TTDL-ZABTER-02-KHA-001

First text in volume. Back to Volume PageNext Text

Wylie title	zab gsang mkha' 'gro'i snying thig las: 'jam dpal gsang ba 'dus pa'i kha byang gsal ba'i a dar+sha:
Location	bdud 'joms gling pa zab gter Volume 2, Text 1, Pages 1-21 (Folios 1a1 to 11a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las 'jam dpal gsang ba 'dus pa'i kha byang gsal ba'i a dar+sha. In Sprul pa'i gter chen bdud 'joms gling pa'i zab gter gsang ba'i chos sde, Vol. 2: 1-21. Thimphu, Bhutan: Lama Kuenzang Wangdue, 2004.
Side notes	Recto: kha byang   Verso: bdud 'joms 'jam dpal zhi ba
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Treasure Inventory - kha byang
Cycle	འཇམ་དཔལ་གསང་བ་འདུས་པ་ ('jam dpal gsang ba 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	'jam dpal dbyangs
Colophon	ཞེས་འཇམ་དཔལ་གསང་བ་འདུས་པའི་ཁ་བྱང་དང་ཟབ་ཆོས་གསང་བ་སྐོར་གསུམ་གྱི་ཁ་བྱང་འདི་ཉིད་སློབ་བུ་དམ་པ་ཀུན་བཟང་ཆོས་གྲགས་དང་། ངག་དབང་ཕྲིན་ལས་གཉིས་ཀྱིས་བསྐུལ་ངོར། ཁྲག་འཐུང་བདུད་འཇོམས་རྡོ་རྗེས་གཏན་ལ་ཕབ་པ་ཡོངས་སུ་དགེ་ཞིང་བཀྲ་ཤིས་པར་གྱུར་ཅིག། དགེའོ། ། དགེའོ། །དགེའོ། །སརྦ་མངྒ་ལཾ།།
	zhes 'jam dpal gsang ba 'dus pa'i kha byang dang zab chos gsang ba skor gsum gyi kha byang 'di nyid slob bu dam pa kun bzang chos grags dang /_ngag dbang phrin las gnyis kyis bskul ngor/_khrag 'thung bdud 'joms rdo rjes gtan la phab pa yongs su dge zhing bkra shis par gyur cig/_dge'o/_/_dge'o/__/dge'o/__/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ འཇམ་དཔལ་གསང་བ་འདུས་པའི་ཁ་བྱང་གསལ་བའི་ཨ་དཪྴ་བཞུགས་སོ༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ས་ཕོ་རྟ་ཡི་ལོར་ཧོར་ཟླ་བརྒྱད་པའི་ཚེས་བཅོ་ལྔའི་ནུབ་མོ་རྨི་ལམ་གྱི་སྣང་བ་ལ་ཡུལ་ཡངས་པ་ཆེན་པོ་རི་མེད་པའི་ཐང་ཆེན་པོ་མདོག་དམར་ལ་མེ་ཏོག་སྣ་ཚོགས་ཀྱིས་ཡོངས་སུ་ཁེབས་པ་འཇའ་དང་འོད་ཀྱི་དྲྭ་བ་མིག་མང་རིས་སུ་བྲིས་པ༔ ནམ་མཁའ་ལ་འཇའ་ཡི་འཕན་གདུགས་དང་རྒྱལ་མཚན་དང་༔ དར་འཕྱང་དང་༔ བླ་བྲེ་དང་གནམ་ཡོལ་སོགས་དར་སྣ་ཚོགས་ཀྱི་ལྷབ་ལྷུབ་མཛེས་པར་བྱས་པ༔ བར་སྣང་ལ་མེ་ཏོག་གི་ཆར་པ་ལང་ལོང་འབེབས་པ༔ དཔའ་བོ་དང་དཔའ་མོ་མང་པོས་སྐུ་མཛེས་པའི་གར་བསྒྱུར་ཞིང་ཕྱག་ནས་མཆོད་པའི་སྤྲིན་སྤེལ་བ༔ ས་གཞིར་དཔག་བསམ་གྱི་ཤིང་ལས་འདོད་རྒུའི་ལོངས་སྤྱོད་འབེབས་པ༔ ཕྱོགས་མཚམས་རྣམས་སུ་མཚོ་ཡན་ལག་བརྒྱད་དང་ལྡན་པའི་འགྲམ་ན་རིན་པོ་ཆེ་སྣ་ཚོགས་ཀྱི་གྲམ་པ་དང་༔ གཡུ་ཡི་ནེའུ་སིང་དང་༔ གསེར་གྱི་བྱེ་མ་བརྡལ་བ༔ གནས་དེར་བྱའི་ཚོགས་དུང་ལྟར་དཀར་བ༔ གསེར་ལྟར་སེར་བ༔ བྱུ་རུ་ལྟར་དམར་བ༔ ཨིནྡྲ་ནཱི་ལ་ལྟར་ལྗང་བ༔ འཇའ་ཡི་ཁ་དོག་ལྟར་ཁྲ་བོ་ལ་སོགས་པས་མཛེས་པའི་གཟུགས་ངོམས་ཤིང་ཆོས་ཀྱི་སྒྲ་སྒྲོགས་པ༔ རི་དྭགས་རྣམ་པ་སྣ་ཚོགས་པས་མཛེས་པའི་གཟུགས་ངོམས་ཤིང་རྩེད་འཇོ་སྣ་ཚོགས་རོལ་པ༔ གཞན་ཡང་ངོ་མཚར་བའི་བཀོད་པ་ཕུན་སུམ་ཚོགས་པ་རང་བྱུང་བའི་གནས་དེ་རུ་གཞལ་ཡས་ཁང་རྒྱ་ཆེ་ལ་དཔངས་མཐོ་བ༔ བཀོད་ལེགས་ཤིང་དབྱིབས་མཛེས་པ༔ མཐོང་བ་ཙམ་གྱིས་ཡིད་ལ་དགའ་བདེ་ཆེན་པོ་བསྐྱེད་པར་བྱེད་པ༔ གཞལ་ཡས་ཁང་དེའི་ནང་དུ་རིན་པོ་ཆེའི་ཁྲི་མཛེས་ཤིང་ལྟ་ན་སྡུག་པའི་སྟེང་དུ༔ དཔལ་ཆེན་པོ་འཇའ་ལུས་སྒྱུ་མའི་སྐུ་མཆོག་གཟི་བརྗིད་འོད་ཕུང་འབར་བ་ལ༔ རིག་འཛིན་དཔའ་བོ་མཁའ་འགྲོ་བསམ་གྱིས་མི་ཁྱབ་པས་བསྐོར་ཞིང་འདུད་དེ་ཆོས་ཉན་པར་ཡོད་པ་ལས༔ དེར་མཁའ་འགྲོ་ཡེ་ཤེས་མཚོ་རྒྱལ་གྱིས་འདི་སྐད་ཅེས་གསུངས་ཏེ༔ རིགས་ཀྱི་བུ་གནས་འདི་ཁྱོད་ཀྱིས་ཤེས་སམ་མི་ཤེས་ཞེས་གསུངས་པས༔ དེ་ལ་བདག་གིས་འདི་སྐད་སྨྲས༔ ཡུལ་འདི་ངོ་མི་ཤེས་འདི་འཇིག་རྟེན་མི་ཡུལ་ནི་མ་ཡིན་ཞིང་ཁམས་ཤིག་ཨེ་ཡིན་སྙམ་སྨྲས་པ་དང་༔ མཁའ་འགྲོའི་ཞལ་ནས༔ རིགས་ཀྱི་བུ་འདི་འཇིག་རྟེན་མི་ཡི་གནས་ནི་མ་ཡིན༔ མི་ཡི་སྣང་བ་དབྱིངས་སུ་ཡལ་ཏེ་རྨི་ལམ་དག་པའི་སྣང་བ་རང་སྣང་དོན་གྱི་འོག་མིན་ཞེས་བྱ་བ་དེ་མཆེད་པ་ཡིན་ཅེས་གསུངས་ཚེ༔ དེ་ནས་བདག་གིས་གུས་པས་ཕྱག་འཚལ་ཏེ་མེ་ཏོག་སྣ་ཚོགས་པའི་མཆོད་པ་ཕུལ་བ་ན༔ རིག་འཛིན་གྱི་རྒྱལ་པོ་ཆོས་དཔལ་ཞེས་བྱ་བས༔ ཨེ་ཨེ་ཁྱེའུ་ཆུང་ལོ་ཙཱ་འདིར་ལྷགས་ཞེས་ཟེར༔ མཁའ་འགྲོ་མ་སུ་ཀ་སིདྡྷི་ན་རེ༔ བདུད་འདུལ་རྡོ་རྗེ་ཉིད་ལགས་ཞེས་ཟེར༔ ཨོ་རྒྱན་ཆེན་པོས་ཁྱོད་དང་འཕྲད་པ་རྟེན་འབྲེལ་ཤིན་ཏུ་ལེགས་གསུངས་ཚེ༔ བདག་གིས་ཁྱབ་བདག་འགྲོ་བའི་མགོན་པོ་ལགས༔ དུས་དེང་སང་དུས་ངན་པའི་དབང་དང་བདུད་དང་དུག་ལྔ་སྟོབས་བཙན་པའི་དབང་གིས་སེམས་ཅན་དམུ་རྒོད་ཅིང་དུག་ལྔ་རགས་པ་ལ་ཕན་པ་མི་འབྱུང་བའི་ཁར༔ བདག་ཀྱང་ལས་ངན་གྱི་དབང་དུ་གྱུར་ཏེ་འཁོར་བ་མཐའ་མེད་དུ་ཁ་འཁྱོལ་བ་ལས་འོས་མེད་པ་ཡིན་ནམ་སྙམ་ལགས་ཞེས་ཞུས་ཚེ༔ ཨོ་རྒྱན་ཆེན་པོས་སྤྱན་ནམ་མཁར་ཧྲིག་གེར་གཟིགས་ནས༔ ཀྱཻ་རིགས་ཀྱི་བུ་ཁྱོད་མ་ཡེངས་པར་ཉོན་དང་༔ ངས་མ་འོངས་པའི་ལུང་བསྟན་ཚིགས་སུ་བཅད་པ་འགའ་ཁྱོད་ལ་གདམ་མོ།ཞེས་གསུངས་ཏེ༔ ཀྱེ་ ཧོཿ སྐྱེ་བ་དུ་མར་སྦྱངས་སྟོབས་ཅན༔ ཁྱེད་ནི་འཁོར་བར་འཁྱམ་དུ་མེད༔ རྣལ་འབྱོར་ནུས་ལྡན་རྡོ་རྗེ་ཡི༔ ཐུགས་བསྐྱེད་སྨོན་ལམ་རྣམ་དག་མཐུས༔ སངས་རྒྱས་སྟོང་གི་བསྟན་པ་ལ༔ གང་འདུལ་ཐབས་དང་ཕྲིན་ལས་ཀྱིས༔ གདུལ་བྱ་འདུལ་བར་དམ་བཅས་ཤིང་༔ འགྲོ་དོན་རྒྱ་ཆེན་འབྱུང་གྱུར་གྱི༔ སྨོན་ལམ་རྣམ་དག་བཏབ་པའི་མཐུས༔ སྔོན་ཚེ་འགྲོ་དོན་དཔག་ཏུ་མེད༔ ད་རེས་ཚེ་འདིའི་སྨད་ཆ་རུ༔ རྫོགས་པ་ཆེན་པོའི་བསྟན་པ་དང་༔ འགྲོ་བ་མང་ལ་ཕན་ཆེར་ཐོགས༔ དེང་སང་གངས་ཅན་བོད་ཡུལ་ན༔ མཁས་པར་རློམས་ཤིང་ཆོས་འཆད་པའི༔ སྐྱེས་བུ་མང་ཞིག་མཆིས་ལགས་ཏེ༔ ང་དང་བོ་དྷི་སཏྭ་དང་༔ བི་མ་ལ་སོགས་འབྱུང་ཚུལ་དང་༔ མཁས་ཁྱད་ཡོད་ཅེས་གླེང་ན་ཡང་༔ མཁན་སློབ་ཡེ་ཤེས་སྒྱུ་མའི་སྐུ༔ ཡེ་ནས་ཡེ་སངས་རྒྱས་པ་ལ༔ མཁས་ཁྱད་འཆད་པ་ཤིན་ཏུ་བླུན༔ ང་ནི་ཡེ་ཤེས་སྒྱུ་མའི་སྐུས༔ གདུལ་བྱའི་ལྷག་མ་སྐྱོང་བའི་ཆེད༔ ཇོ་བོ་ཨ་ཏི་ཤ་རུ་བྱུང་༔ གདུལ་བྱ་ཐེར་འབུམ་རྣམ་གྲོལ་གྱི༔ ས་རུ་བཀོད་ཅིང་ང་རུ་བསྡུས༔ བོད་ཀྱི་སྐྱེས་བུ་འགའ་ཞིག་གིས༔ ཆོས་འཆད་མདོ་རྒྱུད་མང་དུ་གླེང་༔ གདུལ་བྱའི་རྒྱུད་ལ་ཕན་ཐོགས་པའི༔ ནུས་པ་མེད་ཅིང་ཁ་བཤད་ཀྱིས༔ ཉོན་མོངས་ཆགས་སྡང་ནར་སོན་བྱེད༔ ངེས་པར་གདུལ་བྱ་འདུལ་བ་ཡི༔ ཆོས་ནི་སེམས་རྒྱུད་ཐུལ་བ་དང་༔ ཚེ་གཅིག་བསྒྲུབ་པ་ལྷུར་ལེན་པའི༔ གནད་ནི་སྟོན་མཁན་ཤིན་ཏུ་དཀོན༔ ཁྱད་པར་ལྔ་བརྒྱའི་སྙིགས་དུས་འདིར༔ ཁ་བཤད་རྒྱུད་ལ་ཁེལ་བ་དཀོན༔ ཆོས་ཉིད་རྫོགས་པ་ཆེན་པོ་ཡིས༔ གདུལ་བྱ་ཕལ་ཆེར་རྣམ་གྲོལ་བྱེད༔ ཟབ་མོ་བདུད་ཀྱི་གཅོད་ཡུལ་གྱིས༔ ངེས་མེད་རི་ལ་སྒྲུབ་ཚུགས་ཟིན༔ མྱུར་ལམ་འོད་གསལ་ཐོད་རྒལ་གྱིས༔ ཚེ་འདིར་རིག་འཛིན་ས་རུ་འཕེན༔ གཅོད་ཡུལ་འཆད་པ་གྲངས་མང་ཡང་༔ ཁ་དང་ལག་པ་དལ་མེད་པའི༔ སྤྱོད་པ་བྱེད་ཅིང་རྣམ་པར་རྟོག༔ བདུད་བཞི་གཅོད་པ་ཤིན་ཏུ་དཀོན༔ བདག་གིས་བསྟན་པའི་བདུད་གཅོད་ལམ༔ ཤེས་རྒྱུད་འདུལ་ཞིང་རེ་དོགས་ཡུལ༔ ཡུལ་མེད་ཆེན་པོར་གཅོད་པའི་ཐབས༔ རྫོགས་པ་ཆེན་པོའི་ཟབ་གནད་ཡིན༔ དེ་ལྟར་རྫོགས་ཆེན་མ་བུ་གསུམ༔ འཆད་པའི་སྟོན་པར་ཁྱོད་བསྔགས་ཏེ༔ ང་ཡི་རྒྱལ་ཚབ་མཆོག་མངའ་གསོལ༔ ཁྱོད་ཀྱི་ཕྲིན་ལས་བྱེད་པ་པོ༔ སྨོན་ལམ་ལས་ཀྱིས་འབྲེལ་བ་ཡི༔ བྱང་ཆུབ་སེམས་དཔའ་འདི་ལྟར་འབྱུང་༔ གནས་འདིའི་མི་རིང་ཉེ་བ་ནས༔ སྐྱེས་བུ་སྤུ་ཡི་མིང་ཅན་འབྱུང་༔ དེ་ཡིས་བསྟན་ལ་ཕན་ཆེར་བཏགས༔ གནས་འདིའི་མི་རིང་ཉེ་བ་ནས༔ སྐྱེས་བུ་བསོད་ནམས་མིང་ཅན་འབྱུང་༔ སྙིང་པོ་སྒྲུབ་ལ་མངའ་བརྙེས་ཤིང་༔ དངོས་མེད་ལྷ་འདྲེའི་འགྲོ་དོན་འབྱུང་༔ གནས་འདིའི་མི་རིང་ཉེ་བ་ནས༔ སྐྱེས་བུ་ཀི་ཡི་མིང་ཅན་འབྱུང་༔ བདུད་དང་དམ་སྲིས་མ་བསླུས་ན༔ ཁྱོད་ཀྱི་བསྟན་ལ་ཕན་ཆེར་བཏགས༔ འགྲོ་བའི་དོན་ཡང་རྒྱ་ཆེར་འགྲུབ༔ གྲོགས་དང་ཞབས་ཏོག་མཐུན་རྐྱེན་གྱི༔ སྐྱེས་བུ་དྲག་གི་མིང་ཅན་འབྱུང་༔ རྒྱལ་པོ་ཛཿཡི་རྣམ་རོལ་པའི༔ སྤྲུལ་པའི་སྐུ་མཆོག་པུཎྱེ་འབྱུང་༔ ཆོས་རྒྱལ་ཚངས་པ་ལྷའི་མེ་ཏོག༔ ཡང་སྲིད་འཛམ་གླིང་དབང་རྒྱན་འབྱུང་༔ ལྷ་ཆེན་ཚངས་པ་དཀར་པོ་ཡི༔ ཡང་སྲིད་པདྨའི་མིང་ཅན་འབྱུང་༔ ལང་གྲོ་ལོ་ཙཱའི་ཡང་སྲིད་པ༔ བུ་ཆུང་མི་ཕམ་རྡོ་རྗེ་བཞེངས༔ རིག་འཛིན་གཡུ་སྒྲ་སྙིང་པོ་ཡི༔ སྤྲུལ་པ་དྲི་མེད་འོད་ཟེར་འབྱུང་༔ ལོ་ཆེན་བཻ་རོའི་རྣམ་འཕྲུལ་པའི༔ སྐྱེས་བུ་ལྷ་ཡི་མིང་དུ་གྲགས༔ རྒྱལ་པོའི་སྲས་མོ་ལྷ་ཡི་ལྕམ༔ སྐྱེས་བུ་ནམ་མཁའ་འཇིགས་མེད་པ༔ པཎ་ཆེན་བི་མ་མི་ཏྲ་ཡི༔ སྤྲུལ་པ་ཡེ་ཤེས་རྡོ་རྗེར་གྲགས༔ དེ་ལ་ང་ཡིས་མཚན་གསོལ་ལོ༔ དེ་དག་ཁྱོད་ཀྱི་བསྟན་འཛིན་ལགས༔ འབྲེལ་ཚད་འགྲོ་བ་ཐར་ལམ་གཟུད༔ སྨར་གྱི་སྦ་གཏེར་བྲག་འདི་ནི༔ བཻ་རོའི་སྦ་མཁར་སྦ་བའི་གནས༔ གཤོང་ཕྲན་མདའ་ཡི་སྲུབ་ཟུར་དུ༔ བྲག་དམར་དཀྱིལ་དུ་དཀར་པོ་བཀྲ༔ སྲུབ་ཀྱི་ནང་དུ་ས་བྲུས་ན༔ ཁ་བྱང་མཛོད་ཀྱི་ལྡེའུ་མིག་དང་༔ བྱེ་མ་ཨ་ཀྲོང་ལས་གྲུབ་པའི༔ འཕགས་མ་སྒྲོལ་མའི་སྐུ་གཟུགས་དང་༔ ས་ར་ཧ་པའི་ཕྱག་ཕྲེང་ཡོད༔ དབྱར་ཟླ་ར་བའི་ཚེས་བཅུའི་ཉིན༔ པད་འབྱུང་བདག་ལ་གསོལ་བ་ཐོབ༔ གཏེར་སྲུང་ཀླུ་སྨན་དབང་མོ་ལ༔ དར་དཀར་ཡུག་དང་འབྲུ་སྣ་ཕུལ༔ ཐ་ཚིག་སྒྲོག་ལ་དེ་ལོངས་ཤིག༔ སྨར་གྱི་དངུལ་རྒོད་ཉིན་ངོས་སུ༔ བྲག་ཆེན་དཀྱིལ་དུ་བྲག་ཆུང་ནི༔ ཐང་དཀར་གཤོག་པ་རྐྱང་འདྲ་ཡོད༔ ལྟོ་བའི་བྲག་གི་ཕུག་པ་རུ༔ ཁ་བྱང་གསལ་བའི་མེ་ལོང་ཡོད༔ དེ་ཡི་ནང་བཞིན་སྒྲུབ་མཛོད་དང་༔ འགྲོ་དོན་གདུལ་བྱ་དཔག་མེད་འབྱུང་༔ ཞེས་གསུང་ཞིང་མི་སྣང་བར་ཡལ༔ དེ་ནས་དབྱར་ཟླ་ར་བའི་ཚེས་བཅུའི་ཉིན་འབྲུ་སྣ་དང་དར་ཡུག་ཐོགས་ནས་སློབ་བུ་ངག་དབང་རྒྱ་མཚོ་དང་ལྷན་ཅིག་ཏུ་བྲག་དེ་ཉིད་ཚོལ་དུ་སོང་བས་མ་རྙེད་པར་ཡུན་ཅིག་ངལ་གསོས་ནས་ཡོད་པའི་མོད་ལ་བྲག་སུབ་ཞིག་ཏུ་རྡོ་ཆུང་ངུ་ཞིག་ཆད་དེ་འདྲིལ་སོང་བས༔ དེར་ཕྱིན་ནས་བྲག་སྲུབ་དེའི་ནང་བྲུས་པས་ལག་པ་ཤོང་ཙམ་ཡོད་པའི་ནང་ནས་ལ་ཆའི་སྒྲོམ་བུ་ཞིག་བཏོན་ཏེ་དེའི་ནང་དུ་ཤོག་དྲིལ་གཅིག་དང་༔ དེའི་གཡས་སུ་ཕྲེང་བ་ཟད་པོ་ཡིད་དུ་མི་འོང་བ་བརྡར་ན་ཙནྡན་དཀར་པོའི་དྲི་མནམ་པ་ཞིག་དང་༔ རྒྱབ་ཏུ་སྒྲོལ་མའི་འདག་སྐུ་གསེར་གྱིས་བྱུགས་པ་ཞིག་འདུག་པ་བླངས་ཏེ༔ ཚབ་ཏུ་འབྲུ་སྣ་དང་དར་བཅུག་ནས་སྔར་བཞིན་འདག་པས་སྲུབ་འདན་པར་བྱས་ནས་བཞག༔ ཤོག་དྲིལ་ལ་ཞེང་སོར་ལྔ་པ་རིང་ཐུང་འདོམ་དོ་ཙམ་ཡོད་པའི་ཡི་གེའི་ངོས་ནས་བལྟས་ཚེ་ནག་པོ་དང་༔ རྒྱབ་ནས་བལྟས་ན་དམར་པོ་རིས་སུ་དོད་པ་སྤུས་བྲིས་པ་ཙམ་འདུག་པ་ལ༔ ཆོས་སྐུ་ཀུན་ཏུ་བཟང་པོ༔ ལོངས་སྐུ་རྡོ་རྗེ་སེམས་དཔའ༔ སྤྲུལ་སྐུ་དགའ་རབ་རྡོ་རྗེ༔ མཁས་གྲུབ་ཀྱི་མཆོག་ཤྲཱི་སེངྷ་རྣམས་ལ་མི་ཕྱེད་དད་པའི་སྒོ་ནས་འདུད་ཅིང་གཏན་གྱི་སྐྱབས་གནས་སུ་བསྟེན་ཏོ༔ བདག་འདྲ་པདྨ་འབྱུང་གནས་ངས༔ ལྔ་བརྒྱའི་འགྲོ་བ་མཐའ་དག་ལ༔ རྗེས་ཆགས་སྙིང་རྗེའི་བསམ་པ་ཡིས༔ འཛམ་གླིང་ས་གནས་ཐམས་ཅད་དུ༔ གཏེར་ཁ་སྟོང་དང་རྩ་བཞི་སྦས༔ དེང་སང་སྙིང་མའི་མར་གཤམ་འདིར༔ སེམས་ཅན་ལས་ངན་དམུ་རྒོད་པས༔ ཤེས་རྒྱུད་འདུལ་བར་དཀའ་མོད་ཀྱང་༔ སྨོན་ལམ་ལས་ཀྱིས་འབྲེལ་བ་ཡི༔ གདུལ་བྱའི་ལྷག་མ་སྐྱོང་བའི་ཕྱིར༔ ཁྱོད་ནི་ཕྲིན་ལས་བདག་པོར་བསྐོས༔ ས་མོ་ལུག་གི་ལོ་ཁྱིམ་གྱི༔ དགུན་ཟླ་ར་བའི་ཉེར་ལྔ་ལ༔ གསེར་སྨད་རྔ་ལ་སྟག་རྩེ་ཞེས༔ འཕགས་མ་སྒྲོལ་མའི་གནས་མཆོག་སྟེ༔ དེ་ཡི་གཡས་ཕྱོགས་ལོགས་ཆ་ན༔ རྒྱལ་པོ་གཡུ་ཕྲེང་ཅན་གྱི་མགུལ༔ རྡོ་རྗེ་བྲག་ཅེས་བྱ་བ་ཡོད༔ ཁང་སྒོ་ལྟ་བུའི་རི་མོ་བཀྲ༔ བྲག་ནི་སྲུབ་ཀྱིས་འཁོར་བ་ལ༔ སྒོ་ནི་མཐོ་ཡིས་འཁོར་ཙམ་ཡོད༔ དེ་ཉིད་ལྕགས་ཀྱི་གཟོང་གིས་དཀྲིག༔ འབྱེད་ཚེ་ཕོ་རོག་སྟོང་ཐུབ་ཀྱི༔ དབུས་ནས་ངང་པ་ཁྲི་ཐུབ་ཀྱིས༔ གཡོགས་པའི་སྒྲོམ་བུ་བདུན་ཕྲག་ཡོད༔ གཏེར་སྲུང་རྒྱལ་པོ་གཡུ་ཕྲེང་ཅན༔ ཤ་དང་ཁྲག་གི་སྐྱེམས་ཀྱིས་མཆོད༔ ཚབ་ཏུ་གཏེར་བུམ་བཟང་པོ་དང་༔ དར་ཚོན་སྣ་ལྔ་ཕུལ་ནས་བཞག༔ ཟབ་ཆོས་གསང་བ་སྐོར་གསུམ་ལས༔ ཐུགས་སྒྲུབ་གསང་བའི་རྒྱ་ཅན་ནི༔ བདུད་རྒྱལ་སེ་ཕུང་ནག་པོ་ཡིས༔ རྒྱལ་ཁམས་ཁ་ལོ་བསྒྱུར་བའི་ཚེ༔ དེ་ཡི་དབང་པོ་བསྣུབ་པའི་ཕྱིར༔ ཤིང་མོ་གླང་གི་ལོ་རུ་ཕོབ༔ མཁའ་འགྲོ་གསང་བ་ཡེ་ཤེས་ནི༔ མེ་སྟག་ལོ་ཡི་དབྱར་ར་བར༔ སྐྱེས་བུ་སོ་ཡི་མིང་མཐའ་ཅན༔ ཡང་ཅིག་ནི་ཡི་མིང་མཐའ་ཅན༔ འབྱུང་ཚེ་ཡི་གེར་ཕབ་པ་ན༔ དེ་ཡི་རྟེན་འབྲེལ་དུས་ཚིགས་ལགས༔ ཡང་ཁྲོས་མ་ཧཱ་ཀཱ་ལ་ནི༔ ལྕགས་མོ་ལུག་གི་ལོ་ཁྱིམ་དུ༔ སྐྱེས་བུ་བཅུ་ཡི་མིང་མཐའ་ཅན༔ འབྱུང་ཚེ་རྟེན་འབྲེལ་དུས་ཚིགས་ལགས༔ གསང་བདག་རྡོ་རྗེའི་སྒྲུབ་པ་ནི༔ སྐྱེས་བུ་ལི་ཡི་མིང་མཐའ་ཅན༔ བྱི་བའི་ལོ་རུ་ལྷགས་པའི་ཚེ༔ དེ་ཡང་རྟེན་འབྲེལ་དུས་ཚིགས་ལགས༔ རྡོ་རྗེ་ཕུར་པའི་ཆ་ལག་རྣམས༔ སྨོན་ལམ་ལས་ཀྱིས་བསྐུལ་བ་ཡི༔ སྣོད་ལྡན་སློབ་མ་རིམ་བཞིན་དུ༔ འབྱུང་ཚེ་རྟེན་འབྲེལ་དུས་ཚིགས་ལགས༔ བསྐལ་པ་ཕག་གི་ལོ་ཁྱིམ་དུ༔ དབྱར་ཟླ་ར་བ་ལ་བབ་ཚེ༔ སྐྱེས་བུ་ཤྲཱིའི་མིང་མཐའ་ཅན༔ བསྐུལ་བ་པོ་རུ་ལྷགས་པའི་ཚེ༔ ཐུགས་རྗེ་ཆེན་པོའི་སྒྲུབ་སྐོར་རྣམས༔ ཕབ་པའི་རྟེན་འབྲེལ་དུས་ཚིགས་ལགས༔ སྟག་གི་ལོ་ཁྱིམ་ལ་བབ་ཚེ༔ སྐྱེས་བུ་སེམས་ཀྱི་མིང་མཐའ་ཅན༔ བསྐུལ་བ་པོ་རུ་ལྷགས་པའི་ཚེ༔ འཆོལ་བ་རྡོ་རྗེ་གྲོ་བོ་ལོད༔ གཏན་ལ་དབབ་པའི་དུས་ཚིགས་ལགས༔ བྱི་བའི་ལོ་ཁྱིམ་ལ་བབ་ཚེ༔ སྐྱེས་བུ་དྷརྨའི་མིང་ཅན་ཉིད༔ བསྐུལ་བ་པོ་རུ་ལྷགས་པའི་ཚེ༔ འཇམ་དཔལ་གསང་བ་འདུས་པ་ཉིད༔ གཏན་ལ་དབབ་པའི་དུས་ཚིགས་ཏེ༔ ཡོས་བུའི་ལོ་ཁྱིམ་ལ་བབ་ཚེ༔ སྐྱེས་བུ་རང་ཤར་མིང་མཐའ་ཅན༔ བསྐུལ་བ་པོ་རུ་ལྷགས་པའི་ཚེ༔ སྒྲོལ་མའི་སྒྲུབ་ཐབས་གཏན་ལ་དབབ༔ རྟ་ཡི་ལོ་ཁྱིམ་ལ་བབ་ཚེ༔ སྐྱེས་བུ་རང་གྲོལ་མིང་མཐའ་ཅན༔ འབྱུང་ཚེ་མཚོ་རྒྱལ་སྒྲུབ་པ་ཉིད༔ གཏན་ལ་དབབ་པའི་དུས་ཚིགས་ཡིན༔ གཞན་ཡང་གསང་བ་སྐོར་གསུམ་གྱི༔ ཆ་ལག་ཡན་ལག་ཐམས་ཅད་ནི༔ བཀའ་བབ་ཆོས་བདག་རེ་རེ་ཡིས༔ བསྐུལ་ཞིང་གཏན་ལ་དབབ་པར་འགྱུར༔ རྫོགས་རིམ་མ་བུ་སྐོར་གསུམ་ནི༔ དག་སྣང་དགོངས་གཏེར་ཚུལ་དུ་འབྱུང་༔ རྔ་ལ་སྟག་རྩེའི་ལྟེ་བ་རུ༔ ཡང་ཟབ་རྡོ་རྗེ་སྙིང་པོ་ཡོད༔ གཡུང་དྲུང་ལྕགས་རྩེའི་ནང་མཛོད་དུ༔ འོད་གསལ་སྒྱུ་འཕྲུལ་དྲྭ་བ་ཡོད༔ ལྕགས་རི་ཅན་གྱི་གནས་དེ་རུ༔ མ་མོ་བདེ་བའི་རྒྱང་གླུ་ཡོད༔ ཨ་མྱེ་དྲིལ་དཀར་ཐོར་གཙུག་ཏུ༔ མགོན་པོ་ནག་པོའི་གསང་རྒྱུད་ཡོད༔ རྨ་ཡུལ་ཨོ་རྒྱན་པད་ཞྭ་རུ༔ བདེ་མཆོག་འཁོར་ལོའི་སྒྲུབ་སྐོར་ཡོད༔ བྲག་དཀར་སྤྲེལ་རྫོང་གནས་མཆོག་ཏུ༔ མཁའ་འགྲོ་གསང་བའི་ཐེམ་ཡིག་ཡོད༔ དྭགས་རི་གསང་བ་གཉན་པོ་རུ༔ སྦས་ཡུལ་བདུན་གྱི་ཁ་བྱང་ཡོད༔ ཀོང་པོའི་ལ་སྒང་གཡས་ལོགས་སུ༔ པདྨ་བཀོད་ཀྱི་ལྡེ་མིག་ཡོད༔ སྤུ་རུ་དྭགས་རྫོང་ཕུག་པ་རུ༔ ལུང་གསུམ་ལྗོངས་ཀྱི་ལྡེ་མིག་ཡོད༔ ལྷ་རི་ཐོད་དཀར་བྱ་བ་རུ༔ འབྲས་མོ་ལྗོངས་ཀྱི་ལྡེ་མིག་ཡོད༔ བསམ་ཡས་མཆོད་རྟེན་དཀར་པོ་རུ༔ ཡུ་པོ་ལུང་གི་ལྡེ་མིག་ཡོད༔ གཙང་གི་ཆུ་ལུང་བྲག་དམར་ན༔ མཁན་པ་ལུང་གི་ལྡེ་མིག་ཡོད༔ དེང་དུས་མཐའ་དམག་དབུས་སུ་རྡིབ༔ དུ་རུ་ཀ་ཡི་ཡོ་ལང་འཕྱོ༔ སྐྱེ་འགྲོ་མི་ཡི་ཤེས་རྒྱུད་བརླམས༔ པདྨ་ང་དང་འབྲེལ་བའི་བུ༔ ལས་ཅན་སྐྱེས་བུ་མཐའ་དག་ཀུན༔ སྦས་པའི་ཡུལ་དུ་ཡིབ་པ་ལ༔ ས་མཁན་བཀའ་བབ་ཁྱོད་ལགས་ཀྱང་༔ རྟེན་འབྲེལ་སྣ་ཁ་ལོག་པ་ཡིས༔ རྟགས་དང་ལྟས་མཚན་སྣ་ཚོགས་འབྱུང་༔ འབྲོང་རྫོང་རྡོ་རྗེ་ཕག་མོ་དང་༔ གངས་ལའི་དབང་ཕྱུག་ཆེན་པོ་ཉིད༔ མ་འབྱིན་བར་དུ་སྒོ་མི་འབྱེད༔ མེ་བྱའི་ལོ་ལ་བབ་པའི་ཚེ༔ རྩ་རླུང་རྡོ་རྗེ་གཏུམ་མོ་ཡི༔ སྟོབས་ཀྱིས་དབུ་མའི་རྩ་ཁ་འབྱེད༔ ཆོས་ཉིད་ནམ་མཁའ་མཛོད་ཀྱི་གཏེར༔ རྡོལ་ཚེ་ལས་འབྲེལ་སློབ་བུ་སྐྱོངས༔ པདྨའི་རྒྱལ་ཚབ་སྐྱེས་བུ་ཁྱོད༔ ལྷ་འདྲེ་མི་གསུམ་ཆོ་འཕྲུལ་གྱིས༔ ལེགས་ཉེས་གར་གྱི་རྣམ་འགྱུར་མཐོང་༔ རང་དབང་རྒྱལ་པོའི་བཙན་ས་ཟུངས༔ ལོ་ཁྱིམ་དྲུག་ཅུ་རྩ་བཞི་ནས༔ ཆོས་བརྒྱད་སྒྲུབ་བློའི་བྱ་བ་སྤོངས༔ བློ་སྣ་པདྨ་ང་ལ་གཏོད༔ སྣང་སྲིད་པདྨ་འོད་དུ་སྦྱོངས༔ དོན་གཉིས་ལྷུན་གྲུབ་གདིང་ཐོབ་འགྱུར༔ ཅེས་བཀའ་བཞིན་དུ་དངུལ་རྒོད་ཀྱི་ནང་དུ་ཕྱིན་ཚེ་རྟ་ནག་རྟིང་དཀར་ལ་ཞོན་པའི་མི་སེང་གེའི་མགོ་ཅན་ཞིག་བྱུང་ནས༔ ཀྭིའི་ཀྭིའི༔ གཡུང་དྲུང་ལྕགས་རྩའི་བཙུན་མོ་དངུལ་བཟང་མ་ཁྱོད་ཚུར་ཤོག་ཟེར༔ དེ་མ་ཐག་ཏུ་གཡུ་དང་འདྲ་བའི་གཡུའི་ཁ་དོག་དང་བཞིན་མདངས་འབར་བའི་བུ་མོ་ཞིག་བྱུང་ནས༔ བྲག་ལ་ཁུ་ཚུར་གྱིས་བརྒྱབ་པའི་མོད་ལ་བྲག་རི་མི་མགོ་ཙམ་ཞིག་སྒར་གྱིས་འཕར་བྱུང་༔ དེའི་ནང་དུ་རྩྭའི་པ་ཊ་བྱས་པའི་གོང་བུ་ཕོར་པ་ཙམ་གྱི་ནང་དུ་ཤོག་དྲིལ་ཆེན་པོ་ཞིག་འདུག་པ་བླངས་ཏེ་གཏེར་ཚབས་བཅུག་ནས་སྒོ་སྔར་བཞིན་བསྡམས་ཏེ་བཞག༔ སྨར་མདོ་རུ་ཕྱིན་ཏེ་ཤོག་སེར་ཁ་ཕྱེས་ནས་བལྟས་པའི་ངོས་ལ༔ འཁོར་འདས་ཡོངས་ཁྱབ་འཁོར་འདས་ཀྱི༔ དབང་ཕྱུག་བྱེད་པོ་ཀུན་ཏུ་བཟང་༔ མངོན་གྱུར་ཆེན་པོར་བཞུགས་ནས་ཀྱང་༔ གདོད་མའི་ཡེ་གཞི་ནམ་མཁའ་ཆེར༔ རང་གྲོལ་འབྲས་བུ་ཐོབ་ཕྱག་འཚལ༔ བསྐལ་བ་མང་པོའི་གོང་རོལ་ནས༔ ཚོགས་དང་སྨོན་ལམ་སྟོབས་འབྱོར་ཏེ༔ ཐུགས་བསྐྱེད་རྣམ་དག་གདིང་ལྡན་པས༔ སྐྱེས་བུ་ཁྱོད་ཉིད་འདིར་ལྟོས་དང་༔ ཁྱོད་ལ་ཉེར་མཁོའི་ལམ་ཞིག་གདའ༔ བསྐལ་པ་བྱ་ཡི་ལོ་ཁྱིམ་དུ༔ སྨར་གྱི་འབྲོས་ཕུག་རབ་དབེན་ཚལ༔ ལོ་ཁྱིམ་དྲུག་ཏུ་སྒྲུབ་པ་མཛོད༔ སྣོད་ལྡན་དང་ནི་སྣོད་མིན་པའི༔ སློབ་མ་བཅུ་ཕྲག་བཞི་རུ་འབྱུང་༔ བདུད་ཀྱི་ལོག་སྨོན་ལ་ཡོག་འདོར༔ དེ་འོག་གྲོང་ཆུང་གནས་ཟུང་ལ༔ ལོ་གསུམ་བར་དུ་རྟེན་ཆོས་ཤིག༔ དེ་མཐར་ཉ་མང་ལུང་ཆུང་དུ༔ ཟླ་བ་བཅུ་རུ་རྟེན་ཆོས་ལ༔ གནས་པོས་བརྡ་རྟགས་བྱུང་བའི་ཚེ༔ སྨར་མདོར་ལོ་དགུར་རྟེན་ཆོས་ཤིག༔ འཁོར་སློབ་བཅུ་ཕྲག་བཅུ་གཉིས་འབྱུང་༔ མཚོ་རྒྱལ་སྤྲུལ་པ་རྡོ་རྗེའི་མིང་༔ གང་ལྷ་པདྨའི་མིང་ཅན་དང་༔ སྤྲེལ་ཆུང་རྒྱལ་གྱི་མིང་མཐའ་ཅན༔ མཆོག་དབྱངས་དགེ་བའི་མིང་ཅན་གཉིས༔ འབྱུང་ཚེ་གསེར་གྱི་ཡུལ་དུ་སྤོས༔ དེ་ཚེ་སྨད་ཀྱི་ཕྱོགས་ཆ་ནས༔ བུ་སློབ་བཅུ་ཕྲག་བརྒྱད་དུ་འབྱུང་༔ དེ་ལས་མ་འཛི་མདའ་རུ་མཆོག༔ ཀ་ཡི་མིང་དང་བཛྲ་མིང་༔ བཱིདྱ་དང་ནི་ཛྙཱ་ན་པ༔ མཐོང་བའི་ལམ་དང་ལྔ་ཕྲག་འབྱུང་༔ དེ་དག་རྒྱ་གར་འཕགས་ཡུལ་ནས༔ པདྨ་ང་དང་འབྲེལ་བའི་བུ༔ རྫོགས་པ་ཆེན་པོའི་ཆོས་སྒོ་དང་༔ སྤྲོད་དང་མཆོག་གི་དངོས་གྲུབ་འཐོབ༔ ལྷོ་ནས་རྒྱ་མཚོའི་མིང་མཐའ་ཅན༔ ཚེ་འདིར་གཞོན་ནུ་བུམ་སྐུར་གྲོལ༔ ལྷོ་ནུབ་འཚམས་ནས་གྲོལ་གྱི་མི༔ རྫོགས་པ་ཆེན་པོའི་ཆོས་སྒོ་དང་༔ འཕྲད་ན་ཡང་དག་སངས་རྒྱས་ཐོབ༔ སྐྱེས་བུ་པདྨ་བསོད་ནམས་ཞེས༔ མོན་བུ་དབང་རྒྱལ་སྐྱེ་བའི་མཐའ༔ ཕྱི་མ་ལོངས་སྤྱོད་རྫོགས་སྐུར་གྲོལ༔ ཤར་ནས་རལ་ཁུར་ཅན་གྱི་ཁྱུའི༔ མཆོག་གྱུར་མཁྱེན་པའི་མིང་མཐའ་ཅན༔ ཚེ་འདིར་མཆོག་གི་དངོས་གྲུབ་འཐོབ༔ ཤར་ལྷོ་མཚམས་ནས་འབྱུང་འགྱུར་ནི༔ སྔོན་ཚེ་ང་ཡི་འབངས་གྱུར་པ༔ ནམ་མཁའ་ཡེ་ཤེས་སྐྱེ་བརྒྱུད་པ༔ སྐྱེས་བུ་ངག་གི་མིང་ཅན་འབྱུང་༔ བདུད་དང་དམ་སྲིས་མ་བསླུས་ན༔ འོད་གསལ་མྱུར་ལམ་ཟབ་མོ་དང་༔ མ་དང་མཁའ་འགྲོའི་སྒྲུབ་སྐོར་གྱིས༔ ཚེ་གཅིག་མཁའ་སྤྱོད་དག་པའི་དབྱིངས༔ མ་དང་མཁའ་འགྲོའི་ཚོགས་དཔོན་བྱེད༔ ནུབ་ནས་སེམས་ཀྱི་མིང་མཐའ་ཅན༔ རྨ་ཐོག་རིན་ཆེན་སྤྲུལ་པ་སྟེ༔ མི་ལོ་བཅུ་གཉིས་བར་མེད་དུ༔ གསང་ཆེན་མྱུར་ལམ་ཟབ་མོ་རུ༔ བརྟེན་ན་འཇའ་ལུས་འཕོ་ཆེན་འགྲུབ༔ སེ་ལུང་ཡ་མའི་སྐྱེ་བརྒྱུད་དེ༔ སྐྱེས་བུ་ལྡན་གྱི་མིང་མཐའ་ཅན༔ མི་ལོ་བཅུ་དྲུག་བར་མེད་དུ༔ འོད་གསལ་ཐོད་རྒལ་ལ་བརྟེན་པས༔ འཇའ་ལུས་རྡོ་རྗེའི་སྐུ་འགྲུབ་འགྱུར༔ ནུབ་བྱང་མཚམས་ནས་འབྱུང་འགྱུར་ནི༔ ལས་ཅན་སློབ་མ་བརྒྱ་ཕྲག་ལས༔ ཆུང་འཕེལ་སེང་གི་མིང་མཐའ་ཅན༔ པདྨ་ང་དང་འབྲེལ་བའི་བུ༔ རྫོགས་པ་ཆེན་པོའི་སྒོ་འདི་དང་༔ འཕྲད་ན་མངོན་སངས་རྒྱས་འགྱུར་རོ༔ གཙང་ནས་འབྲོག་མིའི་སྤྲུལ་པ་འབྱུང་༔ སྟོད་ནས་དཔལ་རྡོར་སྤྲུལ་པ་འབྱུང་༔ གདོང་ལས་ཐང་སྟོང་རྒྱལ་པོ་འབྱུང་༔ དེ་སོགས་ཁྱོད་ཀྱི་འཁོར་ཚོགས་ལ༔ བརྒྱ་ཕྲག་བཅུ་ཕྲག་བཅུ་གསུམ་འབྱུང་༔ སྙིང་པོའི་སྒྲུབ་པ་ལ་གཞོལ་བས༔ སྐྱེས་བུ་འགའ་ཞིག་མངོན་སངས་རྒྱས༔ ལོག་པ་བདུད་ཀྱིས་མ་བསླད་ན༔ ཕལ་ཆེར་བྱང་ཕྱོགས་ཤམ་བྷ་ལར༔ ཕ་རོལ་དཔུང་འཇོམས་གྲལ་འཁོད་དེ༔ ལོག་པ་བདུད་ཀྱི་བསྟན་པ་བསྣུབས༔ ཟླ་རྒྱལ་དཔའ་བོའི་ཉེ་འདབས་སུ༔ སྐྱེས་བུ་ག་གའི་མིང་ཅན་འབྱུང་༔ གནས་དེར་ཚེ་དང་སྐྱབས་ཞེས་པའི༔ མིང་མཐའ་ཟུང་ཞིག་འབྱུང་བ་དང་༔ ནེ་གེར་ཞེས་བྱའི་ཉེ་ས་རུ༔ སྐྱེས་བུ་དགའ་བའི་མིང་ཅན་དང་༔ གཞན་ཡང་རི་ཁྲོད་ངེས་མེད་དུ༔ བཙན་ས་འཛིན་པའི་སྐྱེས་བུ་ལྔ༔ ཚེ་འདིར་ཐར་པའི་གྲོང་འཕོ་ཞིང་༔ འབྲེལ་ཚད་སྲིད་ལས་བསྒྲལ་འགྱུར་རོ༔ ཡོས་བུའི་ལོ་ཁྱིམ་ལ་བབ་ཚེ༔ གནས་ཡུལ་གཞན་དུ་འཕོས་ནས་སུ༔ ལི་ཞེས་བྱ་བའི་སྟོད་ཀྱི་ཆ༔ དེ་རུ་གནས་རྟེན་བཅས་གྱུར་ན༔ རྟེན་འབྲེལ་དང་མཐུན་གནས་གཞི་འཛུགས༔ སྐྱེས་བུ་ཁྱོད་ཀྱི་འབངས་གྱུར་པའི༔ བསྟན་འཛིན་སྐྱེས་བུ་ཐམས་ཅད་ཀྱིས༔ ལྷ་ཆེན་དབང་ཕྱུག་ཆེན་པོ་དང་༔ གནོད་སྦྱིན་ཤན་པ་གྲོགས་སུ་བསྟེན༔ སྣང་སྲིད་སྐྱེ་འགྲོའི་བློ་ཡིད་སེམས༔ འདོད་རྒུར་དབང་བསྒྱུར་ལྕགས་ཀྱུ་ལགས༔ གཟའ་རྒོད་དུག་གི་སྤུ་གྲི་ནི༔ བསྟན་དགྲ་འདུལ་བའི་གཉེན་དུ་ཆེ༔ སྒོ་གསུམ་ལྷ་རུ་སྦྱོང་བ་ནི༔ བར་ཆད་སེལ་བའི་མཆོག་ཏུ་ཤེས༔ འོད་གསལ་རྫོགས་པ་ཆེན་པོ་ཡི༔ སྟོན་དང་བསྟན་པ་ཉི་ཞུར་ཙམ༔ ཤེས་པར་གྱིས་ལ་བཀའ་བབ་རྣམས༔ ཆོས་བརྒྱད་ལས་དབེན་རི་སུལ་དུ༔ རྩེ་གཅིག་སྙིང་པོའི་སྒྲུབ་ལ་བརྩོན༔ སྲིད་པ་སྡུག་བསྔལ་རྒྱ་མཚོ་ལས༔ ཐར་པ་ཐོབ་པར་གདོན་མི་ཟ༔ ང་སྤྲུལ་ང་གཏེར་དང་འཕྲད་པའི༔ སྐལ་བ་བཟང་པོའི་སྐྱེས་བུ་རྣམས༔ ཚེ་གཅིག་གྲོང་ཆོག་འདྲེ་བརྡུང་དང་༔ རྙེད་ཚོལ་ལས་ལ་འབྱམས་མ་བྱེད༔ དཀའ་ཚེགས་ངལ་བ་ཁྱད་བསད་དེ༔ གཞན་དོན་བསྒྲུབ་ལ་ཆེས་ཆེར་བརྩོན༔ དེ་ཡང་སྨིིིན་གྲོལ་གདམས་པ་འདོམས༔ པད་འབྱུང་ཕྲིན་ལས་ཕོ་ཉ་བ༔ བསྟན་དང་འགྲོ་བའི་དོན་ལས་མེད༔ དེ་དོན་རྟག་ཏུ་ཡིད་ལ་ཞོག༔ འདི་སྣང་རྨི་ལམ་གནས་སྐབས་ཙམ༔ ཤེས་ནས་རྟག་འཛིན་ཞེན་པ་ཆོད༔ དེ་ལྟར་གནད་དང་ལྡན་གྱུར་ན༔ དོན་གཉིས་མཐར་ཕྱིན་གདིང་འཐོབ་འགྱུར༔ གནོད་སྦྱིན་ཤན་པ་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཨ་ཐམ་རྒྱ༔ ཞེས་དེ་ལྟར་བྱུང་བ་བཞིན་དུ་ལུག་ལོ་དགུན་ཟླ་འབྲིང་པོའི་ཚེས་ཉེར་ལྔའི་ཉིན་གྲོགས་བདེ་ཆེན་ཞེས་བྱ་བ་དང་ལྷན་ཅིག་ཏུ་བསྡེབས་ཏེ་ཤྭ་བྲག་རྡོ་རྗེ་ཅན་དུ་སླེབས་ནས་བྲག་སྲུབ་ལྕགས་གཟོང་གིས་དཀྲིག་པའི་མོད་ལ་སྒོ་གྲུ་བཞིར་རྡོལ་བའི་ནང་དུ་སོལ་བ་མང་དུ་སྤུངས་པའི་དཀྱིལ་དུ་ཤུག་པའི་ཤུན་པ་དང་གྲོ་གས་གཡོགས་པའི་ནང་དུ་སྒྲོམ་བུ་ཟངས་ཞུན་གྱིས་བསྐོན་པ་ལྔ་གདན་དྲངས་པའི་མཐར། བྲག་གི་སྒོ་དང་སྲུབ་དང་སྒྲོམ་བུ་སྐུ་གསུང་ཐུགས་རྟེན་མང་དུ་སྣང་བ་རྣམས་རྨི་ལམ་བཞིན་དུ་ཡལ་སོང་། ཉི་མ་དེ་ཡི་རིང་ལ་དྲི་བཟང་གིས་ལུང་པ་ཁྱབ། ཉིན་སྲིབ་ཀྱི་རི་བོ་ཐམས་ཅད་འཇའ་དང་འོད་ཀྱིས་ཁེབས། རོལ་མོ་མང་པོས་རང་སྒྲ་འཁྲོལ། གླ་བ་ཞིག་རྙིས་ཟིན་འདུག་པ་དེ་རྙི་ཐག་གྲིས་བཅད་ནས་བཀྲོལ། འཇའ་ཚོན་འོད་ཀྱི་དྲྭ་བ་འཁྲིགས་པ་ནི། གདམས་པ་ཉམས་སུ་ལེན་པའི་སྐྱེས་བུ་སྲིད་ན་འཇའ་ལུས་འགྲུབ་པའི་རྟེན་འབྲེལ་དང་༔ རོལ་མོ་མང་པོས་རང་སྒྲ་ལྡིར་བ་ནི་ཚེའི་སྨད་ཆར་སྙན་གྲགས་རྒྱས་པ་དང་༔ གླ་བ་རྙི་ནས་གྲོལ་བ་དེ་སྨོན་ལམ་ལས་ཀྱིས་འབྲེལ་བའི་སྐྱེས་བུ་རྣམས་རི་དྭགས་རྒྱ་ནང་ནས་གྲོལ་བ་བཞིན་ཏུ་ཐར་པ་དང་རྣམ་མཁྱེན་གྱི་ལམ་དུ་འདྲོངས་པའི་རྟེན་འབྲེལ་གྱི་བརྡ་དང་རྟགས་སུ་གོ། དྲི་བཟང་གི་ན་བུན་འཐུལ་བ་ནི། དམ་ཚིག་དང་ལྡན་པའི་བུ་སློབ་ཟོལ་མེད་མང་པོ་འབྱུང་བའི་རྟེན་འབྲེལ་དུ་གོ། དེ་ནས་གཞན་ལ་ཐུག་འཕྲད་བྱུང་ན་རྟེན་འབྲེལ་གྱི་སྣ་ཁ་ལོག་པར་དོགས་ནས་གཞན་རྒྱུ་འགྲུལ་མེད་པའི་ལ་ལུང་མང་པོར་བསྒྲོད་ནས་རང་ཁྱིམ་དུ་སླེབས་སོ། །ཞེས་འཇམ་དཔལ་གསང་བ་འདུས་པའི་ཁ་བྱང་དང་ཟབ་ཆོས་གསང་བ་སྐོར་གསུམ་གྱི་ཁ་བྱང་འདི་ཉིད་སློབ་བུ་དམ་པ་ཀུན་བཟང་ཆོས་གྲགས་དང་། ངག་དབང་ཕྲིན་ལས་གཉིས་ཀྱིས་བསྐུལ་ངོར། ཁྲག་འཐུང་བདུད་འཇོམས་རྡོ་རྗེས་གཏན་ལ་ཕབ་པ་ཡོངས་སུ་དགེ་ཞིང་བཀྲ་ཤིས་པར་གྱུར་ཅིག། དགེའོ། ། དགེའོ། །དགེའོ། །སརྦ་མངྒ་ལཾ།། །།