་འགྱུར་མི་དམིགས་ཆོས་ཀྱི་དབྱིངས་ཉིད་ལས། །རིག་པ་མི་འགྱུར་མ་བསླད་མཉམ་མཞག་ན། །ཅིར་ཡང་མི་རྟོག་གང་ལའང་མི་བསམ་ཏེ། །མཆོག་ཏུ་གསང་བའི་རྨད་བྱུང་སེམས་ཉིད་འདི། །རྣ་བས་ཉན་པ་ལ་སོགས་སྤྱོད་ཡུལ་ཡོད་མ་ཡིན། །ཀུན་གཞི་མི་འགྱུར་དབྱིངས་ཆེན་ལ། །རིག་པ་མི་འགྱུར་མ་ཡེངས་བཞག །སྒོམ་ [25b] པ་འདི་ལས་མེད་པར་འཁུམས། །ཁམས་གསུམ་རྟོགས་པར་གྲོལ་བས་བཙལ་ཞིང་སྒྲུབ་མི་དགོས། །རེ་ཞིང་དོགས་པ་མེད་པའི་བདག་ཉིད་སངས་རྒྱས་ཡིན། །གྷི་ཏ་མ་ཀོ་ལ་ཨ་ཧོཿ དྲུག་པ། སེམས་སྒོམ་གྱི་དགོངས་པ་དབྱིངས་ཀློང་རྡོལ་གླུའི་བསམ་གཏན་རྒྱན་ཆག་དཔལ་གྱི་རིའི་གནས་སུ་སྐྱ་རེངས་གསུམ་པ་ཤར་ཙམ་ན་ནཱ་གརྫུ་ན་འདི་སྐད་ལོ། །ཧཱུྃ། སྣང་བ་ཐམས་ཅད་ཡེ་ནས་དབྱིངས་ཆེན་ལ། །རིག་པ་འཕོ་འགྱུར་མེད་པའི་དུར་བཏབ་ནས། །དབྱིངས་ཉིད་མི་འགྱུར་རིག་པས་མི་བསླད་དེ། །མ་ཡེངས་མི་འགྱུར་མཁའ་ལྟར་དག་པ་ལས། །མ་ཡེངས་མི་འགྱུར་ཡོངས་ཀྱི་འོད་གསལ་ལ། །སྒོམ་པ་མིང་དུ་བཏགས་པ་གུད་ན་མེད་པར་འཁུམས། །བདག་གི་ཕུང་པོ་གདོས་བཅས་འདི། །དབྱེ་བ་མེད་པའི་ས་ལ་མཆིས། །གྷི་ཏ་མ་ཀོ་ལ་ས་ཨ་ཧོཿ བདུན་པ། རྨད་བྱུང་གི་དགོངས་པ་འབྱུང་ལྔ་ཡེ་ཤེས་ཀློང་རྡོལ་གླུའི་བསམ་གཏན་དམར་རེངས་དང་པོ་ཤར་ཙམ་ན་རྒྱ་མཚོའི་འགྲམ་དུ་ཁྱིའི་རྒྱལ་པོ་ཕྱི་མ་འདི་སྐད་ལོ། །ཧཱུྃ། ཆོས་ཉིད་བྱང་ཆུབ་སེམས་ནི་འབྱུང་བ་ལྔ་ཡིན་ཏེ། །མ་བཅོས་རང་བཞིན་གསལ་བས་མཁའ་ལྟར་གནས། །འགྲོ་བའིོ་གཟུང་འཛིན་བསྲེགས་པས་མེ་ལྟར་གནས། །དམིགས་མེད་གདོད་ནས་དག་པས་ [26a] རླུང་ལྟར་གནས། །གཟུང་འཛིན་སྐྱོན་དང་བྲལ་བས་ཆུ་ལྟར་གནས། །ཅིས་ཀྱང་སྐྱོན་མེད་སྲ་བས་ས་ལྟར་གནས། །འབྱུང་བ་ལྔ་ཉིད་ཡེ་ནས་ཆོས་ཉིད་བྱང་ཆུབ་སེམས། །གདོད་ནས་དག་པས་ནམ་མཁའ་འདྲ་བ་ལ། །དམིགས་པ་མེད་པ་མ་ཡེངས་གནས་པ་ལས། །སྒོམ་པ་འདི་ལས་མེད་པར་རྟོགས། །བདག་གི་ཕུང་པོ་གདོས་བཅས་འདི། །དབྱེ་བ་མེད་པའི་ས་ལ་མཆིས། །གྷི་ཏ་མ་ཀོ་ལ་ས་ཧ་ཨ་ཧོཿ བརྒྱད་པ། ཡིད་བཞིན་ནོར་བུའི་དགོངས་པ་དངོས་གྲུབ་ཀློང་རྡོལ་གླུའི་བསམ་གཏན་དམར་རེངས་གཉིས་པ་ཤར་ཙམ་ན་གནོད་སྦྱིན་བུ་མོ་བྱང་ཆུབ་མ་འདི་སྐད་ལོ། །ཧཱུྃ། ཆོས་ཉིད་བྱང་ཆུབ་སེམས་ལ་བླང་ཞིང་བལྟར་མེད་དེ། །བལྟ་བའི་གཟུགས་མེད་ཡོངས་ལ་སྣང་། །ཅིས་ཀྱང་བཅོས་སུ་མེད་ལ་སྤྱད་དུ་མེད། །སེམས་ཀྱི་རང་བཞིན་ཅི་ལའང་མི་གནས་ཏེ། །རིག་པ་བྱང་ཆུབ་སེམས་ཀྱི་རང་བཞིན་ཡིན། །ཇི་ལྟར་བསླད་ཀྱང་དབྱིངས་ལས་འགྱུར་བ་མེད། །དབྱིངས་ཉིད་རིག་པས་མི་བཙལ་ཏེ། །སེམས་ཉིད་མཁའ་ལྟར་དག་པའི་གནས། །མ་བཅོས་རང་བཞིན་མེད་པ་སྟེ། །སྒོམ་པ་འདི་ལས་མེད་པར་བདག་གིས་རྟོགས། །བདག་གི་ཕུང་པོ་གདོས་བཅས་འདི་བསྙིལ་ནས། །ཀུན་བཟང་ [26b] ཐུགས་ཀྱི་འོད་ཟེར་བདག་ལ་ཤར། །གྷི་ཏ་མ་ཀོ་ལ་ས་ཨ་ཧོཿ དགུ་པ། རྩེ་མོ་བྱུང་རྒྱལ་གྱི་དགོངས་པ་རྩོལ་མེད་ཀློང་རྡོལ་གླུའི་བསམ་གཏན་ཤིང་ན་ལ་བྱི་ས་ལའི་རྩར་དམར་རེངས་གསུམ་པ་ཤར་ཙམ་ན་སྨད་འཚོང་མ་བུདྡྷ་ཏི་འདི་སྐད་ལོ། །ཨེ་མ་ཧོ་ཆོས་ཉིད་བྱང་ཆུབ་སེམས། །བརྟག་ཏུ་མེད་དེ་དཔྱད་དུ་མེད། །བཙལ་ཞིང་གཉེན་པོས་བཅོས་སུ་མེད། །སེམས་ལས་སངས་རྒྱས་ལོགས་ན་མེད། །བཙལ་བས་མི་རྙེད་སེམས་ལས་སངས་རྒྱས་མེད། །སེམས་ཀྱི་རང་བཞིན་མ་བཅོས་སངས་རྒྱས་ཡིན། །གདོད་ནས་མ་བཙལ་བྱང་ཆུབ་སྙིང་པོ་ལ། །ཏིང་འཛིན་མ་བསླད་ངང་གིས་གསལ་བ་ལས། །སངས་རྒྱས་དགོངས་པ་འདི་ལས་མེད་པར་འཁུམས། །བདག་གི་ཕུང་པོ་གདོས་བཅས་འདི་བསྙིལ་ནས། །ཀུན་བཟང་ཐུགས་ཀྱི་འོད་ཟེར་བདག་ལ་ཤར། གྷི་ཏ་མ་ཀོ་ལ་ས་ཨ་ཧོཿ བཅུ་པ། སྤྱི་གཅོད་ཀྱི་དགོངས་པ་གསང་བ་ཀློང་རྡོལ་གླུའི་བསམ་གཏན་ཤིང་ནྱ་གྲོ་དྷའི་རྩར་སྲོད་ཀྱི་ཐུན་ལ་འཇམ་དཔལ་བཤེས་གཉེན་ཕྱི་མ་འདི་སྐད་ལོ། །ཧཱུྃ། ཀུན་གཞི་ཡངས་པའི་བྱེ་ཐང་ལ། །དག་པའི་ཀློང་ནས་ཉི་མ་ཤར། །ཤར་བའི་དུས་ན་ནུབ་པ་མེད། །ཤར་ནས་མ་བཅོས་གསལ་བ་ལས། །སངས་རྒྱས་ཆོས་ཉིད་སྔ་ཕྱི་གསུམ། །གང་དུ་བཙལ་ཡང་རྙེད་ཐབས་མེད། །ཀུན་གཞི་ཡངས་ [27a] པའི་ཆོས་ཉིད་ལ། །རིག་པ་སེམས་ཀྱི་ཉི་ཤར་བ། །མ་བཅོས་ནུབ་པ་མེད་པ་ལས། །སྒོམ་དུ་འདི་ལས་མེད་པར་འཁུམས། །མྱོང་ན་སེམས་ཀྱི་བདུད་རྩི་མྱོང་། །བལྟ་ན་རིག་པའི་ཡེ་ཤེས་ལྟོས། །པདྨ་ཀོ་ལ་ཤ་ཨ་ཧོཿ བཅུ་གཅིག་པ། ། སྤྱི་ཆིངས་ཀྱི་དགོངས་པ་ནམ་མཁའ་ཀློང་རྡོལ་གླུའི་བསམ་གཏན་དཔག་བསམ་ཤིང་གི་གྲིབ་མ་ལ་ཐོ་རེངས་ཁར་ཨཱ་རྻ་པ་ལོ་འདི་སྐད་ལོ། །ཧཱུྃ། བྱང་ཆུབ་སེམས་ནི་ནམ་མཁའ་ལྟ་བུའི་ཀློང་། །གསལ་ལ་རྙོག་པ་མེད་པའི་ཡེ་ཤེས་ནི། །ཕྱི་དང་ནང་མེད་ཀུན་ལ་གསལ་བར་སྣང་། །གདོད་ནས་དག་པ་ནམ་མཁའི་ཀློང་འདྲ་ལ། །རྣམ་རྟོག་སྲེག་པའི་ཡེ་ཤེས་མངོན་ཤར་བའི། །སྐྱེ་འགག་ཡངས་དོག་རང་བཞིན་མེད་པ་ལས། །སངས་རྒྱས་དགོངས་པ་འདི་ལས་མེད་པར་མཇལ། །ཟ་ན་སེམས་ཉིད་བདུད་རྩི་ཟོ། །གྱོན་ན་ཆོས་ཉིད་གོས་སུ་གྱོན། །ཨེ་མ་ཀོ་ལ་ཤ་ཨ་ཧོཿ བཅུ་གཉིས་པ། བདེ་བ་ཕྲ་བཀོད་ཀྱི་དགོངས་པ་ཕྲིན་ལས་ཀློང་རྡོལ་གླུའི་བསམ་གཏན་རིན་པོ་ཆེའི་གླིང་ན་ནམ་གུང་ཡོལ་ལ། ཨོ་རྒྱན་གྱི་མཁན་པོ་དྷ་ཧེ་ཏ་འདི་སྐད་ལོ། །ཧཱུྃ། སེམས་ཉིད་སངས་རྒྱས་ཡིན་པ་ལ། །སེམས་ལས་སངས་རྒྱས་ལོགས་ན་མེད། །སེམས་ཉིད་ཡེ་ནས་སངས་རྒྱས་ཡིན་པ་ལ། །རིག་པ་མི་ [27b] འགྱུར་རང་བཞིན་མེད་པ་འདི། །ཟབ་མོའི་ཆོས་དབྱིངས་མི་བརྗོད་དོན་དམ་གསལ། །རྒྱ་མཚོ་ཆེ་ལྟར་ཆོས་དབྱིངས་ཟབ་མོ་ལས། །རིག་པ་མི་འགྱུར་བཟོད་ཅིང་ནང་ནས་འཆར། །ཀུན་གཞི་གཏན་ནས་སྦྱོངས་པའི་ཉི་ཆེན་པོ། །མཁའ་ལྟར་དག་པའི་ཡོངས་ལ་ཁྱབ་པར་གདལ། །ཆོས་ཉིད་ཡེ་ནས་དག་པས་སྦྱང་དུ་མེད་པ་ལ། །རིག་པ་མི་འགྱུར་གདོད་ནས་གསལ་བར་གནས། །ཕྱིན་ཅི་ལོག་གིས་མ་བསླད་གསལ་བར་གནས། །བདེ་བར་གཤེགས་པའི་དགོངས་པ་འདི་ལས་མེད་པར་མཇལ། །ཆོས་ཉིད་ནམ་མཁའ་ཆེན་པོ་ལ། །རྣལ་འབྱོར་ཁྱུང་ཆེན་གཤོག་པ་ལྡིང་། །ཀརྨ་ཀོ་ལ་ཤ་ཨ་ཧོཿ བཅུ་གསུམ་པ། སྲོག་གི་འཁོར་ལོའི་དགོངས་པ་རང་བྱུང་ཀློང་རྡོལ་གླུའི་བསམ་གཏན་ནྱ་གྲོ་དྷའི་དགོན་པར་སྲོད་ཡོལ་བའི་དུས་སུ་དྲང་སྲོང་བི་ཤྭ་ཏི་འདི་སྐད་ལོ། །ཧཱུྃ། མ་བཅོས་མཁའ་ལ་གཟའ་སྐར་ཀུན་འཕྱོ་བས། །གདོད་ནས་དག་པའི་མཁའ་ནི་མི་བརྗོད་དེ། །བྱང་ཆུབ་སེམས་ནི་མཁའ་ལྟར་དག་པ་ལ། །མཚན་མའི་རྣམ་རྟོག་སྒྱུ་མས་ཅི་བསླད་ཀྱང་། །རྣམ་དག་སེམས་ཉིད་དབྱིངས་ལ་འཕོ་འགྱུར་མེད། །ཆོས་དབྱིངས་བརྡལ་བ་ཆེན་པོའི་དཀྱིལ་འཁོར་ལ། །རིག་པ་ཡེ་ཤེས་དུར་ས་བཏབ་པ་ནི། །གསང་བའི་འོད་ཀྱི་དཀྱིལ་འཁོར་ [28b] གསལ་བར་འཆར། །ཤར་བ་ཉིད་ཀྱི་དོན་དེ་མ་ཡེངས་ལས། །སངས་རྒྱས་རྣམས་ལ་དགོངས་པ་འདི་ལས་མེད། །རིག་པ་ཡེ་ཤེས་རླུང་ཆེན་གྱིས། །རྣམ་པར་རྟོག་པའི་མུན་པ་གཡེངས། །ཨ་ཀ་ཤ་ཀོ་ལ་མ་དྷ་ཨ་ཧོཿ བཅུ་བཞི་པ། རིན་པོ་ཆེ་ཀུན་འདུས་ཀྱི་དགོངས་པ་སྐྱེ་མེད་ཀློང་རྡོལ་གླུའི་བསམ་གཏན་རྒྱལ་བའི་དགོན་གནས་སུ་ནམ་སྨད་ལ་སྲས་མོ་གོ་མ་དེ་ཝཱི་འདི་སྐད་ལོ། །ཧཱུྃ། སངས་རྒྱས་ཀུན་གྱི་ཐུགས་ཉིད་ཡི་གེ་ཨ་ཡིན་ཏེ། །ཨ་ཡི་རང་བཞིན་ཡེ་ནས་དངོས་པོ་མེད། །བདེ་གཤེགས་ཀུན་གྱི་འབྱུང་གནས་ཨ་ཡིན་ཏེ། །བདེན་གཉིས་ལ་སོགས་སྣང་སྲིད་ཅིར་སྣང་ཡང་། །ཨ་ཡི་དངོས་གཞི་ཡེ་ནས་བྱང་ཆུབ་སེམས། །འཕོ་འགྱུར་འདུ་འབྲལ་བརྟགས་ན་སངས་རྒྱས་ཏེ། །སྨྲ་བསམ་ཡུལ་ལས་འདས་པའི་བྱང་ཆུབ་དབྱིངས་ཉིད་ལ། ཨ་ལྟར་སྐྱེ་བ་མེད་པའི་བྱང་ཆུབ་སེམས། །མ་བཅོས་མ་ཡེངས་མཉམ་པར་བཞག་པ་ལས། །བདག་གི་དགོངས་པ་འདི་ལས་མེད་པར་མཇལ། །ཆོས་ཉིད་བྱེ་ཐང་ཆེན་པོ་ལ། །རིག་པ་ཡེ་ཤེས་རྟ་ཕོ་རྒྱུག །ཀ་པ་ལ་ཀ་མ་པ་ཤ་ཨ་ཧོཿ བཅོ་ལྔ་པ། སྐྱེ་མེད་རང་རིག་གི་དགོངས་པ་ཆོས་སྐུ་ཀློང་རྡོལ་གླུའི་བསམ་གཏན་ཙནྡན་སྡོང་པོའི་རྩར་གུང་ཐུན་ལ། ཁ་ཆེའི་རྒྱལ་ [28b] པོ་རབ་སྣང་མཛད་འདི་སྐད་ལོ། །ཧཱུྃ། བྱང་ཆུབ་སེམས་ནི་ཡེ་ནས་ཆོས་ཀྱི་སྐུ། །མཁའ་དང་འདྲ་བར་ཀུན་ལ་ཁྱབ་པར་སྣང་། །སྣང་བ་ཉིད་ཀྱང་སྟོང་པ་སྟེ། །སྟོང་པའི་ཆོ་འཕྲུལ་ཅིར་སྣང་བ། །བསམ་དུ་རྡུལ་ཙམ་མེད་པ་ལ། །བརྗོད་དུ་མེད་པར་མ་ཡེངས་ཞོག །ཆོས་ཉིད་སེམས་ཀྱི་བདུད་རྩི་ཡིས། །ཁམས་གསུམ་འཁོར་བའི་ནད་པ་གསོས། །ཀ་པ་ལ་ཀོ་ཤ་ཨ་ཧོཿ བཅུ་དྲུག་པ། བདེ་འབྱམས་ཀྱི་དགོངས་པ་སྐུ་གསུམ་ཀློང་རྡོལ་གླུའི་བསམ་གཏན་གྲོང་ཁྱེར་དཔལ་ཡོན་དུ་སྲོད་ཀྱི་དུས་སུ་རྒྱལ་པོ་དེ་བ་རཱ་ཛ་འདི་སྐད་ལོ། །ཧཱུྃ། སྣང་སྲིད་ཆོས་རྣམས་མངོན་དུ་ལྟོས་པ་རྣམས། །ཡང་དག་ཉིད་དུ་འདི་ལྟར་བསྒོམ་པར་བྱ། །སྣང་སྲིད་ཐམས་ཅད་ཡེ་ནས་ཀུན་ཏུ་བཟང་པོའི་ངང་། །འདི་ལས་གཞན་མེད་མ་ཡེངས་མཉམ་བཞག་པས། །སྒོམ་པར་བྱ་བ་འདི་ལས་མེད་པར་རྟོགས། །ལུས་ནི་སྒྱུ་མའི་ཕུང་པོ་མིང་ཙམ་སྟེ། །སེམས་ནི་ཡེ་ཤེས་ཆེན་པོར་སོན། །ཙནྡྲ་དེ་ཝ་ཀོ་ས་ལ་ཨ་ཧོཿ བཅུ་བདུན་པ། ནམ་མཁའི་རྒྱལ་པོའི་དགོངས་པ་གྲོལ་བ་ཀློང་རྡོལ་གླུའི་བསམ་གཏན་མེ་ཏོག་གི་ཚལ་དུ་ནམ་གྱི་ཆ་སྟོད་ལ་དྷརྨ་རཱ་ཛ་འདི་སྐད་ལོ། །ཧཱུྃ། སེམས་ཀྱི་རང་བཞིན་ཡེ་ནས་མཛོད་ཆེན་ལས། །གང་ལྟར་རྟོགས་ཤིང་ཇི་ལྟར་ [29b] སྣང་བ་ཀུན། །འབྱུང་འཇུག་འབྱུང་བ་མེད་ན་ཀུན་ཏུ་བཟང་། །གཉིས་སུ་མེད་པའི་རིག་པ་འདི། །ཀུན་ཏུ་བཟང་པོའི་སེམས་ལ་གནས། །རིག་པའི་དབྱིངས་ལ་མ་བསླད་པས། །བསྒོམ་ཞིང་གནས་པ་འདི་ལས་མེད། །ཀྱེ་མ་མ་རྟོགས་སྙིང་རེ་རྗེ། །བདག་ཉིད་རང་སར་གྲོལ་བ་ཨ་ལ་ལ་ཧོཿ རྡོ་ཧ་ཀོ་ས་ཤ་ཨ་ཧོཿ བཅོ་བརྒྱུད་པ། རྗེ་བཙུན་དམ་པའི་དགོངས་པ་ཤེས་རབ་ཀློང་རྡོལ་གླུའི་བསམ་གཏན་དབེན་པ་ཆེན་པོའི་གནས་སུ་བུདྡྷ་གུཔྟ་འདི་སྐད་ལོ། །ཧཱུྃ། ཆོད་རྣམས་ཐམས་ཅད་མ་བཅོས་ཀུན་ཏུ་བཟང་པོ་ལ། །གསལ་ལ་འགྱུར་བ་མེད་པ་བྱང་སེམས་ངང་དེ་ལ། །མཚན་མའི་རྣམ་པར་རྟོག་པས་མ་བསླད་དེ། །རྣམ་རྟོག་རང་བྱུང་རང་ཤར་གནས་པ་ལས། །སྒོམ་པ་འདི་ལས་གུད་དུ་མེད་པར་འཁུམས། །སེམས་ཀྱི་མེ་ལོང་མ་བལྟས་ན། །རྣམ་རྟོག་དྲི་མས་གོས་ཏ་རེ། །པྲཛྙཱ་ཀོ་ས་ལ་ཨ་ཧོཿ ཞེས་སོ། དེ་ལྟར་བྱིན་རླབས་འཕོ་བའི་དབང་བསྐུར་ཐོབ་བའི་ཡེ་ཤེས་ཀྱི་རྒྱུན་དེ་ཉིད་མི་ཉམས་བརྟན་པར་བྱ་བའི་སླད་དུ་རིག་འཛིན་བླ་མའི་ལྷ་ཚོགས་ནམ་མཁའ་གང་བར་སད་པ་རྣམས་ཀྱིས་སྨོན་པའི་བདེན་ཚིག་གི་རྒྱས་གདབ་ཅིང་ཤིས་པ་བརྗོད་པའི་མེ་ཏོག་གི་ཆར་ཕབ་པས་དགེ་ལེགས་ [29b] སུ་བྱས་པའི་མོས་པ་མཛོད། མེ་ཏོག་འཐོར་བཞིན། ཆོས་ཉིད་དངོས་པོ་མེད་པའི་ཡེ་སྟོང་འདི། །ལྟ་བ་འདི་དང་མི་འབྲལ་འགྲོགས་པར་ཤོག །ཆོས་ཉིད་ཉམས་མྱོང་མེད་པའི་བདེ་སྟོང་འདི། །བསྒོམ་པ་འདི་དང་མི་འབྲལ་འགྲོགས་པར་ཤོག །སེམས་ཉིད་འཆོས་པ་མེད་པའི་རང་སྟོང་འདི། །སྤྱོད་པ་འདི་དང་མི་འབྲལ་འགྲོགས་པར་ཤོག །ཆོས་ཉིད་འགྱུར་བ་མེད་པའི་ཡེ་སྟོང་འདི། །འབྲས་བུ་འདི་དང་མི་འབྲལ་འགྲོགས་པར་ཤོག །ཇི་ལྟར་སྨོན་པའི་འབྲས་བུ་འགྲུབ་པར་གྱུར་ཅིག །སྨོན་ལམ་གྱི་མཐུ་བཙན་པར་གྱུར་ཅིག །དེ་ཁོ་ན་ཉིད་ཀྱི་དོན་ལ་བློ་གནས་པར་གྱུར་ཅིག །ཅེས་དང་ཤིས་བརྗོད་གང་འོས་བྱ། དེ་རྣམས་ཀྱི་སྒོ་ནས་ཕྱི་སྐོར་སེམས་སྡེའི་རིག་འཛིན་བླ་མ་འགྲོ་འདུལ་སུམ་ཅུ་རྩ་གཅིག་གི་བྱིན་རླབས་དབང་བསྐུར་ཟབ་མོ་ལེགས་པར་གྲུབ་པ་ལགས་པས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་གྱིས་བསྡུས་པ་མཐའ་དག་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་དབང་གི་རྗེས་རིམ་སྤྱི་ལྟར་བྱའོ། །གསུམ་པ་རྗེས་ནི། ཚོགས་ལ་རོལ་པ་སོགས་ཆོ་གའི་རྗེས་རིམ་རྣམས་བྱང་བུ་ཁྲིགས་བསྡེབས་ལྟར་མཐར་དབྱུང་བས་གྲུབ་བོ། །ཀུན་བཟང་གདོད་མའི་དབྱིངས་ [30a] ཉིད་ལས། །གང་འདུལ་ཡེ༵་ཤེ༵ས་སྒྱུ་མའི་གར། །རྡོ༵་རྗེ༵འི་རིག་འཛིན་རྒྱ་མཚོ་ཡི། །དགོངས་ཉམས་རྩལ་དབང་འཇུག་བདེའི་དཔྱིད། །ཕྱི་སྐོར་སེམས་སྡེའི་རིག་འཛིན་བླ་མ་འགྲོ་འདུལ་སུམ་ཅུ་རྩ་གཅིག་གི་བྱིན་རླབས་དབང་བསྐུར་གྱི་ལེའུ་ཚན་ནོ།། །།


[31a] སྭསྟི། བྱང་ཆུབ་སེམས་ཀྱི་རང་བཞིན་ནི། །རྡོ་རྗེ་དབྱིངས་ཀྱི་དཀྱིལ་འཁོར་དུ། །མངོན་པར་སྣང་ལ་ཡོངས་བཏུད་ནས། །གང་དེའི་སྨིན་བྱེད་ལམ་བཟང་དབྱེ། །རྫོགས་པ་ཆེན་པོ་སྡེ་གསུམ་ལས་ཕྱི་སྐོར་སེམས་སྡེའི་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་བའི་ཚུལ་ལ། སྦྱོར་བ་རས་བྲིས་ཞི་དཀྱིལ་སྤྱི་འགྲེ་སྒོས་ཆོས་ལྷ་མཚན་ཅན་གྱི་འདིང་དཀྱིལ་བཀྲམ་པའམ། མ་འབྱོར་ན་མཎྜལ་ལ་ཚོམ་བུ་དབུས་དང་ཕྱོགས་མཚམས་སུ་རེ་རེ། དེ་རྒྱབ་མཚམས་བཞི་དང་ཤར་ནུབ་གཉིས་སུ་རེ་རེ་སྟེ་དྲུག །དེ་རྒྱབ་བཞི་བཅས་བཀོད་པའི་སྟེང་དུ་མཉྫིར་བུམ་པ་སོ་ལྔའི་བཅུད་ལྡན་ཁ་རྒྱན་མགུལ་ཆིངས་ཀྱིས་སྤྲས་པ། ཤར་དུ་གསང་མཚན་ཤོག་དྲིལ་ལམ་རྡོ་དྲིལ་ལྷན་ཅིག་ཏུ་བསྡམས་པ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། མདུན་དུ་སྐུ་ཙཀ་ཡོངས་རྫོགས། ཤར་ལྷོར་མངའ་དབུལ་ཆས་ཁྲི་གདུགས་གླེགས་བམ་ཕྱག་ཤིང་འཁོར་ལོ་རྡོ་དྲིལ་དུང་བཅས་ཀྱི་ཙཀླི། ལྷོ་ནུབ་ཏུ་གསང་ཐོད་ཨ་མྲྀ་ཏས་གཏམས་པ། ནུབ་བྱང་དུ་རིག་མའི་གཟུགས་བརྙན། བྱང་ཤར་དུ་རང་བྱུང་གི་ཤེལ་རྡོ་བཅས་འགོད། ཕྱི་ནང་གི་མཆོད་པ་དང་ཚོགས་གཏོར་སོགས་སྤྱི་ལྟར་དང་། མིག་དར་མེ་ཏོག་སོགས་ཉེར་མཁོ་ཡོ་བྱད་རྣམས་ཚང་བར་འདུ་བྱས་ལ། དབང་སྒྲུབ་ཆོ་གའི་སྔོན་རྗེས་རྣམས་བླ་མའི་བྱང་བུ་ཁྲིགས་བསྡེབས་ལྟར་ལས། མངོན་རྟོགས་གཏེར་གཞུང་ཕྱི་སྐོར་ཡི་དམ་སྒྲུབ་པ། སེམས་ཉིད་ཀ་ནས་དག་པའི་ངང་༔ སོགས་སྦྱར་ལ་བདག་མདུན་དབྱེར་མེད་དུ་གསལ་གདབ། ཛཔྲ་ཀྱི་སྐབས་བཟླས་དམིགས་ནི། [31b] རང་གི་ཐུགས་སྲོག་ས་བོན་ལས༔ བདེ་བ་ཆེན་པོའི་འོད་ཟེར་འཕྲོས༔ རབ་འབྱམས་རྒྱལ་བའི་དཀྱིལ་འཁོར་པའི༔ ལྷ་ཚོགས་རྣམས་ཀྱི་ཐུགས་རྒྱུད་བསྐུལ༔ དེ་རྣམས་ཐུགས་རྗེའི་འོད་ཟེར་རྣམས༔ མཁའ་ཁྱབ་ཀུན་ཏུ་སྣང་བ་ཡིས༔ བདག་དང་འགྲོ་ཀུན་སྒྲིབ་གཉིས་སྦྱངས༔ ཡེ་ཤེས་མཆོག་གིས་བྱིན་རླབས་གྱུར༔ ཅེས་བསྒོམ་ལ་སྒྲུབ་ཐབས་ཀྱི་བསྐྱེད་སྔགས་རྣམས་གཙོ་འཁོར་གྱི་འགྲོས་དང་སྦྱར་ཏེ་བཟླས་མཐར། བུམ་བཟླས་ནི། བུམ་པ་རང་བྱུང་གི་གཞལ་ཡས་ཁང་དུ་ལྷ་རྣམས་དྭངས་པའི་མཚོ་ལ་གཟའ་སྐར་ཤར་བ་ལྟར་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཕོག །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་གཉིས་མེད་རོ་གཅིག་གྱུར། །ཅེས་གཟུངས་ཐག་ནས་འཇུས་ཏེ་བཟླས་པ་ཅི་འགྲུབ་བྱ། མཐར་སྟོང་ཚིག་གིས་མཆོད་བསྟོད་ཕུལ་ལ། ཨོཾ་ཨཱཿཧཱུྃ་གིས་མཆོད་ཡོན་ཕུལ་བས། བུམ་པའི་ལྷ་རྣམས་བདེ་སྟོང་ཆེན་པོས་འོད་དུ་ཞུ་བ་བུམ་པའི་ཆུ་དང་རོ་གཅིག་ཏུ་གྱུར་པར་མོས། ལས་བུམ་གོང་ལྟར་བརླབ། བཀའ་གཏེར་སྲུང་མའི་གཏོར་འབུལ་དང་ཚོགས་མཆོད་ཕུལ། རིག་པའི་མེ་ཏོག་དོར་ལ་གནང་བ་ནོད་དེ་དཀྱིལ་འཁོར་ཡོལ་བས་བསྒྲིབ་བོ། །དབང་བསྐུར་ [32a] དངོས་ལ། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་ཆོས་བཤད་གོང་བཞིན་རྒྱས་བསྡུས་ཇི་ལྟར་རིགས་པ་དང་ཁྱད་པར། འདིར་རྫོགས་པ་ཆེན་པོ་སྡེ་གསུམ་གྱི་ནང་ཚན་ཕྱི་སྐོར་སེམས་ལུང་མ་ཧཱའི་མན་ངག་དང་འབྲེལ་བ་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ། ཡེ་ཤེས་སྤྱི་བླུགས་ཀྱི་དབང་བསྐུར་ཟབ་མོ་བསྒྲུབ་པ་ལ་བདག་ཉིད་ཀྱིས་བགྱི་འོས་རྣམས་སྔོན་དུ་གྲུབ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག །ཁྱེད་རང་རྣམས་སྔོན་ཆད་གསང་བའི་དཀྱིལ་འཁོར་ཆེན་པོར་མ་ཞུགས་པ་མཚོན་པའི་ཕྱིར་མིག་དར་འཆིང་བར་ཞུ། ཨོཾ་ཙ་ཀྵུ་བྷནྡྷ་ཝཱ་ར་མ་ཎཱ་ཡེ་སྭཱ་ཧཱ། ཞེས་མིག་དར་འཆིང་། ཡེ་ཤེས་ཀྱི་ལྷ་དང་མཇལ་བའི་ཕྱག་རྟེན་དུ་མེ་ཏོག་གི་ཕྲེང་བ་རེ་བཟུང་བར་མཛོད། ཨ་ཁཾ་བཱི་ར་ཧཱུྃ། ཞེས་མེ་ཏོག་གཏད། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་ཐལ་མོ་མེ་ཏོག་དང་བཅས་མི་ཕྱེད་དད་པས་གསོལ་བ་གདབ་པ་འདིའི་རྗེས་ཟློས། ཨེ་མ་ཧོ་བདེ་གཤེགས་བླ་མ་རྒྱལ་བ་སྲས་བཅས་ཀུན༔ མ་ལུས་བདག་ཅག་རྣམས་ལ་དགོངས་སུ་གསོལ༔ རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་རུ༔ བདག་ཅག་གཞུག་ཅིང་སྨིན་པར་མཛད་དུ་གསོལ༔ ལན་གསུམ། དེ་ལྟར་གསོལ་བ་ [32b] བཏབ་པ་ལ་སྤྲོ་བ་བསྐྱེད་པའི་སྒོ་ནས་གནང་བ་སྦྱིན་པ་ལགས་ཏེ། ཨོཾ༔ རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་འདིར༔ འཇུག་ཅིང་སྨིན་པ་བསྐལ་པར་རྙེད་མི་འགྱུར༔ རྩོལ་བས་ཚུལ་བཞིན་འཇུག་པར་རྗེས་ཡི་རང༔ བུ་རྣམས་ཚུར་ཤོག་དམ་ཚིག་ཐུབ་པར་གྱིས༔ ཞེས་བསྒོ། དེ་ལ་ཐོག་མར་རྒྱུད་དག་པར་བྱ་བའི་སླད་དུ་སོགས་སྐྱབས་སེམས་ཚོགས་བསགས་བཅས་སྔར་བླ་མའི་ཟབ་དབང་གི་སྐབས་བཞིན་འདིར་བྱ། གསང་སྔགས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་ལྷག་པས་བསྡུས་པ་རྣམས་ལེགས་པར་བླངས་ནས་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། ཨེ་མ་ཧོཿ བདེ་གཤེགས་སྲས་བཅས་མ་ལུས་པ༔ ཀུན་ནས་བདག་ལ་དགོངས་སུ་གསོལ༔ དེ་བཞིན་གཤེགས་པའི་རིགས་རྣམས་ཀྱིས༔ སྡོམ་པ་མ་ལུས་བདག་གིས་བཟུང་༔ སྲོག་གི་ཕྱིར་ཡང་མི་བཏང་ངོ་༔ ལན་གསུམ། དམ་ཚིག་རྡོ་རྗེའི་ཕྱག་རྒྱ་སྤྱི་བོར་བཀོད་པ་ཁེ་ཉེན་གྱི་དཔང་པོར་བཞུགས་པའི་དོན་གོ་བར་གྱིས་ཤིག །དེ་ལྟར་ཡིན་ན་དེ་བཞིན་གཤེགས་༔ རྡོ་རྗེ་དབྱིངས་ཀྱི་དཀྱིལ་འཁོར་དུ༔ བཅུག་ཅིང་སྨིན་པར་བྱེད་དུ་རུང༔ དམ་ཚིག་ཆེན་པོ་དེ་ཉིད་སྲུངས༔ དངོས་གྲུབ་ཆེན་པོ་དེ་ཐོབ་བྱ༔ དེ་བས་དམ་ལས་མ་འདའ་ཞིག༔ ཨོཾ་བཛྲ་ས་མ་ཡ་ [33a] ཧཱུྃ༔ ཞེས་རྡོ་རྗེ་མགོར་བཞག སློབ་དཔོན་གྱིས་དབྱེ་བའི་རྒྱ་དང་བཅས། ས་མ་ཡ་པྲ་ཝེ་ཤ་ཡ་ཕཊ༔ ཅེས་པས། དཀྱིལ་འཁོར་གྱི་སྒོ་བཞི་ཤག་གིས་དབྱེ་བར་གྱུར། ཅེས་བརྗོད་ལ་ཡོལ་བ་བསལ། ཤར་སྒོ་ནས་གཡས་བསྐོར་དུ་ཕྱིན་ཏེ་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་བྱ་བར་མོས་པས་ཐལ་མོ་གནས་གསུམ་དུ་སྦྱོར་ལ་འདིའི་རྗེས་ཟློས། ཨོཾ་ན་མ་སྟེ་ཧཱུྃ༔ ཨོཾ་ན་མ་མཱི་ཧཱུྃ༔ ཨོཾ་ན་མོ་ན་མ་ཧཱུྃ༔ ལན་བཞི། དེ་རྣམས་ཀྱིས་ཕྱི་འཇུག་གི་རིམ་པ་རྣམས་གྲུབ། དེ་ནས་ནང་འཇུག་གི་དངོས་གཞི་ཡེ་ཤེས་པ་དབབ་པའི་སླད་དུ། ཁྱེད་རང་རྣམས་དཀྱིལ་འཁོར་ཆེན་པོའི་ཤར་སྒོའི་ཁྱམས་སུ་དབང་སྟེགས་ཀྱི་ཁྲི་ལ་འཁོད་པར་མོས་ཏེ་སྒོ་གསུམ་གྱི་གནད་ལེགས་པར་གཅུན་ལ་དམིགས་པ་འདི་རྩེ་གཅིག་སྒོམ་མཛོད། ཤུ་ནྱ་ཏས་བསང་སྦྱང་། ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཀྱིས་མཚོན་པའི་གཟུང་འཛིན་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་ཀྱི་ངང་ལས་ཆུ་ལས་ཆུ་བུར་བརྡོལ་བ་ལྟར་སྐད་ཅིག་གིས་རྣམ་པར་སྣང་མཛད་སྐུ་མདོག་དཀར་གསལ་ཞལ་གསུམ་ཞི་ཞིང་འཛུམ་པའི་ཉམས་ཅན། ཕྱག་དྲུག་གི་གཡས་གསུམ་འཁོར་ལོ་རྡོ་རྗེ་རིན་པོ་ཆེ་དང་། གཡོན་གསུམ་པདྨ་རྒྱ་གྲམ་དྲིལ་བུ་འཛིན་པ། ཞབས་ [33b] རྡོ་རྗེའི་སྐྱིལ་མོ་ཀྲུང་གིས་བཞུགས་པའི་པང་དུ་ཡུམ་དབྱིངས་ཕྱུག་མ་སྔོན་མོ་འཁོར་ལོ་དང་དྲིལ་བུ་འཛིན་པས་མགུལ་ནས་འཁྱུད་པ་དང་མཉམ་པར་སྦྱོར་བ། གཉིས་ཀའང་ཞི་བའི་ཚུལ་དགུ་ལྡན་ཅིང་། དར་དང་རིན་པོ་ཆེ་སོགས་ལོངས་སྤྱོད་རྫོགས་པའི་རྒྱན་གྱིས་སྤྲས་པ། འོད་ཟེར་དཔག་ཏུ་མེད་པར་འཕྲོ་བའི་སྐུ་ཅན་དུ་གསལ་བའི་སྤྱི་བོར་ཧོཾ། མགྲིན་པར་ལྃ། སྙིང་གར་བྃ། ལྟེ་བར་རྃ། རྐང་མཐིལ་དུ་ཡྃ་རྣམས་ཀྱིས་མཚན་པ་དང་། སློབ་དཔོན་གྱི་ཐུགས་ཀ་ནས་འོད་ཟེར་གྱི་སྣང་བ་བསམ་གྱིས་མི་ཁྱབ་པའི་འཕྲོས་པས་འོག་མིན་གྱི་ཞིང་ན་བཞུགས་པའི་བདེ་བར་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། དེ་ཐམས་ཅད་ནམ་མཁའི་དབྱིངས་གང་བར་བྱོན་ཏེ་ལུས་ཀྱི་དཀྱིལ་གྱི་ཡི་གེ་རྣམས་ལ་ཐིམ། ཡི་གེ་རྣམས་འོད་དུ་མེར་གྱིས་ཞུ་ནས་ལུས་ཀྱི་ནང་ཐམས་ཅད་གང་བས་བདེ་སྟོང་གི་ཡེ་ཤེས་མཆོག་ཏུ་འབར་བར་མོས་མཛོད། ཅེས་འབེབས་པའི་རྫས་བཏུལ། རོལ་མོའི་སྒྲ་དང་བཅས། ཨོཾ་ཧཱུྃ་ཏྲཱྃ་ཧྲཱིཿཨཱཿམཱུྃ་ལཱྃ་མཱྃ་པཱྃ་ཏཱྃ་ཛྙཱ་ན་སཏྭ་ཧཱུྃ༔ ཨཱ་བེ་ཤ་ཡ་ཨ་ཨཱཿཞེས་དྲག་ཏུ་བརྗོད་ལ་དབབ། དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་བརྟན་པར་བྱས་པའི་མོས་པ་མཛོད། རྡོ་རྗེ་མེ་ཏོག་དང་བཅས་པ་སྤྱི་བོར་བཞག་ལ། ཏིཥྛ་བཛྲས་བརྟན་པར་བྱ། སྔར་བྱིན་པའི་ [34a] མེ་ཏོག་དེ་ཉིད་ཚེ་རབས་ནས་འབྲེལ་བའི་རིགས་ཀྱི་ལྷ་ལ་འབུལ་བའི་མོས་པས་འདིའི་རྗེས་ཟློས་དང་བཅས་ཚོམ་བུའི་དཀྱིལ་འཁོར་དུ་འདོར་བ་ཞུ། དགྲིམ་དཀྱིལ་བཀོད་ལ། ཧོཿ བདེ་གཤེགས་ཀུན་འདུས་དཀྱིལ་འཁོར་འདིར༔ སྙིང་པོའི་ཡེ་ཤེས་བསྟན་བྱའི་ཕྱིར༔ རིག་པའི་མེ་ཏོག་འདི་འབུལ་གྱིས༔ ལས་འཕྲོའི་དབང་གིས་བཞེས་སུ་གསོལ༔ པུཥྤེ་པྲ་ཏཱིཙྪ་ཧོཿ ཞེས་འདོར་དུ་གཞུག ། མེ་ཏོག་ལྷག་པའི་ལྷས་བཞེས་ཏེ་སླར་དབང་རྟགས་ཅོད་པན་དུ་བཅིངས་པར་མོས་ཤིག །ཧོཿ མི་གནས་ཡེ་ཤེས་དཀྱིལ་འཁོར་དུ༔ རིག་པའི་མེ་ཏོག་ཕུལ་བ་འདི༔ བྱིན་རླབས་བསམ་མི་ཁྱབ་པར་ཟུངས༔ དངོས་གྲུབ་ཐམས་ཅད་འདིས་ཐོབ་བོ༔ པུཥྤེ་གྷྲྀ་ཎ་སྟྭྃ་ཨི་མཾ་ས་ཏྭ་མ་ཧཱ་བ་ལ། ཞེས་མེ་ཏོག་སླར་སྤྱི་བོར་བཅིངས། མ་རིག་པའི་སྒྲིབ་གཡོགས་དང་མིག་དར་ལྷན་ཅིག་བསལ་བར་མོས་ཤིག །གསེར་ཐུར་ཐོགས་ལ། ཧོཿ སྔོན་གྱི་རྒྱལ་བ་ཐམས་ཅད་ཀྱིས༔ འགྲོ་བའི་མིག་ནི་དབྱེ་བར་མཛད༔ སངས་རྒྱས་ས་ལ་བཀོད་པ་བཞིན༔ དེང་འདིར་རྣམ་སྣང་མཛད་བདག་གིས༔ མ་རིག་མིག་ནི་དབྱེ་བར་བྱ༔ ཙཀྵུ་པྲ་བེ་ཤ་ཡ་ཕཊ༔ ཞེས་མིག་དར་བསལ། དེ་ལྟར་དྲི་མེད་ཡེ་ཤེས་ཀྱི་སྤྱན་ཐོབ་པ་ལ་བརྟེན་ནས་ [34a] བཅོམ་ལྡན་འདས་རྣམ་པར་སྣང་མཛད་ཡབ་ཡུམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་མངོན་སུམ་དུ་མཇལ་བར་མོས་ལ་སྤྲོ་བ་རྒྱ་ཆེན་པོ་བསྐྱེད་མཛོད། དེ་རྣམས་ཀྱིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་པ་ལགས། ཞུགས་ནས་མངོན་པར་དབང་བསྐུར་བ་དངོས་ལ་རྣམ་གྲངས་བཞི་ལས། དང་པོ་བུམ་པའི་དབང་གི་སླད་དུ། སློབ་དཔོན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་གདན་གསུམ་ཚང་བའི་དབང་གི་ལྷ་ནམ་མཁའ་གང་བར་སྤྱན་དྲངས། དེ་རྣམས་དང་སློབ་དཔོན་ལྷན་ཅིག་པས་རིན་པོ་ཆེའི་བུམ་པ་རྡོ་རྗེ་མི་བསྐྱོད་པའི་རང་བཞིན་ཅན་གྱི་བདུད་རྩིའི་ཆུ་རྒྱུན་གྱིས་གང་བ་ཐོགས་ཏེ་བཀྲ་ཤིས་པའི་རྣམ་པ་དུ་མ་དང་ལྡན་པས་དབང་བསྐུར་བར་མོས་ཤིག །རྣམ་བུམ་ཐོགས་ལ། ཧཱུྃ༔ རིན་ཆེན་བུམ་པ་གཞལ་ཡས་ཁང་༔ ནང་དུ་བདེ་གཤེགས་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ སྣང་སྟོང་ཡེ་ཤེས་རྟོགས་པར་ཤོག༔ ཀ་ལཱ་ཤ་ཨ་བྷི་ཥིཉྩ་ཧཱུྃ༔ སྤྲོ་ན་བསྐྱེད་སྔགས་རེ་རེའི་མཐར་ཀ་ལཱ་ཤ་སྦྱར། བུམ་པ་སྤྱི་བོར་བཞག་ཅིང་བུམ་ཆུ་སྦྱིན། དེ་ལྟར་བུམ་པའི་ཆུས་དབང་བསྐུར་བས་ཉོན་མོངས་པ་ཞེ་སྡང་དག །རྣམ་པར་ཤེས་པའི་ཕུང་པོ་རྡོ་རྗེ་མི་ [35a] བསྐྱོད་པའི་ངོ་བོར་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། དབང་ལྷ་རྣམས་དང་སློབ་དཔོན་ལྷན་ཅིག་པས་རིན་ཆེན་འབྱུང་ལྡན་གྱི་ངོ་བོར་གྱུར་པའི་རིན་པོ་ཆེའི་དབུ་རྒྱན་གྱིས་དབང་བསྐུར་ཞིང་སྤྱི་བོར་བཅིངས་པར་མོས་ཤིག །དབུ་རྒྱན་ཐོགས་ལ། ཧཱུྃ༔ རིན་ཆེན་མཛེས་པའི་དབུ་རྒྱན་འདི༔ རྒྱལ་བ་ཀུན་གྱི་ཅོད་པན་ཏེ༔ སྐལ་ལྡན་བུ་ལ་དབང་བསྐུར་བས༔ མཉམ་ཉིད་ཡེ་ཤེས་རྟོགས་པར་ཤོག༔ རཏྣ་མུ་ཀུ་ཊ་ཨ་བྷི་ཥིཉྩ་ཏྲཱྃ༔ ཞེས་སྤྱི་བོར་བཅིངས། དེ་ལྟར་དབུ་རྒྱན་ཅོད་པན་གྱིས་དབང་བསྐུར་བས་ཉོན་མོངས་པ་ང་རྒྱལ་དག །ཚོར་བའི་ཕུང་པོ་རིན་ཆེན་འབྱུང་ལྡན་གྱིུ་ངོ་བོར་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། དབང་ལྷ་རྣམས་དང་སློབ་དཔོན་ལྷན་ཅིག་པས་སྣང་བ་མཐའ་ཡས་ཀྱི་རང་བཞིན་ཅན་གྱི་རྡོ་རྗེས་དབང་བསྐུར་ཞིང་ལག་གཡས་སུ་གཏད་པར་མོས་ཤིག །རྡོ་རྗེ་ཐོགས་ལ། ཧཱུྃ༔ མི་ཆོད་མི་ཤིགས་རྡོ་རྗེ་འདི༔ རྒྱལ་བ་ཀུན་གྱི་གསང་གསུམ་སྟེ༔ སྐལ་ལྡན་བུ་ལ་དབང་བསྐུར་བས༔ སོར་རྟོག་ཡེ་ཤེས་རྟོགས་པར་ཤོག༔ པདྨ་དྷཱ་ར་ཨ་བྷི་ཥིཉྩ་ཧྲཱིཿ ཞེས་སྤྱི་བོར་བཞག་ཅིང་ལག་གཡས་ [35b] སུ་གཏད། དེ་ལྟར་རྡོ་རྗེས་དབང་བསྐུར་བས་ཉོན་མོངས་པ་འདོད་ཆགས་དག །འདུ་ཤེས་ཀྱི་ཕུང་པོ་སྣང་བ་མཐའ་ཡས་ཀྱི་ངོ་བོར་གནས་གྱུར། སོ་སོར་རྟོག་པའི་ཡེ་ཤེས་མངོན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། དབང་ལྷ་རྣམས་དང་སློབ་དཔོན་ལྷན་ཅིག་པས་དོན་ཡོད་གྲུབ་པའི་རང་བཞིན་ཅན་གྱི་དྲིལ་བུས་དབང་བསྐུར་ཞིང་ལག་གཡོན་དུ་གཏད་པར་མོས་ཤིག །དྲིལ་བུ་ཐོགས་ལ། ཧཱུྃ སྟོང་པ་ཉིད་ཀྱི་དྲིལ་བུ་ཆེ༔ རྒྱལ་བ་ཀུན་གྱི་དབྱངས་དང་ལྡན༔ སྐལ་ལྡན་བུ་ལ་དབང་བསྐུར་བས༔ བྱ་གྲུབ་ཡེ་ཤེས་རྟོགས་པར་ཤོག༔ ཀརྨ་གྷཎྜེ་ཨ་བྷི་ཥིཉྩ་ཨཱ༔ ཞེས་སྤྱི་བོར་བཞག་ཅིང་ལག་གཡོན་དུ་གཏད། དེ་ལྟར་དྲིལ་བུས་དབང་བསྐུར་བས་ཉོན་མོངས་པ་ཕྲག་དོག་དག །འདུ་བྱེད་ཀྱི་ཕུང་པོ་དོན་ཡོད་གྲུབ་པའི་ངོ་བོར་གནས་གྱུར། བྱ་བ་གྲུབ་བའི་ཡེ་ཤེས་མངོན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། དབང་ལྷ་རྣམས་དང་སློབ་དཔོན་ལྷན་ཅིག་པས་རྣམ་པར་སྣང་མཛད་ཀྱི་རང་བཞིན་ཅན་གྱི་རྡོ་རྗེའི་མིང་གིས་མངོན་པར་དབང་བསྐུར་བར་མོས་ཤིག །གསང་མཚན་ཅོད་པན་ནམ་རྡོ་དྲིལ་ལྷན་ཅིག་ཏུ་བསྡམས་པ་ཐོགས་ལ། ཧཱུྃ༔ རྒྱལ་བ་ཀུན་གྱི་མཚན་མཆོག་ནི༔ ཐོག་མ་བར་དང་མཐའ་མར་དགེ༔ སྐལ་ལྡན་བུ་ལ་དབང་བསྐུར་བས༔ ཆོས་དབྱིངས་ཡེ་ཤེས་རྟོགས་ [36a] པར་ཤོག༔ བུདྡྷ་ན་མཿསརྦ་ཏ་ཐཱ་ག་ཏ་ཀྱེ་དཔལ་ཀུན་ཏུ་གཟིགས་པ་ཞེས་བྱ་བའི་དེ་བཞིན་གཤེགས་པའོ། །ཞེས་བསྐུར། དེ་ལྟར་མིང་གིས་དབང་བསྐུར་བས་ཉོན་མོངས་པ་གཏི་མུག་དག །གཟུགས་ཀྱི་ཕུང་པོ་རྣམ་པར་སྣང་མཛད་ཀྱི་ངོ་བོར་གནས་གྱུར་། ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། དེའི་རྗེས་འབྲེལ་དུ་ལྷ་སྐུ་ཕྱག་རྒྱའི་དབང་བསྐུར་པ་ལ། དཀྱིལ་འཁོར་པའི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་འཕྲོས་ཏེ་ཁྱེད་རང་ཁྱེད་རང་རྣམས་ལ་ཐིམ་པར་མོས་ཤིག །སྐུ་ཙཀ་རྣམས་རིམ་པར་ཐོགས་ལ། ཧཱུྃ༔ དབུས་ཀྱི་ཕྱོགས་ཀྱི་དེ་བཞིན་གཤེགས་༔ བཅོམ་ལྡན་རྣམ་པར་སྣང་མཛད་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ རྣམ་པར་སྣང་མཛད་དབང་ཐོབ་ཤོག༔ ཨོཾ་ཧཱུྃ་ཏྲཱྃ་ཧྲཱིཿཨཱཿ མཱུྃ་ལཱྃ་མཱྃ་པཱྃ་ཏཱྃ༔ ཛྙཱ་ན་ས་ཏྭ་ཧཱུྃ༔ ཨ་བྷི་ཥིཉྩ་ཨོཾ༔ ཧཱུྃ༔ ཤར་གྱི་ཕྱོགས་ནས་དེ་བཞིན་གཤེགས༔ བཅོམ་ལྡན་རྡོ་རྗེ་སེམས་དཔའ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ རྡོ་རྗེ་སེམས་དཔའི་དབང་ [36b] ཐོབ་ཤོག༔ ཨོཾ་བཛྲ་ས་ཏྭ་ཨཱཿཨ་བྷི་ཥིཉྩ་ཨོཾ༔ ཧཱུྃ༔ ལྷོ་ཡི་ཕྱོགས་ནས་དེ་བཞིན་གཤེགས༔ བཅོམ་ལྡན་འཇམ་དཔལ་གཞོན་ནུ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ འཇམ་དཔལ་གཞོན་ནུའི་དབང་ཐོབ་ཤོག༔ ཨོཾ་མཉྫུ་ཤྲཱི་མཱུཾ༔ ཨ་བྷི་ཥིཉྩ་ཨོཾ༔ ཧཱུྃ༔ ནུབ་ཀྱི་ཕྱོགས་ནས་དེ་བཞིན་གཤེགས༔ བཅོམ་ལྡན་འཇིག་རྟེན་དབང་ཕྱུག་ལ༔ དེ་བཞིན་གཤེགས་དང་བྱང་ཆུབ་སེམས་༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ འཇིག་རྟེན་དབང་ཕྱུག་དབང་ཐོབ་ཤོག༔ ཨོཾ་ཨཱ་རྻ་ཨ་ཝ་ལོ་ཀི་ཏེ་ཤྭ་རི་ཧྲཱིོཿ ཨ་བྷི་ཥིཉྩ་ཨོཾ༔ ཧཱུྃ༔ བྱང་གི་ཕྱོགས་ནས་དེ་བཞིན་གཤེགས༔ བཅོམ་ལྡན་ཕྱག་ན་རྡོ་རྗེ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ ཕྱག་ན་རྡོ་རྗེའི་དབང་ཐོབ་ཤོག༔ ཨོཾ་བཛྲ་པཱ་ཎི་ཧཱུྃ༔ ཨ་བྷི་ཥིཉྩ་ཨོཾ༔ ཧཱུྃ༔ ཤར་ལྷོ་མཚམས་ཀྱི་དཀྱིལ་འཁོར་ནས༔ བཅོམ་ལྡན་ཀུན་ཏུ་བཟང་པོ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོའི་བསྐོར༔ སྐལ་ [37a] ལྡན་བུ་ལ་དབང་བསྐུར་བས༔ ཀུན་ཏུ་བཟང་པོའི་དབང་ཐོབ་ཤོག༔ ཨོཾ་ས་མནྟ་བྷ་དྲ་ཧཱུྃ༔ ཨ་བྷི་ཥིཉྩ་ཨོཾ༔ ལྷོ་ནུབ་མཚམས་ཀྱི་དེ་བཞིན་གཤེགས༔ བཅོམ་ལྡན་ནམ་མཁའི་རྒྱལ་པོ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ ནམ་མཁའི་སྙིང་པོའི་དབང་ཐོབ་ཤོག༔ ཨོཾ་ཁ་གརྦྷ་ཏྲཾ༔ ཨ་བྷི་ཥིཉྩ་ཨོཾ༔ ཧཱུྃ༔ ནུབ་བྱང་མཚམས་ཀྱི་དེ་བཞིན་གཤེགས༔ བཅོམ་ལྡན་ས་ཡི་སྙིང་པོ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ ས་ཡི་སྙིང་པོའི་དབང་ཐོབ་ཤོག༔ ཨོཾ་ཀྵིཾ་རཱ་ཛ་ཧྲཱིཿ ཨ་བྷི་ཥིཉྩ་ ཨོཾ༔ ཧཱུྃ༔ བྱང་ཤར་མཚམས་ཀྱི་དེ་བཞིན་གཤེགས༔ བཅོན་ལྡན་བྱམས་པ་མགོན་པོ་ལ༔ དེ་བཞིན་གཤེགས་དང་བྱང་ཆུབ་སེམས༔ མ་ལུས་འཁོར་ཚོགས་རྒྱ་མཚོས་བསྐོར༔ སྐལ་ལྡན་བུ་ལ་དབང་བསྐུར་བས༔ བྱམས་པ་མགོན་པོའི་དབང་ཐོབ་ཤོག༔ ཨོཾ་མེེ་ཏྲི་དྷ་ར་ཨཱཿ ཨ་བྷི་ཥིཉྩ་ཨོཾ༔ ཞེས་སྤྱི་བོར་བསྐུར། དེ་ལྟར་བརྡ་ལྷ་སྐུ་ཕྱག་རྒྱས་དབང་བསྐུར་བ་ལ་བརྟེན་ནས། དོན་ཕྱི་སྣོད་གཞལ་ཡས་ཁང་། ནང་བཅུད་ [37b] ལྷའི་དཀྱིལ་འཁོར། རྒྱུད་ཕུང་ཁམས་སྐྱེ་མཆེད་དབང་ཡུལ་དང་བཅས་པ་ཐམས་ཅད་བདེ་གཤེགས་ཞི་བ་རྡོ་རྗེ་དབྱིངས་ཀྱི་ལྷ་ཚོགས་སུ་ཡེ་ནས་བཞུགས་པ་ཉིད་ཐབས་འདིས་གསལ་བཏབ་པ་ཡིན་པས། དེང་ཕྱིན་ཆད་གདན་གསུམ་ཚང་བའི་དཀྱིལ་འཁོར་འཁོར་ལོའི་ང་རྒྱལ་ལ་རྟག་ཏུ་གནས་པའི་སྒོ་ནས་ཅིར་སྣང་ཆོས་ཉིད་བདེ་བ་ཆེན་པོའི་ལོངས་སྤྱོད་ལ་རོལ་པར་མཛོད་ཅིག །དེ་ལྟར་དབང་ཡོངས་སུ་རྫོགས་པ་ཐོབ་པ་ལ་ཁམས་གསུམ་ཆོས་ཀྱི་རྒྱལ་པོར་མངའ་གསོལ་བའི་ཕྱིར་ཁྱེད་རང་རྣམས་སེང་གེས་བཏེགས་པའི་རིན་པོ་ཆེའི་ཁྲི་ལ་གནས་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་ཕུབ་ཅིང་། རྐང་འོག་ཏུ་འཁོར་ལོ། །ལག་ཏུ་རྡོ་དྲིལ་དུང་དང་གླེགས་བམ་ཕྱག་ཤིང་རྣམས་གཏད་ནས་རྡོ་རྗེ་སློབ་དཔོན་གྱི་དབང་གི་བྱེད་ལས་གཞན་དོན་འཆད་ཕྲིན་གྱི་གནང་བ་སྩལ་བར་མོས་ཤིག །ཡོ་བྱད་རྣམས་གཏད་ལ། ཧཱུྃ༔ རང་བྱུང་ལྷུན་གྲུབ་དགོངས་པ་མངོན་གྱུར་པའི༔ རྡོ་རྗེ་སློབ་དཔོན་བདག་པོའི་དབང་ཐམས་ཅད༔ དེང་འདིར་རྡོ་རྗེ་སློབ་དཔོན་འདིར་རྫོགས་ནས༔ རྒྱལ་བ་རྣམས་ཀྱིས་ཤིས་པ་བརྗོད་གྱུར་ཅིག༔ ཅེས་དང་། རྟེན་འབྲེལ་སྙིང་པོ་བཟླས་པའི་མེ་ཏོག་འཐོར། དེ་ལྟར་ན་ཕྱི་མཚན་མའི་དཀྱིལ་འཁོར་དུ་བུམ་པའི་དབང་ཐོབ། ལུས་རྩའི་དྲི་མ་དག །ལམ་སྣང་སྟོང་ [38a] ཟུང་འཇུག་བསྐྱེད་པའི་རིམ་པ་བསྒོམ་པ་ལ་དབང་། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །འདིར་དབང་གཞུང་དུ་མཆོག་དབང་གོང་མ་གསུམ་དབང་ཕྲེང་ཆེ་ཆུང་ནས་བླང་བར་གསུངས་པ་གཏེར་ཁ་རིགས་གཅིག་པའི་གནད་ཀྱིས་དགའ་རབ་སྙིང་ཐིག་ནས་ལེན་པའི་ཕྱག་བཞེས་ལྟར་ན། གཉིས་པ་གསང་བའི་དབང་གི་སླད་དུ། བླ་མ་དཀྱིལ་འཁོར་གྱི་བདག་པོ་ཡབ་ཡུམ་སྙོམས་པར་ཞུགས་པའི་བདེ་བའི་སྒྲ་དང་དགའ་བའི་འོད་ཟེར་གྱིས་རྒྱལ་བ་སྲས་དང་བཅས་པ་བཀུག་ཏེ་ཞལ་དུ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ། མཁའ་གསང་ནས་ཕྱུངས་ཏེ་དཀར་དམར་ལྷག་པའི་བྱང་སེམས་ཐོད་པའི་བདུད་རྩི་དང་རོ་གཅིག་ཏུ་འདྲེས་པ་ལྕེ་ལ་བཞག་སྟེ་དབང་བསྐུར་བར་མོས་ཤིག །གསང་ཐོད་ཐོགས་ལ། ཨ༔ ཇི་ལྟར་བདེ་གཤེགས་ཡབ་རྣམས་ཀྱིས༔ རང་གི་སྲས་ལ་དབང་བསྐུར་བཞིན༔ བདེ་ཆེན་བྱང་ཆུབ་སེམས་ཀྱི་ཆུས༔ རྟོག་པའི་དྲི་མ་བསལ་བར་བྱ༔ བོ་དྷི་ཙིཏྟ་ཨ་བྷི་ཥིཉྩ་ ཧོཿ ཞེས་བདུད་རྩི་སྦྱིན། རྣམ་པར་རྟོག་པ་མེད་པའི་བློས་སྔགས་འདིའི་རྗེས་ཟློས་དང་བཅས་མྱང་བར་ཞུ། ཨ་ཧོ་མ་ཧཱ་སུ་ཁ་ཧོཿ ཞེས་མྱང་དུ་བཅུག ། དེས་སློབ་དཔོན་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་རླུང་གི་ [38b] དྲི་མ་དག །ལམ་རང་བྱིན་རླབས་ཀྱི་རིམ་པ་བསྒོམ་པ་ལ་དབང་། འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་གི་སླད་དུ། སློབ་དཔོན་གྱི་ཡུམ་དབྱིངས་ཕྱུག་མ་ལས་གཟུགས་དང་ལང་ཚོ་ཕུལ་དུ་བྱུང་ཞིང་མཚན་ཉིད་ཡོངས་སུ་རྫོགས་པའི་ཤེས་རབ་མ་སྤྲོས་ཏེ་ཁྱེད་རང་གི་མདུན་དུ་ཆགས་པའི་ཉམས་འགྱུར་དང་བཅས་འཁོད་ནས་བདེ་བ་བརྟེན་པར་བསྐུལ་བར་མོས་ཤིག །རིག་ཙཀ་ཐོགས་ལ། ཧཱུྃ༔ དགའ་བའི་གནས་ཆེན་ཕྱག་རྒྱ་མོ༔ སྣ་ཚོགས་གཟུགས་ཅན་ཡིད་འོང་མ༔ ཁྱེར་ཅིག་ཁྱེར་ཅིག་སེམས་དཔའ་ཆེ༔ དགའ་བདེའི་རོལ་མོ་རྟག་ཏུ་གྱིས༔ མ་ཧཱ་མུ་དྲ་ཛྙཱ་ན་ཨ་བྷི་ཥིཉྩ་ཧཱུྃ༔ ཞེས་ལག་ཏུ་གཏད། ཛཿཧཱུྃ་བྃ་ ཧོཿ ཨ་ནུ་རཱ་ག་ཛྙ་ན་བཛྲ་ས་མ་ཡ་ཧོཿ ཞེས་ཤེས་རབ་མ་དང་འདུ་ཤེས་གསུམ་ལྡན་གྱིས་སྙོམས་པར་ཞུགས་པས་ཡས་བབས་རྒྱུ་དང་མས་བརྟན་འབྲས་བུའི་དགའ་བ་བཞི་ཉམས་སུ་མྱོང་། ལྷན་ཅིག་སྐྱེས་པའི་ཡེ་ཤེས་འགྱུར་མེད་དུ་བརྟན་པར་མོས་ཤིག །དེས་ཕྱག་རྒྱ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ། ཡིད་ཐིག་ལེའི་སྒྲིབ་པ་དག །ལམ་གཞན་ལུས་ཕོ་ཉའི་ལམ་བསྒོམ་པ་ལ་དབང་། འབྲས་བུ་ [39a] ཐུགས་རྡོ་རྗེ་ཆོས་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །དབང་བཞི་པ་དོན་དམ་ངོ་སྤྲོད་རིག་པ་རྩལ་གྱི་དབང་གི་སླད་དུ། སྔར་དཔེ་ལས་སྐྱེས་པའི་ཡེ་ཤེས་དེ་ཉིད་ཀྱིས་མཚོན་བྱེད་དུ་བྱས་ནས་དོན་དམ་རང་བྱུང་ལྷན་ཅིག་སྐྱེས་པའི་ཡེ་ཤེས་གདོད་ནས་རང་རིག་རང་ལ་གསལ་བའི་དོན་རྡོ་རྗེ་སེམས་དཔའི་མེ་ལོང་གི་བརྡས་མཚོན་ཏེ། དབྱིངས་ཀ་དག་ནང་གསལ་སྤྲོས་པ་དང་བྲལ་བ་ལས་རིག་གདངས་ལྷུན་གྲུབ་ཀྱི་སྣང་བ་ཕྱིར་གསལ་དུ་འཆར་ཡང་ངོ་བོ་ལས་ནམ་ཡང་མ་གཡོས་པའི་དོན་གོ་བར་མཛོད་ལ་མཉམ་པར་ཞོག་ཅིག །ཤེས་རྡོ་ཐོགས་ལ། ཨཿ གསང་བ་མཆོག་གི་དགྱེས་པ་ན༔ ཐམས་ཅད་བདག་ཉིད་རྟག་ཏུ་བཞུགས༔ རྡོ་རྗེ་སེམས་དཔའ་བདེ་བ་ཆེ༔ དབྱིངས་རིག་ཟུང་འཇུག་རྟོགས་པར་ཤོག༔ ཛྙཱ་ན་བཛྲ་ས་ཏྭ་ཨ་ཨ་ཨ༔ ཞེས་ཤེལ་རྡོ་སྙིང་གར་བཞག ། དེས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཚིག་དབང་རིན་པོ་ཆེ་ཐོབ། སྒོ་གསུམ་ཆ་མཉམ་གྱི་སྒྲིབ་པ་དག །ལམ་འོད་གསལ་རྫོགས་པ་ཆེན་པོ་ཀ་དག་དང་ལྷུན་གྲུབ་ཉམས་སུ་ལེན་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། བླ་མ་དཀྱིལ་འཁོར་པའི་ལྷ་ཚོགས་ [39b] ནམ་མཁའ་གང་བའི་རྩ་གསུམ་སོགས་ཀྱིས་མཚམས་སྦྱར་ལ་ཤིས་བརྗོད་རྒྱས་པར་སྤེལ། དེ་རྣམས་ཀྱི་སྒོ་ནས་གཞུང་ལས། དེ་ལྟར་རྡོར་དབྱིངས་དཀྱིལ་འཁོར་གྱི༔ དབང་བསྐུར་ཡོངས་རྫོགས་ཕྱི་སྐོར་འདི༔ ཡང་ཟབ་ཀུན་གྱི་མཐར་ཐུག་པ༔ རྫོགས་པ་ཆེན་པོའི་ཆོས་སྡེར་འདུ༔ ཞེས་གསུངས་པ་ལྟར་རྫོགས་བ་ཆེན་པོ་ཕྱི་སྐོར་སེམས་སྡེ་མ་ཧཱའི་མན་ངག་དང་འབྲེལ་བ་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་ཟབ་མོ་ལེགས་པར་གྲུབ་པ་ལགས་སོགས་ཀྱི་མཚམས་སྦྱར་ལ་དམ་ཚིག་བསྒྲགས་བཟུང་སོགས་དབང་གི་རྗེས་རིམ་སྤྱི་ལྟར་དང་། སློབ་དཔོན་གྱིས་ཚོགས་ལ་རོལ་ཞིང་ལྷག་མ་གཏོང་བ་སོགས་ཆོ་གའི་རྗེས་རིམ་རྣམས་ཀྱང་གཞུང་བཞིན་མཐར་ཆགས་སུ་བཏང་བས་གྲུབ་བོ། །མི་འགྱུར་གཉུག་མའི་ཡེ༵་ཤེ༵ས་གང་། །རྡོ༵་རྗེ༵་དབྱིངས་ཀྱི་ཕྱག་རྒྱ་རུ། །ཡོངས་སྣང་དེ་ཡི་དཀྱིལ་འཁོར་དུ། །འཇུག་པའི་ཐབས་ཚུལ་འདི་རྨད་བྱུང་། །ཕྱི་སྐོར་སེམས་སྡེའི་ཡི་དམ་ཞི་བ་རྡོ་རྗེ་དབྱིངས་ཀྱི་དབང་གི་ལེའུ་ཚན་ནོ།། །།


