TTDL-ZABTER-09-TA-029

Previous Text Back to Volume PageNext Text

Wylie title	zab gsang mkha' 'gro'i snying thig las: chos skyong rgyal po chen po'i gsol mchod 'dod 'byung yid bzhin:
Location	bdud 'joms gling pa'i zab gter Volume 9, Text 29, Pages 209-210 (Folios 1a1 to 1b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las chos skyong rgyal po chen po'i gsol mchod 'dod 'byung yid bzhin. In Sprul pa'i gter chen bdud 'joms gling pa'i zab gter gsang ba'i chos sde, Vol. 9: 209-210. Thimphu, Bhutan: Lama Kuenzang Wangdue, 2004.
Side notes	Recto: gsol mchod   Verso: bdud 'joms bka' srung rnam sras
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Protector Rituals - gsol mchod
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་རིག་འཛིན་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ།།
	zhes pa 'di yang rig 'dzin bdud 'joms rdo rjes gter nas bton te dag par phab pa'i yi ge pa ni phun tshogs bkra shis so/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ཆོས་སྐྱོང་རྒྱལ་པོ་ཆེན་པོའི་གསོལ་མཆོད་འདོད་འབྱུང་ཡིད་བཞིན་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཆོས་སྐྱོང་རྒྱལ་པོ་ཆེན་པོ་ནི༔ སྒྲུབ་ཚེ་གསོལ་མཆོད་འདིར་བརྩོན་བྱ༔ མཆོད་རྫས་དཀར་གསུམ་མངར་གསུམ་དང་༔ ཆང་དང་གསེར་སྐྱེམས་བ་ལིཾ་ཏ༔ བདུད་རྩི་ཆེན་པོས་རབ་བྲན་ནས༔ ནམ་མཁའ་མཛོད་ཀྱི་སྔགས་རྒྱས་བརླབས༔ དགའ་ཞིང་སྤྲོ་དང་ཆགས་སེམས་ཀྱིས༔ བཻ༔ བྱང་ཕྱོགས་རིན་ཆེན་གཏེར་གྱི་གཞལ་ཡས་ཁང་༔ ཁང་བཟང་དམ་པ་གཏེར་གྱི་རྒྱལ་མཚན་ནས༔ རྒྱལ་ཆེན་རྣམ་སྲས་ཡབ་ཡུམ་བཀའ་འཁོར་བཅས༔ དད་པ་དང་ནི་དམ་ཚིག་གཉན་གྱིས་འབོད༔ མ་ཐོགས་མྱུར་དུ་འདིར་གཤེགས་བརྟན་བཞུགས་ནས༔ འདོད་རྒུའི་དཔལ་ཡོན་སྟེར་བའི་དཔལ་དུ་རོལ༔ དངོས་སུ་འབྱོར་དང་ཡིད་ཀྱིས་སྤྲུལ་པ་ཡི༔ འདོད་ཡོན་མི་ཟད་རྒྱན་གྱི་འཁོར་ལོའི་ཚོགས༔ ཆོས་སྐྱོང་རྒྱལ་ཆེན་རྣམ་སྲས་འཁོར་དང་བཅས༔ གསོལ་ལོ་མཆོད་དོ་བཞེས་ཏེ་དགྱེས་དགོངས་མཛོད༔ དཔག་བསམ་ཤིང་དང་བདུད་རྩིའི་རྒྱ་མཚོ་དང་༔ རིན་ཆེན་དར་ཟབ་སྨན་སྣ་འབྲུ་སྣ་དང༔ བཀྲ་ཤིས་རྫས་རྟགས་རྒྱལ་སྲིད་སྣ་བདུན་སོགས༔ འདོད་ཡོན་ལོངས་སྤྱོད་ནམ་མཁའི་མཛོད་ཆེན་པོ༔ གནོད་སྦྱིན་རྒྱལ་ཆེན་འཁོར་དང་བཅས་ལ་འབུལ༔ ཐུགས་རྗེས་འགྲོ་བའི་དོན་དུ་བཞེས་སུ་གསོལ༔ བདག་གི་ཡིད་ལ་འདོད་པའི་བྱེ་བྲག་ཀུན༔ འབད་མེད་ལྷུན་གྱིས་གྲུབ་པའི་དངོས་གྲུབ་སྩོལ༔ བཀའ་དང་དམ་ཚིག་གཉན་གྱིས་བསྙེན་བསྒྲུབ་བོ༔ དབྱེར་མེད་གྲོགས་མཛོད་བསམ་དོན་ལྷུན་གྲུབ་མཛོད༔ སྒྲུབ་པའི་བརྒྱུད་འཛིན་ཕོ་མོ་ཡིས༔ འདི་ལ་རྟག་ཏུ་འབད་ཅིང་བརྩོན༔ འདོད་རྒུ་ཡིད་བཞིན་འགྲུབ་པ་དང་༔ ཕྲིན་ལས་ཐམས་ཅད་ཐོགས་མེད་འགྲུབ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་རིག་འཛིན་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ།། །།