TTDL-ZABTER-16-MA-030

Previous Text Back to Volume PageNext Text

Wylie title	rang bzhin rdzogs pa chen po'i rang zhal mngon du byed pa'i gdams pa ma bsgom sangs rgyas
Location	bdud 'joms gling pa'i zab gter Volume 16, Text 30, Pages 291-358 (Folios 1a1 to 34b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Rang bzhin rdzogs pa chen po'i rang zhal mngon du byed pa'i gdams pa ma bsgom sangs rgyas. In Sprul pa'i gter chen bdud 'joms gling pa'i zab gter gsang ba'i chos sde, Vol. 16: 291-358. Thimphu, Bhutan: Lama Kuenzang Wangdue, 2004.
Side notes	Recto: rtsa ba   Verso: bdud 'joms rdzogs chen snang sbyang
More details More details
Genre	Contemplative Guide Books and Instructional Manuals - khrid yig  ·  Dzogchen - rdzogs pa chen po
Colophon	Author colophon: །ཞེས་པ་འདི་ཡང་སྐྱེ་བ་དུ་མར་ལས་དང་སྨོན་ལམ་གྱིས་འབྲེལ་བའི་སྤྲུལ་སྐུ་པདྨ་ལུང་རྟོགས་རྒྱ་མཚོ་དང་མཁྱེན་རབ་རྒྱ་མཚོ་གཉིས་ཀྱིས་ནན་དུ་བསྐུལ་ངོར། ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་སྒྱུ་འཕྲུལ་རོལ་པའི་ཀློང་མཛོད་ལས་གཏན་ལ་ཕབ་པ། ཆོས་ཀྱི་བདག་པོ་སྐྱེས་མཆོག་དྲུག་ཅུ་རྩ་བརྒྱད་དུ་མཁའ་འགྲོས་ལུང་བསྟན་ནས་རྟེན་འབྲེལ་གྱི་དུས་ཚིགས་ཐོག་མ་ཡིན་ཅེས་ཨོ་རྒྱན་ཆེན་པོའི་བཀས་གནང་བ་ཕེབས་པའོ། Editor colophon:།རང་གི་རིགས་སྲས་དམ་པ་མཁས་མཆོག་བསོད་ནམས་བསྟན་འཛིན་རྡོ་གྲུབ་རིན་པོ་ཆེ་གྱིས་ཞུས་དག་ནན་དུ་བགྱིས་པའོ། Editor colophon:།དེ་ལྟར་ཀ་དག་རྫོགས་པ་ཆེན་པོ་ཁྲེགས་ཆོད་ཀྱི་གནས་ལུགས་ཆེན་པོར་སྟོན་པའི་ཁྲིད་རིམ་སྣང་སྦྱང་དུ་གྲགས་པ་འདི་ལ། སྔོན་ཆད་རྗེ་རང་ཉིད་ཀྱི་སྐུའི་སྲས་ཀྱི་ཐུ་བོ་རྡོ་གྲུབ་རིན་པོ་ཆེ་ནས་ཞུས་དག་ཅུང་ཟད་གནང་བར་སྔོན་ཡང་ད་དུང་མ་ཕྱི་ནོར་བ་རྒྱུན་འབྱམས་སོང་བས་ཡིག་སྐྱོན་ཤིན་ཏུ་མང་བར་བརྟེན། དཔལ་མིའི་དབང་པོ་ཐའི་ཇི་ཚེ་དབང་རིག་འཛིན་རྣམ་པར་རྒྱལ་བའི་ཐུགས་བསྐྱེད་ཕྲིན་ལས་ཀྱི་ཆ་ལས་ཆོས་སྐུའི་རིང་བསྲེལ་ཆོས་སྦྱིན་མི་འཛད་པའི་གཏེར་དུ་བསྒྲུབས་པར་མཛད་དེ་ཡབ་གཞིས་བསམ་འགྲུབ་ཕོ་བྲང་གི་གནྡྷོ་ལར་བཞུགས་སུ་གསོལ་བའི་སྐབས་སྤར་གྱི་ཕྱི་མོར་ལེགས་པར་དཔྱད་པའི་སྒོ་ནས་ཞུས་ཏེ་གཙང་དག་ཏུ་གཏན་ལ་འབེབས་པ་པོ་ནི་ཁྲག་འཐུང་རིག་འཛིན་ཆེན་པོའི་སྐྱེ་བའི་སྒྱུ་གར་དུ་རློམ་པ་འཇིགས་བྲལ་ཡེ་ཤེས་རྡོ་རྗེ་སྟེ། འདིས་ཀྱང་འོད་གསལ་རྫོགས་པ་ཆེན་པོའི་བསྟན་པ་ལ་བྱ་བ་རླབས་པོ་ཆེར་སྤྱོད་པས་སྐལ་ལྡན་གྱི་གདུལ་བྱ་དཔག་ཏུ་མེད་པ་ནང་དབྱིངས་གདོད་མའི་གཞི་ཐོག་ཏུ་མངོན་པར་གྲོལ་བའི་གྱུར་གྱུར་ཅིག། ཤུ་བྷཾ།།
	Author colophon: /zhes pa 'di yang skye ba du mar las dang smon lam gyis 'brel ba'i sprul sku pad+ma lung rtogs rgya mtsho dang mkhyen rab rgya mtsho gnyis kyis nan du bskul ngor/__khrag 'thung bdud 'joms rdo rje khro lod rtsal gyis sgyu 'phrul rol pa'i klong mdzod las gtan la phab pa/__chos kyi bdag po skyes mchog drug cu rtsa brgyad du mkha' 'gros lung bstan nas rten 'brel gyi dus tshigs thog ma yin ces o rgyan chen po'i bkas gnang ba phebs pa'o/ Editor colophon:/rang gi rigs sras dam pa mkhas mchog bsod nams bstan 'dzin rdo grub rin po che gyis zhus dag nan du bgyis pa'o/ Editor colophon:/de ltar ka dag rdzogs pa chen po khregs chod kyi gnas lugs chen por ston pa'i khrid rim snang sbyang du grags pa 'di la/__sngon chad rje rang nyid kyi sku'i sras kyi thu bo rdo grub rin po che nas zhus dag cung zad gnang bar sngon yang da dung ma phyi nor ba rgyun 'byams song bas yig skyon shin tu mang bar brten/__dpal mi'i dbang po tha'i ji tshe dbang rig 'dzin rnam par rgyal ba'i thugs bskyed phrin las kyi cha las chos sku'i ring bsrel chos sbyin mi 'dzad pa'i gter du bsgrubs par mdzad de yab gzhis bsam 'grub pho brang gi gan+d+ho lar bzhugs su gsol ba'i skabs spar gyi phyi mor legs par dpyad pa'i sgo nas zhus te gtsang dag tu gtan la 'bebs pa po ni khrag 'thung rig 'dzin chen po'i skye ba'i sgyu gar du rlom pa 'jigs bral ye shes rdo rje ste/__'dis kyang 'od gsal rdzogs pa chen po'i bstan pa la bya ba rlabs po cher spyod pas skal ldan gyi gdul bya dpag tu med pa nang dbyings gdod ma'i gzhi thog tu mngon par grol ba'i gyur gyur cig/___shu b+haM//

Tibetan Text

[edit]

༄༅། །རང་བཞིན་རྫོགས་པ་ཆེན་པོའི་རང་ཞལ་མངོན་དུ་བྱེད་པའི་གདམས་པ་མ་བསྒོམ་སངས་རྒྱས་བཞུགས་སོ།།

༄༅། །ཁྱབ་བདག་གདོད་མའི་མགོན་པོ་ཡེ་ཤེས་སྒྱུ་འཕྲུལ་རོལ་པའི་གྲོང་ཁྱེར་མཆོག་ལ་མི་ཕྱེད་དད་པའི་སྒོ་ནས་ཕྱག་འཚལ་ལོ། །དུས་དེང་སང་སྙིགས་མ་ལྔ་བདོ་བའི་སྐབས་འདིར་སེམས་ཅན་དམུ་རྒོད་ལས་ངན་དབང་ཆེ་བའི་སྟོབས་ཀྱིས་མི་ཚེ་རྨི་ལམ་གྱི་གནས་སྐབས་ཙམ་འདི་ལ་ཞེན་ཅིང་བློ་ཐག་རིང་པོས་གཏན་དུ་སྡོད་གྲབ་བྱེད་ཅིང་ཕྱི་མའི་དོན་གཉེར་རྒྱབ་ཏུ་བོར་བ་ཤ་སྟག་ལས་མེད་དེ། དེའི་ཕྱིར་ཐར་པ་དང་རྣམ་མཁྱེན་གྱི་གོ་འཕང་དོན་དུ་གཉེར་བ་ནི་ཉིན་མོའི་སྐར་མ་ཙམ་ལས་མ་མཐོང་། གལ་ཏེ་འཆི་བ་དྲན་ནས་ཆོས་ཉམས་སུ་ལེན་པར་སྤྲོ་ཡང་ལུས་ངག་གི་དགེ་སྦྱོར་ཙམ་ལ་མི་ཚེ་ཟད་ནས་མཐོ་རིས་ལྷ་མིའི་གོ་འཕང་དོན་དུ་གཉེར་བ་དང་༔ ཡང་འགའ་ཞིག་གིས་ལྟ་བ་སྟོང་ཉིད་ཀྱི་ཕྱོགས་ཙམ་མི་ཤེས་པར་རང་སེམས་སྟོང་པ་རུ་ཐག་བཅད་ནས་རྣམ་པར་རྟོག་པའམ་ཤེས་པ་བཟོ་མེད་ཙམ་ངོ་སྤྲད་དེ་དེའི་ངང་དུ་བྱར་མེད་དུ་སྡོད་པས་འདོད་གཟུགས་ཀྱི་ལྷ་རུ་འཕེན་པ་ཙམ་ལས་རྣམ་མཁྱེན་གྱི་ལམ་ལ་སྤུ་རྩེ་ཙམ་ཡང་ཉེ་བ་མ་ཡིན་ནོ། །དེའི་ཕྱིར་ན་བསྐལ་པ་དཔག་ཏུ་མེད་པའི་གོང་རོལ་ནས་ཚོགས་རྒྱ་ཆེན་པོ་བསགས། སྨོན་ལམ་བཟང་པོས་མཚམས་སྦྱར་དོན་དམ་པའི་ཆོས་ལ་ལས་འབྲེལ་བཞག་པའི་སྐྱེས་བུ་རེ་ཙམ་མཆིས་ན་དེའི་དབང་སྐལ་དུ་ངས་བསྟན་པ་ཡིན། ང་དང་ལས་འབྲེལ་མེད་ཅིང་རྫོགས་པ་ཆེན་པོའི་ཆོས་ལ་དབང་བྱེད་པའི་སྐལ་བ་མེད་པ་དག་གིས་བསྟན་པ་འདི་ལ་སྒྲོ་སྐུར་བྱེད་པ་ལས་བློ་འབྲོག་དགོན་པ་རུ་འབྲོས་པར་འགྱུར་བ་ཡིན། དེ་ལྟར་མ་ཡིན་པའི་བདག་དང་སྐལ་བ་མཉམ་པའི་སྐྱེས་བུ་རྣམས་ཀྱིས་གདམས་པ་འདིར་ལྟོས་ལ་བརྟག་དཔྱད་གོམས་འདྲིས་ཀྱི་སྒོ་ནས་འཁོར་འདས་སྟོང་ཉིད་ཆེན་པོར་ངོ་ཤེས་ཏེ་ངང་རྟོགས་པར་མཛོད་ཅིག། འདིར་རང་བཞིན་རྫོགས་པ་ཆེན་པོ་ལ་སེམས་ཀློང་མན་ངག་གི་སྡེ་གསུམ་དུ་ཡོད་པ་ལས། འདི་ནི་གསང་བ་མན་ངག་གི་སྡེ་ཞེས་བྱ་བ་ཡིན། འདི་ལ་ལྟ་བ་དང་། བསྒོམ་པ་དང་། སྤྱོད་པ་གསུམ་དུ་ཡོད་པ་ལས། དང་པོ་ལྟ་བ་གཏན་ལ་དབབ་པ་ལ། མེད་པ་དང་། གཅིག་པུ་དང་། ཕྱལ་བ་དང་། ལྷུན་གྲུབ་རྣམ་པ་བཞིའི་སྒོ་ནས་གཏན་ལ་ཕབ་སྟེ་ཇི་ལྟ་བ་བཞིན་ཏུ་རྟོགས་པར་བྱ་བ་ནི་གནད་དམ་པ་ཡིན་ནོ། །དེ་ལ་དང་པོ་མེད་པའི་ཚུལ་གཏད་ལ་དབབ་པ་ལ། གང་ཟག་གི་བདག་གཏན་ལ་དབབ་པ་དང་། ཆོས་ཀྱི་བདག་གཏན་ལ་དབབ་པ་གཉིས་ཡོད་པ་ལས། དང་པོ་གང་ཟག་གི་བདག་ཅེས་བྱ་བ་ནི། ཉིན་སྣང་དང་། རྨི་སྣང་དང་། བར་སྲིད་དང་། ཕྱི་མའི་དུས་རྣམས་སུ་བདག་ཡོད་པར་སྣང་ཙམ་ཉིད་ལ་གང་ཟག་གི་བདག་ཅེས་བྱའོ། །དེ་མ་ཐག་ཏུ་ང་རུ་བཟུང་བའི་ཤེས་པ་བག་ལ་ཉལ་བ་ལ་ཤེས་པ་ཕྱི་མའམ་རྣམ་པར་རྟོག་པ་ཞེས་བྱ་སྟེ། དེས་གསལ་བཏབ་ནས་བརྟན་ཅིང་འཐས་པར་བྱས་པ་ཡིན། དེའི་ཕྱིར་ང་ཞེས་བྱ་བ་དང་པོ་བྱུང་བའི་ཁུངས་ལ་བརྟག་ནས་བྱུང་ཁུངས་མེད་པའི་ས་ལ་གཏུག་གོ། བར་དུ་གནས་པའི་ས་བཙལ་བ་ལ། ང་ཞེས་བྱ་བ་དེ་གནས་ས་དང་གནས་མཁན་སོ་སོར་ངོས་བཟུང་མཚན་མ་ཅན་དུ་ཡོད་དམ་མེད་འདི་ལྟར་བརྟག་པར་བྱའོ། །མགོ་ལ་ནི་མགོ་ཞེས་བྱ་སྟེ་ང་མ་ཡིན། དེ་བཞིན་མགོ་ལྤགས་ལའང་ལྤགས་པ་ཞེས་བྱ་སྟེ་ང་མ་ཡིན། རུས་པ་ལ་རུས་པ་བརྗོད་པ་ལས་ང་མ་ཡིན། དེ་བཞིན་དུ་མིག་ནི་མིག་ལས་ང་མ་ཡིན། རྣ་བ་ནི་རྣ་བ་ལས་ང་མ་ཡིན། སྣ་ནི་སྣ་ལས་ང་མ་ཡིན། ལྕེ་ནི་ལྕེ་ལས་ང་མ་ཡིན། སོ་ནི་སོ་ལས་ང་མ་ཡིན། ཀླད་པ་ཡང་ང་མ་ཡིན། ཤ་ཁྲག་ཆུ་སེར་རྩ་རྒྱུས་རྣམས་ལའང་རང་རང་གི་མིང་ལས་ང་མ་ཐོགས་པ་དེས་ཤེས། ཡང་ལག་པ་ནི་ལག་པ་ལས་ང་མ་ཡིན། སོག་པ་ནི་དེ་བཞིན་ང་མ་ཡིན། དཔུང་པ་ནི་མ་ཡིན། ལག་ངར་ནི་མ་ཡིན། སོར་མཛུབ་རྣམས་ཀྱང་མ་ཡིན། ཡང་རྒལ་ཚིགས་ནི་རྒལ་ཚིགས་ལས་ང་མ་ཡིན། རྩིབ་མ་ནི་ང་མ་ཡིན། བྲང་ནི་ང་མ་ཡིན། གློ་བ་ནི་ང་མ་ཡིན། སྙིང་ནི་ང་མ་ཡིན། མཆིན་ཁྲི་ནི་ང་མ་ཡིན། མཆིན་པ་དང་མཚེར་པ་ནི་ང་མ་ཡིན། རྒྱུ་མ་དང་མཁལ་མ་ནི་ང་མ་ཡིན། དྲི་ཆུ་དང་གཤང་ལྕི་ནི་ང་མ་ཡིན། ཡང་རྐང་པ་ལའང་ང་ཡི་མིང་མི་གདག་སྟེ། །བརླ་ལ་བརླ་ཞེས་གདག་པ་ལས་ང་མི་གདག། དཔྱི་ཡང་དེ་བཞིན་དུ་ང་མ་ཡིན། རྗེ་ངར་ཡང་ང་མ་ཡིན། བོལ་བ་ཡང་ང་མ་ཡིན། སོར་མཛུབ་ཀྱང་ང་མ་ཡིན། མདོར་ན་ཕྱིའི་ལྤགས་པ་ལ་ང་མི་གདག། བར་གྱི་ཤ་ཚིལ་ལ་ཤ་ཚིལ་ཟེར་བ་ལས་ང་མི་གདག། ནང་གི་རུས་པ་ལ་རུས་པ་ཟེར་བ་ལས་ང་མི་གདག། གསང་བ་རྐང་ལའང་རྐང་ཟེར་བ་ལས་ང་མི་གདག། རྣམ་པར་ཤེས་པ་ལའང་དེ་ལས་ང་མི་གདག། དེའི་ཕྱིར་བར་དུ་གནས་པའི་ས་དང་བདག་པོ་མེད་པའི་སྟོང་པ་ཉིད་དུ་ངེས་པའོ། །དེ་བཞིན་དུ་ཐ་མ་འགྲོ་བའི་ཡུལ་དང་བདག་པོ་ཐམས་ཅད་ལས་འདས་པ་ཉིད་དུ་ཐག་ཆོད་པར་བྱའོ། །དོན་ལ་མེད་བཞིན་ཡོད་པར་སྣང་བ་ནི་རབ་རིབ་ལྟ་བུའོ། །མིང་བརྗོད་པ་དེ་དག་ཀྱང་རི་བོང་གི་རྭ་བརྗོད་པ་ལྟ་བུའོ། །གཉིས་པ་ཆོས་ཀྱི་བདག་མེད་གཏན་ལ་དབབ་པར་བྱ་བ་ལ་མིང་གི་གདག་གཞི་བཙལ་བ། དངོས་པོའི་རྟག་འཛིན་བཤིག་པ། ཕན་གནོད་ཀྱི་མཚང་ལ་རྒོལ་བ། རེ་དོགས་ཀྱི་རྫུན་ཕུག་བརྡིབ་པའོ། །དང་པོ་ནི། མིང་ཐམས་ཅད་བཏགས་དོན་བཙལ་ན་མེད་བཞིན་དུ་རྟོག་པའི་རང་མདངས་ཙམ་ལ་བཏགས་པར་ཟད་དེ། ཆོས་གང་ཡང་གདག་གཞིའི་སྟེང་ན་ཚུགས་ཐུབ་ཏུ་གྲུབ་པར་མི་སྲིད་པའི་ཕྱིར་རོ། །དེ་ཡང་མགོ་ཞེས་བྱ་བ་ཅིའི་ཕྱིར་ཅི་ལ་བཏགས༔ ལུས་ཆགས་པའི་དང་པོ་ཡིན་པས་སམ༔ ཟླུམ་པོ་ཡིན་པས་སམ། སྟེང་དུ་བསྟན་པ་ལ་བཏགས། ལུས་ཆགས་པའི་དང་པོར་ནི་མགོ་མ་སྐྱེས། ཟླུམ་པོ་ཐམས་ཅད་ལ་ནི་མགོ་མི་ཐོགས། སྟེང་འོག་ཀྱང་བརྟག་ན་ནམ་མཁའ་ལ་སྟེང་འོག་མེད། དེ་བཞིན་དུ་སྐྲ་ནི་མགོ་མ་ཡིན། ལྤགས་པ་ལ་ལྤགས་པ་ལས་མགོ་མི་ཐོགས། རུས་པ་ལ་རུས་པ་ཟེར་བ་ལས་མགོ་མི་ཐོགས། ཀླད་པ་ནི་མགོ་མ་ཡིན་མིག་དང་རྣ་བ་ནི་མགོ་མ་ཡིན། སྣ་དང་ལྕེ་ནི་མགོ་མ་ཡིན། དེ་ལྟར་སོ་སོར་ཕྲལ་ན་མ་ཡིན་ཀྱང་ལྷན་དུ་ཚོགས་པ་ལ་མགོ་ཟེར་བ་ཡིན་སྙམ་ན་སྲོག་ཆགས་ཞིག་གི་མགོ་བཅད་དེ་རྡུལ་དང་རྡུལ་ཕྲན་ཆ་མེད་དུ་བཏགས་ནས་འཛམ་བུ་གླིང་གི་མི་ལ་བསྟན་ཀྱང་མགོ་ཞེས་མི་སྨྲ། ཆུས་སྦྲུས་ཀྱང་མགོ་མི་ཐོགས་པས་མགོ་ཞེས་བྱ་བ་བརྗོད་པ་ཙམ་ལས་བརྗོད་གཞི་ཡུལ་མེད་དུ་འདུག་པའི་ངང་ཚུལ་ཤེས་པར་བྱའོ། །དེ་བཞིན་དུ་མིག་ལ་ཡང་ཆུ་བུར་ཟུང་དུ་ཡོད་པ་ལ་མིག་མི་ཐོགས། ལྤགས་པ་ནི་མིག་མ་ཡིན། ཆུ་དང་རྩ་ཁྲག་རྣམས་ཀྱང་དེ་བཞིན་དུ་མིག་མ་ཡིན། དེ་དག་སོ་སོར་ཕྱེས་ཀྱང་མ་ཡིན། ལྷན་ཅིག་ཚོགས་པའི་རྡུལ་ཀྱང་མ་ཡིན། ཆུས་སྦྲུས་པའི་འདག་པ་ཡང་མ་ཡིན། གཟུགས་མཐོང་མཁན་ཀྱང་ཤེས་པ་ཡིན་པ་ལས་ཆུ་བུར་མ་ཡིན་པ་རྨི་ལམ་དང་བར་དོའི་སྐབས་སུ་མཐོང་བྱེད་ཡོད་པ་དེས་སྟོན་ཏོ། །རྣ་བ་ཡང་དེ་བཞིན་དུ་སྦུ་གུ་ནི་རྣ་བ་མ་ཡིན། ལྤགས་པ་ནི་རྣ་བ་མ་ཡིན། ཤ་དང་རྩ་རྒྱུས་ཁྲག་དང་ཆུ་སེར་རྣམས་ནི་རང་རང་གི་མིང་ལས་རྣ་བ་མ་ཡིན། དེ་རྡུལ་དུ་ཕབ་པའི་ཕྱེ་མ་ཡང་རྣ་བ་མ་ཡིན། ལྷན་ཅིག་སྦྲུས་པའི་འདག་པ་ཡང་རྣ་བ་མ་ཡིན། སྒྲ་ཐོས་མཁན་ལ་རྣ་བ་ཞེས་བཏགས་པར་སེམས་ན། རྨི་སྣང་ཉིན་སྣང་བར་དོའི་སྐབས་ཀྱི་སྒྲ་ཐོས་མཁན་ལ་ལྟོས། སེམས་ཡེ་གནས་ཀྱི་ཤེས་པ་ཉིད་ཡིན་ཏེ་རྣ་བ་མ་ཡིན། དེ་བཞིན་དུ་སྣ་ཡང་སྦུ་གུ་དང་ལྤགས་པ་དང་རུས་པ་ཤ་དང་རྩ་རྒྱུས་ཐམས་ཅད་རང་རང་གི་མིང་ལས་སྣ་ཞེས་མི་གདགས། དྲི་ཚོར་མཁན་ཡང་ཤེས་པ་ཉིད་ཡིན་པར་རྨི་ལམ་དང་བར་དོའི་སྐབས་སུ་དྲི་ཚོར་མཁན་ལ་བརྟག་པར་བྱའོ། །ལྕེ་ཡང་དེ་བཞིན་དུ་སོ་སོར་ཕྱེས་ན་ཤ་ལྤགས་ཁྲག་དང་རྩ་རྒྱུས་ཐམས་ཅད་ལ་རང་རང་གི་མིང་ལས་ལྕེ་ཞེས་མི་བྱ། དེ་དག་རྡུལ་དུ་ཕབ་པའི་རྡུལ་ལའང་ལྕེ་ཞེས་མི་བྱ། ཆུས་སྦྲུས་པའི་འདག་པ་ལའང་ལྕེ་མི་གདག་པ་བཞིན་འོག་མ་ཀུན་ལ་འགྲེ་བར་བྱའོ། །དེ་བཞིན་དུ་ལག་པའང་སོག་པ་ནི་ལག་པ་མ་ཡིན། དཔུང་པ་ནི་མ་ཡིན། ལག་ངར་ནི་མ་ཡིན། སོར་ཚིགས་རྣམས་ཀྱང་མ་ཡིན། ཤ་ལྤགས་རུས་པ་རྐང་ཡང་མ་ཡིན། སོག་པ་ཡང་དེ་བཞིན་དུ་ལྤགས་པ་ནི་སོག་པ་མ་ཡིན། ཤ་དང་རུས་པ་རྣམས་ཀྱང་མ་ཡིན། ལྷན་ཅིག་འཚོགས་པའི་རྡུལ་ཡང་མ་ཡིན། ཆུས་སྦྲུས་པའི་འདག་པ་ཡང་མ་ཡིན་ཏེ། སོག་པའི་མིང་གི་གདག་གཞི་ཡུལ་མེད་དུ་སྟོང་པའོ། །དེ་བཞིན་དུ་དཔུང་པ་དང་ལག་ངར་ལ་བརྟག་པས་ཤ་ལ་ཤ། རུས་པ་ལ་རུས་པ། ལྤགས་པ་ལ་ལྤགས་པ། རྐང་ལ་རྐང་ཞེས་རང་རང་གི་མིང་ལས་གདག་གཞི་རྡུལ་ཕྲན་ཙམ་ཡང་མ་གྲུབ། ལུས་དང་ཕུང་པོ་ཞེས་བརྗོད་པའི་གཞི་རྩ་ལ་བརྟག་པས་རྒལ་ཚིགས་དང་རྩིབ་མ་ལ་ལུས་མི་བྱ། བྲང་དང་ཤ་ལྤགས་རུས་པ་ལ་ལུས་མི་བྱ། སྙིང་དང་གློ་བ་མཆིན་ཁྲི་མཚེར་པ་མཁལ་མ་རྒྱུ་མ་རྣམས་ལ་རང་རང་གི་མིང་སོ་སོར་བརྗོད་པ་ལས་ལུས་དང་ཕུང་པོའི་གདག་གཞི་ཡུལ་མེད་དུ་སྟོང་པས་སྟོང་པ་ཉིད་དོ། །རྐང་པ་ལའང་དེ་བཞིན་དུ་བརྟག་པས་དཔྱི་ནི་རྐང་པ་མ་ཡིན། བརླ་ནི་མ་ཡིན། རྗེ་ངར་ནི་མ་ཡིན། བོལ་བ་ཡང་མ་ཡིན། དེ་བཞིན་དུ་དཔྱི་ནི་ཤ་ལ་མི་བྱ་ལྤགས་པ་དང་རུས་པ་རྩ་རྒྱུས་རྣམས་ལ་མི་བྱའོ། །བརླ་ཡང་ལྤགས་པ་དང་ཤ་རུས་རྩ་རྒྱུས་ཐམས་ཅད་ལ་མི་བྱ། རྗེ་ངར་ཡང་དེ་བཞིན་ཏེ། དེ་དག་ཐམས་ཅད་རྡུལ་དུ་ཕབ་པའི་ཕྱེ་མ་ལ་མིང་དེ་དག་མ་གྲུབ། ཆུས་སྦྲུས་པའི་འདག་པ་ལའང་མིང་དེ་དག་མི་བྱའོ། །ཕྱིའི་རི་བོ་ཞེས་བྱ་བའི་གདག་གཞི་བཙལ་ན། ས་ནི་རི་བོ་མ་ཡིན། དེ་བཞིན་རྩྭ་དང་ཤིང་ནི་མ་ཡིན། རྡོ་ནི་མ་ཡིན། བྲག་དང་ཆུ་ནི་མ་ཡིན། ཁང་ཁྱིམ་གྱི་མིང་གི་གདག་གཞི་བཙལ་ན། ས་ནི་ཁང་པ་མ་ཡིན་པ་བཞིན་དུ་རྡོ་ནི་མ་ཡིན། ཤིང་ནི་མ་ཡིན། རྩིག་པ་ལའང་རྩིག་པ་ཞེས་བྱ་བ་ལས་ཁང་པ་མི་གདག་པ་དེ་བཞིན་དུ་ཕྱི་དང་ནང་གང་དུ་ཡང་མ་གྲུབ་པ་ཡིན། མི་རྟ་ཁྱི་ལ་སོགས་པའི་མིང་གི་གདག་གཞི་བཙལ་བས་ཀྱང་། མིག་དང་རྣ་བ་སྣ་དང་ལྕེ་དང་ཤ་ཁྲག་རུས་པ་རྐང་དང་རྩ་རྒྱུས་རྣམ་པར་ཤེས་པ་དང་བཅས་པ་ལ་རང་རང་གི་མིང་ལས་མི་རྟ་ཁྱི་དང་བཅས་པའི་གདག་གཞི་ཡུལ་མེད་པ་ལྟར་ཐམས་ཅད་དེས་སྟོན་ཏོ། །དཔེར་ན་རྫས་རྣམས་ལས་རྔ་ཞེས་བྱ་བ་ནི་ཤིང་ལ་མི་བྱ། ཀོ་བ་ལ་མི་བྱ། ཕྱི་དང་ནང་ལ་མི་བྱ་བ་དང་། གྲི་ཡང་ལྕགས་ལ་མི་བྱ། སོ་དང་ལྟག་པ་རྩེ་མོ་ཡུ་བ་ཀུན་ཏུ་གྲི་ཞེས་གདག་ཡུལ་མ་གྲུབ་པ་ཡིན་ནོ། །མིང་དོན་འགྱུར་བའང་དཔེར་ན། གྲིས་སྙུང་བུ་བྱས་ཚེ་མིང་འགྱུར་བ་དང་། ཁབ་བྱས་པའི་ཚེ་མིང་སྔ་མ་ཐམས་ཅད་ཡུལ་མེད་དུ་སོང་བ་བཞིན་ནོ། །གང་ཟག་གི་བདག་ཅེས་བྱ་བ་དང་མིང་གི་གདག་གཞི་བཙལ་བ་འདི་གཉིས་ཀ་བདག་གི་བླ་མ་འཕགས་མཆོག་ཐུགས་རྗེ་ཆེན་པོས་རྨི་ལམ་གྱི་སྐབས་སུ་གསུངས་པ་ལ་བརྟེན་ནས་ལེགས་པར་རྟོགས་པ་ཡིན་ནོ། །སླར་ཡང་ཨོ་རྒྱན་མཚོ་སྐྱེས་རྡོ་རྗེ་ཡེ་ཤེས་སྒྱུ་མའི་སྐུ་དང་མཇལ་ཚེ་གནང་བའི་སྣང་བ་སྒྱུ་མར་སྦྱོང་བའི་གདམས་པ་ནི། རྒྱུ་རྐྱེན་འཕྲད་པའི་རྟེན་འབྲེལ་དུ་ངོ་སྤྲོད་པ་ལ། དེ་ཡང་རྒྱུ་གཞི་དབྱིངས་དྭངས་གསལ་ཅི་ཡང་འཆར་རུང་གི་ནུས་པ་ཅན་དང་། རྐྱེན་ངར་འཛིན་གྱི་ཤེས་པ་གཉིས་འདུས་པ་ལ་བརྟེན་ནས་སྣང་བ་ཐམས་ཅད་སྒྱུ་མ་བཞིན་དུ་སྣང་བ་སྟེ། དེ་ལྟར་གཞི་དབྱིངས་དང་། དེའི་རྩལ་ལས་ཤར་བའི་སེམས་དང་། སེམས་དེའི་སྣང་ཆ་ཕྱི་ནང་གི་ཆོས་ཐམས་ཅད་ཉི་མ་དང་ཉི་མའི་ཟེར་བཞིན་ལུ་གུ་རྒྱུད་དུ་འབྲེལ་བས་ན་རྟེན་ཅིང་འབྲེལ་བར་འབྱུང་བ་ཞེས་བྱའོ། །དེའི་དཔེ་ནི་རྒྱུ་ནམ་མཁའ་དྭངས་གསལ་ལ་བརྟེན་ནས་རྐྱེན་སྒྱུ་མའི་རྫས་སྔགས་དང་ཡུལ་སེམས་དུས་འཛོམ་པ་ལས་རྟེན་འབྲེལ་སྒྱུ་མ་སྣང་བ་ལྟ་བུའོ། །འདི་ལྟར་སྣང་བའི་ཆོས་ཐམས་ཅད་མེད་བཞིན་དུ་ངར་འཛིན་གྱི་དབང་གིས་སྣང་བ་ནི་ནམ་མཁའ་དྭངས་གསལ་དང་དྲོད་ཤེར་དུས་འཛོམ་པ་ལས་སྨིག་རྒྱུ་སྣང་བ་ལྟ་བུའོ། །ཉིན་སྣང་དང་རྨི་སྣང་བར་སྲིད་ཕྱི་མའི་སྣང་བ་ཐམས་ཅད་མེད་བཞིན་དུ་སྣང་བ་ལ་བདེན་ཞེན་གྱི་དབང་གིས་འཁྲུལ་བ་ནི་དཔེར་ན་རྨི་ལམ་གྱི་དུས་སུ་འདི་རྨི་ལམ་མོ་སྙམ་དུ་རྫུན་པར་མི་སེམས་ཏེ་གཏན་གྱི་གནས་ཡུལ་དུ་བཟུང་ནས་ཞེན་པ་ལྟ་བུའོ། །ནང་ང་རུ་འཛིན་པའི་བདག་རྐྱེན་ལས་སྣ་ཚོགས་ཆོས་ཁམས་གཞན་དུ་སྣང་བ་བྱད་དང་མེ་ལོང་འཕྲད་པའི་རྟེན་འབྲེལ་ལས་གཟུགས་བརྙན་སྣང་བ་ལྟ་བུའོ། །བདག་འཛིན་གྱིས་ཀུན་ནས་དཀྲིས་པའི་དབང་གིས་གྲོང་ཁྱེར་དྲུག་གི་འཇིག་རྟེན་རེས་མོས་སུ་སྣང་བ་ནི་སེམས་འཛིན་གྱི་སྣང་ཉམས་ཞིག་ཏུ་ནུབ་ཁའི་ཐང་སོགས་ཡུལ་ལ་དྲི་ཟའི་གྲོང་ཁྱེར་སྣང་བ་ལྟ་བུའོ། །འདོད་ཡོན་གྱི་སྣང་བ་གདོད་ནས་མ་གྲུབ་པ་ལ་མཐོང་ཐོས་མྱོང་ཚོར་སྣ་ཚོགས་བདག་སྣང་གཞན་ལྟར་སྣང་བ་བྲག་ཅ་ལྟ་བུའོ། །སྣང་བ་ཐམས་ཅད་གཞི་ལས་མི་གཞན་པར་གཞི་ཉིད་དུ་རོ་གཅིག་པ་ནི་རྒྱ་མཚོའི་གཟའ་སྐར་ཐམས་ཅད་རྒྱ་མཚོ་ལས་མི་གཞན་པར་ཆུ་ཉིད་དུ་རོ་གཅིག་པ་ལྟ་བུའོ། །གཞི་དབྱིངས་ཁྱབ་བརྡལ་ནམ་མཁའི་ཁོར་ཡུག་ལ་ངར་འཛིན་གྱི་དབང་གིས་བདག་གཞན་བདེན་གྲུབ་དུ་སྣང་བ་ནི་ཆུ་ལས་ལྦུ་བ་བརྡོལ་བ་ལྟ་བུའོ། །གཞི་དབྱིངས་སྟོང་པ་དྭངས་གསལ་གྱི་ཆ་དེ་བདག་སྣང་ཡིད་ཤེས་སུ་གཅུན་ཏེ་བརྟན་པའི་སྟོབས་ཀྱིས་འཁྲུལ་སྣང་སྣ་ཚོགས་སྣང་བ་ནི་དཔེར་ན་རྩ་བཙིར་བའམ་རྩ་ཁམས་རླུང་གིས་བསྒྱུར་བ་ལས་མིག་ཡོར་སྣང་བ་ལྟ་བུའོ། །ངར་འཛིན་གྱི་ཤེས་པའི་ངོར་གཞི་ལས་སྣ་ཚོགས་སྣང་ཡང་གཞི་རང་ལས་མ་གཡོས་ཤིང་མ་བྱུང་བ་ནི་དཔེར་ན་སྤྲུལ་བསྒྱུར་གྱི་ཏིང་ངེ་འཛིན་ལ་དབང་བསྒྱུར་བའི་སྐྱེས་བུ་སྤྲུལ་བསྒྱུར་གྱི་ཏིང་འཛིན་ལ་སྙོམས་པར་ཞུགས་ཚེ་སྤྲུལ་པ་སྣ་ཚོགས་སུ་སྣང་ཡང་དོན་ལ་གཞི་རྩ་བྲལ་ཞིང་དངོས་ཡུལ་མ་གྲུབ་པ་ལྟ་བུའོ། །ཀྱཻ། ཁྱེའི་ཆུང་བསམ་དུ་མེད་པ་ཁྱོད་ཀྱིས་འདི་ལྟར་རིམ་བཞིན་དུ་བསྒོམ་དང་སྣང་བ་སྒྱུ་མར་རྟོགས་པས་སྒྱུ་མའི་རྣལ་འབྱོར་དུ་འགྱུར་རོ། །ཞེས་གསུངས་ཤིང་མི་སྣང་བར་གྱུར་ཏོ། །ཡང་རིག་འཛིན་བདུད་འདུལ་རྡོ་རྗེས། རྡོ་རྗེ་རྟག་པའི་རྡོ་རྗེའོ། །དོན་དུ་ནམ་མཁའ་ཉིད་ལ་ལྟོས། །ཞེས་དང་། སླར་ཡང་དེའི་དོན་བཀྲོལ་ནས་གསུངས་པ་ནི། ཀྱེ་ཧོ་ནམ་མཁའ་སྟོང་པ་འདི་ནི་སྣོད་བཅུད་ཐམས་ཅད་ཀྱི་འཆར་གཞི་ཡིན་ཏེ། དཔེར་ན་གཟུགས་བརྙན་འཆར་གཞི་མེ་ལོང་ཡིན་ལ་མེ་ལོང་ལས་གཟུགས་བརྙན་གཞན་དུ་མ་གྲུབ་པ་དང་། ཆུ་ཟླ་འཆར་གཞི་ཆུ་ཡིན་ལ་ཆུ་ལས་ཆུ་ཟླ་གཞན་དུ་མ་གྲུབ་པ་དང་། འཇའ་ཚོན་འཆར་གཞི་ནམ་མཁའ་ཡིན་ལ་ནམ་མཁའ་ལས་འཇའ་ཚོན་གཞན་དུ་མ་གྲུབ་པ་བཞིན་ནོ། །ནམ་མཁའ་དེ་ནི་རྨ་མི་འབྱུང་བས་མི་ཆོད་པ། ནམ་མཁའ་ལ་གཞོམ་གཞིག་བྲལ་བས་མི་ཤིགས་པ། ནམ་མཁའ་སྣང་སྲིད་ཀྱི་མཆེད་གཞིར་གནས་པས་བདེན་པ། ནམ་མཁའ་ལ་སྐྱོན་ཡོན་གྱི་བསླད་མི་འཇུག་པས་སྲ་བ། ནམ་མཁའ་འཕོ་འགྱུར་བྲལ་བས་བརྟན་པ། ནམ་མཁའ་རྡུལ་ཕྲ་རབ་ཡན་ཆད་ཀྱི་ཁོངས་སུ་མ་ཞུགས་པ་མེད་པས་ཐམས་ཅད་དུ་ཐོགས་པ་མེད་པ། ནམ་མཁའ་ལ་གཞན་གང་གིས་ཀྱང་གནོད་པས་མི་ཚུགས་པས་ཐམས་ཅད་ལས་མ་ཕམ་པའོ། །རྫས་གཞན་གང་ལའང་མཚོན་གྱིས་རྨ་འབྱུང་བས་ཆོད་པ། རྐྱེན་གྱིས་གཞོམ་ཞིང་འཇིག་ནུས་པས་ཤིགས་པ། གཅིག་དང་དུ་མར་འགྱུར་བས་རྫུན་པ། གཞན་གྱིས་བསླད་འཇུག་པས་མི་སྲ་བ། གཡོ་འགུལ་དང་བཅས་བརྟེན་གནས་མེད་པས་མི་བརྟན་པ། གང་ལའང་ཐོགས་པ་དང་བཅས་པ། རྐྱེན་གཞན་གྱིས་སྟོང་པར་བྱེད་པས་ཕམ་པ་སྟེ། བདེན་པར་མ་གྲུབ་པའི་མཚན་ཉིད་ཅན་དེ་དག་སྟོང་པའོ། །གཞན་ཡང་དངོས་པོ་རགས་པ་རྡུལ་དུ་ཕབ་པས་རྡུལ། རྡུལ་དེ་བདུན་ཆར་བཏང་བས་རྡུལ་ཕྲན། རྡུལ་ཕྲན་དེ་ཡང་བདུན་ཆར་བཏང་བས་ཆ་མེད་དུ་སྟོང་པ་ཡང་མ་གྲུབ་པའི་མཚན་ཉིད་ཀྱིས་ཡིན་ནོ། །དེ་ཡང་བྱ་བ་བྱས་པས་མེད་པར་བཏང་བ་ལས་དང་པོ་ཡོད་པར་སེམས་ན། རྨི་ལམ་གྱི་སྣང་བ་སྣང་དུས་ཉིད་ནས་མ་གྲུབ་པ་ལ་མཐོང་རེག་གི་བྱ་བ་བྱས་མ་བྱས་དང་། མིག་འབྱེད་བཙུམ་དང་གོམ་པ་འདེག་འཇོག་ཙམ་གྱིས་སྣང་བ་མཆེད་འགུག་ཏུ་འགྱུར་བའི་ཚུལ་ལྟོས་ཤིག། འོན་ཏེ་སྔ་མ་འགག་ཅིང་ཡལ་ཏེ་ཕྱི་མ་ཕྱིས་མཆེད་པ་མ་ཡིན་ཏེ་སྔ་མ་ནས་གཞན་དུ་འཕོས་ཚེ་སྔ་ཕྱི་ཐམས་ཅད་བདེན་གྲུབ་ཏུ་ཡོད་པར་སེམས་ན་རྨི་ལམ་གྱི་སྣང་བ་ལ་ལྟོས་ཤིག། ཁྱད་པར་དུ་ཡང་རྒྱུ་འབྲས་ཕན་ཚུན་ལ་ལྟོས་ནས་བཏགས་པ་མིན་པའི་ཚུགས་ཐུབ་ཀྱི་ངོ་བོ་ཞིག་ཡོད་མི་སྲིད་པས་ངང་ཚུལ་ལེགས་པར་སོམ་མཛོད། འོ་ན་ནམ་མཁའ་ལ་རྡོ་རྗེ་ཆོས་བདུན་ལྡན་པར་བཤད་པ་དེ་དག་ཀྱང་དངོས་མེད་ཡིན་པའི་རྒྱུ་མཚན་གྱིས་འཕོ་འགྱུར་མེད་ཚུལ་དཔེར་བཞག་ནས་ཆོས་ཉིད་ཀྱི་བཞུགས་ཚུལ་སྨྲ་བསམ་བརྗོད་མེད་ཀྱི་ངོ་བོ་ལ་འགྱུར་བ་མེད་པར་སྟོན་པ་ཡིན་གྱི། དངོས་དང་དངོས་མེད་བདེན་བརྫུན་གྱི་ཁྱད་འོང་བར་འཆད་པ་ལ་སྦྱར་ན་ལེགས་པ་ཡིན་ནོ། །དེ་བས་ན་མཛུབ་མོས་ཟླ་བ་སྟོན་པའི་བརྡའ་ཐབས་བྱས་ན་ཟླ་བ་ལ་བལྟ་བར་བྱ་ཡི་མཛུབ་མོའི་རྩེ་ཙམ་ཞིག་བལྟ་བས་ཚིམ་པར་མི་བྱའོ༔ འདི་ལ་གོམས་འདྲིས་ཡང་ཡང་བཏང་ནས་སྟོང་པར་ཐག་ཆོད་པ་ཞིག་མ་བྱས་ན་རྣམ་མཁྱེན་གྱི་ལམ་དུ་ཕྱོགས་ཙམ་ཉེ་བར་མི་འགྱུར་རོ། །ཁྱེའུ་ཆུང་ཤེས་རིག་གི་རྩེ་མོ་ཁྱོད་ཀྱིས་འདིའི་དོན་ལ་རབ་ཏུ་ལྟོས་ལ་སྣང་བ་ཐམས་ཅད་ནམ་མཁའ་ཉིད་དུ་རྟོགས་པའི་ནམ་མཁའ་གོ་འབྱེད་པའི་རྣལ་འབྱོར་པ་ཞིག་མཛོད་ཅིག། ཅེས་གསུངས་ཤིང་མི་སྣང་བར་གྱུར་ཏོ། །དེ་ལྟར་གཏན་ལ་ཕབ་པས་སྣང་བ་ཐམས་ཅད་རང་ས་ཉིད་ནས་སྟོང་པར་ཤེས་ཀྱང་། །ཕྱི་སྣང་བ་སྣོད་ཀྱི་འཇིག་རྟེན་ནང་གཡོ་བ་བཅུད་ཀྱི་སེམས་ཅན་བར་འདོད་ཡོན་ལྔའི་ཡུལ་སྣང་འདི་དག་ཐམས་ཅད་ཤུལ་དུ་བོར་ནས་གནས་རིས་གཞན་དུ་འགྲོ་བ་དང་། སེམས་ཅན་ཐམས་ཅད་རང་རང་གི་རྒྱུད་ཅན་ཡོད་པར་སེམས་ནས་ཡོད་པའི་གནས་སྐབས་ན། རྨི་ལམ་གྱི་སྣང་ངོར་ངའི་བླ་མ་དྲི་མེད་འོད་ཟེར་དང་ཞལ་མཇལ་ནས་དྲི་བ་རྩོད་ལན་གྱི་ཚུལ་དུ་ངོ་སྤྲོད་འདི་ལྟར་གདམས་སོ། །ཀྱེ་རིགས་ཀྱི་བུ་ཕྱི་སྣང་བ་སྣོད་ཀྱི་འཇིག་རྟེན་ནང་གཡོ་བ་བཅུད་ཀྱི་སེམས་ཅན་བར་འདོད་ཡོན་ལྔའི་ཡུལ་སྣང་འདི་དག་སྒྱུ་མའི་འཁྲུལ་འཁོར་དབྱིངས་སུ་ཞིག་པ་བཞིན་དུ་ཀུན་གཞི་སྟོང་ཧད་ཀྱི་ནམ་མཁར་ཐིམ་ནས་མཐར་ལས་རླུང་གཡོས་པའི་ཆོ་འཕྲུལ་གྱིས་བདག་ལུས་སྣང་བ་ལས་རྨི་ལམ་གྱི་སྣོད་བཅུད་འདོད་ཡོན་ཐམས་ཅད་མཆེད་པ་ལ་མངོན་ཞེན་སྐྱེས་པས་འཁྲུལ་པ་དང་། སླར་ཡང་སྣང་སྲིད་དེ་ཡང་འཇའ་ཚོན་ནམ་མཁའ་ལ་ཡལ་བ་ལྟར་ཀུན་གཞི་སྟོང་ཧད་ཀྱི་ནམ་མཁར་ཐིམ་པ་ལས་ཡང་སྔར་བཞིན་ཉིན་སྣང་མཆེད་པ་ཡིན། ཅེས་གསུངས་པ་ལ། བདག་གིས་འདི་སྐད་ཞུས། བདག་གི་ལུས་འདི་ནི་སྣང་ཙམ་མ་ཡིན་པར་ངེས་པར་ཕ་མའི་རྒྱུ་རྐྱེན་ལས་བྱུང་བ་ཡིན་ནམ་སྙམ་ཞུས་པས། དེ་ལྟར་ཁྱེད་ཀྱི་ལུས་ཕ་དང་མ་ལུས་བྱུང་བར་སྙམ་ན། ཕ་མའི་ཐོག་མཐའ་བྱུང་གནས་འགྲོ་གསུམ་གང་ལགས་སྨོས་དང་གསུངས་པ་ལ། བདག་གིས་དེ་ཡོད་ཀྱང་མི་དྲན་པ་ཡིན་སྙམ། ཕ་མ་མེད་པའི་ལུས་མི་སྲིད་པར་སེམས་ཀྱི་ཞུས་པས། རྨི་ལམ་དང་བར་སྲིད་ཀྱི་ལུས་དང་དམྱལ་བའི་ལུས་སོགས་ཀྱི་ཕ་མ་གང་ལགས་ལྟོས་ཤིག་གསུངས་པས། ལུས་འདི་སྣང་ཙམ་ལས་མ་གྲུབ་པར་ཐག་ཆོད་པ་བྱུང་། ཡང་ཀྱཻ་བླ་མ་ལགས། བདག་གི་ལུས་མལ་སར་གོས་ཀྱིས་གཡོགས་ནས་མི་ཡུལ་དང་བཅས་པ་མི་འགྱུར་བར་གནས་བཞིན་རྨི་ལམ་གྱི་སྣང་བ་ཤར་བ་ཡིན་པར་སེམས་འདུག་གི་ཞུས་པས། བླ་མའི་ཞལ་ནས་ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་བ། ནང་གཡོ་བ་བཅུད་ཀྱི་སེམས་ཅན་གྲངས་མང་བ། བར་འདོད་ཡོན་ལྔའི་ཡུལ་སྣང་བཀོད་ལེགས་པའི་རྨི་སྣང་དེ་ལུས་ཀྱི་མགོ་དང་ཡན་ལག་སྟོད་སྨད་གང་གི་ནང་དུ་མཆེད་པའི་ཡུལ་ལ་ལྟོས་ཤིག་གསུངས་པས། དེ་ཡང་མ་ཡིན་པའི་ཐག་ངེས་པར་ཆོད་པ་བྱུང་། ཡང་བླ་མ་ལགས། ཡུལ་གཞན་ཞིག་ཏུ་རྣམ་པར་ཤེས་པ་སོང་བས་རྨི་སྣང་ཤར། སླར་ལུས་ནང་དུ་ཞུགས་ཚེ་ཉིན་སྣང་ཤར་བ་ཡིན་སྙམ་གྱི་ཞེས་ཞུས་པས། བླ་མའི་ཞལ་ནས་འོ་ན། དེ་ལྟར་ལགས་ན་ལུས་འདི་གནས་ཁང་ལྟ་བུར་འགྱུར་བས་རྣམ་ཤེས་འབྱུང་འཇུག་བྱེད་པའི་གནས་ཁང་གི་སྒོ་ལྟ་བུ་དེ་ངོས་ཟུངས་ལ་སྨོས་ཤིག། དེར་མ་ཟད་སེམས་ཀྱི་གནས་ས་ཡང་ངོས་འཛིན་དགོས་ཏེ། སེམས་ལུས་ཀྱི་སྟོད་དུ་གནས་ན་སྨད་དུ་ཚེར་མ་ཟུག་པ་ཙམ་གྱིས་ཟུག་རྔུ་ཅི་ལ་མྱོང་། སྨད་དུ་གནས་ན་དེ་བཞིན་སྟོད་དུ་ཟུག་རྔུ་མྱོང་བའི་དོན་མ་མཆིས། དང་པོ་བུག་སྒོ་ནས་འབྱུང་འཇུག་བྱེད་པའི་རྣམ་པར་ཤེས་པ་ཕྲ་མོ་དེ་ཡང་འཕེལ་ཏེ་ལུས་ཁྱབ་པ་དང་། ཡང་མར་འགྲིབ་སྟེ་བུག་སྒོ་ཕྲ་མོ་ནས་ཐོན་པ་ཙམ་དུ་ཆེ་ཆུང་བྱེད་པ་མི་རིག། དེ་ལྟར་ན་བེམ་རིག་བྲལ་བའི་རྣམ་པར་ཤེས་པ་དེ་ཤི་བའི་དུས་སུ་ཡང་སླར་བེམ་པོར་ཅིས་མི་འཇུག། ཡུལ་གཞན་དུ་སོང་བའི་རྨི་སྣང་གི་ཡུལ་དེ་སྟེང་འོག་ཕྱོགས་མཚམས་གང་དུ་ཡོད། ཉིན་སྣང་གི་སྣོད་བཅུད་དང་གཅིག་པར་འདོད་དམ་ཐ་དད་དུ་འདོད། གཅིག་ཏུ་འདོད་ན་གཉིད་ཀྱིས་མཚམས་བཅད་དམ་མ་བཅད། བཅད་ན་ནི་ཉིན་སྣང་མ་ཡིན་ལ། མ་བཅད་ན་ནི་རྨི་སྣང་མ་ཡིན། ཡང་ན་སྣང་བ་དེ་ཉིད་སྟེང་འོག་གམ་ཕྱི་ནང་བྱས་ནས་ཡོད་པར་འདོད་པ་ལས་འོས་མེད་པ་ཡིན་ནོ། །ཞེས་གསུངས། ཡང་བདག་གིས་བླ་མ་ལགས། དེས་ན་ཐག་གང་ལ་ཆོད། ས་གང་གིས་འཛིན། བླ་མ་མཆོག་ཉིད་ཀྱིས་བསྟན་དུ་གསོལ་ཞུས་པས་བླ་མའི་ཞལ་ནས། ཚེ་རབས་ཐོག་མ་མེད་པའི་དུས་ཀུན་ཏུ་སྐྱེ་མ་མྱོང་ཡང་སྐྱེ་སྣང་ཙམ་དུ་ཟད། འཆི་མ་མྱོང་ཡང་སྣང་བ་གནས་འགྱུར་ཙམ་དུ་དཔེར་ན་རྨི་སྣང་དང་ཉིན་སྣང་ལྟ་བུར་ཟད། མིག་དང་རྣ་བ་སྣ་དང་ལྕེ་དང་ལུས་རྣམས་སུ་གཟུགས་སྒྲ་དྲི་རོ་རེག་བྱར་མཐོང་ཐོས་ཚོར་མྱང་མྱོང་བ་ཐམས་ཅད་རང་སྣང་རང་ལ་ཤར་བ་ཙམ་ལས་གཞན་དུ་སྤུ་རྩེ་ཙམ་ཡོད་མ་མྱོང་། གལ་ཏེ་མངོན་སུམ་མིག་གིས་མཐོང་། དོན་ལག་པས་ཟིན། དབང་པོའི་སྒོར་མྱོང་བས་གཞན་རང་རྒྱུད་པར་ཡོད་དོ་སྙམ་ན་རྨི་ལམ་གྱི་གཟུགས་སྒྲ་དྲི་རོ་རེག་བྱ་ཐམས་ཅད་དེ་དང་དེའི་དུས་སུ་བདེན་པར་སྣང་ཡང་སད་དུས་ཉིད་ནས་ཡུལ་མེད་ལ་ཡོད་མ་མྱོང་བ་དེས་སྟོན་ཏོ། །ཚེ་འཁོར་བ་ཐོག་མ་མེད་པའི་དུས་ནས་གནས་འཕོ་ཞིང་འགྲོ་མ་མྱོང་། ཡུལ་གཞན་དུ་སྡོད་མ་མྱོང་བའི་ཚུལ་ནི། རྨི་ལམ་གྱི་སྣང་བ་དང་མཚུངས་སོ། །རྨི་སྣང་དང་ཉིན་སྣང་གི་བདེན་རྫུན་མི་མཉམ་པར་སེམས་ན་སྐྱེས་ནས་ད་ལྟའི་བར་གྱི་རྨི་སྣང་དང་ཉིན་སྣང་གི་ལས་ཀ་སོ་ནམ་འབད་རྩོལ་གསོག་འཇོག་ཐམས་ཅད་མཉམ་མི་མཉམ་ལྟོས་ཤིག། དེ་གཉིས་ལ་དུས་ཡུན་རིང་ཐུང་དང་། གྲངས་མང་ཉུང་མེད་པའི་ཚུལ་ལ་ཞིབ་ཏུ་བརྟག་ན་མཚུངས་པར་ཐག་ཆོད་པར་འགྱུར་རོ། །དེར་མ་ཟད་རྨི་སྣང་མི་བདེན་པ་དང་ཉིན་སྣང་བདེན་པ་ཡིན་ན། རྨི་སྣང་འཁྲུལ་པ་དང་ཉིན་སྣང་མ་འཁྲུལ་པར་འགྱུར་བས། རྨི་སྣང་དུ་སེམས་ཅན་དང་ཉིན་སྣང་དུ་སངས་རྒྱས་ཡིན་པར་འདོད་དགོས། གཉིས་ཀ་འཁྲུལ་སྣང་ཡིན་ན་ནི་བདེན་རྫུན་གྱི་ཁྱད་པར་ཡོད་དོན་མེད་དེ། མ་ཡིན་པ་ལ་ཡིན་པར་སྣང་ཞིང་བཟུང་བ་ལ་འཁྲུལ་སྣང་ཞེས་བརྗོད་པ་ཡིན་པའི་ཕྱིར་རོ། །སྔོན་ཆད་རི་རབ་ཟས་སུ་ཟོས་རྒྱ་མཚོ་སྐོམ་དུ་བཏུང་ཀྱང་ད་ལྟ་འགྲང་བ་མེད་པ་དང་། སྟོང་གསུམ་གོས་སུ་གྱོན་ཡང་དྲོ་བ་མེད་པ་རྣམས་ནི་སྣང་ཙམ་ཉིད་ལས་མ་གྲུབ་པའི་བརྡར་ཤེས་པར་བྱའོ། །ལུས་སུ་སྣང་བ་འདི་སྟོང་པར་མ་ཤེས་ཤིང་དེ་ལ་བདེན་པར་ཞེན་པ་ནི་སྐྱོན་ཤིན་ཏུ་ཆེ་བ་ཡིན་ཏེ། ལུས་འདིའི་ཆེད་དུ་འབད་རྩོལ་གྱི་དབང་གིས་རྣམ་མཁྱེན་གྱི་འབྲས་བུ་ལ་ཟ་བས་ན་ཟ་འདྲེ་དང་། འཁོར་བ་ནས་འཁོར་བར་ཁ་བརྒྱུད་དེ་སྐྱེ་འཆིའི་སྣང་བ་སྟོན་པས་ཤི་གཤེད། ལུས་ཀྱི་ཆེད་དུ་གོས་སོགས་བདེ་བ་དོན་དུ་གཉེར་ཞིང་རེ་དོགས་ཉེར་ལེན་ཆགས་སྡང་གི་ཞེན་པས་འཆིང་སྟེ་ཐར་པའི་སྲོག་རྩ་གཅོད་པས་སྲོག་གཅོད། གཏན་དུ་བདེ་བའི་དབུགས་འཕྲོག་པས་ན་དབུགས་ལེན་ཀྱང་ཡིན། དེས་ན་ཚོགས་དྲུག་གི་ཡུལ་སྣང་ལ་ཞེན་པ་ཐམས་ཅད་རི་དྭགས་ཀྱིས་སྨིག་རྒྱུ་ཆུ་རུ་མཐོང་ནས་རྒྱུག་པ་ལྟ་བུ་ལས་སྙིང་པོ་རྡུལ་ཕྲན་ཙམ་ཡང་མ་གྲུབ་པའོ། །ཡང་འདི་ལྟར་སྟོང་པར་ཤེས་ཀྱང་སྔར་བཞིན་བདེན་པའི་ཚུལ་དུ་གནས་པ་ལས་མེད་དུ་ནི་མི་འགྲོ་བར་འདུག་པས་དེ་ལྟར་ཤེས་པ་ལ་དགོས་པ་ཅི་ཡོད་སྙམ་ན། བསྒོམ་བྱའི་ངོ་བོ་སྟོང་ཉིད་ཡིན་པར་མ་ཤེས་ན་སྒོམ་པ་ཐམས་ཅད་ལུང་མ་བསྟན་གྱི་ཕྱོགས་སུ་ངེས་པ་ཡིན། ལར་བསྐྱེད་སྒོམ་དམིགས་པ་གཞན་ཐམས་ཅད་ཀྱིས་ཀྱང་གོ་ཙམ་རྟོགས་ཙམ་གྱིས་གྲོལ་བར་མི་འགྱུར་བས་ན་སྟོང་ཉིད་རྟོགས་ཙམ་གྱིས་མེད་པའི་གནས་ལུགས་མངོན་དུ་འགྱུར་དགོས་པའི་རྒྱུ་མཚན་ཅི་ཡོད། ཡང་གདོད་ནས་སྟོང་ན་སྟོང་པར་ཤེས་དང་མ་ཤེས་འདྲའོ་སྙམ་ན། རིག་དང་མ་རིག་ཤེས་དང་མ་ཤེས་གཉིས་ཀྱི་ཁྱད་པར་ལས་འཁོར་འདས་དང་གྲོལ་འཁྲུལ་འབྱུང་བ་ཡིན་པས་ཤེས་ཤིང་རིག་པ་ནི་གནད་དུ་རྟོགས་པར་བྱའོ། །ཡང་འགའ་ཞིག་གིས་རང་སྟོབས་ཀྱིས་མ་ཤེས་ན་ཐོས་བསམ་གྱི་གོ་མི་ཆོད་ཟེར་བའང་འབྱུང་སྲིད་དེ། ཐོག་མ་མེད་པའི་དུས་ན་རང་སྟོབས་ཀྱིས་མ་རྟོགས་ནས་འཁོར་བར་འཁྱམས་པ་ཡིན། བསླབ་ཅིང་སྦྱངས་པས་རྒྱུད་ལུང་མན་ངག་ཐམས་ཅད་དང་མཐུན་པའི་ལྟ་བ་སྟོང་ཉིད་རྟོགས་པར་འགྱུར་བ་ཡིན་པས་ཤེས་པར་གྱིས་ཤིག། གཞན་ཡང་བསླབ་སྦྱང་སོགས་དཀའ་བ་ཆེན་པོ་སྤྱད་ནས་སྟོང་ཉིད་རྟོགས་ཀྱང་རུང་། དཀའ་བ་སྤུ་ཙམ་མ་སྤྱད་པར་སྟོང་ཉིད་རྟོགས་ཀྱང་རུང་། དཔེར་ན་དཀའ་བ་ཆེན་པོ་སྤྱད་ནས་གསེར་རྙེད་པ་དང་། དཀའ་བ་སྤུ་ཙམ་མ་སྤྱད་པར་གསེར་མལ་ས་ནས་རྙེད་ཀྱང་གསེར་ལ་བཟང་ངན་མེད་པ་ལྟ་བུའོ། །དེ་ལྟར་སྣང་བ་ཐམས་ཅད་སྟོང་ཉིད་དུ་གཏན་ལ་འབེབས་པའི་དཔྱོད་བྱེད་ཀྱི་ཤེས་པ་ལ་སོ་སོར་རྟོག་པའི་ཤེས་རབ་ཅེས་བྱ་ཞིང་། འཁོར་འདས་སྟོང་ཉིད་ཆེན་པོར་ངེས་པར་ཐག་ཆོད་པའི་རྗེས་ཤེས་རྒྱུན་ཆགས་པ་ལ་བདག་མེད་རྟོགས་པའི་ཤེས་རབ་ཅེས་བྱའོ། །ཤེས་རབ་དེ་གཉིས་རྒྱུད་ལ་བསྐྱེད་ནས་དང་པོ་རྟོགས། །བར་དུ་མྱོང་། ཐ་མ་གདིང་ཐོབ་པར་བྱ་བ་ནི་གནད་དོ། །ཡང་ལུས་སོགས་སྣང་ཙམ་ལས་མ་གྲུབ་པར་འདོད་པ་ནི་མི་འཐད་དེ། སྟོང་པར་རྟོགས་པའི་གང་ཟག་ཞིག་གིས་ལུས་ལ་མེ་ཆུས་རེག་ཅིང་མདའ་མདུང་དབྱུག་པ་སོགས་ཀྱིས་བསྣུན་ན་ཟུག་རྔུ་འབྱུང་བས་སོ་ཟེར་ན། ཆོས་ཉིད་ཟད་པའི་དབྱིངས་ལ་མ་སླེབ་ཀྱི་བར་དུ་གཉིས་སྣང་མི་ནུབ། དེ་མ་ནུབ་ཀྱི་བར་དུ་ཕན་གནོད་ཀྱི་སྣང་བ་རྒྱུན་མི་འཆད་པར་འབྱུང་ཡང་དོན་ལ་ནི་དམྱལ་བའི་མེས་ཀྱང་མ་ཚིག་པས་སྟོན་ཏོ། །ཞེས་གསུངས་ཤིང་མི་སྣང་བར་གྱུར་ཏོ། །ཡང་རེ་ཞིག་གི་དུས་སུ་གྲུབ་ཆེན་ས་ར་ཧའི་ཞལ་མཇལ་བའི་ཚེ། བདག་གིས་གྲུབ་པའི་དབང་ཕྱུག་ཆེན་པོ་ལགས། སྒྲིབ་པ་གང་གིས་སྦྱང་། ལྷ་ཇི་ལྟར་བསྒྲུབ། འདྲེ་བགེགས་གང་གིས་སྒྲོལ༔ བདག་ལ་བཀའ་སྩལ་དུ་གསོལ་ཞུས་པས། བཀའ་སྩལ་པ། ཀྱཻ་སྐྱེས་བུ་ཆེན་པོ་ཁྱོད་ཀྱིས་ཕན་གནོད་ཀྱི་མཚང་ལ་རྒོལ་དགོས་པས། སྒྲིབ་པ་ཞེས་བྱ་བ་ནི་གཞི་སྟོང་ཉིད་ཀྱི་ངོ་བོ་མ་རིག་པ་ལ་སྒྲིབ་པ་དང་མ་རིག་པ་དང་། དེ་བརྟན་པ་ལ་བག་ཆགས་ཞེས་བྱའོ། །དེ་ནི་ལུས་ངག་གི་དགེ་སྦྱོར་ལ་འབད་པ་ལྟ་བུའི་རྩོལ་བ་ཕལ་གྱིས་སྦྱོང་བར་མི་ནུས་ཏེ། འདི་ལྟར་སོ་སོར་རྟོག་པའི་ཤེས་རབ་ཀྱིས་ཆོས་ཉིད་གཏན་ལ་དབབ་པས་སྒྲིབ་པ་དེ་ངང་གིས་འདག་པར་འགྱུར་བ་ཡིན། །ཕན་བྱེད་ལུས་ངག་གི་དགེ་བ་ཐམས་ཅད་གནས་གང་དུ་འདུག། བསགས་པའི་བང་མཛོད་གང་དུ་མཆིས། བྱུང་བའི་ཁུངས། གནས་པའི་ས། འགྲོ་བའི་ཡུལ་ཐམས་ཅད་ལ་བརྟག་ཅིང་དཔྱད་པ་བཏང་བས་ཡུལ་མེད་དུ་འདུག་ན་ཕན་གང་ལ་བཏགས། སེམས་ཉིད་སྟོང་པའི་ཕྱི་ནང་བར་གསུམ་མགོ་མཇུག་གང་ལ་ཕན་ཐོགས་པ་ཡོད་ཅེས་བརྟག་ནས་ཡུལ་མེད་དུ་ཐག་ཆོད་ཚེ་འཁོར་བ་རུ་བསོད་ནམས་བསགས་པ་ཙམ་དུ་ཟད་དོ། །དེ་བཞིན་དུ་སྡིག་པ་བསགས་པའི་ཕུང་པོ་ཕྱོགས་མཚམས་གང་དུ་གདའ། དེའི་བང་ཁང་གནས་གང་དུ་མཆིས། སེམས་སྟོང་པའི་ཕྱི་ནང་མགོ་མཇུག་བར་གསུམ་གང་དུ་གནོད་བྱས་ཡོད་པའི་ཚུལ་བརྟག། དེ་ལྟར་རྟག་ཏུ་ལུས་ངག་དགེ་ལ་སྦྱོར་བའི་སྐྱེས་བུ་དང་། ཚེ་གཅིག་སྡིག་ལ་སྤྱོད་པའི་སྐྱེས་བུ་གཉིས་ཀྱི་ཤེས་རྒྱུད་ལ་ཞིབ་ཏུ་བརྟག་ན་དེ་གཉིས་ཀའི་སེམས་ཀྱི་ཆགས་སྡང་རེ་དོགས་ཉེར་ལེན་ཐམས་ཅད་ལ་ཁྱད་པར་རྡུལ་ཙམ་ཡང་མེད། གྲོལ་ན་ཡང་ཤེས་རྒྱུད་གྲོལ་བས་གྲོལ། འཁྲུལ་ན་ཡང་ཤེས་རྒྱུད་འཁྲུལ་པས་འཁྲུལ། གཉིས་ཀ་ཤེས་རྒྱུད་མ་གྲོལ་བར་འཁོར་བར་འཁྱམས་པ་ལ་ཁྱད་པར་སྤུ་ཙམ་མེད། དེས་ན་དགེ་སྡིག་གཉིས་གནས་སྐབས་ཀྱི་བདེ་སྡུག་སྐྱེད་པའི་ཁྱད་པར་ཙམ་ལས་འཁོར་བའི་སྣོན་པ་ཁོ་ན་ལས་མ་འདས་སོ། །འདི་ལྟར་དགེ་བ་གཏན་ལ་མ་ཕབ་ན་རྣམ་པར་གྲོལ་བའི་ལམ་དང་། གནས་སྐབས་བསོད་ནམས་བསགས་པའི་དགེ་བ་གཉིས་ནོར་ནས་རྣམ་མཁྱེན་གྱི་འབྲས་བུ་མི་འཐོབ། སྡིག་པ་གཏན་ལ་མ་དབབ་ན་རང་ངོ་རང་གིས་མ་རིག་པ་ཉིད་སྒྲིབ་པ་དང་འཁྲུལ་གཞི་ཡིན་པར་མི་ཤེས་ནས་འཁྲུལ་པའི་རྒྱུ་ངོས་མི་ཟིན། དེས་འཁོར་བ་མཐའ་མེད་དུ་འཁྲུལ་པ་ལས་འོས་མེད་པས་གཏན་ལ་དབབ་པ་གནད་དུ་ཤེས་པར་བྱའོ། །ཡང་ཕན་སྐྱབས་ཀྱི་ལྷ་ཞེས་བྱ་བ་རྣམས་དང་པོ་བྱུང་ས་བར་དུ་གནས་ས་ཐ་མ་འགྲོ་ས་གསུམ་ལ་བརྟག་པས་ཡུལ་མེད་པ་དང་། དབང་པོའི་ཡུལ་དུ་སྣང་བའི་གཟུགས་སྒྲ་དྲི་རོ་རེག་བྱ་གང་གི་ཡུལ་དུ་གྲུབ། སྣོད་བཅུད་ཀྱི་འབྱུང་བའི་ཁམས་ཤིག་ཏུ་ཡོད་པར་སེམས་ན་རྡུལ་དང་རྡུལ་ཕྲན་ཆ་མེད་ཀྱི་ཁོངས་སུ་བརྟག། འབྱུང་བ་རང་རང་གི་མིང་དང་དངོས་པོའི་ཚུལ་ལའང་བརྟག། ལྷ་དེས་ཕན་ཇི་ལྟར་བཏགས་པའི་ཚུལ་དང་། གནོད་བྱེད་ཀྱི་འདྲེ་ཡང་དེ་ལྟར་ཞིབ་ཏུ་བརྟག་པས་ཡུལ་མེད་ཤེས་པར་འགྱུར་རོ། །བདེ་བ་དང་སྡུག་བསྔལ་ཐམས་ཅད་སེམས་ཀྱི་སྣང་ཉམས་རྨི་ལམ་ལྟ་བུ་ལས་ལྷ་འདྲེས་ཕན་གནོད་གདགས་གཞིའི་སྟེང་ནས་ཅི་ཡང་མ་བྱུང་ངོ་། །འདྲེས་གནོད་པ་བྱེད་པ་ཡིན་སྙམ་ན་གཟུགས་སྒྲ་དྲི་རོ་རེག་བྱའི་ཡུལ་ལས་འདས་པས་འདྲེ་ཞེས་མིང་ཙམ་དུ་ཟད་པ་དེས་གནོད་ཇི་ལྟར་བྱས་བརྟག་པས་ཡུལ་མེད་དུ་སྟོང་པ་ལས་ཡོད་པར་མ་མཐོང་། མི་རྣམས་འཁྲུལ་པའི་དབང་གིས་རང་ལུས་སྟོད་སྨད་ལའང་བཟང་ངན་དུ་བལྟས་ཏེ་ཁོག་སྟོད་གཙང་མར་སྣང་ནས་ལྷ་ལྟར་འཛིན། ཁོག་སྨད་བཙོག་པར་སྣང་ནས་འདྲེ་ལྟར་འཛིན་པའི་ཚུལ་གྱིས་རེ་དོགས་རྒྱུན་མི་ཆད་པར་འབྱུང་བ་དང་། བདག་འཛིན་གྱི་འཆིང་བ་དམ་པོའི་སྟོབས་ཀྱིས་བདེ་སྡུག་གི་ཉམས་རྒྱུན་མི་ཆད་པར་འབྱུང་བ་ཐམས་ཅད་འཁོར་བའི་སྣང་ཉམས་ཁོ་ན་ལས་གཞན་དུ་བདེན་པར་གྲུབ་པ་རྡུལ་ཙམ་མེད་པ་ནི་དཔེ་རྨི་ལམ་ཁོ་ནས་སྟོན་ཏོ། །འདིའི་གནད་དོན་ཡིན་ལུགས་ཤེས་པ་ནི་སྒོམ་པའི་གེགས་སེལ་ཡིན་ཏེ། སྒོམ་པ་ལ་ཡིད་ཆེས་ཤིང་བློ་མི་གཏོད་པའི་གེགས་ཐམས་ཅད་སེལ་ནས་ཆོས་ཉིད་ཀྱི་དོན་ལ་ཡིད་ཆེས་ཤིང་ཐེ་ཚོམ་པའི་གདིང་ཐོབ་པར་འགྱུར་བ་དང་། མ་རིག་པའི་སྒྲིབ་པ་དང་བྲལ་ནས་རིག་པའི་ཡོ་ལངས་ཆེན་པོར་དབང་བསྒྱུར་བར་བྱེད་དོ། །ཞི་བྱེད་བདུད་གཅོད་ཟབ་མོའི་རྩ་བའང་ཡིན་ཏེ། རང་རིག་ལས་ལྷ་གཞན་དུ་མི་འཚོལ། །རྣམ་རྟོག་ལས་འདྲེ་གཞན་ན་མེད་པར་ཐག་ཆོད་པར་འགྱུར་བས། དེ་ནི་སྒྲུབ་པ་དང་གཏོ་ཡས་གཏོང་བ་ཐམས་ཅད་ལའང་འདི་མེད་ཐབས་མེད་པ་ཡིན་ཏེ༔ དེ་ལྟར་ཤེས་ན་ཆོས་ཐམས་ཅད་སྒྱུ་མ་ལྟ་བུར་རྟོགས་པའི་སྒྱུ་མའི་རྣལ་འབྱོར་ཆེན་པོར་ངེས་པའོ། །ཀྱཻ་སེམས་མེད་རིག་པའི་ཁྱེའུ་ཆུང་ཁྱོད་ཀྱིས་འདི་གདུལ་བྱ་རྣམས་ལ་སྟོན་དང་ངེས་གསང་ཐེག་པ་ཆེན་པོའི་རྣལ་འབྱོར་པ་ཤ་སྟག་འབྱུང་སྲིད་དོ། །ཞེས་གསུངས་ཤིང་མི་སྣང་བར་གྱུར་ཏོ། །ཡང་འོད་གསལ་དག་པའི་སྣང་ངོར་དཔལ་ཆེན་ཕྱག་ན་རྡོ་རྗེའི་ཞལ་མཇལ་བའི་ཚེ། བདག་གིས་འདི་སྐད་ཞུས། ཀྱཻ་རྒྱལ་བ་རྡོ་རྗེ་འཆང་ཆེན་པོ་སངས་རྒྱས་ཞེས་བྱ་བ་རང་ཐོག་ཏུ་རང་སངས་རྒྱས་པ་ཡིན་ནམ། །གཞན་ཞིག་གི་ཡུལ་དུ་འཚང་རྒྱ་བར་འགྲོ་རྒྱུ་ཡིན་ནམ། ཞེས་ཞུས་པས། བཀའ་སྩལ་པ། ཀྱེ་ཧོ་སྐལ་ལྡན་རིགས་ཀྱི་བུ། སངས་རྒྱས་ཞེས་བྱ་བ་ཡུལ་ཡངས་པ་ཆེན་པོ་ཞིག་ན་མི་རྗེ་གཟུགས་བཟང་བ་མཐོང་ན་མི་མཐུན་པ་མེད་པ་ཞི་བ་བསིལ་བ་དྭངས་པ་རྙོགས་པ་དང་བྲལ་བ་མཛེས་སྡུག་བལྟ་བས་ཆོག་མི་ཤེས་པ་ཞིག་གི་ཚུལ་དུ་ཡོད་པར་སེམས་ན་དེའི་ཕ་མ་གང་ལགས། མ་ལས་སྐྱེས་ན་སྐྱེ་བའི་མཐའ་ཅན། གནས་ན་གནས་པ་རྟག་པའི་མཐའ་ཅན། འགག་ན་སྣང་མེད་ཆད་པའི་མཐའ་ཅན་ཏེ། མདོར་ན་སྐྱེ་འགག་གནས་གསུམ་ཚུགས་ཐུབ་བདེན་གྲུབ་ཀྱི་ངོ་བོར་ཡོད་ཕན་ཆད་མཐའ་གཉིས་དང་བྲལ་བའི་གནས་ལུགས་ཞིག་ཡོད་ཐབས་མེད་དེ། ཇི་ལྟར་སྣང་བ་འདི་དག་སྐྱེ་འགག་ལྟར་སྣང་བ་ནི་བཏགས་པ་ཁོ་ནར་ཟད་དོ། །ཡར་དག་པ་རྣམ་བྱང་གི་ཕྱོགས་སུ་ཡང་བདེན་པར་བཟུང་ན་རང་གིས་རང་ཉིད་འཆིང་བར་འགྱུར་གྱི། འཁོར་འདས་ཀྱི་ཆོས་ཉིད་ལ་མི་འདྲ་བའི་ཁྱད་པར་ཞིག་ཡོད་ན་སྲིད་ཞི་མཉམ་ཉིད་ཀྱི་གནས་ལུགས་ཟེར་བའང་ཁ་ཙམ་དུ་བས་ཤིང་། མང་པོ་ཞིག་མྱང་འདས་རང་མཚན་པར་ཞེན་ནས་རེ་དོགས་ཀྱི་གཟེབ་ཏུ་འཇུག་མོད། དག་པའི་ཞིང་དུ་ལོངས་སྤྱོད་རྣམ་པ་གྲངས་མང་ལ། བཀོད་པ་རྒྱ་ཆེ་བའི་ཁྱད་པར་དུ་བྱས་ནས་དངོས་པོ་རང་མཚན་དུ་འཛིན་ན་དེའང་ཆོས་ཀྱི་བདག་འཛིན་དུ་འདུག་གོ། དེ་བཞིན་གཤེགས་པ་ཐེར་ཟུག་དང་བདེན་གྲུབ་ཏུ་ལྟ་བ་དེ་མིང་ཇི་ལྟར་བཏགས་ཀྱང་དོན་ལ་གང་ཟག་གི་བདག་ཏུ་ལྟ་བ་ལས་མ་འདས། སངས་རྒྱས་ལ་མིག་ཡོད་པར་སེམས་ན་མིག་གི་རྣམ་པར་ཤེས་པ་ཡང་ཡོད། མིག་གི་རྣམ་པར་ཤེས་པ་གྲུབ་ཙམ་ནས་གཟུགས་སུ་སྣང་བ་མི་མཆེད་པའི་ཐབས་མེད་པ་ཡིན། དེ་ནི་མིག་གི་གཟུང་བ་ཡུལ་ཞེས་བྱ་སྟེ། དེ་ལྟར་གྲུབ་ཕན་ཆད་གཟུགས་ཉེར་ལེན་གྱི་སེམས་རྟོག་ཕྲ་མོ་ཞིག་མི་འབྱུང་བའི་ཐབས་མེད། དེ་ནི་མིག་གི་འཛིན་སེམས་ཏེ། གཟུང་འཛིན་གཉིས་སུ་རྟོག་པ་ལ་སེམས་ཞེས་བྱ་བས་སེམས་གང་ལ་ཡོད་པ་དེ་ལ་སེམས་ཅན་ཞེས་བྱའོ། །དེ་བཞིན་དུ་རྣ་བ་ཡོད་པར་སེམས་ན་དེའི་རྣམ་པར་ཤེས་པ་སྒྲ་དང་བཅས་པ་དང་། སྣ་ཡོད་པར་སེམས་ན་སྣའི་རྣམ་པར་ཤེས་པ་དྲི་དང་བཅས་པ་དང་། ལྕེ་ཡོད་པར་སེམས་ན་ལྕེའི་རྣམ་པར་ཤེས་པ་རོ་དང་བཅས་པ་དང་། ལུས་ཡོད་པར་སེམས་ན་ལུས་ཀྱི་རྣམ་པར་ཤེས་པ་རེག་བྱ་དང་བཅས་པ་ཐམས་ཅད་དེ་རྣམས་ཀྱི་གཟུང་ཡུལ་ཡིན་ཏེ། དེ་དག་ཉེ་བར་ལེན་པའི་རྟོག་ཚོགས་རྣམས་ནི་དེ་དག་གི་འཛིན་པ་སེམས་ཏེ། སྔ་མ་བཞིན་སེམས་གང་ལ་ཡོད་པ་དེ་ལ་སེམས་ཅན་ཞེས་བྱའོ། །སངས་རྒྱས་ཞེས་གཟུང་འཛིན་ལས་མ་འདས་པའི་སངས་རྒྱས་ཞིག་ཡོད་པར་སྲིད་ན་དེའི་ཡོན་ཏན་སེམས་ཅན་ལ་འཇུག་པའང་མི་དང་མི་ལྟ་བུའོ། །སངས་རྒྱས་ཀྱིས་གཞན་ལ་ཆོས་སྟོན་པར་སེམས་ན་སྟོན་པ་པོ་བདག་དང་། བསྟན་བྱའི་ཆོས་དང་། སྟོན་ཡུལ་སེམས་ཅན་དུ་སྣང་ཞིང་འཛིན་པ་ཡོད་ན་དེ་ནི་སེམས་ཅན་ལས་འཕགས་པའི་ཁྱད་ཆོས་ཏིལ་འབྲུ་ཙམ་ཡང་མེད་པས་ཐམས་ཅད་སེམས་ཅན་ནོ། །ཡུལ་ཁམས་བདེ་བ། གཟུགས་མཛེས་པ། མཛའ་གྲོགས་ལེགས་པ། ལོངས་སྤྱོད་དང་བདེ་སྐྱིད་ཆེ་བ། ཁྲོ་བ་དང་ཆགས་པ་མེད་པ་རྣམས་ཁྱད་ཆོས་ཡིན་པར་སེམས་ན་དེ་ཡང་གཟུགས་ཁམས་ཀྱི་ལྷ་ལས་མི་འཕགས་པས་སེམས་ཅན་ནོ། །ངེས་པའི་དོན་དུ་རང་གི་གཞི་ཀུན་ཏུ་བཟང་པོ་ནི་དུས་གསུམ་གྱི་བདེ་བར་གཤེགས་པ་ཞེས་བྱ་བ་ཡིན་ནོ། །དོན་དམ་པར་སངས་རྒྱས་འཇིག་རྟེན་དུ་བྱོན་མ་མྱོང་བ་དང་། ཆོས་སྟོན་མ་མྱོང་བ་ནི་རྒྱུད་ལུང་མན་ངག་མང་པོར་གདུལ་བྱ་རང་སྣང་གི་སྟོན་པ་རང་ལ་ཤར་བ་ཡིན་པའི་ཚུལ་གསལ་བར་གསུངས་པ་ལ་ལྟོས་ཤིག་རྟོགས་ཤིག། ཡང་འཁོར་བའི་གནས་རིགས་གཞན་ཡོད་ཅིང་གྲུབ་སྟེ་སེམས་ཅན་མང་པོ་ཡུལ་དེ་རུ་སོང་ཞིང་ཁ་བརྒྱུད་ནས་བདེ་སྡུག་མྱོང་བར་སེམས་ན་དེ་ཡང་མི་རིགས་ཏེ། སྔ་མའི་ལུས་རྟེན་ཤུལ་དུ་བོར་བར་སྣང་བ་བདེན་ན་བར་སྲིད་ཀྱི་ལུས་དེ་གང་ནས་ལེན། དེང་སང་གི་སེམས་ཅན་རྣམས་ལ་རྨ་དང་རྐང་ལག་ཚིག་པ་ཙམ་དང་། དགུན་ཉིན་ཞག་རེ་ཙམ་གྱི་གྲང་ལྷག་གིས་འཆི་བར་འགྱུར་ན། དམྱལ་བ་ཚ་གྲང་མྱོང་བྱེད་ཀྱི་ལུས་གྲུབ་ནས་བཙོ་བསྲེག་སོགས་ཡུན་རིང་བྱས་ཀྱང་མི་འཆི་བ་དེ་ཅིའི་ཕྱིར་ཡིན། དེ་བཞིན་དུ་དེང་སང་ཟླ་ཤས་ཞག་ཤས་ཙམ་དུ་མུ་གེ་བྱུང་བས་འཆི་སྲིད་ན། ཡི་དྭགས་ཀྱི་སེམས་ཅན་བསྐལ་པར་མུ་གེས་ཅིས་མི་འཆི། དེས་ན་འགྲོ་བ་རིགས་དྲུག་གི་སེམས་ཅན་བར་སྲིད་དང་བཅས་པ་ཐམས་ཅད་རྨི་ལམ་གྱི་སྣང་བ་མཆེད་པ་ལྟ་བུར་སྣང་ཙམ་ལས་མ་གྲུབ་ཅིང་སྟོང་པ་ཡུལ་མེད་པ་ལ་བདེན་ཞེན་སྐྱེས་པས་འཁྲུལ་པ་ཡིན། དེ་ལྟར་འཁྲུལ་སྣང་གཏན་ལ་ཕབ་ནས་བདེན་མེད་སྟོང་པ་ཡུལ་མེད་དུ་རྟོགས་ན་འཁོར་བ་དོང་ནས་སྤྲུགས་པ་ཡིན། སངས་རྒྱས་རང་གཞི་ལས་མེད་པར་ཐག་ཆོད་དེ་རང་ལ་རང་གདིང་ཐོབ་པར་བྱས་ན་སངས་རྒྱས་དུ་མ་རང་གྲོལ་ཞེས་བྱ་བའི་མིང་དོན་གྱིས་ཐོབ་པ་ཡིན་ནོ། །ཀྱཻ་ནམ་མཁའི་དབང་ཕྱུག་ཀུན་ཁྱབ་རྡོ་རྗེ་ཁྱོད་ཀྱིས་འཁོར་འདས་ཀྱི་ཆོས་ཐམས་ཅད་ཅང་མེད་སྟོང་པ་རུ་གཏན་ལ་ཕབ་ནས་མེད་པའི་རང་བཞིན་རྟོགས་པར་གྱིས་ཤིག། ཅེས་གསུངས་ཤིང་མི་སྣང་བར་གྱུར་ཏོ། །དེ་ལྟར་བདག་གིས་ཡུན་རིང་པོར་གཏན་ལ་ཕབ་ནས་མེད་པར་ཐག་ཆོད་པ་བྱུང་ཞིང་སྣོད་བཅུད་ཀྱི་སྣང་བ་ཐམས་ཅད་རང་ངོས་ནས་སྟོང་པར་ཤེས་ཀྱང་སྟོང་པ་གྲངས་མང་བ་ལུང་མ་བསྟན་དུ་ཡོད་པའི་སྐབས་ཤིག་ན། ཆེ་མཆོག་རྡོ་རྗེ་ཁྲོ་ལོད་འཁོར་འདས་སྟོང་ཉིད་ཀྱི་རོལ་པར་སྟོན་པའི་ཧཱུྃ་གླུ་གྱེར་བ་ཞིག་གི་ཞལ་མཇལ་བའི་ཚེ་བདག་གིས། ཀྱཻ་ལྷག་པའི་ལྷ་མཆོག་ཆེན་པོ་ལགས། ངས་འཁོར་འདས་སྟོང་ཉིད་དུ་གོ་ཡང་སྟོང་པ་ཕན་མེད་གནོད་མེད་དུ་འདུག་པ་འདི་ཅིས་ལན་པ་ཡིན། ཅེས་ཞུས་པས། ཀྱཻ་སྐྱེས་བུ་ནམ་མཁའི་དབང་པོ་ཁྱོད་ཀྱིས་འཁོར་འདས་ཐམས་ཅད་སྟོང་པ་ཉིད་དུ་འགགས་སྡོམས་ཤིག། སྟོང་པ་ཉིད་ངོ་བོ་ཉིད་དུ་འགགས་བསྡམ་པར་གྱིས་ཤིག། ངོ་བོ་ཉིད་གཞི་རུ་འགགས་བསྡམ་པར་གྱིས་ཤིགའཁོར་འདས་གཞིའི་རོལ་པར་འགགས་སྡོམས་ཤིག། འཁོར་འདས་ཀྱི་སྤྱི་ཆིངས་གཞི་ཉིད་དུ་འགགས་བསྡམ་པར་གྱིས་ཤིག། རྒྱ་མཚོའི་གཟའ་སྐར་རྒྱ་མཚོ། སྣོད་བཅུད་ནམ་མཁའ། འཁོར་འདས་ཆོས་ཉིད་རྣམས་ཀྱི་རོལ་པ་དང་། ཆིངས་པ་དང་། ཆོས་ཉིད་ཁྱབ་ཅིང་བརྡལ་བ་དག་དཔེ་དང་དཔེ་ཅན་ཡིན་པའི་ངང་ཚུལ་ཤེས་པར་གྱིས་ཤིག། དེས་འཁོར་འདས་འུབ་ཆུབ་ཀྱི་རྣལ་འབྱོར་པར་འགྱུར་རོ། །ཞེས་གསུངས་ཤིང་མི་སྣང་བར་གྱུར་ཏོ། །དེ་ནས་ཡང་ལོ་ཁྱིམ་བདུན་གྱི་རྨི་ལམ་དག་པའི་སྣང་ངོར་ཆོས་སྐུའི་སྟོན་པ་རྡོ་རྗེ་འཆང་གི་ཞལ་མཇལ་བའི་ཚེ་བདག་གིས། ཀྱཻ་སྟོན་པ་བཅོམ་ལྡན་འདས་ཐར་པ་དང་རྣམ་མཁྱེན་གྱི་ལམ་དུ་ཇི་ལྟར་གྲོལ་བ་དང་། མ་དག་པ་འཁོར་བའི་ལམ་དུ་ཇི་ལྟར་འཁྲུལ་བ་ཡིན། སྟོན་པ་ཉིད་ཀྱིས་བསྟན་དུ་གསོལ། ཅེས་ཞུས་པས་བཀའ་སྩལ་པ། ཀྱཻ་སྐྱེས་བུ་ཆེན་པོ་ཁྱོད་ཉོན་ཅིག། སངས་རྒྱས་དང་སེམས་ཅན་གཉིས་ཀ་རིག་དང་མ་རིག་གཉིས་ཀྱིས་ཁྱད་པར་ལས་བྱུང་བ་ཡིན་ཏེ། གཞི་གདོད་མའི་མགོན་པོ་ཀུན་ཏུ་བཟང་པོ་ཉིད་ནི་སྐུ་བཞི་ཡེ་ཤེས་ལྔའི་བདག་ཉིད་ཅན་ནོ། །ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་རང་གྲོལ་བ་སྤྲུལ་སྐུ། འཁོར་འདས་ཀུན་ལ་ཁྱབ་ཅིང་བརྡལ་བ་ངོ་བོ་ཉིད་སྐུའོ། །ཆོས་ཐམས་ཅད་གོ་འབྱེད་པས་ཆོས་དབྱིངས། དྭངས་གསལ་རྙོག་མ་དང་བྲལ་བས་མེ་ལོང་། འཁོར་འདས་དག་མཉམ་གྱི་རོལ་པ་མཉམ་ཉིད། མཁྱེན་གཟིགས་ཡེ་ཤེས་ཀྱི་གོ་མ་འགགས་པས་སོར་རྟོག། དག་གྲོལ་གྱིས་བྱ་བ་གྲུབ་པས་བྱ་གྲུབ་བོ། །དེ་ལྟར་རང་བྱུང་གི་སངས་རྒྱས་སུ་གྲོལ་བའི་ལམ་རིག་པ་ཡང་སྐུ་བཞི་ཡེ་ཤེས་ལྔའི་བདག་ཉིད་ཅན་མངོན་དུ་བྱེད་པ་སྟེ། རིག་པའི་ངོ་བོ་ཁྱབ་གདལ་ནམ་མཁའི་ཁོར་ཡུག་ཡུལ་མེད་ཟང་ཐལ་ཆེན་པོ་གཞི་མེད་རྩ་བྲལ་གྱི་རོལ་བ་དེ་ཉིད་སྤྲོས་པ་དང་བྲལ་བས་ཆོས་སྐུ། རང་བཞིན་རང་གསལ་གྱི་ཆ་ནས་ལོངས་སྐུ། ཡེ་ཤེས་ཀྱི་གསལ་སྒོ་མ་འགགས་པའི་ཆ་ནས་སྤྲུལ་སྐུ། འཁོར་འདས་ཀྱི་སྤྱི་གཞིར་གྱུར་པའི་ཆ་ནས་ངོ་བོ་ཉིད་སྐུའོ། །གཞི་གཏན་ལ་ཕབ་ནས་འཁོར་འདས་ཆོས་ཉིད་ཀྱི་དབྱིངས་སུ་རོ་གཅིག་པའི་ངང་ཚུལ་རྟོགས་པ་ཆོས་དབྱིངས་ཡེ་ཤེས། སྟོང་པ་བེམ་སྟོང་དུ་མ་སོང་བར་དྭངས་གསལ་རྙོག་མ་དང་བྲལ་ཞིང་ཅིར་ཡང་འཆར་དུ་རུང་བ་མེ་ལོང་གཡའ་བྲལ་ལྟ་བུ་ལ་མེ་ལོང་ཡེ་ཤེས། འཁོར་འདས་སྟོང་ཉིད་ཆེན་པོར་དག་མཉམ་དུ་ཡོད་པའི་ངང་ཚུལ་ཤེས་པ་མཉམ་ཉིད་ཡེ་ཤེས། རིག་རྩལ་སོ་སོར་རྟོགས་པའི་ཡེ་ཤེས་ཀྱི་གསལ་སྒོ་མ་འགགས་པ་སོར་རྟོག་ཡེ་ཤེས། རིག་པ་ལ་རང་དབང་བསྒྱུར་བས་དག་གྲོལ་གཉིས་ལྡན་གྱི་བྱ་བ་རང་གྲུབ་པས་བྱ་གྲུབ་ཡེ་ཤེས་འདིའི་ཡིན་ལུགས་ཇི་ལྟ་བ་བཞིན་དུ་མི་ཤེས་ཤིང་སེམས་རིག་གི་དབྱེ་བ་མི་ཕྱེད་པའི་ཤེས་པ་བཟོ་མེད་ལམ་དུ་བྱེད་པ་མང་ཡང་། དེ་རྣམས་ནི་ཕྱི་སྣང་བ་ལ་ལུང་མ་བསྟན་དངོས་པོ་མཚན་མ་ཅན་དུ་བཟུང་། ནང་རང་ལུས་ལ་ལུང་མ་བསྟན་རྟག་པ་དངོས་འཛིན་གྱི་འཆིང་བས་དམ་དུ་འཁྱུད། དེ་གཉིས་ཀྱི་བར་ལྟ་བུར་ཤེས་པ་གསལ་རིག་གོ་མ་འགགས་པ་ཙམ་ལ་བརྟན་པ་ཐོབ་ཀྱང་ཁམས་གོང་མ་གཉིས་སུ་འཕེན་བྱེད་ཀྱི་དགེ་བར་འགྱུར་སྲིད་པ་ཙམ་ལས་ཐར་པ་དང་རྣམ་མཁྱེན་གྱི་གོ་འཕང་མི་འཐོབ་པས་སྐྱོན་དང་བཅས་པ་ཡིན། འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་ཉིད་དེ་བཞིན་ཉིད་ཀྱི་ངང་དུ་རོ་གཅིག་པའི་ངང་ཚུལ་ཇི་ལྟ་བ་བཞིན་དུ་ཤེས་པ་ལ་ཇི་ལྟ་བ་ཤེས་པའི་ཤེས་རབ། རིག་པའི་ངོ་བོ་དེའི་ངང་དུ་གནས་ཀྱང་ཀུན་ཤེས་ཀུན་རིག་གི་ཤེས་པ་གོ་མ་འགག་པར་རང་བྱུང་བ་ནི་ཇི་སྙེད་པ་ཤེས་པའི་ཤེས་རབ་སྟེ། དེ་ལྟར་གོ་མ་འགགས་ཀྱང་ཡུལ་ལ་མི་འཇུག་པ་ནི་དཔེར་ན་དངུལ་ཆུའི་ཐིག་པ་ས་ལ་ལྷུང་བ་ལྟ་བུའོ། །སེམས་ནི་འཁོར་འདས་རང་རྒྱུད་པར་བལྟ་ཞིང་སྣང་བ་ལ་དངོས་པོར་འཛིན་པ་བཞིའི་གནས་ལུགས་མ་རིག་པའོ། །དེ་ལས་སེམས་བྱུང་གི་རྟོག་པ་སྐྱེ་འགག་ཅན་ཡུལ་དང་འདྲེས་པར་བྱུང་བ་ནི་ས་སྐམ་དུ་ཆུ་ཐིག་བབས་པ་ལྟ་བུའོ། །གཞི་ལ་རང་དབང་བསྒྱུར་བ་དག་པ་གཞིའི་སངས་རྒྱས་ཀྱི་རང་ཞལ་མ་རིག་པས་བསྒྲིབ་པ་ལས་གཞིའི་ངང་མདངས་ཀྱི་སྐུ་དང་ཡེ་ཤེས་ཐམས་ཅད་ནང་མདངས་སུ་ནུབ་སྟེ་ཕྱི་གདངས་ཕྱི་རུ་འཕོས་ཏེ་འོད་ལྔའི་རྣམ་པས་འབྱུང་ལྔའི་རོལ་པར་མཆེད་པའི་ཚུལ་ནི། ཆོས་དབྱིངས་ཡེ་ཤེས་མ་རིག་པས་བསྒྲིབ་པས་ཕྱི་གདངས་འོད་མཐིང་དུ་སྣང་བ་ནང་འབྱུང་དང་ནམ་མཁའི་དྭངས་མ་འབྱུང་ཆེན་ཞེས་བྱ་བ་ཡིན། འོད་ལ་བདེན་འཛིན་དངོས་ཞེན་སྐྱེས་པས་ནམ་མཁར་སྣང་སྟེ་དེ་ལ་ཕྱི་འབྱུང་འབྱུང་ཕྲན་སྙིགས་མའི་སྣང་བ་ཞེས་བྱའོ། །མེ་ལོང་ཡེ་ཤེས་མ་རིག་པས་བསྒྲིབ་སྟེ་ནང་མདངས་སུ་ནུབ་པས་ཕྱི་གདངས་འོད་དཀར་པོའི་ཁ་དོག་ཏུ་སྣང་བ་ཆུའི་དྭངས་མ་དང་འབྱུང་ཆེན་ནང་འབྱུང་། དེ་ལ་དངོས་འཛིན་བདེན་ཞེན་སྐྱེས་པས་ཆུ་རུ་སྣང་བ་སྙིགས་མ་དང་འབྱུང་ཕྲན་ཕྱི་འབྱུང་། མཉམ་ཉིད་ཡེ་ཤེས་མ་རིག་པས་བསྒྲིབ་སྟེ་ནང་མདངས་སུ་ནུབ་པས་ཕྱི་གདངས་འོད་སེར་པོའི་ཁ་དོག་ཏུ་སྣང་བ་སའི་དྭངས་མ་དང་ནང་འབྱུང་འབྱུང་ཆེན། དེ་ལ་དངོས་འཛིན་བདེན་ཞེན་སྐྱེས་པས་ས་རུ་སྣང་བ་སྙིགས་མ་འབྱུང་ཕྲན་ཕྱི་འབྱུང་། སོར་རྟོག་ཡེ་ཤེས་མ་རིག་པས་བསྒྲིབ་སྟེ་ནང་མདངས་སུ་ནུབ་པས་ཕྱི་གདངས་འོད་དམར་པོའི་ཁ་དོག་ཏུ་སྣང་བ་མེའི་དྭངས་མ་དང་ནང་འབྱུང་འབྱུང་ཆེན། དེ་ལ་དངོས་འཛིན་བདེན་ཞེན་སྐྱེས་པས་མེ་རུ་སྣང་བ་སྙིགས་མ་འབྱུང་ཕྲན་ཕྱི་འབྱུང་། བྱ་གྲུབ་ཡེ་ཤེས་མ་རིག་པས་བསྒྲིབ་སྟེ་ནང་མདངས་སུ་ནུབ་པས་ཕྱི་མདངས་འོད་ལྗང་གུའི་ཁ་དོག་ཏུ་སྣང་བ་རླུང་གི་དྭངས་མ་དང་ནང་འབྱུང་འབྱུང་ཆེན། དེ་ལ་དངོས་འཛིན་བདེན་ཞེན་སྐྱེས་པས་རླུང་དུ་སྣང་བ་སྙིགས་མ་འབྱུང་ཕྲན་ཕྱི་འབྱུང་ཞེས་བྱའོ། །འོད་གདངས་དེ་དག་ནང་ན་གནས་པའི་རྐྱེན་ལས་ཁ་དོག་སྣ་ཚོགས་དང་འབྱུང་བ་ལྔའི་སྣང་བ་རྒྱུན་མི་ཆད་པར་སྣང་བ་ཡིན་ནོ། །འཁྲུལ་པའི་གཞི་ལྔ་དེ་དག་གི་རྩལ་དུ་ཤར་བ་ནི་འདི་ལྟ་སྟེ། གཞི་མ་རིག་པས་བསྒྲིབ་པ་ལས་ཀུན་གཞི་མཚན་ཉིད་པ་བེམ་སྟོང་ནམ་མཁའ་ལྟ་བུ་ཅི་ཡང་མི་སེམས་ཤིང་མི་སྣང་བ་སྟེ། དཔེར་ན་གཉིད་འཐུག་པོ་དང་བརྒྱལ་བའི་གནས་སྐབས་ལྟ་བུའོ། །དེའི་ངང་དུ་འབྱམས་ཀླས་པ་ནི་གཏི་མུག་གི་ངོ་བོ་སྟེ་མ་རིག་པའི་ཡོ་ལངས་ཆེན་པོའོ། །དེ་ལས་བསྐལ་བ་ལས་ཀྱི་རླུང་འགུལ་བ་ནི་ཕྲག་དོག་གི་ངོ་བོ་ཡིན། དེའི་བྱེད་ལས་ཀྱིས་སྟོང་པ་ལས་གསལ་ཆ་ཐོན་པ་ཀུན་གཞིའི་རྣམ་ཤེས་ཏེ་ཞེ་སྡང་གི་ངོ་བོར་གནས་པ་ཡིན། དེ་ལས་བདག་སྣང་ཙམ་ལ་ངར་འཛིན་སྐྱེས་པ་ཉོན་ཡིད་དེ་ང་རྒྱལ་གྱི་ངོ་བོར་གནས། དེ་ལས་ཡིད་ལངས་ཏེ་གཞི་བེམ་སྟོང་ལ་སྣང་བ་མཆེད་རུང་གི་ནུས་པ་བཞག་ཅིང་གསལ་ཆ་བཏོན་པ་འདོད་ཆགས་ཀྱི་ངོ་བོར་གནས་པ་ཡིན། དེ་དག་ཐམས་ཅད་ནང་མདངས་ལས་ངོ་བོ་ལྔ་ཕྱི་རྩལ་དུ་ཤར་བ་ཡིན། དུག་ལྔའི་ངོ་བོ་མེ་ལྟ་བུ་ལས་ཉོན་མོངས་པའི་རྟོག་ཚོགས་མེ་སྟག་མཆེད་པ་ལྟ་བུའོ། །དེ་ལྟར་ཀུན་གཞི་དང་ཡིད་མཉམ་པར་བརྡལ་བའི་སྟོང་གསལ་གྱི་ཆ་ལ་སྣང་བ་མཆེད་པའི་ཡུལ་གོ་མ་འགགས་པར་ཡོད་པ་ལས། ལས་རླུང་གཡོ་བའི་རྐྱེན་དང་རྒྱུ་གཞི་འཆར་རུང་གི་ནུས་པ་ཅན་གཉིས་ཀ་རྒྱུ་རྐྱེན་དུས་འཛོམ་པ་ལས་གཞི་ལ་བརྟེན་ཅིང་གཞི་རང་ལས་མི་གཞན་པར་འབྲེལ་བའི་ཚུལ་གྱིས་གཟུགས་སུ་སྣང་བ་སྣ་ཚོགས་མཆེད་པ་སྟེ། གཟུགས་སྣང་མཆེད་པའི་ཡུལ་གང་ཡིན་པ་དེ་ལ་མིག་གི་རྣམ་པར་ཤེས་པ་ཞེས་ཐ་སྙད་ཙམ་དུ་བརྗོད་པའོ། །དེས་ན་སྣང་ཡུལ་རྒྱ་མཚོ་ལྟ་བུ་ལ་ཡུལ་དང་། གཟུགས་སྣང་གཟའ་སྐར་ལྟ་བུ་ལ་གཟུང་བ་ཞེས་བྱའོ། །དེ་ལས་འཛིན་པ་ཡིད་ཀྱི་རྣམ་ཤེས་ཕྲ་མོས་གཟུགས་དེ་ལ་མིང་བཏགས་དོན་བཟུང་དངོས་པོར་བལྟས་ཏེ་བདེ་སྡུག་བར་མ་གསུམ་ཉེ་བར་ལེན་པའི་རྣམ་པར་རྟོག་པ་ཤར་བ་ལ་ནི་མིག་གི་འཛིན་པ་སེམས་ཞེས་བྱའོ། །དེ་བཞིན་དུ་སྒྲ་མཆེད་པའི་ཡུལ་གོ་མ་འགགས་པ་ལ་ཡུལ་དང་། སྒྲ་རུ་སྣང་བ་མཆེད་པ་ལ་གཟུང་བ་དང་། ཉེར་ལེན་ཡིད་ཤེས་ལ་འཛིན་པ་སེམས་ཞེས་བྱ་སྟེ། གོང་ལྟར་རྒྱུ་རྐྱེན་ཚོགས་པའི་རྟེན་འབྲེལ་ལོ། །དེ་བཞིན་དུ་དྲི་རུ་སྣང་བ་མཆེད་པ་ལ་སྣའི་རྣམ་པར་ཤེས་པ་དང་། རོ་རུ་སྣང་བ་མཆེད་པ་ལ་ལྕེའི་རྣམ་པར་ཤེས་པ་དང་། རེག་བྱའི་སྣང་བ་མཆེད་པ་ལ་ལུས་ཀྱི་རྣམ་པར་ཤེས་པ་རྣམས་མིང་ཐ་སྙད་ཙམ་དུ་བརྗོད་པ་ལས་བུག་སྒོ་ཐ་དད་པར་སྣང་བ་མ་ཡིན་པར་རྨི་ལམ་དང་བར་སྲིད་ཀྱི་སྐབས་སྟོན་ཏོ། །འགའ་ཞིག་གིས་སྣང་བ་སེམས་སུ་འདོད་ཅིང་ཕྱི་རོལ་གྱི་སྣང་བ་ཐམས་ཅད་རྣམ་རྟོག་དང་རང་སེམས་དངོས་ཡིན་ནམ་སྙམ་དུ་སེམས་ཀྱང་དེ་ལྟར་མ་ཡིན་ཏེ། སྣང་བ་རྣམས་སྣང་ཙམ་ཉིད་ནས་གནས་འགྱུར་ཏེ་སྐད་ཅིག་སྔ་ཕྱིའི་རིམ་པས་འགགས་ནས་འགྲོ་བ་ལ། སེམས་ནི་དེ་དང་དེའི་ངོ་བོར་འཕོས་ཏེ་རང་ཉིད་སེམས་མེད་དུ་མ་སོང་བ་དེས་སྟོན་ཏོ། །དེ་ལྟར་ཚོགས་བརྒྱད་ཀྱི་སྣང་བ་ལུགས་སུ་འབྱུང་བས་འཁོར་བ་ཡོངས་སུ་མཆེད། ཡང་ཀུན་གཞིའི་རྣམ་ཤེས་ཀྱི་བར་ལུགས་སུ་ལྡོག་པས་སྲིད་པའི་རྩེ་རུ་དུབ་པ་ཡིན་ནོ། །དེ་ལྟར་སྣང་སྲིད་འཁོར་འདས་ཐམས་ཅད་གཞི་རང་ལས་མི་གཞན་པར་གཞི་ཉིད་དུ་རོ་གཅིག་པ་དཔེར་ན་རྒྱ་མཚོར་གཟའ་དང་རྒྱུ་སྐར་གྱི་གཟུགས་བརྙན་སྣ་ཚོགས་སྣང་ཡང་དོན་ལ་ཆུ་ཉིད་དུ་རོ་གཅིག་པ་ལྟ་བུར་ཤེས་པར་གྱིས་ཤིག། སྣང་བ་ཐམས་ཅད་རང་སྣང་དུ་སྟོན་པ་རྡོ་རྗེ་འཆང་གི་མན་ངག་གོ། ཞེས་གསུངས་ཤིང་མི་སྣང་བར་ཡལ་ལོ། །ཡང་དུས་རེ་ཞིག་གི་ཚེ་རིག་འཛིན་ཆེན་པོ་ཧཱུྃ་ཆེན་ཀཱ་རའི་ཞལ་མཇལ་བའི་ཚེ། བདག་གིས་སྣང་བའི་བཀོད་པ་འདི་ཇི་ལྟ་བུ་ལགས་ཞེས་ཞུས་པས། བཀའ་སྩལ་པ། ཀྱཻ་སྐྱེས་བུ་ཆེན་པོ་སྒོ་ལྔའི་རྣམ་ཤེས་ནམ་མཁའ་ལྟ་བུ་ཅིར་ཡང་མཆེད་དུ་རུང་བ་དང་། རྣམ་པར་རྟོག་པ་སྒྱུ་མའི་རྫས་སྔགས་ལྟ་བུ་གཉིས་དུས་འཛོམ་པ་ལས་སྣང་བའི་བཀོད་པ་སྒྱུ་འཕྲུལ་ལྟ་བུར་འབྱུང་བ་ཡིན་ལ། ཉེར་ལེན་གྱི་ཤེས་པ་ནི་ལྟད་མོ་མཁན་ལྟ་བུའོ། །དེས་ན་མཆོད་རྫས་དང་སྦྱིན་པའི་རྫས་ཐམས་ཅད་སྒྱུ་མའི་རྫས་ལྟ་བུ་དང་། སྦྱང་སྔགས་ཀྱིས་སྟོང་ཉིད་དུ་སྦྱངས་ནས་སྤེལ་སྔགས་ཀྱིས་མཆོད་སྦྱིན་གྱི་ཡུལ་གང་ཡིན་པ་དེའི་དབང་པོ་དྲུག་གི་ཡུལ་དུ་འདོད་ཡོན་གྱི་སྣང་བ་དཔག་ཏུ་མེད་པར་མཆེད་པར་བྱས་ཏེ། མཉེས་པར་བྱེད་པ་སྒྱུ་མ་ལྟ་བུའི་རྣལ་འབྱོར་གྱི་སྒོ་དང་། ཡང་སྒྱུ་མ་ལྟ་བུའི་རྣལ་འབྱོར་གྱིས་སྤྲུལ་པ་ལྟ་བུའི་སེམས་ཅན་ལ་དྲི་ཟའི་གྲོང་ཁྱེར་ལྟ་བུའི་སྣང་ཡུལ་བཀོད་དེ་རྨི་ལམ་ལྟ་བུའི་དམིགས་བསྒྱུར་གྱིས་བསྒྲལ་འདྲེན་སོགས་བྱེད་པས་སྒྱུ་མའི་རྣལ་འབྱོར་ཆེན་པོར་དབང་བསྒྱུར་བའོ། །མཚོ་ལ་གཟའ་སྐར་ཇི་ལྟར་མང་ཡང་ཆུ་ཉིད་ཀྱིས་ཆིངས་པ་དང་། སྣོད་བཅུད་ཇི་ལྟར་མང་ཡང་ནམ་མཁའ་གཅིག་གིས་ཆིངས་པ་དང་། འཁོར་འདས་ཀྱི་སྣང་བ་ཇི་ལྟར་རྒྱ་ཆེ་ལ་གྲངས་མང་ཡང་སེམས་ཉིད་གཅིག་གིས་ཆིངས་པའི་ཚུལ་ལ་ལྟོས་ཤིག། སེམས་ཉིད་བདེ་གཤེགས་སྙིང་པོ་ཞེས་བྱ་བ་ནི་ཕྱལ་བ་སྐྱོན་གྱིས་མ་གོས་པ། དཔེར་ན་སངས་རྒྱས་ནམ་མཁའ་གང་བ་ཞིག་ཡོད་སྲིད་ནའང་དེའི་ཡེ་ཤེས་ཡོན་ཏན་གྱིས་ཕན་བཏགས་པའི་ཡུལ་མེད་པས་ཕྱལ་བ་དང་། སེམས་ཅན་རང་རྒྱུད་པ་ནམ་མཁའི་མཐའ་དང་མཉམ་པ་ཙམ་ཡོད་སྲིད་ནའང་གནོད་པ་བྱེད་པའི་ཡུལ་མེད་པས་ཕྱལ་བའོ། །གཞིའི་ཆོས་སྐུ་བདེ་བར་གཤེགས་པའི་སྙིང་པོ་དེ་སྐྱེ་བའི་གནས་ཡུལ་བདག་པོ་ཐམས་ཅད་དང་བྲལ་བས་སྐྱེ་བའི་མཐའ་དང་བྲལ་བ། འགག་པའི་དུས་དང་བདག་པོ་ལས་འདས་པས་འགག་པའི་མཐའ་དང་བྲལ་བ། ཡོད་པ་དངོས་པོའི་ཕྱོགས་སུ་མ་ལྷུང་བར་རྒྱལ་བའི་སྤྱན་གྱིས་ཀྱང་མི་གཟིགས་པའི་ཕྱིར་རྟག་པའི་མཐའ་དང་བྲལ་བ། མེད་པ་ཅང་མེད་དུ་མ་སོང་བར་འཁོར་འདས་ཀྱི་སྤྱི་གཞིར་གྱུར་པས་ཆད་པའི