TTDL-ZABTER-07-JA-008

Previous Text Back to Volume PageNext Text

Wylie title
Location	bdud 'joms gling pa zab gter Volume 7, Text 8, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: . Thimphu, Bhutan: Lama Kuenzang Wangdue, 2004.
Side notes	Verso: bdud 'joms mkha' 'gro gsang ye
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཐུགས་སྒྲུབ་ཡེ་ཤེས་ཉི་མ་ (thugs sgrub ye shes nyi ma)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	mkha' 'gro gsang ba ye shes

Tibetan Text

[edit]

༠༠༠༠བརྡ་ཡིག༡༧༣ཟབ་གསང་མཁའ་འགྲོའི་སྙིང་ཐིག་ལས༔ ཐུགས་སྒྲུབ་ཡེ་ཤེས་ཉི་མའི་སྐོར༔ ལག་ལེན་གནད་དང་བཅའ་གཞིའི་རིམ༔ ཀློང་ཆེན་གསང་བའི་གབ་ཡིག་ཆུང༔ བརྡ་ཐིམ༔ ༠༠༠༠བརྡ་ཡིག༡༧༤གདོད་ནས་ཡེ་སངས་རྒྱས་པ་སྟེ༔ སྤྲོས་མེད་ཀློང་ལས་སྤྲོས་པར་ངོམས༔ སྒྱུ་འཕྲུལ་རྣམ་མང་བསྒྱུར་དྲག་ཅན༔ འོད་མི་འགྱུར་བའི་མགོན་པོར་འདུད༔ སྐུ་གསུམ་མཉམ་སྦྱོར་པད་འབྱུང་ངས༔ མ་འོངས་ལས་ཅན་དོན་ཆེད་དུ༔ གསང་ཆེན་གབ་པའི་ཡིག་ཆུང་བསྟན༔ ཕྱི་རབས་ལས་དང་སྐལ་ལྡན་རྣམས༔ དམ་པའི་ཆོས་གང་བསྒྲུབ་གྱུར་ཀྱང་༔ རང་སེམས་འདི་ཉིད་གྲོལ་བར་གྱིས༔ དྲང་དོན་དང་ནི་ངེས་དོན་གྱི༔ ཆོས་རྣམས་མ་ལུས་ཐམས་ཅད་ཀུན༔ རྒྱལ་བ་རྣམས་ཀྱིས་འདི་དོན་ནོ༔ རྣལ་འབྱོར་པ་ལ་ཉམས་སད་པའི༔ གཞན་གྱིས་མི་ཐུབ་བདུད་བྱུང་ན༔ རིག་པ་ཡེ་ཤེས་ཆེན་པོའི་ཆ༔ སྙིང་དབུས་དྭངས་མའི་ཐིག་ལེ་ལས༔ ཡེ་ཤེས་འོད་ཀྱི་མེ་འབར་བས༔ ཟག་བཅས་གདོས་ཀྱི་ཕུང་པོ་རོ༔ ཟག་མེད་སྒྱུ་མའི་ངང་དུ་བསྲེགས༔ རང་རིག་ཡེ་སྟོང་ཆེན་པོར་རིག༔ དབྱིངས་ལས་ལྕགས་སྡིག་དཔག་མེད་དང་༔ མེ་རླུང་མཚོན་ཐུན་དཔག་མེད་ཀྱིས༔ སྐར་ལྟར་འཁྲིགས་ཤིང་རླུང་ལྟར་འཚུབས༔ བདག་འཛིན་རཱུ་ཏྲ་དུག་ལྔ་བདུད༔ ཐལ་བ་རླུང་གིས་གཏོར་བ་ལྟར༔ བསྲེགས་གཏུབ་གཏོར་ཞིང་སྡིག་པ་ཡིས༔ ལྷག་མ་མེད་པར་ཟ་བར་བསམ༔ དབྱིངས་དང་རིག་པ་དབྱེར་མེད་དུ༔ བསྲེགས་ཏེ་ཕཊ་སྒྲ་བཅུ་བརྗོད་དེ༔ དེ་ཡི་ངང་ལ་མཉམ་པར་བཞག༔ དེས་ཀྱང་མི་ཕན་སྡང་གྱུར་ན༔ རང་རིག་ཧཱུྃ་ཡིག་ནག་པོ་ལས༔ འོད་འཕྲོས་ནང་ལྟར་གཞལ་ཡས་ལ༔ ཕྱི་ལྟར་གནམ་ལྕགས་ཀྱི་འཁོར་ལོ༔ རྩིབས་སྟོང་ལྡན་པས་སྟེང་མ་གཡས༔ འོག་མ་གཡོན་དུ་འཁོར་བ་ལ༔ རྩིབས་ནི་རེག་ལ་རྣོ་བ་ཡི༔ གཡས་གཡོན་དྲག་ཏུ་འཁོར་བ་དེ༔ རྩིབས་རྩེ་གདོན་བགེགས་རྒྱལ་བསེན་གྱི༔ སྙིང་དཀྱིལ་གཏོད་བཤགས་གཏུབ་པ་ལ༔ མེ་ཞགས་མཚོན་ཐུན་ཁྲོ་ཆུང་སྡིག༔ དཔག་ཏུ་མེད་པས་གཏུབ་ཅིང་ཟོས༔ ལྷ་ཡང་རུང་སྟེ་བརླག་པར་བསམ༔ དེའི་ངང་དྲག་ཐུང་ཕཊ་སྒྲ་བཅུ༔ བརྗོད་ཅིང་སྙིང་རྗེའི་དཔའ་གདིང་གིས༔ དབྱིངས་རིག་བསྲེས་ལ་ཡུན་ཅིག་བཞག༔ དེས་ཀྱང་ཕན་པར་མ་གྱུར་ན༔ རང་ཉིད་ཁྲོ་བོའི་ང་རྒྱལ་བསྐྱེད༔ ཕྱི་ནི་འཁོར་ལོ་རྩིབས་སྟོང་ལ༔ ནང་ནི་གཞལ་ཡས་ཁང་དབུས་སུ༔ པདྨ་ཉི་མ་རོའི་སྟེང་གསལ༔ རྒྱན་དང་ཆ་ལུགས་ཡོངས་རྫོགས་ནི༔ སྟོང་པའི་ངང་ལས་བསྒོམ་པར་བྱ༔ ཡེ་ཤེས་སྤྱན་དྲངས་གཉིས་མེད་བསྟིམ༔ སྐུ་སྟོད་བཀའ་རྒྱུད་བླ་མ་དང་༔ རྐེད་པར་ཡི་དམ་ལྷ་ཚོགས་དང་༔ སྐུ་སྨད་མ་དང་མཁའ་འགྲོ་བསྒོམ༔ མཐའ་བསྐོར་སྲུང་མའི་ཚོགས་བསྒོམ་མོ༔ དེ་ནས་བ་སྤུའི་བུ་ག་ནས༔ མེ་རླུང་མཚོན་ཐུན་ཁྱུང་སྡིག་དང་༔ ཁྲོ་ཆུང་དཔག་ཏུ་མེད་པ་ནི༔ རླུང་དམར་བཞིན་དུ་འཕྲོས་ཤིང་འཚུབས༔ ཁོ་ཡི་སྙིང་ལ་ཐོག་ལྟར་བབས༔ དམར་ཉིལ་གཏུབས་ཤིང་ཟོས་པ་ཡི༔ ལྷག་མ་ཐལ་ཕུང་རླུང་གཏོར་བཞིན༔ རྗེས་ཤུལ་ཙམ་ཡང་མེད་པར་བསམ༔ དེའི་ངང་ཧཱུྃ་ཕཊ་དྲག་པོ་བསྒྲགས༔ དེས་ནི་ཐེ་ཚོམ་མེད་པར་ཐུལ༔ རྒྱ་མཚོ་ཧུབ་ཀྱིས་འདེབས་པ་ནི༔ རང་ཉིད་ལྕགས་ཀྱི་ཁྱུང་ནག་པོ༔ སྟོང་གསུམ་ཁྱབ་པའི་སྐུར་བསྒོམས་ཏེ༔ ཁྱུང་སྔགས་ལན་གསུམ་བརྗོད་བྱས་ནས༔ རྒྱ་མཚོ་ཧུབ་ཀྱིས་རྔུབ་པ་ཡི༔ ལྷག་མ་ཤུལ་ཙམ་མེད་པར་བྱས༔ གནས་པའི་ཀླུ་བཙན་བདུད་པོ་ཡི༔ མགོ་ལ་ལྕགས་ཀྱི་གཤོག་རྩེས་བརྡབ༔ རྐང་གླིང་དྲག་ཐུང་ལན་གསུམ་འབུད༔ ཕཊ་སྒྲ་དྲག་པོ་ལན་གསུམ་བརྗོད༔ རི་བོ་ཁམ་གྱིས་གཅོད་པ་ལ༔ རང་ཉིད་དུག་གི་མི་ནག་པོ༔ དུག་གི་ཆུ་སྲིན་ལ་ཞོན་ནས༔ རི་བོའི་ཐད་དུ་སོང་བ་ཡི༔ རང་དང་ཞོན་པའི་ཆུ་སྲིན་གྱིས༔ རི་བོ་ཁམ་གྱིས་ལན་གསུམ་བཅད༔ རྗེས་ཤུལ་ཙམ་ཡང་མེད་པར་བསམ༔ གནས་པའི་ལྷ་འདྲེའི་མགོ་བོ་ལ༔ དུག་གི་སེན་མོས་བྲད་པར་བསམ༔ ཕཊ་སྒྲ་དྲག་པོ་གསུམ་བརྗོད་དེ༔ རྐང་གླིང་དྲག་ཐུང་ལན་གསུམ་འབུད༔ དབྱིངས་རིག་བསྲེ་བ་ཀུན་གྱི་གནད༔ དེ་ནས་སྤྲིན་ནག་ཧུབ་འདེབས་ནི༔ རང་ཉིད་དུག་གི་ཁྱུང་ནག་པོ༔ ཁམས་གསུམ་གང་བའི་སྐུར་བསྒོམ་མོ༔ སྤྲིན་ནག་ཧུབ་ཀྱིས་ལན་གསུམ་འདེབས༔ གནོད་བྱེད་དང་བཅས་གྱུར་མིད་ནས༔ ཁོག་པར་བཙུད་ནས་དུག་མེར་བསྲེགས༔ ཁོ་ཡི་ལུས་ངག་ཡིད་གསུམ་རྣམས༔ དུག་གིས་བརྒྱལ་ནས་ཐིབས་ཀྱིས་བསད༔ དབྱིངས་རིག་བསྲེས་ལ་མཉམ་པར་བཞག༔ དེ་ནས་རླུང་རོ་དང་བཅས་པ༔ ལྕགས་རིའི་རྒྱབ་ཏུ་འཕང་བའོ༔ ཡང་ན་རང་ཉིད་གསང་བའི་བདག༔ རྡོ་རྗེ་འཛིན་པ་བསྒོམས་ཀྱང་རུང་༔ དེ་ནི་སྒོམ་པའི་དྲག་དམིགས་སོ༔ དེ་ནས་ལས་བྱེད་དྲག་དམིགས་ལ༔ རང་ཉིད་ཡི་དམ་ལྷར་བསྒོམས་ཏེ༔ བ་སྤུའི་སྒོ་ནས་མཚོན་ཆའི་ཆར༔ སྐར་ལྟར་འཁྲིགས་ཤིང་རླུང་ལྟར་འཚུབས༔ གནོད་བྱེད་གདོན་བགེགས་ཐམས་ཅད་ཀྱི༔ ལུས་ངག་ཡིད་གསུམ་མ་ལུས་པ༔ ཐལ་བ་རླུང་གིས་གཏོར་བ་ལྟར༔ རྡུལ་ཕྲན་བཞིན་དུ་བརླགས་པ་དེ༔ ཡེ་ཤེས་མེ་ཡིས་བསྲེགས་བྱས་ནས༔ སྤུ་གྲི་རླུང་གིས་གཏོར་བར་བསམ༔ རྡོའམ་ཡུངས་དཀར་གྱིས་བྲབ་བྱ༔ དྲག་སྔགས་བརྗོད་ཅིང་ལྟ་སྟངས་གཟིར༔ བྱང་ཆུབ་སེམས་ཀྱི་གདིང་བསྐྱེད་དོ༔ ཡང་ན་རང་ཉིད་ལྷར་གསལ་བའི༔ གནས་ལྔ་དག་ནི་བ་སྤུའི་སྒོའི༔ མེ་དང་མཚོན་ཐུན་སྤུ་གྲིའི་རླུང་༔ ནམ་མཁའ་བར་སྣང་ས་གཞི་ཀུན༔ གོ་མཚམས་མེད་པར་གང་བར་འཕྲོས༔ གནོད་བྱེད་གདོན་བགེགས་ལོག་འདྲེན་རྣམས༔ རྡུལ་ཕྲན་བཞིན་དུ་བརླགས་བྱས་ནས༔ ཤོག་སྐྱ་རླུང་གིས་དེད་པ་ལྟར༔ ལྕགས་རི་ནག་པོའི་ཕ་མཐར་བསྐྲད༔ མེ་རླུང་མཚོན་གྱིས་མཚམས་བཅད་བསམ༔ རྡོ་སོགས་ཐུན་གྱིས་བྲབ་པར་བྱ༔ དྲག་སྔགས་བརྗོད་ཅིང་ལྟ་སྟངས་གཟིར༔ བསྲུང་བའི་གུར་ཁང་རིམ་ལྔ་བསྒོམ༔ དེ་ནི་དྲག་དམིགས་རིམ་པའོ༔ གནམ་ལྕགས་ཐོག་གི་དམིགས་པ་ནི༔ རང་ཉིད་གུ་རུ་དྲག་པོ་བསྒོམ༔ ཐུགས་ཀའི་ཧཱུྃ་ཡིག་དམར་ནག་ལས༔ ཧཱུྃ་ཡིག་དམར་ནག་གཉིས་འཕྲོས་པས༔ སྤྲིན་གྱི་ཀློང་དུ་ཐིམ་པ་ཡི༔ སྤྲིན་ཡང་སྐད་ཅིག་ཙམ་གྱི་ནི༔ ལྕགས་བསྲེགས་ཁང་སྒྲོམ་སྲུབ་མེད་དུ༔ གྱུར་པའི་ཕྱི་ནང་ཡེ་ཤེས་མེས༔ ཁྱབ་ཅིང་འཁྱིལ་བས་གནོད་བྱེད་དང་༔ འབྲུག་གློག་སྡེ་བརྒྱད་ཐམས་ཅད་ཀུན༔ ལྕགས་ཁང་དེ་རུ་འུབ་ཀྱིས་བསྡུས༔ རང་གི་ངག་ནས་ཕཊ་བརྗོད་ཅིང་༔ སྡིགས་མཛུབ་ཤེད་ཀྱི་འཕང་བ་ཡིས༔ རབ་འབྱམས་རྒྱ་མཚོའི་ཕ་མཐར་འཕངས༔ ནམ་ཡང་བྲོས་ཐར་ཡུལ་མེད་བསམ༔ དྲག་ཏུ་བརྗོད་ཅིང་ཕཊ་སྒྲ་བསྒྲགས༔ དེས་ནི་མི་ཐུབ་གཅིག་ཀྱང་མེད༔ ཡང་ན་རང་ཉིད་ཡི་དམ་ལྷར༔ གསལ་བའི་ཐུགས་ལས་ཛཿཡིག་དམར་ནག་གཉིས༔ འཕྲོས་པ་ནམ་མཁར་སོང་བ་ཡིས༔ བསམ་གྱིས་མི་ཁྱབ་གྲངས་མང་གྱུར༔ འབྲུག་དང་སྡེ་བརྒྱད་ཐམས་ཅད་ཀྱི༔ ཁ་དང་གཤང་ལམ་གཉིས་ནས་ཞུགས༔ ཁོང་དུ་ཕྱིན་པའི་ཟངས་ལྕགས་ཀྱིས༔ འཁོར་ལོ་རྩིབས་སྟོང་ལྡན་པ་གཉིས༔ གཡས་དང་གཡོན་དུ་འཁོར་བ་ཡིས༔ འབྲུག་དང་སྡེ་བརྒྱད་འབྱུང་པོ་ཡི༔ ལུས་ངག་ཡིད་གསུམ་དམར་ཉིལ་གཏུབ༔ མཐུ་སྟོབས་ནུས་པ་ཐམས་ཅད་བསྲེགས༔ སེང་གེ་ལྕགས་སྡིག་བྱ་ཁྱུང་གིས༔ ངག་སྒྲ་སྒྲོགས་ཤིང་ཟོས་པ་ཡི༔ རྗེས་ཤུལ་ཙམ་ཡང་མེད་པར་བསམ༔ དྲག་སྔགས་བརྗོད་ཅིང་ཐུན་གྱིས་འཕེན༔ འདིས་ནི་མི་ཐུབ་གང་ཡང་མེད༔ ཡང་ན་རང་ཉིད་ལྷར་གསལ་བའི༔ ཕྱག་གི་མཚོན་ཆ་ཕྱར་བ་ཡིས༔ མེ་འབར་མཚོན་གྱི་ཚྭ་ཚྭ་ཡིས༔ གདུག་ཅིང་སྡང་སེམས་ལྡན་པ་ཀུན༔ ལྷ་ཡང་རུང་སྟེ་ཐལ་བར་བརླག༔ འཁྲུལ་པའི་རྒྱུ་རྐྱེན་རྩད་བཅད་ནས༔ དྲགས་སྔགས་བརྗོད་ཅིང་ཕྱག་མཚན་གྱིས༔ གདབ་ཚུལ་བྱས་པས་ཉེས་ཀུན་འཇོམས༔ ས་མ་ཡ༔ དེ་དག་དྲག་དམིགས་གཟིར་གདབ་སྟེ༔ གང་རུང་བ་ལ་བྱེད་མི་རུང་༔ སྲོག་ལ་བབས་ན་བསྒོམ་པར་བྱ༔ རིགས་རིམ་ལེའུ་དང་པོའོ༔ ས་མ་ཡ༔ རྒྱ་རྒྱ་རྒྱ༔ མ་འོངས་ལས་ཅན་སྐལ་ལྡན་རྣམས༔ བསྒྲུབ་པའི་སྒོ་རུ་འཇུག་འདོད་ན༔ འདི་བཞིན་ཉམས་སུ་ལེན་པར་གནད༔ དང་པོ་བཟུང་བའི་ཡུལ་འདི་ཉིད༔ བདེན་པར་གྲུབ་བམ་མ་གྲུབ་བརྟགས༔ དེ་ཕྱིར་ཀུན་བཏགས་འདིར་སྣང་བ༔ ཐམས་ཅད་བྱུང་བའི་ཁུང་རྩད་བཅད༔ རྡུལ་དུ་བཏུལ་ནས་གཏོར་བས་ན༔ བདེན་པར་གྲུབ་ན་འགྱུར་བ་མེད༔ དེ་ཕན་རང་བཞིན་འདི་མེད་ན༔ བདག་མེད་སྟོང་པའི་ངང་ལས་བལྟ༔ གཞན་ཡང་ཤིང་གཅིག་འདུག་པ་ལ༔ དཔྱད་ན་དང་པོ་ཤིང་ཡིན་བསམ༔ བཟོ་བཅོས་ལས་ཀས་མིང་ཡང་འགྱུར༔ དེ་ལྟར་དངོས་པོར་འཛིན་པའི་ཆོས༔ ཐམས་ཅད་སྟོང་པ་བདག་མེད་དུ༔ ངེས་པར་རྟོགས་ཀྱི་བར་ཏུ་བརྟགས༔ ཆོས་ཀྱིས་བདག་མེད་དེ་ཉིད་ཀྱང་༔ བྱེད་མཁན་དང་ནི་ངོས་འཛིན་མཁན༔ སུ་ཡིན་གང་ན་ཡོད་དམ་བརྟགས༔ འདི་ནི་སེམས་ཀྱིས་བྱས་སོ་སེམས༔ དེས་ན་སེམས་འདི་དངོས་པོ་ཅན༔ བྱུང་ཁུང་རྩ་བ་ཚོལ་བྱས་ན༔ དེ་ཡང་ཟང་ཐལ་སྟོང་པར་མཐོང་༔ སྟོང་ན་འདི་སྣང་སྣོད་དང་བཅུད༔ དངོས་པོར་གྲུབ་སེམས་སོ་སོར་བྱས༔ མིང་དང་བདག་ཏུ་ཅི་ལ་འཛིན༔ དེ་ལ་བརྟགས་ཤིང་དཔྱད་པར་བྱ༔ ཡང་ཡང་བལྟས་པའི་གོམས་འདྲིས་ཀྱིས༔ འཁྲུལ་པ་ནས་བཟུང་ད་བར་དུ༔ མེད་ལ་ཡོད་པར་འཛིན་པ་ཡིས༔ བག་ཆགས་མངོན་དུ་གྲུབ་པའི་ཡུལ༔ རང་ལ་གཉིས་སུ་འཛིན་པ་ཡི༔ རང་ལ་རང་གི་བྱ་བ་བྱས༔ སོ་སོར་འཛིན་ཅིང་བརྟགས་པ་ལས༔ ཡུལ་གཞན་ནས་ཡང་བྱུང་མིན་རྟོགས༔ གང་ལྟར་ལ་ཡང་རྨི་ལམ་ལ༔ ཡུལ་དང་ལུས་དང་ནོར་གྲོགས་རྫས༔ ད་ལྟ་བཞིན་དུ་འདུག་པ་ལ༔ སད་མ་ཐག་ཏུ་རྫུན་དུ་ཟད༔ དེ་ལྟར་འདི་ལྟར་ཐམས་ཅད་ཀྱང་༔ རྫུན་དུ་ཟད་དེ་སེམས་སུ་ཤེས༔ སེམས་ཀྱང་བདག་མེད་མངོན་དུ་རྟོགས༔ འཛིན་པ་སེམས་ཀྱི་བདག་མེད་དོ༔ སེམས་ཀྱང་ནམ་མཁའ་ལྟ་བུ་སྟེ༔ ཡོད་མིན་མེད་མིན་ཁྱབ་གདལ་ལོ༔ དེས་ན་རེ་ཞིང་དོགས་པའི་ཡུལ༔ ཐམས་ཅད་སེམས་ཉིད་སེམས་བྱུང་ང་ོ༔ དེ་ཕྱི་ཡེ་ནས་སེམས་ཉིད་ཀྱིས༔ ངོ་བོ་ཆོས་སྐུར་དག་པ་ལ༔ ལམ་ནི་ལོག་པའི་ལམ་ཞུགས་ཏེ༔ བག་ཆགས་རྐྱེན་གྱིས་བསྒྲིབ་ཅིང་གཡོགས༔ དཔེར་ན་ནམ་མཁའ་མི་འགྱུར་ཡང་༔ སྤྲིན་དང་ན་བུན་གྱིས་བསྒྲིབ་ལྟར༔ ཆུ་ལ་འགྱུར་ཀྱང་རྙོག་པའི་འདམ༔ དྭངས་ཚེ་ཆུ་ཡི་རང་བཞིན་གནས༔ དེ་ལྟར་རང་སེམས་ཡེ་གཞི་ནི༔ ཆོས་ཀྱི་སྐུ་རུ་ཡེ་གནས་པ༔ རང་ངོར་རང་ཉིད་སངས་པའི་ཕྱིར༔ ཡེ་ཤེས་ལྷ་རུ་གསལ་བར་བྱ༔ དེ་ལ་གཉིས་སུ་མི་འཛིན་པར༔ རང་རིག་རང་ངོར་སངས་པ་གཙོ༔ གཉིས་སུ་བཟུང་བའི་ཡུལ་ལ་གོལ༔ མཐར་ནི་རང་ངོར་མི་གྲོལ་ན༔ གཉིས་སུ་འཛིན་པས་རཱུ་ཏྲར་གོལ༔ དེ་ཕྱིར་རང་གཞིར་ཤེས་པར་བྱ༔ སྣང་བ་འོད་གསལ་གཞལ་ཡས་སུ༔ རང་ཉིད་ཡེ་ཤེས་ལྷ་ཉིད་ལ༔ རྩལ་སྣང་ཐམས་ཅད་འཁོར་དུ་ཤེས༔ ཕྱག་མཚན་ཐམས་ཅད་ཐུགས་ཀྱི་མདངས༔ རྒྱན་གོས་རྣམ་འགྱུར་ཐམས་ཅད་ཀྱང་༔ རང་མདངས་ལས་ནི་གཞན་མ་ཡིན༔ ཡིན་ལུགས་ཤེས་ཤིང་དེ་ལྟར་བསྒོམ༔ བྱང་ཆུབ་སེམས་ཀྱི་རང་གདངས་དང་༔ མ་བྲལ་བ་ཡི་ཆོས་གང་བསྒྲུབ༔ སྤྲོས་པ་མེད་པའི་དཀྱིལ་འཁོར་ནི༔ གཞན་ལ་མི་མངོན་གསང་བའི་ཐབས༔ མི་བསྒྲུབ་ཚུལ་གྱིས་བསྒྲུབ་པ་ནི༔ ཀུན་ལས་ལྷག་པའི་དོན་ཆེར་འགྲུབ༔ ཀུན་ལ་མངོན་པར་ངོམས་པའི་ཆོས༔ ལྷ་སྔོན་བདུད་ཀྱི་མྱུར་ཉིད་སྲིད༔ དེ་ལ་བགེགས་དང་བར་ཆད་མང་༔ དེ་ཕྱིར་གསང་བར་བསྒྲུབ་པ་མཆོག༔ སྔགས་ཀྱང་ཤུབ་བུར་བཟླ་བ་ལས༔ སྐད་ཆེར་འདོན་པའི་བཟླ་མི་རུང་༔ བཟླས་ན་བགེགས་དང་བདུད་ཀྱི་ཐོས༔ ཀུན་གྱིས་འུར་འུར་བཟླས་གྱེར་ནས༔ སྒྲུབ་པའི་སྙིང་པོ་ལོན་ནོ་སྐད༔ དེ་ཕྱིར་ཤུབ་བུར་བཟླ་བ་གནད༔ ཡི་དམ་ལྷ་ཡང་གསང་བ་མཆོག༔ གསང་བ་གཞན་ལ་སྨྲས་པ་ན༔ འདི་དང་ཕྱི་མ་གཉིས་ལ་ཡང་༔ བདུད་བགེགས་ལྷ་རུ་བརྫུས་ནས་སུ༔ ལྷ་ཡི་མཚན་བཟུང་ང་ཡིན་ཟེར༔ དེ་ཡི་དབང་དུ་འགྲོ་ཉེན་སྲིད༔ དེ་ཕྱིར་གསང་བ་མཆོག་ཏུ་གཅེས༔ ལྷ་ཡང་དངོས་པོ་ཅན་དུ་བསྐྱེད༔ ཕྱག་མཚན་ཟངས་ལྕགས་ལ་སོགས་པའི༔ ཀུན་བཏགས་མངོན་གྲུབ་རྒྱུ་རུ་བཟུངས༔ མགོ་བརྙན་སེམས་ཅན་དེ་ཉིད་ཀྱི༔ རྒྱུད་ལ་གོལ་ཞིང་དངོས་སུ་བསམ༔ ཆས་རྒྱན་དེ་བཞིན་རྫས་སུ་གོལ༔ ཁྲོ་བོ་ཞེ་སྡང་ང་རྒྱལ་གྱི༔ གཟུགས་སུ་གོལ་ཞིང་དེའི་ངང་བསྐྱེད༔ དངོས་འཛིན་ཨ་འཐས་དང་བཅས་པ༔ དེ་དག་ལོག་པའི་ལམ་དུ་གོལ༔ བདུད་དང་རཱུ་ཏྲའི་ལམ་དུ་ཤོར༔ ཐར་པའི་ལམ་ལ་ཕྱོགས་ཙམ་མིན༔ དེ་ལྟར་མ་བྱེད་ལས་ཅན་རྣམས༔ ལྷ་དང་དཀྱིལ་འཁོར་ཐམས་ཅད་ལ༔ དག་པ་དྲན་པ་གེགས་མེད་ལམ༔ སྤྲོས་མེད་ལུགས་སུ་ཉམས་ལེན་ན༔ སྣང་བ་འོད་གསལ་གཞལ་ཡས་ཁང་༔ སྲིད་པ་དག་སྦྱོར་ཡེ་ཤེས་ལྷ༔ སྒྲ་གྲགས་དག་པ་སྔགས་ཀྱི་སྒྲ༔ ཡོངས་སུ་ཡེ་གྲུབ་དཀྱིལ་འཁོར་རོ༔ རང་ལུས་བདེ་ཆེན་གཞལ་ཡས་ཁང་༔ རྩ་ཁམས་དཔའ་བོ་མཁའ་འགྲོའི་དལ༔ ཡོངས་སུ་ཡེ་གྲུབ་དཀྱིལ་འཁོར་རོ༔ ངོ་བོ་ཆོས་སྐུ་ཆོས་སྐུའི་ཞིང་༔ རང་བཞིན་ལོངས་སྤྱོད་རྫོགས་ཞིང་སྐུ༔ ཐུགས་རྗེ་སྤྲུལ་སྐུའི་ཞིང་སྐུར་རྫོགས༔ ཡོངས་སུ་ཡེ་གྲུབ་དཀྱིལ་འཁོར་རོ༔ སྣང་བ་སྣོད་ཀྱི་གཞོང་པ་རུ༔ སྲིད་པ་འདི་འཛིན་བརྙན་ཤར་བ༔ ཡེ་གྲུབ་མཆོད་པའི་རྒྱུན་ཆེན་པོ༔ རྩ་ཁམས་དཔའ་བོ་ཡེ་གྲུབ་ཀྱིས༔ རང་བྱུང་ལྷུན་གྲུབ་དཀྱིལ་འཁོར་ལ༔ བཟའ་བཏུང་ཚོགས་ཀྱི་མཆོད་པ་ཆེ༔ སྣང་གྲགས་མྱོང་ཚོར་རིག་ཚོགས་ཀུན༔ མཆོད་པ་མ་བཅོས་རང་བྱུང་མཆོག༔ ངོ་རང་ཐུགས་རྗེའི་དཀྱིལ་འཁོར་ལ༔ དགའ་བདེའི་རོལ་པ་མཆོད་པའི་མཆོག༔ མྱོང་ཚོར་ཐམས་ཅད་བདེ་སྟོང་རོས༔ བླང་དོར་འབུལ་ཀྱང་མེད་པས་མཆོད༔ སྤྲོས་བཅས་ཅན་གྱི་དེ་མི་གོ༔ མ་འོངས་ང་ཡི་རྗེས་འཇུག་རྣམས༔ སྤྲོས་བཅས་ལ་བརྟེན་བསྒྲུབ་པའི་སྒོར༔ འཇུག་འདོད་གང་ཟག་ལས་འཕྲོ་ཅན༔ དབེན་ཞིང་ཉམས་དགའི་སྐྱེད་ཚལ་དུ༔ སྒྲུབ་ཁང་མཛེས་ལྡན་མཐུན་རྐྱེན་འཛོམ༔ ཟླ་ཚེས་དུས་བཟང་ཚེས་བཅུའི་ཉིན༔ རས་བྲི་འམ་ནི་རྡུལ་ཚོན་གྱི༔ དཀྱིལ་འཁོར་དམར་པོ་གཞི་གཙང་ལ༔ མུ་ཁྱུད་རིམ་པ་ལྔ་རུ་བསྐོར༔ དབུས་ཀྱི་ལྟེ་བ་དཀར་པོ་ལ༔ ཕྱོགས་བཞི་ལས་བཞིའི་རང་དབྱིབས་བྱ༔ ཁ་དོག་རང་མདོག་ལྟ་བུའོ༔ སྒོ་གྲུ་མཚན་ཉིད་སྤྱི་ལྟར་བྱ༔ དེ་སྟེང་ཚོམ་བུ་ལྔ་བཀོད་ཅིང་༔ དབུས་སུ་བླ་རྡོ་ཙཀྲ་བཙུག༔ རྩ་གསུམ་གཏོར་མ་སྤྱི་ལྟར་ལ༔ རང་འདྲའི་གཏོར་ཕྲན་བཞི་རེས་བསྐོར༔ གཞན་ཡང་ལས་བཞིའི་དབྱིབས་ཁ་ཏོག༔ དབུས་དང་ལྔ་ལྡན་ལྟེ་བ་རུ༔ དམར་གཏོར་དྲང་མཛེས་བརྗིད་པ་ལ༔ དེ་འདྲའི་གཏོར་ཕྲན་བརྒྱད་ཀྱིས་བསྐོར༔ སྟེང་དུ་དར་དམར་ལེ་བརྒན་གདུགས༔ མེ་རི་འབར་བས་བརྒྱན་པའོ༔ དངོས་གྲུབ་ཉེར་ཕྱིར་འདུད་ཚུལ་ཙམ༔ ཉེར་ལྔ་དམ་རྫས་མང་སྦྱོར་གྱིས༔ རིལ་བུ་ཐོད་པར་ཕྱུར་བ་བཞག༔ ཕྱི་མཆོད་ཉེར་སྤྱོད་འདོད་ཡོན་དང་༔ ནང་མཆོད་སྨན་གཏོར་རཀྟ་བཤམས༔ དར་ཚོན་སྣ་ལྔའི་གཡབ་དར་སོགས༔ འབྱོར་ཚོགས་མཆོད་པའི་ཡོ་བྱད་བཀོད༔ རིན་ཆེན་གཏེར་བུམ་སྒྲུབ་པའི་རྟེན༔ བྱིན་རླབས་ཅན་གྱི་རྟེན་གསུམ་སོགས༔ སྒྲུབ་པའི་རྟེན་དུ་བཙུག་པར་བྱ༔ སྲུང་མ་རྣམས་ལ་རང་གཞུང་ལྟར༔ ལྷ་གྲངས་ལྡན་པའི་གཏོར་ཚན་བྱ༔ དེ་ཡང་དང་པོ་ཡུལ་ལྷ་དང་༔ ས་བདག་ཚོགས་ལ་གཏོར་མ་སྦྱིན༔ ས་འདུལ་རིན་འཇལ་ཉོ་ཚོང་ཚུལ༔ གནས་དེར་དཀྱིལ་འཁོར་སྒྲུབ་པ་ལ༔ ཀོ་ལོང་མི་བྱེད་སྡོང་གྲོགས་བཅོལ༔ སྒྲུབ་དུས་སུ་དང་མི་འཕྲད་པར༔ ཕྱི་ནང་བར་གསུམ་མཚམས་བྱའོ༔ དེ་ཕྱིར་དང་པོ་སྔ་ཐོག་ཏུ༔ བཟའ་བཏུང་མཆོད་རྫས་ཡོ་བྱད་རྣམས༔ བསགས་ཤིང་ཚང་བར་བྱ་བ་གནད༔ ཆག་གྲུམ་སྣོད་ངན་སྤངས་བྱས་ཏེ༔ གཙང་ཞིང་དགེ་བའི་ཡོ་བྱད་རྣམས༔ དམེ་ཡུག་མཛེ་ཅན་དབང་ཉམས་དང་༔ དམ་ཉམས་གྲོགས་ངན་སྤངས་བྱས་ཏེ༔ ཡོན་ཏན་ལྡན་པའི་མཛའ་གྲོགས་བརྟེན༔ ཕར་ལ་ལྐོག་སོ་བལྟ་བ་དང་༔ ཕག་ཏུ་ཉན་སོགས་སྤང་བར་བྱ༔ ནང་ཡང་ཕྱི་ཡིས་མི་མཐོང་དང་༔ སྨྲ་སྐད་མི་ཐོས་པ་ཡང་གནད༔ ཕན་ཚུན་གང་ལ་བལྟ་ཉན་དང་༔ ཐུག་འཕྲད་མེད་པ་ཡང་གནད་དོ༔ སྐྲ་སེན་ཁ་སྤུ་བྲེག་པ་དང་༔ གདོང་དང་ལག་པ་འཁྲུ་བ་སྤངས༔ སྒྲུབ་པའི་གྲོགས་དང་སྒྲུབ་གནས་ལྷ༔ གང་ལ་མི་སྨྲ་གསང་བ་གནད༔ མཚམས་ནས་ཐོན་ཚེ་ཞག་གསུམ་དུ༔ གདན་མི་བསྒུལ་ཞིང་བསྲུང་བའོ༔ དྲོད་རྟགས་གཞན་ལ་མི་སྨྲ་བར༔ གསང་བ་རྒྱ་ཡིས་གདབ་པར་བྱ༔ རབ་ལ་མི་ཚིག་འཁྱལ་བ་ཡིས༔ སྔགས་ཀྱི་བར་བ་གཅོད་པ་དང་༔ གདན་གྱི་དྲོད་མི་ཡལ་བར་བསྒྲུབ༔ སྒྲུབ་པའི་ལག་ལེན་རིམ་པའོ༔ ལེའུ་གཉིས་པའོ༔ སྒྲུབ་པའི་སྒོར་འཇུག་རྣལ་འབྱོར་གྱིས༔ རྣམ་པར་རྟོག་པའི་སྟེང་སྐོར་དང་༔ ཡུལ་ལ་ཞེན་ཆགས་ཡིད་དཔྱོད་ཀུན༔ རིག་སྟོང་ངང་དུ་ཆམ་བརྡལ་ཐོང་༔ དངོས་གྲུབ་མཚན་མ་རེ་རློམ་དང་༔ གྲུབ་རྟགས་མངོན་ཤེས་རེ་བའི་སེམས༔ གཟུང་འཛིན་རང་གྲོལ་རང་ངོར་ཤིག༔ ཆེ་འདོད་གྲགས་འདོད་འགྲན་རྩོད་དང་༔ འབྲས་བུ་ད་ལྟ་རེ་བ་རྣམས༔ མི་རྟག་སྒྱུ་མའི་རོལ་པར་ཤིག༔ ཡུལ་ལ་ཆགས་ཤིང་གཉེན་བརྩེའི་སེམས༔ ཆོས་ཀུན་བདག་མེད་ངང་དུ་ཞོག༔ ནོར་ལ་འཚོ་སྐྱོང་དགྲ་འདུལ་སེམས༔ རྨི་ལམ་ལྟ་བུར་ཡུལ་མེད་ཐོང་༔ ཡར་ལ་སངས་རྒྱས་རེ་བ་ན༔ རེ་བ་བདུད་དེ་རང་གཞི་ནི༔ ཡེ་ནས་སངས་རྒྱས་རིག་པའི་ངང་༔ མར་གྱི་ངན་འགྲོར་དོགས་པ་ན༔ དོགས་པ་བདུད་དེ་དོགས་པའི་སེམས༔ ཡུལ་མེད་ཟང་ཐལ་ཆེན་པོར་བཤིགས༔ ཆེ་འདོད་དང་ནི་རྨི་ལམ་མཚན༔ འདི་ལ་དགའ་བྲོད་ཡང་རློམས་ཀུན༔ རང་སེམས་འཕྲུལ་དུ་ཤིག་ལ་ཐོངས༔ ཉམས་ལ་ཞེན་ཆགས་བསྒོམ་དུ་འཛིན༔ ང་རྒྱལ་དང་ནི་ཁེངས་སེམས་ཀུན༔ རྨི་ལམ་ལྟ་བུར་བདེན་མེད་དུ༔ རིག་པ་རང་ངོར་རྗེན་པར་ཞོག༔ གང་ཤར་ཤར་ཚེ་ཞེན་པ་དང་༔ བཀག་གཅུན་རྗེས་དཔྱོད་མ་ཡིན་པར༔ རིག་པའི་རང་ངོར་ཤིག་ལ་ཞོག༔ ཤར་ལ་བཟང་ངན་མི་མངའ་སྟེ༔ གྲོལ་ཐོག་ཆོས་སྐུའི་ཀློང་ཆེན་མཁའ༔ ངན་ཤར་གྲོལ་དུ་དཀའ་ལས་མེད༔ བཟང་ཤར་གྲོལ་དུ་སླར་ཡང་མིན༔ ཕན་གནོད་མེད་པར་གྲོལ་བའོ༔ ཤར་ཆ་རིག་པ་ཐ་དད་དུ༔ གྲོལ་རྒྱུ་གྲོལ་བ་མ་བྱེད་པར༔ ཤར་ཡང་རང་ཤར་གཞི་མེད་ལ༔ གྲོལ་ཡང་རང་གྲོལ་ཡུལ་མེད་དང་༔ ད་ལྟ་བཅོས་བསྒྱུར་སླད་མེད་ཀྱི༔ ཐ་མལ་ཤེས་པ་ཟང་ཀ་མ༔ རིག་པའི་རྒྱུན་གྱིས་སྐྱོང་བ་འདི༔ རྩོལ་མེད་རང་ཐོག་གྲོལ་བའོ༔ ཤར་བ་རིག་པ་རིག་པར་ཤར༔ ཉི་ཟླ་དང་ནི་སྤྲིན་དཔུང་གིས༔ མཁའ་དབྱིངས་དཀར་ནག་བྱེད་པ་ལྟར༔ རིག་པ་ཉིད་ལ་གང་ཤར་རིག༔ སེམས་སུ་འདུག་ཚེ་གང་ཤར་སེམས༔ དཔེར་ན་ཉིན་དུས་སྟེང་མཁའ་གསལ༔ མཚན་གྱིས་དུས་སུ་མཁའ་དབྱིངས་འཐིབས༔ རིག་པའི་ངང་དུ་གང་ཤར་ཡང་༔ ཐམས་ཅད་རིག་པ་རྗེན་པ་ལ༔ སེམས་ཀྱི་དུས་སུ་གང་ཤར་ཡང་༔ ཐམས་ཅད་སེམས་སུ་གྱུར་བའོ༔ དེ་ལྟར་སེམས་དང་རིག་པ་གཉིས༔ གང་ལ་གདལ་ཡང་དེ་ལྟར་རོལ༔ སོ་སོར་མ་ཡིན་ལམ་དུའོ༔ ཡིད་ལ་དཔྱོད་བསྒྱུར་བསམ་མནོ་དང་༔ འགགས་མེད་བདེ་སྡུག་ལས་འདས་པའི༔ ཤར་གྲོལ་དུས་མཉམ་མ་ནོར་ལམ༔ བདེའམ་འགགས་པ་ཡིན་ནམ་སློང་༔ ཉམས་ཏེ་སྒོ་གསུམ་འཛིན་མ་རྨོངས༔ ཐ་མལ་རང་རྒྱུད་ལ་འཇོག་དང་༔ ཤར་ཆ་འགགས་ན་སྒོམ་མེད་བློ༔ ཤར་རྗེས་དཔྱོད་བཏང་ཤར་གྲོལ་སེམས༔ སྟོང་པར་ལྟ་བ་ཀློང་གྲོལ་དང་༔ ཉམས་སུ་ནུབ་པ་སྤྲོས་བྲལ་ལ༔ བཅུན་ཞིང་བཅོས་མར་བསྒོམ་པར་སེམས༔ རྟོག་གེ་བ་ལ་སྒོམ་ཅན་དང་༔ ཤར་རྗེས་སྟོང་པར་རྒྱས་འདེབས་པ༔ བསྒོམ་རྗེས་འབྲས་བུར་རེ་རློམ་སྐྱེ༔ མ་རྟོགས་ཁ་ལྟ་སྟོང་འབྱམས་སོགས༔ དེ་དག་ལྟར་སྒོམ་ཉོན་རེ་མོངས༔ ཨ་རེ་སྡུག་སྟེ་རྨོངས་གཏིང་ཞ༔ དེ་དག་གང་དུའང་མ་གྱུར་པའི༔ ལམ་མེད་ལམ་མཆོག་ཨ་ཏིའི་ལམ༔ གང་ཤར་མ་ཞེན་རང་ངོར་གྲོལ༔ སྦྲུལ་གྱི་མདུད་པ་ཞིག་པ་ལྟར༔ ཐོལ་གྱིས་ཤར་ལ་ངང་དུ་གྲོལ༔ ཀློང་ལས་ཤར་ཏེ་ཀློང་དུ་གྲོལ༔ མཁའ་ལས་གློག་བྱུང་ཀློང་ཐིམ་ལྟར༔ གཞི་ཡི་ཀློང་དུ་གྲོལ་བར་ཞོག༔ འཁོར་བ་དང་ནི་འདས་པ་གཉིས༔ གང་ལ་མ་བརྩལ་མ་བསྒྲོད་པར༔ རིག་པའི་རང་ངོར་རྫོགས་པ་ལ༔ བྱས་ཤིང་བཟོ་བཅོས་གང་མ་ལན༔ རང་སྣང་རང་གིས་སྤྱོད་ཡུལ་གྲུབ༔ གྲུབ་པ་མ་ཡིན་སོ་ཚུགས་མེད༔ མ་གྲུབ་ཡང་མིན་འདི་ལྟར་བྱེད༔ གང་ནས་གྲོལ་ཏེ་གར་ཕྱིན་མིན༔ གང་ལ་རང་ངོར་སངས་པས་ན༔ དེ་ལྟར་རང་ཀློང་རང་སྐུ་ཞིང་༔ མ་བྱས་ངང་གིས་གྲུབ་པའོ༔ གང་ཞིག་འཁྲུལ་པའི་གཉིད་ངོག་ཏུ༔ ཡུལ་འཛིན་འཁོར་བ་ཡོངས་གྲུབ་ལྟར༔ གང་འཁྲུལ་གང་དུ་མ་བསྒྲོད་པའི༔ འདུས་བྱས་བདེ་སྡུག་རང་ངོའི་གཞན༔ གཉིས་ཀྱང་གཤིས་རྩལ་ངང་དུ་རྫོགས༔ དེ་ནས་གང་དུ་མི་དོགས་ཤིང་༔ གང་ལའང་རེ་བ་མེད་པ་ཡི༔ ཆོས་ཉིད་ངང་རྫོགས་རྩལ་རིག་པས༔ མཁན་པོ་ཉིད་ལ་མཁན་པོ་སད༔ ཉི་ཟླ་འོད་ཀྱི་དཀྱིལ་འཁོར་དུ༔ མ་བྱས་རང་བྱུང་གྲུབ་པ་ལྟར༔ སེམས་ཀྱི་འཁོར་འདས་དཀྱིལ་འཁོར་དུ༔ མ་བརྩལ་ངང་གིས་གྲུབ་པའོ༔ རང་ལས་རང་གྲོལ་རང་ཆོས་སྐུ༔ དེ་ལས་འབྲས་བུ་ལོག་མ་ཚོལ༔ རང་ཤར་རང་ངོར་གྲོལ་ལ་ཞོག༔ གང་ཤར་རིག་སྟོང་ངང་དུ་ཤིག༔ རང་ཀློང་ནས་ཤར་རང་ཀློང་གྲོལ༔ གཉིས་དང་སོ་སོར་ཕྱོགས་རིས་སུ༔ མ་འཛིན་མི་སེམས་ངང་ལ་ཞོག༔ བཅོས་བསྒྱུར་སྤངས་ལེན་ཕྱེ་བྲབ་པ༔ ཐམས་ཅད་ངོ་བོ་གཅིག་ཏུ་གྲོལ༔ བྱེ་བྲག་བཟང་ངན་གང་ཡང་མེད༔ འཁོར་འདས་ཡོངས་གྲུབ་ངང་རྫོགས་པའི༔ ཅིར་ཡང་བསྒྱུར་བའི་ཆོ་འཕྲུལ་ཅན༔ རིག་པ་གཞི་སྟེ་རིག་པ་ལམ༔ རིག་པ་འབྲས་བུ་ལྷུན་གྲུབ་ཉིད༔ རིག་པ་མི་བལྟར་བལྟ་བ་ལ༔ རིག་པ་མི་སྒོམ་བསྒོམ་པའོ༔ རིག་པ་མི་སྤྱོད་སྤྱོད་པ་སྟེ༔ རིག་པ་ངོ་བོ་ཀ་དག་ལ༔ རིག་པ་རང་བཞིན་མ་འགགས་པ༔ རིག་པ་ཐུགས་རྗེ་ཕྱོགས་མེད་ལ༔ རིག་པ་བསྒོམ་མེད་རྫོགས་པ་ཆེ༔ རིག་པ་སྤྲོས་པ་དང་བྲལ་ཞིང་༔ རིག་པ་སྐྱེ་མེད་ཆོས་སྐུ་འོ༔ རིག་པ་རང་ལ་རྫོགས་པ་ལས༔ བྱ་རྩོལ་བཅོས་བསྒྱུར་གནས་བསྒྲོད་མེད༔ རྣལ་འབྱོར་ལམ་འདིར་ངེས་གྲོལ་ན༔ འཕེལ་འགྲིབ་མེད་པའི་བཀོད་པ་རྫོགས༔ སྐྱེ་ནུབ་མེད་པའི་བདེ་སྐྱིད་ལ༔ འབད་རྩོལ་མེད་པའི་ལོངས་སྤྱོད་དོ༔ དེ་ལྟར་ངེས་གསང་སྙིང་པོའི་ཆོས༔ མ་བསྒོམ་ཚུལ་གྱིས་བསྒོམ་མཛོད་ལ༔ བལྟ་རྒྱུ་མེད་པའི་ཚུལ་དུ་ལྟོས༔ ཡིད་ལ་ཅི་ཡང་མི་བྱེད་པའི༔ བྱེད་པ་ཆེན་པོའི་ངང་ནས་བྱ༔ བྱ་རྩོལ་བཅོས་བསྒྱུར་མེད་པ་ཡིས༔ བྱ་རྩོལ་རྫོགས་པའི་ངང་ལ་ཞོག༔ ལམ་འདིའི་དབང་ཐོབ་ལམ་འདི་རུ༔ ཉམས་སུ་ལེན་དང་ཉམས་མྱོང་བའི༔ མ་ནོར་ལམ་ལ་ངེས་བརྒལ་ན༔ དེ་ནི་ཚེ་འདིར་མངོན་སངས་རྒྱས༔ མ་འོངས་ང་ཡི་རྗེས་འཇུག་རྣམས༔ འདི་བཞིན་བསྒོམ་སྒྲུབ་ཉམས་སུ་ལོངས༔ ཨོ་རྒྱན་ང་དང་འབྲལ་བ་མེད༔ སྐྱེ་བ་ཕྱི་མར་མི་ལྟོས་པར༔ ཚེ་འདིར་མངོན་པར་སངས་རྒྱས་པའོ༔ དེས་ནི་སྒོམ་དང་བསྒྲུབ་པ་ཀུན༔ དལ་མེད་རྟག་ཏུ་ལྷུར་ལེན་མཛོད༔ ས་མ་ཡ༔ མ་འོངས་ལྔ་བརྒྱའི་ཐ་མ་ལ༔ མཁས་པར་རློམ་པའི་རང་མཐོང་ཅན༔ དོན་ལ་གདོལ་པ་ལས་ཉན་པའི༔ མི་ནག་བཙུན་པའི་ཚུལ་འཛིན་རྣམས༔ དཀོར་དང་སྡིག་ཟས་སླད་མར་རྔམས༔ དགེ་སྡིག་ཆོས་ལ་རློམ་ཆོས་མཚང་༔ བྱ་བྱེད་གང་ལ་དེའི་ཚུགས་འཛིན༔ ལྐོག་ཏུ་བུད་མེད་ཡིབས་སུ་སྦས༔ ཐར་པའི་འབྲས་བུ་དེ་ལ་འཚོངས༔ དེ་འདྲའི་ཟོག་པོ་བརྫུ་བ་མཁན༔ ཁྱེད་ཅག་ཆོས་ཀྱི་མཚང་མི་ལོན༔ ཕྱི་རུ་ཁ་ལྟ་ཅོ་འདྲི་བྱེད༔ ནང་དུ་མྱོང་མེད་རྨོན་པའི་སེམས༔ སྡིག་པའི་སློབ་དཔོན་སྦྱང་མོ་འདྲས༔ འཁོར་སློབ་སྡིག་ཚུད་རི་ཁྱིའི་བུ༔ ཁྱོད་ཅག་རང་རང་བདེ་བར་སྡོད༔ ང་ཡི་བཀའ་ལ་སླད་མ་གཞུག༔ ཨོཾ་རྒྱན་མཁའ་འགྲོའི་སྙིང་ཐིག་གི༔ ཆོས་ཀྱི་བདག་པོ་ཁྱོད་མ་ཡིན༔ ས་མ་ཡ༔ སྔགས་སྲུང་ཨེ་ཀ་ཙ་ཏི་དང་༔ དཔལ་ལྡན་རང་བྱུང་རྒྱལ་མོར་གཉེར༔ གཡུ་ཡི་ཕྲེང་བ་ཅན་གྱིས་སྲུངས༔ ཆོས་བཞིན་སྤྱོད་ལ་བུ་ལྟར་སྐྱོངས༔ དམ་ཉམས་སྲོག་གི་གཤེད་མར་ཕོབ༔ སྙིང་འདྲ་གཅིག་ལས་ཤོར་ཏ་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་མ་ནུས་ཀུན་གྱིས་སྤངས་པའི་ཟོག་པོ་བདུད་འཇོམས་རྡོ་རྗེ་གར་དབང་འོད་གསལ་གླིང་པས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མི་ལོ་བཞི་ལ་བཀའ་རྒྱས་བཏབ་སྟེ་མཐར་སྨར་སྟོད་འབྲོས་ཕུག་མཁའ་འགྲོའི་གནས་མཆོག་དབེན་པའི་ཁྲོད་དུ་དག་པར་ཕབ་པའི་ཡི་གེའི་རིས་བྱེད་ཕུན་ཚོགས་བཀྲ་ཤིས་སོ།།དགེའོ།།སརྦ་མངྒ་ལཾ།།།།