[40a] སྭསྟི། བྱིན་རླབས་འཕོ་བའི་དབང་ཆེན་གྱིས། །སྐལ་ལྡན་གྲོལ་གཞིར་སྨིན་མཛད་པ། །རིག་འཛིན་བླ་མར་གུས་བཏུས་ནས། །ཁྲིད་ཀྱི་བྱིན་རླབས་མཛོད་སྒོ་དབྱེ། །རྫོགས་པ་ཆེན་པོ་སྡེ་གསུམ་ལས་ཕྱི་སྐོར་སེམས་སྡེའི་ཁྲིད་ཀྱི་བྱིན་རླབས་ཨ་ཡིག་མདའ་འཕེན་མ་བསྒྲུབ་པ་ལ། སྦྱོར་བ་རྡུལ་ཚོན་ནམ་རས་བྲིས་ཀྱི་ཕྱི་དཀྱིལ་ཙིཏྟ་ལ་ནང་པདྨ་དམར་པོ་འདབ་མ་བཅུ་དྲུག་པ་འདབ་མ་རྣམས་ལ་ཨ་དཀར་པོ་རེ་རེས་མཚན་པ་ཅན་བྲིས་པ་བཀྲམ། དེ་སྟེང་མཉྫི་ཁར་བུམ་པ་བཅུད་ལྡན་ལ་རས་སམ་ཤིང་ཤུན་ལ་བྲིས་པའི་ཙིཏྟ་དམར་པོ་ཨ་ཡིག་གིས་མཚན་པ་གདག །ཕྱི་ནང་གི་མཆོད་ཚོགས་བཤམ་ལ། བླ་མའི་བསྐྱེད་རིམ་བྱང་བུའི་ཁྲིགས་བསྡེབས་ལྟར་བདག་མདུན་དབྱེར་མེད་ཀྱི་དགོངས་པས་བཟླས་པ་ཚོགས་མཆོད་དང་། བུམ་ནང་ཨ་དཀར་པོ་ཞུ་བས་བདུད་རྩིར་བསམ་ལ་ཨ་གང་འགྲུབ་བཟླ། ལས་བུམ་རྡོར་སེམས་ཀྱིས་བརླབ། བྱིན་རླབས་དངོས་ལ། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམ། མཎྜལ་བཀྱེ་བསྡུ་དང་། སེམས་བསྐྱེད་གསལ་བཏབ་ལ་མཚམས་སྦྱོར་གྱི་ཁྱད་པར། དེ་ལ་འདིར་གྲུབ་པའི་རིག་འཛིན་རྣམས་ཀྱི་གསུམ་དུ་གྲགས་པའི་ཡ་གྱལ་རྫོགས་པ་ཆེན་པོ་ཀུན་གྱི་འཕྲོ་གཞིའམ་རྩ་བ་ལྟ་བུ་སེམས་ཕྱོགས་རྒྱ་མཚོའི་མན་ངག་གི་སྙིང་པོ་མཁས་པ་ཤྲཱི་སེང་ཧས་དུས་གསུམ་ཀུན་མཁྱེན་པདྨ་འབྱུང་གནས་ [40b] ལ་གདམས་པ། ཟབ་དགུའི་ཡང་བཅུད་རྟོག་གེ་དང་དམ་ཉམས་འདྲེས་ཁྱེར་གྱི་བསྲེ་བསླད་མ་ཞུགས་པ་གཏེར་བརྒྱུད་མཁའ་འགྲོའི་ཁ་རླངས་ཐུ་ལེ་བ་འདི་ཉིད་ཀྱི་ཁྲིད་ཀྱི་བྱིན་རླབས་ཟབ་མོ་འབུལ་བ་ལ། ཀྱེ་རིགས་ཀྱི་བུ་རྣམས༔ དབང་བསྐུར་བའི་ཚུལ་ནི་འདི་ལྟ་བུ་སྟེ༔ བསྐུར་བྱ་བསྐུར་བྱེད་བསྐུར་ཐོབ་དང་བྲལ་བའོ༔ དེ་མཚོན་བྱེད་བརྡ་ལ་བརྟེན་ནས་འཇུག་དགོས་པས་ཐོག་མར་ཁྱེད་རང་གི་དངོས་སུ་འབྱོར་པ་དང་ཡིད་ཀྱིས་སྤྲུལ་པའི་མཆོད་སྤྲིན་ཞིང་ཁམས་རྒྱ་མཚོར་ཁྱབ་པར་སྤྲུལ་ནས་མཎྜལ་འབུལ་བར་ཞུ། ཞེས་མཎྜལ་འབུལ་དུ་གཞུག ། འོ་རང་ཤེས་རིག་པའི་རྒྱལ་པོ་བླ་མ་ཀུན་ཏུ་བཟང་པོར་བསྒོམ་ལ་དད་མོས་གདུང་བ་དྲག་པོས་གསོལ་བ་འདེབས་པ་འདིའི་རྗེས་ཟློས། བདག་ལ་བྱ་རྩོལ་བྲལ་བའི་རྫོགས་ཆེན་ཐམས་ཅད་སེམས་སུ་བལྟ་བ༔ བརྡ་ཙམ་གྱིས་ནི་རྟོགས་པའི་བྱིན་རླབས་འཕོ་བའི་དབང་༔ སློབ་དཔོན་དགོངས་པའི་མཐར་ཐུག་གང་ཡོད་བདག་ལ་སྩལ་དུ་གསོལ༔ ལན་གསུམ། དེ་ནས་མཆོད་བསྟོད་བཤགས་པ་བྱ་བ་རྣམས་ཚིག་རིས་དང་མཐུན་པའི་སྒོམ་དོན་གསལ་ཐོབ་ཅིག །དཔོན་སློབ་ལྷན་ཅིག་པས་བླ་མའི་བྱང་བུའི་མཆོད་བསྟོད་དང་། སྒྲིབ་སྦྱོང་བྱང་བུའམ་ཆོས་ཉིད་ཀློང་བཤགས་སོགས་རྒྱས་བསྡུས་ཅི་རིགས་བྱ། དེ་ནས་བྱིན་རླབས་དངོས་གཞིའི་ [41a] སླད་དུ་དམིགས་པ་འདི་བཞིན་དུ་མཛོད། ཀྱེ་རིགས་ཀྱི་བུ་སློབ་དཔོན་མ་བཅོས་གསལ་རྫོགས་ལྷུག་པར་གནས་པའི་སྙིང་རྩ་འདབ་དབུས་དང་བཅས་པའི་ཕྱོགས་བརྒྱད་ན་ཨ་སུམ་ཅུ་རྩ་གཅིག་བསྒོམ༔ སྙིང་གར་གནས་པའི་ཨ་དཀར་པོ་ལས་འོད་ཟེར་མདའ་འཕང་བ་ལྟར་འཕྲོས༔ དཀྱིལ་འཁོར་དབུས་ཀྱི་ཨ་ཐམས་ཅད་ལའང་ཕོག༔ དེ་ལས་ཀྱང་འོད་ཟེར་སྔར་ལྟར་འཕྲོས་ཏེ་རྫས་ཀྱི་ཨ་ཡིག་ལ་ཕོག༔ དེ་ལས་འོད་ཟེར་སྐར་མདའ་ལྟར་འཕྲོས་པས་སློབ་མའི་སྙིང་ནང་གི་ཨ་ལ་ཕོག་པས༔ སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཨ་ཡིག་བཞི་ལ་ཐིམ༔ རང་ལུས་ཀྱང་ཨ་ཡིག་ལ་ཐིམ༔ ཨ་ཡིག་འོད་དུ་མེར་གྱི་ཞུ་ནས་མི་དམིགས་པར་མཉམ་པར་བཞག༔ སླར་ཡང་མ་འདྲེས་གསལ་རྫོགས་སུ་གསལ་བས༔ སྙིང་གི་ཨ་ཡིག་ལས་འོད་འཕྲོས༔ སྙིང་གའི་ནང་ཐམས་ཅད་གསལ༔ བུམ་ནང་གི་མར་མེ་ལྟར་གསལ་བ་ལ་ཤེས་པ་གཏོད་ཅིག༔ དཀྱིལ་འཁོར་གྱི་བརྡ་དོན་ངོ་སྤྲད་ནི། དཀྱིལ་འཁོར་དབུས་ཀྱི་ཨ་དཀར་པོ་དེ་ནི་ཀུན་གཞི་དྲི་མ་མེད་པ་མཚོན་ནོ༔ ཨ་ཡིག་ཕྱི་རོལ་དུ་ཙིཏྟ་རིན་ཆེན་འདི་ནི་ཀུན་གཞིའི་ངོ་བོ་སྟོང་པ་ནི་འོད་གསལ་བ་ལས་མ་རིག་པ་རྣམ་ཤེས་སམ༔ རིག་པའི་དུས་ན་ [41b] ཡེ་ཤེས་སུ་སྐུ་མཚོན་པས་སྐུ་གཉིས་ལྷུན་གྱིས་གྲུབ་པའོ༔ བུམ་པ་ནི་ལུས་དབང་པོའི་སྒོ་ཐམས་ཅད་གསལ་ཞིང་རྣམ་ཤེས་ཀྱི་འཇུག་སྒོ་ཕྱི་ནང་གི་ཡུལ་ཤེས་གཉིས་ཀྱི་སྒོ་འབྱེད་པ་ལྟ་བུ་སྟེ༔ བུམ་པའི་སྒོ་འགགས་པས་སོ་སོར་དབྱེ་བ་ཙམ་ལས་བུམ་པ་དབྱིངས་སུ་ཐིམ་པའི་ཚེ་ནམ་མཁའ་ཕྱི་ནང་གཅིག་ཏུ་འགྱུར་བ་བཞིན༔ ལུས་ཀྱི་རྒྱ་གྲོལ་བས་ཡུལ་དང་ཤེས་པ་དབྱེར་མེད་ཅིང་༔ དེ་ཉིད་ཀྱང་ཀུན་གཞིའི་དབྱིངས་སུ་རྫོགས་པར་འགྱུར་བས་ན༔ མ་དག་པའི་དབང་པོ་གཉིས་སུ་འཛིན་ཅིང་༔ དག་པའི་དབང་པོ་བདེན་མེད་དུ་མཐོང་བས་བུམ་པ་ཆག་པའི་མར་མེས་ཕྱི་ནང་འོད་གསལ་བ་བཞིན་འོད་གསལ་དག་པའི་གཞོན་ནུ་བུམ་པའི་སྐུར་ལྷུན་གྱིས་གྲུབ་པར་མཚུངས་ལ༔ པདྨ་ནི་མ་དག་པའི་ངོ་ནས་ཀུན་གཞི་ནས་གསལ་བའི་ཆ་མ་རྟོགས་པར་རྣམ་ཤེས་ཀྱི་འཇུག་པ་དབང་པོས་མཚམས་སྦྱར་ཏེ་ཡུལ་ཐམས་ཅད་སྣ་ཚོགས་བདེན་ཞེན་དུ་མཐོང་བར་བྱེད་ལ༔ དེ་ཉིད་རྣམ་ཤེས་གནས་འགྱུར་བའི་ཚེ་དབང་པོ་བདེ་བ་འོད་གསལ་ཞིང་ཕྱིའི་རྟོག་ཚོགས་ཐམས་ཅད་ཆོས་ཉིད་ཀྱི་རང་སྣང་དུ་རྟོགས་པས་ཞིང་ཁམས་ཡོན་ཏན་བསམ་གྱིས་མི་ཁྱབ་པ་མཐོང་བའི་བརྡའོ༔ ཞེས་ངོ་སྤྲོད་ལ། བུམ་པ་ཐོགས་ཏེ། དང་པོ་དབང་པོའི་ཚོར་བས་མཚམས་སྦྱར་ཏེ༔ [42a] རྣམ་ཤེས་ལོག་པར་བྱེད་པ་དག་པ་དང་༔ དབང་པོ་བདེན་མེད་ཉིད་དུ་རྟོགས་བྱའི་ཕྱིར༔ བདེ་ཆེན་གཞོན་ནུ་ཕྱག་རྒྱ་བུམ་པའི་དབང་༔ དེ་བས་དེ་ཉིད་རྟོགས་ཕྱིར་དབང་བསྐུར་རོ༔ ཁ་རྒྱན་སྣ་ཚོགས་མདོངས་སྒྲོ་པདྨའི་འདབ༔ སྣང་སྟོང་དབྱེར་མེད་ཡུལ་ཀུན་དག་པ་དང་༔ སྣང་སྲིད་བདེ་བ་ཆེན་པོར་འཆར་བའི་ཕྱིར༔ བུམ་པ་ཁ་རྒྱན་སྣང་སྟོང་མདངས་གསལ་དབང་༔ ཕྱི་ནང་གཉིས་མེད་རྟོགས་ཕྱིར་དབང་བསྐུར་རོ༔ རྣམ་ཤེས་ཡུལ་ལ་འཇུག་པའི་མ་དག་པ༔ རྡོ་ལ་གསེར་འགྱུར་རྩི་ཡིས་བཏབ་པ་བཞིན༔ བདེ་ཆེན་མཁའ་དབྱིངས་མཉམ་སྦྱར་གཅིག་ཏུ་འཁྲིལ༔ ཙིཏྟ་རིན་ཆེན་འབར་བ་ཟུར་བརྒྱད་འདི༔ བདེ་བ་བརྒྱད་དུ་མཚོན་པས་དབང་བསྐུར་བས༔ དགའ་བཞིའི་ཡེ་ཤེས་དབྱིངས་སུ་རྣམ་ཤེས་དག༔ ཡེ་ཤེས་འོད་གསལ་ཀློང་དུ་གྲོལ་བར་ཤོག༔ ཨ་ནི་ཀུན་གཞི་ཀ་དག་སྒྲིབ་བྲལ་ལས༔ གཙང་ཞིང་རྟག་ལ་འགྱུར་བ་མེད་པའི་ངང་༔ བཟང་ངན་བླང་དོར་འཛིན་པའི་མཐའ་ལས་འདས༔ འོད་གསལ་ཀློང་ཆུབ་སེམས་ཉིད་ཡེ་ཤེས་སུ༔ བལྟས་པས་སྣང་སྲིད་ཐམས་ཅད་ཡེ་ཤེས་དབྱིངས༔ ཡོངས་རྫོགས་རྩོལ་བ་མེད་པའི་ངང་དུ་ལྟ༔ [42b] ཨ་ཨ་ཨ༔ ཞེས་བུམ་པ་སྤྱི་བོར་བཞག་ཅིང་བུམ་ཆུ་སྦྱིན། རིག་འཛིན་དགོངས་མཉམ་ཀྱི་གླུས་བསྐུལ་བ་ལ་རྩ་བ་རིག་འཛིན་ཤྲཱི་སེངྷ་ས་བསམ་གཏན་གྱི་ཁང་བུར་རྡོ་རྗེའི་གླུ་ཕྱི་མ་རྒྱས་པ་འདི་སྐད་ལོ། །ཇི་ལྟར་བསམ་ཡང་མི་རྟོག་ངང་༔ ཞེས་སོགས་ནས། བདེ་བ་ཆེན་པོར་ཨ་ལ་ལ་ ཧོཿ ཞེས་བླངས། དེ་ལྟར་རྡོ་རྗེ་གླུའི་དགོངས་དོན་གདམས་ངག་གི་ངོ་སྤྲོད་ཆིག་བརྒྱུད་དུ་གདམས་པ་ནི། སློབ་བུའི་རྣ་བར་ཟངས་དུང་ལྟ་བུའི་སྦུབས་མཆུ་བཙུགས་ནས་སྐད་ཤུབ་བུས་གཞན་གྱིས་མ་ཐོས་པར་བྱས་ལ། བུམ་པ་ཁུངས་གཏོར་གྱི་དགོངས་པ་ལས། ཆོས་ཐམས་ཅད་ཡེ་ཤེས་སུ་ཤེས༔ ཡེ་ཤེས་བཙལ་དུ་མེད་པའོ༔ ཞེས་དང་། དང་པོ་ཐུགས་གཅིག་ཏུ་ཐུག༔ བར་དུ་བལྟ་བ་གཅིག་ལ་བལྟ༔ མཐར་ནི་མཐོང་བ་གཅིག་ཏུ་མཐོང་༔ ཞེས་ལན་གསུམ་རེ་དལ་བུར་བརྗོད། དེ་ནས་སྔར་སེམས་སྡེའི་བླ་མའི་སྒྲུབ་དབང་གི་སྐབས་བཞིན་རྒྱལ་པོ་དྷ་ཧེ་ན་ཏ་ལོ་ནས་བཟུང་རིག་འཛིན་བཅོ་བརྒྱད་ཀྱི་གླུ་རྣམས་འདིར་བླང་ལ་གླུ་རེ་དང་སྒྲགས་ནས་ངོ་སྤྲད་སྦུབས་མཆུའི་གདམས་པ་བཅོ་བརྒྱད་ནི། དང་པོ། གསེར་གྱི་ཁྱུང་གཤོག་ཅེས་པའི་མན་ངག་ལས། གསལ་ལ་མི་གཡོ་ཐལ་བྱུང་བའོ། །གཉིས་པ། བུམ་པ་ཁུངས་གཏོར་ཞེས་བྱ་བའི་མན་ངག་ལས། ཡེ་ཤེས་མ་བཙལ་ཡན་པར་ཞོག །གསུམ་པ། ཉི་མ་ཤར་བ་ལྟ་བུའི་ [43a] མན་ངག་ལས། རིག་པ་ཅིག་ཆར་ལྷུག་པར་བཞག །བཞི་པ། དབུལ་མོ་གཏེར་འཆང་ཞེས་བྱ་བའི་མན་ངག་ལས། ཐམས་ཅད་སྤྲུལ་པ་སྐུ་སྟེ་བཏང་སྙོམས་ངང་། །ལྔ་པ། མེ་ལོང་ལྟ་བུ་ཞེས་བྱ་བའི་མན་ངག་ལས། སྤྲོས་མེད་བྱང་ཆུབ་ཡན་ལག་གནས། །དྲུག་པ། ཐིག་ལེ་ཆེན་པོ་ཞེས་བྱ་བའི་མན་ངག་ལས། ཆོས་ཉིད་བདེ་ཆེན་ངང་དུ་གསལ། །བདུན་པ། སེང་གེ་འགྱིང་བ་ལྟ་བུ་ཞེས་བྱ་བའི་མན་ངག་ལས། ཉོན་མོངས་ལྔ་ཉིད་ཡེ་ཤེས་ལྔ་རུ་གསལ། །བརྒྱད་པ། མཁའ་ལྡིང་ཆེན་པོ་ཞེས་བྱ་བའི་མན་ངག་ལས། འཁོར་བ་མ་བཙལ་ཡེ་ནས་སངས་རྒྱས་ཡིན། །དགུ་པ། ཡེ་ཤེས་ཕྲེང་བ་ཞེས་བྱ་བའི་མན་ངག་ལས། སྣང་སྲིད་ཡེ་ཤེས་ངང་དུ་གསལ། །བཅུ་པ། སེམས་ཀྱི་འཁོར་ལོ་ཞེས་བྱ་བའི་མན་ངག་ལས། སེམས་ཀྱི་བདེ་ཆེན་ཉམས་མྱོང་གསལ། །བཅུ་གཅིག་པ། སྒྲོན་མ་གསལ་བ་ཞེས་བྱ་བའི་མན་ངག་ལས། སེམས་ཉིད་གྱིན་འདའ་རྣལ་མར་ཞོག །བཅུ་གཉིས་པ། སྐྱེས་བུ་གྱད་ཀྱི་རྩལ་འཆང་ཞེས་བྱ་བའི་མན་ངག་ལས། རིག་པ་མི་གཡོ་རྒྱ་མཚོ་བཞིན་དུ་གནས། །བཅུ་གསུམ་པ། ལྷ་མོ་མཁའ་ལྡིང་ཞེས་བྱ་བའི་མན་ངག་ལས། [43a] འཁོར་འདས་སེམས་ལ་རྫོགས་པར་ལྷུན་གྱིས་གྲུབ། །བཅུ་བཞི་པ། མན་ངག་ཡེ་ཤེས་འཁྱིལ་བ་ལས། གཉིས་མེད་ཡེ་ཤེས་ངང་དུ་རོ་གཅིག་པས། །བཅོ་ལྔ་པ། ཐིག་ལེ་ཉི་ཤར་ཞེས་བྱ་བའི་མན་ངག་ལས། གཉིས་མེད་རྡོ་རྗེ་ཡེ་ཤེས་གསལ། །བཅུ་དྲུག་པ། ཆོས་ཉིད་མཁའ་ལྟར་ཡངས་པ་ཞེས་བྱ་བའི་མན་ངག་ལས། བླང་དོར་མེད་ཅིང་མཉམ་པའི་ངང་དུ་གསལ། །བཅུ་བདུན་པ། ཡེ་ཤེས་ཆེན་པོ་ཞེས་བྱ་བའི་མན་ངག་ལས། གང་ནས་བལྟས་ཀྱང་ཡེ་ཤེས་རྩེ་གཅིག་འཆར། །བཅོ་བརྒྱད་པ། ནམ་མཁའི་སྤྲིན་དང་ལྡན་པ་ཞེས་བྱ་བའི་མན་ངག་ལས། ཆོས་རྣམས་མ་བཅོས་ལྷུན་གྱིས་གྲུབ་པའི་ངང་། །ཞེས་ལན་གསུམ་རེ་གདབ། འདིར་རྒྱས་པར་འཕྲོས་དོན་ལས་ཅན་དྲྭ་མ་བཞི་དང་། བོད་ཀྱི་རིག་འཛིན་རྣམས་ཀྱི་གླུ་ཡང་རིག་པས་དཔྱད་ལ་གཞུང་གཞན་དུ་རྟོགས་པར་གསུངས་པས། སྤྲོ་ན་སྔ་མ་བཞི་གོང་གི་བླ་མའི་སྒྲུབ་དབང་སྐབས་བཞིན་དང་། ཕྱི་མ་རྣམས་ནང་སྐོར་བླ་མའི་ཆོས་སྡེ་ནས་བླང་བར་བྱ་ཞིང་། འདི་རྣམས་ལ་ངོ་སྤྲོད་ཟུར་དུ་མི་བཞུགས་པས་མ་འགྲུབ་ཀྱང་ཆད་པའི་སྐྱོན་མེད་པར་སེམས། དེ་རྣམས་ཀྱིས་ཕྱི་སྐོར་ཁྲིད་ཀྱི་བྱིན་རླབས་སྨིན་བྱེད་ཟླ་བའི་ཞུན་མ་སྙིང་གི་མུན་སེལ་ཉིད་ཡོངས་སུ་གྲུབ་པ་ལགས། དེ་ལྟར་ལེགས་པར་ཐོབ་པའི་གཏང་རག་དང་། [44a] སླར་ཡང་སྨིན་ཟིན་གྲོལ་བར་བྱེད་པ་ཁྲིད་ཀྱི་རིམ་པ་ཞུ་བའི་ཡོན་དུ་མཎྜལ་ཆབ་གཅིག་འདི་བཞིན་གནང་བར་ཞུ། ངོ་བོ་ཞིང་ཁམས་རྒྱ་ཆེ་བར༔ རང་བཞིན་གསལ་བའི་རྒྱན་གྱིས་སྤྲས༔ ཐུགས་རྗེ་ཅིར་སྣང་མཎྜལ་འདི༔ གསལ་རྫོགས་བདེ་བར་གཤེགས་ལ་འབུལ༔ གུ་རུ་མཎྜ་ལ་པཱུ་ཛ་ཧོཿ དེ་ཡང་རིག་འཛིན་ཆེན་པོ་ཤྲཱི་སེང་ཧའི་དགོངས་བཅུད། གྲུབ་པའི་སློབ་དཔོན་པདྨ་སམྦྷ་ཝ་དང་། ལོ་ཆེན་བེེ་རོ་ཙཱ་ནའི་མན་ངག་གནད་དུ་འདྲིལ་བ་ཟབ་ཆོས་རྫོགས་པ་ཆེན་པོ་སྡེ་གསུམ་ལས། ཕྱི་སྐོར་སེམས་སྡེ་ནམ་མཁའ་ཀློང་ཡངས་ཀྱི་ཁྲིད་ཚུལ་བགྱི་བ་ལ། སྐུ་ཉིད་རྣམས་ཐུགས་གཞན་དུ་མ་གཡེངས་པར་གཏེར་གཞུང་རྡོ་རྗེའི་ཚིག་རྐང་འདི་ལ་སྙན་གྱི་དབང་པོ་རྩེ་གཅིག་ཏུ་གཏོད་འཚལ། ན་མོ་གུ་རུ༔ ཕྱི་སྐོར་དངོས་གཞིའི་ཁྲིད་རིམ་ནི༔ དང་པོ་ཐུགས་གཅིག་ཏུ་ཐུག༔ ཅེས་པས། ལྟ་བ་མངོན་དུ་གྱུར་པའི་བླ་མ་ཞིག་ཏུ་གཏུག༔ གདམས་ངག་ལེགས་པར་ཞུས་ལ་ཐེ་ཚོམ་གྱི་དྲི་མ་བཅད༔ ཡུལ་དངོས་པོར་འདུག་གམ་བརྟག་བས་མི་རྟག་པ་གློ་བུར་དུ་བྱུང་བ་རྣམས་ལ་བློ་བཞག་སྟེ༔ སྨིག་རྒྱུ་དུ་བ་རྣམས་ལའང་དངོས་པོ་ཡོད་མེད་ [44b] ལེགས་པར་དཔྱད་པའི་ཚེ༔ ཡུལ་ཐམས་ཅད་སྟོང་ཞིང་ཡུལ་དེ་རྣམས་ལ་རྣམ་ཤེས་འབྱམས་པའི་མཚམས་སྦྱར་བ་པོ་ནི་དབང་པོ་སྟེ༔ དཔེར་ན་མགོ་ད་ལྟ་རང་དུ་མཚོན་གྱིས་བཅད་དེ་རྡོ་བས་ཞིབ་པར་འཐག་ནས་བྱ་ཁྱིར་བྱིན་ན་མགོ་བོ་སོང་བའི་ཡུལ་ཡང་མེད༔ དེ་བཞིན་དུ་དབང་པོ་མི་རྟག་པ་དང་དབང་པོ་སྟོང་པ་ཉིད་དོ༔ དབང་པོ་དེ་ལ་འཇུག་པའི་རྣམ་ཤེས་དུས་གསུམ་གྱི་རྣམ་རྟོག་ལ་དཔྱད་དེ་བརྟག་ན། སྔར་དྲན་པའི་ཤེས་པ་མཚན་མོའི་རྨི་ལམ་བཞིན་དུ་གར་སོང་ཆ་མེད༔ མ་འོངས་པའི་རྟོག་པ་གློ་བུར་ཆུའི་རྦ་རླབས་ལྟ་བུར་འབྱུང་བའི་ཡུལ་འདི་ལས་བྱུང་མེད༔ ད་ལྟའི་ཤེས་པ་ནམ་མཁའི་དབྱིངས་སུ་ཁུ་རླངས་ལྟ་བུ་འདི༔ དངོས་མེད་མྱུར་དུ་ཡལ་བ་ཡིན་ནོ༔ རྣམ་ཤེས་འབྱུང་བའི་ཡུལ་ཀུན་གཞི་ཉིད་དངོས་པོར་གྲུབ་བམ་མ་གྲུབ་༔ གྲུབ་ན་ཕྱི་ནང་ལུས་ཀྱི་སྟོད་སྨད་སྙིང་དཀར་ནག་མཚམས་གང་དུ་གནས་པ་བརྟག་པས་ཡུལ་མི་རྙེད་དོ༔ མ་གྲུབ་ན་འཁོར་བ་བདེ་སྡུག་གི་བྱེད་ལས་སྣ་ཚོགས་པ་ཀུན་གཞི་ཉིད་ལས་འབྱུང་བའོ༔ བར་དུ་བལྟ་བ་གཅིག་ལ་བལྟ༔ ཞེས་པས། སྣང་བ་ཐམས་ཅད་དངོས་མེད་ནམ་མཁའི་མཇའ་ཚོན་ལྟ་བུར་བལྟས་བྱས་ཏེ༔ སྟོང་པ་ཐམས་ཅད་ [45a] བདེ་བའི་ངང་དུ་རྒྱས་གདབ་གཉིས་སུ་མེད་པ་ནི༔ བདེ་བ་ཐམས་ཅད་སྟོང་པའི་རང་བཞིན་ངོས་བཟུང་བྲལ་བར་ཡེ་ནས་སྟོང་༔ ཕྱལ་ཆད་མ་ཡིན་བདེ་སྟོང་གཉིས་མེད་བདེ་བ་ཆེན་པོར་ལྷུན་གྱིས་གྲུབ༔ སྣང་བ་ཐམས་ཅད་ཡུལ་ལ་འབྱམས་པ་འཁྲུལ་པའི་བློ་རྣམས་མ་ལུས་ཀུན༔ སྟོང་ཞིང་མ་འདྲེས་སོ་སོར་གསལ་བ་བསྐྱེད་པའི་རིམ་པ་མ་བསྐྱེད་གསལ༔ ཡོངས་སུ་འཛིན་པ་མེད་པས་དངོས་པོ་མེད་པར་ཡུལ་རྣམས་ཐམས་ཅད་སྟོང་པར་དག༔ སྟོང་པ་དེ་ཡང་རང་རིག་བྱང་ཆུབ་སེམས་ཀྱི་ངོ་བོ་ཨེ་མ་ཧོཿ བདེ་བ་དེ་ཡང་དབང་པོའི་སྒོ་ལ་རྐྱེན་གྱིས་སྨིན་པར་ཡང་དག་བརྩོན༔ དབང་པོ་བདེ་བ་རང་ལས་བྱུང་ཞིང་ལུས་ཀུན་ཐམས་ཅད་ཀུན་ཏུ་ཁྱབ༔ ཀུན་ཏུ་སྣང་བའི་སྒོ་ནི་ཚོགས་དྲུག་ཡུལ་ལ་འཇུག་པའི་དབང་པོའི་གསང་ལམ་བདེ༔ བདེ་བ་དེ་ཉིད་སྟོང་པར་བྱས་ན་དབང་པོའི་ཡུལ་ཡང་རྣམ་པར་སྟོང་པར་རང་རིག་བྱང་ཆུབ་སེམས་ཀྱིས་སོ༔ ཕྱག་རྒྱའི་ཡུལ་ལ་དབང་པོའི་རྣམ་ཤེས་བཅུག་བྱས་ན༔ རྣམ་ཤེས་བདེ་བའི་ངང་དུ་ཐིམ་གྱུར་ཚོགས་དྲུག་ཡུལ་སྣང་འགག༔ རྣམ་ཤེས་གང་དུ་མི་གནས་སྟོང་ལ་མྱོང་གསལ་བདེ་བ་ཆེ༔ དབྱེར་མེད་དག་པར་གྱུར་པ [45b] རང་རིག་བྱང་ཆུབ་སེམས་ཀྱིས་མཐོང་༔ ཡུལ་དབང་ཤེས་གསུམ་བདེ་བའི་ངང་དུ་རྣམ་པར་དག་གྱུར་པས༔ ཀུན་གཞིའི་ངང་དུ་རྣམ་ཤེས་གནས་འགྱུར་སེམས་རིག་གཉིས་མེད་པར༔ འུབ་ཆུབ་ཀློང་དུ་བལྟ་བྱ་བྲལ་བའི་ངང་དུ་རྟོགས་བྱ་ཡེ་ཤེས་ཉིད་ཁོ་ནའོ༔ བལྟ་ཚུལ་ཤྲཱི་སེངྷས་གདམས་པ་ཚིགས་སུ་བཅད་པ་དེ་དག་གིས་རྟོགས་པར་འགྱུར་ལ༔ མཐའ་མར་མཐོང་བ་གཅིག་ཏུ་མཐོང་༔ ཞེས་པས་ཡུལ་སྟོང་བས་ན་དབང་པོའི་མཚང་རིག་ཅིང་རྣམ་པར་དག་སྟེ་འཇུག་བྱེད་རྣམ་ཤེས་བདེ་བ་ཆེན་པོའི་ཡེ་ཤེས་སུ་གྱུར་པས་ཀུན་གཞི་བྱ་རྩོལ་དང་བྲལ་བར་འུབ་ཆུབ་ཀློང་དུ་གྲོལ་བར་འགྱུར་བ་ནི་འབྲས་བུའོ༔ ཕྱི་སྐོར་ཁྲིད་ཀྱི་དངོས་གཞི་རྫོགས་སོ༔ ས་མ་ཡ་རྒྱ་རྒྱ་རྒྱ༔ ཞེས་དང་། སླར་ཡང་དངོས་གཞིའི་ཁྲིད་ཀྱི་བསྡུས་དོན་ནི་འདི་ལྟ་སྟེ། ན་མོ་གུ་རུ༔ ཕྱི་སྐོར་ཁྲིད་ཀྱི་རྗེས་འབྲེལ་ནི༔ ལྟ་སྒོམ་སྤྱོད་གསུམ་འབྲས་བུ་ལས༔ ལྟ་བ་ཀུན་གཞི་སྟོང་བ་ཉིད༔ ཅིར་ཡང་མེད་ལ་མྱོང་བ་ཅན༔ གལ་ཏེ་གནས་པ་མ་ཡིན་ནམ༔ རྣམ་ཤེས་གསལ་སྟོང་དམིགས་སུ་མེད༔ སྤྲོས་པའི་མཐའ་དང་བྲལ་བ་ཉིད༔ དབང་པོ་ཡུལ་གཉིས་བདེ་བར་སྤྱོད༔ ཀུན་གཞི་ཡེ་ཤེས་བདེ་ཆེན་འཆར༔ འབྲས་བུ་སྐུ་གཉིས་ [46a] འགྲུབ་བོ༔ དངོས་གཞིའི་ཁྲིད་དོན་མདོར་བསྡུས་སོ༔ ས་མ་ཡ་རྒྱ་རྒྱ་རྒྱ༔ ཞེས་གསལ་དག་སྙན་པའི་སྒོ་ནས་གོ་བརྡ་འཕྲོད་ངེས་པར་བཀླག ། དེ་དག་རྣམས་ཀྱི་སྒོ་ནས་ཕྱི་སྐོར་སེམས་སྡེའི་མན་ངག་གི་བྱིན་རླབས་ཟབ་ཁྲིད་ཡོངས་རྫོགས་དཀྱུས་གཅིག་ཏུ་ཕུལ་གྲུབ་པ་ལགས་བས། འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་ཉིད་བྱང་ཆུབ་སེམས་ཀྱི་ངོ་བོ་བྱ་རྩོལ་ལས་འདས་པ་གདོད་ནས་ཡེ་སངས་རྒྱས་པར་ཤེས་པས་ངང་བཞག་གི་ཏིང་ངེ་འཛིན་ཆུ་བོའི་རྒྱུན་ལྟར་སྐྱོང་བ་དང་། གཉིས་འཛིན་བློ་རྟོག་གིས་བསྲུང་དུ་མེད་པ་རང་བཞིན་བལྟ་བའི་དམ་ཚིག་ཆེན་པོ་ལས་ནམ་ཡང་འདའ་བར་མི་བྱ་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་དང་། དེ་ལྟར་ཐོབ་པའི་གཏར་རག་ཏུ་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འབུལ་བའི་མོས་པས་འདིའི་རྗེས་ཟློས། དེང་ནས་བརྩམས་ཏེ་སོགས་དང་དགེ་བསྔོ་བཅས་སྤྱི་ལྟར་བྱ། སློབ་དཔོན་གྱིས་ཚོགས་ལ་རོལ་བ་སོགས་ཆོ་གའི་རྗེས་རྣམས་གཞུང་བཞིན་མཐར་དབྱུང་བས་གྲུབ་བོ། །རང་གནས་ཡེ༵་ཤེ༵ས་སྙིང་བོའི་དོན། །རྡོ༵་རྗེ༵འི་ཚིག་གིས་མཚོན་བྱས་ནས། །མངོན་སུམ་གནད་ལ་དབབ་པའི་ཚུལ། །སྨིན་བྱེད་རྒྱ་མཚོའི་ཉིང་ཁུ་ལགས། །ཕྱི་སྐོར་སེམས་སྡེའི་ཁྲིད་ཀྱི་བྱིན་རླབས་ཨ་ཡིག་མདའ་འཕེན་མའི་ལེའུ་ཚན་ནོ།། །།


[47a] སྭསྟི། ཆོས་ཉིད་མཉམ་པའི་ཀློང་ཆེན་ལས། །གང་འདུལ་སྒྱུ་མའི་ཕྱག་རྒྱར་སྟོན། །རིག་འཛིན་ཚོགས་ལ་གུས་བཏུད་ནས། །དེ་ཡི་བྱིན་རླབས་ལམ་མཆོག་དབྱེ། །རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་བླ་མ་རིག་འཛིན་བཅོ་ལྔའི་བྱིན་རླབས་སྒྲུབ་དབང་བསྐུར་བའི་ཚུལ་ལ། སྦྱོར་བ་མདུན་དཀྱིལ་རས་བྲིས་སྤྱི་མཐུན་ནམ་མཎྜལ་མེ་ཏོག་གི་ཚོམ་བུ་ལྷ་གྲངས་བཀོད་པའི་ཁར་འཕྲུལ་སྟེགས་ལ་རིག་འཛིན་བཅོ་ལྔའི་སྐུ་འབག་བཤམ། ཕྱི་ནང་གི་མཆོད་པ་དང་། ཚོགས་ཀྱི་ཡོ་བྱད་སོགས་ཆོ་གར་འོས་པའི་རིགས་རྣམས་ཚོགས་པར་འདུ་བྱས་ལ། དབང་སྒྲུབ་ནང་སྐོར་ཁྲོ་བོའི་བྱང་བུ་ཁྲིགས་བསྡེབས་ཀྱིས་ཁོག་ཕུབ་ནས། མངོན་རྟོགས་དང་བཟླས་པ་རྣམས་ནང་སྐོར་རིག་འཛིན་བླ་མའི་སྒྲུབ་ཐབས་ལྟར་ལ། བཟླས་དམིགས་ནི། ཐུགས་དབུས་པདྨ་ཟླ་བའི་སྟེང་། །ཨ་མཐར་སྔགས་ཀྱི་ཕྲེང་བས་བསྐོར། །འོད་འཕྲོས་རྒྱལ་བ་སྲས་བཅས་མཆོད། །ཚུར་འདུས་དངོས་གྲུབ་བདག་ལ་ཐིམ། །སླར་འཕྲོས་འགྲོ་བའི་སྒྲིབ་གཉིས་སྦྱངས། །སྣོད་བཅུད་ལྷ་དང་གཞལ་ཡས་ཁང་། །སྣང་གྲགས་རྟོག་པའི་ཆོས་རྣམས་ཀུན། །སྐུ་གསུང་ཐུགས་ཀྱི་ཕྱག་རྒྱར་རྫོགས། །ཞེས་གསལ་བཏབ་ལ་གཙོ་བོའི་མཚན་སྔགས་ཅི་ནུས་དང་གཞན་རྣམས་དེའི་ཕྱེད་ཆ་སོགས་ཇི་ལྟར་འོས་པ་རྣམས་དང་ཚོགས་མཆོད་རྒྱས་པར་བྱ་ཞིང་ལས་བུམ་རྡོར་སེམས་བསྐྱེད་བཟླས་ཀྱིས་བརླབ། བྱིན་རླབས་སྒྲུབ་དབང་དངོས་ [47b] ལ། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་མཚམས་བཅད། མཎྜལ་བཀྲམ་བསྡུས་དང་། སེམས་བསྐྱེད་གསལ་བཏབ་ལོ་རྒྱུས་ཀྱི་ཁྱད་པར། དེ་ལ་གསན་བྱ་དམ་པའི་ཆོས་ཀྱི་རྣམ་གྲངས་མཐའ་ཡས་པ་ཞིག་མཆིས་པ་ལས་སྐབས་སུ་བབས་པའི་འདི་ནི་སྔ་འགྱུར་རྙིང་མའི་བཀའ་སྲོལ་ལ་ཐེག་པ་རིམ་པ་དགུར་གྲགས་པ་རྣམས་ཀྱི་ནང་ནས་མཆོག་ཏུ་གྱུར་པ་ནང་དབང་བསྒྲུབ་ཐབས་ཀྱི་ཐེག་པ། དེ་ལའང་ཐབས་དང་ཤེས་རབ་ཟུང་འཇུག་གི་རྣལ་འབྱོར་གཙོར་བཏོན་པའི་དབང་ལས་མ་ཧཱ་ཨ་ནུ་ཨ་ཏི་སྟེ་ཡོ་ག་རྣམ་པ་གསུམ་ལས་འདིར་ཐམས་ཅད་ཀྱི་ཡང་རྩེ་ཨ་ཏི་ཡོ་ག །དེ་ལའང་ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེ་དང་གསུམ་དུ་བཞུགས་པ་ལས་འདིར་ནང་སྐོར་སྙིང་ལྟ་བུ་ཀུན་ཏུ་བཟང་པོ་ཀློང་ཆེན་རབ་འབྱམས་རྒྱལ་པོ་སོགས་རྒྱུད་ལུང་རྣམས་ཀྱི་བསྟན་དོན་ཆོས་ཐམས་ཅད་ཆོས་ཉིད་ཀུན་ཏུ་བཟང་མོའི་ཀློང་ལས་ནམ་ཡང་འདའ་རུ་མེད་པར་སྟོན་པ་ཀློང་སྡེ་ཡིན། འདི་ལའང་རྒྱུད་ལུང་མན་ངག་གི་རིམ་པ་བསམ་གྱིས་མི་ཁྱབ་པ་བཞུགས་ཤིང་། དེ་དག་ལས་ཕལ་མོ་ཆེ་ཞིག་འཇའ་ལུས་རྡོ་རྗེའི་སྐུ་བརྙེས་པ་རིག་འཛིན་གྲུབ་པ་ཡོངས་ཀྱི་གཙུག་རྒྱན་སློབ་དཔོན་ཆེན་པོ་ཤྲཱི་སེང་ཧ་ལས། རྣམ་སྣང་སྤྲུལ་པའི་ལོ་ཙ་བ་ཆེན་པོ་བེེ་རོ་ཙ་ནས་དཀའ་བ་མང་དུ་སྤྱད་ [48a] ནས་གསན་ཏེ་ཀློང་ཆེན་རབ་འབྱམས་རྒྱལ་པོའི་རྒྱུད་ལ་སོགས་པ་བོད་དུ་བསྒྱུར། ལོ་ཙཱ་བ་ཉིད་ཀྱང་འཇའ་ལུས་ཀྱི་གྲུབ་མཐར་གཤེགས་ཤིང་གདམས་ངག་སྤང་མི་ཕམ་མགོན་པོ་ལ་ཆིག་བརྒྱུད་དུ་གནང་བས་དེས་མཚོན་བརྒྱུད་པ་ལྔའི་བར་དུ་འཇའ་ལུས་སུ་གཤེགས་པ་ཤ་སྟག་བྱུང་། དེ་ལས་ཀྱང་གདོད་མའི་བཙན་ས་ཟིན་པའི་གྲུབ་ཐོབ་ཀྱི་བརྒྱུད་པ་བར་མ་ཆད་པ་ལས་བྱོན་པའི་བརྡ་བརྒྱུད་རྡོ་རྗེ་ཟམ་པ་ཞེས་རིང་བརྒྱུད་བཀའི་ཆུ་བོ་ད་ལྟའི་བར་མ་ཉམས་པར་བཞུགས་པ་ཡིན་ལ། འདིར་ནི་དེ་ལས་ཀྱང་བཀའ་བབ་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱ་སྟེ། ཁྱད་པར་གྱི་བརྒྱུད་པ་གསུམ་དང་ལྡན་པའི་ངོ་མཚར་གཏེར་བརྒྱུད་མཁའ་འགྲོའི་ཁ་རླངས་མ་ཡལ་བ། བོད་ཡུལ་ས་འོག་ཀུན་གྱི་གཏེར་གཅིག །དམ་ཆོས་རྫོགས་ཆེན་སྡེ་གསུམ་གྱི་ནང་ཚན་ནང་སྐོར་ཀློང་སྡེའི་རིག་འཛིན་བཅོ་ལྔའི་བྱིན་རླབས་དབང་བསྐུར་གྱི་རིམ་པ་ཟབ་མོ་བསྒྲུབ་པར་བགྱི་བ་ལགས། དེ་ལ་བདག་ཉིད་སློབ་དཔོན་གྱིས་བགྱི་བར་འོས་པ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག ། སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས། ཟུང་འཇུག་དགོངས་པ་རྙེད་པ་ཡི༔ འགྲོ་ [48b] འདུལ་རིག་འཛིན་བཅོ་ལྔ་ཡི༔ བྱིན་རླབས་བརྩེ་བས་གནང་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་བསྐུར་ཐོབ་བྲལ་བའི་དབང་བསྐུར་ཡེ་ནས་རང་ལ་རྫོགས་པར་གདམས་པའི་སྒོ་ནས་ལན་སྦྱིན་པ་འདི་ལ་གསན་པས་ཁྱབ་སྟེ། སྤྱིར་ནི་འགྲོ་འདུལ་རིག་འཛིན་བཅོ་ལྔ་པོ༔ ཐམས་ཅད་ཟུང་འཇུག་མངོན་གྱུར་ཀུན་ཏུ་བཟང༔ དགོངས་པ་རང་བྱུང་ནམ་མཁའི་རྣལ་འབྱོར་ཚོགས༔ ཡེ་ཤེས་སྐུ་ཅན་འཁོར་འདས་ཡོངས་ལ་ཁྱབ༔ བཞུགས་ཡུལ་ཞིང་ཁམས་གཞན་དུ་བཙལ་མི་འཚལ༔ ད་ལྟའི་ནམ་མཁའ་འདིར་ཡང་རྣལ་འབྱོར་རྣམས༔ རང་གི་སེམས་ཉིད་འདི་ལའང་བླ་མས་ཁྱབ༔ བསྐུར་བྱ་བསྐུར་ཐོབ་སྒྲུབ་དང་སྒྲུབ་ཐབས་མེད༔ རྣལ་འབྱོར་ལྟ་བའི་ངང་ལ་སྒྲུབ་དབང་རྫོགས༔ ཞེས་དང་། དེ་ལ་རང་གནས་ཡེ་ཤེས་ཀྱི་ཚོགས་བསགས་པའི་ཆེད་དུ་ལྟ་བའི་རྒྱལ་པོ་ཡས་འབུབ་ཀྱི་མཆོད་པ་འབུལ་བར་གདམས་པ་སྟེ༔ ཨེ་མ་ཧོ་བདེ་གཤེགས་བླ་མ་རྣམས༔ བསམ་གྱིས་མི་ཁྱབ་ཆོས་ཉིད་ཀློང་༔ ཀུན་ཏུ་བཟང་པོའི་རྣལ་འབྱོར་ཡིན༔ ལྟ་བའི་རྒྱལ་པོའི་མཆོད་པ་འབུལ༔ རང་རིག་གདོད་ནས་རྣམ་པར་དག་པ་རིག་རྩལ་བླ་མའི་ལྷ་ཚོགས་རྣམས་ཀྱི་སྤྱན་ [49a] སྔར་གནས་ལུགས་ལྟ་བ་མཇལ་བའི་ཕྱག་འཚལ་ཞིང་གང་ཤར་ཆོས་ཉིད་རྒྱན་དུ་རོལ་བའི་མཆོད་པ་འབུལ་བ་སྔོན་དུ་འགྲོ་བས། གློ་བུར་འཁྲུལ་པའི་མུན་ཁུང་བརྟོལ་ཏེ་འོད་གསལ་སྣང་བའི་དགའ་སྟོན་སྩོལ་བར་གསོལ་བ་གདབ་པ་འདིའི་རྗེས་ཟློས། གདོད་ནས་དག་པའི་ཀུན་བཟང་བླ་མ་ལ༔ མཚན་འཛིན་འཁྲུལ་པའི་བསྐང་བཤགས་མི་འཚལ་ཞིང་༔ གཉིས་སུ་འཛིན་པའི་ཕྱག་འཚལ་མོས་གུས་བྲལ༔ དེ་བས་རང་རིག་ཀློང་དུ་ཕྱག་འཚལ་ལོ༔ གཉིས་སུ་མེད་པའི་ཆོས་སྤྲིན་རྒྱ་མཚོས་མཆོད༔ བསམ་ལས་འདས་པའི་ངང་དུ་ཐུགས་དམ་བསྐང་༔ བརྗོད་མེད་བརྗོད་པ་ཐམས་ཅད་མཐོལ་ལོ་བཤགས༔ ཨེ་མ་ཧོ་བདེ་གཤེགས་བླ་མ་རྣམས༔ ཀུན་བཟང་དགོངས་ཀློང་སེམས་སུ་རྫོགས་པ་ལ༔ ཕྱི་ནང་གཉིས་མེད་སྤྲོས་བའི་མཐའ་ལས་འདས༔ ཆོས་དབྱིངས་ཀློང་ཆུབ་ངང་དུ་ཕྱག་འཚལ་ལོ༔ ཨེ་མ་ཧོ་རང་རིགས་བླ་མ་རྣམས༔ འཁོར་འདས་ཐམས་ཅད་ས་ལེར་མཐོང་བ་ལ༔ གཉིས་སུ་མེད་པའི་དབྱིངས་སུ་ལྷུན་རྫོགས་པས༔ མཐོང་བྱ་མཐོང་མཁན་མེད་ལ་ཕྱག་འཚལ་ལོ༔ ཨེ་མ་ཧོ་བདེ་གཤེགས་བླ་མ་རྣམས༔ ཕྱི་ནང་ནམ་མཁའ་ཀུན་ལ་སྐུ་ནི་ཡོངས་སུ་ཁྱབ་པ་ [49b] ཉིད༔ བཞུགས་པའི་ཡུལ་ནི་ཕྱོགས་བཅུའི་འཇིག་རྟེན་དག་ན་མཆིས༔ གློ་བུར་དྲི་མའི་རྣམ་རྟོག་བསལ་ཕྱིར་གཟུགས་སྐུར་བཞེངས་པ་རྣམས༔ མཚན་འཛིན་འཁྲུལ་པ་འདི་དག་མྱུར་དུ་བསལ་བར་མཛད་དུ་གསོལ༔ ཞེས་གསོལ་བ་བཏབ། སློབ་དཔོན་གྱི་རིག་འཛིན་བླ་མ་རྣམས་ལ་ཐུགས་དམ་བསྐུལ་བའི་སླད་དུ་གསོལ་བ་གདབ་པར་བྱ་བ་ཡིན་ཏེ། ཨེ་མ་ཧོཿ བདེ་གཤེགས་བླ་མ་འགྲོ་འདུལ་རིག་འཛིན་བཅོ་ལྔ་རྣམས༔ དམིགས་མེད་ཆོས་ཀྱི་སྐུ་ལས་ད་ལྟ་བཞེངས་སུ་གསོལ༔ ཕྱི་སྐོར་བླ་མ་རིག་འཛིན་བཅོ་ལྔ་གནང་བར་མཛོད༔ ཡེ་ཤེས་སྐུ་ཡི་སློབ་མར་བྱིན་རླབས་དབང་ཆེན་ད་ལྟ་བསྐུར་དུ་གསོལ༔ ཞེས་གསོལ་བ་བཏབ། སློབ་དཔོན་ཉིད་རིག་འཛིན་བླ་མའི་སྐུར་བཞུགས་པའི་དྲུང་དུ། ཁྱེད་རང་རྣམས་ཀྱང་རིག་འཛིན་བླ་མ་བཅོ་ལྔའི་སྐུ་འདི་བཞིན་དུ་གསལ་ཐོབ་ཅིག །ཨ༔ ཀ་དག་དེ་བཞིན་ཉིད་ཀྱི་དབྱིངས༔ ཞེས་སོགས་སྒྲུབ་ཐབས་མཐར་ཆགས་སུ་བཏང་ནས། སྣང་ལ་རང་བཞིན་མེད་པར་གསལ༔ དེ་ལྟར་གསལ་བཞིན་པ་ལ་རིག་འཛིན་བླ་མ་རྣམས་ཀྱི་དོ་ཧ་རྡོ་རྗེའི་གླུ་དགོངས་པ་མི་གཡོ་བའི་ངང་ནས་བླངས་པ་དང་ཆབ་གཅིག་རང་འདྲའི་སྐུ་གཉིས་པར་རེ་བྱུང་བ་སྤྱི་བོ་ནས་ཐིམ་པས་སྐུའི་བྱིན་རླབས་ [50a] དང་། རྡོ་རྗེའི་བཟླས་པ་བྱ་བ་གསུང་གི་བྱིན་རླབས་དང་། རིག་འཛིན་བླ་མ་རྣམས་རང་རིག་ཏུ་རྫོགས་པའི་ངང་དུ་མཉམ་པར་བཞག་པ་ཐུགས་ཀྱི་བྱིན་རླབས་ཡིན་པས། ཁྱེད་རང་རྣམས་དགོངས་པ་སྐྱེ་མེད་ཀྱི་ངང་ལས་མ་གཡོས་བཞིན་དུ་གྲགས་སྟོང་རྡོ་རྗེའི་གླུ་བླངས་པ་འདི་ལ་སྙན་གྱི་དབང་པོ་རྩེ་གཅིག་ཏུ་གཏོད་པར་ཞུ། དགའ་རབ་རྡོ་རྗེའི་སྐུ་ཐོགས་ལ། ཆོས་ཀྱི་དབྱིངས་ན་རྡོ་རྗེ་སེམས་དཔའི་དྲུང་དུ་སེམས་ཉིད་འོད་གསལ་བའི་དུས་སུ་རིག་འཛིན་དགའ་རབ་རྡོ་རྗེ་འདི་སྐད་ལོ། །ང་ནི་མི་ཡི་རིག་འཛིན་དགའ་རབ་རྡོ་རྗེ་སྟེ༔ སེམས་ལ་བལྟ་བའི་ཡུལ་མེད་འཛིན་པ་རང་སར་དག༔ སྒོམ་པའི་བློ་དང་བྲལ་ནས་གསལ་དང་མི་གསལ་མེད༔ སྤྱོད་པ་ཅི་དགར་བཏང་བས་རེ་དོགས་རྩིས་གདབ་བྲལ༔ འབྲས་བུ་འོད་གསལ་སྙིང་པོའི་ཀློང་དུ་རང་བཞིན་གྲོལ༔ ཞེས་བླངས་ལ་སྐུ་ཙཀ་སྤྱི་བོར་བཞག ། ཨ་སུམ་སྦྲེལ་གྱི་རྡོ་རྗེའི་བཟླས་པ་མཛད་པར་ཞུ། །ཞེས་རྡོར་བཟླས་ལན་བདུན་ནམ་གསུམ་ཙམ་བྱ། དགའ་རབ་རྡོ་རྗེ་རང་རིག་ཏུ་རྫོགས་པའི་ངང་དུ་མཉམ་པར་ཞོག་ཅིག །ཅེས་དགོངས་པའི་ངང་དར་ཅིག་བསྐྱང་། དེ་བཞིན་དུ་འཇམ་དཔལ་བཤེས་གཉེན་གྱི་སྐུ་ཐོགས་ལ། དུར་ཁྲོད་ཧེ་ཆེན་བརྡལ་དུ་མཆོད་རྟེན་ལ་ [50b] སྐུ་རྒྱབ་བརྟེན་ཏེ་བསྒྲུབ་པའི་ཚེ་སྲོད་ཀྱི་དུས་སུ་སློབ་དཔོན་འཇམ་དཔལ་བཤེས་གཉེན་འདི་སྐད་ལོ། །དགའ་རབ་རྡོ་རྗེའི་ཐུགས་སྲས་འཇམ་དཔལ་བཤེས་གཉེན་བདག༔ གདམས་ངག་བསྒོམ་མཁན་མི་སྣང་འོད་གསལ་ཀུན་ལ་ཁྱབ༔ དེ་ཉིད་དམིགས་སུ་མ་མཆིས་དམིགས་ཡུལ་རྡུལ་ཙམ་མེད༔ སྟོང་ཉིད་ཀ་ནས་དག་ཀྱང་སྐུ་དང་ཡེ་ཤེས་གསལ༔ ཞེས་དང་། ཨ་སུམ་སྦྲེལ་གྱི་རྡོར་བཟླས། འཇམ་དཔལ་བཤེས་གཉེན་རང་རིག་ཏུ་རྫོགས་པའི་ངང་དུ་མཉམ་པར་བཞག །ཤྲཱི་སེངྷའི་སྐུ་ཐོགས་ལ། བསམ་གཏན་གྱི་ཁང་བུར་སློབ་དཔོན་ཤྲཱི་སེངྷ་འདི་སྐད་ལོ། །ཇི་ལྟར་བསམ་ཡང་མི་རྟོག་ངང༔ ཇི་ལྟར་སྨྲས་ཀྱང་སྒོམ་པ་མེད༔ སྣང་སྲིད་ཆོས་ཀུན་ཡེ་ཤེས་ངང་༔ ཡེ་ཤེས་བཙལ་དུ་མེད་པ་འདི༔ རང་བྱུང་རང་ཤར་ཐལ་ལེ་བ༔ ང་ནི་དེང་ཕྱིན་གཞི་ལ་གནས༔ གཞི་ནི་མ་བཅོས་ལྷུག་པར་འདུག༔ མཚན་ཉིད་ཀུན་ལྡན་འོད་གསལ་བ༔ ཅིར་ཡང་མ་ཡིན་ཅིར་ཡང་རྟོག༔ ལྟ་བ་མཐར་ཕྱིན་ཤྲཱི་སེང་༔ སྒོམ་པའི་བློ་དང་བྲལ་འདོད་ནས༔ གསལ་བ་འདི་ལ་ལམ་བྱས་པས༔ གཏད་སོ་མེད་པའི་ཉམས་ཤིག་ཤར༔ རྒྱུན་ཆད་མེད་པའི་ཤྲཱི་སེང་༔ སྤྱོད་པ་སྤྱད་དུ་འདུག་གམ་བལྟས༔ ཅི་ [51a] བྱས་ཐམས་ཅད་བདེ་བ་ཆེ༔ གང་བྱུང་ཐམས་ཅད་དགའ་བའི་ངང་༔ ཟུང་འཇུག་མངོན་གྱུར་ཤྲཱི་སེང་༔ འབྲས་བུ་ཐོབ་པར་བྱ་བའི་ཕྱིར༔ གཞི་ཡི་སྟེང་དུ་མཉམ་པར་བཞག༔ འཇམ་དཔལ་བཤེས་གཉེན་གདམས་པ་སྟེ༔ སེམས་ཀྱི་ཀློང་ནས་གཏེར་དུ་རྙེད༔ རྣམ་ཤེས་ཡུལ་དབང་ཀུན་གཞི་རྣམས༔ སོ་སོར་དབྱེར་མེད་དམིགས་སུ་མེད༔ གང་ཡང་འདི་ཞེས་མེད་པ་ཡི༔ བདེ་བ་ཆེན་པོར་ཨ་ལ་ལ་ ཧོཿ ཞེས་དང་། གོང་བཞིན་རྡོར་བཟླས་དང་མཉམ་བཞག་བྱ་བ་འོག་མ་རྣམས་ལ་འགྲེ། ཛྙཱ་ན་སཱུ་ཏྲའི་སྐུ་ཐོགས་ལ། རང་བྱུང་བྲག་དམར་དབེན་རྩ་རུ་མཁའ་འགྲོ་མ་རྣམས་དང་ཚོགས་ཀྱི་འཁོར་ལོ་བསྐོར་བའི་ཚེ་སློབ་དཔོན་ཛྙཱ་ན་སུ་ཏྲ་འདི་སྐད་ལོ། ཨ་ཧོཿ བདེ་བ་ནམ་མཁའི་ཀློང་དུ་བསྟིམ་བྱས་པས༔ བདེ་སྟོང་རྒྱ་ཆེ་ཁྱབ་བརྡལ་ནམ་མཁའ་འདྲ༔ ཞེན་པ་མེད་པ་བདེ་བའི་འཁོར་ལོ་ལ༔ ལུས་ངག་ཡིད་གསུམ་བདེ་བ་ཆེན་པོར་ཤར༔ བི་མ་མི་ཏྲའི་སྐུ་ཐོགས་ལ། དུར་ཁྲོད་ཆེན་པོ་བདེ་ཆེན་བརྩེགས་པར་མཁའ་འགྲོ་དབྱིངས་ཕྱུག་མས་མཆོད་པའི་ཚེ་སློབ་དཔོན་བི་མ་མི་ཏྲ་འདི་སྐད་ལོ། །ཨ་ཧོཿ བདེ་ཆེན་ནམ་མཁའ་གང་བའི་དབྱིངས་སུ་དག༔ རང་བྱུང་རང་ཤར་རིག་པའི་ [51b] ཀློང་དུ་ཐིམ༔ དབྱིངས་རིག་གཉིས་མེད་ཟུང་འཇུག་ལ་བཟླས་པས༔ འཁོར་འདས་ཀུན་ཁྱབ་ཧེ་རུ་ཀ་དཔལ་ལོ༔ བེེ་རོ་ཙཱ་ནའི་སྐུ་ཐོགས་ལ། ཡར་ཀླུང་ཤེལ་གྱི་བྲག་ཕུག་ཆེན་པོར་སྙིང་པོའི་གནས་ལུགས་མངོན་དུ་གྱུར་པའི་ཚེ་སློབ་དཔོན་བེེ་རོ་ཙཱ་ན་འདི་སྐད་ལོ། །ང་ནི་བེེ་རོ་ཙཱ་ན་སྟེ༔ མ་བཅོས་རང་གསལ་ངང་དུ་གནས༔ མ་ནོར་དམིགས་སུ་མ་མཆིས་ཤིང་༔ བརྗོད་མེད་རིག་པ་ཟང་ཐལ་ལེ༔ བསམ་འདས་སེམས་ཀྱི་དྲི་མ་དག༔ རང་བྱུང་ཡེ་ཤེས་ངོ་བོ་ཉིད༔ རང་གསལ་རང་བཞིན་ལྷུན་གྱིས་གྲུབ༔ ཅིར་སྣང་ཆོས་སྐུའི་རྒྱན་དུ་ཤར༔ ཐུགས་རྗེ་སྤྲུལ་སྐུ་སྣ་ཚོགས་སྣང་༔ ཐམས་ཅད་ཀུན་གཞིའི་དབྱིངས་སུ་རྫོགས༔ ལྟ་བ་གནམ་འཕང་གཅོད་པའི་ཚེ༔ སྒོམ་པ་ཐབས་ཤེས་སྒྲོ་གཤོག་བརྒྱང་༔ སྤྱོད་པའི་ལམ་ལ་བཞུགས་པའི་ཚེ༔ རེ་དོགས་མེད་པའི་ངང་ལ་འགྲོ༔ འབྲས་བུའི་ཕ་མཐར་རྟོགས་པའི་ཚེ༔ གཞན་དུ་མེད་པའི་སངས་རྒྱས་རྟོགས༔ སྒོམ་པའི་གཟེབ་ལས་གྲོལ་ཙ་ན༔ ལྟ་བའི་རྒྱལ་པོ་ཕུག་ཐག་ཆོད༔ ལམ་ལ་བགྲོད་དུ་མེད་པ་དེ༔ ལུང་དང་རིག་པས་བསྒྲུབ་མེད་ཕྱིར༔ གཞི་ཡི་སྟེང་དུ་འབྲས་བུར་སྨིན༔ ཆོས་ཉིད་ཀློང་དུ་ལ་བཟླས་ཏེ༔ [52a] རང་རིག་རྩལ་དུ་ཤན་ཡང་འབྱེད༔ དབྱིངས་རིག་གཉིས་སུ་མེད་པ་དེ༔ ཐིག་ལེ་ཉག་གཅིག་ངང་དུ་རྫོགས༔ སེམས་བདེའི་ངང་དུ་ཉམས་བླངས་པས༔ སྣང་སྲིད་སེམས་ཀྱི་ཀློང་དུ་རྫོགས༔ ཀློང་སྡེའི་རྩ་བ་ཉམས་བླངས་ཚེ༔ རྣམ་རྟོག་ཕྲ་རགས་ཀློང་དུ་ཐིམ༔ མན་ངག་ཉམས་སུ་བླངས་བའི་ཚེ༔ དབྱིངས་ཡེ་ཟུང་འཇུག་མངོན་སངས་རྒྱས༔ ལྟ་བའི་ཕུག་ཐག་ཆོད་པ་ཡིན༔ སྒོམ་པའི་བློ་ལས་འདས་པ་ཡིན༔ སྤྱོད་པ་སྤྱད་དུ་མེད་པ་ཡིན༔ འབྲས་བུ་གཞན་ལ་དེ་མི་འཚལ༔ འོན་ཀྱང་རྣལ་འབྱོར་བེེ་རོ་ཡིས༔ རྒྱུ་འབྲས་ཁྱད་དུ་མི་གསོད་པས༔ སྡོམ་པ་གསུམ་གྱིས་རྒྱུད་སྦྱངས་ཏེ༔ མཚན་ལྡན་བླ་མ་དཔལ་སེངྒེ༔ སྤྱི་བོའི་གཙུག་ཏུ་འབྲལ་མེད་བཞུགས༔ རིག་འཛིན་པདྨ་འབྱུང་གནས་དེ༔ མཉེས་པ་གསུམ་གྱིས་ཡང་ཡང་བསྟེན༔ པཎ་ཆེན་བི་མ་ལ་མི་ཏྲ༔ དགོངས་པར་བཞེད་བའི་ཕ་མཐའ་བསྐང་༔ བསླབ་པ་གསུམ་གྱི་ཆས་འཛིན་ཏེ༔ ལྟ་བའི་གནམ་འཕང་གཅོད་པ་ཡིན༔ སྔར་སྤྱོད་ངང་དུ་མཉམ་པར་བཞག༔ བསྟན་གཉིས་ཟུང་འཇུག་བཀྲ་ཤིས་ཤོག༔ ཁྲི་སྲོང་ལྡེའུ་བཙན་གྱི་སྐུ་ཐོགས་ལ། བསམ་ཡས་དབུ་ [52b] རྩེའི་བར་ཁང་གཡུ་ཞལ་ཅན་ནས་མངའ་བདག་ཁྲི་སྲོང་ལྡེའུ་བཙན་འདི་སྐད་ལོ། །ང་ནི་ཁྲི་སྲོང་ལྡེའུ་བཙན་སྟེ༔ སེམས་ཉིད་རང་བྱུང་ཡེ་ཤེས་དེ༔ ཅིར་ཡང་མི་དམིགས་ཅིར་ཡང་གསལ༔ ལྟ་བའི་རྒྱལ་པོ་མཐའ་གཉིས་བྲལ༔ གཉགས་ཛྙཱ་ནའི་སྐུ་ཐོགས་ལ། ཡར་མོ་ལུང་གི་ཕུ་བདུད་རྩི་འབྱུང་བའི་བ་གམ་ནས་གཉགས་ཆེན་ཛྙཱ་ན་ཀུ་མཱ་ར་འདི་སྐད་ལོ། ལྷུན་གྲུབ་ཡེ་ཤེས་བསམ་མི་ཁྱབ༔ ནམ་མཁའ་ལྟ་བུ་མཐའ་བྲལ་བ༔ ཟུང་དུ་འཇུག་པའི་ཡེ་ཤེས་དེ༔ བློ་བྱས་ཡིད་དཔྱོད་ཀུན་ལས་འདས༔ དཔལ་གྱི་ཡེ་ཤེས་ཀྱི་སྐུ་ཐོགས་ལ། ཀོང་པོ་བྲག་དཀར་ལྷ་ཆུ་འཁྱིལ་བའི་ཡང་དབེན་ནས་གཉན་ཆེན་དཔལ་གྱི་ཡེ་ཤེས་འདི་སྐད་ལོ། །རང་རིག་ལྷུན་གྲུབ་བློ་ལས་འདས༔ སེམས་ཉིད་ནམ་མཁའ་མཐའ་དབུས་མེད༔ ཚོགས་བརྒྱད་སྣང་ལ་ངོས་བཟུང་མེད༔ རང་བྱུང་དགོངས་པ་འདི་ཀའོ༔ ཉང་བན་གྱི་སྐུ་ཐོགས་ལ། ཀོང་ཡུལ་ལྗོན་པ་ལུང་གི་འཆི་མེད་ཚེའི་ཀེའུ་ཚང་ནས་ཉང་བན་ཏིང་འཛིན་བཟང་པོ་འདི་སྐད་ལོ། །ལྟ་བ་ཕྱོགས་ལྷུང་མེད་པ་དེ༔ དམིགས་བྱ་མེད་པའི་ངོ་བོ་ཉིད༔ ལྟ་བྱེད་བློ་ཡི་གཟེབ་ལས་གྲོལ༔ བལྟ་བྱའི་སྙིང་པོ་ཡེ་ཤེས་ཆེ༔ ནམ་མཁའི་སྙིང་པོའི་སྐུ་ཐོགས་ལ། ལྷོ་བྲག་མཁར་ཆུ་ [53a] དཔལ་གྱི་ཕུག་མོ་ཆེ་ནས་དགེ་སློང་ནམ་མཁའི་སྙིང་པོ་འདི་སྐད་ལོ། །རང་བྱུང་རང་ཤར་ཡེ་ཤེས་འདི༔ བསྒོམ་བྱའི་བློ་ལས་རིང་དུ་འདས༔ སྒོམ་བྱེད་ཤེས་པ་རང་སར་དེངས༔ ཅིར་ཡང་དམིགས་སུ་མེད་པར་ཤར༔ འབྲོག་མི་དཔལ་ཡེའི་སྐུ་ཐོགས་ལ། བདུད་རི་གནམ་ལྕགས་འབར་བའི་རྩེ་མོ་ནས་འབྲོག་མི་དཔལ་གྱི་ཡེ་ཤེས་འདི་སྐད་ལོ། །དགོངས་པ་རང་བྱུང་རང་ཤར་འདི༔ མ་བཅོས་ལྷུག་པར་བཞག་ཙམ་ན༔ བརྗོད་དུ་མེད་པའི་ཉམས་ཤིག་ཤར༔ བསམ་དུ་མེད་པའི་འབྲས་བུ་རྙེད༔ གནུབས་ཆེན་གྱི་སྐུ་ཐོགས་ལ། སྒྲགས་ཀྱི་ཡང་རྫོང་གི་ཀེའུ་ཚང་ནས་གནུབས་ཆེན་སངས་རྒྱས་ཡེ་ཤེས་འདི་སྐད་ལོ། །ང་ནི་སངས་རྒྱས་ཡེ་ཤེས་ཏེ༔ སངས་རྒྱས་རང་ལས་རྙེད་པ་ཡིན༔ ལྟ་བའི་རྒྱལ་པོ་གནམ་འཕང་གཅོད༔ སྒོམ་པ་ཐབས་ཤེས་གཤོག་རྩལ་ཆེ༔ སྤྱོད་པ་འཇིགས་མེད་ཧེ་རུ་ཀ༔ འབྲས་བུ་སྲིད་ཞིའི་ཐིག་ལེར་རྫོགས༔ ལང་གྲོ་ལོ་ཙཱིའི་སྐུ་ཐོགས་ལ། བྲག་དམར་ཟངས་ཡག་ནམ་མཁའ་རྫོང་ནས་ལང་གྲོ་དཀོན་མཆོག་འབྱུང་གནས་འདི་ཀད་ལོ། །སེམས་ལ་བསམ་དུ་མེད་པའི་ཉམས༔ རང་གསལ་རྗེན་པར་གནས་པ་འདི༔ འཁོར་འདས་ཀུན་ལ་ [53b] ལ་ཁྱབ་པ་ཉིད༔ དུས་གསུམ་སངས་རྒྱས་དགོངས་པ་ལགས༔ རྒྱལ་བ་མཆོག་དབྱངས་ཀྱི་སྐུ་ཐོགས་ལ། བསམ་ཡས་བྲག་དམར་མཆིམས་ཕུའི་དབེན་རྩ་ནས་ངན་ལམ་རྒྱལ་བ་མཆོག་དབྱངས་འདི་སྐད་ལོ། །བློ་འདས་བསམ་བརྗོད་བྲལ་བའི་སེམས༔ རིག་པའི་ངང་དུ་གཉིས་མེད་འདྲེས༔ ཕྱི་ནང་ཀུན་ལ་ཟང་ཐལ་ལེ༔ མ་བཅོས་ཡེ་རྫོགས་ཆེན་པོའོ༔ རླངས་ཆེན་དཔལ་སེང་གི་སྐུ་ཐོགས་ལ། ཁམས་ཀྱི་ཁྱུང་ཚང་བྲག་གི་དབེན་རྩ་ནས་རླངས་ཆེན་དཔལ་གྱི་སེང་གེ་འདི་སྐད་ལོ། །གསལ་བ་ཐབས་སུ་བྱས་ནས་ཀྱང་༔ སྟོད་པ་ཤེས་རབ་ངང་དུ་རྫོགས༔ གསལ་སྟོང་དབྱེར་མེད་ཀློང་དུ་འཕྱོ༔ ཀུན་བཟང་དགོངས་པ་རང་ལས་རྙེད༔ མཁའ་འགྲོ་ཡེ་ཤེས་མཚོ་རྒྱལ་གྱི་སྐུ་ཐོགས་ལ། གཞོ་སྟོད་ཏི་སྒྲོ་བྲག་གི་ཚོགས་ཁང་ཆེན་མོ་ནས་མཁའ་འགྲོ་ཡེ་ཤེས་མཚོ་རྒྱལ་འདི་སྐད་ལོ། །འཁོར་འདས་ཀུན་ལ་ཁྱབ་པའི་སེམས༔ བདེ་བ་ཆེན་པོའི་ངང་དུ་ཐིམ༔ ཆོས་ཉིད་ངང་དུ་ལྟ་བྱ་བྲལ༔ ཁོ་མོའི་རྟོགས་པ་དེ་ཙམ་མོ༔ གཡུ་སྒྲ་སྙིང་པོའི་སྐུ་ཐོགས་ལ། ལྷ་སའི་ཡེར་པ་གཙུག་རུམ་འབར་བའི་ཕུག་ནས་རྒྱལ་མོ་གཡུ་སྒྲ་སྙིང་པོ་འདི་སྐད་ལོ། །སེམས་ལས་གཞན་པའི་སངས་རྒྱས་མེད༔ རྣམ་རྟོག་ཆོས་ [54a] དབྱིངས་ཀློང་དུ་ནུབ༔ དབྱིངས་རིག་དབྱེར་མེད་རྫོགས་པ་འདི༔ བེེ་རོ་ཙཱ་ནི་བཀའ་དྲིན་ལགས༔ ཞེས་བསྐུར་རོ། དེ་ལྟར་བྱིན་རླབས་འཕོ་བའི་དབང་བསྐུར་ཐོབ་པའི་ཡེ་ཤེས་ཀྱི་རྒྱུན་དེ་ཉིད་མི་ཉམས་བརྟན་པར་བྱ་བའི་སླད་དུ་རིག་འཛིན་བླ་མའི་ལྷ་ཚོགས་ནམ་མཁའ་གང་བར་སད་པ་རྣམས་ཀྱིས་སྨོན་པའི་ཚིག་གི་ཤིས་པ་བརྗོད་ཅིང་མེ་ཏོག་གི་ཆར་ཕབ་པས་དགེ་ལེགས་སུ་བྱས་པའི་མོས་པ་མཛོད། ཅེས་ཤིས་བརྗོད་གང་འོས་བྱ། དེ་རྣམས་ཀྱི་སྒོ་ནས་ནང་སྐོར་ཀློང་སྡེའི་བླ་མ་རིག་འཛིན་བཅོ་ལྔའི་བྱིན་རླབས་དབང་བསྐུར་ཟབ་མོ་ལེགས་པར་གྲུབ་པ་ལགས་པས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་གྱིས་བསྡུས་པ་མཐའ་དག་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་དབང་གི་རྗེས་རིམ་སྤྱི་ལྟར་བྱའོ། །སློབ་དཔོན་གྱིས་ཚོགས་ལ་རོལ་བ་སོགས་ཆོ་གའི་རྗེས་རིམ་རྣམས་བྱང་བུ་ཁྲིགས་བསྡེབས་ལྟར་མཐར་དབྱུང་བས་གྲུབ་བོ། །ལྷུན་གྲུབ་སྐུ་དང་ཡེ༵་ཤེ༵ས་ཀྱི། །རང་རྩལ་སྒྱུ་འཕྲུལ་རྡོ༵་རྗེ༵འི་སྤྲིན། །འགྲོ་འདུལ་ཚོམ་བུའི་དགོངས་ཉམས་བྱིན། །སྐལ་སྡན་སྙིང་ལ་འདོད་རྒུར་འཇོ། །ནང་སྐོར་ཀློང་སྡེའི་བླ་མ་རིག་འཛིན་བཅོ་ལྔའི་བྱིན་རླབས་དབང་བསྐུར་གྱི་ལེའུ་ཚན་ནོ།། །།


[55b] སྭསྟི། སྐུ་གསུམ་བསྟན་པའི་སྙིང་པོ་མཆོག །མི་མཇེད་ཞིང་འདིར་སྣང་མཛད་མགོན། །སྟོན་པ་བཅུ་གཉིས་ལ་བཏུད་ནས། །དེ་ཡི་སྨིན་བྱེད་ལམ་བཟང་དབྱེ། །རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་ཡིད་དམ་ཞི་བ་རྫོགས་ཆེན་སྟོན་པ་བཅུ་གཉིས་ཀྱི་སྒྲུབ་དབང་བསྐུར་བའི་ཚུལ་ལ། སྦྱོར་བ་རས་བྲིས་ཞི་དཀྱིལ་སྤྱི་མཐུན་ལྷ་གནས་ལྟེ་བ་ཟླུམ་སྐོར་མཐིང་ག་ཕྱི་སྐོར་པད་འདབ་བཞི་དང་དེ་རྒྱབ་པད་འདབ་བརྒྱད་ཕྱོགས་མདོག་ཅན་ཐིག་ལེས་མཚན་པ་དགྲམ་པའམ། མ་འབྱོར་ན་མཎྜལ་ལ་མེ་ཏོག་གི་ཚོམ་བུ་དབུས་སུ་གཅིག །ཕྱོགས་བཞིར་བཞི་དེ་རྒྱབ་བརྒྱད་བཅས་བཀོད་པའི་ཁར་མཉྫིའི་སྟེང་དུ་བུམ་པ་སོ་ལྔའི་བཅུད་ལྡན། གཡས་སུ་ཐོད་ཆང་མངར་གསུམ་ཆོས་སྨན་སྦྱར་བ། གཡོན་དུ་རིག་མའི་གཟུགས་བརྙན། རྒྱབ་ཏུ་རང་བྱུང་གི་ཤེལ་རྡོ། མདུན་དུ་སྐུ་ཙག་རྣམས་བཅས་བཤམ། ཕྱི་ནང་གི་མཆོད་པ་དང་ཚོགས་གཏོར་སོགས་སྤྱི་ལྟར་འདུ་བྱས་ནས། དབང་སྒྲུབ་ནང་སྐོར་ཁྲོ་བོའི་བྱང་བུ་ཁྲིགས་སྡེབས་ཀྱིས་ཁོག་ཕུབ་ནས་མངོན་རྟོགས་གཏེར་གཞུང་ཡི་དམ་ཞི་སྒྲུབ་ལྟར་བདག་མདུན་དབྱེར་མེད་དུ་བསྒོམ་ལ། ཛཔྲ་དམིགས་ནི། བདེ་གཤེགས་སྟོན་པ་བཅུ་གཉིས་རྣམས༔ སྣང་སྲིད་སྐུ་ཡི་རོལ་པས་གང་༔ སྔགས་ནི་གྲགས་སྟོང་རང་སྒྲ་སྒྲོགས༔ འོད་གསལ་ངོ་བོའི་ཐུགས་ཀྱི་ངང་༔ མཆོད་སྤྲིན་རྒྱ་མཚོས་རྒྱལ་ [55b] བ་དགྱེས༔ འགྲོ་རྣམས་བླ་མེད་ས་ལ་བཀོད༔ སྣང་སྲིད་གཞིར་བཞེངས་བདེ་བ་ཆེ༔ དགོངས་པ་ཀློང་ཡངས་ངང་དུ་རྫོགས༔ ཞེས་པའི་དགོངས་པ་སྲོག་ཏུ་བཟུང་སྟེ་གཞུང་གི་བཟླས་པ་ཅི་འགྲུབ་དང་། བུམ་སྒྲུབ་ཟུར་དུ་སྤྲོ་ན། བུམ་པ་རང་བྱུང་གི་གཞལ་ཡས་ཁང་དུ་བདེ་གཤེགས་སྟོན་པ་བཅུ་གཉིས་ཀྱི་ཚོམ་བུ་དྭངས་པའི་མཚོ་ལ་གཟའ་སྐར་ཤར་བ་ལྟར་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་འོད་ཟེར་སོགས་སྤྱི་ལྟར་གསལ་བཏབ་ལ་བཟླས་པ་བྱ། མཐར་སྟོང་ཚིག་ཕུལ་ལ་འོད་ཞུ་དང་། ལས་བུམ་དུ་རྡོར་སེམས་བསྐྱེད་བཟླས། སྲུང་མའི་གཏོར་འབུལ། ཚོགས་ཀྱི་མཆོད་པ། རིག་པའི་མེ་ཏོག་དོར་ནས་གནང་བ་ནོད་པ་བཅས་བྱ། དབང་དངོས་ལ། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམ། མཎྜལ་བཀྲམ་བསྡུ་དང་། སེམས་བསྐྱེད་གསལ་བཏབ་ལ་ཆོས་བཤད་ཅི་རིགས་པ་ལས་ཁྱད་པར། འདིར་དམ་ཆོས་རྫོགས་ཆེན་སྡེ་གསུམ་གྱི་ནང་ཚན་ནང་སྐོར་ཀློང་སྡེའི་ཡི་དམ་ཞི་བའི་ཚུལ་དུ་སྒྲུབ་པ་སྐུ་གསུམ་བསྟན་པའི་སྙིང་པོ་འོད་གསལ་རྫོགས་པ་ཆེན་པོའི་སྟོན་པ་མངོན་རྫོགས་རྒྱལ་པོ་བཅུ་གཉིས་ཀྱི་སྨིན་བྱེད་ཟབ་མོ་བསྒྲུབ་པར་བགྱི་བ་ལ། བདག་ཉིད་སློབ་དཔོན་གྱིས་བགྱི་བར་འོས་པ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག ། ཕྱག་སྙིམ་པ་མེ་ཏོག་གིས་བཀང་བའི་ [56a] ཐལ་མོ་སྦྱོར་ལ་མི་ཕྱེད་དད་པའི་ཡིད་ཀྱིས་གསོལ་བ་གདབ་པ་འདིའི་རྗེས་ཟློས། ཡེ་སངས་རྒྱས་པ་གདོད་མའི་ཀུན་ཏུ་བཟང་༔ ཐོག་མའི་སྟོན་པ་ཆེན་པོ་བཅུ་གཉིས་ཀྱི༔ རང་བྱུང་དགོངས་པ་ཀློང་ཡངས་བསྟན་དུ་གསོལ༔ ཆོས་དབྱིངས་འུབ་ཆུབ་ཀློང་དུ་མི་འདའ་བའི་༔ རྣལ་འབྱོར་ནམ་མཁའི་རྒྱལ་པོ་བལྟ་འདོད་ཀྱི༔ ད་ལྟ་ཉིད་དུ་བླ་མས་སྩལ་དུ་གསོལ༔ ལན་གསུམ། ཞེས་གསོལ་བ་བཏབ་པ་ལ་དོན་གྱི་ངེས་ཤེས་བསྐྱེད་པའི་སྒོ་ནས་གནང་བ་སྦྱིན་པར་བྱ་བ་ཡིན་ཏེ། ཨེ་མ་ཧོཿ བདེ་གཤེགས་སྟོན་པ་རིག་འཛིན་ནི༔ བསྟན་པ་གཉིས་ཀྱི་བདག་པོ་སྟེ༔ ཀུན་ཏུ་བཟང་པོ་མན་ཆད་ནས༔ བོད་ཀྱི་རིག་འཛིན་ཡན་ཆད་དུ༔ འགྲོ་འདུལ་བདུན་ཅུ་རྩ་གཅིག་ནི༔ ཆོས་དབྱིངས་ཀློང་ལ་ཁྱབ་པ་ཉིད༔ ཐམས་ཅད་ནམ་མཁའི་རྣལ་འབྱོར་ཡིན༔ འཁོར་འདས་ཀུན་ལ་ཁྱབ་པའི་སྐུ༔ གློ་བུར་འཁྲུལ་པས་མ་བསྒྲིབ་ན༔ རང་ཡང་ནམ་མཁའི་ངང་དུ་རྫོགས༔ འགྲོ་འདུལ་རྣམས་དང་དགོངས་པ་གཅིག༔ ད་ལྟའི་ནམ་མཁའ་འདི་རྣམས་ཀྱང་༔ བདུན་ཅུ་རྩ་གཅིག་འདུས་པ་ཡི༔ ཐུགས་རྗེའི་ཀློང་ཆེན་དམ་པའོ༔ དེ་ཕྱིར་མཆོད་པའི་སྤྲིན་ཚོགས་འབུལ༔ [56b] དེ་ནས་ཁྱེད་རང་རྣམས་ཀྱི་ལུས་ལོངས་སྤྱོད་དགེ་ཚོགས་དང་བཅས་པ་ཀུན་བཟང་མཆོད་པའི་སྤྲིན་ཆེན་པོར་སྤྲོས་ཏེ་འབུལ་བ་ཀུན་རྫོབ་རྒྱུ་བསོད་ནམས་ཀྱི་ཚོགས་དང་། སྣང་བ་རིག་པའི་རྒྱན་དུ་རང་ཤར་བ་ཉིད་ཤར་གྲོལ་འཛིན་མེད་གཉུག་མའི་ལྷ་ལ་འཁོར་གསུམ་ཡོངས་དག་ཆེན་པོའི་མཆོད་པ་འབུལ་བ་དོན་དམ་འབྲས་བུ་ཡེ་ཤེས་ཀྱི་ཚོགས་ཏེ། ཚོགས་གཉིས་ཡེ་རྫོགས་ཆེན་པོའི་ངང་དུ་ལ་བཟླ་བ་དང་། རང་བྱུང་གི་རིག་པ་ཟང་ཐལ་འཆིང་གྲོལ་ལས་འདས་པའི་ངོ་བོར་དགེ་སྡིག་རྒྱུ་འབྲས་ཕན་གནོད་ཀྱི་མཚན་མ་དང་བྲལ་བས་བཤགས་བྱ་བཤགས་བྱེད་ལས་འདས་པ་ཡེ་ཤེས་ཀློང་ཆེན་ཡངས་པའི་ངང་དུ་མཉམ་པར་བཞག་བཞིན་པས་འདིའི་རྗེས་ཟློས། ཀུན་རྫོབ་རིག་པའི་ཀློང་ཡངས་ནམ་མཁའ་ཆེ༔ ཀུན་བཟང་ཀློང་དུ་རྟོགས་པའི་མཆོད་པའི་སྤྲིན༔ ཤར་དང་ཤར་ཡུལ་མེད་པར་མཆོད་པ་འབུལ༔ འཛིན་ཡུལ་མེད་པའི་ངང་དུ་མཐོལ་ལོ་བཤགས༔ བཤགས་བྱ་བཤགས་བྱེད་བྲལ་བ་ངོ་མཚར་ཆེ༔ ཡེ་ཤེས་ཀློང་ཆུབ་ངང་དུ་མཛད་དུ་གསོལ༔ ཡེ་ནས་བསྐུར་ཐོབ་བྲལ་བའི་ཆོས་ཉིད་རིག་པ་རང་གནས་ཀུན་ཏུ་བཟང་པོའི་ཀློང་ཆེན་པོར་སྐུ་དང་ཡེ་ཤེས་ཡོན་ [57a] ཏན་ལྷུན་གྱིས་གྲུབ་པའི་ཕྱིར་ཐ་སྙད་སྤྲོས་པའི་བྱིན་དབབ་པ་ལ་མི་ལྟོས་པས་ན། ནམ་མཁའི་རྣལ་འབྱོར་མ་བཅོས་རང་གསལ་ལྷུག་པར་གནས་པས་དོན་གྱི་བྱིན་རླབས་རྫོགས་པར་སྟོན་པ་ཡིན་ཏེ། རང་རིག་གཞི་ལུས་ཀུན་ཏུ་བཟང་པོ་ལ༔ ཞལ་ཕྱག་མཚན་མ་བྱིན་རླབས་མི་འཚལ་ཞིང་༔ རྣལ་འབྱོར་ནམ་མཁའ་ཆེ་ལ་ལྟ་སྟངས་ཀྱིས༔ རང་གསལ་མ་བཅོས་ལྷུག་པར་གནས་པར་གྱིས༔ དབང་དངོས་གཞི་ལ་རྣམ་གྲངས་བཞིར་ཡོད་པ་ལས། དང་པོ་སྤྲོས་བཅས་བུམ་པའི་དབང་ནི། བརྡ་བུམ་པ་བཅུད་ལྡན་རྒྱན་དང་བཅས་པའི་མཚོན་ཏེ། དོན་དབྱིངས་རིག་ཟུང་འཇུག་གི་གནས་ལུགས་རྟོགས་པར་མཛོད་ཅིག །བུམ་པ་ཐོགས་ལ། །བུམ་པ་ཆོས་དབྱིངས་ཕྱི་ནང་མེད་པ་ལ༔ རང་བྱུང་ཡེ་ཤེས་ཁ་རྒྱན་བཅུད་ཀྱིས་གཏམས༔ བསྐུར་བྱ་བསྐུར་ཐོབ་མེད་པར་རང་ལ་རྫོགས༔ ཨེ་མ་ཧོཿ ཆོས་ཀྱི་དབྱིངས་སུ་རྫོགས་པའི་དབང་ཐོབ་ཤོག༔ ཞེས་བུམ་པ་སྤྱི་བོར་བཞག་ཅིང་བུམ་ཆུ་སྦྱིན། གཉིས་པ་སྤྲོས་མེད་གསང་བའི་དབང་ནི། བརྡ་ཐོད་པའི་བདུད་རྩི་མྱང་བ་ལ་བརྟེན་ནས། དོན་ལས་རླུང་གི་རྒྱུ་བ་རྣམས་དབུ་མར་ཐིམ་པས་སྨྲ་བསམ་བརྗོད་བྲལ་གསལ་ལ་མི་རྟོག་པའི་ [57b] ཡེ་ཤེས་ལྷག་གེར་མཐོང་བར་མོས་ཤིག །གསང་ཐོད་ཐོགས་ལ། གསལ་རིག་རྒྱུན་ཆད་མེད་པའི་ཐོད་པའི་ནང་༔ ཡོངས་སུ་དེ་ཉིད་རྒྱས་པའི་བདུད་རྩིར་ཞུ༔ ཨེ་མ་ཧོཿ མདངས་གསལ་གསལ་རྫོགས་ངང་དུ་དབང་བསྐུར་བས༔ སྣང་བ་མཐོང་མེད་མཐོང་བ་རབ་གསལ་ཤོག༔ ཅེས་བདུད་རྩི་སྦྱིན། གསུམ་པ་ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་ནི། བརྡ་མཚན་ཉིད་ཡོངས་སུ་རྫོགས་པའི་རིག་མ་གཏད་པ་དང་མཉམ་པར་སྦྱོར་བའི་རྐྱེན་གྱིས། དོན་ལྷན་སྐྱེས་ཀ་དག་གི་ཡེ་ཤེས་རྩོལ་མེད་དུ་སྐྱེས་པར་མོས་ཤིག །རིག་ཙཀ་ཐོགས་ལ། བདེ་ཆེན་ཡེ་ཤེས་གསང་བའི་ལང་ཚོ་ཡིས༔ རིག་པ་རང་གསལ་གཅིག་ཏུ་བདེ་བར་འཁྲིལ༔ གཉིས་མེད་སྣང་མེད་འཛིན་མེད་བདེ་བ་ཆེ༔ ཨེ་མ་ཧོ་བདེ་ཆེན་ཡེ་ཤེས་དབང་བསྐུར་བས༔ རྟོག་ཚོགས་བདེ་བ་ཆེན་པོ་རང་གྲོལ་ཤོག༔ ཅེས་ལག་གཡོན་དུ་གཏད། བཞི་པ་རབ་ཏུ་སྤྲོས་མེད་ངོ་སྤྲོད་དོན་གྱི་དབང་ནི། བརྡ་རྡོ་རྗེ་སེམས་དཔའི་མེ་ལོང་གིས་མཚོན་ཏེ། དོན་རྩོལ་བྲལ་བློ་འདས་འོད་གསལ་གྱི་དགོངས་པ་མངོན་དུ་གྱུར་པར་མོས་ལ་གནས་ལུགས་མ་བཅོས་པའི་ངང་དུ་མཉམ་པར་ཞོག་ཅིག །ཤེལ་རྡོ་ཐོགས་ལ། སེམས་དཔའི་མེ་ལོང་དྭངས་གསལ་རྙོགས་ [58a] པ་ཀུན་དང་བྲལ༔ སྣང་བ་ཅི་ཤར་འཇའ་ཚོན་བཞིན་དུ་དངོས་མེད་པར༔ གང་ནས་མ་བྱུང་ཕྱི་ནང་ཀུན་བྲལ་ཐལ་ལེར་གསལ༔ དབྱིངས་རིག་ཟུང་འཇུག་དགོངས་པས་དབང་བསྐུར་བསྐུར་ཐོབ་མེད༔ རྩིས་གདབ་བྲལ་བའི་ངང་དུ་གནས་པས་དབང་བསྐུར་ཡོངས་རྫོགས་ཤོག༔ དྷརྨ་དྷཱ་ཏུ་ཨ་བྷི་ཥིཉྩ་ཨ་ལ་ལ་ ཧོཿ ཞེས་བརྗོད་ལ་ཅུང་ཟད་མཉམ་པར་བཞག ། དེང་ནས་དབྱིངས་རིག་ཟུང་འཇུག་ཀ་དག་ཡེ་སངས་རྒྱས་པའི་དགོངས་པ་དང་མ་བྲལ་བས་ཆོས་ཐམས་ཅད་རང་བཞིན་རྫོགས་པ་ཆེན་པོའི་ཀློང་དུ་ལ་བཟླ་བར་གྱིས་ཤིག །དེ་རྣམས་ཀྱིས་དངོས་གཞིའི་དབང་བསྐུར་གྲུབ་ནས་རྗེས་འབྲེལ་མངོན་རྫོགས་སྟོན་པ་བཅུ་གཉིས་ཀྱི་བྱིན་རླབས་འཕོ་བའི་དབང་བསྐུར་བ་ལ། འདས་རྗེས་ཞལ་ཆེམས་རྡོ་རྗེའི་རྒྱུད་ཀྱི་ཚིག་རྣམས་བསྒྲག་པ་དང་ལྷན་ཅིག་ཡེ་ཤེས་ཀྱི་ཕྱག་རྒྱ་རེ་འཕྲོས་ཏེ་ཁྱེད་རང་གི་སྤྱི་བོར་ནས་སྙིང་གར་ཐིམ་པས་སྟོན་པ་དེ་དག་དང་དབྱེར་མི་ཕྱེད་པའི་སྤངས་རྟོགས་ཀྱི་ཡོན་ཏན་ཡོངས་སུ་རྫོགས་པར་མོས་ཤིག །རྡོ་རྗེ་འཆང་གི་སྐུ་ཐོགས་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །རྡོ་རྗེ་འཆང་ཆེན་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་ [58b] དགོངས་པ་མངོན་གྱུར་ཤོག །བཛྲ་དྷ་ར་ ཨ་བྷི་ཥིཉྩ་ཨོཾ། ཞེས་སྤྱི་བོར་བཞག །རྡོར་གླིང་ལྟ་བ་ཀློང་ཡངས་ལས་འབྱུང་བ་བཞིན། རྒྱ་གར་སྐད་དུ༔ སརྦ་དྷརྨཱ་བེེ༔ ཨ་ཨ་ཨ༔ བོད་སྐད་དུ༔ ཆོས་ཐམས་ཅད་ཀྱི་གནད༔ སོགས་ནས། རྡོ་རྗེ་འཆང་དང་པོའི་དགོངས་པའི་བུ་གཅིག་རྫོགས་སོ༔ བར་གསལ་དག་ལྡན་པར་བཀླག །དེ་བཞིན་དུ་རྡོ་རྗེ་སེམས་དཔའི་སྐུ་ཐོགས་ལ། ། ཧཱུྃ། རྫོགས་པ་ཆེན་པོའི་སྟོན་པ་མཆོག །རྡོ་རྗེ་སེམས་དཔའི་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་འགྱུར་ཤོག །བཛྲ་ས་ཏྭ་ཨ་བྷི་ཥིཉྩ་ཨོཾ། ཞེས་སྤྱི་བོར་བཞག་ལ། རྒྱ་གར་སྐད་དུ༔ སརྦ་དྷརྨ་བྷྱེེ༔ བོད་སྐད་དུ༔ ཆོས་ཐམས་ཅད་ཀྱི་གནད༔ སོགས་ནས། སྔགས་ཀྱི་སྲུང་མས་འདི་སྲུངས་ཤིག༔ མཛེས་པའི་མེ་ཏོག་གི་སྐུ་ཐོགས་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །མཛེས་པའི་ཏོག་གི་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨྃ། ཞེས་སྤྱི་བོར་བཞག ། རྒྱ་གར་སྐད་དུ༔ སརྦ་དུ་ས་དྷ་རྐཾ༔ བོད་སྐད་དུ༔ ཡང་ཏིག་སྲོག་གཟེར༔ སོགས་ནས། ཐུགས་རྗེ་ཅེར་གྲོལ་ཡིན་ནོ༔ འཇམ་དཔལ་འཇིགས་སྐྱོབ་བམ་ [59a] མཛེས་པའི་དཔལ་གྱི་སྐུ་ཐོགས་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །མཛེས་པའི་དཔལ་གྱི་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། ཞེས་སྤྱི་བོར་བཞག ། རྒྱ་གར་སྐད་དུ༔ ཨེ་བཾ་ཀྲུ་ཡ༔ བོད་སྐད་དུ༔ གསེར་གྱི་འབྲུ་གཅིག་པ༔ སོགས་ནས། སྔགས་ཀྱི་བདག་མོས་སྲུངས་ཤིག༔ གཞོན་ནུ་རྣམ་རོལ་གྱི་སྐུ་ཐོགས་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །གཞོན་ནུ་རྣམ་རོལ་དབང་བསྐུར་རོ། །འཁོར་འདས་འབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བཞག ། རྒྱ་གར་སྐད་དུ༔ མ་མ་ཨཀྵེ༔ བོད་སྐད་དུ༔ རིགས་དྲུག་རང་གྲོལ༔ སོགས་ནས། སྔགས་ཀྱི་སྲུང་མས་བཀའ་འདི་སྲུངས༔ རྡོ་རྗེ་འཆང་གི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །རྡོ་རྗེ་འཆང་གི་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། རྒྱ་གར་སྐད་དུ༔ བུདྡྷ་དྷེ་ཀ་ར་ཡ་དྷུ་ན་མཿ བོད་སྐད་དུཿ སངས་ [59b] རྒྱས་ཀྱི་ཞལ་ཆེམས་དང་པོ་ཞེས་བྱ་བ༔ སོགས་ནས། དཔལ་སྔགས་ཀྱི་བདག་མོ་ནག་མོ་ཁྲོས་མས་སྲུངས་ཤིག༔ གཞོན་ནུ་སྟོབས་ལྡན་གྱི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །གཞོན་ནུ་སྟོབས་ལྡན་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ༔ རྒྱ་གར་སྐད་དུ༔ བུདྡྷ་དྷེ་ཀ་ར་ཡ་དུ་ན་མ༔ བོད་སྐད་དུ༔ སངས་རྒྱས་ཀྱི་འདས་རྗེས་གཉིས་པ་ཞེས་བྱ་བ༔ སོགས་ནས། མཁའ་འགྲོ་མ་ནག་མོས་རྒྱལ་བའི་བཀའ་འདི་སྲུངས་ཤིག༔ དྲང་སྲོང་ཁྲོས་པའི་རྒྱལ་པོའི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །དྲང་སྲོང་རྒྱལ་པོའི་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། རྒྱ་གར་སྐད་དུ༔ བུདྡྷ་བྷ་ཀ་ར་ཡ་བྷེེ་ན་མ༔ བོད་སྐད་དུ༔ སངས་རྒྱས་ཀྱི་ཞལ་ཆེམས་གསུམ་པ་ཞེས་བྱ་བ༔ སོགས་ནས། སྔགས་ཀྱི་སྲུང་མས་བཀའ་འདི་སྲུངས་ཤིག༔ གསེར་འོད་དམ་པའི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །གསེར་འོད་དམ་པའི་དབང་བསྐུར་རོ། །འཁོར་འདས་འུབ་ཆུབ་གདོད་ [60a] མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། རྒྱ་གར་སྐད་དུ༔ བུདྡྷ་དྷེ་ཀ་ར་ཡ༔ བོད་སྐད་དུ༔ སངས་རྒྱས་ཀྱི་ཞལ་ཆེམས༔ སོགས་ནས། སྔགས་ཀྱི་སྲུང་མས་ཐུབ་པར་སྲུངས༔ བརྩེ་བའི་བློ་གྲོས་ཀྱི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །བརྩེ་བའི་བློ་གྲོས་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། རྒྱ་གར་སྐད་དུ༔ བུདྡྷ་དྷརྨ༔ བོད་སྐད་དུ༔ སངས་རྒྱས་ཀྱི་ཆོས་ཚིག༔ སོགས་ནས། སྔགས་ཀྱི་སྲུང་མས་བཀའ་འདི་སྲུངས་ཤིག༔ འོད་སྲུང་བསྒྲེས་པོའི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་པོའི་སྟོན་པ་མཆོག །འོད་སྲུང་བསྒྲེས་པོས་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། རྒྱ་གར་སྐད་དུ༔ སརྦ་ཏ་ཐཱ་ག་ཏ་བྷྱ༔ བོད་སྐད་དུ༔ དེ་བཞིན་གཤེགས་པ་ཐམས་ཅད་ཀྱི་དགོངས་བཅུད༔ སོགས་ནས། སྔགས་ཀྱི་སྲུང་མས་སྲུངས་ཤིག༔ མངོན་རྫོགས་རྒྱལ་པོའི་སྐུ་སྤྱི་བོར་བཞག་ལ། ཧཱུྃ། རྫོགས་པ་ཆེན་ [60b] པོའི་སྟོན་པ་མཆོག །མངོན་རྫོགས་རྒྱལ་པོའི་དབང་བསྐུར་རོ། །འཁོར་འདས་འུབ་ཆུབ་གདོད་མའི་ཀློང་། །ཀུན་བཟང་དགོངས་པ་མངོན་གྱུར་ཤོག །མ་ཧཱ་སིནྡྷ་སུ་ག་ཏ་ཨ་བྷི་ཥིཉྩ་ཨོཾ། རྒྱ་གར་སྐད་དུ༔ བུདྡྷ་ཨ་ཀྵེ་བཾ༔ བོད་སྐད་དུ༔ སངས་རྒྱས་གནད་ཐིམ༔ སོགས་ནས། སྐུ་གསུང་ཐུགས་ཀྱི་རྒྱ་ཡོད་དོ༔ ཞེས་བཀླག ། དེ་རྣམས་ཀྱི་སྒོ་ནས་ནང་སྐོར་ཀློང་སྡེའི་ཡི་དམ་ཞི་སྒྲུབ་རྫོགས་ཆེན་སྟོན་པ་བཅུ་གཉིས་ཀྱི་བྱིན་རླབས་དབང་བསྐུར་ཟབ་མོ་ལེགས་པར་གྲུབ་པ་ལགས་པས་སོགས་ཀྱིས་མཚམས་སྦྱར་ཏེ་དམ་ཚིག་ཁས་ལེན་སོགས་དབང་གི་རྗེས་རིམ་སྤྱི་ལྟར་བྱའོ། སློབ་དཔོན་གྱིས་ཚོགས་ལ་རོལ་པ་སོགས་ཆོ་གའི་རྗེས་རིམ་རྣམས་བྱང་བུ་ཁྲིགས་བསྡེབས་ལྟར་མཐར་དབྱུང་བས་གྲུབ་བོ། །ཡེ༵ཤེ༵ས་དབྱིངས་ལས་རང་ཤར་བ། །མངོན་རྫོགས་སྟོན་པ་བཅུ་གཉིས་ཀྱི། །ཐུགས་གསང་རྡོ༵་རྗེ༵འི་རྩེ་མོར་བཅུད། །ལས་འཕྲོའི་སྐལ་པར་འཁྱིལ་འདི་རྨད། །ནང་སྐོར་ཀློང་སྡེའི་ཡི་དམ་ཞི་བ་རྫོགས་ཆེན་སྟོན་པ་བཅུ་གཉིས་ཀྱི་བྱིན་རླབས་དབང་གི་ལེའུ་ཚན་ནོ།། །།


[61a] སྭསྟི། ཆོས་དབྱིངས་མི་འགྱུར་ཀློང་ཆེན་ལས། །ཡེ་ཤེས་སྒྱུ་མའི་སྤྲིན་ཕུང་འཕྲོ། །མངོན་རྫོགས་རྒྱལ་པོར་གུས་བཏུད་ནས། །གང་དེའི་སྨིན་བྱེད་སྒོ་འཕར་དབྱེ། །རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་ཡི་དམ་ཁྲོ་བོའི་སྒྲུབ་དབང་ཟབ་མོའི་བསྐུར་བའི་ཚུལ་ལ་གཉིས། སྦྱོར་བ་སྟ་གོན་དང་། དབང་བསྐུར་དངོས་སོ། །དང་པོ་ལ་གཉིས། སའི་ཆོ་ག་དང་། ལྷག་པར་གནས་པའོ། །དང་པོ་ནི། གང་དུ་བྱ་བའི་གཞི་དེར་གཏོར་མ་དཀར་དམར་གསེར་སྐྱེམས་བཅས་བཤམ། སེང་ལྡེང་གི་ཕུར་བུ་སོར་བརྒྱད་པ་དར་དམར་གྱི་ཅོད་པན་ཅན། དྲིའི་ཆུ་བདུད་རྩི་ལྔ་དང་སྦྱར་བའི་དུང་ཕོར་སོགས་དགོས་པའི་ཡོ་བྱད་རྣམས་འདུ་བྱས་ཏེ། བརྒྱུད་འདེབས་སྔོན་དུ་འགྲོ་བས། ནང་སྐོར་ཡི་དམ་ཁྲོ་བོའི་ཕྲིན་ལས་བྱང་བུ་ཁྲིགས་སྡེབས་ཀྱི་དབུ་ནས་བརྩམ་བྱིན་རླབས་བྱང་བུ་ཡན་བཏང་ལ། རང་ཉིད་སྐད་ཅིག་གིས་དཔལ་ཆེན་མངོན་རྫོགས་རྒྱལ་པོ་ཧེ་རུ་ཀ་རང་སྣང་གི་ཡུམ་དང་བཅས་པ་འབར་བ་ཆེན་པོའི་འོད་ཟེར་རབ་ཏུ་འཁྲུགས་པའི་སྐུར་ལམ་གྱིས་གསལ་བར་གྱུར། བསང་ཆུ་སྒྲུབ་པ་ནི། དེའི་ཐུགས་ཀ་ནས་རྃ་ཡྃ་ཁྃ་འཕྲོས་པས་མ་དག་པའི་དངོས་འཛིན་ཐམས་ཅད་བསྲེགས་གཏོར་སྦྱངས། སྟོང་པའི་ངང་ལས་བསང་ཆུའི་སྟེང་དུ། ཨ་ཙཎྡྲ་མཎྜ་ལ། ཟླ་བ་ལ་གནས་པའི་ཧཱུྃ་ཡིག་དཀར་པོ། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོས་འདུས་ཡོངས་ [61b] སུ་གྱུར་པ་ལས། ཨོཾ་བཛྲ་ས་ཏྭ་ཨཱཿདཔལ་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་རང་འོད་ཀྱི་ཡུམ་སྙེམས་མ་དཀར་མོ་དང་མཉམ་པར་སྦྱོར་བའི་སྐུར་གྱུར་པར་བསམ་ཞིང་། ཨོཾ་བཛྲ་ས་ཏྭ་ཧཱུྃ༔ ཞེས་སྙིང་པོ་བརྒྱ་རྩ་བརྒྱད་ཀྱིས་བྱིན་རླབས་པས། རྡོ་རྗེ་སེམས་དཔའི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ། གཏོར་མ་དཀར་དམར་རྒྱན་ལྡན་གཉིས་ལས་སྔགས་ཀྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་བྷཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བསམ། ཨོཾ་ཨཱཿཧཱུྃ་གིས་བྱིན་གྱིས་བརླབ། གཏོར་མ་དང་པོ། སྠཱ་ན་པ་ཏི་ཀྵི་ཏྲ་པཱ་ལ་ཉྩ་ན་མཿསརྦ་ཏ་ཐཱ་ག་ཏ་བྷྱོ་སོགས་གསུམ་གྱིས་བསྔོས་ལ། ཧཱུྃ༔ ཆོས་དབྱིངས་རང་རྩལ་ལས་ཤར་བའི༔ སྣང་བ་སྣ་ཚོགས་ས་བདག་ལ༔ དྲན་སྣང་སོ་མའི་གཏོར་མ་འབུལ༔ གློ་བུར་སྣང་བའི་ས་འདི་སྩོལ༔ བྷཱུ་མི་པ་ཏི་བ་ལིཾ་ཏ་ཁཱ་ཧི༔ ཞེས་གསོལ། ས་བཟུང་བའི་སླད་དུ་དབང་མཆོག་གི་ཕུར་བུ་ཐོགས་ལ། རང་གི་ཐུགས་ཀ་ནས་ཧྲཱིཿཡིག་མར་མེ་ལྟར་འབར་བ་འཕྲོས། ཕུར་བུ་ལ་ཐིམ་པས་དེ་ཉིད་དཔལ་རྟ་མགྲིན་སྐུ་མདོག་དམར་པོ་དབྱུག་ཏོ་དང་ཐོད་ཁྲག་འཛིན་པ་སྐུ་སྨད་ཕུར་བུའི་དབལ་ཅན་དུ་གྱུར་པར་བསམ་ཞིང་། ཨོཾ་པདྨཱན་ཏ་ཀྲྀ་ཏ་ཕཊ། ཅེས་ལན་བདུན་བཟླས་ནས་ས་ [62a] གཞི་ལ་བཏབ་པས། དེ་ལས་འོད་ཟེར་འཕྲོས་ས་གཞི་ལ་ཁྱབ་པས་སྣང་སྲིད་ཐམས་ཅད་བདག་གི་དབང་དུ་འདུས་པར་བསམ། ས་སྦྱོང་བའི་སླད་དུ། རང་གི་ཐུགས་ཀ་ནས་རྃ་ཡྃ་ཁྃ་འཕྲོས་པས་སྣོད་བཅུད་ཀྱི་དངོས་འཛིན་མ་དག་པའི་ཉེས་སྐྱོན་ཐམས་ཅད་བསྲེག་གཏོར་བཀྲུས་ཏེ་སྟོང་པར་སྦྱངས། སྟོང་པའི་ངང་ལས་སྣོད་བཅུད་སྣང་སྲིད་ཐམས་ཅད་འོག་མིན་བཀོད་པ་ལྷུན་གྲུབ་ཀྱི་ཞིང་ཁམས་ཆེན་པོར་ཡོངས་སུ་རྫོགས་པར་གསལ་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཿསྭ་བྷཱ་ཝ་ཤུ་དྡྷོཉཧཾཿ ཞེས་བཟླ་ཞིང་ལག་གཡས་པའི་སོར་མོ་ལྔ་རྡོ་རྗེ་རྩེ་ལྔ་པར་མོས་པས་བསྐོར་ཞིང་རེག །ས་སྲུང་བའི་སླད་དུ། གཏོར་མ་གཉིས་པ། ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་བྷྱོ་སོགས་ནས། ཨི་མཾཾཾ་ག་ག་ན་ཁཾ་གྲྀཧྞེ་དཾ་བ་ལིནྟ་སྭཱ་ཧཱ། ཞེས་ལན་གསུམ་གྱིས་བསྔོས་ལ། ཧཱུྃ༔ རང་བྱུང་སྙིང་པོ་བསྒོམ་པ་ལ༔ མི་དབང་མ་རིག་བདུད་ཀྱི་ཚོགས༔ རང་རྩལ་རོལ་པའི་གཏོར་མ་ལོངས༔ ཕ་མཐའ་བྲལ་བའི་ཀློང་དུ་དེངས༔ ཧཱུྃ་ཧཱུྃ་ཧཱུྃ་ཕཊ༔ ཅེས་དང་ སུམྦྷ་ནི་སོགས་དྲག་སྔགས་ཡུངས་ཐུན་ཚམ་རྔམས་དང་བཅས་པས་བསྐྲད་ལ། ཧཱུྃ༔ དབྱིངས་རིག་ཟུང་འཇུག་ཆོ་འཕྲུལ་ལས༔ སྣང་ཞིང་སྲིད་པས་བསྡུས་པའི་ཆོས༔ ཡེ་ནས་རང་གསལ་སྲུང་བའི་གུར༔ མ་བཅོས་ [62b] ཐིག་ལེ་ཆེན་པོར་རྫོགས༔ ཧཱུྃ་ཧཱུྃ་ཧཱུྃ་བཛྲ་རཀྵ༔ ཞེས་སྲུང་འཁོར་བསྒོམ། ས་འདུལ་བའི་སླད་དུ་དྲིའི་དུང་ཞལ་ཐོགས་ལ། ཧཱུྃ༔ ཆོས་དབྱིངས་ཡུམ་གྱི་ས་གཞི་ལ༔ རིག་པ་ཐབས་ཀྱི་བདུད་རྩི་ཡིས༔ བདེ་སྟོང་དངོས་གྲུབ་འཛིན་པའི་ཕྱིར༔ ཟུང་དུ་འཇུག་པའི་ཆག་ཆག་གདབ༔ པཉྩ་ཨ་མྲྀ་ཏ་མཎྜ་ལ་ཧཱུྃ༔ ཞེས་དཀྱིལ་འཁོར་གྱི་གཞི་ལ་བྱང་ཤར་ནས་གཡས་བསྐོར་དུ་ཁྱེམ་མེད་པར་བྱུག་གོ ། གཉིས་པ་ལྷག་པར་གནས་པའི་ཚུལ་ལ་གསུམ། ལྷ། བུམ་པ། སློབ་མ་སྟ་གོན་ནོ། །དང་པོ་ལྷ་སྟ་གོན་ནི། དཀྱིལ་འཁོར་གྱི་གཞིར་མཎྜལ་དྲིས་བྱུགས་པར་མེ་ཏོག་གི་ཚོམ་བུ་དབུས་སུ་ཆེ་བ་གཅིག །ཕྱོགས་མཚམས་རྣམས་སུ་བརྒྱད། མཐའ་སྐོར་དུ་འཁོར་རྣམས་མཚོན་བྱེད་མེ་ཏོག་སིལ་མར་བཀྲམ། སྨན་རཀ་གཏོར་མ་ཆུ་གཉིས་ཉེར་སྤྱོད་ལྔ་བཅས་བཤམ་ལ། ཁྲོ་བོའི་ཕྲིན་ལས་བྱང་བུ་ཁྲིགས་སྡེབས་ཀྱི་མཆོད་པ་བྱིན་རླབས་ནས་བརྩམ་ཕྲིན་ལས་ཀྱི་གཞུང་སྲང་ལ་བཟླས་པ་ཅི་འགྲུབ་མཐར་སྟོང་ཚིག་གི་མཆོད་བསྟོད་བྱའོ། །གཉིས་པ་བུམ་པ་སྟ་གོན་ནི། རིན་པོ་ཆེའི་བུམ་པ་གུ་གུལ་བདུག་ཅིང་ཡུངས་ཀར་གྱིས་བྲབ་པ་དང་བཅས་དྲག་སྔགས་བཟླས་པས་བགེགས་བསྐྲད། སྭ་བྷཱ་ཝའི་སྔགས་བརྗོད་བཞིན་རྒྱུན་འབབས་ཀྱི་ཆུ་གཙང་དྲི་བཟང་སོ་ལྔའི་བཅུད་ཀྱིས་སུམ་གཉིས་དགང་། ཨོཾ་ཛྙཱ་ན་བུདྡྷ་བཛྲ་རཏྣ་པདྨ་ཀརྨ་བྷྲཱུྃ༔ ཞེས་མགུལ་ཆིངས་ཀྱིས་སྤྲས་ཤིང་ཁ་རྒྱན་གཟུང་རྡོར་དང་ལྡན་པ་དཀྱིལ་འཁོར་དབུས་ཀྱི་མཉྫིར་བཀོད། ཉེ་ལོགས་སུ་དྲིའི་ཞལ་ཀྱང་འདུ་བྱས་ལ། བུམ་པ་རང་བྱུང་གཞལ་ [63a] ཡས་ཁང་ཆེན་དབུས། །བྱོལ་སོང་པདྨ་ཉི་ཟླའི་གདན་སྟེང་དུ། །སོགས་ལས་བྱང་གི་ལྷ་བསྐྱེད་ནས་བསྟོད་པའི་བར་དུ་བཏང་སྟེ། གཟུངས་ཐག་བླངས་ལ། རང་སྲོག་སྡགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་བརྒྱུད་བསྐུལ། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། ཅེས་སྙིང་པོ་དང་ཡང་སྙིང་ཅི་འགྲུབ་བཟླས་མཐར་སྟོང་ཚིག་ཕུལ། ཨོཾ་ཨཱཿཧཱུྃ་གིས་དུང་ཆོས་ཀྱི་མཆོད་ཡོན་ཕུལ་བས། བུམ་པའི་ལྷ་རྣམས་ཆགས་པ་ཆེན་པོས་བྱང་ཆུབ་ཀྱི་སེམས་སུ་ཞུ་བ་བུམ་པའི་ཆུ་དང་གཉིས་མེད་དུ་གྱུར་པར་བསམ། དཀྱིལ་འཁོར་ཡོལ་བས་བསྒྲིབ་སྟེ་བཞག་གོ ། གསུམ་པ་སློབ་མ་སྟ་གོན་ལ་བཅུ་ལས། དང་པོ་ཀུན་སློང་བཅོས་པས་མཚམས་སྦྱར་ཏེ་མཎྜལ་འབུལ་བ་ནི། འོ་མ་ཅན་ནམ་འབྲས་བུ་ཅན་གྱི་སོ་ཤིང་སོར་བཅུ་གཉིས་པ་གས་ཆག་མེད་པའི་རྩེ་མོ་སོར་གཉིས་ཟླུམ་པོ་ལ་མེ་ཏོག་གིས་བརྒྱན་ཅིང་སྨད་དབལ་ལྡན་དྲིའི་ཆུས་རླན་པ་དང་། མཎྜལ་པད་འདབ་བཞི་པར་མེ་ཏོག་གི་ཚོམ་བུ་ལྔ་བཀོད་པ། དྲིའི་ཁྱོར་ཆུ། དཔུང་སྐུད་ཁ་དོག་ལྔ་བསྒྲིལ་རྡོ་རྗེའི་མདུད་པ་གསུམ་ལྡན། ཀུ་ཤུའི་ཕོན་པོ། ཏིལ་ནག་དང་མེ་ཆུ། དྲིའི་དུང་ཞལ། སློབ་མ་མཆོད་པའི་ཉེར་སྤྱོད་བཅས་ཉེ་ལོགས་སུ་བསྡོག །ཟུང་དུ་མ་གྱུར་པའི་སློབ་མ་རྣམས་སྒོ་དྲུང་དུ་འཁོད་པ་ལ། ཇི་ལྟར་བལྟམས་པ་སོགས་བརྗོད་ཅིང་ལས་བུམ་གྱི་ཆུས་ཁྲུས་བྱ། [63b] ཕྱག་བཅས་གྲལ་དུ་འཁོད་པ་དང་མེ་ཏོག་བཀྲམ་བསྡུ་བྱས་ལ། སེམས་བསྐྱེད་གསལ་བཏབ་ནས། དེའང་རང་རེ་རྣམས་ཚེ་རབས་ཐོག་མ་མེད་པ་ནས་བློ་འཁྲུལ་རྟོག་གི་གཞན་དབང་ལ་བརྟེན་ནས་མུ་མཐའ་མེད་པའི་འཁོར་བའི་རྒྱ་མཚོ་ཆེན་པོར་ཡང་ནས་ཡང་དུ་འཁྱམས་ཤིང་སྡུག་བསྔལ་ཤ་སྟག་ཉམས་སུ་མྱོང་བ་ལས། ད་རེས་སྔོན་བསགས་དགེ་བ་རླབས་པོ་ཆེ་རྣམ་པར་སྨིན་པའི་མཐུ་ལས་དལ་འབྱོར་ཚང་བའི་མི་ལུས་ཡང་དག་པ་ཐོབ། སངས་རྒྱས་ཀྱི་བསྟན་པ་རིན་པོ་ཆེ་དང་མཇལ། དེའི་ཡང་སྙིང་རྡོ་རྗེ་ཐེག་པའི་ཟབ་ཆོས་དང་འཕྲད། དེ་སྟོན་བྱེད་མཚན་ཉིད་དང་ལྡན་པའི་རྡོ་རྗེ་སློབ་དཔོན་གྱིས་རྗེས་སུ་བཟུང་བ་སོགས་ལོ་ལེགས་པའི་སྟོན་ཐོག་ལྟར་ཕུན་སུམ་ཚོགས་པའི་སྐལ་བ་དང་ལྡན་པའི་སྐབས་འདིར། མནོག་ཆུང་ཚེ་འདིའི་བྱ་བས་མི་ཚེ་སྟོང་ཟད་དུ་མི་བཏང་བར་དོན་ཆུང་རྨི་ལམ་ལྟ་བུའི་བྱ་བཞག་ལིང་གིས་བོར་ནས། འདི་དང་གཏན་གྱི་ཕན་བདེའི་འབྱུང་གནས་མཚུངས་ཟླ་མ་མཆིས་པ་དམ་པའི་ཆོས་རྣམ་པར་དག་པ་ཞིག་བསྒྲུབ་པ་ལ་ཅིས་ཀྱང་འབད་འཚལ། བསྒྲུབ་བྱ་དམ་པའི་ཆོས་ཀྱི་ཚུལ་ལ་གདུལ་བྱའི་ཁམས་དབང་གི་རྗེས་སུ་འགྲོ་བ་རྣམ་གྲངས་བསམ་གྱིས་མི་ཁྱབ་པར་བཞུགས་པ་དེ་ཐམས་ཅད་དབྱེ་བའི་སྒོ་ནས་ཐེག་པ་རིམ་ [64a] པ་དགུར་གནས་ཀྱང་། བསྡུ་བའི་སྒོ་ནས་ཐེག་པ་ཆེ་ཆུང་གཉིས་སུ་འདུ་བ་ལས་འདིར་ཐེག་པ་ཆེན་པོ། དེ་ལ་རྒྱུ་འབྲས་ཀྱི་ཐེག་པ་གཉིས་ལས་འདིར་རྒྱུའི་ཐེག་པ་ལས། ལམ་བདེ་བ་དང་། དུས་མྱུར་བ་དང་། ཐབས་ལ་མཁས་པ་སྟེ་ཁྱད་པར་གསུམ་གྱིས་འཕགས་པའི་འབྲས་བུ་རྡོ་རྗེ་ཐེག་པ་ཡིན། དེ་ལའང་ཕྱི་ཀྲི་ཡོག་སྡེ་གསུམ་གྱི་ཐེག་པ་དང་། ནང་བླ་ན་མེད་པའི་ཐེག་པ་གཉིས་ལས་འདིར་ཕྱི་མ། དེ་ལའང་སྔགས་གསར་རྙིང་གཉིས་ལས། འདིར་གསར་མ་ལས་ཆེ་བ་དྲུག་ལྡན་གྱིས་ཁྱད་པར་དུ་གྱུར་བ་གསང་སྔགས་རྙིང་མ། རྙིང་མ་ལའང་བཀའ་གཏེར་གྱི་སྲོལ་ཁ་ཆེན་པོ་གཉིས་སུ་ཡོད་པ་ལས། འདིར་ཉེ་བརྒྱུད་ཟབ་མོ་གཏེར་གྱི་ཆོས་སྡེ་ཟབ་རྒྱས་ཀྱི་ཐེག་པ་མ་ལུས་པའི་མཐར་ཐུག །ཚེ་འདི་ཉིད་ལ་མཆོག་གི་དངོས་གྲུབ་མངོན་དུ་བྱེད་པའི་མྱུར་ལམ། མན་ངག་རྫོགས་པ་ཆེན་པོ་སྡེ་གསུམ་གྱི་ནང་ཚན། ཆོས་ཐམས་ཅད་ཆོས་ཉིད་ཀུན་ཏུ་བཟང་མོའི་ཀློང་ལས་མི་འདའ་བར་སྟོན་པ་ཀློང་དགུ་བམ་པོ་ཉི་ཁྲིའི་རྒྱུད་ཀྱི་བཅུད་ཕྱུངས་པ། ནང་སྐོར་ཀློང་སྡེ་རྫོགས་པ་ཨ་ནུ་ཡོ་གའི་མན་ངག་འདུས་པ་ཆེན་པོ་མདོ་ལུང་དང་འབྲེལ་བ་ཡི་དམ་ཁྲོ་བོ་མངོན་རྫོགས་རྒྱལ་པོ་རྩ་བའི་དཀྱིལ་འཁོར་ [64b] དུ་དབང་བསྐུར་བསྒྲུབ་པར་བྱེད་པ་ཡིན། དེ་ལ་ཇི་སྐད་དུ། དབང་བསྐུར་དཀྱིལ་འཁོར་སྔོན་འགྲོ་བར། རྡོ་རྗེ་འཆང་གིས་གསུངས་པ་སྟེ། ཞེས་གསུངས་པ་ལྟར་དབང་བསྐུར་བ་དེ་ཡང་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དཀྱིལ་འཁོར་གྱི་སྔོན་འགྲོའི་ཆོས་ལའང་སའི་ཆོ་ག་དང་སྟ་གོན་དུ་བྱ་བ་གཉིས་ལས། འདིར་ས་ཆོག་ལྷ་དང་བུམ་པའི་སྟ་གོན་བཅས་སྔོན་དུ་སོང་། ད་སློབ་མ་སྟ་གོན་གྱི་བྱ་བ་དེ་སྒྲུབ་པ་སྐབས་སུ་བབས་པ་ཡིན་པས་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་ལྷག་གནས་ཀྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་མཎྜལ་འབུལ་དུ་གཞུག །གཉིས་པ་གསོལ་བ་གདབ་ཅིང་གནང་བ་སྦྱིན་པ་ནི། ཕྱག་སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་སྙིང་ནས་དད་མོས་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས། ཨེ་མ་ཧོཿ འདྲེན་པའི་གཙོ་བོ་བླ་མ་རྗེ༔ བདག་ཅག་འཁོར་བ་ལས་སྒྲོལ་ཕྱིར༔ ཐར་པའི་ལམ་མཆོག་སྟོན་པ་དང་༔ ཐུགས་རྗེ་བརྩེ་བས་བཟུང་དུ་གསོལ༔ ལན་གསུམ། དེ་ལྟར་གསོལ་པ་བཏབ་པ་ལ་སྤྲོ་བ་བསྐྱེད་པའི་སྒོ་ནས་གནང་བ་སྦྱིན་པ་འདི་ལ་གསན་པས་ཁྱབ་པར་གདའ། ཧོཿ ཐར་པ་དོན་གཉེར་སྐལ་ལྡན་རྣམས༔ [65a] ཚུར་ཤོག་ཇི་ལྟར་འཚམས་པ་ཡི༔ ལམ་མཆོག་བདག་གི་སྟོན་པས་ན༔ སྐལ་ལྡན་པ་རྣམས་སྤྲོ་བ་བསྐྱེད༔ གསུམ་པ་རྒྱུད་སྦྱོང་ཞིང་སྡོམ་པ་བཟུང་བ་ནི། དེ་ལ་ཐོག་མར་རྒྱུད་རྣམ་པ་དག་པར་བྱ་བའི་སླད་དུ། མདུན་གྱི་ནམ་མཁར་སྐྱབས་གནས་དཀོན་མཆོག་རྩ་གསུམ་རྒྱ་མཚོ་མངོན་སུམ་དུ་བཞུགས་པའི་སྤྱན་སྔར་རང་གཞན་སེམས་ཅན་ཐམས་ཅད་དེང་ནས་སྙིང་པོ་བྱང་ཆུབ་མ་ཐོབ་ཀྱི་བར་དུ་རྩེ་གཅིག་གུས་པ་ཆེན་པོ་སྐྱབས་སུ་འགྲོ་བ་ཀུན་རྫོབ་རྒྱུའི་སྐྱབས་འགྲོ་དང་། དོན་དམ་པར་ཆོས་ཐམས་ཅད་ཀྱི་གནས་ལུགས་ངོ་བོ་ཀ་དག་སྤྲོས་བྲལ་བརྡལ་ཁྱབ་ཆེན་པོ་ཡེ་ནས་རང་ཆས་སུ་བཞུགས་པ་སངས་རྒྱས། རང་བཞིན་མ་འགགས་ལྷུན་གྲུབ་སྐུ་དང་ཐིག་ལེའི་རོལ་པ་རང་གསལ་བ་དམ་ཆོས། ཐུགས་རྗེ་རོལ་རྩལ་འགགས་མེད་སྣ་ཚོགས་སྤྲུལ་པའི་ཆོ་འཕྲུལ་ཅིར་ཡང་སྣང་བ་དགེ་འདུན་ཏེ། དེ་ལྟ་བུའི་མཆོག་གསུམ་སྐྱབས་གནས་ཆིག་རྫོགས་རིག་པ་བྱང་ཆུབ་སེམས་ཀྱི་གཤིས་སུ་བསྐྱབ་བྱ་སྐྱོབ་བྱེད་ལས་འདས་པ་དབྱེར་མེད་མཉམ་བརྡལ་ཆེན་པོར་རང་བབས་སུ་ལ་བཟླ་བ་དོན་གྱི་སྐྱབས་འགྲོ་ཡོངས་ཤེས་ཀྱི་ངང་ནས་འདིའི་རྗེས་ཟློས། ངོ་བོ་སྟོང་པ་སོགས་སྔོན་འགྲོའི་བྱང་བུ་ལྟར་ལན་གསུམ། [65b] སེམས་བསྐྱེད་པའི་སླད་དུ་སེམས་ཅན་ཐམས་ཅད་ཡེ་ནས་ཆོས་ཀྱི་དབྱིངས་རྣམ་པར་དག་པ་བྲི་གང་འཕོ་འགྱུར་བྲལ་བར་བཞུགས་པ་ལ། རང་ངོ་མ་ཤེས་པས་བསྒྲིབ་ཏེ་བདག་གཞན་སྒྲོ་བཏགས་པའི་གཉིས་ཆོས་ཀྱི་འཁྲུལ་པས་བཅིངས་པའི་འགྲོ་བ་རྣམས་སྲིད་ཞིར་མི་གནས་པའི་དཔལ་ཆེན་རང་བྱུང་ཁྲོ་བོའི་རྒྱལ་པོའི་ཡེ་ཤེས་ཀྱི་ཀློང་དུ་བསྒྲལ་བར་བྱའོ་སྙམ་པའི་བློས་ཕྱོགས་ལྷུང་དང་བྲལ་བར་ཁྱབ་གདལ་ཆེན་པོར་སེམས་བསྐྱེད་པ་འདིའི་རྗེས་ཟློས། །ཨེ་མ་ཧོ་ཆོས་དབྱིངས་སོགས་ལན་གསུམ། བསགས་སྦྱོང་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་བགྱི་བ་ལ། དམིགས་བསམ་བརྗོད་པའི་མཐའ་ལས་འདས་པ་རང་རིག་བདེ་གཤེགས་སྙིང་པོའི་ལྷ་ཚོགས་ལ་ཆོས་དབྱིངས་འདུ་འབྲལ་མེད་པར་རྟོགས་པའི་ཕྱག་འཚལ་བ་དང་། རང་གསལ་མེ་ལོང་ལྟ་བུའི་ཡེ་ཤེས་ཀྱི་ཀློང་དུ་འཁོར་འདས་སྣང་སྲིད་ཀྱི་བཀོད་པ་རང་བྱུང་རྒྱན་གྱི་འཁོར་ལོར་ཤར་བའི་མཆོད་པ་ཕུལ་བ་དང་། ཆོས་དབྱིངས་མཉམ་པ་ཉིད་ཀྱི་ཀློང་དུ་དགེ་སྡིག་སྤང་བླང་གི་འཛིན་རྟོག་དམིགས་སུ་མེད་པར་མ་ཤེས་པས་ཕན་གནོད་རྒྱུ་འབྲས་སུ་ཞེན་པ་ལྟ་བའི་གོལ་སྒྲིབ་ཡོངས་སུ་བཤགས་པ་དང་། ཀུན་ཁྱབ་སོ་སོར་རྟོག་བའི་ཡེ་ཤེས་ཀྱི་ཀློང་དུ་ཟག་མེད་བྱང་གྲོལ་གྱི་ [66a] དགེ་ཚོགས་མཐའ་དག་མ་འདྲེས་ཀུན་ཏུ་གསལ་བ་ལ་ངོ་མཚར་བའི་རྗེས་སུ་ཡི་རང་བ་དང་། དག་གྲོལ་གྱི་བྱ་བ་ལྷུན་གྱིས་གྲུབ་པའི་ཀློང་ལས་བརྗོད་མེད་ན་དའི་དབྱངས་ཀྱིས་འདོད་འབྱུང་ཡིད་བཞིན་རྫོགས་པ་ཆེན་པོའི་ཆོས་འཁོར་རྒྱུན་དུ་བསྐོར་བར་བསྐུལ་བ་དང་། བདེན་གཉིས་དབྱེར་མེད་ཟུང་འཇུག་ཡེ་ཤེས་རྡོ་རྗེའི་སྐུ་མཆོག་རང་རིག་འདུ་འབྲལ་མེད་པའི་ངོ་བོར་རྟག་ཁྱབ་ཞི་བ་གཡུང་དྲུང་ཆེན་པོར་བཞུགས་སུ་གསོལ་བ་དང་། དེ་ལྟ་བུའི་ཟག་མེད་ཡེ་ཤེས་ཀྱི་དགེ་ཚོགས་ཆོས་ཀྱི་དབྱིངས་སུ་བསྔོ་བའི་ཐ་སྙད་བྲལ་བར་ཤེས་པ་ལས་གཉིས་མེད་མཐའ་གྲོལ་ཆེན་པོའི་གོ་འཕང་སྨོན་པ་མེད་པའི་འབྲས་བུ་རང་ས་ཟིན་པ་སྟེ། ཁྱད་པར་ཅན་གྱི་དོན་དྲན་བཞིན་པས་འདིའི་རྗེས་ཟློས། དམིགས་མཐའ་བྲལ་བའི་སོགས་ལན་གསུམ། ཨ་ཏི་ཁྱབ་བརྡལ་ཡེ་གྲོལ་ཆེན་པོར་མཚན་མའི་བསྲུང་སྡོམ་མི་དམིགས་ཀྱང་། གཟུང་འཛིན་གྱི་སྒྲོགས་སུ་ཆུད་པའི་མེད་སྣང་འཁོར་པའི་འགྲོ་རྣམས་བསྒྲལ་བའི་སླད་དུ། ཕྱི་སྒོ་གསུམ་གྱི་ཉེས་སྤྱོད་སྡོམ་པ་སོ་སོར་ཐར་པའི་ཚུལ་ཁྲིམས། ནང་གཞན་ལ་ཕན་པ་སྒྲུབ་པ་བྱང་ཆུབ་སེམས་དཔའི་བསླབ་བྱ། གསང་བ་རང་རྒྱུད་ཐབས་ཤེས་དབྱེར་མེད་ཟག་མེད་བདེ་བ་ཆེན་པོའི་རང་བཞིན་དུ་སྡོམ་པ་རིག་འཛིན་སྔགས་ [66b] ཀྱི་དམ་ཚིག་མཐའ་དག་ལེགས་པར་བླངས་ནས་ཚུལ་བཞིན་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས། བདེ་གཤེགས་སྲས་བཅས་སོགས་ལན་གསུམ། དེ་ལྟར་རྒྱུད་སྦྱངས་ཤིང་སྡོམ་ལྡན་དུ་བྱས་པ་ཉིད་དཀྱིལ་འཁོར་དུ་འཇུག་པར་གནང་ཞིང་སྟ་གོན་ལ་གནས་པར་གདམས་པ་འདི་ལ་གསན་འཚལ། དེ་ལྟར་ཡིན་ན་གསང་སྔགས་ཀྱི༔ དཀྱིལ་འཁོར་དག་ཏུ་འཇུག་རུང་ཡིན༔ བརྟག་ཕྱིར་སྟ་གོན་ལེགས་བར་གྱིས༔ བཞི་པ་སོ་ཤིང་དོར་བ་ནི། དེ་ནས་དངོས་གྲུབ་ཀྱི་སྐལ་པ་བརྟག་པ་ལ་གཉིས་ལས། དང་པོ་སོ་ཤིང་དོར་ཏེ་བརྟག་པ་ནི། ཧཱུྃ་ལས་བྱུང་བའི་སོ་ཤིང་བྱང་ཆུབ་ཀྱི་ཤིང་གི་རང་བཞིན་སོར་བཅུ་གཉིས་པའི་ཚད་ཅན་དྲིས་བྱུགས་ཤིང་རྩེ་མོར་མེ་ཏོག་གི་ཅོད་པན་བཅིངས་པ་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་གྱུར། དེ་ཉིད་ཁྱེད་རང་རྣམས་ཀྱི་ལག་པ་ཐལ་མོའི་བར་དུ་བཟུང་ལ་རྩེ་མོས་སོ་བྲུད་པས་སྡིག་སྒྲིབ་ཐམས་ཅད་སྐྱུགས་པར་མོས་ཤིང་། དཔལ་ཆེན་མངོན་རྫོགས་རྒྱལ་པོའི་ལྷ་ཚོགས་རྣམས་ཀྱིས་བདག་ལ་བཟང་ངན་གྱི་པྲ་བརྟག་བསྟན་དུ་གསོལ་སྙམ་པའི་འདུན་པ་རྩེ་གཅིག་པས་ཚིག་འདིའི་རྗེས་ཟློས་དང་བཅས་མཎྜལ་གྱི་དབུས་སུ་དྲང་པོར་འདོར་མཛོད། ཅེས་སོ་ཤིང་གཏད་ལ། ཧོཿ [67a] ཆོས་དབྱིངས་མཎྜལ་རྣམ་པར་དག༔ ཡེ་ཤེས་ལྔ་ཡི་ཚོམ་བུར་གསལ༔ བདག་གི་དུག་ལྔ་ཡེ་ཤེས་སུ༔ སངས་ནས་སྐལ་པ་མཐོང་བར་ཤོག༔ བཛྲ་ཧ་ས་ཧ༔ དེ་ལྟར་དོར་བས་མཎྜལ་གྱི་དབུས་སུ་བབས་ན་མཆོག་གི་དངོས་གྲུབ་ཐོབ། ཤར་དུ་ཞི་བ། ལྷོ་རུ་རྒྱས་པ། ནུབ་ཏུ་དབང་། བྱང་དུ་དྲག་པོ། སྟེང་དུ་མཁའ་སྤྱོད། འོག་ཏུ་ས་སྤྱོད། མཚམས་སུ་ལས་ཕྲན་ཚེགས་འགྲུབ། མ་ཚུད་ན་ལན་གསུམ་བསྐྱར་ལ་དོར། །གསུམ་ཀ་ལ་མ་ཚུད་ན་རེ་ཞིག་སྐལ་བ་ཆད་པར་གསུངས་པས་ཉམས་ཆག་སྐོང་ཞིང་ཚོགས་བསགས་པ་ལ་འབད་པར་རིགས་སོ། ལྔ་པ་ཁྱོར་ཆུ་སྦྱིན་པ་ནི། དེ་ནས་གཉིས་པ་རྨི་ལམ་བརྟག་པ་ལ་སྦྱོར་དངོས་གཉིས་ཀྱི་སྦྱོར་བ་ལའང་གསུམ་ལས། དང་པོ་རྨི་ལམ་གསལ་བའི་ཆེད་དུ་ཁྱོར་ཆུ་བླུད་པ་ནི། ལས་བུམ་མམ་དུང་ཞལ་གྱི་ཆུ་བྃ་མང་དུ་བཟླས་པས་བརླབ། དྲིའི་ཆུ་ཁྱོར་བར་ལན་གསུམ་བྱིན་པ་འཐུང་ལ་ལྷག་མ་རྒྱབ་ཏུ་དོར་ཅིག །ཧཱུྃ༔ དྲི་མེད་ཁྱོར་ཆུ་བདུད་རྩིའི་མཚོ༔ རྣམ་པར་དག་པ་ཁྲུས་ཀྱི་ཆུ༔ བག་ཆགས་ངན་པ་སངས་གྱུར་ནས༔ སྐལ་བཟང་རྨི་ལམ་མཐོང་བར་ཤོག༔ ཅེས་ལས་སྔགས་བཟླ་ཞིང་ཁྱོར་ཆུ་སྦྱིན། དྲུག་པ་སྲུང་སྐུད་གདག་པ་ནི། གཉིས་པ་རྨི་ལམ་ [67b] ལ་བར་ཆད་སྲུང་བའི་དོན་དུ་དཔུང་སྐུད་གདག་པ་ནི། ཡེ་ཤེས་ལྔ་དང་རྡོ་རྗེ་གསུམ་མཚོན་པའི་སྲུང་བའི་སྐུད་པ་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་སུ་བཅིངས་པས་སྒོ་གསུམ་གྱི་བར་ཆད་ཐམས་ཅད་སྲུང་བར་མོས་ཤིག །ཅེས་ལས་སྔགས་ཀྱིས་བསྔགས་པའི་སྲུང་སྐུད་བཅིངས་ལ་རྡོ་རྗེས་རྒྱ་གྲམ་དུ་རྒྱས་གདབ། བདུན་པ་ཀུ་ཤ་སྦྱིན་པ་ནི། གསུམ་པ་རྨི་ལམ་མི་འཁྲུགས་པའི་ཕྱིར་དུ་ཀུ་ཤའི་སྔས་སྟན་སྦྱིན་པ་ལ། དྷཱི་དང་ཁྃ་ལས་སྐྱེས་པའི་ཀུ་ཤ་སྔོ་ལྗང་རྨ་བྱའི་མགྲིན་མདོག་ལྟར་འཇམ་ལ་རེག་ན་བདེ་བ། སློབ་མ་རྣམས་ཀྱི་རྨི་ལམ་མི་འཁྲུགས་ཤིང་གསལ་བའི་ནུས་པ་དང་ལྡན་པ་ཉིད་ཆུང་བ་སྔས་དང་ཆེ་བ་སྟན་གྱི་དོན་དུ་ཟུངས་ཤིག །ཧཱུྃ༔ ཐབས་ཀྱི་དྷཱི་ལས་སྐྱེས་པ་དང་༔ ཤེས་རབ་ཁྃ་ལས་སྐྱེས་པ་ཡི༔ གཙང་ཞིང་དགེ་བའི་སྔས་སྟན་ལ༔ ཉལ་ཏེ་ལྷ་ལ་སེམས་བཟུང་ལ༔ བཟང་ངན་གང་བྱུང་བདག་ལ་སྟོན༔ གང་ཡང་ཆོས་ཉིད་ཀློང་ལ་ཞོག༔ བཛྲ་དྷཱི་ཁྃ༔ ཞེས་ལག་གཡས་གཡོན་དུ་གཏད། གཉིས་པ་རྨི་ལམ་བརྟག་པ་དངོས་ནི་དོ་ནུབ་ཁྱེད་རང་རྣམས་བླ་མའམ་དཀྱིལ་འཁོར་ལ་མགོ་ཕྱོགས་པས་ཀུ་ཤའི་སྔས་སྟན་ལ་སེང་གེ་ཉལ་སྟབས་དང་བཅས་དགེ་བའི་སེམས་ཀྱིས་ཉོལ་ལ། དེ་ལས་ཐོ་རངས་ན་རྨི་ལམ་གྱི་མཚན་མ་བཟང་ [68a] ངན་དག་མཐོང་བར་འགྱུར་པས་ནངས་པར་ཁོ་བོ་ལ་སྨྲོས་ཤིག །ཅེས་བསྒོ། བརྒྱད་པ་སྡིག་སྒྲིབ་སྦྱོང་བ་ནི། ཏིལ་དང་མེ་ཆུ་མདུན་དུ་བཀོད་ལ། དེ་ནས་སྡིག་སྒྲིབ་སྦྱོང་བའི་སླད་དུ་ཁྱེད་རང་རྣམས་ཐ་མལ་དུ་གནས་པའི་རྐང་མཐིལ་དུ་ཡྃ་ལྗང་གུ་དང་ལྟེ་བར་རྃ་དམར་པོ། སྙིང་གར་ཀྃ་ནག་པོ་ལ་ཚེ་རབས་ཐོག་མ་མེད་པ་ནས་བསགས་བའི་སྡིག་སྒྲིབ་ཐམས་ཅད་འདུས་པར་མོས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རྐང་མཐིལ་གྱི་ཡྃ་དང་ལྟེ་བའི་རྃ་བསྐུལ། མེ་རླུང་གི་སྦྱོར་བས་སྙིང་གའི་ཀཾ་ཡིག་དེད། སྣ་སྒོར་སྡིག་པ་རྭ་ཅན་གྱི་རྣམ་པས་ཐོན་ནས་མདུན་གྱི་ཏིལ་ལ་ཐིམ་པ་དེ་ཉིད་ཡེ་ཤེས་ཀྱི་མེས་བསྲེགས་ཤིང་ཆོས་ཉིད་ཀྱི་རྒྱ་མཚོར་དོར་བར་མོས་ཤིག །ཨོཾ་སརྦ་པཱ་པཾ་ཨ་པ་ན་ཡ་བི་ཤུདྡྷེ་སྭཱ་ཧཱ༔ ཞེས་ལན་གསུམ་སོགས་བརྗོད་བཞིན་གཡས་སུ་མེར་བསྲེགས་གཡོན་དུ་ཆུར་བླུགས་ལ་ཕྱིར་དོར། དགུ་པ་གནས་གསུམ་བྱིན་གྱིས་བརླབ་པ་ནི། དེ་ལྟར་ཁྱེད་རང་རྣམས་ཀྱི་སྡིག་སྒྲིབ་ཐམས་ཅད་ལྷག་མེད་དུ་བྱང་ནས་ལུས་འོད་ཀྱི་གོང་བུར་ཞུ་བ་ལས་སྐད་ཅིག་གིས་རྡོ་རྗེ་སེམས་དཔའ་དཀར་གསལ་རྡོ་རྗེ་དང་དྲིལ་བུ་འཛིན་ཅིང་དར་དང་རིན་པོ་ཆེའི་རྒྱན་ཅན་ཞབས་སྐྱིལ་ཀྲུང་དུ་བཞུགས་པ་རང་འོད་ཀྱི་ཤེས་རབ་མ་དང་མཉམ་པར་སྦྱོར་བའི་སྐུར་ [68b] ལམ་གྱིས་གྱུར་པའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་རྣམས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་གསལ་བར་གྱུར། ཨོཾ་ཨཱཿཧཱུྃ། ཞེས་བརྗོད་བཞིན་གནས་གསུམ་དུ་དྲིས་ཐིག་ལེ་བྱ། དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ཏེ་ཁྱེད་རང་ལ་ཐིམ་པས་དབྱེར་མེད་དུ་གྱུར་པ་ཉིད་བརྟན་པར་བྱས་པའི་མོས་པ་མཛོད། རྡོ་རྗེ་དང་བཅས་པའི་མེ་ཏོག་སྤྱི་བོར་བཞག་ལ། ཏིཥྛ་བཛྲ། ཞེས་བརྗོད། དེ་ལྟར་ཁྱེད་རང་རྣམས་ཀྱི་སྒོ་གསུམ་ལྷའི་བདག་ཉིད་ཡེ་ནས་ཡིན་པ་ལ་ཡིན་པར་གསལ་བཏབ་པ་དེ་མཆོད་པའི་ཡུལ་དུ་བཟུང་བ་ཡིན་པས་སློབ་དཔོན་གྱིས་མཆོད་པ་བགྱིས་པའི་མོས་པ་མཛོད། ཨོཾ་བཛྲ་པུཥྤེ་ཨཱཿཧཱུྃ་སོགས་ནས། ཤཔྟའི་བར་གྱིས་ཉེར་སྤྱོད་འབུལ་ཚུལ་བྱའོ། བཅུ་པ་ཆོས་བཤད་པ་ནི། ཟབ་མོའི་སྒོར་ཞུགས་ནས་ཕྱིར་མི་ལྡོག་བའི་སླད་དུ་བདེན་པིའ་ཆོས་བཤད་པས་སྤྲོ་བ་བསྐྱེད་པ་འདི་ལ་གསན་འཚལ། འཇིག་རྟེན་འདི་ན་ཀུན་མཁྱེན་དག །ཨུ་དུམ་ཝ་རའི་མེ་ཏོག་མཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ན་མི་འབྱུང་ངོ་། །གསང་སྔགས་སྤྱོད་པའི་ཚུལ་འདི་ནི། །དེ་བས་ཀྱང་ནི་དཀོན་པ་སྟེ། །བུ་ཡིས་བློ་གྲོས་འདི་གྱིས་ཤིག །ཀྱེ་རིགས་ [69a] ཀྱི་བུ་རྣམས་འཇིག་རྟེན་ན་ཨུ་དུམ་ཝ་རའི་མེ་ཏོག་བརྒྱ་ལམ་ན་འབྱུང་སྲིད་ཀྱི་དེ་བས་སངས་རྒྱས་འཇིག་རྟེན་དུ་འབྱོན་པ་དཀོན། བྱོན་ཀྱང་ཆོས་གསུངས་པ་དང་ཁྱད་པར་ཐེག་ཆེན་གསུངས་པ་དཀོན། དེ་ལས་ཀྱང་གསང་སྔགས་རྡོ་རྗེ་ཐེག་པ་གསུངས་པ་ནི་ཤིན་ཏུ་དཀོན་པས། རྙེད་པར་དཀའ་ཞིང་རྙེད་ན་དོན་ཆེ་བ་དཀྱིལ་འཁོར་ཆེན་པོ་ལན་གཅིག་མཐོང་བས་ཀྱང་བསྐལ་པ་བྱེ་བར་བསགས་པའི་སྡིག་པ་འདགས་པར་གསུངས་ན། དཀྱིལ་འཁོར་དུ་ཞུགས་ནས་དབང་བསྐུར་བ་ཚུལ་བཞིན་ཐོབ་པར་གྱུར་ན་སྨོས་ཀྱང་ཅི་དགོས་ཏེ། ཐབས་མང་དཀའ་བ་མེད་པའི་ཚུལ་གྱིས་རིང་པོར་མི་ཐོགས་པར་བླ་ན་མེད་པ་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པར་བྱེད་པ་མྱུར་ལམ་རྡོ་རྗེ་ཐེག་པའི་རིགས་སུ་སྐྱེས་པ་ནི་ཁྱེད་རྣམས་ཀྱིས་རྙེད་པ་ལེགས་པར་རྙེད་པ་ཡིན་པས། སྤྲོ་བ་ཆེན་པོ་བསྐྱེད་ལ་ཡང་དག་པའི་བློ་གྲོས་དང་བསམ་པ་དེ་ལས་ནམ་ཡང་མི་འགྱུར་བར་གྱིས་ཤིག །འདི་མཚམས་དངོས་སྟ་སྤྲེལ་ན་འོག་གི་དངོས་གཞིའི་ལོ་རྒྱུས་ལ་འཇུག །དཀྱུས་སུ། དངོས་གཞི་དབང་བསྐུར་བའི་ཆོ་ག་སང་ཉིན་འབྱུང་བ་ལགས་པས་དགེ་བའི་རྩ་བ་གཞན་དོན་དུ་བསྔོ་བར་ཞུ བསོད་ནམས་འདི་ཡིས་སོགས་ཀྱིས་དགེ་བ་བསྔོས་ཏེ་སློབ་མ་རྣམས་ [69b] རང་གནས་སུ་བཏང་། སློབ་དཔོན་གྱིས་སྟ་གོན་གྱིས་ལྷ་ལ་མཆོད་བསྟོད་སྔོན་དུ་འགྲོ་བས། འདེགས་པའི་རྒྱ་དང་བཅས། ཨྃ་བཛྲ་ཨུཏྟིཥྛ། ཞེས་པས། སྟ་གོན་གྱི་ལྷ་རྣམས་བར་སྣང་འོད་ཀྱི་དྲ་བར་བཞུགས་པར་མོས། ཚོམ་བུ་དང་མཆོད་པ་རྣམས་བསྡུ། ཕྱིར་ནངས་སློབ་མ་རྣམས་ཀྱིས་རྨི་ལམ་དགེ་བའི་མཚན་མ་མཐོང་ན་ཞེན་པ་མེད་པའི་སྒོ་ནས་གཟེངས་བསྟོད། ཅི་ཡང་མ་མཐོང་ན་འབྲིང་། ངན་ན་ཞི་བའི་སྲེག་བླུགས་སོགས་ཟློག་པའི་ཐབས་བྱ་ཞིང་། གཙོ་བོ་ཆོས་ཉིད་སྒྱུ་མ་ལྟ་བུར་ཤེས་པས་བདེན་མེད་ཀྱི་རྒྱས་བཏབ་པས་བཟློག་གོ །གཉིས་པ་དངོས་གཞི་ལ་གསུམ། དབང་རྟེན་དཀྱིལ་འཁོར་བཤམས། དབང་དོན་སྒྲུབ་ཅིང་མཆོད་པ། དབང་བསྐུར་དངོས་ལ་འཇུག་པའོ། །དང་པོ་ནི། སྟེགས་བུའི་དབུས་སུ་འདི་ཉིད་ཀྱི་དཀྱིལ་འཁོར་རས་བྲིས་དངོས་སམ་བཀའ་མ་འདུས་མདོའི་རས་བྲིས་ལྟ་བུ་ཡོད་ན་བཀྲམ། མེད་ན་མཎྜལ་ལ་ཚོམ་བུ་ལྷ་གྲངས་བཀོད་པའི་སྟེང་དུ་མཉྫིའི་ཁར་སྔར་སྟ་གོན་བྱས་པའི་བུམ་པ་ཉིད་བརྟན་པོར་འགོད། དེའི་མདུན་དུ་གཙོ་འཁོར་དགུའི་སྐུ་ཙཀ །རྡོ་དྲིལ་ལྷན་ཅིག་ཏུ་བསྡམས་པ་དང་འཛོམ་ན་གསང་མཚན་ཤོག་དྲིལ། གཡས་སུ་དབུ་རྒྱན་ཅོད་པན། གསང་ཐོད་མངར་གསུམ་ཆོས་སྨན་སྦྱར་བ། སྔགས་ཕྲེང་། རྒྱབ་ཏུ་རྡོ་རྗེ། རིག་མའི་གཟུགས་བརྙན། གཡོན་དུ་དྲིལ་བུ། ཤེལ་རྡོ། ཁྲི་གདུགས་རྡོ་དྲིལ་འཁོར་ལོ་དུང་སོགས་མངའ་གསོལ་ཆས་བཅས་མངོན་རྫོགས་རྩ་བའི་དབང་དང་། མཐའ་བརྟེན་སྒྲུབ་རྫས་དབང་ལ་ཕྱོགས་མཚམས་རྣམས་སུ་རིམ་བཞིན། སྨན་གྱི་ཕོ་བྲང་། ཀ་པཱ་ལར་མར་མེ་གླིང་དགུ། ཁྲམ་ [70a] ཤིང་དང་དྲག་པོའི་འཁོར་ལོ་ཕྱོགས་གཅིག་བྲིས་པ། རྟ་ཞལ་ཕུར་བུ། མདོས་གཏོར་དངོས་སམ་བྲིས་པ། ཞལ་ཟས་ཚོགས་རྫས། ཚེ་འབྲང་། ཚེ་རིལ་ཆང་། མདའ་དར་བཅས་འགོད། དེ་རྒྱབ་ཐེག་རིམ་གྱི་དབང་དཀྱིལ་ལ། བྱང་ཤར་སྒོ་འབྱེད་ཀྱི་དབང་ནས་བརྩམས་གཡོན་བསྐོར་གྱིས་ཡོ་གའི་དབང་དཀྱིལ་ཤར་སྟོད་དུ་སླེབ་པར་བྱ་སྟེ། ཐོག་མར་སྒོ་འབྱེད་དབང་ལ། བུམ་པ་ཉེར་ལྔའི་བཅུད་ལྡན། བྲབ་རྫས་བྱེ་ཡུངས། ཕྱག་རྡོར་དང་ཐུབ་པ་བཞིའི་སྐུ་ཙཀ་བཅས། མིའི་ཐེག་པ་ལ། བུམ་པ། འཁོར་ལོས་བསྒྱུར་བའི་རྒྱལ་པོ་སྡེ་ལྔའི་སྐུ་ཙཀ་བཅས། ལྷ་ཡི་ཐེག་པའི་དབང་ལ། བུམ་པ། དམ་པ་ཏོག་དཀར། ཚངས་པ། བརྒྱ་བྱིན། ལྷ་མོ་སྒྱུ་འཕྲུལ་རྣམས་ཀྱི་སྐུ་ཙཀ་བཅས། ཉན་ཐོས་ཐེག་པའི་དབང་ལ། བུམ་པ། ཆོས་གོས་རྣམ་གསུམ་ལྷུང་བཟེད་འཁར་གསིལ་དུང་སྤྱི་བླུགས་ཆུ་སྣོད་ཆུ་ཚག་གདིང་བ་བཅས་བྲིས་པའི་ཙཀ་ལི། སྟོན་པ་ཉན་ཐོས་བཞིས་བསྐོར་བ་བཅས། རང་རྒྱལ་ཐེག་པའི་དབང་ལ། བུམ་པ། རང་རྒྱལ་གྱི་སྐུ་ཙཀ །རྟེན་འབྲེལ་བཅུ་གཉིས་ཀྱི་གཟུགས་བྲིས་པ་བཅས། བྱང་སེམས་ཐེག་པའི་དབང་ལ། བུམ་པ། ཉེ་སྲས་བརྒྱད་ཀྱི་སྐུ་ཙཀ །རལ་གྲི། ཨ་རུ། གྲུ། དུང་རྣམས་བྲིས་པའི་ཙཀ་ལི་བཅས། ལྷ་མི་ཉན་རང་བྱང་སེམས་རྣམས་ཀྱི་བུམ་པ་གཅིག་ཏུ་བསྡུས་ཀྱང་ཆོག་གོ །ཀྲི་ཡའི་ཐེག་པ་དབང་ལ། བུམ་པ། སྟོན་པ་ལ་བཀྲ་ཤིས་ལྷ་མོ་བརྒྱད་ཀྱིས་བསྐོར་བའི་སྐུ་ཙཀ །རྣམ་བུམ། དབུ་རྒྱན། རིགས་གསུམ་ལོངས་སྐུའི་ཆས [70b] ཅན་བཅས། ཨུ་པའི་ཐེག་པའི་དབང་ལ། བུམ་པ། དབུ་རྒྱན། རྡོ་དྲིལ། དབྱངས་གསལ་བཀོད་པའི་སྔགས་བྱང་། རྣམ་སྣང་། སྣང་མཐའ། མི་བསྐྱོད་པ། རིན་འབྱུང་རྣམས་ལོངས་སྐུའི་ཆས་ཅན་གྱི་སྐུ་ཙཀ་བཅས། ཡོ་གའི་ཐེག་པའི་དབང་ལ། རྣམ་བུམ། དབུ་རྒྱན། རྡོ་རྗེ་དྲིལ་བུ། མིང་དབང་རྡོ་དྲིལ། རྣམ་སྣང་ཞལ་བཞི་ཕྱག་ི གས་བཞི་ཡབ་རྐྱང་ལོངས་སྐུའི་ཆས་མཉམ་བཞག་རང་རྟགས་རྡོར་སྐྱིལ་ཅན་གྱི་སྐུ་ཙཀ །རིགས་བཞིའི་ཡུམ་བཞི་ཕྱག་གཡས་གར་རྒྱ་གཡོན་རང་རྟགས་སེམས་སྐྱིལ་ཅན་རྣམས་ཀྱི་སྐུ་ཙཀ །ཀུན་རིག་གཟུངས་རིང་ཐུང་གང་འོས་ཀྱི་སྔགས་བྱང་། མེ་ལོང་། མངའ་གསོལ་ཆས་ཁྲི་གདུགས་རྒྱལ་མཚན་སོགས་བྲིས་པ་བཅས་འགོད། ཕྱི་རོལ་དུ་ཕྱི་ནང་གི་མཆོད་པ། ཚོགས་དང་གཏོར་མའི་བྱེ་བྲག །བདུད་རྩི་ཨ་མྲྀ་ཏ་དང་སྦྱར་བའི་དམ་ཆུ། མིག་དར། མེ་ཏོག །འགྲིམ་དཀྱིལ། ཚུལ་བཞིན་སྦྱར་བའི་འབེབས་རྫས། གསེར་ཐུར། ཕྱག་ཤིང་། མཎྜལ་གྱི་ཆས་སོགས་ཕྲིན་ལས་དང་དབང་གི་སྐབས་སོ་སོར་དགོས་པའི་ཡོ་བྱད་རྣམས་ཚང་བར་འདུ་བྱའོ། །གཉིས་པ་དབང་དོན་སྒྲུབ་མཆོད་ནི། བརྒྱུད་པའི་གསོལ་འདེབས་སྔོན་དུ་འགྲོ་བས། ནང་བསྐོར་ཁྲོ་བོའི་ཕྲིན་ལས་བྱང་བུ་ཁྲིགས་སྡེབས་ཀྱི་དབུ་ནས་བརྩམས་བྱིན་རླབས་བྱང་བུ་ཡན་གྲུབ་པ་དང་། སྔར་ས་ཆོག་གི་སྐབས་བཞིན་འབྱུང་གཏོར་བསྔོས་ལ་སྲུང་འཁོར་བསྒོམ། དེ་ནས་མཆོད་བརླབས་བྱང་བུ་ནས་ལྷ་བསྐྱེད་དཀྱུས་བཞིན་ལས། ཐེག་རིམ་དགུའི་དཀྱིལ་འཁོར་རྣམས་ [71a] འཁོར་གྱི་ཚུལ་དུ་མ་འདྲེས་གསལ་རྫོགས་སུ་བསྒོམ་ཞིང་། སྤྱན་འདྲེན་སྐབས་སྔར་ནམ་མཁར་བཏེགས་པའི་སྟ་གོན་གྱི་ལྷ་དཀྱིལ་འཁོར་ལ་བསྟིམས་ནས་ཕྱག་མཆོད་བསྟོད་པའི་བར་དུ་སོང་སྟེ། བྷྲཱུྃ་བི་ཤྭ་བི་ཤུདྡྷེ་ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ་ཛ༔ ཞེས་མདུན་དཀྱིལ་གྱི་གོ་སར་ཛཔྲ་ཁང་ཕྱེས་ལ་ཟུར་གསལ་གཏེར་གཞུང་སྔགས་བྱང་མཇུག་གི་ཛཔྲ་དམིགས་རྣམས་རིམ་པར་གསལ་བཏབ་ནས་སྙིང་པོ་ཡང་སྙིང་འཁོར་སྔགས་ཡན་ལག་གི་དཀྱིལ་འཁོར་རྣམས་ཀྱི་སྔགས་བཅས་གཙོ་འཁོར་གྱི་འགྲོས་དང་སྦྱར་ཏེ་བཟླས་པ་ཅི་འགྲུབ་དང་། སྤྲོ་ན་སྟ་གོན་སྐབས་བཞིན་བུམ་བཟླས་ཀྱང་བྱ། དེ་ནས་སྨན་གྱི་ཕོ་བྲང་ལ་དམིགས་ཏེ། དབྱིངས་ཀྱི་བྷནྡྷ་སོགས་བསྐྱེད་བཟླས་སྨན་སྲུང་སྤྱན་འདྲེན་རྟོག་བསལ་བཅས་སོང་ནས། བདུད་རྩི་སྨན་གྱི་ཚེ་ལུང་བཞིན། བདག་མདུན་མངོན་རྫོགས་རྒྱལ་པོ་ཡི། །ཐུགས་དབུས་རིན་ཆེན་ཟུར་བརྒྱད་པ། །སོགས་ཀྱིས་གསལ་བཏབ་ལ་ཚེ་ཛཔྲ་ཅི་འགྲུབ་མཐར་ཚེ་འགུགས་བསྐུལ་ལ་རྒྱས་གདབ་བྱ། སྟོང་ཚིག་ཕུལ་ཏེ་ཡིག་བརྒྱས་ནོངས་བཤགས། བཀའ་སྲུང་དང་གཏེར་སྲུང་གི་གཏོར་ཆོག །ཚོགས་བྱིན་རླབས་ནས་བསྟབ་པའི་བར་དུ་བཏང་ལ། བདག་འཇུག་ཟུར་བྱང་བཞིན་བླང་བའམ་བསྡུ་ན་རིག་པའི་མེ་ཏོག་དོར་ཞིང་གནང་བ་ནོད་དོ། །གསུམ་པ་དབང་བསྐུར་དངོས་ལ་གཉིས། ཡན་ལག་ཐེག་པ་དགུ་བསྒྲིལ་གྱི་དབང་དང་། རྩ་བ་ནང་རྒྱུད་གསུམ་བསྒྲིལ་གྱི་དབང་ངོ་། །དང་པོ་ལ་དགུ་ལས། དང་པོ་སྒོ་འབྱེད་ཕྱག་རྡོར་དབང་ནི། སྔར་སྟ་གོན་བྱས་པའི་སློབ་མ་རྣམས་སྒོ་དྲུང་དུ་བོས་ལ་ཁྲུས་ [71b] ནས་དབྱུང་། ནང་དུ་ཞུགས་ནས་གྲལ་ལ་འཁོད་པ་དང་བགེགས་གཏོར་བསྔོས་ལ་བསྐྲད་ཅིང་སྲུང་འཁོར་བསྒོམ། མཎྜལ་བཀྲམ་བསྡུ་དང་སེམས་བསྐྱེད་གསལ་བཏབ་ལ་ཆོས་བཤད་གོང་གི་ནང་སྐོར་རིག་འཛིན་བཅོ་ལྔའི་སྐབས་བཞིན་ལས་ཁྱད་པར། དམ་ཆོས་རྫོགས་ཆེན་སྡེ་གསུམ་གྱི་ནང་ཚན་ནང་སྐོར་ཀློང་སྡེ་ཨ་ནུ་མདོ་ལུང་ཆེན་པོ་དང་འབྲེལ་བ་ཡི་དམ་ཁྲོ་བོ་མངོན་རྫོགས་རྒྱལ་པོ་རྩ་བའི་དཀྱིལ་འཁོར་དུ་དབང་བསྐུར་དངོས་གཞི་བསྒྲུབ་པར་བྱེད་པ་ཡིན། དེ་ལའང་ཡན་ལག་ཐེག་པ་དགུ་བསྒྲིལ་གྱི་དབང་དང་། རྩ་བ་ནང་རྒྱུད་གསུམ་བསྒྲིལ་གྱི་དབང་གཉིས་སུ་ཡོད་པ་ལས། ཐོག་མར་ཡན་ལག་ཐེག་པ་དགུའི་དཀྱིལ་འཁོར་དུ་རིམ་པར་གཞུག་ཅིང་དབང་བསྐུར་བར་བྱ་བ་ལ། བདག་ཉིད་སློབ་དཔོན་གྱིས་བགྱི་བར་འོས་པ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག ། ཕྱག་ཐལ་མོ་མེ་ཏོག་དང་བཅས་ཏེ་མི་ཕྱེད་དད་པས་གསོལ་བ་འདེབས་པ་འདིའི་རྗེས་ཟློས། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ལན་གསུམ། དེ་ལ་ཐོག་མར་དབང་ཐམས་ཅད་ཀྱི་སྔོན་དུ་འགྲོ་བ་སྒོ་འབྱེད་ཕྱག་ན་རྡོ་རྗེ་ངན་སོང་གནས་འདྲེན་གྱི་དབང་བསྐུར་བའི་སླད་དུ། མདུན་གྱི་དཀྱིལ་འཁོར་ཆེན་པོའི་བྱང་ཤར་གྱི་དཀྱིལ་འཁོར་ནས་དཔལ་ཆེན་ [72a] ཕྱག་ན་རྡོ་རྗེའི་གསང་གསུམ་བྱིན་རླབས་འདུས་པའི་བདུད་རྩིའི་རྒྱུན་གྱིས་ཁྲུས་བྱས་ཤིང་དབང་བསྐུར་བར་མོས་མཛོད། བུམ་པ་ཐོགས་ལ། ཧཱུྃ༔ བྱང་ཤར་དཀྱིལ་འཁོར་ཆེན་པོ་ནས༔ ཕྱག་ན་རྡོ་རྗེ་དབྱིངས་ནས་བཞེངས༔ བཀྲ་ཤིས་ཁྲུས་ཀྱི་བུམ་པ་འདིར༔ རྒྱལ་བ་ཀུན་གྱི་ཐུགས་རྗེའི་ཆུས༔ སློབ་མའི་དུག་གསུམ་སྒྲིབ་སྦྱོངས་ནས༔ ན་རཀ་གནས་རྣམས་དོང་སྤྲུགས་ཤོག༔ ཨོཾ་བཛྲ་པཱ་ཎི་ཧཱུྃ་ཕཊ༔ ཅེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། གསང་བའི་བདག་པོའི་སྐུ་ལས་ཡེ་ཤེས་ཀྱི་འོད་ཟེར་མེའི་ཚྭ་ཚྭ་ལྟ་བུ་འཕྲོས་པས་སློབ་བུ་རྣམས་ངན་སོང་གསུམ་དུ་སྐྱེ་བའི་ས་བོན་བག་ཆགས་དང་བཅས་པ་སྦྱངས་པར་གྱུར་པའི་མོས་པ་མཛོད། ཡུངས་ཀར་གྱིས་བྲབ་བཅིང་། ཨོཾ་བཛྲ་སུ་ར་ཏི༔ ཨོཾ་བཛྲ་ཨཉྫ་ལི༔ ཨོཾ་བཛྲ་བནྡྷ་བཾ༔ ཨོཾ་ད་ཧ་ད་ཧ་སརྦ་ན་ར་ཀ་ཏེ་ཧེ་ཏུཾ་ཧཱུྃ་ཕཊ༔ ཨོཾ་པ་ཙ་པ་ཙ་སརྦ་བྲེ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཨོཾ་མ་ཐ་མ་ཐ་སརྦ་ཏིརྻ་ཀ་ག་ཏེ་ཧེ་ཏུཾ་ཧཱུྃ་ཕཊ༔ སློབ་མ་རྣམས་ཀྱི་སྡིག་སྒྲིབ་ཐམས་ཅད་ཉི་མས་བ་མོ་ཞུས་པ་ལྟར་དག་སྟེ་ངན་སོང་གི་གནས་ནས་ཐར་བར་གྱུར་པ་ལ། མདུན་བསྐྱེད་གསང་བའི་བདག་པོ་འཁོར་དང་བཅས་པའི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་ [72b] འཕྲོས་ཏེ་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབ་པར་མོས་མཛོད། སྐུ་ཙཀ་རྣམས་རིམ་པར་ཐོགས་ལ། ཧཱུྃ༔ གསང་བའི་བདག་པོ་རྡོ་རྗེ་འཛིན༔ ཞལ་གཅིག་ཕྱག་གཉིས་སྐུ་མདོག་མཐིང་༔ རྡོ་རྗེ་དྲིལ་འཛིན་ཁྲོ་བོའི་རྒྱལ༔ ཐར་པར་འདྲེན་པས་དབང་བསྐུར་རོ༔ ཨོཾ་བཛྲ་པཱ་ཎི་ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ དམྱལ་བ་འདུལ་མཛད་ཆོས་ཀྱི་སྐུ༔ སྤྲུལ་སྐུ་སྟོན་པའི་ཚུལ་བཟུང་བས༔ ཞེ་སྡང་སྡིག་སྒྲིབ་འཇོམས་པར་མཛད༔ དེ་བཞིན་གཤེགས་པས་དབང་བསྐུར་རོ༔ ཨོཾ་མུ་ནེ་ཡེ་ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ ཡི་དྭགས་འདུལ་མཛད་ཁ་འབར་རྒྱལ༔ སྤྲུལ་སྐུ་སྟོན་པའི་ཚུལ་བཟུང་བས༔ འདོད་ཆགས་སྡིག་སྒྲིབ་འཇོམས་པར་མཛད༔ དེ་བཞིན་གཤེགས་པས་དབང་བསྐུར་རོ༔ ཨོཾ་མུ་ནེ་ཡེ་སྲུྃ་ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ དུད་འགྲོ་འདུལ་མཛད་སེང་རབ་བརྟན༔ སྤྲུལ་སྐུ་སྟོན་པའི་ཚུལ་བཟུང་བས༔ གཏི་མུག་སྡིག་སྒྲིབ་འཇོམས་མཛད་པའི༔ དེ་བཞིན་གཤེགས་པས་དབང་བསྐུར་རོ༔ ཨོཾ་མུ་ནེ་ཀྵྃ་ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བསྐུར། སླར་ཡང་བུམ་པ་ཐོགས་ལ། ཧཱུྃ༔ བྱང་ཤར་དཀྱིལ་འཁོར་ཆེན་པོ་ནས༔ ཕྱག་ན་རྡོ་རྗེ་དབྱིངས་ནས་བཞེངས༔ བཀྲ་ཤིས་ཁྲུས་ཀྱི་ [73a] བུམ་པ་འདིར༔ རྒྱལ་བ་ཀུན་གྱི་ཐུགས་རྗེའི་ཆུས༔ སློབ་མའི་ཕྲག་དོག་སྒྲིབ་སྦྱངས་ནས༔ ལྷ་མིན་གནས་རྣམས་དོང་སྤྲུགས་ཤོག༔ ཨོཾ་བཛྲ་པཱ་ཎི་ཧཱུྃ་ཕཊ༔ ཅེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། ཐག་བཟང་རིས་ཀྱི་སྐུ་ཐོགས་ལ། ཧཱུྃ༔ ཕྲག་དོག་རབ་ཏུ་འཇོམས་པ་དང་༔ རྟག་ཆད་གཉིས་ཀྱི་མཐར་བསལ་མཛད༔ གཟུགས་ཅན་མུ་སྟེགས་ལ་སོགས་པའི༔ ལྟ་ལོག་སུམ་བརྒྱ་དྲུག་ཅུ་དང་༔ གཟུགས་མེད་ལྷ་མིན་མཐུ་ཆེན་འཇོམས༔ ལྷ་མིན་བཅོམ་ལྡན་ཐག་བཟང་རིས༔ རྒྱལ་པོའི་ཆ་ལུགས་འཁོར་ལོ་འཛིན༔ དེད་དཔོན་བཞི་ཡི་ཚོགས་རྣམས་ཀྱིས༔ ལོག་ལྟ་འཇོམས་ཕྱིར་དབང་བསྐུར་རོ༔ ཨོཾ་མུ་ནི་ཏྲུྃ་ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བསྐུར། དེ་རྣམས་ཀྱིས་རྒྱུ་དུག་གསུམ་དང་ཕྲག་དོག་གི་ཀུན་ནས་བསླངས་པའི་ལས་ཀྱི་འབྲས་བུ་ངན་སོང་གསུམ་དང་ལྷ་མིན་དུ་སྐྱེ་བའི་སྡིག་སྒྲིབ་བག་ཆགས་ངན་པ་དང་བཀྲ་མི་ཤིས་པའི་དངོས་པོ་ཐམས་ཅད་ཉེ་བར་ཞི་ནས་བདེ་འགྲོ་ཐར་པའི་གྲོང་དུ་དབུགས་འབྱིན་པའི་སྐལ་བཟང་པོ་ཅན་དུ་བྱས་པ་ཡིན་ནོ། །གཉིས་པ་མིའི་ཐེག་པའི་དབང་ནི། དེས་ཡན་ལག་དང་པོ་སྒོ་འབྱེད་ཀྱི་དབང་བསྐུར་བ་གྲུབ་ནས། ཡན་ལག་གཉིས་པ་ [73b] མིའི་ཐེག་པའི་དབང་གི་སླད་དུ། དཀྱིལ་འཁོར་ཆེན་པོའི་བྱང་གི་དཀྱིལ་འཁོར་ནས་རྣམ་པར་འདྲེན་པ་འཇིག་རྟེན་འཁོར་ལོས་སྒྱུར་བའི་རྒྱལ་པོའི་ཚུལ་དུ་རོལ་བས་བུམ་པའི་བདུད་རྩིས་ཁྲུས་བྱས་ཤིང་དབང་བསྐུར་བར་མོས་ཤིག །བྱང་གི་བུམ་པ་ཐོགས་ལ། ཧཱུྃ༔ བཀྲ་ཤིས་བུམ་པ་ཀུན་ཏུ་དགེ་བའི་ཁྲུས༔ མཛད་ཅིང་བློ་གྲོས་ལྡན་པ་བྱ་བའི་ཕྱིར༔ སངས་རྒྱས་བྱིན་རླབས་བདུད་རྩི་ཆུ་ཡི་མཆོག༔ དེང་འདིར་སྐལ་ལྡན་རྣམས་ལ་དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཧཱུྃ༔ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་བྱིན། །འཁོར་སྒྱུར་སྡེ་ལྔའི་སྐུ་ཐོགས་ལ། ཧཱུྃ༔ འདོད་ཆགས་འཇོམས་མཛད་བཅོམ་ལྡན་ཤཱཀྱའི་རྒྱལ༔ ཟས་གཙང་སྲས་པོ་ཁྱེའུ་མཛེས་པའི་གཟུགས༔ ལྟ་བས་ཆོག་མི་ཤེས་པ་རྒྱལ་པོའི་ཚུལ༔ དང་པོ་གསེར་གྱི་འཁོར་ལོས་སྒྱུར་བའི་རྒྱལ༔ གཉིས་པ་དངུལ་གྱི་འཁོར་ལོས་སྒྱུར་བའི་རྒྱལ༔ གསུམ་པ་ཟངས་ཀྱི་འཁོར་ལོས་སྒྱུར་བའི་རྒྱལ༔ བཞི་པ་ལྕགས་ཀྱི་འཁོར་ལོས་སྒྱུར་བའི་རྒྱལ༔ འཇིག་རྟེན་མི་ཡི་རྒྱལ་པོ་སྡེ་ལྔ་ཡིས༔ བཀྲ་ཤིས་རྣམ་པར་དགེ་བའི་དབང་བསྐུར་བས༔ སྐྱོན་སྤང་ལེགས་པའི་ཡོན་ཏན་སྒྲུབ་པ་ཡི༔ དགེ་བཅུ་ཕུན་སུམ་ཚོགས་པའི་དབང་ཐོབ་ [74a] ཤོག །ཨོཾ་མུ་ནེ་སྲུྃ་ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བསྐུར། དེས་རྒྱུ་འདོད་ཆགས་ཀྱི་ཀུན་ནས་བསླངས་བའི་ལས་ཀྱི་འབྲས་བུ་བྲེལ་ཕོངས་མི་རུ་སྐྱེ་བའི་སྡིག་སྒྲིབ་བག་ཆགས་སྐལ་པ་ངན་པ་དང་བཀྲ་མི་ཤིས་པའི་དངོས་པོ་ཐམས་ཅད་ཞི་ནས་ཕུན་ཚོགས་དགེ་བ་བཅུའི་ཡོན་ཏན་ལ་དབང་འབྱོར་ཏེ་མིའི་ཐེག་པ་ཡོངས་སུ་རྫོགས་པའི་སྐལ་བཟང་པོ་ཅན་དུ་བྱས་པ་ཡིན་ནོ། །གསུམ་པ་ལྷའི་ཐེག་པའི་དབང་ནི། དེས་ཡན་ལག་གཉིས་པ་མིའི་དགེ་བཅུ་སྟོན་པའི་དབང་བསྐུར་གྲུབ་ནས། ཡན་ལག་གསུམ་པ་ལྷའི་དགེ་བཅུ་སྟོན་པའི་དབང་གི་སླད་དུ། ནམ་མཁའ་གང་བའི་ལྷ་རྣམས་ཀྱི་བུམ་པའི་བདུད་རྩིས་ཁྲུས་གསོལ་ཞིང་། དཀྱིལ་འཁོར་ཆེན་པོའི་ནུབ་བྱང་གི་དཀྱིལ་འཁོར་ནས་རྣམ་པར་འདྲེན་པ་བཅོམ་ལྡན་འདས་ལྷ་དབང་བརྒྱ་བྱིན་སྤྲུལ་པའི་ཚོགས་དང་བཅས་པ་བྱོན་ཏེ་ཁྱེད་རང་རྣམས་ཀྱི་སྤྱི་བོར་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །ནུབ་བྱང་གི་བུམ་པ་ཐོགས་ལ། ཧཱུྃ༔ ཅིར་ཡང་འགྱུར་བའི་སྣ་ཚོགས་ཆོ་འཕྲུལ་ལས༔ བཀྲ་ཤིས་བུམ་པ་ཁྲུས་ཀྱི་གཞལ་ཡས་ཁང་༔ ལྷ་ཡི་བྱ་བ་ཐོག་མར་དག་བྱེད་ཁྲུས༔ འཇིག་རྟེན་ཆོས་ཚུལ་དེ་དང་མཐུན་པའི་ཕྱིར༔ དགེ་བའི་ཁྲུས་ཆབ་ [74b] གཙང་མས་དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། དམ་པ་ཏོག་དཀར་སོགས་ཀྱི་སྐུ་ཐོགས་ལ། ཧཱུྃ༔ ང་རྒྱལ་འཇོམས་མཛད་བཅོམ་ལྡན་བརྒྱ་བྱིན་ནི༔ དམ་པ་ཏོག་དཀར་ལྷ་ཡི་རྒྱལ་པོའི་ཚུལ༔ ཀུན་ལ་དབང་བསྒྱུར་ཚངས་པ་གདོང་བཞི་དང་༔ འཇིག་རྟེན་ལྷ་དབང་རྣམས་ཀྱི་དབང་བསྐུར་རོ༔ ཨོཾ་མུ་ནེ་ཀྲེཾ་ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བཞག ། དེས་རྒྱུ་ང་རྒྱལ་གྱིས་ཀུན་ནས་བསླངས་པའི་ལས་ཀྱི་འབྲས་བུ་འཕོ་ལྟུང་ལྷ་རུ་སྐྱེ་བའི་སྡིག་སྒྲིབ་བག་ཆགས་སྐལ་པ་ངན་དང་བཀྲ་མི་ཤིས་པའི་དངོས་པོ་ཐམས་ཅད་ཉེ་བར་ཞི་ནས་ཕུན་ཚོགས་དགེ་བ་བཅུའི་ཡོན་ཏན་ལ་དབང་འབྱོར་ཏེ་ལྷའི་ཐེག་པ་ཡོངས་སུ་རྫོགས་པའི་སྐལ་པ་བཟང་པོ་ཅན་དུ་བྱས་པ་ཡིན་ནོ། །བཞི་པ་ཉན་ཐོས་ཐེག་པའི་དབང་ནི། དེས་ཐོག་མའི་ལམ་སྟེགས་སོར་བཞག་ལྷ་མིའི་ཐེག་པའི་དབང་བསྐུར་བ་གྲུབ་ནས། ཡན་ལག་བཞི་པ་ཉན་ཐོས་ཐིག་པའི་དབང་བསྐུར་བའི་སླད་དུ། ནམ་མཁའ་གང་བའི་ལྷ་རྣམས་ [75a] ཀྱིས་མཆོད་པའི་སྤྲིན་དང་བཅས་ཏེ་བུམ་པའི་བདུད་རྩིས་ཁྲུས་གསོལ་ཞིང་། དཀྱིལ་འཁོར་ཆེན་པོའི་ནུབ་ཀྱི་དཀྱིལ་འཁོར་ནས་རྣམ་འདྲེན་ཤཱཀྱའི་རྒྱལ་པོ་འཁོར་དང་བཅས་པ་བྱོན་ཏེ་ཁྱེད་རང་རྣམས་ཀྱི་སྤྱོ་བོར་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །ནུབ་ཀྱི་བུམ་པ་ཐོགས་ལ། ཧོཿ རྒྱལ་བ་འཇིག་རྟེན་ལ་ནི་སྐུ་བལྟམས་ཚེ༔ ལྷ་ཡི་རྒྱལ་པོ་རྣམས་ཀྱིས་ཁྲུས་གསོལ་ལྟར༔ རྣམ་པར་རྒྱལ་བའི་བུམ་པ་ཁྲུས་ཀྱི་མཛོད༔ འཇིག་རྟེན་ཀུན་ཏུ་ཤིས་པ་དང་པོའི་དབང་༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཧཱུྃ༔ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། ཡོ་བྱད་རྣམས་བྲིས་པའི་ཙཀླི་གཏད་ལ། ཧོཿ རབ་ཏུ་བྱུང་ཞིང་ཚངས་པར་སྤྱོད་པའི་ཚེ༔ ཆོས་གོས་རྣམ་གསུམ་ལྷུང་བཟེད་འཁར་གསིལ་དང་༔ སྤྱི་བླུགས་ཆུ་སྣོད་ཆུ་ཚགས་ལ་སོགས་པའི༔ རབ་བྱུང་ཆ་ལུགས་ཆས་ཀྱིས་དབང་བསྐུར་བས༔ ཚངས་པར་སྤྱོད་པའི་སྡོམ་པ་ཡོངས་རྫོགས་ཤོག༔ ཅེས་ལག་ཏུ་གཏད། སྟོན་པ་འཁོར་བཅས་ཀྱི་སྐུ་ཐོགས་ལ། ཧཱུྃ༔ སྟོན་པའི་རྒྱལ་པོ་བཅོམ་ལྡན་ཤཱཀྱ་ཐུབ༔ གསེར་མདོག་ས་གནོན་མཉམ་བཞག་མཚན་དཔེས་སྤྲས༔ ཚུལ་ཁྲིམས་ཕུན་སུམ་ཚོགས་པ་ཉེ་བར་འཁོར༔ མངོན་ [75b] པར་ཤེས་པ་ལྡན་པ་ཤཱ་རིའི་བུ༔ རྫུ་འཕྲུལ་ཁྱད་པར་འཕགས་པ་མོོ་གལ་བུ༔ རྒྱལ་བའི་རིམ་གྲོ་ཉན་ཐོས་ཀུན་དགའ་བོ༔ གཞན་ཡང་ཉན་ཐོས་དགེ་སློང་དཔག་མེད་པས༔ དབང་བསྐུར་ཚུལ་ཁྲིམས་མཐའ་རུ་ཕྱིན་པར་ཤོག༔ ཨོཾ་མུ་ནི་མུ་ནི་མ་ཧཱ་མུ་ནི་ཤཱཀྱ་མུ་ནི་ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བསྐུར། ཨེ་མ༔ ལྷ་མིའི་ཐེག་པ་དགེ་བ་བཅུ་སྤྱད་ཀྱང་༔ དཀོན་མཆོག་གསུམ་ལ་སྐྱབས་སུ་མ་སོང་བས༔ འཁོར་བར་འཕགས་པ་ནམ་ཡང་མི་འགྱུར་ཞིང་། དགེ་སྡིག་སྤང་བླང་ཙམ་ལས་ལྟ་བ་མེད༔ ཉན་ཐོས་ལྟ་བ་བག་ཡོད་ཚུལ་བཞིན་ལས༔ ཆོས་ཀྱི་བདག་མེད་ཕྱེད་ཙམ་རྟོགས་པ་དང་༔ གང་ཟག་བདག་མེད་རྟོགས་པ་སྐད་ཅིག་མ༔ དེ་ལས་གཞོམ་མེད་གཞན་དུ་སྟོང་པར་ལྟ༔ དྷརྨ་ཨ་བྷི་ཥིཉྩ་ཧཱུྃ༔ དེས་ཉོན་མོངས་པ་དུག་ལྔས་ཀུན་ནས་བསླངས་པའི་ལས་ཀྱི་འབྲས་བུ་ཁམས་གསུམ་དུ་འཁོར་ཞིང་སྐྱེ་བའི་སྡིག་སྒྲིབ་བག་ཆགས་སྐལ་པ་ངན་པ་དང་བཀྲ་མི་ཤིས་པའི་དངོས་པོ་ཐམས་ཅད་ཉེ་བར་ཞི་ནས་སྤོང་བའི་ཚུལ་ཁྲིམས་རྣམ་པར་དག་པ་ལ་དབང་འབྱོར་ཞིང་ཞི་བདེ་ཉན་ཐོས་ཀྱི་ཐེག་པ་ཡོངས་སུ་རྫོགས་ཏེ་འགོག་པའི་མྱང་འདས་དགྲ་བཅོམ་པའི་གོ་འཕང་འཐོབ་པའི་སྐལ་པ་ [76a] བཟང་པོ་ཅན་དུ་བྱས་པ་ཡིན་ནོ། །ལྔ་པ་རང་རྒྱལ་ཐེག་པའི་དབང་ནི། དེས་ཡན་ལག་བཞི་པ་ཉན་ཐོས་ཀྱི་ཐེག་པའི་དབང་བསྐུར་བ་གྲུབ་ནས། ཡན་ལག་ལྔ་པ་རང་རྒྱལ་གྱི་ཐེག་པའི་དབང་བསྐུར་བའི་སླད་དུ། ནམ་མཁའ་གང་བའི་ལྷ་རྣམས་ཀྱིས་བུམ་པའི་བདུད་རྩིས་ཁྲུས་གསོལ་ཞིང་། དཀྱིལ་འཁོར་ཆེན་པོའི་ལྷོ་ནུབ་ཀྱི་དཀྱིལ་འཁོར་ནས་འདྲེན་པ་རང་རྒྱལ་གྱི་ཚོགས་རྣམས་བྱོན་ཏེ་ཁྱེད་རང་རྣམས་ཀྱི་སྤྱི་བོར་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །ལྷོ་ནུབ་ཀྱི་བུམ་པ་ཐོགས་ལ། ཧཱུྃ༔ ཐོག་མཐའ་བར་དུ་དགེ་བའི་ལྷ་ཡི་ཆུ༔ དངོས་པོའི་དྲི་འཇོམས་མི་རྟག་ཚུལ་སྟོན་པ༔ ཡོངས་སུ་སྡིག་སྒྲིབ་འཇོམས་པའི་ཆུ་ཡིས་བཀྲུ༔ རྫུ་འཕྲུལ་ཤུགས་ཀྱིས་སྟོན་པའི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲཱི་ཧཱུྃ༔ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། རང་རྒྱལ་གྱི་སྐུ་ཙཀ་སྤྱི་བོར་བཞག་ལ། ཧཱུྃ༔ སློབ་དཔོན་མེད་པར་རང་སངས་རྒྱས་པའི་སྐུ༔ ཉོན་མོངས་དགྲ་བཅོམ་མ་ཤེས་ཀུན་ལས་ལྡོག༔ རང་རྒྱལ་གཙོ་བོ་སྐུ་ལས་མེ་འབར་དང་༔ མི་རྟག་དོན་རྟོགས་སྐུ་ལས་ཆུ་འཁྲུགས་དང་༔ སྟོང་ཉིད་དོན་རྟོགས་རང་རྒྱལ་མཁའ་ལ་བཞུགས༔ མི་རྟོག་དོན་རྟོགས་རང་རྒྱལ་འཇིགས་པ་མེད༔ སྣང་བའི་ [76b] ཆོས་ལ་མི་ཞེན་འོད་ཕུང་འབར༔ རང་རྒྱལ་ཆེན་པོ་རྣམས་ཀྱི་དབང་ཐོབ་ཤོག༔ ཨོཾ་སརྦ་མ་ཧཱ་ཡ་ན་ཨ་བྷི་ཥིཉྩ་ཧཱུྃ༔ རྟེན་འབྲེལ་བཅུ་གཉིས་བྲིས་པའི་གཟུགས་བརྙན་ལག་ཏུ་གཏད་ལ། ཧཱུྃ༔ རྟེན་འབྲེལ་བཅུ་གཉིས་ཐོག་མ་མ་རིག་པ༔ ཡོངས་དག་གང་ཟག་བདག་མེད་ཉིད་རྟོགས་ཤིང་༔ སྲིད་པའི་འཁོར་ལོའི་དྲྭ་བ་རྣམ་འཇོམས་པའི༔ རྟེན་འབྲེལ་བཅུ་གཉིས་མངོན་པར་དག་གྱུར་པས༔ བརྡ་རྟགས་གཟུགས་ཀྱི་ཐ་མ་གདོས་བཅས་ཚོགས༔ མི་རྟག་སྟོན་པའི་ཚུལ་གྱིས་དབང་བསྐུར་རོ༔ དྷརྨ་ཨ་བྷི་ཥིཉྩ་ཨཱཿདེས་ཉོན་མོངས་མ་རིག་པས་ཀུན་ནས་བསླངས་པའི་ལས་ཀྱི་འབྲས་བུ་ལུགས་འབྱུང་འཁོར་བའི་བག་ཆགས་སྡིག་སྒྲིབ་བསྐལ་པ་ངན་པ་དང་བཀྲ་མི་ཤིས་པའི་དངོས་པོ་ཐམས་ཅད་ཉེ་བར་ཞི་ནས་ལུགས་ལྡོག་རྟེན་འབྲེལ་ཡན་ལག་བཅུ་གཉིས་ཀྱི་ཡོན་ཏན་ལ་དབང་འབྱོར་ཞིང་རང་རྒྱལ་གྱི་ཐེག་པ་ཡོངས་སུ་རྫོགས་ཏེ་ལྷག་བཅས་དང་ལྷག་མེད་མྱང་འདས་ཀྱི་གོ་འཕང་འཐོབ་པའི་སྐལ་བ་བཟང་པོ་ཅན་དུ་བྱས་པ་ཡིན་ནོ། །དྲུག་པ་བྱང་སེམས་ཐེག་པའི་དབང་ནི། དེས་ཡན་ལག་ལྔ་པ་རང་རྒྱལ་ཐེག་པའི་དབང་བསྐུར་བ་གྲུབ་ནས། ཡན་ལག་དྲུག་པ་བྱང་སེམས་ཀྱི་ཐེག་པའི་དབང་བསྐུར་བའི་སླད་དུ། ནམ་མཁའ་གང་བའི་ལྷ་དང་ལྷ་མོ་རྣམས་ཀྱིས་ [77a] མཆོད་པའི་སྤྲིན་དང་བཅས་ཏེ་བུམ་པའི་བདུད་རྩིས་ཁྲུས་གསོལ་ཞིང་། དཀྱིལ་འཁོར་ཆེན་པོའི་ལྷོ་ཕྱོགས་ཀྱི་དཀྱིལ་འཁོར་ནས་བྱང་ཆུབ་སེམས་དཔའ་འཕགས་པའི་ཚོགས་རྣམས་བྱོན་ཏེ་ཁྱེད་རང་རྣམས་ཀྱི་སྤྱི་བོར་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །ལྷོ་ཡི་བུམ་པ་ཐོགས་ལ། ཧཱུྃ༔ ཕན་བདེའི་འབྱུང་གནས་བཀྲ་ཤིས་བུམ་པ་རུ༔ བྱང་ཆུབ་སེམས་ཀྱི་ཆུ་ཡི་བདུད་རྩིས་བཀང་༔ སྡུག་བསྔལ་ཐམས་ཅད་རྣམ་བར་སྦྱོང་བའི་ཕྱིར༔ སྐལ་ལྡན་རྣམས་ལ་སྙིང་པོའི་ཁྲུས་གསོལ་བས༔ བྱང་ཆུབ་སེམས་པའི་རིགས་ཅན་དག་ཏུ་གྱུར༔ རྒྱ་ཆེན་རྒྱུན་མི་འཆད་པའི་བྱང་ཆུབ་སེམས༔ རྣམ་པར་བརྟན་ཅིང་རབ་ཏུ་འཕེལ་གྱུར་ཅིག༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲཱི་ཧཱུྃ༔ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། བྱང་ཆུབ་སེམས་དཔའ་རྣམས་ཀྱི་སྐུ་སྤྱི་བོར་བཞག་ལ། ཧཱུྃ༔ སྙིང་རྗེའི་བདག་ཉིད་འཕགས་མཆོག་ཐུགས་རྗེ་ཆེ༔ མཁྱེན་བརྩེའི་བདག་ཉིད་འཇམ་དཔལ་ཡེ་ཤེས་སེམས༔ སྡུག་བསྔལ་ཀུན་འཇོམས་བཅོམ་ལྡན་རྡོ་རྗེ་འཛིན༔ ས་བཅུའི་མགོན་པོ་འཕགས་མཆོག་མི་ཕམ་མགོན༔ གཞན་ཡང་སྒྲིབ་པ་རྣམ་སེལ་ནམ་མཁའི་སྙིང་༔ ཀུན་ཏུ་བཟང་པོ་ས་ཡི་སྙིང་པོ་དང་༔ ཟླ་བའི་ [77b] བློ་གྲོས་བྱམས་མགོན་ཐུགས་རྗེའི་གཏེར༔ སེམས་དཔའི་རྒྱལ་པོ་གསེར་འོད་དམ་པ་སོགས༔ བྱང་ཆུབ་སེམས་དཔའ་བྱེ་བ་ཁྲག་ཁྲིག་གི༔ ཐུགས་བསྐྱེད་རྣམ་དག་སྨོན་ལམ་ཡོངས་གྲུབ་པ༔ སེམས་ཅན་ཀུན་ལ་སྨན་མཛད་མཁྱེན་བརྩེ་ནུས༔ མ་ལུས་ཡོངས་སུ་རྫོགས་པའི་དབང་ཐོབ་ཤོག༔ ཨོཾ་བོ་དྷི་ས་ཏྭ་སརྦ་ཨ་བྷི་ཥིཉྩ་ཧཱུྃ༔ ཕྱག་མཚན་སོགས་ལག་ཏུ་གཏད་ལ། ཧཱུྃ༔ སྡུག་བསྔལ་གཅོད་མཛད་ཤེས་རབ་རལ་གྲི་དང་༔ ཉོན་མོངས་གཅོང་ནད་འབྱིན་པའི་སྨན་གྱི་རྒྱལ༔ སྡུག་བསྔལ་ཆུ་བོ་ཆེ་ལས་སྒྲོལ་བའི་གྲུ༔ སེམས་ཅན་ཀུན་གྱི་དབུགས་དབྱུང་ཆོས་ཀྱི་དུང་། བྱང་ཆུབ་སེམས་ཀྱི་རང་བཞིན་ཀུན་ཁྱབ་པ༔ རྟག་ཏུ་ཡོན་ཏན་མངོན་སུམ་རྫོགས་གྱུར་བའི༔ བྱང་ཆུབ་སེམས་དཔའ་རྣམས་ཀྱི་གང་དགོངས་པ༔ སེམས་ཅན་ཀུན་ལ་དེ་ཉིད་འབྱུང་གྱུར་ཅིག༔ ཨོཾ་སརྦ་བོ་དྷི་ས་ཏྭ་ཨ་བྷི་ཥིཉྩ་ཧཱུྃ༔ སློབ་དཔོན་ཕྱག་གདེངས་ཏེ། འདི་ཕན་ཐེག་དམན་ཉན་ཐོས་རང་དོན་ཏེ༔ འདི་ནི་ཐེག་ཆེན་གཞན་དོན་རླབས་ཆེན་ཡིན༔ སྨོན་ལམ་ཡང་དག་དགེ་བའི་འཇུག་པ་སྟེ༔ བྱང་ཆུབ་སེམས་དཔའི་སྡོམ་པ་བླ་ན་མེད༔ བདག་མེད་རྣམ་གཉིས་རང་བཞིན་རྟོགས་གྱུར་ཏེ༔ དེ་རིང་བྱང་ཆུབ་སེམས་དཔའི་རིགས་ཅན་ནོ༔ [78a] རྒྱལ་བ་ཀུན་གྱི་སྲས་ཀྱི་དམ་པར་དགོངས༔ སྤྲོ་བ་བསྐྱེད་ཅིག་གཞན་ཕན་རྒྱ་ཆེར་གྱིས༔ བོ་དྷི་ས་ཏྭ་ཨཱཿདེས་གཉིས་སྣང་གཟུང་འཛིན་གྱིས་ཀུན་ནས་བསླངས་པའི་ལས་ཀྱི་འབྲས་བུ་སྲིད་པ་འཁོར་བའི་རྒྱ་མཚོར་ལྟུང་བའི་བག་ཆགས་སྐལ་པ་ངན་པ་དང་བཀྲ་མི་ཤིས་པའི་དངོས་པོ་ཐམས་ཅད་ཉེ་བར་ཞི་ནས་ཤེས་རབ་སྙིང་རྗེ་ཆེན་པོས་བདེན་པ་གཉིས་ཀྱི་དོན་ལ་དབང་འབྱོར་ཞིང་བྱང་ཆུབ་སེམས་དཔའི་ཐེག་པ་ཡོངས་སུ་རྫོགས་ཏེ་སྐུ་གཉིས་ཀྱི་གོ་འཕང་མངོན་དུ་འགྲུབ་པའི་སྐལ་བཟང་པོ་ཅན་དུ་བྱས་པ་ཡིན་ནོ། །བདུན་པ་ཀྲི་ཡའི་ཐེག་པའི་དབང་ནི། དེས་ཡན་ལག་དྲུག་པ་བྱང་སེམས་ཐེག་པའི་དབང་བསྐུར་བ་གྲུབ་ནས། ཡན་ལག་བདུན་པ་ཀྲི་ཡའི་ཐེག་པའི་དབང་བསྐུར་བའི་སླད་དུ། ནམ་མཁའ་གང་བའི་ལྷ་ཚོགས་རྣམས་ཀྱིས་མཆོད་པའི་སྤྲིན་དང་བཅས་ཏེ་བུམ་པའི་བདུད་རྩིས་ཁྲུས་གསོལ་ཞིང་། དཀྱིལ་འཁོར་ཆེན་པོའི་ཤར་ལྷོའི་དཀྱིལ་འཁོར་ནས་སྟོན་པ་རིགས་གསུམ་འཁོར་དང་བཅས་པ་བྱོན་ནས་ཁྱེད་རང་རྣམས་ཀྱི་སྤྱི་བོར་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །ཤར་ལྷོའི་བུམ་པ་ཐོགས་ལ། ཧཱུྃ༔ རྣམ་པར་རྒྱལ་བའི་སྟོན་པ་སངས་རྒྱས་ཉིད༔ ས་ཆེན་འདི་རུ་རྣམ་པར་བལྟམས་པའི་ཚེ༔ ཀུན་གྱིས་དང་པོ་བཀྲ་ཤིས་ཁྲུས་གསོལ་ལྟར༔ [78b] ཤིན་ཏུ་དགེ་བའི་ཆབ་ཀྱིས་ཁྲུས་བགྱིའོ༔ ཨོཾ་སརྦ་ཏ་ཐཱ་ག་ཏ་ ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། ལྷ་རྣམས་སྐུ་སྤྱི་བོར་བཞག་ཅིང་། ཧཱུྃ༔ སྟོན་པ་གསེར་མདོག་མྱ་ངན་མེད་པའི་རྒྱལ༔ ཉོན་མོངས་དུག་རྣམས་སེལ་བའི་རྨ་བྱ་ཅན༔ སྒྲིབ་པའི་དྲི་མའི་ཚོགས་འཇོམས་བསིལ་བའི་ཚལ༔ གདོན་བགེགས་མ་ལུས་ཀུན་འཇོམས་སོ་སོར་འབྲང་༔ སྡུག་བསྔལ་རྣམ་པར་འཇོམས་པ་ལྷ་མོའི་མཆོག༔ འཇིགས་པ་བརྒྱད་རྣམས་ཞི་མཛད་ཞི་བ་མ༔ ཡོངས་སུ་སྡུག་བསྔལ་སྦྱོང་མཛད་རིག་པའི་རྒྱལ༔ ཀུན་ཏུ་བསོད་ནམས་འཕེལ་མཛད་རྣམ་པར་རྒྱལ༔ ལས་ཀུན་གྲུབ་པར་མཛད་པ་གྲུབ་པ་མོ༔ བཀྲ་ཤིས་ལྷ་མོ་བརྒྱད་ཀྱི་དབང་བསྐུར་བས༔ ཤིན་ཏུ་རྣམ་པར་དགེ་དང་བཀྲ་ཤིས་ཤིང་༔ རྣམ་པར་རྒྱལ་བའི་དབང་མཆོག་ཐོབ་པར་ཤོག༔ སླར་ཡང་བུམ་པ་ཐོགས་ལ། ཧཱུྃ༔ བཀྲ་ཤིས་རྣམ་པར་རྒྱལ་བའི་བུམ་པ་ནས༔ ཉོན་མོངས་དུག་འཇོམས་ཕ་རོལ་ཕྱིན་པའི་ཆུ༔ བཀོད་པ་ཁྱད་འཕགས་དགེ་མཚན་དུ་མར་བཅས༔ ཡེ་ཤེས་ཆུ་བོ་མཆོག་གིས་ཁྲུས་བགྱའོ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ ཞེས་ཁྲུས་བྱ། དབུ་རྒྱན་བཅིང་ལ། དམ་པ་ཏོག་དཀར་ལྷ་ཡུལ་ནས་གཤེགས་ཏེ༔ དེ་ཚེ་རྒྱལ་བ་བྱམས་པ་མགོན་པོ་ [79a] ལ༔ རྒྱལ་ཚབ་དབང་བསྐུར་ཅོད་པན་བཅིངས་པ་ལྟར༔ རིན་ཆེན་ཅོད་པན་དམ་པས་དབང་བསྐུར་རོ༔ ཨོཾ་རཏྣ་མུ་ཀུ་ལ་ཏྲཱྃ་ཨ་བྷི་ཥིཉྩ་མི༔ རིགས་གསུམ་མགོན་པིའི་སྐུ་ཐོགས་ལ། ཧཱུྃ༔ སྣང་སྲིད་རིགས་གསུམ་དཀྱིལ་འཁོར་མཐོང་བའི་ཕྱིར༔ སྐུ་ཡི་རིགས་མཆོག་འཇམ་དཔལ་ཡེ་ཤེས་སེམས༔ གསུང་གི་རིགས་མཆོག་འཕགས་པ་སྤྱན་རས་གཟིགས༔ ཐུགས་ཀྱི་རིགས་མཆོག་བཅོན་ལྡན་གསང་བའི་བདག༔ དུག་གསུམ་དག་ནས་སྐུ་གསུམ་མཐོང་བ་དང་༔ རིགས་གསུམ་ལྷ་ཚོགས་རྣམས་དང་དབྱེར་མེད་ཤོག༔ ཨོཾ་སརྦ་ཏ་ཐཱ་ག་ཏ་ཀཱ་ཡ་ཝ་ཀ་ཙི་ཏྟ་ཨ་བྷི་ཥིཉྩ་ཧཱུྃ༔ ཞེས་སྤྱི་བོར་བསྐུར། ས དེས་བྱ་རྒྱུད་རིགས་གསུམ་གྱི་དཀྱིལ་འཁོར་དུ་ཆུ་དང་ཅོད་པན་གྱི་དབང་རྗེས་འབྲེལ་དང་བཅས་པ་ཐོབ། དཀའ་ཐུབ་དང་གཙང་སྦྲའི་ཀུན་སྤྱོད་ལ་གནས་པས། དོན་དམ་པར་མཐའ་བཞི་དང་བྲལ་བའི་དག་པར་རྟོགས་ནས། ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཚུལ་གྱིས་སྒྲུབ་པ་ཀྲི་ཡའི་ཐེག་པ་ཡོངས་སུ་རྫོགས་པ་ལ་དབང་འབྱོར་ཏེ་རིགས་གསུམ་གྱི་བྱང་ཆུབ་མངོན་དུ་འགྲུབ་པའི་སྐལ་པ་བཟང་པོ་ཅན་དུ་བྱས་པ་ཡིན་ནོ། །བརྒྱད་པ་ཨུ་པ་ཡའི་ཐེག་པའི་དབང་ནི། དེས་ཡན་ལག་བདུན་པ་ཀྲི་ཡའི་ཐེག་པའི་དབང་བསྐུར་བ་གྲུབ་ནས། ཡན་ལག་ [79b] བརྒྱད་པ་ཨུ་པ་ཡའི་ཐེག་པའི་དབང་བསྐུར་བའི་སླད་དུ། ནམ་མཁའ་གང་བའི་ལྷ་ཚོགས་རྣམས་ཀྱིས་མཆོད་པའི་སྤྲིན་དང་བཅས་ཏེ་བུམ་པའི་བདུད་རྩིས་ཁྲུས་བྱས་ཤིང་ཅོད་པན་དང་རྡོར་དྲིལ་གྱི་དབང་བྱིན། དཀྱིལ་འཁོར་ཆེན་པོའི་ཤར་སྨད་ཀྱི་དཀྱིལ་འཁོར་ནས་རྒྱལ་བ་རིགས་བཞིའི་ལྷ་ཚོགས་བྱོན་ནས་ཁྱེད་རང་རྣམས་ཀྱི་སྤྱི་བོར་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །ཤར་སྨད་ཀྱི་བུམ་པ་ཐོགས་ལ། ཧཱུྃ༔ རང་གསལ་དག་པའི་བུམ་པ་རུ༔ ཡེ་ཤེས་བཞི་ཡི་ཆུ་ཡིས་བཀང་༔ ཉོན་མོངས་སྦྱོང་ཕྱིར་ཁྲུས་བགྱིས་པས༔ ཡེ་ཤེས་རྣམ་བཞི་མཐོང་བར་ཤོག༔ ཨོཾ་སརྦ་ཏ་ཐཱ་ག་ཏ༴ ཞེས་བུམ་ཆུ་སྤྱི་བོར་བླུགས་ཤིང་ངག་ཏུ་སྦྱིན། དབུ་རྒྱན་ཅོད་པན་སྤྱི་བོར་གཏད་ལ། ཧཱུྃ༔ རྣམ་པར་རྒྱལ་བའི་སངས་རྒྱས་ཀྱི༔ རིན་ཆེན་དབང་རྟགས་ཅོད་པན་ཆེ༔ རྒྱལ་བའི་དབང་རྣམས་རྫོགས་པའི་ཕྱིར༔ དབུ་རྒྱན་དམ་པས་དབང་བསྐུར་རོ༔ རཏྣ་མུ་ཀུ་ལ་ཏྲྃ༔ རྡོ་རྗེ་དྲིལ་བུ་ལག་ཏུ་གཏད་ལ། ཧཱུྃ༔ རྣམ་པར་དག་པའི་ཡེ་ཤེས་ཀྱི༔ ཐབས་ཀྱི་རྡོ་རྗེ་བཟུང་བར་གྱིས༔ སྟོང་པ་ཟུང་འཇུག་དབྱངས་ལྡན་པའི༔ ཤེས་རབ་དྲིལ་བུ་བཟུང་བར་གྱིས༔ བཛྲ་དྷཱ་ར་ཀརྨ་གཎྜེ༴ རྡོ་དྲིལ་བཟུང་བ་སྙིང་གར་བསྣོལ་དུ་བཅུག་ལ། ཧཱུྃ༔ སྔགས་དང་ཕྱག་རྒྱ་བླ་མེད་པའི༔ ཐམས་ཅད་ཡེ་ [80a] ཤེས་ཆེན་པོར་བསྒྱུར༔ ཐབས་དང་ཤེས་རབ་ཟུང་འཇུག་པའི༔ སྔགས་དང་ཕྱག་རྒྱ་བཟུང་བར་གྱིས༔ ཞེས་དང་དབྱངས་གསལ་བརྗོད། རིགས་བཞིའི་སྐུ་ཙཀ་སྤྱི་བོར་བཞག་ལ། ཧཱུྃ༔ ཆོས་དབྱིངས་ཡེ་ཤེས་བཅོམ་ལྡན་རྣམ་སྣང་མཛད༔ སོར་རྟོག་ཡེ་ཤེས་བཅོམ་ལྡན་སྣང་མཐའ་ཡས༔ མེ་ལོང་ཡེ་ཤེས་བཅོམ་ལྡན་མི་བསྐྱོད་པ༔ མཉམ་ཉིད་ཡེ་ཤེས་བཅོམ་ལྡན་རིན་ཆེན་འབྱུང་༔ རྒྱལ་བ་རིགས་བཞིའི་དབང་ཆེན་རབ་བསྐུར་བས༔ རིགས་བཞིའི་ལྷ་ཡི་དངོས་གྲུབ་འགྲུབ་པར་ཤོག༔ ཨོཾ་སརྦ་ཏ་ཐཱ་ག་ཏ་བེེ་ཏོ་ཙ་ན་པདྨ་དྷ་ར་ཨཀྵོ་བྷྱཿརཏྣ་སཾ་བྷ་ཝ་ཨ་བྷི༴ ཞེས་བསྐུར། དེས་སྤྱོད་རྒྱུད་རིགས་བཞིའི་དཀྱིལ་འཁོར་དུ་ཆུ་དང་ཅོད་པན་རྡོ་དྲིལ་གྱི་དབང་རྗེས་འབྲེལ་དང་བཅས་པ་ཐོབ། ཕྱི་ལུས་ངག་གི་བྱ་བ་དང་། ནང་སེམས་ཀྱི་ཏིང་ངེ་འཛིན་ཆ་མཉམ་པར་སྤྱོད་དེ། ལྷ་དང་བདག་གཉིས་སྤུན་ནམ་གྲོགས་པོའི་ཚུལ་དུ་བལྟས་ནས་དངོས་གྲུབ་སྒྲུབ་པ་ཨུ་པ་ཡའི་ཐེག་པ་ཡོངས་སུ་རྫོགས་པ་ལ་དབང་འབྱོར་ཏེ་རིགས་བཞིའི་བྱང་ཆུབ་མངོན་དུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །དགུ་པ་ཡོ་གའི་ཐེག་པའི་དབང་ནི། དེས་ཡན་ལག་བརྒྱད་པ་ཨུ་པ་ཡའི་ཐེག་པའི་དབང་བསྐུར་བ་གྲུབ་ནས། ཡན་ལག་དགུ་པ་ཡོ་གའི་ཐེག་པའི་ [80b] དབང་བསྐུར་བ་ལ། ཐོག་མར་ཁྱེད་རང་རྣམས་མ་རིག་པའི་སྒྲིབ་གཡོགས་དང་བཅས་པར་མཚོན་ཕྱིར་མིག་དར་རེ་འཆིང་བར་ཞུ། ཨོཾ་ཨཱཿཧཱུྃ་གིས་མིག་དར་བཅིང་། ལྷ་དང་མཇལ་བའི་ཕྱག་རྟེན་དུ་མེ་ཏོག་གསར་པ་རེ་ཐོགས་པར་མཛོད། ཨ་ཁཾ་བཱི་ར་ཧཱུྃ་གིས་གཏད། འདི་ཕན་ཉོན་མོངས་བཀྲུ་བའི་བྱ་བ་ཡིན༔ ད་ནི་ཡེ་ཤེས་གོང་དུ་འཕེལ་བ་ཡི༔ གསང་སྔགས་ཡོ་གའི་ཐེག་པར་འཇུག་པ་སྟེ༔ རིགས་ལྔའི་སྡོམ་པ་མ་ལུས་ཐུབ་པར་སྲུངས༔ ཞེས་ཇི་སྐད་བསྒོས་པའི་སྡོམ་པ་མ་ལུས་པ་བཟུང་ཞིང་མི་ཉམས་པར་བསྲུང་བར་བགྱིད་སྙམ་པས་འདིའི་རྗེས་ཟློས། བདེ་བར་གཤེགས་པ་སློབ་དཔོན་དགོངས༔ རིགས་ལྔའི་སྡོམ་པ་མ་ལུས་པ༔ རྣལ་འབྱོར་རྒྱུད་དུ་གང་གསུངས་པ༔ དེ་དག་ཐམས་ཅད་བདག་གིས་བསྡོམ༔ ས་མ་ཡ་ཨི་དན་ན་ར་ཀན༔ དེ་ནས་དབང་གི་སྣོད་དུ་རུང་བར་བྱ་བའི་ཕྱིར་ཁྱེད་རང་རྣམས་ཀྱི་གཞི་ལུས་ལྷའི་སྐུ་འདི་ལྟར་དུ་གསལ་ཐོབ་མཛོད། སློབ་མའི་ལུས་སྣང་མི་དམིགས་སྟོང་པར་གྱུར༔ སྟོང་པའི་ངང་ལས་པད་ཟླའི་གདན་གྱི་སྟེང་༔ དུས་གསུམ་སངས་རྒྱས་ཀུན་རིག་རྣམ་སྣང་མཛད༔ ཞལ་གཅིག་ཕྱག་གཉིས་མཉམ་གཞག་འཁོར་ལོ་འཛིན༔ དཀར་པོ་ལོངས་སྤྱོད་རྫོགས་སྐུ་མཚན་ [81a] དཔེ་རྫོགས༔ ལྷ་མོ་དབྱིངས་ཕྱུག་མ་ནི་མདུན་ནས་འདུད༔ དེ་ལྟར་གསལ་བའི་གནས་གསུམ་འབྲུ་གསུམ་མཚན༔ སློབ་དཔོན་ཐུགས་ཀའི་འོད་ཀྱིས་ཡེ་ཤེས་པ༔ དབྱིངས་ནས་སྤྱན་དྲངས་དབྱེར་མེད་ཐིམ་པར་གྱུར༔ ཨོཾ་བུདྡྷ་བེེ་རོ་ཙ་ན་ཨ་བེ་ཤ་ཡ་ཨ་ཨཱཿ ཞེས་སྤོས་རོལ་བཅས་དབབ། ཡེ་ཤེས་པ་དེ་ཉིད་བརྟན་པར་གྱུར་པའི་མོས་པ་མཛོད། ཏིཥྛ་བཛྲ་ཞེས་རྡོ་རྗེ་སྤྱོ་བོར་རྒྱ་གྲམ་དུ་བཞག ། སྔར་བྱིན་པའི་མེ་ཏོག་དེ་ཉིད་དཀྱིལ་འཁོར་གྱི་ལྷ་ལ་འབུལ་བའི་མོས་པས་ཚོམ་བུ་རིགས་ལྔར་གསལ་བ་ལ་སྔགས་འདིའི་རྗེས་ཟློས་དང་བཅས་འདོར་མཛོད། པུཥྤེ་པཱུ་ཛ་ཧོཿ ཞེས་མེ་ཏོག་འདོར་དུ་གཞུག ། མེ་ཏོག་ལྷག་པའི་ལྷས་བཞེས་ཏེ་སླར་ཡང་དབང་རྟགས་སུ་སྤྱི་བོར་སྩལ་བར་མོས་ཤིག །པུཥྤེ་གྲྀཧྞ་ཨི་མཾ་ས་ཏྭ་མ་ཧཱ་བཱ་ལ༔ ཞེས་མེ་ཏོག་སྤྱི་བོར་བཀོད། མ་རིག་པའི་སྒྲིམ་གཡོགས་མིག་དར་དང་ལྷན་ཅིག་ཏུ་བསལ་བར་མོས་ཤིག །ཙཀྵུ་པྲ་ཝེ་ཤ་ཡ་ཕཊ༔ ཅེས་མིག་དར་བསལ། ཡེ་ཤེས་དག་པའི་སྤྱན་གྱིས་རིགས་ལྔའི་དཀྱིལ་འཁོར་ཚུལ་བཞིན་དུ་མཐོང་བར་མོས་ཤིག །དེ་རྣམས་ཀྱིས་འཇུག་པའི་རིམ་པ་སོང་ནས། དབང་བསྐུར་བ་དངོས་ལ། དབང་ལྷ་ནམ་མཁའ་གང་བར་སད་པ་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས། [81b] ཆོས་དབྱིངས་བུམ་པ་མི་བསྐྱོད་པའི་ངོ་བོ་བདུད་རྩིའི་རང་བཞིན་ཅན་གྱིས་དབང་བསྐུར་བས་ཞེ་སྡང་རྣམ་དག་མེ་ལོང་ཡེ་ཤེས་མངོན་དུ་གྱུར་པར་མོས་མཛོད། རྣམ་བུམ་ཐོགས་ཏེ། ཧཱུྃ༔ ཆོས་དབྱིངས་རྣམ་པར་དག་པའི་བུམ་པ་རུ༔ རྡོ་རྗེ་དབྱིངས་ཀྱི་དཀྱིལ་འཁོར་མངོན་སུམ་བཞེངས༔ དག་པ་ལྷ་ཡི་བདུད་རྩི་དབབ་པ་ཡི༔ མེ་ལོང་ཡེ་ཤེས་བུམ་པའི་དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་ཨཀྵོ་བྷྱཿ ཨ་བྷི་ཥིཉྩ་ཧཱུྃཿ ཞེས་དབང་བསྐུར་ཞིང་བུམ་ཆུ་སྦྱིན་ལ་སྤྱི་བོར་གཏིག ། རིན་འབྱུང་གི་ངོ་བོ་རྒྱལ་བ་རིགས་ལྔའི་དབུ་རྒྱན་གྱིས་དབང་བསྐུར་བས་ང་རྒྱལ་རྣམ་དག་མཉམ་ཉིད་ཡེ་ཤེས་མངོན་དུ་གྱུར་པར་མོས་ཤོག །དབུ་རྒྱན་ཐོགས་ལ། ཏྲཱྃ༔ འདི་ནི་རྒྱལ་བ་ཐམས་ཅད་ཀྱིས༔ དབང་བསྐུར་ཅོད་པན་ཆེན་པོ་སྟེ༔ རྒྱལ་བ་རིགས་ལྔས་དབུ་བརྒྱན་པས༔ མཉམ་ཉིད་ཡེ་ཤེས་རྟོགས་པར་ཤོག༔ ཨོཾ་སརྦ་ཏ་ཐཱ་ག་ཏ་རཏྣ་སམྦྷ་ཝ་རཏྣ་མུ་ཀུ་ཊ་ཨ་བྷི་ཥིཉྩ་ཏྲཱྃ༔ ཞེས་མགོ་བོར་བཞག ། སྣང་མཐའི་ངོ་བོ་གཞོམ་མེད་རྡོ་རྗེའི་དབང་བསྐུར་བས་འདོད་ཆགས་རྣམ་དག་སོར་རྟོག་ཡེ་ཤེས་མངོན་དུ་གྱུར་པར་མོས་ཤིག །རྡོ་རྗེ་ཐོགས་ལ། ཧྲཱིཿ ཡང་དག་གཞོམ་མེད་རྡོ་རྗེ་ཆེ༔ ཏིང་ངེ་འཛིན་དང་ཡེ་ཤེས་ཀྱི༔ རྡོ་རྗེ་རབ་ཏུ་གསོར་བ་ཡིས༔ སོར་རྟོག་ཡེ་ཤེས་རྟོགས་ [82a] པར་ཤོག༔ ཨོཾ་སརྦ་ཏ་ཐཱ་ག་ཏ་པདྨ་དྷཱ་ར་ཨ་བྷི་ཥིཉྩ་ཧྲཱིཿ ཞེས་ལག་གཡས་སུ་གཏད། དོན་གྲུབ་ཀྱི་ངོ་བོ་སྟོང་ཉིད་ཆོས་ཀྱི་སྒྲ་དབྱངས་དྲིལ་བུའི་དབང་བསྐུར་བས་ཕྲག་དོག་རྣམ་དག་བྱ་གྲུབ་ཡེ་ཤེས་མངོན་དུ་གྱུར་པར་མོས་ཤིག །དྲིལ་བུ་ཐོགས་ལ། ཨཱཿ ཡང་དག་ཡེ་ཤེས་སངས་རྒྱས་དབྱངས༔ རྒྱལ་བ་རྣམས་ཀྱི་ཆོས་ཀྱི་སྒྲ༔ དབྱངས་སྙན་དྲིལ་བུའི་དབང་བསྐུར་བས༔ བྱ་གྲུབ་ཡེ་ཤེས་རྟོགས་པར་ཤོག༔ ཨོཾ་སརྦ་ཏ་ཐཱ་ག་ཏ་ཀརྨ་ཨ་མོ་གྷ་སིདྡྷ་ཀརྨ་གཎྜེ་ཨ་བྷི་ཥིཉྩ་ཨཱཿ ཞེས་དཀྲོལ་ཞིང་ལག་གཡོན་དུ་གཏད། རྣམ་པར་སྣང་མཛད་ཀྱི་ངོ་བོ་སངས་རྒྱས་རིགས་གསུམ་གྱི་མཚན་གསོལ་བས་གཏི་མུག་རྣམ་དག་ཆོས་དབྱིངས་ཡེ་ཤེས་མངོན་དུ་གྱུར་པར་མོས་ཤིག ། མིང་དབང་རྡོ་དྲིལ་ཐོགས་ལ། ཧཱུྃ༔ འདི་ནི་སངས་རྒྱས་ཀུན་གྱི་མིང་༔ ས་རྣམས་ཀུན་ཏུ་གྲགས་གྱུར་བའི༔ དེ་བཞིན་རིགས་སུ་མཚན་གསོལ་བས༔ ཆོས་དབྱིངས་ཡེ་ཤེས་རྟོགས་པར་ཤོག༔ ཨོཾ་སརྦ་ཏ་ཐཱ་ག་ཏ་བུདྡྷ་བེེ་རོ་ཙ་ན་རྣམ་པར་སྣང་མཛད་ཆེ་གེ་ ཞེས་བྱ་བའི་དེ་བཞིན་གཤེགས་པའོ༔ ཞེས་སྤྱི་བོར་འཁྲོལ། དེ་ལྟར་རིག་པའི་དབང་ལྔ་བསྐུར་བས། མ་རིག་པ་ལྔ་སྦྱངས། ཕུང་པོ་ལྔ་གནས་གྱུར། ཡེ་ཤེས་ལྔ་ཡི་རྟོགས་པ་རྒྱུད་ལ་སྐྱེས་པར་མོས་ [82b] མཛོད། དེའི་རྗེས་འབྲེལ་དུ་སྐུ་གསུང་ཐུགས་ཀྱི་དབང་བསྐུར་བ་ལ། དཀྱིལ་འཁོར་ཆེན་པོའི་ཤར་སྟོད་ཀྱི་དཀྱིལ་འཁོར་དུ་བཞུགས་པའི་རྣམ་པར་སྣང་མཛད་རྒྱལ་བ་རིགས་ལྔའི་ལྷ་ཚོགས་རྣམས་ཀྱི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་འཕྲོས་ཏེ་ཁྱེད་རང་རྣམས་ཀྱི་སྤྱི་བོ་ནས་ཞུགས་ཏེ་ལུས་ལ་ཐིམ་པར་མོས་ཤིག །སྐུ་ཙཀ་རྣམས་ཐོགས་ལ། ཧཱུྃ༔ དུས་གསུམ་སངས་རྒྱས་ཀུན་རིག་རྣམ་སྣང་མཛད༔ ཞལ་བཞི་ཕྱག་གཉིས་མཉམ་བཞག་འཁོར་ལོ་འཛིན༔ དཀར་པོ་ལོངས་སྤྱོད་རྫོགས་སྐུ་མཚན་དཔེ་རྫོགས༔ ལྷ་མོ་དབྱིངས་ཕྱུག་མ་ནི་མདུན་ན་འདུད༔ དེ་བཞིན་གཤེགས་པ་མཆོག་གི་དབང་བསྐུར་རོ༔ ཨོཾ་བུདྡྷ་བེེ་རོ་ཙ་ན་ཨ་བྷི༴ ཧཱུྃ༔ དུས་གསུམ་སངས་རྒྱས་རྒྱལ་བ་རིགས་བཞི་རྣམས༔ ཞག་གཅིག་ཕྱག་གཉིས་མཉམ་གཞག་རང་རྟགས་འཛིན༔ མཐིང་སེར་དམར་ལྗང་ལོངས་སྤྱོད་རྫོགས་སྐུའི་ཆས༔ བདེ་བར་གཤེགས་པ་བཞི་ཡི་དབང་བསྐུར་རོ༔ ཨོཾ་བཛྲ་ཨཀྵོ་བྷྱ༔ རཏྣ་སམྦྷ་ཝ་པདྨ་དྷཱ་ར་ཀརྨ་ཨ་མོ་གྷ་སིདྡྷི་ཨ་བྷི༴ ཧཱུྃ༔ མཚམས་ལ་བཞུགས་པའི་དེ་བཞིན་གཤེགས་མ་བཞི༔ ཞལ་གཅིག་ཕྱག་གཉིས་གར་བསྒྱུར་རང་རྟགས་འཛིན༔ མཐིང་སེར་དམར་ལྗང་ཡབ་ལ་འདུད་པའི་ཚུལ༔ བདེ་བར་གཤེགས་མ་བཞི་ཡི་ [83a] དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་བཛྲ་རཏྣ་པདྨ་ཀརྨ་མ་ཊ་ཨ་བྷི༴ ཞེས་བསྐུར། གསུང་བཟླས་བའི་ལུང་བྱིན་ཅིང་སྔགས་ཀྱི་བྱང་བུ་མགྲིན་པར་བཞག་པས་རྒྱལ་བའི་གསུང་གི་བྱིན་རླབས་ངག་ལ་ཞུགས་པར་མོས་མཛོད། སྔགས་བྱང་ཐོགས་ལ། ཧཱུྃཿ རྡོ་རྗེ་རྩེ་མོའི་གཟུངས་སྔགས་བླ་ན་མེད༔ ངན་སོང་རྣམས་འཇོམས་སྡིག་པའི་ཚོགས་འཇོམས་པ༔ རྒྱལ་བ་གསང་སྔགས་རིགས་སྔགས་ཐམས་ཅད་ཀྱི༔ དབང་བསྐུར་མ་ལུས་ཡོངས་སུ་རྫོགས་པར་ཤོག༔ གཟུང་སྔགས་འདིའི་རྗེས་ཟློས་མཛོད། ངན་སོང་སྦྱོང་བའི་གཟུངས་སྔགས། ཨོཾ་ཤྭ་དྷ་ནི་ཤྭ་དྷ་ནི་སརྦ་པཱ་པཾ་བི་ཤྭ་དྷ་ནི་ཤུདྡྷེ་སརྦ་ཀརྨ་ཨ་ཝ་ར་ཎ་བི་ཤྭ་དྷ་ནེ་སྭཱ་ཧཱ། །ཞེས་རྗེས་ཟློས་ཚར་གཅིག་བྱ་ཞིང་། སྔགས་བྱང་མགྲིན་པར་བཞག ། ཐུགས་ཀྱི་དགོངས་པ་ངོ་སྤྲོད་པའི་སླད་དུ། མེ་ལོང་དྭངས་པ་ལ་གཟུགས་བརྙན་སྣ་ཚོགས་སུ་ཤར་བ་འདིས་མཚོན་ཏེ་དབྱིངས་སྤྲོས་པ་དང་བྲལ་བའི་ངང་ལས་རྩལ་སྣང་འགགས་མེད་འཁོར་འདས་ཀྱི་རྣམ་པ་ཇི་ལྟར་ཤར་ཡང་ངོ་བོ་ཆོས་ཉིད་བརྗོད་དུ་མེད་པའི་ངང་ལས་མི་འདའ་བའི་དོན་གོ་བར་གྱིས་ལ་འོད་གསལ་རྣམ་པར་མི་རྟོག་པའི་ངང་དུ་མཉམ་པར་ཞོག་ཅིག །ཧཱུྃ༔ ཆོས་རྣམས་མ་ལུས་ཐམས་ཅད་ནི༔ གཟུང་དུ་མེད་ལ་འཛིན་པ་བྲལ༔ མེ་ལོང་ནང་གི་གཟུགས་ [83b] བརྙན་ལྟར༔ བརྗོད་དུ་མེད་པ་རྟོགས་པར་ཤོག༔ ཙིཏྟ་དྷརྨ་དྷཱ་ཏུ་ཨ་བྷི་ཥིཉྩ་ཨཱཿདེ་ལྟར་དབང་ཐོབ་ནས་གཞན་དོན་བྱེད་ནུས་པའི་སླད་དུ་རྡོ་རྗེ་སློབ་དཔོན་ལ་འོས་པའི་ཡོ་བྱད་རྣམས་ཀྱིས་མངའ་གསོལ་བར་མོས་མཛོད། ཆས་རྣམས་གཏད་ལ། ཧཱུྃ༔ དཀྱིལ་འཁོར་གཙོ་བོའི་གོ་འཕང་མཉམ་པའི་ཕྱིར༔ ཁྲི་ལ་མངའ་གསོལ་གདུགས་ཕུབ་རྒྱལ་མཚན་ཕྱར༔ རྒྱལ་བ་ཀུན་གྱི་ཤིས་པའི་མེ་ཏོག་ཀྱང་༔ དེ་རིང་འདི་ལ་ཀུན་གྱིས་འཐོར་བར་ཤོག༔ ཅེས་རྟེན་སྙིང་བརྗོད་ཅིང་མེ་ཏོག་འཐོར། དེས་ཡོ་ག་རིགས་ལྔའི་དཀྱིལ་འཁོར་དུ་སློབ་མའི་དབང་རྗེས་འབྲེལ་དང་བཅས་པ་དང་སློབ་དཔོན་གྱི་དབང་བཅས་ཐོབ། ནང་ཐབས་ཤེས་ཀྱི་ལམ་ཕྱག་རྒྱ་བཞི་དང་འབྲེལ་བའི་མཚན་བཅས་དང་མཚན་མེད་ཀྱི་རྣལ་འབྱོར་ཟབ་མོ་གཙོ་བོར་སྒྲུབ་པ་ཡོ་གའི་ཐེག་པ་ཡོངས་སུ་རྫོགས་པ་ལ་དབང་འབྱོར། རིགས་ལྔ་ཡེ་ཤེས་ལྔའི་ངོ་བོ་མངོན་དུ་འགྲུབ་པའི་སྐལ་པ་ཅན་དུ་བྱས་པ་ཡིན་ནོ། །གཉིས་པ་རྩ་བ་ནང་རྒྱུད་གསུམ་བསྒྲིལ་གྱི་དབང་ལ་གཉིས། རྩ་དབང་དངོས་དང་། མཐའ་རྟེན་གྱི་དབང་ངོ་། དང་པོ་ནི། འདིར་དཀྱིལ་འཁོར་ལ་ཡོལ་བ་བཏང་། དེ་རྣམས་ཀྱིས་ཡན་ལག་ཐེག་པ་དགུ་བསྒྲིལ་གྱི་དབང་རྣམས་ལེགས་པར་གྲུབ། ད་ནི་རྩ་བ་མངོན་རྫོགས་རྒྱལ་པོའི་དཀྱིལ་འཁོར་དུ་ནང་རྒྱུད་གསུམ་བསྒྲིལ་གྱི་དབང་བསྐུར་བ་ལ། ཐོག་ [84a] མར་ཕྱི་འཇུག་གི་སླད་དུ་ཁྱེད་རང་རྣམས་དཀྱིལ་འཁོར་ཁང་པའི་ཕྱིར་རོལ་གྱི་སྒོ་དྲུང་དུ་འཁོད་པར་མོས་ཏེ་སྒོ་སྲུང་ཁྲོ་བོ་རྣམས་ལ་སྒོ་དབྱེ་བར་གསོལ་བ་འདེབས་པ་འདིའི་རྗེས་ཟློས་མཛོད། ཧོཿ ཡེ་གསང་ཐབས་ཀྱི་སྒོ་བ་རྣམས༔ རིག་པའི་ཡེ་ཤེས་མཐོང་འདོད་པས༔ བདག་ཅག་སྐལ་ལྡན་ཕོ་མོ་རྣམས༔ ཐར་པའི་གྲོང་དུ་གཏོང་བར་གསོལ༔ ལན་གསུམ། དེའི་ལན་དུ་སྒོ་སྲུང་ཁྲོ་བོས་འདི་སྐད་བསྒོས་པར་མོས་ཤིག །ཧཱུྃ༔ རིག་པའི་ཡེ་ཤེས་མཐོང་འདོད་ན༔ བླ་མ་དཔལ་ཆེན་མཁའ་འགྲོ་མའི༔ བཀའ་བཞིན་དམ་ཚིག་ཐུབ་པ་དང་༔ སྡོམ་པ་ལ་ནི་གནས་པར་གྱིས༔ ཞེས་གསུངས་ཤིང་ཕོ་བྲང་ཆེན་པོའི་སྒོ་ཤགས་ཀྱིས་ཕྱེས་ཏེ་ནང་དུ་བཏང་བའི་མོས་པ་མཛོད། འདིར་ཁྲུས་དང་བགེགས་བསལ་བ་འབྱུང་ཡང་དབང་གོང་མ་རྣམས་དང་སྦྲེལ་ཚེ་སྔར་སོང་བས་འཐུས། བླ་མ་དཔལ་ཆེན་མངོན་རྫོགས་རྒྱལ་པོའི་ངོ་བོར་བཞུགས་པ་ལ་རྩ་བའི་དབང་བསྐུར་ཟབ་མོ་ཞུ་བའི་དོན་དུ་མཎྜལ་འབུལ་བར་མཛོད། ཅེས་མཎྜལ་ཕུལ། མཚམས་སྦྱོར་སྔར་ལྟར་བྱས་ལ། ཨོཾ་ཨཱཿཧཱུྃ་གིས་མིག་དར་བཅིང་ཞིང་། ཨ་ཁ༷ཾ་བཱི་ར་ཧཱུྃ་གིས་མེ་ཏོག་གཏད། ཐལ་མོ་མེ་ཏོག་དང་བཅས་པས་ཐར་པ་ཆེན་པོའི་གྲོང་ཁྱེར་དུ་གཞུག་པར་གསོལ་བ་འདེབས་པ་འདིའི་རྗེས་ཟློས་མཛོད། ཧོཿ ཧེ་རུ་ཀ་དང་གཉིས་མེད་པའི༔ རྡོ་ [84b] རྗེ་དཔོན་དགོངས་སུ་གསོལ༔ ཁྲག་འཐུང་ཆེན་པོའི་གྲོང་ཁྱེར་དུ༔ བདག་ཅག་མགོན་པོས་གཞུག་པར་འཚལ༔ ལན་གསུམ། དེ་ལྟར་གསོལ་བ་བཏབ་པ་ལ་སློབ་དཔོན་གྱིས་དམ་ཚིག་གི་བསླབ་བྱ་བསྙད་ཅིང་སྤྲོ་བ་བསྐྱེད་པའི་སྒོ་ནས་ལན་སྦྱིན་པ་འདི་ལ་གསན་པས་ཁྱབ་སྟེད། དེ་ལྟར་ཡིན་ན་ཧེ་རུ་ཀའི༔ གྲོང་ཁྱེར་ཆེན་པོར་གཞུག་པར་བྱ༔ བླ་མེད་རྒྱུད་ལས་གང་གསུངས་པའི༔ དམ་ཚིག་ཐམས་ཅད་ཐུབ་པར་གྱིས༔ གསང་སྔགས་ལམ་མཆོག་རྙེད་པ་ནི༔ བསྐལ་པ་བརྒྱ་ལམ་རེས་འགའ་ཙམ༔ ཨུ་དུམ་ཝ་རའི་མེ་ཏོག་འདྲ༔ དེས་ན་དགའ་ཞིང་སྤྲོ་བར་གྱིས༔ ཞེས་གདམས། རྡོ་རྗེ་ཐེག་པ་སྤྱི་དང་ཁྱད་པར་ལྷག་པས་བསྡུས་པའི་དམ་ཚིག་མཐའ་དག་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། བདེ་བར་གཤེགས་པའི་ཧེ་རུ་ཀའི༔ བདག་ཉིད་བླ་མ་དགོངས་སུ་གསོལ༔ སྐུ་གསུང་ཐུགས་ཀྱི་དམ་ཚིག་དང་༔ མི་སྤངས་ལྔ་དང་དང་ལེན་ལྔ་༔ ཤེས་བྱ་ལྔ་དང་སྒྲུབ་བྱ་ལྔ༔ སྤྱད་པར་བྱ་བའི་དམ་ཚིག་ལྔ༔ མ་ལུས་བདག་གིས་བཟུང་བར་བགྱི༔ སྲོག་གི་ཕྱིར་ཡང་མི་གཏོང་ངོ་༔ ལན་གསུམ། འདི་ལྟར་ཁས་བླང་པའི་དམ་ཚིག་གི་གནས་རྣམས་ལས་ནམ་ཡང་འདར་རུང་བ་མ་ཡིན་པས་ཁེ་ཉན་གྱི་གནད་ལ་བཀར་ནས་དམ་ལ་བཞག་པར་བྱ་བ་ལགས་ཏེ། རྡོ་རྗེ་སྤྱི་བོར་བཞག་ལ། ཧོཿ བདག་ནི་ [85a] ཧེ་རུ་ཀ་དཔལ་ཏེ༔ ང་ལ་བརྙས་པར་མི་རུང་ངོ་༔ ཚུལ་འདི་ལས་ནི་འདས་པ་ན༔ དཀྱིལ་འཁོར་གཙོ་བོར་འགལ་བར་འགྱུར༔ ཨོཾ་བཛྲ་ས་མ་ཡ་ཧཱུྃ༔ རྡོ་རྗེ་སྙིང་གར་བཞག་ལ། ཧེ་རུ་ཀ་དཔལ་བདག་གི་ནི༔ བསྒོ་བའི་བཀའ་ལ་ཉན་པར་གྱིས༔ གལ་ཏེ་བཀའ་ལས་འདས་པ་ན༔ གསང་སྔགས་འབྲས་བུ་ཐོབ་འདོད་མིན༔ བཛྲ་ས་མ་ཡ་ཏིཥྛ༔ དམ་ཆུ་བདུད་རྩི་སྦྱིན་ལ། འདི་ནི་དམ་ཚིག་རྡོ་རྗེའི་ཆུ༔ དམ་སྲུང་ཡེ་ཤེས་སེམས་དཔའ་སྟེ༔ འདས་ན་ཡཀྴ་ནག་པོར་འགྱུར༔ སྙིང་ཁྲག་འཐུང་ཞིང་དམྱལ་བར་ལྟུང་༔ དེ་བས་དམ་ཚིག་ཐུབ་པར་གྱིས༔ བཛྲ་ས་མ་ཡ་རཀྵ་སི་ཧཱུྃ༔ རྡོ་རྗེ་གདེངས་ལ། ཧེ་རུ་ཀ་དཔལ་ཚུལ་འདི་ནི༔ གསང་བས་བྱིན་རླབས་བླ་ན་མེད༔ ཚུལ་འདི་སྨྲས་ཤིང་བདག་བརྙས་ན༔ དམ་ཚིག་ལས་ནི་འགལ་བར་འགྱུར༔ དེ་བས་སྙིང་ནས་བྲོ་བར་ཞིག༔ ཁྱེད་རང་རྣམས་ཀྱི་ལག་གཉིས་རྡོ་རྗེ་རྩེ་གཅིག་གི་ཕྱག་རྒྱ་སྙིང་གར་བཟུང་ལ་གསང་བའི་དམ་ཚིག་གཉན་པོ་ལས་ནམ་ཡང་མི་འདའ་འོ་སྙམ་པས་རྡོ་རྗེའི་བྲོ་བོར་བ་འདིའི་རྗེས་ཟློས། ཨོཾ་བཛྲ་ས་མ་ཡ་ཨི་དན་ན་ར་ཀན༔ ཞེས་བྲོ་བོར། དེ་ནས་དབང་གི་གཞི་འགོད་པ་ཡེ་ཤེས་པ་དབབ་པའི་སླད་དུ་ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་སྲོངས། [85b] ངག་གནད་སྲོག་རྩོལ་ཁ་སྦྱོར་དུ་ཆིངས། སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། སྣང་སྲིད་ཆོས་འབྱུང་ཆེན་པོར་བསམ༔ དབུས་སུ་སློབ་མ་མངོན་རྫོགས་རྒྱལ༔ ཧེ་རུ་ཀ་དཔལ་ཞལ་གཅིག་པ༔ སྨུག་ནག་ཕྱག་གཉིས་གྲི་ཐོད་འཛིན༔ ཞབས་གཉིས་སྐྱིལ་ཀྲུང་ཡུམ་དང་འཁྲིལ༔ བམ་རོ་པད་ཉིར་གནས་པ་ཡི༔ སྙིང་གར་ཆོས་འབྱུང་དམར་པོའི་ནང་༔ ཨ་ཤད་དམར་པོ་འོད་འབར་བསྒོམ༔ སློབ་དཔོན་ཧེ་རུ་ཀ་དཔལ་གྱི༔ ཐུགས་སྲོག་ཧཱུྃ་གི་འོད་ཟེར་གྱིས༔ དབྱིངས་ནས་ཡེ་ཤེས་སེམས་དཔའི་ཚོགས༔ དཔག་མེད་ཆར་ཆེན་བབས་པ་བཞིན། །སྤྱན་དྲངས་སློབ་བུའི་སྒོ་གསུམ་དང་། །ཁྱད་པར་སྙིང་གའི་ཨ་ཤད་ལ། །སིབ་སིབ་ཐིམ་པས་བདེ་དྲོད་གཡོས། །ཡེ་ཤེས་གཟི་བྱིན་འབར་བར་བསྒོམ། །ཞེས་དམིགས་པ་ཕོག་ལ། འབེབས་པའི་རྫས་དུད་རོལ་མོའི་སྒྲ་དང་སྦྱར་ཏེ། ཛྙཱ་ན་ཨཱ་བེ་ཤ་ཡ་ཨ་ཨ་ཨ་ཧཾ༔ ཧ་ཧ་ཧ་ཧཱུྃ་ཧཱུྃ་ཧཱུྃ༔ ཨཱ་རལླི་ཨེ་ཧྱེ་ཧི་ཨ་ཧཾ༔ བཛྲ་ས་མ་ཡ་ཛཿཨ་ཧཾ༔ ཞེས་མང་དུ་བརྗོད་པས་དབབ་ལ་ཕེབས་རྟགས་བྱུང་བ་ན། དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་བརྟན་པར་བྱས་པའི་མོས་པ་མཛོད། ཏིཥྛ་བཛྲ། །ཞེས་རྡོ་རྗེ་སྤྱོ་བོར་རྒྱ་གྲམ་དུ་བཞག །མེ་ཏོག་འདོར་བའི་ར་བ་བཀོད་ལ། [86a] ཧོཿ བདེ་དགཤེགས་རྒྱལ་བའི་ཕོ་བྲང་འདིར༔ ཡེ་ཤེས་ལྷ་ཚོགས་དངོས་སུ་བཞུགས༔ འབྲེལ་པ་གང་ཡོད་བརྟག་པའི་ཕྱིར༔ རིག་པའི་མེ་ཏོག་ལྷ་ལ་ཕུལ༔ ཁྱེད་རང་རྣམས་ལ་སྔར་བྱིན་པའི་མེ་ཏོག་དེ་ཉིད་དཀྱིལ་འཁོར་གྱི་ལྷ་ལ་འབུལ་བའི་མོས་པས་ཚིག་འདིའི་རྗེས་ཟློས་དང་བཅས་ཚོམ་བུའི་དཀྱིལ་འཁོར་དུ་འདོར་བར་ཞུ། ཧོཿ བསྐལ་པ་སྔོན་ནས་འབྲེལ་པ་ཡི༔ ཡེ་ཤེས་རིག་པའི་ལྷ་མཆོག་ལ༔ རང་རིག་ལྷ་དང་ངོ་འཕྲོད་ཕྱིར༔ ཁ་དོག་ལྔ་ལྡན་མེ་ཏོག་འབུལ༔ ཐུགས་ཀྱིས་དགྱེས་པར་བཞེས་སུ་གསོལ༔ བཛྲ་པུཥྤེ་པྲ་ཏིཙྪ་ ཧོཿ ཞེས་འདོར་དུ་གཞུག་ལ། དབུས་སུ་བབས་ན་བུདྡྷ་ཧེ་རུ་ཀ་དཔལ། དེ་བཞིན་དུ་ཕྱོགས་བཞིར་བཛྲ་སོགས་རིགས་བཞི། མཚམས་བཞིར་གུ་ཧྱ་སོགས་གསང་མཚན་སོ་སོར་འདོགས་པའམ། སྤྱི་ཁྱབ་ཙམ་དུ། དེ་ལྟར་ཕུལ་བའི་མེ་ཏོག་དེ་ཉིད་དབུས་དང་ཕྱོགས་མཚམས་གང་དུ་ཕོག་ཀྱང་འདྲ་སྟེ། ཚོམ་བུའི་དཀྱིལ་འཁོར་ཇི་ལྟར་སྣང་བ་ཐམས་ཅད་གཙོ་བོའི་ཐུགས་ཡེ་ཤེས་ཀྱི་རང་རྩལ་ཁོ་ན་ལས་གཞན་དུ་མ་དམིགས་པའི་ཕྱིར་ཁྱེད་རང་རྣམས་ཀྱི་མེ་ཏོག་གཙོ་བོ་ལ་ཕོག་པ་ཡིན་པས་གསང་བའི་མཚན་ཡང་བུདྡྷ་ཧེ་རུ་ཀ་ཞེས་བྱ་བར་ཟུང་ཞིག །ལྷ་དང་མི་འབྲལ་ཞིང་རང་རྒྱུད་བྱིན་གྱིས་རློབ་པའི་བརྡར་མེ་ཏོག་དེ་ཉིད་སླར་ཡང་དབང་རྟགས་ཅོད་པན་གྱི་ [86b] ཚུལ་དུ་སྤྱི་བོར་བཅིངས་པར་མོས་ཤིག །ཧོཿ ཡེ་ཤེས་ལྷ་ཚོགས་ཐམས་ཅད་ལ༔ རིག་པའི་མེ་ཏོག་ཕུལ་བ་ཡི༔ བྱིན་རླབས་བསམ་མི་ཁྱབ་པ་དེ༔ རང་རིག་ལྷ་དང་ངོ་འཕྲོད་དེ༔ སྐུ་གསུང་ཐུགས་ཀྱི་དངོས་གྲུབ་ཐོབ༔ དཔལ་ཆེན་པོ་དང་དབྱེར་མེད་ཤོག༔ པུཥྤེ་གྲྀཧྞེ་ཨི་མཾ་ས་ཏྭ་མ་ཧཱ་བ་ལ༔ ཞེས་མེ་ཏོག་སྤྱི་བོར་བཞག ། དེ་ནས་མིག་དབྱེ་བར་གསོལ་བ་འདེབས་པ་འདིའི་རྗེས་ཟློས། ཧོཿ བདེ་བར་གཤེགས་པ་མིག་མཁན་རྒྱལ༔ ཧེ་རུ་ཀ་དཔལ་མཐོང་བྱའི་ཕྱིར༔ བསྐལ་པ་སྔོན་ནས་བསྒྲིབས་པ་ཡི༔ མ་རིག་ལིང་ཏོག་བསལ་དུ་གསོལ༔ གསེར་ཐུར་ཐོགས་ལ། ཡེ་ཤེས་རིག་པའི་ཐུར་མས་ལྷན་སྐྱེས་མ་རིག་པའི་སྒྲིབ་གཡོགས་མིག་དར་དང་ལྷན་ཅིག་བསལ་བར་མོས་ཤིག ། ཧོཿ དེང་ཁྱོད་ཧེ་རུ་ཀ་དཔལ་གྱིས༔ ཡེ་ཤེས་མཆོག་གི་མིག་དབྱེ་མཛད༔ རབ་རིབ་བདེ་བར་གཤེགས་པས་བསལ༔ ཡེ་ཤེས་མཆོག་ནི་མཐོང་བར་འགྱུར༔ བཛྲ་ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ རྡོ་རྗེའམ་ཕྱག་ཤིང་གིས་མཚོན་ཏེ། ཧོཿ ལྟོས་ཤིག་ལྟོས་ཤིག་རིགས་ཀྱི་བུ༔ མཐོང་ན་ཡེ་ཤེས་མྱུར་དུ་རྟོགས༔ འདི་ན་ཧེ་རུ་ཀ་དཔལ་གྱི༔ གྲོང་ཁྱེར་བླ་ན་མེད་པ་བཞུགས༔ སྐད་ཅིག་མཐོང་བ་ཙམ་གྱིས་ནི༔ བསྐལ་པ་དུ་མའི་སྒྲིབ་པ་སྦྱངས༔ [87a] དེ་ལྟར་དྲི་མེད་ཡེ་ཤེས་ཀྱི་མིག་ཐོབ་པ་ལ་བརྟེན་ནས་དཔལ་ཆེན་མངོན་རྫོགས་རྒྱལ་པོའི་དཀྱིལ་འཁོར་རྟེན་དང་བརྟེན་པར་བཅོས་པ་མངོན་སུམ་དུ་མཇལ་བར་མོས་ལ་དད་པ་དང་སྤྲོ་བ་རྒྱ་ཆེན་པོ་བསྐྱེད་མཛོད། དེའང་ཏིང་འཛིན་གྱི་དཀྱིལ་འཁོར་མཚོན་བྱེད་དཔེའི་དཀྱིལ་འཁོར་འདི་དང་དབྱེར་མེད་ཅིང་། མཚོན་བྱ་དོན་གྱི་དཀྱིལ་འཁོར་གཉུག་མ་མི་ཤིགས་པའི་ཐེག་ལེ་སྐུ་དང་ཡེ་ཤེས་ཀྱི་འཁོར་ལོ་ཡེ་ནས་རང་ཆས་ལྷུན་གྲུབ་ཏུ་བཞུགས་པ་ཉིད་ངོ་ཤེས་པར་གྱིས་ཤིག །དེ་རྣམས་ཀྱིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་པ་ལགས། ཞུགས་པའི་དཀྱིལ་འཁོར་དེར་དབང་བསྐུར་བ་དངོས་གཞི་ཞུ་བའི་སླད་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། ཧཱུྃ༔ དཔལ་ཆེན་མངོན་རྫོགས་དཀྱིལ་འཁོར་འདིར༔ གཞུག་ཅིང་སྨིན་པར་མཛད་དུ་གསོལ༔ སྨིན་ཅིང་གྲོལ་བ་མཐར་ཕྱིན་ཅིང་༔ མི་གནས་ཀློང་དུ་སྐྱེལ་བར་མཛོད༔ ལན་གསུམ། དབང་དངོས་ལ་ཕྱི་ཕན་པའི་དབང་། ནང་ནུས་པའི་དབང་། གསང་བ་ཟབ་མོའི་དབང་རྣམས་སུ་ཡོད་པ་ལས། དང་པོ་ཕྱི་ཕན་པའི་དབང་གི་སླད་དུ། ཐོག་མར་མ་རིག་པ་ལྔ་ཡེ་ཤེས་ལྔར་དག་པའི་ཆེད་དུ་རིག་པའི་དབང་ལྔ་བསྐུར་བ་ལ། ནམ་མཁའ་གང་བར་སད་ [87b] པའི་དབང་ལྷ་རྣམས་ཀྱིས་བཀྲ་ཤིས་པའི་རྣམས་པ་དུ་མ་དང་བཅས་ཏེ། བུམ་པ་རང་བྱུང་གི་གཞལ་མེད་ཁང་ཆེན་པོར་བུམ་བཅུད་ཧེ་རུ་ཀ་དཔལ་ཞུ་བའི་རང་བཞིན་ཅན་གྱི་བདུད་རྩིའི་ཆུ་རྒྱུན་གྱིས་མངོན་པར་དབང་བསྐུར་བར་མོས་ཤིག ། རྣམ་བུམ་ཐོགས་ལ། ཧཱུྃ༔ རང་བྱུང་ཡེ་ཤེས་བུམ་པ་རུ༔ ཧེ་རུ་ཀ་དཔལ་ལྷ་ཚོགས་བཞུགས༔ ཐབས་ཤེས་གཉིས་མེད་ཞུ་བའི་ཆུས༔ སྐལ་ལྡན་བུ་ལ་དབང་བསྐུར་རོ༔ ཨོཾ་ཤྲཱི་ཧེ་རུ་ཀ་ཀ་ལཱ་ཤ་ཨ་བྷི༴ ཞེས་སྤྱི་བོར་བཞག་ཅིང་བུམ་ཆུ་སྦྱིན། དཔལ་རིགས་ལྔ་ཧེ་རུ་ཀའི་རང་བཞིན་ཅན་གྱི་རིན་པོ་ཆེའི་དབུ་རྒྱན་དར་དཔྱངས་དང་ལྡན་པ་སྤྱི་བོར་བཅིངས་ཏེ་དབང་བསྐུར་བར་མོས་ཤིག །དབུ་རྒྱན་ཐོགས་ལ། ཧཱུྃཿ ཧེ་རུ་ཀ་དཔལ་དབང་གི་རྟགས༔ ཁྲག་འཐུང་ལྔ་ཡི་ཅོད་པན་དང་༔ ཐབས་དང་ཤེས་རབ་དབྱེར་མེད་པའི༔ དར་འཕྱང་དབང་བསྐུར་སྦྱིན་པར་བྱ༔ ཨོཾ་ཤྲཱི་ཧེ་རུ་ཀ་རཏྣ་མུ་ཀུ་ཊ་ཨ་བྷི༴ ཞེས་མགོ་བོར་བཞག །ཐབས་བདེ་བ་ཆེན་པོའི་རང་བཞིན་ཅན་གྱི་རྡོ་རྗེ་ཕྱག་གཡས་སུ་གཏད་དེ་དབང་བསྐུར་བར་མོས་ཤིག །རྡོ་རྗེ་ཐོགས་ལ། ཧཱུྃ༔ ཡེ་ཤེས་ལྔ་ལས་རང་བྱུང་བ༔ ཐབས་ཀྱི་རང་བཞིན་རྡོ་རྗེ་ཆེ། སངས་རྒྱས་ཀུན་གྱི་གསང་གསུམ་ལས༔ བྱུང་བའི་རྡོ་རྗེའི་དབང་བསྐུར་རོ༔ ཨོཾ་ཤྲཱི་ཧེ་རུ་ཀ་བཛྲ་ཨབྷི༴ ཞེས་ལག་གཡས་སུ་ [88a] གཏད་པ་གསོར་ཞིང་སྙིང་གར་བཟུང་དུ་བཅུག ། ཤེས་རབ་སྟོང་པ་ཉིད་ཀྱི་རང་བཞིན་དྲིལ་བུ་ཕྱག་གཡོན་དུ་གཏད་དེ་དབང་བསྐུར་བར་མོས་ཤིག །དྲིལ་བུ་ཐོགས་ལ། ཧཱུྃ༔ སངས་རྒྱས་ཀུན་གྱི་དབྱངས་ལྡན་པའི༔ ཤེས་རབ་རང་བཞིན་དྲིལ་བུ་ཆེ༔ སངས་རྒྱས་ཀུན་གྱི་ཡེ་ཤེས་ལས༔ བྱུང་བའི་དྲིལ་བུས་དབང་བསྐུར་རོ༔ ཨོཾ་ཤྲཱི་ཧེ་རུ་ཀ་གཎྜེ་ཨ་བྷི༴ ཞེས་ལག་གཡོན་དུ་གཏད་པ་དཀྲོལ་ཞིང་དཀུར་བརྟེན་དུ་བཅུག ། ནམ་མཁའ་གང་བའི་དེ་བཞིན་གཤེག་པ་རྣམས་དང་སློབ་དཔོན་ལྷན་ཅིག་པས་རྡོ་རྗེའི་མིང་གི་དབང་བསྐུར་བར་མོས་ཤིག །རྡོ་དྲིལ་བསྣོལ་མ་ཐོགས་ལ། ཧཱུྃ༔ བདེ་བར་གཤེགས་པ་ཐམས་ཅད་ཀྱི༔ སེམས་དཔར་མིང་ནི་བཏགས་པ་བཞིན༔ རྒྱལ་བའི་མིང་ནི་བླ་ན་མེད༔ ས་གསུམ་གྲགས་པར་དབང་བསྐུར་རོ༔ ཨོཾ་ཤྲཱི་ཧེ་རུ་ཀ་ཀྱེ་དཔལ་བུདྡྷ་ཧེ་རུ་ཀ་ཞེས་བྱ་བའི་ཁྲོ་བོའི་རྒྱལ་པོའོ། །ཞེས་དྲིལ་བུ་སྨིན་མཚམས་སུ་དཀྲོལ། དེ་རྣམས་ཀྱིས་ཐུན་མོང་རིག་པའི་དབང་ལྔ་ཐོབ། ཉོན་མོངས་པ་ལྔ་དག །ཡེ་ཤེས་ལྔ་རྒྱུད་ལ་སྐྱེས། ཁྲག་འཐུང་རིགས་ལྔའི་གོ་འཕང་འགྲུབ་པའི་སྐལ་པ་རྒྱུད་ལ་བཞག་པ་ཡིན་ནོ། །དེ་ནས་ནང་ནུས་པ་འཇུག་པའི་དབང་ལ་སྐུ་གསུང་ཐུགས་ཀྱི་རྗེས་སུ་གནང་བ་ལས། ཐོག་མར་སྐུའི་རྗེས་གནང་གི་སླད་དུ། དཀྱིལ་འཁོར་ [88b] པའི་ཡེ་ཤེས་ཕྱག་རྒྱ་སྐུ་ལས་སྐུ་གཉིས་པ་རེ་འཕྲོས། ཁྱེད་རང་མངོན་རྫོགས་ཧེ་རུ་ཀར་གསལ་བའི་སྤྱི་བོ་ནས་ཞུགས་ཏེ་ལུས་ལ་ཐིམ་པར་མོས་ཤིག །སྐུ་ཙཀ་རྣམས་རིམ་པར་ཐོགས་ལ། ཧཱུྃ༔ ཆོས་སྐུ་སྐྱེ་མེད་ལོངས་སྤྱོད་རྫོགས༔ དབུས་ཀྱི་ཧེ་རུ་ཀ་དཔལ་ཏེ༔ མངོན་རྫོགས་རྒྱལ་པོ་ཧེ་རུ་ཀ༔ ཡབ་ཡུམ་འཁོར་བཅས་དབང་རྫོགས་ཤོག༔ ཨོཾ་ཤྲཱི་ཧེ་རུ་ཀ་ཀཱ་ཡ་ཨ་བྷི༴ ཧཱུྃ༔ ཆོས་སྐུ་སྐྱེ་མེད༴ ཤར་གྱི་ཧེ་རུ༴ བཅོམ་ལྡན་བཛྲ༴ ཡབ་ཡུམ༴ ཨོཾ་བཛྲ༴ ཧཱུྃ༔ ཆོས་སྐུ་སྐྱེ་མེད༴ ལྷོ་ཡི་ཧེ་རུ༴ བཅོམ་ལྡན་རཏྣ༴ ཡབ་ཡུམ༴ ཨོཾ་རཏྣ༴ ཧཱུྃ༔ ཆོས་སྐུ་སྐྱེ་མེད༴ ནུབ་ཀྱི་ཧེ་རུ༴ བཅོམ་ལྡན་པདྨ༴ ཡབ་ཡུམ༴ ཨོཾ་པདྨ༴ ཧཱུྃ༔ ཆོས་སྐུ་སྐྱེ་མེད༴ བྱང་གི་ཧེ་རུ༴ བཅོམ་ལྡན་ཀརྨ༴ ཡབ་ཡུམ༴ ཨོཾ་ཀརྨ༴ ཧཱུྃ༔ ཆོས་སྐུ་སྐྱེ་མེད༴ ཤར་ལྷོའི་ཧེ་རུ༴ བཅོམ་ལྡན་གུཧྱ༴ ཡབ་ཡུམ༴ ཨོཾ་གུ་ཧྱ༴ ཧཱུྃ༔ ཆོས་སྐུ༴ ལྷོ་ནུབ༴ བཅོམ་ལྡན་ས་ནུ༴ ཡབ་ཡུམ༴ ཨོཾ་ས་ནུ༴ ཧཱུྃ༔ ཆོས་སྐུ༴ ནུབ་བྱང་༴ བཅོམ་ལྡན་ཡཀྵ༴ ཡབ་ཡུམ༴ ཨོཾ་ཡཀྵ༴ ཧཱུྃ༔ ཆོས་སྐུ༴ བྱང་ཤར༴ བཅོམ་ལྡན་རཀྴ༴ [89a] ཡབ་ཡུམ༴ ཨོཾ་རཀྴ༴ ཞེས་སྤྱི་བོར་བསྐུར། དེ་ནས་གསུང་གི་རྗེས་སུ་གནང་བའི་སླད་དུ། ཁྱེད་རང་རྣམས་དཔལ་ཆེན་པོར་གསལ་བའི་སྙིང་གར་ཉི་མའི་སྟེང་དུ་རྡོ་རྗེ་རྩེ་དགུ་པའི་ལྟེ་བར་ཧཱུྃ་མཐིང་ནག་གི་མཐར་སྔགས་ཀྱི་ཕྲེང་བས་བསྐོར་བ། སློབ་དཔོན་དཔལ་ཆེན་པོའི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་བྱུང་། ཞལ་ནས་ཐོན་ཏེ་ཁྱེད་རང་གི་ཞལ་དུ་ཞུགས། ཐུགས་ཀའི་སྔགས་ཕྲེང་ལ་ཐིམ་པས་བརྟན་གཡོའི་སྒྲ་སྐད་ཐམས་ཅད་གྲགས་སྟོང་གཞོམ་མེད་སྔགས་ཀྱི་རོལ་པར་གྲགས་པར་མོས་ལ་སྔགས་འདིའི་རྗེས་ཟློས། ཨོཾ་བཛྲ་ཀྲོ་དྷ་སོགས་བསྐྱེད་པའི་བྱང་བུ་ལྟར་སྙིང་པོ་དང་ཡང་སྙིང་བཅས་རྗེས་ཟློས་ལན་གསུམ་རེ་བྱ། དེ་ནས་ཐུགས་ཀྱི་རྗེས་སུ་གནང་བའི་སླད་དུ། སེམས་དུས་གསུམ་གྱི་སྤྲོས་པ་ཆོད་ལ་རང་བབས་གཉུག་མའི་གཤིས་ལུགས་འོད་གསལ་རྣམ་པར་མི་རྟོག་པའི་ངང་དུ་མཉམ་པར་འཇོག་མཛོད། ཅེས་དར་གཅིག་མཉམ་པར་བཞག ། དེ་ལྟར་མཉམ་པར་བཞག་པས་གདོད་ནས་རྣམ་པར་དག་པ་ཆོས་ཉིད་རང་བྱུང་གི་ཡེ་ཤེས་དཔལ་ཆེན་ཧེ་རུ་ཀའི་ཐུགས་ཀྱི་གསང་བ་རིག་སྟོང་རྗེན་པའི་ངོ་བོ་ཡེ་ནས་རང་དང་ལྷན་ཅིག་སྐྱེས་པའི་གནས་ལུགས་ཉིད་མངོན་དུ་གྱུར་པའི་ངེས་ཤེས་བསྐྱེད་མཛོད། དེ་རྣམས་ཀྱི་རྗེས་འབྲེལ་དུ་ཁམས་གསུམ་ཆོས་ [89b] ཀྱི་རྒྱལ་པོ་མངའ་གསོལ་ཞིང་ལུང་བསྟན་པའི་སྒོ་ནས་དབུགས་དབྱུང་བའི་ཕྱིར། ཁྱེད་རང་རྣམས་སེང་གེས་བཏེགས་པའི་རིན་པོ་ཆེའི་ཁྲི་ལ་གནས་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་ཕུབ་ཅིང་། རྐང་འོག་ཏུ་འཁོར་ལོ། ལག་ཏུ་རྡོ་དྲིལ་དུང་དང་གླེགས་བམ་ཕྱག་ཤིང་རྣམས་གཏད་ནས་རྡོ་རྗེ་སློབ་དཔོན་གྱི་དབང་གི་བྱེད་ལས་གཞན་དོན་འཆད་ཕྲིན་གྱི་གནང་བ་སྩལ་བར་མོས་ཤིག །ཡོ་བྱད་རྣམས་གཏད་ལ། ཧཱུྃ༔ རང་བྱུང་ལྷུན་གྲུབ་དགོངས་པ་མངོན་གྱུར་པའི༔ རྡོ་རྗེ་སློབ་དཔོན་བདག་པོའི་དབང་ཐམས་ཅད༔ དེང་འདིར་རྡོ་རྗེ་སློབ་དཔོན་འདིར་རྫོགས་ནས༔ རྒྱལ་བ་རྣམས་ཀྱི་ཤིས་པ་བརྗོད་གྱུར་ཅིག༔ ཅེས་དང་། རྟེན་འབྲེལ་སྙིང་པོ་བཟླས་པའི་མེ་ཏོག་འཐོར། སློབ་དཔོན་གྱི་ལག་གཡོན་པས་ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟར་བཟུང་། གཡས་སྐྱབས་སྦྱིན་དང་བཅས། སློབ་དཔོན་དེ་བཞིན་གཤེགས་པ་སྤྲུལ་པའི་སྐུའི་ཆ་བྱད་ཅན་དུ་བཞེངས་ཏེ་ཁྱེད་རང་རྣམས་བྱང་ཆུབ་མཆོག་ཏུ་ལུང་བསྟན་པར་མོས་ཤིག །འདིར་ནི་ཁྱེད་ལ་ངས་ལུང་བསྟན༔ མངོན་རྫོགས་རྒྱལ་པོ་ཞེས་བྱ་བ༔ སྲིད་པ་ཀུན་ལས་རྣམ་གྲོལ་བའི༔ དེ་བཞིན་གཤེགས་པ་ཉིད་ཡིན་ནོ༔ ཨོཾ་སརྦ་ཏ་ཐཱ་ག་ཏ་སྭ་བྷཱ་ཝ་བྷུརྦྷུ་ཝ་སྭཱ༔ འདི་ལྟར་ངས་ལུང་བསྟན་པའི་དབྱངས་ནི་ས་འོག་ས་སྟེང་ས་བླ་རྣམས་སུ་གྲགས་ཤིང་ཕྱོགས་བཅུའི་ [90a] དེ་བཞིན་གཤེགས་པ་རྣམས་ཀྱིས་ཀྱང་མགྲིན་གཅིག་ཏུ་ལུང་སྟོན་པ་དང་དབུགས་དབྱུང་བར་འགྱུར་བ་ཡིན་ནོ། །འདི་ཉིད་གཞུང་དུ། སློབ་མ་ཁྲིར་བཀོད་གདུགས་ཕུབ་ལ༔ མངའ་གསོལ་ཤིས་བརྗོད་ཅི་རིགས་བྱ༔ ལུང་བསྟན་བདག་པོའི་དབང་རྫོགས་བསྒོམ༔ ཞེས་པ་ཙམ་ལས་བསྐུར་ཚིག་མ་བྱུང་བས་ཕྱི་སྐོར་ཞི་བ་རྡོར་དབྱིངས་དང་རིགས་མཐུན་ལས་ཁ་བསྐང་བའོ། ། དེ་ལྟར་ཕྱི་མཚན་མའི་དཀྱིལ་འཁོར་དུ་བུམ་པའི་དབང་རྗེས་འབྲེལ་དང་བཅས་པ་ཐོབ། ལུས་རྩའི་སྒྲིབ་པ་དག་ ། སྣང་སྟོང་བསྐྱེད་པའི་རིམ་པ་མ་ཧཱ་ཡོ་ག་བསྒོམ་པ་ལ་དབང་། འབྲས་བུ་སྐུ་རྡོ་རྗེ་སྤྲུལ་པའི་སྐུ་འགྲུབ་པའི་ནུས་པ་རྒྱུད་ལ་བཞག་པ་ཡིན་ནོ། །དེ་ནས་གསང་བ་ཟབ་མོའི་དབང་གསུམ་བསྐུར་བ་ལ། ཐོག་མར་གསང་བའི་དབང་གི་སླད་དུ། སློབ་དཔོན་དཔལ་ཆེན་ཧེ་རུ་ཀ་ཡབ་ཡུམ་བདེ་ཆེན་དགྱེས་པར་རོལ་པའི་བྱང་སེམས་དཀར་དམར་གྱི་རྒྱུན་ཐོད་པའི་བདུད་རྩི་དང་རོ་གཅིག་པ་དེ་ཉིད་ཁྱེད་རང་རྣམས་ཀྱི་ལྕེ་ཐོག་ཏུ་བཞག་པར་མོས་ཤིག །ཐོད་པའི་བདུད་རྩི་ཐོགས་ལ། ཧཱུྃ༔ ཧེ་རུ་ཀ་དཔལ་མངོན་རྫོགས་རྒྱལ༔ ཡུམ་མཆོག་ཙཎྜ་ལཱི་དང་སྦྱོར༔ རྒྱལ་བའི་ཟག་མེད་བྱང་སེམས་བསྡུས༔ བདེ་སྟོང་ཟུང་འཇུག་རྟོགས་ཕྱིར་སྦྱིན༔ བོདྷི་ཙིཏྟ་ཨ་བྷི་ཥིཉྩ་ཨཱཿཞེས་བདུད་རྩི་སྦྱིན་པ་མྱང་དུ་གཅུག ། ཞེས་བདུད་ [90b] རྩི་མྱང་བས་རྩ་ཁམས་ཐམས་ཅད་བདུད་རྩིས་གང་སྟེ་བདེ་བའི་ཡེ་ཤེས་རྒྱུད་ལ་སྐྱེས་པར་མོས་ཤིག །དེས་སློབ་དཔོན་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་རླུང་གི་སྒྲིབ་པ་དག་གསལ་སྟོང་བདག་བྱིན་རླབས་ཀྱི་རིམ་པར་བསྒོམ་པ་ལ་དབང་། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་འགྲུབ་པའི་ནུས་པ་རྒྱུད་ལ་བཞག་པ་ཡིན་ནོ། །ཤེས་རབ་ཡེ་ཤེས་ཀྱི་དབང་གི་སླད་དུ། པདྨ་ཅན་གྱི་ཤེས་རབ་མ་གནམ་ཞལ་དབྱིངས་ཕྱུག་མའི་ངོ་བོར་སྤྲོས་པའི་ལག་གཡོན་ནས་བཟུང་སྟེ་ཁྱེད་རང་རྣམས་ཀྱི་ལག་གཡས་པར་གཏད་དེར་ཐར་པ་བརྟེན་པར་བསྐུལ་བར་མོས་ཤིག །རིག་མའི་ཙཀླི་ཐོགས་ལ། ཧཱུྃ༔ འདི་ནི་བདེ་ཆེན་གསང་བའི་ལམ༔ འདུ་ཤེས་གསུམ་གྱིས་རྟག་ཏུ་བསྟེན༔ བདེ་ཆེན་ཡེ་ཤེས་རྟོགས་པར་བྱེད༔ འདི་སྤངས་སངས་རྒྱས་ཐོབ་འདོད་མིན༔ རྒྱལ་བ་ཀུན་གྱི་གསང་ལམ་མཆོག༔ དེ་རིང་ཁྱོད་ལ་བསྟན་པར་བྱ༔ བུ་ཡིས་བདེ་བར་རྟག་ཏུ་རོལ༔ མ་ཧཱ་སུ་ཁ་བྷཉྫ་མོཀྵ༔ ཞེས་ལག་གཡས་སུ་གཏད། དེ་ལྟར་འདུ་ཤེས་གསུམ་ལྡན་གྱི་སྒོ་ནས་སྙོམས་པར་ཞུགས་པས་རྗེས་ཆགས་བདེ་ཆེན་གྱི་ཡེ་ཤེས་ཆེས་ཆེར་འབར་ཞིང་བྱང་སེམས་དབབ་ལྡོག་གི་སྦྱོར་བས་ལྷན་སྐྱེས་དགའ་བའི་ཡེ་ཤེས་རྒྱུད་ལ་བརྟན་པར་མོས་ཤིག །དེས་ཕྱག་རྒྱ་བྷ་གའི་དཀྱིལ་འཁོར་དུ་ཤེས་ [91a] རབ་ཡེ་ཤེས་ཀྱི་དབང་ཐོབ། ཡིད་ཐིག་ལེའི་སྒྲིབ་པ་དག །བདེ་སྟོང་ཕོ་ཉའི་ཨ་ནུ་ཡོ་ག་བསྒོམ་པ་ལ་དབང་། འབྲས་བུ་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་ནུས་པ་རྒྱུད་ལ་བཞག་པ་ཡིན་ནོ། །དབང་བཞི་པ་རིག་པ་རྩལ་གྱི་དབང་གི་སླད་དུ། གཞི་ཆོས་ཉིད་སྐྱེ་བ་མེད་པའི་དབྱིངས་ལས་རྩལ་སྣང་འགག་མེད་སྣ་ཚོགས་སུ་འཆར་བ་རྡོ་རྗེ་སེམས་དཔའི་མེ་ལོང་གི་བརྡ་འདིས་མཚོན་པར་བྱ་བ་ཡིན་ཏེ། ཤེལ་རྡོ་ཐོགས་ལ། ཧཱུྃ༔ སེམས་ནི་རང་བཞིན་འོད་གསལ་བ༔ དེ་ཉིད་མི་རྟོག་སྐྱེ་བ་མེད༔ གསལ་སྟོང་འགག་མེད་བདེ་བ་ཆེ༔ ཐམས་ཅད་དབྱེར་མི་ཕྱེད་པའོ༔ ཡང་དག་དོན་ལ་གནས་པར་གྱིས༔ དྷརྨ་དྡྷ་ཏུ་ཨ་ཨ་ཨ༔ འདི་ལྟར་སྣང་བ་ཐམས་ཅད་སྣང་དུས་ཉིད་ནས་མ་གྲུབ་ཅིང་གདོད་ནས་ཤིན་ཏུ་རྣམ་པར་དག་པའི་དབྱིངས་སྟོང་པ་ཆེན་པོ་དང་རིག་པའི་རྩལ་སྣ་ཚོགས་སུ་ཤར་བ་མན་ཤེལ་ལ་ཡུལ་རྐྱེན་གྱིས་ཁ་དོག་སྣ་ཚོགས་སུ་སྣང་ཡང་སྟོང་པ་དང་རོ་གཅིག་པ་ལྟར། དབྱིངས་རིག་གཉིས་སུ་མེད་པའི་དོན་ངོ་ཤེས་པར་གྱིས་ལ་མཉམ་པར་འཇོག་འཚལ། དེས་ཡང་གསང་རྫོགས་པ་ཆེན་པོའི་དཀྱིལ་འཁོར་དུ་དབང་བཞི་པ་ཚིག་དབང་རིན་པོ་ཆེ་ཐོབ། ཡེ་ཤེས་ཀྱི་དྲི་མ་དག །རིག་སྟོང་ཟུང་འཇུག་རྫོགས་པ་ཆེན་ [91b] པོའི་ལམ་བསྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་འགྲུབ་པའི་ནུས་པ་རྒྱུད་ལ་བཞག་པ་ཡིན་ནོ། །གཉིས་པ་མཐའ་བརྟེན་གྱི་དབང་ལ། སྒྲུབ་རྫས་ཀྱི་དབང་དང་། ཚེའི་དབང་གཉིས་ལས། དང་པོ་ནི། དེ་རྣམས་ཀྱིས་དངོས་གཞིའི་དབང་བསྐུར་བ་གྲུབ་ནས། མཐའ་རྟེན་སྒྲུབ་རྫས་ཀྱི་དབང་བསྐུར་བའི་སླད་དུ། གྲོལ་བ་བཞི་ལྡན་དམ་རྫས་ར་སྭ་ཡ་ན། ཡེ་ཤེས་ཀློང་དགུ་མཚོན་པའི་ཞུན་ཆེན་གྱི་མར་མེ། གདུག་པ་ཅན་ཚར་གཅོད་པ་ཁྲམ་ཤིང་དང་འཁོར་ལོ། འཁོར་འདས་དབང་དུ་སྡུད་པ་རྟ་མགོའི་ཕྱག་རྒྱ། ལོག་རྟོག་བདུད་དགྲ་ཐལ་བར་འབྱིན་པའི་ཕུར་བུ། སྣོད་བཅུད་ཡོངས་རྫོགས་སྲིད་པ་མདོས་ཀྱི་ཕྱག་རྒྱ། བཀྲ་ཤིས་ཚི་གཡང་རིགས་བརྒྱུད་བསོད་ནམས་སྤེལ་བ་ཞལ་ཟས་ལོངས་སྤྱོད་ཀྱི་དབང་རྣམས་རིམ་པར་བསྐུར་བར་མོས་ཤིག ། སྨན་གྱི་ཕོ་བྲང་ཐོགས་ལ། ཧཱུྃ༔ བདེ་ཆེན་ཡེ་ཤེས་བདུད་རྩི་ནི༔ ཧེ་རུ་ཀ་དཔལ་ཡབ་ཡུམ་རྣམས༔ གཉིས་མེད་སྦྱོར་བའི་དམ་ཚིག་རྫས༔ ར་སཱ་ཡ་ནས་དབང་བསྐུར་རོ༔ པཉྩ་ཨ་མྲྀ་ཏ་ཨ་བྷི་ཥིཉྩ་ཧཱུྃ༔ ཞེས་བདུད་རྩི་མྱང་དུ་གཞུག །མར་མེ་དགུ་ཐོགས་ལ། ཧཱུྃ༔ དབྱིངས་སུ་མཚོན་པའི་ཀོང་བུ་རུ༔ ཡེ་ཤེས་ཀློང་དགུའི་ཞུན་ཆེན་བལྟམས༔ ཧེ་རུ་ཀ་དགུའི་མེ་འབར་བ༔ [92a] སྣང་གསལ་མར་མེས་དབང་བསྐུར་རོ༔ བཛྲ་ཨཱ་ལོ་ཀེ་ཨ་བྷི༴ ཁྲམ་ཤིང་དང་འཁོར་ལོ་ཐོགས་ལ། ཧཱུྃ༔ བདུད་འདུལ་མཐུ་ཆེན་དམིགས་བྱ་ངན༔ བསད་པའི་ཁྲམ་དུ་འདེབས་པ་དང་༔ ཚད་མེད་སྟོང་སྲོག་འཁོར་ལོ་ཡིས༔ གདུག་པའི་ཚོགས་འཇོམས་དབང་བསྐུར་རོ༔ ཐུམ་རིལ་ཙཀྲ་ཝ་རྟི་ཨ་བྷི༴ དབང་སྡུད་རྟ་མགོ་ཐོགས་ལ། ཧཱུྃ༔ རྔམ་པ་ཧི་ཧིའི་སྒྲ་ཆེན་གྱིས༔ སྣང་སྲིད་དུས་གཅིག་དབང་བསྡུས་ནས༔ ཡེ་ཤེས་འཇིག་རྟེན་ལས་ལ་ཚུད༔ མཆོག་ཐུན་འགྲུབ་པའི་དབང་ཐོབ་ཤོག༔ ཧ་ཡ་གྲཱི་ཝ་ཨ་བྷི༴ ཕུར་བུ་ཐོགས་ལ། ཧཱུྃ༔ བདུད་འདུལ་མཐུ་ཆེན་ཀཱི་ལ་ཡ༔ འཇོམས་བྱེད་ཆེན་པོའི་དབང་བསྐུར་བས༔ གསལ་བ་གསུམ་ལྡན་སྲོག་གསུམ་གསལ༔ ལོག་རྟོག་བསྒྲལ་ཕྱིར་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཨ་བྷི་ཥཉྩ་ཧཱུྃ༔ མདོས་གཏོར་ཐོགས་ལ། ཧཱུྃཿ སྣང་སྲིད་གཡོ་འཁྲུགས་བཟློག་པའི་ཕྱིར༔ སྣང་སྲིད་མདོས་ཀྱི་རི་རབ་ལ༔ དོན་གཉིས་བཅུད་ཀྱིས་བརྒྱན་བྱས་ཏེ༔ ཡོངས་རྫོགས་མདོས་ཀྱི་དབང་བསྐུར་རོ༔ ཨོཾ་སརྦ་བ་ལིཾ་ཏ་བྷྱོ་བྷྱོ་ཟློག་ཟློག༔ ཨ་བྷི༴ ཞལ་ཟས་བཟའ་བཏུང་ཐོགས་ལ། ཧཱུྃ༔ བཀྲ་ཤིས་ཚི་ནི་ཚེ་ཡི་ལུང་༔ [92b] ཐབས་ཤེས་རྫས་མཆོག་བདེ་བའི་ལུང་༔ ཛ་གད་སྨན་མཆོག་གར་གྱི་ལུང་༔ མཱཾ་ས་རྫས་མཆོག་ནུས་པ་བསྐྱེད༔ འབྲས་བུ་རིགས་བྱེད་རིགས་རྒྱུད་ལུང་༔ ཟླ་རྒྱས་ཟླ་ཕྲོམ་བཀྲ་ཤིས་ཟས༔ མཐའ་རྫོགས་དགའ་སྟོན་དབང་བསྐུར་རོ༔ ག་ཎ་ཙཀྲ་མངྒ་ལཾ་ཨཱ་ཡུཿསིདྡྷི་བྷྲཱུྃ༔ ཞེས་བསྐུར། གཉིས་པ་ཚེའི་དབང་ནི། དེ་ནས་མཐའ་རྒྱས་འཆི་མེད་ཚེའི་དབང་བསྐུར་བ་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས། ཧོཿ བདུད་རྩི་སྨན་གྱི་ལྷ་ཚོགས་རྣམས༔ བཀྲ་ཤིས་བརྟན་པ་ཚེ་ཡི་ལུང་༔ མི་འགྱུར་མི་ཤིགས་དངོས་གྲུབ་ཆེ༔ ད་ལྟ་ཉིད་དུ་སྩལ་དུ་གསོལ༔ ལན་གསུམ། སློབ་དཔོན་མདུན་བསྐྱེད་དང་བཅས་པའི་ཐུགས་ཀ་ནས་ཚེ་འགུགས་ཀྱི་ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་སྤྲོས་པས་ཁྱེད་རང་རྣམས་ཀྱི་བླ་ཚེ་ཡར་བ་འཐོར་བ་ཉམས་ཆག་ཏུ་གྱུར་པ་རྣམས་དང་ཕྱོགས་བཅུ་བརྟན་གཡོའི་ཚེ་བཅུད་མ་ལུས་པ་བསྡུས་ནས་ཁྱེད་རང་རྣམས་དང་མདུན་གྱི་ཚེ་རྫས་ལ་ཐིམ་པར་མོས་ཤིག །མདའ་དར་གཡབ་ལ། ཧཱུྃ༔ བདུད་རྩིའི་གང་རྒྱ་སྨན་གྱི་ལུང་༔ རཏྣ་པདྨ་ཚེ་ཡི་ལུང་༔ བཛྲ་པདྨ་ཕོ་ཉར་སྤྲོ༔ འཇིག་རྟེན་གསུམ་པོ་ཐམས་ཅད་ཀྱི༔ ཚེ་དང་སྨན་གྱི་བཅུད་བསྡུས་ལ༔ གནས་འདིར་ད་ལྟ་ [93a] ཉིད་དུ་ཁུག༔ མགྱོག་མ་བཞི་དང་མཁའ་འགྲོ་བཞི༔ སྲོག་བདག་བཞི་དང་ཤུགས་འགྲོ་བཞི༔ སྲིད་གསུམ་ཚེ་ཡི་བདག་མོ་རྣམས༔ ཚེ་དང་སྨན་གྱི་བཅུད་འདིར་སྡུས༔ བཀྲ་ཤིས་བུམ་པའི་ནང་དུ་བསྐྱིལ༔ སྐལ་ལྡན་རྣམས་ལ་སྩལ་དུ་གསོལ༔ ཨོཾ་ཨ་མཱ་ར་ཎི་ཛི་བནྟི་ཡེ་གུ་རུ་ཨ་པ་རི་མི་ཏ་ཨཱ་ཡུརྫྙཱ་ན་པུཎྱེ་མ་ཧཱ་པུཎྱེ་བྷྲཱུྃ་བྷྲཱུྃ་བྷྲཱུྃ༔ བུམ་པའི་ནང་དུ་ཚེ་བཅུད་རྣམས༔ ངོ་བོ་ཡེ་ཤེས་བདུད་རྩི་ལ༔ རྣམ་པ་མངོན་རྫོགས་རྒྱལ་པོ་དམར༔ ཞལ་གཅིག་ཕྱག་གཉིས་ཡུམ་དང་འཁྲིལ༔ གཉིས་ཀའི་ཕྱག་གཉིས་ཚེ་བུམ་འཛིན༔ དེ་ཉིད་རྡོ་རྗེས་ཁ་བཀབ་བསམ༔ སྤྱི་བོར་རྡོར་སེམས་ཚེ་དཔག་མེད༔ ཐུགས་ཀར་རྩ་བའི་ཚེ་ལྷ་བསྒོམ༔ འཁོར་དུ་ལྷ་མོ་བཅུ་དྲུག་བསམ༔ སྐུ་ལས་བདུད་རྩི་ཆེར་བབས་པས༔ སྤྱི་བོའི་གཙུག་ནས་སྙིང་དབུས་ཞུགས༔ ལུས་གང་དུས་མིན་འཆི་བ་སྦྱངས༔ ཚེ་ཡི་རིག་འཛིན་ཐོབ་པར་གྱུར༔ བུམ་པ་ཐོགས་ལ། ཧཱུྃ༔ བཀྲ་ཤིས་བུམ་པ་ཚེ་ཡི་ལུང་༔ དངོས་གྲུབ་རྒྱ་མཚོའི་སྲོག་དང་ལྡན༔ ནམ་མཁའ་གང་བ་ཚེ་ཡི་མཆོག༔ ཡེ་ཤེས་སྣང་བ་ལམ་མེ་བ༔ བདེ་བ་ཆེན་པོ་བདུད་རྩི་ལུང་༔ ད་ལྟ་ཉིད་དུ་སྩལ་དུ་གསོལ༔ [93a] དུས་མིན་འཆི་བ་སྦྱོང་བ་དང་༔ ལོ་བརྒྱ་ཐུབ་པའི་ཚེ་ཐོབ་ཤོག༔ ཨོཾ་ཨཱ་ཡུརྫྙཱ་ན་ཚེ་བྷྲཱུྃཿ ཨ་བྷི་ཥིཉྩ་ཧཱུྃ༔ ཞེས་བུམ་པ་སྤྱི་བོར་བཞག་ཅིང་བུམ་ཆུ་སྦྱིན། འཆི་མེད་ཚེ་ཡི་བདུད་རྩི་དང་བརྟན་གཡོའི་དྭངས་བཅུད་འདུས་པའི་རིལ་བུ་གསོལ་བས་འཆི་མེད་རྟག་པ་དམ་པའི་དངོས་གྲུབ་ལ་དབང་འབྱོར་བར་མོས་ཤིག །ཚེ་རིལ་ཆང་སྦྱིན་ལ། ཧཱུྃཿ ཚེ་ཡི་དངོས་གྲུབ་བརྒྱུད་གསུམ་པོ༔ རྩ་སྲོག་ཙིཏྟའི་ཐིག་ལེར་བསྟེམ༔ མི་ཕྱེད་སྐུ་གསུང་ཐུགས་རྡོ་རྗེའི༔ དབང་དང་བྱིན་རླབས་དངོས་གྲུབ་སྩོལ༔ ཀཱ་ཡ་ཝཱ་ཀ་ཙིཏྟ་ཨཱ་ཡུརྫྙཱ་ན་སིདྡྷི་ཧཱུྃ་བྷྲཱུྃ༔ ཞེས་ཚེ་སྔགས་བཟླ། ཚེ་བཅུད་དྭངས་མ་ཐམས་ཅད་སྙིང་གའི་ཉི་ཟླའི་གྭའུའི་ནང་གི་ཚེ་རྟེན་ལ་ཐིམ་པས་འཆི་མེད་རྟག་པ་དམ་པའི་སྐུ་ཐོབ་པར་མོས་ཤིག །ཚེ་མདའ་སྤྱི་བོར་རྒྱ་གྲམ་དུ་བཞག་ལ། ཧཱུྃ༔ ཚེ་བཅུད་སྙིང་དབུས་རྟེན་ལ་ཐིམ༔ རིག་འཛིན་ཚེ་ཡི་དངོས་གྲུབ་ཐོབ༔ ཡེ་ཤེས་རྡོ་རྗེའི་ཕྱག་རྒྱ་ཡིས༔ རྟག་པ་དམ་པར་རྒྱས་གདབ་བོ༔ ཛྙཱ་ན་བཛྲ་རཀྵ་རཀྵ་ཧཱུྃ༔ ཞེས་རྒྱས་གདབ། ཚེ་དབང་འདི་ཉིད་སྡེ་གསུམ་དབང་བསྐུར་ཡོངས་རྫོགས་གྲུབ་པའི་རྗེས་ཀྱི་མཐའ་དགེར་མཛད་པའི་ཕྱག་བཞེས་ལྟར་བྱེད་པར་སྤྲོ་ན་སྐབས་འདིར་ཚེ་རྫས་བཤམས་བསྒྲུབ་དོར་སྟེ། རྗེས་སུ་མངོན་རྫོགས་དཀྱིལ་འཁོར་ལ་ཚེ་རྫས་རྐྱང་པ་བཤམ་བསྒྲུབ་བྱ་བ་དང་། ཚེ་དབང་སྐབས་ལོ་རྒྱུས་ [94a] མདོར་བསྡུས་ཀྱི་མཚམས་སྦྱར་ལ་མཎྜལ་ཕུལ་མཐར་གསོལ་གདབ་མན་གོང་སྨོས་ལྟར་བགྱིས་བས་འགྲུབ་བོ། ། དེ་ལྟར་དབང་རྣམས་ཡོངས་སུ་རྫོགས་པར་ཐོབ་པ་ལ། སློབ་དཔོན་དང་དཀྱིལ་འཁོར་པའི་ལྷ་ཚོགས་རྣམས་ཀྱིས་ཤིས་པ་བརྗོད་པའི་དབྱངས་སྙན་སྒྲོགས་ཤིང་མེ་ཏོག་གི་ཆར་སིལ་མར་བསྙིལ་བས་དབང་དོན་གྱི་ཡེ་ཤེས་བརྟན་པར་བྱས་པའི་མོས་པ་མཛོད། ཅེས་བརྡ་སྦྱར་ལ་ཤིས་བརྗོད་ཇི་ལྟར་འོས་པ་བྱ། དེ་ལྟར་ན་ཇི་སྐད་དུ་གཞུང་ལས། རྩ་བ་དགུ་བསྒྲིལ་འདི་ཉིད་ནི༔ བདག་པོའི་དབང་ཕན་མ་ཧཱ་དང་༔ གསང་དབང་ཤེར་དབང་ཨ་ནུ་སྟེ༔ རིག་རྩལ་ཨ་ཏི་རྫོགས་པ་ཆེ༔ སྤྱིར་ནི་ཐེག་རིམ་དབང་བསྐུར་བ༔ ཐེག་པ་དངོས་ཀྱི་འཇུག་སྒོ་ཡིན༔ སྔོན་འགྲོ་ཐེག་རིམ་གཏན་འབེབས་ཏེ༔ ལུང་མདོ་ཨ་ནུའི་ཁྱད་པར་གྱི༔ བྱེ་བྲག་འདི་ནི་བསྡུས་དོན་ཡིན༔ རྒྱས་པར་དཔེ་རྒྱུད་ཕྱོགས་སུ་ལྟོས༔ ཞེས་གསུངས་པ་ལྟར་ནང་སྐོར་ཀློང་སྡེ་ཨ་ནུ་མདོ་ལུང་ཆེན་པོ་དང་བསྡེབས་པར་མཛད་པ་མངོན་རྫོགས་ཧེ་རུ་ཀའི་དཀྱིལ་འཁོར་དུ་འཇུག་སྒོ་ཐེག་པ་རིམ་འཇུག་དབང་གིས་ཐོག་དྲངས་ཏེ་རྩ་བ་དང་ཡན་ལག་གི་དབང་རྣམས་ཡོངས་རྫོགས་མཐའ་རྒྱས་སུ་ལེགས་པར་གྲུབ་པ་ལགས་པས། དབང་དུས་སུ་ཞལ་གྱིས་བཞེས་པའི་དམ་ཚིག་མཐའ་དག་ [94b] ཚུལ་བཞིན་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་དམ་ཚིག་ཁས་བླངས་དང་། གཏང་རག་མཎྜལ། ལུས་ལོངས་སྤྱོད་འབུལ་བ། དགེ་བསྔོ་བཅས་གྲུབ་ནས་སློབ་མ་རྣམས་རང་གནས་སུ་བཏང་། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ། གཏོར་སྐྱོང་དང་། དཀྱིལ་འཁོར་གྱི་རྗེས་ཆོག་རྣམས་ཁྲོ་བོའི་བྱང་བུ་ཁྲིགས་སྡེབས་ལྟར་བྱས་པས་གྲུབ་བོ། །མཁའ་ཁྱབ་ཡེ༵་ཤེ༵ས་ཕྱག་རྒྱ་ཡིས། །ཅིར་སྣང་བདེ་ཆེན་རྡོ༵་རྗེ༵ར་སྡོམ། །དཀྱིལ་འཁོར་གཅིག་ཉིད་ལ་ཞུགས་པས། །ཐེག་ཀུན་དབང་རྫོགས་ངོ་མཚར་རྨད། །ནང་སྐོར་ཀློང་སྡེའི་ཡི་དམ་ཁྲོ་བོ་མངོན་རྫོགས་རྒྱལ་པོའི་དབང་གི་ལེའུ་ཚན་ནོ།། །།


[95a] སྭ་སྟི། ཆོས་རྣམས་མ་ལུས་འབྱུང་པའི་གནས། །ཆོས་ཉིད་བཟང་མོའི་མཁའ་ཀློང་ཆེར། །རོ་མཉམ་རྟོགས་པས་འདིར་བཏུད་ནས། །ཁྲིད་ཚུལ་བྱིན་རླབས་སྒོ་འཕར་དབྱེ། །རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་ཁྲིད་ཀྱི་བྱིན་རླབས་ཟབ་མོ་བསྒྲུབ་པ་ལ། སྦྱོར་བ་ནི། ཕྱི་ནང་གསང་བའི་མཆོད་ཚོགས་རྣམས་ཚོགས་པར་བྱ། ཨོག་མཁར། སྒོམ་ཐག །དམིགས་ཤིང་གསུམ་ཙམ་ལས་སྤྲོས་མེད་ཀྱི་བྱིན་རླབས་ཡིན་པས་གཞན་དབང་རྫས་དང་། དབང་སྒྲུབ་ལོགས་སུ་མི་དགོས་ཤིང་། སློབ་དཔོན་ལྟ་དགོངས་དང་ལྡན་པས་ཀུན་བཟང་དོན་གྱི་ཕྲིན་ལས་ནི། ཨ༔ ཆོས་རྣམས་ཡེ་ནས་སངས་རྒྱས་རང་བཞིན་ལ༔ བསྐྱེད་པའི་རིམ་པ་དམིགས་སུ་མ་མཆིས་སོ༔ རང་རྩལ་རྫོགས་པའི་རྣམ་སྣང་བེེ་རོ་རྗེ༔ འོད་གསལ་ཐིག་ལེ་རང་ཤར་ཀློང་དུ་བསྐྱེད༔ འཁྲུལ་མ་མྱོང་བའི་ཀ་དག་ཆོས་སྐུ་ལ༔ སྤྱན་འདྲེན་གཤེགས་སུ་གསོལ་བ་ག་ལ་ཡོད༔ ལྷུན་གྱིས་གྲུབ་ཅིང་འདུ་འབྲལ་མེད་པའི་ལྷ༔ སྟོང་གསལ་འདུས་མ་བྱས་པར་གཤེགས་སུ་གསོལ༔ སྐུ་དང་ཡེ་ཤེས་འདུ་འབྲལ་མེད་པ་ལ༔ དབང་བསྐུར་རྒྱས་གདབ་བཞུགས་སུ་གསོལ་བྱ་ཅི༔ འོད་གསལ་སྤྲོས་བྲལ་རིག་པ་ཟང་ཐལ་ངང་༔ ཡེ་ནས་མ་བཅོས་རང་དབང་བཞུགས་གསོལ་རྫོགས༔ [95b] ཆོས་རྣམས་དབྱིངས་རིག་སྐུ་དང་ཞིང་ཁམས་ལ༔ མཆོད་པའི་ལོངས་སྤྱོད་སྤྲོ་རུ་མ་མཆིས་ཕྱིར༔ དག་པའི་སྣང་བ་འབྱམས་ཀླས་ཡེ་ཤེས་སྤྲིན༔ གཉིས་མེད་མཉམ་པའི་ངང་དུ་འབུལ་བར་བགྱི༔ སྟོང་གསལ་ཉིད་ལས་གཡོ་བ་མ་མཆིས་པའི༔ ཡོན་ཏན་ལྷུན་གྲུབ་ནང་དབྱིངས་ཆེན་པོའི་ངང་༔ ངོ་བོར་རང་བཞིན་མ་འདྲེས་སོ་སོར་གསལ༔ གཉིས་སུ་མེད་པའི་ཚུལ་གྱིས་ཕྱག་འཚལ་ལོ༔ གདོད་མའི་གནས་ལུགས་ཤེལ་ལྟར་དྭངས་པ་ལ༔ ལྷུན་གྲུབ་སྣང་བ་འཇའ་ལྟར་ཀུན་ཏུ་ཤར༔ གཉིས་མེད་ཟུང་འཇུག་རིག་པའི་རྩལ་དབང་ཆེ༔ འབྲས་བུ་གཞི་རུ་སྨིན་པར་དབང་བསྐུར་རོ༔ བླ་ན་མེད་པའི་སྣང་བ་མཐར་ཕྱིན་ཕྱིར༔ རེ་དགོས་མེད་པར་སྒོམ་པར་ཀློང་ཆུབ་པ༔ ལྟ་བའི་རྒྱལ་པོ་གནམ་འཕང་གཅོད་པ་བཞིན༔ ཁྱུང་ཆེན་རྩལ་རྫོགས་ངང་དུ་ངོ་སྤྲོད་དོ༔ གཟུང་འཛིན་བློ་ཟད་འཁོར་འདས་ཁྱབ་གདལ་ངང་༔ དགོངས་ཀློང་གཅིག་འདྲེས་ཡེ་ཤེས་མཐར་ཕྱིན་ཤོག༔ ཅེས་དགོངས་པ་མི་གཡོ་བའི་ངང་ལ་བཞག །དངོས་གཞི་ཁྲིད་ཀྱི་བྱིན་རླབས་ནི། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམ། སེམས་བསྐྱེད་གསལ་གདབ་ལ་མཚམས་སྦྱོར་གྱི་ཁྱད་པར། དེ་ལ་འདིར་དཔལ་ཀུན་ཏུ་བཟང་པོའི་ཐུགས་བཅུད། གྲུབ་པའི་སློབ་ [96a] དཔོན་ཆེན་པོ་པདྨ་འབྱུང་གནས་དང་། ལོ་ཆེན་བེེ་རོ་ཙ་ནའི་མན་ངག །བོད་ཡུལ་ས་འོག་ཀུན་གྱི་གཏེར་གཅིག་དམ་ཆོས་རྫོགས་པ་ཆེན་པོ་སྡེ་གསུམ་གྱི་ནང་ཚན་ནང་སྐོར་ཀློང་སྡེའི་ཁྲིད་ཀྱི་བྱིན་རླབས་ཟབ་མོ་བགྱི་བ་ལ། ཐོག་མར་ཞུ་བའི་ཡོན་དུ་མཎྜལ་ཞིག་འབུལ་མཛོད། ཅེས་མཎྜལ་འབུལ་དུ་གཞུག ། བླ་མ་ཉིད་སློབ་དཔོན་བེེ་རོའི་སྐུ་འདི་ལྟར་དུ་གསལ་ཐོབ་མཛོད། རྒྱལ་ཀུན་ངོ་བོ་བླ་མ་ནི༔ ལོ་ཆེན་བེེ་རོ་དཀར་གསལ་འཛུམ༔ པཎ་ཞྭ་ཆོས་གོས་སྨུག་བེར་གསོལ༔ རྡོ་རྗེ་སྐྱིལ་ཀྲུང་པད་ཟླར་བཞུགས༔ མཉམ་གཞག་ཐོད་པ་བཅུད་བཀང་བསྣམས༔ འོད་དང་འོད་ཟེར་འབར་བ་ཡི༔ ནམ་མཁར་དུས་གསུམ་སངས་རྒྱས་དང་༔ རྫོགས་པ་ཆེན་པོའི་རིག་འཛིན་རྣམས༔ བར་དུ་རིག་འཛིན་མཁའ་འགྲོའི་ཚོགས༔ མ་ལུས་ཀུན་གྱིས་མགྲིན་གཅིག་ཏུ༔ སྙན་བརྒྱུད་གདམས་པ་གསུངས་པར་བསྒོམ༔ སློབ་དཔོན་གྱི་ཕྱག་སློབ་མའི་སྤྱི་གཙུག་ཏུ་བཞག་ལ། ཨ་ཧ་ཡི་ ཧོཿ ཨ་ནི་སྐྱེ་མེད་གསལ་བའོ༔ ཧ་ནི་མ་བཅོས་ཐད་ཀར་འཇོག༔ ཡ་ནི་བདེ་བ་ཆེན་པོ་ལ༔ ཧོ་ནི་དབྱེ་བ་མེད་པའོ༔ ཨ་ཧ་ཡི་ ཧོཿ ཧོཿ ལྟ་སྟངས་གཡོ་བ་མེད་པས་མདུན་གྱི་ནམ་མཁའི་དབྱིངས་ལ་ [96b] ལྟོས་ཤིག༔ སེམས་དང་ནམ་མཁའ་གཉིས་སུ་མེད༔ ནམ་མཁར་དངོས་པོ་ཡོད་མེད་བརྟག༔ སེམས་ལ་གཏད་སོ་ཡོད་མེད་བརྟག༔ དེ་གཉིས་གཉིས་མེད་དམིགས་པ་མེད༔ འོན་ཀྱང་ངོ་བོ་གསལ་བའོ༔ སྒོམ་ཤིང་ཨོག་མཁར་བཙུག་ལ། ལུས་བསྲང་དབང་པོ་ཐད་ཀར་བཞག༔ ལུས་དང་སེམས་གཉིས་ཐ་དད་དམ༔ ལུས་ཀྱི་དབང་པོ་གང་ནས་བྱུང་༔ སེམས་ཀྱི་ཡུལ་ལ་གང་ནས་ཁྲིད༔ དེ་གཉིས་དབྱེར་མེད་ཇི་ལྟ་བུ༔ སེམས་ནི་དམིགས་པ་མེད་པ་སྟེ༔ གང་ཡང་གནས་པ་མ་ཡིན་ནོ༔ མི་རྟོག་པ་སྟེ་ངོ་མཚར་ཆེ༔ སྒོམ་ཐག་ལུས་ལ་བསྐོན་ཏེ། འོག་རླུང་ཡིད་ཙམ་འཐེན་བྱས་ལ༔ བདེ་བ་ཆེན་པོའི་རང་བཞིན་ལས༔ སེམས་འདི་འདས་པར་མ་གྱུར་ཏེ༔ འོན་ཀྱང་དམིགས་སུ་མེད་པས་ན༔ བདེ་བ་དེ་ལ་འཛིན་པ་བྲལ༔ རང་བྱུང་བདེ་ཆེན་ངོ་མཚར་ཆེ༔ དམིགས་ཤིང་མདུན་དུ་བཞག་ལ། ལྕེ་ནི་གང་དུའང་མ་རེག་བྱ༔ ཕྱི་ནང་འཁོར་འདས་ཆོས་ཐམས་ཅད༔ གསལ་ལ་དམིགས་མེད་བདེ་བ་ཆེ༔ དབྱེར་མེད་དམིགས་ཤིང་མདུན་དུ་བཞག༔ འདི་གསུམ་དབྱེར་མེད་ངོ་བོ་ཉིད༔ འཁོར་འདས་ཐམས་ཅད་ཀློང་དུ་ཆུབ༔ མན་ངག་ཀློང་ཆུབ་གདམས་ངག་བསྒོམ༔ འདིར་ཟིན་བྲིས་སུ་རིག་འཛིན་བྱིན་རླབས་ལྟར་ནང་སྐོར་གྱི་གླུ་ [97a] རྣམས་ལེན་པར་གསུངས་ཀྱང་གཏེར་གཞུང་དུ་མི་གསལ་བས་མ་གྲུབ་ནའང་ཆད་སྐྱོན་མེད་པར་སེམས། དེས་ནང་སྐོར་ཁྲིད་ཀྱི་བྱིན་རླབས་ལེགས་པར་གྲུབ་པ་ལགས། དེ་ལྟར་ཐོབ་པའི་གཏང་རག་དང་། སླར་ཡང་གྲོལ་བྱེད་ཁྲིད་ཀྱི་རིམ་པ་དངོས་གཞི་ཞུ་བའི་ཡོན་དུ་མཎྜལ་ཕུལ་མཛོད། དེ་ལ་འདིར་དམ་ཆོས་རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེའི་ཉི་མ་ཀློང་ཆུབ་དགོངས་པ་འོད་གསལ་གྱི་ཟབ་ཁྲིད་དངོས་གཞི་འཆད་པ་ནི་རྩ་བ་རྡོ་རྗེའི་གསུང་འདི་ལ་མ་ཡེངས་རྩེ་གཅིག་པས་གསན་པར་ཞུ། ན་མོ་གུ་རུ༔ ནང་སྐོར་ཁྲིད་ཀྱི་དངོས་གཞི་ལ༔ གཞི་དང་ལམ་དང་འབྲས་བུའོ༔ གཞི་ནི་ཀུན་གཞི་ངོ་བོ་སྟེ༔ རིག་ན་བདེ་བར་གཤེགས་པའི་སྐུ༔ མ་རིག་མ་དག་ཀུན་གྱི་གཞི༔ རང་བཞིན་འོད་གསལ་རང་བྱུང་སྟེ༔ རིག་ན་ཡེ་ཤེས་ཆ་ཡིན་ལ༔ མ་རིག་རྣམ་ཤེས་ཞེས་བྱའོ༔ ཐུགས་རྗེ་ཅིར་ཡང་སྣང་བ་ལ༔ དེ་ཡང་རྣམ་ཤེས་དེ་ཉིད་ལས༔ དབང་པོས་མཚམས་སྦྱར་ཕྱི་ཡི་ཡུལ༔ ཡུལ་དབང་ཤེས་གསུམ་དེ་ཉིད་ལས། སྣ་ཚོགས་ཅིར་ཡང་སྣང་བའོ༔ རིག་ན་ཐུགས་རྗེ་སྤྲུལ་སྐུ་སྟེ༔ མ་རིག་འཁོར་བ་འཁྲུལ་འབྱམས་སོ༔ དེ་ཉིད་ཉམས་སུ་ལེན་པའི་ཚུལ༔ དང་པོ་འགྱུ་བྱེད་ཤེས་པར་བྱ༔ འགྱུ་བ་ཏོལ་རྩེར་ཤར་བ་ན༔ [97b] འགྱུ་བྱེད་དེ་ཉིད་ཤེས་པར་བྱ༔ འགྱུ་བྱེད་ཤེས་ན་དུག་ལྔ་དག༔ འགྱུ་བ་དེ་ཡི་རྗེས་བཅད་པས ༔ ཅིར་ཡང་དམིགས་པ་མེད་པ་སྟེ༔ དངོས་མེད་ཟང་ཐལ་ཅིར་ཡང་སྣང་༔ དངོས་ཀྱི་རིག་པ་ཟང་ཐལ་ཏེ༔ དངོས་མེད་ཉིད་དུ་ཤར་བ་གང་༔ རང་བཞིན་འོད་གསལ་ཉིད་དུའོ༔ སངས་པ་སྣང་བ་ཡུལ་ངོ་མེད༔ མ་འདྲེས་ཡོངས་གསལ་ངོ་མཚར་ཆེ༔ གྲོལ་བ་ཟང་ཐལ་ཡུལ་མེད་དུ༔ གྲོལ་བས་བློ་འདས་བྱ་རྩོལ་བྲལ༔ དེ་ཉིད་སྐྱོང་ཚུལ་བརྡ་བཞི་སྟེ༔ དབང་པོ་ཧད་དེ་རང་སར་བཞག༔ ཡུལ་སྣང་དབྱེར་མེད་ས་ལེར་གསལ༔ ལུས་བསྲང་ཅོག་བཞག་གང་བདེ་ལ༔ ཕྱི་ནང་འགྲོ་འོང་མི་རྟོག་པ༔ པུས་འཁྱུད་འོག་རླུང་སོར་ཕྱེད་འཐེན༔ ཆོས་རྣམས་བདེ་བ་ཆེན་པོར་བལྟ༔ ལྕེ་ནི་ཡ་རྐན་ལ་ཕྱོགས་པས༔ གང་དུ་མ་རེག་རླུང་རང་སར༔ ཕྱི་ནང་ཆོས་ཀུན་ལྟ་སྒོམ་རྣམས༔ ཡེ་ནས་དབྱེ་བ་མེད་པར་མཐོང་༔ མ་ནོར་མ་བཅོས་བསམ་ལས་འདས༔ བརྗོད་པ་མེད་པའི་ཚུལ་འདི་ནི༔ གཞི་ཉིད་འཁྲུལ་མ་མྱོང་བ་ཡི༔ བྱ་རྩལ་བློས་བྱས་རྟོག་པ་སྤངས༔ བསམ་པའི་རང་འོད་བྲལ་བར་སྤྱོད༔ བརྗོད་དུ་མེད་པའི་འབྲས་བུ་ཐོབ༔ མ་བཅོས་ཡིན་མིན་བྲལ་བ་ཡི༔ སྤང་བླང་རྩིས་གདབ་བྲལ་བར་བསྐྱང་༔ [98a] གསལ་བའི་ཆ་ཡིས་ཆོས་ཐམས་ཅད༔ མི་རྟོག་ངང་དུ་ཆོས་ཀྱི་སྐུ༔ བདེ་བ་ཆེན་པོ་ལོངས་སྤྱོད་རྫོགས༔ དབྱེར་མེད་སྤྲུལ་སྐུ་ཅིར་ཡང་སྟོན༔ ལམ་རྟགས་ཡོན་ཏན་ཁྱད་པར་འཕགས༔ ནང་སྐོར་ཁྲིད་ཀྱི་དངོས་གཞི་རྫོགས༔ ས་མ་ཡ་རྒྱ་རྒྱ་རྒྱ༔ ནང་སྐོར་ཁྲིད་ཀྱི་རྗེས་འབྲེལ་ནི༔ ཀུན་རྫོབ་ཆོད་རྣམས་མ་ལུས་པ༔ དོན་དམ་ཉིད་ལ་མི་གཏོགས་སོ༔ ཡེ་ནས་གང་ནས་བྱུང་ཞེ་ན༔ མཚན་མ་ཙམ་དུ་ངེས་པས་ན༔ མཚན་མའི་རང་བཞིན་ཟུར་དུ་ཆད༔ ཀུན་རྫོབ་དོན་གྱི་ཕྱོགས་མི་རྟོགས༔ དོན་དམ་བློ་ཡི་ཡུལ་འདས་པས༔ ཀུན་རྫོབ་ཕྱོགས་སུ་ཅི་ལ་སྟོང་༔ གཞན་ཞིག་དག་ནས་བྱུང་ངམ་ཞེས༔ དོན་དམ་འཁྲུལ་མ་མྱོང་བ་ཡི༔ ཀུན་རྫོབ་བདེན་མེད་རང་བཞིན་ལ༔ དོན་དམ་བདེན་པའི་རང་བཞིན་ཡིན༔ བདེན་འཛིན་གཉིས་ཀྱི་ཤན་འབྱེད་ཡོད༔ ཟླ་བ་ལ་ནི་དངོས་པོ་སྲིད༔ ཆུ་ཟླ་ལ་ནི་དངོས་པོ་མེད༔ འཆར་ཚུལ་འབྲེལ་བ་ལྟོས་ཆོས་ཙམ༔ དེ་བས་ཀུན་རྫོབ་དོན་དམ་གཉིས༔ སོ་སོ་ཉིད་དུ་ཤན་འབྱེད་བྱ༔ དེ་ཕྱིར་སེམས་ནི་རྫུན་དུ་ཐལ༔ རིག་པ་བདེན་པའི་དབྱིངས་སུ་ངེས༔ སེམས་དང་རིག་པ་གཅིག་མི་གཅིག༔ རིག་པ་རིག་པའི་དབྱིངས་སུ་རྫོགས༔ [98b] སེམས་ནི་འཁྲུལ་ངོར་གཉིས་སུ་འཛིན༔ འཁྲུལ་དང་མ་འཁྲུལ་ཁྱད་ཡོད་དམ༔ ཡོད་ན་འཁྲུལ་པ་གང་ནས་བྱུང་༔ མེད་ན་དབྱེ་བ་གང་གིས་འབྱེད༔ སེམས་དང་རིག་པ་ཁྱད་ཆེ་སྟེ༔ རིག་དང་མ་རིག་ངོ་བོས་སྟོང་༔ ལྟོས་ཆོས་ཙམ་དུ་གཅིག་ན་ཡང་༔ འཕྲོ་གཞི་ཞེས་བའི་དབྱིངས་གཅིག་ཀྱང་༔ འོད་དང་མུན་པ་ག་ལ་གཅིག༔ འོད་ཀྱི་ཚེ་ན་མུན་པ་ཅི༔ མུན་པའི་ཚེ་ན་འོད་གང་ཐལ༔ དེ་གཉིས་རྣམ་པའི་ཚུལ་དུ་དབྱེ༔ རིག་པ་ནམ་མཁའི་དཀྱིལ་ལྟར་དྭངས༔ སེམས་ནི་ཁུ་རླངས་ལྟ་བུའོ༔ དེ་བས་ནམ་མཁའ་ཁུ་རླངས་གཉིས༔ དབྱེ་བ་ཡོད་པ་སུས་ཀྱང་ངེས༔ དེ་ཕྱིར་སེམས་རིག་སོ་སོར་དབྱེ༔ རིག་པ་ཀུན་གཞི་དྭངས་གསལ་ལ༔ སེམས་ནི་མ་རིག་དབྱིངས་སུ་འཐུམ༔ མ་ཡེངས་ཚེ་ན་རིག་པ་ཡིན༔ ཡེངས་པ་དག་ནི་སེམས་ཡིན་ནོ༔ དེ་བས་ཤིན་ཏུ་ཤན་འབྱེད་གཅེས༔ ད་ནི་རྗེས་མེད་ལ་བཟླ་སྟེ༔ ཀུན་རྫོབ་དོན་དམ་གཉིས་པོ་ནི༔ དོན་དམ་བདེན་པ་མཐོང་བའི་ཕྱིར༔ ཀུན་རྫོབ་འཁྲུལ་པའི་ལས་སྒྲིབ་རྣམས༔ ཀུན་རྫོབ་བྱ་བའི་ཆོས་ཀྱིས་བཀྲུ༔ ནོར་བུ་འདམ་གྱིས་གོས་པ་དག༔ འདམ་ནི་ཆུ་ཡིས་སྦྱང་བཞིན་ནོ༔ དོན་དམ་ཀུན་རྫོབ་བློའི་སྒྲིབ་པ༔ ཀུན་རྫོབ་མཚན་ཉིད་དུ་ [99a] མས་བརྟག༔ དོན་དུ་ཀུན་རྫོབ་ཐམས་ཅད་ཀྱང་༔ དོན་དམ་དབྱིངས་ལས་གཞན་མེད་ཅིང་༔ དེ་བས་སེམས་དང་རིག་པ་གཉིས༔ ཏིལ་དང་ཁུ་བ་ཇི་བཞིན་ནོ༔ རིག་དང་མ་རིག་ཁྱད་པར་ཅེས༔ རྣམ་པའི་ཆ་ལ་སོ་སོ་ཙམ༔ ངོ་བོའི་ཆ་ལ་དབྱེ་བ་མེད༔ རིག་ན་སེམས་དེ་རིག་པར་འདུ༔ རིག་པ་ཡེ་ཤེས་གཅིག་པུའོ༔ ཡེ་ཤེས་ཟང་ཐལ་གྱི་དགོངས་པ་ཤན་འབྱེད་ཅིང་ལ་བཟླའོ༔ ནང་སྐོར་ཁྲིད་ཀྱི་རྗེས་འབྲེལ་རྫོགས་སོ༔ ས་མ་ཡ་རྒྱ་རྒྱ༔ ཞེས་གསུངས་པ་རྣམས་ཀྱི་ཚིག་དོན་ཐུགས་ལ་བཅག་སྟེ་སྒོམ་མེད་ཡེངས་མེད་ཀློང་ཆེན་ནམ་མཁའི་རྣལ་འབྱོར་གྱི་ཏིང་ངེ་འཛིན་ཆུ་བོའི་རྒྱུན་ལྟ་བུར་བསྐྱངས་ནས་ཆོས་ཟད་བློ་འདས་ཀྱི་ས་ལ་གཏན་གྱི་སྲིད་འཛིན་པར་མཛོད་ཅིག །རྗེས་ཀྱི་རིམ་པ་ནི། དེ་རྣམས་ཀྱིས་ནང་སྐོར་ཀློང་སྡེའི་ཁྲིད་ཀྱི་བྱིན་རླབས་གདམས་ཁྲིད་དངོས་དང་བཅས་པ་ལེགས་པར་གྲུབ་པ་ལགས་པས་གསང་སྔགས་འདའ་དཀའི་སྡོམ་པ་སྤྱི་དང་ཁྱད་པར་རང་བཞིན་ལྟ་བུའི་དམ་ཚིག་ཡེ་སྲུང་ལྷུན་གྲུབ་ཆེན་པོའི་རྒྱ་ལས་ནམ་ཡང་མི་འདའ་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་དབང་གི་རྗེས་རིམ་སྤྱི་ལྟར་མཐར་དབྱུང་ཞིང་། སློབ་དཔོན་རང་ཉིད་དམིགས་མེད་ཁྱབ་བརྡལ་ཆེན་པོར་མཉམ་པར་བཞག་པས་གྲུབ་བོ། །ཡེ༵་ཤེ༵ས་ཟང་ཐལ་དགོངས་པའི་ [99b] བྱིན། །མངོན་སུམ་ཅར་ཕོག་དབབ་ལས་འདིར། །འཁྲུལ་སྣང་རྫུན་ཕུག་རང་རྡིབ་ནས། །རྡོ༵་རྗེ༵འི་ས་མཆོག་ནོན་དེ་མཚར། །ནང་སྐོར་ཀློང་སྡེའི་ཁྲིད་ཀྱི་བྱིན་རླབས་གདམས་ཁྲིད་དངོས་དང་བཅས་པའི་ལེའུ་མཚན་ནོ།། །།


[100a] སྭ་སྟི། མཆོག་ཏུ་མི་འགྱུར་ཆོས་ཀྱི་དབྱིངས། །རྣམ་བཅས་ཡེ་ཤེས་ཕྱག་རྒྱར་སྣང་། །ཤེས་རབ་ཡུམ་ཆེན་དེར་བཏུད་ནས། །སྨིན་ལམ་ཟབ་མོའི་སྒོ་འཕར་དབྱེ། །རྫོགས་པ་ཆེན་པོ་སྡེ་གསུམ་ལས་ནང་སྐོར་ཀློང་སྡེ་ཨ་ནུ་དང་འབྲེལ་བ་མཁའ་འགྲོ་རོ་ལངས་བདེ་བའི་སྟོབས་ལྡན་མའི་དབང་བསྐུར་བ་ལ། སྦྱོར་བ་དཀྱིལ་འཁོར་རྡུལ་ཚོན་ནམ་རས་བྲིས་གང་རུང་གིས་ཆོས་འབྱུང་བསྣོལ་མ་ཕྱི་སྐོར་པདྨ་དུར་ཁྲོད་རྡོ་ར་མེ་རིས་བསྐོར་བ་ཚུལ་བཞིན་བྲིས་པའམ། མ་འབྱོར་ན་མཎྜལ་ལ་མེ་ཏོག་གི་ཚོམ་བུ་གཙོ་འཁོར་བདུན་བཀོད་པ་བཀྲམ། དེ་སྟེང་མཉྫིའི་ཁར་གསང་བུམ་ཐོད་པ་ཁ་སྦྱར་བདུད་རྩི་ཨ་མྲྀ་ཏས་གཏམས་པ་དར་དམར་གྱིས་དྲིལ་བ་དང་། དེ་སྟེང་འཁར་བའི་མེ་ལོང་སིནྡྷུ་ར་བརྡལ་བར་ཆོས་འབྱུང་བསྣོལ་མའི་དབུས་སུ་བྃ། ཟུར་དྲུག་ལ་མདུན་ནས་རིམ་པར་ཨེ་ཡྃ་ཧྃ་ལྃ་རྃ་ཧཱུྃ་རྣམས་ཡིག་མགོ་ཕྱིར་བསྟན་དུ་བྲིས་པ་འགོད། མཆོད་གཏོར་སྨན་རཀ་ཉེར་སྤྱོད་སོགས་སྤྱི་དང་མཐུན་པར་བཤམ། གཞན་ཡང་ཉེ་བར་མཁོ་བའི་ཡོ་བྱད་རྣམས་ཚོགས་པར་བྱས་ལ། ནང་སྐོར་ཡི་དམ་ཁྲོ་མོའི་བྱང་བུ་ཁྲིགས་སྡེབས་ཀྱིས་ཁོག་ཕུབ་སྟེ། དངོས་གཞི་རྟེན་གྱི་བྱང་བུའི་མཇུག ། བྷྲཱུྃ་ཛྙཱ་ན་ཙཀྲ་མཎྜལ་ཧཱུྃ༔ ཞེས་པའི་མཚམས་སུ། རང་བྱུང་ཡེ་ཤེས་ཕོ་བྲང་དུ༔ སོགས་མཁའ་འགྲོ་རང་གཞུང་གི་མངོན་རྟོགས་སྦྱར་ལ། སྣང་སྟོང་ཟུང་འཇུག་ཆེན་པོར་གསལ༔ དུག་གསུམ་ཡེ་དག་རྡོ་རྗེ་གསུམ༔ སོགས་ནས་བསྟོད་པ་གྲུབ་ཀྱི་བར་དུ་སོང་སྟེ། རང་ཉིད་བདེ་བའི་སྟོབས་ལྡན་མའི༔ སོགས་ཀྱི་ [100b] དམིགས་གནད་འཅས་བསྙེན་སྒྲུབ་ལས་སྦྱོར་གྱི་བཟླས་པ་གཞུང་བཞིན་བྱ་ཞིང་། སྒྲུབ་སྔགས་ཀྱི་བཟླས་པའི་མཇུག་ཏུ་སིནྡྷུ་ར་ཆང་དང་སྦྱར་བ་བྱིན་གྱིས་བརླབས་ཏེ་འབྲུ་གསུམ་གྱིས་མྱང་། ཐུན་མཐར་སྟོང་ཚིག་གིས་ཆོད་བསྟོད་ཕུལ། སྲུང་མའི་གཏོར་འབུལ་དང་ཚོགས་མཆོད་བྱ། ལས་བུམ་རྡོར་སེམས་སྙིང་པོས་བྱིན་བརླབ་བྱ། རིག་པའི་མེ་ཏོག་དོར་ལ་གནང་པ་ནོད་དོ། །དེ་ནས་དབང་བསྐུར་དངོས་ལ། སློབ་མ་རྣམས་ཁྲུས་ནས་དབྱུང་ལ། བགེགས་བསལ་ཞིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་གོང་གི་ཆོས་བཤད་ཇི་ལྟར་རིགས་པས་མཚམས་སྦྱར་ཏེ། ཁྱད་པར། འདིར་དམ་ཆོས་རྫོགས་པ་ཆེན་པོ་སྡེ་གསུམ་གྱི་ནང་ཚན་ནང་སྐོར་ཀློང་སྡེ་ཨ་ནུ་དང་འབྲེལ་བའི་གདམས་ཟབ། སྐལ་ལྡན་རྣམས་ལ་མཆོག་ཐུན་གྱི་དངོས་གྲུབ་བཙན་ཐབས་ལག་གཏོད་དུ་སྩོལ་བ་ལ་ཡི་དམ་གཞན་ལས་ཀྱང་ཁྱད་པར་དུ་འཕགས་པའི་མྱུར་ལམ་བླ་ན་མེད་པ་སྟེ། དོན་དམ་པར་སྤྲོས་བྲལ་ཤེས་རབ་ཀྱི་ཕ་རོལ་དུ་ཕྱིན་པ་ཀློང་ཆེན་ཀུན་ཏུ་བཟང་མོ་ཉིད་རྣམ་འགྱུར་རྟགས་ཀྱི་ཕྱག་རྒྱ་རིགས་ལྔ་ཌཱ་ཀའི་སྤྲིན་ཕུང་གང་འདུལ་སྒྱུ་འཕྲུལ་དྲྭ་བའི་བཀོད་པ་མཁའ་ཁྱབ་ཏུ་སྣང་བ་ལས། འདིར་ནི་ཟབ་ཆོས་གཞན་ལ་མ་གྲགས་པའི་གསང་བ་ངོ་མཚར་རྨད་དུ་བྱུང་བ་ཡེ་ཤེས་མཁའ་འགྲོ་རོ་ལངས་བདེ་བའི་སྟོབས་ལྡན་མའི་སྒྲུབ་སྐོར་ཏེ། གཞུང་ལས། དེ་ལྟ་བུ་ཡི་གསང་སྒྲུབ་འདི༔ བེེ་རོ་བདག་གི་ཐུགས་ཁྲག་སྟེ༔ དཔེ་རྒྱུད་འཆོལ་བར་བསྟན་ [101a] པ་ལས༔ སྙན་རྒྱུད་མན་ངག་ཉམས་པའི་ཚེ༔ ཡེ་ཤེས་སྙིང་པོ་ཚིག་གི་རྒྱུད༔ མངའ་བདག་ཡབ་སྲས་རྣམ་འཕྲུལ་སོགས༔ སྐལ་ལྡན་འགའ་ལ་སྣང་བར་འགྱུར༔ ཤིན་ཏུ་གསང་བའི་དམ་ཚིག་གོ༔ ཞེས་བསྔགས་པར་མཛད་པ་འདིའི་བྱིན་རླབས་དབང་བསྐུར་གྱི་རིམ་པ་སྒྲུབ་པ་ལ་བདག་ཉིད་སློབ་དཔོན་གྱིས་བགྱི་འོས་རྣམས་སྔོན་དུ་གྲུབ་ནས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་ཐོག་མར་སྨིན་བྱེད་ཟབ་མོ་ཞུ་བའི་ཡོན་དུ་མཎྜལ་འབུལ་མཛོད། ཅེས་མཎྜལ་འབུལ་དུ་གཞུག ། སློབ་དཔོན་ཉིད་རྡོ་རྗེ་བཙུན་མོའི་ངོ་བོར་བཞུགས་པ་ལ་མི་ཕྱེད་གུས་པས་གསོལ་བ་འདེབས་པ་འདིའི་རྗེས་ཟློས། བདེ་གསལ་མི་རྟོག་དབྱེར་མེད་པའི༔ བླ་མ་རྡོ་རྗེ་བཙུན་མོ་ཡིས༔ ཐུགས་རྗེ་བརྩེ་བས་ཉེར་དགོངས་ནས༔ བྱིན་རླབས་དབང་མཆོག་སྩལ་དུ་གསོལ༔ ལན་གསུམ། སྐུ་གསུམ་རང་ངོ་ཤེས་པ་གནས་ལུགས་དོན་གྱི་སྐྱབས་སུ་འགྲོ་བ་འདིའི་རྗེས་ཟློས། ངོ་བོ་སྟོང་བ་སོགས་ལན་གསུམ། གཉིས་སྣང་རང་གྲོལ་ཆེན་པོར་ལ་བཟླ་བ་དོན་དམ་བྱང་ཆུབ་མཆོག་ཏུ་སེམས་བསྐྱེད་པ་འདིའི་རྗེས་ཟློས། ཨེ་མ་ཧོ་ཆོས་དབྱིངས་སོགས་ལན་གསུམ། དོན་དམ་སྒྲིབ་པ་ཡེ་དག་ཚོགས་ཆེན་ཡེ་རྫོགས་ཀྱི་རྒྱུན་བཤགས་འབུལ་བ་འདིའི་རྗེས་ཟློས། དམིགས་མཐའ་བྲལ་བའི་སོགས་ལན་ [101b] གསུམ། འདའ་དཀར་རྡོ་རྗེའི་དམ་ཚིག་སྤྱི་དང་ཁྱད་པར་གྱིས་བསྡུས་པ་མཐའ་དག་ཚུལ་བཞིན་དུ་བསྲུང་བརབགྱིའོ་ཉམ་པས་འདིའི་རྗེས་ཟློས། བདེ་ཆེན་ཡེ་ཤེས་རྣལ་འབྱོར་མའི༔ བདག་ཉིད་བླ་མ་དགོངས་སུ་གསོལ༔ སྐུ་གསུང་ཐུགས་ཀྱི་དམ་ཚིག་དང་༔ མི་སྤང་ལྔ་དང་དང་ལེན་ལྔ༔ ཤེས་བྱ་ལྔ་དང་སྒྲུབ་བྱ་ལྔ༔ སྤྱད་པར་བྱ་བའི་དམ་ཚིག་ལྔ༔ མ་ལུས་བདག་གིས་བཟུང་བར་བགྱི༔ ལན་གསུམ། དེ་རྣམས་ཀྱིས་རྒྱུད་སྦྱོང་བའི་རིམ་པ་གྲུབ་ནས། དངོས་གཞི་དབང་གཞི་འགོད་པ་ཡེ་ཤེས་པ་དབབ་པ་ཡིན་པས་ཁྱེད་རང་རྣམས་སྒོ་གསུམ་གྱི་གནད་གཅུན་ལ་དམིགས་པ་འདི་བཞིན་དུ་མཛོད། སློབ་དཔོན་ཐུགས་ཀའི་འོད་ཟེར་གྱིས། །སློབ་བུའི་ལུས་སྣང་སྟོང་པར་སྦྱངས། །རང་བྱུང་ཡེ་ཤེས་ཆོ་འཕྲུལ་ལས། །མཁའ་འགྲོ་ཆོས་འབྱུང་འབར་བའི་དཀྱིལ། །ཞེས་སོགས་མངོན་རྟོགས་བཞིན་གསལ་ལ། ཁ་ཊྭཱཾ་ཀ་ནི་མཆན་གཡོན་བརྟེན༔ གནས་གསུམ་ཡིག་འབྲུ་གསུམ་གྱིས་མཚན། །སློབ་དཔོན་ཐུགས་ཀའི་འོད་ཟེར་དང་། །རྡོ་རྗེའི་སྔགས་ཀྱི་སྒྲས་བསྐུལ་བས། རབ་འབྱམས་ཞིང་གི་དྷཱ་ཀི་ནཱི། །ཐམས་ཅད་བདེ་བ་ཆེན་པོས་བཞེངས། །ནམ་མཁའ་གང་བར་ཆར་བཞིན་བབས། །སློབ་མའི་སྒོ་གསུམ་ལ་ཐིམ་པས། །བདེ་ཆེན་ཡེ་ཤེས་རྩོལ་མེད་ [102a] ཤར། །བྱིན་རླབས་གཟི་བྱིན་འབར་བར་སྒོམས། །སྤོས་རོལ་དང་བཅས་བསྙེན་སྒྲུབ་སྔགས་མཐར། ཛྙཱ་ན་ཨཱ་བེ་ཤ་ཡ་ཨ་ཨཱཿཨེ་ཨཱ་རལླྀ་ཧྲཱིཾ་ཧྲཱིཾ་ཕེཾ་ཕེཾ། ཞེས་དྲག་ཏུ་བརྗོད་པས་དབབ། བྱིན་དབབ་པའི་ཡེ་ཤེས་པ་དེ་ཉིད་བརྟེན་པར་བྱས་པའི་མོས་པ་མཛོད། ཏིཥྛ་བཛྲ། ཞེས་བརྟན་པར་བྱ། དེ་ནས་དངོས་གཞི་བུམ་པའི་དབང་གི་སླད་དུ། མཁའ་དབྱིངས་གང་བའི་དབང་ལྷ་རིག་པའི་ལྷ་མོ་རྣམས་ཀྱིུས་རང་བྱུང་བདེ་སྐྱོང་གི་བུམ་པ་དབྱིངས་ཕྱུག་དྷཱ་ཀིའི་དཀྱིལ་འཁོར་ཡོངས་རྫོགས་ཀྱི་ངོ་བོ་ཅན་གྱིས་སྤྱི་བོ་ནས་དབང་བསྐུར་བས། ལུས་རྩ་ཁམས་གདོས་བཅས་ཀྱི་དྲི་མ་སྦྱངས་ཏེ། སྣང་སྟོང་ཟག་མེད་བདེ་བ་མཆོག་གི་སྐུ་མངོན་དུ་གྱུར་བར་མོས་ཤིག །གསང་བུམ་ཐོགས་ལ། ཨོཾཿ བདེ་ཆེན་བདུད་རྩིའི་ཐོད་པ་ལ༔ ཡེ་ཤེས་མཁའ་འགྲོའི་དཀྱིལ་འཁོར་རྫོགས༔ རིགས་ཀྱི་བུ་ལ་དབང་བསྐུར་བས༔ སྣང་སྟོང་བདེ་མཆོག་མངོན་གྱུར་ཤོག༔ སྔགས་མཐར། ཀ་ལཱ་ཤ་ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བཞག ། གསང་བའི་དབང་གི་སླད་དུ། ཡེ་ཤེས་མཁའ་འགྲོའི་ལྷ་ཚོགས་རྗེས་ཆགས་བདེ་བ་ཆེན་པོས་འོད་དུ་ཞུ་བའི་བྱང་སེམས་བདུད་རྩིའི་རྒྱུན་ལྕེ་ཐོག་ཏུ་མྱང་བས། ངག་རླུང་འཕོ་བཅས་དྲི་མ་སྦྱངས་ཏེ། གསལ་སྟོང་འགག་ [102b] མེད་མི་ཤིགས་ན་དའི་དབྱངས་སུ་འཕོས་པར་མོས་ཤིག །གསང་བུམ་གྱི་བདུད་རྩི་སྦྱིན་ལ། ཨཱཿ ཡེ་ཤེས་མཁའ་འགྲོའི་ལྷ་ཚོགས་རྣམས༔ འོད་ཞུ་བྱང་སེམས་བདུད་རྩིའི་བཅུད༔ རིགས་ཀྱི་བུ་ལ་སྦྱིན་པ་ཡིས༔ གསལ་སྟོང་དགོངས་པ་མངོན་གྱུར་ཤོག༔ གུཧྱ་ཛྙཱ་ན་ཨ་མྲྀ་ཏ་ཝཱ་ཀ་ཨ་བྷི་ཥིཉྩ་ཨཱཿ ཞེས་མྱང་དུ་གཞུག ། དེའི་རྗེས་འབྲེལ་བཟླས་པའི་ལུང་གི་སླད་དུ། དཔོན་སློབ་གཉིས་ཀའི་ཐུགས་རིན་པོ་ཆེ་ཟུར་དྲུག་པ་མཆོང་གུར་ལྟ་བུའི་དབུས་སུ་ཉི་ཟླའི་གྭའུའི་ནང་དུ་བྃ་ཡིག་སྔགས་ཕྲེང་བཅས་གསལ་ཐོབ། སློབ་དཔོན་གྱི་ཐུགས་ཀ་ནས་སྔགས་ཕྲེང་བྱུང་། ཞལ་ནས་ཐོན་ཁྱེད་རང་གི་ཞལ་དུ་ཞུགས་ཐུགས་སྲོག་གི་མཐར་མགལ་མེ་ལྟར་འཁོར་བར་མོས་ལ་བསྙེན་སྔགས་འདིའི་རྗེས་ཟློས། བསྙེན་སྔགས་ལན་གསུམ། སླར་ཡང་ཙིཏྟ་རིན་ཆེན་འབར་བའི་དབུས་སུ་ཆོས་འབྱུང་བསྣོལ་མ་ཟུར་དྲུག་པའི་ལྟེ་བར་ཉི་ཟླའི་གྭའུའི་ནང་དུ་བྃ་དང་རྩིབས་དྲུག་ལ་ཨེ་ཡྃ་ཧྃ་ལྃ་རྃ་ཧཱུྃ་རྣམས་ཀྱིས་མཚན་པ། སྔགས་བཟླས་བའི་རྐྱེན་གྱིས་ཚོགས་དྲུག་ཡེ་ཤེས་དྲུག་གི་ངོ་བོར་ཤར་ཞིང་རབ་འབྱམས་ཞིང་གི་དྷཱ་ཀི་རྣམས་ཀྱི་ཐུགས་རྒྱུད་བསྐུལ་བས་བདེ་བ་ཆེན་པོའི་གཟི་བྱིན་ལྷག་པར་འབར། དེ་ཐམས་ཅད་བདུད་རྩིར་ཞུ་ནས་བདག་ལ་ཐིམ་པས་བྱིན་རླབས་ནུས་སྟོབས་མཆོག་ཏུ་འབར་བར་མོས་ལ་སྒྲུབ་སྔགས་འདིའི་རྗེས་ [103a] ཟློས། སྒྲུབ་སྔགས་ལན་གསུམ། ཡང་ཐུགས་ཀའི་སྔགས་ཕྲེང་ལས་འོད་ཟེར་འཕྲོས། ལས་བྱེད་མཁའ་འགྲོ་གསུམ་གྱི་ཐུགས་རྒྱུད་བསྐུལ། དེ་ལས་རང་འདྲ་མཁའ་ཁྱབ་ཏུ་འཕྲོས། རྒྱལ་བ་སྲས་བཅས་ལ་མཆོད་པ་ཕུལ། བདེ་བ་ཆེན་པོའི་དངོས་གྲུབ་བསྡུས། འཇིག་རྟེན་དང་འཇིག་རྟེན་ལས་འདས་བའི་དངོས་གྲུབ་རྣམས་འོད་ཟེར་བདུད་རྩིའི་རྣམ་པས་བསྡུས་པ་རང་ལ་ཐིམ་པས་ལས་དང་དངོས་གྲུབ་ཐམས་ཅད་ལ་དབང་འབྱོར་བར་མོས་པས་ལས་སྔགས་འདིའི་རྗེས་ཟློས། ལས་སྔགས་ལན་གསུམ་དང་ཤམ་བུ་བཏགས་པ་ལན་གཅིག་རྗེས་ཟློས་བྱ། དེང་ཕྱིན་ཆད་བསྙེན་སྒྲུབ་ལས་སྦྱོར་གྱི་བཟླས་པ་ཆུ་བོའི་རྒྱུན་ལྟར་བརྩོན་པར་གྱིས་ཤིག །ཤེས་རབ་ཡེ་ཤེས་ཀྱི་དབང་གི་སླད་དུ། སིནྡྷུ་རའི་མཎྜལ་དབྱིངས་ཕྱུག་དྷཱ་ཀིའི་ཚོམ་བུར་སྣང་བ་ཕྱག་ཏུ་གཏད་ཅིང་ཐིག་ལེ་སྙིང་གར་བཀོད་པས། འཁོར་གསུམ་གཟུང་འཛིན་གྱི་དྲི་མ་སྦྱངས་ཏེ། ཤེས་རབ་རྣམ་ཐར་གསུམ་ལྡན་དབྱིངས་ཀྱི་ཆུ་སྐྱེས་སུ་ཐབས་མཆོག་རིག་པའི་རྡོ་རྗེ་སྙོམས་འཇུག་གི་སྦྱོར་བས་དགའ་བཞིའི་མཐར་ཐུག་ལྷན་སྐྱེས་བདེ་ཆེན་ཡེ་ཤེས་མངོན་དུ་གྱུར་པར་མོས་ཤིག །སིནྡྷུ་རའི་མཎྜལ་ཐོགས་ལ། ཧཱུྃ༔ རྣམ་ཐར་གསུམ་ལྡན་དགའ་བ་བཞི༔ མཚོན་བྱེད་རྟགས་ཀྱི་མཎྜལ་འདི༔ རིགས་ཀྱི་བུ་ལ་གཏད་པ་ཡིས༔ [103b] མི་རྟོག་ཡེ་ཤེས་ཉམས་མྱོང་ཤོག༔ སིནྡྷུ་ར་མཎྜལ་ཙིཏྟ་ཨ་བྷི་ཥིཉྩ་ཧཱུྃ༔ ཞེས་སྙིང་གར་སིནྡྷུ་རས་ཐིག་ལེ་བཀོད། དབང་བཞི་པའི་སླད་དུ། སྔར་དཔེའི་ཡེ་ཤེས་ངོ་སྤྲོད་པ་དེ་ཉིད་མཚོན་བྱེད་དུ་བྱས་ནས་མཚོན་བྱ་དོན་གྱི་ཡེ་ཤེས་བདེ་གསལ་མི་རྟོག་དབྱེར་མེད་ཟུང་འཇུག་ཤིན་ཏུ་རྣམ་དག་བློ་འདས་ཀྱི་དབྱིངས་སུ་མཉམ་པར་བཞག་པས། གཞི་སྣང་གི་དྲི་མ་སྦྱངས་ཏེ། མི་ཤིགས་ཀློང་ལྔའི་ཡེ་ཤེས་མངོན་དུ་གྱུར་པར་མོས་མཛོད། ཧོཿ བདེ་གསལ་མི་རྟོག་དབྱེར་མེད་པ༔ ཟང་འཇུག་ཤིན་ཏུ་རྣམ་དག་ངང་༔ རིགས་ཀྱི་བུ་ལ་བྱིན་བརླབས་པས༔ ཀློང་ལྔའི་ཡེ་ཤེས་མཐར་ཕྱིན་ཤོག༔ ཛྙཱ་ན་དྷཱ་ཏུ་ཨ་ཨ་ཨ༔ ཞེས་ཅུང་ཟད་མཉམ་པར་བཞག ། དེ་ལྟར་དབང་བཞི་ཟབ་མོ་ཐོབ་པ་ལ། མཁའ་དབྱིངས་ཁྱབ་པར་སད་པའི་དྷཱ་ཀིའི་ཚོགས་དང་སློབ་དཔོན་ལྷན་ཅིག་པས་ཤིས་པ་བརྗོད་པས་མངའ་གསོལ་བས་དབང་དོན་གྱི་ཡེ་ཤེསབརྟན་པར་བྱས་པའི་མོས་པ་མཛོད། ཅེས་ཤིས་མརྗོད་ཅི་ལྟར་རིགས་པ་བྱ། དེ་ལྟར་ན་ནང་སྐོར་མཁའ་འགྲོ་རོ་ལངས་བདེ་བའི་སྟོབས་ལྡན་མའི་དབང་བསྐུར་ཟབ་མོ་ལེགས་པར་གྲུབ་པ་སྟེ། གཞུང་ལས། དེ་ལྟ་བུ་ཡི་དབང་མཆོག་འདི་ དགོངས་པ་མངོན་གྱུར་སློབ་དཔོན་གྱིས༔ སྣོད་དང་སྐལ་ལྡན་སློབ་མ་ལ༔ ཚུལ་བཞིན་སྨིན་པའི་དབང་བསྐུར་བས༔ [104a] རྩ་ཁམས་རླུང་ལ་བྱིན་ཕེབས་ནས༔ བདེ་གསལ་མི་རྟོག་དབྱེར་མེད་པའི༔ ཀློང་ཆེན་ཀུན་ཏུ་བཟང་མོའི་དབྱིངས༔ སྐུ་དང་ཡེ་ཤེས་མྱུར་འགྲུབ་འགྱུར༔ དེ་ཕྱིར་ཤིན་ཏུ་གཅེས་པར་ཟུངས༔ ཞེས་གསུངས་པ་ལྟར་དགོངས་པ་ཕན་ཡོན་རྒྱ་ཆེན་པོ་དང་ལྡན་པ་ལགས་པས་སྤྲོ་བ་བསྐྱེད་པ་དང་། དབང་སྲོག་སྔགས་ཀྱི་དམ་ཚིག་སྤྱི་དང་ཁྱད་པར་ཌཱ་ཀི་སྒོས་ཀྱི་དམ་ཚིག་རྣམས་ཚུལ་བཞིན་བཟུང་ཞིང་བསྲུང་ངོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་དམ་ཚིག་ཁས་ལེན། གཏང་རག་མཎྜལ་དང་ལུས་དབུལ། དགེ་བསྔོ་བཅས་སྤྱི་ལྟར་བྱས་ལ་སློབ་མ་གྱེས། སློབ་དཔོན་གྱིས་ཆོ་གའི་རྗེས་ཀྱི་བྱ་བའང་གཞུང་བཞིན་མཐར་ཆགས་སུ་བགྱིས་པས་གྲུབ་བོ། །དབང་མཆོག་ཡེ༵་ཤེ༵ས་ཆུ་རྒྱུན་གྱིས། །གཉིས་རྟོག་དྲི་མ་རབ་གཏོར་ཏེ། །རྡོ༵་རྗེ༵ས་བཙུན་མོའི་གོ་འཕང་ཆེས། །རྒྱུད་ལ་བླུགས་པའི་ཚུལ་འདི་རྨད། །ནང་སྐོར་ཀློང་སྡེའི་མཁའ་འགྲོ་རོ་ལངས་བདེ་བའི་སྟོབས་ལྡན་མའི་དབང་གི་ལེའུ་མཚན་ནོ།། །།


