TTDL-ZABTER-03-GA-026

Previous Text Back to Volume PageNext Text

Wylie title	zab gsang mkha' 'gro'i snying thig las: rta mgrin khams gsum rol pa yang khros ma hA kA la'i sreg blugs ye shes me lce:
Location	bdud 'joms gling pa zab gter Volume 3, Text 26, Pages 287-297 (Folios 1a1 to 6a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las rta mgrin khams gsum rol pa yang khros ma hA kA la'i sreg blugs ye shes me lce. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 287-297. Thimphu, Bhutan: Lama Kuenzang Wangdue, 2004.
Side notes	Recto: sreg blug   Verso: bdud 'joms rta mgrin yang khros
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Fire Offerings - sbyin sreg
Cycle	ཁྲོ་རྒྱལ་ཁམས་གསུམ་རོལ་པ་རྟ་མགྲིན་ཡང་ཁྲོས་ནག་པོ་ (khro rgyal khams gsum rol pa rta mgrin yang khros nag po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rta mgrin nag po
Colophon	ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེ་ཁམས་ཡུལ་རྡོ་རྗེ་བྲག་ནས་བཏོན་ཏེ་མི་ལོ་བཅུ་གསུམ་ལ་བཀའ་རྒྱ་བྱས་ནས་མཐར་སྨར་མདོ་དགའ་བ་འཁྱིལ་དུ་དག་པར་ཕབ་པའི་ཡི་གེའི་རིས་བྱེད་ཧོར་གྱི་བླ་མ་ཕུན་ཚོགས་བཀྲ་ཤིས་སོ། །ཇི་སྲིད་འཁོར་བའི་འཇིག་རྟེན་མ་སྟོང་བར། །དེ་སྲིད་དམ་པའི་ཆོས་འདི་མ་རྫོགས་སོ།།ཨྠིྀ།།དགེའོ། །དགེའོ། །དགེའོ །སརྦ་མངྒ་ལཾ།།
