TTDL-ZABTER-01-KA-052

Previous Text Back to Volume PageNext Text

Wylie title
Location	bdud 'joms gling pa zab gter Volume 1, Text 51, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ ཆེ་མཆོག་བདུད་འཇོམས་རྡོ་རྗེའི་གསང་སྒྲུབ་ཆོས་ཉིད་ཀློང་མཛོད་བཞུགས་སོ༔ ༠༠༠༠༠བརྡ་ཡིག༥༠༡༔ ན་མོ་གུ་རུ་པདྨ་ཀ་ར་ཡེ༔ ཆེ་མཆོག་དཔལ་དགུའི་གསང་ཆེན་རོལ་པའི་དཔལ༔ རྡོ་རྗེ་གྲོ་ལོད་གསང་བའི་སྒྲུབ་པ་འདི༔ རིག་པའི་རང་གདིང་ཐོབ་ནས་འཁོར་འདས་ཀུན༔ གཉིས་མེད་རོལ་པར་རྟོགས་པའི་རྣལ་འབྱོར་གྱིས༔ སྤྱོད་ཡུལ་ཟབ་མོ་མ་བཙལ་རྫོགས་པའི་ལྷ༔ དམ་ཚིག་ཡེ་ཤེས་གདོད་ནས་གཉིས་མེད་དེ༔ རང་ཤེས་གཟུང་འཛིན་བྲལ་བའི་ངང་ནས་སྤྱོད༔ སྤྱན་འདྲེན་བཞུགས་གསོལ་ཕྱག་འཚལ་འདིར་མི་དགོས༔ སངས་རྒྱས་ཡུལ་གོལ་ཅན་གྱི་ཞེན་ལམ་མིན༔ ཚེ་གཅིག་སངས་རྒྱས་སྒྲུབ་པ་ཟབ་མོའི་ལམ༔ ངེས་གསང་རྫོགས་པ་ཆེན་པོ་དོན་གྱི་ལྷ༔ འབྲེལ་བའི་སྒྲུབ་པ་གསང་བའི་སྙིང་པོ་འདི༔ བདུད་འདུལ་ཆེན་པོ་པདྨ་འབྱུང་གནས་ངས༔ མ་འོངས་འབྱུང་འགྱུར་སྤྲུལ་པ་དག་ལ་གདམས༔ ཉམས་སུ་ལེན་ཚད་ངའི་སྤྲུལ་ཤ་སྟག་གོ༔ ས་མ་ཡ༔ དེ་ནས་སྒོ་གསུམ་རྡོ་རྗེ་གྲོང་འཇུག་ལ༔ རྣལ་འབྱོར་བྱ་བ་སྒྲུབ་པ་ཀུན་གྱི་གནད༔ བསྐྱེད་རྫོགས་བཟླས་བརྗོད་ཏིང་འཛིན་ཡ་མ་བྲལ༔ དམ་བཅའ་མི་རལ་བ་ནི་རྩལ་དུ་འདོན༔ ས་མ་ཡ༔ དངོས་གཞི་ནི༔ ཧཱུྃ་བླ་མ་ཧཱུྃ་ཡི་དམ་ཧཱུྃ་མཁའ་འགྲོ་མ་ལུས་པ༔ ཡོངས་འདུས་སྒོ་གསུམ་ཡི་གེ་ཧཱུྃ་དུ་ཞུ༔ ཧཱུྃ་ཡིག་དམར་ནག་ཡེ་ཤེས་མེ་འབར་བ༔ སྐུ་གསུམ་ཡོངས་རྫོགས་གསང་ཆེན་ཐིག་ལེར་བཟླུམས༔ ཐབས་ཤེས་ཉི་ཟླའི་གྭའུ་ཁ་སྦྱོར་བའི༔ གཞལ་ཡས་ཡངས་པར་ཆོས་ཀྱི་འབྱུང་གནས་མཁར༔ པདྨ་ཉི་མ་བདུད་དཔུང་བསྣོལ་བའི་སྟེང་༔ ཟ་བྱེད་རྔམ་པ་སྟག་མོ་གྲུས་མ་འགྱིང་༔ སྒལ་སྟེང་ཧཱུྃ་ལས་རྒྱལ་ཀུན་གསང་འདུས་པ༔ ཆོས་ཉིད་དོན་གྱི་རིག་སྐུ་ཆེ་བའི་མཆོག༔ ཁྲག་འཐུང་ཡང་ཁྲོས་རྡོ་རྗེ་གྲོ་བོ་ལོད༔ དམར་ནག་འབར་བ་ཞལ་གཅིག་ཕྱག་གཉིས་པ༔ སྤྱན་གསུམ་དམར་ཟླུམ་ཉི་ལྟར་མཁའ་ལ་གཟིགས༔ ཁྲོ་གཉེར་བསྡུས་ཤིང་ཨམ་གཙིགས་མཆེ་བ་དཀར༔ སྨ་ར་སྨིན་མ་དམར་སེར་མེ་ཞགས་འཕྲོ༔ དབུ་སྐྲ་གཡས་འཁྱིལ་དུང་གི་སྙན་ཆ་མཛེས༔ ཕྱག་གཡས་གནམ་ལྕགས་རྡོ་རྗེ་ནམ་མཁར་ཕྱར༔ དགྲ་གདོན་གནོད་བྱེད་ཕོ་མོའི་མགོ་བོ་འགེམ༔ གཡོན་པས་གནམ་ལྕགས་ཕུར་པ་ས་ལ་གཟིར༔ དགྲ་བགེགས་ལོག་འདྲེན་མགོ་ལུས་དུམ་བུར་འཐོར༔ སྡིགས་མཛུབ་རྩེ་ནས་ལྕགས་སྡིག་བྱ་ཁྱུང་འགྱེད༔ རྒྱལ་བསེན་ཀླུ་གཉན་འབྱུང་པོའི་སྙིང་ཁྲག་རོལ༔ བརྒྱལ་བྱེད་དྲི་ངན་དུག་རླངས་ཕྱོགས་བཅུར་འཕྲོས༔ སྡེ་བརྒྱད་ཀླུ་གཉན་འབྱུང་པོ་བརྒྱལ་ཞིང་འབོག༔ སྐུ་སྟོད་ཟ་འོག་སྔོ་ནག་བེར་འདུང་མནབ༔ སྐུ་སྨད་ཐང་ཤམ་དམར་སྨུག་རླུང་གིས་གཡེང་༔ ཆོས་གོས་དམར་པོ་གསེར་གྱི་ཧ་རིས་གསོལ༔ ཁྲག་འཛག་མི་མགོ་ལྔ་བཅུའི་དོ་ཤལ་མཛད༔ ཡིད་བཞིན་འདོད་འབྱུང་ནོར་བུའི་རྒྱན་ཕྲེང་གསོལ༔ སྤྱི་བོར་ཨོཾ་ལ་སྐུ་ཡི་གསང་བ་འདུས༔ མགྲིན་པར་ཨཱཿལ་གསུང་གི་གསང་བ་རྫོགས༔ ཐུགས་ཀར་ཧཱུྃ་ལ་ཐུགས་ཀྱི་གསང་བ་འདུ༔ ལྟེ་བར་སྭཱ་ལ་ཡོན་ཏན་གསང་ཆེན་རྫོགས༔ གསང་བར་ཧཱ་ལ་ཕྲིན་ལས་གསང་ཆེན་འདུ༔ དཀར་དམར་མཐིང་སེར་ལྗང་གསལ་འོད་ཟེར་འབར༔ རྒྱལ་བ་རྒྱ་མཚོའི་གསང་ཆེན་ཡོངས་སུ་གྲུབ༔ ཡེ་ཤེས་མེ་དཔུང་འབར་བའི་ཀློང་ན་འགྱིང་༔ ཞབས་གཉིས་གྱད་ཀྱི་འདོར་སྟབས་ཚུལ་དུ་བགྲད༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ དམ་ཚིག་ཡེ་ཤེས་གཉིས་མེད་རོལ་པ་རུ༔ ཤེས་རབ་དབྱིངས་ལས་ཐབས་ཀྱི་ཕྱག་རྒྱར་ཤར༔ སྣང་ལ་རང་བཞིན་མེད་པ་འོད་ཀྱི་སྐུ༔ གསལ་ལ་དེར་འཛིན་བྲལ་བ་ཆོས་ཀྱི་དབྱིངས༔ ཡུལ་དུ་ཞེན་གོལ་མེད་པ་ངོ་བོ་ཉིད༔ མ་བཅོས་སྤྲོས་མཐའ་བྲལ་བ་ཆོས་ཀྱི་སྐུ༔ སྐུ་དང་ཡེ་ཤེས་ངང་རྫོགས་གནས་ལུགས་གཤིས༔ ཆོས་ཉིད་མཐའ་གྲོལ་བྱང་ཆུབ་རྫོགས་པ་ཆེ༔ མ་བསྒོམ་སངས་རྒྱས་རང་བྱུང་ཉིད་དུ་རིག༔ ཨོཾ་བཛྲ༔ ཞེས་བརྗོད་པས་ལུས་ཡེ་ཤེས་སྒྱུ་མའི་སྐུར་འཕོས་པར་བསམ༔ ཨཱཿབཛྲ༔ ཞེས་བརྗོད་པས་ངག་རྡོ་རྗེའི་གསུང་རང་བྱུང་ཧཱུྃ་གི་རང་སྒྲར་འཕོས་པར་བསམ༔ ཧཱུྃ་བཛྲ༔ ཞེས་བརྗོད་པས་སེམས་རྡོ་རྗེའི་ཐུགས་རྣམ་པར་མི་རྟོག་པའི་ངོ་བོར་འཕོས་ཤིང་སྨིན་པར་བསམ༔ སྭཱ་བཛྲ༔ ཞེས་བརྗོད་པས་ཡོན་ཏན་ཐམས་ཅད་ཡོངས་སུ་རྫོགས་པར་བསམ༔ ཧཱ་བཛྲ༔ ཞེས་བརྗོད་པས་ཕྲིན་ལས་ཐམས་ཅད་ཡོངས་སུ་རྫོགས་ཤིང་འགྲོ་བ་མ་ལུས་འདུལ་བའི་མཐུ་ནུས་དང་ལྡན་པར་བསམ༔ ཨོཾ་སརྦ་ཏ་ཐཱ་ག་ཏ་གུ་ཧྱ་ཛྙཱ་ན་ས་མ་ཏི་སྟྭཾ་ཨཱཿལན་བདུན་བརྗོད་ཚེ་རྒྱལ་བ་མ་ལུས་ཡོངས་ཀྱི་གསང་ཆེན་ཡེ་ཤེས་དགོངས་མཛོད་ཐམས་ཅད་རང་རྒྱུད་ལ་འདུས་པར་བསམ༔ དེ་ནས་བསྟོད་པ་བྱ་བ་ནི༔ ཧཱུྃ༔ བླ་མེད་བླ་མའི་གསང་ཆེན་བུམ་ཀློང་དུ༔ བདེ་གཤེགས་དཔལ་དགུའི་གསང་བ་མཉམ་ཞུགས་པས༔ བླ་མ་ཡི་དམ་གཉིས་མེད་འཆོལ་བར་ཁྲོས༔ བདག་དང་ཡུལ་བལྟ་རྒྱུ་དང་རྐྱེན་སྣང་བགེགས༔ ཉེ་རིང་སྙོམས་པ་ཆེན་པོས་མཉམ་པར་བསྒྲལ༔ མ་བསྒྲལ་ཤུགས་སྒྲོལ་ཀློང་བསྡུས་སྟོབས་ཆེན་གྱིས༔ འཁོར་བའི་རྒྱུ་རྐྱེན་རཱུ་ཏྲ་ངང་གིས་སྒྲོལ༔ ཆེ་མཆོག་ཡོངས་འདུས་དཔལ་ལ་ཕྱག་འཚལ་བསྟོད༔ ས་མ་ཡ༔ དེ་ནས་ཛབ྄་འཁོར་བསྒོམ་བཟླས་ནི༔ རང་ཉིད་རྡོ་རྗེ་གྲོ་ལོད་ཀྱི༔ ཐུགས་ཀར་འོད་ཀློང་པད་ཉིའི་སྟེང་༔ ཡེ་ཤེས་སེམས་དཔའ་ཚོན་གང་བའི༔ སྙིང་གར་ཉི་སྟེང་རྡོ་རྗེ་ཡི༔ ལྟེ་བར་ཉི་ཟླའི་གྭའུ་རུ༔ ཧཱུྃ་ཡིག་དམར་གསལ་འོད་འབར་བའི༔ མཐའ་མར་སྔགས་ཀྱི་ཕྲེང་བས་བསྐོར༔ དམར་གསལ་ཧཱུྃ་གི་འཕྲོ་འདུ་ལས༔ སྣང་སྲིད་ཧཱུྃ་གི་ཚང་ཁང་འཁྲིག༔ རྒྱལ་བ་ཀུན་མཆོད་དབང་བྱིན་བསྡུས༔ རྡོ་རྗེ་གསུམ་གྱི་གཟི་བྱིན་བསྐྱེད༔ འགྲོ་ཀུན་སྡུག་བསྔལ་རྒྱུ་རྐྱེན་བསྲེགས༔ གཉིས་སུ་འཛིན་པའི་རཱུ་ཏྲ་བསྒྲལ༔ ཁྱབ་བརྡལ་ཆོས་དབྱིངས་ཆེན་པོའི་ངང་༔ རང་བྱུང་ཧཱུྃ་སྒྲ་དི་རི་རི༔ མ་ལུས་འཁོར་འདས་ཐམས་ཅད་ཀྱི༔ སྲོག་གི་སྙིང་པོ་ཡི་གེ་ཧཱུྃ༔ བཟླས་པ་ཙམ་གྱིས་སྲོག་འདུས་གྱུར༔ ཨོཾ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ་ཧཱུྃ༔ གྲངས་མེད་བརྗོད༔ ཧཱུྃ་ནི་འཁོར་འདས་ཐམས་ཅད་ཀྱི༔ སྲོག་གི་སྙིང་པོ་འདུས་པའི་བཅུད༔ བཟླས་པས་མཆོག་གི་དངོས་གྲུབ་ཐོབ༔ བཟླས་ཚེ་ཧཱུྃ་དང་རིག་པ་དྲིལ༔ གཞན་དུ་གཡེང་བར་མི་བྱའོ༔ གཟེར་བཞིའི་མན་ངག་དང་ལྡན་པའི༔ རྣལ་འབྱོར་རྣམས་ནི་ངེས་གྲོལ་འགྱུར༔ སྒྲུབ་རྫས་གཞལ་ཡས་ལྷ་སྔགས་ཀུན༔ ཡོངས་རྫོགས་རོལ་པར་གསལ་བའི་ངང་༔ རྩེ་གཅིག་བསྒོམ་བཟླས་གནད་དུ་བསྣུན༔ མ་དག་སྒོ་གསུམ་གནས་དག་ནས༔ རྡོ་རྗེ་གསུམ་ཀློང་ངེས་པར་འཕོ༔ བློ་བྲལ་རྫོགས་པ་ཆེན་པོ་ནི༔ མཐར་ཐུག་གྲོལ་བའི་ལམ་དུ་གནད༔ འདི་ནི་པདྨའི་སྙིང་ཁྲག་དངོས༔ ཚུལ་བཞིན་ཉམས་སུ་ལེན་པའི་བུ༔ ཚེ་འདིར་གྲོལ་བ་མ་ཐོབ་ན༔ པདྨས་བསླུས་སོ་བརྒྱུད་འཛིན་བུ༔ མཁའ་འགྲོ་ཡེ་ཤེས་མཚོ་རྒྱལ་ཁྱོད༔ བཀའ་འདི་བརྡ་ཡི་རིས་སུ་ཐོབ༔ ལྷ་ཆེན་དབང་ཕྱུག་ཆེན་པོས་སྲུངས༔ བསྟན་པ་མི་ནུབ་དར་རྒྱས་ཤིང་༔ བརྒྱུད་འཛིན་སྐྱེས་བུའི་འདོད་དོན་སྒྲུབས༔ བསྟན་དགྲའི་སྡེ་དཔུང་ཚར་ཆོད་ཅིག༔ འཛིན་འཆང་ཡུན་གནས་བདེ་དགེ་མཛོད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ བརྡ་ཐིམ༔ ཞེས་པ་འདི་ཡང་འོད་གསལ་རྫོགས་པ་ཆེན་པོའི་རྣལ་འབྱོར་པ་རིག་འཛིན་ཆོས་ཉིད་ཀློང་བརྡོལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་གདན་དྲངས་ཏེ་སྨར་མདོ་དགའ་བ་འཁྱིལ་ཁུག་ཏུ་དག་པར་ཕབ་པའི་ཡི་གེ་པ་ནི་རང་སློབ་དམ་པ་པདྨ་བཀྲ་ཤིས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།