DJYD-KABUM-18-TSHA-013

Previous Text Back to Volume PageNext Text

Wylie title	bka' bsgo springs yig le tshan gsum
Location	bdud 'joms rin po che bka' 'bum Volume 18, Text 13, Pages 597-598 (Folios 1a1 to 1b5)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. bka' bsgo springs yig le tshan gsum. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 18: 597-598. Kalimpong: Dupjung Lama, 1979-1985.
Side notes	Recto: bka' bsgo   Verso: springs yig
More details More details
Genre
Colophon	First colophon: །ཅེས་གོ་བར་བྱ་བའི་ཡིག་གེ་འདིའང་ཀོང་ཡུལ་བདུདརི་གནམ་ལྕགས་འབར་བའི་མགུལ་ནས་ཁྲག་འཐུང་ཁྲོ་བོ་འཆོལ་བའི་རྣལ་འབྱོར་པ་འཇིགས་བྲལ་ཡེ་ཤེས་རྡོ་རྗེ་དྲག་པོ་རྩལ་གྱིས་བྲིས།། Second colophon: །ཞེས་པའང་འཇིགས་བྲལ་ཡེ་ཤེས་རྡོ་རྗེས་སྤྲིངས།། Third colophon: །ཛྙཱ་ནས་སོ།།
	First colophon: ces go bar bya ba'i yig ge 'di'ang kong yul bdudari gnam lcags 'bar ba'i mgul nas khrag 'thung khro bo 'chol ba'i rnal 'byor pa 'jigs bral ye shes rdo rje drag po rtsal gyis bris// Second colophon: zhes pa'ang 'jigs bral ye shes rdo rjes springs// Third colophon: dz+nyA nas so//

Tibetan Text

[edit]

༄༅། །མི་མ་ཡིན་པའི་ཚོགས་ལ་བཀའ་བསྒོ་བསྲིངས་ཡིག་གི་སྐོར། སྲིད་པའི་ཁམས་ན་གནས་ཤིང་རྒྱུ་བའི་ཡིད་ཅན་ཆེ་ཕྲ་ཡོངས་ལ་བསྲིངས་པ། ད་ལམ་རིག་པ་འཛིན་པ་ཁྲོ་རྒྱལ་རྡོ་རྗེ་འདི་ལ་ངེད་ནས་ཟབ་གསང་ཌཱ་ཀིའི་སྙིང་ཁྲག་གི་སྙན་བརྒྱུད་ཀྱི་གདམས་པ་ཕོག དོན་བརྒྱུད་ཀྱི་དགོངས་པ་གཏད། འགྲོ་འདུལ་རྒྱལ་ཚབ་ཀྱི་སྐྱེས་བུར་དབང་བསྐུར་ཏེ། ཕྱོགས་མེད་ཀྱི་གདུལ་བྱའི་ཁ་ལོ་ཐར་པའི་ལམ་དུ་བསྒྱུར་ཕྱིར་མངགས་པ་ཡིན་པས། ཁྱེད་ལྷ་འདྲེ་མི་གསུམ་སུ་ཡང་རུང་བས་ཕན་པའི་སྡོང་གྲོགས་ཚུལ་བཞིན་དུ་བསྒྲུབ་ན་འདི་ཕྱིའི་ཕན་བདེ་འབྱུང་བ་ཆོས་ཉིད་དང་། གལ་སྲིད་ལོག་པར་འཁུ་བའི་བསམ་སྦྱོར་ཕྲ་མོ་ཙམ་ཡང་ཤར་ཚེ་དྲག་ཤུལ་གྱི་སྟོབས་དང་ཡེ་ཤེས་ཀྱི་སྤྱན་མངའ་བའི་བཀའ་སྲུང་དྲེགས་པའི་དམག་ཚོགས་རམ་དར་སྦྲན་ནས་གཟུགས་ཅན་གྱི་སྲོག་རྩ་བཅད། གཟུགས་མེད་ཀྱི་དབང་པོ་བསྐུམ་སྟེ་མིང་གི་ལྷག་མར་གཏོང་བར་གདོན་མི་ཟ་བས་ན་ཁེ་ཉེན་གྱི་གནས་ལ་ཤིན་ཏུ་བག་ཡོད་པར་བྱོས་ཤིག །ཅེས་གོ་བར་བྱ་བའི་ཡིག་གེ་འདིའང་ཀོང་ཡུལ་བདུདརི་གནམ་ལྕགས་འབར་བའི་མགུལ་ནས་ཁྲག་འཐུང་ཁྲོ་བོ་འཆོལ་བའི་རྣལ་འབྱོར་པ་འཇིགས་བྲལ་ཡེ་ཤེས་རྡོ་རྗེ་དྲག་པོ་རྩལ་གྱིས་བྲིས།། །། ༈ ཧཱུྃ་ཧཱུྃ་ཧཱུྃ། ཁྲག་འཐུང་ཁྲོ་རྒྱལ་འཆོལ་བའི་བཀའ་བྱུང་གིས། །ང་ཡིས་བསྲུངས་པའི་ཡུལ་ཁམས་གནས་རིས་འདིར། །གཉུག་མར་གནས་དང་གློ་བུར་ལྷགས་པ་ཡི། །མཁའ་ལ་རྒྱུ་བའི་ཡིད་ཀྱི་ལུས་ཅན་རྣམས། །གནོད་ཅིང་འཚེ་བའི་བསམ་སྦྱོར་ཀུན་སྤོངས་ལ། །ཕན་པའི་སྡོང་གྲོགས་བཟང་པོ་ཚུལ་བཞིན་སྒྲུབས། །ཚེ་རབས་འབྲེལ་བའི་ལས་ཀྱི་འབྲས་བུར་སོམས། །ཞི་བ་བྱང་ཆུབ་སེམས་དང་ལྡན་པར་མཛོད། །གལ་ཏེ་མི་ཉན་གདུག་སེམས་བསྐྱེད་པ་ན། དབང་དྲག་ཕོ་ཉ་ལྕགས་སྡིག་འབར་བ་ཡིས། །ཁྱེད་རྣམས་སྙིང་ཁྲག་འཇིབ་ནས་བརླག་པར་འགྱུར། །དེ་བས་ཉེན་ལ་མ་བདོ་ས་མ་ཡ། །ཞེས་པའང་འཇིགས་བྲལ་ཡེ་ཤེས་རྡོ་རྗེས་སྤྲིངས།། །། ༈ ཧྲཱིཿ དབང་དྲག་ཁྲག་འཐུང་འཆོལ་བའི་བཀའ་བྱུང་གིས། །ཡུལ་འདིར་གནོད་ཅིང་འཚེ་བའི་འབྱུང་པོ་ཚོགས། །འཁྲུལ་སྣང་སྒྱུ་མའི་གྲོང་ལ་མ་ཞེན་པར། །ཞི་བ་བྱང་ཆུབ་མཆོག་གི་སར་དེངས་ཤིག །འདས་ན་ཡཀྴ་ཁྲོ་ངྷས་སྙིང་ཟོས་ཏེ། ལུས་སེམས་དམྱལ་མེས་འཚིག་པར་གདོན་མི་ཟ། ས་མ་ཡ་བཛྲ་ཙིཏྟ་ཨ། །ཛྙཱ་ནས་སོ།། །།