	zhes pa 'di yang sprang ma nus bdud 'joms rdo rje khams yul rdo rje brag nas bton te mi lo bcu gsum la bka' rgya byas nas mthar smar mdo dga' ba 'khyil du dag par phab pa'i yi ge'i ris byed hor gyi bla ma phun tshogs bkra shis so/ /ji srid 'khor ba'i 'jig rten ma stong bar/_/de srid dam pa'i chos 'di ma rdzogs so//a+thi+-i//dge'o/_/dge'o/_/dge'o_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ རྟ་མགྲིན་ཁམས་གསུམ་རོལ་པ་ཡང་ཁྲོས་མ་ཧཱ་ཀཱ་ལའི་སྲེག་བླུགས་ཡེ་ཤེས་མེ་ལྕེ་བཞུགས་སོ༔

ཐྂ༎༔ (བརྡ་ཡིག་)ན་མོ་གུ་རུ་པདྨ་ཀ་ར་ཡེ༔ ཡང་ཁྲོས་མ་ཧཱ་ཀཱ་ལ་ཡི༔ སྲེག་བླུགས་ཡེ་ཤེས་མེ་ལྕེ་འདི༔ ལག་ཏུ་ལེན་པའི་རིམ་པ་ནི༔ རྟ་མགྲིན་ནག་པོའི་རྣལ་འབྱོར་ལ༔ དགྲ་དང་གོད་ཡམས་གདོན་འབྱུང་ཚེ༔ རང་ཉིད་རྟ་མགྲིན་ནག་པོ་ཡི༔ སྒོམ་བཟླས་སྔོན་སོང་མདུན་བསྐྱེད་ལ༔ མེ་དལ་གྲུ་གསུམ་འབར་བའི་སྟེང་༔ དྲག་པོའི་རྩང་གིས་ཧོམ་ཁུང་བརྩིགས༔ འབུལ་རྫས་འབྲུ་སྣ་ལིངྒ་བསགས༔ མདུན་དུ་རྟ་མགྲིན་ནག་པོ་ཡི༔ ཁམས་གསུམ་རོལ་པའི་ཞལ་ཧོམ་དུ༔ གནོད་བྱེད་དགྲ་བགེགས་མ་ལུས་པ༔ བཀུག་སྟེ་རྐང་མཐིལ་སྐྱ་ལྷག་གི༔ མགོ་མཇུག་ལོག་ནས་སོང་བར་བསམ༔ མིང་བྱང་ལིངྒ་སྔགས་ཀྱིས་བསྟབ༔ ཉེར་སྤྱོད་འདོད་ཡོན་སྨན་གཏོར་རཀ༔ དམར་གཏོར་ཁྲག་གིས་བྱུགས་པའང་འབུལ༔ དེ་ལྟར་དམིགས་པ་གནད་དུ་གཅེས༔ ས་མ་ཡ༔ དེ་ནས་གཞུང་དུ་འཇུག་པ་ལ༔ སྐྱབས་སེམས་མཚམས་བཅད་སྔོན་སོང་ནས༔ དཀྱིལ་འཁོར་ཆེན་པོའི་བྱ་བ་ནི༔ སྔགས་ཀྱི་སྣང་སྲིད་དག་པར་སྦྱངས༔ རྩ་བའི་སྔགས་ནི་ལན་གསུམ་བརྗོད༔ མདུན་དུ་གྲུ་གསུམ་དམར་ནག་འབར་བའི་ཨེ་ཀློང་དྲེགས་པ་ཕོ་མོ་གཅལ་དུ་བཀྲམ་པའི་སྟེང་དུ༔ པདྨ་ཉི་མ་བམ་གྱི་སྟེང་དུ་ཧྲཱིཿཡིག་དམར་ནག་ལས་འོད་འཕྲོས་ཕྱོགས་བཅུའི་རྒྱལ་བ་རྣམས་ལ་མཉེས་མཆོད་ཕུལ༔ ཐུགས་རྗེ་བྱིན་རླབས་དབང་དང་དངོས་གྲུབ་ཐམས་ཅད་ཚུར་འདུས་ཧྲཱིཿལ་ཐིམ༔ མར་འཕྲོས་དགྲ་བགེགས་གདུག་པ་ཅན་ཐམས་ཅད་ཚར་བཅད༔ སེམས་ཅན་ཐམས་ཅད་ཀྱི་སྒྲིབ་པ་སྦྱངས༔ དེ་དག་གི་ནུས་མཐུ་ཐམས་ཅད་བསྡུས་ཏེ་ཧྲཱིཿལ་ཐིམ་པས་དེ་གནས་སུ་གྱུར་པ་ལས༔ བཅོམ་ལྡན་འདས་རྟ་མགྲིན་ཡང་ཁྲོས་ནག་པོ་ཞལ་གཅིག་ཕྱག་བཞི་ཞབས་གཉིས་སྡེ་བརྒྱད་དྲེགས་པ་ཕོ་མོའི་སྟེང་དུ་གྱད་ཀྱི་འདོར་སྟབས་སུ་བསྒྲད་པ༔ གཡས་ཀྱི་དང་པོས་རལ་གྲི་མེ་འབར་བ་ཀླད་ལ་བསྐོར་ཞིང་༔ འོག་མས་ལྕགས་ཀྱུས་ཁམས་གསུམ་འགུགས་པ༔ གཡོན་གྱི་དང་པོ་ཐོད་ཁྲག་དང་འོག་མས་སྦྲུལ་ཞགས་བསྣམས་ནས་ཁམས་གསུམ་ཁྲག་ཏུ་རོལ་ཞིང་སྣང་སྲིད་ཐམས་ཅད་རྟོག་མེད་མཉམ་པ་ཉིད་དུ་འཆིང་བར་བྱེད་པ༔ སྐུ་ལ་བེར་ནག་གསོལ་ཞིང་དུར་ཁྲོད་ཆས་བརྒྱད་ཀྱིས་བརྒྱན་པ་ཞལ་གདངས་ཤིང་ལྗགས་གློག་དམར་ལྟར་དུ་འདྲིལ་བ༔ མཆེ་བ་ཟླ་ལྟར་གཙིགས་ཤིང་སྨ་ར་དང་སྨིན་མ་མེ་ལྟར་འབར་ཞིང་མེ་ཡི་ཚྭ་ཚྭ་མགར་གྱི་ཚྭ་ཞགས་ལྟར་དུ་འཕྲོས་ནས་གནོད་བྱེད་ཐམས་ཅད་བསྲེགས་པ༔ སྤྱན་གསུམ་སྡང་མིག་ཏུ་གཡོ་ཞིང་སྤྱན་རྩ་ལས་གློག་སྟོང་འཁྱུགས་པས་གནོད་བྱེད་ཐམས་ཅད་བརྒྱལ་ཞིང་འབོགས་པ༔ ཁྲོ་གཉེར་ཆུ་ཡི་རླབས་བཞིན་འཁྲིགས་པས་སྲིད་གསུམ་སྔངས་ཤིང་འདར་བ༔ དབུ་སྐྲ་དམར་སེར་གྱེན་དུ་བརྫེས་ཤིང་སྤྱི་གཙུག་ཏུ་རྟ་མགོ་ལྗང་ཞུར་ལྷང་ལྷང་མཚེར་ནས་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ༔ ཡེ་ཤེས་ལྔ་དང་སྐུ་ལྔ་ལྷུན་གྱིས་གྲུབ་པའི་རང་གདངས་རིགས་བཞིའི་ཁྲག་འཐུང་ཁྲོས་མ་སྒོ་སྐྱོང་དང་བཅས་པ་ངོ་བོ་སོ་སོར་མི་གཞན་པ་ལས༔ རྣམ་པ་མ་འདྲེས་ཡོངས་རྫོགས་ཉི་མ་དག་འོད་ཟེར་བཞིན་དུ་རང་ཤར་རང་གསལ་ཆེན་པོའི་བདག་ཉིད་ཅན་དུ་གྱུར༔ དེ་དག་ཐམས་ཅད་ཡེ་ཤེས་ཀྱི་མེ་དཔུང་དམར་ནག་རབ་ཏུ་འབར་བའི་ཀློང་དུ་བཞུགས་པར་གསལ་བའི་སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་མཐིང་ནག་རྣམས་ལས་འོད་དང་འོད་ཟེར་རབ་ཏུ་འཕྲོས་པས་རྟ་མགྲིན་པདྨ་དབང་གི་དཀྱིལ་འཁོར་ལྷ་ཚོགས་ཐམས་ཅད་སྤྱན་དྲངས་ལ་བསྟིམ་མོ༔ རྩ་སྔགས་མཐར༔ བཛྲ་ས་མ་ཡ་ཛཿཛཿཧཱུྃ་བྃ་ཧོཿ ཧཱུྃ་ཧྲཱིཿབདེ་ཆེན་དབང་དྲག་རོལ་པའི་དཀྱིལ་འཁོར་ནས༔ ཆེ་བའི་ཆེ་མཆོག་པདྨ་ཡང་ཁྲོས་སྐུ༔ གསང་ཆེན་གསུང་གི་འཁོར་ལོ་ཡོངས་རྫོགས་ལྷ༔ མ་ལུས་སྐད་ཅིག་ཉིད་ལ་གཤེགས་སུ་གསོལ༔ ཧཱུྃ༔ དད་པ་དང་ནི་དམ་ཚིག་གཉན་པོ་ཡིས༔ རྟ་མགྲིན་ཡང་ཁྲོས་ལྷ་ཚོགས་སྤྱན་འདྲེན་ནོ༔ ཆོས་ཀྱི་དབྱིངས་ནས་སྐུར་བཞེངས་དུས་ལ་བབ༔ བདག་ཅག་རྗེས་སུ་བཟུང་ཕྱིར་གཤེགས་སུ་གསོལ༔ རྒྱལ་བསེན་སྲོག་བདག་འདུལ་ཕྱིར་གཤེགས་སུ་གསོལ༔ ལྷ་སྲིན་སྡེ་བརྒྱད་འདུལ་ཕྱིར་གཤེགས་སུ་གསོལ༔ གོད་འདྲེ་འགོང་སྲི་འདུལ་ཕྱིར་གཤེགས་སུ་གསོལ༔ མི་ནད་ཕྱུགས་ནད་འཇོམས་ཕྱིར་གཤེགས་སུ་གསོལ༔ བཛྲ་ཀྲོ་དྷ་ཧྱ་གྲཱི་ཝ་བཛྲ་ས་མ་ཡ་ཛཿཛཿདེ་ནས་བཞུགས་སུ་གསོལ་བ་ནི༔ ཧཱུྃ་ཧྲཱིཿམ་ཆགས་པདྨ་ཉི་ཟླའི་གདན་སྟེང་དུ༔ ཆེ་མཆོག་པདྨ་ཡང་ཁྲོས་ནག་པོ་ཆེ༔ དམ་ཚིག་ཡེ་ཤེས་གཉིས་མེད་རོ་གཅིག་རོལ༔ མཉམ་སྤྱོར་བདེ་བ་ཆེན་པོའི་ཏིང་འཛིན་བསྐྱེད༔ ཨོཾ་བཛྲ་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ན་མོ༔ སྲིད་གསུམ་གདུག་པ་མ་ལུས་འཇོམས་མཛད་པ༔ ཆེ་བའི་ཆེ་མཆོག་པདྨ་ཡང་ཁྲོས་སྐུ༔ གཉིས་མེད་འཁོར་གྱི་རོལ་པ་རྫོགས་པའི་ལྷར༔ གར་གྱི་ཉམས་འགྱུར་རོལ་པས་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོཿ དེ་ནས་མཆོད་པ་འབུལ་བ་ནི༔ ཧཱུྃ་ཧྲཱིཿ མེ་ཏོག་བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོས་སྲིད་པ་གསུམ་བཀང་ནས༔ རྟ་མགྲིན་ཡང་ཁྲོས་དཀྱིལ་འཁོར་ལྷ་ལ་འབུལ༔ དགྲ་བགེགས་ལོག་འདྲེན་མ་ལུས་ལྷག་མེད་རོལ༔ ཨརྒྷཾ་པཱདྱཾ་སོགས་ནསཤཔྡ་སརྦ་དགྲ་བགེགས་མཱ་ར་ཡ་ཛྭ་ལ་རཾ་ཁཱ་ཧི༔ ཧཱུྃ་ཧྲཱིཿགཟུགས་མཛེས་སྒྲ་སྙན་དྲི་ཞིམ་རོ་མངར་རེག༔ མི་ཟད་ཡེ་ཤེས་བདུད་རྩིར་བྱིན་རླབས་ནས༔ རྟ་མགྲིན་ཡང་ཁྲོས་ནག་པོའི་ཞལ་དུ་འབུལ༔ བརྣག་པའི་དགྲ་བགེགས་དཔུང་བཅས་ལྷག་མེད་རོལ༔ ཨོཾ་རཱུ་པ་ཤཔྡ་སོགས་སྤཪྴེ་ནྲྀ་ཏྲི་ཤ་ཏྲུཾ་མཱ་ར་ཡ་ཛྭ་ལ་རཾ་ཁཱ་ཧི༔ ཧཱུྃ་ཧྲཱིཿསྨན་གཏོར་རཀྟ་མཆོད་པའི་ཡོ་བྱད་སྤྲིན༔ མི་ཟད་རྒྱན་གྱི་འཁོར་ལོ་རབ་སྤེལ་ནས༔ རྟ་མགྲིན་ཡང་ཁྲོས་དཀྱིལ་འཁོར་ལྷ་ལ་འབུལ༔ བརྣག་པའི་དགྲ་བགེགས་མ་ལུས་ལྷག་མེད་རོལ༔ ཨོཾ་ཨཱཿསརྦ་པཉྩ་ཨ་མྲྀ་ཏ་རཀྟ་བ་ལིངྟ་ཁཱ་ཧི༔ ནྲྀ་ཏྲི་ཤ་ཏྲུཾ་མཱ་ར་ཡ་སརྦ་ཛྭ་ལ་རཾ་ཁཱ་ཧི༔ དེ་ནས་བསྟོད་པ་བྱ་བ་ནི༔ ཧཱུྃ་ཧྲཱིཿདུས་གསུམ་རྒྱལ་ཀུན་གསུང་གི་ངོ་བོ་ཉིད༔ ཆེ་བའི་ཆེ་མཆོག་པདྨ་དབང་གི་ལྷ༔ རབ་འཇིགས་རྔམས་བརྗིད་དྲག་པོའི་སྐུར་སྟོན་པ༔ རྟ་མགྲིན་ཡང་ཁྲོས་འཁོར་དང་བཅས་ལ་བསྟོད༔ ཁྱེད་ལ་བསྟོད་ཅིང་གུས་པས་གསོལ་འདེབས་ནི༔ མ་ཉེས་རང་སར་འདུག་པའི་རྣལ་འབྱོར་ལ༔ སྡང་བའི་དགྲ་བགེགས་མཁྱེན་བཞིན་མ་ཤོར་བར༔ དྲག་པོ་མེ་ཧོམ་འབར་བའི་ཞལ་དུ་བཞེས༔ རྗེས་ཤུལ་ལྷག་མ་ཙམ་ཡང་མེད་པར་མཛོད༔ དེ་ནས་བསྲེག་རྫས་ལིངྒ་མཉམ་པར་དགྲ་བགེགས་སུ་དམིགས་ནས་འབུལ་བ་ནི༔ བཅོམ་ལྡན་དཔལ་ཆེན་པདྨ་ཧེ་རུ་ཀ༔ རྟ་མགྲིན་ཡང་ཁྲོས་ནག་པོ་འཁོར་དང་བཅས༔ མ་གཡེལ་ཐུགས་དམ་གཉན་པོའི་དུས་ལ་བབ༔ བདག་ཅག་དཔོན་སློབ་མི་ནོར་འཁོར་བཅས་ལ༔ སྡང་བའི་དགྲ་དང་གནོད་པའི་བགེགས་ཚོགས་རྣམས༔ མ་ལུས་བསྒྲལ་ནས་ལྷག་མ་མ་ལུས་པར༔ འབུལ་རྫས་འདི་དང་གཉིས་སུ་མེད་པར་རོལ༔ དེ་ནས་འབུལ་བ་ནི༔ ཨོཾ་བཛྲ་ཀྲོ་དྷ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ དགྲ་བགེགས་གནོད་བྱེད་སརྦ་ཤ་ཏྲུཾ་མཱ་ར་ཡ་ཛྭ་ལ་རཾ་རཾ་ཁཱ་ཧི༔ ལན་བརྒྱ་སྟོང་སོགས་ཀྱིས་འབུལ་བའི་སྐབས་སུ༔ སྣང་སྲིད་ཁམས་ཀྱི་གནོད་བྱེད་དགྲ་བགེགས་ཐམས་ཅད་རྗེས་ཤུལ་ལྷག་མ་ཙམ་ཡང་མ་ལུས་པར་འབྲས་བུ་ཕུལ་གྱིས་བཅུས་པ་བཞིན་དུ་དགང་གཟར་གྱིས་བཅུས་ཏེ་པདྨ་དྲག་པོའི་ཞལ་ཧོམ་དུ་སིབ་སིབ་ཀྱིས་ཐིམ་པར་བསྒོམ་སྟེ་བཅུས་ཚུལ་བྱས་ཏེ་བསྟབ་བོ༔ མཐར་ཡང་རྣམ་ལྔ་འདོད་ཡོན་སྨན་གཏོར་རཀྟ་རྣམས་གོང་ལྟར་ཕུལ་ནས་བསྟོད་དོ༔ དེ་ནས་མེ་ཐུན་འགྱེད་ན་མཚམས་འདིར་བྱ༔ དེ་མིན་སྲེག་བླུགས་རྐྱང་པར་གཤེགས་གསོལ་འདི་ལྟར་བྱ༔ ཧཱུྃ༔ དབང་ཆེན་ཡང་ཁྲོས་དཀྱིལ་འཁོར་ལྷ༔ ཆོས་སྐུ་སྐྱེ་མེད་དབྱིངས་སུ་བསྡུ༔ དོན་ལ་ངོ་བོ་མཐའ་བྲལ་ཀློང་༔ ལྷ་དང་རང་སྣང་གཅིག་ཏུ་འདྲེས༔ ཨ་ཨཱཿཕཊ༔ དེ་ནས་མེ་ཡི་ཚ་ཟེར་འགྱེད་འདོད་ན༔ ཧཱུྃ༔ དབུས་ནས་ཡང་ཁྲོས་ནག་པོ་ལ༔ ཆོས་དབྱིངས་ཡེ་ཤེས་མེ་འབར་བས༔ གཏི་མུག་ལས་བྱུང་ལྷ་འདྲེ་གདོན༔ ནད་དང་སྡུག་བསྔལ་རྒྱུ་འབྲས་བཅས༔ མ་ལུས་རྗེས་ཤུལ་མེད་པར་རཾ༔ ཤར་ཕྱོགས་རྡོ་རྗེ་ཡང་ཁྲོས་ལ༔ མེ་ལོང་ཡེ་ཤེས་མེ་འབར་བས༔ ཞེ་སྡང་ལས་གྱུར་ནད་གདོན་བགེགས༔ སྡུག་བསྔལ་རྒྱུ་འབྲས་དང་བཅས་པ༔ ལྷག་མ་མེད་པར་ཛྭ་ལ་རཾ༔ ལྷོ་ཕྱོགས་རཏྣ་ཡང་ཁྲོས་ལ༔ མཉམ་ཉིད་ཡེ་ཤེས་མེ་འབར་བས༔ ང་རྒྱལ་ལས་བྱུང་ནད་གདོན་བགེགས༔ སྡུག་བསྔལ་རྒྱུ་འབྲས་དང་བཅས་པ༔ ལྷག་མ་མེད་པར་ཛྭ་ལ་རཾ༔ ནུབ་ནས་པདྨ་ཡང་ཁྲོས་ལ༔ སོར་རྟོག་ཡེ་ཤེས་མེ་འབར་བས༔ འདོད་ཆགས་ལས་བྱུང་ནད་གདོན་བགེགས༔ སྡུག་བསྔལ་རྒྱུ་འབྲས་དང་བཅས་པ༔ ལྷག་མ་མེད་པར་ཛྭ་ལ་རཾ༔ བྱང་ནས་ལས་ཀྱི་ཡང་ཁྲོས་ལ༔ བྱ་གྲུབ་ཡེ་ཤེས་མེ་འབར་བས༔ ཕྲག་དོག་ལས་བྱུང་ནད་གདོན་བགེགས༔ སྡུག་བསྔལ་རྒྱུ་འབྲས་དང་བཅས་པ༔ ལྷག་མ་མེད་པར་ཛྭ་ལ་རཾ༔ ཕྱོགས་བཞི་ཕྲིན་ལས་ལས་ཀྱི་སྒོར༔ ཡེ་ཤེས་སྒོ་མ་རྣམ་བཞི་ལ༔ ཚད་མེད་བཞི་ཡི་མེ་འབར་བས༔ སྐྱེ་གནས་བཞི་ལས་སྐྱེས་པ་ཡི༔ གདོན་བགེགས་མི་མཐུན་ཕྱོགས་རྣམས་ཀུན༔ ལྷག་མ་མེད་པར་ཛྭ་ལ་རཾ༔ ཨོཾ་ཧྲཱིཿབཛྲ་ཀྲོ་དྷ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ དུ་ཏྲི་རཱུ་དྲ་སརྦ་ཤ་ཏྲུཾ་མཱ་ར་ཡ་སོད་རཾ་རཾ༔ རྦད་རཾ་རཾ༔ ཐུཾ་རི་ལི་ལི་རཾ་རཾ༔ ཨེ་ཧུར་ཐུཾ་ཛྭ་ལ་རཾ་རཾ༔ ཛྭ་ལ་རཾ་རཾ༔ ཧཱུྃ་བཞིའི་སྔགས་བརྗོད་མེ་ཐུན་བརྒྱབ༔ སྣང་སྲིད་ཀྱི་ཁམས་ཐམས་ཅད་རྟ་མགྲིན་རིགས་ལྔའི་མེའི་དབལ་གྱིས་ཁྱབ་ནས་གནོད་བྱེད་ནད་གདོན་བར་ཆད་ཐམས་ཅད་བྱ་སྒྲོ་མེ་ལ་བསྲེགས་པ་ལྟར་གཞོམ་པར་བསམ་མོ༔ མཐར་བསྡུ་རིམ་རྗེས་ཀྱི་སྤྱོད་པ་ཐམས་ཅད་རྫོགས་པར་བྱའོ༔ སྲུང་འཁོར་ཡང་བསྒོམ༔ འདི་ནི་རྣལ་འབྱོར་དམ་པའི་ལམ༔ གོད་ཡམས་སྣ་ཚོགས་འབྱུང་དུས་དང་༔ རྟ་དྲེལ་ནད་སྣ་ལང་བ་དང་༔ འགོང་གཤེད་ཕྱུགས་ལ་གཟན་པ་དང་༔ མི་ལ་ནད་རིམས་གཉན་ལ་ཁ༔ ན་ཚ་རྒྱུན་དུ་བྱུང་བ་དང་༔ སྣ་ཚོགས་གདོན་གྱིས་ཉེས་པ་དང་༔ བྱད་ཕུར་རྦོད་གཏོང་འབྱུང་བའི་ཚེ༔ དམིགས་གནད་དེ་ལ་གཟིར་ནས་བྱ༔ རྣལ་འབྱོར་བསྐྱེད་རྫོགས་གདིང་ལྡན་ན༔ རྡོ་རྗེ་ཡིན་ཡང་འཇིག་པར་ནུས༔ འདི་ཡིས་མི་ཐུབ་གང་ཡང་མེད༔ བུད་མེད་ཡེ་ཤེས་མཚོ་རྒྱལ་ཁྱོད༔ གསང་བ་བརྡ་ཡི་རིས་སུ་ཐོབས༔ ཁམས་ཀྱི་རྡོ་རྗེ་བྲག་ལ་སྦོས༔ གནོད་སྦྱིན་ཤན་པ་དམར་ནག་དང་༔ ཞིང་སྐྱོང་གཟའ་བདུད་རྒྱལ་པོས་སྲུངས༔ དམ་ལྡན་བུ་ལ་བརྩེ་བས་སྐྱོངས༔ དམ་ཉམས་བྱུང་ན་དབང་པོ་སྣུབས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གཉན་རྒྱ༔ བརྡ་ཐིམ༔ ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེ་ཁམས་ཡུལ་རྡོ་རྗེ་བྲག་ནས་བཏོན་ཏེ་མི་ལོ་བཅུ་གསུམ་ལ་བཀའ་རྒྱ་བྱས་ནས་མཐར་སྨར་མདོ་དགའ་བ་འཁྱིལ་དུ་དག་པར་ཕབ་པའི་ཡི་གེའི་རིས་བྱེད་ཧོར་གྱི་བླ་མ་ཕུན་ཚོགས་བཀྲ་ཤིས་སོ། །ཇི་སྲིད་འཁོར་བའི་འཇིག་རྟེན་མ་སྟོང་བར། །དེ་སྲིད་དམ་པའི་ཆོས་འདི་མ་རྫོགས་སོ།།ཨྠིྀ།།དགེའོ། །དགེའོ། །དགེའོ །སརྦ་མངྒ་ལཾ།། །། ༈ མདུན་དུ་རྟ་མགྲིན་ནག་པོ་ཡི༔ ཁམས་གསུམ་རོལ་པའི་ཞལ་ཧོམ་དུ༔ གནོད་བྱེད་དགྲ་བགེགས་མ་ལུས་པ༔ བཀུག་སྟེ་རྐང་མཐིལ་སྐྱ་ལྷག་གིས༔ མགོ་མཇུག་ལོག་ནས་སོང་བར་བསམ༔ འགུགས་པ་སོགས་བརྗོད༔ སྲེག་བླུགས་ལས་སོ།། །།