TTDL-ZABTER-10-THA-010

Previous Text Back to Volume PageNext Text

Wylie title	ma hA a ti yo ga'i zab chos dgongs pa klong rdol las: o rgyan pad+ma bdud 'dul gyi gsol 'debs dgongs pa'i gnad bskul:
Location	bdud 'joms gling pa'i zab gter Volume 10, Text 10, Pages 121-122 (Folios 1a1 to 1b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Ma hA a ti yo ga'i zab chos dgongs pa klong rdol las o rgyan pad+ma bdud 'dul gyi gsol 'debs dgongs pa'i gnad bskul. In Sprul pa'i gter chen bdud 'joms gling pa'i zab gter gsang ba'i chos sde, Vol. 10: 121-122. Thimphu, Bhutan: Lama Kuenzang Wangdue, 2004.
Side notes	Recto: gnad bskul   Verso: bdud 'joms khros ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Invocations - bskul ba  ·  Supplications - gsol 'debs
Cycle	བདུད་འཇོམས་ཁྲོས་མ་ (bdud 'joms khros ma)
Parent Cycle	མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ (ma ha a ti yo ga'i zab chos dgongs pa klong rdol)
Deity	khros ma nag mo
Colophon	ཞེས་པའང་ཡེ་ཤེས་སྒྱུ་མའི་རྣལ་འབྱོར་པ་བདུད་འཇོམས་རྡོ་རྗེས་རྩལ་སྣང་ཡི་གེའི་རིས་སུ་བྲིས་པ་བྱིན་རླབས་རྣོ་ནུས་ཤིན་ཏུ་ཆེ་བའི་རྟེན་འབྲེལ་ཡོད། དགེའོ།།
	zhes pa'ang ye shes sgyu ma'i rnal 'byor pa bdud 'joms rdo rjes rtsal snang yi ge'i ris su bris pa byin rlabs rno nus shin tu che ba'i rten 'brel yod/_dge'o//

Tibetan Text

[edit]

སྱྃ༔ མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ལས༔ ཨོ་རྒྱན་པདྨ་བདུད་འདུལ་གྱི་གསོལ་འདེབས་དགོངས་པའི་གནད་བསྐུལ་བཞུགས་སོ༔ ན་མོ་གུ་རུ་པདྨ་སིདྡྷི་ཧཱུྃ་ཧྲཱིཿ ངེས་འབྱུང་དད་པས་དགོངས་པའི་གནད་བསྐུལ་ལ༔ ཨེ་མ་ཧོཿ རྒྱལ་ཀུན་དགོངས་པ་ལྷུན་རྫོགས་གར་གྱི་དབང་༔ དཔའ་བོ་མཁའ་འགྲོ་ཡོངས་འདུས་ཚོགས་ཀྱི་མཆོག༔ འགྲོ་བའི་སྐྱབས་མགོན་ཨོ་རྒྱན་རིན་པོ་ཆེ༔ སངས་རྒྱས་ཀུན་ལས་ཐུགས་རྗེ་མྱུར་བའི་མཆོག༔ དུས་གསུམ་རྒྱལ་བའི་མཁྱེན་བརྩེ་ནུས་པའི་དཔལ༔ ཁྱབ་བདག་སྐུ་བཞིའི་སྤྱི་དཔལ་ཁྱོད་དྲན་ནས༔ མོས་གུས་གདུང་བའི་ང་རོས་གསོལ་བ་འདེབས༔ དུས་ཀྱི་མར་གཤམ་སྙིགས་མའི་སེམས་ཅན་ལ༔ ཐུགས་རྗེ་རྒྱུན་ཆད་མེད་པར་སྤྱན་གྱིས་གཟིགས༔ སྔོན་གྱི་ཞལ་བཞེས་དམ་བཅའ་འདི་མིན་ནམ༔ གསོལ་བ་སྙིང་ནས་འདེབས་པའི་གང་ཟག་ལ༔ བྱིན་གྱིས་བརླབས་ཤིང་རྗེས་སུ་འཛིན་པ་དང་༔ དད་ལྡན་མི་ལ་སྐད་ཅིག་འབྲལ་བ་མེད༔ ཅེས་གསུངས་རྡོ་རྗེའི་ཚིག་ལ་མི་དགོངས་སམ༔ དུས་ངན་ལྔ་བརྒྱའི་སྐྱེ་བོ་བདག་འདྲ་ལ༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ ལོ་ཉེས་སད་སེར་མུ་གེ་འཁྲུགས་རྩོད་དང་༔ མ་མོའི་དལ་ཡམས་དུས་ཀྱི་ཕུང་སྲིའི་རིགས༔ མི་ཕྱུགས་ཀུན་ལ་མི་འདོད་ཉེས་པའི་ཚོགས༔ རྒྱ་འདྲེ་འགོང་པོ་སྨོན་ལོག་བསྟན་བཤིག་དང་༔ བོད་ཁམས་ཕུང་བྱེད་དམ་སྲི་སྤུན་དགུའི་སྡེ༔ ཤི་འདྲེ་གྲོང་འདྲེས་གསོན་ལ་འཚེ་བ་དང་༔ བསླུ་བྲིད་བར་ཆད་བདུད་ཀྱི་གཡུལ་འགྱེད་སོགས༔ ཐམས་ཅད་བཟློག་ཅིང་བཏུལ་བའི་དུས་ལ་བབ༔ བསྐུལ་ལོ་བསྐུལ་ལོ་ཨོ་རྒྱན་རིན་པོ་ཆེ༔ དབྱིངས་ནས་བཞེངས་ཤིག་རྡོ་རྗེ་ཐོད་ཕྲེང་རྩལ༔ དགྲ་བགེགས་ཀུན་སྒྲོལ་ཡང་ཁྲོས་གྲོ་བོ་ལོད༔ མི་བཟོད་སྡུག་བསྔལ་ཉེས་ཚོགས་གཡོ་འཁྲུགས་ཀུན༔ མཐུ་རྩལ་ནུས་སྟོབས་དྲག་པོས་བཟློག་བསྒྱུར་མཛོད༔ བསྟན་འགྲོའི་དགེ་ལེགས་ཡར་ངོའི་ཟླ་ལྟར་སྤེལ༔ གཏན་གྱི་མགོན་པོ་ཁྱེད་ལ་གསོལ་བ་འདེབས༔ བསམ་པའི་དོན་ཀུན་འབད་མེད་ལྷུན་གྲུབ་མཛོད༔ བདག་སོགས་འདི་ནས་ཚེ་རབས་ཐམས་ཅད་དུ༔ ལས་རྐྱེན་ངན་པའི་དབང་དུ་མི་འགྲོ་ཞིང་༔ ཨོ་རྒྱན་ཆེན་པོའི་དགོངས་ཀློང་ཆེན་གྲོལ་ནས༔ ཁམས་གསུམ་འཁོར་བ་དོང་སྤྲུགས་མཐུ་ཐོབ་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ས་མ་ཡ༔ རྒྱ་རྒྱ་རྒྱ༔ ཞེས་པའང་ཡེ་ཤེས་སྒྱུ་མའི་རྣལ་འབྱོར་པ་བདུད་འཇོམས་རྡོ་རྗེས་རྩལ་སྣང་ཡི་གེའི་རིས་སུ་བྲིས་པ་བྱིན་རླབས་རྣོ་ནུས་ཤིན་ཏུ་ཆེ་བའི་རྟེན་འབྲེལ་ཡོད། དགེའོ།། །།