TTDL-ZABTER-14-PHA-037

Previous Text Back to Volume PageNext Text

Wylie title
Location	bdud 'joms gling pa zab gter Volume 14, Text 37, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༄༅།།གཉིད་འོད་གསལ་འདྲེས་པའི་དག་སྣང་ངོར།།སྨིན་མཚམས་སུ་ཐིག་ལེ་དམར་པོ་ཤར།།དེ་ཇེ་ཆེར་ཡངས་པའི་ཡུལ་ཞིག་སྣང་།།རྒྱུས་མ་ཤེས་བུད་མེད་ཞིག་ན་རེ།།འདི་དུར་ཁྲོད་རོ་མྱག་ཚལ་ཡིན་ཟེར།།དེར་ཡུན་ཅིག་དྲན་རྟོག་འགགས་པའི་མོད།།མཁར་གྲུ་གསུམ་ཐོད་པས་བརྩེགས་པ་མཐོང་།།སྔོན་བདག་གི་སྒྲུབ་ཁང་ཡིན་པར་ཤེས།།མཁར་དེ་ཡི་རྩེ་ན་བུད་མེད་ནི།།རྒྱན་རུས་པ་ཤ་ལྤགས་ལ་བྱས་ཤིང་།།འོད་དམར་པོ་རབ་འབར་གྲི་ཐོད་ཅན།།དེས་དགྱེས་ཆགས་བཞད་པས་བདག་ལ་གཟིགས།།བདག་དགའ་བདེའི་ཉམས་ཀྱིས་ཡུན་གཅིག་མྱོས།།དེའི་མོད་ལ་ཞུ་ཚིག་གླུ་རུ་བླངས།།ཀྱེ།ཨ་ལྕམ་རྒྱལ་མོ་བཞིན་ལེགས་མ།།ཡུལ་ཡངས་པ་ཆེན་པོ་ཀ་དག་ཀློང་།།ཐབས་བདེ་ཆེན་རིག་པའི་གཞོན་ནུ་ངས།།གྲོགས་ཤེས་རབ་སྟོང་ཉིད་མཛའ་ན་མོ།།ཉམས་བདེ་སྟོང་ཡེ་ཤེས་ཆེན་པོར་སྦྱོར།།ལྷ་སྐུ་གསུམ་རྒྱལ་བ་མ་ལུས་པ།།དོན་སྐྱེ་མེད་ཀློང་དུ་རོ་གཅིག་འདྲེས།།དེར་དགའ་བཞིའི་ཡེ་ཤེས་ཆེན་པོའི་སྟོབས།།བཅུད་བདེ་སྟོང་སྙིང་རྗེ་བྱང་ཆུབ་སེམས།།ལམ་དཀར་དམར་འདྲེས་པའི་ཐིག་ལེ་ནི།།སྐུ་ལུས་ཀྱི་བཀོད་པ་ལྷུན་རྫོགས་ལ།།ཡེ་ཤེས་ཀྱི་ལྷ་སྐུ་བཞེངས་གྱུར་གྱི།།དེའི་ཐུགས་རྗེའི་འོད་ཟེར་རབ་འབར་བས།།མ་འགྲོ་ཀུན་སྒྲོལ་ནས་གྲོལ་བར་བྱེད།།ད་ཕྱི་ཡི་སྦྱོར་བ་ཐབས་ཀྱི་ལམ།།ཡང་སྣོད་བཅུད་གཞི་རུ་སད་པ་ལས།།ཡེ་རིག་པ་སྐུ་གསུམ་ལྷུན་གྲུབ་ཕྱིར།།ལྷ་དྲན་རྫོགས་ཡབ་ཡུམ་སྙོམས་འཇུག་འབར།།ཞིང་ཕྱོགས་བཅུའི་རྒྱལ་བ་ཀུན་ནས་བསྟིམ།།མཁའ་ཀློང་དུ་དཀྱིལ་འཁོར་ཡོངས་གྲུབ་ཞིང་།།དེ་བདེ་དང་སྟོང་པའི་ཡེ་ཤེས་རོལ།།སླར་གཅིག་འདྲེས་བདེ་གཤེགས་ཡོངས་འདུས་པའི།།སྐུ་གསུང་ཐུགས་ཡོན་ཏན་ཕྲིན་ལས་ཀུན།།ཡོངས་རྫོགས་ཀྱི་སྤྲུལ་སྐུར་ལྷུན་གྱིས་གྲུབ།།ད་གསང་བ་ཡེ་ཤེས་སྦྱོར་བའི་ལམ།།དེ་རང་གཞན་གཉིས་སུ་མི་བལྟ་བར།།ཡེ་སྣང་སྟོང་མཉམ་སྦྱོར་རོལ་པ་ཡི།།གཤིས་བདེ་སྟོང་ཡེ་ཤེས་ལྷུན་རྫོགས་སུ།།ངོ་ཤེས་པར་རྟོགས་པའི་བརྟུལ་ཞུགས་ཀྱིས།།མྱང་འདས་ཀྱི་དབྱིངས་སུ་སྙོམས་པར་འཇུག།གཞི་འོད་གསལ་གྱི་ཞལ་རས་ལྷག་གེར་མཐོང་།།དེས་འཁོར་བའི་གཞི་རྩ་རང་སར་གྲོལ།།འདི་གསུམ་པོ་གཅིག་ལ་མི་བརྟེན་ན།།སེམས་འདོད་ཆགས་ཀྱི་རེག་བྱ་མྱོང་བ་ཀུན།།སྔགས་ཐབས་ཀྱི་ལམ་དུ་རེ་བ་འཁྲུལ།།མ་ཁྱེད་ཀྱི་དྲི་བའི་དོན་གཉེར་བ།།བརྡས་བསྐུལ་བ་སྤྲང་པོས་གླུ་རུ་གྱེར།།ང་རྒན་པོས་བུ་ལ་སྨྲ་རྒྱུའི་ཚིག།མ་ཡེ་ཤེས་མཁའ་འགྲོས་མཁྱེན་བཞིན་སྟོན།།།།བརྡ་ཡིག་༠༠༠༠༠༠༣༤༣༔ ཨེ་མ་ཧོཿགདོད་ནས་མ་བཅོས་སྤྲོས་བྲལ་ཆོས་ཀྱི་སྐུ༔ ལྷུན་གྲུབ་འདུས་མ་བྱས་པ་ལོངས་སྤྱོད་རྫོགས༔ ཐུགས་རྗེའི་རང་གཟུགས་སྤྲུལ་པ་ཆུ་ཟླའི་གར༔ སྐུ་གསུམ་ལྷུན་རྫོགས་པདྨ་རྒྱལ་པོས་སྐྱོངས༔ ཆོས་ཉིད་སྒྱུ་མར་རོལ་པའི་རིག་འཛིན་གྱི༔ སྣང་བ་བརྡ་དཔེར་ཤར་བའི་སྒྱུ་འཕྲུལ་ལས༔ རོལ་རྩལ་མཁའ་འགྲོའི་རྣམ་རོལ་ཅིར་ཡང་རྩེ༔ བདེན་མེད་རྫུན་མེད་སྒྱུ་མའི་དཔེ་རུ་འགྲན༔ དེ་ལས་དྭངས་མ་འོད་གསལ་སྣང་ཆ་ལ༔ རིག་རྩལ་ལུས་མེད་མཁའ་འགྲོ་དཔལ་འབར་མས༔ འཇའ་འོད་ཐིག་ལེའི་ཀློང་ནས་གླུ་འདི་ལེན༔ ཨེ་སྣང་སྲིད་འཁོར་འདས་དབྱེར་མེད་ཀྱི་རོལ་པར༔ ཀ་དག་གི་ནམ་མཁའ་བརྡལ་ཁྱབ་ཏུ་རྣམ་དག༔ ཆོས་ཉིད་ཀྱི་དབྱིངས་ལ་བདག་སྣང་ནི་མ་མཆིས༔ གཉིས་འཛིན་གྱི་ལྷར་སྣང་མིག་ཡོར་ལ་འགྲན་སོང་༔ མཁའ་འགྲོ་མ་ང་ཡང་རིག་རྩལ་གྱི་རོལ་པ༔ སྐྱེ་མེད་ཀྱི་མཁའ་ལ་འགགས་མེད་དུ་ཤར་འཕྱོ༔ མངོན་ཞེན་དང་ཡུལ་གོལ་ལོག་ལམ་ཞིག་ཨེ་ཡོང་༔ མངོན་ཤེས་དང་ལུང་བསྟན་ཉམས་བརྡལ་ཞིག་མིན་ན༔ མཁྱེན་བྱ་དང་མཁྱེན་བྱེད་མཁྱེན་ཡུལ་དེ་གཉིས་འཛིན༔ གོལ་ས་ལས་གྲོལ་བའི་ས་ཡིན་ལ་མ་འཁྲུལ༔ སངས་རྒྱས་ལ་གཞན་སྣང་བའི་གཉིས་འཛིན་ཞིག་མེད་ན༔ ཆགས་སྡང་དང་ཁེ་དྲག་ལོ་འདོད་ཀྱིས་ཕུང་བའི༔ བདུད་འབངས་ལ་མིག་བསླུས་ཆོ་འཕྲུལ་ནི་མང་ཡང་༔ ཚེ་འདི་ཡི་དོན་གཉེར་བྱ་བཞག་ཞིག་རེད་ན༔ འགྲོ་དོན་ནི་ལྟ་ཅི་ངན་སོང་གི་གཏིང་རྡོ༔ མཁའ་འགྲོ་མའི་བུ་རྣམས་ངེས་དོན་གྱི་རྣལ་འབྱོར༔ འདི་སྣང་གི་བྱ་བཞག་རྨི་སྣང་དང་མཚུངས་པས༔ རང་འདོད་ཀྱིས་གཞན་བསླུས་ཐབས་མཁས་ལ་མ་བརྩོན༔ ངེས་མེད་ཀྱི་རི་ལ་སྒྲུབ་ཚུགས་ཞིག་ཟུང་དང་༔ མཁའ་འགྲོ་ཡི་དངོས་གྲུབ་འབད་མེད་དུ་འབྱུང་འོང་༔ རྒྱལ་ཁམས་སུ་ཁྱི་བཞིན་ཉུལ་མོ་ལ་མ་ཞེན༔ འཇའ་ལུས་ཀྱི་རིག་འཛིན་གྲུབ་ཐོབ་ཀྱི་དམ་པ༔ མིག་བསླུ་ཡི་ལྷ་བདུད་ཆོ་འཕྲུལ་ལ་ཞེན་ན༔ ཕྲག་དོག་དང་མཁོན་འཛིན་སྒོ་བརྡུངས་སུ་སླེབ་སྲིད༔ དེ་ཕྱིར་ན་མ་ངའི་ངག་བཞིན་དུ་རེམ་མཛོད༔ མ་བཞེངས་དང་ཁྱོད་ལ་བུད་མེད་ཞིག་སྣང་ཐལ༔ ཞེས་པ་ལ་བདག་གིས་ཀྱང་གླུ་འདི་བླངས་སོ༔ ཨ་ཧོཿའོད་གསལ་གྱི་དབྱིངས་ལ་རྡུལ་བྲལ་གྱི་མཁའ་འགྲོ༔ ལྷན་སྐྱེས་ཀྱི་ཡེ་ཤེས་རང་ཞལ་དུ་མཇལ་བྱུང་༔ གཉིས་འཛིན་གྱིས་བསླུས་པས་གཉིས་སྣང་ལ་ཁ་འཁྱོལ༔ རྨི་ལམ་གྱི་ཡུལ་བདག་ལྟ་བུ་དང་མཚུངས་པའི༔ ཤེས་པ་ཡིས་བསྐྱེད་པའི་ཡུལ་སྣང་གི་ཆ་འདིར༔ ལེགས་ཉེས་ཀྱི་ཚུལ་ཞིག་རྒྱང་གླུ་རུ་སྲོང་མཛོད༔ ཅེས་སྨྲས༔ ཀྱེ༔ ཉོན་དང་སྐལ་བཟང་སྐྱེས་བུ་ལགས༔ སྔོན་ཚེ་ཨོ་རྒྱན་ཆེན་པོ་ཡིས༔ ལྷ་སྲིན་དམ་བཏགས་བསྟན་འགྲོ་བསྐྱངས༔ མཁན་སློབ་ཁྲི་གདུགས་ལྟ་བུ་ལ༔ ལོ་པཎ་སྐར་ཚོགས་ཙམ་གྱིས་བསྐོར༔ མུན་གླིང་ནག་པོ་ཉིན་མོར་བྱེད༔ དེ་ཚེ་དེ་ཡི་འགབ་འདྲེ་རུ༔ གཡུང་དྲུང་བོན་སྐྱེས་ཁྱུ་བཞིན་བྱུང་༔ བདུད་གཉེར་སེ་ཕུང་ནག་པོ་ཡིས༔ བསྟན་ལ་རྒོལ་བའི་སྨོན་ལམ་བཏབ༔ དམ་སྲི་སྤུན་བདུན་ཕོ་ཉར་མངག༔ དགེ་བའི་ལས་ལ་བར་ཆད་བརྩམ༔ དེ་ཡང་མཁན་སློབ་རྣམ་གཉིས་ཀྱིས༔ བྱང་ཕྱོགས་རྡོ་རིང་འོག་ཏུ་མནན༔ བདུད་ཀྱི་ཕོ་ཉ་རྣམ་གཉིས་མངག༔ དེ་ཡང་སྤྱི་དཔལ་འོག་ཏུ་མནན༔ བཙན་གྱི་ཕོ་ཉ་རྣམ་གསུམ་མངག༔ རྩང་བྲག་སླེ་བའི་འོག་ཏུ་མནན༔ རྒྱལ་པོ་ཕོ་ཉ་ཆེན་པོ་བཏང་༔ ལྷོ་བྱང་ནེ་མ་ཐང་དུ་མནན༔ ཀླུ་བདུད་ཕོ་ཉ་བཞི་ཡང་མངག༔ ཁྲིས་སྟེང་ལྷ་ཁང་འོག་ཏུ་མནན༔ སྲིན་མོ་སྟོབས་ལྡན་སྤུན་དགུར་མངག༔ དེ་ཡང་ཤོ་རི་ཉེ་བ་རུ༔ ཆུ་ཀླུ་བྲི་གུ་ཆེན་པོར་བཅུག༔ དེ་མཐར་སྔོན་གྱི་སྨོན་ལོག་མཐུས༔ བསྟན་འཛིན་སྐྱེས་བུ་འགའ་རེ་ཡང་༔ བསྟན་དང་འགྲོ་དོན་ལ་དགོངས་ནས༔ སོ་ནམ་ཁྱབ་པའི་ལས་སྣ་བདོག༔ བྱང་གི་རྡོ་རིང་འོག་ནས་གཅིག༔ བསམ་ཡས་སྣང་བརྙན་འོག་ནས་གཉིས༔ སྟེང་དུ་ཤོར་བས་གསུམ་བསྡུས་ནས༔ དབུས་གཙང་བོད་དུ་བདུད་སྤྲུལ་པ༔ བར་བར་བྱུང་ནས་སྔ་འགྱུར་གྱི༔ བསྟན་ལ་སྡང་ཞིང་བར་བར་དུ༔ དམེ་འཁྲུགས་མཚོན་གྱི་ཡོ་ལངས་འགྱེད༔ རྩང་བྲག་སླེ་བའི་བཙན་རྒོད་གཉིས༔ གཏེར་མིན་གཏེར་དགྲ་ཞིག་གིས་ཕྱུང་༔ རྩང་གསེར་གཉིས་སུ་དམེ་འཁྲུག་འགྱེད༔ ཤོ་རི་ཕྲག་ལོག་ཐོག་གིས་བཤིག༔ སྲིན་མོའི་གསེར་རྡོ་རྨ་སྨར་དཀྲུགས༔ དམེ་འཁྲུག་ཡོ་ལངས་བར་བར་འགྱེད༔ ནེ་མ་ཐང་གི་རྒྱལ་འགོང་དེ༔ ལང་གྲོའི་སྤྲུལ་པའི་རྟེན་འབྲེལ་ལོག༔ དེ་ཚེ་དཔེ་འབངས་ཞིག་གིས་ཕུང་༔ ཧོར་ཉག་གྲོང་དགོན་ཐམས་ཅད་དུ༔ འཁྲུག་རྩོད་སྐྱི་སེར་བཞིན་དུ་མང་༔ གསོད་གཅོད་ལས་ཀྱི་མཆོག་ཏུ་འཛིན༔ ཤན་པ་མི་ཡི་དམ་པར་བསྔགས༔ སྤྱང་ཀུ་རྒྱབ་སེར་དྲིལ་ལྟར་བསྟོད༔ བསམ་བརྗོད་ཐམས་ཅད་རྩོད་པ་ཅན༔ དེ་ཚེ་ཡུལ་དེར་ཉེས་སྐྱོན་མང་༔ ཁྲིས་སྟེང་མནན་པའི་ཀླུ་བདུད་ཤོར༔ ནད་དང་མུ་གེ་ལ་ཡོག་འདོར༔ ཕྲག་དོག་འཁྲུགས་རྩོད་འཚུབས་མ་སློང་༔ དེ་ལྟར་བདུད་དང་དམ་སྲི་ཡིས༔ སྤྲུལ་པ་མང་པོས་ས་སྟེང་ཁྱབ༔ བདེ་བའི་སྐབས་ནི་ཉུང་ལ་ལྟོས༔ གྲོང་ལྗོངས་འགའ་ཡི་བདེ་བའི་སྐབས༔ འདོད་ན་ལྷ་ཆེན་དབང་ཕྱུག་ལ༔ བརྟེན་ནས་གསོལ་མཆོད་བྱ་བ་དང་༔ དཔལ་ཆེན་བཀའ་འདུས་དཀྱིལ་འཁོར་ལ༔ བརྟེན་ནས་བྱུར་སྲི་དམ་སྲི་མནན༔ བསོད་ཉམས་ཡུལ་དུས་ཉམས་པ་ལ༔ ཚོགས་བསྐང་མང་བཏང་བསྙེན་གནས་བསྲུང་༔ སྤྱི་བསྲུང་དག་ལ་ཡང་ཡང་བརྩོན༔ ཨོ་རྒྱན་རྗེ་དང་ཕུར་པའི་ལྷ༔ ལྷ་ཆེན་དབང་པོ་དང་བཅས་པ༔ རྩ་བ་གསུམ་དུ་བསྙེན་སྒྲུབ་མཆོད༔ དེ་ཡིས་ཡུལ་ཆགས་བཟློག་སྲིད་ཀྱང་༔ ལས་ངན་སེམས་ཅན་བདུད་དབང་ཆེ༔ བསྒྱུར་ནས་ལྷ་ལ་འདྲེ་རུ་བཟུང་༔ ལོག་ལམ་ཞུགས་པའི་སྐྱེས་བུ་ཀུན༔ ཡེ་ཤེས་ལྷ་ལ་ལྷག་པར་བསྔགས༔ ཕྱོགས་ཀྱི་གྲུབ་མཐའ་འཛིན་པ་ཡིས༔ བདུད་ཀྱི་བསྟན་པ་དབུས་སུ་རྡིབ༔ སངས་རྒྱས་བསྟན་པའི་གསལ་སྒྲོན་ནུབ༔ བསྟན་འགྲོའི་བདེ་བ་སྐྱེད་བྱེད་པའི༔ སྐྱེས་བུ་རྣམ་བཞི་བོད་ཁམས་སུ༔ ཨོ་རྒྱན་ཆེན་པོས་མངག་བྱུང་ཡང་༔ ཡུལ་ཚོ་ཕྲ་མོ་ཙམ་མ་གཏོགས༔ ཀུན་གྱི་ལོག་ལྟའི་གནས་སུ་མཐོང་༔ ཕན་ཐོགས་ནུས་པའང་དེ་ཙམ་མོ༔ བདུད་སྤྲུལ་གཏེར་བརྫུ་མང་པོ་ལ༔ མཆོད་གནས་བཀུར་སྟི་བྱས་ན་ཡང་༔ རང་གཞན་གཉིས་ཕུང་གཞི་ཙམ་ལས༔ ཕན་ཐོགས་ནུས་པ་ཆུ་བསྲུབ་མར༔ བདུད་ཀྱི་སྤྲུལ་པའི་སྐྱེས་བུ་ལ༔ ཕྱི་མའི་དོན་གཉེར་བསྒོམ་སྒྲུབ་མེད༔ ལྟ་སྒོམ་སྤྱོད་པའི་ཟབ་ཁྱད་མེད༔ འཁོར་སློབ་སྨིན་གྲོལ་གདམས་པ་མེད༔ ཕྱིས་ཚུལ་ཆོས་གཟུགས་མཛེས་ཙམ་ལས༔ དམ་པའི་ཆོས་བསྒྲུབ་སྤྱོད་པ་མེད༔ རྙེད་པ་དོན་དུ་གཉེར་ཙམ་ལས༔ བསྟན་དང་འགྲོ་དོན་གཉེར་བ་མེད༔ ཅིས་ཕྱིར་བསྙད་ན་ཆོས་པའི་བདུད༔ དེ་ཕྱིར་ཆོས་པ་དག་གི་ལྟོས༔ ཞང་བློན་ཁྲ་ཡི་མགོ་བོ་ཅན༔ དགྲ་འདུལ་མིང་འཛིན་ནོར་ཉག་འཇོམས༔ སྤྲེལ་མགོ་སྤྱང་དཀར་མིང་བཟུང་ནས༔ ལ་ལུང་མང་པོ་ཁྲག་གིས་བཀང་༔ སྟག་སྣས་ལེགས་གྲུབ་མིང་བཟུང་ནས༔ རྒྱལ་ཁམས་འོ་མཚོ་ཁྲག་གིས་སྦག༔ གཟིག་གདོང་པུརྞེའི་མིང་བཟུང་ནས༔ ཀོ་གཡུ་ཁྲོ་ལ་དུག་ཞིང་རྨོང་༔ མ་བཙུན་བོན་བཟའ་དམར་རྒྱན་མ༔ ཤྲཱི་མིང་འཛིན་མགོན་ཞེས་བརྗོད༔ དེ་དག་ཆུ་བདག་སྒོ་རུ་ཉེས༔ དེ་ཡང་སེ་ཕུང་གླང་དར་མ༔ ཧོར་གྱི་གླིང་ནས་རྒྱལ་བུ་གྲགས༔ ངང་ཁྱུས་རྒྱབ་ཏུ་མྱོས་ཆང་ཕྱུག༔ ལྟོར་སོང་མྱོས་ནས་ཡང་ཡང་འཐབ༔ ཐ་མ་མ་གྲགས་ཁྲོས་འབང་ནས༔ བློན་ཡང་སྟག་སྣ་གཟིག་གདོང་དང་༔ ཁྲ་མགོ་སྤྲེལ་གདོང་རྣམ་པ་བཞི༔ གྲོས་བྱས་དར་མདོའི་བདུད་དར་བསླང་༔ རླུང་ཆེན་དཔལ་གྱིས་དར་ཆེན་སྤྲུགས༔ ནུབ་ཕྱོགས་དུག་གི་རྒྱ་མཚོ་དཀྲུགས༔ ཁ་རླངས་གནམ་དུ་ཕྱུར་བ་ཡིས༔ དགའ་ལྡན་ཉི་མ་སྤྲིན་གྱིས་སྒྲིབ༔ ཆོས་སྡེར་རོ་ལྷའི་ནགས་ཚལ་གྱི༔ ད་དུང་བདུད་ཀྱི་རྒྱལ་བློན་གྱིས༔ ཀི་བསྭོའི་འབྲུག་སྒྲ་ཆེར་བསྒྲགས་ནས༔ སེར་ཆེན་ལ་ལུང་མང་དུ་བབ༔ དབུས་ཀྱི་ལས་ངན་སྤྱོད་པ་ཡང་༔ གོ་ཡུལ་སེང་ཁོག་སྤྲིན་གྱི་འགོང་༔ བོད་ཁམས་གཉིས་སུ་འཁྲུགས་རྩོད་སློང་༔ གསེར་སྨད་ས་ཆར་གནམ་སའི་ཐེའུ༔ གཉིས་བརྡུང་དམེ་འཁྲུག་ལས་ལ་བརྩོན༔ གཡུ་རྩང་ལུང་པར་ཆུ་ཀླུང་འདྲེན༔ རྩི་ཤིང་མང་པོའི་རྩ་བ་ཕུད༔ རྒྱལ་རྗེ་མེ་ཡི་ཐོ་ལུམ་འབབ༔ འཇག་སྐྱའི་ཕུང་པོ་མེ་རུ་བསྲེག༔ གཞན་ཡང་ཡུལ་གྱི་ལེགས་ཉེས་ལ༔ ཚད་ཀྱིས་བཏབ་ན་བསམ་མི་ཁྱབ༔ ཅིས་ཕྱིར་བསྙད་ན་དགོས་ཆེད་ཕྱིར༔ ད་ནི་ཡང་ཅིག་ཁྱོད་འོང་དོན༔ ཟུར་ཙམ་བཤད་ཀྱིས་ཉོན་ལ་ཟུངས༔ བཙན་རྒོད་སྲོག་ལེན་རཀྴ་འདི༔ ཕ་ནི་ཀླུ་བདུད་ཉ་གཞོན་ཡིན༔ མ་ནི་ཐེའུ་བྲང་སྨན་གྱི་རིགས༔ མྱེས་པོ་རྡོ་ཐེ་ཤ་ཟན་གྱིས༔ ལོག་པའི་སྨོན་ལམ་མཐུ་ལས་སྐྱེས༔ ད་ཆུང་ཡང་རྒྱུད་སྐྱེས་བུ་ལ༔ བདུད་ཕོ་ཧ་ལ་མེ་འབར་ཡོད༔ ལག་གཡས་སྨན་གུ་ཐིག་པ་ཤར༔ ལས་ཀ་འཁྲུགས་དང་རྩོད་ལ་འགྱེད༔ སྡོང་ཟླ་ཐེ་བྲང་དང་བསྡོང་ནས༔ ལ་ལུང་གཉིས་ལ་ཁྲག་གིས་བག༔ སྡོང་ཟླ་རཀྴའི་བྱས་པ་ན༔ བྱ་ཆེན་གསུམ་ལ་རེ་ཐུལ་བསྒོ༔ གཉེན་གྱི་གྲོགས་དང་བསྡོང་བའི་ཚེ༔ སྦལ་ནག་མགོ་དགུའི་ཤ་ལ་གསུམ༔ མ་སྨན་དབང་དུ་འདུ་བའི་ཚེ༔ ཡིབ་ཅིང་བྱ་རོག་འུག་པ་རྩེ༔ འགོང་པོ་མུ་ཏོ་དབྱེན་དུ་ལང་༔ བྲག་བྱའི་ལུས་ལ་ལྕགས་བྱ་འབབས༔ སེར་གྲིའི་ཁ་ཏོག་བྱི་རུས་བསྒྱུར༔ ཡུལ་གྱི་འདབ་ཆགས་འུར་མ་འུར༔ བདུད་བྱ་རོག་པོའི་རྡོ་བཙན་འཛིན༔ ཁྲོ་ཆུས་རྦ་རླབས་མཁའ་ལ་བབ༔ དུག་གི་སེར་བ་ཆེན་པོ་འཇོམས༔ སླར་ཡང་མི་ཡི་གླག་མོ་མངོན༔ གླག་སྐད་ཆེར་སྒྲོགས་བདུད་བྱ་བསླང་༔ ཤ་ཟན་འདབ་ཆགས་སྡེ་དང་བཅས༔ ཨ་ཕྱི་ཆེན་མོའི་མཁའ་ལ་བབ༔ སྲིན་བྱ་ཧོར་པ་ལྔ་ཡིས་མཐོང་༔ དེ་ཕྱིར་དེ་ཡི་གྲོགས་བྱས་ནས༔ ས་མིག་གསུམ་གྱི་ཀླུ་གཉན་འཇོམས༔ དེ་ནི་ནག་པོའི་ལས་ཀའི་ལན༔ དབང་ཕྱུག་ཆེན་པོས་མ་བཟློག་ན༔ གནམ་ལྕགས་སྐྱིན་ཐང་ལན་བཞིར་འབེབས༔ དེ་ཕྱིར་དེ་ལ་སྐྱབས་ན་ལེགས༔ ལྷ་ཆེན་མ་ཧཱ་དཱེ་ཝ་ནི༔ ལྷ་ཡི་མགོན་ཏེ་ལྷ་ཡི་བདུད༔ དེ་ཕྱིར་ལྷ་སྲིན་བསྟན་པའི་ཆ༔ ནག་པོ་ཀླ་ཀློའི་མགོ་འཕང་གནོན༔ སྐྱེ་འགྲོ་ལས་ངན་སྤྱོད་པ་ལ༔ བཀའ་སྲུང་གཞན་གྱི་སུན་ཅིང་གཡེལ༔ འདི་ནི་འདོད་ཁམས་དབང་ཕྱུག་ཆེ༔ ཀུན་གྱི་ངོ་བོར་གནས་པའི་ཕྱིར༔ སྒྲུབ་ན་བསམ་པའི་དོན་ཀུན་འགྲུབ༔ ལྔ་བརྒྱའི་སེམས་ཅན་བསོད་ནམས་དམན༔ ནོར་དབུལ་ཁེ་ཉན་འཁྲུགས་འགྱེད་མང་༔ དེ་ཚེ་དབང་ཕྱུག་ལ་བརྟེན་ན༔ ལོངས་སྤྱོད་འཕེལ་ཞིང་ཁ་ཡང་གྲགས༔ ཕ་རོལ་རྒོལ་བ་ཟིལ་གནོན་བྱེད༔ དེ་ཕྱིར་དེ་ལ་བརྟེན་ན་ལེགས༔ སྙིགས་མ་ལྔ་ཡི་དུས་འདི་ལ༔ ཕྲིན་ལས་ལྷ་ཡི་ནུས་པ་མྱུར༔ དེ་ཕྱིར་ཕུར་པ་བསྒྲུབ་ན་ལེགས༔ མི་སྲིན་ཚོགས་ཀྱི་ཚོམ་འདི་ལ༔ བཙན་ཕྱུག་འཕན་གཡང་འདུ་བའི་ཕྱིར༔ དབང་ཆེན་སྟོབས་ཀྱི་རྒྱལ་པོ་བརྟེན༔ མ་སྲོག་དགྲ་ལ་མི་ཤོར་ཕྱིར༔ ལྷ་མགོན་མ་ཧཱ་ཀཱ་ལ་བརྟེན༔ འདྲེ་སྲིན་གདུག་པ་འདུལ་བའི་ཕྱིར༔ རྡོ་རྗེ་ཕུར་པ་ལ་བརྟེན་ནས༔ བྱུར་སྲི་མནན་པ་ཡང་ཡང་བསྐྱལ༔ རྒྱལ་མཚན་དཔུང་རྒྱན་དར་ཕྱར་དང་༔ རྣམ་རྒྱལ་རྣམ་གསུམ་ཀློག་འདོན་ནི༔ ལོ་བཞིན་བྱས་ན་མཆོག་ཏུ་བཟང་༔ འཁྲུགས་མཁོན་བསྡུམ་པ་ཁྲོ་ཡི་མཆོག༔ དེ་འདུམ་སྔར་གྱི་མི་གཉིས་པོའི༔ ངག་བཞིན་བྱས་ན་ཉེས་པ་མེད༔ རིང་ནས་འབྱུང་བའི་ས་འཛིན་དེར༔ ཕུང་བདུད་འོག་ནས་ལང་བའི་ཚེ༔ ཐལ་ཚོམ་རླུང་གིས་གཏོར་བཞིན་འགྲོ༔ དེ་ཚེ་རང་སར་འཁོད་ཀྱང་ལེགས༔ དེ་བར་ལི་རྩང་གསེར་ལ་ཆགས༔ གཞན་ལ་ཤོར་སྒོ་མི་འབྱུང་ཆེད༔ གཡང་དཀར་མཇུག་མ་འགུལ་བའི་ཚེ༔ རྒྱ་སྟག་ཁྲ་བོས་འཕུར་ཐབས་བྱེད༔ ཨ་བསེས་ལྕགས་མཁར་ནག་པོས་བཟུངས༔ སེང་གེ་དཀར་མོའི་དཔའ་ཟིལ་གྱོན༔ སྟག་ཕྲུག་དག་གི་མགོན་ལ་ཆེ༔ ཕྱི་ལ་འགྱིང་ཞིང་ང་རོ་འདོན༔ དགྲ་ཡི་ཡུལ་དུ་གསུམ་ཁ་འབྱེད༔ དེ་ཡང་རིམ་གྲོས་སྟོབས་བྲན་ཡང་༔ གླང་བུས་རྭ་བརྡར་བྱེད་ཚེ་སྡང་༔ དགེ་བཙུན་ཚོགས་ཀྱི་ཚོམ་འདུས་ནས༔ ལོ་བཞིན་ཟླ་བ་རེ་རེ་ལ༔ སྒྲུབ་པའི་དམ་རྒྱ་བྱས་པ་ན༔ རྗེ་དང་འབངས་འཁོར་བཅས་པ་ཡི༔ བཙན་ཕྱུག་དགེ་ལེགས་གོང་འཕེལ་ནས༔ སྟོང་དང་འཇིག་ཆགས་འབྱུང་མི་འགྱུར༔ རིམ་གྲོ་གང་གིས་འགྲན་ཟླ་མེད༔ བསྒྲུབ་པའི་ལྷ་ནི་གོང་དུ་སྨོས་ཟིན་ཏོ༔ མི་དཔོན་འབངས་དང་བརྟེན་ལྷ་དེ༔ མཆོད་གསོལ་ལོ་བཞིན་ཆག་མེད་བརྩོན་གྱུར་ན༔ མི་ནོར་ལོངས་སྤྱོད་དགེ་ལེགས་གོང་འཕེལ་བྱེད༔ ཅེས་དང་གཤེགས་པའི་གླུ་དབྱངས་རྫོགས་སོ༔ ཆོས་ཉིད་ནམ་མཁའི་མཛོད་ཀྱི་དབྱིངས་ལ་ཐིམ༔ ཁྲག་འཐུང་བདུད་འཇོམས་རྡོ་རྗེའི་སྣང་ཉམས་སོ།།དགེའོ།།སརྦ་མངྒ་ལཾ།།།།