[105a] སྭསྟི། རྩོལ་མེད་ཐེག་པས་སྐལ་བཟང་འགྲོ། །གདོད་མའི་གྲོལ་གཞིར་འཁྲིད་མཛད་པ། །རིག་འཛིན་ཚོགས་ལ་གུས་བཏུད་ནས། །གང་དེའི་སྨིན་བྱེད་འཇུག་སྒོ་དབྱེ། །རྫོགས་པ་ཆེན་པོ་སྡེ་གསུམ་ལས་གསང་སྐོར་བླ་མ་རིག་འཛིན་ཡོངས་རྫོགས་ཀྱི་སྨིན་བྱེད་སྒྲུབ་པ་ལ། སྦྱོར་བ་ཚུལ་བཞིན་བྲིས་པའི་འདིང་དཀྱིལ་ལམ། མ་འབྱོར་ན་མཎྜལ་ལ་མེ་ཏོག་གི་ཚོམ་བུ་དབུས་སུ་གཅིག ། ཕྱོགས་བཞིར་རེ་རེ། དེ་རྒྱབ་བརྒྱད་བཅས་བཀོད་པའི་ཁར་མཉྗིའི་སྟེང་དུ་རྣམ་བུམ་སོ་ལྔའི་བཅུད་ལྡན། ཕྱོགས་བཞིར་ཐུན་མོང་རིག་པའི་དབང་རྫས། མདུན་དུ་ལྷ་ཙཀ་ཡོངས་རྫོགས། མཐའ་སྐོར་དུ་སྔགས་ཕྲེང་། མེ་ལོང་། རྡོ་རྗེ། མངའ་གསོལ་ཆས། རྡོར་དྲིལ། གླེགས་བམ། དར་གྱི་ཆས་གོས། སྣ་ཚོགས་རྡོ་རྗེ། གསང་ཐོད། རིག་ཙཀ ། ཤེལ་རྡོ། ཚེ་འབྲང་། ཚི་རིལ་ཆང་། ཚེ་མདའ། བཀྲ་ཤིས་རྫས་རྟགས་སྣ་བདུན་བཅས་བཀོད། ཕྱི་ནང་གི་མཆོད་ཚོགས། མིག་དར་མེ་ཏོག་སོགས་ཉེ་བར་མཁོ་བའི་ཡོ་བྱད་རྣམས་ཚང་བར་འདུ་བྱས་ལ། དབང་དོན་སྒྲུབ་མཆོད་ནི། གསང་སྐོར་ཁྲོ་བོའི་བསྐྱེད་རིམ་བྱང་བུས་ཁོག་ཕུབ་སྟེ། མངོན་རྟོགས་བཟླས་པ་རྣམས་འདིའི་སྒྲུབ་ཐབས་ལྟར་བྱ། བུམ་བཟླས་ཟུར་དུ་སྤྲོ་ན་དམིགས་བཟླས་འོད་ཞུ་སྤྱི་ཁྱབ་ལྟར་དང་། ལས་བུམ་རྡོར་སེམས་སྙིང་པོས་བརླབ། སྲུང་མའི་གཏོར་འབུལ་དང་ཚོགས་མཆོད་རིག་མི་དོར་བ་བཅས་གྲུབ་ནས། དངོས་གཞི་དབང་ལ། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ། མཚམས་སྦྱོར་གྱི་ཁྱད་ [105b] པར། དེ་ལ་འདིར་བདེ་བར་གཤེགས་པ་ཐམས་ཅད་ཀྱི་དགོངས་པའི་ཞེ་ཕྲག །རིག་འཛིན་གྲུབ་ཐོབ་རྒྱ་མཚོའི་གསེང་ལམ། ཡེ་ཤེས་ཌཱ་ཀི་བྱེ་བ་འབུམ་གྱི་ཐུགས་ཁྲག ། འོད་གསལ་རྫོགས་པ་ཆེན་པོ་ལ་དབྱེ་ན། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་སྡེ། །ཞེས་གསུངས་པ་ལྟར་གསུམ་དུ་དབྱེ་བ་དེ་ཐམས་ཅད་ཀྱང་། ནམ་མཁའ་ཆེ་ལས། རང་བྱུང་ཡེ་ཤེས་རྩོལ་མེད་ལས། །གྲོལ་ནས་གྲོལ་བའི་ལམ་ཡང་སྟོན། །ཅེས་པ་ལྟར་རྩོལ་མེད་ཀྱི་ལམ་ཡིན་པར་གཅིག་ཀྱང་རིག་པ་རང་གནས་ཀྱི་ཡེ་ཤེས་རྗེན་ཅར་དུ་སྟོན་པ་གསང་བ་མན་ངག་གི་སྡེའི་ཁྱད་ཆོས་ཏེ། དེ་ལྟ་བུའི་གདམས་པ་འདི་ཉིད་མཐོང་བས་བྱིན་རླབས་ཀྱི་བབ་དང་ལྡན་པ། ཐོས་པས་ངན་སོང་གི་སྐྱེ་སྒོ་དགག་པ། ཚུལ་བཞིན་ཉམས་སུ་བླངས་པས་ཚེ་འདིར་འཇའ་ལུས་འཕོ་བ་ཆེན་པོའི་གྲུབ་མཐའ་སྙེགས་པ། གླེགས་བམ་ལ་རེག་པ་ཙམ་གྱིས་ཀྱང་ཐར་པའི་ས་བོན་ཐེབས་ངེས་པའི་ཟབ་ཆོས་བྱིན་རླབས་ཀྱི་ཚན་ཁ་ཁྱད་པར་དུ་མས་འཕགས་པ་མན་ངག་སྙིང་ཐིག་ཆེན་མོ་ལའང་བཀའ་སྲོལ་ཇི་སྙེད་ཅིག་བཞུགས་པ་ལས། སྐབས་སུ་བབས་པ་འདི་ནི་ཡིད་དཔྱོད་ལྟ་བའི་འཛིན་སྟངས་ལས་འདས་ཤིང་ཆོས་ཅན་གྱི་སྣང་བ་ཐམས་ཅད་ཆོས་ [106a] ཉིད་ཀ་དག་ཡོངས་གྲོལ་ཆེན་པོར་སྡུད་པ་གནད་ཐོག་ཏུ་ཐེབས་པའི་མེ་བཙའ་ལྟ་བུ་གསང་བ་སྙིང་ཁྲག་གམ་སྲོག་གི་དྭངས་མ་དང་འདྲ་བའི་རྒྱུད་ཆེན་བཅུ་བདུན་སོགས་ཀྱིས་བསྟན་དོན། སློབ་དཔོན་ཆེན་པོ་པདྨ་ཐོད་ཕྲེང་དང་། ལོ་ཆེན་བེེ་རོ་ཙ་ནས་མན་ངག་མནོག་ཆོས་སུ་བསྡེབས་བར་མཛད་པ། མངའ་བདག་ཆོས་རྒྱལ་ཡབ་སྲས་ཀྱི་རྣམ་འཕྲུལ་རིག་འཛིན་རྩལ་འཆང་རྣམ་གཉིས་ཀྱི་ཟབ་གཏེར་རྒྱ་མཚོའི་ཡང་ཞུན་དམ་ཆོས་རྫོགས་ཆེན་སྡེ་གསུམ་གྱི་ནང་ཚན་གསང་སྐོར་མན་ངག་སྡེའི་བླ་མ་རིག་འཛིན་ཡོངས་རྫོགས་ཀྱི་དཀྱིལ་འཁོར་དུ་དབང་བསྐུར་ཟབ་མོ་སྒྲུབ་པ་ལ། བདག་ཉིད་ཀྱིས་བགྱི་བར་འོས་པ་རྣམས་སྔོན་དུ་གྲུབ་ནས་སོགས་ཀྱི་མཚམས་སྦྱར་ལ་མཎྜལ་འབུལ་དུ་གཞུག །མཚམས་སྦྱོར་དང་སྔགས་སྤྱི་མཐུན་བཅས་མིག་དར་མེ་ཏོག་གཏད། ཐལ་མོ་མེ་ཏོག་དང་བཅས་པས་གསོལ་བ་འདེབས་པ་འདིའི་རྗེས་ཟློས། ཧོཿ བརྒྱུད་གསུམ་རྒྱལ་བ་རིག་འཛིན་དང་༔ དབྱེར་མེད་རྡོ་རྗེ་སློབ་དཔོན་གྱིས༔ བདག་ལ་བརྩེ་བས་ཉེར་དགོངས་ནས༔ སྨིན་གྲོལ་དབང་མཆོག་སྩལ་དུགསོལ༔ ལན་གསུམ། དེ་ལྟར་གསོལ་བ་བཏབ་པ་ལ་སྣོད་དང་སྐལ་པ་དྲི་བའི་སྒོ་ནས་ལན་སྦྱིན་པ་འདི་ལ་གསན་འཚལ། རིག་འཛིན་ཡོངས་རྫོགས་དཀྱིལ་འཁོར་འདིར༔ འཇུག་པའི་སྐལ་ལྡན་རེ་རེ་ཙམ༔ [106b] རྒྱུད་སྦྱངས་དམ་ཚིག་སྡོམ་པ་བཟུང་༔ ཚུལ་བཞིན་སྒྲུབ་ལ་བརྩོན་ནུས་སམ༔ ཞེས་དྲིས་པ་ལ་སླར་ཡང་ནན་ཏན་ཆེན་པོས་གསོལ་བ་འདེབས་པ་འདིའི་རྗེས་ཟློས། ཇི་ལྟར་བཀའ་སྩལ་བདག་གིས་བགྱིད༔ ངེས་པར་རྗེས་སུ་བཟུང་མཛད་གསོལ༔ དེ་ནས་རྒྱུད་སྦྱོང་བའི་སླད་དུ་ཚོགས་བསགས་པ་ལ་དམིགས་འདུན་འདི་ལྟར་དུ་མཛོད། ཕྱོགས་དུས་ཀྱི་སྐྱབས་ཡུལ་ཐམས་ཅད་གདོད་ནས་རང་ལ་རང་ཆས་སུ་རྫོགས་པ་ལ་དབྱིངས་རིག་གཉིས་སུ་མེད་པའི་ཚུལ་གྱིས་སྐྱབས་སུ་འགྲོ་བ་དང་། རང་བྱུང་རང་གསལ་ལྷུན་གྲུབ་ཆེན་པོའི་ངང་དུ་སེམས་བསྐྱེད་པ་དང་། གནས་ལུགས་དོན་དམ་ལྟ་བ་མཇལ་བའི་དགོངས་སྤྱོད་ལྷུན་འབྱམས་ཆེན་པོའི་ངང་དུ་ཚོགས་བསགས་པ་འདི་རྣམས་ཀྱི་རྗེས་ཟློས། དབྱིངས་ཉིད་རྣམ་དག་རྫོགས་སངས་རྒྱས༔ སོགས་གསང་སྐོར་བྱང་བུ་བཞིན་སྐྱབས་སེམས་ཚོགས་བསགས་རྣམས་ལན་གསུམ་རེ། སྤྱི་དང་ཁྱད་པར་གྱི་སྡོམ་པ་དམ་ཚིག་རྣམས་སྲོག་བཞིན་དུ་བསྲུང་སྙམ་པ་འདིའི་རྗེས་ཟློས། ཧོཿ བདེ་བར་གཤེགས་པ་ཁྱེད་ཅི་འདྲ༔ དེ་འདྲ་ཁོ་ནར་བདག་གྱུར་ཅིག༔ སྤྲུལ་སྐུའི་སྟོན་པས་བཤད་པ་ཡི༔ སོ་སོར་ཐར་དང་བྱང་ཆུབ་སེམས༔ ལོངས་སྐུའི་སྟོན་པས་བཤད་པ་ཡི༔ རིགས་ལྔའི་སྡོམ་པ་མ་ལུས་བཟུང་༔ ཁྱད་པར་རིག་འཛིན་ཡོངས་རྫོགས་ཀྱི༔ [107a] ཉི་ཤུ་ལྔ་དང་བྱེ་བྲག་ཏུ༔ སྐུ་གསུང་ཐུགས་ཀྱི་དམ་ཚིག་རྣམས༔ ཇི་ལྟར་བསྟན་པ་བདག་གིས་བཟུང་༔ སྲོག་གི་ཕྱིར་ཡང་མི་བཏང་ན༔ རིག་འཛིན་རིགས་མཆོག་སྩལ་དུ་གསོལ༔ ཅེས་ཁས་བླང་དུ་གཞུག །དམ་ལ་བཞག་པ་ནི། རྡོ་རྗེ་ཕྲེང་བ་མགོ་བོར་བཞག་ལ། ང་ནི་སངས་རྒྱས་ཀུན་བདག་ཉིད༔ ཧེ་རུ་ཀ་དཔལ་བླ་ན་མེད༔ ཤྲཱི་སེངྷ་ང་ཡིན་གྱིས༔ ང་ལ་བརྙས་པར་མ་བྱེད་ཅིག༔ རྡོ་རྗེ་ཕྲེང་བ་སྙིང་གར་བཞག་ལ། ང་ནི་བླ་མ་ཀུན་ཏུ་བཟང་༔ ཁྱོད་ཀྱིས་བཀའ་ཡང་མི་གཅོག་ཅིང་༔ བདེ་གཤེགས་རིགས་ཀྱི་བཤད་པའི་ཆོས༔ བཤད་ཀྱིས་ཐེ་ཚོམ་མ་ཟ་ཞིག༔ དམ་ཆུ་བདུད་རྩི་སྦྱིན་ལ། འདི་ནི་ངོ་བོ་དམ་ཚིལ་ཆུ༔ ཡེ་ཤེས་བསྐྱེད་ཕྱིར་སྦྱིན་པ་ཡིན༔ དམ་བསྲུང་དངོས་གྲུབ་འདིས་ཐོབ་བྱེད༔ མ་བསྲུང་ལྕགས་ཀྱི་སྡིག་པར་འགྱུར༔ སྲོག་གཅོད་དམྱལ་བ་ཆེན་པོར་ལྟུང་༔ དམ་བསྲུང་རྡོ་རྗེའི་ཆུ་འདི་འཐུང་༔ དེ་ལྟར་བྱིན་པའི་དམ་ཚིག་གི་ཆུ་ནན་སྙིང་ལ་བསྟིམས་ཏེ་མི་འདའ་རྡོ་རྗེའི་བྲོ་བོར་བ་འདིའི་རྗེས་ཟློས། ཨོཾ་བཛྲ་ས་མ་ཡ་ཨི་དན་ན་ར་ཀན༔ དེ་ནས་དབང་གི་གཞི་སྒྲུབ་པར་བྱེད་པ་ཡེ་ཤེས་པ་དབབ་པ་ལ་དམིགས་པ་འདི་བཞིན་དུ་མཛོད་ཅིག ། འཁོར་འདས་སྣོད་བཅུད་སྟོང་པར་ཐིམ༔ སྟོང་པའི་རང་མདངས་ [107b] འགགས་མེད་རྩལ༔ སེང་ཁྲི་པད་ཉི་ཟླ་བའི་སྟེང་༔ སློབ་མ་རིག་འཛིན་ཤྲཱི་སེང་༔ དམར་སྨུག་ཤིན་ཏུ་བརྗིད་པའི་སྐུ༔ རྣལ་འབྱོར་བརྟུལ་ཞུགས་སྤྱོད་པའི་ཚུལ༔ ཁྲོ་འཛུམ་གཟི་བྱིན་རབ་ཏུ་འབར༔ ཡེ་ཤེས་ལྟ་སྟངས་དབྱིངས་ལ་གཟིགས༔ ཕྱག་གཡས་ལྕགས་ཀྱུའི་ཕྱག་རྒྱ་ཡིས༔ འཁོར་འདས་ཀུན་གྱི་དྭངས་མ་སྡུད༔ གཡོན་པའི་བདེ་སྐྱིད་སྣོད་དུ་བསྐྱིལ༔ མེ་ཏོག་ཕྲེང་བས་ཐོད་བཅིངས་ཤིང་༔ ཐོད་སྐམ་ཅོད་པན་འཁོར་ལོ་སོགས༔ རིན་ཆེན་རུས་པའི་རྒྱན་གྱིས་བརྒྱན༔ དར་གྱི་ན་བཟའ་སྟག་ཤམ་གསོལ༔ ཞབས་ཟུང་གཡོན་བརྐྱང་ཕྱེད་སྐྱིལ་བཞུགས༔ སྤྱི་བོར་རིགས་བདག་རྡོ་རྗེ་སེམས༔ རྡོ་རྗེ་དྲིལ་འཛིན་ལོངས་སྐུའི་ཆས༔ མགྲིན་པར་ཆོས་སྐུ་ཀུན་ཏུ་བཟང་༔ མཐིང་གསལ་མཉམ་གཞག་ཡུམ་དང་འཁྲིལ༔ ཐུགས་ཀར་ཡེ་ཤེས་སེམས་དཔའ་ནི༔ དགའ་རབ་རྡོ་རྗེ་སྤྲུལ་སྐུའི་ཚུལ༔ མཉམ་གཞག་སྐྱིལ་ཀྲུང་མཚན་དཔེ་འབར༔ དེ་ལྟར་གསལ་བའི་གནས་གསུམ་དུ༔ རྡོ་རྗེའི་ཡི་གེ་འབྲུག་གསུམ་མཚན། །སློབ་དཔོན་ཐུགས་ལས་འོད་ཟེར་འཕྲོས། །རང་བཞིན་གནས་ནས་ཡེ་ཤེས་པ། །དཔག་མེད་སྤྱན་དྲངས་ཁྱེད་རང་གི ། སྒོ་གསུམ་ལ་ཐིམ་དབྱེར་མེད་གྱུར། །སྤོས་རོལ་བཅས་རྩ་སྔགས་མཐར། ཛྙཱ་ [108a] ན་ཨ་ཝེ་ཤ་ཨ་ཨཱཿ ཞེས་དྲག་ཏུ་བརྗོད་ལ་དབབ། ཡེ་ཤེས་པ་བརྟན་པར་གྱུར་ཅིག ། ཏིཥྛ་བཛྲ། འགྲིམ་དཀྱིལ་འདུ་བྱས་ལ། རིག་འཛིན་ཡོངས་རྫོགས་ཕོ་བྲང་དུ༔ རིག་པའི་མེ་ཏོག་འདྲིས་མེད་དོར༔ སྔོན་ནས་ལས་འཕྲོ་གང་ཡོད་པའི༔ ཡེ་ཤེས་ལྷ་ལ་འབབ་པར་འགྱུར༔ ཁྱེད་རང་རྣམས་ལ་སྔར་བྱིན་པའི་མེ་ཏོག་དེ་ཉིད་ཡེ་ཤེས་ཀྱི་དཀྱིལ་འཁོར་དུ་དོར་བའི་མོས་པས་འདིའི་རྗེས་ཟློས༔ ཧོཿ རིག་འཛིན་རོལ་པའི་དཀྱིལ་འཁོར་འདིར༔ སྙིང་པོའི་ཡེ་ཤེས་བརྟག་བྱའི་ཕྱིར༔ རིག་པའི་མེ་ཏོག་འདི་འབུལ་གྱིས༔ ལས་འཕྲོའི་དབང་གིས་བཞེས་སུ་གསོལ༔ པུཥྤེ་པྲ་ཏཱིཙྪ་ཧོཿ ཞེས་དོར་དུ་གཞུག ། རྟེན་དང་བརྟེན་པར་བཅས་པའི་དཀྱིལ་འཁོར་གཙོ་དང་འཁོར་དུ་སྣང་བ་ཐམས་ཅད་ཀྱང་ཀུན་ཁྱབ་ཆོས་ཀྱི་དབྱིངས་ཀྱི་ཡེ་ཤེས་འཇིགས་མེད་ཤྲཱི་སེངྷའི་རང་བཞིན་ཁོ་ན་ཡིན་པས་ཁྱེད་རང་རྣམས་ཀྱི་གསང་བའི་མཚན་རིག་འཛིན་འདུས་པ་རྩལ་ཅེས་བྱ་བ་ཡིན་ནོ། །དེ་ལྟར་ཕུལ་བའི་མེ་ཏོག་དེ་ཉིད་ཀྱང་རིགས་རྟགས་སུ་བྱིན་གྱིས་བརླབ་སྟེ་རྡོ་རྗེའི་ཅོད་པན་དུ་བཅིངས་པར་མོས་ཤིག །ཧཱུྃ༔ མི་གནས་ཡེ་ཤེས་དཀྱིལ་འཁར་དུ༔ རིག་པའི་མེ་ཏོག་ཕུལ་བ་འདི༔ བྱིན་རླབས་བསམ་མི་ཁྱབ་པར་ཟུངས༔ དངོས་གྲུབ་ཐམས་[108b] ཅད་འདིས་ཐོབ་ཤོག༔ པུཥྤེ་གྲྀཧྞ་སྟྭཾ་ཨི་མཾ་ས་ཏྭ་མ་ཧཱ་བ་ལ༔ ཞེས་མེ་ཏོག་སྤྱི་བོར་བཞག ། སྒྲིབ་པས་ལྗོངས་པའི་མིག་དབྱེ་བར་གསོལ་བ་འདེབས་པ་འདིའི་རྗེས་ཟློས། ཧོཿ བསྐལ་སྔོན་སྒྲིབ་པའི་མ་རིག་མིག༔ ཐབས་མཁས་རྒྱལ་བའི་རིག་འཛིནཆེས༔ མྱུར་བ་ཉིད་དུ་དབྱེ་བ་དང་༔ ཡེ་ཤེས་དཀྱིལ་འཁོར་བསྟན་དུ་གསོལ༔ ལྷན་སྐྱེས་མ་རིག་པའི་སྒྲིབ་གཡོགས་ཡེ་ཤེས་རིག་པའི་ཐུར་མས་བསལ་བར་མོས་ཤིག །གསེར་ཐུར་ཐོགས་ལ། ཧོཿ སྔོན་གྱི་རྒྱལ་བ་ཐམས་ཅད་ཀྱིས༔ འགྲོ་བའི་མིག་ནི་དབྱེ་བར་མཛད༔ སངས་རྒྱས་ས་ལ་བཀོད་པ་བཞིན༔ དེང་འདིར་རིག་པ་འཛིན་བདག་གིས༔ མ་རིག་མིག་ནི་དབྱེ་བར་བྱ༔ ཙཀྵུ་པྲ་ཝེ་ཤ་ཡ་ཕཊ༔ ཅེས་མིག་དར་བསལ། ཧོཿ ལྟོས་ཤིག་སྐལ་པ་ཅན་རྣམས་ལྟོས༔ རིག་འཛིན་ཀུན་འདུས་དཀྱིལ་འཁོར་འདིར༔ སྐད་ཅིག་མཐོང་བ་ཙམ་གྱིས་ཀྱང་༔ སྒྲིབ་པ་དག་སྟེ་ཡེ་ཤེས་མཐོང་༔ ཧོཿ རིག་འཛིན་རོལ་པའི་ཕོ་བྲང་ཡེ་ཤེས་བུམ་པ་དབྱེར་མེད་པའི་ནང་དུ་བདེ་གཤེགས་ཀུན་འདུས་འཇིགས་མེད་ཤྲཱི་སེངྷ་དང་བརྒྱུད་གསུམ་རིག་འཛིན་རྒྱ་མཚོའི་ཚོགས་རྣམས་གཙོ་འཁོར་གྱི་ཚུལ་དུ་བཞུགས་པ་འདི་ནི་མཚན་མ་རྫས་དང་ཏིང་འཛིན་སྤྲུལ་པའི་དཀྱིལ་འཁོར་དབྱེར་མེད་ [109a] ཡིན་ཅིང་༔ འདི་མཚོན་བྱེད་དེ༔ མཚོན་བྱ་དོན་གྱི་དཀྱིལ་འཁོར་རང་གི་སེམས་ཉིད་ཡེ་ཤེས་བརྒྱུད་གསུམ་རིག་འཛིན་བླ་མའི་བདག་ཉིད་ཆེན་པོར་རྫོགས་པའི་རང་བཞིན་དུ་ངོ་ཤེས་བར་གྱིས་ཤིག༔ ཅེས་ལྷ་ངོ་བསྟན། དེ་དག་གིས་དཀྱིལ་འཁོར་ཕྱི་ནང་གི་འཇུག་པ་སོང་ནས་མངོན་པར་དབང་བསྐུར་བ་དངོས་གཞི་ཞུ་བའི་སླད་དུ་མཎྜལ་ཕུལ། ཐོག་མར་གསོལ་བ་གདབ་པ་འདིའི་རྗེས་ཟློས། ཧོཿ རིག་འཛིན་ཡོངས་རྫོགས་དཀྱིལ་འཁོར་འདིར༔ ཞུགས་ཀྱང་སྨིན་པར་མཛད་དུ་གསོལ༔ སྨིན་ཅིང་གྲོལ་བ་མཐར་ཕྱིན་ཞིང་༔ མི་གནས་ཀློང་དུ་སྐྱེལ་བར་མཛོད༔ ལན་གསུམ། དབང་བསྐུར་བ་དངོས་ལ་བུམ་གསང་ཤེར་ཡེ་ཚིག་དབང་རྗེས་འབྲེལ་དང་བཅས་པ་རིམ་པར་འབྱུང་བ་ལས། དང་པོ་བུམ་པའི་དབང་གི་སླད་དུ། བུམ་པ་རང་བྱུང་གི་གཞལ་ཡས་ཁང་དུ་རིག་འཛིན་རོལ་པའི་ལྷ་ཚོགས་རྣམས་བཞུགས་པའི་སྐུ་ལས་བྱང་ཆུབ་སེམས་ཀྱི་ཆུ་རྒྱུན་བྱུང་བས་སྒྲིབ་པའི་འཆིང་བ་གཏོར་ཞིང་ཡེ་ཤེས་ཀྱི་བཅུད་བླུགས་པར་མོས་ཤིག །རྣལ་བུམ་ཐོགས་ལ། ཧཱུྃ༔ དབྱིངས་ཀྱི་བུམ་པར་རིག་པའི་བཅུད་༔ ཟུང་འཇུག་རིག་འཛིན་རོལ་བའི་ལྷ༔ གཉིས་མེད་མཉམ་སྦྱོར་བདུད་རྩི་མཆོག༔ ཡེ་ཤེས་ཆུ་ཡི་དབང་བསྐུར་རོ༔ ཀ་ལཱ་ [109b] ཤ་ཨ་བྷི་ཥིཉྩ་ཧཱུྃ༔ ཞེས་བུམ་ཆུ་སྤྱི་བོར་གཏིགས། ཡེ་ཤེས་རྡོ་རྗེའི་ཅོད་པན་དབུ་ལ་བཅིངས་པས་རིགས་ཐམས་ཅད་ཀྱི་རྒྱལ་སྲིད་ལ་མངའ་དབང་བསྒྱུར་བར་མོས་ཤིག ། རིན་ཆེན་འབར་བའི་པྲོག་ཞུ་འདི༔ རྒྱལ་བ་ཀུན་དང་མཉམ་པ་ཡི༔ གོ་འཕང་བླ་མེད་བསྒྲུབ་བྱའི་ཕྱིར༔ དབང་བསྐུར་ཅོད་པན་ཆེན་པོའོ༔ རཏྣ་མུ་ཀུ་ཊ་ཨ་བྷི་ཥཉྩེ་ཏྲཱྃ༔ ཞེས་དབུ་རྒྱན་སྤྱི་བོར་གཏད། མི་འགྱུར་རྡོ་རྗེ་རྩེ་ལྔ་ཕྱག་གཡས་སུ་གཏད་པས་ཐབས་བདེ་བ་ཆེན་པོ་མཆོག་ཏུ་མི་འགྱུར་བའི་བདག་ཉིད་ཆེན་པོར་གྲུབ་པར་མོས་ཤིག ། སངས་རྒྱས་རིགས་ལྔ་ཡེ་ཤེས་ལྔས༔ དུག་ལྔ་རྣམ་པར་གཞོམ་པའི་ཕྱིར༔ མི་འགྱུར་རྡོ་རྗེ་བླ་ན་མེད༔ སངས་རྒྱས་རྡོ་རྗེའི་དབང་བསྐུར་རོ༔ བཛྲ་དྷ་ར་ཨ་དྷི་པ་ཏི་བཛྲ་ཨ་བྷི་ཥིཉྩ་ཧྲཱིཿ ཞེས་རྡོ་རྗེ་ལག་གཡས་སུ་གཏད། ལས་ཀྱི་དྲིལ་བུ་ཕྱག་གཡོན་དུ་གཏད་པས་ཤེས་རབ་སྟོང་བ་ཉིད་གཞོམ་མེད་ཆོས་ཀྱི་སྒྲས་འགྲོ་ཁམས་སད་པར་བྱེད་པའི་མཐུ་ཐོབ་པར་མོས་ཤིག །ཡན་ལག་དྲུག་ཅུའི་དབྱངས་ལྡན་གསུང་༔ རྗེས་སུ་འགྲོ་བའི་ཤེས་རབ་མཆོག༔ མ་རིག་སད་པའི་དྲིལ་བུ་ཆེ༔ ཀརྨ་གཎྜེ་ཨ་བྷེ་ཥེཉྩ་ཨཱཿ ཞེས་དྲིལ་བུ་ལག་གཡོན་དུ་གཏད། མིང་གི་དབང་བསྐུར་བས་རྡོ་རྗེའི་མཚན་གྱིས་ས་གསུམ་དུ་གྲགས་པའི་དབང་ཐོབ་པར་མོས་ཤིག །དུས་གསུམ་སངས་རྒྱས་ཐམས་ [110a] ཅད་ཀྱི༔ རྡོ་རྗེའི་མིང་ནི་བླ་ན་མེད༔ ས་གསུམ་ཀུན་ཏུ་གྲགས་པ་ཡི༔ རིག་པ་འཛིན་ཞེས་བྱའོ༔ རྡོ་དྲིལ་བསྣོལ་མ་སྤྱི་བོར་དཀྲོལ་ཞིང་། ཨོཾ་སརྦ་ཏ་ཐཱ་ག་ཏ་བིདྱ་དྷ་ར་ཡཱ་མི་ཨ་བྷི་ཥིཉྩ་ཨོཾ༔ དེ་དག་གིས་མ་རིག་པ་ལས་གྱུར་པའི་སྒྲིབ་པ་ལྔ་དག །རིག་པ་ཡེ་ཤེས་ལྔ་ཡི་ས་བོན་གསོས་བཏབ་པས་ན་རིག་པའི་དབང་ཞེས་བྱའོ། །དེ་ནས་སྐུ་ཕྱག་རྒྱའི་དབང་བསྐུར་བ་ལ། མདུན་བསྐྱེད་དཀྱིལ་འཁོར་རིག་འཛིན་གཙོ་འཁོར་རྣམས་ཀྱི་སྐུ་ལས་ཡེ་ཤེས་ཀྱི་སྣང་བརྙན་གཉིས་པ་རེ་འཕྲོས་ཏེ་ཁྱེད་རང་རྣམས་ཀྱི་གནས་རྣམས་སུ་ཐིམ་པར་མོས་ཤིག ། སྐུ་ཙཀ་རྣམས་རིམ་པར་ཐོགས་ལ། ཧཱུྃཿ ཆོས་སྐུའི་སྟོན་མཆོག་འོད་མི་འགྱུར༔ ཀུན་ཏུ་བཟང་པོ་ཡབ་ཡུམ་གྱིས༔ རིགས་ཀྱི་བུ་ལ་དབང་བསྐུར་བས༔ གཟུང་འཛིན་དབྱིངས་སུ་ཐིམ་པར་ཤོག༔ ཨོཾ་གུ་རུ་ས་མནྟ་བྷ་དྲ་ཨ་བྷི་ཥིཉྩ་ཨོཾ༔ ཨཱཿ ལོངས་སྐུའི་སྟོན་མཆོག་དཀྱིལ་འཁོར་བདག༔ རྡོ་རྗེ་སེམས་དཔའ་ཡབ་ཡུམ་གྱིས༔ རིགས་ཀྱི་བུ་ལ་དབང་བསྐུར༴ རིག་པའི་ཡེ་ཤེས་རང་སྣང་ཤོག༔ ཨོཾ་གུ་རུ་བཛྲ་ས་ཏྭ་ཨ་བྷི་ཥིཉྩ་ཨོཾ༔ ཧཱུྃ༔ སྤྲུལ་སྐུའི་སྟོན་པ་རིག་འཛིན་གཙོ༔ དགའ་རབ་དགྱེས་པ་རྡོ་རྗེ་ཡིས༔ རིགས་ཀྱི་བུ་ལ་དབང་བསྐུར༴ ཡོངས་རྫོགས་མཆོག་གི་ [110b] དབང་ཐོབ་ཤོག༔ ཨོཾ་གུ་རུ་པྲ་ཧེ་བཛྲ་ཨ་བྷི་ཥིཉྩ་ཨོཾ༔ ཧྲཱིཿ སྐུ་གསུམ་དབྱེར་མེད་ཧེ་རུ་ཀ༔ འཇིགས་མེད་ཤྲཱི་སེངྷ་ཡིས༔ རིགས་ཀྱི་བུ་ལ་དབང་༴ རིག་རྩལ་དབང་མཆོག་ཐོབ་པར་ཤོག༔ ཨོཾ་གུ་རུ་ཤྲཱི་སེངྷ་ཨ་བྷི་ཥིཉྩ་ཨོཾ༔ ཧྲཱིཿ ལུང་རྒྱུད་མན་ངག་ཀུན་གྱི་བདག༔ རྒྱལ་ཆེན་ཨིནྡྲ་བྷུ་ཏི་ཡིས༔ རིགས་ཀྱི་བུ་ལ་དབང་༴ གླེགས་བམ་དབང་མཆོག་ཐོབ་པར་ཤོག༔ ཨོཾ་གུ་རུ་ཨིནྡྲ་ཨ་བྷ་ཥིཉྩ༴ ཧྲཱིཿ རྩ་གསུམ་རྒྱ་མཚོའི་ཁྱབ་བདག་ཆེ༔ འཆི་མེད་པདྨ་འབྱུང་གནས་ཀྱིས༔ རིག་ཀྱི་བུ་ལ༴ རབ་འབྱམས་དབང་མཆོག་ཐོབ་པར་ཤོག༔ ཨོཾ་གུ་རུ་པདྨ་སམྦྷ་ཝ་ཨ་བྷི༴ ཧྲཱིཿ པཎ་གྲུབ་ལྔ་བརྒྱའི་གཙུག་གི་རྒྱན༔ སློབ་དཔོན་བི་མ་མི་ཏྲ་ཡིས༔ རིགས་ཀྱི་བུ་ལ༴ བཤེས་གཉེན་དབང་མཆོག་ཐོབ་པར་ཤོག༔ ཨོཾ་གུ་རུ་བི་མ་ལ་མི་ཏྲ་ཨ་བྷི༴ ཧྲཱིཿ སྣང་བཞི་མཐར་ཕྱིན་ཡེ་ཤེས་སྐུ༔ པཎ་ཆེན་ཛྙཱ་ན་སཱུ་ཏྲ་ཡིས༔ རིགས་ཀྱི་བུ༴ དགོངས་ཀློང་དབང་མཆོག་ཐོབ་པར་ཤོག༔ ཨོཾ་གུ་རུ་ཛྙཱ་ན་སཱུ་ཏྲ་ཨ་བྷི༴ ཧྲཱིཿ ཡང་དག་གྲུབ་པའི་ཐེག་ལེའི་སྐུ༔ སློབ་དཔོན་རྡོ་རྗེ་ཧཱུྃ་ཀ་རས༔ རིགས་ཀྱི་བུ༴ མེ་ལོང་ཡེ་ཤེས་མངོན་གྱུར་ཤོག༔ ཨོཾ་གུ་རུ་ཧཱུྃ་ཀ་ར་ཨ་བྷི༴ ཧཱུྃཿ བཅོམ་ལྡན་འཇམ་དཔལ་གཤིན་རྗེ་ [111a] དངོས༔ སློབ་དཔོན་ཁྲག་འཐུང་ནག་པོ་ཡིས༔ རིགས་ཀྱི་བུ༴ མཉམ་ཉིད་ཡེ་ཤེས་མངོན་གྱུར་ཤོག༔ ཨོཾ་གུ་རུ་ཧེ་རུ་ཀ་ཀཱ་ཡ་ཨ་བྷི་ཥིཉྩ༴ ཧྲཱིཿ དབང་ཆེན་རྟ་མཆོག་རོལ་བའི་གར༔ སློབ་དཔོན་ནཱ་གརྫུ་ན་ཡིས༔ རིགས་ཀྱི་བུ༴ སོར་རྟོག་ཤེས་མངོན་གྱུར་ཤོག༔ ཨོཾ་གུ་རུ་ནཱ་གརྫུ་ན་ཨ་བྷི༴ ཧྲཱིཿ ཕྲིན་ལས་ལྷ་དང་གཉིས་སུ་མེད༔ སློབ་དཔོན་པྲ་ཆེན་ཧསྟི་ཡིས༔ རིགས་ཀྱི༴ བྱ་གྲུབ་ཡེ་ཤེས་མངོན་གྱུར་ཤོག༔ ཨོཾ་གུ་རུ་པྲ་བྷ་ཧསྟི་ཨ་བྷི༴ ཧྲཱིཿ སྲིད་པ་མ་མོའི་འཁོར་ལོས་བསྒྱུར༔ སློབ་དཔོན་དྷ་ན་སཾ་སྐྲྀ་ཏས༔ རིགས་ཀྱི༴ མཐའ་གྲོལ་ཡེ་ཤེས་མངོན་གྱུར་ཤོག༔ ཨོཾ་གུ་རུ་དྷ་ན་སཾ་སྐྲྀ་ཏ་ཨ༴ ཧྲཱིཿ རིག་འཛིན་ཌཱ་ཀིའི་འཁོར་ལོས་སྒྱུར༔ མཁའ་འགྲོ་ལས་ཀྱི་དབང་མོ་ཆེས༔ རིགས་ཀྱི༴ ཕྱག་རྒྱའི་ཡེ་ཤེས་མངོན་གྱུར་ཤོག༔ ཨོཾ་གུ་རུ་ཀརྨ་ཨིནྡྲ་ནཱི་ལ༴ ཧྲཱིཿ དྲེགས་པ་ཟིལ་གནོན་སྟོབས་ཀྱི་བདག༔ སློབ་དཔོན་རམྦུ་གུ་ཧྱ་ཡིས༔ རིགས་ཀྱི༴ དབྱིངས་གྲོལ་ཡེ་ཤེས་མངོན་གྱུར་ཤོག༔ ཨོཾ་གུ་རུ་རམྦུ་གུ་ཧྱ་ཨ༴ ཧྲཱིཿ དྲག་སྔགས་དམོད་པའི་འཁོར་ལོས་སྒྱུར༔ སློབ་དཔོན་ཤིཾནྟ་གརྦྷ་ཡིས༔ རིགས་ཀྱི༴ མཐའ་གྲོལ་ཡེ་ཤེས་མངོན་གྱུར་ [111b] ཤོག༔ ཨོཾ་གུ་རུ་ཤིཾནྟ་གརྦྷ་ཨ་བྷི་ཥིཉྩ་ཨོཾ༔ ཞེས་བསྐུར། ལྷ་དང་དབྱེར་མེད་རིག་འཛིན་རོལ་པའི་སྐུ་ཕྱག་རྒྱའི་དབང་བསྐུར་བས༔ དེང་ཕྱིན་ཆད་ཇི་ལྟར་སྣང་ཞིང་བཏགས་པའི་ཆོས་ཐམས་ཅད་སྐུ་རྡོ་རྗེ་སྣང་སྟོང་ཟུང་འཇུག་གི་ཡེ་ཤེས་ཆེན་པོར་རང་ཤར་དུ་འཆར་བར་གྱུར་ཅིག༔ གསུང་བཟླས་པའི་ལུང་གི་སླད་དུ། ཁྱེད་རང་གི་ཐུགས་ཀར་ཡེ་ཤེས་སེམས་པའི་ཐུགས་མཆོང་གུར་སྨུག་པོའི་ཀློང་དུ་ཉི་ཟླའི་གྭའུའི་དབུས་སུ་ཧྲཱིཿདམར་པོའི་མཐར་སྔགས་ཀྱི་ཕྲེང་བས་བསྐོར་བ་དང་། བླ་མ་དཀྱིལ་འཁོར་པའི་ལྷ་ཚོགས་ཀྱི་ཐུགས་ཀ་ནས་སྔགས་ཕྲེང་གཉིས་པ་འཕྲོས། ཞལ་ནས་ཐོན་ཁྱེད་རང་གི་ཞལ་དུ་ཞུགས་ཐུགས་སྲོག་གི་མཐར་འཁོར་པ་དང་། དེ་ལས་འོད་ཟེར་འཕྲོས་རྩ་གསུམ་རྒྱལ་བ་རབ་འབྱམས་རིག་འཛིན་བླ་མ་རྣམས་ཀྱི་ཐུགས་རྒྱུད་བསྐུལ། གསང་བ་གསུམ་གྱི་བྱིན་རླབས་ལྷ་སྔགས་ཕྱག་མཚན་འོད་ཟེར་གྱི་རྣམ་པར་བསྡུས་ཏེ་ཐུགས་ཀའི་སྔགས་ཕྲེང་ལ་ཐིམ་པར་མོས་ལ་སྔགས་འདིའི་རྗེས་ཟློས། བསྙེན་སྒྲུབ་ལས་གསུམ་གྱི་རྩ་སྔགས་ལན་གསུམ་རེ་རྗེས་ཟློས་བྱ། དེ་བརྟན་པར་བྱ་བའི་ཕྱིར་སྔགས་ཕྲེང་མགྲིན་པར་བཞག་ལ། ཨཿ རིག་འཛིན་རོལ་བའི་ལྷ་ཚོགས་ཀྱི༔ བསྙེན་སྒྲུབ་ལས་སྦྱོར་རྡོ་རྗེའི་སྔགས༔ རིགས་ཀྱི་བུ་ལ་སྦྱིན་པ་ཡིས༔ གྲགས་སྟོང་རང་གྲོལ་དབང་ཐོབ་ཤོག༔ ཨོཾ་སརྦ་མ་ [112a] ཧཱ་གུ་རུ་ཝཱ་ཀ་ཨ་བྷི༴ སྔགས་དང་དབྱེར་མེད་པའི་རིག་འཛིན་རོལ་པའི་གསུང་བཟླས་པའི་དབང་བསྐུར་བས། དེང་ཕྱིན་ཆད་འདི་ལྟར་སྒྲར་སྣང་ཞིང་གྲགས་པའི་ཆོས་ཀུན་གསུང་རྡོ་རྗེ་གྲགས་སྟོང་ཟུང་འཇུག་གི་ཡེ་ཤེས་ཆེན་པོར་རང་ཤར་དུ་འཆར་བར་གྱུར་ཅིག༔ ཐུགས་ཀྱི་དབང་གི་སླད་དུ། མེ་ལོང་དུ་རྡོ་རྗེའི་གཟུགས་བརྙན་ཤར་བའི་བརྡ་འདིས་མཚོན་ཏེ་རང་རིག་སྟོང་གསལ་ཟུང་འཇུག་མི་འགྱུར་གཉུག་མའི་ངང་དུ་མཉམ་པར་བཞག་པས་སྐྱེ་མེད་དོན་གྱི་དགོངས་པ་མངོན་དུ་རྫོགས་པར་མོས་ཤིག །མེ་ལོང་དུ་རྡོ་རྗེའི་གཟུགས་བརྙན་ཤར་བ་བསྟན་ལ། ཧཱུྃ༔ མི་འགྱུར་སྟོང་ཉིད་རྡོ་རྗེའི་དབྱིངས༔ རིག་པ་མེ་ལོང་གཟུགས་བཞིན་སྣང་༔ ཟུང་འཇུག་བརྡ་ཡི་དབང་བསྐུར་བས༔ དབྱེར་མེད་ངེས་དོན་རྟོགས་པར་ཤོག༔ ཨོཾ་སརྦ་མ་ཧཱ་གུ་རུ་ཙིཏྟ་ཨ་བྷི་ཥིཉྩ་ཧཱུྃ༔ ཆོས་ཉིད་བསམ་གྱིས་མི་ཁྱབ་པ་དང་དབྱེར་མེད་པ་རིག་འཛིན་རོལ་བའི་ཐུགས་དགོངས་པའི་དབང་བསྐུར་བས༔ དེང་ཕྱིན་ཆད་ཇི་ལྟར་གཟུང་ཞིང་འཛིན་པའི་ཆོས་ཀུན་ཐུགས་རྡོ་རྗེ་རིག་སྟོང་ཟུང་འཇུག་གི་ཡེ་ཤེས་ཆེན་པོ་རང་ཤར་དུ་འཆར་བར་གྱུར་ཅིག༔ ཡོན་ཏན་ཡོངས་རྫོགས་རྡོ་རྗེ་སློབ་དཔོན་མཆོག་ཏུ་འོས་པའི་ཡོ་བྱད་རྣམས་ཀྱིས་མངའ་གསོལ་ [112b] ཞིང་དབང་བསྐུར་བས་ཆེ་བའི་ཡོན་ཏན་མ་བཙལ་ལྷུན་གྱིས་རྫོགས་པར་མོས་ཤིག །གདན་ཁྲི་སོགས་ཚིག་གསལ་བཞིན་དང་། ལག་ཏུ་རྡོ་དྲིལ། སྤྱི་བོར་ལྷ་ཙཀ་ཡོངས་རྫོགས་སྦམ་སྟེ་བཀོད་ལ། ཨོཾཿ རང་སྣང་རྣམ་དག་ཡེ་ཤེས་ཕོ་བྲང་ཆེར༔ སེང་ཁྲི་པདྨ་ཉི་ཟླའི་གདན་སྟེང་དུ༔ སློབ་མ་རིགས་འདུས་ཤྲཱི་སེངྷ་རྩལ༔ དཀྱིལ་འཁོར་རྒྱ་མཚོའི་བདག་པོར་བཞུགས་པ་ཡི༔ སྟེང་དུ་གདུགས་ཕུབ་གཡས་གཡོན་རྒྱལ་མཚན་འཕྱར༔ དམ་ཚིག་གསུམ་ལྡན་རྡོ་རྗེ་དྲིལ་བུ་འཁྱུད༔ ཡེ་ཤེས་དཀྱིལ་འཁོར་རབ་འབྱམས་ཐམས་ཅད་ཀྱི༔ ཡི་དམ་ལྷ་དང་དབྱེར་མེད་དབང་བསྐུར་བས༔ དགོངས་པ་མི་འགྱུར་ལྷ་ཚོགས་རང་ལ་རྫོགས༔ རིག་རྩལ་རོལ་པ་དོན་གྱི་དབང་ཐོབ་ནས༔ ཀུན་བཟང་རྡོ་རྗེ་འཛིན་པའི་ས་ཐོབ་ཤོག༔ ཨོཾ་བཛྲ་མ་ཧཱ་གུ་རུ་སརྦ་མཎྜ་ལ་ཛྙཱ་ན་ཀཱ་ཡ་ཨ་བྷི་ཥིཉྩ་ཨོཾ༔ ནང་རྒྱུད་ཡོ་ག་གསུམ་གྱི་གླེགས་བམ་གཅེས་བཏུས་ལག་ཏུ་གཏད་ལ། ཨཱཿ རྒྱུད་ལུང་མན་ངག་དམ་པའི་མཛོད་གསུམ་གྱི༔ ཆོས་བཀའ་གཏད་པ་གླེགས་བམ་དབང་བསྐུར་བས༔ ལུང་བསྟན་རྡོ་རྗེའི་ཡེ་ཤེས་རྒྱུད་ལ་ཤར༔ རབ་འབྱམས་ཆོས་སྒོ་འབྱེད་པའི་དབང་ཐོབ་ཤོག༔ ཨཱཿསརྦ་ཏནྟྲ་དྷརྨ་ཝཱ་ཀ་ཨ་བྷི་ཥིཉྩ་ཨཱཿཆས་གོས་རྣམས་ཚིག་གསལ་བཞིན་གཏད་ལ། ཧཱུྃཿ ཆོས་ [113a] གོས་རྣམ་གསུམ་དར་དང་རིན་ཆེན་བརྒྱན༔ བེར་ཕོད་པདྨའི་སྙན་ཞུས་མངའ་གསོལ་བས༔ སྡོམ་པ་གསུམ་ལྡན་སྡེ་སྣོད་རྒྱུད་སྡེའི་བདག༔ དགེ་བའི་བཤེས་གཉེན་དབང་མཆོག་ཐོབ་པར་ཤོག༔ ཧཱུྃ་མ་ཧཱ་ཨ་ཙརྻ་ཙིཏྟ་ཨ་བྷི་ཥིཉྩ་ཧཱུྃ༔ རྣམ་བུམ་སྤྱི་བོར་བཞག་ལ། ཧོཿ བཀྲ་ཤིས་བུམ་པ་ལྷ་ཡི་གཞལ་ཡས་ཁང་༔ རྩ་གསུམ་འོད་ཞུ་བདེ་ཆེན་བདུད་རྩིས་གཏམས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཡོན་ཏན་ཡོངས་རྫོགས་མཆོག་གི་དབང་ཐོབ་ཤོག༔ ཨོཾ་ཨཱཿཧཱུྃ་སརྦ་ཏ་ཐཱ་ག་ཏ་ཛྙཱ་ན་ཨ་བྷི་ཥིཉྩ་ཧོཿ ཞེས་བུམ་ཆུ་སྦྱིན། བྲལ་བ་དང་རྣམ་པར་སྨིན་པ་དང་དབྱེར་མེད་རིག་འཛིན་རོལ་པའི་ཡོན་ཏན་གྱི་དབང་བསྐུར་བས༔ དེང་ཕྱིན་ཆད་འདི་ལྟར་སྣང་བའི་ཡུལ་ཐམས་ཅད་ཡོན་ཏན་རྡོ་རྗེ་གསལ་སྟོང་ཟུང་འཇུག་གི་ཡེ་ཤེས་ཆེན་པོར་ལྷུན་གྱིས་གྲུབ་པར་གྱུར་ཅིག༔ ཕྲིན་ལས་སྒོམ་སྒྲུབ་འཆད་ཕྲིན་གྱི་ཆས་རྣམས་གཏད་པས་རྒྱལ་བ་གདུང་འཚོབ་དོན་གཉིས་ལྷུན་གྱིས་འགྲུབ་པའི་མཐུ་དབང་ལ་མངའ་བརྙེས་པར་མོས་ཤིག ། སྐུ་དང་བགྲང་ཕྲེང་གླེགས་བམ་སྣ་ཚོགས་རྡོ་རྗེ་རྣམས་གཏད་ལ། ཧཱུྃཿ རྩ་གསུམ་ལྷ་བསྒོམ་རྩེ་གཅིག་སྒྲུབ་པ་དང་༔ གཞན་དོན་འཆད་འཕྲིན་རབ་འབྱམས་དབང་བསྐུར་བས༔ རྒྱལ་བའི་གདུང་འཚོབ་འགྲོ་ [113b] བའི་ཁ་ལོ་བསྒྱུར༔ དོན་གཉིས་ལྷུན་གྲུབ་ཕྲིན་ལས་མཐར་ཕྱིན་ཤོག༔ ཨོཾ་ཨཱཿཧཱུྃ་སརྦ་ཏ་ཐཱ་ག་ཏ་ཛྙཱ་ན་ཀརྨ་ཨ་བྷི་ཥིཉྩ་ཨ༔ དུས་གསུམ་བདེ་བར་གཤེགས་པ་ཐམས་ཅད་ཀྱི་མཛད་པ་དང་དབྱེར་མེད་པ་རིག་འཛིན་རོལ་བའི་ཕྲིན་ལས་ཀྱི་དབང་བསྐུར་བས༔ དེང་ཕྱིན་ཆད་བྱེད་སྤྱོད་ཐམས་ཅད་ཕྲིན་ལས་རྡོ་རྗེ་ཚོར་སྟོང་ཟུང་འཇུག་གི་ཡེ་ཤེས་ཆེན་པོར་རང་ཤར་དུ་སྣང་བར་གྱུར་ཅིག༔ ཧོཿ བཀྲ་ཤིས་བུམ་པ་འཁོར་དང་བཅས་པའི་དབང་བསྐུར་བས༔ སློབ་མ་ཐམས་ཅད་ལྷ་རུ་འགྱུར་ཞིང་ལྷ་ཐམས་ཅད་སྣང་སྟོང་གི་ཡེ་ཤེས་སུ་རྟོགས་པར་གྱུར་ཅིག༔ ཅེས་མེ་ཏོག་འཐོར། ཧོཿ སྐུ་གསུམ་སྟོན་པ་བླ་མ་རིག་འཛིན་ཡོངས་རྫོགས་ཀྱི་ཕྱི་མཚན་མའི་དཀྱིལ་འཁོར་དུ༔ སྤྲོས་བཅས་བུམ་པའི་དབང་བསྐུར་བས༔ སྐལ་ལྡན་རིག་པ་འཛིན་པ་རྣམས་ཀྱི་ཕུང་ཁམས་སྐྱེ་མཆེད་ཐ་མལ་སྣང་ཞེན་གྱི་དྲི་མ་བག་ཆགས་དང་བཅས་པ་ཐམས་ཅད་བྱང་ཞིང་དག་ནས༔ ལམ་སྣང་སྲིད་གཞིར་བཞེངས་རང་བྱུང་གི་དཀྱིལ་འཁོར་བསྒོམ་པ་ལ་དབང་༔ འབྲས་བུ་སྐུ་རྡོ་རྗེ་སྤྲུལ་པའི་སྐུ་འགྲུབ་པའི་སྐལ་པ་དང་ལྡན་པར་གྱུར་ཅིག༔ གསང་བའི་དབང་གི་སླད་དུ། བླ་མ་རིག་འཛིན་ཡོངས་རྫོགས་ཀྱི་ལྷ་ཚོགས་མཉམ་པར་སྦྱོར་བའི་བྱང་སེམས་བདུད་རྩིའི་རྒྱུན་ལྕེ་ཐོག་ཏུ་བཞག་པར་མོས་ཤིག ། [114a] ཐོད་པའི་བདུད་རྩི་སྦྱིན་ལ། ཧཱུྃཿ དབྱིངས་ཀྱི་བྷནྡྷ་ཡངས་པ་རུ༔ རིག་པ་བདེ་སྟོང་ལྷ་ཚོགས་སྦྱོར༔ ཟུང་འཇུག་བདེ་ཆེན་བདུད་རྩིའི་དབང་༔ བདེ་ཆེན་ཡོངས་སུ་བསྐྱེད་ཕྱིར་བསྐུར༔ བོ་དྷི་ཙིཏྟ་ཨ་བྷི་ཥིཉྩ་ཧཱུྃ༔ ཧོཿ བདེ་བ་ཆེན་པོ་བྱང་ཆུབ་སེམས་ཀྱི་བདུད་རྩིས་དབང་བསྐུར་བས་ཕུང་ཁམས་ཐམས་ཅད་ལྷར་དག་སྟེ་བདེ་གསལ་ཡེ་ཤེས་མངོན་དུ་འབར་བར་གྱུར་ཅིག༔ ཅེས་མེ་ཏོག་འཐོར། ཧོཿ སྐུ་གསུམ་སྟོན་པ་བླ་མ་རིག་འཛིན་ཡོངས་རྫོགས་ཀྱི་ལུས་ཀྱི་དཀྱིལ་འཁོར་དུ༔ སྤྲོས་མེད་གསང་བའི་དབང་བསྐུར་བས༔ སྐལ་ལྡན་རིག་པ་འཛིན་པ་རྣམས་ཀྱི་ངག་རླུང་འཕོ་བཅས་ཀྱི་དྲི་མ་བག་ཆགས་དང་བཅས་པ་ཐམས་ཅད་བྱང་ཞིང་དག༔ ལམ་གསལ་སྟོང་བདག་བྱིན་རླབས་ཀྱི་རིམ་པ་བསྒོམ་པ་ལ་དབང་༔ འབྲས་བུ་གསུང་རྡོ་རྗེ་ལོངས་སྐུ་འགྲུབ་པའི་སྐལ་པ་དང་ལྡན་པར་གྱུར་ཅིག༔ ཤེས་རབ་ཡེ་ཤེས་ཀྱི་དབང་གི་སླད་དུ། གཟུགས་དང་ལང་ཚོ་མཚན་ཉིད་ཡོངས་སུ་རྫོགས་པའི་ཤེས་རབ་མ་ཕྱག་རྒྱའི་དོན་དུ་གཏད་པར་མོས་ཤིག །རིག་མའི་གཟུགས་བརྙན་ནམ་དྲིལ་བུ་གཏད་ལ། ཧཱུྃཿ བཀྲ་ཤིས་མཚན་ལྡན་གཟུངས་མ་འདི༔ བསྟེན་ན་བདེ་བ་ཆེན་པོ་རྟོགས༔ འདི་སྤངས་སངས་རྒྱས་ཐོབ་འདོད་མིན༔ བདེ་ཆེན་ངལ་མེད་རྟག་ཏུ [114b] རོལ༔ མ་ཧཱ་སུ་ཁ་ཨ་བྷི་ཥིཉྩ་ཧཱུྃ༔ ཧོཿ བདེ་སྐྱིད་ཡུམ་གྱི་དབང་བསྐུར་བས་རྟོག་ཚོགས་ཐམས་ཅད་བདེ་བ་ཆེན་པོར་དག་སྟེ༔ བདེ་ཆེན་ཡེ་ཤེས་ཀློང་དུ་འགྱུར་བར་གྱུར་ཅིག༔ ཅེས་མེ་ཏོག་འཐོར། ཧོཿ སྐུ་གསུམ་སྟོན་པ་བླ་མ་རིག་འཛིན་ཡོངས་རྫོགས་ཀྱི་ཡུམ་གསང་བ་བྷ་གའི་དཀྱིལ་འཁོར་དུ༔ ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་བསྐུར་བས༔ སྐལ་ལྡན་རིག་པ་འཛིན་པ་རྣམས་ཀྱི་ཡིད་ཐིག་ལེའི་དྲི་མ་བག་ཆགས་དང་བཅས་པ་ཐམས་ཅད་བྱང་ཞིང་དག༔ ལམ་གཞན་ལུས་ཕོ་ཉའི་རྣལ་འབྱོར་བསྒོམ་པ་ལ་དབང་༔ འབྲས་བུ་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་སྐལ་བ་དང་ལྡན་པར་གྱུར་ཅིག༔ དབང་བཞི་པའི་སླད་དུ། རྡོ་རྗེ་སེམས་དཔའི་མེ་ལོང་འདིའི་བརྡས་མཚོན་ཏེ་སེམས་ཉིད་སྟོང་གསལ་རང་བྱུང་གི་ཡེ་ཤེས་སུ་ངོ་སྤྲད་པས་ཀ་དག་སྐྱེ་མེད་རིག་པ་རྩལ་གྱི་དབང་ཆེན་ལ་མངའ་བརྙེས་པར་མོས་ཤིག །ཤེལ་རྡོ་ཐོགས་ལ། ཧཱུྃཿ སེམས་ཉིད་མ་བཅོས་ཀ་ནས་དག༔ སྟོང་གསལ་རང་བྱུང་ཡེ་ཤེས་རྩལ༔ ལྷུན་གྱིས་གྲུབ་པ་མེ་ལོང་བཞིན༔ རིག་རྩལ་མཆོག་གི་དབང་ཐོབ་ཤོག༔ དྷརྨ་དྷཱ་ཏུ་ཨ་བྷི་ཥིཉྩ་ཨཱཿ ཧོཿ རྡོ་རྗེ་སེམས་དཔའི་མེ་ལོངས་གི་དབང་བསྐུར་བས༔ མི་གནས་ཡེ་ཤེས་ཀྱི་རྟོགས་པ་མངོན་དུ་འགྱུར་བར་གྱུར་ཅིག༔ ཅེས་མེ [115a] ཏོག་འཐོར། ཧོཿ སྐུ་གསུམ་སྟོན་པ་བླ་མ་རིག་འཛིན་ཡོངས་རྫོགས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་རབ་ཏུ་སྤྲོས་མེད་བཞི་པའི་དབང་བསྐུར་བས༔ སྐལ་ལྡན་རིག་པ་འཛིན་པ་རྣམས་ཀྱི་སྒོ་གསུམ་སྙོམས་འཇུག་གི་དྲི་མ་བག་ཆགས་དང་བཅས་པ་ཐམས་ཅད་བྱང་ཞིང་དག༔ ལམ་རིག་སྟོང་ཟུང་འཇུག་རྫོགས་པ་ཆེན་པོ་བསྒོམ་པ་ལ་དབང་༔ འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་འགྲུབ་པའི་སྐལ་པ་དང་ལྡན་པར་གྱུར་ཅིག༔ མཐའ་རྟེན་བཀྲ་ཤིས་ཚེ་ཡི་དབང་བསྐུར་བ་ལ། ཚེ་འགུགས་པའི་སླད་དུ་ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་འཕྲོས་པས་རང་གཞན་གྱི་བླ་ཚེ་ཆད་ཉམས་ཡར་བ་དང་། འཁོར་འདས་ཀྱི་ཚེ་བཅུད་ཐམས་ཅད་འོད་ཟེར་བདུད་རྩིའི་རྣམ་པར་བསྡུས་ནས་ཁྱེད་རང་རྣམས་ལ་ཐིམ་པས་འཆི་མེད་ཚེའི་དངོས་གྲུབ་ཐོབ། མདུན་གྱི་ཚེ་རྫས་རྣམས་ལ་ཐིམ་པས་རྡོ་རྗེའི་ཚེའི་བཅུད་ལེན་དུ་གྱུར་པར་མོས་ཤིག ། མདའ་དར་གཡབ་ལ། ཧཱུྃཿ བདུད་རྩི་གང་རྒྱ་སྨན་གྱི་ལུང་༔ ཞེས་སོགས་ཚེ་ལུང་ནས་འབྱུང་བཞིན་བརྗོད་ལ། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་ཨ་ཡུརྫྙཱ་ན་སརྦ་སིདྡྷི་ཧཱུྃ༔ ཞེས་བསྐུལ། ཚེའི་འབྲང་རྒྱས་རིག་འཛིན་ཚེ་ལྷའི་དཀྱིལ་འཁོར་དུ་གསལ་བ་སྤྱི་བོར་སྤྱན་དྲངས་པས་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ [115b] ལུས་པ་ཐོབ་པར་མོས་ཤིག ། ཚེ་འབྲང་ཐོགས་ལ། ཧྲཱིཿ ཟླ་གམ་དབང་ཆེན་གཞོན་ནུ་བུམ་སྐུའི་དབྱིངས༔ ཡེ་ཤེས་རང་སྣང་འཆི་མེད་ལྷ་ཚོགས་བཞུགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཚེ་དང་ཡེ་ཤེས་སྣང་བ་རྒྱས་པར་ཤོག༔ ཚེ་སྔགས་མཐར། ཀཱ་ཡ་ཝཱ་ཀ་ཙིཏྟ་བཛྲ་ཨཱ་ཡུ་ཥེ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བཞག ། ཐབས་མི་འགྱུར་བའི་བདེ་བ་ཆེན་པོ་དང་ཤེས་རབ་སྟོང་པ་ཉིད་ཟུང་དུ་འཇུག་པའི་ཚེ་ལ་མངའ་བརྙེས་པར་མོས་ཤིག ། ཅེས་ཚེ་སྔགས་བཟླ་བཞིན་ཚེ་རིལ་ཆང་སྦྱིན། སླར་ཡང་ཚེ་འབྲང་སྤྱི་བོར་བཞག་སྟེ། རིག་འཛིན་ཚེ་ལྷའི་དཀྱིལ་འཁོར་གྱི་ལྷ་ཚོགས་ལས་རང་འདྲ་གཉིས་པ་ཆད་དེ་ཁྱེད་རང་རྣམས་ལ་ཐིམ་པས་གཉིས་མེད་དུ་གྱུར་པར་མོས་ཤིག ། ཛཿཧཱུྃ་བྃ་ཧོཿ ཞེས་བསྟིམ། ཧཱུྃཿ ཚེ་བཅུད་སྙིང་དབུས་སོགས་ཚེ་ལུང་ལྟར་བརྗོད་ལ་རྒྱས་གདབ། བཀྲ་ཤིས་པའི་རྫས་རྟགས་བརྒྱད་དང་རིན་ཆེན་སྣ་བདུན་གྱིས་མངའ་གསོལ་ཞིང་ཤིས་པ་བརྗོད་པས་བདེ་ལེགས་སུ་བྱས་པར་མོས་ཤིག །ཅེས་སྤྱི་འགྲོའི་ཚིག་གིས་སྦྱིན་ཅིང་ཤིས་བརྗོད་ཅི་རིགས་བྱ། དེ་རྣམས་ཀྱིས་གསང་སྐོར་བླ་མ་རིག་འཛིན་ཡོངས་རྫོགས་ཀྱི་སྨིན་བྱེད་མཐའ་རྟེན་དང་བཅས་པ་ལེགས་པར་གྲུབ་པ་ལགས་པས་སོགས་ཀྱིས་མཚམས་སྦྱར་ལ། དམ་ཚིག་ཁས་ལེན། གཏང་རག་མཎྜལ། ལུས་དབུལ། [116a] དགེ་བསྔོ་བཅས་བྱས་ལ་སློབ་མ་གྱེས། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ་བ་སོགས་རྗེས་ཀྱི་བྱ་བ་རྣམས་ཕྲིན་ལས་དཀྱུས་བཞིན་མཐར་དབྱུང་བས་གྲུབ་བོ། །སྐལ་ལྡན་ཡེ༵་ཤེ༵ས་བླ་མའི་སར། །བདེ་མྱུར་དཀྲི་བའི་ལམ་ཟབ་ཕུལ། །རིག་འཛིན་ཡོངས་རྫོགས་སྨིན་བྱེད་ནི། །རྡོ༵་རྗེ༵་སྙིང་པོའི་བཅུད་དུ་གྲུབ། །གསང་སྐོར་བླ་མ་རིག་འཛིན་ཡོངས་རྫོགས་ཀྱི་དབང་གི་ལེའུ་ཚན་ནོ། །།


[117a] སྭསྟི། ཆོས་ཉིད་བཟང་མོའི་མཁའ་ཀློང་ལས། །ཆོས་ཅན་ཞི་ཁྲོའི་སྤྲིན་ཕུང་སྤྲོ། །སྲིད་ཞིའི་ཁྱབ་བདག་དེར་བཏུད་ནས། །གང་དེའི་སྨིན་ལམ་རྣམ་གསལ་དབྱེ། །རྫོགས་པ་ཆེན་པོ་སྡེ་གསུམ་ལས་གསང་སྐོར་ཡི་དམ་ཞི་བའི་དབང་བསྐུར་བ་ལ། སྦྱོར་བ་ཞི་ཁྲོ་སྒྱུ་འཕྲུལ་ལྟ་བུའི་ཞི་དྲག་གཉིས་ཀྱི་དཀྱིལ་འཁོར་གཉིས་བརྩེགས་སུ་བཤམ་པའམ། མ་འབྱོར་ན་མཎྜལ་ལ་ཚོམ་བུ་ལྷ་གྲངས་སོ་སོར་བཀོད་པ་སྟེང་འོག་བརྩེགས་ཏེ་བཤམས་པའི་ཁར། འཕྲུལ་སྟེགས་ཀྱི་ཁར་རྣམ་བུམ་སོ་ལྔའི་བཅུད་ལྡན་བཀོད་པའི་ཁ་རྒྱན་ལ་ཅོད་པན་རྡོ་དྲིལ་མིང་དབང་བཅས་ཀྱི་ཙཀླི་བཙུག་ན་དབང་ལྔ་ཆིག་རྫོགས་ཡིན་པས་སྟབས་བདེ། མདུན་དུ་ཞི་ཁྲོའི་སྐུ་ཙཀ ། གཡས་སུ་གསང་ཐོད། གཡོན་རིག་ཙཀ་དང་། ཤེལ་རྡོ། མེ་ལོང་དར་སྣ་ལྔས་བརྒྱན་པ། རྨ་བྱའི་མདོངས། ཤེལ་ཕྲེང་། རྒྱབ་ཏུ་གཏགས་གྲོལ་ཙཀྲའམ་གླེགས་བམ་དར་སྣས་དྲིལ་བ། མདུན་དུ་དབང་གཏོར་གཙོ་སྐུ་དར་གདུགས་ཅན་བཅས་འགོད། གཞན་ཡང་ཕྱི་ནང་གི་མཆོད་ཚོགས་སོགས་དགོས་པའི་ཡོ་བྱད་རྣམས་འདུ་བྱས་ལ། དབང་དོན་སྒྲུབ་མཆོད་ནི། གསང་སྐོར་ཁྲོ་བའི་བྱང་བུ་ཁྲིགས་བསྡེབས་ཀྱིས་ཁོག་ཕུབ་ནས། ཡི་དམ་ཞི་སྒྲུབ་ཀུན་བཟང་དོན་གྱི་ཕྲིན་ལས་ཉིད་བདག་བསྐྱེད་བྱས་ལ། མདུན་བསྐྱེད་ཞི་ཁྲོ་གནས་འགྱུར་གྱི་མངོན་རྟོགས་ལྟར་ཐོག་མར་ཞི་བ་བསྒོམ་ནས་སྤྱན་འདྲེན་འཆོད་བསྟོད་བར་གྲུབ་པ་དང་། ཧཱུྃཿ སྣང་བ་ཐམས་ཅད་ཞི་བའི་སྐུ༔ གྲགས་པ་ཐམས་ཅད་སྔགས་ཀྱི་དབྱངས༔ རིག་པ་ [117b] རྟོག་མེད་འོད་གསལ་དབྱིངས༔ མཆོད་སྤྲིན་རྒྱ་མཚོས་ཞིང་རྣམས་ཁེངས༔ ཕྲིན་ལས་དུ་མས་འགྲོ་བ་བསྒྲལ༔ མཁའ་ཁྱབ་རྒྱལ་བའི་དཀྱིལ་འཁོར་ཉིད༔ དུ་མ་རོ་གཅིག་ངང་དུ་རྫོགས༔ ཞེས་དམིགས་པའི་འཕྲོ་འདུ་དང་བཅས་ཞི་ཛབ྄་བཟླ། སླར་ཡང་། དེ་ཉིད་ཁྲོ་བོ་གནས་འགྱུར་ནི༔ དབུས་སུ་བྱོལ་སོང་ཁྲི་ལྔའི་སྟེང་༔ སོགས་ནས། དཔལ་གྱི་དཀྱིལ་འཁོར་ཆེན་པོར་གསལ༔ དབང་བསྐུར་ནས་བསྟོད་པའི་བར་བྱང་བུ་རྣམས་གོང་བཞིན་སྦྱར། ཧཱུྃཿ སྣང་བ་ཐམས་ཅད་ཁྲོ་བོའི་སྐུ༔ གྲགས་པ་ཐམས་ཅད་སོགས་གོང་གི་ཞི་བའི་སྐབས་བཞིན་དམིགས་པའི་འཕྲོ་འདུ་དང་བཅས་རུ་ལུ་བཟླས་མཐར། བུམ་བཟླས་ཟུར་དུ་སྤྲོ་ན་སྤྱི་ཁྱབ་ལྟར་བྱ། དེ་ནས་སྲུང་མའི་གཏོར་འབུལ། ཚོགས་མཆོད་བཅས་གྲུབ་ནས། ཏིང་ངེ་འཛིན་གྱི་དབང་བླང་བའམ་རིག་མེ་དོར་ལ་གནང་བ་ནོད། དབང་དངོས་ལ། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམ། སེམས་བསྐྱེད་གསལ་བཏབ་ནས་གོང་གི་གསང་སྐོར་རིག་འཛིན་ཡོངས་རྫོགས་ཀྱི་དབང་བཤད་ལྟར་ལས། དམ་ཆོས་རྫོགས་ཆེན་སྡེ་གསུམ་གྱི་གསང་སྐོར་ཡི་དམ་ཞི་བའི་སྨིན་བྱེད་སྒྲུབ་པར་བགྱི་བ་ལ། བདག་ཉིད་ཀྱིས་བགྱི་འོས་རྣམས་སྔོན་དུ་གྲུབ་སོགས་ཀྱི་མཚམས་སྦྱར་ཏེ་མཎྜལ་འབུལ་དུ་གཞུག ། ཕྱག་སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ [118a] ཟློས། བླ་མ་ཞི་ཁྲོའི་ལྷ་ཚོགས་དགོངས༔ བདག་ནི་མ་རིག་འཁྲུལ་པས་བསྒྲིབ༔ སྒྲིབ་པའི་ཚོགས་རྣམས་བསལ་བར་མཛོད༔ རྗེས་སུ་འཛིན་པར་མཛད་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་སློབ་དཔོན་གྱིས་དམ་ཚིག་གི་གནད་ལ་བཀར་བའི་སྒོ་ནས་ལན་སྦྱིན་པར་བྱ་བ་ཡིན་ཏེ། དེ་ལྟར་ཡིན་ན་ཞི་ཁྲོ་ཡི༔ བླ་མེད་ཡང་གསང་དམ་ཚིག་རྣམས༔ སྲོག་གི་ཕྱིར་ཡང་མི་བཏང་བར༔ ཁྱོད་ཀྱི་ཡང་དག་བྲོ་བོར་ཅིག༔ ཅེས་བསྒོས་པ་ལ་གསང་བའི་དམ་ཚིག་གི་ཚུལ་ལས་ནམ་ཡང་མི་འདའ་འོ་སྙམ་པས་རྡོ་རྗེའི་བྲོ་བོར་པ་འདིའི་རྗེས་ཟློས། ཨི་དན་ན་ར་ཀན༔ དེ་ལ་ཐོག་མར་དབང་གི་གཞི་འགོད་པའི་སླད་དུ་ཁྱེད་རང་རྣམས་སྒོ་གསུམ་གྱི་གནད་གཅུན་ལ་དམིགས་པ་འདི་བཞིན་དུ་མཛོད། སློབ་མ་མ་བཅོས་ཀློང་གསལ་ཀུན་ཏུ་བཟང་པོར་གསལ་བའི་ཐུགས་ཀར་ཡེ་ཤེས་ཀྱི་འཁོར་ལོ་དྲག་ཏུ་འཁོར་བ་ལས་རྒྱལ་བ་ཐམས་ཅད་བྱོན་ནས་ཐིམ་པས་བྱིན་གྱིས་བརླབ་པར་མོས་ཤིག ། ཞི་ཁྲོའི་སྤྱི་སྔགས་མཐར། ཨ་བེ་ཤ་ཡ་ཨ་ཨཱཿཞེས་སྤོས་རོལ་བཅས་དྲག་ཏུ་བརྗོད་ལ་དབབ། བྱིན་དབབ་པའི་ཡེ་ཤེས་པ་དེ་ཉིད་བརྟན་པར་གྱུར་ཅིག ། ཏིཥྛ་བཛྲ། ཞེས་རྡོ་རྗེ་སྤྱི་བོར་རྒྱ་གྲམ་དུ་བཞག ། དེ་ནས་དབང་དངོས་ལ། གནས་ [118b] སུ་དག་པ་ཞི་བའི་དབང་། གནས་སུ་གྱུར་བ་ཁྲོ་བོའི་དབང་། གཉིས་ཀའི་ཐུན་མོང་དུ་མཆོག་གི་དབང་གསུམ་མཐའ་རྟེན་བཅས་རིམ་པར་འབྱུང་བ་ལས། དང་པོའི་སླད་དུ་དམིགས་པ་འདི་བཞིན་དུ་མཛོད། གདན་གསུམ་ཚང་བའི་དབང་ལྷ་ནམ་མཁའ་གང་བར་སད་པ་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་བཅས། རྡོ་རྗེ་མི་བསྐྱོད་པའི་རང་བཞིན་ཅན་གྱི་བུམ་པའི་བདུད་རྩིས་ཁྲུས་བྱས་ཤིང་དབང་བསྐུར། རིན་ཆེན་འབྱུང་ལྡན་གྱི་ངོ་བོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན། སྣང་བ་མཐའ་ཡས་ཀྱི་རང་བཞིན་རྡོ་རྗེ་ཕྱག་གཡས་སུ་གཏད། དོན་ཡོད་གྲུབ་པའི་བདག་ཉིད་དྲིལ་བུ་གཡོན་དུ་གཏད། རྣམ་པར་སྣང་མཛད་ཀྱི་བདག་ཉིད་རྡོ་རྗེ་མིང་གིས་མངོན་པར་དབང་བསྐུར་ཏེ་མངའ་གསོལ་བར་མོས་ཤིག །རྣམ་བུམ་རིག་དབང་ལྔས་མཚན་པ་ཐོགས་ལ། ཧཱུྃ༔ བཀྲ་ཤིས་བུམ་པ་སྣོད་བཅུད་ཡོངས་སུ་རྫོགས༔ རིན་ཆེན་ཅོད་པན་རྒྱལ་པའི་དབང་བསྐུར་ཆེ༔ ཡེ་ཤེས་རྡོ་རྗེ་དང་བཅས་རྒྱལ་བས་འཛིན༔ སངས་རྒྱས་གསུང་དབྱངས་དྲིལ་བུའི་སྒྲ་འཁྲོལ་ཞིང་༔ བཀྲ་ཤིས་མཚན་གྱི་སྙིང་པོས་མངའ་གསོལ་བས༔ རིག་པའི་དབང་ལྔ་དུས་གཅིག་རྫོགས་གྱུར་ཅིག༔ ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨ་བྷི་ཥིཉྩ་ཨཱཿ ཞེས་སྤྱི་བོ་དང་ལག་གཉིས་སུ་བཞག་ལ་བུམ་ཆུ་ [119a] སྦྱིན། དེ་ལྟར་ན་བུམ་པ་ལ་བརྟེན་པའི་རིག་པའི་དབང་ལྔ་ཆིག་རྫོགས་སུ་ཐོབ། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་གྱུར། ཡེ་ཤེས་ལྔ་མངོན་དུ་འགྲུབ་པའི་ནུས་པ་རྒྱུད་ལ་བཞག་པ་ཡིན་ནོ། །དེའི་རྗེས་འབྲེལ་དུ་སྐུ་ཕྱག་རྒྱའི་དབང་གི་སླད་དུ་དཀྱིལ་འཁོར་པའི་ལྷ་ཚོགས་རྣམས་ཀྱི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་འཕྲོས་ཏེ་ཁྱེད་རང་རྣམས་ལ་ཐིམ་པས་དབྱེར་མེད་དུ་གྱུར་པར་མོས་ཤིག །སྐུ་ཙཀ་རྣམས་ཀྱི་དབང་རིམ་པར་བསྐུར་ཞིང་། ཧཱུྃ༔ ཞེ་སྡང་རྣམ་དག་མི་བསྐྱོད་རྡོ་རྗེ་དང་༔ གཏི་མུག་རྣམ་དག་རྣམ་པར་སྣང་མཛད་དང་༔ ང་རྒྱལ་རྣམ་དག་རིན་ཆེན་འབྱུང་ལྡན་དང་༔ འདོད་ཆགས་རྣམ་དག་སྣང་བ་མཐའ་ཡས་དང་༔ ཕྲག་དོག་རྣམ་དག་དོན་ཡོད་གྲུབ་པ་སྟེ༔ རྒྱལ་བ་རིགས་ལྔའི་སྐུ་གསུང་ཐུགས་རྫོགས་ཤོག༔ ཧཱུྃ་ཨོཾ་ཏྲཱཾ་ཧྲཱིཿཨཱཿཨ་བྷི་ཥིཉྩ་ཨོཾ༔ ནམ་མཁའ་རྣམ་དག་ཡུམ་ཆེན་དབྱིངས་ཕྱུག་མ༔ ས་ཁམས་རྣམ་དག་ཡུམ་ཆེན་སངས་རྒྱས་སྤྱན༔ ཆུ་ཁམས་རྣམ་དག་ཡུམ་ཆེན་མཱ་མ་ཀི༔ མེ་ཁམས་རྣམ་དག་ཡུམ་ཆེན་གོས་དཀར་མོ༔ རླུང་ཁམས་རྣམ་དག་ཡུམ་ཆེན་དམ་ཚིག་སྒྲོལ༔ རིགས་ཀྱི་ཡུམ་གྱུར་རྣམས་ཀྱི་དབང་བསྐུར་རོ༔ མཱུྃ་ལཱྃ་མཱྃ་པཱྃ་ཏཱྃ་ཨ་བྷི་ཥིཉྩ་ཨོཾ༔ ཧཱུྃ༔ མིག་དབང་གནས་ [119b] དག་སེམས་དཔའ་ས་ཡི་སྙིང་༔ གཟུགས་ཡུལ་གནས་དག་སེམས་དཔའ་བྱམས་པ་མགོན༔ རྣ་དབང་གནས་དག་སེམས་དཔའ་ནམ་མཁའི་སྙིང་༔ སྒྲ་ཡུལ་གནས་དག་སེམས་དཔའ་སྒྲིབ་པ་སེལ༔ སྣ་དབང་གནས་དག་སེམས་དཔའ་སྤྱན་རས་གཟིགས༔ དྲི་ཡུལ་གནས་དག་སེམས་དཔའ་ཀུན་ཏུ་བཟང་༔ ལྕེ་དབང་གནས་དག་སེམས་དཔའ་འཇམ་པའི་དབྱངས༔ རོ་ཡུལ་གནས་དག་སེམས་དཔའ་རྡོ་རྗེ་འཛིན༔ བྱང་ཆུབ་སེམས་དཔའ་བརྒྱད་ཀྱི་དབང་བསྐུར་རོ༔ ཀྵེཾ་མེེ་ཏྲྃ་ཐླྷིཾ་ཧྲཱིཿཨ་མཱུྃ་ཛེཾ་ཨ་བྷི་ཥིཉྩ་ཧཱུྃ༔ ཧཱུྃ༔ མིག་གི་རྟོག་པ་གནས་དག་ལཱ་སྱ་མ༔ གཟུགས་ཡུལ་རྟོག་པ་གནས་དག་པུཥྤེ་མ༔ རྣ་བའི་རྟོག་པ་གནས་དག་མཱ་ལེ་མ༔ སྒྲ་ཡུལ་རྟོག་པ་གནས་དག་དྷཱུ་པེ་མ༔ སྣ་ཡུལ་རྟོག་པ་གནས་དག་གཱིརྟི་མ༔ དྲི་ཡུལ་རྟོག་པ་གནས་དག་ཨཱ་ལོ་མ༔ ལྩེ་ཡུལ་རྟོག་པ་གནས་དག་ནཱིརྟི་མ༔ རོ་ཡུལ་རྟོག་པ་གནས་དག་གནྡྷེ་མ༔ བྱང་ཆུབ་སེམས་མ་བརྒྱད་ཀྱི་དབང་བསྐུར་རོ༔ ཧཱུྃ་ཧཱུྃ་ཏྲཱྃ་ཏྲཱྃ་ཧྲཱི་ཧྲཱི་ཨ་ཨ་ཨ་བྷི་ཥིཉྩ་ཧཱུྃ༔ ལྷ་ཡི་རྟོག་པ་གནས་དག་བརྒྱ་བྱིན་དབང༔ ལྷ་མིན་རྟོག་པ་གནས་དག་ཐག་བཟང་རིས༔ མི་ཡི་རྟོག་པ་གནས་དག་ཤཱཀྱ་ཐུབ༔ བྱོལ་སོང་རྟོག་པ་གནས་དག་སེང་རབ་བརྟན༔ ཡི་དྭགས་རྟོག་པ་གནས་དག་ཁ་འབར་མ༔ དམྱལ་ [120a] བའི་རྟོག་པ་གནས་དག་ཆོས་ཀྱི་རྒྱལ༔ འགྲོ་འདུལ་ཐུབ་པ་དྲུག་གི་ བསྐུར་རོ་༔ ཀྲེཾ་ཏྲུྃ་ཀྵྃ་ཀྲུྃ་སྲུྃ་ཡེ་ཨ་བྷི་ཥིཉྩ་ཧཱུྃ༔ ཧཱུྃ༔ བྱེད་པ་རྣམ་དག་ཡེ་ཤེས་སྐུ་མངའ་བ༔ རྒྱལ་བ་ཀུན་ཏུ་བཟང་པོའི་དབང་བསྐུར་རོ༔ བྱ་བ་རྣམ་དག་ཆོས་ཀྱི་སྐུ་མངའ་མ༔ རྒྱལ་ཡུམ་ཀུན་ཏུ་བཟང་མོའི་དབང་བསྐུར་རོ༔ ཨ་ཨ་ཨ་བྷི་ཥིཉྩ་ཧཱུྃ༔ རྟག་ལྟ་གནས་དག་སྒོ་བ་གཤིན་རྗེ་གཤེད༔ སྙིང་རྗེའི་བདག་ཉིད་རྡོ་རྗེ་ལྕགས་ཀྱུ་མ༔ ཆད་མཐའ་རྣམ་དག་སྒོ་བ་རྣམ་པར་རྒྱལ༔ བྱམས་པའི་བདག་ཉིད་རྡོ་རྗེ་ཞགས་པ་མ༔ མཚན་མ་རྣམ་དག་སྒོ་བ་རྟ་མགྲིན་རྒྱལ༔ དགའ་བའི་བདག་ཉིད་རྡོ་རྗེ་ལྕགས་སྒྲོག་མ༔ མཚན་འཛིན་རྣམ་དག་སྒོ་བ་བགེགས་མཐར་བྱེད༔ བཏང་སྙོམས་བདག་ཉིད་རྡོ་རྗེ་དྲིལ་བུ་མ༔ མཐར་བྱེད་ཡབ་ཡུམ་བརྒྱད་ཀྱི་དབང་བསྐུར་རོ༔ ཧཱུྃ་ཏྲཱྃ་ཧྲཱིཿཨཱཿཛཿཧཱུྃ་བྃ་ཧོཿ ཨ་བྷི་ཥིཉྩ་ཧཱུྃ༔ དེ་རྣམས་ཀྱིས་ཕུང་ལྔ་འབྱུང་ལྔ་དབང་ཡུལ་རྟོག་པ་བྱ་བྱེད་ལྟ་བ་སྐྱེ་གནས་དང་བཅས་པ་མ་སྤངས་གནས་སུ་དག་ནས་བདེ་གཤེགས་ཞི་བ་རབ་འབྱམས་ཀྱི་གོ་འཕང་གི་ཆོས་རྒྱུད་ལ་བཞག་པ་ཡིན་ནོ། །སླར་ཡང་དཀྱིལ་འཁོར་གྱི་ཞི་བའི་ལྷ་ཚོགས་དེ་རྣམས་སྐད་ཅིག་གིས་འབར་བ་ཁྲག་འཐུང་ཁྲོ་བོའི་ལྷ་ཚོགས་སུ་གནས་གྱུར་ཏེ་ཁྱེད་རང་རྣམས་ལ་ [120b] ཐིམ་པས་གཉིས་མེད་དུ་གྱུར་པར་མོས་ཤིག ། ཧཱུྃ༔ ཉོན་མོངས་ཞེ་སྡང་གནས་གྱུར་པའི༔ རྡོ་རྗེ་ཁྲོ་བོའིདབང་བསྐུར་རོ༔ ཉོན་མོངས་གཏི་མུག༴ དེ་བཞིན་ཁྲོ་བོའི༴ ཉོན་མོངས་ང་རྒྱལ༴ རིན་ཆེན་ཁྲོ་བོའི༴ ཉོན་མོངས་གདོན་ཆགས༴ པདྨ་ཁྲོ་བོའི༴ ཉོན་མོངས་ཕྲག་དོག༴ ཀརྨ་ཁྲ་བོའི༴ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཨ་བྷི་ཥིཉྩ་ཨོྃ༔ ཧཱུྃ༔ འབྱུང་བ་ཆུ་ཁམས་གནས་གྱུར་པའི༔ བཛྲ་ཀྲོ་དྷིའི་དབང་བསྐུར་རོ༔ འབྱུང་བ་ནམ་མཁའ་གནས་གྱུར་པའི༔ བུདྡྷ་ཀྲོ་དྷིའི༴ འབྱུང་བ་ས་ཁམས༴ རཏྞ་ཀྲོ་དྷིའི༴ འབྱུང་བ་མེ་ཁམས༴ པདྨ་ཀྲོ་དྷིའི༴ འབྱུང་བ་རླུང་ཁམས་གནས་གྱུར་པའི༔ ཀརྨ་ཀྲོ་དྷིའི༴ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཨ་བྷི་ཥིཉྩ་ཨོྃ༔ ཧཱུྃ༔ མིག་གི་རྣམ་ཤེས་གནས་གྱུར་པའི༔ མ་མོ་ཆེན་མོ་ཀེའུ་རི་མ༔ རྣ་བའི་རྣམ་ཤེས་གནས་གྱུར་བའི༔ མ་མོ་ཆེན་མོ་ཙོའུ་རི་མ༔ སྣ་ཡི༴ མ་མོ་ཆེན་མོ་པྲ་མོ་ཧ༔ ལྕེ་ཡི༴ མ་མོ་ཆེན་མོ་བེེ་ཏ་ལི༔ ལུས་ཀྱི༴ མ་མོ་ཆེན་མོ་པུཀྐ་སི༔ ཡིད་ཀྱི༴ མ་མོ་ཆེན་མོ་ཙཎྜ་ལི༔ ཉོན་ཡིད༴ མ་མོ་ཆེན་མོ་གྷསྨ་རི༔ ཀུན་གཞིའི༴ མ་མོ་ཆེན་མོ་སྨེ་ཤ་ནི༔ གནས་ཀྱི་མ་མོའི་དབང་བསྐུར་རོ༔ ཧ་ཧ་ཧ་ཧ་ཧ་ཧ་ཧ་ཧ་ཨ་བྷི་ཥིཉྩ་ཨོྃ༔ ཧཱུྃ༔ [121a] ། གཟུགས་ཡུལ་གནས་གྱུར་སིང་ཧ་མ༔ སྒྲ་ཡུལ་གནས་གྱུར་བྱ་གྷྲྀ་མ༔ དྲི་ཡུལ་གནས་གྱུར་སྲི་ལ་མ༔ རོ་ཡུལ་གནས་གྱུར་ཤྭ་ན་མ༔ ལུས་ཡུལ་གནས་གྱུར་ཀདྐ་མ༔ ཡིད་ཡུལ་གནས་གྱུར་ཀྲྀ་ཏ་མ༔ ཉོན་ཡིད་གནས་གྱུར་ཁ་ཁ་མ༔ གཞི་ཡུལ་གནས་གྱུར་ཧུ་ལུ་ལ་མ༔ ཡུལ་གྱི་མ་མོའི་དབང་བསྐུར་རོ༔ ཧེ་ཧེ་ཧེ་ཧེ་ཧེ་ཧེ་ཧེ་ཧེ་ཨ་བྷི་ཥིཉྩ་ཧཱུྃ༔ ཧཱུྃ༔ ལྷ་རྣམས་གནས་སྤོར་སྐར་མདའ་འཕེན༔ ལྷ་མིན་གནས་སྤོར་མདུང་ཐུང་ཅན༔ མི་རྣམས་གནས་སྤོར་རལ་གྲི་འཛིན༔ དུད་འགྲོ་གནས་སྤོར་དྲིལ་འཁྲོལ་མ༔ ཡི་དྭགས་གནས་སྤོར་གློག་ཤ་རྡེབས༔ དམྱལ་བ་གནས་སྤོར་མེ་འབར་མ༔ རྟག་པའི་གནས་སྤོར་ཟླ་འཕེན་མ༔ ཆད་པའི་གནས་སྤོར་ཉི་ཟེར་འཕེན༔ སྤོར་བྱེད་བརྒྱད་ཀྱི་དབང་བསྐུར་རོ༔ ཧ་ཧ་ཧུ་ལུ་ཧུ་ལུ་ཧུ་ལུ་ཨབྷི་ཥིཉྩ་ཨོྃ༔ རྟག་ལྟ་གནས་གྱུར་རྟ་གདོང་མ༔ ཆད་ལྟ་གནས་གྱུར་ཕག་གདོང་མ༔ མཚན་མ་གནས་གྱུར་སེང་གདོང་མ༔ མཚན་འཛིན་གནས་གྱུར་སྤྱང་གདོང་མ༔ སྒོ་མ་བཞི་ཡི༴ ཛཿཧཱུྃ་བྃ་ཧོཿ ཨ་བྷི་ཥིཉྩ་ཨོཾ༔ རྣམ་རྟོག་ཕྲ་རགས་གནས་གྱུར་པའི༔ ཞི་བའི་ལས་མཛད་རྣལ་འབྱོར་བདུན༔ རྒྱས་པའི་ལས་མཛད༴ དབང་གི༴ དྲག་པོའི༴ [121b] དབང་ཕྱུག་ཉེར་བརྒྱད་དབང་བསྐུར་རོ༔ བྷྱོ་སརྦ་ཡཀྵི་ཨ་བྷི་ཥིཉྩ་ཨོཾ༔ དེ་རྣམས་ཀྱིས་ཀུན་གཞི་ཡིད་ཆོས་ཁམས་དང་རྣམ་ཤེས་རོ་དྲུག་ལྟ་བ་སོགས་མ་སྤངས་གནས་སུ་གྱུར་ཏེ་དཔལ་ཆེན་ཁྲོ་བོ་རོལ་པའི་གོ་འཕང་གི་ཆོས་རྒྱུད་ལ་བཞག་པ་ཡིན་ནོ། །དེ་ལྟར་ན་ཕྱི་ཀུན་རྫོབ་མཚན་མའི་དཀྱིལ་འཁོར་དུ་བུམ་པའི་དབང་ཐོབ། ལུས་རྩའི་སྒྲིབ་པ་སྦྱངས་ཏེ་བསྐྱེད་པའི་རིམ་པ་བསྒོམ་པ་ལ་དབང་། འབྲས་བུ་སྣང་སྟོང་སྐུ་རྡོ་རྗེ་སྤྲུལ་པའི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། དེ་ནས་མཆོག་གི་དབང་གསུམ་བསྐུར་བ་ལ། ཐོག་མར་གསང་བའི་དབང་གི་སླད་དུ། བླ་མ་དཀྱིལ་འཁོར་གྱི་གཙོ་བོ་ཡབ་ཡུམ་བདེ་ཆེན་མཉམ་པར་སྦྱོར་བའི་བྱང་སེམས་སངས་རྒྱས་ཐམས་ཅད་འདུས་པའི་ངོ་བོ་ཅན་དེ་ཉིད་ཐོད་པའི་བདུད་རྩི་དང་སྦྱར་ཏེ་ཁྱེད་རང་རྣམས་ཀྱི་ལྕེ་ཐོག་ཏུ་བཞག་པར་མོས་ཤིག །གསང་ཐོད་ཐོགས་ལ། ཧཱུྃ༔ བྷནྡྷ་སྟོང་པའི་སྣོད་ནང་དུ༔ བྱང་སེམས་བདེ་བའི་བཅུད་ཀྱིས་བཀང་༔ བདེ་སྟོང་དབྱེར་མེད་བདུད་རྩི་འདིས༔ གསང་དབང་ངག་ལ་ཡོངས་རྫོགས་ཤོག༔ བྷོ་དྷི་ཙིཏྟ་ཧཱུྃ༔ ཞེས་མྱང་དུ་བཅུག ། དེ་ལྟར་སྦྱིན་པ་དེ་ཉིད་རྣམ་པར་རྟོག་པ་མེད་པའི་བློས་མྱང་པས་རྩ་ཐམས་ཅད་བདུད་རྩིས་གང་། དུས་གསུམ་གྱི་རྣམ་རྟོག་དག ། བདེ་ [122a] བའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་མོས་ཤིག །དེས་སློབ་དཔོན་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་རླུང་གི་སྒྲིབ་པ་སྦྱངས་ཏེ་བདག་བྱིན་གྱིས་རློབ་པའི་རྫོགས་རིམ་བསྒོམ་པ་ལ་དབང། འབྲས་བུ་གསལ་སྟོང་གསུང་རྡོ་རྗེ་ལོངས་སྤྱོད་རྫོགས་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །ཤེས་རབ་ཡེ་ཤེས་ཀྱི་དབང་གི་སླད་དུ། གཟུགས་དང་ལང་ཚོ་མཚན་ཉིད་ཕུན་སུམ་ཚོགས་པའི་ཤེས་རབ་མ་ཀུན་ཏུ་བཟང་མོའི་ངོ་བོ་ཅན་ཕྱག་རྒྱའི་དོན་དུ་གཏད་པར་མོས་ཤིག །རིག་ཙཀ་ཐོགས་ལ། ཧཱུྃ༔ ཡུལ་སྣང་སྣང་སྟོང་མཚན་ལྡན་མར༔ རང་རིག་བདེ་བ་ཡེ་ཤེས་ལས༔ དབྱིངས་རིག་བདེ་སྟོང་གཉིས་མེད་སྦྱོར༔ ཟུང་འཇུག་བདེ་ཆེན་རྟོགས་པར་ཤོག༔ མ་ཧཱ་སུ་ཁ་ ཧོཿ ཞེས་ལག་གཡས་སུ་གཏད། དེ་ལྟར་གཏད་པའི་རིག་མ་དང་ཁྱེད་རང་རྣམས་འདུ་ཤེས་གསུམ་ལྡན་གྱི་སྒོ་ནས་མཉམ་པར་སྦྱར་ཏེ་ཟག་མེད་བདེ་ཆེན་གྱི་ཡེ་ཤེས་ཆེས་ཆེར་སྦར་བས་བྱང་སེམས་དྭངས་མ་དབབ་ལྡོག་གི་སྦྱོར་བས་དགའ་བ་བཞིའི་མཐར་ཐུག་ལྷན་སྐྱེས་ཀྱི་ཡེ་ཤེས་རྒྱུད་ལ་བརྟན་པར་མོས་ཤིག ། དེས་ཕྱག་རྒྱ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཐིག་ལེའི་སྒྲིབ་པ་སྦྱངས་ཏེ་ཕོ་ཉ་བདེ་བ་ཆེན་པོའི་ [122b] ལམ་བསྒོམ་པ་ལ་དབང་། འབྲས་བུ་བདེ་སྟོང་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །དེ་ནས་དབང་བཞི་པ་རིག་པ་རྩལ་གྱི་དབང་གི་སླད་དུ། རྡོ་རྗེ་སེམས་དཔའི་མེ་ལོང་གི་བརྡ་འདིས་མཚོན་ནས་རང་རིག་གདོད་མའི་གཤིས་ལུགས་སྟོང་གསལ་འགག་མེད་རང་བྱུང་གི་ཡེ་ཤེས་རྒྱ་ཆད་ཕྱོགས་ལྷུང་དང་བྲལ་བའི་དོན་གོ་བར་གྱིས་ལ་ཀ་དག་ཁྲེགས་ཆོད་ཀྱི་དགོངས་པ་དབྱིངས་རིག་གཉིས་སུ་མེད་པའི་ངང་དུ་མཉམ་པར་ཞོག་ཅིག ། ཤེལ་རྡོ་ཐོགས་ལ། ཨེ་མ་ཧོཿ ངོ་བོ་སྟོང་པ་ཤེལ་གྱིས་མཚོན༔ རང་བཞིན་ལྷུན་གྲུབ་འཇའ་རུ་ཤར༔ ཐུགས་རྗེའི་འོད་ཟེར་ཀུན་ཏུ་འཕྲོ༔ རང་བྱུང་སེམས་ནི་ངོ་མཚར་ཆེ༔ དྷརྨ་ཤུདྡྷེ་ཨ༔ རིག་རྩལ་ལྷུན་གྲུབ་ཐོད་རྒལ་སྒྲོན་མ་བཞིའི་སྣང་བ་དབང་པོའི་སྒོར་མངོན་སུམ་དུ་འཆར་བའི་ཚུལ་བརྡ་འདི་རྣམས་ཀྱིས་མཚོན་པར་ཤེས་པར་གྱིས་ལ་ཆོས་ཟད་དགོངས་པའི་དབྱིངས་སུ་ལ་བཟླ་བར་མཛོད་ཅིག ། མེ་ལོང་དར་སྣ་མདོངས་སྒྲོ་ཤེལ་ཕྲེང་ཤེལ་རྡོ་རྣམས་བསྟན་ལ། དབྱིངས་ཀྱི་རང་བཞིན་མེ་ལོང་ལ༔ འོད་ཀྱི་རང་བཞིན་དར་སྣས་བརྒྱན༔ ཐིག་ལེའི་རང་བཞིན་རྨ་བྱའི་མདོངས༔ རིག་པ་ལུག་རྒྱུད་ཤེལ་གྱི་ཕྲེང་༔ མིག་ཏུ་མཚོན་ཕྱིར་ཤེལ་གྱི་ཀློང་༔ [123a] ། དབང་པོའི་སྒོར་སྦྱར་བརྡ་བསྟན་པས༔ རིག་རྩལ་ཐོད་རྒལ་དབང་ཐོབ་ཤོག༔ དྷརྨ་དྷཱ་ཏུ་ཛྙཱ་ན་ཨ་ཨ༔ དེས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་རིག་པའི་རྩལ་དབང་ཐོབ། སྒོ་གསུམ་སྙོམས་འཇུག་གི་སྒྲིབ་པ་སྦྱངས་ཏེ་རྫོགས་ཆེན་ཁྲེགས་ཆོད་ཐོད་རྒལ་གྱི་རྣལ་འབྱོར་བསྒོམ་པ་ལ་དབང་། འབྲས་བུ་སྣང་བཞི་ཟད་སར་འཁྱོལ་ཏེ་ཀུན་བཟང་ངོ་བོ་ཉིད་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །དེ་རྣམས་ཀྱིས་དབང་གི་དངོས་གཞི་གྲུབ་ནས་མཐའ་རྟེན་གྱི་དབང་ལ། སངས་རྒྱས་ཀུན་གྱི་ཡེ་ཤེས་ཐུགས་རྗེའི་རང་གཟུགས་སུ་སྣང་བ་བསྟན་པ་བུ་གཅིག་པའི་རྒྱུད་ཀྱི་གླེགས་བམ་རིན་པོ་ཆེའི་དབང་བསྐུར་ཞིང་མི་འབྲལ་བར་བཅངས་པས་འགྲོ་འདུལ་གྲོལ་བ་དྲུག་གི་ཕྲིན་ལས་རྩོལ་མེད་དུ་བརྡལ་བས་འཁོར་བ་དོང་ནས་སྤྲུགས་པའི་མཐུ་དབང་ལ་མངའ་བརྙེས་པར་མོས་ཤིག །བཏགས་གྲོལ་ཐོགས་ལ། ཨ༔ རང་བྱུང་རང་ཤར་བསྟན་པ་བུ་གཅིག་རྒྱུད༔ སངས་རྒྱས་ཀུན་གྱི་ཡེ་ཤེས་ཐུགས་རྗེའི་གཟུགས༔ འོད་གསལ་སྙིང་པོའི་བསྟན་པའི་བཙས་གཅིག་པུ༔ བྲིས་ཏེ་བཏགས་པས་གྲོལ་བའི་དབང་ཐོབ་ཤོག༔ འཁོར་ལོར་བྱས་ཏེ་མཐོང་བས་མཐོང་གྲོལ་ཤོག༔ གང་དུ་བཏགས་པ་རེག་པས་རེག་གྲོལ་ [123b] ཤོག༔ བརྗོད་ཅིང་ཚིག་གི་བརྡ་སྤྲད་ཐོས་གྲོལ་ཤོག༔ བཟླས་ཤིང་བཏབ་པ་མྱོང་བས་མྱོང་གྲོལ་ཤོག༔ གང་གིས་ཚོར་བ་དེ་དག་གྲོལ་བར་ཤོག༔ འ་ཨ་ཤ་ས་མ་ཧ་ཨ་བྷི་ཥིཉྩ་ཧཱུྃ༔ ཞེས་སྤྱི་བོར་གཏུགས་ཤིང་ལག་ཏུ་གཏད། བྱིན་རླབས་འཕོ་བ་གཏོར་མའི་དབང་གི་སླད་དུ། གཏོར་སྣོད་དབྱིངས་ཀྱི་གཞལ་མེད་ཁང་ཆེན་པོར་གཏོར་མ་རིག་རྩལ་རྒྱལ་བ་ཞི་ཁྲོའི་ལྷ་ཚོགས་སུ་བཞུགས་པས་དབང་བསྐུར་བས་མ་དག་སྐྱེ་འཆི་བར་དོའི་སྣང་བ་ཐམས་ཅད་བཙན་ཐབས་སུ་ཆོད་དེ་རིག་པ་གདོད་མའི་དབྱིངས་སུ་བཙན་ས་ཟིན་པའི་བྱིན་རླབས་འཕོ་བའི་དབང་ཆེན་ཐོབ་པར་མོས་ཤིག ། གཏོར་མ་ཐོགས་ལ། ཧཱུྃ༔ གཏོར་གཞོང་དབྱིངས་ཀྱི་རང་བཞིན་གཞལ་ཡས་ཁང་༔ གཏོར་མ་རིག་པ་རྒྱལ་བ་ཞི་ཁྲོའི་ལྷ༔ དབྱེར་མེད་ཟུང་འཇུག་ངང་དུ་དབང་བསྐུར་བས༔ སྣང་བ་ལྷར་དག་བར་དོར་གྲོལ་བར་ཤོག༔ ཕུང་ཁམས་གནས་འགྱུར་འོད་གསལ་ཟིན་པར་ཤོག༔ རྟོག་ཚོགས་བདེ་ཆེན་དབྱིངས་སུ་འཕོ་བར་ཤོག༔ རིག་པ་དབྱིངས་སུ་ཐིམ་པར་བྱིན་གྱིས་རློབས༔ ཚོམ་བུ་འབུམ་བཅས་མངོན་སངས་རྒྱས་གྱུར་ཅིག༔ ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙ་ན་དྷཱ་ཏུ་ཨཱཿ ཨོཾ་རུ་ལུ་རུ་ལུ་ཧཱུྃ༔ སརྦ་ཨ་བྷི་ཥིཉྩ་ཨོཾ་ཨཱཿཧཱུྃ༔ ཞེས་གནས་གསུམ་དུ་བཞག ། བླ་མ་དཀྱིལ་ [124a] འཁོར་གྱི་ལྷ་ཚོགས་རྣམས་ཀྱིས་ཤིས་པ་བརྗོད་པའི་བདེན་ཚིག་སྒྲོགས་ཤིང་མེ་ཏོག་གི་ཆར་སིལ་མར་བསྙིལ་བས་དབང་དོན་གྱི་ཡེ་ཤེས་བརྟན་ཅིང་གོང་འཕེལ་དུ་བྱས་པར་མོས་མཛོད། ཅེས་ཤིས་བརྗོད་ཅི་རིགས་བྱ། དེ་རྣམས་ཀྱི་སྒོ་ནས་གསང་སྐོར་ཡི་དམ་ཞི་བ་བདེ་གཤེགས་ཞི་ཁྲོ་རབ་འབྱམས་ཀྱི་དཀྱིལ་འཁོར་དུ་དབང་བསྐུར་བའི་བྱ་བ་ལེགས་པར་གྲུབ་པ་ལགས་པས་སོགས་ཀྱིས་མཚམས་སྦྱར་ཏེ་དམ་ཚིག་ཁས་ལེན། གཏང་རག་མཎྜལ་དང་ལུས་དབུལ། དགེ་བསྔོ་བཅས་སྤྱི་ལྟར་བྱས་ལ་སློབ་མ་གྱེས། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བསྔོ་བ་སོགས་ཆོ་གའི་རྗེས་ཀྱི་བྱ་བ་གཞུང་བཞིན་མཐར་དབྱུང་བས་གྲུབ་བོ། །ཡེ༵་ཤེ༵ས་གཅིག་ཉིད་དུ་མའི་གར། །ཞི་ཁྲོ་རབ་འབྱམས་དཀྱིལ་འཁོར་ཆེར། །སྐལ་བཟང་རྒྱུད་དག་ནུས་ཐོབ་ཕྱིར། །རྡོ༵་རྗེ༵འི་ལམ་གྱི་འཇུག་ངོགས་སོ། །གསང་སྐོར་ཡི་དམ་ཞི་བའི་དབང་གི་ལེའུ་ཚན་ནོ། །སྐབས་འདིར་འཇམ་མགོན་གུ་ཎའི་ལྗགས་བསྒྲིགས་རིན་ཆེན་གཏེར་མཛོད་དུ་བཞུགས་པ་གསང་སྐོར་ཡི་དམ་ཁྲོ་བོའི་དབང་ཆོག་ཡེ་ཤེས་ཀློང་ཡངས་ཉིད་འདིར་བླངས་ཏེ་བསྐུར་བར་བྱའོ།། །།


[125a] སྭསྟི། བྱིན་རླབས་འཕོ་བའི་དབང་ཆེན་གྱིས། །སྐལ་ལྡན་རྟོགས་གྲོལ་དུས་མཉམ་དུ། །སྦྱོར་མཛད་བླ་མར་གུས་བཏུད་ནས། །གསང་ཁྲིད་བྱིན་རླབས་སྒོ་འཕར་དབྱེ། །རྫོགས་པ་ཆེན་པོ་སྡེ་གསུམ་ལས་གསང་སྐོར་ཨ་ཏིའི་ཁྲིད་ཀྱི་བྱིན་རླབས་སྒྲུབ་པ་ལ། །སྦྱོར་བ་རྡུལ་ཚོན་ནམ་རས་བྲིས་ཀྱི་བུམ་པ་བསྣོལ་མའི་དཀྱིལ་འཁོར་འོད་ལྔའི་མུ་ཁྱུད་ཅན་གྱི་སྟེང་དུ་མཉྫིའི་ཁར་བུམ་པ་དྲི་དང་སོ་ལྔའི་བཅུད་ལྡན་གྱི་ཁ་རྒྱན་གསེབ་ཏུ། མདའ། དར་སྣ་ལྔ། མེ་ལོང་། ཤེལ་ཕྲེང་། རྨ་བྱའི་མདོངས་བཅས་བཙུགས་པ་འགོད། འཛོམ་ན་དེའི་ཕྱོགས་བཞིར་བུམ་པ་བཞིར་མགུལ་ཆིངས་ཕྱོགས་མདོག་ལ་ཁ་རྒྱན་གོང་མཚུངས་ཅན་འགོད་ཅིང་མ་འཛོམ་ན་གཅིག་གིས་འཐུས། ཕྱི་ནང་གི་མཆོད་པ་སོགས་འདུ་བྱས་ལ། གསང་སྐོར་རིག་འཛིན་བླ་མ་ཡོངས་རྫོགས་ཀྱི་གཞུང་བསྲངས་ཏེ་བཟླས་པ་ཅི་འགྲུབ་དང་། བུམ་པའི་ནང་དུ་རྒྱལ་བ་རིགས་ལྔ་སྐད་ཅིག་གིས་གསལ་བཏབ་ལ་ཞི་ཁྲོའི་སྤྱི་ཛཔྲ་དང་། ཧཱུྃ་ཨོཾ་སྭ་ཨཱཾ་ཧཱ༔ ཅི་རིགས་བཟླ། སྲུང་མའི་གཏོར་འབུལ་དང་ཚོགས་མཆོད་གྲུབ་ནས། དོན་དམ་དབང་ཆེན་ཡོངས་རྫོགས་དགོངས་པ་གསལ་འདེབས་ཙམ་གྱིས་བདག་འཇུག་གི་དོན་ཚང་བས། བྱིན་རླབས་དངོས་ལ། སློབ་མ་རྣམས་ཁྲུས་ནས་དབྱུང་། བགེགས་བསལ་ཞིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་གོང་གི་གསང་སྐོར་ཆོས་བཤད་ཇི་ལྟར་རིགས་པས་མཚམས་སྦྱར་ཏེ། འདིར་གསང་སྐོར་ཨ་ཏིའི་ཁྲིད་ཀྱི་བྱིན་རླབས་ཟབ་མོ་སྒྲུབ་པ་ལ། ཐོག་མར་ཞུ་བའི་ཡོན་དུ་ཁྱེད་རང་ [125b] རྣམས་ནས་འབྲུ་ལྔ། སྨན་ལྔ། དྲི་ལྔ། རིན་ཆེན་ལྔ། སྙིང་པོ་ལྔ་རྣམས་ཀྱི་མཎྜལ་སོ་སོར་འབྲུལ་བར་མོས་ལ་ཞིང་ཁམས་འབུལ་བར་འཚལ། ཞེས་མཎྜལ་འབུལ་དུ་གཞུག ། བླ་མ་ཉིད་ཁྱབ་བདག་ཀུན་ཏུ་བཟང་པོའི་ངོ་བོར་བཞུགས་པའི་འདུ་ཤེས་བསྐྱེད་དེ་དད་མོས་དྲག་པོས་གསོལ་བ་འདེབས་པ་འདིའི་རྗེས་ཟློས། ཨེ་མ་ཧོ་ཀུན་ཏུ་བཟང་༔ གདོད་མའི་བླ་མ་དགོངས་སུ་གསོལ༔ བདག་ནི་རྣམ་པར་གྲོལ་འདོད་པས༔ ཐེག་པའི་ཡང་རྩེ་གནང་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་སློབ་དཔོན་གྱིས་སྤྲོ་བ་བསྐྱེད་ཅིང་གསང་དམ་བསྒྲགས་པའི་སྒོ་ནས་ལན་སྦྱིན་པ་ཡིན་ཏེ། ཨེ་མ་རང་རིག་བྱང་ཆུབ་སེམས༔ འདི་ལ་མོས་པ་ཤིག་ཏུ་དཀོན༔ ཐེག་པའི་རྩེ་མོ་དོན་གཉེར་བ༔ ཤིན་ཏུ་ངོ་མཚར་སྦྱིན་མཆོག་ཀྱང་༔ བདག་ནི་ཀུན་ཏུ་བཟང་པོ་སྟེ༔ གཟུགས་ཀྱི་སྐུ་རུ་ལྟ་མི་འཚལ༔ མཆོག་ཏུ་གསང་བའི་དམ་ཚིག་གཉན་པོའི་ཚུལ་ལས་ནམ་ཡང་མི་འདའ་བའི་བློས་རྡོ་རྗེའི་བྲོ་བོར་བ་འདིའི་རྗེས་ཟློས། ས་མ་ཡ་ཨི་དན་ན་ར་ཀན༔ རྡོ་རྗེའམ་ཕྱག་ཤིང་གིས་མཚོན་ཏེ། ཀྱེེ། སྐལ་ལྡན་རིགས་ཀྱི་བུ་རྣམས་འདི་ལྟར་ཤེས་པར་གྱིས་ཤིག དེ་ཡང་མདུན་གྱི་དཀྱིལ་འཁོར་དུ་བུམ་པ་གཉིས་བསྣོལ་དུ་བྱུང་བ་ནི་དོན་ [126a] དམ་ཆོས་ཉིད་འགྱུར་བ་མེད་པ་རིག་སྟོང་ཆོས་སྐུ་དང་། ཀུན་རྫོབ་རྣམ་འགྱུར་འགག་པ་མེད་པ་སྣང་སྟོང་གཟུགས་སྐུ་ཟུང་དུ་འབྲེལ་བའི་བརྡའོ། །ཁ་དོག་དམར་པོར་བྱུང་བ་ནི་བརྟན་གཡོ་འཁོར་འདས་ཀྱི་ཆོས་ཀུན་ལ་དབང་བསྒྱུར་ཞིང་རྗེས་ཆགས་བདེ་བ་ཆེན་པོའི་ཡེ་ཤེས་རྩོལ་མེད་དུ་འབར་བའི་བརྡའོ། །དཔག་བསམ་ཤིང་གིས་ཁ་བརྒྱན་པ་ནི་ལྷུན་གྲུབ་སྐུ་དང་ཡེ་ཤེས་ཀྱི་བཀོད་པ་མ་འདྲེས་རང་བྱུང་འདོད་རྒུར་འཇོ་བའི་བརྡའོ། །བུམ་གདན་སྣ་ཚོགས་པདྨ་ནི་ཆོས་ཉིད་ཀྱི་ངོ་བོ་ལ་ཡེ་ནས་སྐྱོན་དང་དྲི་མས་མ་གོས་ཤིང་རོལ་རྩལ་ཐབས་སྣ་ཚོགས་སུ་ཤར་བའི་བརྡའོ། །ཁྱམས་སྔོན་པོར་བྱུང་བ་ནི་ཆོས་ཀྱི་དབྱིངས་ཀྱི་ཡེ་ཤེས་ཀུན་ཏུ་ཁྱབ་ཅིང་ནམ་ཡང་འགྱུར་བ་མེད་པའི་བརྡའོ། །འོད་ལྔའི་མུ་ཁྱུད་ཀྱིས་ཟླུམ་པོར་བསྐོར་བ་ནི་ཆོས་དབྱིངས་ཀུན་ནས་ཟླུམ་པ་སྤྲོས་པའི་གྲྭ་ཟུར་དང་བྲལ་ཞིང་སྐུ་ལྔ་ཡེ་ཤེས་ལྔའི་རང་བཞིན་ཡེ་ནས་ལྷུན་གྲུབ་ཏུ་གནས་པའི་བརྡའོ། །དེ་ལྟར་ན་གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ། འབྲས་བུ་ཆོས་སྐུ་དང་གཟུགས་སྐུ་ཡང་བུམ་པ་གཉིས་བསྣོལ་གྱི་བརྡ་འདིས་མཚོན་པ་ཡིན་ནོ། །ཞེས་དཀྱིལ་འཁོར་ངོ་སྤྲད། དེ་ནས་ཡེ་ཤེས་པ་དབབ་པའི་སླད་དུ་ཁྱེད་རང་སློབ་མ་རྣམས་གཞིའི་ཀུན་ཏུ་བཟང་ [126b] པོ་ཡབ་ཡུམ་མཐིང་ག་གཅེར་བུ་རྒྱན་མེད་པ་འཇའ་འོད་ཐིག་ལེའི་ཀློང་དུ་བཞུགས་པར་གསལ་ཐོབ། སློབ་དཔོན་གྱི་ཐུགས་ཀའི་འོད་ཀྱིས་བསྐུལ་བས་འོག་མིན་གྱི་ཞིང་ནས་ཡེ་ཤེས་པ་ཆར་བབས་པ་ལྟར་སྤྱན་དྲངས་ནས་ཁྱེད་རང་རྣམས་ལ་ཐིམ་པས་དབྱེར་དུ་གྱུར་བར་མོས་མཛོད། སྤོས་རོལ་བཅས་གསང་སྐོར་བྱང་བུའི་སྤྱན་འདྲེན་དང་སྔགས་དྲག་ཏུ་བརྗོད་པས་བྱིན་དབབ། བུམ་པ་ཐོགས་ལ། ཀྱེ་རིགས་ཀྱི་བུ་རྣམས། འདི་ལྟར་བུམ་པ་བདུད་རྩིའི་ཆུ་རྒྱུན་གྱིས་བཀང་བ་ནི་ནང་གསལ་ཐིམ་ལ་མ་རྨུག་པ་གཞོན་ནུ་བུམ་པའི་སྐུ་འགྲུབ་པའི་བརྡའོ། །ཁ་རྒྱན་རྣམ་པར་བཀྲ་བ་ནི་ལྷུན་གྲུབ་ཡེ་ཤེས་ཀྱི་སྣང་བ་མཁའ་ཁྱབ་ཏུ་འཆར་བའི་བརྡའོ། །མེ་ལོང་ནི་དབྱིངས་རྣམ་དག་གི་སྒྲོན་མ་རྒྱ་ཆེར་འཕེལ་བའི་བརྡའོ། །ཤེལ་གྱི་ཕྲེང་བ་ནི་རིག་པ་རྡོ་རྗེ་ལུ་གུ་རྒྱུད་འགུལ་འཕྲིག་མེད་པར་བཀྲ་ལམ་མེར་བརྟན་པའི་བརྡའོ། །དར་སྣ་ལྔ་ནི་དུག་ལྔ་རྣམ་དག་ཡེ་ཤེས་ལྔ་ཡི་རང་འོད་གསལ་བའི་བརྡའོ། །མདའ་ནི་དབྱིངས་རིག་ཐབས་ཤེས་ཟུང་འཇུག་མདའ་ལྟར་དྲངས་ཤིང་ཡེ་ཤེས་ཟང་ཐལ་དུ་འབྱིན་པའི་བརྡའོ། །རྨ་བྱའི་སྒྲོ་མདོངས་ནི་ཐག་དགུའི་རྩེ་མོ་ཤིན་ཏུ་རྣལ་འབྱོར་གྱི་མྱུར་ལམ་ཐོད་རྒལ་རིག་པའི་རྩལ་དབང་ཐམས་ཅད་ཡོངས་སུ་རྫོགས་པའི་བརྡའོ། །དེ་ལྟར་བུམ་པ་ལ་བརྟེན་ནས་མཚོན་་བྱེད་བརྡའི་དབང་བསྐུར་བས་མཚོན་ [127a] བྱ་རང་ལ་ཡེ་གནས་སྟོང་གསལ་རང་རིག་འདུས་མ་བྱས་པའི་ཡེ་ཤེས་མངོན་སུམ་དུ་རྟོགས་པའི་བརྡ་དོན་གོ་བར་གྱིས་ཤིག །ཧཱུྃ༔ དབྱིངས་ཀྱི་བུམ་པ་རིག་པའི་བཅུད༔ དབྱེར་མེད་ཁ་རྒྱན་བརྗོད་དང་བྲལ༔ དབྱིངས་ཀྱི་རང་བཞིན་མེ་ལོང་དང་༔ ཤེས་རབ་རང་བཞིན་མདའ་ཡིས་བརྒྱན༔ འོད་ཟེར་མཐའ་ཡས་དར་གྱིས་ཀླུབས༔ ལུ་གུ་རྒྱུད་ནི་ཤེལ་གྱིས་མཚོན༔ ཐིག་ལེ་རྨ་བྱའི་སྒྲོ་དང་ལྡན༔ ཆོས་ཉིད་མངོན་སུམ་སྣང་བ་ཡི༔ སྤྲོས་བཅས་བུམ་པའི་དབང་བསྐུར་རོ༔ ཧཱུྃ༔ མཚན་མ་བྲལ་བ་དབྱིངས་ཀྱི་ངང་༔ དམིགས་མེད་རང་གསལ་རིག་པའི་བཅུད༔ བསམ་མི་ཁྱབ་པའི་ཁ་རྒྱན་ལ༔ སྟོང་བ་ཆེན་པོའི་མདའ་ཡིས་བརྒྱན༔ བདེ་བ་མེ་ལོང་དབྱེར་མེད་ཤེལ༔ རླུང་ལྔ་དག་བ་རྨ་བྱའི་སྒྲོ༔ རྩ་ཁམས་དག་པ་དར་གྱིས་བརྒྱན༔ ཕུང་པོ་ཡོངས་གྲོལ་དབང་བསྐུར་བས༔ ཉམས་སྣང་གོང་དུ་འཕེལ་གྱུར་ཏེ༔ སྤྲོས་མེད་གསང་དབང་ཐོབ་པར་ཤོག༔ ཧཱུྃ༔ དབྱིངས་ལས་མི་འདའ་ཡུམ་གྱི་མཁའ༔ རིག་པ་ཐབས་མཆོག་བདེ་བ་ཆེ༔ གཉིས་མེད་མཉམ་སྦྱོར་བཅུད་ཀྱིས་བཀང་༔ ཡོན་ཏན་ཡོངས་རྫོགས་ཁ་རྒྱན་ལ༔ ཡུམ་གྱི་རྐྱེན་བཞི་མདའ་ཡིས་བརྒྱན༔ ཡབ་ཀྱི་རྒྱུ་ [127b] བཞི་མེ་ལོང་གསལ༔ དབྱེར་མི་ཕྱེད་པ་ཤེལ་གྱིས་སྤྲས༔ བདེ་བ་མཁའ་ཁྱབ་དར་གྱིས་ཀླུབས༔ བདེ་སྟོང་དབྱེར་མེད་དབང་བསྐུར་བས༔ རིག་པ་ཚད་ལ་ཕེབས་གྱུར་ཏེ། རབ་ཏུ་སྤྲོས་མེད་ཤེར་དབང་ཐོབ༔ ཧཱུྃཿ ཕ་མཐའ་བྲལ་བ་དབྱིངས་ཀྱི་ངང་༔ བསམ་ལས་འདས་པ་རིག་པའི་བཅུད༔ སྨྲ་བརྗོད་བྲལ་བ་ཁ་རྒྱན་ལ༔ མཚན་ཉིད་བཞི་ལྡན་མདའ་ཡིས་བརྒྱན༔ ཡེ་ནས་དག་པ་མེ་ལོང་སྟེ༔ དབྱིངས་རིག་གཉིས་བྲལ་ཤེལ་གྱིས་བརྒྱན༔ སྟོང་ཡངས་སྣ་ཚོགས་དར་གྱིས་ཀླུབས༔ རྫོགས་པ་ཆེན་པོའི་དབང་བསྐུར་བས༔ ཆོས་ཉིད་ཟད་སར་ཕྱིན་གྱུར་ཏེ༔ ཤིན་ཏུ་རྣམ་པར་གྲོལ་བར་ཤོག༔ ཧཱུཾཿ བསྒོམ་བྱ་མེད་པ་དབྱིངས་ཀྱི་ངང་༔ བསམ་ལས་འདས་པ་རིག་པའི་བཅུད༔ བརྗོད་ལས་འདས་པ་ཁ་རྒྱན་ཏེ༔ དབྱེར་མེད་སྟོང་པའི་ཤེས་རབ་མདའ༔ འགགས་མེད་ཅིང་ཡང་མེ་ལོང་བརྒྱན༔ སྐྱེ་འགགས་གཉིས་མེད་ཤེལ་གྱིས་བརྒྱན༔ ལྷུན་གྱིས་གྲུབ་པ་དར་གྱིས་ཀླུབས༔ ཞིང་ཁམས་ལྔ་རུ་དབང་བསྐུར་བས༔ ཐམས་ཅད་ལྷུན་རྫོགས་ཐོབ་པར་ཤོག༔ ཅེས་བུམ་པ་སྤྱི་བོར་བཞག་ཅིང་བུམ་ཆུ་སྦྱིན། འདིར་དབང་གཞུང་རྩ་བར་མི་གསལ་ཞིང་གཏེར་སློབ་རཏྣའི་དབང་ཟིན་དུའང་མི་འབྱུང་མོད། འོན་ཀྱང་ཕྱི་སྐོར་ཁྲིད་ཀྱི་བྱིན་ [128a] རླབས་ལ་སྐོར་གསུམ་གྱི་བླ་མ་རྣམས་ཀྱི་བྱིན་རླབས་རིག་པས་འཕྲུལ་ཞེས་གསུངས་པ་ལྟར་གསང་སྐོར་གྱི་བླ་མ་སོ་སོའི་བྱིན་རླབས་ད་ལྟ་ཕྱག་བཞེས་སུ་མཛད་པ་བཞིན་སྤྲོ་ན། གོང་དུ་སློབ་མའི་གཞི་ལུས་ལྷར་གསལ་བཏབ་ཟིན་པས་འདིར་བྱིན་རླབས་དངོས་ལ་འཇུག་སྟེ། སློབ་དཔོན་རིག་འཛིན་གཙོ་བོ་ཤྲཱི་སེངྷར་གསལ་བའི་ཞལ་ནས་རིག་འཛིན་བླ་མ་རྣམས་ཀྱི་དོ་ཧ་རྡོ་རྗེའི་མགུར་གླུ་དགོངས་པ་མི་གཡོ་བའི་ངང་ནས་བླངས་པ་དང་ཆབ་གཅིག་མདུན་དཀྱིལ་རིག་འཛིན་བླ་མའི་ལྷ་ཚོགས་ལས་རང་འདྲའི་སྐུ་གཉིས་པ་རེ་བྱུང་བ་སྤྱི་བོ་ནས་ཐིམ་པ་སྐུ་ཡི་བྱིན་རླབས་དང་། རྡོ་རྗེའི་བཟླས་པ་བྱ་བ་གསུང་གི་བྱིན་རླབས་དང་། རིག་འཛིན་བླ་མ་རྣམས་རང་རིག་ཏུ་རྫོགས་པའི་ངང་དུ་མཉམ་པར་བཞག་པ་ཐུགས་ཀྱི་བྱིན་རླབས་ཡིན་པས། ཁྱེད་རང་རྣམས་དགོངས་པ་སྐྱེ་མེད་ཀྱི་ངང་ལས་མ་གཡོས་བཞིན་དུ་གྲགས་སྟོང་རྡོ་རྗེའི་གླུ་བླངས་པ་འདི་ལ་སྙན་གྱི་དབང་པོ་རྩེ་གཅིག་ཏུ་གཏོད་བར་ཞུ། ཤྲཱི་སེངྷའི་སྐུ་ཐོགས་ལ། པདྨ་བཀའ་ཐང་ལས་བྱུང་བའི་ཤྲཱི་སེངྷའི་གླུ་ནི། ཤྲཱི་སེངྷས་མཁའ་ལ་སྡིགས་མཛུབ་གཏད༔ གང་ཤར་མ་ཞེན་གང་ཤར་མ་ཞེན་ཅིག༔ མ་ཤར་མ་ཤར་ཤར་ཤར་ཤར་མ་ཞེན༔ ཤར་གྲོལ་དུས་མཉམ་ཤར་གྲོལ་དུས་མཉམ་མོ༔ སྟོང་སྟོང་མི་སྟོང་མི་སྟོང་རྣམ་པར་སྟོང་༔ མ་འགགས་ མ་འགག་འགགས་འགག་འགག་པ་མེད༔ ཡེ་སྟོང་ཡེ་སྟོང་རྣམ་ [128b] སྟོང་རྣམ་པར་སྟོང་༔ སྟེང་འོག་བར་མཚམས་ཕྱོགས་མེད་ཀུན་ཤར་འདི༔ ཤྲཱི་སེདྷའི་དོན་དམ་གནད་དེ་མཛོད༔ ལྟ་སྤྱོད་སྣོད་རུང་དབྱེར་མེད་ངང་གིས་འཆར༔ ཞེས་གསུངས་རྡོ་རྗེ་ལྟ་བུའི་ཀློང་དུ་ཐིམ༔ ཞེས་སྐུ་སྤྱི་བོར་བཞག ། ཨོཾ་ཨཱཿཧཱུྃ་གི་རྡོ་རྗེའི་བཟླས་པ་ལན་གསུམ་རེ་གནང་བར་ཞུ། ཞེས་རྡོར་བཟླས་བྱ། ཤྲཱི་སེངྷ་རང་རིག་ཏུ་རྫོགས་པའི་ངང་དུ་མཉམ་པར་ཞོག་ཅིག །ཅེས་དར་ཅིག་མཉམ་བར་བཞག །རྡོར་བཟླས་མཉམ་བཞག་དེས་འགྲེས་ཏེ། ཨིནྡྲ་བྷུ་ཏིའི་སྐུ་ཐོགས་ལ། རྒྱལ་པོ་ཨིནྡྲ་བྷཱུ་ཏིའི་རྡོ་རྗེའི་གླུ༔ བདེ་ཆེན་རང་བྱུང་མཁའ་དབྱིངས་རྣམ་དག་པ༔ གནྡྷོ་ལ་ཡི་མཁའ་འགྲོའི་གྲོང་ཁྱེར་དུ༔ ཨིནྡྲ་བྷཱུ་ཏིའི་བླ་མེད་དོན་རྟོགས་ཏེ༔ ཨ་ཧོཿ ཆོས་དབྱིངས་རང་བྱུང་རང་ཤར་དགོངས་པ་འདི༔ ལྟ་བ་མཐའ་བཞིའི་དྲི་མ་རང་སངས་ཉིད༔ སྒོམ་པ་བློ་ལས་འདས་ཤིང་འོད་གསལ་བ༔ སྤྱོད་པ་བྱར་མེད་ངང་དུ་ལྷུག་པར་བཞག༔ འབྲས་བུ་རང་ལས་རྙེད་པ་ངོ་མཚར་ཆེ༔ བི་མ་ལའི་སྐུ་ཐོགས་ལ། སློབ་དཔོན་བི་མ་མི་ཏྲའི་རྡོ་རྗེའི་གླུ༔ ཡེ་ཤེས་དབྱིངས་སུ་རྣམ་པར་དག་པ་ཡི༔ བདེ་ཆེན་བརྩེགས་པར་མཁའ་འགྲོ་དབྱིངས་ཕྱུག་མས༔ སློབ་དཔོན་མཆོད་པས་དེ་ཚེ་འདི་སྐད་གསུངས༔ ཨ་ཧོཿ བདེ་ཆེན་ནམ་མཁའ་གང་བའི་དབྱིངས་སུ་དག༔ རང་བྱུང་རང་ཤར་རིག་ [129a] པའི་ཀློང་དུ་ཐིམ༔ དབྱིངས་རིག་གཉིས་མེད་ཟུང་འཇུག་ལ་བཟླས་པས༔ འཁོར་འདས་ཀུན་ཁྱབ་ཧེ་རུ་ཀ་དཔལ་ལོ༔ པདྨ་འབྱུང་གནས་ཀྱི་སྐུ་ཐོགས་ལ། འཆི་མེད་པདྨ་འབྱུང་གནས་རྡོ་རྗེའི་གླུ༔ རང་བྱུང་རང་ཤར་ཆོས་ཉིད་བསྟན་པའི་ཚེ༔ ལྷུན་གྲུབ་བརྩེགས་ཀྱི་བམ་རོའི་ཚལ་ཆེན་དུ༔ པདྨ་འབྱུང་གནས་བརྟུལ་ཞུགས་སྤྱོད་པའི་ཚེ༔ ཨ་ཧོཿ ཤར་གྲོལ་དུས་མཉམ་རིག་པ་ཐོལ་བྱུང་ནི༔ འཇིགས་མེད་སྣང་མེད་འཛིན་མེད་ངང་དུ་སྤྱོད༔ ཀློང་ལས་ཤར་བའི་ཆོ་འཕྲུལ་ཅིར་བསྟན་ཀྱང་༔ འཁོར་འདས་མཉམ་པ་ཉིད་དུ་བརྡལ་བའོ༔ ཛྙཱ་ན་སཱུ་ཏྲའི་སྐུ་ཐོགས་ལ། སློབ་དཔོན་ཛྙཱ་ན་སཱུ་ཏྲའི་རྡོ་རྗེའི་གླུ༔ བདེ་བ་ཆེན་པོའི་ཡེ་ཤེས་ཆེས་འཕགས་པ༔ ཛྙཱ་ན་སཱུ་ཏྲ་བྲག་དམར་དབེན་རྩ་རུ༔ མཁའ་འགྲོ་རྣམས་དང་ཚོགས་འཁོར་བསྐོར་བའི་ཚེ༔ ཨ་ཧོཿ བདེ་བ་ནམ་མཁའ་ཀློང་དུ་བསྟིམས་བྱས་པས༔ བདེ་སྟོང་རྒྱ་ཆེ་ཁྱབ་བརྡལ་ནམ་མཁའ་འདྲ༔ ཞེན་པ་མེད་པ་བདེ་བའི་འཁོར་ལོ་ལ༔ ལུས་ངག་ཡིད་གསུམ་བདེ་བ་ཆེན་པོར་ཤར༔ ཧཱུྃ་ཀཱ་རའི་སྐུ་ཐོགས་ལ། སློབ་དཔོན་ཧཱུྃ་ཀཱ་ར་ཡི་རྡོ་རྗེའི་གླུ༔ རིག་པ་ཐོག་འབེབས་འཁྲུལ་བའི་ཚང་ཚིང་བསྲེགས༔ བསིལ་བའི་ཚལ་དུ་ཧཱུྃ་ཆེན་དགོངས་པར་བཞུགས༔ བྲམ་ཟེའི་ [129b] བུ་མོས་ཚོགས་ཀྱིས་མཆོད་པའི་ཚེ༔ ཨ་ཧོཿ རང་བྱུང་རང་ཤར་དཔལ་ཆེན་ཧེ་རུ་ཀ༔ འཁོར་བའི་ཁྲག་འཐུང་སྟོང་ཉིད་དབྱིངས་སུ་སྦྱོར༔ རིག་པ་གཏིང་གསལ་ཆོས་ཉིད་ཀློང་ཡངས་སུ༔ སྣང་བ་ཅི་ཤར་ནམ་མཁར་སྤྲིན་དེངས་འདྲ༔ ཁྲག་འཐུང་ནག་པོའི་སྐུ་ཐོགས་ལ། སློབ་དཔོན་ཁྲག་འཐུང་ནག་པོའི་རྡོ་རྗེའི་གླུ༔ རང་སེམས་གཉུག་མའི་ངང་དུ་རྫོགས་པ་ལས༔ རྫུ་འཕྲུལ་ཆེར་སྣང་རྩུབ་འགྱུར་ཚལ་ཆེན་པོར༔ བམ་ཆེན་ཚོགས་ཀྱི་འདུ་བར་ལོངས་སྤྱོད་ཚེ༔ ཨ་ཧོཿ བདག་འཛིན་རྣམ་རྟོག་རྩད་ནས་བཅད་པ་ལས༔ རིག་པའི་སྟོང་སྲོག་འཁོར་ལོ་ནམ་མཁར་བསྐོར༔ ཉོན་མོངས་རྣམ་རྟོག་བྱེ་བ་ཕྲག་བརྒྱ་བསད༔ ཐམས་ཅད་ཡེ་ཤེས་རོལ་པའི་རྒྱན་དུ་ཤར༔ ཀླུ་སྒྲུབ་ཀྱི་སྐུ་ཐོགས་ལ། སློབ་དཔོན་ཀླུ་སྒྲུབ་སྙིང་པོའི་རྡོ་རྗེའི་གླུ༔ སྒྱུ་མ་ལྟ་བུའི་རང་གསལ་རྟོགས་པ་ལས༔ དཔལ་གྱི་རི་ལ་མཁས་པ་ལྔ་བརྒྱའི་དབུས༔ ནཱ་གརྫུ་ནས་སྐྱེ་མེད་གླུ་འདི་བླངས༔ ཨ་ཧོཿ འོད་གསལ་བྱང་ཆུབ་སེམས་འདི་ཀུན་ལ་ཁྱབ༔ རིག་པའི་རང་རྩལ་སྣང་སྲིད་དབང་དུ་བསྡུས༔ སེམས་ཀྱིས་སྣང་སྲིད་ཀུན་ལ་ཐ་ལེར་གསལ༔ སྣང་བ་གང་ཤར་སྐྱེ་མེད་སྒྱུ་མར་ལྟོས༔ པྲ་བྷ་ཧསྟིའི་སྐུ་ཐོགས་ལ། སློབ་དཔོན་པྲ་བྷ་ཧ་སྟིའི་རྡོ་རྗེའི་གླུ༔ འཛིན་པ་རབ་ཏུ་གཞོམ་ [130a] པ་རྡོ་རྗེའི་ཀློང་༔ པདྨ་བརྩེགས་སུ་བདེ་བ་ཆེན་པོ་བརྙེས༔ པྲ་ཆེན་ཧསྟིས་རྡོ་རྗེའི་གླུ་བླངས་པ༔ ཨ་ཧོཿ རྐྱེན་གྱིས་གཡོ་བ་མེད་པའི་རིག་པ་ལ༔ འཛིན་པ་དུ་མས་བཅིངས་པ་སེམས་ཀྱི་གོས༔ རང་ཤར་ཀློང་དུ་འཛིན་མེད་ཟང་ཐལ་གསལ༔ སེམས་ཉིད་རྣམ་པར་དག་པའི་རིག་པ་ཤར༔ དྷ་ན་སཾ་སྐྲྀ་ཏའི་སྐུ་ཐོགས་ལ། སློབ་དཔོན་དྷ་ན་སཾ་སྐྲྀའི་རྡོ་རྗེའི་མགུར༔ བརྗོད་ཚིག་བྲལ་བའི་ཡེ་ཤེས་བརྙེས་པ་ལས༔ རྡོ་རྗེ་གདན་གྱི་གཙུག་ལག་ཁང་ཆེན་དུ༔ གྲུབ་པའི་དབང་ཕྱུག་ཐམས་ཅད་འདུས་པའི་ཚེ༔ དྷ་ན་སཾ་སྐྲྀས་འཇིགས་མེད་གླུ་འདི་བླངས༔ ཨ་ཧོཿ བརྗོད་མེད་སེམས་ལ་རིག་པས་བལྟ་མི་འཚལ༔ རྣམ་པར་དག་པའི་རིག་པ་ངང་གིས་རྫོགས༔ རིག་པ་དྭངས་གསལ་རྙོགས་པ་མེད་པ་སྟེ༔ རྩ་རླུང་བྱང་ཆུབ་སེམས་རྣམས་ཐ་མི་དད༔ ལས་ཀྱི་དབང་མོའི་སྐུ་ཐོགས་ལ། མཁའ་འགྲོ་ལས་ཀྱི་དབང་མོའི་རྡོ་རྗེའི་མགུར༔ མཁའ་དབྱིངས་རྣམ་པར་དག་པ་ཀུན་ཁྱབ་པ༔ ཉི་ཟླའི་ཁང་བུར་ལས་ཀྱི་དབང་མོ་ཆེས༔ ཡེ་ཤེས་མཁའ་འགྲོ་བྱེ་བ་འདུས་པའི་ཚེ༔ ཨ་ཧོཿ ཆོས་ཀྱི་དབྱིངས་ནི་གཟུང་དུ་མེད་པ་སྟེ༔ ཀུན་ལ་གསལ་ཞིང་དམིགས་པའི་མཐའ་དང་བྲལ༔ བརྗོད་མེད་ཉག་གཅིག་བདེ་བ་ཆེན་པོ་འདི༔ སངས་རྒྱས་ཀུན་ [130b] གྱི་གོ་འཕང་བླ་མེད་དོ༔ རམྦུ་གུཧྱའི་སྐུ་ཐོགས་ལ། སློབ་དཔོན་རམྦུ་གུཧྱའི་རྡོ་རྗེའི་གླུ༔ ཀློང་ནས་ཅི་ཤར་ཆོས་དབྱིངས་ཀློང་ནས་གྲོལ༔ ནྱ་གྲོ་དྷ་ཡི་མཆོད་རྟེན་ཆེན་མོའི་དྲུང་༔ བམ་རོའི་སྒྲུབ་པ་མཛད་པའི་གུང་གསེལ་ལ༔ རམྦུ་གུཧྱས་རྡོ་རྗེའི་ཚིག་འདི་གསུངས༔ ཨ་ཧོཿ དམིགས་པ་མེད་ལ་ཆད་པའི་མཐའ་དང་བྲལ༔ ཅིར་ཡང་འཆར་ཞིང་རྟག་པའི་ཡུལ་ལས་འདས༔ གསལ་སྟོང་ཟུང་འཇུག་དབྱིངས་རིག་གཉིས་སུ་མེད༔ གང་ཡང་ཤར་བ་འདི་ཀ་ཆོས་ཉིད་དོ༔ ཤིནྟཾ་གརྦྷའི་སྐུ་ཐོགས་ལ། སློབ་དཔོན་ཤིནྟཾ་གརྦྷའི་རྡོ་རྗེའི་གླུ༔ རྣམ་རྟོག་ཆོས་ཉིད་ཀློང་དུ་གྲོལ་བ་ལ༔ མཆོད་རྟེན་གཟི་འབར་དྲུང་དུ་དྲེགས་པ་ཅན༔ ལྷ་འདྲེ་ཀུན་གྱི་སྟོང་སྲོག་བཅད་པའི་ཚེ༔ ཤིནྟཾ་གརྦྷའི་ཧཱུྃ་གི་གླུ་འདི་བླངས༔ ཨ་ཧོཿ རྣམ་རྟོག་ཐམས་ཅད་སྐྱེ་མེད་ངང་དུ་ཧཱུྃ༔ འགགས་མེད་གང་ཤར་རིག་པ་ཧཱུྃ་གིས་སྦྱོར༔ རང་བྱུང་རིག་པ་ཧཱུྃ་གིས་མ་རིག་གསོད༔ བདག་ཏུ་འཛིན་པ་གཞོམ་པའི་ཧཱུྃ་སྒྲ་ཆེ༔ ཧཱུྃ་ཧཱུྃ་ཧཱུྃ༔ ཞེས་བསྐུར། དེ་ལྟར་བྱིན་རླབས་འཕོ་བའི་དབང་བསྐུར་ཐོབ་པའི་ཡེ་ཤེས་ཀྱི་རྒྱུན་དེ་ཉིད་མི་ཉམས་བརྟན་པར་བྱ་བའི་སླད་དུ་རིག་འཛིན་བླ་མའི་ལྷ་ཚོགས་ནམ་མཁའ་གང་བར་སད་པ་རྣམས་ཀྱིས་སྨོན་པའི་ཚིག་གི་ཤིས་པ་བརྗོད་ཅིང་མེ་ཏོག་གི་ཆར་ཕབ་པས་དགེ་ལེགས་སུ་བྱས་ [131a] པའི་མོས་པ་མཛོད། ཅེས་ཤིས་བརྗོད་གང་འོས་བྱ། དེས་གསང་སྐོར་ཁྲིད་ཀྱི་བྱིན་རླབས་ཟབ་མོ་ལེགས་པར་ཕུལ་གྲུབ་པ་ལགས། དེ་ལྟར་ལེགས་པར་ཐོབ་པའི་གཏང་རག་དང་། སླར་ཡང་སྨིན་ཟིན་གྲོལ་བར་བྱེད་པ་ཁྲིད་ཀྱི་རིམ་པ་ཞུ་བའི་ཡོན་དུ་མཎྜལ་ཆབ་གཅིག་འདི་བཞིན་དུ་འབུལ་བར་ཞུ། སྟོང་པ་ཉིད་ཀྱི་དབྱིངས་ཉིད་དུ༔ རིག་པ་ཅོག་བཞག་ཚོམ་བུར་བཀོད༔ དབྱིངས་རིག་དབྱེར་མེད་མཎྜལ་འདི༔ ཀ་དག་བདེ་བར་གཤེགས་ལ་འབུལ༔ གུ་རུ་མཎྜལ་པཱུ་ཛ་ཧོཿ ཞེས་མཎྜལ་འབུལ། དེ་ཡང་རིག་འཛིན་ཆེན་པོ་ཤྲཱི་སེང་ཧའི་དགོངས་བཅུད། གྲུབ་པའི་སློབ་དཔོན་པདྨ་སམྦྷ་ཝ་དང་། ལོ་ཆེན་བཻ་རོ་ཙཱ་ནའི་མན་ངག་གནད་དུ་འདྲིལ་བ་ཟབ་ཆོས་རྫོགས་པ་ཆེན་པོ་སྡེ་གསུམ་ལས། གསང་སྐོར་མན་ངག་ཨ་ཏི་ཡོ་གའི་གདམས་ཁྲིད་བགྱི་བ་ལ། སྐུ་ཉིད་རྣམས་ཐུགས་གཞན་དུ་མ་ཡེངས་པར་གཏེར་གཞུང་རྡོ་རྗེའི་ཚིག་རྐང་འདི་ལ་སྙན་གྱི་དབང་པོ་རྩེ་གཅིག་ཏུ་གཏོད་འཚལ། ན་མོ་གུ་རུ༔ གསང་སྐོར་ཁྲིད་ཀྱི་རིམ་པ་ནི༔ གཞི་ལམ་འབྲས་བུ་བསྟན་པའོ༔ དང་པོ་ནམ་མཁའ་ལྟ་བུ་སེམས༔ རིག་དང་མ་རིག་འཁོར་འདས་ཀྱི༔ ས་མཚམས་གྲིབ་སོ་ཙམ་ལས་མེད༔ རྒྱལ་བུ་དམངས་སུ་བབས་པ་ན༔ བློན་པོས་ངོ་ཤེས་དབང་བསྐུར་ཚེ༔ རྒྱལ་པོས་ཁམས་མགསུམ་དབང་དུ་སྡུད༔ དེ་བཞིན་རང་རིག་བྱང་ཆུབ་སེམས༔ [131b] དེ་ཡི་མཚན་ཉིད་བསྟན་པར་བྱ༔ གསལ་ཞིང་རྙོག་པ་མེད་པ་ལ༔ རིག་པ་རང་བྱུང་སྟོང་པའི་ངང་༔ གསལ་སྟོང་དབྱེར་མེད་རྒྱུན་ཆད་བྲལ༔ འགྱུར་བ་མེད་ཅིང་ཀུན་ཏུ་རྟག༔ འདི་ཡིན་མེད་པའི་ངོས་བཟུང་བྲལ༔ འོན་ཀྱང་མྱོང་བ་ཅན་གྱི་གདངས༔ ངེས་པ་ཅན་དུ་གནས་པའོ༔ དེ་ཉིད་མཐོང་བར་བྱེད་པའི་ལམ༔ རྒྱུད་སྦྱང་ཚོགས་བསགས་སྡོམ་པ་བླང་༔ སྤྲོས་བཅས་སྤྲོས་མེད་ཤིན་ཏུ་དང་༔ རབ་ཏུ་སྤྲོས་མེད་དབང་བཞི་ཞུ༔ སྤྲོས་བཅས་བསྐྱེད་རིང་སྤྲོས་མེད་དུ༔ རྩ་རླུང་བསྒོམ་ཞིང་ལུས་གནད་བསྣུན༔ ཤིན་ཏུ་སྤྲོས་མེད་བདེ་བ་སྦྱངས༔ རབ་ཏུ་སྤྲོས་མེད་དེ་ཉིད་བལྟ༔ བསྐྱེད་རིམ་རྒྱལ་བ་རིགས་ལྔའམ༔ ཡང་ན་ཞི་ཁྲོ་གསལ་རྫོགས་བསྒོམ༔ ཡུལ་སྣང་ལྷ་རུ་འགྱུར་བར་བསླབ༔ རྩ་རླུང་རང་ཉིད་ཀུན་བཟང་གི༔ སྐུ་ལ་རྩ་གསུམ་འཁོར་ལོ་དྲུག༔ ཐིག་ལེ་གཏུམ་མོ་འབར་འཛག་བསྒོམ༔ ལུས་གནད་བདུན་ལྡན་དྲུག་ཆིངས་དང་༔ ཙོག་པུར་གནས་པ་རྣམ་གསུམ་གྱིས༔ བདེ་དྲོད་མི་རྟོག་གསུམ་ལྡན་གཅེས༔ བདེ་བ་མི་མོ་གཞོན་ནུ་མ༔ ཆོས་ཀྱིས་རབ་ཏུ་སྨིན་བྱས་ཏེ། ཡབ་ཡུམ་ཀུན་བཟང་ཀུན་བཟང་མོ༔ གནས་རྣམས་བྱིན་རླབས་མཉམ་པར་སྦྱར༔ དགའ་བ་དགའ་བ་ཆེན་པོ་དང་༔ [132a] མཆོག་དགའ་དགའ་བྲལ་ལྷན་ཅིག་སྐྱེས༔ ཚོར་བ་བདེ་བའི་ངང་དུ་བསླབ༔ རྫོགས་པ་ཆེན་པོའི་དེ་ཉིད་ནི༔ ལུས་གནད་བདུན་ལྡན་ཞི་གནས་བསྒོམ༔ འཁྲུལ་འཁོར་སྣ་ཚོགས་ལྷག་མཐོང་བསྒོམ༔ ཞི་ལྷག་ཟུང་འཇུག་སྤྱོད་ལམ་ལ༔ དབྱེར་མེད་ཉིད་དུ་འདྲེས་པར་བྱ༔ ལུས་ངག་ཡིད་གསུམ་ལྷུག་པར་གནས༔ རང་བཞིན་བྱ་རྩོལ་བྲལ་བར་བལྟ༔ འབྱམས་ན་རིག་བ་ཧུར་ཕྱུང་ཞིང་༔ རྩོལ་བ་དང་བཅས་མཉམ་པར་བཞག༔ བྱིངས་ན་རིག་པ་དྭངས་ལ་བསླབ༔ འགྱུ་བྱེད་རང་ངོ་ཤེས་པ་བལྟ༔ ཅི་ཡང་མ་ཡིན་ཅིར་ཡང་འཆར༔ འདི་ཞེས་བརྗོད་ཚིག་བྲལ་བ་ཡི༔ ཉམས་ལ་ངེས་པར་བསླབ་པར་བྱ༔ འབྲས་བུ་བླ་ན་མེད་པའི་ས༔ ཡང་དག་པར་ནི་ཐོབ་པར་འགྱུར༔ སྐུ་ལྔའི་འབྲས་བུ་ཚེ་འདིར་ཐོབ༔ འབྲས་བུ་གཞི་ལ་སྨིན་པར་དེས༔ གདམས་པའི་མཐར་ཐུག་ཁོ་ནའོ༔ གསང་སྐོར་ཁྲིད་ཀྱི་དངོས་གཞི་རྫོགས༔ ས་མ་ཡ་རྒྱ་རྒྱ༔ ༁ྃ༔ ན་མོ་གུ་རུ༔ གསང་སྐོར་ཁྲིད་ཀྱི་རྗེས་འབྲེལ་དུ༔ གནས་ཐབས་འབྲས་བུ་རྣམ་གསུམ་ནི༔ གནས་ནི་སྙིང་གའི་སྒྲོན་མ་རུ༔ ཀུན་གཞི་རང་རིག་ཡེ་ཤེས་ཏེ༔ སྐུ་དང་ཡེ་ཤེས་ [132b] འོད་ལྔར་བཞུགས༔ དཀར་འཇམ་རྩ་ཡི་སྒྲོན་མ་ལས༔ དབང་པོར་གསལ་བའི་སྒྲོན་མེར་སྣང་༔ སྟོང་པའི་དབྱིངས་ནི་རྣམ་པར་དག༔ རིག་པ་ཐིག་ལེ་ལུ་གུ་རྒྱུད༔ གནས་ནི་ལུས་ཀྱི་ནང་ན་གནས༔ ཤར་ནི་དབང་པོའི་ཕྱི་རུ་སྣང་༔ དོན་དུ་ཕྱི་ནང་དབྱེར་མེད་ཤེས༔ ཐབས་ནི་སྐུ་གསུམ་བཞུགས་སྟངས་ཀྱིས༔ དབྱིངས་རིག་ཐིག་ལེ་འདི་ལ་སྦྱང་༔ ཆོས་སྐུའི་བཞུགས་སྟངས་སེང་གེ་ལྟར༔ ཉི་མ་འཆར་ཀར་དབྱིངས་ལ་བསླབ༔ ལོངས་སྐུའི་བཞུགས་སྟངས་གླང་ཆེན་གྱིས༔ ཤར་མ་ཁད་པར་རིམ་པར་བསླབ༔ སྤྲུལ་སྐུའི་བཞུགས་སྟངས་ཙོག་བུ་ཡིས༔ ཤར་བའི་དུས་ན་འོད་ལ་སྦྱང་༔ ཤིན་ཏུ་གོམས་པ་གྱུར་པའམ༔ མ་འདྲེས་སོ་སོར་སྣང་བ་ན༔ ལུས་གནད་བདུན་ལྡན་ཅི་བདེ་བས༔ དབྱིངས་རིག་ཐིག་ལེ་ཉེ་རྫོགས་སུ༔ སྣང་བ་རིག་པ་དབྱེར་མེད་བསྒོམ༔ དེ་ལ་ལམ་རྟགས་འཆར་ཚུལ་རྣམས༔ ཆེས་ཆེར་རིམ་པས་འཕེལ་བ་སྟེ༔ ཡུལ་ཁམས་གང་བར་མངོན་སུམ་སྣང་༔ ཕྱག་མཚན་ཡིག་འབྲུ་གོང་དུ་འཕེལ༔ སྐུ་ནི་ཡོངས་རྫོགས་ཚད་ལ་ཕེབས༔ རིག་པ་རང་སྣང་ཟད་སར་ཟིན༔ སྤྱི་བོའི་གཙུག་ཏུ་འོད་བདུན་ནི༔ ཐོ་བརྩེགས་ཚུལ་དུ་ [133a] བྱུང་བ་ན༔ ཞག་བདུན་འོད་ལུས་འགྲུབ་པའི་རྟགས༔ འབྲས་བུ་ཚེ་གཅིག་ལུས་འདིས་ཐོབ༔ གང་དུ་གནས་ཀྱང་ཞིང་ཁམས་སུ༔ འགྱུར་ལས་གཞན་དུ་འཕོ་བ་མེད༔ དེ་ལྟ་བུ་ཡི་རྣལ་འབྱོར་ཅན༔ མན་ངག་ཀུན་གྱི་མཐར་ཐུག་གོ༔ གསང་སྐོར་ཁྲིད་ཀྱི་རྗེས་འབྲེལ་རྫོགས༔ ས་མ་ཡ་རྒྱ་རྒྱ༔ ཞེས་རང་བཞིན་རྫོགས་པ་ཆེན་པོ་ཆོས་ཉིད་བྱ་རྩོལ་བྲལ་བའི་གནས་ལུགས་གཞི་ལམ་འབྲས་བུ་གསུམ་གྱི་སྒོ་ནས་གཏན་ལ་ཕབ་སྟེ་ལྟ་བའི་གཞི་བཟུང་། དབང་བཞིའི་ལམ་དང་འབྲེལ་བའི་བསྐྱེད་རྫོགས་ཀྱི་རྣལ་འབྱོར་ཐུན་མོང་དང་། ཁྱད་པར་རིག་པ་ལྷོངས་སུ་ཕུད་དེ་སེམས་ལས་འདས་པའི་ཡེ་ཤེས་རྗེན་ཅར་རང་བབ་ཆུ་བོའི་རྒྱུན་ལྟར་སྐྱོང་བ་ཀ་དག་ཁྲེགས་ཆོད་ཀྱིས་གཞུང་བསྲང་། སྒོ་ཡུལ་རིག་པའི་གནད་ལ་བརྟེན་ནས་སྒྲོན་མ་བཞིའི་སྣང་བ་འོད་གསལ་ཆེན་པོར་མངོན་སུམ་དུ་སྤྱོད་པ་ལྷུན་གྲུབ་ཐོད་རྒལ་གྱི་རྣལ་འབྱོར་ཟབ་མོས་རྗེས་བསྐྱངས་ཏེ། འབྲས་བུ་ཕྱི་དུས་སུ་མི་ལྟོས་པར་ཚེ་ལུས་གཅིག་ལ་འཕོ་ཆེན་འཇའ་ལུས་གཞོན་ནུ་བུམ་བ་སྐུར་མངོན་པར་བྱང་ཆུབ་པའི་ཚུལ་གཏེར་གཞུང་རྡོ་རྗེའི་ཚིག་གིས་ཇི་ལྟར་བསྟན་པའི་དོན་རྣམས་ཐུགས་ཀྱི་དཔལ་བེའུར་བཅངས་ནས་རྨད་དུ་བྱུང་བའི་ [133b] གདམས་ཟབ་འདི་ལྟ་བུ་མཇལ་བ་དོན་ལྡན་དུ་མཛད་འཚལ། དེ་རྣམས་ཀྱིས་གསང་སྐོར་ཁྲིད་ཀྱི་བྱིན་རླབས་དང་ཁྲིད་རིམ་དངོས་གཞི་བཅས་ཚང་སྤྲུགས་སུ་ལེགས་པར་གྲུབ་པ་ལགས་པས་རྡོ་རྗེ་ཐེག་པའི་དམ་ཚིག་སྤྱི་དང་ཁྱད་པར་ཆོས་ཐམས་ཅད་ཆོས་ཉིད་མཉམ་བརྡལ་ཆེན་པོའི་དགོངས་པར་ལ་བཟླ་བས་བསྲུང་མཚམས་ལས་འདས་པ་དམ་ཚིག་ཡེ་བསྲུང་ལྷུན་གྲུབ་ཆེན་པོའི་རྒྱ་ལས་ནམ་ཡང་མི་འདའ་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་དམ་ཚིག་ཁས་ལེན། གཏང་རག་མཎྜལ་ལུས་དབུལ། དགེ་བསྔོ་བཅས་བྱས་ལ་སློབ་མ་གྱེས། སློབ་དཔོན་གྱིས་ཆོ་གའི་རྗེས་རིམ་གཞུང་བཞིན་མཐར་དབྱུང་བས་གྲུབ་བོ། །སེམས་ལས་འདས་པའི་ཡེ༵་ཤེ༵ས་གང་། །མངོན་སུམ་རང་ཐོག་འབེབས་པའི་གནད། །མཆོག་གསང་རྡོ༵་རྗེ༵་རྩེ་མོ་ཡིས། །གདམས་པའི་ཡང་ཞུན་སྙིང་པོའོ། །གསང་སྐོར་མན་ངག་སྡེའི་ཁྲིད་ཀྱི་བྱིན་རླབས་གདམས་ཁྲིད་དངོས་དང་བཅས་པའི་ལེའུ་ཚན་ནོ།། །།


