TTDL-ZABTER-03-GA-011

Previous Text Back to Volume PageNext Text

Wylie title	dag snang ye shes drwa ba las: rta mgrin yang khros nag po'i mchod phreng bdud rtsi'i sprin phung:
Location	bdud 'joms gling pa zab gter Volume 3, Text 11, Pages 127-131 (Folios 1a1 to 3a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las rta mgrin yang khros nag po'i mchod phreng bdud rtsi'i sprin phung. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 127-131. Thimphu, Bhutan: Lama Kuenzang Wangdue, 2004.
Side notes	Recto: mchod phreng   Verso: bdud 'joms rta mgrin yang khros
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Offering Substance Liturgies - mchod phreng
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Deity	rta mgrin nag po
Colophon	ཞེས་པ་འདི་ཡང་རིགས་སྲས་མཁྱེན་བརྩེའི་དབང་པོས་བསྐུལ་ངོར།ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།
	zhes pa 'di yang rigs sras mkhyen brtse'i dbang pos bskul ngor/khrag 'thung bdud 'joms rdo rjes dag snang ye shes drwa ba las bsgyur ba'o//dge'o//dge'o//dge'o//legs so//sarba mang+ga laM//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ རྟ་མགྲིན་ཡང་ཁྲོས་ནག་པོའི་མཆོད་ཕྲེང་བདུད་རྩིའི་སྤྲིན་ཕུང་བཞུགས་སོ༔ ན་མོ་གུ་རུ་དྷེ་ཝ་ཌཱ་ཀི་ནཱི་ཡེ༔ (བརྡ་ཡིག་) དང་པོ་ཉེར་སྤྱོད་འབུལ་བ་ལ༔ ཧཱུྃ༔ ཏིང་འཛིན་ནམ་མཁའ་མཛོད་ཀྱི་འཕྲུལ༔ མཆོད་ཡོན་དང་ནི་ཞབས་བསིལ་དང་༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སིལ་སྙན་རོལ་མོའི་ཚོགས༔ དབང་དྲག་རོལ་པའི་ཚོགས་ལ་འབུལ༔ བཞེས་ནས་མཆོག་གི་དངོས་གྲུབ་སྩོལ༔ ཨོཾ་བཛྲ་ཨརྒྷཾ་སོགས་ནས་ཤཔྡ་པྲ་ཏཱིཙྪ་སརྦ་པཱུ་ཛ་ཧོཿདེ་ནས་ནང་གི་མཆོད་པ་ལ༔ ཧཱུྃ༔ རང་བྱུང་ཡེ་ཤེས་རོལ་བའི་འཕྲུལ༔ གཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ འདོད་ཡོན་རང་བྱུང་མཆོད་པའི་སྤྲིན༔ དབང་དྲག་རོལ་པའི་ལྷ་ལ་འབུལ༔ བཞེས་ནས་དབང་དང་དངོས་གྲུབ་སྩོལ༔ ཨོཾ་ཨཱཿཧཱུྃ་རཱུ་པ་ཤབྡ་སོགས་ནས་སྤཪྴེ་པྲ་ཏིཙྪ་སརྦ་པཱུ་ཛ་ ཧོཿ དེ་ནས་གསང་མཆོད་ལ༔ དང་པོ་བདུད་རྩི་སྨན་མཆོད་ནི༔ ཨོཾ་ཨཱཿཧཱུྃ༔ བརྡལ་ཁྱབ་ཡངས་པའི་ཀ་པཱ་ལར༔ ཁམས་གསུམ་ཡིག་འབྲུ་གསུམ་གྱི་ངང་༔ སྐུ་གསུང་ཐུགས་ཀྱི་བདུད་རྩིར་ཞུ༔ བདེ་སྟོང་ཡེ་ཤེས་ནུས་བཅུད་ལྡན༔ ཧཱུྃ༔ རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་༔ གང་ཟག་སྙན་བརྒྱུད་ཤོག་སེར་ཚིག་བརྒྱུད་དང་༔ བཀའ་བབས་ལུང་བརྒྱུད་སྨོན་ལམ་གཏེར་བརྒྱུད་སོགས༔ རིག་འཛིན་རྩ་བརྒྱུད་བླ་མ་ཐམས་ཅད་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྒྱུད་སྡེ་བཞི་དྲུག་ཐེག་དགུར་འབྲེལ་བ་ཡི༔ ཡི་དམ་དཔའ་བོ་མཁའ་འགྲོ་སྤྱི་དང་ནི༔ ཁྱད་པར་རྟ་མགྲིན་ཡང་ཁྲོས་ཡབ་དང་ཡུམ༔ རིགས་བཞི་ཁྲག་འཐུང་ཡབ་ཡུམ་སྒོ་སྐྱོང་བཞི༔ སྤྲུལ་པ་ཡང་སྤྲུལ་སྒྱུ་འཕྲུལ་འཁོར་ལོ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ལས་མཁན་སྤྲུལ་པའི་ཁྱུང་ཆེན་རིགས་ལྔ་དང་༔ ཕག་ནག་མགོ་དགུ་སྡིག་ནག་མེ་དབལ་སོགས༔ མི་སྲུན་གདུག་པ་འདུལ་བའི་མཐུ་རྩལ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བཀའ་སྲུང་དབང་ཕྱུག་མ་ཧཱ་དཱེ་ཝ་དང་༔ གནོད་སྦྱིན་ཤན་དམར་གཟའ་བདུད་རཱ་ཧུ་ལ༔ དྲེགས་པ་དམ་ཅན་སྡེ་དགུ་འཁོར་དང་བཅས༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཞིང་བཅུའི་དགྲ་བགེགས་ཚར་གཅོད་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དེ་ནས་དངོས་གྲུབ་བླང་བ་ནི༔ ཨོཾ་ཨཱཿཧཱུྃ༔ སྟོང་ཉིད་དབྱིངས་ཀྱི་ཀ་པཱ་ལར༔ གསང་གསུམ་རྡོ་རྗེའི་དབང་དངོས་གྲུབ༔ ཡིག་འབྲུ་གསུམ་གྱི་རྣམ་པར་ཤར༔ རྡོ་རྗེ་སྙིང་པོའི་འོད་ཟེར་གྱིས༔ བླངས་ཏེ་གསང་གསུམ་འཁོར་ལོར་བསྟིམ༔ དབང་དང་དངོས་གྲུབ་མཆོག་ཐོབ་འགྱུར༔ རྩ་སྔགས་མཐར༔ ཀཱ་ཡ་སིདྡྷི་ཨོཾ༔ ཝཱཀ་སིདྡྷི་ཨཱཿཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱིཿདེ་ནས་རཀྟ་འབུལ་བ་ནི༔ ཧཱུྃ༔ ཆོས་དབྱིངས་དང་མཉམ་བྷནྡྷའི་སྣོད་མཆོག་ཏུ༔ འཁོར་བ་དབྱིངས་སྒྲོལ་རཀྟའི་རྒྱ་ཚོར་བསྐྱིལ༔ ཁྲོ་ཆེན་རྡོ་རྗེ་དབྱིངས་ཀྱིས་ཚོགས་ལ་འབུལ༔ བཞེས་ནས་འཁོར་བའི་འཁྲུལ་འཁོར་བཤིག་དུ་གསོལ༔ མ་ཧཱ་རཀྟ་ཁཱ་ཧི༔ དེ་ནས་གཏོར་མ་འབུལ་བ་ནི༔ ཧཱུྃ༔ བརྡལ་ཁྱབ་ཆོས་དབྱིངས་ཡངས་པའི་གཏོར་གཞོང་དུ༔ སྣང་སྲིད་གཞིར་བཞེངས་མ་ཧཱ་བ་ལིཾ་ཏ༔ འདོད་རྒུའི་ལོངས་སྤྱོད་སྣ་ཚོགས་རྒྱན་དུ་ཤར༔ དབང་དྲག་ཡང་ཁྲོས་དཀྱིལ་འཁོར་ལྷ་ལ་འབུལ༔ མ་ཧཱ་བ་ལིཾ་ཏ་ཁཱ་ཧི༔ དེ་ནས་ཁྱད་པར་མཆོད་པ་ལ༔ སྦྱོར་བའི་མཆོད་པ་ནི༔ ཧཱུྃ༔ སྣང་བ་ཐབས་ཀྱི་རང་བཞིན་དབང་དྲག་ལྷ༔ སྟོང་པ་ཡུམ་གྱི་རང་བཞིན་ཝཱ་ར་ཧི༔ སྙོམས་འཇུག་བདེ་སྟོང་བཅུད་ཀྱི་བྱང་ཆུབ་སེམས༔ དབང་དྲག་རོལ་པའི་དཀྱིལ་འཁོར་ལྷ་ལ་འབུལ༔ བདེ་སྟོང་དགའ་བཞིའི་ཡེ་ཤེས་དངོས་གྲུབ་སྩོལ༔ མ་ཧཱ་བོ་དྷི་ཙིཏྟ་སརྦ་པཱུ་ཛ་ ཧོཿ དེ་ནས་བསྒྲལ་བའི་མཆོད་པ་ནི༔ ཧཱུྃ༔ སྟོང་ཉིད་རྡོ་རྗེ་བཙུན་མོའི་མཁའ་དབྱིངས་སུ༔ ཐབས་མཆོག་ཧེ་རུའི་གཏུན་བུའི་སྟོབས་ཤུགས་ཀྱིས༔ བདག་ལྟའི་རཱུ་དྲ་ཕོ་མོ་ཕྱེ་མར་བཏུལ༔ ཤ་རི་ཁྲག་མཚོ་ཕུང་ཁམས་སྐྱེ་མཆེད་བཅས༔ མཉམ་ཉིད་རོལ་པ་ཆེན་པོའི་ཞལ་དུ་བསྟབ༔ འཁོར་བ་མྱང་འདས་ཆེན་པོར་ཆོམ་མཛོད་ལ༔ དྲག་པོ་མཐུ་ཡི་དངོས་གྲུབ་སྩལ་དུ་གསོལ༔ མ་ཧཱ་མཱཾ་ས་རཀྟ་ཙིཏྟ་ལ་ཁ་རཾ་ཁཱ་ཧི༔ དེ་ནས་བསྟོད་པ་ནི༔ ཧཱུྃ༔ འཁོར་འདས་ཡོངས་ལ་དབང་བསྒྱུར་ཆེ་བའི་མཆོག༔ བདག་ལྟའི་རཱུ་དྲ་འདུལ་ཕྱིར་སྐུར་སྣང་བ༔ གང་འདུལ་ཐབས་ཀྱིས་ཆོ་འཕྲུལ་སྣ་ཚོགས་སྟོན༔ དབང་དྲག་འབར་བའི་སྐུ་ལ་ཕྱག་འཚལ་བསྟོད༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རིགས་སྲས་མཁྱེན་བརྩེའི་དབང་པོས་བསྐུལ་ངོར།ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།། །། (བརྡ་ཡིག་) མདུན་བསྐྱེད་གསལ་བ་ནི༔ བདག་ཉིད་རྩ་བའི་དཀྱིལ་འཁོར་ལས༔ ཟླ་བ་ལས་ནི་ཆུ་ཟླ་བཞིན༔ རང་བྱུང་དཀྱིལ་འཁོར་ཆེན་པོར་སྤྲོས༔ དམ་ཚིག་ཡེ་ཤེས་དབྱེར་མེད་རྫོགས༔ ཧཱུྃ་ཧཱུྃ་ཧཱུྃ༔ ས་མ་ཡ༔ བདུད་འཇོམས་པས་སོ༔ བྷྲུྃ་བི་ཤྭ་བི་ཤུདྡྷེ་ཕཊ་ཛ༔ འཛབ་ཁང་དབྱེ་བའོ།། །།