TTDL-ZABTER-08-NYA-061

Previous Text Back to Volume PageNext Text

Wylie title
Location	bdud 'joms gling pa zab gter Volume 8, Text 61, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་དམར་ནག་གི༔ སྨད་ལས་དགྲ་བགེགས་ཡོངས་སྒྲོལ་བཞུགས་སོ༔ བརྡ་ཡིག་༠༠༠༠༠༠༔ ན་མོ་གུ་རུ་པདྨ་ཀ་ར་ཡེ༔ བརྡ་ཡིག་༠༠༠༠༠༠༥༢༠༔ དྲག་པོ་སྔགས་ཀྱི་རྣལ་འབྱོར་པས༔ དགྲ་བགེགས་གདུག་པ་བསྒྲལ་འདོད་ན༔ དཀྱིལ་འཁོར་དབུས་སུ་ཨེ་ཁང་ནི༔ ཟུར་གསུམ་རིམ་པ་གསུམ་དུ་བྱས༔ འོག་མར་གྲི་ཁྲག་དུག་སྣས་བྱུགས༔ བར་མ་མཆོད་རྟེན་ཞིག་ས་དང་༔ ཕུང་ཤུལ་ས་དང་ཕུང་མཁར་ས༔ ཁྱི་ཁྲག་ཕག་ཁྲག་ར་ཡི་ཁྲག༔ བྱུག་ཅིང་བང་རིམ་སྟེང་མ་ལ༔ ཐུན་རྫས་ཁྱི་སྤྱང་བྲུན་དང་ནི༔ སྤོས་ཕྱེ་ལ་སོགས་འདག་པ་བྱུག༔ དེ་སྟེང་རྩང་གི་ར་བས་བསྐོར༔ མཐའ་མར་འཁོར་བརྒྱད་གཏོར་མས་བསྐོར༔ སྟེང་དུ་མཉྫི་ཁྲི་ཡི་ཁར༔ གནོད་སྦྱིན་ཆེན་པོའི་རྟེན་གཏོར་བཞག༔ དེ་ནས་དང་པོ་ཨེ་ཁང་བསྐྱེད་པ་ལ༔ ཧཱུྃ༔ རང་ཉིད་སྐད་ཅིག་གིས་ཡི་དམ་དྲག་པོ་ཧེ་རུ་ཀར་གསལ་བའི་མདུན་མཁར་གནོད་སྦྱིན་ཤན་པ་དམར་ནག་སྐུ་ཆེ་བརྗིད་རབ་ཏུ་འཇིགས་པ་བསྐལ་པའི་མེ་རླུང་འཚུབས་མའི་ཀློང་ན་བཞུགས་པའོ༔ དེ་ཡི་འོག་ཏུ་ཁྲུ་བདུན་གྱིས་དམའ་བའི་ས་རུ་ཨེ་ལས་གནམ་ལྕགས་ཀྱི་ཁང་སྒྲོམ་ནག་པོ་གྲུ་གསུམ་པ་ཁ་དོག་ལ་གཏིང་ཡངས་པ༔ གཏི་མུག་གི་མུན་ནག་འཐིབས་ཤིང་ཞེ་སྡང་གི་མེ་དཔུང་འབར་བ༔ ང་རྒྱལ་གྱི་བྲག་རི་རྙིལ་ཞིང་འདོད་ཆགས་ཀྱི་ཁྲག་མཚོ་འཁྱིལ་བ༔ ཕྲག་དོག་གི་རླུང་དམར་གཡོ་ཞིང་ནད་རིམས་དུག་གི་ན་བུན་འཐིབས་པ༔ མཚོན་ཐུན་སྣ་ཚོགས་ཀྱི་བུ་ཡུག་འཚུབས་ཤིང་གྲིབ་དང་གདོན་སྣ་ཚོགས་མུན་ལྟར་གཏིབས་པ་སྲུབ་དང་སྒོ་མེད་པའི་དབུས་སུ་ལིང་ག་དེ་ཉིད་ནྲྀཿལྗང་སྔོན་ཞིག་ཏུ་གྱུར་པ་ལས་འོད་ཟེར་འཕྲོས་པས་དགྲ་བོའི་བླ་སྲོག་རྣམ་པར་ཤེས་པ་རྡོ་ཁབ་ལེན་གྱིས་ལྕགས་ཕྱེ་རྔུབ་པ་བཞིན་དུ་འུབ་ཀྱིས་བསྡུས་ཏེ་ལིང་ག་ལ་ཐིམ་པས་གཉིས་སུ་མེད་པར་གྱུར༔ དེ་ཡོངས་སུ་གྱུར་པ་ལས་དགྲ་བོ་དེ་ཡི་གཟུགས་ཁམས་སྐྱེ་མཆེད་ཚང་བ༔ ཁ་ངུ་བ༔ མིག་ཤི་མིག༔ ལག་པ་མྱ་ངན་གྱི་ཕྱག་རྒྱ་ཅན༔ རྐང་ལག་ལྕགས་སུ་བཅུག་པ༔ མདོག་སྔོ་ཞིང་མདངས་ཉམས་པ༔ མགོན་སྐྱབས་ཀྱི་ལྷ་དང་བྲལ་ཏེ་འདར་ཕྲི་ལི་ལི་གནས་པར་གྱུར༔ བདག་ཡི་དམ་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་གནོད་སྦྱིན་ཤན་པ་དམར་ནག་འཁོར་དང་བཅས་པའི་ཐུགས་ཀར་ཕོག་པས་ཐུགས་དམ་གྱི་རྒྱུད་རབ་ཏུ་བསྐུལ་ནས་སྤྲུལ་པ་དང་ཡང་སྤྲུལ་དཔག་ཏུ་མེད་པ་འཕྲོས་པས་དགྲ་བོའི་བླ་སྲོག་རྣམ་པར་ཤེས་པ་བྱིའུ་ཆུང་ཁྲས་དེད་པ་ལྟར་བཀུག་སྟེ་ལིང་ག་ལ་ཐིམ་པས་གཉིས་སུ་མེད་པར་གྱུར༔ ཨེ་ཁང་དེ་ཡི་སྟེང་གི་ཕྱི་རིམ་འཁོར་ཡུག་ཏུ་ལས་མཁན་སྤྲུལ་པའི་འཁོར་བརྒྱད༔ བཀའ་སྡོད་ལྷ་སྲིན་སྡེ་བརྒྱད་སྤྲུལ་འཁོར་བྱེ་བ་འབུམ་སྡེའི་ཚོགས་ཀྱིས་དགྲ་བོའི་སྲོག་ལ་རྔམས་ཤིང་ཤ་ཁྲག་ལ་དགྱེས་པའི་ཚུལ་གྱིས་མཚོན་ཐུན་སྣ་ཚོགས་ཕྱར་ནས་བསྐོར་བར་བསྒོམ༔ དེ་ནས་འགུགས་གཞུག་འདི་ལ་འབད་པར་བྱའོ༔ ན་མོ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་ཚོགས་ཀྱི་བཀའ་བདེན་པ་དང་༔ ཆོས་ཉིད་རྣམ་པར་དག་ཅིང་རྒྱུ་འབྲས་བསླུ་བ་མེད་པའི་བདེན་པས་ཡིད་ལ་བརྣག་པའི་དགྲ་བོ་ཆེ་གེ་མོའི་བླ་སྲོག་རྣམ་པར་ཤེས་པ་གཟུགས་ལིང་ག་འདི་ལ་ཁུག་ཅིག༔ བསྟིམས་ཤིག༔ གཉིས་སུ་མེད་པར་གྱུར་ཅིག༔ ཅེས་ཐུན་རེ་ལ་བརྒྱ་རྩ་རེ་བརྗོད་མཐར༔ ལིང་ག་དང་དགྲ་བོའི་རྣམ་པར་ཤེས་པ་དབྱེར་མེད་དུ་འདྲེས༔ ནད་དང་དུག་དང་གྲིབ་རིགས་ཐམས་ཅད་འདུས་པའི་མུན་པ་ནག་པོས་བསྟུམ༔ ཐར་འཆོར་མེད་པའི་སྒོང་རྒྱུར་ཚུད་ནས་ཐིབས་ཀྱིས་བརྒྱལ་བར་བསམ༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་གྷྲཾ་བྷྱོ༔ ཤཾ་ར་བྷྱོ༔ པུ་རུ་ཛ༔ གྷྲིག་ཧ་ལ༔ གྷྲན་ཏ་ཡ༔ གྱིན་ཏ་ཡ་རྦད་སོད༔ པུ་རུ་སྙིང་རྩེ༔ ཨ་པ་ལམ་ཆེ་གེ་མོ་མཱ་ར་ཡ་སོད༔ རང་རྒྱུག་སྲོག་ལ་རྒྱུག༔ ཤ་ལ་རྔམས༔ དབུགས་ལ་འུབ༔ ཁྲག་ལ་འཇིབ༔ ཙིག་ཙིག༔ ཆེ་གེ་མོའི་སྲོག་ལ་ཡཾ་ཡཾ༔ སྐབས་འདིར་སུམ་བརྒྱ་རེ་བཟླའོ༔ དེ་ནས་རྦད་བསད་གང་གི་སྐབས་ཡིན་ཡང་དེ་ལ་འཇུག༔ ནམ་གྱི་སྲོད་ལ་ནན་དུ་བསྐུལ་མཐར་འགུགས་གཞུག་བྱས་ཏེ༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿམཿདུཿརུཿཙཿཤཿནཿས་མ་ཡ༔ ཆོ་ཆོ་རྒྱུག་རྒྱུག༔ དགྲ་བོ་ཆེ་གེ་མོའི་བླ་ཁུག་ཁུག་ཟུངས་ཟུངས་ཆོམས་ཆོམས་མཱ་ར་ཡ་ཆིངས་ནན༔ ཅེས་བརྒྱ་རྩ་བརྗོད༔ དགྲ་བོའི་བླ་དང་ལིང་ག་གཉིས་ཆུ་ལ་ཆུ་བཞག་པ་ལྟར་གཉིས་མེད་འདྲེས་ཤིང་དབྱེར་མི་ཕྱེད་པར་བསམ༔ བསད་པའི་དུས་སུ་བསད་རྟགས་སྟོན་བྱུང་ན་མི་བསད་མཚོན་གྱིས་ལིང་ག་ལ་བརྡེག་ཚུལ་བྱ་ཞིང་ཐུན་གྱིས་བྲབ་ལ༔ ཧཱུྃ༔ གནོད་སྦྱིན་ཆེན་པོའི་དུས་ལ་བབ༔ ཤན་པ་ཆེན་པོའི་དུས་ལ་བབ༔ དམར་མོ་མི་ཟན་དུས་ལ་བབ༔ སྲོག་བདུད་དམར་ནག་དུས་ལ་བབ༔ སྤྲུལ་འཁོར་བརྒྱད་ཀྱི་དུས་ལ་བབ༔ ལྷ་སྲིན་སྡེ་བརྒྱད་དུས་ལ་བབ༔ ཡང་འཁོར་བྱེ་བའི་དུས་ལ་བབ༔ དམ་ཉམས་དགྲ་བོ་ལས་ངན་འདི༔ ནད་རིམས་དུག་དང་གྲིབ་ཀྱིས་སོད༔ མཚོན་ཐུན་སྣ་ཚོགས་དབལ་གྱིས་ཐོབས༔ ལོ་ཟླར་འགྱངས་སུ་མ་ཤོར་བར༔ གློ་བུར་ཧུར་ཐུམ་ནད་ཀྱིས་སོད༔ བླ་སྲོག་དོན་སྙིང་ནང་རོལ་བཅས༔ ལྷག་མ་མེད་པར་ཧུབ་ཀྱིས་ཐོབས༔ རྗེས་ཤུལ་མེད་པར་ཇུར་མིད་ཐོང་༔ ཁྱོད་ཀྱི་དམ་ཚིག་དུས་ལ་བབ༔ མངོན་སྤྱོད་དྲག་པོའི་ཕྲིན་ལས་ཀྱིས༔ གཟིར་ཞིང་བསད་པའི་ཕྲིན་ལས་མཛོད༔ ཨེ་ཧེ་དམའ་རུ་རྩེ་ཆེ་གེ་ནྲྀཿཔཱ་ཤཾ་ཀུ་རུ་རྦད༔ སྙིང་ལ་ཐུམ་རིལ་ཙིཏྟ་རྦད༔ སྲོག་ལ་ཕྱག་ཆོད་རྦད༔ སོད་སོད་སྙིང་ཕྱུངས་སྲོག་རྩ་ལ་རྦད༔ ཐུམ་ནྲྀཿཆེ་གེ་སོད་སོད་རྦད༔ རྨ་རུ་རྩེ་ཆེ་གེའི་སྲོག་ལ་མཱ་ར་ཡ་རྦད་སོད༔ འདི་ཞག་གསུམ་ལ་བཟླས་ཤིང་༔ བདག་དང་གནོད་སྦྱིན་ཆེན་པོས་དགྲ་བོའི་ཚེ་སྲོག་བསོད་ནམས་བཀྲག་མདངས་དང་བཅས་པ་ཧུབ་ཀྱིས་འདེབས་པས་འུབ་ཀྱིས་རྔུབ་པར་ཡང་ཡང་བསམ་མོ༔ ཡང་བར་སྐབས་སུ༔ གནོད་སྦྱིན་ཤན་པ་ཆེན་པོའི་གྲི་གུག་གིས་དགྲ་བོའི་སྙིང་བཤག་པའི་ནང་ནས་སྲོག་གི་ངོ་བོ་རླུང་ཁྲག་ནྲྀཿཡིག་ཐམས་ཅད་ལྷག་མ་ཙམ་ཡང་མ་ལུས་པར་འུབ་ཀྱིས་རྔུབ་ཤིང་མྱག་མྱག་གསོལ་བར་བསམ༔ བསད་པ་ལ་མ་ཁུག་པའི་སྔ་ཐོག་ཏུ་ལྷ་དབྱེ་བའི་རྫས་རྣམས་ཀྱིས་བདུག་ཅིང་༔ འདི་ལྟར་ལྷ་དབྱེ་བྱ༔ ཧཱུྃ༔ ཕྱོགས་བཅུའི་དུས་གསུམ་བདེ་གཤེགས་རྣམས༔ བདག་གི་མགོན་སྐྱབས་དཔུང་ལ་བསྐུལ༔ ཡིད་ལ་བརྣག་པའི་དགྲ་བོ་འདི༔ མགོན་སྐྱབས་བྱེད་པའི་ལྷ་དང་ཕྲོལ༔ ཧཱུྃ༔ དབང་དྲག་འབར་བའི་དཀྱིལ་འཁོར་ནས༔ གནོད་སྦྱིན་ཆེན་པོའི་དུས་ལ་བབ༔ དམ་ཉམས་སྡང་བའི་དགྲ་བོ་འདི༔ མགོན་སྐྱབས་བྱེད་པའི་ལྷ་དང་ཕྲོལ༔ ལས་མཁན་སྤྲུལ་པའི་འཁོར་བརྒྱད་པོ༔ ཁྱེད་ཅག་ཐུགས་དམ་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ མགོན་སྐྱབས་བྱེད་པའི་ལྷ་དང་ཕྲོལ༔ བཀའ་འཁོར་ལྷ་སྲིན་སྡེ་བརྒྱད་ཚོགས༔ ཁྱེད་ཅག་དམ་ཚིག་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ མགོན་སྐྱབས་བྱེད་པའི་ལྷ་དང་ཕྲོལ༔ ཕུང་བར་བྱེད་པའི་སྲི་དང་སྤྲོད༔ ཟ་བར་བྱེད་པའི་འདྲེ་དང་སྤྲོད༔ ཀྱཻ༔ དགྲ་བོའི་ལྷ་དང་སྲུང་མ་རྣམས༔ མ་ལུས་བདག་གི་བཀའ་ལ་ཉོན༔ དམ་ཉམས་སྡིག་ཅན་དགྲ་བོ་འདིས༔ སངས་རྒྱས་བསྟན་པ་གཉན་པོ་བཤིག༔ དཀོན་མཆོག་གསུམ་གྱི་དབུ་འཕང་སྨད༔ རྣལ་འབྱོར་བདག་ལ་དོ་བསྡོ་བྱས༔ འདི་ནི་བསྒྲལ་བའི་ཞིང་ཡིན་པས༔ མགོན་དང་དཔུང་གཉེན་མ་བྱེད་ཅིག༔ སྐྱབས་དང་དཔུང་གྲོགས་མ་བྱེད་ཅིག༔ རྡོ་རྗེ་འཛིན་དང་པདྨ་འབྱུང་༔ རིག་འཛིན་བརྒྱུད་པའི་བཀའ་ཡིན་གྱིས༔ དགྲ་བོ་འདི་ཡི་སྲོག་རྩ་ཆོད༔ ད་ནི་མགོན་སྐྱབས་མ་བྱེད་ཅིག༔ གལ་ཏེ་སྐྱབས་མགོན་དཔུང་བྱེད་ན༔ རྡོ་རྗེ་འཛིན་ནས་བརྒྱུད་པ་ཡི༔ བླ་མ་རྣམས་ཀྱི་བཀའ་ཆད་ཀྱིས༔ ཁྱོད་ཀྱི་མགོ་འགས་སྙིང་བསྲེགས་ཏེ༔ རྡོ་རྗེ་དམྱལ་བའི་གནས་སུ་ལྟུང་༔ དེ་བས་བཀའ་ལས་མ་འདའ་བར༔ དགྲ་འདི་ང་ཡི་དབང་གྱིས་ལ༔ ཁྱོད་ཅག་མ་འདུག་ཕྱིར་དེངས་ཤིག༔ ཨོཾ་ཨཱཿཧཱུྃ༔ གུ་རུ་དྷེ་ཝ་ཌཱ་ཀི་ནཱི་ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿམཿདུཿརུཿཙཿཤཿནཿས་མ་ཡ༔ དགྲ་བོ་ལྷ་དང་ཕྱེས་ཕྱེས༔ ཨ་ནྲྀ་ཏྲག་རཀྴ་མཱ་ར་ཡ་ཕྱེས་ཕྱེས༔ མ་མ་ཏྲག་རཱུ་ཏྲ་མཱ་ར་ཡ་ཕྱེས་ཕྱེས༔ ཨ་ནྲྀ་ཏྲག་རཀྴ་མཱ་ར་ཡ་ཕྱེས་ཕྱེས༔ མ་མ་ཏྲག་རཱུ་ཏྲ་མཱ་ར་ཡ་ཕྱེས་ཕྱེས༔ དགྲ་བོའི་འགོ་བའི་ལྷ་སྲུང་ཐམས་ཅད་ཨུ་ཙ་ཏ་ཡ་ཕཊ༔ ཅེས་བཟླས༔ གཏོར་མ་འབྲུ་ཟན་འཆང་རྗེས་ཐུན་གྱིས་བྲབ་པས་དགྲ་བོའི་སྐྱོབ་བྱེད་ཀྱི་ལྷ་སྲུང་ཐམས་ཅད་ཀྱིས་དགྲ་བོ་དེ་བོར་ནས་རང་རང་གི་གནས་སུ་སོང་བར་བསམ་མོ༔ དེ་ནས་རྦད་བསད་ཀྱི་དུས་རྣམས་སུ༔ དགྲ་བོ་འགུགས་པའི་ལས་བྱེད་པ་ནི༔ ཧཱུྃ༔ རབ་འཇིགས་རྔམས་པའི་དུར་ཁྲོད་ནས༔ གནོད་སྦྱིན་ཤན་པ་ཆེན་པོ་ཡི༔ སྤྲུལ་པའི་ལས་མཁན་ཕོ་ཉར་འགྱེད༔ ལྷ་སྲིན་སྡེ་བརྒྱད་བྲན་དུ་བཀོལ༔ སྣང་སྲིད་ལྷ་འདྲེ་འབངས་སུ་སྡུད༔ ཁྱོད་ཀྱི་དམ་ཚིག་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ སྣང་སྲིད་ཁམས་འདིར་གར་གནས་ཀྱང་༔ བྱིའུ་ཆུང་ཁྲ་ཡིས་དེད་པ་བཞིན༔ ནམ་མཁའི་ཁམས་ནས་ཁུག་ལ་ཤོག༔ ཤོག་སྐྱ་རླུང་གིས་བསྐྱོད་པ་ལྟར༔ བར་སྣང་ཁམས་ནས་ཁུག་ལ་ཤོག༔ ཤ་ཁྱིས་རི་དྭགས་དེད་པ་བཞིན༔ ས་གཞིའི་ཁམས་ནས་ཁུག་ལ་ཤོག༔ ལོ་དང་ཟླ་བར་མ་འགྱང་བར༔ ད་ལྟ་ཉིད་དུ་ཁུག་ལ་ཤོག༔ གཟུགས་མིང་རཱུ་པ་འདི་ལ་ཁུག༔ གཉིས་སུ་མེད་པར་ཐིམ་པར་མཛོད༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿམཿདུཿརུཿཙཿཤཿནཿས་མ་ཡ༔ དགྲ་བོའི་བླ་ཚེ་སྲོག་གསུམ་ཁུག་ཛ༔ ཁུག་ཛ་ནན༔ ནྲྀ་ཨཾ་ཀུ་ཤ་ཡ་ཛ་ཛཿཐུན་དང་པོ་ལ་དེ་ལན་གསུམ༔ གཉིས་པ་ལ༔ ཧཱུྃ༔ དྲག་པོ་ཆེན་པོ་དྲག་ཤུལ་ཅན༔ གནོད་སྦྱིན་ཤན་པ་དམར་ནག་ཁྱོད༔ དམ་ཚིག་ཐུགས་དམ་དུས་ལ་བབ༔ བརྣག་པའི་དགྲ་བོ་བྱད་དུ་ཆུགས༔ སྤྲུལ་པ་ལས་ཀྱི་ཕོ་ཉ་ནི༔ ཕྱོགས་བཅུའི་སྡེ་དཔོན་ཆེན་པོ་དང་༔ འཁོར་ཚོགས་བྱེ་བ་འབུམ་སྡེའི་ཚོགས༔ དམ་ཚིག་ཐུགས་དམ་དུས་ལ་བབ༔ བརྣག་པའི་དགྲ་བོ་བྱད་དུ་ཆུགས༔ བཀའ་སྡོད་ལྷ་སྲིན་སྡེ་བརྒྱད་ཚོགས༔ འཁོར་དང་ཡང་འཁོར་གཡོག་ཡང་གཡོག༔ དམ་ཚིག་ཐུགས་དམ་དུས་ལ་བབ༔ བརྣག་པའི་དགྲ་བོ་བྱད་དུ་ཆུགས༔ མ་འགྱང་མ་བུལ་ལས་མ་གཡེལ༔ དུས་ལ་བབ་པོ་ས་མ་ཡ༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿམཿདུཿརུཿཙཿཤཿནཿས་མ་ཡ་དགྲ་བོ་མྱོག་མྱོག་རྨུག་རྨུག་ཐུམ་རི་ལི་ལི་མཱ་ར་ཡ་ཧུར་ཐུམ་རྦད༔ དེ་ནས་གསུམ་པ་ལ༔ ཧཱུྃ༔ དམར་ནག་རབ་འཇིགས་མི་སྲུན་པ༔ གནོད་སྦྱིན་དྲག་པོ་མཐུ་རྩལ་ཅན༔ ཁྱོད་ཀྱི་དམ་ཚིག་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ སྨྱོ་ཞིང་བརྒྱལ་ནས་རེངས་སུ་ཆུགས༔ ཧཱུྃ༔ གནོད་སྦྱིན་ཤན་པ་དམར་ནག་གི༔ སྤྲུལ་པའི་ལས་མཁན་ཆེན་པོ་བརྒྱད༔ འཁོར་ཚོགས་བྱེ་བ་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ སྨྱོ་འབོགས་བརྒྱལ་ནད་དྲག་པོས་ཐོབས༔ ཧཱུྃ༔ གནོད་སྦྱིན་ཤན་པ་ཆེན་པོ་ཡི༔ བཀའ་སྡོད་ལྷ་སྲིན་སྡེ་བརྒྱད་ཚོགས༔ དམ་ཚིག་ཐུགས་དམ་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ སྨྱོ་ཞིང་འབོག་བརྒྱལ་རེངས་སུ་ཆུགས༔ དམ་ལ་མ་འདའ་ས་མ་ཡ༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿཡཿདུཿརུཿཙཿཤཿནཿདགྲ་བོ་ཛྭ་ལ་པ་ཡ་ཛྭ་ལ་པ་ཡ་མཱ་ར་ཡ་རྦད་རྦད་སོད༔ ཐུན་བཞི་པ་ལ༔ ཧཱུྃ༔ དྲག་པོ་མི་སྲུན་སྲོག་ལེན་པ༔ གནོད་སྦྱིན་ཆེན་པོའི་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ ཐལ་བའི་རྡུལ་ཕྲན་བཞིན་དུ་རློགས༔ ཧཱུྃ༔ ལས་མཁན་སྤྲུལ་པའི་འཁོར་བརྒྱད་དང་༔ ཕྱོགས་བཅུའི་འབངས་འཁོར་བཅས་པ་རྣམས༔ དམ་ཚིག་ཐུགས་དམ་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ ཐལ་བའི་རྡུལ་དུ་བརླག་པར་མཛོད༔ བཀའ་སྡོད་དྲེགས་པ་སྡེ་བརྒྱད་ཚོགས༔ སྤྲུལ་འཁོར་ཡང་འཁོར་དུས་ལ་བབ༔ དམ་ཚིག་གཉན་པོའི་དུས་ལ་བབ༔ མངོན་སྤྱོད་དྲག་པོའི་ཕྲིན་ལས་ཀྱིས༔ ཡིད་ལ་བརྣག་པའི་དགྲ་བོ་འདི༔ དྲག་པོ་ཐུན་མཚོན་འཁྲུལ་འཁོར་གྱིས༔ རྡུལ་ཕྲན་བཞིན་དུ་ཕྱེ་མར་ཐུལ༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿམཿདུཿརུཿཙཿཤཿནཿས་མ་ཡ་ཨ་མུ་ཀ་མཱ་ར་ཡ་ཐུལ་ཐུལ་རྦད་རྦད་སོད་སོད་ཏ་ཐ་ཡ་ཏ་ཐ་ཡ་ཧཱུྃ་ཕཊ༔ བསད་པའི་སྐབས་སུ་དུས་བཞི་རུ༔ འདི་དག་སྦྱར་ནས་འབད་པ་ཡིན༔ འདི་ཉིད་ཉམས་སུ་ལེན་པའི་མི༔ དྲག་པོ་དམོད་པའི་ལས་འདི་ལ༔ བརྩོན་ནས་གནད་དུ་བསྣུན་གྱུར་ན༔ དགྲ་དཔུང་རྡོ་རྗེ་ཡིན་ཡང་འཇིག༔ མཐུ་ཡི་གྲགས་པས་ས་སྟེང་ཁྱབ༔ ཆེ་ཞིང་དྲེགས་པའི་དཔལ་ཡོན་ཐོབ༔ ཕྱོགས་རྣམས་ཀུན་ལས་ངེས་པར་རྒྱལ༔ འདི་ནི་ཤིན་ཏུ་ཟབ་ཅིང་གཉན༔ རབ་ཏུ་གཅེས་པའི་མན་ངག་བཅུད༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ལྡན་བརྒྱུད་འཛིན་བུ་སློབ་སྐྱོངས༔ དམ་ཉམས་ལོག་ལྟའི་དབང་པོ་སྣུབས༔ བཀའ་དང་ཐ་ཚིག་གཉན་པོའི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཁྲག་འཐུང་རྡོ་རྗེ་ཁྲོ་ལོད་ཀྱིས།།གསེར་སྨད་སྲིན་ལྗོངས་བྲག་རྡོ་རྗེ།།རྟ་མགྲིན་ཐུགས་ཀྱི་གནས་མཆོག་ནས།།གསང་གཏེར་གཉན་པོའི་སྒོ་ཕྱེས་ཚེ།།མན་ངག་ཡང་ཟབ་འདི་ཉིད་གཅེས།།ཤིན་ཏུ་གཉན་པས་ལོ་ཉི་ཤུར།།བཀའ་རྒྱས་བཏབ་ཅིང་མཐར་རྟེན་འབྲེལ།།དུས་བབ་ས་ཕོ་སྟག་གི་ལོར༔ མ་མོ་དཔལ་ལྡན་རེ་མ་ཏཱིས།།ཡང་ཡང་བསྐུལ་བས་དེ་ཕྱིར་ཕབ།།ཡི་གེ་རིག་པའི་རྡོ་རྗེས་བྲིས།།དགེའོ།།ཨྠིྀ།མངྒ་ལཾ།།།།