TTDL-ZABTER-08-NYA-050

Previous Text Back to Volume PageNext Text

Wylie title	zab gsang mkha' 'gro'i snying thig las: gnod sbyin chen po shan pa dmar nag gi las byang gnam lcags gri gug khams gsum 'gugs byed dbang sdud rgyan gyi 'khor lo:
Location	bdud 'joms gling pa zab gter Volume 8, Text 50, Pages 457-464 (Folios 1a1 to 4b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las gnod sbyin chen po shan pa dmar nag gi las byang gnam lcags gri gug khams gsum 'gugs byed dbang sdud rgyan gyi 'khor lo. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 457-464. Thimphu, Bhutan: Lama Kuenzang Wangdue, 2004.
Side notes	Recto: las byang   Verso: bdud 'joms bka' srung shan pa
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Manual - las byang
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་མགུལ་ནས་བཏོན་ཏེ་མི་ལོ་ཉི་ཤུའི་བར་དུ་བཀའ་རྒྱ་བྱས་མཐར་རྟེན་འབྲེལ་དུས་ལ་བབ་ཚེ་རང་སློབ་དམ་པ་ཚོགས་མཆོག་རྡོ་རྗེས་བསྐུལ་ངོར་དག་པར་ཕབ་པའི་ཡི་གེ་པ་ནི་འཇིགས་མེད་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།།
	zhes pa 'di yang khrag 'thung bdud 'joms rdo rjes gser smad rnga la stag rtse'i mgul nas bton te mi lo nyi shu'i bar du bka' rgya byas mthar rten 'brel dus la bab tshe rang slob dam pa tshogs mchog rdo rjes bskul ngor dag par phab pa'i yi ge pa ni 'jigs med phun tshogs bkra shis so/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཆེན་པོ་ཤན་པ་དམར་ནག་གི་ལས་བྱང་གནམ་ལྕགས་གྲི་གུག་ཁམས་གསུམ་འགུགས་བྱེད་དབང་སྡུད་རྒྱན་གྱི་འཁོར་ལོ་བཞུགས་སོ༔

