TTDL-ZABTER-06-CHA-008

First text in volume.Last text in volume.

Wylie title	zab gsang mkha' 'gro'i snying thig las: bde gshegs gsang ba 'dus pa yi: bskang ba ye shes klong mdzod:
Location	bdud 'joms gling pa zab gter Volume 6, Text 8, Pages 103-105 (Folios 1a1 to 2a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bde gshegs gsang ba 'dus pa yi bskang ba ye shes klong mdzod. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: 103-105. Thimphu, Bhutan: Lama Kuenzang Wangdue, 2004.
Side notes	Recto: bskang ba   Verso: bdud 'joms bka' brgyad chu 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mending Rituals - bskang chog
Cycle	བཀའ་བརྒྱད་བདེ་གཤེགས་ཆུ་གཏེར་འདུས་པ་ (bka' brgyad bde gshegs chu gter 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་བསྐལ་བཟང་མདོ་སྔགས་བསྟན་རྒྱལ་གླིང་དུ་དག་པར་ཕབ་པའི་ཡི་གེ་པ་ནི་བསོད་ནམས་རབ་རྒྱས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang khrag 'thung bdud 'joms rdo rjes gter nas bton te bskal bzang mdo sngags bstan rgyal gling du dag par phab pa'i yi ge pa ni bsod nams rab rgyas so/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བདེ་གཤེགས་གསང་བ་འདུས་པ་ཡི༔ བསྐང་བ་ཡེ་ཤེས་ཀློང་མཛོད་བཞུགས༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) བདེ་གཤེགས་གསང་བ་འདུས་པ་ཡི༔ སྒྲུབ་པ་ཉམས་སུ་ལེན་པ་ལ༔ བསྐང་བ་འདི་ནི་ཡང་ཟབ་མཆོག༔ དེ་ཕྱིར་ཟུངས་ཤིག་ཕྱི་རབས་རྣམས༔ ཧཱུྃ་ཧྲཱིཿ གཞི་དབྱིངས་གདོད་ནས་རྣམ་དག་ཞིང་༔ སྣང་བ་ཐམས་ཅད་འདོད་ཡོན་དཔལ༔ སྲིད་པ་རང་བྱུང་མཆོད་པའི་སྤྲིན༔ མི་ཟད་རྒྱན་གྱི་འཁོར་ལོར་ཤར༔ འོག་མིན་བདེ་བ་ཆེན་པོ་ནས༔ ཁྱབ་བདག་མགོན་པོའི་ཐུགས་དམ་བསྐང་༔ ལྷུན་གྲུབ་མ་འགགས་རོལ་པ་ལས༔ ཐུགས་རྗེའི་ཆེན་པོའི་ཐུགས་དམ་བསྐང་༔ གདུལ་བྱའི་དཔལ་མཚོར་ཆུ་ཟླའི་གར༔ པདྨ་འབྱུང་གནས་ཐུགས་དམ་བསྐང་༔ དཔལ་ཆེན་སྐུ་ཡི་གསང་རྫོགས་གར༔ མཉྫུ་མི་ཏྲའི་ཐུགས་དམ་བསྐང་༔ གསུང་གི་གསང་བ་རྫོགས་པའི་གར༔ ནཱ་གརྫུ་ནའི་ཐུགས་དམ་བསྐང་༔ ཐུགས་ཀྱི་གསང་བ་རྫོགས་པའི་གར༔ ཧཱུྃ་ཆེན་ཀཱ་རའི་ཐུགས་དམ་བསྐང་༔ ཡོན་ཏན་གསང་ཆེན་རྫོགས་པའི་གར༔ རྒྱལ་པོ་ཛཿཡི་ཐུགས་དམ་བསྐང་༔ ཕྲིན་ལས་གསང་ཆེན་རོལ་པའི་གར༔ པྲ་ཆེན་ཧསྟིའི་ཐུགས་དམ་བསྐང་༔ སྲིད་པའི་མ་མོ་དབང་བསྒྱུར་གར༔ དྷ་ན་སཾ་སྐྲྀའི་ཐུགས་དམ་བསྐང་༔ རིག་འཛིན་བླ་མ་ཡོངས་འདུས་གར༔ བི་མ་མི་ཏྲའི་ཐུགས་དམ་བསྐང་༔ འཇིག་རྟེན་དྲེགས་པ་འདུལ་བྱེད་གར༔ རམ་བུ་གུ་ཧྱའི་ཐུགས་དམ་བསྐང་༔ མངོན་སྤྱོད་ཐོགས་མེད་ལས་ཀྱི་གར༔ ཤཱནྟིཾ་གརྦྷའི་ཐུགས་དམ་བསྐང་༔ མདོ་སྔགས་བསྟན་པའི་བ་དན་བསྒྲེང་༔ རྗེ་འབངས་ཉེར་ལྔའི་ཐུགས་དམ་བསྐང་༔ གདུལ་དཀའ་འདུལ་མཛད་དཔའ་བོའི་སྐུ༔ དྲིན་ཆེན་བླ་མའི་ཐུགས་དམ་བསྐང་༔ བདེ་གཤེགས་སྐུ་ཡི་དཀྱིལ་འཁོར་ནས༔ འཇམ་དཔལ་ལྷ་ཚོགས་ཐུགས་དམ་བསྐང་༔ པདྨ་གསུང་གི་དཀྱིལ་འཁོར་ནས༔ རྟ་མགྲིན་ལྷ་ཚོགས་ཐུགས་དམ་བསྐང་༔ འཁྲུལ་མེད་ཐུགས་ཀྱི་དཀྱིལ་འཁོར་ནས༔ ཡང་དག་ལྷ་ཚོགས་ཐུགས་དམ་བསྐང་༔ ཡོན་ཏན་ལྷུན་གྲུབ་དཀྱིལ་འཁོར་ནས༔ ཆེ་མཆོག་ལྷ་ཚོགས་ཐུགས་དམ་བསྐང་༔ ཕྲིན་ལས་མངོན་སྤྱོད་དཀྱིལ་འཁོར་ནས༔ ཕུར་པའི་ལྷ་ཚོགས་ཐུགས་དམ་བསྐང་༔ རྦོད་གཏོང་རོལ་པའི་དཀྱིལ་འཁོར་ནས༔ མ་མོའི་ལྷ་ཚོགས་ཐུགས་དམ་བསྐང་༔ དབང་བྱིན་འབྱུང་བའི་དཀྱིལ་འཁོར་ནས༔ རིག་འཛིན་ལྷ་ཚོགས་ཐུགས་དམ་བསྐང་༔ འཇིག་རྟེན་མཆོད་བསྟོད་དཀྱིལ་འཁོར་ནས༔ དྲེགས་འདུལ་ལྷ་ཚོགས་ཐུགས་དམ་བསྐང་༔ དྲག་སྔགས་རོལ་པའི་དཀྱིལ་འཁོར་ནས༔ སྟོབས་ལྡན་ལྷ་ཚོགས་ཐུགས་དམ་བསྐང་༔ བསྟན་དང་བསྟན་འཛིན་སྡེ་སྐྱོང་ཕྱིར༔ དཔལ་གྱི་བཀའ་སྡོད་ཐུགས་དམ་བསྐང་༔ ཕྲིན་ལས་བཞི་སྒྲུབ་དངོས་གྲུབ་བདག༔ དྲེགས་པ་སྡེ་དགུའི་ཐུགས་དམ་བསྐང་༔ སོ་ཐར་བྱང་སེམས་གསང་སྔགས་ཀྱི༔ སྡོམ་དང་བསླབ་པ་དམ་ཚིག་ལས༔ འགལ་འཁྲུལ་ཉམས་ཆག་ཅི་མཆིས་པ༔ མི་འཆབ་མི་སྦེད་གནོང་འགྱོད་ཀྱིས༔ བཤགས་སོང་དག་ཅིང་ཚངས་པར་སྩོལ༔ ཨོཾ་བཛྲ་སཏྭ་ས་མ་ཡ༔ ཞེས་སོགས་ཡིག་བརྒྱ་ཅི་ནུས་བཟླ༔ ཉམས་ཆག་རྟོག་སྒྲིབ་བག་ཆགས་ཀུན༔ བསྐང་བཤགས་ཟབ་མོ་འདིས་གྲོལ་བྱེད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་བསྐལ་བཟང་མདོ་སྔགས་བསྟན་རྒྱལ་གླིང་དུ་དག་པར་ཕབ་པའི་ཡི་གེ་པ་ནི་བསོད་ནམས་རབ་རྒྱས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།