TTDL-ZABTER-03-GA-012

Previous Text Back to Volume PageNext Text

Wylie title	zab gsang mkha' 'gro'i snying thig las: rta mgrin yang khros nag po'i bskang ba me tog rab rgyas:
Location	bdud 'joms gling pa zab gter Volume 3, Text 12, Pages 133-136 (Folios 1a1 to 2b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las rta mgrin yang khros nag po'i bskang ba me tog rab rgyas. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 133-136. Thimphu, Bhutan: Lama Kuenzang Wangdue, 2004.
Side notes	Recto: bskang ba   Verso: bdud 'joms rta mgrin yang khros
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mending Rituals - bskang chog
Cycle	ཁྲོ་རྒྱལ་ཁམས་གསུམ་རོལ་པ་རྟ་མགྲིན་ཡང་ཁྲོས་ནག་པོ་ (khro rgyal khams gsum rol pa rta mgrin yang khros nag po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rta mgrin nag po
Colophon	ཞེས་རང་སློབ་ཚེས་བཅུའི་མིང་གིས་བསྐུལ་ངོར།འོད་གསལ་རྫོགས་པ་ཆེན་པོ་ཀློང་ཡངས་ནམ་མཁའི་རྣལ་འབྱོར་པ་བདུད་འཇོམས་རྡོ་རྗེ་ཁྲོད་ལོད་རྩལ་གྱིས་མཁའ་འགྲོའི་བརྡ་རིས་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes rang slob tshes bcu'i ming gis bskul ngor/'od gsal rdzogs pa chen po klong yangs nam mkha'i rnal 'byor pa bdud 'joms rdo rje khrod lod rtsal gyis mkha' 'gro'i brda ris las zhal bshus te dag par phab pa'i yi ge pa ni phun tshogs bkra shis so/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ རྟ་མགྲིན་ཡང་ཁྲོས་ནག་པོའི་བསྐང་བ་མེ་ཏོག་རབ་རྒྱས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) མཆོད་རྫས་དངོས་སུ་འབྱོར་ཚོགས་ལ༔ སྔགས་དང་ཏིང་འཛིན་རླབས་ཀྱིས་བརླབ༔ རང་གཞན་སེམས་ཅན་མ་ལུས་པའི༔ སྡིག་ལྟུང་་དམ་ཉམས་བཤགས་སེམས་ཀྱིས༔ ཧཱུྃ་ཧྲཱིཿའོག་མིན་ཆོས་དབྱིངས་ཕོ་བྲང་ནས༔ ཀུན་བཟང་ཡབ་ཡུམ་ཐུགས་དམ་བསྐང་༔ མངོན་པར་དགའ་བའི་ཞིང་ཁམས་ནས༔ རྡོ་རྗེ་སེམས་དཔའི་ཐུགས་དམ་བསྐང་༔ ལྕང་ལོ་ཅན་གྱི་གནས་མཆོག་ནས༔ ཕྱག་ན་རྡོ་རྗེའི་ཐུགས་དམ་བསྐང་༔ གཞོན་ནུ་བུམ་སྐུའི་དཀྱིལ་འཁོར་ནས༔ དགའ་རབ་རྡོ་རྗེའི་ཐུགས་དམ་བསྐང་༔ འཕོ་བ་ཆེན་པོའི་གཞལ་ཡས་ནས༔ ཤྲཱི་སེང་ཧའི་ཐུགས་དམ་བསྐང་༔ ཟངས་མདོག་དཔལ་རིའི་རྩེ་མོ་ནས༔ པདྨ་འབྱུང་གནས་ཐུགས་དམ་བསྐང་༔ འཇའ་ལུས་སྒྱུ་མའི་སྐུ་བརྙེས་པ༔ ཡེ་ཤེས་མཚོ་རྒྱལ་ཐུགས་དམ་བསྐང་༔ སྐུ་གསུམ་དགོངས་པའི་ཀློང་ཆེན་རྡོལ༔ ཁྱེའུ་ཆུང་ལོ་ཙཱའི་ཐུགས་དམ་བསྐང་༔ ཟབ་གཏེར་སྒོ་འབྱེད་འགྲོ་བའི་མགོན༔ བདུད་འཇོམས་གླིང་པའི་ཐུགས་དམ་བསྐང་༔ སྣང་སྲིད་གཞིར་བཞེངས་དཀྱིལ་འཁོར་ནས༔ དྲིན་ཆེན་བླ་མའི་ཐུགས་དམ་བསྐང་༔ པདྨ་གསུང་གི་དཀྱིལ་འཁོར་ནས༔ ཡང་ཁྲོས་ནག་པོའི་ཐུགས་དམ་བསྐང་༔ སྣང་སྲིད་དུར་ཁྲོད་གཞལ་ཡས་ནས༔ ཁྲོས་མ་ནག་མོའི་ཐུགས་དམ་བསྐང་༔ སྐུ་ཡི་ངོ་བོ་ཡོངས་རྫོགས་དཔལ༔ འཇམ་དཔལ་ནག་པོའི་ཐུགས་དམ་བསྐང་༔ གསུང་གི་གསང་བ་འདུས་པའི་དཔལ༔ རྟ་མགྲིན་རྒྱལ་པོའི་ཐུགས་དམ་བསྐང་༔ ཐུགས་ཀྱི་ཡེ་ཤེས་ཡོངས་འདུས་དཔལ༔ རྡོ་རྗེ་གཏུམ་པོའི་ཐུགས་དམ་བསྐང༔ ཕྲིན་ལས་མངོན་སྤྱོད་མཛད་པའི་དཔལ༔ ཡེ་ཤེས་ཁྱུང་ཆེན་ཐུགས་དམ་བསྐང་༔ དུག་ལྔ་དབྱིངས་སྒྲོལ་ཡེ་ཤེས་སྐུ༔ རིགས་ལྔ་ཡབ་ཡུམ་ཐུགས་དམ་བསྐང་༔ ལས་བཞིའི་ཕྲིན་ལས་ཐོགས་མེད་བདག༔ སྒོ་མ་བཞི་ཡི་ཐུགས་དམ་བསྐང་༔ སྟེང་ཕྱོགས་ནམ་མཁའི་ཀློང་དཀྱིལ་ནས༔ གཟའ་བདུད་ཆེན་པོའི་ཐུགས་དམ་བསྐང་༔ ཧེ་ཆེན་དྷ་ནའི་དུར་ཁྲོད་ནས༔ གནོད་སྦྱིན་དམར་ནག་ཐུགས་དམ་བསྐང༔ བཀའ་དང་དམ་ཚིག་གཞལ་ཡས་ནས༔ དྲེགས་པ་སྡེ་བརྒྱད་ཐུགས་དམ་བསྐང་༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟའི་ཚོགས་ཀྱིས་བསྐང་༔ ཏ་ན་ག་ན་བདེ་ཆེན་པོ༔ སྣང་སྲིད་མ་ལུས་ཡོངས་ཀྱིས་བསྐང་༔ ཞལ་ཟས་ཚོགས་དང་སུ་ར་ཆང་༔ ཤ་ལྔ་བདུད་རྩི་རྣམ་ལྔས་བསྐང་༔ བདག་ལུས་ལོངས་སྤྱོད་བསྡུས་པའི་ཚོགས༔ རྩ་གསུམ་ཐུགས་དམ་བསྐང་ཕྱིར་འབུལ༔ བཞེས་ནས་མཆོག་གི་དངོས་གྲུབ་སྩོལ༔ ཡི་གེ་བརྒྱ་པ་ཅི་འགྲུབ་བཟླ༔ ཧཱུྃ༔ བླ་མ་ཡང་ཁྲོས་དབྱེར་མེད་དགོངས༔ ཁྱེད་ལ་ཕྱག་འཚལ་མཆོད་ཚོགས་འབུལ༔ བདག་གི་ཚེ་རབས་ཐམས་ཅད་དུ༔ གསང་སྔགས་ཐེག་ཆེན་སྒོར་ཞུགས་ནས༔ རྒྱལ་བའི་བཀའ་དང་བླ་མའི་ལུང་༔ ཇི་བཞིན་མ་སྤྱད་སློབ་དཔོན་སྨད༔ རྡོ་རྗེ་མཆེད་དང་ལྕམ་དྲལ་ལ༔ ལྟ་ལོག་ངན་སེམས་ངག་ཏུ་སྨྲས༔ བརྡེག་བཙོག་གནོད་པ་དངོས་སུ་སྤྱད༔ ལྷ་དང་དཀྱིལ་འཁོར་ཉམས་མ་གསལ༔ འཛབ་བཟླས་མ་དག་ཟུར་ཆག་ཉམས༔ གསང་བར་འོས་དང་གཉེར་གཏད་སྨྲས༔ གསང་བཅུ་བསྒྲགས་ཤིང་བླ་མ་བསླུས༔ རྩ་བའི་དམ་ཉམས་མཐོལ་ཞིང་བཤགས༔ སྤྱད་པར་བྱ་བའི་དམ་ཚིག་ལྔ༔ ཤེས་བྱ་ལྔ་དང་བསྒྲུབ་བྱ་ལྔ༔ མི་སྤངས་ལྔ་དང་དང་ལེན་ལྔ༔ ཡན་ལག་དམ་ཉམས་མཐོལ་ཞིང་བཤགས༔ བསྙེན་སྒྲུབ་ཏིང་འཛིན་དམ་གཡེལ་ཞིང་༔ ཉ་སྟོང་དུས་དྲུག་དུས་མཆོད་ཆག༔ ལེ་ལོ་གསོག་འཇོག་ཚོགས་སྤྱང་སྤྱད༔ ཕུད་ལྷག་ཉམས་ཤིང་ཁ་ཚར་ཤོར༔ ཚོར་དང་མ་ཚོར་རྐྱེན་དབང་གིས༔ སྒོ་གསུམ་བག་མེད་དམ་ཉམས་བཤགས༔ ཡིད་ཀྱི་དམ་ཉམས་ལྟ་བས་བཤགས༔ དེ་ཡང་ཀུན་གཞི་བྱང་ཆུབ་སེམས༔ ཡིན་པ་མེད་པའི་ལྟ་བ་རྟོགས༔ མིན་པ་མེད་པའི་དགོངས་ཉམས་ལོན༔ ཡིན་མིན་མེད་པའི་སྤྱོད་པ་རྟོགས༔ རེ་དོགས་མེད་པའི་བྱང་ཆུབ་སེམས༔ རྩ་བ་ཡན་ལག་ཐམས་ཅད་ཀྱི༔ ཆག་ཉམས་མ་བྱུང་མ་སྐྱེས་པ༔ བཤགས་བྱ་བཤགས་བྱེད་གཉིས་མེད་གྲོལ༔ དགེ་ཚོགས་ཀུན་ལ་རྗེས་ཡི་རང་༔ འགྲོ་བའི་དོན་དུ་ཆོས་འཁོར་བསྐོར༔ ཁྱེད་ཅག་མྱ་ངན་མི་འདའ་བཞུགས༔ དགེ་བ་མ་གྱུར་འགྲོ་ལ་བསྔོ༔ རྫོགས་པའི་བྱང་ཆུབ་མྱུར་ཐོབ་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ དྲང་སྲོང་གཟའ་བདུད་རྒྱལ་པོས་སྲུངས༔ གུ་ཧྱ༔ ཞེས་རང་སློབ་ཚེས་བཅུའི་མིང་གིས་བསྐུལ་ངོར།འོད་གསལ་རྫོགས་པ་ཆེན་པོ་ཀློང་ཡངས་ནམ་མཁའི་རྣལ་འབྱོར་པ་བདུད་འཇོམས་རྡོ་རྗེ་ཁྲོད་ལོད་རྩལ་གྱིས་མཁའ་འགྲོའི་བརྡ་རིས་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།