ཐྂ༎༔ (བརྡ་ཡིག་) ན་མོ་གུ་རུ་པདྨ་ཀ་ར་ཡེ༔ གནོད་སྦྱིན་ཆེན་པོ་ཤན་པ་དམར་ནག་གི༔ ལས་བྱང་གནམ་ལྕགས་གྲི་གུག་ཞེས་བྱ་འདི༔ ཉམས་སུ་ལེན་པའི་རྣལ་འབྱོར་དམ་པ་རྣམས༔ རབ་དབེན་གནས་སམ་དུར་ཁྲོད་ནགས་ཀྱི་ཁྲོད༔ དཀྱིལ་འཁོར་ལེགས་གྲུབ་གཏོར་མ་སྲོག་འཁོར་བཅས༔ ཚུལ་བཞིན་བསྒྲུབ་མཐར་ཡི་དམ་བསྒོམ་བཟླས་མཐར༔ བྱིན་རླབས་སྨོན་ལམ་བདེན་པའི་ཚིག་བརྗོད་ནས༔ ལྷ་བསྐྱེད་སྔོན་སོང་སྤྱན་འདྲེན་བྱ་བ་ནི༔ སྤོས་བསྲེགས་རོལ་མོ་འཁྲོལ་ཞིང་འདི་སྐད་དོ༔ ཧཱུྃ་ཀྵ༔ དད་པ་དང་ནི་དམ་ཚིག་གིས༔ བཀའ་སྲུང་གཉན་པོ་སྤྱན་འདྲེན་ནོ༔ ཧེ་ཆེན་བརྡལ་བའི་དུར་ཁྲོད་ནས༔ གནོད་སྦྱིན་ཆེན་པོ་གཤེགས་སུ་གསོལ༔ ཆགས་དང་བདེ་བའི་རྒྱས་འདེབས་མ༔ གསོད་བྱེད་དམར་མོ་གཤེགས་སུ་གསོལ༔ ནམ་མཁའི་གཟའ་སྐར་ཀུན་གྱི་གཙོ༔ ཁྱབ་འཇུག་ཆེན་པོ༴འོག་ཕྱོགས་ས་བདག་ཀླུ་ཡི་གཙོ༔ འཁོར་ལོ་བསྒྱུར་རྒྱལ་གཤེགས་སུ་གསོལ༔ དྲི་ཟའི་ཡུལ་ལ་མངའ་དབང་མཛད༔ སྟག་གི་གདོང་ཅན༴མེ་ལྷའི་ཡུལ་ལ་མངའ་དབང་མཛད༔ ནེ་ཙོའི་གདོང་ཅན༴གཤིན་རྗེའི་ཡུལ་ལ་མངའ་དབང་མཛད༔ གཟིག་གི་གདོག་ཅན༴སྲིན་པོའི་ཡུལ་ལ་མངའ་དབང་མཛད༔ རྨ་བྱའི་གདོང་ཅན༴ཆུ་ལྷའི་ཡུལ་ལ་མངའ་དབང་མཛད༔ དོམ་གྱི་གདོང་ཅན༴རླུང་ལྷའི་ཡུལ་ལ་མངའ་དབང་མཛད༔ ཤང་ཤང་གདོང་ཅན༴གནོད་སྦྱིན་ཡུལ་ལ་མངའ་དབང་མཛད༔ འབྲོང་གི་མགོ་ཅན༴དབང་ལྡན་ཡུལ་ལ་མངའ་དབང་མཛད༔ གསེར་མིག་གདོང་ཅན་གཤེགས་སུ་གསོལ༔ ཛཿདཀར་པོ་ལྷ་ཡི་སྡེ་དཔོན་མཆོག༔ ཚངས་པ་དཀར་པོ་གཤེགས་སུ་གསོལ༔ འཆི་བདག་གཤིན་རྗེའི་སྡེ་དཔོན་མཆོག༔ ཡ་མ་རཱ་ཛ༴སྲིད་པ་མ་མོའི་སྡེ་དཔོན་མཆོག༔ སྲིད་པའི་རྒྱལ་མོ༴ ནག་པོ་བདུད་ཀྱི་སྡེ་དཔོན་མཆོག༔ བསྐོས་རྗེ་བྲང་དཀར༴ དམར་པོ་བཙན་གྱི་སྡེ་དཔོན་མཆོག༔ ཡམ་ཤུད་དམར་པོ༴སྲོག་བདག་རྒྱལ་པོའི་སྡེ་དཔོན་མཆོག༔ པེ་ཧར་རྒྱལ་པོ༴མི་སྲུན་གནོད་སྦྱིན་སྡེ་དཔོན་མཆོག༔ ཀཱ་ལ་ཡཀྴ༴གཏུམ་པོ་ཀླུ་ཡི་སྡེ་དཔོན་མཆོག༔ ནཱ་ག་རཱ་ཛ༴བསྟན་ལ་གདུང་ཞིང་སྒྲུབ་ལ་བརྩེ༔ དྲེགས་པའི་འཁོར་ཚོགས་གཤེགས་སུ་གསོལ༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲིཿབཛྲ་ས་མ་ཡ་ཛ་ཛཿདེ་ནས་བཞུགས་སུ་གསོལ་བ་ནི༔ ཧཱུྃ༔ གསང་ཆེན་རོལ་པའི་དུར་ཁྲོད་འདིར༔ བསྟན་དགྲ་བསྒྲལ་བའི་ཁྲི་སྟེང་དུ༔ གནོད་སྦྱིན་ཤན་པ་འཁོར་དང་བཅས༔ བསྟན་པ་བསྲུང་ཕྱིར་བཞུགས་སུ་གསོལ༔ ཨེ་ཧེ་དམའ་རུ་རྩེ་ཛཿཧཱུྃ་བཾ་ཧོཿ ཏིཥྛ་བཛྲ་ས་མ་ཡ་སྟྭཾ༔ དེ་ནས་ཕྱག་འཚལ་བ་ནི༔ ཧཱུྃ༔ གསང་སྔགས་ཟབ་མོའི་རྟེན་འབྲེལ་གྱིས༔ མཐུ་ལས་གྲུབ་པའི་བསྟན་སྲུང་བ༔ སྒྱུ་འཕྲུལ་འཁོར་དང་བཅས་པ་ལ༔ བསྟན་པ་བསྲུང་ཕྱིར་གུས་ཕྱག་འཚལ༔ ན་མོ་པུ་རུ་ཤ་ཡ་ ཧོཿ དེ་ནས་མཆོད་པ་འབུལ་བ་ནི༔ ཧཱུྃ༔ གནོད་སྦྱིན་ཤན་པ་འཁོར་བཅས་ལ༔ ཕྱི་མཆོད་རིན་ཆེན་རྣམ་ལྔ་དང་༔ དར་ཟབ་གཅན་གཟན་སྤྱན་གཟིགས་དཀོར༔ ཉེར་སྤྱོད་བདུན་དང་འདོད་ཡོན་ལྔ༔ ནང་མཆོད་སྨན་རཀ་གཏོར་གསུམ་དང་༔ ལོངས་སྤྱོད་ཚོགས་ཀྱི་མཆོད་པ་འབུལ༔ ཁྱི་དམར་གཡག་དམར་རྟ་ལུག་དམར༔ ཁྱུང་ཆེན་རྨ་བྱ་དེ་ཕོ་དང་༔ སེང་གེ་གླང་ཆེན་རྔ་མོང་རྟ༔ འོམ་མདའ་རྒྱན་ལྡན་སྲོག་འཁོར་བཅས༔ མཆོད་དང་བརྟེན་པ་སྒྲུབ་རྫས་འབུལ༔ ཁྱི་དམར་སྙིང་དང་དགྲ་ཤ་ཁྲག༔ འབྲུ་སྣ་སྨན་སྤོས་མེ་ཏོག་རིགས༔ ཕྱེ་མར་བཤོས་སྐྱེམས་མདོས་དང་མདངས༔ འདོད་ཡོན་རྒྱན་གྱི་མཆོད་པ་འབུལ༔ མི་འབྲལ་བརྩེ་བས་བདག་སྐྱོངས་ལ༔ ཞི་རྒྱས་དབང་དྲག་ཕྲིན་ལས་སྒྲུབས༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་སརྦ་ས་པ་རི་ཝཱ་ར་ཨརྒྷཾ་པཱདྱཾ་སོགས་ནས་ཤཔྟ་རཱུ་པ་ཤཔྟ་གནྡྷེ་རཱ་ས་སྤཪྴེ་མཧཱ་སརྦ་པཉྩ་ཨ་མྲྀ་ཏ་རཀྟ་སརྦ་ག་ཎ་པཱུ་ཛ་ཧོཿ དེ་ནས་བསྟོད་པ་བྱ་བ་ནི༔ ཧཱུྃ༔ དབང་དྲག་རོལ་པའི་དུར་ཁྲོད་ནས༔ བཅོམ་ལྡན་པདྨ་ཧེ་རུ་ཀའི༔ མངོན་སྤྱོད་རོལ་པའི་སྐུར་སྟོན་པ༔ གནོད་སྦྱིན་ཤན་པ་ཆེན་པོར་བསྟོད༔ མི་ཟད་གཏེར་གྱི་འཕྲུལ་བསྒྱུར་ཚེ༔ རྣམ་ཐོས་བུ་དང་ཨ་པ་རས༔ འགྲོ་བའི་དབུལ་འཕོངས་འབྱོར་རྒུད་སྐྱོབས༔ གནོད་སྦྱིན་རྒྱལ་པོ་ཁྱོད་ལ་བསྟོད༔ ཁམས་གསུམ་དབང་དུ་བསྒྱུར་བའི་ཚེ༔ དབང་ཕྱུག་འདོད་རྒྱལ་ཚོགས་ཀྱི་བདག༔ ཁྱབ་འཇུག་མིག་དམར་འཁོར་ལོས་སྒྱུར༔ དབང་ཆེན་དཔལ་འབར་ཁྱོད་ལ་བསྟོད༔ རབ་འབྱམས་ཕྲིན་ལས་ཡོངས་བསྒྲུབ་ཚེ༔ དམར་ནག་མེ་ཡི་ཕུང་པོ་ཅན༔ ཀླུ་འདུལ་མེ་ཁྱུང་རླུང་གཤོག་བཅིབས༔ ཕྱག་བཞི་རལ་གྲི་གྲི་གུག་དང་༔ སྙིང་ཞགས་བྷནྡྷ་ཐོད་ཕྲེང་བསྣམས༔ དུར་ཁྲོད་ཆས་རྫོགས་བེར་དམར་གསོལ༔ དམར་སེར་རལ་པ་སྲིད་རྩེར་འཁྱིལ༔ སྤྱན་གསུམ་དམར་ཟླུམ་སྡང་མིག་གཡོ༔ ཞལ་གདངས་ལྗགས་འདྲིལ་མཆེ་བ་གཙིགས༔ སྨ་ར་སྨིན་མར་མེ་ཞགས་འཕྱོ༔ རིན་ཆེན་ནོར་བུའི་ཕྲེང་བ་གསོལ༔ ཁམས་གསུམ་མ་ལུས་དབང་བསྡུད་ཅིང་༔ སྲིད་པ་གསུམ་ལ་མངའ་དབང་བསྒྱུར༔ གནོད་སྦྱིན་ཤན་པ་ཁྱོད་ལ་བསྟོད༔ ཡུམ་མཆོག་གསོད་བྱེད་ཆེན་མོ་ནི༔ དབང་གི་ཕྲིན་ལས་མཛད་པའི་ཚེ༔ དགྱེས་ཆགས་བདེ་བའི་ཡབ་ལ་འཁྱུད༔ དྲག་པོའི་མངོན་སྤྱོད་མཛད་པའི་ཚེ༔ མེ་རྟ་ཆིབས་ཤིང་སྟོང་གསུམ་ཉུལ༔ མ་མོ་ཆེན་མོ་ཁྱོད་ལ་བསྟོད༔ འཇིགས་བྱེད་དྲག་ཤུལ་བདག་པོ་ཡི༔ སྤྲུལ་པའི་འཁོར་བརྒྱད་ལས་ལ་འགྱེད༔ ལྷ་སྲིན་སྡེ་བརྒྱད་བྲན་དུ་བཀོལ༔ སྣང་སྲིད་ལྷ་འདྲེ་འབངས་སུ་སྡུད༔ སྐད་ཅིག་སྟོང་གསུམ་རྩིས་ལ་འདེབས༔ དྲག་རྩལ་ནམ་མཁའི་ཐོག་ལས་ཆེ༔ མྱུར་མགྱོགས་བར་སྣང་གློག་ལས་མྱུར༔ ཆེ་བཙན་འཇིག་རྟེན་བདུན་ལས་འཕགས༔ གནོད་སྦྱིན་ཆེན་པོ་ཁྱོད་ལ་བསྟོད༔ ཁྱོད་བསྟེན་བསྒྲུབ་མཆོད་བྱས་པ་ཡིས༔ རྣལ་འབྱོར་བདག་ཅག་འཁོར་བཅས་ཀྱི༔ ཕྲིན་ལས་རབ་འབྱམས་ལྷུན་གྲུབ་ཅིང་༔ བཀྲ་ཤིས་དགེ་ལེགས་དཔལ་རྒྱས་མཛོད༔ ས་མ་ཡ༔ བཀའ་སྲུང་འདུས་པའི་བདག་ཉིད་དཔལ༔ མི་སྲུན་འཇིགས་བྱེད་དྲག་པོ་འདི༔ གང་གིས་བསྒྲུབ་པའི་སྐྱེས་བུ་རྣམས༔ བསོད་ནམས་དཔལ་རྒྱས་ལོངས་སྤྱོད་འཕེལ༔ དབང་བསྡུད་ཆེ་སྟེ་ཟིལ་གནོན་ལྡན༔ གཟུགས་ཅན་གཟུགས་མེད་དགྲ་བགེགས་ཀུན༔ བརྣག་པ་ཙམ་གྱིས་ངེས་པར་སྒྲོལ༔ སྙན་དང་གྲགས་པས་ས་སྟེང་ཁྱབ༔ དང་པོ་བསྙེན་ཅིང་བསྒྲུབ་པའི་ཚེ༔ བསྐྱེད་ཅིང་གསལ་བའི་གཟེར་གནད་དང་༔ སྐད་ཅིག་མི་འབྲལ་བཟླས་པའི་སྔགས༔ བར་མ་ཆད་པར་བྱེ་བ་བཟླས༔ གྲུབ་པའི་རྟགས་མཚན་ངེས་པར་འགྲུབ༔ བུད་མེད་ཡེ་ཤེས་མཚོ་རྒྱལ་ཁྱོད༔ བཀའ་འདི་བརྡ་ཡི་རིས་སུ་ཐོབ༔ མ་འོངས་བསྟན་དགྲའི་གཤེད་དུ་སྦས༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་མ་བཏང་རེམས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་མགུལ་ནས་བཏོན་ཏེ་མི་ལོ་ཉི་ཤུའི་བར་དུ་བཀའ་རྒྱ་བྱས་མཐར་རྟེན་འབྲེལ་དུས་ལ་བབ་ཚེ་རང་སློབ་དམ་པ་ཚོགས་མཆོག་རྡོ་རྗེས་བསྐུལ་ངོར་དག་པར་ཕབ་པའི་ཡི་གེ་པ་ནི་འཇིགས་མེད་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།། །།