་མཐའ་དང་བྲལ་བ། འགྲོ་བའི་གནས་ཡུལ་བདག་པོ་ཐམས་ཅད་ལས་འདས་པས་འགྲོ་བའི་མཐའ་དང་བྲལ་བ། འོང་བའི་གནས་ཡུལ་བདག་པོ་མ་གྲུབ་པའི་ཕྱིར་འོང་བའི་མཐའ་དང་བྲལ་བ། གཞི་བདེ་གཤེགས་སྙིང་པོའི་ཀློང་དུ་འཁོར་འདས་ཀྱི་ཆོས་ཐམས་ཅད་རྒྱ་མཚོའི་ནང་གི་གཟའ་སྐར་ལྟར་མ་འདྲེས་སོ་སོར་ཤར་བའི་ཕྱིར་དོན་གཅིག་པའི་མཐའ་དང་བྲལ་བ། འཁོར་འདས་ཀྱི་རྣམ་པ་ཇི་ལྟར་ཤར་ཡང་རྒྱ་མཚོའི་གཟའ་སྐར་རྒྱ་མཚོ་ལས་མི་གཞན་པ་ལྟར་གཞི་བདེ་གཤེགས་སྙིང་པོ་ཉིད་དུ་རོ་གཅིག་པའི་ཕྱིར་ཐ་དད་པའི་མཐའ་དང་བྲལ་བ་སྟེ། སྤྲོས་པའི་མཐའ་བརྒྱད་པོ་གང་དུའང་མ་ལྷུང་བའི་ཕྱིར་ཕྱལ་བ་སྐྱོན་གྱིས་མ་གོས་པའོ། །ཡང་སྟེང་འོག་ཕྱོགས་མཚམས་བར་དང་དུས་ལས་འདུས་པས་སྟོང་པ་དང་། ཡོངས་ལ་ཁྱབ་ཅིང་ཡོངས་སུ་བརྡལ་བས་སྟོང་པ་དང་། ཕྱི་སྣང་བ་ཐམས་ཅད་དངོས་མཚན་བདེན་གྲུབ་ཏུ་མ་མཆིས་པས་ཕྱི་སྟོང་པ་དང་། ནང་རང་སེམས་གཞི་རྩ་ཐམས་ཅད་ལས་འདས་པས་ནང་སྟོང་པ་ཉིད་དང་། བར་གཟུང་འཛིན་གཉིས་སུ་མི་ཕྱེད་པས་བརྡལ་ཁྱབ་ཆེན་པོ་དོར་བ་མེད་པའི་སྟོང་པ་ཉིད་དེ་རྣམ་པར་ཐར་བའི་སྒོ་སྟོང་པ་ཉིད་དང་། གཞིའི་ཆོས་སྐུ་བདེ་གཤེགས་སྙིང་པོ་ཚིག་ཏུ་བརྗོད་བྱའི་མཚན་མ་དང་བྲལ་བ། དཔེའི་མཚུངས་ཟླ་ལས་འདས་པ། དོན་གྱིས་སྟོན་བྱའི་དངོས་པོས་སྟོང་པ་སྟེ་རྣམ་པར་ཐར་བའི་སྒོ་མཚན་མ་མེད་པ་དང་། ཆོས་ཉིད་བདེ་གཤེགས་སྙིང་པོ་དུས་གསུམ་དུ་བདེ་བར་གཤེགས་པ་དེ་ལ་ལུས་དང་ངག་གི་དགེ་སྦྱོར་ཙམ་གྱིས་འབྲས་བུ་ཡུལ་ཞིང་ཁམས་གཞན་དུ་འགྲོ་ཞིང་གྲོལ་བར་སེམས་ན་ཁྱབ་བརྡལ་ནམ་མཁའི་ཁོར་ཡུག་འགྲོ་འོང་གི་ཡུལ་དང་བདག་པོར་སེམས་པ་ནི་ཤིན་ཏུ་མགོ་འཁོར་ཞིང་བློ་རྨོངས་པར་གྱུར་ཏོ། །ལམ་གང་ཡིན་ན་རང་ཐོག་ཏུ་རང་ས་བཟུང་བ་ཉིད་དང་། རྟོགས་པ་གང་ལགས་ན་རང་ངོ་གནས་ལུགས་ཚུལ་བཞིན་ཤེས་པ་ཉིད་དང་། གྲོལ་བ་གང་ལགས་ན་རང་ངོར་སངས་རྒྱས་པ་ཉིད་ལས། གྲོལ་ས་དང་གྲོལ་ཡུལ་གཞན་དུ་འཛིན་ཅིང་འབད་རྩོལ་བྱེད་པ་ནི་ཤིན་ཏུ་འཁྲུལ་བ་ཡིན་པས། དོན་དམ་པར་འབྲས་བུ་ལ་ཡིད་སྨོན་ཙམ་ཡང་འཆའ་བའི་གནས་མེད་པས་ན་རྣམ་པར་ཐར་བའི་སྒོ་སྨོན་པ་མེད་པའོ། །ཀྱཻ་ཁྱེའུ་ཆུང་རིག་པའི་དབང་པོ་ཁྱོད་ཀྱིས་འདི་ལྟར་བཤད་པ་དང་ཐོས་པ་ཙམ་གྱིས་གྲོལ་བར་མི་འགྱུར་ཏེ། བཤད་ཟིན་པ་དེ་དག་གི་ངང་ཚུལ་ལ་བརྟག་ཅིང་དཔྱོད་ལ་མྱོང་བ་གཏིང་ནས་ཐོན་ཅིང་ཤེས་རིག་རྒྱུད་བརྟན་པ་ཞིག་མཛོད་ལ་སྣོད་དང་ལྡན་པའི་སྐལ་ལྡན་རྣམས་ལ་སྟོན་ཅིག། རྩེ་གཅིག་ཉམས་སུ་ལེན་པའི་སྐྱེས་བུ་རྣམས་ལ་ངའི་དགོངས་རྒྱུད་འཕོས་ཏེ་རིང་པོར་མི་ཐོགས་པར་གྲོལ་བ་འཐོབ་པར་གདོན་མི་ཟའོ། །ཞེས་གསུངས་ཤིང་མི་སྣང་བར་ཡལ་ལོ། །ཡང་འོད་གསལ་ཉམས་ཀྱི་སྣང་ངོར་འཇམ་དཔལ་སྨྲ་བའི་སེངྒེའི་ཞལ་མཇལ་བའི་ཚེ་བདག་གིས་འདི་སྐད་ཞུས། ཀྱཻ་སྟོན་པ་འཇིག་རྟེན་མགོན་པོ་ལགས། སྣོད་བཅུད་ཀྱི་སྣང་བ་ཐམས་ཅད་རང་སྣང་ལས་མི་གཞན་པའི་ངང་ཚུལ་ཇི་ལྟ་བ་བཞིན་དུ་ཐག་ཆོད་ཀྱང་། སངས་རྒྱས་ཐམས་ཅད་ཀྱི་མིང་དང་ཞིང་ཁམས་ཐ་དད་དུ་ཡོད་པ་རྣམས་ཡུལ་རང་རྒྱུད་པར་གྲུབ་དང་མ་གྲུབ་པའི་ཚུལ་བདག་ལ་བསྟན་དུ་གསོལ། ཅེས་ཞུས་པས་སྟོན་པ་ཉིད་ཀྱིས་བཀའ་སྩལ་པ། ཀྱཻ་སྐྱེས་བུ་ཆེན་པོ་ཁྱོད་ཉོན་ཅིག། གཞིའི་ཆོས་སྐུ་བདེ་གཤེགས་སྙིང་པོའི་ནང་མདངས་ལྷུན་གྲུབ་རིན་པོ་ཆེའི་ཡོན་ཏན་ལ་གཞི་བྱས་ཏེ་སངས་རྒྱས་ཀྱི་ཞིང་དང་ལྷ་ཡབ་ཡུམ་གཞལ་ཡས་ཁང་དང་བཅས་པར་བསྟན་པ་རྣམས་གཞི་རང་ལ་རང་ཆས་སུ་རྫོགས་པ་ནི་ཤེས་རབ་དང་། ཡུལ་གཞན་དུ་གྲུབ་པར་བསྟན་པ་ནི་ཐབས་སོ། །གཞི་རང་ལ་ཡོན་ཏན་རྫོགས་པ་ནི་དོན་དམ་པ། གཞན་དུ་ཡུལ་སྣོད་བཅུད་ཅན་ཡོད་པར་འཆད་པ་ཀུན་རྫོབ་བོ། །ཡང་གཞི་རང་གི་ལྷུན་གྲུབ་སྐུ་དང་ཡེ་ཤེས་ཀྱི་རོལ་པ་ནི་ངེས་དོན་དང་། ཡུལ་གཞན་དུ་སངས་རྒྱས་ཀྱི་ཞིང་དང་ལྷ་ཕོ་མོའི་མིང་སོགས་དངོས་པོ་མཚན་མ་ཅན་དུ་འཆད་པ་ཐམས་ཅད་དྲང་དོན་ཡིན་ནོ། །འཁོར་བའི་སྒོར་བསྟུན་ནས་དོན་དམ་ཀུན་རྫོབ་ཏུ་བསྟན་པ་ནི་འདི་ལྟ་སྟེ། རྒྱལ་བ་ཐམས་ཅད་སྐུ་ལྔའི་ཆིངས་ཀྱིས་བཅིང་ཚུལ་ནི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གཞི་དབྱིངས་སྟོང་ཉིད་ཆེན་པོར་མ་བཅོས་རང་ཆས་སུ་ཡོད་པའི་ཆོས་ཉིད་ཆེན་པོ་ལ་ཆོས། ཁམས་དང་དབང་པོའི་བྱེ་བྲག་བསམ་གྱིས་མི་ཁྱབ་པ་ལས་ལམ་གྱི་འཇུག་སྒོ་དང་། ཉམས་ཀྱི་མྱོང་བ་དང་། འབྲས་བུའི་ཐོབ་བྱ་བསམ་གྱིས་མི་ཁྱབ་པ་རང་ཆས་སུ་ཡོད་པ་ལ་སྐུ་ཞེས་བྱའོ། །ལྷུན་གྲུབ་སྐུ་དང་ཡེ་ཤེས་ཀྱི་རོལ་བ་ལོངས་སྤྱོད་དུ་རང་ཆས་སུ་རྫོགས་པ་ལ་ལོངས་སྐུ། ངང་ལས་སྤྲུལ་པ་འགྱེད་སྙམ་གྱི་བློ་ཡིད་མ་གཡོས་ཤིང་། གཞི་རང་ལས་མི་གཞན་པའི་ཚུལ་དུ་སྟོན་པ་སྤྲུལ་སྐུ་དང་། བཟོ་སྤྲུལ་སྐུ་དང་། སྐྱེ་བ་སྤྲུལ་སྐུ། བེམ་པོ་སྤྲུལ་སྐུ་རྣམས་ངར་འཛིན་གྱི་ཤེས་པ་ཆུ་སྣོད་ལྟ་བུ་དང་བདེ་གཤེགས་སྙིང་པོའི་དབྱིངས་ཀྱི་ཡོན་ཏན་ནམ་མཁའི་གཟའ་སྐར་ལྟ་བུ་དུས་འཛོམ་པའི་ཚེ་རྟེན་འབྲེལ་སྤྲུལ་པ་རྣམ་བཞིར་སྣང་བ་ཡིན་ནོ། །དོན་ལ་སྣོད་བཅུད་སྐུ་གསུམ་གྱི་རོལ་པ་ལས་མ་འདས་པ་སྟེ། ངོ་བོ་སྟོང་པའི་ཆ་ལ་ཆོས་སྐུ། རང་བཞིན་ལྷུན་གྲུབ་ཀྱི་ཆ་ལ་ལོངས་སྐུ་སོ་སོར་སྣང་བའི་ཆ་ལ་སྤྲུལ་སྐུ་ཞེས་བྱའོ། །ཡང་གཞི་ཉིད་འཁོར་འདས་ཐམས་ཅད་ཀྱི་ངོ་བོར་གྱུར་ཅིང་ངོ་བོ་ཉིད་དུ་ཐམས་ཅད་རོ་གཅིག་པས་ངོ་བོ་ཉིད་ཅེས་བྱའོ། །ཡེ་ཤེས་ཡོན་ཏན་ཐམས་ཅད་བསགས་ནས་སྤུངས་པ་ལྟ་བུ་ལ་སྐུ་ཞེས་བྱའོ། །དུས་གསུམ་འཕོ་བ་མེད་ཅིང་ངོ་བོ་གཞན་དུ་མི་འགྱུར་བས་མི་འགྱུར། གཞན་གང་གིས་རྨ་མི་འབྱུང་པས་མི་ཆོད་པ། རང་དང་གཞན་གྱིས་མི་ཤིགས་པ། འཁོར་འདས་ཀྱི་སྤྱི་གཞིར་གནས་པས་བདེན་པ། བཟང་ངན་གྱི་བསླད་མི་འཇུག་པས་སྲ་བ། གཡོ་འགུལ་དང་བྲལ་བས་བརྟན་པ། ཤེས་སྒྲིབ་ཕྲ་བ་ཡན་ཆད་འབིག་ནུས་པས་ཐམས་ཅད་དུ་ཐོགས་པ་མེད་པ། ཡུལ་རྐྱེན་གང་གིས་མི་ཐུབ་པས་ཐམས་ཅད་དུ་མ་ཕམ་པའོ། །དེ་ལྟར་དོན་དམ་མི་ཤིགས་པའི་རྡོ་རྗེའི་གནས་ལུགས་ལས་དང་སྐལ་བར་ལྡན་པའི་སྐྱེས་བུ་མ་གཏོགས་སེམས་ཅན་གང་རུང་གིས་རྟོགས་མི་སྲིད་པ། རྟོགས་ནས་ཉམས་སུ་བླངས་པས་གདིང་མི་ཐོབ་མི་སྲིད་པ། གདིང་ཐོབ་ཚེ་མི་གྲོལ་མི་སྲིད་པ། གྲོལ་ཚད་འཚང་མི་རྒྱ་མི་སྲིད་པས་ན་དམ་བཅའ་བཞི་དང་ལྡན་པའོ། །སྐུ་ལྔ་པོ་དེ་དག་གཞི་རང་ལ་རང་ཆས་སུ་ཡོད་པ་དོན་དམ་པ་ཡིན་ཏེ། དེ་ལས་ཐ་དད་པར་འཆད་པ་ནི་ཀུན་རྫོབ་ཐབས་ཀྱི་ལམ་ཞེས་བྱའོ། །འགྲོ་བ་རྣམས་རིགས་ལ་མངོན་པར་ཞེན་པ་དེ་དང་བསྟུན་ཏེ་ལྷ་ལ་རིགས་བརྗོད་པའི་གཞི་ནི། གཞི་ཉིད་བག་ཆགས་ཀྱི་དྲི་མ་དབྱིངས་སུ་སངས་པས་སངས། ཡེ་ཤེས་དང་ཡོན་ཏན་གྱི་ངང་རྒྱས་པས་རྒྱས་ཞེས་བྱའོ། །མི་ཤིགས་པ་རྡོ་རྗེའི་ཆོས་བདུན་དང་ལྡན་པས་རྡོ་རྗེ། སྐུ་དང་ཡེ་ཤེས་ཐམས་ཅད་ཀྱི་འབྱུང་ཁུངས་སུ་གྱུར་པས་རིན་པོ་ཆེ། སྐྱོན་དང་དྲི་མས་མ་གོས་པས་པདྨ། ཕྲིན་ལས་ཡོངས་སུ་གྲུབ་པས་ལས་ཀྱི་རིགས་སོ། །རིགས་ཞེས་བྱ་བ་ནི་ཆིངས་དེས་བཅིངས་པའི་རང་རང་གི་ཁྱབ་པ་ལ་བརྗོད་པའོ། །མི་རྣམས་ཡུལ་ལ་མངོན་པར་ཞེན་པའི་ཡུལ་དང་བསྟུན་པའི་ཞིང་ཁམས་ལྔ་རུ་བསྟན་པ་ནི། གཞི་དབྱིངས་ཡོན་ཏན་ལྷུན་སྟུག་པའི་ཆ་ལ་སྟུག་པོ་བཀོད་པ། ཡུལ་རྐྱེན་བདག་པོས་མ་བསྐྱེད་པའི་དགའ་བ་ཆེན་པོ་ལྡན་པས་མངོན་པར་དགའ་བ། ཡེ་ཤེས་ཡོན་ཏན་གྱི་དཔལ་ཕུན་སུམ་ཚོགས་པ་དང་ལྡན་པས་དཔལ་ལྡན། བདེ་སྟོང་ཟག་པ་མེད་པའི་ཡེ་ཤེས་དང་ལྡན་པས་བདེ་བ་ཅན། དག་པ་དང་གྲོལ་བའི་ལས་ཐམས་ཅད་རབ་ཏུ་རྫོགས་པས་ལས་རབ་རྫོགས་པའོ། །ཞིང་ཞེས་བྱ་བ་དབྱིངས་ལ་བརྗོད་པ་དང་། ཁམས་ཞེས་བྱ་བ་ཁམས་དེ་ལས་མི་གཞན་པ་ལ་བྱའོ། །གཞིའི་ཡོན་ཏན་གཞལ་དུ་མེད་པས་གཞལ་ཡས། འཁོར་འདས་ཡོངས་སུ་གང་བས་ཁང་པའོ། །གཞི་དབྱིངས་ཁྱབ་བརྡལ་གྱི་རང་མདངས་ཁྱབ་བྱེད་ཀྱི་ཤེས་རབ་ཆེན་པོས་མངོན་དུ་གྱུར་པའི་ཚེ་བདེ་གཤེགས་སྙིང་པོའི་ཁམས་ཀྱི་ཡེ་ཤེས་ཡོན་ཏན་ཐམས་ཅད་རྣམ་པར་སྣང་བར་མཛད་པ་དང་། མི་ཤིགས་པ་རྡོ་རྗེའི་ཆོས་བདུན་དང་ལྡན་ཅིང་དུས་གསུམ་གཡོ་འགུལ་བྲལ་བས་མི་བསྐྱོད་རྡོ་རྗེ། ལམ་དང་འབྲས་བུའི་ཆོས་ཐམས་ཅད་ཀྱི་འབྱུང་གནས་དང་ཡོན་ཏན་ཕུན་སུམ་ཚོགས་པ་དང་ལྡན་པས་རིན་ཆེན་འབྱུང་ལྡན། གཞི་སྣང་མཐའ་ཡས་པ་ལ་སྣང་བ་མཐའ་ཡས། ཡང་དག་པའི་དོན་ཐམས་ཅད་རང་བྱུང་དུ་ཡོད་པ་ལས་དོན་ཡོད་གྲུབ་པ་ཞེས་བྱའོ། །དོན་གྱི་རྡོ་རྗེ་སྟོང་པ་ཉིད་ཀྱི་མཁའ་ལ་འཁོར་འདས་ཀྱི་ཆོས་ཐམས་ཅད་འགྲོ་འོང་གི་རྣམ་པར་སྣང་པས་རྡོ་རྗེ་མཁའ་འགྲོ། རིན་པོ་ཆེའི་མཛོད་ཁང་ལྟ་བུར་ཡེ་ཤེས་ཡོན་ཏན་ཐམས་ཅད་རང་བྱུང་བའི་ཆ་ལ་རིན་ཆེན་མཁའ་འགྲོ། ཆགས་པ་ཐམས་ཅད་དང་བྲལ་བའི་ཆ་ལ་པདྨ་མཁའ་འགྲོ། ལྷུན་གྲུབ་སྐུ་དང་ཡེ་ཤེས་ཀྱི་ལས་ཐམས་ཅད་བྱ་བས་མ་བྱས་རྩོལ་བས་མ་བསྒྲུབ་པར་རང་བྱུང་བའི་ཆ་ལ་ལས་ཀྱི་མཁའ་འགྲོ། ཉོན་ཤེས་ཀྱི་དྲི་མ་དབྱིངས་སུ་སངས་ཤིང་ཡེ་ཤེས་ཡོན་ཏན་གྱི་ངང་རྒྱས་པས་སངས་རྒྱས། སྟོང་ཉིད་ཆེན་པོའི་མཁའ་ཀློང་དུ་འཁོར་འདས་ཀྱི་སྣང་བ་ཐམས་ཅད་འགྲོ་འོང་གི་རྣམ་པར་སྣང་བས་མཁའ་འགྲོ་ཞེས་བྱའོ། །དེ་ལྟར་གཞིའི་ཆོས་སྐུ་བདེ་གཤེགས་སྙིང་པོ་འཁོར་འདས་ཀུན་ཁྱབ་ཀྱི་བདག་ཉིད་ཆེན་པོའི་ངང་མངོན་དུ་བྱེད་པ་ཉིད་ནི་གཞིའི་རིག་པ་མཐའ་གྲོལ་ཆེན་པོ་ཡིན་ལ། དོན་དམ་པའི་སྒྲུབ་པ་ཐམས་ཅད་འདིར་འདུས་པ་ནི། གཞིའི་རིག་པ་དཀོན་མཆོག་ཀུན་འདུས་ཀྱི་ངོ་བོར་རང་དམ་བཅས་ནས་རང་དབང་བསྒྱུར་བ་ནི་གནས་ལུགས་དོན་གྱི་སྐྱབས་འགྲོ་བླ་ན་མེད་པ་ཡིན། ཚེ་རབས་ཐོག་མ་མེད་པའི་དུས་ནས་རང་ཉིད་བདེན་པར་བཟུང་ཞིང་ཡུལ་ལ་མངོན་པར་ཞེན་པས་བློ་རྒྱ་ཤིན་ཏུ་ཆུང་བ་ལ་ད་ནི་འཁོར་འདས་རིག་པ་གཅིག་གི་ཡོ་ལང་དུ་ཐག་བཅད་ནས་སེམས་ཀྱི་རྒྱ་བསྐྱེད་པ་ནི་སེམས་བསྐྱེད་ཐམས་ཅད་ཀྱི་དམ་པར་གྱུར་པའོ། །གཟུང་འཛིན་གྱི་སེམས་ནི་ཁམས་གསུམ་འཁོར་བར་འཁྱམས་པའི་སྲིད་པའི་འདྲེ་བོ་ཆེ་ཡིན་ལ། དེ་སོ་སོར་རྟོག་པའི་ཤེས་རབ་ཀྱིས་ཡུལ་མེད་སྟོང་པ་ཉིད་དུ་བསྐྲད་ཅིང་། བདག་མེད་རྟོགས་པའི་ཤེས་རབ་མངོན་དུ་བྱེད་པ་བྱང་ཆུབ་སེམས་ཀྱི་སྲུང་འཁོར་གཞོམ་གཞིག་དང་བྲལ་བ་ཡིན། མ་རིག་པའི་མུན་ཁམས་སུ་རིག་པ་ཡེ་ཤེས་ཀྱི་བྱིན་ཆེན་དབབ་བྱིན་འབེབས་ཉིད་དང་། སྣང་བ་རིག་པའི་རྒྱན་དུ་ཤར་བའི་ངང་ཚུལ་རྟོགས་པས་རང་བྱུང་འདོད་ཡོན་གྱི་བཀོད་པ་མཆོད་པ་ཉིད་ཀྱང་ཡིན། ཀུན་གཞི་ཆོས་སྐུར་འཕོ་བ་གདོད་མ་གཞིའི་སངས་རྒྱས་ཏེ། དེའི་གནས་ལུགས་ཇི་ལྟ་བ་བཞིན་དུ་མཁྱེན་པའི་ཤེས་རབ་དང་། ཀུན་ཤེས་ཀུན་གསལ་གྱི་བདག་ཉིད་ཇི་སྙེད་པ་གཟིགས་པའི་ཤེས་རབ་མངོན་དུ་གྱུར་པ་ནི་རྒྱལ་དང་རྒྱལ་སྲས་ཐམས་ཅད་ཀྱི་གསང་བ་འདུས་པ་ཉིད་ཡིན་ལ། དང་པོ་རྟོགས་པའི་ཆ་ལ་བཀའ་སྲུང་དྲེགས་ཚོགས། ས་བརྒྱད་ཡན་ཆད་དུ་དབང་བསྒྱུར་བ་ལ་བྱང་ཆུབ་སེམས་དཔའ། མངོན་སངས་རྒྱས་པའི་ཆ་ལ་སངས་རྒྱས་དང་སངས་རྒྱས་ཀྱི་ཞིང་ཁམས་བཀོད་པ་ཐབས་ཀྱི་ལམ་ཡིན་ནོ། །ཀུན་གཞི་མ་རིག་པ་དབང་ཕྱུག་ཆེན་པོ། །དེ་ལས་ལྡང་བའི་རྟོག་ཚོགས་ཐམས་ཅད་བཀའ་སྲུང་ཆོས་སྐྱོང་སྡེ་བརྒྱད་ལྷ་འདྲེར་བཤད་པ་ཐབས་ཀྱི་སྒོ་སྟེ། གདོད་མ་གཞིའི་ཆོས་སྐུ་མངོན་དུ་གྱུར་པ་ལས་རང་བྱུང་གི་ཡེ་ཤེས་ཆེན་པོ་རྩལ་དུ་ཤར་བ་རྣམས་དུམ་བུར་བཅད་དེ་ཐབས་ཀྱི་ལམ་དུ་བཅོས་པ་ཡིན་ནོ། །དོན་དམ་པའི་སངས་རྒྱས་མངོན་དུ་བྱེད་པ་སྒྲུབ་པ་ཡིན་ཏེ། སྒྲུབ་དང་དཀྱིལ་འཁོར་ཐམས་ཅད་འདིར་འདུས་ཤིང་རྫོགས་པའོ། །ཁམས་གསུམ་འཁོར་བའི་ཆོས་ཐམས་ཅད་ཆོས་ཉིད་ཆེན་པོ་གཅིག་གི་རོལ་པས་འཕོས་ཏེ་ངང་མངོན་དུ་བྱེད་པ་སྤྱན་འདྲེན། དུས་གསུམ་འཕོ་འགྱུར་དང་བྲལ་བར་རང་ཐོག་ཏུ་རང་ས་འཛིན་པ་བཞུགས་གསོལ། ལྟ་བའི་རྒྱལ་པོ་གདོད་མ་གཞིའི་ཆོས་སྐུའི་རང་ཞལ་མཇལ་བའི་ཚེ་ངོ་མཚར་ཆེན་པོ་ཐོབ་པ་ལྟ་བུ་མཇལ་བའི་ཕྱག། །ཆོས་ཅན་ཆོས་ཉིད་དུ་རོལ་པའི་མཆོད་པ་ཆེན་པོ། །འཁོར་འདས་རྫོགས་པ་ཆེན་པོའི་གནས་ལུགས་ཇི་བཞིན་མཐོང་ནས་ངོ་མཚར་ཞིང་ཡིད་ཆེས་པ་དོན་གྱི་བསྟོད་པ་ཉིད་དོ། །སྣ་ཚོགས་སྣང་བ་མ་འདྲེས་སོ་སོར་སྣང་བ་སྐུའི་བཀོད་པ། ལྷུན་གྱིས་རྫོགས་ཤིང་གྲུབ་པ་གསུང་གི་རོལ་པ། ཀ་དག་སྤྲོས་མཐའ་བྲལ་བའི་དབྱིངས་ཉིད་ཐུགས་ཀྱི་རོལ་པ་སྟེ། སྐུ་དང་ཡེ་ཤེས་ཀྱི་རོལ་པ་མ་བཙལ་ལྷུན་གྱིས་གྲུབ་པའི་ངང་ཚུལ་རྟོགས་པའི་ཡོན་ཏན་རྣམ་བཞིའི་ཕྲིན་ལས་ལ་དབང་བསྒྱུར་བ་རྣམས་རྫོགས་ཆེན་རིག་པའི་མཚན་ཉིད་ཡིན་ནོ། །དབང་བཞི་ཡང་དེ་བཞིན་དུ་སྐུ་གསུང་ཐུགས་ཡོན་ཏན་ཕྲིན་ལས་རང་ཉིད་ལ་གཅིག་ཆར་དུ་རྫོགས་པ་ཡིན་པར་ཤེས་པར་གྱིས་ཤིག། དེ་ལྟར་རྫོགས་པའི་ངང་ཚུལ་ཇི་ལྟ་བ་བཞིན་དུ་ཤེས་ཤིང་རྟོགས་པ་ནི་རྫོགས་པ་ཆེན་པོར་ངེས་པའོ། །དེ་མ་ཤེས་པའི་དབང་གིས་སྔོན་ཡང་འཁོར་བར་འཁྱམས་པ་ཡིན། གདོད་ནས་རྫོགས་ཀྱང་མ་རིག་པས་བསྒྲིབས་ཏེ་ཆུ་རང་གྲོལ་དུ་ཡོད་པ་འཁྱག་པས་བསྡམ་པ་དང་། གསེར་དང་ནོར་བུ་ངོ་མ་ཤེས་པས་རྒུད་པ་མི་སེལ་བ་ལྟ་བུར་གྱུར་པའོ། །དོན་དམ་པར་གཞི་བདེ་གཤེགས་སྙིང་པོ་ཡེ་ཤེས་དང་ཡོན་ཏན་རྩལ་དུ་རྫོགས་པ་རྟེན་དང་བརྟེན་པའི་འཁོར་ལོ་སོ་སོར་བཤད་པ་རྣམས་ནི་གདུལ་བྱ་རྟག་འཛིན་ཅན་རྣམས་ཀུན་རྫོབ་རྩོལ་བཅས་ཀྱི་ལམ་ལ་བརྟེན་ནས་དོན་དམ་རྩོལ་མེད་ཀྱི་དབྱིངས་སུ་ཁ་དྲང་བའི་ཐབས་སུ་བསྟན་པ་ཡིན། དེས་ན་གསལ་དག་སྟོང་པ་གསུམ་གྱི་གནད་དང་ལྡན་པས་འབྲས་བུ་བླ་ན་མེད་པའི་དབྱིངས་སུ་ཁ་དྲང་བ་ཡིན་ནོ། །ཞེས་གསུངས་ཤིང་མི་སྣང་བར་ཡལ་ལོ། །སླར་ཡང་བར་སྐབས་ཤིག་ཏུ་དཔལ་ཨོ་རྒྱན་མཚོ་སྐྱེས་རྡོ་རྗེའི་ཞལ་མཇལ་བའི་དུས་སུ་བདག་གིས། ཀྱཻ་ཁྱབ་བདག་གདོད་མའི་མགོན་པོ་ཞིང་ཁམས་དང་གཞལ་ཡས་ཁང་དང་ལྷར་བསྐྱེད་ཅིང་བསྒྲུབ་པ་རྣམས་ཅིའི་ཕྱིར་བསྟན་པ་ཡིན་ལགས། ཞེས་ཞུས་པས་བཀའ་སྩལ་པ། ནམ་མཁས་གར་ཁྱབ་ཀྱི་འཇིག་རྟེན་འདི་དག་ཕྱི་བདག་ལྟའི་རཱུ་དྲ་སྟེ། དེའི་གཉེན་པོར་སྤྲུལ་པའི་འོད་ལས་གྲུབ་པའི་ཞིང་ཁམས་སྦྱོང་བ་དང་། ནང་གནས་ཁང་ལོངས་སྤྱོད་ལུས་དང་བཅས་པར་འཛིན་པ་ནང་བདག་ལྟའི་རཱུ་དྲ་སྟེ། དེའི་གཉེན་པོར་གཞལ་ཡས་ཁང་དང་ལྷ་བསྒོམ་པ་དང་། དུས་དང་རྣམ་པ་ཀུན་ཏུ་ང་ཞེས་བདག་ཏུ་སྣང་པའི་ཤེས་པ་བག་ལ་ཉལ་བ་རྒྱ་དང་རྒྱུན་མ་ཆད་པ་ནི་གསང་བ་བདག་ལྟའི་རཱུ་དྲ་སྟེ་འཁོར་བའི་སྣང་སེམས་ཐམས་ཅད་ཀྱི་སྤུན་ཐག་གོ། དེའི་གཉེན་པོར་ལྷའི་ང་རྒྱལ་བརྟན་པོ་བཟུང་བ་ཡིན་ནོ། །འདིའི་གནད་མ་ཤེས་ན་ལ་ལས་ནི་བསྐྱེད་གསལ་ང་རྒྱལ་བཟུང་བ་དང་བཅས་པ་དོར་ནས་ངག་གི་བཟླས་པ་ཁོ་ན་ལ་འབད། ལ་ལས་ནི་ལྷ་དང་ཞིང་ཁམས་རང་རྒྱུད་པར་བཟུང་ནས་བསྒྲུབ་ཀྱང་འཚང་མི་རྒྱ་བས་ན་གནད་འདི་ཤེས་པར་གྱིས་ཤིག། ཅེས་གསུངས་ཤིང་མི་སྣང་བར་ཡལ་ལོ། །ཡང་རེ་ཞིག་གི་ཚེ་དབྱིངས་ཀྱི་རྗེ་མོ་ཨེ་ཀ་ཛ་ཊཱིའི་ཞལ་མཇལ་བའི་ཚེ་བདག་གིས། ཀྱཻ་འཁོར་འདས་ཀུན་གྱི་ཨ་ཕྱི་གཅིག་མ་ལགས། འཁོར་འདས་སྟོང་ཆེན་དབྱིངས་ཀྱི་རྗེ་མོའི་མཁའ་གསང་དུ་རོལ་པའི་ཐེག་པ་འདི་ལ་མིང་གང་ཞེས་བྱ། ཞེས་ཞུས་པས་བཀའ་སྩལ་པ། ཀྱཻ་ཨ་མའི་བུ་ཆུང་ཁྱོད་ལ་དགོངས་བརྒྱུད་ལུས་ཀྱི་ཚུལ་དུ་རྫོགས་པར་བྱས། བརྡ་བརྒྱུད་ནུ་ཞོའི་ཚུལ་དུ་བསྣུན་ནས་ནར་སོན་པར་བྱས། སྙན་བརྒྱུད་སྙིང་གཏམ་ལྟ་བུར་གདམས་ནས་བློ་དང་ལྡན་པར་བྱས་ཡོད། གདུལ་བྱ་ལས་སྨོན་གྱིས་འབྲེལ་བའི་སྐལ་ལྡན་རྣམས་ལ་སྟོན་དང་འབྲེལ་ཚད་དོན་དང་ལྡན་པ་ཡིན་ནོ། །ཐེག་པ་ཐམས་ཅད་ཀྱི་རྒྱལ་པོ་ངའི་མིང་ནི་སྒྲ་གྲགས་ཚད་ཐམས་ཅད་ངའི་མིང་ཡིན་ཅིང་ངེས་གསང་བླ་ན་མེད་པ་མཁའ་སྤྱོད་ཨ་མའི་མཁའ་རུ་འུབ་ཆུབ་པའི་རོལ་པ་འདི་ལ་མིང་གི་རྣམ་གྲངས་དུ་མ་ཡོད་ཀྱང་མིང་བདུན་དུ་ངས་སྨྲའོ། །ཆོས་འདི་གསང་ཆེན་གཉིས་དང་ལྡན་པས་གསང་། བདག་རྟོག་མཚན་མ་ཡིད་བྱེད་ཀྱི་འཇིགས་པ་ལས་སྐྱོབ་པར་བྱེད་པས་སྔགས། དོན་དམ་མི་ཤིགས་པའི་རྡོ་རྗེ། ལམ་ཐམས་ཅད་ཀྱི་ཡོན་ཏན་བཅུད་དུ་འདུས་པས་ཐེག་པའོ། །ཆོས་ཐམས་ཅད་ཀྱི་ཡིན་ལུགས་མཐར་ཐུག་ཏུ་གནས་པས་དོན། །རྟོགས་བྱ་རྣམས་ཀྱི་གཙོ་བོར་གྱུར་པས་དམ་པ། སྐྱོན་དང་དྲི་མ་ཐམས་ཅད་བྱང་བ་སྐུ་དང་ཡེ་ཤེས་ལམ་དང་འབྲས་བུའི་ཆོས་ཐམས་ཅད་ཁོང་དུ་འུབ་ཆུབ་པ། ཐམས་ཅད་དག་མཉམ་གྱི་རོལ་པ་སྣ་ཚོགས་པའི་འཆར་གཞི་རྡོ་རྗེ་གསུམ་གྱི་སྲོག་གཅིག་པུར་བཞུགས་པས་ཙིཏྟའམ་སྙིང་སྟེ་སེམས་སོ། །འཁོར་འདས་ལམ་གསུམ་རྫོགས་པ། ཐེག་པ་ཐམས་ཅད་དོན་གཅིག་ཏུ་དྲིལ་མདོ་གཅིག་ཏུ་བསྡུས་པས་ཐེག་པ་ཐམས་ཅད་ཀྱི་སྤྱི་གཞིར་གྱུར་པས་ཆེན་པོའོ། །རྟོག་པའི་གྲྭ་ཟུར་ཐམས་ཅད་ལས་འདས་པས་ཐིག་ལེ། འཁོར་འདས་འུབ་ཆུབ་ཀྱི་སེམས་སུ་རོ་གཅིག་པས་ཉག་གཅིག་གོ། རིག་པ་བདེ་གཤེགས་སྙིང་པོའི་ངང་དྭངས་གསལ་རྙོགས་མ་དང་བྲལ་བས་འོད་གསལ། མི་ཤིགས་པ་རྡོ་རྗེའི་ཆོས་བདུན་དང་ལྡན་པས་རྡོ་རྗེ། འཁོར་འདས་ཀྱི་ཆོས་ཐམས་ཅད་ཀྱི་བཅུད་དུ་གནས་པས་སྙིང་པོའོ། །འཁོར་འདས་ཀྱི་ཆོས་ཐམས་ཅད་བདེ་གཤེགས་སྙིང་པོའི་ངང་དུ་འུབ་ཀྱིས་འདུས་ཤིང་ཡོངས་སུ་ཆུབ་པས་འཁོར་འདས་འུབ་ཆུབ་བོ། །སྐྱེ་འཆི་བསྒྲེས་རྒུད་ཐམས་ཅད་དང་བྲལ་བས་གཞོན་ནུ། ལྷུན་གྲུབ་ཀྱི་ཕྱི་རྒྱ་མ་རལ་བས་བུམ་པ། ཡེ་ཤེས་ཡོན་ཏན་ཐམས་ཅད་བསགས་ནས་སྤུངས་པ་ལྟ་བུས་སྐུ་ཞེས་བྱའོ། །ཞེས་གསུངས་ཤིང་མི་སྣང་བར་ཡལ་ལོ། །དེ་ལྟར་སྤྱིར་བཤད་ནས་བྱེ་བྲག་རིམ་དགུའི་ཐེག་པའི་ལམ་གྱི་ཡོན་ཏན་ཐམས་ཅད་རྫོགས་ཚུལ་གྱི་མཚོན་ནས་བཤད་ན། ང་དང་བདག་ཏུ་འཛིན་པའི་གཞི་གང་ཟག་ཏུ་སྣང་བ་ཐམས་ཅད་རང་བཞིན་མེད་པར་མཐོང་བས་ཉན་ཐོས། ཕྱི་ནང་གི་དངོས་པོ་རྟེན་འབྲེལ་སྒྱུ་མའི་སྣང་བ་ཉག་གཅིག་ཏུ་རྟོགས་པ་རང་བྱང་ཆུབ། སྟོང་ཉིད་རྟོགས་པའི་རྩལ་སྙིང་རྗེའི་ངོ་བོར་ཤར་ནས་ཐབས་དང་ཤེས་རབ་ཀྱི་ཕྱོགས་ཐམས་ཅད་འབད་རྩོལ་མེད་པར་ངང་གིས་འདུ་བས་ན་བྱང་སེམས་ཏེ། ཀུན་འབྱུང་འདྲེན་པའི་ཐེག་པ་གསུམ་གྱི་ཡོན་ཏན་ཡར་ལྡན་དུ་རྫོགས་ཤིང་། བྱ་བའི་རྒྱུད་ཀྱི་དཀའ་ཐུབ་དང་གཙང་སྦྲས་ལྷ་མཉེས་པར་བྱ་བ་དང་། ཨུ་པ་ཡའི་རྒྱུད་ཀྱི་བཟླས་བརྗོད་དང་ཏིང་ངེ་འཛིན་གྱིས་དངོས་གྲུབ་སྒྲུབ་པ་དང་། རྣལ་འབྱོར་གྱི་རྒྱུད་དུ་མཚན་མ་མེད་པ་དབྱིངས་ཀྱི་བྱིན་རླབས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་ལྟ་བའི་ཞི་གནས་དང་ལྷག་མཐོང་གི་རྣལ་འབྱོར་ཏེ། །དཀའ་ཐུབ་རིག་བྱེད་ཀྱི་ཐེག་པའི་ཡོན་ཏན་དང་བྱེད་ལས་ཐམས་ཅད་ཀྱི་དངོས་གྲུབ་ཀྱི་སྙིང་པོ་བརྗོད་དུ་མེད་པའི་རང་སེམས་ལྷན་ཅིག་སྐྱེས་པའི་དབྱིངས་གཅིག་པུ་འདིར་རྫོགས་ཤིང་། ཕ་རྒྱུད་མ་ཧཱ་ཡོ་གའི་ཆོས་ཐམས་ཅད་གཟོད་མ་ཉིད་ནས་དོན་དམ་དཀོར་བདུན་ནམ་ལྷག་པའི་བདེན་གཉིས་དབྱེར་མེད་ཀྱི་ཆོས་སྐུ་ཆེན་པོར་དག་པ་དང་། ལུང་ཨ་ནུ་ཡོ་གའི་ཡེ་ཇི་བཞིན་པ་དང་ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར་གཉིས་ཟུང་དུ་འཇུག་པའི་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་དུ་སྣང་སྲིད་དག་མཉམ་ཆེན་པོར་རྫོགས་པའི་དོན་རྣམས་ཀྱང་། རང་བཞིན་རྫོགས་པ་ཆེན་པོ་འོད་གསལ་མཐའ་དབུས་ལས་འདས་པའི་དབྱིངས་གཅིག་ཏུ་གཞི་སྣང་ལྷུན་གྲུབ་རིན་པོ་ཆེའི་སྣང་བ་རྒྱ་ཆད་ཕྱོགས་ལྷུང་བྲལ་རང་ཤར་བ་ཐམས་ཅད་གསེར་དང་དེའི་མདངས་བཞིན་དུ་སོ་སོ་མ་ཡིན་པའི་ཆོས་སྐུ་འཕོ་འགྱུར་མེད་པ་རིག་པ་མཐའ་གྲོལ་ཆེན་པོ་གཞི་དབྱིངས་བདེ་གཤེགས་སྙིང་པོའི་དོན་ཉིད་ལ་གཅིག་ཆར་དུ་འདུས་པ་སྟེ། སོ་སོར་བསྟན་པ་རྣམས་ནི་གདུལ་བྱ་རིམ་གྱིས་དཀྲི་བའི་ཆེད་དུ་བསྟན་པར་ཟད་དོ། །སླར་ཡང་རིག་འཛིན་གྱི་རྒྱལ་པོ་ཤྲཱི་སེང་ཧའི་ཞལ་མཇལ་བའི་ཚེ། ཀྱཻ་སྟོན་པ་ལགས། རྫོགས་པ་ཆེན་པོའི་ལམ་གང་ལགས་བདག་ལ་བསྟན་དུ་གསོལ། ཞུས་པས་བཀའ་སྩལ་པ། རྫོགས་པ་ཆེན་པོ་ནི་འཁོར་འདས་ཀྱི་སྤྱི་གཞི་ཆེན་པོ་འཁོར་འདས་ལམ་གསུམ་རྫོགས་པའི་དབྱིངས་ཆེན་པོ་ཡིན་ཏེ། དེའི་ངང་ཚུལ་ཡིན་ལུགས་ཤེས་པ་ནི་ལྟ་བ་ཡིན་ནོ། །གདོད་མའི་ཡེ་གཞི་ཆེན་པོར་རང་དབང་བསྒྱུར་ཏེ་རང་ཐོག་ཏུ་རང་སད་ཅིང་བརྡལ་བ་ནི་བསྒོམ་པ་དམིགས་གཏད་དང་བྲལ་བ་ཉིད་ཡིན་ནོ། །དེ་ནི་དཔེར་ན་ཆུ་ཐིག་རྒྱ་མཚོ་དང་འདྲེས་ཚེ་རྒྱ་མཚོ་བཅོས་སུ་མེད་པར་རྒྱ་མཚོར་འགྱུར་བའམ། །བུམ་ནང་གི་ནམ་མཁའ་ཕྱིའི་ནམ་མཁའ་དང་འདྲེས་ཚེ་ནམ་མཁའ་བཅོས་སུ་མེད་པར་ནམ་མཁར་འབྱམས་ཀླས་པ་ལྟ་བུའོ། །གཞི་དང་སེམས་ལ་ཕྱི་ནང་མེད་ཀྱང་བདག་འཛིན་གྱིས་ཕྱི་ནང་དུ་བཅད་པ་ཙམ་དུ་ཟད་དེ། ཆུ་རང་གྲོལ་དུ་ཡོད་པ་གྲང་ལྷག་གི་སྤུན་ཐག་གིས་འཁྱག་པར་བསྡམས་པ་ལྟར་གཞི་རང་གྲོལ་དུ་ཡོད་པ་ལ་བདག་འཛིན་གྱི་སྤུན་ཐག་གཅིག་པུས་འཁོར་བ་ཡོངས་སུ་གྲུབ་པའོ། །དེའི་ངང་ཚུལ་ཤེས་ཏེ་ལུས་ཀྱི་སྒོ་ནས་བཟང་ངན་བར་གསུམ་གྱི་བྱ་བ་བཏང་སྟེ་བྱར་མེད་དུ་དུར་ཁྲོད་ཀྱི་མི་རོ་ལྟར་སྡོད་པ་དང་། ངག་གི་བྱ་བ་གསུམ་པོ་ཡང་དེ་བཞིན་དུ་བཏང་སྟེ་ལྐུགས་པ་ལྟར་སྡོད་པ་དང་། སེམས་ཀྱི་བྱ་བ་གསུམ་པོ་ཡང་བཏང་ནས་སྟོན་ནམ་བསླད་བྱེད་ཀྱི་རྐྱེན་གསུམ་དང་བྲལ་བ་ལྟ་བུ་མི་འཆོས་པར་བཞག་པ་ནི་མཉམ་པར་བཞག་པ་ཞེས་བྱའོ། །བྱ་བ་དགུ་ཕྲུགས་སུ་བཏང་བས་བྱ་བཏང་དང་བྱར་མེད་བློས་མ་བཅོས་པས་བློ་འདས་ཞེས་ཀྱང་བྱའོ། །གནད་དེ་ཉིད་ཀྱི་ངང་དུ་རང་གདིང་ཆེན་པོ་འཐོབ་པར་འགྱུར་རོ། །གཞན་ཡང་འགྲོ་འདུག་འགུལ་བསྐྱོད་བཟླས་བརྗོད་བསམ་སྤྱོད་ཐམས་ཅད་ཀྱི་དུས་ཀུན་ཏུ་ལྟ་བའི་སྟངས་མ་ཤོར་བར་སྣང་སྲིད་སྒྱུ་མ་ལྟ་བུ། སྒོམ་པའི་གདིང་མ་ཤོར་བར་ངང་མངོན་གྱུར་དུ་རིག་པ། སྤྱོད་པ་བག་མེད་དུ་མ་སོང་བར་སྤྱོད་ལམ་རྣམ་བཞི་ཚུལ་བཞིན་བསྟེན་པའོ། །གནད་དེ་ནི་ཤི་བའི་མཐར་མ་ཐུག་བར་དུ་བརྟེན་དགོས་པ་ཡིན། དེ་ནི་བསྒོམ་པ་རང་གྲོལ་བློ་འདས་སོ། །སྤྱོད་པའི་གནད་ཐམས་ཅད་སྟོང་པ་ཉིད་ཡིན་པས་ཇི་ལྟར་སྤྱོད་ཀྱང་ཉེས་པས་མི་གོས་སྙམ་དུ་ལྟ་བའི་ཕྱོགས་སུ་སྤྱོད་པ་མི་འཆོལ་བར་ལུས་ངག་གི་མི་དགེ་བ་དུག་བཞིན་སྤངས་ཏེ་ཞི་དུལ་བག་ཡོད་དང་ལྡན་པ་ཁྲིམས་བདག་རྒྱལ་པོའི་མདུན་སར་སླེབ་པ་ལྟ་བུ་ཞིག་དགོས། ཡང་ལུས་ངག་ཡིད་གསུམ་གྱི་དགེ་བ་གཞན་ཟབ་ཟབ་འདྲ་བའི་ཡུལ་དུ་ཞེན་ནས་ཡང་དག་པའི་ལྟ་སྒོམ་ཟིལ་གྱིས་མནན་ཏེ་འཁོར་བར་བསོད་ནམས་བསགས་པ་ཙམ་ལ་མི་ཚེ་འདས་ན་གསེར་གྱི་སྒྲོག་གིས་བཅིངས་པ་ལྟ་བུ་སྤྱོད་པའི་ཕྱོགས་སུ་ལྟ་བ་མི་འཆོལ་བར་དཔེར་ན་སྡེར་ཆགས་གང་གིས་ཀྱང་ཟིལ་གྱིས་མི་ནོན་པ་སེང་གེ་གངས་ལ་འགྱིང་བ་ལྟ་བུ་ཞིག་དགོས་པ་ཡིན་ནོ། །ཁྱད་པར་ལྟ་བ་སྟོང་ཉིད་རྟོགས་ཀྱང་སྙིང་རྗེ་གཞན་ནས་བསྒོམ་དགོས་ཟེར་བ་དག་ཡོད་པའི་རྗེས་སུ་འབྲངས་ན་ཆུ་རང་ལ་ཡོད་ཀྱང་རླན་གཞན་ནས་ཚོལ་དགོས་པར་སྐད་པ་དང་། མེ་རང་ལ་ཡོད་ཀྱང་ཚ་དྲོད་གཞན་ནས་ཚོལ་བ་དང་། རླུང་རང་ཉིད་ཡིན་ཀྱང་བསིལ་གཞན་ནས་འབྱུང་དགོས་ཟེར་བ་ལྟ་བུའི་ཕྱོགས་སུ་ངེས་ཏེ། འཁོར་འདས་སྟོང་ཉིད་ཆེན་པོ་ཉིད་དུ་ངེས་པར་ཐག་ཆོད་པ་ནི་འཁོར་འདས་དག་མཉམ་དུ་རོལ་པའི་སྙིང་རྗེ་བྱང་ཆུབ་ཀྱི་སེམས་བླ་ན་མེད་པའོ། །ལྟ་སྒོམ་གྱི་གནད་དང་ངང་ཚུལ་ཇི་ལྟ་བ་བཞིན་དུ་ངོ་འཕྲོད་ནས་ཤེས་ནའང་དེས་ཆོག་པ་ཙམ་དུ་ཐག་བཅད་དེ་འཁོར་བའི་བྱ་བ་ལ་ཞེན་ནས་ཆགས་སྡང་གི་སྤྱོད་པ་སྣ་ཚོགས་པས་མི་ཚེ་སྡུག་ཟད་དུ་གཏོང་བ་དག་ནི་ལྟ་སྒོམ་ཐམས་ཅད་འཁྲུལ་པ་འཁོར་བའི་བྱ་བྱེད་ཀྱིས་ཟིལ་གྱིས་མནན་པ་ཡིན། ཉམས་ཀྱི་སྣང་བ་ནི་སེམས་དང་ཤེས་པ་སྔར་ལྟར་མ་ཡིན་པར་འདོད་ལྷར་འཕེན་པའི་བདེ་སྣང་འབོལ་ལེ་བ་དང་། གཟུགས་ཁམས་སུ་འཕེན་པའི་གསལ་ཉམས་གསལ་ཧྲིག་གེ་བ་དང་། གཟུགས་མེད་མུ་བཞིར་འཕེན་པའི་སྟོང་ཉམས་མི་རྟོག་པ་ཁ་ནང་ལྟ་ཐོམ་ཡོ་རེ་བ་དྲན་མེད་ཤེས་མེད་གཉིད་འཐུག་ལྟ་བུ་དང་། ལྟ་བ་སྟོང་ཉིད་ལ་རྒྱུས་མེད་ཅིང་སེམས་སྟོང་པ་དངོས་པོར་མ་གྲུབ་པ་ཙམ་ལ་བློ་ཐག་བཅད་དེ་སྟོང་པའི་ངང་དུ་རྩེ་གཅིག་ཏུ་འཇོག་པ་ནི་སྲིད་པའི་རྩེ་དང་། འདུ་ཤེས་མེད་པའི་ལྷར་འཕེན་པའི་ལྟ་བ་ཡིན་ནོ། །གཞན་ཡང་ཕྱི་སློང་ལྷ་འདྲེའི་ཆོ་འཕྲུལ་ཐན་དང་ལྟས་ངན་ལ་སོགས་པ་དབང་པོའི་ཡུལ་ལ་ཆོ་འཕྲུལ་སྣ་ཚོགས་འབྱུང་བ་དང་། ནང་སློང་ལུས་ལ་ན་ཚ་ཟུག་རྔུ་སྣ་ཚོགས་པ་འབྱུང་བ་དང་། གསང་སློང་སེམས་ཀྱི་བདེ་སྡུག་མ་ངེས་པར་འབྱུང་བ་ཐམས་ཅད་ཉམས་རྫུན་པོ་ཆེའི་མཚང་དུ་རིག་ཅིང་ཐག་བཅད་ན་རང་ཡལ་དུ་འགྲོ་བ་ཡིན། བདེན་ཞེན་རེ་དོགས་ཀྱི་ངང་བརྟན་པར་གྱུར་ན་སྨྱོ་འབོག་བརྒྱལ་བ་ལ་སོགས་པས་འཆི་བ་སྲོག་ལ་འབབ་པའི་རྒྱུ་རྐྱེན་དུ་འགྱུར་བ་དང་། ལྷར་སྣང་འདྲེར་སྣང་བ་མངོན་པར་ཞེན་པའི་དབང་དུ་གྱུར་ན་བསྒོམ་ཆེན་ཐ་མལ་དུ་འཆོལ་བའི་རྒྱུར་འགྱུར་བ་ཡིན་ནོ། །ཞེས་གསུངས་ཤིང་མི་སྣང་བར་ཡལ་ལོ། །ཡང་རེ་ཞིག་གི་ཚེ་རང་སྣང་དོན་གྱི་འོག་མིན་དུར་ཁྲོད་མེ་རི་འབར་བའི་གནས་ནས་ཟུར་ཆུང་ཤེས་རབ་གྲགས་པ་དང་མཇལ་ཚེ། བདག་གིས། ཀྱཻ་བླ་མ་ལགས། གདམས་ངག་ཐུགས་ཀྱི་ཡང་བཅུད་ཚིག་ཉུང་ལ་དོན་འདུས་པ་ཞིག་བདག་ལ་གནང་བར་མཛད་དུ་གསོལ། ཅེས་ཞུས་པས་བཀའ་སྩལ་པ། ཀྱཻ་བསྐལ་པ་དཔག་ཏུ་མེད་པའི་གོང་རོལ་ནས་ཚོགས་སྨོན་ལས་འཕྲོ་དུས་འཛོམ་པའི་སྐྱེས་བུ་ཁྱོད་ཉོན་ཅིག། རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ལ་བགྲོད་པར་འདོད་ན། བླ་མ་ལ་མོས་གུས་ཐང་ལྷོད་མེད་པའི་སྒོ་ནས་སྤྱོད་ལམ་ཀུན་ཏུ་བསྙེན་པ་དང་། མཆེད་གྲོགས་ལ་བརྩེ་གདུང་དང་དག་སྣང་སྦྱོང་བ་རྒྱུན་མི་ཆད་པ་དང་། སེམས་ཅན་ལ་སྙིང་རྗེ་དྲག་པོའི་སྒོ་ནས་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བ་དང་། འདུས་བྱས་ཐམས་ཅད་མི་རྟག་པའི་ངང་ཚུལ་ལ་རྟག་ཏུ་བསམ་ནས་འཁོར་བའི་བྱ་བ་བཏང་སྟེ་བྱར་མེད་ཀྱི་ངང་དུ་གནས་པར་བྱ་བ་རྣམས་ནི་དམ་པའི་ཆོས་ཐམས་ཅད་ཀྱི་ཡང་སྙིང་བླ་ན་མེད་པ་ཡིན་ནོ། །གདམས་ངག་ཆུད་ཟོས་སུ་མི་གཏོང་བ་བླ་མ་དམ་པའི་ཞབས་ཏོག། དམ་ཚིག་ལ་ངོ་ལྐོག་མེད་པ་ལྷ་དང་སྲུང་མའི་བླ་རྡོ། མི་ཚེ་ཆོས་ལ་དྲིལ་བ་འཆི་དུས་བློ་ལྷག་མེད་པའི་གནད་གསུམ་ཡིན་ནོ། །དམ་ཚིག་དང་སྡོམ་པ་སྲོག་ལྟར་བསྲུང་བ་སྒོམ་ཆེན་ཐ་མལ་དུ་མི་འཆོལ་བའི་གནད་དང་། འདོད་ཡོན་ལ་ཆོག་ཤེས་བསྟེན་པ་ཡུལ་ངན་དུ་མགོ་མི་འཁོར་བའི་གདམས་པ་དང་། འཁོར་བ་ལ་སྙིང་པོ་མེད་པར་ཤེས་པ་ཆགས་སྡང་གི་ཞེན་པ་གཅོད་པའི་གདམས་པ་ཡིན་ནོ། །འཇིག་རྟེན་གྱི་བྱ་བ་ལ་ཟིན་དུས་མེད་པ་སྤོས་རྒྱའི་རི་མོ་ལྟ་བུར་ཤེས་པར་བྱ་བ་ནི་མཐའ་སྡུད་པའི་མན་ངག་ཡིན་ནོ། །དང་པོ་བསླབ་པ་ལ་བརྟེན་ནས་ཤེས་པ་དང་། བར་དུ་བརྟག་ཅིང་དཔྱད་པས་རང་རྒྱུད་ལ་མྱོང་བ་ཐོན་ནས་རྟོགས་པ་དང་། དེ་ལྟར་ཤེས་པ་དང་རྟོགས་པ་ཙམ་གྱིས་གྲོལ་བ་མི་འཐོབ་པའི་ཚུལ། དཔེར་ན་ཟས་ཡོད་ཀྱང་མ་ཟོས་ན་མི་འགྲང་བ་ལྟ་བུ་ཡིན་པས། བྱ་བ་དགུ་ཕྲུགས་སུ་བཏང་ནས་བསྒོམ་པའི་སྟོབས་ཀྱིས་རང་ཐོག་ཏུ་བརྟན་པ་ཐོབ་པ་ནམ་ལངས་ཚེ་མུན་པ་མི་འབྱུང་བ་ལྟ་བུར་རིག་པའི་ཁོར་ཡུག་ཏུ་རྒྱ་མ་ཆད་པའི་དུས་ནི་རིག་པ་རང་ཐོག་ཏུ་རང་གདིང་ཐོབ་པ་ཡིན། ད་དུང་དེ་ཙམ་གྱིས་འཚང་རྒྱ་བར་མི་འགྱུར་པས་ཆོས་ཅན་གྱི་སྣང་བ་ཆོས་ཉིད་དུ་ཟད་ནས་འཁོར་བའི་སྣང་སེམས་ཀྱི་དྲི་ཙམ་ཡང་མེད་པར་ཆོས་དབྱིངས་ཀུན་ནས་ཟླུམ་པ་ཆེན་པོའི་ངག་དུ་འབྱམས་ཀླས་པ་ནི་གྲོལ་བའི་ས་རུ་ཕེབས་པ་ཡིན། སྣང་བ་དེ་ཡང་ཤེས་སྒྲིབ་ཕྲ་བའི་ཕྲ་བ་ཡུལ་མེད་དུ་སངས་ནས་ཇི་ལྟ་ཇི་སྙེད་ཀྱི་ཡེ་ཤེས་ཆེན་པོར་དབང་བསྒྱུར་ནས་ཆོས་སྐུ་ནམ་མཁའ་ལྟ་བུ་སྐུ་གསུམ་མཉམ་བརྡལ་གྱི་རོལ་པར་སངས་རྒྱས་པ་ཡིན་ནོ། །རིགས་ཀྱི་བུ་གཞི་མ་རིག་པ་རྩལ་རྣམ་པར་རྟོག་པ་སྐྱེ་འགགས་ཅན་ནི་སེམས་ཀྱི་མཚན་ཉིད་ཡིན་ནོ། །གཞི་མངོན་དུ་གྱུར་པ་རྩལ་ཡེ་བབ་ཆེན་པོ་ནི་རིག་པའི་མཚན་ཉིད་ཡིན་ནོ། །གཞིའི་གནས་ལུགས་ཤེས་པ་ནི་གཞིའི་རིག་པ་ཡིན། ཆོས་ཉིད་མངོན་བྱེད་ཀྱི་ཤེས་པ་དྭངས་གསལ་རྙོགས་མ་དང་བྲལ་བ་ནི་ལམ་རིག་པ་སྟེ། །གཉིས་ཀ་དུས་འཛོམ་པ་ལ་ཁྱབ་བརྡལ་རིག་པ་རྫོགས་པ་ཆེན་པོ་ཡིན་ནོ། །རྣམ་པར་རྟོག་པའི་ཆོ་འཕྲུལ་མཆེད་པའི་སྣང་བ་ཐམས་ཅད་མངོན་དུ་བྱེད་པའི་ཤེས་པ་ལ་ཡིད་ཅེས་བྱ་བ་དང་། སྣང་བ་མཆེད་པའི་ཡུལ་དྲུག་མ་འགགས་པ་ལ་ཡིད་ཀྱི་རྣམ་པར་ཤེས་པ་ཞེས་ཚིག་ཏུ་བརྗོད་པའོ། །འཁོར་འདས་སྟོང་ཉིད་ཆེན་པོའི་ངང་ཚུལ་ཇི་ལྟ་བ་བཞིན་དུ་ཤེས་པ་གཞིའི་ཤེས་རབ། ཤེས་པ་ཟང་ཀ་རྒྱ་ཡན་གོ་མ་འགགས་པ་ཉིད་ངོ་འཕྲོད་པ་ལམ་གྱི་ཤེས་རབ། དེ་གཉིས་ཀ་དུས་འཛོམ་པ་ལ་ཁྱབ་བྱེད་ཀྱི་ཤེས་རབ་ཅེས་བྱའོ། །འདོད་ཡོན་གྱི་སྣང་བ་མཆེད་པའི་སྣང་ཡུལ་གོ་མ་འགགས་པ་ལ་རྣམ་པར་ཤེས་པ་དང་། སྣང་བ་ལ་དངོས་པོར་འཛིན་པའི་རྣམ་པར་རྟོག་པ་ལ་ལས་རླུང་ཞེས་བྱའོ། །ཡིད་ཀྱི་ཤེས་པ་ཕྲ་རགས་དུས་འཛོམ་པས་འཁོར་བ་ཡོངས་སུ་གྲུབ་པའོ། །ཆོས་ཉིད་བདེ་གཤེགས་སྙིང་པོའི་ངང་ཚུལ་ཇི་ལྟ་བ་བཞིན་དུ་ཤེས་པ་ཇི་ལྟ་བ་མཁྱེན་པའི་ཡེ་ཤེས། ཆོས་ཉིད་དེ་བཞིན་ཉིད་ཀྱི་གནས་ལུགས་མངོན་དུ་བྱེད་པའི་དུས་སུ་ཀུན་ཤེས་ཀུན་རིག་གི་གོ་མ་འགགས་པ་ལ་ཇི་སྙེད་ལ་གཟིགས་པའི་ཡེ་ཤེས། དེ་མཉམ་དུ་བརྡལ་བ་ལ་ཀ་དག་མཉམ་པ་ཉིད་ཀྱི་ཡེ་ཤེས་ཞེས་བྱའོ། །གཞི་མ་རིག་པའི་དབང་གིས་ལུང་མ་བསྟན་དུ་སོང་བ་དཔེར་ན་གཉིད་ཀྱི་ངང་དུ་རྨི་ལམ་སྣ་ཚོགས་སྣང་བ་ལྟར་ཀུན་གཞིའི་མཁའ་ལ་ལས་རླུང་སྣ་ཚོགས་གཡོས་པ་འཁོར་བ་ཀུན་གྱི་གཞི་དང་རྩ་བའོ། །ཆོས་ཅན་གྱི་སྣང་བ་ཐམས་ཅད་ཆོས་ཉིད་སྤྲོས་མཐའ་བྲལ་བ་འཁོར་འདས་དག་མཉམ་ཆེན་པོ་ཧར་སངས་པའི་ངང་དུ་རྒྱ་ཡན་པ་ཆོས་སྐུ་ཀུན་ཏུ་བཟང་པོའོ། །རིགས་ཀྱི་བུ་ཆུ་ཟླ་དང་ཆུའི་གཟུགས་བརྙན་ཐམས་ཅད་ཆུའི་རོལ་པ་ཆུ་ལས་མ་འདས་པ་དང་། སྣོད་བཅུད་བརྟན་གཡོ་ཐམས་ཅད་ནམ་མཁའི་རོལ་པ་ནམ་མཁའ་ཉིད་ལས་མ་འདས་པ་དང་། འཁོར་འདས་ཐམས་ཅད་ཆོས་ཉིད་གཅིག་གི་རོལ་པ་ཆོས་ཉིད་ལས་མ་འདས་པའོ། །དེ་ལྟར་གཞིའི་ཆོས་སྐུ་གཏིང་གསལ་ཆེན་པོ་མངོན་དུ་བྱས་པའི་དུས་དེར་ངོ་བོ་འཁོར་འདས་དག་མཉམ་གྱི་ཆོས་སྐུ། རང་བཞིན་ཡེ་ཤེས་ཡོན་ཏན་གྱི་ལོངས་སྐུ། ཐུགས་རྗེ་རང་གསལ་སྒྲིབ་གཡོགས་དང་བྲལ་བའི་སྤྲུལ་སྐུ། དེའི་རོལ་པ་དོན་དམ་པའོ། །གཞི་ཀ་དག་གི་ངོ་བོ་མ་རིག་པ་ལ་ཀུན་གཞི། དེའི་གདངས་ལས་སྣང་བ་རྩལ་སེམས་བྱུང་གི་རོལ་པ་ཀུན་རྫོབ་ཅེས་བྱ་ཡིན་ནོ། །འདི་ལྟར་རོལ་པ་དང་། ཆིངས་པ་དང་། ཁྱབ་པ་དང་། བརྡལ་བའི་ངང་ཚུལ་ཐམས་ཅད་ཤེས་པར་བྱས་ཏེ། ཆོས་ཉིད་རང་ཀར་འདུག་པ། ངང་བཞག་བློ་འདས་རྒྱ་ཡན་ཆོས་ཉིད་ཅི་ཡང་མ་ཡིན་པའི་བརྗོད་བྲལ་ཆེན་པོ་ཉིད་དུ་ལ་བཟླ་ཞིང་། རྣམ་པ་ཐམས་ཅད་མཁྱེན་པའི་ཡེ་ཤེས་ཆེན་པོ་མ་འཐོབ་ཀྱི་བར་དུ་ཐང་ལྷོད་མེད་པའི་བརྩོན་འགྲུས་དྲག་པོས་ཉམས་སུ་བླང་བ་ནི་གནད་མཆོག་ཏུ་ཟུངས་ཤིག། ཅེས་གསུངས་ཤིང་ཆོས་ཉིད་ཀྱི་དབྱིངས་སུ་འབྱམས་ཀླས་སོ། །ཞེས་པ་འདི་ཡང་སྐྱེ་བ་དུ་མར་ལས་དང་སྨོན་ལམ་གྱིས་འབྲེལ་བའི་སྤྲུལ་སྐུ་པདྨ་ལུང་རྟོགས་རྒྱ་མཚོ་དང་མཁྱེན་རབ་རྒྱ་མཚོ་གཉིས་ཀྱིས་ནན་དུ་བསྐུལ་ངོར། ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་སྒྱུ་འཕྲུལ་རོལ་པའི་ཀློང་མཛོད་ལས་གཏན་ལ་ཕབ་པ། ཆོས་ཀྱི་བདག་པོ་སྐྱེས་མཆོག་དྲུག་ཅུ་རྩ་བརྒྱད་དུ་མཁའ་འགྲོས་ལུང་བསྟན་ནས་རྟེན་འབྲེལ་གྱི་དུས་ཚིགས་ཐོག་མ་ཡིན་ཅེས་ཨོ་རྒྱན་ཆེན་པོའི་བཀས་གནང་བ་ཕེབས་པའོ། །རང་གི་རིགས་སྲས་དམ་པ་མཁས་མཆོག་བསོད་ནམས་བསྟན་འཛིན་རྡོ་གྲུབ་རིན་པོ་ཆེ་གྱིས་ཞུས་དག་ནན་དུ་བགྱིས་པའོ། །དེ་ལྟར་ཀ་དག་རྫོགས་པ་ཆེན་པོ་ཁྲེགས་ཆོད་ཀྱི་གནས་ལུགས་ཆེན་པོར་སྟོན་པའི་ཁྲིད་རིམ་སྣང་སྦྱང་དུ་གྲགས་པ་འདི་ལ། སྔོན་ཆད་རྗེ་རང་ཉིད་ཀྱི་སྐུའི་སྲས་ཀྱི་ཐུ་བོ་རྡོ་གྲུབ་རིན་པོ་ཆེ་ནས་ཞུས་དག་ཅུང་ཟད་གནང་བར་སྔོན་ཡང་ད་དུང་མ་ཕྱི་ནོར་བ་རྒྱུན་འབྱམས་སོང་བས་ཡིག་སྐྱོན་ཤིན་ཏུ་མང་བར་བརྟེན། དཔལ་མིའི་དབང་པོ་ཐའི་ཇི་ཚེ་དབང་རིག་འཛིན་རྣམ་པར་རྒྱལ་བའི་ཐུགས་བསྐྱེད་ཕྲིན་ལས་ཀྱི་ཆ་ལས་ཆོས་སྐུའི་རིང་བསྲེལ་ཆོས་སྦྱིན་མི་འཛད་པའི་གཏེར་དུ་བསྒྲུབས་པར་མཛད་དེ་ཡབ་གཞིས་བསམ་འགྲུབ་ཕོ་བྲང་གི་གནྡྷོ་ལར་བཞུགས་སུ་གསོལ་བའི་སྐབས་སྤར་གྱི་ཕྱི་མོར་ལེགས་པར་དཔྱད་པའི་སྒོ་ནས་ཞུས་ཏེ་གཙང་དག་ཏུ་གཏན་ལ་འབེབས་པ་པོ་ནི་ཁྲག་འཐུང་རིག་འཛིན་ཆེན་པོའི་སྐྱེ་བའི་སྒྱུ་གར་དུ་རློམ་པ་འཇིགས་བྲལ་ཡེ་ཤེས་རྡོ་རྗེ་སྟེ། འདིས་ཀྱང་འོད་གསལ་རྫོགས་པ་ཆེན་པོའི་བསྟན་པ་ལ་བྱ་བ་རླབས་པོ་ཆེར་སྤྱོད་པས་སྐལ་ལྡན་གྱི་གདུལ་བྱ་དཔག་ཏུ་མེད་པ་ནང་དབྱིངས་གདོད་མའི་གཞི་ཐོག་ཏུ་མངོན་པར་གྲོལ་བའི་གྱུར་གྱུར་ཅིག། ཤུ་བྷཾ།། །།