TTDL-ZABTER-13-PA-006

Previous Text Back to Volume PageNext Text

Wylie title	chos nyid nam mkha'i klong 'dzod las: sngags srung dbyings kyi rje mo'i yang gsang gi sgrub pa yid bzhin char 'bebs:
Location	bdud 'joms gling pa'i zab gter Volume 13, Text 6, Pages 15-17 (Folios 1a1 to 2a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las sngags srung dbyings kyi rje mo'i yang gsang gi sgrub pa yid bzhin char 'bebs. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 15-17. Thimphu, Bhutan: Lama Kuenzang Wangdue, 2004.
Side notes	Recto: yang gsang   Verso: bdud 'joms srung ma sngags srung
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	E ka dzA Ti
Colophon	ཞེས་པ་འདི་ནི་སློབ་བུ་རིག་རྩལ་གྱིས་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ།།
	zhes pa 'di ni slob bu rig rtsal gyis bskul ngor bdud 'joms rdo rjes nam mkha'i mdzod las bsgyur ba'o/_/dge'o/_/dge'o/_/dge'o//

Tibetan Text

[edit]

ཐྂ།༔ ཆོས་ཉིད་ནམ་མཁའི་ཀློང་མཛོད་ལས༔ སྔགས་སྲུང་དབྱིངས་ཀྱི་རྗེ་མོའི་ཡང་གསང་གི་སྒྲུབ་པ་ཡིད་བཞིན་ཆར་འབེབས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ཟངས་ལྕགས་སྣོད་དུ་གཏོར་མ་ནི༔ ཟུར་གསུམ་ཁྲུ་གང་ཁྲག་གིས་བྱུགས༔ སྙིང་དང་ཞིང་དབྱུག་ཤ་ཡིས་བརྒྱན༔ མཐིང་ནག་དར་གྱི་ལྡིང་གུར་ཕུབ༔ དེ་ནས་བསྒྲུབ་པའི་རིམ་པ་ལ༔ ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ རང་ཉིད་སྐད་ཅིག་དྲན་རྫོགས་སུ༔ སྤྱི་དཔལ་ཆེ་མཆོག་ཧེ་རུ་ཀའི༔ མདུན་མཁར་པད་ཉི་རོ་ཡི་སྟེང་༔ བསྐལ་པའི་མེ་རླུང་འཚུབས་མའི་ཀློང་༔ མ་ལས་དབྱིངས་ཀྱི་རྗེ་མོ་ནི༔ སྨུག་ནག་ཁྲོ་གཏུམ་རྔམས་ཤིང་བརྗིད༔ རལ་པ་འབྲུ་གཅིག་གནམ་དུ་གཟིང་༔ སྤྱན་གཅིག་འཁོར་འདས་ས་ལེར་གཟིགས༔ མཆེ་གཅིག་དགྲ་སྙིང་ཁུང་ནས་འབྱིན༔ ཞབས་གཅིག་དགྲ་གདོན་བསྣོལ་སྟབས་གནོན༔ ཕྱག་གཡས་ཞིང་གི་དབྱུག་པ་ཕྱར༔ གཡོན་པས་དགྲ་སྙིང་དམར་རློན་བསྣམས༔ ནུ་གཡས་སྒྲུབ་ལ་དངོས་གྲུབ་བབས༔ གཡོན་པས་དགྲ་ལ་ཁྲག་གནད་གཏོང་༔ རྒྱན་དུ་མི་མགོའི་ཕྲེང་བ་དང་༔ གོས་སུ་ཞིང་ཆེན་གཡང་གཞི་གསོལ༔ གནས་ལྔར་མེ་ལོང་གཟུགས་བརྙན་བཞིན༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྡོ་རྗེ་སྙིང་པོ་ཨོཾ་དཀར་དང་༔ ཨཱཿདམར་ཧཱུྃ་མཐིང་སྭཱ་སེར་པོ༔ ཧཱ་ལྗང་ལས་ནི་རང་མདོག་གི༔ འོད་དང་འོད་ཟེར་རབ་འཕྲོས་པས༔ ཕྱོགས་བཅུའི་ཞིང་ཁམས་རབ་འབྱམས་དང་༔ འབྱུང་ལྔ་དབྱིངས་ཀྱི་ཡུམ་ཆེན་ལྔ༔ དབྱིངས་ཀྱི་རྗེ་མོའི་རྣམ་རོལ་དུ༔ མཚོ་ལ་ཁ་ཆར་བབ་པ་ལྟར༔ སྤྱན་དྲངས་གཉིས་མེད་རོ་གཅིག་གྱུར༔ མཐུ་ནུས་གཟི་བྱིན་བསྐྱེད་པར་གྱུར༔ དེ་ནས་འབོད་སྔགས་འདི་ཉིད་སྤྲོ་བསྡུའི་དམིགས་པའི་གནད་ཀྱིས༔ ཆུ་བོའི་གཞུང་ལྟར་རྒྱུན་མི་འཆད་པར་བཟླའོ༔ མ་མ་ཨེ་ཀ་ཙ་ཏི་ས་མ་ཡ་ཡ་ཧྲཱིཾཿཛ་ཛཿ བར་སྐབས་སུ་བསྐང་གསོལ་གྲངས་མང་བསགས༔ དེ་ལྟར་བསྒོམ་དམིགས་ཀྱི་གནད་དང་ལྡན་པས་བསྒྲུབ་ན་ཁྱིམ་འོད་ཀྱི་གང་བའམ༔ གཏོར་མ་ལ་མེ་འབར་བའམ་ཐོག་འཚགས་པ་སེར་བ་བྱུང་བའམ༔ ཉམས་དང་རྨི་ལམ་གྱི་སྣང་ངོར་བུད་མེད་མང་པོ་འདུ་བ་དང་༔ དབྱིངས་ཀྱི་རྗེ་མོའི་ཞལ་མངོན་སུམ་དུ་མཐོང་བ་སོགས་གྲུབ་པའི་ལྟས་མཚན་རིང་པོར་མི་ཐོགས་པར་འབྱུང་ངེས་སོ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ནི་སློབ་བུ་རིག་རྩལ་གྱིས་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ།། །། ཀྱཻ༔ དད་པ་དང་ནི་དམ་ཚིག་གིས༔ ཨེ་ཀ་ཙ་ཏི་འཁོར་དང་བཅས༔ མ་ཐོགས་གནས་འདིར་གཤེགས་སུ་གསོལ༔ དམ་ཚིག་ཆེན་པོའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་ལོ༔ བདག་གི་སྲུང་མར་མངའ་གསོལ་ལོ༔ ཕྱི་ནང་གསང་བའི་མཆོད་པ་འབུལ༔ ཐུགས་དམ་བསྐང་ངོ་ཉམས་ཆག་བཤགས༔ གདུང་དབྱངས་རོལ་མོའི་སྒྲ་ཡིས་བསྟོད༔ ཕྲིན་ལས་རབ་འབྱམས་ལྷུན་གྲུབ་མཛོད༔ མ་གཡེལ་མ་འགྱངས་ས་མ་ཡ༔ མངྒ་ལཾ།། །།