TTDL-ZABTER-08-NYA-027

Previous Text Back to Volume PageNext Text

Wylie title
Location	bdud 'joms gling pa zab gter Volume 8, Text 27, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: . Thimphu, Bhutan: Lama Kuenzang Wangdue, 2004.
Side notes	Verso: bdud 'joms srung ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

Tibetan Text

[edit]

བརྡ་ཡིག་༠༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་དབང་ཕྱུག་ཆེན་པོའི་དྲག་བཟློག་རྡོ་རྗེའི་ཕ་ལམ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ བརྡ་ཡིག་༠༠༠༠༠༠༠༢༠༤༔ འདི་ཡི་ལག་ལེན་རིམ་པ་ལ༔ དྲག་པོའི་གཏོར་མ་རྩེ་གསུམ་ལ༔ འཁོར་ནི་གཉིས་དང་བརྒྱད་ཀྱིས་བསྐོར༔ ཟོར་ཀོང་ཁྲག་ཀོང་སྐྱུ་གུས་བསྐོར༔ མཆོད་རྫས་དྲག་པོའི་རྣམ་ལྔ་དང་༔ ལིང་རོ་ཉལ་ཉིལ་ཁྲག་སྐྱེམས་དང་༔ གཏོར་མ་ཤ་དུམ་མང་པོ་བཤམས༔ དེ་ནས་གཏོར་མ་དེ་ཉིད་ནི༔ ལྷ་ཆེན་ཡབ་ཡུམ་འཁོར་བཅས་སུ༔ གསལ་ཏེ་བཟློག་པའི་ལས་བཅོལ་བྱ༔ འགུགས་གཞུག་བྱས་མཐར༔ ཧཱུྃ༔ བཞེངས་ཤིག་བཞེངས་ཤིག་བླ་མ་དཀོན་མཆོག་གསུམ༔ ཡི་དམ་མཁའ་འགྲོ་ཆོས་སྐྱོང་སྲུང་མའི་ཚོགས༔ ཐུགས་དམ་བསྐུལ་ལོ་བཟློག་པའི་ལས་ལ་བཞེངས༔ སྐུ་ནི་དྲག་པོའི་གར་བསྒྱུར་རབ་ཁྲོས་པས༔ མི་སྲུན་རྔམས་བརྗིད་གར་དགུའི་ཉམས་ལྡན་ཅིང་༔ རབ་འཇིགས་དུར་ཁྲོད་ཆས་བརྒྱད་རྒྱན་རྫོགས་པའི༔ སྣང་སྲིད་ཐམས་ཅད་ཡོངས་སུ་འགེངས་པར་མཛོད༔ གསུང་གི་ང་རོ་འབྲུག་སྟོང་ལྡིར་བའི་སྒྲས༔ ཧཱུྃ་ཕཊ་རྒྱོབ་སོད་བྷྱོ་ཟློག་སྒྲ་སྒྲོགས་ཤིང་༔ ཐུགས་སྤྲུལ་འཁོར་བའི་སྡུག་བསྔལ་གཞོམ་བྱེད་པའི༔ ཐུན་མཚོན་རྫས་སྔགས་ཁྲོ་ཆུང་ཁྱུང་སྡིག་པ༔ བསྐལ་འཇིགས་མེ་རླུང་ཆུ་ལྟར་འཁྲུགས་པ་ཡིས༔ དྲག་པོའི་མངོན་སྤྱོད་འཁྲུལ་འཁོར་རབ་ཏུ་འགྱེད༔ གནོད་བྱེད་དགྲ་གེགས་བཟློག་བསྒྱུར་ལས་མཛོད་ཅིག༔ འཇིག་རྟེན་དབང་ཕྱུག་རབ་ཁྲོས་དྲག་པོའི་སྐུ༔ མཐིང་ནག་འབར་བ་ཞལ་གཅིག་ཕྱག་གཉིས་པ༔ དབུ་ཡིས་སྲིད་པའི་རྩེ་ནས་ལྷ་གསུམ་འདུལ༔ ལྷ་ཡི་གདོན་ཚོགས་མ་ལུས་དགྲ་ལ་བཟློག༔ ཕྱག་གཡས་གནམ་ལྕགས་ཏྲི་ཤུལ་ཀླད་ལ་བསྐོར༔ ལྷ་མ་ཡིན་གྱི་སྡེ་ཚོགས་དགྲ་ལ་བཟློག༔ ཕྱག་གཡོན་འཆིང་བྱེད་ཞགས་པ་ཐུགས་ཀར་འཛིན༔ བཀའ་སྲུང་སྡེ་བརྒྱད་གཡོ་འཁྲུག་དགྲ་ལ་བཟློག༔ སྐེད་པ་བར་སྣང་ཁམས་ཀྱི་འཇིག་རྟེན་འདུལ༔ མི་དང་མི་མིན་གནོད་པ་དགྲ་ལ་བཟློག༔ ཞབས་གཉིས་ངན་སོང་གསུམ་གྱི་སྐྱེ་སྒོ་བཅད༔ ངན་སོང་འཁོར་བའི་གཡོ་འཁྲུག་དགྲ་ལ་བཟློག༔ སྲིད་པ་ཤར་གྱི་སྐྱེ་འགྲོ་ཁ་ལོ་སྒྱུར༔ ཞི་བའི་ཕྲིན་ལས་མ་ལུས་ལྷུན་གྱིས་གྲུབ༔ ཤར་ཕྱོགས་སྐྱོང་མཛད་ཐུགས་ཀྱི་སྤྲུལ་པ་ཡིས༔ ཤར་གྱི་བསྟན་དགྲ་སྡེ་དང་བཅས་པ་བཟློག༔ བསྟན་དགྲའི་མཐུ་ནུས་རྫས་སྔགས་རྦོད་གཏོང་བཅས༔ མེ་སྟག་ཆུ་ཡིས་བསད་པ་བཞིན་དུ་ཐུལ༔ སྲིད་པ་ལྷོ་ཕྱོགས་སྐྱེ་འགྲོ་ཁ་ལོ་བསྒྱུར༔ རྒྱས་པའི་ཕྲིན་ལས་མ་ལུས་ལྷུན་གྱིས་གྲུབ༔ ལྷོ་ཕྱོགས་སྐྱོང་མཛད་ཡོན་ཏན་སྤྲུལ་པ་ཡིས༔ ལྷོ་ཡི་བསྟན་དགྲ་སྡེ་དང་བཅས་པ་བཟློག༔ བསྟན་དགྲའི་མཐུ་ནུས་རྫས་སྔགས་རྦོད་གཏོང་བཅས༔ མེ་སྟག་ཆུ་ཡིས་བསད་པ་བཞིན་དུ་ཐུལ༔ སྲིད་པ་ནུབ་ཀྱི་སྐྱེ་འགྲོ་ཁ་ལོ་བསྒྱུར༔ དབང་གི་ཕྲིན་ལས་མ་ལུས་ལྷུན་གྱིས་གྲུབ༔ ནུབ་ཕྱོགས་སྐྱོང་མཛད་ཡོན་ཏན་སྤྲུལ་པ་ཡིས༔ ནུབ་ཀྱི་བསྟན་དགྲ་སྡེ་དང་བཅས་པ་བཟློག༔ བསྟན་དགྲའི་མཐུ་ནུས་རྫས་སྔགས་རྦོད་གཏོང་བཅས༔ མེ་སྟག་ཆུ་ཡིས་བསད་པ་བཞིན་དུ་ཐུལ༔ སྲིད་པ་བྱང་གི་སྐྱེ་འགྲོ་ཁ་ལོ་བསྒྱུར༔ དྲག་པོའི་ཕྲིན་ལས་མ་ལུས་ལྷུན་གྱིས་གྲུབ༔ བྱང་ཕྱོགས་སྐྱོང་མཛད་ཕྲིན་ལས་སྤྲུལ་པ་ཡིས༔ བྱང་ཕྱོགས་བསྟན་དགྲ་སྡེ་དང་བཅས་པ་བཟློག༔ བསྟན་དགྲའི་མཐུ་ནུས་རྫས་སྔགས་རྦོད་གཏོང་བཅས༔ མེ་སྟག་ཆུ་ཡིས་བསད་པ་བཞིན་དུ་ཐུལ༔ སྲིད་པ་དབུས་ཕྱོགས་སྐྱེ་འགྲོ་ཁ་ལོ་བསྒྱུར༔ ཕྲིན་ལས་རབ་འབྱམས་མ་ལུས་ལྷུན་གྱིས་གྲུབ༔ དབུས་ཕྱོགས་བསྟན་དགྲ་སྡེ་དང་བཅས་པ་བཟློག༔ བསྟན་དགྲའི་མཐུ་ནུས་རྫས་སྔགས་རྦོད་གཏོང་བཅས༔ མེ་སྟག་ཆུ་ཡིས་བསད་པ་བཞིན་དུ་ཐུལ༔ སྲིད་པ་མཚམས་བཞིའི་སྐྱེ་འགྲོ་ཁ་ལོ་བསྒྱུར༔ མངོན་སྤྱོད་དྲག་པོའི་ཕྲིན་ལས་ལྷུན་གྱིས་གྲུབ༔ མཚམས་བཞི་སྐྱོང་བའི་བཀའ་སྲུང་དྲེགས་པའི་འཁོར༔ མཚམས་བཞིའི་བསྟན་དགྲ་སྡེ་དང་བཅས་པ་བཟློག༔ བསྟན་དགྲའི་མཐུ་ནུས་རྫས་སྔགས་རྦོད་གཏོང་བཅས༔ མེ་སྟག་ཆུ་ཡིས་བསད་པ་བཞིན་དུ་ཐུལ༔ བསྟན་དང་འགྲོ་ལ་རྒོལ་བའི་བསམ་སྤྱོད་ཀྱིས༔ ས་རྡོ་རྩི་ཤིང་རྫས་སྔགས་ཀྱིས་སྦག་ནས༔ སྲོག་ཆགས་ཕྲ་མོ་གཟན་ལ་འགྱེད་ནས་སུ༔ ལོ་འབྲས་ཟས་གོས་དཔལ་ལ་ཟ་བྱེད་པའི༔ རྫས་སྔགས་འཕྲུལ་གྱི་མཁན་པོ་དང་བཅས་པ༔ སྒྲོན་ཤིང་ཚལ་དུ་མེ་ཆེན་མཆེད་པ་བཞིན༔ རྗེས་ཤུལ་ལྷག་མ་མེད་པར་བརླག་པར་མཛོད༔ སླར་ཡང་འབྱུང་ན་མཐུ་དང་སྟོབས་ཀྱིས་བཟློག༔ རྫས་ངན་སྔགས་དང་ལོག་པའི་ཏིང་འཛིན་གྱིས༔ ས་སྐྱོང་གཞི་བདག་ལྷ་སྲིན་དབང་བསྒྱུར་ནས༔ མི་རྣམས་ཤེས་རྒྱུད་ནག་ཕྱོགས་ལ་བསྒྱུར་བའི༔ མཐའ་མི་སྡིག་སྤྱོད་ལས་ངན་བདུད་སྡེ་འབངས༔ རྩ་སྦུར་དུས་མཐའི་མེ་ཡིས་གཞོམ་པ་བཞིན༔ སྐད་ཅིག་མྱུར་བ་ཉིད་དུ་བརླག་པར་མཛོད༔ རྫས་སྔགས་ཏིང་འཛིན་ནུས་པ་རང་གཤེད་ཕོབས༔ རྗེས་ཤུལ་མེད་པར་བསྟན་དགྲའི་སྲོག་ལ་བཟློག༔ མིག་བསླུས་འཕྲུལ་བསྒྱུར་འགྲོ་བའི་སྣང་སེམས་བསླུ༔ ས་རྡོ་རིན་ཆེན་ནོར་དུ་བསྒྱུར་ནས་སུ༔ ས་མིག་གནས་བཟུང་ཡུལ་ཀུན་རིམ་པ་བཞིན༔ ཁ་ལོ་བསྒྱུར་ཞིང་རྒྱལ་ཁམས་མངའ་འོག་འདྲེན༔ སེམས་ཅན་བདེ་སྐྱིད་དཀར་པོའི་དགེ་བཅུ་བསྣུབ༔ མཐའ་མེད་འཁོར་བའི་ཁྲི་མུན་གནས་སུ་འཕང་༔ འདི་འདྲའི་ལས་ངན་གདུག་འདྲེ་བདུད་སྡེ་འབངས༔ མ་ལུས་འབྲུ་དྲུག་སེར་བས་བཅོམ་པ་བཞིན༔ དཀོན་མཆོག་རྩ་གསུམ་སྲུང་མ་སྤྱི་དང་ནི༔ དབང་ཕྱུག་དྲེགས་པའི་ཚོགས་ཀྱིས་བརླག་པར་མཛོད༔ དབང་ཕྱུག་ལྷ་མགོན་བཀའ་སྲུང་དྲེགས་པའི་སྡེ༔ མ་ལུས་དཀར་པོ་དགེ་བའི་གྲོགས་སུ་བསྐུལ༔ ལྷ་དམག་དཀར་པོའི་དབུ་འཕང་མཐོ་བ་དང་༔ ལྷ་མིན་རྨ་ཕོབ་ཉམ་ཐག་ལས་མཛོད་ལ༔ སྐྱེ་འགྲོའི་སྡུག་བསྔལ་ཉེས་ཚོགས་ནད་མུག་མཚོན༔ མ་ལུས་བསྟན་དགྲ་མཐའ་མིའི་སྟེང་དུ་བཟློག༔ མུ་སྟེགས་ཀླ་ཀློའི་མཐའ་མི་ཧོར་ཕུ་དང་༔ ཀྱ་སོགས་བསྟན་དགྲ་མ་ལུས་སྡེ་དང་བཅས༔ འཆི་བདག་ལས་ཀྱི་གཤིན་རྗེའི་ཁ་རུ་བཟློག༔ ལུས་ཀྱི་ལྷ་ལ་རྫས་སྔགས་ཀྱིས་གཏོར་བས༔ མི་རྣམས་ཀུན་ལ་ནད་རིམས་སྣ་ཚོགས་དར༔ དེ་ཡང་བཀའ་སྲུང་དྲེགས་པའི་སྟོབས་ཀྱིས་བཟློག༔ མཆོག་གསུམ་སྐུ་གསུམ་རྩ་གསུམ་སྟོབས་ཀྱིས་བཟློག༔ ཆོས་ཉིད་རྣམ་པར་དག་པའི་སྟོབས་ཀྱིས་བཟློག༔ རྟེན་འབྲེལ་རྒྱུ་འབྲས་ཟབ་མོའི་སྟོབས་ཀྱིས་བཟློག༔ ཧཱུྃ་ཧྲཱིཿདབང་ཕྱུག་མ་ཧཱ་དཱེ་ཝ་ལྷ་ཆེན་པོ༔ ཁམས་གསུམ་སྣོད་བཅུད་ཀུན་གྱི་མེས་ཆེན་པོ༔ སྲིད་པ་ལེགས་ཉེས་ཀུན་གྱི་བྱེད་པ་པོ༔ ཐུགས་དམ་བསྐུལ་ལོ་བཟློག་པའི་ལས་མཛོད་ཅིག༔ ཁམས་གསུམ་གཡོ་འཁྲུག་སྲིད་པའི་སྡུག་བསྔལ་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ དགྲ་ཇག་ཆོམ་རྐུན་བསམ་ངན་སྦྱོར་རྩུབ་དང་༔ བཀའ་སྲུང་གཞི་བདག་ཕོ་གདོན་མོ་གདོན་དང་༔ ཀླུ་གདོན་ཆེ་འདྲེ་ཆུང་སྲི་གོད་སྲི་སོགས༔ གནོད་བྱེད་དགྲ་བགེགས་ལོག་པར་འདྲེན་པ་རྣམས༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ མི་ཡི་ན་ཚ་ཕྱུགས་ཀྱི་གོད་ཁ་དང་༔ ཞིང་གི་སད་སེར་ལོ་ནད་བཙའ་ཐན་དང་༔ མུ་གེ་འཁྲུགས་རྩོད་མི་མཐུན་ཕྱོགས་རྣམས་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཟ་འདྲེ་ཕུང་སྲི་འགོང་འདྲེ་བསེ་རག་དང་༔ སྔོན་གྱི་ལས་དང་འཕྲལ་རྐྱེན་ལས་གྱུར་པའི༔ འདྲེ་གདོན་གནོད་བྱེད་མ་ལུས་ཐམས་ཅད་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཧྲཱིཿདབང་ཕྱུག་མ་ཧཱ་དཱེ་ཝ་ལྷའི་བླ་མ༔ ཡུམ་མཆོག་ཨུ་མ་དཱེ་ཝི་མ་ཆེན་མོ༔ སྲིད་པ་མོ་རྒྱུད་ཡོངས་ཀྱི་དབང་ཕྱུག་མོ༔ ཁམས་གསུམ་གནས་རིགས་ཀུན་གྱི་ལེགས་ཉེས་བསྒྱུར༔ ཁྲོས་པའི་རྒྱལ་མོ་ཆེན་མོ་འཁོར་དང་བཅས༔ དམ་ཚིག་གཉན་པོས་བཟློག་པའི་ལས་བཅོལ་ལོ༔ ཁམས་གསུམ་གཡོ་འཁྲུག་སྲིད་པའི་སྡུག་བསྔལ་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ དགྲ་ཇག་ཆོམ་རྐུན་བསམ་ངན་སྦྱོར་རྩུབ་དང་༔ བཀའ་སྲུང་གཞི་བདག་ཕོ་གདོན་མོ་གདོན་དང་༔ ཀླུ་གདོན་ཆེ་འདྲེ་ཆུང་སྲི་གོད་སྲི་སོགས༔ གནོད་བྱེད་དགྲ་བགེགས་ལོག་པར་འདྲེན་པ་རྣམས༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ མི་ཡི་ན་ཚ་ཕྱུགས་ཀྱི་གོད་ཁ་དང་༔ ཞིང་གི་སད་སེར་ལོ་ནད་བཙའ་ཐན་པ༔ མུ་གེ་འཁྲུགས་རྩོད་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཟ་འདྲེ་ཕུང་སྲི་འགོང་འདྲེ་བསེ་རག་དང་༔ སྔོན་གྱི་ལས་དང་འཕྲལ་རྐྱེན་ལས་གྱུར་པའི༔ འདྲེ་གདོན་གནོད་བྱེད་མ་ལུས་ཐམས་ཅད་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཧྲཱིཿལྷ་ཆེན་ཚོགས་ཀྱི་བདག་པོ་དབང་ཆེན་དཔལ༔ སྣང་སྲིད་ལེགས་ཉེས་ཀུན་གྱི་བྱེད་པོ་ཆེ༔ དམ་ཚིག་གཉན་པོས་བཟློག་པའི་ལས་བཅོལ་ལོ༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་ལོག་འདྲེན་དང་༔ མི་ཕྱུགས་ནད་རིམས་བར་ཆད་རྐྱེན་གེགས་དང་༔ འཇིགས་དང་སྡུག་བསྔལ་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ དཔལ་མགོན་བདུན་ཅུ་རྩ་ལྔ་འཁོར་དང་བཅས༔ སངས་རྒྱས་བསྟན་སྲུང་དཀར་ཕྱོགས་སྐྱོང་བའི་ལྷ༔ དམ་ཚིག་གཉན་གྱིས་བཟློག་པའི་ལས་བཅོལ་ལོ༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་ལོག་འདྲེན་དང་༔ མི་ཕྱུགས་ནད་རིམས་བར་ཆད་རྐྱེན་གེགས་དང་༔ འཇིགས་དང་སྡུག་བསྔལ་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཡེ་ཤེས་འཇིག་རྟེན་བཀའ་སྲུང་གཉན་པོ་རྣམས༔ ལེགས་ཉེས་སྟངས་འཛིན་དམ་ཚིག་རྗེས་གཅོད་དཔལ༔ དམ་ཚིག་གཉན་གྱིས་བཟློག་པའི་ལས་བཅོལ་ལོ༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་ལོག་འདྲེན་དང་༔ མི་ཕྱུགས་ནད་རིམས་བར་ཆད་རྐྱེན་གེགས་དང་༔ འཇིགས་དང་སྡུག་བསྔལ་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཧཱུྃ་ཛཿབཀའ་ཡི་ལྷ་སྲིན་སྡེ་བརྒྱད་སྡེ་དང་དཔུང་༔ བསྟན་དགྲའི་སྲོག་གི་གཤེད་དུ་ལྷུན་གྱིས་གྲུབ༔ དམ་ཚིག་གཉན་གྱིས་བཟློག་པའི་ལས་བཅོལ་ལོ༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་ལོག་འདྲེན་དང་༔ མི་ཕྱུགས་ནད་རིམས་བར་ཆད་རྐྱེན་གེགས་དང་༔ འཇིགས་དང་སྡུག་བསྔལ་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ སྣང་སྲིད་ཡུལ་གཞི་སྐྱོང་བའི་གཞི་བདག་ཚོགས༔ རང་ཕྱོགས་སྐྱོང་ཞིང་དགྲ་ལ་རྒོལ་བར་བྱེད༔ དམ་ཚིག་གཉན་གྱིས་བཟློག་པའི་ལས་བཅོལ་ལོ༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་ལོག་འདྲེན་དང་༔ མི་ཕྱུགས་ནད་རིམས་བར་ཆད་རྐྱེན་གེགས་དང་༔ འཇིགས་དང་སྡུག་བསྔལ་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ མདོར་ན་ལྷ་ཆེན་དབང་ཕྱུག་ཆེན་པོ་ཡི༔ འཁོར་འབངས་བཀའ་སྡོད་དྲེགས་པའི་སྡེ་ཚོགས་རྣམས༔ མ་ཐོགས་མྱུར་དུ་སྐུར་བཞེངས་འདིར་གཤེགས་ཤིག༔ ཤ་ཁྲག་དམར་གྱི་གཏོར་མ་འདི་བཞེས་ལ༔ དགྲ་བགེགས་བཟློག་བསྒྱུར་དྲག་པོའི་ཕྲིན་ལས་མཛོད༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་ལོག་འདྲེན་དང་༔ མི་ཕྱུགས་ནད་རིམས་བར་ཆད་རྐྱེན་གེགས་དང་༔ འཇིགས་དང་སྡུག་བསྔལ་མི་མཐུན་ཕྱོགས་ངན་ཀུན༔ བསྟན་དགྲ་སྡེ་དང་བཅས་པའི་སྟེང་དུ་བཟློག༔ ཧཱུྃ༔ ཁམས་གསུམ་སྲིད་པའི་མེས་ཆེན་པོ༔ དབང་ཕྱུག་མ་ཧཱ་དཱེ་ཝ་ཡིས༔ དམར་གྱི་གཏོར་མ་འདི་བཞེས་ལ༔ སེམས་ཅན་ཀུན་གྱི་གནོད་འཚེ་བཟློག༔ སྣང་སྲིད་ལེགས་ཉེས་བྱེད་པ་མོ༔ ལྷ་མོ་ཨུ་མ་དཱེ་ཝི་ཡིས༔ དམར་གྱི་གཏོར་མ་འདི་བཞེས་ལ༔ སྣང་སྲིད་ཡོངས་ཀྱི་གནོད་འཚེ་བཟློག༔ འདོད་པ་ཁམས་ཀྱི་དབང་ཆེན་པོ༔ ལྷ་ཆེན་ག་ཎ་པ་ཏི་ཡིས༔ དམར་གྱི་གཏོར་མ་འདི་བཞེས་ལ༔ འདོད་ཁམས་ཡོངས་ཀྱི་གནོད་འཚེ་བཟློག༔ ལྷ་གཉན་ཀླུ་ཡི་དབང་ཆེན་པོ༔ དཔལ་མགོན་བདུན་ཅུ་རྩ་ལྔ་ཡིས༔ དམར་གྱི་གཏོར་མ་འདི་བཞེས་ལ༔ སྣོད་བཅུད་བརྟན་གཡོའི་གནོད་འཚེ་བཟློག༔ སྣང་སྲིད་ཁ་ལོ་བསྒྱུར་བའི་ལྷ༔ དྲེགས་པའི་སྡེ་དཔོན་འབངས་བཅས་ཀྱིས༔ དམར་གྱི་གཏོར་མ་འདི་བཞེས་ལ༔ དྲེགས་པ་ཡོངས་ཀྱི་གནོད་འཚེ་བཟློག༔ ལྷ་ཡི་དབང་པོ་བརྒྱ་བྱིན་དང་༔ དེ་འཁོར་ལྷ་དང་ལྷ་མོ་ཡིས༔ དམར་གྱི་གཏོར་མ་འདི་བཞེས་ལ༔ ལྷ་དང་ལྷ་མོའི་གནོད་འཚེ་བཟློག༔ ལྷ་མིན་དབང་པོ་ཐག་བཟང་རིས༔ ལྷ་མིན་ཕོ་མོ་འཁོར་དང་བཅས༔ དམར་གྱི་གཏོར་མ་འདི་བཞེས་ལ༔ ལྷ་མིན་ཡོངས་ཀྱི་གནོད་འཚེ་བཟློག༔ མི་ཡི་དབང་པོ་འཁོར་ལོས་སྒྱུར༔ དགྲ་ལྷ་ཡུལ་ལྷའི་ཚོགས་དང་བཅས༔ དམར་གྱི་གཏོར་མ་འདི་བཞེས་ལ༔ མི་རྣམས་ཡོངས་ཀྱི་གནོད་འཚེ་བཟློག༔ བྱོལ་སོང་དབང་པོ་སེང་རབ་བརྟན༔ དེ་འཁོར་ཡང་འཁོར་བཅས་རྣམས་ཀྱིས༔ དམར་གྱི་གཏོར་མ་འདི་བཞེས་ལ༔ བྱོལ་སོང་ཡོངས་ཀྱི་གནོད་འཚེ་བཟློག༔ ཡི་དྭགས་དབང་པོ་ཁ་འབར་མ༔ དེ་འཁོར་བྲན་འབངས་བཅས་རྣམས་ཀྱིས༔ དམར་གྱི་གཏོར་མ་འདི་བཞེས་ལ༔ ཡི་དྭགས་ཡོངས་ཀྱི་གནོད་འཚེ་བཟློག༔ དམྱལ་བའི་དབང་པོ་ཆོས་ཀྱི་རྒྱལ༔ དེ་འཁོར་གཤིན་རྗེའི་སྡེ་ཚོགས་ཀྱིས༔ དམར་གྱི་གཏོར་མ་འདི་བཞེས་ལ༔ དམྱལ་བ་ཡོངས་ཀྱི་གནོད་འཚེ་བཟློག༔ ལྷ་ཆེན་ཚངས་པ་དཀར་པོ་དང་༔ ལྷ་དམག་བྱེ་བ་བསམ་ཡས་ཀྱིས༔ དམར་གྱི་གཏོར་མ་འདི་བཞེས་ལ༔ དཀར་པོ་ལྷ་ཡི་གནོད་འཚེ་བཟློག༔ བཙན་རྒོད་ཡམས་ཤུད་སྲོག་བདུད་པོ༔ བཙན་དམག་བྱེ་བ་འབུམ་བཅས་ཀྱིས༔ དམར་གྱི་གཏོར་མ་འདི་བཞེས་ལ༔ དམར་པོ་བཙན་གྱི་གནོད་འཚེ་བཟློག༔ གཤིན་རྗེ་ཡ་མ་རཱ་ཙ་ནི༔ འཁོར་ཚོགས་དམག་དང་དཔུང་བཅས་ཀྱིས༔ དམར་གྱི་གཏོར་མ་འདི་བཞེས་ལ༔ འཆི་བདག་གཤིན་རྗེའི་གནོད་འཚེ་བཟློག༔ སྲོག་བདག་པེ་ཧར་རྒྱལ་པོ་དང་༔ དེ་འཁོར་ཡང་འཁོར་དཔུང་བཅས་ཀྱིས༔ དམར་གྱི་གཏོར་མ་འདི་བཞེས་ལ༔ སྲོག་བདག་རྒྱལ་པོའི་གནོད་འཚེ་བཟློག༔ མ་མོ་སྲིད་པའི་རྒྱལ་མོ་ཆེ༔ སྤྲུལ་པ་འབངས་འཁོར་བཅས་རྣམས་ཀྱིས༔ དམར་གྱི་གཏོར་མ་འདི་བཞེས་ལ༔ སྲིད་པ་མ་མོའི་གནོད་འཚེ་བཟློག༔ གནོད་སྦྱིན་ཀཱ་ལ་ཡཀྴ་ནི༔ རབ་འཇིགས་དྲེགས་པའི་འཁོར་གྱིས་བསྐོར༔ དམར་གྱི་གཏོར་མ་འདི་བཞེས་ལ༔ མི་སྲུན་གནོད་སྦྱིན་གནོད་འཚེ་བཟློག༔ བདུད་པོ་སྐོས་རྗེ་བྲང་དཀར་ནི༔ རབ་འཇིགས་དྲག་པོའི་འཁོར་དང་བཅས༔ དམར་གྱི་གཏོར་མ་འདི་བཞེས་ལ༔ ནག་པོ་བདུད་ཀྱི་གནོད་འཚེ་བཟློག༔ ཀླུ་བདུད་འཆི་བདག་མགོ་དགུ་པ༔ འཁོར་འབངས་སྣང་སྲིད་ཀླུ་ཡི་ཚོགས༔ དམར་གྱི་གཏོར་མ་འདི་བཞེས་ལ༔ གཏུམ་པོ་ཀླུ་ཡི་གནོད་འཚེ་བཟློག༔ དམ་ཅན་རྡོ་རྗེ་ལེགས་པ་སྐྱོངས༔ འཁོར་འབངས་སྡེ་རིགས་བཅས་རྣམས་ཀྱིས༔ དམར་གྱི་གཏོར་མ་འདི་བཞེས་ལ༔ འགོང་པོ་ཐེའུ་རང་གནོད་འཚེ་བཟློག༔ བགེགས་རྒྱལ་བི་ན་ཡ་ག་ཡི༔ འབངས་འཁོར་སྡེ་རིས་བཅས་རྣམས་ཀྱིས༔ དམར་གྱི་གཏོར་མ་འདི་བཞེས་ལ༔ བགེགས་རིགས་ཡོངས་ཀྱི་གནོད་འཚེ་བཟློག༔ ས་བདག་འཁོར་ལོས་སྒྱུར་བའི་རྒྱལ༔ གཉན་དང་ཡུལ་ལྷ་གཞི་བདག་ཚོགས༔ དམར་གྱི་གཏོར་མ་འདི་བཞེས་ལ༔ གཉན་དང་གཞི་བདག་གནོད་འཚེ་བཟློག༔ ལྷ་ཆེན་དགྲ་བླ་བཅུ་གསུམ་པོ༔ འགོ་ཞིང་སྐྱོབ་པའི་ལྷ་དང་བཅས༔ དམར་གྱི་གཏོར་མ་འདི་བཞེས་ལ༔ ལྷ་སྲུང་ཡོངས་ཀྱི་གནོད་འཚེ་བཟློག༔ ཧཱུྃ༔ ལྷ་ཆེན་སྤྲུལ་པའི་བཀའ་སྡོད་ཚོགས༔ དམར་གྱི་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ལ༔ གནོད་ཅིང་འཚེ་བར་བྱེད་པ་ཡི༔ བནྡྷེ་སྔགས་པའི་བྱད་ཁ་བཟློག༔ གཡུང་དྲུང་བོན་གྱི་བྱད་ཁ་བཟློག༔ མུ་སྟེགས་ནག་པོའི་མཐུ་ནུས་བཟློག༔ མཐའ་མི་ཀླ་ཀློའི་བྱད་ཁ་བཟློག༔ སྐྱེས་པ་ཕོ་ཡི་དམོད་བྱད་བཟློག༔ ཟ་མ་མོ་ཡི་དམོད་བྱད་བཟློག༔ བྱིས་པ་ཆུང་གི་དམོད་བྱད་བཟློག༔ ལེགས་པར་སྨོན་པའི་བྱད་ཁ་བཟློག༔ ངན་པར་སྨོན་པའི་བྱད་ཁ་བཟློག༔ ཕ་མ་སྤུན་ཟླའི་གེགས་སྲི་བཟློག༔ ནད་རིགས་བཞི་བརྒྱ་རྩ་བཞི་བཟློག༔ བགེགས་རིགས་སྟོང་ཕྲག་བརྒྱད་ཅུ་བཟློག༔ བྱིས་པའི་གདོན་ཆེན་བཅོ་ལྔ་བཟློག༔ ཟ་འདྲེ་ཕུང་སྲི་ཤི་སྲི་བཟློག༔ གྲོང་འདྲེ་ཡུལ་འདྲེ་ཐམས་ཅད་བཟློག༔ མི་ཡི་ན་ཚ་རིམས་ཡམས་བཟློག༔ ཕྱུགས་ཀྱི་གོད་ཁ་འགོང་གཤེད་བཟློག༔ མུ་གེ་བསེ་རག་བྱུར་འདྲེ་བཟློག༔ ཉེ་བ་ཡོངས་ཀྱི་ཉེ་འདྲེ་བཟློག༔ ཕུ་ནུ་ཡོངས་ཀྱི་རུས་འདྲེ་བཟློག༔ གྲི་ཁ་མཚོན་ཁ་ཐམས་ཅད་བཟློག༔ ལྟས་ངན་མཚན་ངན་རྨི་ངན་བཟློག༔ མོ་རྩིས་རྟེན་འབྲེལ་ངན་པ་བཟློག༔ དགྲ་ཇག་ཆོམ་རྐུན་ཐམས་ཅད་བཟློག༔ གཅན་གཟན་གདུག་པའི་ཟ་ཁ་བཟློག༔ གཟུགས་ཅན་སྐྱེ་འགྲོའི་རྒོལ་འཚེ་བཟློག༔ གཟུགས་མེད་ལྷ་འདྲེའི་རྒོལ་འཚེ་བཟློག༔ མི་མཐུན་མི་འདོད་ཕྱོགས་རྣམས་ཀུན༔ བསྟན་དགྲ་དམ་ཉམས་སྟེང་དུ་བཟློག༔ སྡང་བར་བྱེད་པའི་དགྲ་ལ་བཟློག༔ གནོད་པར་བྱེད་པའི་བགེགས་ལ་བཟློག༔ ཟ་བར་བྱེད་པའི་འདྲེ་ལ་བཟློག༔ ཕུང་བར་བྱེད་པའི་སྲི་ལ་བཟློག༔ བསླབ་སློབ་དམ་ཉམས་སྟེང་དུ་བཟློག༔ བྲན་གཡོག་ངོ་ལོག་སྟེང་དུ་བཟློག༔ དཀོན་མཆོག་གསུམ་གྱི་བདེན་པས་བཟློག༔ རྩ་གསུམ་རྒྱ་མཚོའི་མཐུ་ཡིས་བཟློག༔ བཀའ་སྲུང་དྲེགས་པའི་སྟོབས་ཀྱིས་བཟློག༔ ཆོས་ཉིད་རྣམ་དག་བདེན་པས་བཟློག༔ རྟེན་འབྲེལ་བསླུ་མེད་བདེན་པས་བཟློག༔ ཨོཾ་མ་ཧཱ་དཱེ་ཝ་སརྦ་ས་པ་རི་ཝཱ་ར་གནོད་བྱེད་སརྦ་ཤ་ཏྲུཾ་མཱ་ར་ཡ༔ བྷྱོ་བྷྱོ༔ བཟློག་བཟློག༔ དཀོན་མཆོག་རྩ་གསུམ་དཔང་བཙུགས་ཏེ༔ ལྷ་ཆེན་འཁོརབཅས་ཡིད་ལ་བྱས༔ སྤྲུལ་དང་ཡང་སྤྲུལ་དཔག་མེད་པས༔ བཟློག་འགྱུར་དྲག་པོའི་ལས་བྱེད་པར༔ བསམ་ཞིང་འདི་བརྗོད་ཉེས་ཚོགས་བཟློག༔ དགེ་ལེགས་ཡོན་ཏན་གོང་འཕེལ་བྱེད༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་བཀའ་ལོག་སྲོག་ལ་ཡ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་ནས་བཏོན་ཏེ་མི་ལོ་ཉེར་བཞིའི་བར་དུ་བཀའ་རྒྱ་བྱས་མཐར་སློབ་བུ་མཁྱེན་རབ་རྒྱ་མཚོས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པ་ཡང་དེ་ཉིད་དོ།།དགེའོ།།ལེགས་སོ།།སརྦ་མངྒ་ལཾ།།།།