DJYD-KABUM-16-MA-008

Previous Text Back to Volume PageNext Text

Wylie title	mkha' 'gro mtsho rgyal gyi grub rtags las tshogs zab mo
Location	bdud 'joms rin po che'i bka' 'bum Volume 16, Text 8, Pages 41-59 (Folios 1a1 to 10a2)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Mkha' 'gro mtsho rgyal gyi grub rtags las tshogs zab mo. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 41-59. Kalimpong: Dupjung Lama, 1979-1985.
Side notes	Recto: las tshogs   Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Activity Practices - las tshogs
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)
Colophon	མཁའ་འགྲོ་གསང་བའི་མཛོད་ཀྱི་ཆོས་སྡེ་ལས་ཉེར་མཁོའི་ལས་ཚོགས་འགའ་ཞིག་ཁོལ་འདོན་དུ་གཏན་ལ་ཕབ་པ་སྟེ༔ འཇིགས་བྲལ་ཡེ་ཤེས་རྡོ་རྗེས་སོ། །ཤུ་བྷཾ༎
	mkha' 'gro gsang ba'i mdzod kyi chos sde las nyer mkho'i las tshogs 'ga' zhig khol 'don du gtan la phab pa ste:___'jigs bral ye shes rdo rjes so/___/shu b+haM//

Tibetan Text

[edit]

༁ྃ༔ མཁའ་འགྲོ་མཚོ་རྒྱལ་གྱི་གྲུབ་རྟགས་ལས་ཚོགས་ཟབ་མོ་བཞུགས་སོ༔ ༁ྃ༔ མཁའ་འགྲོ་མ་གུས་པས་འདུད༔ ཡང་ཟབ་མཁའ་འགྲོའི་སྙིང་ཐིག་ལས༔ ཁྱད་པར་གྱི་ལས་ཚོགས་ཉི་ཤུ་རྩ་གཅིག་བསྟན་པ་ནི༔ གོང་དུ་མཁའ་འགྲོའི་བསྙེན་སྒྲུབ་ཚད་དུ་བསྐྱལ་ཞིང་དྲོད་རྟགས་བརྙེས་པའི་རྣལ་འབྱོར་པས༔ མཁའ་འགྲོའི་ང་རྒྱལ་བརྟུལ་ཞུགས་ཀྱི་སྤྱོད་པ་བྱ་བ་ལ༔ འཇིག་རྟེན་ལྷ་འདྲེ་དྲག་པོ་དམ་ལ་འདོགས་ཤིང་ལས་ལ་བཙུད་པ་ནི༔ ལྷ་སྲིན་གར་གནས་པའི་རྟེན་དེ་ནས་ས་བླངས་ལ་གཟུགས་བཅོས༔ གཏོར་མ་བྱིན་ནས༔ རང་མཁའ་འགྲོ་མཚོ་རྒྱལ་གྱིང་རྒྱལ་བསྒོམས་ལ༔ བཾ་ཧ་རི་ནི་ས་ངྷེ་ཝ་ཡཀྴ་ཧཱུྃ༔ ཀ་ལ་ས་མ་ཡ་སྟྭཾ༔ ཞེས་བཟླས་པས་ལྷ་འདྲེ་གདུག་པ་ཅན་གང་ [2a] ཡིན་ཡང་དམ་ལ་ཐོགས་ཤིང་ལས་ལ་འཁོལ་ལོ༔ ཟབ་རྒྱ༔ བླ་མ་མཁའ་འགྲོའི་རྣལ་འབྱོར་པས༔ དོན་འགྲུབ་བམ་མི་འགྲུབ་རྟག་པ་ནི༔ རང་གི་སྔས་སུ་མཁར་བའི་སྣོད་དུ་ཆུ་གཙང་མའི་ནང་དུ་འོ་མ་བླུགས་ཏེ༔ རང་མཚོ་རྒྱལ་དཀར་མོ་ཉི་མའི་སྤྱན་དཔྲལ་བར་ཡོད་པར་བསམ་ལ༔ བྃ་ཧ་རི་ནི་ས་ཆུ་བུར་མིག་གི་སྒོ་སོལ༔ ཙཀྵུ་སྭཱ་ཧཱ༔ ཞེས་སྟོང་ཕྲག་བཟླས་ནས་མིག་ལ་ཆུ་བྱུག༔ ཁོང་དུ་མིད༔ ཁྲུས་བྱས་ཏེ་ཉལ་བས༔ རབ་མིག་གིས་མཐོང་༔ འབྲིང་ལུང་སྟོན༔ ཐ་མ་རྨི་ལམ་དུ་བརྡ་རྟགས་སྣ་ཚོགས་འབྱུང་ངོ་༔ མཁའ་འགྲོ་ལ་གསོལ་བ་གདབ་བོ༔ [2b] ཨྠིྀ༔ མཁའ་འགྲོ་གྲུབ་པའི་རྣལ་འབྱོར་བས༔ པྲ་དབབ་པར་འདོད་ན༔ བུ་མོ་གཙང་མ་གྲོང་པའི་ཆོས་ཀྱིས་མ་གོས་པ་ལ་ཁྲུས་བྱ༔ དེ་མཁའ་འགྲོ་དམར་མོ་སྤྱན་གསུམ༔ དཔྲལ་བའི་སྤྱན་གྱིས་སྲིད་གསུམ་མཐོང་བ་གཅིག་ཏུ་བསྒོམས་ལ༔ བྃ་ཧ་རི་ནི་ས༔ གང་གོ་ལི༔ ཆུ་བུར་མིག་གི་སྒོ་ཕྱེས་ཤིག༔ ཅེས་ནས་ལ་བཟླས་ནས་གཏོར་བས་ལེགས་ཉེས་ཐམས་ཅད་མཐོང་བར་འགྱུར་རོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ ལུས་བསྒྱུར་བར་འདོད་ན༔ ས་ལ་ཕག་པའི་གཟུགས་ལ་སོགས་པ་གང་འདོད་བྱས་ལ། བྃ་ཧ་རི་ནི་ས༔ ས་གེ་ཡ༔ ཞེས་བརྒྱ་རྩ་བཟླས་ཤིང་གང་དུ་བསྒྱུར་བའི་དམིགས་པ་གཏད་དེ་ལན་གསུམ་འདྲེས་པས་གང་འདོད་པའི་གཟུགས་སུ་འགྱུར་རོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ ཕ་རོལ་གྱི་ཤེས་པ་བསྒྱུར་འདོད་ན༔ རང་རྡོ་རྗེ་ཕག་མོར་བསྒོམས་པའི་ཐུགས་ཀར་མཚོ་རྒྱལ་དམར་མོ་རུས་རྒྱན་ཅན་བསྒོམས་ལ༔ བྃ་ཧ་རི་ནི་ས༔ ཨ་མྲྀ་ཏཾ་ཀ་ལ༔ ཞེས་བཟླ་ཞིང་ཕག་མོའི་ད་ཀྱི་ངུར་ནས༔ ཕ་རོལ་ལ་རིག་པ་གཏད་པས་ཤེས་པ་འགྱུར་རོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ ཆོས་སྨྲ་བའི་ཚེ༔ རང་གི་ལྕེ་པདྨ་འདབ་བཞིར་ཡི་གེའི་རང་སྒྲ་སྒྲོགས་པར་བསམ་ལ༔ བྃ་ཧ་རི་ནི་ས༔ ངྷྭརྨ་སརྦ་ [3a] སྨྲས་སོ༔ ཞེས་བརྒྱ་རྩ་བཟླས་པས་ཆོས་གང་བཤད་ཕ་རོལ་གྱི་ཡིད་ལ་འཇུག་ཅིང་བྱིན་གྱིས་བརླབ་བོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ སྐྱེས་པ་འགུགས་པར་འདོད་ན༔ གྲོག་ལ་གང་བྱེད་ཀྱི་གཟུགས་བྲིས་ལ༔ སྙིང་གར་འཁོར་ལོ་རྩིབས་དྲུག༔ རྩ་སྔགས༔ མུ་ཁྱུད་ལ་ཤམ༔ དབུས་སུ་མིང་ནྲྀཿབྲིས་ལ༔ རང་མཚོ་རྒྱལ་འགུགས་བྱེད་དམར་མོར་གསལ་ལ༔ བྃ་ཧ་རི་ནི་ས༔ ཆེ་གེ་མོ་ཨཱ་ཀཪྴ་ཡ་ཛཿཛ༔ ཞེས་བསྒྲུབས་ནས་རྟགས་བྱུང་བ་དང་འཁོར་ལོ་ལག་མཐིལ་དུ་དྲིལ་བས་གང་ལ་བྱས་པ་ཁུག་པར་འགྱུར་རོ༔ བུད་མེད་འགུགས་པར་འདོད་ན༔ འཁོར་ལོ་གོང་ལྟར་མིང་ཡིག་བྲིས་ལ༔ བྃ་ཧ་རི་ནི་ས༔ རྨར་ཆེ་གེ་མོ་ཨ་ཀཪྴ་ཡ་ཧྲཱིཿ ཞེས་བསྒྲུབས་ནས་འཁོར་ལོ་དྲིལ་ཏེ་མོས་མཐོང་སར་ཕྱིན་པས་མྱུར་དུ་ཁུག་པར་འགྱུར་རོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ ཆང་འགུགས་པར་འདོད་ན༔ ཐོད་པ་ཆང་གིས་བཀང་བ་ལ་བདུད་རྩི་བླུགས་ནས༔ བླ་མ་མཁའ་འགྲོ་ལ་མཆོད་བསྟོད་གསོལ་བ་བཏབ༔ བྃ་ཧ་རི་ནི་ས༔ སུ་ར་སིདྡྷི་ཕ་ལ་ན་མ༔ ཞེས་བཟླས་པས་ཆང་ཁོལ་དུ་འོང་བས༔ རང་མཚོ་རྒྱལ་གྱི་སྤྱི་བོར་བླ་མ༔ སྙིང་གར་ཡི་དམ༔ ལྟེ་བར་མཁའ་འགྲོ་ [3b] བསམ་ལ་ཧུབ་གསུམ་བཏུང་༔ ལྷག་མ་བདུད་རྩི་རིལ་བུར་བྱས་ལ་ལུས་ལ་བཅང་༔ དཔྲལ་བར་བྱུགས་ལ༔ བྃ་ཧ་རི་ནི་ས༔ སྨི་ཏི་ཟུང་༔ ཞེས་བཟླས་པས་ཆང་མང་དུ་འདུའོ༔ གོང་གི་རིལ་བུ་དེ་ཕབ་དང་བསྲེས་ནས་ཆང་བཙོས་ན༔ ཆང་ཞིམ་ཞིང་ཆང་ཟད་པ་མེད་པར་འབྱུང་ངོ་༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ མི་འདུ་བར་འདོད་ན༔ ཚོགས་དང་གཏོར་མ་བཟང་པོ་བཤམ༔ མཁའ་འགྲོ་ལ་གསོལ་བ་གདབ༔ བྃ་ཧ་རི་ནི་ས༔ དྷཱ་ཀི་ཨོ་ཏྲུཾ་ཨེ་ཀ་ས་ར༔ ཞེས་བཟླ་ཞིང་ལག་མཐིལ་དུ་འཁོར་ལོ་བྲིས་ནས་བསྔགས་ཏེ་མི་ལ་བསྟན་པས་ཁྲོམ་འདུའོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ མཁའ་འགྲོ་མ་དང་མི་མ་ཡིན་དབང་དུ་བསྡུ་བར་འདོད་ན༔ དུར་ཁྲོད་དུ་འགྲོ་ནས་གཅེར་བུར་བྱས་ཏེ༔ རྐང་དུང་འབུད༔ རང་མཚོ་རྒྱལ་དུ་བསམ་ལ༔ བྃ་ཧ་རི་ནི་ས༔ བྷ་རི་ཧ་ས་ཛཿ ཞེས་བཟླས་ཤིང་ཁྲག་གཏོར་བས༔ མི་མ་ཡིན་རྣམས་སྤྲིན་བཞིན་དུ་འདུ་ཞིང་གང་བཅོལ་བ་ཉན་ནོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ ཟས་ནོར་འདུ་བར་འདོད་ན༔ ནང་ནུབ་ཟས་སྣ་ཆུ་དང་རིན་པོ་ཆེ་རྣམས་སྲེག་ཅིང་༔ མེ་མཁའ་འགྲོའི་ཚོགས་སུ་བསམ་ལ༔ བྃ་ཧ་རི་ནི་ས༔ བ་སུ་ངྷ་ན་ཁ་ངྷེ་རཏྣ་པུཥྚིཾ་ཀུ་རུ་ [4a] སྭཱ་ཧཱ༔ ཞེས་མཆོད་པས་ཟས་ནོར་གཏེར་བརྡོལ་བ་ལྟར་འབྱུང་ངོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་བས༔ ཚོང་རྒྱལ་བར་འདོད་ན༔ མཁའ་འགྲོ་ལ་གསོལ་བ་བཏབ་ནས༔ བྃ་ཧ་རི་ནི་ས༔ སྨ་ས་ར་ས་ཀུ་རུ༔ ཞེས་ཁོའི་ནོར་དེ་ལ་སྔགས་ཉེར་གཅིག་བཏབ་པས་ཚོང་རང་རྒྱལ་བར་འགྱུར་རོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ ནོར་བསྒྲུབ་པར་འདོད་ན༔ ཐོད་པ་མཚན་ལྡན་དུ་མ་གཅིག་ནང་དུ་རིན་པོ་ཆེ་འབྲུ་དར་ཟབ་སྣ་ཚོགས་ཀྱིས་བཀང་ལ༔ མཁའ་འགྲོ་མཆོད་ཅིང་གསོལ་བ་བཏབ་སྟེ༔ བྃ་ཧ་རི་ནི་ས༔ བ་སུ་པུཥྚིཾ་ཀུ་རུ་སྭཱ་ཧཱ༔ ཞེས་བཟླས་པས་ནོར་ཕྱུག་པར་འགྱུར་རོ༔ ཨྠིྀ༔ མཁའ་འགྲོ་གྲུབ་པའི་རྣལ་འབྱོར་པས༔ གྲུབ་རྟགས་བསྟན་འདོད་ན༔ དང་པོ་མཁའ་སྤྱོད་སྒྲུབ་པ་ནི༔ སྐྱེ་བ་བདུན་པའི་ཁྲག་དང་༔ ཤ༔ རུས་པ༔ སྨན་སྣ་ཚོགས་བསྲེས་ལ་རིལ་བུ་བྱས་ཏེ་ཐོད་པ་བཀང་ནས༔ བྃ་ཧ་རི་ནི་ས༔ ཨེ་ཀ་པཱ་ལ༔ ཞེས་འབུམ་ཕྲག་བཟླས་པས་རིལ་བུ་མང་དུ་འཕེལ་ཞིང་འཕུར་རོ༔ དེ་ཁར་བཅུག་པས་མཁའ་སྤྱོད་འགྲུབ༔ ཚེ་ཉི་ཟླ་དང་མཉམ་མོ༔ ཨྠིྀ༔ ས་སྤྱོད་བསྒྲུབ་ན༔ གནས་དབེན་པར་དོང་གྲུ་གསུམ་བྲུས་ལ་རང་དེར་འདུག༔ མཁའ་འགྲོ་ [4b] མཚོ་རྒྱལ་ཡེ་ཤེས་ཀྱི་སྤྱན་ཅན༔ སྤྱན་ས་འོག་ཏུ་གཟིགས་པར་བསྒོམས་ལ༔ བྃ་ཧ་རི་ནི་ས༔ ཨ་མན་བྷ་ག༔ ཞེས་བཟླས་པས༔ དང་པོ་བྱོལ་སོང་༔ དེ་ནས་དམྱལ་བ་སོགས༔ དེ་ནས་ས་འོག་གི་གཏེར་ཐམས་ཅད་མཐོང་སྟེ་དབང་བསྒྱུར་བར་འགྱུར་རོ༔ ཨྠིྀ༔ མེས་མི་ཚིག་པར་འདོད་ན༔ བྃ་ཧ་རི་ནི་ས༔ ཨགྣེ་ཤཱནྟིཾ་ཀུ་རུ་སྭཱ་ཧཱ༔ ཞེས་མེར་མཆོངས་ཀྱང་མི་ཚིག་གོ༔ ཆུས་མི་བྱིང་བར་འདོད་ན༔ བྃ་ཧ་རི་ནི་ས༔ པ་ནི་པུས་ཏིང་ཀུ་རུ་ཡི་སྭཱ་ཧཱ༔ ཞེས་ཆུས་མི་བྱིང་ངོ་༔ གཡང་རྦབ་ཀྱི་ཉེས་པ་མི་འོང་བར་འདོད་ན༔ བྃ་ཧ་རི་ནི་ས༔ ཡྃ་པ་ར་ཎཱ་ཡ་སྭཱ་ཧཱ༔ གཡང་ལ་མཆོངས་ཀྱང་མི་སྐྱོན་ནོ༔ མགོ་མི་ཆག་པར་འདོད་ན༔ བྃ་ཧ་རི་ནི་ས་ཧཱུྃ༔ ཞེས་མགོ་བརྡབས་དེ་འབོལ་བར་བསྒོམས་པས་མི་སྐྱོན་ནོ༔ གངས་སོགས་འཁྱག་པའི་སྟེང་དུ་ཉལ་ན༔ རླུང་དགང་ནས་བཟུང་ལ་གཏུམ་མོ་སྦར༔ བྃ་ཧ་རི་ནི་ས༔ རྃ་རྃ༔ ཞེས་འཁྱག་མེད་བསྒོམ་མོ༔ དེ་ལྟར་བརྟུལ་ཞུགས་གང་བྱེད་ཀྱང་མཁའ་འགྲོའི་རྟགས་ཚད་རྫོགས་པར་བསྒྲུབ་པ་གལ་ཆེའོ༔ མཁའ་འགྲོ་མའི་བརྟུལ་ཞུགས་ཀྱི་གྲུབ་རྟགས་ལས་ཚོགས་ཉེར་གཅིག་པ་ཨྀཐི༔ གུ་ཧྱ༔ མཁའ་འགྲོའི་ལས་ཚོགས་ཐོར་བུ་སྣང་སྲིད་དབང་བསྒྱུར་བསྟན་པ་ནི༔ བསྙེན་ [5a] པ་ཚད་དུ་སྐྱོལ་ཞིང་མཁའ་འགྲོ་གྲུབ་པའི་རྣལ་འབྱོར་པས༔ དང་པོ་ཞི་བའི་ལས་ཚོགས་ནི༔ རྒྱལ་པོའི་ཆད་པ་ལ་སོགས་འཇིགས་པ་དྲག་པོ་བྱུང་ན༔ རྒྱ་ཤུག་དང་ཙན་དན་གྱི་ལོ་མ་ལ༔ བྃ་ཧ་རི་ནི་ས་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་འབུམ་ཕྲག་གཅིག་བཟླས་ནས་རྒྱལ་མཚན་གྱི་རྩེ་མོ་ལ་བཏགས་ནས༔ མཚོ་རྒྱལ་མཁའ་འགྲོ་མ་ལ་གསོལ་བ་བཏབ་སྟེ༔ ཨ་མ༔ རྒྱལ་པོའི་ཆད་པའི་འཇིགས་པ་དང་༔ ཕ་རོལ་པའི་དམག་ཚོགས་དང་༔ མེ་དང་༔ ཆུ་དང་༔ གཅན་གཟན་དང་༔ སྦྲུལ་གདུག་པ་ཅན་དང་༔ མུ་གེ་དང་༔ དུས་མ་ཡིན་པའི་འཆི་བའི་འཇིགས་པ་དང་༔ འཇིགས་པ་བརྒྱད་ལས་ཐར་བར་གྱུར་ཅིག༔ བཟློག་པར་འགྱུར་ཅིག༔ ཞི་བར་གྱུར་ཅིག༔ ཅེས་བྱས་པས་འཇིགས་པ་བརྒྱད་ལས་ཐར་བར་འགྱུར་རོ༔ ཨྠིྀ༔ རྒྱས་པའི་ལས་སྦྱོར་ནི༔ བུམ་པར་ཆུ་དང་༔ རིན་པོ་ཆེ་དང་༔ སྨན་དང་༔ འབྲུ་ལ་སོགས་པ་བླུགས་ལ༔ བྃ་ཧ་རི་ནི་ས་ས་པུས་ཏིང་ཀུ་རུ་ཨཱ་ཡུཿསིདྡྷི་སྭཱ་ཧཱ༔ ཞེས་འབུམ་ཕྲག་གཅིག་བཟླས་ནས་ནངས་རེ་བཞིན་དུ༔ རང་ངམ་འཁོར་སོགས་གང་དགོས་ཀྱིས་ཁྲུས་བྱས་ཤིང་བཏུང་ན་ཚེ་དང་༔ འཁོར་དང་༔ ནོར་དང་༔ ལོངས་སྤྱོད་ལ་སོགས་པ་ [5b] རྒྱས་པར་འགྱུར་རོ༔ ཨྠིྀ༔ དབང་གི་ལས་ནིཿ མེ་ལོང་གི་སྟེང་དུ་བྱང་སེམས་དཀར་དམར་དང་༔ སིནྡྷུ་རས་བྃ་ཧ་རི་ནི་ས་ཡི་གེ་བྱས་ཏེ༔ དེའི་སྟེང་དུ་རྫས་དེ་གསུམ་གྱི་རིལ་བུ་ཐུམ་བོར་བཞག་ལ༔ བྃ་ཧ་རི་ནི་ས༔ པ་ཤཾ་ཀུ་རུ༔ ཨཱ་བེ་ཤ་ཨཱཿཞེས་འབུམ་ཕྲག་བཟླས་ནས༔ ལས་སྦྱོར་ནམ་དགོས་དུས་སྨིན་མཚམས་སུ་ཐིག་ལེ་བྱས་པས༔ འགྲོ་བ་ཐམས་ཅད་ཀྱིས་རྒྱལ་པོའམ༔ སློབ་དཔོན་ནམ༔ ཕ་མ་ལྟ་བུར་མཐོང་ནས་མོས་ཏེ༔ མོས་པ་རྣམ་པ་བཞིས་དབང་དུ་འདུས་པ་འགྱུར་རོ༔ ཨྠིྀ༔ དྲག་པོའི་ལས་ཀྱིས་དགྲ་བསད་པ་ནི༔ རབས་ཆད་ཀྱི་ཐོད་པར་དགྲའི་ལིངྒ་བཅུག་སྟེ༔ དགུག་གཞུག་བྱས་ནས༔ ཉུང་དཀར་ལ་བསྔགས་ཏེ་ཐུན་བརྡེག་གོ༔ བྃ་ཧ་རི་ནི་ས་ཨ་ཀ་ས་མ་ར་ཙ་ཕཊ༔ ཆེ་གེ་ཨུཾ་མཱ་ར་ཡ་རྦད༔ ཅེས་ཐུན་དྲག་ཏུ་བརྡེབས་པས་ཐོད་ལིང་འཚག་པར་འོང་ངོ་༔ དེ་ནས་སྦྱིན་སྲེག་གི་དུག་ཤིང་གི་མེ་ལ་བསྲེགས་པས་མྱུར་དུ་གུམ་མོ༔ དགྲ་བོ་འགུགས་པར་འདོད་ན༔ དུར་ཁྲོད་ཀྱི་རས་ལ་དགྲ་བོའི་རཱུ་བར་ཁྲག་གིས་བྲིས་ལ༔ སྙིང་གར་ཡི་གེ་ནྲྀ་ཛཿབྲི༔ ངག་ནས་བྃ་ཧ་རི་ནི་ས་ཆེ་གེ་ཨཾ་ཀུ་ཤ་ནི་ཛ་ཛཿ ཞེས་བཟླས་ཤིང་ལིངྒ་ལ་འགུགས་གཞུག་བྱས༔ ལིངྒ་ [6a] བྲུབ་ཁུང་དུ་བཅུག་ལ༔ ཉུང་དཀར་ཐུན་གྱིས་བྲབ་པས་དགྲ་དངོས་སུ་དགུག་ནུས་སོ༔ ཨྠིྀ༔ དགྲ་བཅིངས་པ་ནི༔ དགྲ་བགེགས་གང་ཡིན་ལིངྒ་བྲིས་ལ༔ སྙིང་གར་ནྲྀ་ཛཿཛཿནན༔ ཅེས་བྲིས་ལ་བལ་ནག་ཕྱིན་ཀ་ལོག་ཏུ་སྐུད་པས་བྱད་དུ་གཞུག༔ བྃ་ཧ་རི་ནི་ས༔ མོན་ངྷ་ཆིངས༔ ཞེས་བཟླ་ཞིང་ཉུང་ནག་གི་ཐུན་གྱིས་བྲབ༔ ལིངྒ་མལ་འོག་ཏུ་མནན་ན་དགྲ་བོ་གང་ལ་བྱས་པ་གྲུ་གུ་ཐུལ་དུ་འཆིང་བར་འགྱུར་རོ༔ ཨྠིྀ༔ དགྲ་བགེགས་བསྐྲད་པར་འདོད་ན༔ གུ་གུལ་དང་ནིམ་པ་སྦྱར་ལ༔ དགྲ་བགེགས་ཀྱི་ལིངྒ་བྲིས་ཏེ༔ རྫས་ཀྱི་དུད་པ་བཏང་ཞིང་༔ བྃ་ཧ་རི་ནི་ས༔ གརྫ་ཡ་ཕཊ༔ ཅེས་སྟོང་བཟླས་པས་དགྲ་ཡུལ་ནས་ཕྱུང་ཞིང་༔ བགེགས་གནས་ནས་བསྐྲད་པར་འགྱུར་རོ༔ ཨྠིྀ༔ དགྲའི་དམག་དཔུང་རེངས་པར་འདོད་ན༔ རྒྱ་ཤུག་གི་ལོ་མའམ་གྲོ་ག་ལ་དགྲའི་མིང་བྲིས་ལ༔ དམག་གི་མདུན་དུ་བསྲེག་ཅིང་༔ བྃ་ཧ་རི་ནི་ས༔ ཧ་ཀ་ལི་ཧཱུྃ་ཕཊ༔ ཅེས་བཟླས་པས་དམག་དང་དགྲ་གང་ཡིན་ཀྱང་རུང་སྟེ་རེངས་པ་འགྱུར་རོ༔ ཨྠིྀ༔ དགྲ་བགེགས་ཡུལ་ནས་ཕུང་བ་ནི༔ དགྲ་བགེགས་ཀྱི་ལིངྒ་བྲིས་ལ༔ ཚེར་མའི་ཤིང་ལ་ཉུང་ནག་བསྲེས་ཏེ༔ བྃ་ཧ་རི་ནི་ས༔ [6b] ཆེ་གེ་སྤོ་ཏ་ཡ་སྤོ་ཏ་ཡ་ཕཊ༔ ཅེས་ཐལ་བ་ཕྱོགས་ཐམས་ཅད་དུ་གཏོར་ཞིང་རླུང་ལ་བསྐུར་ན༔ དགྲ་བགེགས་ཡུལ་བུད་ནས་མི་ཆགས་སོ༔ ཨྠིྀ༔ མཐུན་གཉིས་སམ༔ དགྲའི་ནང་ངམ། གྲོང་ཁྱེར་གྱི་ནང་དབྱེ་བར་འདོད་ན༔ ཤིང་གླ་བའི་བྱང་བུ་ལག་མཐིལ་དང་མཉམ་པའི་དུམ་བུ་ཟླུམ་པོ་གཉིས་ལ༔ ལྡོང་རོས་ཀྱི་འཁོར་ལོ་རྩིབས་བཞི་པར་ཧ་རི་ནི་ས༔ དབུས་ཀྱི་ལྟེ་བར་དགྲའི་མིང་བྲིས༔ མཐར་སྲོག་མཱ་ར་ཡ་ཕྱེས་ཕྱེས་བྲིས༔ རང་གིས་བྃ་ཧ་རི་ནི་ས༔ སྲོག་མཱ་ར་ཡ་ཕྱེས་ཕྱེས༔ ཞེས་བཟླ་ཞིང་འཁོར་ལོ་གཉིས་དྲག་ཏུ་བརྡབ་ན་དགྲ་ནང་འཁྲུགས༔ མཐུན་གཉིས་བྲལ་བར་འགྱུར་རོ༔ ཨྠིྀ༔ གཡུལ་ལས་རྒྱལ་བར་འདོད་ན༔ ཕུངས་དང་ལྕགས་ཕྱེ་འསྲེས་ལ༔ བྃ་ཧ་རི་ནི་ས༔ ཨ་མྲྀ་ཀ་ར་ལ་ཕཊ༔ ཅེས་བཟླས་ཏེ་ས་དེ་གཏོར་ན་གཡུལ་ལས་རང་རྒྱལ་ལོ༔ ཨྠིྀ༔ མཚོན་གྱི་མི་ཚུག་པ་འདོད་ན༔ བྃ་ཧ་རི་ནི་ས༔ དུར་མོ་ཡ་མི་ལ་སྭཱ་ཧཱ༔ ཞེས་སྔགས་དེ་སྟོང་ཕྲག་དགུ་བཟླས་ནས་ཉུང་ཀར་འབྲུ་བདུན་དང་ལྷན་ཅིག་ལུས་ལ་བཏགས་ན་མཚོན་གྱིས་མི་ཚུགས་སོ༔ ས་ལ་བཟླས་ཏེ་གཏོར་ན་ཕ་རོལ་གྱི་མཚོན་ཁ་ཆིང་བར་འགྱུར་རོ༔ ཨྠིྀ༔ རྒྱལ་པོའི་དམག་དཔུང་བཟློག་པར་འདོད་ན༔ ཐོད་པ་ [7a] སྦྱར་མའི་ནང་དུ་སྔགས་ཀྱི་འཁོར་ལོ་བྲིས་ཏེ༔ བྃ་ཧ་རི་ནི་ས༔ ས་སྨ་ར་ས་ཀུ་རུ་སྭཱ་ཧཱ༔ ཞེས་འབུམ་ཕྲག་བཟླས་ཏེ༔ རྔ་བརྡུངས་པས་རྒྱལ་པོའི་དམག་དཔུང་ཐམས་ཅད་ལས་རང་རྒྱལ་ལོ༔ ཨྠིྀ༔ དགྲ་བོ་སྨྱོ་བར་འདོད་ན༔ སྨྱོ་འབོག་གི་ཁྲག་གིས་དགྲ་ཡི་ལིངྒ་བྲིས་ལ༔ དུག་ཆུས་བྱུག༔ སྨྱོས་ནས་ཤི་བའི་སྙིང་དུ་བཅུག་ལ༔ བྃ་ཧ་རི་ནི་ས༔ ཨུན་མན་ཏ་ཡ་ཕཊ༔ ཅེས་ཐང་ཕྲོམ་གྱིས་བྲབ་པས་གང་ལ་བྱས་པ་སྨྱོ་བར་འགྱུར་རོ༔ དགྲ་ལྐུགས་པར་འདོད་ན༔ དགྲའི་ལིངྒ་མིང་རུས་བྲིས་ཏེ་ལྐུགས་པའི་ལྕེར་བཅུག་ལ༔ ཉུངས་ནག་དང་གུ་གུལ་གྱིས་བྲབ་བོ༔ བྃ་ཧ་རི་ནི་ས༔ ཀྲི་ཝ་སྟྭམ་བྷ་ཡ་ནན༔ ཞེས་ཆུ་མིག་ལྐུགས་པར་ལིངྒ་མནན་ན་དགྲ་ཁ་ལྐུགས་པར་འགྱུར་རོ༔ དགྲ་བགེགས་སྲེག་པ་ནི༔ དུག་ཤིང་གི་མེ་ལ་དགྲ་བགེགས་ཀྱི་ལིངྒ་དང་༔ མར་ནག༔ ཀེ་ཚེ་དང་གཏོར་མ་བཅས་བསྲེགས་ཏེ༔ བྃ་ཧ་རི་ནི་ས༔ ཆེ་གེ་མོ་ཛྭ་ལ་རཾ་རཾ༔ ཞེས་རྫས་དང་ལིངྒ་རེ་རེ་ལ་བདུན་རེ་བཟླས་ཏེ༔ ཉི་ཤུ་རྩ་གཅིག་རེ་བསྲེག་ན་དགྲ་བགེགས་ཐམས་ཅད་བརླག་པ་འགྱུར་རོ༔ ཨྠིྀ༔ དགྲ་བགེགས་མནན་པར་འདོད་ན༔ ཐོད་པ་མཚན་ངན་དུ་དགྲ་བགེགས་ཀྱི་ལིངྒ་བཅུག་ནས་ [7b] མཁར་ནག་གིས་བཅིངས་ནས་དགུག་གཞུག་དྲག་ཏུ་བྱས་ཏེ༔ བྃ་ཧ་རི་ནི་ས༔ ཆེ་གེ་མོ་མཱ་ར་ཡ་སྟྭམ་བྷ་ཡ་ནན༔ ཞེས་སྟོང་ཁྲི་བཟླས་ནས་དུར་ཁྲོད་དང་༔ མཆོད་རྟེན་རྨང་ངམ༔ ལྷ་ཁང་གི་ཐེམ་འོག་ཏུ་མནན་ནོ༔ རྟ་བྲོ་བྱས་པས་དགྲ་བགེགས་གང་ཡང་གནོན་པར་འགྱུར་རོ༔ ཨྠིྀ༔ ཕ་རོལ་གྱི་རྦོད་གཏོང་དང་བྱད་ཁ་བཟློག་པར་འདོད་ན༔ དགྲ་ཡི་ལིང་ག་བྲིས་ནས་སྙིང་ཁར་མཚོན་ཕུར་སོར་བརྒྱད་གདབ་སྟེ༔ བྃ་ཧ་རི་ནི་ས་རྦོད་གཏོང་སརྦ་ཟློག༔ ཆེ་གེ་མོ་ལ་རྦད༔ ཅེས་ཉིན་ཞག་ཕྲུགས་གཅིག་ཏུ་བཟླས་ཤིང་༔ ལིངྒ་ཐོད་པ་མཚན་ངན་དུ་བཅུག་ལ༔ རང་གི་མལ་འོག་ཏུ་སྦས༔ དེས་ཟོར་ཁ་རང་གཤེད་དུ་བཟློག་པར་འགྱུར༔ ཨྠིྀ༔ ལྟས་ངན་པ་དང་རྨི་ལམ་ངན་པ་བཟློག་ན༔ དམར་གཏོར་གཙོ་འཁོར་ལྔ་བཤམས་ལ༔ མཁའ་འགྲོ་མ་ལ་གསོལ་བ་གདབ་སྟེ༔ བྃ་ཧ་རི་ནི་ས༔ ཨ་པ་ན་ཡ་ཟློག་བྷྱོ༔ ཅེས་བཟླས་ནས་ཕྲིན་ལས་བཅོལ༔ གཏོར་མ་ཕྱོགས་ངན་དུ་འཕང་ན་རྨི་ལམ་ངན་པ་ལྟས་ངན་ལ་སོགས་པ་མི་མཐུན་པ་ཐམས་ཅད་བཟློག་པར་འགྱུར་རོ༔ ཨྠིྀ༔ ལམ་དུ་ཞུགས་པའི་དགྲ་ཇག་བཟློག་ན༔ དགྲ་གཟུགས་ཐེམ་པའི་ཕྱི་རོལ་ལམ༔ ལམ་དུ་བྲིས་ལ༔ དེའི་སྙིང་ཁར་རྐང་པ་བཞག་ལཿ [8a] བྃ་ཧ་རི་ནི་ས༔ ཨངྐུ་ཤ་ཏྲཱུཾ་མཱ་ར་ཡ་ནན༔ ཞེས་ཉེར་གཅིག་རེ་བཟླས་ནས་དགྲ་བོ་རི་རབ་ཀྱིས་ནོན་པར་བསམ་ལ་འགྲོ་བས་འཇིགས་པ་མི་འབྱུང་ངོ་༔ ཨྠིྀ༔ ཡམས་ནད་དང་བགེགས་བཟློག་ན༔ དམར་གཏོར་ཁྲག་བྱུག་པ་གཅིག་བཤམས་ལ༔ མཁའ་འགྲོ་མ་ལ་གསོལ་བ་བཏབ་ནས༔ བྃ་ཧ་རི་ནི་ས༔ འབྱུང་པོ་མ་མ་ཤ་ཟློག༔ ཅེས་བཟླས་ནས་གཏོར་མ་ཟོར་དུ་འཕངས་པས༔ མ་མོའི་ཡམས་ནད་དང་འབྱུང་པོ་ཐམས་ཅད་བཟློག་གོ༔ ཨྠིྀ༔ འཕྲལ་དུ་ནད་པ་ལ་བྱིན་རླབས་བྱེད་ན༔ དམར་གཏོར་གཅིག་བཅོས་ཏེ་མཁའ་འགྲོ་ལ་གསོལ་བ་གདབ་ནས༔ བྃ་ཧ་རི་ནི་ས་བྷ་ལིན་ཏ་ཁ་ཁ་ཁཱ་ཧི་ཁཱ་ཧི༔ ཞེས་བརྒྱ་སྟོང་གིས་ཕུལ་ནས༔ ཨ་མ་ཨ་ཀ་ས་མ་ར་ཙ་ཕཊ༔ ཅེས་གཏོར་མ་ནད་པའི་སྟེང་དུ་བསྐྱུར་བས་ཕན་ནོ༔ རྟེན་འབྲེལ་བརྟག་པ་ནི༔ སྣོད་མ་ཆག་ཅིང་༔ གཏོར་རྩེ་ཕར་དང་གཡས་གཡོན་དུ་བསྟན་ན་བཟང་༔ སྣོད་ཆག་ཅིང་གཏོར་རྩེ་རང་ལ་བསྟན་ན་ངན་པས་བསྐྱར་རོ༔ ཨྠིྀ༔ གུ་ཧྱ༔ ཡང་མི་རྒོད་ཇག་པ་བཅིང་བར་འདོད་ན༔ རྐང་པ་གཡོན་པའི་ལྷམ་སྒྲོགས་ལ་མདུད་པ་གཅིག་བྱ༔ མི་རྒོད་དགྲ་བོ་ཐམས་ཅད་ལྕགས་ [8b] ཁང་སྒོ་མེད་ནང་དུ་ཚུད་པ་བསམ༔ རྐང་གཡོན་འོག་ནས་ས་སྤར་བླངས་ལ་འགྲོ་བའི་ཕྱོགས་སུ་གཏོར༔ མགྲོན་གཞན་དང་གནས་ཁང་སོགས་བསྲུང་ན་བྱེ་མ་ལ་བསྔགས་ནས་གཏོར༔ དང་པོ་གོང་བསྙེན་ཁྲི་འབུམ་བྱ༔ དེ་ནས་ནམ་དགོས་ལས་ལ་སྦྱར༔ ལམ་ལམ་ཁ་ལ་ཆིངས་ཆིངས༔ ལམ་ལམ་ཁ་ལ་སྒྲོག་སྒྲོག༔ དགྲ་བོའི་ལུས་ཆིངས་ཆིངསཿ དགྲ་བོའི་ངག་ཆིངས་ཆིངས༔ དགྲ་བོའི་ཡིད་ཆིངས་ཆིངས༔ དགྲ་བོ་ཧོ་པ་ལ་ཧོ་པ་ལ༔ ཟབ་བོ༔ རྨ་ཁྲག་གཅོད་ན༔ ཁྱི་སྤུ་གཏུབ་ལ་མར་དང་བསྲེག་ནས་རྨ་ཁར་བྱུག༔ བྷེ་ཞ་ར་ཎ་འུབ་འདུས་སོང་༔ ཟབ་བོ༔ དུད་འགྲོའི་བརྣང་སྔགས་ནི༔ བརྣང་ཟས་དེ་ཉར་བསྒོམ༔ སྔགས་ཆུ་དང་ཕུ་བཏབ་པ་དུང་དུ་བསྒོམ་ལ༔ ཛ་྅་དུང་ཁ་ལ་ཤད་ཤད་སྭཱ་ཧཱ༔ ཟབ་བོ༔ ལིང་ཏོག་སྔགས་ནི༔ ལིང་ཏོག་ཉ་དང་སྔགས་ཆུ་བྱར་བསྒོམ༔ བྱས་ཉ་སད་པར་བསྒོམ་ལ༔ ཨོཾ་ཧ་ར་ལིང་སྭཱ་ཧཱ༔ ཟབ་བོ༔ སྐྲང་རིགས་དང་གཉན་རིགས་ཐབ་བམ་ཁྲག་ཆོད་ཀྱི་གདམས་པ་ནི༔ རྨ་སྐྲང་གང་ཡིན་དེ་མེ་རུ་བསྒོམ༔ སྔགས་ཆུ་དང་སྔགས་ཐུལ་རྒྱག་པ་ཆུར་བསྒོམ༔ ཆུས་མེ་བསད་པར་བསྒོམ་ལ༔ ཨོཾ་ཏྲི་ཧྲཱི་ཐེབ་ཐེབ་ཐབ་སོད༔ གཞོབ་སོད༔ ཡ་མ་སོད༔ ཡ་ཁྱི་སོད༔ བྲམ་ [9a] ཟེ་ནག་པོ་གཉན་སོད༔ ཟབ་བོ༔ ཁྱི་སྨྱོན་སྔགས་ནི༔ ཟན་ཤྭ་བ་སྔགས་ལ་བཏང་༔ སྔགས་ཆུ་དང་གཉིས་ཀ་བྱའོ༔ ཨོཾ་ཀ་ཀ་ཀི་ཀི་ཅ་ཅ་ཅི་ཅི་སྐྱ་རེངས་མཆེ་བའི་དབལ་སོད༔ ཟབ་བོ༔ བུད་མེད་དང་དུད་འགྲོའི་བུ་མ་ཐོན་ན༔ མར་གྱི་རིལ་བུ་དང་སྔགས་ཆུ་ཁོང་དུ་བཏང་༔ བུད་མེད་ལ་མར་བསྔགས་ཏེ་སྤྱི་བོའི་འཛུམ་དུ་བསྐུ༔ རིལ་བུ་དང་སྔགས་ཆུ་ཧ་ཅང་མང་ན་ནང་ཁྲོལ་བཤལ་དོགས་ཡོད༔ སྔགས་ནི༔ ཨོཾ་ཀ་ཀ་མའི་ལམ་ཕྱེས༔ ཀི་ཀི་མའི་ལམ་ཕྱེས༔ ཤྭ་ནི་མའི་ལམ་ཕྱེས༔ འབྱུང་བ་ལྔ་ཡི་ལམ་ཕྱེས༔ ཐུམ་ཤག༔ རྒྱུག་ཤག༔ ཟབ་བོ༔ ཡང་ཤ་མ་མཐོན་ན༔ སྤྱང་བྲུན་བྱ་བལ་མ་ཆང་དང་སྦྱར་ལ་སྔགས་འདི་བཏབ༔ ཏྲ་ནི་ཏྲ་ནི་ཤག་ཕྱུངས༔ ཞེས་ཁོང་དུ་བཏང་བས་ཕན༔ ཟབ་བོ༔ ཡང་བུད་མེད་དང་དུད་འགྲོའི་ནུ་མ་མ་བདེ་ན༔ ཨོཾ་སུམ་པ་མ་མ་ཛི་ཏ་ན་སྭཱ་ཧཱ༔ མར་རྙིང་པ་སྔགས་ལ་བྱུགས་པས་ཕན་ནོ༔ ཟབ་བོ༔ ལྷོགས་པའི་སྔགས་ནི༔ གོང་བསྙེན་ཁྲི་ཚོ་བྱེད༔ དགོས་དུས་སྔགས་ཆུ་བཏུང་ཞིང་སྔགས་ཐུལ་བཏབ་པས་ཕན༔ ཨ་ཀ་ར་ཙ་སོད༔ ཡ་མ་ཙ་སོད༔ སྤུ་གྲིས་ཆོད་ཆོད༔ སྤུ་གྲིས་རྦད་རྦད༔ ལྷོག་པ་སྤུན་དགུའི་སྲོག་ལ་ཐུམ་ཧྲིལ་ [9b] ཧྲིལ༔ ཟབ་བོ༔ ནད་ངན་གྱི་བསྲུང་བ་ནི༔ ཐོ་རངས་དྲི་ཆུ་བར་པ་ལ་སྔགས་ཅི་མང་བཏབ༔ བུ་ག་དགུ་ལ་ཐིག་ལེ་བྱ་ཞིང་ཁོང་དུ་བཏང་༔ ཨོཾ་ལི་ཏྲི་ཡཀྴ་ཧཱུྃ༔ ཟབ་བོ༔ སོ་སྲིན་གདམས་ངག་ནི༔ རྒྱ་ཐང་ཕྲོམ་ལ་བསྔགས་ནས་མཁར་གོང་མེར་བསྲེགས་པའི་སྟེང་དུ་བླུགས་ལ་བདུག༔ མཆིལ་མ་ཕོས་པས་སྲིན་བུ་དངོས་སུ་འདོན་པར་འགྱུར༔ ཨོཾ་སྨག་སོད༔ རྨུགས་སོད༔ སོ་སྲིན་སོད༔ ཆུད་ཕྱུ་ཊ་སོགས༔ སྭཱ་ཧཱ༔ སོ་རྩ་འཇིབས་ཤིང་མཆིལ་མ་དོར༔ སྣབ་ཙང་ལ་བདུག༔ དེ་ནས་ཁ་གླ་ཆུས་བཤལ༔ ཟབ་བོ༔ ཆུ་འགགས་བཅོས་ཐབས་ནི༔ སྲུང་སྐུད་དཀར་ཁྲ་མདུད་པ་གསུམ་བྱས་སྔགས་བརྒྱ་རྩ་བརྒྱད་བཏབ་ནས་རྐེ་ལ་བཏགས༔ སྔགས་ཆུ་བསྐོལ་གྲང་བྱ་ཞིང་ཁོང་དུ་བཏང་༔ ཨོཾ་ཤར་ཤར་ཤརཿ ནར་ནར་ནར༔ ཆུ་ཆོ་ལེ་སྭཱ་ཧཱ༔ ཟབ་བོ༔ རིམས་ནད་ཀྱི་སྔགས་ལ༔ ཨ་དམར་པོ་ཁྲག་ཁྲིག་སོད༔ འདི་བརྒྱ་རྩ་རེ་མ་ཆག་ན་རིམས་ནད་ཀུན་ལ་ཟབ་བོ༔ ཤ་དུག་ལ་སོགས་དུག་རིགས་སྤྱི་འཇོམས་སྔགས་ནི༔ སྔགས་ཆུ་བྱ་ཞིང་༔ ཤ་དུག་ལ་ཆང་དང་དོམ་མཁྲིས་བསྔགས་ཏེ་ཁོང་དུ་བཏང་༔ ཨོཾ་ཧྲཱིཿནི་ཨ་གྷུ་ལ་ཀ་ཐ༔ འདི་དབུགས་མ་ཆད་གོང་དུ་སླེབ་པས་ཆོག་ [10a] གོ༔ ཟབ་བོ༔ ཨྠིྀ༔ མཁའ་འགྲོ་གསང་བའི་མཛོད་ཀྱི་ཆོས་སྡེ་ལས་ཉེར་མཁོའི་ལས་ཚོགས་འགའ་ཞིག་ཁོལ་འདོན་དུ་གཏན་ལ་ཕབ་པ་སྟེ༔ འཇིགས་བྲལ་ཡེ་ཤེས་རྡོ་རྗེས་སོ། །ཤུ་བྷཾ༎ ༎