[134a] སྭསྟི། དབྱིངས་ལས་འབར་བའི་ཕྱག་རྒྱ་ཡི། །སྡེ་གསུམ་བཀའ་ཡི་གཉེར་ཁ་འཛིན། །བསྟན་སྲུང་ཚོགས་ལ་གུས་བཏུད་ནས། །སྲོག་དབང་ཟབ་མོའི་ཆོ་ག་འཆད། །རྫོགས་པ་ཆེན་པོ་སྡེ་གསུམ་གྱི་བཀའ་སྲུང་གཏེར་སྲུང་དང་བཅས་པའི་སྲོག་དབང་དཀྱུས་གཅིག་ཏུ་སྒྲུབ་པ་ལ། གཞི་སྟེགས་དབུས་སུ་བཀའ་སྲུང་ཡེ་ཤེས་པའི་དཀྱིལ་འཁོར་སྒོམ་དོན་དང་མཐུན་པའི་རས་བྲིས་སམ་མཎྜལ་ལ་འབྲུ་ནག་ཁྲག་ཆང་གིས་གཤེར་བའི་ཚོམ་བུ་གཙོ་འཁོར་དགུ་བཀོད་པའི་ཁར་རྣམ་བུམ་སོ་ལྔའི་བཅུད་ལྡན། མདུན་དུ་གཙོ་འཁོར་དགུའི་སྐུ་ཙཀ་དང་དབང་གཏོར། གཡས་སུ་གསང་ཐོད་དང་སྔགས་ཕྲེང་། རྒྱབ་ཏུ་བཀའ་སྡོད་བུམ་པ། གཡོན་དུ་རིག་ཙཀ ། ཤེལ་རྡོ། དབྱིངས་ཕྱུག་ཡུམ་ལྔའི་སྐུ་ཙཀ་བཅས་འགོད། །དེའི་གཡས་ནས་གཡས་སུ་བཀའ་སྲུང་དྲེགས་པ་གསུམ་ལས་འབར་མ་མེ་གདོང་མར་མཎྜལ་ཆོས་འབྱུང་བསྣོལ་མའམ་ཚོམ་བུ་གཅིག་བཀོད་པའི་ཁར་དམར་གཏོར་གཙོ་འཁོར་གསུམ་པ་སྐུ་ཙཀ་དར་གདུགས་ཅན། རྡོ་རྗེ་གཤོག་རྒོད་མར་མཎྜལ་གྲུ་གསུམ་མཐིང་ནག་བྲིས་པའམ་ཚོམ་བུ་ལྔ་བཀོད་པའི་ཁར་དམར་གཏོར་གཙོ་འཁོར་ལྔ་པ་སྐུ་ཙཀ་དར་གདུགས་ཅན། དམ་ཅན་སྐྱེས་བུ་ལ་མཎྜལ་ཚོམ་བུ་གཅིག་པའི་ཁར་གཏོར་མ་མཁར་ཐབས་སྙིང་དང་ར་མགོས་མཚན་པར་སྐུ་ཙཀ་དར་གདུགས་དམར་པོ་ཅན་དང་། མདའ་རྒོད་སྒྲོ་མ་མེ་ལོང་དར་ནག་སྟག་རས་ཕ་ཝཾ་ལོང་བུ་ལ་གསེར་གྱིས་སྲོག་སྔགས་བྲིས་པ་དར་དམར་གྱིས་དྲིལ་ཏེ་བཏགས་པ་འཛུག །མ་འབྱོར་ན་མདའ་དར་བྲིས་པའི་རྒྱབ་ཏུ་སྲོག་སྔགས་བྲིས་ [134b] པས་འཐུས། རྩ་དཀྱིལ་གཡོན་དུ་གཏེར་སྲུང་རྣམ་གསུམ་གྱི་བཀའ་གཏད་ལ། འཛོམ་ན་རྟེན་རྫས་རྣམ་གཏེར་གཞུང་དུ་གསལ་བ་བཞིན་དགོས་ཀྱང་། སྲོག་དབང་སྐབས་འདིར་བསྡུས་པའི་ཕྱག་བཞེས་ལྟར། ལྷ་ལ་གཏོར་མ་དཀར་ཟླུམ། བཙན་ལ་ཟུར་གསུམ་དམར་པོ། ཀླུ་ལ་བཤོས་སྔོན་ནམ་དཀར་ཟླུམ་སྦྲུལ་དཀྲིས་ཅན་བཅས་ལ་སོ་སོའི་སྐུ་ཙཀ་དར་གདུགས་རང་མདོག་ཅན་བཙུགས་པ་ཕྲེང་ཚར་དུ་འགོད། དེ་རྣམས་ཀྱི་མཐའ་སྐོར་དུ་ཉེར་སྤྱོད་དང་། མདུན་རྒྱབ་གང་བདེར་སོ་སོའི་མཆོད་གཏོར་སྨན་རཀ ། གཞན་ཡང་འདིར་འོས་པའི་ཡོ་བྱད་ཐམས་ཅད་ཚང་བར་འདུ་བྱས་ལ། དབང་དོན་སྒྲུབ་མཆོད་ནི། གསང་སྐོར་ཡི་དམ་བསྐྱེད་རིམ་བྱང་བུས་ཁོག་ཕུབ་སྟེ། དངོས་གཞི་རྟེན་གྱི་བྱང་བུའི་དབུ་ནས། ཐུགས་རྗེའི་འོད་ཀྱིས་སྣོད་བཅུད་སྦྱངས༔ ཞེས་པའི་མཚམས་སུ་བཀའ་སྲུང་ཡེ་ཤེས་པའི་སྒྲུབ་ཐབས་རང་གཞུང་གི ། སྣང་སྲིད་ཆོས་ཀྱི་འབྱུང་གནས་རྫོགས༔ ཞེས་སོགས་མངོན་རྟོགས་གཞུང་བསྲང་ལ་བདག་མདུན་ཆིག་རྫོགས་སུ་གསལ་གདབ། ཉི་མ་ལ་ནི་འོད་བཞིན་བསྒོམ༔ དུག་གསུམ་ཡེ་དག་རྡོ་རྗེ་གསུམ༔ སོགས་བྱང་བུའི་རྒྱས་གདབ་དབང་བསྐུར་ནས་བརྩམས་བསྟོད་པའི་བར་དུ་བཏང་ལ། བཟླས་པའི་ཐོག་མར་ཉམས་ཆག་འཁོན་གྲིབ་སྦྱོང་བའི་སླད་དུ། བདག་བསྐྱེད་ཀྱི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། མདུན་བསྐྱེད་ཀྱི་གནས་གསུམ་དུ་ཐིམ་པས་སྐུ་གསུང་ཐུགས་ཀྱི་དམ་ཚིག་ཉམས་ཆག་ཉེས་ལྟུང་གི་ཚོགས་ཐམས་ཅད་བྱང་ཞིང་ [135a] དག །གསང་བ་གསུམ་གྱི་བྱིན་རླབས་དངོས་གྲུབ་ཐམས་ཅད་འོད་ཟེར་དཀར་དམར་མཐིང་གའི་རྣམ་པར་བྱོན་ནས་བདག་ལ་ཐིམ་པས་མཆོག་དང་ཐུན་མོང་གི་དོངས་གྲུབ་ཐོབ། སླར་ཡང་འོད་ཟེར་འཕྲོས་པས་སྲུང་མ་དམ་ཅན་རྒྱ་མཚོའི་ཐུགས་རྒྱུད་བསྐུལ། ཅི་བཅོལ་བའི་ཕྲིན་ལས་བཞི་ཐོགས་མེད་དུ་སྒྲུབ་པར་བསམ་ཞིང་། ཡི་གེ་བརྒྱ་པ་ཅུང་ཟད། རྩ་བའི་བཟླས་པ་དངོས་ནི། མདུན་བསྐྱེད་གཙོ་འཁོར་ཀུན་གྱི་ཐུགས་ཀར་ཉི་མ་ལ་གནས་པའི་ཧཱུྃ་གི་མཐར་སྔགས་ཕྲེང་གཡས་སུ་བཀོད་པ་གཡོན་དུ་འཁོར་བ་ལས་འོད་ཟེར་འཕྲོས། རྒྱལ་བ་སྲས་དང་བཅས་པ་མཆོད། སེམས་ཅན་གྱི་དོན་བྱས། བྱང་ཆུབ་སྒྲུབ་པའི་བར་ཆད་བདུད་བགེགས་ལོག་འདྲེན་ཐམས་ཅད་ཚར་བཅད། སྣང་སྲིད་ཐམས་ཅད་ཁྲོ་མོ་རོལ་པའི་དཀྱིལ་འཁོར་ཆེན་པོར་གྱུར་པར་བསམ་ལ། གཞུང་གསལ་སྔགས་རྣམས་གཙོ་འཁོར་གྱི་འགྲོས་དང་སྦྱར་ཏེ་བཟླ་ཞིང་། བུམ་བཟླས་སྤྲོ་ནའང་སྤྱི་ལྟར་བྱས་མཐར་སྟོང་ཚིག་གིས་མཆོད། དེ་ནས་འབར་གདོང་མའི་མདུན་རྟེན་ལ་དམིགས་ཏེ། རང་ཉིད་ཡི་དམ་ལྷར་གསལ་མདུན། །ཆོས་འབྱུང་དམར་ནག་བསྣོལ་བའི་དབུས། །འབར་བའི་གདོང་ཅན་སྐུ་མདོག་དམར། །གཡས་སུ་སེང་གེའི་གདོང་ཅན་དཀར། །གཡོན་དུ་ཆུ་སྲིན་གདོང་ཅན་ནག །གསུམ་ཀ་རུས་རྒྱན་དུར་ཁྲོད་ཆས། །གྲི་ཐོད་འཛིན་ཅིང་གར་སྟབས་བསྒྱུར། ། [135b] མེ་རླུང་འཚུབ་མའི་ཀློང་དུ་གསལ། །རང་གི་ཐུགས་ནས་འོད་འཕྲོས་པས། །མདུན་གྱི་མ་མོའི་ཐུགས་རྒྱུད་བསྐུལ། །སྔོན་གྱི་དམ་ཚིག་རྗེས་དྲན་ཏེ། །ཕྲིན་ལས་ཐོགས་མེད་སྒྲུབ་པར་གྱུར། །ཅེས་དམིགས་ལ། ཨོཾ་མ་མ་ཛྭ་ལ་ཛྭ་ལ་ནི་ཙཎྜི་ཧཱུྃ་ཕཊ། ཅེས་ཅི་འགྲུབ་བཟླས་མཐར། ཧཱུྃ། ཐུན་མོང་ཁྱད་པར་བླ་ན་མེད། །ཕྱི་ནང་གསང་བའི་མཆོད་སྤྲིན་ནི། །དངོས་བཤམས་ཡིད་ལས་བྱུང་བ་དག །ནམ་མཁའ་གང་བར་སྤྲོས་ཏེ་མཆོད། །ཨོཾ་མ་མ་ཛྭ་ལ་ཛྭ་ལ་ནི་ཙཎྜི་ས་པ་རི་ཝཱ་ར་ཨརྒྷཾ པཱདྱཾ། པུཥྤེ། སོགས་ནས། ཤཔྟ་པྲ་ཏཱིཙྪ་སྭཱ་ཧཱ། ཞེས་ཉེར་སྤྱོད་དང་། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཏི། ཞེས་སྨན་རཀ་སྟོབ། ཨོཾ་མ་མ་ཛྭ་ལ་ཛྭ་ལ་སོགས་སྙིང་པོའི་མཐར། ས་བ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱི་ཧི། ཞེས་ལན་གསུམ་མམ་བདུན་གྱིས་གཏོར་མ་ཕུལ་ལ། ཧཱུྃ༔ གཏུམ་ཆེན་ཁྲོས་མ་མེ་ཡི་གདོང་༔ ཞལ་གཅིག་གཉིས་གྲོ་ཐོད་འཛིན༔ འབར་བའི་ཀློང་དུ་གར་བསྒྱུར་མ༔ ཆུ་སྲིན་སེང་གེའི་གདོང་ཅན་གཉིས༔ དཀར་ནག་མདོག་ཅན་གྲི་ཐོད་འཛིན༔ མ་མོ་མཆེད་གསུམ་བཀའ་སྡོད་བཅས༔ བརྒྱན་པའི་གཏོར་མ་འདི་བཞེས་ལ༔ གདུག་པའི་དགྲ་བགེགས་ཐལ་བར་རློག༔ བཅོལ་བའི་ཕྲིན་ལས་མྱུར་སྒྲུབ་མཛོད༔ ཅེས་བསྟོད་ཅིང་ཕྲིན་ལས་གསོལ། དེ་ [136a] ནས་གཤོག་རྒོད་མའི་མདུན་རྟེན་ལ་དམིགས་ཏེ། མདུན་དུ་གྲུ་གསུམ་འབར་བའི་ཀློང་། །རྡོ་རྗེ་གཤོག་རྒོད་མཐིང་ནག་འབར། །མཚོན་ཆའི་གཤོག་བརྒྱངས་གྲི་ཐོད་འཛིན། །པད་ཉིར་དགྲ་བགེགས་གདན་ལ་འགྱིང་། །ཕྱོགས་བཞིར་ལས་བཞིའི་ཕོ་ཉ་བཞི། །དགྲ་སྙིང་ཟ་ཞིང་མེ་ལོང་བལྟ། །མི་ལྤགས་གོས་གྱོན་ཞབས་གར་སྟབས། །ཀུན་ཀྱང་འབར་བའི་དབུས་ན་གསལ། །རང་གི་ཐུགས་ནས་འོད་འཕྲོས་པས། མདུན་གྱི་མ་མོའི་ཐུགས་རྒྱུད་བསྐུལ། །སྔོན་གྱི་དམ་ཚིག་རྗེ་དྲན་ཏེ། །ཕྲིན་ལས་ཐོགས་མེད་སྒྲུབ་པར་གྱུར། །ཅེས་དམིགས་ལ། མ་མ་ཏྲག་རཀྴ་ག་རུ་ཊ་ཧཱུྃ་ཕཊ༔ ཅེས་ཅི་འགྲུབ་བཟླས་མཐར་གོང་བཞིན་ཉེར་སྤྱོད་དང་སྨན་རཀ ། རང་སྔགས་ལ་གཏོར་སྔགས་བཏགས་པས་གཏོར་མ་ཕུལ་ལ། ཧཱུྃ༔ དབྱིངས་ལས་སྐུར་བཞེངས་མ་མོ་ནི༔ གཏུམ་ཆེན་མཐིང་ནག་གྲི་ཐོད་འཛིན༔ གཤོག་བརྒྱངས་མེ་ཡི་ཀློང་ན་བཞུགས༔ རིགས་བཞི་ཕོ་ཉ་བཞི་ཡིས་བསྐོར༔ དཀར་སེར་དམར་ལྗང་སྙིང་མེ་ལོང་༔ འཛིན་ཅིང་མེ་ཀློང་གར་ཐབས་བསྒྱུར༔ མ་མོའི་འབུམ་གྱི་འཁོར་གྱིས་བསྐོར༔ འདིར་བྱོན་དམ་རྫས་མཆོད་གཏོར་བཞེས༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་གསོལ། དེ་ནས་དམ་ཅན་གྱི་མདུན་རྟེན་ལ་དམིགས་ཏེ། རང་མདུན་ཕ་ཝཾ་ལོང་བུའི་ [136b] མཁར། །མེ་རླུང་དམར་ནག་འཚུབ་མ་འཁྱིལ། །འབྲུག་སྒྲ་ཐོག་སེར་བུ་ཡུག་འཚུབས། །སེར་གེར་ར་སྐྱེས་ཁྱུ་མཆོག་གླང་། །མ་ངེས་ཞོན་པ་སྣ་ཚོགས་སྟེང་། །སྐྱེས་བུ་ཆེན་པོ་དམར་ནག་ཁྲོས། །སྟག་རལ་གཡས་ལ་གཟིག་ཤུ་བ་གཡོན། །རྡོ་རྗེ་ཕྱར་ཞིང་དགྲ་སྙིང་ཟ། །མཆན་གཡོན་དར་དམར་རུ་མཚོན་བསྒྲེངས། །དར་བེར་ཕྱི་ནང་རིན་ཆེན་རྒྱན། །སུལ་ནས་རིན་ཆེན་ནོར་ཆར་འབེབས། །སྐུ་ལས་མེ་འོད་གློག་སྟོང་འཁྱུག །ཞལ་ནས་རྔམས་པའི་གད་རྒྱང་སྒྲོགས། །ཤངས་ནས་བསྐལ་པའི་འཐོར་རླུང་འཚུབས། །མཆེད་འཁོར་ཕོ་ཉས་རུ་མཚོན་ཕྱར། །དོམ་དྲེད་འཕར་སྤྱང་ངར་སྐད་སྒྲོགས། །འཁོར་དང་བཅས་པ་མངོན་སུམ་གསལ། །རང་གི་ཐུགས་ནས་འོད་འཕྲོས་པས། །མདུན་གྱི་དམ་ཅན་ཐུགས་རྒྱུད་བསྐུལ། །སྔོན་གྱི་དམ་ཚིག་རྗེས་དྲན་ཏེ། །ཕྲིན་ལས་ཐོགས་མེད་སྒྲུབ་པར་གྱུར། །ཅེས་དམིགས་ལ། ཨོཾ་ཏྲི་ཤུ་ལ་བཛྲ་སཱ་དྷུ་སིདྡྷི་ཧཱུྃ། ཞེས་ཅི་འགྲུབ་བཟླས་མཐར་གོང་བཞིན་ཉེར་སྤྱོད་སྨན་རཀ་དང་། རང་སྔགས་ལ་གཏོར་སྔགས་བཏགས་པས་གཏོར་མ་ཕུལ་ལ། ཧཱུྃ༔ དབང་གི་སྤྲུལ་པ་རྡོ་རྗེ་ལེགས༔ དམར་ནག་རྡོ་རྗེ་དགྲ་སྙིང་འཛིན༔ དར་གྱི་བེར་ཆེན་ཕྱི་ནང་གསོལ༔ དབུ་སྐྲ་གྱེན་བརྫེས་ཐོད་སྐམ་བརྒྱད༔ སག་ལྷྭམ་གསོལ་ཞིང་སེང་ཆེན་ཆིབས༔ བཙན་དམག་ [137a] ཞུབ་ཅན་སྟོང་གིས་བསྐོར༔ དགྱེས་སྡེ་བརྟན་མ་བཅུ་གཉིས་སོགས༔ ཡང་ཟབ་བཀའ་ཡི་སྲུང་མ་རྣམས༔ འདིར་བྱོན་དམ་རྫས་མཆོད་གཏོར་བཞེས༔ སྒྲུབ་པ་པོ་ཡི་བསམ་པ་སྒྲུབས༔ ཞེས་གསོལ། དེ་ནས་གཡོན་གྱི་གཏེར་སྲུང་དྲེགས་པ་རྣམ་གསུམ་གྱི་མདུན་བསྐྱེད་ལ་དམིགས་ཏེ། མདུན་དུ་ཨ་ཏྲི་ནཱྃ་གསུམ་ལས། །དྲེགས་པ་རྣམ་གསུམ་དཀར་དམར་སྔོ། །ལྷ་བཙན་ཀླུ་ཡི་ཆས་ཀུན་རྫོགས། །དཀར་པོ་ལྷ་ཡི་སྡེ་དཔོན་ནི། །གསེར་འཁོར་གཡས་ལ་ཆུ་ཤེལ་གཡོན། །གྲུ་ཡོན་དར་མདུང་དཀར་པོ་ཕྱར། །རྟ་དཀར་ཆིབས་ཤིང་ལྷ་གནས་འགྲིམ། །གསང་མཚན་རྡོ་རྗེ་འོད་གསལ་རྩལ། །དམར་པོ་བཙན་གྱི་སྡེ་དཔོན་ནི། །མདུང་དམར་གཡས་ལ་བཙན་ཞགས་གཡོན། །གདོང་ལས་འབར་བའི་མེ་འོད་འཕྲོ། །ཤངས་ནས་སྔོ་དམར་ནད་རླུང་འཚུབས། ཞལ་ནས་དུག་གི་ཁ་ཆུ་འཛག །རྟ་དམར་ལ་ཞོན་སྟོང་གསུམ་ཉུལ། །གསང་མཚན་རྡོ་རྗེ་མེ་འབར་རྩལ། །སྔོན་པོ་ཀླུ་ཡི་སྡེ་དཔོན་ནི། །ཀླུ་རྒྱལ་གཙུག་ན་རིན་ཆེན་སྲས། །ཡིད་བཞིན་ནོར་བུ་གཏེར་བུམ་འཛིན། །དགོས་འདོད་རེ་སྐོང་འབྲུ་ཆར་འབེབས། །གཟུགས་མཛེས་ཡིད་འོང་བྱིས་པའི་ཚུལ། །གཡུ་སྦྲུལ་མཇུག་མ་གཡས་སུ་འཁྱིལ། །ཀླུ་རྟ་ལ་ཞོན་རྒྱ་མཚོར་རྒྱུ། །གསང་ [137b] མཚན་ནོར་བདག་གཟི་འབར་རྩལ། །སྣང་གསུམ་འོད་ལས་ཤར་བ་ཡི། །ཟབ་གཏེར་སྲུང་མ་རྣམ་གསུམ་ལ། །ཕྱི་ནང་གསང་བ་ཡང་གསང་གི ། ངོ་མཚར་མཆོད་སྤྲིན་རྒྱ་མཚོས་མཆོད། །བརྒྱུད་གསུམ་བླ་མའི་ཐ་ཚིག་ཅན། །གཏེར་བདག་འཁོར་དང་བཅས་ལ་བསྟོད། །དགོངས་པས་གཟིར་ཞིང་། ཨ་དེ་ཝ་རཱ་ཛ་ཛཿ ཙ་ཤུ་ལ་ཏྲི་ཛཿ ནཱྃ་ནཱ་ག་རཱ་ཛ་རཏྣ་ཛཿ ཞེས་ཅི་འགྲུབ་བཟླས་མཐར། རང་སྔགས་ལ་གཏོར་སྔགས་བཏགས་བ་ལན་གསུམ་རེས་གཏོར་མ་ཕུལ་ལ། བརྒྱུད་གསུམ་བླ་མའི་སྤྱན་སྔ་རུ། །དམ་ཅན་ཇི་བཞིན་ད་ལྟ་འདིར། །ཟབ་གཏེར་བསྟན་པ་བསྲུང་མཛད་པ། །འཁོར་དང་བཅས་ལ་བསྟོད་པར་བགྱི། །ཞེས་བསྟོད། ལས་བུམ་དུ་སྐད་ཅིག་གིས་ཀརྨ་ཌཱ་ཀི་གསལ་ལ། ཨོཾ་ཀརྨ་ཌཱ་ཀི་ནཱི་ཧཱུྃ་ཕཊ། ཅེས་བཟླས་པས་བྱིན་བརླབ། དེ་ནས་ཚོགས་མཆོད་དང་། རིག་པའི་མེ་ཏོག་དོར་ལ་གནང་བ་ནོད་དོ། དབང་བསྐུར་དངོས་ལ། སློབ་མ་རྣམས་ཁྲུས་ནས་དབྱུང་། བགེགས་བསལ་ཞིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་ཆོས་བཤད་ཀྱི་ཁྱད་པར། དེ་ལ་འདིར་ཁྱབ་བདག་ཀུན་བཟང་ཧེ་རུ་ཀ་ཡབ་ཡུམ་ཉིད་གདུལ་བྱ་ཞི་བས་མི་འདུལ་བ་རྣམས་ཕྲིན་ལས་དྲག་པོས་ཡོངས་སུ་འདུལ་བ་དང་། གསང་ཆེན་རྒྱུད་ལུང་མན་ངག་ཟབ་མོའི་བཀའ་རྣམས་འཇིག་རྟེན་ན་ཡུན་དུ་སྐྱོང་བར་བྱ་བའི་ཕྱིར་ [138a] ཡེ་ཤེས་དབྱིངས་དང་དྲེགས་པ་ལས་ཀྱི་ཕོ་ཉའི་ཕྱག་རྒྱ་ཇི་སྙེད་ཅིག་སྣང་བར་མཛད་པ་ལས། འདིར་ནི་སློབ་དཔོན་ཆེན་པོ་པདྨ་ཐོད་ཕྲེང་རྩལ་དང་ལོ་ཆེན་བཻ་རོ་ཙཱ་ནས་སྙིང་པོའི་གདམས་ཟབ་མནོག་ཆོས་སུ་དྲིལ་བ་རྫོགས་ཆེན་སྡེ་གསུམ་དང་འབྲེལ་བའི་བཀའ་སྲུང་གི་སྐོར་ཡིན། དེ་ལའང་ཡེ་ཤེས་པ་དང་དྲེགས་པའི་ཚུལ་གཉིས་སུ་ཡོད་པ་ལས། ཐོག་མར་ཡེ་ཤེས་དབྱིངས་ཀྱི་ཌཱ་ཀི་གསང་སྐོར་བཀའ་བརྒྱད་རྫོང་འཕྲང་གི་ཡུམ་བཀའ་དབྱིངས་ཕྱུག་ཁྲོས་མའི་རྒྱལ་མོའི་དཀྱིལ་འཁོར་དུ་དབང་བསྐུར་བ་ལ། བདག་ཉིད་ཀྱིས་བགྱི་འོས་རྣམས་སྔོན་དུ་གྲུབ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག ། བླ་མ་དང་དཀྱིལ་འཁོར་གྱི་གཙོ་མོ་ཐ་མི་དད་པའི་སྤྱན་སྔར་ཕྱག་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས། ཧོཿ བདེ་བར་གཤེགས་པ་བླ་མ་རྗེ༔ དངོས་གྲུབ་ཀུན་བདག་ཡི་དམ་ལྷ༔ མཁའ་འགྲོའི་གཙོ་མོ་དགོངས་སུ་གསོལ༔ བདག་ཅག་དཀྱིལ་འཁོར་ཆེན་པོ་འདིར༔ མྱུར་དུ་གཞུག་པར་མཛད་དུ་གསོལ༔ ལན་གསུམ། གནང་བ་སྦྱིན་པ་ནི་འདི་ལ་གསན་པར་ཁྱབ་སྟེ། མཁའ་འགྲོ་མ་ཡི་གནས་འདི་རུ༔ སུ་ཡིན་འཇུག་པའི་སྐལ་མེད་པས༔ ཐེག་པའི་ཐབས་ཚུལ་ཤེས་པ་དང་༔ རྒྱུད་དག་བསོད་ནམས་ལྡན་པ་རྣམས༔ [138b] འཇུག་པར་རུང་བར་རྒྱལ་བས་བཤད༔ དེ་བས་རྒྱུད་དག་ཚོགས་གསོག་མཛོད༔ གསང་བ་མཆོག་གི་དཀྱིལ་འཁོར་ཡེ་ཤེས་མཁའ་འགྲོའི་རང་བཞིན་རྣམ་པ་ཐམས་ཅད་པ་ཕྱོགས་དུས་ཀྱི་སྐྱབས་ཡུལ་མ་ལུས་གདོད་ནས་རང་ཆས་སུ་རྫོགས་པ་ལ་དབྱིངས་རིག་གཉིས་སུ་མེད་པའི་ཚུལ་གྱིས་སྐྱབས་སུ་འགྲོ་བ་དང་། རང་བྱུང་རང་གསལ་གྱི་ངང་དུ་སེམས་བསྐྱེད་པ་དང་། གནས་ལུགས་དོན་དམ་ལྟ་བ་མཇལ་བའི་བསགས་སྦྱོང་གི་དགོངས་སྤྱོད་ལྷུན་འབྱམས་ཆེན་པོའི་ངང་ནས་འདི་རྣམས་ཀྱི་རྗེས་ཟློས། དབྱིངས་ཉིད་རྣམ་དག་རྫོགས་སངས་རྒྱས༔ ཞེས་སོགས་གསང་སྐོར་ཡི་དམ་སྔོན་འགྲོའི་བྱང་བུ་ལྟར་སྐྱབས་སེམས་ཚོགས་བསགས་རྗེས་ཟློས་བྱ། དམ་བསྒྲག་པ་ལ། ཡེ་ཤེས་མཁའ་འགྲོའི་དཀྱིལ་འཁོར་དུ༔ ངས་ནི་ཡང་དག་ཁྱོད་གཞུག་གི༔ བླ་མེད་རྒྱུད་ལས་གང་གསུངས་པའི༔ དམ་ཚིག་ཐམས་ཅད་ཐུབ་བར་སྲུངས༔ ཞེས་བསྒོས་པ་ལ། སྤྱི་དང་ཁྱད་པར་གྱི་དམ་ཚིག་རྣམས་སྲོག་བཞིན་དུ་བསྲུང་སྙམ་པས་འདིའི་རྗེས་ཟློས། །བདེ་བར་གཤེགས་པ་ཁྱེད་ཅི་འདྲ༔ དེ་འདྲ་ཁོ་ནར་བདག་གྱུར་ཅིག༔ སྤྲུལ་སྐུའི་སྟོན་པས་བཤད་པ་ཡི༔ སོ་སོར་ཐར་དང་བྱང་ཆུབ་སེམས༔ ལོངས་སྐུའི་སྟོན་པས་བཤད་པ་ཡི༔ རིགས་ལྔའི་སྡོམ་པ་མ་ལུས་བཟུང་༔ ཁྱད་པར་ཧེ་རུ་ཀ་ [139a] དཔལ་གྱི༔ ཉི་ཤུ་ལྔ་དང་བྱེ་བྲག་ཏུ༔ སྐུ་གསུང་ཐུགས་ཀྱི་དམ་ཚིག་རྣམས༔ ཇི་ལྟར་བསྟན་པ་བདག་གིས་བསྲུང་༔ སྲོག་གི་ཕྱིར་ཡང་མི་བཏང་ན༔ བདེ་གཤེགས་རིགས་མཆོག་སྩལ་དུ་གསོལ༔ དམ་ཆུ་བདུད་རྩི་སྦྱིན་ལ། འདི་ནི་ངོ་བོ་དམ་ཚིག་ཆུ༔ ཡེ་ཤེས་བསྐྱེད་ཕྱིར་སྦྱིན་པ་ཡིན༔ དམ་བསྲུང་དངོས་གྲུབ་འདིས་ཐོབ་བྱེད༔ མ་བསྲུང་ལྕགས་ཀྱི་སྡིག་པར་འགྱུར༔ སྲོག་གཅོད་དམྱལ་བ་ཆེན་པོར་ལྟུང་༔ དམ་བསྲུང་རྡོ་རྗེ་ཆུ་འདི་འཐུང་༔ དེ་ལྟར་བྱིན་པའི་དམ་ཚིག་རྡོ་རྗེའི་ཆུ་སྙིང་ལ་བསྟིམས་ཏེ་མི་འདའ་རྡོ་རྗེའི་བྲོ་བོར་བ་འདིའི་རྗེས་བཟློས། ཨོཾ་བཛྲ་ས་མ་ཡ་ཨི་དན་ན་ར་ཀན༔ དེ་ནས་དབང་གི་གཞི་སྒྲུབ་བར་བྱེད་པ་ཡེ་ཤེས་པ་དབབ་པ་ལ་དམིགས་པ་འདི་བཞིན་དུ་མཛོད་ཅིག ། ཁྱེད་རང་རྣམས་རྡོ་རྗེ་ཕག་མོ་གནམ་ཞལ་མར་གསལ་བའི་སྙིང་གར་ཉི་མའི་གདན་ལ་ཧཱུྃ༔ སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། རང་བཞིན་གྱི་གནས་ནས་ཡེ་ཤེས་པའི་ཚོགས་སྤྱན་དྲངས་ཏེ་ཁྱེད་རང་རྣམས་ཀྱི་སྒོ་གསུམ་ལ་ཐིམ་པར་གྱུར། སྔགས་ཤམ་དུ། ཛྙཱ་ན་ཨ་ཝེ་ཤ་ཡ་ཨ་ཨཱཿ ཞེས་དྲག་ཏུ་བརྗོད་ཅིང་རོལ་མོ་བྱ། ཡེ་ཤེས་བརྟན་པར་གྱུར་ཅིག ། ཏིཥྛ་བཛྲ། ཞེས་བརྟན་པར་བྱ། དེ་ནས་དངོས་གཞིའི་དབང་བསྐུར་བ་ལ་བུམ་གསང་ཤེར་ཡེ་ཚིག་དབང་རྣམས་ [139b] རིམ་པར་འབྱུང་བ་ལས། ཐོག་མར་བུམ་པའི་དབང་གི་སླད་དུ། བུམ་པ་རང་བྱུང་གི་གཞལ་ཡས་ཁང་དུ་ཡེ་ཤེས་དབྱིངས་ཀྱི་མཁའ་འགྲོ་མ་རྣམས་བཞུགས་པའི་སྐུ་ལས་བྱང་ཆུབ་སེམས་ཀྱི་ཆུ་རྒྱུན་བྱུང་བས་སྒྲིབ་པའི་འཆིང་བ་གཏོར་ཞིང་ཡེ་ཤེས་ཀྱི་བཅུད་བླུགས་པར་མོས་ཤིག །བུམ་པ་ཐོགས་ལ། ཧཱུྃ༔ དབྱིངས་ཀྱི་བུམ་པར་རིག་པའི་བཅུད༔ ཟུང་འཇུག་ཡེ་ཤེས་མཁའ་འགྲོའི་ལྷ༔ གཉིས་མེད་མཉམ་སྦྱོར་བདུད་རྩི་མཆོག༔ ཡེ་ཤེས་ཆུ་ཡི་དབང་བསྐུར་རོ༔ ཀ་ལཱ་ཤ་ཨ་བྷི་ཥིཉྩ་ཧཱུྃ༔ ཞེས་སྤྱི་བོར་བཞག་ལ་བུམ་ཆུ་སྦྱིན། རྗེས་འབྲེལ་སྐུའི་དབང་གི་སླད་དུ། མདུན་བསྐྱེད་ཀྱི་སྐུ་ལས་སྐུ་གཉིས་པ་རེ་འཕྲོས་ཏེ་ཐིམ་པར་མོས་ཤོག །ཧཱུྃ༔ ཆོས་ཀྱི་དབྱིངས་ལས་སྐུར་བཞེངས་པ༔ རྡོ་རྗེ་ཕག་མོ་གནམ་ཞལ་མ༔ ཡབ་ཡུམ་འཁོར་དང་བཅས་རྣམས་ཀྱིས༔ རིགས་ཀྱི་བུ་ལ་དབང་བསྐུར་རོ༔ རྩ་སྔགས་དང་། སརྦ་ས་མ་ཡི་ཨ་བྷི་ཥིཉྩ་ཨོཾ༔ ཧཱུྃ༔ མེ་ལོང་ཡེ་ཤེས་ལས་བཞེངས་པའི༔ བཛྲ་ཀྲོ་དྷཱི་ཤྭ་རི་མ༔ ཡབ་ཡུམ་འཁོར་དང་༴ རིགས་ཀྱི་བུ་ལ༴ སརྦ༴ ཧཱུྃ༔ མཉམ་ཉིད༴ ཡུམ་ཆེན་མ་མོ་བེ་ཏཱ་ལི༔ ཡབ་ཡུམ་འཁོར༴ རིགས་ཀྱི་བུ༴ སརྦ༴ ཧཱུྃ༔ སོར་རྟོག༴ ཡུམ་ཆེན་པདྨ་གཟི་ལྡན་མ༔ ཡབ་ཡུམ༴ རིགས་ཀྱི༴ སརྦ༴ [140a] ཧཱུྃ༔ ནན་ཏན༴ ཡུམ་ཆེན་འཁོར་ལོ་རྒྱས་འདེབས་མ༔ ཡབ་ཡུམ༴ རིགས་ཀྱི༴ སརྦ༴ ཧཱུྃ༔ ཀློང་གྱུར༴ ཡུམ་ཆེན་ཉིད་བཞི་མུ་ཁ་ལེ༔ ཡབ་ཡུམ༴ རིགས་ཀྱི༴ སརྦ༴ ཧཱུྃ༔ ཕྱག་ཆེན༴ མཁའ་འགྲོ་ལས་ཀྱི་དབང་མོ་ཆེ༔ ཡབ་ཡུམ༴ རིགས་ཀྱི༴ སརྦ༴ ཧཱུྃ༔ དབྱིངས་གྲོལ༴ སྲིད་པའི་རྒྱལ་མོ་འབྱུང་ལྔའི་བདག༔ ཡབ་ཡུམ༴ རིགས་ཀྱི༴ སརྦ༴ ཧཱུྃ༔ མཐའ་གྲོལ༴ ཡུམ་ཆེན་ཁམས་གསུམ་སྤྱི་འདུལ་མ༔ ཡབ་ཡུམ༴ རིགས་ཀྱི༴ སརྦ༴ བཀའ་སྡོད་བུམ་པ་ཐོགས་ལ། ཧཱུྃ༔ སྣོད་བཅུད་ཡོངས་རྫོགས་བཀའ་སྡོད་བུམ་པ་རུ༔ མ་མོ་ཉེར་བརྒྱད་གཙོར་གྱུར་བྱེ་བ་འབུམ༔ བསམ་གྱིས་མི་ཁྱབ་ཡོངས་རྫོགས་དབང་བསྐུར་རོ༔ ཕྲིན་ལས་སྣ་ཚོགས་ལྷུན་གྱིས་གྲུབ་པར་ཤོག༔ ཨོཾ་བཛྲ་སརྦ་ཡཀྵ་ས་མ་ཡ་ཧཱུྃ་ཕཊ༔ སརྦ་ཨ་བྷི་ཥིཉྩ་ཧཱུྃ༔ ཞེས་བསྐུར། གསུང་བཟླས་པའི་ལུང་གི་སླད་དུ་དཀྱིལ་འཁོར་ལྷ་ཚོགས་རྣམས་ཀྱི་ཐུགས་ཀ་ནས་སྔགས་ཀྱི་ཕྲེང་བ་གཉིས་པ་རེ་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་སྲོག་ཧཱུྃ་ཡིག་གི་མཐར་འཁོད་པར་མོས་ལ་སྔགས་འདི་རྣམས་ཀྱི་རྗེས་ཟློས། ཡུམ་བཀའ་རང་གཞུང་གི་སྔགས་ [140b] རྣམས་རྗེས་ཟློས་ལན་གསུམ་རེ་བྱ། མཐར་སྔགས་ཕྲེང་ལག་ཏུ་གཏད་ལ། ཡེ་ཤེས་ཌཱ་ཀིའི་གསུང་དང་མཉམ༔ བཟླས་བརྗོད་སྔགས་ཀྱི་ནུས་པ་རྣམས༔ ནུས་ལྡན་མི་ཉམས་འཕེལ་བ་ཡི༔ གསུང་གི་དབང་མཆོག་རྫོགས་པར་ཤོག༔ ཨོཾ་ཛྙཱ་ན་ཌཱ་ཀི་ནཱི་སརྦ་ཝཱ་ཀ་ཨ་བྷི་ཥིཉྩ་ཨཱཿ ཐུགས་ཕྱག་མཚན་རྡོ་རྗེས་དབང་བསྐུར་བས་དབྱིངས་རིག་གཉིས་སུ་མེད་པའི་དགོངས་པ་རང་གསལ་ངང་གིས་རྫོགས་པར་མོས་ཤིག ། དབྱིངས་ཀྱི་སྟོང་ཆ་ཐུགས་ཀྱི་ངང་༔ ཕྱག་མཚན་རིག་པ་ལུ་གུ་རྒྱུད༔ དབྱིངས་རིག་དབྱེར་མེད་གསལ་སྟོང་ཐུགས༔ མ་བཅོས་ལྷུག་པར་དབང་བསྐུར་རོ༔ ཨོཾ་ཛྙཱ་ན་ཌཱ་ཀི་ནཱི་སརྦ་ཙིཏྟ་ཨ་བྷི་ཥིཉྩ་ཧཱུྃ༔ ཡེ་ཤེས་སེམས་མ་ཡུམ་ལྔའི་སྐུ་གནས་ལྔར་ཐིམ་པས་རྡོ་རྗེ་དབྱིངས་ཀྱི་དབང་ཆེན་རབ་འབྱམས་རྫོགས་པར་མོས་ཤིག །ཡུམ་ལྔའི་སྐུ་སྙིང་གར་བཞག་ལ། ཧཱུྃ༔ ཆོས་དབྱིངས་ཀུན་ཏུ་བཟང་མོ་དང་༔ རྡོ་རྗེ་སྙེམས་མ་གླུ་དང་༔ གསང་བ་ཡེ་ཤེས་སྒྲོལ་མ་སོགས༔ རྒྱལ་བ་ཡུམ་ལྔས་དབང་བསྐུར་བས༔ རང་རིག་བྱང་ཆུབ་སེམས་རྟོགས་ཤོག༔ བཛྲ་ཙིཏྟ་བོ་དྷི་གཱིཏྟ་དྷུ་མ་གྷཱ་ཡེ་ཨཱརྻ་ཏཱ་རེ་ཨ་བྷེ་ཥེཉྩ་ཧཱུྃ༔ ཡོན་ཏན་དམ་རྫས་དང་དཔལ་ཆས་ཀྱི་དབང་བསྐུར་བས་ཆེ་བའི་ཡོན་ཏན་མ་བཙལ་ལྷུན་གྱིས་རྫོགས་པར་མོས་ཤིག ། སྨན་རཀ་གཏོར་གསུམ་ཐོགས་ལ། [141ན དབྱིངས་རིག་དབྱེར་མེད་གཏོར་མ་དང༔ འཁོར་འདས་ཡོངས་གྲོལ་རཀྟ་ཆེ༔ ཡེ་ཤེས་ལྔ་རྫོགས་བདུད་རྩིའི་དབང་༔ བསྐུར་བས་བསྙེན་སྒྲུབ་མཐར་ཕྱིན་ཤོག༔ བ་ལིཾ་ཏ་རཀྟ་པཉྩ་ཨ་མྲྀ་ཏ་ཨ་བྷི་ཥིཉྩ་ཧཱུྃ༔ དཔལ་ཆས་བྱིན། ཧཱུྃ༔ ཡེ་ཤེས་ཀློང་ནས་ཤར་བའི་དཔལ་གྱི་ཆས༔ ཀོ་རློན་ཞིང་ཆེན་སྟག་ཤམ་སྦྲུལ་ཆུན་དང་༔ ཐོད་སྐམ་ཐོད་རློན་རྡོ་རྗེའི་གོ་ཁྲབ་བཅས༔ ཁྲག་ཞག་ཐལ་ཆེན་རྡོ་རྗེའི་ཁྱུང་གཤོག་སོགས༔ ཡོན་ཏན་ཡོངས་རྫོགས་ཆས་ཀྱི་དབང་བསྐྱུར་རོ༔ ཨོཾ་ཛྙཱ་ན་ཌཱ་ཀི་ནཱི་སརྦ་གུ་ཎ་ཨ་བྷི་ཥིཉྩ་ཧཱུྃ༔ ཕྲིན་ལས་ཕུར་བུ་དང་མནན་སྲེག་འཕང་བའི་ཆས་རྣམས་གཏད་པས་མངོན་སྤྱོད་དྲག་པོའི་མཐུ་རྩལ་ཡོངས་སུ་རྫོགས་པར་མོས་ཤིག ། ལྕགས་ཕུར་སྲེག་འཕང་མནན་པའི་ཆས་རྣམས་གཏད་ལ། ཧཱུྃ༔ རྣམ་ཐར་གསུམ་གྱི་ཨེ་དབྱིངས་སུ༔ དུག་གསུམ་རུ་དྲ་བཀུག་ནས་ནི༔ སྐུ་གསུམ་ཕུར་པའི་གདབ་པ་ཡི༔ འོད་གསལ་དབྱིངས་བསྒྲལ་དབང་ཐོབ་ཤོག༔ གཉིས་འཛིན་འཁྲུལ་པ་སྲེག་པའི་ཧོམ༔ མ་རུང་ལོག་རྟོག་ཟློག་པའི་ཟོར༔ རྟོག་པ་དབྱིངས་གནོན་རི་རབ་བཅས༔ སྔགས་འཆང་རྒྱལ་པོ་ཁྱེད་ལ་གཏད༔ གཉིས་སྣང་བསྟན་དགྲ་ཚར་གཅོད་པའི༔ མངོན་སྤྱོད་ཕྲིན་ལས་དབང་ཐོབ་ཤོག༔ [141b] སརྦ་ཀརྨ་བི་ཤྭ་ཨ་བྷི༴ ཞེས་གཏད། ཧོཿ བཀྲ་ཤིས་བུམ་པ་འཁོར་དང་བཅས་པའི་དབང་བསྐུར་བས༔ སློབ་མ་ཐམས་ཅད་ལྷ་རུ་འགྱུར་ཞིང་ལྷ་ཐམས་ཅད་སྣང་སྟོང་གི་ཡེ་ཤེས་སུ་རྟོགས་པར་གྱུར་ཅིག༔ ཅེས་མེ་ཏོག་འཐོར། དེ་ལྟར་བུམ་པའི་དབང་བསྐུར་བས་ལུས་ཀྱི་སྒྲིབ་པ་དག་ཅིང་། སྣང་སྟོང་དཀྱིལ་འཁོར་གྱི་འཁོར་ལོ་བསྒོམ་པ་དང་། ཆུ་ཟླ་ལྟ་བུའི་སྤྲུལ་པའི་སྐུ་ཐོབ་པར་འགྱུར་པའི་ནུས་པ་རྒྱུད་ལ་བཞག་པ་ཡིན་ནོ། ཐོད་པའི་བདུད་རྩི་སྦྱིན་ལ། ཧཱུྃ༔ དབྱིངས་ཀྱི་བྷནྡྷ་ཡངས་པ་རུ༔ རིག་པ་བདེ་སྟོང་ལྷ་ཚོགས་སྦྱོར༔ ཟུང་འཇུག་བདེ་ཆེན་བདུད་རྩིའི་དབང་༔ བདེ་ཆེན་ཡོངས་སུ་བསྐྱེད་ཕྱིར་བསྐུར༔ བོ་ངྷི་ཙིཏྟ་ཨ་བྷི་ཥིཉྩ་ཧཱུྃ༔ ཧོ་བདེ་བ་ཆེན་པོ་བྱང་ཆུབ་སེམས་ཀྱི་བདུད་རྩིས་དབང་བསྐུར་བས༔ ཕུང་ཁམས་ཐམས་ཅས་ལྷར་དག་སྟེ་བདེ་གསལ་ཡེ་ཤེས་མངོན་དུ་འབར་བར་གྱུར་ཅིག༔ དེ་ལྟར་བྱང་སེམས་བདུད་རྩི་གསང་བའི་དབང་གིས་ངག་གི་སྒྲིབ་པ་དག་ཅིང་། གསལ་སྟོང་བདག་བྱིན་རླབས་ཀྱི་རིམ་པ་བསྒོམ་པ་དང་། སྒྲ་བརྙན་ལྟུ་བུའི་ལོངས་སྐུ་ཐོབ་པར་འགྱུར་བའི་ནུས་པ་རྒྱུད་ལ་བཞག་པ་ཡིན་ནོ། །རིག་མའི་གཟུགས་བརྙན་ནམ་དྲིལ་བུ་གཏད་ལ། ཧཱུྃ༔ བཀྲ་ཤིས་མཚན་ལྡན་གཟུངས་མ་འདི༔ བསྟེན་ན་བདེ་བ་ཆེན་པོ་རྟོགས༔ [142a] འདི་སྤངས་སངས་རྒྱས་ཐོབ་འདོད་མིན༔ བདེ་ཆེན་ངལ་མེད་རྟག་ཏུ་རོལ༔ མ་ཧཱ་སུ་པ་ཨ་བྷི་ཥིཉྩ་ཧཱུྃ༔ ཧོ་བདེ་བསྐྱེད་ཡུམ་གྱི་དབང་བསྐུར་བས་རྟོག་ཚོགས་ཐམས་ཅད་བདེ་བ་ཆེན་པོར་དག་སྟེ༔ བདེ་ཆེན་ཡེ་ཤེས་ཀློང་དུ་འགྱུར་བར་གྱུར་ཅིག༔ དེ་ལྟར་བདེ་བ་ཆེན་པོ་ཤེས་རབ་ཡེ་ཤེས་ཀྱི་དབང་བསྐུར་བས་ཡིད་ཀྱི་སྒྲིབ་པ་དག་ཅིང་། བདེ་སྟོང་ཕོ་ཉའི་ལམ་བསྒོམ་པ་དང་། །ནམ་མཁའ་ལྟ་བུའི་ཆོས་ཀྱི་སྐུ་ཐོབ་པར་འགྱུར་པའི་ནུས་པ་བརྒྱུད་ལ་བཞག་པ་ཡིན་ནོ། །ཤེལ་རྡོ་ཐོགས་ལ། ཧཱུྃ༔ སེམས་ཉིད་མ་བཅོས་ཀ་ནས་དག༔ སྟོང་གསལ་རང་བྱུང་ཡེ་ཤེས་རྩལ༔ ལྷུན་གྱིས་གྲུབ་པ་མེ་ལོང་བཞིན༔ རིག་རྩལ་མཆོག་གི་དབང་ཐོབ་ཤོག༔ དྷརྨ་དྷཱ་ཏུ་ཨ་བྷི་ཥིཉྩ་ཨ༔ ཧོཿ རྡོ་རྗེ་སེམས་དཔའི་མེ་ལོང་གོ་དབང་བསྐུར་བས༔ མི་གནས་ཡེ་ཤེས་ཀྱི་རྟོགས་པ་མངོན་དུ་འགྱུར་བར་གྱུར་ཅིག༔ དེ་ལྟར་རིག་སྟོང་ཟུང་དུ་འབྲེལ་བའི་དབང་བཞི་པ་བསྐུར་བས་ཡེ་ཤེས་ཀྱི་དྲི་མ་དག་ཅིང་། རིག་སྟོང་ཀ་དག་ཁྲེགས་ཆོད་ཀྱི་དོན་བསྒོམ་པ་དང་། ཀུན་ཁྱབ་ངོ་བོ་ཉིད་སྐུ་ཐོབ་པར་འགྱུར་པའི་ནུས་བརྒྱུད་ལ་བཞག་པ་ཡིན་ནོ། །མེ་ལོང་དང་རྨ་བྱའི་སྒྲོ་མདོངས་བསྟན་ལ། དབྱིངས་ཀྱི་རང་བཞིན་མེ་ལོང་ལ༔ རྨ་བྱའི་མདོངས་ལྟར་ཅིར་ཡང་ [142b] འཆར༔ རིག་རྩལ་ཟུང་འཇུག་རྩལ་གྱི་དབང་༔ ཡང་དག་པར་ནི་རྟོགས་པར་ཤོག༔ དྷརྨ་ཛྙཱ་ན་ཨ་བྷི་ཥིཉྩ་ཧཱུྃ༔ ཧོཿ རིགས་ཀྱི་བུ་ལ་ཐོད་རྒལ་གྱི་དབང་བསྐུར་བས༔ དབྱིངས་ཡེ་ཟུང་དུ་འཇུག་པའི་རྟོགས་པ་མངོན་དུ་འགྱུར་བར་གྱུར་ཅིག༔ དེ་ལྟར་འོད་གསལ་སྒྲོན་མ་བཞི་མཚོན་པ་རིག་པ་རྩལ་གྱི་དབང་བསྐུར་བས་གློ་བུར་གྱི་དྲི་མ་མཐའ་དག་དག་ཅིང་། སྣང་སྟོང་ཐོད་རྒལ་ལྷུན་གྲུབ་ཀྱི་དོན་བསྒོམ་པ་དང་། མི་འགྱུར་རྡོ་རྗེའི་སྐུ་ཐོབ་པར་འགྱུར་བའི་ནུས་པ་རྒྱུད་ལ་བཞག་པ་ཡིན་ནོ། །དེ་རྣམས་ཀྱིས་ཟབ་གསང་རྫོགས་པ་ཆེན་པོའི་རྒྱུད་ལུང་མན་ངག་གི་ཆོས་ཐམས་ཅད་འབྱུང་བའི་བཞིའམ་བདག་པོར་གྱུར་པས་ན་བཀའ་སྲུང་ཡེ་ཤེས་པའི་ངོ་བོར་བཞུགས་པ་རྡོ་རྗེ་ཕག་མོ་གནམ་ཞལ་དབྱིངས་ཕྱུག་མའི་དཀྱིལ་འཁོར་དུ་དབང་བསྐུར་བ་ཟབ་མོ་ལེགས་པར་གྲུབ་པ་ལགས། །ད་ནི་དོན་དམ་ཆོས་ཀྱི་དབྱིངས་ལས་རྣམ་འགྱུར་དྲེགས་པ་རང་རྒྱུད་པའི་ཚུལ་དུ་བསྟན་ཏེ་གསང་བའི་གཉེར་ཁ་འཛིན་པར་མཛད་པ་བཀའ་སྲུང་འཇིག་རྟེན་པ་རྣམས་ཀྱི་སྲོག་གཏད་སྒྲུབ་པ་ལ། གཏེར་གཞུང་རྩ་བ་ལས་ཡང་ཟབ་སྙིང་པོའི་བཀའ་སྲུང་གསུམ༔ ཤིན་ཏུ་གཉན་པས་གསང་བར་གཅེས༔ བཀའ་གཏད་བཀའ་རྒྱ་བསྡམས་པར་གྱིས༔ མ་འོངས་སུམ་ཅུ་ཁ་རལ་དུས༔ ལྷ་སྲས་སྐྱེ་བ་ཉིད་དང་འཕྲད༔ རྫོགས་ [143a] ཆེན་བསྟན་ལ་ཕན་བྱེད་ཤོག༔ ཅེས་བཀའ་རྒྱ་ཤིན་ཏུ་དམ་པའི་བཀའ་སྲུང་རྣམས་ལས་ཐོག་མར་འབར་མ་མེའི་གདོང་ཅན་གྱི་སྲོག་གཏད་ཞུ་བའི་དོན་དུ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས། རྡོ་རྗེ་སློབ་དཔོན་དགོངས་སུ་གསོལ། །སངས་རྒྱས་བསྟན་པ་བསྲུང་བའི་ཕྱིར། །གཏུམ་ཆེན་ཁྲོས་མ་མེ་གདོང་མའི། བཀའ་གཏད་ཟབ་མོ་སྩལ་དུ་གསོལ། ལན་གསུམ། དངོས་གཞི་གཏེར་གཞུང་ལས། བཀའ་གཏད་གཏོར་མ་སློབ་མར་གཏད༔ ཕྲིན་ལས་བཅོལ་ཞིང་དམ་བསྲེའོ༔ ཞེས་གསུངས་པས། ཁྱེད་རང་རྣམས་དབྱིངས་ཡུམ་རྡོ་རྗེ་ཕག་མོ་གནམ་ཞལ་མའི་ང་རྒྱལ་གྱིས་འཁོད་པ་ལ། མདུན་གྱི་གཏོར་སྣོད་དམར་ནག་ཆོས་འབྱུང་བ་སྣོལ་མའི་དབུས་སུ་གཏོར་མ་འདི་ཉིད་གཏུམ་ཆེན་ཁྲོས་མ་མེའི་གདོང་ཅན་སྐུ་མདོག་མཐིང་ནག །གཡས་སུ་སེང་གེའི་གདོང་ཅན་དཀར་མོ། གཡོན་དུ་ཆུ་སྲིན་གདོང་ཅན་ནག་མོ། གསུམ་ཀའང་ཁྲོ་གཏུམ་མི་བཟད་འཇིགས་པའི་གཟུགས་ཅན། རུས་པའི་རྒྱན་དང་དུར་ཁྲོད་ཀྱི་ཆས་ཀྱིས་བརྒྱན་པ། གྲི་གུག་དང་ཐོད་ཁྲག་འཛིན་ཅིང་ཞབས་གཉིས་གར་སྟབས་ཀྱིས་མེ་དཔུང་རླུང་ནག་འཚུབས་མའི་དབུས་ན་རོལ་པར་གསལ་བ་མངོན་སུམ་དུ་བཀའི་སྲུང་མར་གཏད་པར་མོས་ཤིག ། གཏོར་མ་སྐུ་ཙཀ་ཅན་ཐོགས་ལ། ཧཱུྃ༔ [143b] གཏུམ་ཆེན་ཁྲོས་མ་མེ་ཡི་གདོང་༔ ཞལ་གཅིག་ཕྱག་གཉིས་གྲི་ཐོད་འཛིན༔ འབར་བའི་ཀློང་དུ་གར་བསྒྱུུར་མ༔ ཆུ་སྲིན་སེང་གེའི་གདོང་ཅན་གཉིས༔ དཀར་ནག་མདོག་ཅན་གྲི་ཐོད་འཛིན༔ མ་མོ་མཆེད་གསུམ་བཀའ་སྡོད་བཅས༔ དམ་ལྡན་སློབ་མའི་སྲུང་མར་གཏད༔ གང་བཅོལ་ལས་བཞིའི་ཕྲིན་ལས་སྒྲུབས༔ དམ་ལས་མ་འདའ་ས་མ་ཡ༔ ཨོཾ་མ་མོ་ཛྭ་ལ་ཛྭ་ལ་ནི་ཙཎྜི་ཧཱུྃ་ཕཊ༔ སརྦ་ས་མ་ཡ་རཀྵ༔ ཞེས་གཏོར་མ་ལག་ཏུ་གཏད། དམ་ཚིག་བསྲེ་བ་ནི། བདུད་རྩི་སློབ་མར་སྦྱིན་ཅིང་གཏོར་མར་སྦྲེང་ལ། ཧོཿ འདི་ནི་གསང་བའི་བདུད་རྩི་སྟེ། །དམ་ཚིག་བསྲུང་ན་མཆོག་དངོས་གྲུབ། །ཉམས་ན་བསྲེག་པར་འགྱུར་བ་ཡིན། །དེ་ཕྱིར་བུ་དང་སྲུང་མ་གཉིས། །ཕན་ཚུན་དམ་ལས་མ་འདའ་ཞིག །ཨོཾ་བཛྲ་ས་མ་ཡ་ཧཱུྃ་རཀྵནྟུ། ཞེས་རྡོ་རྗེ་མགོར་བཞག ། དེ་ལྟར་དམ་ཚིག་ཕོག་པས་འབར་མ་ཉིད་ནས་སྡེ་གསུམ་སྙིང་པོའི་བསྟན་དང་བསྟན་འཛིན་སྐྱོང་བའི་གཡར་དམ་མདོངས་གསོལ་དུ་བཞེས་ཏེ་སྒྲུབ་པ་པོའི་ཕྲིན་ལས་མཛད་པ་ལ་དགྱེས་ཤིང་ངོ་འཐོན་དུ་བཞུགས་པར་མོས་ཤིག །དེས་འབར་མ་མཆེད་གསུམ་གྱི་བཀའ་གཏད་གྲུབ་པ་ལགས། སླར་ཡང་ལྷ་མོ་རྡོ་རྗེ་གཤོག་རྒོད་མའི་དབང་གི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། རྡོ་རྗེ་སློབ་དཔོན་དགོངས་སུ་ [144a] གསོལ། སངས་རྒྱས་བསྟན་པ་བསྲུང་བའི་ཕྱིར། །ལྷ་མོ་རྡོ་རྗེ་གཤོག་རྒོད་མའི། །སྲོག་དབང་དམ་པ་སྩལ་དུ་གསོལ། །ལན་གསུམ། དངོས་གཞི་གཏེར་གཞུང་ལས། བཀའ་གཏད་སློབ་མ་མ་མོར་བསྐྱེད༔ སྐུ་གཟུགས་ཕྱག་མཚན་བསྟིམ་པར་བྱ༔ ཞེས་གསུངས་པས། ཁྱེད་རང་རྣམས་ལྷའི་སྐུ་འདི་ལྟར་དུ་གསལ་ཐོབ། གྲུ་གསུམ་མཐིང་ནག་འབར་བའི་ཀློང་། །སློབ་མ་སྐད་ཅིག་དྲན་རྫོགས་སུ། །རྡོ་རྗེ་གཤོག་རྒོད་མཐིང་ནག་འབར། །མཚོན་ཆའི་གཤོག་བརྒྱངས་གྲི་ཐོད་འཛིན། །པད་ཉི་དགྲ་བགེགས་གདན་ལ་འགྱིང་། །ཕྱོགས་བཞིར་ལས་བཞིའི་ཕོ་ཉ་བཞི། །དགྲ་སྙིང་ཟ་ཞིང་མེ་ལོང་བལྟ། །མི་ལྤགས་གོས་གྱོན་ཞབས་གར་སྟབས། །ཀུན་ཀྱང་འབར་བའི་དབུས་ན་གསལ། །དེ་ལྟར་དམ་ཚིག་པར་གསལ་བ་ལ། གཏོར་མ་ཡེ་ཤེས་མཁའ་འགྲོ་དངོས་སུ་གསལ་བས་དབང་བསྐུར་ཞིང་ལུས་ལ་ཐིམ་པར་སྒོམས་ཤིག །གཏོར་མ་སྐུ་ཙཀ་ཅན་ཐོགས་ལ། ཧཱུྃ༔ དབྱིངས་ལས་སྐུར་བཞེངས་མ་མོ་ནི༔ གཏུམ་ཆེན་མཐིང་ནག་གྲི་ཐོད་འཛིན༔ གཤོག་བརྒྱངས་མེ་ཡི་ཀློང་ན་བཞུགས༔ རིགས་བཞི་ཕོ་ཉ་བཞི་ཡིས་བསྐོར༔ དཀར་སེར་དམར་ལྗང་སྙིང་མེ་ལོང་༔ འཛིན་ཅིང་མེ་ཀློང་གར་ཐབས་བསྒྱུར༔ མ་མོ་ [144b] འབུམ་གྱི་འཁོར་གྱིས་བསྐོར༔ འདིར་བྱིན་རྡོ་རྗེ་སློབ་མ་ལ༔ མི་འབྲལ་ལུས་དང་གྲིབ་བཞིན་འགྲོགས༔ བཅོལ་བའི་ཕྲིལ་ནས་འགྲུབ་པར་མཛོད༔ མ་མ་ཏྲག་རཀྴ་ག་རུ་ཊ་ཧཱུྃ་ཕཊ༔ སརྦ་བ་ལིཾ་ཏ་ཨ་བྷི་ཥིཉྩ་ཨོཾ་ཨཱཿཧཱུྃ་སྭཱ་ཧཱ། ཞེས་གནས་བཞིར་བཞག་ལ། གཏོར་མའི་ལྷ་ཚོགས་སློབ་མ་ལ་ཐིམ་པར་གྱུར། དེ་ནི་སྐུའི་སྲོག་དབང་ངོ། །སློབ་དཔོན་ཡི་དམ་དུ་གསལ་བའི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་རྡོ་རྗེ་གཤོག་རྒོད་མ་གཙོ་འཁོར་ལྔའི་ཐུགས་ཀར་ཕོག་པས་ཐུགས་རྒྱུད་བསྐུལ། ཞལ་ནས་སྔགས་ཀྱི་ཕྲེང་བ་ཐོན་སློབ་མའི་སྙིང་གའི་ཧཱུྃ་ཡིག་ལ་ཐིམ་པར་བསྒོམ་ལ་སྔགས་འདིའི་རྗེས་ཟློས། མ་མ་ཏྲག་རཀྵ་ག་རུ་ཊ་ཧཱུྃ་ཕཊ། ལན་གསུམ། དེ་ནི་གསུང་གི་སྲོག་དབང་ངོ་། །སློབ་དཔོན་ཡི་དམ་དུ་གསལ་བའི་ཐུགས་ཀ་ནས་ཕྱག་མཚན་གྲི་ཐོད་སྙིང་དང་མེ་ལོང་འཕྲོས་ནས་སློབ་མའི་སྙིང་གར་ཐིམ་པར་བསྒོམ་ལ་སེམས་མ་བཅོས་རྣལ་མའི་ངང་དུ་ཞོག་ཅིག ། མ་ནི་སྟོང་པ་དབྱིངས་ཀྱི་མ། །མོ་ནི་རིག་པ་ཟང་ཐལ་མོ། །རྡོ་རྗེ་འགྱུར་མེད་དབྱིངས་སུ་གྲུབ། །གཤོག་རྒོད་ཐབས་ཤེས་འདུ་འབྲལ་མེད། །ལྷ་མོ་རང་གི་སེམས་ལ་རྫོགས། །ཕཊ། སེམས་དུས་གསུམ་ཡིད་བྱེད་དང་བྲལ་བའི་ངང་ལ་དར་ཅིག་མཉམ་པར་ཞོག་མཛོད། དེ་ནི་ཐུགས་ཀྱི་སྲོག་དབང་ངོ་། ། [145a] དེས་ལྷ་མོ་རྡོ་རྗེ་གཤོག་རྒོད་མའི་སྲོག་གཏད་གྲུབ་པ་ལགས། སླར་ཡང་གསང་བ་སྙིང་གི་ཐིག་ལེའི་བཀའ་སྲུང་རྡོ་རྗེ་ལེགས་པའི་རྗེས་སུ་གནང་བ་ཞུ་བའི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། རྡོ་རྗེ་སློབ་དཔོན་དགོངས་སུ་གསོལ། །སངས་རྒྱས་བསྟན་པ་བསྲུང་བའི་ཕྱིར། །དམ་ཅན་རྡོ་རྗེ་ལེགས་པ་ཡི། །རྗེས་སུ་གནང་བ་སྩལ་དུ་གསོལ། །ལན་གསུམ། དངོས་གཞི་གཏེར་གཞུང་ལས། བཀའ་གཏད་རྟེན་མདའ་ལག་ཏུ་གཏད༔ ཕྲིན་ལས་མ་ལུས་སྒྲུབ་པར་བསམ༔ ཐ་ཚིག་ཕྲིན་ལས་བཅོལ་བས་འགྲུབ༔ ཅེས་གསུངས་པས་ཁྱེད་རང་རྣམས་གཉེན་པོ་སྟོབས་ཀྱི་ལྷ་ཡི་དམ་དྲག་པོའི་གསལ་སྣང་དང་ང་རྒྱལ་གྱིས་འཁོད་པ་ལ། མདུན་གྱི་རྟེན་མདའ་སྐྱེས་བུ་ཆེན་པོའི་སྲིག་རྟེན་དམ་ཅན་དངོས་སུ་གསལ་བ་ཕྱག་ཏུ་གཏད་པས་མི་འབྲལ་ལུས་དང་གྲིབ་མ་བཞིན་དུ་འགྲོགས་ཏེ་ཅི་བཅོལ་བའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་མོས་ཤིག ། རྟེན་མདའ་དང་གཏོར་མ་ཐོགས་ལ། ཧཱུྃ༔ དབང་གི་སྤྲུལ་པ་རྡོ་རྗེ་ལེགས༔ དམར་ནག་རྡོ་རྗེ་དགྲ་སྙིང་འཛིན༔ དར་གྱི་བེར་ཆེན་ཕྱི་ནང་གསོལ༔ དབུ་སྐྲ་གྱེན་བརྫེས་ཐོད་སྐམ་བརྒྱན༔ སག་ལྷྭམ་གསོལ་ཞིང་སེང་ཆེན་ཆིབས༔ བཙན་དམག་ཞུབ་ [145b] ཅན་སྟོང་གིས་བསྐོར༔ དགྱེས་སྡེ་བརྟན་མ་བཅུ་གཉིས་སོགས༔ ཡང་ཟབ་བཀའ་ཡི་སྲུང་མ་རྣམས༔ བུ་ཁྱོད་སྲུང་མར་བདག་གིས་གཏད༔ རྟག་ཏུ་མཆོད་བསྟོད་བརྩོན་པར་གྱིས༔ དམ་ཅན་བཀའ་ཡི་སྲུང་མས་ཀྱང་༔ མི་འབྲལ་ལུས་དང་གྲིབ་བཞིན་འགྲོགས༔ འདོད་དོན་བསམ་པ་ཐམས་ཅད་སྒྲུབས༔ ཞེས་དང་། སྤྲོ་ན། ཧོ་དམ་ཅན་ཆེན་པོ། དགྲ་བླ་ཆེན་པོ། མགར་བ་དམར་པོ། ནོར་བདག་དཀར་པོ། ནག་པོ་ཐོད་མདའ། ཨ་ཙར་མོན་པ་མཆེད་ཟླ་སུམ་བརྒྱ་དྲུག་ཅུ། དགྱེས་སྡེ་བརྟན་མ་བཅུ་གཉིས། དགེ་བསྙེན་ཉི་ཤུ་རྩ་གཅིག །བཙན་དམག་ཞུ་བ་ཅན་སྟོང་སྡེ། སྡེ་བརྒྱད་དྲེགས་པའི་དམག་ཚོགས། ཕོ་ཉ་ཤན་པ་བྱ་གཅན་བཀའ་སྡོད་སྤྲུལ་པ་ཡང་སྤྲུལ་གྱི་ཚོགས་དང་བཅས་པ་རྣམས་ཀྱིས་བླ་མ་རྡོ་རྗེ་སློབ་དཔོན་གྱི་སྐུ་ཚེ་བསྲིང་། དམ་ལྡན་རྡོ་རྗེ་སློབ་མ་འདིའི་བཀའ་དང་བསྟན་པ་སྲུངས། དཔལ་དང་འབྱོར་པ་སྤེལ། སྙན་པ་དང་གྲགས་པ་སྒྲོགས། སྡང་བའི་དགྲ་སོད། གནོད་པའི་བགེགས་ཆོམས། བར་ཆད་ཀྱི་རྐྱེན་ཟློག །མདོར་ན་ཞི་རྒྱས་དབང་དྲག་ཕྲིན་ལས་རྣམ་པ་བཞི་ཐོགས་པ་མེད་པ་སྒྲུབས་ཤིག །ཨོཾ་ཏྲི་ཤུལ་བཛྲ་སཱ་དྷུ་སིདྡྷི་ཧཱུྃ། ཤིཾནྟ་པུཥྚིཾ་ཝཱ་ཤཾ་མཱ་ར་ཡ་ཕཊ། ཅེས་རྟེན་མདའ་དང་གཏོར་མ་ལག་ཏུ་གཏད། [146a] སློབ་དཔོན་གྱིས་ཇི་སྐད་བསྒོས་པ་བཞིན་སྐྱེས་བུ་ཆེན་པོས་རྟག་ཏུ་འགྲོགས་ཤིང་ཕྲིན་ལས་སྒྲུབ་པར་ཞལ་གྱིས་བཞེས་པར་མོས་ཤིག །དེས་དམ་ཅན་སྐྱེས་བུ་ཆེན་པོའི་སྲོག་གཏད་ཕུལ་གྲུབ་པ་ལགས། སླར་ཡང་གཏེར་བདག་སྲུང་མ་རྣམ་གསུམ་གྱི་རྗེས་གནང་ཞུ་བའི་དོན་དུ་རྟེན་འབྲེལ་གྱི་རྫས་དང་བཅས་མཎྜལ་ཕུལ། དེའང་གཏེར་གཞུང་ལས། རང་བྱུང་པདྨ་སློབ་མར་བཅས༔ འཛོམ་གྱི་གངས་རར་བྱོན་པའི་ཚེ༔ ལྷ་ཀླུ་བཙན་གྱི་ཞབས་ཏོག་ཕུལ༔ ཟབ་མོ་གཏེར་གྱི་སྲུང་མར་བསྐོས༔ ཚངས་པ་དཀར་པོའི་རྒྱུད་ལས་བྱུང་༔ ལྷ་ཡི་རྒྱལ་པོ་འོད་གསལ་རྩལ༔ ཡམ་ཤུད་དམར་པོའི་རིགས་ལས་བྱུང་༔ བཙན་གྱི་རྒྱལ་པོ་འོད་འབར་རྩལ༔ གཙུག་ན་རིན་ཆེན་རང་གི་རྒྱུད༔ ཀླུ་རྒྱལ་ནོར་བདག་གཟི་འབར་རྩལ༔ དྲེགས་པ་གསུམ་གྱི་སྲོག་སྙིང་ཕུལ༔ བདེ་བའི་ཉམས་དང་དམར་ལམ་ལས༔ རང་གཟུགས་བཙན་གྱི་རྒྱལ་པོར་ཤར༔ གསལ་བའི་མདངས་དང་དཀར་ལམ་ལས༔ རང་གཟུགས་ལྷ་ཡི་རྒྱལ་པོར་ཤར༔ མི་རྟོག་ཉམས་དང་ནག་ལམ་ལས༔ རང་གཟུགས་ཀླུ་ཡི་རྒྱལ་པོར་ཤར༔ དེ་ལས་གཞན་དུ་གྲུབ་པ་མེད༔ ལྷ་སྲིན་སྟོང་སྲོག་ལེན་པའོ༔ ཞེས་ལོ་རྒྱུས་དེ་ལྡན་གྱི་ [146b] རྗེས་སུ་གནང་བ་སྒྲུབ་པ་ལ་གསོལ་བ་འདེབས་པ་འདིའི་རྗེས་ཟློས། རྡོ་རྗེ་སློབ་དཔོན་དགོངས་སུ་གསོལ། སངས་རྒྱས་བསྟན་པ་བསྲུང་བའི་ཕྱིར། །ཟབ་གཏེར་སྲུང་མ་རྣམ་གསུམ་གྱི། །རྗེས་སུ་གནང་བ་སྩལ་དུ་གསོལ། །ལན་གསུམ། སློབ་དཔོན་དབང་ཆེན་པདྨ་དྲེགས་པ་ཟིལ་གནོན་དུ་གསལ་བས་ལྷ་མི་གཉིས་ཀར་བདུད་རྩི་སྦྱིན་ཞིང་དམ་ཚིག་བསྲེ་བར་བྱ་བ་ཡིན་ཏེ། ནང་མཆོད་ཀྱི་བདུད་རྩི་གཏོར་མར་སྦྲེང་ཞིང་སློབ་མར་སྦྱིན་ལ། ཧོཿ འདི་ནི་གསང་བའི་བདུད་རྩི་སྟེ། །དམ་ཚིག་བསྲུང་ན་མཆོག་དངོས་གྲུབ། །ཉམས་ན་བསྲེག་པར་འགྱུར་བ་ཡིན། །དེ་ཕྱིར་བུ་དང་སྲུང་མ་གཉིས། །ཕན་ཚུན་དམ་ལས་མ་འདའ་ཞིག །ཨོཾ་བཛྲ་ས་མ་ཡ་ཧཱུྃ་རཀྵནྟུ། དེ་ནས་སློབ་མ་གཉེན་པོ་སྟོབས་ཀྱི་ལྷར་གསལ་བ་ལ། གཏེར་སྲུང་ལྷ་བཙན་ཀླུ་གསུམ་བྲན་དང་བཀའ་ཉན་ཕོ་ཉར་གཏད་པར་མོས་ཤིག །ལྷ་ཡི་གཏོར་མ་ཐོགས་ལ། ཧཱུྃ། དཀར་པོ་ལྷ་ཡི་སྡེ་དཔོན་ནི། །གསང་མཚན་རྡོ་རྗེ་འོད་གསལ་རྩལ། །སློབ་དཔོན་པདྨའི་སྤྱན་སྔ་རུ། །ཇི་ལྟར་ཁས་བླངས་མ་གཡེལ་བར། །སློབ་མ་འདི་ཡི་ཕྲིན་ལས་སྒྲུབས། །དམ་ལས་མ་འདའ་ས་མ་ཡ། །ཞེས་ལག་ཏུ་གཏད་ལ་སྲོག་སྔགས་བརྗོད། བཙན་གྱི་གཏོར་མ་ཐོགས་ལ། ཧཱུྃ། དམར་པོ་བཙན་གྱི་སྡེ་དཔོན་ནི། །[147a] གསང་མཚན་རྡོ་རྗེ་མེ་འབར་རྩལ། །སློབ་དཔོན་པདྨའི་སྤྱན་སྔ་རུ། །ཇི་ལྟར་ཁས་བླངས་མ་གཡེལ་བར། །སློབ་མ་འདི་ཡི་ཕྲིན་ལས་སྒྲུབས། །དམ་ལས་མ་འདའ་ས་མ་ཡ། །ཞེས་ལག་ཏུ་གཏད་ལ་སྲོག་སྔགས་བརྗོད། ཀླུ་ཡི་གཏོར་མ་ཐོགས་ལ། ཧཱུྃ། སྔོན་པོ་ཀླུ་ཡི་སྡེ་དཔོན་ནི། །གསང་མཚན་ནོར་བདག་གི་གཟི་འབར་རྩལ། །སློབ་དཔོན་པདྨའི་སྤྱན་སྔ་རུ། །ཇི་ལྟར་ཁས་བླངས་མ་གཡེལ་བར། སློབ་མ་འདི་ཡི་ཕྲིན་ལས་སྒྲུབས། །དམ་ལས་མ་འདའ་ས་མ་ཡ། །ཞེས་ལག་ཏུ་གཏད་ལ་སྲོག་སྔགས་བརྗོད། དེ་དག་གིས་གཏེར་སྲུང་རྣམ་པ་གསུམ་གྱི་སྲོག་གཏད་ཟབ་མོ་གྲུབ་པ་ལ་ཤིས་པ་བརྗོད་པས་མངའ་གསོལ་བར་མོས་ཤིག །རྩ་བརྒྱུད་བླ་མའི་བྱིན་རླབས་སྙིང་ལ་ཞུགས། །ཞེས་སོགས་ཀྱིས་ཤིས་བརྗོད་སྤེལ། དེ་ལྟར་ན་དེ་རྣམས་ཀྱི་སྒོ་ནས་སྡེ་གསུམ་བཀའི་སྲུང་མ་གཏེར་སྲུང་དང་བཅས་པའི་སྲོག་དབང་བཀའ་གཏད་ཀྱི་རིམ་པ་ལེགས་པར་གྲུབ་པ་ལགས་པས། རྡོ་རྗེ་ཐེག་པའི་ཚིག་སྤྱི་དང་ཁྱད་པར་སྲུང་མ་མསྙེན་སྒྲུབ་གསོལ་མཆོད་ལ་བརྩོན་པ་སོགས་བསླབ་བྱའི་ཚུལ་ལས་ནམ་ཡང་མི་འདའ་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་དམ་ཚིག་ཁས་ལེན། གཏང་རག་མཎྜལ་ལུས་དབུལ། དགེ་བསྔོ་བཅས་བྱ། སློབ་དཔོན་གྱིས་ཚོགས་ལ་རོལ་ཞིང་ལྷག་མ་ [147b] བསྔོ། དམ་ཅན་རྣམས་གཏོར་འབུལ་དང་འབྲེལ་རྟེན་ལ་བསྟིམ་པའམ་རང་གནས་སུ་གཤེགས། གཏོར་སྐྱོང་སོགས་རྗེས་ཀྱི་བྱ་བ་རྣམས་གཞུང་བཞིན་མཐར་ཆགས་སུ་བགྱིས་པས་གྲུབ་བོ། །དབྱིངས་ཡུམ་ཡེ༵་ཤེ༵ས་ཌཱ་ཀི་ནཱི། །རྣམ་འགྱུར་འཇིག་རྟེན་ཚུལ་དང་བཅས། །རྡོ༵་རྗེ༵འི་གསང་མཛོད་གཉེར་འཛིན་གྱི། །སྲོག་དབང་ཟབ་གཉན་བཅུད་དུ་བསྡེབས། །སྡེ་གསུམ་བཀའི་སྲུང་མ་རྣམས་ཀྱི་སྲོག་དབང་གི་ལེའུ་ཚན་ཏེ། དེ་རྣམས་ཀྱིས་མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་སུ་རྫོགས་པ་ལེགས་པར་ཚང་ངོ་། །སྮལར་སྨྲེས་པ། བསམ་ཡས་ཐེག་པའི་ཡང་རྩེ་རྫོགས་པ་ཆེ། །སྡེ་གསུམ་དགོངས་པའི་གསང་ཚིག་རྡོ་རྗེའི་གསུང་། །ཚུལ་བཞིན་ཉམས་འོག་ཆུད་རྣམས་ལྟ་ཅི་སྟེ། །ཐོས་པ་ཙམ་ཡང་འཁོར་བ་མཐའ་ཅན་ཉིད། །དེ་སླད་དེར་འཇུག་ཐོག་མའི་ལམ་གྱི་གཞི། །དབང་གི་རྟེན་འབྲེལ་ཁོ་ནར་རག་ལས་ཕྱིར། །སྨིན་བྱེད་ཆོ་གའི་ལག་ལེན་ཇི་བཞིན་དུ། །མ་ནོར་རྣམ་གསལ་འཇུག་བདེའི་ཁྲིགས་སུ་བསྡེབས། །འདིར་འབད་བསོད་ནམས་གང་ཞིག་ཐོབ་པ་དེས། །འགྲོ་ཀུན་རྫོགས་ཆེན་ལམ་གྱི་སྣོད་གྱུར་ཏེ། །དཀའ་བ་མེད་པར་འཁྲུལ་ཆོས་དབྱིངས་ཟད་ནས། །གདོད་མའི་གཞི་ལ་འཁོར་བ་དོང་སྤྲུགས་ཤོག །དེ་ལྟར་མཆོག་གཏེར་རྫོགས་ཆེན་སྡེ་གསུམ་གྱི་དབང་བསྐུར་ཡོངས་རྫོགས་དཀྱུས་གཅིག་ཏུ་ཁྲིགས་སུ་བསྡེབས་པ་ཀུན་བཟང་རིག་འཛིན་བླ་མའི་དགོངས་རྒྱན་ཅེས་བྱ་བ་འདིའང་། གསང་འཛིན་ཁྱབ་བདག་བླ་མ་ཨོ་རྒྱན་ཚེ་དབང་མཆོག་གྲུབ་དཔལ་འབར་གྱི་ཞལ་སྔ་ནས་ཟབ་ཆོས་འདིའི་སྨིན་གྲོལ་གྱི་བདུད་རྩི་སྐལ་བཟང་པོའི་དཔྱིད་དུ་ནོས་པའི་སྐབས་རྣམ་གསལ་འཇུག་བདེའི་ངག་ཁྲིགས་འདི་ལྟ་བུ་ཞི་ཅིས་ཀྱང་སྒྲུབ་པར་གྱིས་ [148a] ཤིག་པའི་བཀའ་ལུང་བཏུད་མར་ཕེབས་པ་བཞིན་རྗེས་སུ་སྒྲུབ་པའི་གཡར་དམ་སྙིང་ལ་བཀོད་ཀྱང་གཞན་རྐྱེན་མི་བཟད་པའི་ཁོལ་པོར་འཕྱན་ཏེ་ཡུན་རིང་པོར་འགྱང་པ་ན། སླར་ཡང་རྒྱལ་དབང་ཀརྨ་པ་ཀུན་བཟང་རིག་པའི་རྡོ་རྗེའི་བཀའ་ལུང་གིས་རྗེ་བླ་མར་སྙན་བསྐུལ་གནང་བར་མཛད་པ་དང་། འཁོར་ལོའི་མགོན་པོ་མཁྱེན་བརྩེ་ཆོས་ཀྱི་བློ་གྲོས་དཔལ་བཟང་པོའི་ཞལ་སྔ་ནས་ཀྱང་ལེགས་སོའི་གསུང་གིས་དབུགས་དབྱུང་ཐོབ་པ་ལ་བརྟེན་ནས། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་ལྔ་བཅུ་ང་དགུར་སོན་པ་དགེ་བྱེད་ཆུ་ཕོ་སྟག་གི་ལོ་འབྲས་བུ་བཅུད་དུ་སྨིན་པའི་དུས་ཀྱི་ཆར་རི་བོས་རིན་ཆེན་སྤུངས་པའི་མགུལ་ཀུན་ཏུ་བཟང་པོའི་ནགས་ཁྲོད་ཉམས་དགའ་བའི་གནས་སུ་གྲུབ་པར་སྤེལ་བའི་ཟིན་བྲིས་ལས། ཐོག་མའི་གླེགས་བམ་དུ་འབེབས་པ་པོ་ནི་ལྷོ་མོན་ཤིང་ལོའི་ཚལ་གྱི་སྔགས་སྟོན་ཆོས་གྲགས་རྒྱ་མཚོས་བགྱིས་པའོ། །འདིས་ཀྱང་མཆོག་གཏེར་སྙིང་པོའི་རིང་ལུགས་ཕྱོགས་ཐམས་ཅད་དུ་དར་ཞིང་རྒྱས་ལ་མི་ནུབ་ཡུན་དུ་གནས་པའི་རྒྱུར་གྱུར་ཅིག །།སརྦ་དཱ་མངྒལཾ།། །།


Retrieved from "https://dudjom.tsadra.org/index.php?title=DJYD-KABUM-09-TA-001&oldid=18757"
Dudjom Tersar
Collected Works of the Masters
A Tsadra Foundation initiative designed to house the writings and revelations of the masters of the Dudjom lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Bodhicitta
Khyentse Lineage
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Dudjom Tersar Project, a Tsadra Foundation initiative designed to house the writings and revelations of the masters of the Dudjom lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.